\id 2TH - Buglere NT -Panama 2008 (DBL -2013) 
\h 2 TESALONICENSES 
\toc1 Pablo Nu Chada Degaba Bitabokedale Kwian Chubenu Una Tesalónicamu Alin 
\toc2 2 Tesalonicenses 
\toc3 2Ts 
\mt1 Pablo Nu Chada Degaba Bitabokedale Kwian Chubenu Una Tesalónicamu Alin 
\mt2 Segunda Carta de Pablo a los Tesalonicenses 
\ip Pablo kledu una Corintoge gire ama chada ai degangu bitabokedale kagadale kwian Chubenu una Tesalónicamu alin kwian Chubenu ta gbagda suge trate Jesucristo chieni chuia giti. Kwian gweale daba tkanga tangle geru me uliage kledu gerule kwian Chubenu una Tesalónicamu ole Jesucristo chieni chuia chkubi malen kwian me tañachugadale lle boi giti. Kwian una Tesalónicamu geru e gau ulia malen ama gweale mo ta gbu toi ngwale me lle boi dare mo alin toigda ngeru kare. Chada ai giti Pablo kwian Chubenu ta gbu chke uñale trate Jesucristo bebi chieni, ngeru Jesucristo bebi chieni gire kwian gdaite be chke kwian na tanre anblite geru ngwalege Satanás kirallaske, agwa chui bdaglige kwian daba anblitanga e kaire kwian na ulita me Jesucristo gerua gaba ulia Chube be kwian ene ulita gbe ji chuge tirare kwian agedu Chube dollale giti. 
\ip Pablo kwian Chubenu una Tesalónicamu ta gbu chege toi trate Jesucristo chieni chuia manade ngwange, kwian Chubenu ulita mo ta gbadale lle boi mo managda kaire kwian mo ta gbadale daba na chudaboi age no ulita Chube takalin kare. 
\c 1  
\s1 Pablo gbi kage chada giti kwian Chubenu 
\s1 una Tesalónicamu alin 
\p  
\v 1 Cha Pablo chada ai degange ba ulita Jesucristo gerua gaba ulia kle mo lite Chube geruadi una Tesalónicage alin: 
\p Cha ule Silvano ole Timoteo ole gbi kage ba ulita alin chada ai giti. Ba ulita kle mo lite Chube geruadi, ba che Ñenua Chubenu kaire ba che Chugagwalla Jesucristonu.  
\v 2 Cha takalin che Ñenua Chube kaire che Chugagwalla Jesucristo age no ba ulita alin ba ta gbe suga no. 
\s1 Chube be ji gbe kwian agenga me no giti 
\s1 Jesucristo be chieni chuiage 
\p  
\v 3 Cha daballa cha ibotea Jesucristo giti, cha diali mo ta gbe gerule no Chube ole ba ulita giti ene: “Chube, cha gerule ba ole kwian una Tesalónicamu nu ba gerua gaba ulia giti, nga suga no chadi ba kle ama ulita chudaboi toi no trate ba takalin kare. Ama ulita kle ba gerua gai jumale kle tañachuge chui kaire kairege ma ngle ba giti. Diali ama ulita no daba ole kle tañachuge mo chudaboi ongoru ongoru ta no giti nga suga no ole ma ngle ngeruge, malen nga suga noare chadige daba e kle age giti.” Cha kle gerule diali ene Chube ole ba giti, noare ba kle toi Chube takalin kare.  
\v 4 Malen nga suga no chadige joge baini kaire mo lite kwian Jesucristo gerua ganga ole gire cha kachke no ba ulitage ba kwian boinga tanre daga ngwale agwa ba me kle Jesucristo gerua chuge ngwadi e gdale, ba kle boi me no giti ba me kle tañachuge e giti, ulita ba kle jige Chube kote, uñale bage Chube ñage ba chudaboi, ba kle ama gerua gai ulia. Ba kle mo ta gbe chage gwangerugu giti cha kle e trage kwian na Jesucristo gerua ganga ole.  
\v 5 Suge chage ba ulita una Tesalónicamu kle boi tanre daga ngwale Jesucristo gerua gai gdale agwa ba kle chage no trate gwangerugudba Chube takalin kare, ba me kle Chube gerua chuge ngwadi dale. Malen uñale chage Jesucristo be chieni gire Chube be gerule no ba ole ene: “Ba boidu tanre daga ngwale cha gerua gdale agwa ba toidu cha takalin kare, malen e giti nege cha be ba gai ngwange no aini toi diali cha ole nga ngaña giti.” Chube be gerule ene ulita ba ulita ole. Uñale chage Chube kle age no trate diali kwian ta no alin malen cha ñage gerule ba ole Chube be age no tanre ba alin.  
\v 6 Chube kweri kiraske ama ji gbe kwian age me no giti. Malen cha ñage gerule ba ole, ba kwian Jesucristo gerua ganga kwian na ba gbe boi tanre daga ngwale Jesucristo gerua gdale, kwian kle ba gbe boi daga ngwale giti Chube be ba jia gbe.  
\v 7 Chui bdaglige Jesucristo che Chugagwalla be chieni nga ngaña giti nga dba ai giti ule lle boanga Chube alin ngle ole, lle boanga e kiraske tanre ama be chie Jesucristo ole ule jita gwade chralla tigenga kare. Chui ege Chube be ba jwen siere boi daga ngwalege kaire chui ege gwangerugu che ulita Chube gerua Jesucristo giti gaba ulia mi boi dare daga ngwale Jesucristo gerua gdale.  
\v 8 Kaire chui ege Jesucristo be ji gbe kwian giti kwian bai me Chube uñe me Chube gerua che Chugagwalla Jesucristo giti gai ulia me geru e gbe gdadi.  
\v 9 Jesucristo be kwian e gbe ji chuge diali dale ji chuge daga ngwale ngwadi nga dbigu giti Jesucristo be chieni gire, kaire kwian e be chege sugekare Jesucristoge ni ama be ñage gwage bdagli Jesucristo age no mo kirallaske ngledige.  
\v 10 Be boi ene ulita chui bdaglige Jesucristo be chieni chuiage, kaire chui ege kwian Jesucristo gerua ganga be Jesucristo chuia ollade be ama gai ngwange no mo Chugagwallale kweri, kwian ulita bai Jesucristo gerua gaba be chege tañachuge tanre no Jesucristo giti. Kaire chui ege ba be chege Jesucristo ole, ba Jesucristo gerua gau ulia cha geru ketu bage kare, geru e giti ba be chege Jesucristo ole ule kwian na ulita Jesucristo gerua gaba ole chui ege gerule no Jesucristo giti. 
\p  
\v 11 Cha diali kle tañachuge Jesucristo be chieni chuia giti, uñale chage ba be chege ama ole chui ege malen cha gerule Chube ole ba ulita giti diali, cha kle gerule ene: “Chube, noare ba kwian e gau mau alin, ama kle mo ta gbe toi no diali ba takalin kare agwa ama gballa me ñage chage no mo kiralla giti ba takalin kare, ba alin kiralla giti ama ñage toi no, malen cha takalin ba ama chudaboi toi no ba gwa giti ba takalin kare, ba kira kete amage toigda no trate ba gwa giti. Kaire ama kle ba gai ulia kle mo ta gbe lle boi no ba alin diali kwianske, ba ama chudaboi lle boi no ba kiralla giti ama ulita takalin kare.” Cha kle gerule ene Chube ole ba giti,  
\v 12 ene Jesucristo giti Chube be ba kira gbe toi Chube takalin kare kwian na gwa giti, gire be suge kwian e ulitage ulia Jesucristo kle age no ba tale malen ba kle chage no Chube takalin kare, ene kwian be gerule no Jesucristo giti Jesucristo kle age no ba alin giti. Gire Jesucristo be chieni chuiage nga be suga noare Jesucristodi kaire Chubedi ba mo ta gbu toi no Chube takalin kare giti, ama be gerule no ba giti be age no ba ulita alin. 
\c 2  
\s1 Chui bdaglige onbre gdaite be mo gbe kweri salengwli Chube kare kwian anblitangale ngwale 
\p  
\v 1-2 Daba Chubenu Jesucristo giti, cha gerukalin dare ba ole Jesucristo che Chugagwalla be chieni chuia giti, chui ege ama be che lite ole chege diali toi ama ole ule. Ba kle geru keruchuge tanre Jesucristo nu chkebani giti, ba geru e keruchuge ene Jesucristo giti gire ba me mo gbe tañachuge geru e gai ulia blikare kaire ba me kwachie dale. Kwian gweale gerule ba ole Chube Oña ama ta gbaba Jesucristo chkebani, kwian na gerule: “Cha Pablo keruchugu gerule Jesucristo chkebani”, kaire kwian na gerule: “Pablo chada degu Jesucristo chkebani.” Ba kwian keruchuge gerule ene, ba me ama gerua tallade, ama kle gerule ngwale, ulia Jesucristo bebi chieni.  
\v 3-4 Ba me mo chuge ngwadi kwian na ba anblite ngwale Jesucristo chieni chuia giti. Uñadale bage Jesucristo bebi chieni gire be boi ene: Kwian tanre be jwlite Chube dollale gire kwian onbre gdaite me no be mo tke dole Chube gerua giti, ama be age ulita che dolla Satanás kirallaske. Kwian onbre e gdaite be mo gbe kweri Chube ulia kare kwianske, kaire ama mi takalin kwian lle na gai chubere, kwian e be takalin kwian na ulita gwage ama alindi kweri Chube kare gerule no ama alin giti. Kaire ama be joge u gerungwa Chube ulia olege una Jerusalénge, ne ngwadi ama be gerule kwian ulita ole: “Cha Chube ulia, cha ba chugagwalla kweri, ba cha gai ba chubeale, ba cha gadale dage.” Ama be gerule ene kwian ulita ole, agwa bdagli Jesucristo be kwian onbre e kage nga dbigu giti ji chuge tanre kwian e agedu me no Chube dollale giti.  
\v 5 Ba tachkedale cha kledu ule ba ole una Tesalónicage gire cha ba ta gbu geru ai amaña giti. Ba me mo chuge ngwadi anblitange ngwale Jesucristo chieni chuiage giti. 
\p  
\v 6-7 Uñale ba ulitage Chube bebi kwian onbre e chuge ngwadi mo gbe kweri Chube kare kwianske malen onbre e bebi chke age me no kwianske. Nege tanglebi Satanás kle kwian tanre ta gbe age Chube gerua dollale skwlenre agwa onbre gdaite e be age ma tirare Satanás kirallaske. Chube takalin ngaminegirege onbre e chkedale gire Chube be ama chuge ngwadi age ama takalin kare Chube dollale.  
\v 8 Kwian onbre e be mo kaite Chube kare kwian gwa giti, agwa Jesucristo be chieni kiraske tanre gire Jesucristo gwa giti onbre e ni ñage chege kira molen dare, Jesucristo be gerule alin allabi kwian onbre gdaite e ole gire onbre e be jogekeda. 
\p  
\v 9 Bebi boi ene ulita kwian onbre e ole gire onbre e be age ulita Satanás kiralla giti, Satanás be kwian onbre e gbe kwian oga dodade kaire lle daga ngwale no tanre dodade kwian ulita gwa giti kwian ngwale me ñage dodade kare. Kwian ngle be tañachuge onbre e kle age Chube kiralla giti agwa me dale ama kle age ulita Satanás kiralla giti.  
\v 10 Ama be age ene kwian gwa gbe modi ngwale, ama kle sole. Kwian bai me Chube gerua Jesucristo giti gaba ulia kwian ene Satanás be onbre gdaite gbe ama anblite ngwale. Kwian e me Chube gerua ulia Jesucristo giti gau tiendale gitiru ji chugege agedu me no gdale,  
\v 11 malen Chube be onbre gdaite e chuge ngwadi age tanre me no sole ngwale kwian anblite. Kaire Chube be kwian ulita chuge ngwadi mo ta gbe geru e ngwale gai ulia.  
\v 12 Ene kaire kwian ulita bai geru ngwale e gai ulia onbre e giti ama kle tañachuge geru e noare, nga suga noare amadige age me no ama takalin kare diali, kwian e ulita giti Chube be ji gbe tirare ama me geru ulia gau kbiale. 
\s1 Kwian Chubenu mo ta gbadale chage gwangerugu 
\s1 Chube geruadi 
\p  
\v 13-14 Chube be kwian bai me ama gerua Jesucristo giti gai ulia gbe ji chuge tirare, agwa ba kwian una Tesalónicamu mi boi ene, ba kle Chube gerua ulia Jesucristo giti gai mo tale malen cha kle gerule no diali Chube ole ba giti, cha kle gerule ene: “Chube, nga suga noare chadige daba una Tesalónicamu giti. Ba noare ama ole, nge jondege alin ba ama gaubi ba alin ene ama tien gitiru ji chugege age me no gdale. Cha ba gerua ulia Jesucristo giti ketu kwian ege gire ba Oña ama ulita ta gbu ba gerua gai ulia. Nege ama banu ama ta no trate ba gwa giti, ene ama ñage toi ule diali Chugagwalla Jesucristo ole ba ole ba ngwadige nga ngaña giti. Ba Oña kle ama ulita ta gbe toi no diali ba kirallaske age trate no ba takalin kare. Ulia ba noare ama ole.” Cha kle gerule ene ba ulita giti diali Chube ole. 
\p  
\v 15 Cha daballa cha ibotea Jesucristo giti, cha gerule ba ole, Chube agedu no no ene ba ulita alin malen ba kledale diali Chube gerua uliadi, agwa ba me geru ngwale kle chage baske gai, ba mo ta gbadale tañachuge gwangerugu Chube gerua ulia giti, geru e ulia cha ketu bage cha kledu ba ole gire, kaire cha chada degu ba alin geru ulia e giti, ba me geru ngwale gai dale.  
\v 16-17 Che Ñenua Chube ama noare che ole, diali ama kle age no che alin, Chube che ta gbe, ene uñale chege Chube be che manade chui diali dale alin be age no che alin Jesucristo giti ama gerudu be age kare. Cha takalin Chube che Ñenua ule Jesucristo che Chugagwalla ole ba ulita ta gbe dare nga suga no ole ba kle boi daga ngwale Chube gerua gdale giti. Kaire cha takalin Chube ba kira gbe me kennga gerule no ulita Jesucristo giti kwian na ole age no ulita daba na alin Chube takalin kare. 
\c 3  
\s1 Pablo takalin kwian una Tesalónicamu gerule Chube ole Pablo Jesucristo gerua dbe giti 
\p  
\v 1 Cha takalin ba ulita gerule cha giti Chube ole, cha takalin Chube gerua Jesucristo giti joge chke kwian nga ulitamuge ene kwian nga ege ñage Chube gerua gai ulia ta suga no ole ba ulita Chube gerua gau gwangea kare.  
\v 2 Kaire cha takalin Chube cha jwen siere kwian agenga me no cha dollale kote. Cha takalin kwian ngle Chube gerua Jesucristo giti gai ulia cha giti, agwa uñale bage kwian ulita me kle tañachuge Chube gerua giti me kle Chube gerua Jesucristo giti gai ulia, malen ba gerudale Chube ole cha giti.  
\v 3 Chkedale uñale bage ulia Jesucristo che Chugagwalla ama no, Jesucristo kle ba ole ba chudaboi diali ama be ba ta gbe toi no ama kiralla giti, gire che dolla Satanás be ta mo chugakalin ba ole ba gbe age me no agwa Jesucristo be ba chudaboi be ba manade, ama mi ba chuge ngwadi boi daga ngwale che dolla Satanás takalin kare.  
\v 4 Chage uñale trate ba Jesucristo gau mo Chugagwallale malen Jesucristo kle ba ta gbe age ulita cha geru ketu bage kare cha kledu ba ole gire, kaire uñale chage ba be age ulita cha gerule ba ole kare chui aige gwangerugu diali.  
\v 5 Cha takalin Jesucristo che Chugagwalla ba chudaboi ba ta gbe no daba na ole Chube no ba ole kare, kaire cha takalin Jesucristo ba ta gbe chage gwangerugu Jesucristo geruadi me tallade ba kle boi daga ngwale giti Jesucristo me mo talladu ama boidu giti kare. 
\s1 Kwian gdaite gdaite mo ta gbadale lle boi 
\s1 mo kiralla giti mo managda 
\p  
\v 6 Cha daballa cha ibotea Jesucristo giti, Jesucristo che Chugagwalla kle cha ta gbe gerule ba ole, ba cha kerua gbe gdadi. Daba gweale Jesucristo gerua ganga kle toi baske me ta lle boakalin, ama kle kianchie, daba enege ba mo lingadale siere, cha me kle gerule ba me ñage gerule daba e ole agwa ba me ñage age me no ama kle age kare, ama me kle toi no trate cha ba tku tangle kare, ba ama chugadale ngwadi sugekare.  
\v 7 Ba ulitage uñale kwian Chubenu toidale mine kwian me Chubenuske, ba gwagedu chadi cha toidu mine baske, ba mo ta gbale toi no ene cha toidu cha chagedu kare baske. Cha me toidu baske ngwale, cha kledu baske diali cha lle bo mau alin mo kodi ene cha ñadu toi no,  
\v 8 kaire cha me mo manadu daba na llea giti cha me bligda kadu dabage ngwale. Cha me agedu ene agwa cha lle bo diali tanre gire ene cha ñadu mo manade agali cha lle bo ñanale, cha me tadu chegekalin jiske ba ulitage.  
\v 9 Cha Chube gerua Jesucristo giti traganga ba ole malen cha ñadu lle kade bage toigda, agwa cha me agedu ene dale. Cha lle bo ba gwa giti ene chkedale uñale ba ulitage che lle boi giti che lle molen me tañachuge daba na alin ñage lle kete chege toigda. Cha lle bo ba gwa giti mo alin ene kaire ba agedale cha agedu kare lle boadale mo managda.  
\v 10 Cha kledu baske gire cha geru ketu ba ulitage ene: “Kwian bai me lle boi, kwian ene me blidale.” Cha gerudu ene ba ole.  
\v 11 Agwa chage nu chkeba uñale daba gweale baske me ta lle boakalin, diali ama kle chui ulita kagenga ngwale kle chege gerule daba nadi kaire ulita chkekalin uñale amage kwian na kle toi mine.  
\v 12 Jesucristo che Chugagwalla kle cha ta gbe gerule ba ole daba bai kle toi ene ma no ama agali mo ta gbe lle boi, ene ama ñage igi jwen maunu sugekare mo managda. 
\p  
\v 13 Cha daballa cha ibotea Jesucristo giti, ba ulita me mo ta gbe skwatige toi no ba kle toi kare age no kwian na alin, diali ba mo ta gbadale daba chudaboi Chube takalin kare.  
\v 14 Daba gweale me cha gerua chada ai giti gbakalin gdadi me ta agekalin cha kle gerule kare, ba bai kle geru chada ai giti gai dage ulia, ba mo lingale siere daba me geru gakalinge, ba me skate amage age ama kle age kare, ene daba e be ibuchie kwian gwa giti me cha gerua gakalin gdale.  
\v 15 Cha takalin daba e cha gerua gbe gdadi toi Chube takalin kare, malen ba me skochiedale amadige ba me gerule me no amadige ba me mo tke dole ama ole, agwa ba ama ulladalenga mo daballa kare ama ta gbe ama kle age me trate Chube gwa giti, ene ama ñage mo ta blite toi Chube takalin kare. 
\s1 Pablo gbi jige bdagli chada ai giti kwian Chubenu 
\s1 una Tesalónicamu alin 
\p  
\v 16 Cha gerule ba ole, cha takalin Jesucristo che Chugagwalla ta suga no mauña agali ba ta gbe nga suga noare ole diali chui tangle ba ulita kle boi giti, cha takalin suge trate bage Jesucristo kle diali ba ulita ole, cha takalin ama age no ba ulita alin. 
\p  
\v 17 Cha Pablo chada ai degangu ulita ba ulita alin, nege cha agali kle mo ka dege mo kodi chada ai giti bdagli gbi kage ba ulita alin, diali cha kle chada degange kage kwian alin gire cha kle mo ka dege chada giti bdagli, ene chke uñale kwiange ulia cha kle chada kage ama alin.  
\v 18 Cha takalin Jesucristo che Chugagwalla age no no ba ulita alin. 
\p Geru ai ene ulita cha Pablo chada degangu ba kwian Chubenu ulita una Tesalónicage alin. Che kle meni.