\id 2TI - Buglere NT -Panama 2008 (DBL -2013) 
\h 2 TIMOTEO 
\toc1 Pablo Nu Chada Degaba Bitabokedale Timoteo Alin 
\toc2 2 Timoteo 
\toc3 2Ti 
\mt1 Pablo Nu Chada Degaba Bitabokedale Timoteo Alin 
\mt2 Segunda Carta de Pablo a Timoteo 
\ip Pablo kledu skage una Romage gire ama chada ai degangu bitabokedale kagale Timoteo alin, Pablo giti Timoteo Jesucristo gerua gau ulia malen Pablo Timoteo gau mo kirolla kare Jesucristo gerua giti. 
\ip Pablo chada ai degangu suiale kwian Jesucristo gerua ganga ngle kledu boi tanre daga ngwale Jesucristo gerua gdale. Kaire Pabloge sugedu ama mi toi sbali dare nga dba ai giti, malen ama chada ai degangu bdagli, ama Timoteo ta gbu suge kwian Chubenu bai kle boi daga ngwale kwian ene mo ta gbadale kiraske jage ulita ta no ole ama kle boi daga ngwalege ama mo ta gbadale me Jesucristo gerua chuge ngwadi. Pablo Timoteo ta gbu Timoteo mo ta gbadale toi no Chube gwa giti salengwli Pablo toidu kwianske kare. 
\c 1  
\s1 Pablo gbi kage chada giti Timoteo alin 
\p  
\v 1 Cha Pablo chada ai degange ba alin Timoteo: 
\m Chube tale Chube cha gbu Jesucristo gerua ketangale, sbali Chube gerudu Jesucristo alin giti allabi kwian ñage toi chui tangle diali Chube ole, malen Chube cha gbu geru e trage kwian ole.  
\v 2 Timoteo, ba cha kirolla kare Jesucristo giti, cha noare ba ole, cha takalin Chube che Ñenua kaire Jesucristo che Chugagwalla age no ba alin tai dage bage ba ta gbe suga no diali, cha takalin ba toi Jesucristo talla ole diali. 
\s1 Pablo takalin Timoteo gerule no 
\s1 Jesucristo giti kwian ole 
\p  
\v 3 Cha kle lle boi Chube alin ta no trate ole cha enusulian unsuialin lle bo Chube alin kare. Cha kle gerule Chube ole gire diali cha tachke bage, cha gerule ba giti Chube ole ai kare: “Chube, noare Timoteo kle ba gerua gai ulia, cha takalin ba ama chudaboi lle ulitage.” Cha gerule ene kare Chube ole ba giti diali.  
\v 4 Kaire cha kle tachke chui giti cha jo siere bage suiale cha jo nga nage, e suiale ba chegu olire cha nate. Nege cha kle tachke bage cha ta klekalin ule ba ole nga suga no ole.  
\v 5 Cha kle tachke bage ba Chube gau ulia mo tale giti, ba ta salengwli ba sulian Loida kaire ba chebia Eunice kare, ama boke mo ta gbu ngeru Chube gai ulia no mo tale, cha gerule ba ole ulia ba kaire ta ene molen Chube gai ulia mo tale.  
\v 6 Malen cha gerule ba ole ba mo ta gbadale lle boi Chube alin diali chui gdale, ba mo ta gbu Chube gai ulia kaire ta amaña giti ba lle boale Chube alin. Cha ko gbu ba giti cha gerudu ba giti Chube ole, chui ege Chube ta ngle ketu bage lle boi ama alin kwianske, ba me ta e mlienga lle boage Chube alin.  
\v 7 Chube mo Oña ketu chege lle boadale no Chube alin, Chube me mo Oña ketu chege mo ta dbadale kennga lle boi Chube alin. Diali Chube Oña kle che ole che ta gbe kiraske, ama che ta gbe no Chube ole kwian ole, kaire ama che ta gbe age no ama takalin kare me che ta agekalin kare.  
\v 8 Ba me ibule gerule kwian na ole che Chugagwalla Jesucristo giti, kaire me ibule cha giti cha kle skage ama gerua giti. Ba boi daga ngwale cha boakle kare ba me geru Jesucristo giti chugadale ngwadi, ba Jesucristo gerua dbadale ngerugu kwiange, Chube kiralla giti Chube be ba kira gbe.  
\v 9 Chube che jun siere ji chugege age me no gdale, Chube che gau chagedale trate siere age me noge. E me gerule che agedu ulita ngeru no malen ama che jun siere ji chugege age me no gdale, me dale ene, che me ñage tien gitiru agali ji chugege che age me no gdale, Chube mo tale agali ta gbu age no che alin, ngeru ngeru nga dba ai ulita bebi dodadale Chube mo ta gbu age no che alin Jesucristo giti.  
\v 10 Nege chku uñale chege ulia Chube agedu no kwian ulita alin, ama Jesucristo kagu nga dba ai giti kwian ulita alin, Jesucristo che jwannga siere. Ngeru kwian ulitage jogeda giti ama kennga, nege Jesucristo giti kwian me ta dbadale kennga jogeda giti, kwian geru Jesucristo giti gai ulia, geru e giti chke uñale kwiange ama toi diali chui tangle Chube ole, bdagli ama mi jogeda dare.  
\v 11 Chube cha gau geru Jesucristo giti trage kwian ole, Chube cha gbu geru Jesucristo giti dbe kwiange kwian tke tangle geru ege.  
\v 12 E giti kwian cha tku skage, malen cha kle boi daga ngwale Jesucristo gerua giti, cha me ibule skage Jesucristo gerua giti kwian ngeru. Uñale chage Jesucristo mine, cha ama gai ulia. Uñale chage Jesucristo kira molen, ama be geru amanu manade no chui bdagli alin, ama geru e ketu chage dbadale kwiange, geru e be chege diali chui tangle ama be chieni gire.  
\v 13 Ba chagedale geru trate ulia ole ba geru jun cha ba tku tangle giti. Jesucristo kle che ta gbe ama gerua gai ulia, Jesucristo kle che ta gbe no kwian ole Chube ole, ba chegedale ta ene ole.  
\v 14 Chube geru ketu bage dbadale kwiange, Chube Oña che chudaboanga kle che ole, ama be ba chudaboi geru Jesucristo giti manade no, ba me kwian na chuge ngwadi geru ulia blite nganake kwian takalin kare. 
\p  
\v 15 Uñale bage kwian Chubenu tanre nga kweri Asiage cha chugu ngwadi gballa, Figelo kaire Hermógenes, ama cha chugu ngwadi gballa.  
\v 16-17 Onesíforo me cha chugu ngwadi gballa, cha takalin che Chugagwalla Jesucristo tai dage no Onesíforo bitallage. Onesíforo me ibudu me kendunga cha kle skage giti, ama chku una Romage, ama cha jinadu nate tanre chui gdale, ene gire cha skwendu amage. Ama kledu una Romage gire diali ama chku cha ngwadi cha chudaboi cha ta gbe suga no.  
\v 18 Cha gerule no Onesíforo giti, ulita uñale bage no trate, che kledu ule ama ole una Efesoge ama che chudabo tanre una Efesoge. Cha takalin che Chugagwalla Jesucristo tai dage no Onesíforoge chui bdaglige Jesucristo chieni chuiage. 
\c 2  
\s1 Pablo takalin Timoteo mo ta gbe diali 
\s1 lle boi ngerugu Jesucristo alin 
\p  
\v 1 Timoteo, ba cha kirolla kare Jesucristo giti, Jesucristo agedu no ba alin kle age tanre noare ba alin, ba ama kiralla gadale, ba chagedale ama kirallaske.  
\v 2 Ba cha keruchugu gerule kwian Chubenu tanre gwa giti kwian tke tangle geru ulia Jesucristo gitige, ba geru e ulia keruchugu, ba kwian na tkale tangle geru ege kwian bai ta dbe ulia geru dbe trate, ene ama ña kwian na tke tangle Jesucristo gerua gitige. 
\p  
\v 3 Ba boi daga ngwale Jesucristo gerua giti ba mo ta gbadale diali lle boi ngerugu Jesucristo alin salengwli guardia donga kle lle boi mo chugagwalla alin kare,  
\v 4 guardia donga no kle mo ta gbe dole no, ama me kle tañachuge lle na giti, ama kle biale diali age ama chugagwalla takalin kare. Ene kaire ba kledale biale diali lle boi no Chube alin Chube takalin kare.  
\v 5 Kaire kwian kolanga boladi, ama me kolale no kolagda chadalla gerule kare ama me ñage kolagda ñanalla gai. Ene kaire ba me chage Jesucristo gerua alin gerule kare Chube me ñage age no ba alin.  
\v 6 Kaire kwian nga datanga chude ngamale, ngeru ama nga date chude tke gire ama manade, ene bligda suiage kwian nga datanga bligda gai no mo alin, nga suga no amadi bligda ole. Ene kaire ba chegedale diali gerule kwian ole Jesucristo giti, kwian me geru gai blike ba me tañachugadale olire, bdagli kwian mo ta blite Jesucristo ole gire badi nga be suga no no kwian geru gau ulia giti.  
\v 7 Ba mo ta gbadale tañachuge no geru ai cha kle trage ba ole giti, ene che Chugagwalla Jesucristo be ba ta gbe suge ulita cha kle gerule ba ole giti. 
\p  
\v 8 Ba tachkedale Jesucristo giti, ama chku nga dba ai giti kwian kare David oindallaske, ama jokeda gire ama jaba chkuni gwade, cha kle geru e ulia Jesucristo giti trage kwian ole.  
\v 9 Jesucristo gerua giti cha kle boi daga ngwale skage, kwian me no geru e ole cha tku skage cha kwian jiskenga kare, ama tañachuge ama cha tke skage ene geru Jesucristo giti me chage dare, me dale ene, cha kle skage Jesucristo gerua giti agwa Jesucristo gerua me kle skage, Jesucristo gerua be chage diali kwianske.  
\v 10 Malen cha kle mo ta gbe no ulita boi daga ngwale me boi daga ngwale cha lle boakalin no Chube alin, ene Chube nu kwian gaba Chube gerua Jesucristo giti gangale be geru Jesucristo giti keruchuge be geru e gai ulia, ene ama be tien gitiru ji chugege ama agedu me no gdale, ene ama be toi diali no no Jesucristo ole nga ngaña giti.  
\v 11 Ai gerule ulia: 
\q1 Che jogeda Jesucristo gerua gdale, kaire che be joge toi ama ole. 
\q1  
\v 12 Che me mo ta gbadale kige boi daga ngwale Jesucristo gerua gitige, ene bdagli che be kle ule ama ole gerule nga ulita giti daba chugagwallale. 
\q1 Che gerule kwian na ole che me Jesucristo uñe, chui bdaglige Jesucristo be gerule Ñenua gwa giti ama me che uñe kaire. 
\q1  
\v 13 Che Chube gerua Jesucristo giti gai ulia gire bigwa che geru e chuge ngwadi che sole ama ole. 
\q1 Chube me ene, ama age ulita ama gerule kare, ama me sole ni sidri. 
\m Uñale chage geru ai gerule ulia ulita, malen cha mo ta gbe lle boi no Chube alin gwangerugu me tañachuge boi daga ngwale giti. 
\p  
\v 14 Timoteo, ba kwian Chubenu ulita ta gbadale cha chada degangu giti ba alin, kaire ba gerudale kwian Chubenu ole Chube gwa giti kwian Chubenu kle kira bate geru ngwale giti me kira bate dare, ama kira bate geru ngwale giti e me no dale, ama kira bate geru giti daba na ama keruchuge, ene ama ña daba na ta gbe geru ngwalege gire daba joge siere Chube geruage, e tirare kwian alin joge siere Chube geruage.  
\v 15 Ba agali Timoteo mo ta gbadale lle boi no Chube alin kwian lle boanga no mo chugagwalla alin nga dba ai giti kare, kwian lle boanga no ama me ibule chugagwalla ngeru, chugagwalla gwage ama lle boanga no. Ene kaire ba lle boadale no Chube alin, ba kwian na tkadale tangle no trate Chube gerua uliage, ene Chube gwage ba kle age no.  
\v 16 Kwian gweale kle gerule ngwale geru me ulia giti, ba me ama gbe gdadi, ba joge siere amage, geru ngwale giti ama daba na ta gbe bedre bedre tañachuge me no Chube giti gire bdagli daba ta jwlite age me no Chube dollale.  
\v 17 Geru ngwale salengwli che uda jingmea kada gangrena kare, jingme e kote che uda tuge bedre bedre, ene tuge ulita gire che jogeda. Himeneo kaire Fileto, geru ngwale giti ama boke kle daba ta gbe jwlite age me no Chube dollale,  
\v 18 ama me kle daba tke tangle geru uliage, ama kle gerule Chube be jaba gbeni gwade chuia jo tangle. Himeneo kaire Fileto me kle geru ulia kete dabage, ama daba gweale ta gbe tañachuge nganake, me uñale dabage geru bai ulia.  
\v 19 Chube gerua ulia, me jwlite, geru e be chege diali chui tangle, Chube gerua gerule: “Chubege uñale kwian bai Chubenu.” Kaire gerule: “Kwian bai Chube gerua gaba ulia, ama ulita mo ta gbadale joge siere age me noge.” Chube gerua gerule ene. 
\p  
\v 20 Cha gerule ba ole Timoteo, chkedale uñale bage ai kare giti: U kwerige gwa me oro batekwalla me igi batekwalla alin kle, kaire gli batekwalla dbi batekwalla kle. Oro batekwalla igi batekwalla basangwa no gangwa ngwange, gli batekwalla dbi batekwalla kwian u mauña alin lle boige.  
\v 21 Oro batekwalla igi batekwalla kle trate diali ogaba no, ene kle biale kwian gangwa ngwange no. Ene kaire che kwian Chubenu kledale sugekare lle me no ulitage, che chagedale no trate diali, ene che kle biale lle no boi Chube alin. 
\p  
\v 22 Timoteo, ba chegedale sugekare lle me no ulitage kirogwa biale ulita ta agekalin karege, ba mo ta gbadale chage trate no Chube takalin kare Chube gai dage no, ba mo ta gbadale Chube gai no diali, ba mo ta gbadale no kwian ole Chube ole, ba mo ta gbadale ule daba na ole ta no giti daba bai ta no trate molen Chube ole kle Chube geruadi, daba ene ulita ole ba chegedale ule Chube geruadi.  
\v 23 Kwian kle gerule geru ngwale giti, ba me kwian ene gbe gdadi geru giti, kwian ene gerule tanre, amage me suge kle gerule llema giti, uñale bage kwian ene chege gerule geru ngwale giti gire bigwa ama ta kira batakalin geru e giti. Me no gerule kwian ene ole.  
\v 24 Kwian lle boanga Chube alin me ñage kira bate geru giti, ma no ama chagedale ta no daba ulita ole ama daba tke tangle no geru uliage, daba age me no ama dollale geru giti ama me skochie me skwatige daba tke tangle,  
\v 25 ama gerudale ta no giti kwian Chube gerua dollale ole, ene Chube ñage kwian ta blite, kwian ñage tañachuge nganake gire kwian ñage geru ulia gai mo tale.  
\v 26 Geru ulia be kwian ta gbe, ene kwian ña tien gitirule che dolla Satanáge, che dolla kwian gaba mau alin, ene kwian age che dolla alin che dolla takalin kare. Malen che gerudale trate kwian ene ole Jesu giti, ene ama tien gitiru che dollage. 
\c 3  
\s1 Kwian tanre be kle ta mine molen Jesucristo chuia 
\s1 be kle kodi ngwange 
\p  
\v 1 Cha takalin geru ai ulita chke uñale bage Timoteo: Chui bdagli Jesucristo chuia chieni ngwange, chui ege kwian tanre me no be kle age Chube dollale, chui ege be mnoare kwian Chubenu alin.  
\v 2 Kwian tanre ai kare be kle chui ege: Kwian be tañachuge no diali mau giti alin. Kwian be mo ta gbe no igi alin ole. Kwian be suge moge ama ma no daba ulitage. Kwian be gerule tanre no mau giti: “Cha ma no daba ulitage.” Kwian be gerule Chube dollale. Kirogwa biale mi mo ñenua mo chebia gai dage. Kwian mi gerule no daba ole daba ama chudabo giti: “Noare ba cha chudabo.” Kwian agenga me no Chube dollale.  
\v 3 Kwian mi mo ta dbe no daba ole. Kwian mi tai dage dabage. Kwian be gerule ngwale dabadi. Kwian mi mo ta gbe age no, be mo chuge ngwadi age me no ulita. Kwian be age daga ngwale me no daba ole. Kwian be age me no age no ulita dollale.  
\v 4 Kwian be age mo bitalla mo skatemanalla dollale. Kwian mi tañachuge ngeru, ama be age blike ama takalin kare. Kwian be suge moge ama ma kweri ma no daba ulitage. Kwian be takalin lle tanre noarege mau alin, ene ama tañachuge toi no lle e giti alin, ama mi tañachuge Chube giti. 
\p  
\v 5 Kwian ai kare ulita be gerule: “Cha no Chube ole, cha Chubenu.” Ama gerule ene gire ama age nganake, ama me chage Chube takalin kare me chage no trate ulia kwian Chubenu chagedale kare. Kwian e karege ulita ba chegedale sugekare.  
\v 6 Kwian e gweale chage uge uge geru ngwale dbe muinga me ta molenge, muinga skate amage gwa uge kaire kaire, ama muinga anblite geru ngwaledi, muinga e agenga tanre me no, muinga tañachuge diali age me no.  
\v 7 Muinga e kare tanre be kle biale kwian ulita keruchuge no no, muinga be geru jwen geru e giti gire geru ulita me suge amage geru bai ulia, ene geru ulia me suge amage.  
\v 8 Chui sbali Janes kaire Jambres agedu Moisés dollale, ene kaire nege kwian geru ngwale dbanga dabage age geru ulia dollale, kwian ene ta me no, ama me ñage tañachuge trate no, ama me geru ulia gai, malen ama chege sugekare geru uliage.  
\v 9 Kwian ene mi ñage kwian tanre anblite dare geru ngwaledi, be chke uñale kwian tanrege ama kwian me no ama me kle geru ulia dbe salengwli kwian boke unsuialin boidu Moisés ole kare, ama boke mo ta gbu ma ngle Moisés dollale agwa ama me ñadu. 
\s1 Pablo geru gbe bdagli Timoteo alin 
\s1 chage trate geru ulia ole 
\p  
\v 10 Timoteo, uñale bage ba gwagedu chadi cha kwian tku tangle mine Chube geruage, ba gwa giti cha toidu cha chagedu mine dabaske, cha mo ta gbu lle boi no Chube alin, cha mo ta gbaba Chube gai ulia, kwian bai me ta geru gakalin blike ole cha me skochiu, cha mo kira gbuda jage ulita,  
\v 11 kwian agedu tanre me no cha ole, cha boidu daga ngwale Jesucristo gerua giti. Uñale bage cha boidu ulita ene una Antioquíage una Iconioge una Listrage, una ege ulita kwian me gwagedu ngwaña chadi, ama agedu me no cha ole agwa Chube cha chudabo, ama cha manadu no kwian me no ulitage.  
\v 12 Ulia bai kaire ulita toikalin trate no mo ta gbaba Jesucristo geruage, kwian ene be boi daga ngwale Jesucristo gerua giti, kwian na be age me no ama dollale.  
\v 13 Kwian me no, kwian daba anblitanga geru ngwalege be tañachuge kle chage no, agwa me ene, chui gdale kwian ene be kle chage ma bate geru uliage, kwian na be mo anblitange kwian daba anblitangage, kaire kwian daba anblitanga be chage mo anblitange kwian nage geru giti, kwian ene be chage mo ta anblitaba ole diali. 
\p  
\v 14 Timoteo, ba chagedale no trate diali ngerugu geru uliage, ba geru e jun, uñale bage geru e geru ulia, kaire uñale bage chema ba tku tangle no trate geru uliage.  
\v 15 Ba soli gire ba Chube gerua degaba uñu, nege ba kle chage mo ta gbaba ngerugu geru e ole, geru e ba ta gbe, ene suge bage mine ba tien gitiru ji chugege age me no gdale mo ta gbaba diali Jesucristo gerua alinge.  
\v 16 Chube gerua ulita jo degaba Chube talla giti, geru e no che alin, geru e che tke tangle geru uliage, geru e che ta gbe suge che kle age me no giti, geru e che ta blite age no, geru e che tke tangle chage no trate Chube takalin kare,  
\v 17 ene che kwian Chubenu ulita ñage kle biale no diali lle no ulita boi Chube alin. 
\c 4  
\p  
\v 1 Cha chada ai degange ba alin Timoteo Chube gwa giti kaire che Chugagwalla Jesucristo gwa giti, Jesucristo ama che Chugagwalla kweri, ama be chieni chuiage ama be gerule kwian ulita Chugagwallale be gerule kwian gwade giti kwian jaba giti bai jiske bai me jiske. Cha geru ai gbe ba alin Timoteo, ba agedale no ulita ai kare:  
\v 2 Ba gerudale kwian ole Chube gerua ulia giti, kwian ba keruchugakalin kwian me ba keruchugakalin ba gerudale no diali kwian ole Chube giti. Ba gerudale kwian kle age me no Chube dollale ole, ene suge amage ulia ama kle age me no. Ba gerudale mno kwian ole, ene kwian me age me no dare. Ba kwian ta gbadale Chube geruadi, ene ama be ta agekalin no Chube takalin kare. Ba kwian tkadale tangle no geru uliage, ba me skochiedale ba me skwatigedale gerule kwian ole geru ulia giti diali.  
\v 3 Ba mo ta gbadale chege geru ulia kete kwiange Timoteo, chui bdagli ngnaguge gire kwian mi mo ta gbe geru ulia gai, kwian me mo ta gbe geru ulia keruchugakalin dare, gire kwian be ta geru na jagere keruchugakalin. Kwian be daba tkanga tangle tanre jinade mau ta giti be mo tkange tangle, ene kwian ulita be ta kwian daba tkanga tangle e alin keruchugakalin. Kwian daba tkanga tangle e be kwian tke tangle kwian takalin kare,  
\v 4 gire kwian mi geru ulia keruchuge dare, kwian be geru ulia mlienga be geru unsuialin ngwale me no alin gbe gdadi.  
\v 5 Timoteo, ba mo ta gbadale tañachuge no trate geru ulia alinge, ba me mo chuge ngwadi tañachuge nganake. Ba boi daga ngwale Chube gerua giti ba mo ta gbadale diali lle boi ngerugu Chube alin. Ba chagedale ngage kaire kaire gerule kwian ole Jesucristo giti, Chube ba gau ba gbu lle boi ama alin, ba lle e boadale no no diali. 
\p  
\v 6 Timoteo, cha gerule ba ole, cha be kle toi dare sugeti alin, uñale chage cha be jogeda geru ulia giti, cha be jogeda chuia kle kodi cha ngeru.  
\v 7 Cha mo ta gbu chage no ngerugu geru Jesucristo giti dbe kwiange, Chube cha gbu lle boi ama alin cha lle bo no ulita, cha mo ta gbu Chube gerua alinge.  
\v 8 Cha lle bobi Chube alin no, nege lle boi ñanalla kle cha manade ngwange nga ngaña giti Chube kle ngwadi. Che Chugagwalla Jesucristo gerunga kwian ulita giti ulia, ama be gerule chema jiske chema me jiske, ama be lle no kete chage chui bdaglige, me chage alin allabi ama be lle no kete, kaire be lle no kete kwian ulitage bai kledu Jesucristo chieni chuia manade ngwange, ama no Jesucristo ole, ama takalin Jesucristo chieni, kwian ene ulita be lle no gai kaire nga ngaña giti. 
\s1 Pablo gerule Timoteo ole mau giti 
\p  
\v 9 Timoteo, ba mo ta gbe chie tienda chadi blike.  
\v 10 Demas me ta boikalin daga ngwale cha ole ule, ama cha chugu ngwadi sugekare, ama jo una Tesalónicage lle na boi mau alin ama takalin kare. Crescente jo nga kweri Galaciage, Tito jo nga kweri Dalmaciage,  
\v 11 Lucas alin kle aini cha ole. Timoteo, ba chie ba joge Marcos nate, ba chie Marcos dbe ule, Marcos ñage cha chudaboi lle boi Chube alin aini.  
\v 12 Cha Tíquico kagu una Efesoge.  
\v 13 Timoteo, cha ba ta gbe lle chanu cha jigu daba Carpo ullage giti, cha kledu una Troage cha mo bliagdalla, cha librolla, kaire chada degaba bda kwara giti, cha lle e ulita jigu daba kada Carpo ullage, ba chie ba chie lle e ulita dbe cha alin. Ba me ta jogenga lle e dbe ulita, kaire bda kwara giti chada kle degaba, e cha takalinge diali, ba me ta jogenga lle e ulita dbe cha alin aini. 
\p  
\v 14 Alejandro kwian hierro dodanga agedu me no me no cha dollale, uñale Chubege, Chube be ji gbe ama alin cha gdale.  
\v 15 Ba kledale ta giti ama ngeru, che kle geru Jesucristo giti dbe kwiange, ama kle age tanre me no geru e dollale. 
\p  
\v 16 Timoteo, kaire cha gerule ba ole kwian kle age mine cha ole aini. Gwangea cha dule kwian chugagwalla ulita gwa giti kaire kwian na tanre kledu eni gwa giti, chui ege cha gerudu mo giti gballa, kwian ulita Chubenu me cha chudabo, cha chugle ngwadi gballa gerule kwian ngle gwa giti, ni malen kwian gdaite cha chudabo gerule no cha giti gerule no Jesucristo gerua giti. Kwian Chubenu ulita bai kledu cha ole kwian ngle gwa giti ama chegu kamne me gerudu cha chudaboale, cha takalin Chube tai dage amage, ama agedu giti Chube me tallade.  
\v 17 Che Chugagwalla Jesucristo alin kledu cha ole, ama cha ta gbu, ama cha kira gbu, ama cha chudabo no, ene cha giti geru ulita Jesucristo giti chku uñale kwian nga na tanrege kledu cha keruchuge. Che Chugagwalla Jesucristo cha manadu no kwian cha dollalege Jesucristo gerua giti, ene kwian cha dollale ulita me ñadu cha gweda, cha tiun gitirule kwian cha dollalege.  
\v 18 Cha kle nga dba ai giti, diali Jesucristo be cha manade no age me no ulitage, ene kaire bdagli ama be cha dbe no ama kle ngwadi nga ngaña giti. Chube alin no trate ulita, ama giti kwian gerudale no no chui tangle diali. Ene nobi. 
\s1 Pablo gbi jige bdagli chada ai giti 
\s1 kwian Chubenu ulita alin 
\p  
\v 19 Prisca alin Aquila alin cha gbi kage no ama alin, kaire Onesíforo bitalla alin.  
\v 20 Erasto chegu una Corintoge, Trófimo chegu oga una Miletoge.  
\v 21 Cha takalin ba mo ta gbe chie blike tienda chadi Timoteo, ba chiedale ngeru noi boi nga boi skeke suiale. 
\p Eubulo kaire Pudente kaire Lino kaire Claudia kaire kwian Chubenu na ulita aini gbi kage no tanre ba alin Timoteo. 
\p  
\v 22 Cha takalin che Chugagwalla Jesucristo kle ba ole ba ta kira gbe, kaire cha takalin Chube age no ba alin kaire age no daba Chubenu ulita alin. 
\p Geru ai ene ulita cha Pablo chada degangu ba alin Timoteo. Che kle meni.