\id EPH - Buglere NT -Panama 2008 (DBL -2013) 
\h EFESIOS 
\toc1 Pablo Nu Chada Degaba Kwian Chubenu Una Efesomu Alin 
\toc2 Efesios 
\toc3 Ef 
\mt1 Pablo Nu Chada Degaba Kwian Chubenu Una Efesomu Alin 
\mt2 Carta de Pablo a los Efesios 
\ip Pablo kledu skage una Romage Jesucristo gerua dbe gdale gire ama chada ai degangu kagale kwian Jesucristo gerua ganga una Efesoge alin. Pablo tadukalin kwian Chubenu una Efesoge chada ai batenga ulita gire chada ai kage kwian Chubenu nage una tanrege nga kweri Asiage, ene geru ai ulita ñage chke nate uñale ulita kwian Chubenu tanrege. 
\ip Pablo kledu chage Jesucristo gerua dbe suiale Pablo jo chke una Efesoge Pablo Jesucristo gerua tragu kwian una emu ole (Hechos 18:18-21). Pablo me chegu sbali una Efesoge gire ama jo nga nage Jesucristo gerua dbe. Bigire Pablo joni naskuni una Efesoge kwian Jesucristo gerua ganga chada jwen gire e suiale ama chegu toi chura gdamai kwian tke tangle dare Jesucristo gerua giti (Hechos 19). 
\ip Kwian toinga una Efesoge ulita me chudalla gdaitre alin, kwian gweale israelita gweale me israelita kledu toi una ege. Pablo chada ai degangu kwian ene Chubenu ulita ta gbagda kwian ulita bai kaire Jesucristo gerua gai ulia kwian ene ulita chege kwaitre alin salengwli Chube gwa giti malen ama ulita toidale no modi Chube takalin kare. 
\c 1  
\s1 Pablo gbi kage chada giti kwian Chubenu 
\s1 una Efesomu alin 
\p  
\v 1 Cha Pablo chada ai degange ba ulita Jesucristo gerua gaba ulia una Efesoge alin: 
\p Chube tale Chube cha gau cha gbu Jesucristo gerua ketangale dabage, cha gbi kage chada ai giti ba ulita Chubenu una Efesomu alin, ba ulita kle mo ta gbe diali gwangerugu Jesucristo geruadi toi Chube takalin kare, ba ulita alin cha chada ai degange.  
\v 2 Cha takalin Chube che Ñenua kaire Jesucristo che Chugagwalla age no no ba ulita toinga una Efesoge alin, Chube kaire Jesucristo ba ulita ta gbe nga suga no ole. 
\s1 Jesucristo giti Chube age no tanre 
\s1 kwian Jesucristo gerua gaba alin 
\p  
\v 3 Che Jesucristo gau ulia mo Chugagwallale gire Chube Jesucristo Ñenua diali age tanre no che ulita alin, e giti nga suga noare chadi gerule no Chube ole, cha gerule no ama ole ene: “Chube toinga nga ngaña giti, ba noare ulia, ba kweri, ba diali age no cha ulita Jesucristo gerua gaba ulia alin.” Che gerudale no Chube ole ene. Ulia Jesucristo giti Chube ageba no tanre che alin.  
\v 4 Unsuialin Chube bebi nga ulita dodade gire, uñadu Chubege che be Jesucristo gerua gai ulia, Chube che gau ama alin enebi, gire ene che chege no trate che me chege jiske che agedu me no giti Chube gwa giti. Chube mo ta gbu no ene che ole,  
\v 5 Chubege ulita uñadu unsuialin tangle che be mo ta gbe no ama ole, ama ta du no che alin, unsuialin tangle ama mo ta gbu che gai Jesucristo giti mau alin nga suga no ole ene che ulita chege ama oliale ama takalin kare.  
\v 6 Ulia Chube agedu ene no che alin malen che gerudale no Chube giti nga suga no ole diali, ene chke uñale kwian ulitage Chube no che ole Chube agedu no che alin, ene ama kaire gerule no Chube giti. Chube noare mo Kirolla Jesucristo ole, Jesucristo giti Chube kle age no no che alin.  
\v 7 Chube ta no no che ole, ama mo Kirolla Jesucristo kagu nga dba ai giti boi daga ngwale che ulita alin, Jesucristo jokeda kruge che agedu me no giti, Jesucristo jokeda giti Chube che jun siere ji chugege che agedu me no ulita gdale, che agedu me no ulita Chube talla mliunga.  
\v 8 Cristo giti Chube che ta gbe ngle, kaire Chube che ta gbe suge che toidale trate ama gwa giti.  
\v 9 Chube mo ta gbu gwangea ama be age ulita Cristo giti kwian alin, uñadu Chubege lledale ama be Cristo kage nga dba ai giti, agwa kwian ulitage geru e me chku uñale. Agwa bdagli Chube che ulita amanu ta gbu chke Cristo giti ama mo ta gbu gwangea age giti che alin Cristo giti.  
\v 10 Kaire gwangea Chube mo ta gbu kwian gdaite gdaite ulita gbe ule kwaitre alin, lle nga ngaña gitimu lle nga dba ai gitimu kaire kwian ulita Chube be gbeni naskuni Cristo kote lle dodaba no ulita nge jondege alin kare. Chui e chke gire Cristo be chege kweri lle ulita kwian ulita Chugagwallale. 
\p  
\v 11-12 Chube kle age ulita ama nu mo ta gbaba age gwangeabi kare. Gwangeabi unsuialin tangle Chube mo ta gbu cha kwian israelita gai ngeru mo oliale cha Cristo gai ulia giti. Malen Chube cha kwian israelita ulita ta gbu ngerutabi mo jwannga siere ji chugege age me no gdale manade ngwange. Cristo chku Chube mo ta gbu kare gire cha kwian israelita gweale Cristo gau ulia, Chube cha israelita ulita Cristo gerua ganga gau mau alin toi Chube takalin kare gire ene diali cha ulita gerudale no Chube giti ene: “Ulia Chube agedu no no cha alin cha ama gerua gau ulia giti, malen cha gerule no ama giti cha no no Chube ole, Chube no trate ulita.” Cha kwian israelita gerudale no ene Chube giti Chube agedu no cha alin giti. Ene kaire cha israelita ulita Cristo gerua ganga giti kwian na be gerule no Chube giti.  
\v 13 Kaire ene agwe ba kwian me israelita Chube gerua ulia Cristo giti keruchugu ba geru e gau ulia mo tale, geru e gai ulia giti ba chegu gitiru ji chugege ba agedu me no gdale. Ba Cristo gerua gau ulia gire Chube mo Oña gbu ba tale ama nu gerubabi gwangea be kete bage kare, ene Chube Oña giti ñage suge trate ba Chubenu.  
\v 14 Chube Oña kle che ulita Chubenu tale, e giti chke uñale chege Cristo gai giti Chube che jun siere ji chugege agedu me no gdale. Chube Oña giti uñale chege che be joge toi chui tangle diali Chube ole ama nu chui gbaba kare. Chube agedu no ene ulita che alin ama tadukalin kare malen che toidale no trate Chube takalin kare kwian na gwa giti, kaire Chube agedu no che alin giti che Chubenu gerudale no Chube giti ene: “Chube no kweri, ama kle age no no che ulita kwian amanu alin.” Chube agedu no che alin giti chedi nga suga noare, che gerudale no ama giti ama gbe kweri no kwian na gwa giti gire ene kaire agwe kwian na be gerule no Chube giti. 
\s1 Pablo gerule Chube ole kwian Jesucristo gerua gaba giti 
\p  
\v 15 Chube agedu ulita no che alin Jesucristo giti malen nga suga noare chadi ba ulita mo ta gbu Jesucristo gai ulia mo tale, chku uñale chage ba ulita una Efesomu kle Jesu gai ulia mo Chugagwallale ba kle ama gerua gbe gdadi, chku uñale chage ba kle mo ta dbe no daba ulita Jesucristo gerua gaba ulia ole.  
\v 16 Ba kwian ene malen cha gerule no Chube ole Chube kle ba ta gbe age ene giti, nga suga noare chadige Chube kle age no ba alin ama kle ba ta gbe toi no daba na ole.  
\v 17 Che Chugagwalla Jesucristo Ñenua Chube ama noare kiraske, ama ole cha kle gerule ba giti ene: “Chube, ba kwian una Efesomu bai kaire ba gerua Jesucristo giti gaba ulia, ba ama ulita ta gbe ngle diali mo Oña giti, ene be suge amage ba kle age no ama alin ulia, e giti be suge amage ba talla mine.  
\v 18 Kaire Chube, ba ama ta gbe suge ama Jesucristo gerua gaba giti ama ñage toi diali no ba ole chui tangle, kaire ba ama ta gbe suge ba kle age no ngle diali ama alin chui negege tangle kaire chui bdagli be chkege, ba be chege ama ole ama manade no no diali.  
\v 19-21 Kaire ba ama ta gbe suge ba kiraske tanre lle ulita giti ba ñage age ulita ba takalin kare cha ulita Jesucristo gerua ganga alin. Ene nobi Chube.” Cha kle gerule ene ulita ba giti Chube ole. Chube agedu no ba alin mo kiralla giti ene kaire kira ai amaña giti Chube Cristo gbuni gwade. Ama Cristo gbuni gwade gire Chube Cristo gbu toi dba mo ngena ko taingwli giti nga ngaña giti kwian ulita nga ulitage Chugagwallale. Chube Cristo gbu ma kweri ma kiraske kwian ulitage nga dba ai giti kaire lle boanga Chube alin nga ngaña gitige kaire che dolla Satanáge kaire dolla Satanás chudaboangallage, Cristo chegu ma kweri ma kiraske ama ulitage chui negege tangle kaire chui tangle diali.  
\v 22-23 Chube kwian ulita kaire lle ulita nga ulita jigu Cristo kote, ene Cristo chege ulita mauñale chege ulita kagangale. Kaire Chube Cristo gbu kwian ulita Cristo gerua gaba ulia Chugagwallale, che ulita Cristo gerua gaba ulia che Cristonu che Cristo jegwalenu kare, Cristo kle mo talla gbe diali che amanu tale, ama kle ule diali che amanu ulita ole. 
\c 2  
\s1 Chube ta dbe no no kwian ole malen Chube kwian 
\s1 jwen siere ji chugege age me no gdale 
\p  
\v 1 Ngerutabi ba ulita bebi Chube gerua Jesucristo giti gai ulia gire ba toidu sugekare Chubege age me no Chube dollale malen ba ulita chegu kwian jogebakeda kare Chube gerua giti me uñadu bage Chube giti.  
\v 2 Ba kledu chage age me no kwian na ulita agenga me no kare, ba kledu chage diali che dolla Satanás takalin kare, dolla Satanás ama dolla na ulita kle nga ngaña ngwalege chugagwalla, ama kle kwian ta gbe diali age me no Chube dollale.  
\v 3 Ngeru che toidu kaire kwian agenga me no ulita kle toi kare, che ulita agedu me no diali dolla Satanás che ta gbu age kare. Che ulita medunga gwangea che ta me nobi ulita, che ulita tadu agekalin me no che tañachugu mo tale kare. Che ta me no giti che ulita chegu jiske Chube gwage kwian na ulita me Chubenu jiske kare, Chube ji gbe tirare kwian ulita giti bai chege jiske ama gwage.  
\v 4 Agwa Chube mi ji gbe ene che Cristo gerua ganga giti che agedu me no gdale, Cristo giti Chube no no che ole malen ama mi che gbe ji chuge agedu me no giti.  
\v 5 Ngeru che ulita chagedu sugekare Chubege age me no tanre diali, che chegu kwian jogebada kare sugekare Chubege che agedu me no kbiale, Chube che jun siere ji chugege che agedu me no gdale, e salengwli Chube che jaba gbuni gwade kare.  
\v 6 Jesucristo jokeda kruge Chube ama jaba gbuni gwade mo kiralla giti gire Chube ama duni naskuni toi Chube ole nga ngaña giti. Jesucristo giti Chube che ta blitu no ama ole ene ama gwage che chege no trate me jiske, e salengwli che jo nga ngaña giti ule Jesucristo ole toi dba Chube ngena ko taingwli giti kare.  
\v 7 Jesucristo giti Chube agedu no ene che alin ene chui aige gwangerugu be chke nate uñale ulita Chube no no che ole ulia Chube agedu tanre no che alin Jesucristo giti che bai nu Jesucristo gaba ulia.  
\v 8 Ba ulita mo ta gbu Jesucristo gai ulia, e giti Chube ba jun siere ji chugege ba agedu me no gdale. Ba me tañachugadale ba gballa mo jun siere ji chugege, me dale ene. Chube ba jun siere ji chugege Jesucristo giti, ama agedu ene mau tale ba alin ama no no ba ole.  
\v 9 Ba me tañachugadale mo tale: “Cha agedu no no Chube gwa giti malen Chube cha jun siere ji chugege.” Ba me tañachugadale ene, ba gballa me ñage mo gbe sugekare age me noge, Chube agedu no ba alin mau tale.  
\v 10 Chube che ta blitu ulita, ene che me chege age me no che agedu ngeru kare, gwangea Chube mo ta gbu che dodade mau alin age no ama takalin kare, nege Jesucristo giti ama che ta gbe age no daba na alin daba chudaboi ama takalin kare. 
\s1 Chube kwian israelita kwian me israelita ulita 
\s1 gbe ule kwaitre alin 
\p  
\v 11-12 Ba tachkedale ba toidu ngeru tangle giti sugekare Chubege, ba me kwian israelita chudalla, ba me Chubenu. Nege uñale bage Chube gerudu unsuialin tangle kwian israelita enusulian ole Chube be age no kwian israelita ulita alin be gdaite kage ama jwanngale siere ji chugege age me no gdale. Chube me gerudu ene ba enusulian ole be age no ama oindalla alin jwanle siere ji chugege ama age me no gdale. Ba me kwian israelita chudalla, ba me mo kwara tkangunga kwian onbre israelita mo kwara tkangunga kare, malen kwian israelita ulita gwa giti ba kwian sugaska. Kwian onbre israelita ulita mo kwara tkangunga Chube ama gbu age kare, ene suge amage ama Chubenu ulia. Agwa ba me israelita ba me agedu ene kwian israelita kare, ba ulita chegu sugekare kwian israelita ulitage. Ba me ñadu tañachuge Chube be age no ba alin ba ta gbe no trate Chube gwa giti ama be age kwian israelita ole kare. Ba tachkedale ba bitalla kaire ba ulita me israelita toidu ngeru tangle sugekare Chubege ba bebi Jesucristo gerua gai gire, ne suiale ba me Chubenu dale.  
\v 13 Agwa nege tangle ba Jesucristo gerua gau giti ba Chubenu ulia. Ngeru ba kledu sugekare bate Chubege, agwa nege tangle ba Jesucristo jokeda kruge gau ulia mo alin, e giti ba ta kle ule Chube ole.  
\v 14 Kaire Jesucristo giti cha ulita kwian israelita ba ulita kwian me israelita chege kwaitre alin mne gdaitre alin kare, ngeru cha kwian israelita chudalla ulita mo ta gbu ba dollale agwa Jesucristo gerua gai ulia giti che ulita me kle tañachuge ngeru kare kira bate modi mo ibade ongoru ongoru ngeru kare. Che Jesucristo gai ulia giti che ta chege ule kwaitre alin, suge chege nege che ulita Chubenu.  
\v 15 Unsuialin tangle cha kwian israelita ulita enusulian kada Moisés Chube gerua ketu kwian israelitage kwian israelita toidale trate Chube gwa giti, geru e giti kwian israelita kwian me israelita mo ta gbu diali kira bate modi ongoru ongoru. Agwa Jesucristo jokeda kruge gire geru chegu nganake kwian israelita me agedale dare ulita Moisés chadalla gerule kare kwian ta gbagda trate Chube gwa giti, Jesucristo Chube gerua no jagere gbu kwian ulita alin. Jesucristo giti kwian israelita kwian me israelita toidale no ule chudalla gdaitre alin kare me tañachuge ngeru kare. Ene Jesucristo giti kwian chudalla ulita ñage toi no modi ule ongoru ongoru.  
\v 16 Jesucristo jokeda kruge giti kwian ñage Chube uñe ñage chege no trate Chube gwage, kaire Jesucristo kwian israelita kwian me israelita ulita gbu mo skatemanallale me kira bate dare ngeru kare, ene kwian ulita ñage chege tañachuge salengwli kwian gdaitre alin kare. 
\p  
\v 17 Jesucristo chku nga dba ai giti Chube gerua no dbe kwianske ene geru chke uñale che ulitage ba kwian me israelita ulita cha kwian israelita ulita toidale no modi ulita Chube gwa giti. Ba kwian me israelita kledu sugekare Chubege me Chube gerua uñu, cha kwian israelita ulita Chube gerua uñu, cha ulita geru keruchugu Chube takalin kwian toi mine agwa cha ulita me agedu geru kledu gbaba gerule kare. Malen Jesucristo chku Chube gerua no jagere dbe che ulita alin,  
\v 18 che ulita Chube gerua e Jesucristo giti gau ulia gire Chube mo Oña kagu che alin ulita malen nege che ulita ñage gerule Chube che Ñenua ole salengwli Chube Oña gdaitre alin giti.  
\v 19 Malen Jesucristo giti nege ba kwian me israelita ulita ñage Chube uñe cha israelita kare. Nege ba me ngeru kare, ba Jesucristo gerua gai ulia giti ba me kle sugekare Chubege, Chube kle ba manade kle ba chudaboi kle age no ba alin salengwli ama kle age no cha israelita alin kare. Che ulita Jesucristo gerua gaba ulia che chege Chube bitalla kare, che ulita Chubenu.  
\v 20 Che ulita Chubenu salengwli ke ulla gbaite gbakle kare. Chube Jesucristo kagu nga dba ai giti ke gbaite kweri ma no trate gbakle ngeru kare. Gire Chube kwian gweale gbu Jesucristo gerua ketangale dabage, kwian e ulita Jesucristo gerua ketanga dabage chege salengwli ke ulita gbakle ke gbaite kweri no jegwale ulita dba tangle gerere kare. Che ulita bai kle Jesucristo gerua gai ulia nege tangle che chege salengwli ke na tanre gbakle ke ulita gbakle ngeru giti tangle kare. Gire ene che ulita chege kwaitre alin ke ulla kle chege gbaba ulita no kare.  
\v 21 Che ulita Jesucristo gerua ganga che u gbaitre alin gbakle kare. Che Chugagwalla Jesucristo giti Chube che ulita Jesucristo gerua ganga ulia gbe toi no trate ule kwaitre alin ama takalin kare kwian kle u gbe gbaite kare. Ene bdagli Chube gwa giti che amanu ulita ta be chege salengwli no trate ulita.  
\v 22 Jesucristo giti ba kwian me israelita chegu no kwaitre alin ule cha kwian israelita ole salengwli u gbaite gbakle kare. Chube mo Oña kagu toi che ulita tale, ene Chube Oña giti Chube kle che ole diali kaire che ta chege ama ole diali. 
\c 3  
\s1 Pablo Chube gerua Jesucristo giti dbe 
\s1 kwian me israelitaske 
\p  
\v 1 Chube kle kwian israelita kaire kwian me israelita Jesucristo gerua ganga ulita gbe ule kwaitre alin, geru e dbe ba ulitaske giti cha kle skage, geru e Jesucristo giti no ba ulita alin agwa e giti cha kle skage.  
\v 2 Bage uñale Chube agedu no ba alin cha giti, Chube cha gbu geru no Jesucristo giti kete bage.  
\v 3 Cha chada degangu gwangea sidri chada ai giti Chube mo ta gbu gwangea age kwian ulita alin giti, kwian me geru e uñe trate, geru e chege skwlenre kwiange, Chube cha ta gbu geru e gbe chke uñale kwiange.  
\v 4 Ba geru ai cha kle degange kare batenga, ene ñage suge bage Chube cha ta gbu ulia geru ai Cristo giti kete bage.  
\v 5 Geru Cristo giti me kledu uñale kwian israelita enusulian oña unsuialin tanglege, agwa nege tangle Chube kwian ulita Chube gerua ketanga kaire kwian Jesucristo gerua ketanga ta gbu geru e gbe chke uñale kwian ulitage mo Oña kiralla giti.  
\v 6 Geru ai Chube cha ta gbu giti kle gerule ene: Kwian me israelita bai geru no Jesucristo giti gai ulia ñage tien gitiru ji chugege agedu me no gdale salengwli kwian israelita geru no Jesucristo giti gai ulia kare mi ji chuge ama agedu me no gdale. Chube kle age no kwian israelita Jesucristo gerua gau ulia alin kaire Chube be age no kwian me israelita alin bai Jesucristo gerua gai ulia alin. Chube kwian me israelita gbu ule kwian israelita ole kwaitre alin Jesucristo giti, kaire Chube gerudu kwian israelita ole Chube be age no ama alin kaire ene geru amaña ñage chege kwian me israelita ulita alin kwian bai geru no Jesucristo giti gai ulia alin. 
\p  
\v 7 Uñale chage cha me ñage geru dbe kwianske gballa mo kiralla giti agwa Chube agedu no cha alin Chube cha gbu geru no amanu Jesucristo giti dbe ama kiralla giti ba ulita me israelitaske.  
\v 8 Chage cha suge moge cha kwian ngwale ma soli kwian na ulita Chubenuge agwa Chube agedu no cha alin Chube cha gbu ama gerua Jesucristo giti dbe kwian me israelitage. Nga suga no chadige geru no Jesucristo giti kete kwian ulita me israelitage, geru e gerule Chube diali agekalin no no che ulita alin che kwian bai Jesucristo gerua gai ulia alin. Geru e cha kle kete chkedale uñale kwian ulitage.  
\v 9 Sbali geru Chube be age no kwian me israelita alin giti chegu skwlenre kwian ulitage, Chube nga ulita lle ulita dodanga gwangea ama mo ta gbu age no kwian ulita alin Jesucristo giti kwian israelita alin kaire kwian me israelita alin. Chube che gbu geru e gbe chke uñale kwian ulitage.  
\v 10 Chube kwian me israelita Jesucristo gerua ganga gau mau alin gbu ule ulita kwaitre alin kwian israelita Jesucristo gerua ganga ole. Chube agedu ene, ene nege tangle ñage suge ma trate lle boanga Chube alin nga ngaña giti ulitage ulia Chube ta ngle ole age no ulita.  
\v 11 Chube agedu ene ulita, ama mo ta gbu gwangea kare ama age no kwian ulita alin che Chugagwalla Jesucristo giti.  
\v 12 Che ulita Jesucristo gerua gai ulia giti suge chege che ñage gerule ta no ole Chube ole me ta kennga ole, suge trate chege Chube che keruchuge che kerua gai ngwange no.  
\v 13 Malen cha gerule ba ulita ole, ba me ta olire cha giti cha kle boi daga ngwale Jesucristo gerua kete bage gdale, ba me sugedale moge jiske chage, agwa ma no ba mo ta gbe nga suga no ole cha kle boi daga ngwale giti ba alin. Sugedale bage cha kle boi daga ngwale Jesucristo gerua dbe giti e no ba alin. 
\s1 Pablo gerule Chube ole kwian una Efesomu giti 
\p  
\v 14 Chube agedu no ulita che alin, malen cha jongnagwa skute dba Chube gwa giti Chube gai dage gerule ba giti Chube ole.  
\v 15 Chube kwian Cristo gerua ganga ulita Ñenua. Kwian gweale nu Cristo gaba ulia jogebakeda ama oña kle nga ngaña giti Chube ole, kwian gweale nu Cristo gaba ulia kle nga dba ai giti, Chube ama ulita Chugagwalla.  
\v 16 Chube ole cha gerule ba giti ene: “Chube, ba kira ulita molen, ba ñage age ulita. Cha gerule ba ole ba kwian una Efesomu Cristo gerua ganga ta kira gbe ma no mo Oña kiralla giti.  
\v 17 Ba ama ulita ta gbe Cristo gai ma no dare diali gwangerugu mo Chugagwallale, ba ama chudaboi mo Oña giti, ene suge amage mo tale Cristo kle diali ama ole. Ama no no ba ole kaire ama no daba ole,  
\v 18 malen cha gerule ba ole Chube, ba ama ta gbe kaire ba kwian na ulita nu Cristo gaba ulia ta gbe suge trate ulia mo tale Cristo no no ama ole chui tangle diali.  
\v 19 Kaire ba ama ta gbe suge moge Cristo diali ta no ama ole diali ta agekalin no ama alin, agwa ulia ni be ñage suge amage trate ulita Cristo no diali ama ole giti, e giti mi suge amage ulita. Agwa noare ba ama ta gbe chege diali Cristo talla ole gire ene ama be kle ta no trate ole ba takalin kare ama be tañachuge diali ba giti nga suga no no ole ba talla be kle ama tale. Chube, cha gerule ba ole ene kwian Cristo gerua ganga una Efesomu giti. Ene nobi.” 
\p  
\v 20 Cha kle gerule ene Chube ole ba ulita giti, uñale chage che lle ulita kade Chubege ama ñage age ulita mo kiralla giti, ama kira molen lle ulita boi. Kaire Chube age ma ngle che alin ama takalin kare che kle lle kadege kaire che kle tañachuge gitige, che me ñage tañachuge Chube me ñage che chudaboi lle gweale che takalinge giti. Uñale chage Chube Oña kiralla giti Chube ñage age no ma ngle che kle tañachuge karege. Chube Oña kle che tale, ama giti kle suge chege Chube kle age no diali che alin ta no giti.  
\v 21 Che ulita nu Jesucristo gerua gaba che gerudale no Chube giti Chube agedu no che alin ulita Jesucristo giti. Che gerudale no ngle Chube giti chui tangle diali, ene suge kwian na ulitage Chube noare Chube kweri. Ene nobi. 
\c 4  
\s1 Kwian ulita Jesucristonu mo ta gbadale ta salengwli ole kwaitre alin Chube Oña talla giti 
\p  
\v 1 Cha kle skage Chube gerua Cristo giti dbe gdale, cha gerule ba ulita ole, Chube agedu tanre no ba ulita alin, Chube ba ulita gau mau alin, malen cha takalin ba mo ta gbe chage trate Chube gwa giti Chube takalin kare kwian ulita Chube uñe toidale kare.  
\v 2 Ba me sugedale moge ba ma kweri daba nage, ba diali tañachugadale daba na chudaboi ta no giti, ba nodale daba ole ta no giti, ba mo ta gbadale jage ulita boi daga ngwalege me skochie dabadi me skwatige daba chudaboi, daba age gweale me no ba ole, ba mo ta gbadale no ama ole Chube takalin kare me tañachuge ama kle age gweale ba ole giti.  
\v 3 Ba Cristo gerua ganga Chube ba ulita gbu ule kwaitre alin nga suga no ole, gire nege ba mo ta gbadale toi no modige me kira bate modi, ba mo ta gbadale toi Chube Oña kirallaske diali.  
\v 4 Che ulita Cristo gerua gaba ulia che chege salengwli Cristo jegwalenu kare, che ulita kwian gdaitre alin kare Cristo giti che ulita ta chege salengwli, Chube Oña gdaitre alin kle che ulita Cristo gerua gaba ulia tale, che mo ta gbadale suge moge ulia Chube be age no che alin che be toi ama ole nga ngaña giti chui bdaglige.  
\v 5 Cristo alin allabi che jwannga siere ji chugege agedu me no gdale, ama che ulita Chugagwalla kweri. Che ulita geru Cristo giti ulia gau, malen e giti alin allabi che ulita Chubenu. Che ulita mo ñeangu chiske Cristo alin allabi kalla giti.  
\v 6 Chube ulia gdaitre alin ama che ulita Cristo gerua gaba ulia Ñenua, ama che Chugagwalla kweri ama kle che ulita ta gbe age ama takalin kare, kaire ama kle mo Oña gbe che ulita tale che chudaboanga. 
\p  
\v 7 Che ulita mangire batre Cristo gerua gaba Chube kle che ta gbe ule kwaitre alin kaire Cristo kle ta kete che gdaite gdaitege lle boi no kaire kaire Chube takalin kare daba Chubenu chudaboagda.  
\v 8 Chube gerua degaba unsuialin gerule e giti, chada e gerule: 
\q1 “Ama kwian junnga siere ji chugege, joni nga ngaña giti gire ama ta ketu kwiange ulita lle gweale boagda ama alin.” 
\m Chube gerua degaba unsuialin gerule ene Cristo giti.  
\v 9 Geru kle degaba gerule Cristo joni nga ngaña giti, geru e giti sugedale chege ngeru Cristo kledu nga ngaña giti Chube kle ngwadi chku nga dba ai giti bigire joni naskuni nga ngaña gitini.  
\v 10 Ama chku nga dba ai giti amaña joni nga ngaña giti Chube kle ngwadi, ene ama ñadu mo Oña kage nga dba ai giti chegedale kwian Cristo gerua ganga tale kwian kira gbangale ene Cristo kle nga ulitage nga dba ai giti kaire nga ngaña giti.  
\v 11 Cristo kle ta kete kwian Chubenu gdaite gdaitege lle boi no kaire kaire Chube takalin kare, Cristo ta kete kwian gwealege Jesucristo gerua kete dabage, Cristo ta kete kwian na gwealege Chube gerua kete dabage Chube Oña kle geru kete amage kare, Cristo ta kete kwian na gwealege geru no Cristo giti trage kwian me Cristo gerua uñe ole, Cristo amaña ta kete kwian na gwealege daba Cristo gerua ganga ulita manade Chube geruadi kaire daba tke tangle Cristo gerua giti.  
\v 12 Cristo ta kete ene kwian ama gerua gabage gdaite gdaite kaire kaire, ene kwian ñage age Cristo takalin kare daba chudaboi, ñage daba kira gbe lle boi kaire Chube alin. Ene che ulita Cristo gerua ganga ñage kira gai ma ngle ule kwaitre alin,  
\v 13 gire bdagli che ulita Cristo gerua ganga be chege mo ta gbaba ule tañachuge salengwli ulita kwaitre alin Cristo giti, che ulita be chke Jesucristo Chube Kirolla gerua uñe ma no trate. Ene che ñage toi ta giti che ñage chege trate no Cristo kare ama gerua giti.  
\v 14 Che kle mo ta gbe ulia ulia Cristo geruadi ene che mi chege kirogwa soli anblitakle ngwale kare lle gweale giti. Kwian tanre kle chage geru me ulia ngwale trage kwian ulita ole kle kwian anblite geru ngwaledi. Agwa che bai kle mo ta gbe ulia ulia Cristo geruadi, che mi mo chuge ngwadi mo anblitange kwian ege geru ngwale giti, che mi geru ngwale gai ulia.  
\v 15 Che toidale geru ulia ole mo tale, che geru e ulia tragadale ta no ole kwian nage ene che be kira gai chage no ma ngle ene che be ñage chage no Cristo kare, Cristo che ulita ama gerua ganga Chugagwalla.  
\v 16 Cristo che ulita gdaite gdaite gbu ule kwaitre alin ama jegwalenu kare, malen che ulita mo chudaboadale ongoru ongoru ene che ñage chege mne gdaite salengwli ule ta no ole. Che ulita gdaite gdaite mo ta gbadale lle boi salengwli Cristo ta kete chege kare daba chudaboagda, ene che ulita ñage kira gai moge ongoru ongoru, che ñage toi no ule ta no ole. 
\s1 Kwian Jesucristo gerua ganga toidale nganake 
\s1 me ñage toi ngeru kare 
\p  
\v 17 Geru ai giti cha gerule ba ole Cristo cha ta gbu gerule ba ole kare: Ba me ñage toi dare kwian me Cristo uñe kare, kwian me Cristo uñe kle toi diali tañachuge ama takalin kare diali tañachuge age me no.  
\v 18 Kwian me Chubenu kle mo ta gbe diali Chube gerua dollale kle mo tke dole Chube geruadi gire ene me chke uñale kwian ege kwian kle age me no giti, me kle Chube gerua tallade malen e giti ama kle tañachuge diali age me no tanre, geru ulia me suge amage, Chube talla me kle ama ole.  
\v 19 Kwian ene me suge moge jiske dare mo tale ama kle age me no giti ni ibule kwian na ngeru ama kle age me no giti, kwian ene kle mo chuge ngwadi age me no me no ulita diali ama takalin kare, kwian ene takalin age me no ma ngle gwangerugu diali.  
\v 20 Agwa ba ulita Cristo gerua gau ulia malen uñale bage ba me ñage toi ene kwian me Cristo gerua gaba kle toi kare.  
\v 21 Ba geru ulia Cristo giti keruchugu ba ulita tkere tangle tanre geru ulia giti, ba geru ulia jun giti suge bage ba mo ta gbale toi no trate Chube gwa giti.  
\v 22 Ba ulita toidu age me no tanre ba bebi Cristo gerua gai gire, agwa nege ba Cristo gerua gau ulia malen ba me toidale tañachuge age me no dare ba agedu ngeru kare. Ngeru ba chagedu talla me no ole talla e ba ulita gbu nga blite jogengale sugekare Chubege, agwa nege Cristo giti ba mo ta gbale tañachuge no Cristo takalin kare.  
\v 23 Ba ulita Chube Oña chugadale ngwadi ba ta blite tañachuge nganake, ba me mo chuge ngwadi tañachuge ba tañachugu ngeru kare, ene ba chege ta jagere ole toi no trate Chube takalin kare.  
\v 24 Chube takalin ba ta chege no trate ama kare malen ba mo ta gbadale toi ta jagere ole Chube takalin kare, ene suge ulia ba mo ta blitu toidale no trate Cristo kiralla giti Chube ba ta gbe kare toi trate. 
\p  
\v 25 Ba ta me ngeru kare malen ba me geru jinadale dare ngwale, ba gerudale diali ulia moge ongoru ongoru. Che ulita Cristo gerua gaba che ulita kwian gdaitre alin kare che ta chege salengwli ulita malen che gerudale ulia no diali daba ole.  
\v 26 Ba skochie dabadi daba age gweale me no giti gire ba me mo ta gbadale age me no daba e ole ongoru ongoru. Ba ta skochie chugale ngwadi blikare chui gbaitre alinge me chege tañachuge dare daba agedu me no ba ole giti.  
\v 27 Ba ta skochie chuge ngwadi, ene che dolla Satanás me ñage ba ta gbe age me no daba ole. 
\p  
\v 28 Ba bai skwe bo ngeru ba bebi Cristo gerua gai ulia gire, ba mo ta gbadale me skwe boi dare, ba mo ta gbadale lle boi mo kodi agali ene ba ñage lle molen toigda kaire ba ñage daba me lle molen chudaboi ba llea giti.  
\v 29 Ba ulita Chube gerua Cristo giti gau ulia ba me gerudale jain jain sugaska, ba geru no jwandale mo kate diali daba kira gbe geru no ba kle gerule giti kaire ba daba ta gbe nga suga no ole, geru ulita no ba jwandale mo kate daba na ologe, ba gerule no ene giti daba ñage mo ta gbe no Chube ole, ene ba kle age no daba alin Chube gwa giti.  
\v 30 Ba me agedale me no ni sidri Chube dollale Chube Oña ta gbagda olire. Chube mo Oña kagu ba tale ene Chube Oña giti suge trate bage ba Chubenu ba be joge toi chui bdaglige nga ngaña giti Chube ole, chui ege ba be chege no trate ulita Chube gwa giti, ba mi age me no dare. 
\p  
\v 31 Nege tangle Chube Oña kle ba tale malen ba mo ta gbadale age no diali, ba me jainchke mo tale dabadi kaire ba me nga gbe jwlitenga mo chuga giti sko ole, ba me gerule ta skochie daba ole, ba me kira bate daba ole kaire ngautenga daba gwage me no, ba me ka boi daba ole kwian na gwa giti, ba mo lingadale siere lle ulita kle ba gbe age me noge, ba agedu me no ulita chugale ngwadi.  
\v 32 Ba mo ta dbadale no daba ole ba mo chudaboadale ongoru ongoru, ba taidale dage dabage. Daba gweale age me no ba ole, ba tale ama agedu me no talla mliadalenga ba chegedale ta no ole ama ole. Ba agedu me no talla Chube mliunga ba Cristo gerua gau ulia gire, ba agedale ene kaire daba na alin. 
\c 5  
\s1 Kwian Jesucristo gerua ganga mo ta gbadale 
\s1 chage Chube takalin kare 
\p  
\v 1 Ba ulita Chube olia kare Cristo giti, Chube no no ba ole, ba mo ta gbadale chage Chube talla ole age ama takalin kare.  
\v 2 Ba mo ta dbadale no daba ole diali daba chudaboi salengwli Cristo ta du no che ole kare. Cristo no no che ole, ta ene ole ama mo chugu ngwadi jogeda che agedu me no giti ene ama che jun siere ji chugege che agedu me no gdale. Cristo agedu ene che alin, e giti Chubedi nga suga noare, Chube gwage Cristo agedu no no kwian ulita alin. Che Chubenu mo ta gbadale age no Chube gwa giti ta dbe no daba na ulita ole. 
\p  
\v 3 Cristo giti Chube gwage badi ba kwian no trate, malen ba ulita Chubenu mo ta gbadale age me no chuge ngwadi, ba muirenu ba onbrenu me mo ta gbadale mo chuge ke giti, kaire ba me mo ta gbadale age me no sugaska ni sidri, kaire ba me mo ta dbadale takalin lle ulitage mau alin. Ba kwian Chubenu me mo ta gbadale age me no ene kare ni ba ñage tañachuge age ene giti.  
\v 4 Ba kwian Chubenu me geru jain jain sugaska trage daba ole, kaire ba me geru ngwale mia mé tragale trage daba na ole, kaire ba me kidere jain jain onbre muingadi muinga onbredi. Age ene ai ulita kare e me no kwian Chubenu alin. Ma no ba gerule no Chube giti Chube agedu no ba alin giti, ba mo gate Chube giti daba na ole.  
\v 5 Bage chkedale uñale kwian agenga me no ai kare me ñage joge toi Chube ole Cristo ole nga ngaña giti: Kwian onbrenu muirenu mo chuganga ke giti, kaire kwian agenga me no sugaska, kaire kwian mo ta dbanga takalin lle ulitage mau alin kle lle e gbe ngeru mo tale Chubege, kwian e kare ulita me ñage joge toi Chube ole Cristo ole nga ngaña giti.  
\v 6 Ba me mo chuge ngwadi mo anblitange ngwale kwian geru ngwale dbangage, ba me age me no kwian e kle age kare, kwian e me kle Chube gerua gbe gdadi me kle age Chube takalin kare, kwian e giti Chube be ji kweri gbe mno ama kle age me no gdale.  
\v 7 Ba ulita Chubenu me chegedale ta ule kwian agenga me no ole gai mo skatemanallale. 
\p  
\v 8-10 Ba bebi Cristo gai ulia, ba ulita chagedu kwian e kle chage kare nga jereske kare, ba me Chube uñu, ba agedu me no ulita ba toidu talla sugekare Chubege. Agwa ba Cristo gerua gau uliage gwangerugu ba kle chage nga chralege kare, Cristo ba ta gbu suge ba toidale Chube takalin kare. Ba toi ene suge bage kare gire bedre bedre be suge ma trate bage ba chagedale ma no Cristo che Chugagwalla takalin kare. Cristo ba ta gbe suge ba kwian Chubenu mo ta gbadale age no daba na alin, Cristo ba ta gbe suge ba mo ta gbadale toi no trate kwian na gwa giti, kaire Cristo ba ta gbe suge ba mo ta gbadale gerule no ulia diali daba ole. Cristo ba ta gbe suge ene gire ba ñage chage age no ama takalin kare.  
\v 11-12 Me no kwian agenga me no gatedi age me no ama kle age kare, agwa ma no ba kaboadale mno kwian kle age me no ole. Nga chie ibule chedi gerule kwian ulita kle age giti skwlenre ni che tañachugakalin ama kle age me no giti, agwa che gerudale ama ole ene ama mo ta blite.  
\v 13 Ba Chube uñe, ba mo ta gbadale toi no trate Chube takalin kare kwian agenga me no gwa giti, ene ba giti kwian kle age me noge be chke uñale ama me kle age no trate,  
\v 14 gire ene ama ñage mo ta blite Cristo gerua gai ulia. Geru gweale kle degaba kwian me Cristo uñe giti, chada e kle gerule ene: 
\q1 “Kwian me Cristo gerua uñe kle chege salengwli kwian kle gbe ngajrege kare, kwian ene Cristo gerua gadale. 
\q1 Kwian kle chage sugekare Chubege, ama salengwli kwian jogebakeda kare, kwian ene mo ta gbadale Cristo gerua gai ulia. 
\q1 Gire ene Cristo be ama ulita ta gbe no trate nga suga no ole.” 
\m Geru ai kle degaba ene, ba geru ai gbe gdadi mo tale. 
\p  
\v 15 Ba ulita mo ta gbadale chage ta giti kwian me Chube uñeske, ba me mo chuge ngwadi age me no kwian me Chube uñe kare ba mo manadale toi ta no trate ole diali kwian gwa giti.  
\v 16 Chui nege tanglege kwian tanre kle age me no, malen ba kwian Chubenu me ñage chui kagenga ngwale, ba diali mo ta gbadale age no kwian alin kwian chudaboi, ba gerudale no Chube giti kwian ole ba ñage gire.  
\v 17 Ba me mo ta gbadale agenga ngwale ngwale kwian ta me no kare agwa ba mo ta gbadale suge moge Chube takalin ba age mine kaire ba agedale Chube kle ba ta gbe age kare.  
\v 18 Ba me lle gage jale mo gbe llale, e kle ba gbe age tanre me no. Ba llale ba chege salengwli kwian jwligebanga kare. Ba me mo chuge ngwadi chege lle jai ene, agwa ma no ba nu Cristo gerua gaba ba Chube Oña chuge ngwadi ba kira gbe age no ulita Chube takalin kare.  
\v 19 Chube Oña kiralla giti ba agedale ene: Ba geru tragadale daba na ole Cristo giti ongoru ongoru, Chube gerua degaba unsuialin kada Salmos, chada e giti ba gerudale daba ole daba ta gbe nga suga no ole. Ba mo gatadale ule daba ole Chube giti Chube ollade nga suga noare ole.  
\v 20 Ba gerudale diali Chube che Ñenua ole ene: “Chube, noare ba kle age no cha alin diali, ba kle cha manade no, ba kle cha chudaboi diali lle ulita giti.” Ba gerudale ene Jesucristo che Chugagwalla kalla giti Chube ole Chube kle age no ba alin giti. 
\s1 Onbre kaire muinga mo jwanba toidale 
\s1 mine ule Chube gwa giti 
\p  
\v 21 Ba onbre ba muire mo ta gbadale salengwli modi age no daba alin. Ba tañachugadale diali daba na Chubenu chudaboi, ba daba gadale dage ba nodale ama ole diali Cristo no kwian ulita ole kare. 
\p  
\v 22 Ba muinga ulita mo jwanbale, cha gerule ba ole, ba mo ñengulalla gadale dage ama kerua gbe gdadi age ama gerule kare. Ba Cristo gai dage mo Chugagwallale, talla ene ole ba mo ñengulalla gadale dage kaire.  
\v 23 Ba muinga mo jwanba, bage chkedale uñale ba ñengulalla chege ba chugagwalla salengwli Cristo chege kwian ulita nu ama gerua gaba ulia Chugagwalla kare. Che kwian Cristo gerua gaba ulia che Cristo jegwalenu kare che chege amanu ulita, Cristo che jun siere ji chugege age me no gdale, Cristo che Chugagwalla.  
\v 24 Che kle mo ta gbe Cristo gai dage mo Chugagwallale, che kle age Cristo takalin kare. E kare ene ba muinga mo jwanbale mo ñengulalla gadale dage diali mo chugagwallale ama gerua gbe gdadi ama gerule kare. 
\p  
\v 25 Ba onbre ulita mo jwanbale, ba nodale mo muira ole salengwli Cristo no kwian amanu ole kare. Cristo no no che ole malen Cristo mo chugu ngwadi boi daga ngwale gwaleda che ulita alin.  
\v 26 Cristo agedu no ene ulita che alin ene ama giti che kwian amanu be chege ta no trate ole me jiske Chube gwa giti. Che Cristo gerua gai ulia giti che tien gitiru ji chugege agedu me no gdale gire che mo ñeange chiske mo kaite nate che Chubenu ulia Chube che ta blitu ulia chage no trate ama takalin kare.  
\v 27 Diali Cristo kle che ta gbe ma biale ama chieni chuia ngwange, Cristo takalin che kwian amanu ta chege no trate ulita Chube gwa giti chui ege ni tañachuge me no ni age me no sidri, ene Chube gwa giti che be no trate Cristo takalin kare.  
\v 28-30 Cristo no no che ulita ama gerua gaba ulia ole malen ama kle age no che alin diali, ama kle che manade no no, che Cristo jegwalenu kare. E kare ene kaire kwian onbre mo ta dbadale no mo muira ole salengwli Cristo mo ta dbe no kwian amanu ole kare. Kwian onbre mo jwanbale mo ta dbadale no ene mo muira ole, ama toidale no no mo muira ole mo muira manade no, onbre nodale mo muira ole ama no mo ole naskuni kare, onbre no ene mo muira ole e salengwli ama kle mo jegwale manade no kare. Ni kwian gdaite mo ta dbe me no mo ole naskuni, kwian diali kle mo manade no bligda giti kaire lle na ulita giti ene ama ñage toi no. Ene kaire onbre mo ta dbadale mo muira manadale no.  
\v 31 Onbre mo jwen muinga ole ama gdabonate chege kwian gdaitre alin kare. Chube gerua degaba unsuialin kle gerule e giti, chada e gerule: 
\q1 “Kwian onbre mo jwankalin muinga ole, ama mo ñenua mo chebia chugadale ngwadi mo ta gbe ule muinga ole gire ene ama gdabonate chege kwian gdaitre alin kare ta salengwli ole.” 
\m Chube gerua degaba unsuialin gerule ene onbre muinga mo jwen giti.  
\v 32 Chube gerua e no kweri chkedale uñale nate chege, suge chage geru e kle gerule onbre muire mo jwen giti agwa kaire kle gerule Cristo giti kaire kwian Cristonu giti.  
\v 33 Cha gerule nakwaite ba ulita ole, ba kwian onbre mo jwanbale, ba mo ta dbadale no mo muira ole diali ba no mo ole naskuni kare. Kaire ba muinga mo jwanbale, ba mo ñengulalla gadale dage diali ama gerua gbe gdadi ba ama gai mo chugagwallale. 
\c 6  
\s1 Kirogwa ñenua kirogwa chebia kaire kirogwa mo gadale dage ongoru ongoru, ama ulita toidale no ule 
\p  
\v 1 Cha gerule ba ole, ba kirogwa ulita muirenu onbrenu, ba mo ñenua mo chebia gadale dage diali, ba agedale ba ñenua ba chebia gerule kare Chube gerua degaba gerule kare. Ba age ene, e no trate ba Chugagwalla Chube gwa giti.  
\v 2-3 Moisés nu Chube gerua degaba unsuialin gerule kwian toidale mine Chube gwa giti, geru e ulita gbataboko jigle degaba unsuialin tangle, geru eske geru gbaitre alin kle gerule Chube be age no kwian alin kwian bai geru e gbe gdadi. Geru e gbaite kle degaba ene: 
\q1 “Ba kirogwa ulita, ba nodale mo ñenua mo chebia ole ama gai dage. 
\q1 Ba age ene, ba ñage toi nga suga no ole kaire ba ñage toi juma sbali nga dba ai giti.” 
\m Moisés nu Chube gerua degaba unsuialin gerule ene, kaire nege tangle ba kirogwa ulita agedale ene geru degaba gerule kare. 
\p  
\v 4 Ba kirogwa ñenua kirogwa chebia, ba me ñage ka boi ngwale mo kirogwalla ole kirogwa ta gbe skochie ngwale, kirogwa kle age giti gweale me no, ba ama chudaboadale ta no giti ba ama ta gbadale ama toidale mine Chube takalin kare kaire ba ama tkadale tangle geru ulia giti. 
\s1 Kwian lle boanga kaire kwian chugagwalla mo gadale dage ongoru ongoru, ama toidale no ule 
\p  
\v 5 Ba ulita lle boanga ba chugagwalla alin, ba mo chugagwalla gadale dage kaire ba mo ta gbadale lle boi ulita ta no giti ama ba gbe lle boi kare. Ba agedale ene ulita salengwli ba lle boi Cristo alin kare ba kle ama gai dage kare.  
\v 6 Ba me mo gbadale lle boi no ba chugagwalla kle ba ole ule alin allabi gire, ene ba chugagwalla ñage gerule no ba giti, ba me tañachugadale ene. Ba chugagwalla kle ba ole gwage badi, ba lle boadale no mo chugagwalla alin, ene kaire ba chugagwalla me kle ba ole gwage badi, ba lle boadale no gballa mo chugagwalla alin ama kle gwage badi kare. Ba agedale ulita salengwli ba lle boi Cristo alin kare ta no giti Chube takalin ba age kare.  
\v 7-8 Chkedale uñale bage Chube be age no kwian alin kwian agedu no ñanale ba kwian lle boanga alin kaire kwian ba chugagwalla alin Chube be age salengwli ba ulita alin. Malen ba lle boadale no no nga suga no ole, me tañachuge ba kle lle boi kwian alin allabi agwa kaire ba kle lle boi Cristo alin. 
\p  
\v 9 Ba ulita kwian lle boanga chugagwalla, ba taidale dage kwian lle boanga ba alinge, ba me ñage gerule me no ama ole ama oña gbe boi daga ngwale. Ba kwian chugagwalla, chkedale uñale bage kaire lle boangage Chube gwa giti ba ulita salengwli, kwian lle boanga ba alin Cristo ama Chugagwalla kaire Cristo ba Chugagwalla, Chube gwa giti ba ulita salengwli. Malen ba me kwian lle boanga ba alin gbe boi daga ngwale. 
\s1 Kwian Jesucristo gerua ganga mo gbadale biale kiraske Chube geruadi dolla Satanás ngeru 
\p  
\v 10 Nege cha gerule ba ulita ole ba Cristo gerua gaba ba ulita Chubenu, ba ulita che Chugagwalla Chube kiralla gadale mo kira gbagda che dolla Satanás ngeru.  
\v 11 Che dolla Satanás me takalin ba chage no Chube takalin kare malen ama kle mo chuge ba ole ba gbagda age me no. Che dolla Satanás kle age ene ba ole malen ba mo ta gbadale ngle kiraske Chube geruadi ene ba kle biale Chube kirallaske dolla Satanás ngeru, ene dolla me ñage kirachke badi ba gbe age me no Chube dollale. E salengwli guardia donga nga Romamu kle mo gbe biale no trate dole ama dolla ole kare, ama kle mo ngama tke lle mno giti kle lle dogda gai mo kote kira batagda, ene ama me lentige ama ñage kirachke ama dolladi. Ba mo ta gbadale biale kiraske Chube geruadi dolla Satanás ngeru salengwli guardia donga nga Romamu kle mo gbe biale mo ngama tke kare dole gire.  
\v 12 Che Cristo gerua ganga me kle dole kwian che kare salengwli ole, agwa che kle dole dolla Satanás ole kaire dolla na tanre me no ulita kle chage nga ulitage nga dba ai giti kaire nga ngaña ngwalege, ama lle boanga mo chugagwalla Satanás alin ama Satanás chudaboangalla, ama ulita ole che mo ta gbale dole dolla ole.  
\v 13 Ba mo ta gbadale ngle kiraske Chube gerua ole ene ba kle mo ta gbaba kirallaske dole dolla Satanás ole, ene dolla Satanás mo chuge ba ole gweale, Chube kiralla giti ba ñage kirachke dolladi ba ñage chege kiraske Chube kiralla giti. E salengwli guardia donga kle mo gbe biale ama dollale ngwange kare, guardia donga kle mo ngama tke lle mno giti dole ama dolla ole, ama mi mo chuge ngwadi dolla kirachke amadi. 
\p  
\v 14 Ba mo ta gbadale kiraske dolla Satanás ngeru salengwli guardia donga kle mo gbe biale dole kare: 
\p Guardia donga kle lle mno luge mo bonga tangle, lle e giti lle na ulita ama kle gbe mo jegwale kle chege kejre ama jegwale. E kare ene geru ulia chegedale ba tale ba gerudale diali ulia daba gwale me sole ni sidri, ene dolla Satanás me ñage age ba ole, ba kle chege Chube geruaske. 
\p Guardia donga kle lle gbe mo ta ngnagu mo ta managda, e kare ene ba mo ta gbadale chagé no trate Chube gwa giti, ene dolla Satanás me ñage age ba ole ba mo gbe chage no Chube ole giti. 
\p  
\v 15 Guardia donga kle lle tke mo serage chagegda ene kle biale dole, e kare ene ba kledale biale joge Chube gerua Jesucristo giti trage kwian na ole ama ta gbe nga suga no ole, ene dolla Satanás me ñage age ba ole Chube gerua kle ba tale, e ba ta gbe chege kiraske. 
\p  
\v 16 Guardia donga kle lle mno kweri gai mo kote gbe mo ngnagu, ene ama dolla jrogli mlie ama giti, jrogli me ñage joge ama udaske. E kare ene diali ba mo ta gbadale trate Chube ole ama gai ulia kiraske diali, ene Chube be ba manade no, dolla Satanás me ñage mo chuge ba ole ba gbale age me no, ene ba me mo ta dbe kennga dolla Satanádi, ene ba ta chege kiraske kira batale dolla Satanás ole. 
\p  
\v 17 Guardia donga kle lle gbe mo chugage ene ama mi lentige chugage, e kare ene ba Cristo gerua gai mo jwangda siere ji chugege age me no gdale, ene chke uñale bage ulia dolla Satanás me ñage kirachke badi, ene ba chege kiraske dolla Satanás me kirachke badi. 
\p Guardia donga kle chage sbadi ole mo manale, e kare ene Chube Oña kle Chube gerua gbe suge bage mo tale gire ba Chube gerua gadale gbadale no mo chugale ene Chube gerua sbadi kare e giti ba ña dole dolla Satanás ole, geru e ba gbe kirachke dolla Satanádi. 
\p  
\v 18 Ba ulita Chubenu mo ta gbadale gerule Chube ole diali Chube Oña kle ba ta gbe gerule kare lle ulita kle boi giti ba kira kade Chubege ene ba me age me no Chube dollale dolla Satanás takalin kare. Ba kledale ta giti me skwatige gerule Chube ole, ba mo ta gbe gwangerugu gerule diali Chube ole kwian na ulita Cristo gerua gaba giti.  
\v 19 Kaire agwe ba gerudale Chube ole cha giti Chube cha ta gbe gerule trate kwian ole Cristo giti, kaire ama cha ta gbe gerule no trate ama kirallaske kwian ole me kennga gerule kwian ole, ene cha giti kwian ulita israelita kaire me israelita ñage geru Cristo giti keruchuge ñage geru Cristo giti gai ulia, ene ama ñage chege no salengwli kwaitre alin Chube gwa giti.  
\v 20 Chube cha kagu nga ulitage ama gerua e kete kwian ulitage, geru e kete kwiange giti cha tkere skage, cha takalin ba gerule Chube ole cha giti diali ene cha me ta kennga gerule Cristo gerua giti kwiange aini cha kle skage ngwadi. 
\s1 Pablo gbi kage bdagli kwian Chubenu una Efesomu alin 
\p  
\v 21 Cha kle chada ai kage ba alin Tíquico ole, cha no ama ole ama che daballa Jesucristo giti ama cha chudaboanga no Chube gerua Jesucristo giti dbanga kwian nage. Ama ole cha kle chada ai kage ba alin kaire ama be geru ulita trage ba ole cha giti cha kle boi giti ulita nga ainige.  
\v 22 Cha takalin chke uñale ba ulitage cha ulita kle boi giti nga ainige malen cha kle Tíquico kage ba ngwadi, ene ama ñage geru trage ba ole kaire ñage ba ta gbe chege kiraske ene ba me chegedale tañachuge tanre cha kle boi giti. 
\p  
\v 23 Cha bitalla ulita Jesucristo giti, cha takalin Chube ba ta gbe nga suga no ole kaire ama ba ta gbe chege chage gwangerugu Jesucristo gerua ai gai diali mo tale ene ba toi no nga suga no ole ongoru ongoru daba ulita Jesucristo gerua gaba ole.  
\v 24 Cha takalin Chube age no no ba ulita alin ba bai nu mo ta gbaba no diali Jesucristo che Chugagwalla ole. 
\p Geru ai ene ulita cha Pablo chada degangu ba kwian Chubenu ulita una Efesoge alin. Che kle meni.