\id GAL - Buglere NT -Panama 2008 (DBL -2013) 
\h GÁLATAS 
\toc1 Pablo Nu Chada Degaba Kwian Chubenu Nga Kweri Galaciamu Alin 
\toc2 Gálatas 
\toc3 Ga 
\mt1 Pablo Nu Chada Degaba Kwian Chubenu Nga Kweri Galaciamu Alin 
\mt2 Carta de Pablo a los Gálatas 
\ip Pablo chada ai degangu kwian Jesucristo gerua ganga toinga una kaire kairege nga kweri kada Galaciage alin, kwian nga Galaciamu me israelita. Pablo nu chageba una tanrege nga Galaciage Chube gerua Jesucristo giti kete kwian nga emu ulitage Pablo kwian e ulita tku tangle Jesucristo gai ulia mo tale giti kwian chege no trate me jiske Chube gwa giti. Pablo kwian tku tangle ene gire kwian nga Galaciamu tanre geru Jesucristo giti gau ulia mo tale Pablo giti. 
\ip Agwa Pablo jo nga nage gire kwian israelita na gweale jo chke Pablo nate kwian nga Galaciamu tke tangle geru ngwalege, ama gerudu kwian nga Galaciamu kwian israelita suia jwandale agedale ulita Moisés chadalla unsuialin gerule kare, ene ama chege no trate me jiske Chube gwa giti. Kwian gerudu ene ngwale kwian nga Galaciamu ole. 
\ip Pabloge geru e ulita chku uñale kwian na kle kwian Chubenu nga Galaciamu anblite geru ngwalege gire Pablo chada ai degangu kwian Chubenu ulita nga Galaciamu ta gbagda me mo chuge ngwadi mo anblitange geru ngwalege. 
\c 1  
\s1 Pablo gbi kage chada giti kwian nga Galaciamu alin 
\p  
\v 1-2 Cha Pablo chada ai degange ba ulita nga kweri Galaciage Jesucristo gaba ulia alin: 
\p Cha Jesucristo gerua ketanga, che salengwli me cha gau, che salengwli me cha gbu Jesucristo gerua ketangale. Chube che Ñenua Jesucristo jaba gbuni gwade, Jesucristo e amaña ule Chube ole cha gbu geru amanu ketadale kwiange. Daba Jesucristo gaba ngle kle aini cha ole, cha ule ama ulita ole gbi kage ba Jesucristo gaba ulita alin bai kle toi una kaire kairege kle mo lite Jesucristo geruadi nga kweri Galaciage.  
\v 3 Cha ulita takalin Chube che Ñenua kaire Jesucristo che Chugagwalla age no no ba ulita alin kle toi una kaire kairege nga Galaciage, kaire ama ba ulita ta gbe suga no.  
\v 4 Jesucristo mo ketu gwaleda che agedu me no giti, ene che me ji chuge che agedu me no gdale. Nege che Chubenu, che Chube uñe, che me chegedale age me no dare kwian me Chube uñeske kwian ulita me Chube uñe kle age kare. Jesucristo agedu che alin Chube che Ñenua takalin kare.  
\v 5 Che ulita gerudale no Chube giti chui tangle. Ene nobi Chube alin. 
\s1 Pablo kwian Cristo gaba ta gbe tachke naskuni 
\s1 geru ulia Cristo giti 
\p  
\v 6 Me suge chage mineade ba ulita kle mo ta gbe joge siere blike Chubege, Chube ba gau mau alin Cristo giti, Cristo agedu no ba ulita alin. Cristo alin giti ba ñage tien gitiru ji chugege ba agedu me no gdale, ¿mineade ba kle mo ta gbe geru na nganake Cristo gitige gai?  
\v 7-8 Cha gerudu ulia ba ulita ole no Cristo giti, geru ulia na me. Kwian gweale na kle ba tke tangle me cha ba tku tangle kare Cristo giti, kwian ene kle ba ulita ta gbe tañachuge nganake geru ulia Cristo gitige, ama ta geru ulia Cristo giti blitakalin nganake. Kwian na gweale geru Cristo giti trage nganake ba ole cha gerudu giti ba ole, kwian ene ulita chege ji chugadale sugekare Chubege. Cha agali o lle boanga Chube alin nga ngaña giti geru Cristo giti ulia blite nganake kwian ole kaire be chege ji chugadale sugekare Chubege.  
\v 9 Ba ulita geru ulia Jesucristo giti keruchugu, ba geru e gau ulia. Cha gerudu kare ba ole ngeru nege cha gerule nakwaite, kwian bai kaire kle geru na me ulia Jesucristo giti trage ba ole ama be chege ji chugadale sugekare Chubege. 
\p  
\v 10 Cha me kle kwian kerua manade gerule no cha age no giti, cha ta agekalin Chube takalin kare. Cha mo ta gbe age kwian takalin kare ene cha me kle age Chube takalin kare, ene cha me lle boanga no Cristo alin ulia. 
\s1 Pablo chada degange mau giti Chube Pablo gbu Jesucristo gerua ketangale 
\p  
\v 11 Cha takalin chke uñale ba ulita cha daballa cha ibotea Jesucristo gitige, geru ulia Jesucristo giti cha kle trage kwian ole geru e me kwian talla ni kwian tañachuge kare, geru e me chiu kwian gweale tale.  
\v 12 Kwian gweale me geru e ketu chage dbale kwian nage ni cha geru e jun kwian gwealege, Jesucristo agali cha ta gbu geru ulia amanuge, ama cha ta gbu geru amanu uñe.  
\v 13 Ba geru keruchugu cha giti ngeru cha bebi Cristo gai ulia cha kwian mine, ngeru cha chagedu cha bitalla israelita kle age kare suiage, e suiale cha mo ta gbu chage me no kwian ulita Cristo gerua gaba ulia dollale, cha tadu kwian ulita Cristo gerua gaba gwakalinda ene geru Jesucristo giti me chage dare.  
\v 14 Cha bitalla israelita suia giti cha geru e uñu ma no trate cha tigemanalla ulitage, cha mo ta gbu diali cha enusulian unsuialin suia ulita manade no, cha tañachugu geru e alin giti diali, cha tañachugu geru e ma no geru na ulitage.  
\v 15 Cha bebi menga cha chebia kote gire ngeru Chube cha gau mau alin, Chube mo ta gbu no cha ole ngeru, malen ama cha gau geru Jesucristo giti tragadale kwian ole. Cha tigedu cha tañachugu cha enusulian israelita alin suia giti,  
\v 16 agwa Chube tadukalin cha ama uñe ulia gire ama cha ta gbu ama Kirolla uñe ene cha geru ama Kirolla giti tragadale ba kwian me israelita ulita ole. Chube cha ta gbu ene ulita no ama Kirolla giti gire cha me jo geru kade Jesucristo giti kwian gwealege,  
\v 17 ni cha jo una Jerusalénge blike geru kade kwian Jesucristo gerua ketanga ngeruge, cha cheguda una Damascoge sugeti alin tañachuge ulita Jesucristo gerudu giti cha ole gire cha jo nga kweri Arabiage gire cha chiuni una Damascoge.  
\v 18 Cha Jesucristo uñu chura gdamaige gire cha jo una Jerusalénge tienda Pedrodi, cha chegu Pedro ole semana boke.  
\v 19 Cha kledu una Jerusalénge Pedro ole gire cha gwagedu Santiago che Chugagwalla Jesucristo daballa alindi, agwa cha me su gwage kwian Jesucristo gerua ketanga nadi.  
\v 20 Cha kle chada ai degange kare ba alin cha me kle sole, uñale Chubege cha kle gerule ulia ba ulita ole. 
\p  
\v 21 Cha kledu una Jerusalénge, gire cha jo geru Jesucristo giti dbe nga kweri Siriage kaire nga kweri Ciliciage.  
\v 22 Kwian Cristo gerua ganga nga ege gwagedu chadi mo gwagwa giti, agwa kwian Cristo gerua ganga kle mo lite Jesucristo geruadi una kaire kaire nga kweri Judeage me gwagedu chadi mo gwagwa giti,  
\v 23 ama ulita geru cha giti keruchugu alin allabi, geru ai chku ama ulita ologe: “Ngeru ama chagedu che kwian Cristo gerua ganga nate che gadale gwadaleda Jesucristo gerua gdale, ene ama tañachugu geru Jesucristo giti me jriennga dare, ama agenga ene ngeru, nege ama kle gerule kwian ulita ole kwian mo ta gbale Jesucristo gerua gai ulia.”  
\v 24 Kwian Cristo gerua ganga ulita nga Judeage geru e keruchugu cha giti gire nga sugedu no amadi, ama ulita gerudu no Chube giti Chube agedu giti cha ole. 
\c 2  
\s1 Pablo mo lite kwian Jesucristo gaba 
\s1 una Jerusalénmu chugagwalla ole 
\p  
\v 1 Chura gdataboko giti gdabaga cha chagedu geru Jesucristo giti dbe nga Siriage nga Ciliciage gire cha joni una Jerusalénge nabitaite, Bernabé kaire Tito jo ule cha ole.  
\v 2 Chube cha ta gbu jogeni una Jerusalénge, cha jo chkeni una ege gire cha mo litu kwian Jesucristo gaba una emu chugagwalla ulita ole. Cha kle geru Jesucristo giti dbe mine kwian me israelitaske, cha geru e tragu ulita chugagwalla ulita ole gire chugagwallage chku giti nobi cha kle geru dbe kwian me israelitaske. Cha gerudu ene chugagwalla ole ene chkedale uñale chugagwallage cha kledu geru dbe giti, ene chugagwalla me kwian ta gbe geru dollale. Cha me geru e tragu chugagwalla ole chugagwalla ñadu kwian ta gbe geru dollale, ene cha kledu geru dbe giti ulita chege ngwale.  
\v 3 Tito kledu cha ole chugagwalla ngwadi, chugagwalla gwagedu Titodi Tito me kwian israelita Tito kwian griego, chugagwalla me ama gbu mo kwara tkangenga sidri kwian israelita suia kle age kare, chugagwallage uñale age ene e ngwale.  
\v 4 Cha kledu mo litaba kwian Jesucristo gaba chugagwalla ulita ole gire kwian gweale ta boke ole chku mau tale cha ulitaske. Kwian e ta me no, ama me no Chube gerua ulia ole, ama gerudu ama Chubenu, agwa me ene ulia. Ta me no ole ama tadu cha ulita keruchugakalin gerule Jesucristo giti, uñadu amage cha kledu gerule Jesucristo alin giti kwian chege Chubenu, me Moisés nu Chube gerua degaba unsuialin kwian israelita alin giti kwian chege Chubenu. Kwian e me no geru Jesucristo alin giti ole, ama tadu cha ulita gbakalin naskuni chage diali Moisés chadalla ulita gerule kare.  
\v 5 Cha ulita me kwian e chugu ngwadi gerule tanre ama takalin kare cha agedale, ama me kledu tañachuge trate ama gerudu kare, cha mo ta du geru ulia Jesucristo giti manade no trate ketadale ba ulitage. 
\p  
\v 6-7 Kwian Jesucristo ganga ulia mo salengwli gai mo chugagwallale, chugagwalla e ulita kweri kwian ulita gwa giti, agwa cha me tañachuge e giti, Chube gwa giti kwian ulita salengwli, chugagwalla e ulita cha keruchugu gerule geru Jesucristo giti dbe kwianske giti, sugedu amage cha kledu gerule ulita giti trate, ama me geru na ketu chage tragadale kwian na ole. Sugedu trate kwian Jesucristo ganga ulia chugagwalla ulitage Chube cha gau geru Jesucristo giti dbale kwian me israelitaske Chube Pedro gau kare geru Jesucristo giti dbale kwian israelitaske.  
\v 8 Chube Pedro gau ta gbu kagu Jesucristo gerua ketangale kwian israelitaske, kaire Chube cha gau, Chube cha ta gbu, Chube cha kagu Jesucristo gerua ketangale ba kwian me israelitaske.  
\v 9 Santiago kaire Pedro kaire Juan ama gdamai kwian Jesucristo ganga ulia una Jerusalénmu ulita chugagwalla ma kweri, chugagwalla gdamai ege sugedu trate Chube agedu no cha alin Chube cha gau geru Jesucristo giti dbe, malen ama ko ketu chage kaire Bernabége, ene chku uñale chage ama mo ta gbu lle boi salengwli ule Chube alin geru amaña giti, Santiago kaire Pedro kaire Juan geru Jesucristo giti dbanga kwian israelitaske, cha kaire Bernabé geru Jesucristo giti dbanga ba kwian me israelitaske.  
\v 10 Santiago, Pedro, Juan cha ta gbu lle gdaitre alin giti, ama gerudu cha ole cha me ta jogedalenga daba Jesucristo ganga ulia me lle molen chudaboi, e uñale chage cha agedale ene, diali cha kle mo ta gbe age ene daba Jesucristo ganga ulia me lle molen alin, e me jagere cha alin. 
\s1 Pablo ka boi Pedro ole 
\p  
\v 11 Chui gbaite Pedro jo chke una Antioquíage, cha kledu una ege, cha gwage Pedro kle age kare me kle age no una ege, malen cha ka bo mno ama ole agali kle age giti gdale.  
\v 12 Ama agedu ai kare una Antioquíage: Ngeru ama jo chke kwian me israelita Jesucristo gaba ngwadi ama blidu kwian me israelita Jesucristo gaba ulia ole ule chuia kaire kaire, gire Santiago kwian israelita mneite Jesucristo gaba kagu una Antioquíage, daba e ulita jo chke una ege gire Pedro kwachiu blire dare ule kwian me israelitaske bitalla israelita ngeru. Pedro me takalin suge daba ege ama kle blire kwian me israelita Jesucristo gaba ole ule, uñadu Pedroge daba e kle gerule kwian Jesucristo gaba me israelita ulita mo kwara tkadalenga sidri kwian israelita kle age kare ene kwian me israelita chege kwian Chubenu ulia. Malen Pedroge me chegu no chege blire ule kwian Jesucristo gaba me israelita ole, Pedro mo gbu sugekare daba Jesucristo gaba me israelitage.  
\v 13 Pedro agedu ene me no ta boke ole gire kwian israelita Jesucristo gaba na ulita una ege gwagedu Pedrodi age ene, gire ama ulita mo ta gbu age Pedro agedu kare, ene kaire Bernabé gwagedu ama ulitadi gire Bernabé mo ta blitu salengwli age ama ulita agedu kare.  
\v 14 Cha gwagedu Pedrodi kaire kwian israelita Jesucristo gaba na ulitadi age ene ama me kledu age trate geru ulia Jesucristo giti gerule kare, malen cha ka bo Pedro ole kwian Jesucristo gaba ulita gwa giti, cha gerudu Pedro ole: “Ba kwian israelita, agwa Jesucristo giti ba me age ulita diali kwian israelita kare, ba toidu kwian me israelita kare kwian me israelitaske, ¿mineade nege ba ta kwian me israelita gbakalin age Moisés chadalla gerule kare kwian israelita ulita kle age kare?  
\v 15 Che agali kwian israelita chudalla ñenu giti chebi giti, che me kwian me israelita chudalla, ama ulita me kle chage Moisés nu Chube gerua degaba unsuialin gerule kare.  
\v 16 Che kwian israelita ulia, che Moisés nu Chube gerua degaba gai dage, agwa chku uñale chege trate che age ulita Moisés nu Chube gerua degaba gerule kare e giti che me ña tien gitiru ji chuge che agedu me no gdale, e giti Chube me gwage chedi che no trate. Chku uñale chege Jesucristo alin giti allabi ama gai ulia mo tale e giti alin che chege sugekare ji chugege che agedu me no gdale ene Chube gwage chedi che no trate. Che agali Jesucristo gau ulia mo tale, e alin giti che chege sugekare ji chugege che agedu me no gdale ene Chube gwage chedi che no trate, me che age Moisés nu Chube gerua degaba gerule kare giti Chube gwage chedi che no trate, age geru e gerule kare giti ni kwian gdaite ña tien gitiru ji chugege ama agedu me no gdale.  
\v 17 Che Cristo gau ulia, sugedu chege Cristo alin giti che no trate Chube gwa giti, gire kwian israelita kle Moisés chadalla alin gai ulia ama gwage che jiske che agenga me no kwian me israelita ulita kare. Ene ulia gire kwian ñage tañachuge Cristo che gbanga age me no ama che ta blitu ama gai ulia gire che Moisés chadalla chugu ngwadi. Agwa me ene ulia kwian tañachuge kare.  
\v 18 Cha Moisés chadalla gerule kare chugu ngwadi, cha agali geru e amaña gai naskuni cha age ene cha be chege jiske Chube gwa giti.  
\v 19 Cha kledu Moisés chadalla alin gai gire sugedu chage cha me ñadu age no ulita Chube takalin kare, ene Chube gwa giti cha me no trate. Malen cha Moisés chadalla chugu ngwadi cha mo ta gbu Jesucristo gerua gai toi Chube alin.  
\v 20 Nege cha kle Chube Kirolla Jesucristo gai ulia mo tale diali, Cristo no cha ole, ama agedu no cha alin, ama mo chugu ngwadi jogeda cha agedu me no giti, ama jokeda kruge cha alin suge chage cha jokeda ule ama ole kare, nege cha me kle chage age me no diali cha chagedu ngeru kare, nege cha kle chage age Cristo takalin kare, Cristo cha Chugagwalla.  
\v 21 Chube agedu no cha alin Cristo giti cha gai ulia no, Chube agedu giti cha me gai ngwale. Che tañachuge che Moisés alin chadalla gadale e giti alin che chege sugekare ji chugege che agedu me no gdale, che geru e alin gai dage che me Cristo gai mo alin, ene ama chiu nga dba ai giti ngwale, ngwale ama jokeda.” Cha ka bo ene ulita Pedro ole kwian Jesucristo gaba ulita gwa giti. 
\c 3  
\s1 Kwian chege Chubenu Jesucristo alin gai ulia giti, 
\s1 me age Moisés chadalla gerule kare giti 
\p  
\v 1 Ba ulita nga Galaciamu, nga ngwale ba chuga giti, ba me ta molen. ¿Chema nga blitunga ba chuga giti ba ta gbe tañachuge nganake geru uliage? Ba ulita ole cha geru Jesucristo jo gbaba kruge giti tragu trate, geru Jesucristo giti sugedu ba ulitage, ba geru e gau ulia.  
\v 2 Cha geru kadakalin ai kare bage, ba ulita kledu Moisés chadalla alin gai dage, ¿Chube Oña chku ba tale geru e giti? ¿O ba geru Jesucristonu keruchugu ba geru gau ulia gire e giti Chube Oña chku ba tale? ¿Ba tañachuge geru bai giti Chube Oña chku ba tale?  
\v 3 Ba ulita me ta molen ulia ulia. Ngeru Chube Oña chku ba tale gire ba ama chugu ngwadi ba ta gbe age Chube takalin kare, agwa nege ba mo ta blitu chage Moisés chadalla gerule kare age ulita agali mo kiralla giti, ene ba kle tañachuge ba ñage age ulita diali no Chube gwa giti.  
\v 4 Ngeru sugedu ba ulitage Chube Oña kledu age tanre no ba tale, ¿nege ba kle tañachuge e ngwale? ¡Me ngwale ama agedu ba ulita alin!  
\v 5 Chube mo Oña gbe ba ulita tale, Chube Oña kle age tanre no ba tale, ba ta me nge kare, ¿mineade Chube Oña kle age ene ba ulita alin? E me kle gerule ba ulita kle Moisés chadalla gai age Moisés chadalla kle gerule kare e giti Chube Oña kle age. ¡Me ene! Ba ulita geru Jesucristo giti keruchugu, ba geru e gau ulia, e giti Chube Oña chku ba ulita tale. 
\p  
\v 6 Cha ta ba ta gbakalin tañachuge Abraham giti Abraham mo ta gbu mine Chube ole, Abraham Chube alin gau ulia mo tale, e alin giti Chube gwagedu Abrahamdi Abraham no trate.  
\v 7 Chkedale uñale ba ulitage kwian bai mo ta gbe Chube alin gai ulia mo tale kwian ene alin allabi Abraham oindalla ulia.  
\v 8 Uñadu ngeru ulita Chubege ama be age mine kwian ulita alin, Chube gerua degaba unsuialin gerule e giti. Chada e gerule kwian ulita me israelita bai kaire be Chube alin gai ulia mo tale kwian ene be chege trate Chube gwage, Chube be kwian ene jwen siere ji chugege kwian agedu me no gdale. Chube gerudu Abraham ole Chube be age giti kwian ulita alin, Chube gerudu: 
\q1 “Kwian ulita kle toi nga dba dbi ai giti batre cha be age no ama alin ba giti.” 
\m Chube gerua degaba unsuialin gerule ene.  
\v 9 Abraham Chube alin gau ulia mo tale gire Chube agedu no ama alin, ene kaire kwian ulita bai kaire Chube alin gai ulia mo tale Abraham kare Chube be age no ama alin Chube agedu no Abraham alin kare.  
\v 10 Kwian mo ta gbe Moisés chadalla alin gai dage age chada e alin gerule kare ene kwian tañachuge ama no trate Chube gwage, agwa kwian me ñage age no trate ulita, e giti kwian chege jiske Chube gwage. Chube gerua degaba unsuialin gerule: 
\q1 “Kwian ulita bai kaire me chege diali age no trate ulita Moisés chadalla gerule kare, kwian age sidri me no geru e dollale kwian ene chege jiske Chube gwage.” 
\m  
\v 11 Uñale chege trate kwian gdaite me ñage chege sugekare ji chugege ama agedu me no gdale age Moisés chadalla alin gerule kare giti, Chube gwage Moisés chadalla giti kwian me chege no trate. Chube gerua degaba unsuialin gerule: 
\q1 “Kwian bai kaire Chube alin gai ulia mo tale kwian ene chege no trate Chube gwage, kwian ene be toi Chube ole.” 
\m  
\v 12 Moisés chadalla me gerule kwian mo ta gbale Chube gai mine mo tale, Moisés chadalla gerule alin: 
\q1 “Bai kaire age ulita chada Moisénu gerule kare kwian ene chege no trate Chube gwage, kwian ene be toi Chube ole.” 
\m  
\v 13 Moisés chadalla gerule ene, agwa che gdaite me ñage age ulita no trate diali Moisés chadalla gerule kare, malen che ulita chege jiske Chube gwage che agedu me no giti gdale. Cristo jokeda kruge che ulita alin, e giti Cristo che jun siere ji chugege che agedu me no gdale, Cristo agedu giti che alin che me chege jiske dare Chube gwage. Cristo kledu kruge ngaña gire Chube gwagedu amadi kwian jiskenga kare che agedu me no ulita giti, Chube gerua degaba unsuialin gerule e giti, chada e gerule: 
\q1 “Kwian bai kaire ulita jiske jogedaleda ngaña glige ama jiske Chube gwage.” 
\m  
\v 14 Jesucristo ji chugu che giti ama jokeda gli dodaba krulege ngaña che giti, ene Jesucristo giti Chube agedu no kwian alin, me kwian israelita alin allabi, agwa kwian me israelita alin kaire. Chube gerudu kare Abraham ole unsuialin, ene kaire che Jesucristo gai ulia mo tale Chube mo Oña gbe che tale ama gerudu kare sbali. 
\s1 Pablo chada degange Chube gerudu Abraham ole giti 
\p  
\v 15 Ba daba Jesucristo gaba onbre muire ole ulita cha gerule, kwian kle mo ta gbe kare kwian na alin chudaboale age ai kare: Kwian gdaite be mo ta gbe age kwian gdaite na alin ama mo ka gbe chada giti, ene mi jogenga ama gerudu be age giti, chada e kwian na me ñage jwennga ni ñage na gbe giti dare, me ña blite nganake.  
\v 16 Ene kaire Chube agedu Abraham ole, Chube gerudu Abraham oindallaske Chube be kwian gdaite gbe, Chube gerua degaba unsuialin me kle gerule oindalla ulita giti, agwa kle gerule oindalla gdaitre alin giti, e Cristo.  
\v 17 Cha takalin suge ba ulitage cha kle gerule giti, Chube gerudu Chube be age no Abraham alin gire Chube gerudu Abraham ole: “Cha be age ulia cha gerudu kare ba ole.” E ene ngeru Chube gerudu Abraham ole, chura ngle cuatrocientos treinta jo tangle gire Chube Moisés ta gbu geru gbe kwian israelita ulita alin, geru e nate Chube gerudu giti Abraham ole, geru e Moisés degu kwian israelita alin me ñage Chube gerudu ngeru Abraham ole jwennga mlienga.  
\v 18 Kwian bai kaire kle tañachuge Chube kle age no kwian alin kwian kle Moisés chadalla gai dage alin giti, e me ulia, kwian ene me kle tañachuge no. Chube kle age no kwian alin Cristo alin giti, ngeru Moisés chadallage Chube agali gerudu no Abraham ole Chube be age no kwian ulita alin Chube takalin kare, Abraham oindallaske Chube be gdaite gbe kwian ulita alin, e Cristo. Chube agedu ene ulia ama gerudu kare, e sugekare Moisés chadallage.  
\v 19 E ulia che ña chege tañachuge ai kare Moisés chadalla giti: “¿Lledale Chube Moisés ta gbu chada dege kwian alin? ¿Chada e ngwale?” ¡Me dale! Chada e no kwian ta gbagda kwian kle age me no giti, Abraham oindallaske Cristo bebi chke kwian ta gbe Chube takalin kare gire Moisés chadalla kwian ta gbu suge ama chagedale mine Chube takalin kare, kaire chada e giti sugedu kwiange ama kle age mine me no Chube gwage. Chube geru e ketu lle boanga mau alin nga ngaña giti ketale Moisége gire Moisés geru e degu jigale kwian alin.  
\v 20 Agwa Chube agali geru ketu Abrahamge Abraham oindallaske Chube be gdaite gbe kwian ulita alin. Chube me geru e kagu lle boanga mo alin nga ngaña giti ole ni kwian na ole Abraham alin, Chube agali geru e ketu Abrahamge.  
\v 21-22 E ulita me kle gerule Moisés nu Chube gerua degaba gerule Chube gerua Cristo giti dollale. Chube gerua degaba unsuialin gerule kwian ulita giti kwian ulita agenga me no, kwian gballa me ñage mo ta blite joge siere age me noge. Chagé Moisés nu Chube gerua degaba alin gerule kare kwian me ñage joge siere age me noge. Agwa Cristo alin giti kwian ñage joge siere age me noge mo ta gbe age no Chube takalin kare. Chube gerudu ama be Cristo kage kwian ulita alin, kwian bai kaire Jesucristo gai ulia Jesucristo kwian ene jwen siere ji chugege age me no gdale.  
\v 23 Ngeru chagé Moisés chadalla alin ole che ulita me ñadu mo ta blite joge siere age me noge, e suiale Chube bebi Cristo kage che alin, bebi chke uñale chege Cristo gai.  
\v 24-25 Ngeru Moisés chadalla giti sugedu chege sidri che chagedale mine Chube takalin kare, chada e che chudabo chage sidri no. Nege che me tañachugadale chage Moisés chadalla alin ole, Cristo chku, che ama gau ulia, nege Cristo alin giti che chage ma no trate Chube gwage.  
\v 26 Ba ulita Jesucristo gau ulia mo tale, e giti ba ulita chege Chube oliale.  
\v 27 Ba ulita Cristonu mo ñeangu chiske giti ba mo ta gbu ule Cristo talla ole age Cristo takalin kare.  
\v 28 Cristo giti ba kwian israelita kwian me israelita, kaire ba kwian lle boanga mo mauña alin kwian lle boanga mo alin agali, kaire ba kwian onbre kwian muire, ulita salengwli, ba ulita Cristonu ba kwian gdaitre alin kare Jesucristo giti.  
\v 29 Ba ulita bai Cristonu ba Abraham oindalla ulia Cristo giti, Chube gerudu unsuialin Abraham ole Chube be age no Abraham alin kaire Abraham oindalla ulita alin, Chube agedu no ba ulita alin Chube gerudu kare Abraham ole, Chube Cristo kagu. 
\c 4  
\p  
\v 1-2 Cha geru ñachuge ai kare bage: Ñenua age mo kirolla soli bebi alin, ama gerule: “Cha kirolla be joge juma gire lle chanu ulita be chege amage.” Ñenua gerule ene gire ñenua llea ulita kirogwanu, agwa kirogwa me ñage lle e ñenuanu gai blike, ama soli, ama chegedale manade tigedale jondege. Ñenua lle boanga mau alin gweale gai kirogwa manade ule gwa, kaire ñenua lle boanga mau alin na gai lle ulita ñenuanu manade kirogwa alin. Kirogwa mananga kirogwa manadale no, kirogwa tige kirogwa bebi joge sugekare mo kira giti kirogwa mananga me ñage kirogwa chuge ngwadi age kirogwa ta agekalin kare lle ulita amanu ole, kirogwa agedale lle boanga gerule kare. Kirogwa joge juma, chui chke ama ñenua chui gbu kare, gire kirogwa ñage lle ulita gai mau alin ñage age ama ta agekalin kare lle amanu ole.  
\v 3 Che boidu salengwli kirogwa manakle kare, ngeru che me geru Chube giti uñu trate, malen che gweale chagedu age Moisés chadalla gerule kare, che gweale na chagedu age ulita kwian gweale ngwale nu geru gbaba gerule kare, ene che ulita tañachugu che Chubenu.  
\v 4 Che kledu ene gire Chube chui gbaba unsuialin chuia chku Chube mo Kirolla kagu cheske, Chube Kirolla medunga muinga kote nga dba ai giti kwian israelitaske, Chube Kirolla mo ta gbu age ulita Moisés chadalla gerule kare.  
\v 5 Chube mo Kirolla kagu kwian ulita alin, ene Chube Kirolla giti suge kwiange kwian me chegedale tañachuge diali Moisés chadalla alin giti. Che age chada e alin gerule kare, e giti Chube me che gai mo oliale, agwa che Chube Kirolla Jesucristo gai ulia giti Chube che gai mo oliale.  
\v 6 Nege che Chubenu ulia, malen Chube mo Kirolla Oña kagu che tale, Chube Kirolla Oña che ta gbe gerule Chube ole: “Chube, ba cha Ñenua.”  
\v 7 Ba tachke ene ba me mo ta gbadale age naskuni ngeru kare ulita, nege ba ulita chege Chube oliale, lle ulita Chubenu banu kaire Cristo giti. 
\s1 Pablo ka boi kwian ole geru ulia chuge ngwadi gdale 
\p  
\v 8 Cha gerule ba kwian Chubenu nga Galaciamu ulita ole, ngeru ba ulita me Chube ulia uñu ba lle gweale nga dba ai giti gau mo chubeale, ba chegu diali age lle ngwale ba gau mo chubeale alin.  
\v 9 Ngeru ba kledu ene, agwa nege ba Chube ulia uñe, ba agali me mo ta blitu Chube ulia gai, Chube ba ta gbu ama uñe trate. Chube agedu ene ba alin, malen me suge chage mineade nege ba mo ta blitakalin chege age nge kare naskuni kwian gweale ngwale nu geru gbaba gerule kare, geru e ngwale, geru e giti ba me ñage age ulita Chube takalin kare, ni Moisés chadalla giti.  
\v 10 Kwian israelita suiale kwian kle chui gbaite ollade semana kaire kaire, kle chui gbaite ollade dai kaire kaire, kle semana gweale ollade chura kaire kaire, kle chura jagere chuia ollade. Ba ulita kle chui e ulita gai mau alin olladadale, ene ba tañachuge ba no Chube gwa giti Chubedi nga suga no ba giti,  
\v 11 agwa ba me kle age no. Cha chagedu tanre baske geru ulia trage ba ulita ole, nege ba kle age naskuni nge kare ba me kle age geru ulia gerule kare. Cha kle tañachuge tanre ba giti, cha me takalin cha chagedu baske geru ulia ole ngwale. 
\p  
\v 12 Cha daballa cha ibotea Cristo giti, cha gerule ba ulita ole, cha kwian israelita, ngeru cha chagedu kwian israelita suia ulita ole age ulita Moisés chadalla gerule kare, ba me dale, ba me kwian israelita, ngeru ba me chagedu kwian israelita suia ole age Moisés chadalla gerule kare. Cha jo siere kwian israelita suia ulitage gire cha chegu ba kledu ngeru kare. Nege ba kle kwian israelita suia gai mau alin, cha takalin ba joge siere ege, ene ba chege cha kle nege kare ba kledu ngeru kare. Cha me kle gerule ba ole ba agedu gweale me no cha ole, me ene,  
\v 13 cha jo chke chege baske ba ulita agedu no cha alin. Uñale ba ulitage cha ogadu malen cha chegu baske mo oga manade, cha kledu eni gire cha geru Jesucristo giti tragu ba ulita ole.  
\v 14 Cha chku baske cha kledu oga me no me no, jingme e ngeru ba ñadu cha mlienga sugekare, agwa ba me tañachugu cha mlienga, ba ulita cha gau ngwange no lle boanga Chube alin nga ngaña giti kare, ba cha gau ngwange talla ole ba Jesucristo agali gai ngwange kare, ba ulita cha chudabo no. Ba ulita cha gau ngwange ta suga no ole cha Jesucristo gerua tragu giti.  
\v 15 Ngeru cha geru Jesucristo giti tragu ba ulita ole, geru e giti ba ulita nga du suga no no mo tale geru ole, agwa nege ba me ta ene molen. Uñale chage ulia ngeru ba no no cha ole cha Jesucristo gerua tragu ba ole giti, e giti ba tañachugu no cha alin ba tadukalin mo gwagwa no jwennga kete chage, ene cha ña chage gwagwa no ole.  
\v 16 Nege cha kle ka boi ba ole ba geru ulia chuge ngwadi gdale, e giti ba me tañachuge cha kle mo ta blite ba dollale cha kle mo ta dbe me no ba ole. Me ene, cha me kle gerule ba ole ta me no ole, cha me takalin ba joge siere geru uliage, e giti cha kle gerule ba ole.  
\v 17 Kwian gweale ba tkanga tangle geru me uliage ba ta gbe geru nadi gire ba joge siere geru uliage, kwian ene gerule ba ole: “Cha ta ba chudaboakalin no no geru giti.” Ama gerule ene ba ole ama takalin ba ulitage suge ama no ba ole, agwa ama me no ba ole ulia, ama me kle tañachuge no mo tale ba ulita alin, ama kle tañachuge mau alin giti, ama takalin ba ta gbe joge siere cháge cha geru ulia tragu giti, ene bdagli ba ulita chege mo ta dbe no ama alin ole tañachuge no ama alin giti ama gerule kare.  
\v 18 Noare mo ta gbe daba na chudaboi, e ene no, agwa me daba chudaboi anblitadale mo alin. Cha kle baske cha age no ba alin ulita, e alin allabi gire cha joge siere cha ba talla ulita mlienga, e me gerule cha kle chege tañachuge diali ba ulita giti chudaboale diali geru ulia giti.  
\v 19 Agwa cha me mo ta dbe ene ba ole, ba ulita cha kirolla cha jian kare Jesucristo giti, cha no ba ulita ole, cha kle tañachuge tanre diali ba ulita giti cha kle ba ole suiale cha me kle ba ole suiale. Ngeru ba me Cristo uñu cha ta olidu tanre ba giti, nege ba Cristo uñe, agwa ba kle joge siere geru ulia Cristo gitige, malen nabitaite cha kle ta olire tanre ba ulita giti muinga kle skibachie tanre kirogwa suiale kare, cha ta ene molen ba ulita giti. Cha takalin ba ulita Cristo gai mo Chugagwallale ene ba chage Cristo takalin kare, e giti nga be chege suga no chadi ba ulita giti, ene cha mi chege ta olire dare ba giti.  
\v 20 Cha ta klekalin baske agali nege nege, ene cha ña gerule ma no ba ole agali trate, ene ba ñage cha kerua keruchuge, ene suge bage cha kle gerule ta no ole ba ulita ole. Agwa nege cha kle bate bage cha kle tañachuge tanre ulia ulia ba ulita giti. 
\s1 Pablo geru ñachuge muinga boke giti 
\s1 kada Agar kada Sara 
\p  
\v 21 Ba ulita bai kaire ta agekalin ulita Moisés nu Chube gerua degaba unsuialin gerule kare ene ba tañachuge ba no trate Chube gwa giti, ba me kle geru e ulita gbe gdadi trate no.  
\v 22-23 Geru e amaña kle gerule Abraham giti, geru e gerule: Abraham kirolla muinga boke giti, Abraham kirolla gdaite muinga kada Agar giti, Agar lle boanga Abraham muiralla alin. Abraham kirolla gdaite Abraham muirallanu kada Sara giti, Abraham muirallanu me lle boanga kwian na alin. Abraham toidu lle boanga mo muirallanu alin kada Agar ole gire kirogwa onbre medunga Agar kote. Agar kirogwage malen Agar kirogwa manadu muinga ulita kle kirogwa manade kare. Agwa Abraham muirallanu kada Sara me muinga ene kare, Sara me kirogwage me ñadu kirogwa molen gire Chube agedu Sara alin, ene Abraham ñadu kirogwa molen Sara giti Chube gerudu kare sbali Abraham ole.  
\v 24-25 E ulita boidu sbali unsuialin, nege e kle gerule ai kare che alin: Boidu muinga e boke ole, e salengwli Chube nu mo gerua boke gbaba kwian alin kare. Geru gbaite Chube ketu Moisége jwichuga kada Sinaíge nga kweri kada Arabiage, nege kwian ulita bai kaire kle mo ta gbe age geru e alin gerule kare diali kwian ene salengwli Agar kare, Agar lle boanga kwian na alin, Agar agali me ñadu joge siere ege, ama chegu age ulita mo chugagwalla gerudu kare, Agar kirolla ulita mo chebia kare kaire. Una Jerusalén, una e kwian israelita ulita unalla nga dba ai giti, kwian e ulita kle age Chube nu geru ketaba Moisége kwian israelita alin gerule kare, ene ama tañachuge ama Chubenu, agwa me ene, kwian ulita una Jerusalénmu Agar kirolla kare.  
\v 26 Agwa una Jerusalén na nga ngaña giti, una e kwian Chubenu ulia unalla, kwian Chubenu ulita be toi una ege, kwian ene Sara kirolla kare. Kwian Chubenu ulia me kle tañachuge age diali Moisés chadalla alin gerule kare, e salengwli Sara me lle boanga kwian na alin kare.  
\v 27 Isaías nu Chube gerua degaba unsuialin gerule Sara giti, chada e gerule: 
\q1 “Muinga bai kle gballa me kirogwage ni kirogwa gdaite mebanga muinga kote, muinga ene mo ta gbadale nga suga no ole, ama gerudale nga suga no no ole Chube giti. 
\q1 Bdagli muinga me kirogwage muinga ene be kirogwa molen ma ngle muinga kirogwa molenge.” 
\m Isaías nu Chube gerua degaba unsuialin gerule ulita ene.  
\v 28 Nege cha gerule ba ole cha daballa cha ibotea ulita Cristo giti, sbali Chube gerudu Chube be Cristo kage kwian ulita alin, ene kwian ngle Cristo giti be chege Chubenu. Chube agedu ama gerudu kare, nege che ulita Chubenu Cristo giti. E salengwli Chube gerudu Abraham ole kare, Chube gerudu Abraham ole Chube be kirogwa kete Abrahamage Sara giti, Chube agedu ama gerudu kare, Abraham kirolla kada Isaac molen Sara giti.  
\v 29 Sara me kirogwage gire Chube agedu Sara alin mo Oña kiralla giti, malen Abraham ñadu kirogwa molen Sara giti, kirogwa e kada Isaac. Agar kirolla me no Sara kirolla Isaac ole, ama diali agedu me no Isaac ole, nege kle boi ene kaire cheske Agar kirolla agedu Isaac ole kare. Chube Oña che ta gbu geru Cristo giti gai ulia, e giti che Chubenu ulia. Kwian bai kle age diali Moisés chadalla alin gerule kare, kwian ene me no che ole, ama kle age me no diali che ole che geru Cristo giti gai gdale Agar kirolla agedu me no Sara kirolla Isaac ole kare.  
\v 30 Moisés Chube gerua degu unsuialin Sara giti, chada e gerule: 
\q1 “Sara gerudu Abraham ole Agar giti: ‘Ba muinga lle boanga e mlienga che ullage, ama jogedale siere ule ama kirolla ole, ama kirolla me ñage ba llea gai mau alin cha kirolla kare, ba llea ulita chegedale cha kirolla alin allabi.’ Sara gerudu ene Abraham ole Agar giti Agar kirolla giti.” 
\m  
\v 31 Che ulita me muinga lle boanga mo mauña alin kada Agar kirolla kare, kwian Agar kirolla kare chege tañachuge age diali Moisés chadalla alin gerule kare ene ama tañachuge ama Chubenu, agwa me dale ene, ama chege sugekare Chubege. Che muinga me lle boanga kwian na alin kada Sara kirolla kare, che geru Cristo giti gau ulia, uñale chege Cristo alin giti che ulia Chubenu, lle ulita Chubenu chenu kaire Cristo giti. 
\c 5  
\s1 Pablo kwian ta gbe kwian mo ta gbadale 
\s1 chage ngerugu Cristo alin ole 
\p  
\v 1 Ngeru che ulita chegu tañachuge diali age Moisés chadalla alin gerule kare ene che tañachugu che Chubenu, che chegu age geru e gerule kare kwian lle boanga chege age mo mauña alin kare, che me ñadu joge siere ege. Che ene gire Cristo che jun siere age enege, sugedu chege Cristo alin giti che Chubenu. Nege ba ulita mo ta gbadale diali Cristo ole me mo ta blite chege age nge kare naskuni Moisés chadalla alin gerule kare.  
\v 2 Cha Pablo cha gerule ba ulita ole, cha takalin ba tachke geru ai giti cha kle gerule ba ole, ba ulita bai kaire kle mo ta gbe age naskuni mo kwara tkangenga suia gai, e giti ba kle tañachuge ba no trate Chube gwa giti ba ulita Chubenu, ba ulita age ene naskuni, Cristo agedu ulita ba kle chuge ngwadi ngwale ulita, ngwale ama agedu ba ulita alin.  
\v 3 Cha gerule ba ole kwaite, ba bai kaire mo kwara sidri tkangenga kwian israelita kle age kare, ba tañachuge e giti ba no trate Chube gwa giti, ba age ene gire ba chegedale age diali ulita Moisés chadalla gerule kare.  
\v 4 Ba bai kaire kle mo ta gbe age ulita diali Moisés chadalla alin gerule kare, e alin giti ba kle tañachuge ba Chubenu ba chege no trate Chube gwa giti, ba mo ta gbe ene Moisés chadalla alin ole ba agali kle mo ta gbe joge siere Cristoge ba kle Cristo gai lle ngwale kare, e giti ba ta kle chege sugekare Chubege, me ñage suge bage Chube no ba ole Chube ta agekalin no ba alin.  
\v 5 Agwa che ulita bai kaire Chubenu ulia che Cristo gau ulia mo tale, Chube Oña kle che ta gbe suge Cristo alin giti che chege no trate Chube gwa giti ene che me chege jiske Chube gwage che agedu me no giti.  
\v 6 Che mo ta gbu Jesucristo gai ulia, che amanu, malen che me tañachugadale mo kwara sidri tkangenga o me mo kwara sidri tkangenga, e giti che me tañachugadale, e ngwale, e me che ta blite joge siere age me noge Chube gwage, agwa Jesucristo alin che ta blite age no Chube takalin kare, che mo ta gbadale ulia Jesucristo gai mo tale diali, ene Jesucristo giti che chege diali mo ta dbe no Chube ole kaire daba ulita ole.  
\v 7 Ba ulita geru Jesucristo giti gau gwangea gire ba mo ta gbu chage no no geru e ulia ole, ¿nege boidu mine ba ulita ole? ¿Mineade ba ulita kle mo ta gbe joge siere geru uliage?  
\v 8 Chube agali ba ta gbu geru ulia Jesucristo giti gai ulia, nege Chube me kle ba ta gbe joge siere geru e amañage, agwa ba kle geru gweale na nganake keruchuge, e giti ba kle mo ta gbe joge siere geru uliage.  
\v 9 Geru ngwale gweale kle chage ba ulitaske salengwli levadura tugenga harinaske kare. Levadura harinaske harina gbe sie ulita, ene kaire ba geru ngwale gweale keruchuge ba mo ta gbe bedre bedre geru ege, gire bdagli ba geru ngwale ulita gai gire ba joge siere geru ulia ulitage.  
\v 10 Kle boi ene bedre bedre ba ulitaske geru ngwale giti, agwa chage uñale trate Cristo che Chugagwalla be ba ta gbe naskuni geru uliadi cha kle gerule kare ba ole, ene ba me tañachuge nganake geru ulia giti. Kwian bai kaire kle ba ta gbe geru na nganake me uliadi kwian ene alin Chube be ji gbe. 
\p  
\v 11 Cha daballa cha ibotea ulita Cristo giti, cha takalin suge bage cha giti, cha me kle chage gerule kwian Cristo gau ulia ole mo kwara sidri tkadalenga kaire kwian israelita ulita kle age kare ene ama Chubenu. Agwa cha me kle geru dbe ene kwiange. Cha chage gerule kwian Cristo gau ulia ole mo kwara sidri tkadalenga kaire, cha gerule ene kwian ole ene kwian israelita me age me no cha ole geru giti. Uñale bage cha me kle gerule ene, cha kle gerule daba ulita ole Cristo agedu kruge alin giti kwian ulita Cristo alin gai ulia ene ama Chubenu. Cha kle gerule ene giti kwian israelita kle ta dbe skochie chadi kle mo ta gbe chage age me no cha ole diali.  
\v 12 Kwian bai kle chage geru dbe baske mo kwara sidri tkangenga ene kwian chege Chubenu, ama alin geru mo kwara sidri tkangenga ma kweri geru na ulitage. ¿Mineade kwian ene agali me mo kwara tkenga ulita? 
\p  
\v 13 Ba ulita cha daballa cha ibotea Chubenu, Cristo giti Chube ba ulita gau mau alin, Cristo alin giti ba Chubenu, ba ene ba me mo ta gbadale age ulita Moisés chadalla gerule kare. E me gerule ba agedale me no ulita ba takalin kare, me ene, ba mo ta gbadale age trate ulita Chube takalin kare ta dbale no daba na Chubenu ulita ole ba mo ta gbale daba na chudaboi diali Chube takalin kare.  
\v 14 Chube gerua degaba unsuialin gerule: 
\q1 “Ba mo ta dbadale no daba na ulita ole salengwli ba no mo ole naskuni kare.” 
\m Geru e ma kweri che alin Chube gerua degaba na ulitage. Ba age no ene daba na ole ba mo ta gbe age mo ole kare, gire ba kle age ulita Chube gerua ulita kle gerule kare.  
\v 15 Ba me mo ta gbe no daba ole Chube gerua degaba unsuialin gerule kare, ba ulita mo ta gbe daba gutenga ongoru ongoru geru giti, gire bdagli ba ulita be chege sugekare daba nage ba mi ñage chege ule diali gerudi. 
\s1 Kwian talla gballa ulita tañachuge me no, 
\s1 Chube Oña kwian ta gbe tañachuge no 
\p  
\v 16 Cha gerule ba ulita ole, Chube Oña kle ba tale, ba chagedale diali Chube Oña ba ta gbe kare, ba ulita chagedale ama takalin kare diali, ba me mo chugadale ngwadi age me no ba takalin kare.  
\v 17 Ba age me no ba takalin kare, ene ba me kle age no Chube Oña takalin kare. Ba age no Chube Oña takalin kare, ene ba me kle age me no ba takalin kare. Ba ulita ta e kare boke molen, ta e boke kle kira bate ba tale, gdaite kle kira bate gdaite ole diali. Uñale ba ulitage Chube Oña ta ba ta gbakalin age no, ba ta agekalin no ama takalin kare, agwa kaire ba ta agekalin me no ba takalin kare. Ba ulita ta boke ene molen, malen ba agali gballa me ñage mo ta gbe age no, Chube Oña alin giti ba ñage age no.  
\v 18 Ba ulita Chube Oña chuge ngwadi ba ta gbe age no ama takalin kare, ene ba me tañachugadale age Moisés chadalla gerule kare.  
\v 19 Kwian ulita bai mo ta gbe age me no diali kle mo ta gbe age ai kare: 
\q1 Muinga onbre mo chuge ke giti. 
\q1 Kwian tañachuge geru sugaska giti, age tañachuge kare. 
\q1 Kwian onbre me ngwedi muinga na na ole, muinga me ngwedi onbre na na ole, kwian ene me ibule mo giti. 
\q1  
\v 20 Kwian lle dodaba kodi gai mo chubeale. 
\q1 Kwian ta gdaboke me no molen age me no diali daba na ole che dolla Satanás kirallaske. 
\q1 Kwian ta chege jainchke diali daba nadi. 
\q1 Kwian ta dbe kira bate diali daba na ole. 
\q1 Kwian semale daba ole lle ulita giti. 
\q1 Geru mebitabi kwian chege ta skochie tanre. 
\q1 Kwian geru jinade daba na dollale daba ole ene daba ta blite, ene ama takalin daba ulita gerule no ama giti alin. 
\q1 Mneite mo gbe sugekare daba na ulitage tañachuge ama alin allabi no, bedre bedre geru me ulia giti ama daba na gai chege ama ole. 
\q1  
\v 21 Kwian ta dbe tañachuge me no dabadi lle dabanu giti, ama takalin lle dabanuge mau alin. 
\q1 Kwian mo ta dbe lle gage jai diali. 
\q1 Kwian chui ollade me no, kwian age ulita me no ama takalin kare. 
\q1 Kaire kwian lle na tanre me no dodade. 
\m Cha gerudu ngeru kare ba ole nege cha gerule kwaite ba ulita ole, bai kaire chage diali age ulita ai kare lle ai cha chada degangu giti kare, kwian ene me kle Chube gai mo Chugagwallale, ama mi toi Chube ole diali. 
\p  
\v 22 Kwian mo chuge ngwadi age kwian takalin kare, kwian ene be age me no diali, agwa kwian Chube Oña chuge ngwadi age ama tale, Chube Oña kwian ene ta gbe ai kare: 
\q1 Chube Oña kwian ta gbe mo ta dbe no daba na ulita ole. 
\q1 Chube Oña kwian ta gbe nga suga no ole. 
\q1 Chube Oña kwian ta gbe suga no me tañachuge boi daga ngwale giti. 
\q1 Chube Oña kwian ta gbe jage ulita boi daga ngwalege me skochie me skwatige. 
\q1 Chube Oña kwian ta gbe gerule ta no ole daba na ole. 
\q1 Chube Oña kwian ta gbe age no daba na alin daba na chudaboi. 
\q1 Kwian gerule be age gweale daba na alin, Chube Oña kwian ene ta gbe age ulia kwian gerudu kare. 
\q1  
\v 23 Chube Oña kwian ta gbe me mo gbe ma kweri daba nage. 
\q1 Chube Oña kwian ta gbe me mo chuge ngwadi age me no kwian takalin kare. 
\m Chube Oña kwian ta gbe age no ulita ai kare. Geru kwian nu gbaba kwian ulita alin nga dba ai giti kwian ulita chagedale geru kle gbaba gerule kare, geru e ni gdaite ñage gerule age ulita no ai kare dollale.  
\v 24 Kwian bai kaire Jesucristo gau ulia, kwian ene Jesucristonu, kwian ene mo talla ulita ngeru me no mliunga, ama me mo chuge ngwadi age me no dare ulita ama takalin kare ama agedu ngeru kare.  
\v 25-26 Nege Chube Oña kle toi che tale, ama alin ñage che ta gbe chage no, che Chube Oña chugadale ngwadi che ta gbe age ama takalin kare. Che Chube Oña chuge ngwadi che ta gbe age ama takalin kare ama che ulita ta gbe toi no ule modi, ene che me toi sugaska modi. Che me tañachugadale mo tale: “Cha ma no daba na ulitage.” Che me mo ta gbadale geru jinade dabage daba gbagda skochie. Che me ta dbadale tañachuge me no dabadi lle dabanu giti, che me ta dbale che takalin lle dabanuge mau alin, che mo ta dbale tañachuge no daba ulita alin. 
\c 6  
\s1 Kwian Chubenu ulita mo chudaboadale modi 
\p  
\v 1 Cha daballa cha ibotea Chubenu, cha gerule ba ulita ole, chke uñale bage daba gweale Chubenu kle age gweale me no, ba ulita bai kaire kle mo ta gbe Chube Oñage age Chube takalin kare, ba ene ulita gerudale daba e ole ta no giti, ba ama chudaboadale joge siere ama kle age me noge, ene ama joge naskuni age Chube takalin kare. Ba ulita bai kaire mo ta gbe daba chudaboi ene, ba ta sugedale mo giti ba ñage age me no ene kaire, malen ba gerudale ta giti ama ole.  
\v 2 Ba kwian Chubenu ulitaske daba gweale boi daga ngwale daba gweale mo ta gbakalin age me no, ba ulita bai kaire kle chage no Chube ole trate ba mo ta gbadale diali daba chudaboi ongoru ongoru ta no giti, ba age ene ba kle ta dbe no daba na ole Cristo geru gbu kwian ulita alin kare.  
\v 3 Kwian gweale tañachuge ama ma kweri me ñage daba kle boi daga ngwale chudaboi me ñage daba kle mo ta gbakalin age me no chudaboi, kwian ene me kle tañachuge trate, ama kle mo anblite agali, ama me ma kweri daba nage, Chube gwage ni kwian gdaite ma kweri daba nage.  
\v 4 Ma no kwian ulita mo ta gbe tañachuge trate ulia mo giti, ene chke uñale kle mo ta gbe age no o me kle mo ta gbe age no, me tañachugale ama kle age ma no daba nage o me. Suge amage ulia ama kle age no ulita gire nga be suga no amadi mo tale e giti.  
\v 5 Uñale Chubege kwian ulita talla mine, malen kwian ulita gdaite gdaite mo ta gbadale chage age no Chube takalin kare.  
\v 6 Kwian kle daba tke tangle Chube geruage, daba ulita bai kaire Chube gerua jwannga kwian tkanga tanglege, geru jwannga mo tkanga tangle chudaboadale no lle toigda ulita giti, ene kwian tkanga tangle ñage toi no ñage daba tke tangle dare.  
\v 7 Cha takalin geru ai suge trate ulia ba ulitage, ni kwian gdaite ñage tañachuge ama kle age skwlenre me no Chube me tallade e giti, tañachuge Chubege me uñale ama kle age giti, agwa me kle Chube anblite ulia, kwian ene kle mo anblite naskuni, Chubege kwian talla ulita uñale, Chube gwage kwian kle age ulitadi. Kwian age no Chube gwa giti nga dba ai giti, Chube be age no ama alin bdagli. Kwian age me no Chube gwa giti nga dba ai giti, Chube be ji gbe ama alin bdagli.  
\v 8 Kwian bai kaire mo ta gbe age me no diali ama takalin kare, bdagli kwian ene be boi daga ngwale be chege sugekare Chubege diali. Agwa kwian bai kaire mo ta gbe age no diali Chube Oña takalin kare, kwian ene be toi no diali chui tangle Chube ole.  
\v 9 Malen che ulita me skwatigedale age diali no ulita Chube takalin kare, che chege ta ene kare molen diali, bdagli Chube be age no no che alin, ene be suge trate ulita chege che agedu no Chube takalin kare che me agedu ngwale.  
\v 10 Uñale chege che age no Chube takalin kare che me kle age ngwale, malen noare diali che ñage kare che mo ta gbadale age no kwian ulita alin kwian ulita chudaboi, che me ta jogedalenga age no daba Chubenu alin diali, che daba Chubenu Jesucristo giti chudaboadale ngeru kwian na ulitage. 
\s1 Pablo geru gbe bdagli kwian Chubenu 
\s1 nga Galaciamu alin 
\p  
\v 11 Chada gwagwa kweri kweri ai ba batenga, chada ai cha kle dege agali mo kodi ba ulita alin, cha agali geru ai bdagli dege chada giti ba alin.  
\v 12 Cha gerule trate trate ba ulita ole kwian giti bai kle ba gbe mo kwara sidri tkangenga, ene ama gerule ba ole ba Chubenu. Ama ta chegekalin no kwian na ulita gwa giti malen ama age ene, ene kwian me chage ama nate age me no ama ole, ama me takalin kwian age me no ama ole gerule Cristo agedu kruge giti alin. Kwian ene me gerule daba na ole kwian Cristo alin gai ulia chege Chubenu, ama kennga gerule Cristo giti daba na ole kwian na ngeru.  
\v 13 Kwian israelita kle gerule ba ole ba mo kwara sidri tkadalenga, kwian e amaña ni ñage age no ulita Moisés nu Chube gerua degaba unsuialin kwian israelita ulita alin gerule kare, kwian ene me kle tañachuge no, ama takalin ba age ama gerule kare, ene ama ñage gerule no mo bitalla ole mo giti, ama gerule ene mo giti: “Cha agedu no no, cha kwian me israelita ngle gbu mo kwara sidri tkangenga che ulita kle age kare, nege ama chege che ole.”  
\v 14 Kwian e gerule ene no mo giti kwian na ole ama kle age giti, agwa cha me tañachuge ene, cha alin me no gerule mo giti daba na ole cha agedu giti. Cha ta gerukalin no kwian na ole che Chugagwalla Jesucristo agedu kruge alin giti, Jesucristo jokeda kruge cha alin, e giti Jesucristo cha ta ngeru ulita blitu, ene cha ta e ulita chugu ngwadi, nege cha me tañachuge dare cha tañachugu ngeru kare, suge chage Cristo alin giti cha Chubenu cha age Chube takalin kare, nege cha me age cha takalin kare.  
\v 15 Che me tañachugadale mo kwara sidri tkangenga o me mo kwara sidri tkangenga, e giti che me tañachugadale, e ngwale, e me che ta blite joge siere age me noge Chube gwage, Cristo alin giti Chube Oña che ta jagere gbe, ene che ta me nge kare.  
\v 16 Kwian ulita bai kaire kle mo ta gbe Jesucristo alin gai ulia kle mo ta gbe chage Jesucristo takalin kare, kwian ene kwian Chubenu ulia Jesucristo giti, cha takalin Chube kwian ene ulita ta gbe suga no kaire Chube tai dage ama ulitage. 
\p  
\v 17 Ba ulita nga Galaciamu, ba gweale kle joge siere geru ulia Jesucristo gitige, ba kle age ene ba kle cha ta gbe olire tanre ba kle cha ta gbe tañachuge tanre ba giti, nege gwangerugu cha me takalin ni ba gdaite age ene dare. Cha batré Jesucristo giti tanea kle cha jegwale, e giti ñage suge ba ulitage cha no Jesucristo ole cha ama gai ulia cha lle boanga no ama alin. 
\p  
\v 18 Cha daballa cha ibotea ulita Cristo giti Chubenu, cha takalin che Chugagwalla Jesucristo age no no ba ulita alin. Ene nobi. 
\p Geru ai ene ulita cha Pablo chada degangu ba kwian Chubenu ulita nga Galaciage alin. Che kle meni.