\id COL - Buglere NT -Panama 2008 (DBL -2013) 
\h COLOSENSES 
\toc1 Pablo Nu Chada Degaba Kwian Chubenu Una Colosamu Alin 
\toc2 Colosenses 
\toc3 Col 
\mt1 Pablo Nu Chada Degaba Kwian Chubenu Una Colosamu Alin 
\mt2 Carta de Pablo a los Colosenses 
\ip Pablo kledu skage una Romage Jesucristo gerua dbe gdale gire Chube ama ta gbu chada ai degange kwian Jesucristo gerua ganga una Colosamu alin. Pablo agali me jo Jesucristo gerua kete kwiange una Colosage agwa kwian una emu geru e keruchugu onbre kada Epafras giti. 
\ip Epafras jo chke Pablodi Pablo kledu skage una Romage gire, Epafras geru ketu Pabloge kwian daba tkanga tangle geru me uliage kle kwian Chubenu anblite una Colosage. Kwian daba tkanga tangle geru me uliage kledu gerule kwian ole Jesucristo me Chube Kirolla agwa Jesucristo lle boanga Chube alin nga ngaña giti alin allabi. Kaire kwian daba tkanga tangle geru me uliage kledu kwian gbe age ulita Moisés nu Chube gerua degaba unsuialin kle gerule kare, ama gerudu kwian agedale ene alin allabi gire ene kwian chege no trate Chube gwa giti. Malen Pablo chada ai degangu kwian Jesucristo gerua ganga una Colosage ulita alin kwian e ta gbagda me geru ngwale e gbe gdadi. Chada ai giti Pablo kwian ta gbu chke uñale trate trate Jesucristo ulia Chube Kirolla amaña ulia Chube. 
\c 1  
\s1 Pablo gbi kage chada giti kwian Chubenu 
\s1 una Colosamu alin 
\p  
\v 1-2 Cha Pablo chada ai degange ba ulita Jesucristo gerua gaba ulia una Colosage alin: 
\p Chube tale Chube cha gau cha gbu Jesucristo gerua ketangale dabage, cha ule che daballa Jesucristo giti kada Timoteo ole gbi kage chada ai giti ba ulita alin, ba ulita kle mo ta gbe no Jesucristo gerua gai ulia diali kaire ba kle chage no trate Chube gwa giti mo ta gbe diali gwangerugu Chube geruadi. Cha takalin Chube che Ñenua kaire Jesucristo che Chugagwalla age no no ba ulita alin, kaire Chube nga suga no gbe ba ulita tale. 
\s1 Pablo gerule Chube ole kwian Jesucristo gerua gaba 
\s1 una Colosamu giti 
\p  
\v 3-4 Chage geru chku uñale ba Chube gerua Jesucristo giti keruchugu ba geru e gau ulia ba mo ta gbu ulia ulia gwangerugu geru Jesucristo giti gai mo tale, kaire chku uñale chage ba kle mo ta dbe no daba na ulita Chubenu ole. Geru e ulita ba giti chku uñale chage malen diali cha kle gerule Chube che Chugagwalla Jesucristo Ñenua ole ba giti, Chube ole cha kle gerule no ba giti ai kare: “Chube, noare kwian gweale una Colosamu ba gerua Jesucristo giti gau ulia, ama ulita kle toi no modi ongoru ongoru.” Cha kle gerule ene no ba ulita giti Chube ole.  
\v 5 Nge jondege ba geru ulia Jesucristo giti keruchugu, geru e sugedu bage ba geru e gau ulia, e giti ba be tien gitiru ji chugege agedu me no gdale kaire ba ñage toi no diali chui tangle nga ngaña giti Chube ole. Ba geru e no gau ulia mo tale, geru e ba ta gbe suge bdagli nga ngaña giti Chube be age no ba alin, malen e giti ba ta dbe no diali daba na Chubenu ole kaire ba kle mo ta gbe ulia ulia geru no Jesucristo giti gai ulia gwangerugu.  
\v 6 Geru Jesucristo giti jo ketaba bage ba geru e gau, geru e ba ta blitu, geru e amaña kle chage nga ulitage kle kwian tanre ta blite Chube ole, geru e kle kwian tanre ta gbe ma ngle diali salengwli geru e kle ba ulita ta gbe kare. Ba ulita geru Jesucristo giti keruchugu gerule Chube talla no che ole giti, chku uñale ba ulitage Chube talla no Jesucristo giti che ole geru e ulia, gire ba geru e gau.  
\v 7 Che daballa no Jesucristo giti kada Epafras ama kle lle boi ule cha ole Jesucristo gerua dbe kwian nage, ama geru Jesucristo giti du ngerutabi baske, ama giti ba Jesucristo gerua gau ulia, kaire Epafras amaña kle ba chudaboi kle ba ta gbe gwangerugu Jesucristo geruadi, ama lle boanga no Jesucristo alin ba ulitaske.  
\v 8 Epafras chku aini cha ngwadi geru ba ulita giti dbe, ama gerudu cha ole ba ulita kle mo ta dbe no daba Chubenu ole Chube Oña kle ba ulita ta gbe toi kare no modi ongoru ongoru geru Jesucristo gitidi. 
\p  
\v 9 Geru chku uñale chage ene ba ulita giti, chui ege gwangerugu cha gerule diali Chube ole ba ulita giti, cha takalin Chube ba ulita ta gbe suge no trate ama takalin mine ba alin, kaire cha takalin Chube ba ta gbe suge ma ngle Jesucristo gerua giti, ene chke uñale bage ba toidale mine no Chube takalin kare.  
\v 10 Cha takalin Chube ba ta gbe suge no ene, ene ba be ñage toi no kwian na gwa giti ba Chugagwalla Jesucristo takalin kwian amanu toi kare, ba toi no ene gire Chubedi nga be suga noare, ba ulita kle age ama takalin kare. Chube ba ta gbe toi ama takalin kare ene ba be age no daba na ulita alin lle ulita giti diali kaire ba be Chube uñe ma no chui kaire kairege ba ta be chke ma ngle Chubedi.  
\v 11 Chube kiraske tanre, ama ñage age ulita mo kiralla giti ba ulita alin, malen cha gerule diali ama ole ama ba ulita kira gbe ngle ba kle boi daga ngwaleske ene ba be ñage jage ta no ole ba be ñage mo ta gbe chage gwangerugu kiraske me mo tallade me skwatige ba kle boi daga ngwaleske, ene ba ñage mo ta gbe diali nga suga no ole Chube kirallaske.  
\v 12 Ba diali gerudale no Chube che Ñenua ole Chube agedu no ba alin giti ene: “Chube, noare ba kle age no cha alin diali, cha gerule no ba giti, ba Chube ulia kweri kiraske. Ene nobi Chube.” Ba gerudale ene diali Chube ole nga suga no ole mo tale. Ulia Chube agedu no no ba ulita alin, Chube ba ta gbu Jesucristo gerua gai ulia, Jesucristo giti Chube ba gbu biale no trate toi bdagli Chube ole nga ngaña giti ule kwian na ulita Chubenu ole. Nga ngaña giti Chube be age no no ba ulita alin.  
\v 13-14 Ulia Chube agedu no che ulita alin. Ngeru che kledu age me no Chube dollale dolla Satanás takalin kare, che kledu chage nga jereske kare sugekare Chubege gire che Jesucristo gerua gau ulia giti Chube che jun siere age me no Satanás takalin karege gire ene Satanás me ñage chege che chugagwallale dare ngeru kare. Che Jesucristo gerua gau ulia gire Chube che ta blitu che jun siere ji chugege agedu me no gdale, che agedu me no ama talla mliunga ulita. Chube no no mo Kirolla Jesucristo ole malen Chube che ta gbu Jesucristo gai mo Chugagwallale, ene Jesucristo kiralla giti che ñage age no no diali Chube takalin kare. 
\s1 Cristo noare kweri amaña ulia Chube 
\p  
\v 15 Cristo Chube Kirolla amaña ulia Chube, Chubedi kwian me ñage ten agwa kwian ñadu ten Cristodi Chube Cristo kagu kwian kare toi kwianske nga dba ai giti, gire ene Cristo giti kwian ulitage ñage chke uñale Chube mine, Cristo Chube kaite nate kwiange. Cristo Chube Kirolla gdaitre alin allabi, lle ulita bebi dodale gire Cristo klebi enebi gwangeabi.  
\v 16 Cristo giti Chube lle ulita dodadu lle ulita che ñage tendi nga dba ai giti kaire lle ulita che me ñage tendi nga ngaña giti Chube lle dodadu ulita Cristo giti. Lle boanga Chube alin nga ngaña giti, Chube ama dodadu no ulita, Chube kira ketu amage lle boi Chube alin che me ñage ten amadi. Chube lle ulita dodadu Cristo giti kaire lle ulita e Chube nu dodaba Chube jigu Cristo kote, ene Cristo chege lle ulita mauñale, Cristo ma kweri ma kiraske lle e ulitage, Cristo ma kweri che dolla Satanáge kaire dolla na ulita Satanás chudaboangallage.  
\v 17 Chube bebi lle ulita dodade gire Cristo klebi enebi Chube ole, chui tangle diali Cristo kle nga ulita lle ulita manade mo kiralla giti.  
\v 18 Lle ulita Chube dodadu Cristo chegu lle e mauñale ulita, ene kaire Cristo kwian ulita Chube gerua Cristo giti ganga ulia Chugagwalla kweri. Cristo kle che kwian ulita ama gerua gaba ta gbe age, che chege Cristo jegwalenu kare ulita, Cristo che ulita ta gbe age Cristo takalin kare ama che Chugagwalla. Kaire Cristo Chube Kirolla gdaitre alin jokeda, Chube ama jaba gbuni gwade toidale chui tangle me jogekedani dare, ama boidu ene ngerutabi kwian ulitage, ene kaire kwian ulita jogeda be chkeni gwadeni ama kare. Chube agedu ene Cristo ole ene Cristo chegu lle ulita Chugagwallale ma kweri kwian ulitage kaire lle ulitage.  
\v 19 Chube talla ulita kle Cristo tale, Cristo kiraske ulita salengwli Chube kare, Chube Cristo kagu nga dba ai giti kwian kare toi kwianske gire ene chegu salengwli ulita Chube agali kledu kwianske kare.  
\v 20 Nga dba ai giti nga ngaña giti Chube tadu kwian ulita kaire lle na ulita gbeni no naskuni ama ole Cristo giti, malen ama Cristo kagu toi kwianske gerule kwian ole kwian ñage Chube uñe no Cristo giti. Cristo jokeda kruge, Cristo jokeda giti kwian bai Cristo gai ulia Chube kwian e gai mo skatemanallale salengwli Chube kwian dodadu gwangea kare Chube chegu kwian e ole diali ule kare, ene Cristo giti kwian ulita chegeni Chubenu. 
\p  
\v 21 Ba bebi Cristo gerua gai ulia gire ba kledu mo tke dole Chube ole, ba tale ba kledu tañachuge me no age me no diali Chube dollale, e giti ba chegu sugekare Chubege ni ba Chube uñu sidri.  
\v 22 Agwa nege tangle ba Chube uñe ba Cristo gerua gaba giti. Cristo boidu daga ngwale kwian kare jokeda kwian kare malen ba Cristo gerua gau giti Chube ba gbu no trate mo skatemanallale, ene ba ñage chege no trate ama gwa giti me ta ngeru kare me no ni ba chege jiske sidri lle gweale giti Chube gwa giti.  
\v 23 Ba ta chegekalin diali Chube ole mo tale Chube skatemanallale, ba mo ta gbadale gwangerugu Cristo gerua gai jumale mo tale diali ni joge siere geru ege. Ba tañachugadale diali Chube be age bdagli ba alin giti. Chube gerua Cristo giti jo ketaba bage ba geru e gau ulia, geru sugedu bage chui bdagli Chube be age no ba alin. Geru ai amaña Cristo giti jo ketaba kwian nga na ulitamuge nga dba ai giti, geru ai amaña cha Pablo kle kwian tke tangle giti. 
\s1 Chube Pablo gbe kwian Cristonu chudaboi 
\p  
\v 24 Geru Cristo giti cha kle dbe kwiange, e gdale cha kle boi daga ngwale Cristo gerudu gwangeabi kwian ama gerua ganga be boi kare. Agwa kaire chadi nga suga no cha kle boi daga ngwale giti ba ulita Cristo gerua ganga ulia alin. Chage suge cha kle mo boange daga ngwale Cristo gerua gdale Cristo bole kare che ulita ama gerua ganga alin, ene che ulita ñage chege ama jegwalenu kare kwaitre alin.  
\v 25 Chube cha gbu daba Chubenu ulita chudaboi, ama cha gbu Chube gerua ulita Cristo giti trennga ba ulita me kwian israelitage, geru e Chubenu no ba alin.  
\v 26-27 Chube gerua Cristo giti geru e kwian ulita alin kwian israelita alin kwian me israelita alin. Unsuialin tangle Chube me geru gbu chke uñale cha kwian israelita enusulian oñage chui gwealege Chube be geru amanu kete kwian me israelitage, agwa nege tangle Chube takalin geru e chke uñale nate kwian ulita Cristo gerua gangage, unsuialin tangle geru e me chku nate uñale geru ama ai: Chube be age no no kwian ulita me israelita alin, ba kwian me israelita bai Cristo gerua gai ulia ba tale Cristo be chege diali ba ole ba chudaboi, ene Cristo giti bage be suge ba ñage chege no Chube gwa giti, ba be ñage toi no Chube ole nga ngaña giti chui tangle diali. 
\p  
\v 28 Geru ai amaña Cristo giti cha kle chage dbe kwian ulitaske kwian ulita tke tangle Cristo gerua ulia giti Chube kirallaske kaire cha kle kwian ta gbe ama toidale mine Chube gwa giti, cha kle geru kete ene kwiange ene chui bdaglige Chube gwa giti kwian ulita Cristo ganga ulia ñage chege no trate ta ole Chube gerua giti Chube gwa giti.  
\v 29 Cha takalin chege cha kle gerule kare malen cha kle mo ta gbe kiraske lle boi diali Chube takalin kare Chube kirallaske kwian ulita alin. 
\c 2  
\p  
\v 1 Cha takalin chke uñale ba ulitage cha kle mo ta gbe kiraske ulia gwangerugu ba chudaboi Cristo gerua giti ba ulita ta gbe ma no geru ege. Cha me kle tañachuge cha kle boi daga ngwale giti Cristo gerua dbe gdale, cha me mo tallade e giti agwa cha mo ta gbe ba ulita Chubenu una Colosamu chudaboi kaire kwian Chubenu una Laodiceamu chudaboi kaire kwian Chubenu nga na ulitamu chudaboi. Ulia cha me ba ulita uñe agwa cha kle mo ta gbe kiraske ba chudaboi Cristo gerua giti.  
\v 2 Cha kle mo ta gbe ba kwian Chubenu ulita chudaboi Cristo gerua giti ba ulita kira gbagda mo ta gbe gwangerugu nga suga no ole Cristo gerua giti, kaire cha takalin Chube nga suga no kete bage ba ta gbe ule ulita salengwli ulita mo chudaboi ongoru ongoru ta no ole geru giti. Cha takalin Chube ba ulita ta gbe suge no trate ulita Cristo giti Chube kle age no ba alin ba ulita kwian me israelita alin. Unsuialin tangle geru e me chku uñale kwiange agwa nege tangle geru Cristo giti kle chke uñale kwian ulitage bai Cristo gerua gai ulia.  
\v 3 Cristo alin allabi ñage ba ta gbe ulia ulia Chube talla ulia trate giti, ama alin allabi ñage Chube gerua ulia gbe suge ulita ba tale.  
\v 4 Cha kle geru ai kete bage ene ñage chke uñale bage kwian gweale ñage gerule ba ole Chube giti ba tañachuge ama kle gerule ulia ba ole Chube giti, agwa ama me kle gerule ulia ama kle ba anblite ngwale kle sole ba ole. Cha me takalin kwian ba anblite ngwale geru ngwaledige malen cha kle geru ai kete bage gwangerutabi.  
\v 5 Ulia cha me kle ba ole ule llani ba kle ngwadi agwa chage suge mo tale cha kle ba ole llani kare. Nga suga no chadi ba kle toi no modi ulita kaire ba ulita kle mo ta gbe kiraske Cristo gerua gai ulia gwangerugu. 
\s1 Kwian Cristo gerua gai gire kwian ene ta me ngeru kare 
\p  
\v 6-7 Ba Jesucristo gaubi ulia mo Chugagwallale kaire ene ba mo ta gbadale gwangerugu toi no trate Jesucristo kirallaske Chube takalin kare mo ta gbe diali ulia Jesucristo ole. E salengwli che chude gweale tke dbi noske chude tige no sera joge ulita dbiske, e kare ene che chegedale Jesucristoge. Ba mo kira gadale Jesucristo geruage gwangerugu Epafras ba tku tangle kare Chube gerua giti kaire ba gerule no diali Chube ole Chube kle age no ba alin giti.  
\v 8 Ba kledale ta giti kwian na me kle chage geru ulia olege, kwian ene ba anblitakalin geru ngwalege, ba me kwian geru ngwale trage keruchuge. Geru ngwale e kwian ngwale nga dba ai giti kle daba tke tangle giti geru e me Chube gerua Cristo giti ulia, geru e ngwale kwian kle tañachuge kare kle age mau tale mo chugale, ama takalin ba geru ulia Cristo giti chuge ngwadi, malen ama chie geru e ngwale trage baske ba anblitagda ngwale. Ba Chubenu ulia mo ta gbadale me mo anblitange geru e ngwalege.  
\v 9 Ba me geru e gai ulia kwian geru ngwale dbangage, e me Chube gerua ulia. Cristo giti alin allabi ba ñage Chube gerua ulia uñe. Cristo amaña ulia Chube, Chube talla ulita kle Cristo tale, Cristo klebi Chube ole, Chube Cristo kagu nga dba ai giti, ene Chube chku agali nga dba ai giti kwianske kwian kare, Cristo amaña Chube.  
\v 10 Kwian ulita kle mo gbe daba chugagwallale nga dba ai giti, Cristo ma kiraske kwian e ulitage, kaire Cristo ma kiraske lle boanga Chube alin nga ngaña giti ulitage kaire Cristo ma kiraske che dolla Satanáge kaire ma kiraske che dolla chudaboangalla ulitage. Ba Cristo gaubi ulia malen Chube Oña kle ba tale diali, ba Chubenu, Chube kle ba ole diali ba ta gbe kiraske ama takalin kare. 
\p  
\v 11 Ba Cristo gaubi ulia, e suiagebi Cristo ba ta blitu ba agedu me no ngeruge, ene chui ege dare gwangerugu ba tadu agekalin diali no Chube takalin kare, ba me tadu agekalin me no ngeru kare. Unsuialin tangle Chube kwian israelita gbu kirogwa onbre soli kwara tkenga sidri jwennga kirogwage, kwian israelita agedu ene agali Chube ama gbu age kare, kwara jwennga giti kwian israelita chegu egdage Chube alin, ene sugedu kwian nage ulita kwian israelita e Chubenu. Ba me agedu kwian israelita agedu kare mo ta gbagda no trate Chube gwa giti agwa nege tangle ba Jesucristo gerua gau ulia gire Cristo ba ta blitu Chube ole ama ta me no jun siere bage, gire ta me no jun siere giti Chube agali ba gbu egdage mau alin, ene ba chegu Chubenu.  
\v 12 Ba Cristo gerua gau ulia, ba mo ta gbu suge ulia Chube ñadu Cristo gbeni gwade mo kiralla giti gire ba mo ñeangu chiske, e salengwli ba jokeda ule Cristo ole ba jaba ogle ule ama jaba ole kare, e gerule ba age me no talla ulita chugu ngwadi ba me kle mo ta dbe toi dare age me no ba agedu ngeru kare. Ba chku ngaña chigage, e salengwli ba jaba chkuni gwade Chube kiralla giti ule Cristo ole kare, ene kaire ba me kle toi ngeru kare, ba kle toi Chube kiralla giti Chube takalin kare.  
\v 13 Ngeru tangle ba bebi Chube gerua Cristo giti gai ulia, Cristo bebi ba ta blite bebi ta me no jwen siere bage gire ba kledu sugekare Chubege age me no Chube dollale ba tadukalin kare, malen ba chegu salengwli kwian jogebakeda kare Chube gwa giti ba agedu me no gdale. Agwa ba Cristo gerua gau, e giti Chube ba ta blitu ama ba jun siere ji chugege agedu me no gdale, ene Cristo giti ba ñage toi nga suga no ole diali nga dba ai giti kaire ba be ñage toi chui tangle nga ngaña giti Chube ole. Ulia Cristo giti che agedu me no ulita Chube talla e mliunga, che ta chegu no trate Chube gwa giti.  
\v 14 Ngeru che ulita bebi Cristo gerua gai ulia gire che ulita agedu tanre me no Chube dollale che me agedu Moisés nu Chube gerua degaba unsuialin gerule kare, che chegu jiske tanre diali Chube gwa giti. Agwa Cristo jokeda kruge giti che ama gai ulia gire Chube kle che ta blite che me chege jiske dare Chube gwa giti, che chege trate Chube takalin kare.  
\v 15 Cristo jokeda kruge chkuni gwade giti Chube che dolla Satanás kaire dolla Satanás chudaboangalla ulita gwa gbu modige Chube ma kiraske dolla Satanáge. Chube kirachku Satanádi kaire Satanás chudaboangalla ulitadi kwian ulita gwa giti Cristo chkuni gwade gire, Chube me Satanás jigu kira molen ngle Satanás me kweri Chube kare, Chube kiralla chegu ma kweri kiraske dolla Satanáge. 
\s1 Kwian Chubenu mo ta gbadale me geru ngwale 
\s1 kwian kle chage dbe gai ulia 
\p  
\v 16 Cha gerule ulia ba ole, sugedale bage Cristo ma kweri lle ulitage ama ba Chugagwalla, malen e giti ba me mo anblitange geru ngwalege. Kwian gweale gerule ba ole ba me ñage lle gweale jadale jai kaire bligda gweale gutadale ba me ñage gute, ama kle gerule ba e gute kaire lle gweale e jai gire ba me chege Chubenu dale ba me kle age no Chube gwa giti. Kwian gerule ene ba ole, gire ba me kwian gerua e gbe gdadi. Kaire agwe kwian gerule ba ole ba me kle chui gweale ollade chura kaire kairege kwian israelita kle age kare, kaire ba me kle dai bda chuia ollade kaire ba me kle undege chui undege chuiage kwian israelita kle age kare, ba me kle age ene ulita gire kwian kle gerule ba ole ba me kle age no Chube gwa giti ba kle age Chube dollale. Ama gerule ene ba ole, ba me ama gerua tallade, ama kle gerule ba ole geru ngwale giti.  
\v 17 Geru ai kare kledu gbaba sugetidale alin kwian israelita alin unsuialin tangle Cristo bebi chie gire, geru ai unsuialin tangle giti sugedu kwian israelitage sidri Chube tadukalin ama toi mine ne suiage Chube gwa giti, me sugedu amage trate ulita Chube mine kaire Chube takalin mine ama alin, agwa Cristo chku nga dba ai giti gire Cristo geru gbu kwiange diali dale alin, ene Cristo giti ñage suge trate kwiange Chube takalin kwian tañachuge mine kwian toi mine ama gwa giti, Cristo alin giti ñage suge trate kwiange Chube talla mine.  
\v 18 Ba Cristo gerua gaba ulia malen ba me mo chuge ngwadi kwian ba gbe tañachuge ba me age ama kle age kare gire ene ba me Chubenu ulia. Kwian e kle mo gbe tangle daba nadi ama kle mo sobade ngwale daba nadi, ama kle lle boanga Chube alin nga ngaña giti gai dage mo chugagwallale salengwli Chube kare. Kwian ngwale e kle gerule ama kle gwage lle gwealedige kwian na me gwagebadige, ama gerule lle e kle meñe amage gbire, gire e giti ama kle suge moge ma kweri daba nage, agwa ama kle gerule ngwale mau tale alin, ama me Chubenu ulia. Malen ama kle gerule giti ba me geru e tallade, geru e ngwale me ulia.  
\v 19 Kwian e me kle Cristo gai ulia mo Chugagwallale malen ama kle gerule ngwale mau tale alin. Agwa ba nu Cristo gerua gaba ulia ba mo chugale ngwadi Cristo ba ta gbe no trate ule kwaitre alin daba na Chubenu ole geru ulia giti ene ba be ñage chege no Chube gwa giti Chube takalin kare. Ba ulita Cristo gerua ganga ulia ba Cristo jegwalenu kare, Cristo ba ulita Chugagwalla, Cristo kle ba ulita kira gbe toi ma no chui kaire kairege Chube takalin kare. 
\p  
\v 20-21 Cristo jokeda ba jwandale siere ji chugege age me no gdale, ba ulita Cristo gerua gau ulia, gire nege bage uñale Cristo giti alin allabi ba chege ulia Chubenu. ¿Agwa gire mineade ba kle tañachuge ba agedale dare kwian me Chubenu kle gerule kare ene ba ñage chege Chubenu ulia Chube uñe ma no? Ba me agedale kwian na kle gerule ngwale ba ole kare, ama kle gerule ba age ama kle gerule kare gire ba Chube uñe, ba me age ama kle gerule kare gire ba me Chube uñe. Ama kle gerule ba me ñage bligda gweale gute, kaire ama kle gerule ni ba ñage bligda e manachuge sidri ni ba ñage ko chugedi. Ba Chube uñe ulia agwa gire ¿mineade ba kle kwian na kerua gbe gdadi geru ngwale giti ba agedale dare ene ba ñage chege no Chube gwa giti? ¿Mineade ba kle tañachuge ene?  
\v 22 Geru e kwian kle gerule giti e ulita ngwale, e kwian gerua me Chube gerua ulia. Kwian kle gerule ba me ñage bligda gweale gute gire ¿mineade? Ulia Chube bligda ulita jigu gutadale, bligda lle ngwale kare sugetidale alin, che bligda gute gire che na jwandale gutadale bligda me jage sbali dale. Kwian e kle gerule lle ngwale giti mau tale alin allabi, geru e ngwale ulita.  
\v 23 Kwian kle ba ta gbe me bligda gweale gute kaire lle boanga Chube alin nga ngaña giti gai dage mo chugagwallale salengwli Chube kare, kwian kle gerule ene ba ole ama kle tañachuge age ene giti ama kle chege no trate Chube gwa giti. Kaire kwian na gwage kwian kle age e karedi kwian na tañachuge ama giti ene: “Kwian e kle age no ulia Chube takalin kare.” Kwian kle gwage kwian edi kle tañachuge ene agwa me ulia. Ngwale kwian e kle mo boi jere jere mo tke bage bligdage. Kwian e kle daba na gwa gbe modi ngwale ama kle age giti, ama kle mo sobade daba nadi ama kle age giti. Ama kle age e giti ama me ñage mo ta blite Chube ole ama ta diali me no, ama diali ta agekalin me no. Ba me ñage kwian ene gerua gbe gdadi dale. 
\c 3  
\s1 Kwian Chubenu mo ta gbadale diali 
\s1 tañachuge Chube giti 
\p  
\v 1-2 Cristo jokeda ba ulita age me no giti, ama jaba chkuni gwade, ama kleni nege Chube ole nga ngaña giti Chube ko taingwli giti kwian Chugagwalla kweri. Cha gerule ba ulita ole, ba ulita nu Cristo gerua gaba ulia ba ta chege salengwli ba chkuni gwade Cristo ole ule kare, Chube ba ta blitu ulita ba ta me ngeru kare nege ba ta kle Chube ole. Malen ba diali kledale mo ta gbe age Chube takalin kare, ba mo ta gbu joge siere agedu me no ulitage, ba me ñage mo ta gbe tañachuge lle ngwale nga dba ai giti alin giti kaire tañachuge age me no diali, ma no ba mo ta gbadale tañachuge diali Chube giti.  
\v 3 Ba Cristo gerua gau ulia giti ba chege salengwli ba jogebakeda Cristo ole ule kare, ba me agedale ba agedu ngeru kare. Ba me toidale age me no kwian me Chube uñe kle toi age me no kare, nege ba talla kle Cristo ole kaire Chube ole.  
\v 4 Ba Cristo gerua gau ulia giti ba ñage toi no Chube gwa giti, Cristo chieni nga dba ai giti chuia be chke gire chui ege ba kaire be meñe kwiange ule Cristo ole ba ama gerua gau ulia giti, ene ba be toi diali ama ole Chube ole nga ngaña giti. 
\s1 Kwian Chubenu me ñage toi diali ama toidu ngeru kare 
\p  
\v 5 Ba ageba me no ulita ba talla mlialenga ulita, ba me ñage toi ba toidu ngeru kare ba bebi Cristo gai ulia gire. Ba mo ta gbadale me age me no ai kare: Ba muirenu ba onbrenu me mo chuge ke giti. Ba me tañachuge geru sugaska giti me age ba tañachuge kare. Ba onbre ulita me tañachuge me no muinga nate mau alin kaire ba muire ulita me tañachuge me no onbre nate mau alin. Ba me mo ta gbe tañachuge mo tale age gweale me no. Ba me tañachuge lle tanre molen kwian na ngle ulitage, uñadale bage ba takalin lle molen tanre giti e salengwli ba kle lle ba takalinge gai chubere, gire ba me kle Chube ulia gai mo Chugagwallale, ba kle tañachuge ma lle ngwale giti ba me kle tañachuge Chube giti.  
\v 6 Kwian age me no ulita e kare giti Chube ji gbe mno kwian giti kwian bai me kle Chube gerua gai ulia me kle age Chube takalin kare.  
\v 7 Age me no e kare ulita ba agedu ngeru ba bebi Chube uñe gire, ba me agedale ba agedu ngeru kare,  
\v 8 ba age ulita me no chugale ngwadi, ba mo ta gbadale me age me no ai kare: Ba me mo ta gbadale skochie. Ba me mo ta gbadale age gweale me no ta sko ole daba ole. Ba me ta chege no ole daba boi gweale me no giti. Ba me geru jinade dabadi daba gbagda me no kwian na gwa giti. Ba me gerule jain jain sugaska daba ole.  
\v 9 Ba me sole ongoru ongoru daba ole. Ba mo ta gbadale me age e kare ba agedu ngeru kare. Ba Cristo gerua gau ulia gire Chube ba ta blitu, ba ta me chegu ngeru kare, malen ba agedu ulita me no ngeru chugale ngwadi.  
\v 10 Ba mo ta gbadale toi no Chube takalin kare, chui kaire kairege Chube ba dodanga kle ba ta gbe ma no ta chege ama kare gire ene bdagli ba be Chube uñe ma trate.  
\v 11 Ba Cristo gerua gau ulia, geru e chegu gbaba kaire kwian na ulita alin, me tallade kwian chudalla mine. Chube gwa giti kwian ulita salengwli, kwian bai kaire Chube gerua Cristo giti gai ulia kwian ene agedale ulita salengwli Chube gerua kle gbaba gerule kare. Chube gwa giti kwian israelita kwian me israelita kaire kwian mo kwara tkabanga kwian israelita kare kwian me mo kwara tkabanga, kaire kwian nga namu gerule kwira nale, kaire kwian me geru uñanga, kaire kwian lle boanga mo mauña alin kwian lle boanga mo alin agali, kwian ulita ai kare salengwli Chube gwa giti. Malen che ulitage sugedale trate Chube gerua kle gbaba che ulita alin, che kaire agwe agedale Chube gerua kle gbaba gerule kare. Che ulita Cristo gerua gai ulia gire Cristo kle che ulita ole diali, che ama gadale mo Chugagwalla kweri ama ma kweri ma kiraske kwian ulitage. 
\p  
\v 12 Chube no ba ulita ole Chube ba ulita gau mau alin ene ba kwian amanu, malen ba ulita mo ta gbadale toi nganake Chube ba ta blitu gwangeruguge, ba mo ta gbadale toi age no diali ai kare: Ba taidale dage daba ulitage. Ba gerudale ta no giti daba na ole, ba agedale no diali daba alin. Ba me mo gbadale ma kweri daba nage. Ba mo ta gbadale daba chudaboi ta giti ta no ole me skochie daba ole. Ba mo ta gbadale jage ulita boi daga ngwalege me skochie dabadi me skwatige daba chudaboi.  
\v 13 Daba age gweale me no ba ole, ba taidale dage dabage ama kle age ba ole giti, ba me ta skochie amadi. Daba age gweale me no ba ole ba talla mliadalenga me tañachuge dare me no amadi ama agedu ba ole giti. Ba tachkedale ba Chube gerua Cristo giti gau ulia gire Chube ba agedu me no Chube dollale talla mliunga ulita ama mi tachke dare ba agedu giti, e kare ene ba tañachugadale daba kle age ba ole giti.  
\v 14 Cha gerule ba ole, ba ulita nodale daba na ole ene ba ulita kwian Chubenu ñage chege kwaitre alin kwian gdaitre alin kare Chube takalin kare. 
\p  
\v 15 Chube ba ta gbu Cristo gerua gai ulia, gire ene Chube ba gbu chege kwaitre alin ule daba na Chubenu ulita ole Cristo giti, malen e giti ba mo ta gbadale ta nga suga no ole daba na Chubenu ole Chube takalin kare, me mo gbe kira bate daba ole. Ba Chubenu diali gerudale no Chube ole lle ulita giti ama kle age ba alin giti.  
\v 16 Ba diali mo ta gbadale tañachuge Cristo gerua giti, ba mo ta gbadale ama gerua jwen ma trate. Kaire ba mo tkadale tangle ongoru ongoru Cristo gerua giti Chube kirallaske, ba ongoru ongoru mo ta gbadale kiraske Cristo gerua giti. Chube gerua degaba unsuialin tangle kada Salmos, chada e giti ba mo ta gbadale mo gate nga suga no ole Chube giti Chube agedu no ba alin gdale, ba mo gate no ule daba na ole Cristo giti Chube ollade nga suga no ole Chube Oña ba ta gbe age kare.  
\v 17 Ba ulita mo ta gbadale age ulita gerule ulita che Chugagwalla Jesucristo takalin kare. Jesucristo giti ba diali ñage gerule no Chube che Ñenua ole ene: “Chube, cha kle gerule no ba giti ba agedu no cha alin giti, ba kle cha manade no. Noare ba kle cha chudaboi toi daba ole ba takalin kare. Cha no ba ole.” Ba gerudale no ene diali Chube ole Chube kle age no ba alin giti. 
\s1 Kwian Chubenu mo ta dbadale toi no modi 
\s1 Chube takalin kare 
\p  
\v 18 Cha gerule ba ulita ole, ba toidale no mo bitalla ole gwa u ba kle toi ngwadige. Ba muinga ulita mo jwanbale, cha gerule ba ole, ba mo ñengulalla gadale dage ama kerua gbe gdadi age ama gerule kare, ama ba chugagwalla. Ba age ene Chube gwa giti, e no Chube takalin kare.  
\v 19 Ba kwian onbre ulita mo jwanbale, ba nodale mo muira ole, ba me ama gbadale boi jere jere ba takalin kare, ba gerudale mo muira ole ta no ole. 
\p  
\v 20 Ba kirogwa ulita muirenu onbrenu, ba mo ñenua mo chebia gadale dage chui tangle, ba mo ta gbadale age ba ñenua ba chebia gerule kare. Ba age ene, nga be suga no no Chubedi ba kle age ama takalin kare giti.  
\v 21 Ba kirogwa ñenua kirogwa chebia, ba me ka boi ngwale mo kirogwalla ole ngle lle ulita giti kirogwa sko jwen lle ngwale giti, ba age ene diali kirogwa ole, kirogwa be tañachuge ene mo tale: “Cha me ñanaske ulita, cha me ñage lle ulita boi cha ñenua cha chebia takalin kare, lle ulita me no cha alin agedale.” Kirogwa be tañachuge ene mo tale olire, ba me age mo kirogwalla ole ama gbe ta olire ene, ma no ba ama tke tangle chudaboi Chube takalin kare. 
\p  
\v 22-23 Ba ulita lle boanga ba chugagwalla alin, ba mo chugagwalla gadale dage kaire ba mo ta gbadale lle boi ulita ta no giti ama ba gbe lle boi kare. Ba me mo gbe lle boi no ba chugagwalla kle ba ole ule alin allabi gire, ene ba chugagwalla gerule no ba giti, ba me tañachuge ene. Ba chugagwalla kle ba ole gwage badi, ba lle boadale no mo chugagwalla alin, ene kaire ba chugagwalla me kle ule ba ole gwage badi, ba lle boadale no gballa mo chugagwalla alin ama kle gwage badi kare. Ba Cristo gai dage ulia ba ama gai mo Chugagwallale, ba mo ta gbadale lle ulita boi ta no giti kwian ba chugagwalla alin. Sugedale bage ba kle lle ulita boi ba chugagwalla alin, ba me kle lle boi ama alin allabi agwa kaire ba kle lle boi che Chugagwalla kweri Cristo alin.  
\v 24 Sugedale bage ba kle lle boi no kwian ba chugagwalla alin nga dba ai giti, e giti Chube be age no ba alin nga ngaña giti ba lle bo no ñanale. Sugedale bage ba kle lle boi ba Chugagwalla Cristo alin me kwian alin allabi.  
\v 25 Sugedale kwian Cristo gerua gabage Chube gwa giti kwian ulita salengwli, malen kwian ulita bai me age Chube takalin kare, Chube be kwian ene gbe ji chuge agedu me no kbiale. Chube be gerule kwian ulita giti ta salengwli ole, ama be gerule chema jiske chema me jiske ama gwa giti. 
\c 4  
\p  
\v 1 Ba ulita kwian lle boanga chugagwalla, ba tañachugadale kwian lle boanga monu giti ama kle lle boi giti ba me ñage ama boi jere jere ba takalin kare, ba taidale dage amage ba ama manadale no ba ñage mangire batre, kaire ba gerudale ta no giti ama ole. Chkedale uñale bage ba kaire mo Chugagwalla molen nga ngaña giti, ama kle gwage badi ba kle age giti, ama be gerule ba ole ba agedu no giti ba agedu me no giti. 
\p  
\v 2 Ba kwian ulita Cristo gerua gaba, ba mo ta gbadale gerule Chube ole diali lle ulita giti. Ba kledale ta giti me skwatige gerule Chube ole me tañachuge lle ngwale alin giti ba kle gerule Chube ole gire. Diali ba gerudale no Chube ole ama kle age ba alin giti.  
\v 3-4 Kaire ba gerudale diali Chube ole cha giti, cha kle Chube gerua Cristo giti dbe kwian me Chube uñeske. Ba gerule Chube ole cha giti, ene Chube chudaboi kete chage ene kwian ta be kle biale Cristo gerua keruchuge. Cristo gerua amaña dbe giti cha kle skage agwa cha ta chegekalin diali gerule trate Cristo giti kwian ole, ene geru suge kwiange trate, ene kwian ñage geru e gai ulia. Malen cha takalin ba gerule diali Chube ole chudaboi kade Chubege cha alin, ene cha chege Chube kirallaske geru dbe gwangerugu. 
\p  
\v 5 Ba mo ta gbadale me chui kagenga ngwale, ba diali gerudale kwian ole Cristo giti. Ba toidale diali no trate ta giti Chube takalin kare kwian me Chubenu gwa giti, ene ba ñage gerule no Cristo giti kwian ole, ene kwian geru gai ulia ba giti.  
\v 6 Kaire ba geru tragadale trate ta giti no kwian ole Cristo giti, ba gerudale ulita no, ene geru suge no kwiange, geru e giti kwian gweale geru kade bage Cristo giti ba jaindalenga trate no ama kalen, ene kwiange geru ñage suge no gire ama geru gai ulia. 
\s1 Pablo gbi kage bdagli kwian Chubenu una Colosamu alin 
\p  
\v 7-8 Cha ba ta gbe ene ulita chada ai giti, cha kle che daballa Cristo giti kada Tíquico kage chada ai dbe ba ulita alin. Cha no Tíquico ole, ama cha chudaboanga no Chube gerua Cristo giti kete kwian nage, malen cha kle ama kage ba ngwadi. Ama be joge chke ba ngwadige ama be geru kete bage ma trate ulita cha giti cha kle boi giti nga ainige kaire ama be ba ta gbe nga suga no ole, ene ba ñage kira gai ta chege no me tañachuge tanre cha giti.  
\v 9 Kaire Tíquico ole kwian Cristo gerua ganga ulia kada Onésimo be joge ule, ama che daballa Cristo giti ama toinga ba jwiage una Colosage. Ama gdabonate be geru kete ulita bage kle boi ulita giti aini cha ole. 
\p  
\v 10 Che daballa Cristo giti kada Aristarco cha gatangadi aini skage ngwadi ama gbi kage ba ulita alin, kaire Bernabé dabagdalla kada Marcos gbi kage ba alin. Cha chada degu ba alin ngeru Marcos giti ama cha chudaboanga, ama joge basale badi ba ama gai ngwange no.  
\v 11 Kaire agwe che daballa Cristo giti kada Jesús-Justo gbi kage ba alin. Aristarco kaire Marcos kaire Jesús-Justo ama kwian israelita gdamai alin kle kwian Cristo gerua gabaske kle lle boi ule cha ole Chube gerua Cristo giti dbe kwiange. Kaire ama gdamai ai kle cha ta gbe nga suga no ole diali ama cha chudaboanga no. Kaire daba na Chubenu kle cha chudaboi agwa ama me kwian israelita ama gdamai kare. 
\p  
\v 12 Epafras gbi kage ba alin kaire agwe, ama kwian ba jwiamu ama Cristo gerua dbanga kwiange, kaire agwe ama kle diali tachke ba giti ama kle mo ta gbe gerule kiraske Chube ole ba ulita giti diali, ama takalin Chube ba ulita ta gbe tañachuge gwangerugu chui tangle diali Cristo gerua giti kaire mo ta chuge ngwadi Chubege ene Chube ba ta gbe lle boi ma no Chube takalin kare, malen ama kle gerule Chube ole ba giti diali.  
\v 13 Uñale chage Epafras kwian no malen cha ñage gerule trate ba ole Epafras giti, Epafras kle tañachuge tanre no ba giti ama takalin ba toi no Chube gwa giti baini kaire ba ulita kle ngwadi. Kaire ama kle tañachuge tanre kwian Chubenu toinga una Laodiceage giti kaire kwian Chubenu toinga una Hierápolige giti. 
\p  
\v 14 Kaire agwe che daballa no no Cristo giti kada Lucas kwian mo dodanga kaire Demas che daballa Cristo giti, ama gdabonate gbi kage ba ulita alin. 
\p  
\v 15 Ba geru kete cha alin che daballa che ibotea ulita Cristo giti una Laodiceamuge cha gbi kage ama ulita alin no. Kaire agwe ba gbi kete Ninfage cha alin kaire kwian ulita Chubenuge kle mo lite Chube geruadi Ninfa ullage. Cha gbi kage ama ulita alin. 
\p  
\v 16 Ba chada ai batenga ulita cha degangu ba alin gire ba chada ai amaña kage kwian Chubenu ulitage kle mo lite Chube geruadi una Laodiceage, ene eni kwian una emu ñage chada ai batenga agwe. Kaire agwe cha chada kagu kwian alin una Laodiceage ba chada e batenga.  
\v 17 Ba gerudale Arquipo ole cha Pablo kle geru kage ama alin ene: “Ba Arquipo cha daballa Cristo giti, ba diali agedale ulita Chube kle ba ta gbe age ama alin kare. Ba me ñage mo ta blite me lle boi Chube alin, ba diali tañachugadale lle boi Chube alin Chube ba gau kare.” Ba geru ai kete ene cha alin Arquipoge. 
\p  
\v 18 Cha Pablo chada ai degangu ulita ba alin, nege cha agali kle mo ka dege chada ai giti mo kodi bdagli cha gbi kage dege mo kodi ba ulita alin, ene chke uñale bage ulia cha kle chada ai kage ba ulita alin. Cha gerule ba ole, ba me ta jogenga gerule cha giti Chube ole cha kle skage Cristo gerua dbe gdale giti. Kaire cha takalin Cristo che Chugagwalla age no ba ulita alin. 
\p Geru ai ene ulita cha Pablo chada degangu ba kwian Chubenu ulita una Colosage alin. Che kle meni.