\id 2PE - Buglere NT -Panama 2008 (DBL -2013) 
\h 2 PEDRO 
\toc1 Pedro Nu Chada Degaba Bitabokedale 
\toc2 2 Pedro 
\toc3 2P 
\mt1 Pedro Nu Chada Degaba Bitabokedale 
\mt2 Segunda Carta de Pedro 
\ip Pedro chada ai degu bitabokedale kwian Jesucristo gerua ganga amaña alin bai kaire toidu nga tanrege, Pedro chada ai degu kwian e ulita ta gbagda kwian na kle chage kwian Chubenu anblite giti. 
\ip E suiale kwian tanre daba tkanga tangle geru me uliage kledu chage kwian Chubenuske kwian Chubenu anblite geru ngwalege, kwian daba tkanga tangle e gerudu ama kle chage Chube gerua ulia dbe agwa me ene dale ama gerudu kare, kaire kwian e gerudu kwian Chubenu ñage toi ama takalin kare, ngwale mo ta gbe age no trate Chube takalin kare diali. Kaire kwian daba tkanga tangle geru me uliage gerudu kwian Chubenu ole Cristo mi chieni dale. 
\ip Chada ai giti Pedro kwian Chubenu ta gbu me Chube gerua Jesucristo giti chuge ngwadi agwa mo ta gbadale kiraske geru ulia giti gwangerugu. Kaire Pedro kwian ta gbu suge trate ulita Jesucristo be chieni ulia, agwa Chube tai dage kwian ulitage ama takalin kwian ulita mo ta blite ama ole ama gai ulia malen Chube me kle Jesucristo kageni blike, ama kle manade na dare, ene kwian na tanre ñage geru Jesucristo giti gai ulia. 
\c 1  
\s1 Pedro gbi kage chada giti kwian Chubenu alin 
\p  
\v 1 Cha Simón-Pedro chada ai dege ba kwian Chubenu ulita alin: 
\p Cha lle boanga Jesucristo alin, cha Jesucristo gerua ketanga, cha chada ai dege ba ulita nu Jesucristo gaba ulia mo tale alin cha kle Jesucristo gai ulia kare, e no no ene mo ta gbe diali Jesucristo gai ulia. Che Chubea kaire che jwannga siere Jesucristo no no trate, ama agedu no che ulita alin, ama ba ulita ta gbu ama cha ta gbu kare, ene ba ulita ama gau ulia cha ama gau ulia kare.  
\v 2 Cha takalin Chube age no no diali ba ulita alin Chube nga suga no no gbe ba ulita tale. Ba ulita mo ta gbadale geru jwen ma no diali Chube kaire che Chugagwalla Jesucristo geruage, ene ba ama uñe ma trate tachke ma ngle ama mine, ene diali ba tale be suge ma no nga suga no ole, ene be suge trate bage Chube kle age no ba alin. 
\s1 Jesucristo kiralla giti kwian ñage age no diali 
\s1 Chube takalin kare 
\p  
\v 3 Jesucristo che ulita gau mo alin, Jesucristo takalin che chege age no trate diali ama chagedu kare Chube takalin kare, che ulita mo ta gbadale Jesucristo gerua uñe ma trate, ene che kira gai mo ta gbe ma no diali chage no ama chagedu kare, Jesucristo kiralla giti che ñage chage nga dba ai giti age no diali Chube takalin kare Jesucristo chagedu kare.  
\v 4 Jesucristo giti Chube kle age no no tanre che ulita amanu alin Chube gerudu kare unsuialin, ene Jesucristo giti che ñage joge siere talla ulita age me noge nga dba ai giti, ene che talla chege salengwli Chube talla kare, talla ene giti che age no trate Chube takalin kare.  
\v 5 Chube kle age no tanre ene ba ulita alin Jesucristo giti malen ba mo ta gbadale chage ai kare nga dba ai giti: Ba mo ta gbadale Jesucristo gai ulia mo tale gwangerugu. Ba me Jesucristo gadale ulia mo tale alin allabi, agwa kaire ba ulita gdaite gdaite agali mo ta gbadale ulia ulia age no trate Chube takalin kare. Ba mo ta gbadale Chube gerua uñe ma trate, ene suge bage Chube takalin mine ba alin.  
\v 6 Ba mo ta gbadale me mo chuge ngwadi age me no ba takalin kare. Ba mo kira gbadaleda jage ulita me joge siere blike. Ba mo ta gbadale chage no trate Chube ole diali.  
\v 7 Ba mo ta dbadale no daba Chubenu ulita ole chudaboi ta no ole mo ta dbe mo daballanu ole kare. Ba mo ta dbadale no kwian na ulita ole.  
\v 8 Ba kle mo ta gbe age ma no ene diali ba kle che Chugagwalla Jesucristo chuge ngwadi age ba tale ama takalin kare, ene ba me ama uñe ngwale, suge bage diali ma trate Chube takalin mine.  
\v 9 Agwa kwian Chubenu me kle mo ta gbe age ma no ene diali, kwian ene Jesucristo gai ulia alin gire me kle tañachuge ege gwangerugu agedale mine Chube takalin kare, kwian ene me kle Jesucristo chuge ngwadi mo ta gbe suge Chube takalin kare me kle tachke Jesucristo ama agedu me no ulita jia junnga, ama me kle tañachuge mo giti dare ama me ñage age me no ngeru kare.  
\v 10 Malen cha gerule ba ulita ole cha daballa cha ibotea Jesucristo giti, Chube ba gau mo alin agedale no Chube takalin kare, Chube ba ta gbu Jesucristo gai ulia ene ba chegu Chubenu, Chube agedu no ene ulita ba alin ba ulita agali gdaite gdaite mo ta gbadale ma no dare diali Chube ole age ama takalin kare, ba age ene ba ta mi joge siere Chubege.  
\v 11 Ba age ene ulita nga dba ai giti, gire chui bdaglige nga no no be kle ba alin ba gangwa ngwange Chube kaire che Chugagwalla che jwannga siere Jesucristo kle ngwadige, ba be toi diali chui tangle nga ege Chube ole Jesucristo ole. 
\p  
\v 12 Uñale chage ba kle mo ta gbe no no geru uliage Jesucristo giti kwian geru dbanga ba tku tangle kare, uñale bage ulita trate ba chagedale mine Chube takalin kare, agwa cha ta gerukalin diali ba ole cha kle gerule kare lle ulita giti, cha me takalin ba joge siere geru uliage malen cha ta ba ta gbakalin ma no dare diali geru ulia giti.  
\v 13 Cha kle gwade cha tañachuge cha gerudale no diali ene ba ulita ole ba ta gbe tachke diali, ene ba ulita mi ta jogenga.  
\v 14 Che Chugagwalla Jesucristo kle cha ta gbe suge cha jogeda chuia kle kodi,  
\v 15 nege cha kle gwade cha kle gerule tanre ba ole geru amaña giti, ene geru e cha kle gerule giti chege ba tale diali, kaire cha kle geru jige degaba ba alin, ene cha mi kle gwade ba ñage tachke ulita cha gerudu giti ba ole cha kledu gwade gire. 
\s1 Mo skatemanalla boke ole mo gwagwa giti 
\s1 Pedro gwagedu Jesucristo kiralladi 
\p  
\v 16 Cha gerudu ba ole Jesucristo kiralla ama mine, cha ba ulita tku tangle Jesucristo agedu giti nga dba ai giti mo kirallaske, kaire cha ba ulita tku tangle che ulita Chugagwalla Jesucristo be chieni giti. Cha ba ulita tku tangle cha gerudu kare ba ulita ole Jesucristo giti, e geru me ngwale, cha me kle geru jinade ngwale mo ta giti cha tañachuge kare, ene ama giti cha kle gerule ba ulita ole, me ene. Cha ba tku tangle kare Jesucristo giti e geru ulia, cha ule cha skatemanalla boke ole mo gwagwa giti gwagedu Chugagwalla Jesucristodi mo kirallaske.  
\v 17-18 Chui gbaitege cha gdamai kledu ule Jesucristo ole ngaske jwichuga giti Chube kiralla chku dba ngwadi, chui ege Chube Jesucristo Ñenua gerudu no no Jesucristo giti, Chube gerudu ene: “E cha Kirolla, cha no no ama ole, nga suga noare chadi ama giti.” Cha gdamai agali geru keruchugu mo olodi, e Chube kerua, keru e chiu nga ngaña giti chku cha ulita kledu Jesucristo ole ngwadi.  
\v 19 Cha gdamai gwagedu giti kaire cha geru keruchugu giti suge trate chage kwian Chube gerua ketanga gerudu ulia unsuialin Jesucristo be boi giti, ene kaire suge trate trate chage kwian Chube gerua ketanga chada degu unsuialin Jesucristo be chieni giti e geru ulia, noare ba ulita geru e gbadale gdadi, geru e jichra kare, geru e ba ta gbe suge Jesucristo giti salengwli jichra che gbe ten nga jereske kare, nga joge ju gire che ten ulitadi, ene kaire Jesucristo chieni chuia chke gire ulita be suge trate trate chege kwian Chube gerua ketanga chada ulita degu kare.  
\v 20 Cha takalin ba ulita mo ta gbe tañachuge no Chube gerua kle degaba giti, kwian Chube gerua ketanga me chada e degu gballa mo ta giti,  
\v 21 kwian Chube gerua ketanga me gerudu sidri mo talla giti talla tañachuge kare gballa, agwa kwian ene Chube gerua ketanga ama mo ta gbu Chubege, Chube Oña kwian ene ta gbu gerule ulita Chube takalin kare, kaire Chube Oña kwian ene ta gbu chada dege ulita Chube takalin kare. 
\c 2  
\s1 Pedro kwian ta gbe chke kwian daba tkanga tangle 
\s1 geru me uliage giti 
\p  
\v 1 Unsuialin kwian israelitaske kwian geru ngwale me ulia ketanga kledu, kwian e me Chube gerua ulia ketu kwiange, kwian e mo gbu geru ngwale me ulia trage kwian ole. Boidu ene unsuialin, kaire nege kwian gweale ene talla daba tkanga tangle tanre geru ngwalege be kle ba ulitaske. Kwian daba tke tangle geru me ulia Jesucristo gitige, kwian tanre ene daba tkanga tangle mo ta gbe skwlenre geru me ulia Jesucristo giti kete bage ene ba ta chege sugekare Jesucristoge, Jesucristo jokeda kwian ene daba tkanga tangle ulita alin kaire, agwa ama me Jesucristo gai mo Chugagwallale, ji kweri be kle kwian ene alin, chui bdaglige Chube mi manade kwian ene ole, Chube be ji kweri gbe blike kwian ene ulita alin, kwian ene mi ñage joge siere ji chugege.  
\v 2 Kwian daba tkanga tangle geru ngwalege ama daba tke tangle Chube giti agwa me kle gerule ulia Chube giti, kwian daba tkanga tangle ene ulita agenga me no tanre daga ngwale, kwian e nate kwian na ngle joge chage geru jwen amage, kwian geru jwannga amage mo ta gbe age me no me no tanre kaire daba tkanga tangle kle age kare, ene kwian me Chubenu be gwage kwian edi age giti kwian me Chubenu be gerule me no Chube gerua uliadi, kwian kle age kwian takalin kare, kwian ene me age Chube gerua gerule kare.  
\v 3 Kwian daba tkanga tangle geru ngwalege diali ta igi gakalin tanre ngle mo alin, ama be takalin ba ulita Chubenu tke tangle geru gweale me ulia giti ene ama igi kade ba ulitage ama kle ba tke tangle ñanale. Kwian ene ulita kle age me no Chube gwage malen ji chuge kle biale ama ulita alin, sbali Chube gerudu be ji gbe kwian agenga me no ulita alin, chui be chke gire Chube be kwian ene ulita gbe ji chuge Chube gerudu kare sbali. 
\p  
\v 4 Cha takalin suge ba ulitage Chube agedu mine unsuialin lle boanga monu ole, lle boanga tanre Chube alin nga ngaña giti unsuialin agedu me no Chube dollale, lle boanga e ulitage Chube me taidu dage sidri, Chube lle boanga e ulita mliunga nga dbigu giti nga jereske sugekare Chubege, Chube talla me chegu ule ama ole ama agedu me no giti Chube dollale, Chube ama ulita gbu skage ogabale chui bdagli gbadale boi daga ngwale ji chuge diali.  
\v 5 Kaire unsuialin Noé suiale kwian kledu toi nga dba ai ulitage age tanre me no, Chube me taidu dage kwiange, Chube mo ta gbu nga dba ai ulita kagenga kwian ulita ole llagli chi kote kwian kledu age me no tanre gdale. Agwa Chube Noé alin gbu siere chige ule bitalla gdaguke ole, gdapale Noé ole, Noé alin allabi mo ta gbu no Chube ole Chube gerua gai dage, Noé kledu nga dba ai giti Noé Chube gerua tragu kwian ole toidu no trate Chube takalin kare.  
\v 6 Kaire unsuialin Lot suiale una kweri gdaboke kada Sodoma kaire una kada Gomorra, una e bokege kwian ulita kledu age tanre me no me no, Chube me taidu dage kwian ege, Chube una e boke gugu ulita, una kweri boke ulita kwiange llagli kugedu jitage, una tan mnuña alin chegu jita kote. Chube agedu ene mo kira giti unsuialin, e chege gda uñale kwian na ulita agenga me no be toi chui bdagli ngnagu alin ta gbagda, sugedale kwian chudalla ulitage age tanre me no gdale Chube una boke kweri ulita gugu.  
\v 7-8 Agwa ngeru Chube bebi una guge Chube kwian gdaite kada Lot gbu kige siere una ege, Lot kwian no, ama mo ta gbu toi Chube takalin kare, ama toidu kwian agenga me no tanreske ta no ole, ama ta olidu tanre kwian kle age me no giti, ama skwatige ta olire ole gwage chui gdale kwian me no ngledi age tanre me no, skwatige ta olire ole kwian keruchuge chui gdale gerule me no.  
\v 9 Unsuialin Chube Noé kaire Lot manadu no, ene Noé kaire Lot me boidu daga ngwale kwian agenga me no ulita boidu kare kwian agedu me no gdale, ene kaire nege Chube ñage kwian ulita manade no bai kaire mo ta gbe no ulia Chube ole Noé kaire Lot mo ta gbu Chube ole kare, Chube kwian ene ta gbe toi no trate Chube takalin kare kwian agenga me noske, ene chui bdaglige Chube ji gbe chuiage kwian ene be tien gitiru Chube be ji gbege. Agwa ji chuge chuia chke Chube be kwian agenga me no ulita gbe ji chuge chui tangle.  
\v 10 Chube be ji gbe ma kweri kwian ulita alin bai kaire kle mo ta gbe tañachuge diali age me no tanre ama ta agekalin kare bai kaire kle mo ta dbe me no Chube ole me Chube gai dage mo Chugagwallale. 
\p Kwian daba tkanga tangle geru ngwalege kwian ene, ama diali mo ta gbe tañachuge age me no, ama age tanre me no giti me ibule, ama kle mo ta gbe diali age me no, kwian ene me kwachie gerule me no me no lle boanga Chube alin nga ngaña gitidi.  
\v 11 Lle boanga Chube alin nga ngaña giti ama ulita ma kweri ma kiraske kwian daba tkanga tangle geru ngwalege ñage age me no kwian ene kle gerule me no giti ole, agwa ama me age kwian ene ole, ni kwian gbe jiske Chubege, ama kwian ene jige Chube kote.  
\v 12 Kwian daba tkanga tangle geru ngwalege ta bda kare, bda ta me, bda skien bda toi bda chage bda age ulita bda takalin kare agwa me tañachuge mo giti be boi giti bdagli, bda kle toi nga jereske kare me uñale amage kle age no o me kle age no, me uñale amage ngaminegire ama gutabe o gwabeda. Ene kaire kwian daba tkanga tangle geru ngwalege talla, kwian ene me tañachuge mo giti be boi giti bdagli, ama mo chuge ngwadi toi age me no ama takalin kare, ama gerule me no geru uliadi ama takalin kare, ama ta me, ni uñale amage ama kle gerule llema giti, kwian ene be jogeda sugekare Chubege,  
\v 13 kwian ene be ji chuge kweri daga ngwale ama agedu me no daba na ole giti. Kwian daba tkanga tangle geru ngwalege, ama kle age giti me no ulita chui kaire kaire amadi nga suga no no age ulita me no giti, kwian ene kle tañachuge nga dbe suga no sugeti alin ngwale, kwian ene me kle tañachuge be boi bdagli giti. Ba ulita Chubenu kle chui ollade gire kwian daba tkanga tangle geru ngwalege kle joge chke baske chui ollade mnalin ba ulita ole, kwian ene ba gatedi chui ollade ta me no ole ene ama tañachuge ba ta jwlite ama ole, nga chie ibule ba ulitadi ama kle age baske giti, ama agenga me no me no, ama ta me no diali, malen ba me ñage chui ollade no kwian ene ole.  
\v 14 Baini kaire daba tkanga tangle ene gwage muingadi ama takalin muingage mo alin, diali ama mo ta gbe chage age me no. Ama takalin kwian na age ama kle age kare, kwian Chubenu me mo ta gbaba kiraske Chube geruadi, ama kwian ene anblite age ama kle age kare. Diali ama kle mo ta dbe tañachuge lle me amanu giti takalin lle me amanu ulitage mo alin, ama tachke ngle age ene ama lle me amanu tanre gai mo alin takalin kare, ama mo ta gbe age me no me no diali, kwian ene ulita alin ji chuge kle biale.  
\v 15-16 Ama ulita jo siere geru ulia tratege, ama ulita kle chage sugekare geru uliage age tanre me no, ene ulita kle mo ta gbe age salengwli Beor kirolla kada Balaam agedu kare, Balaam Chube gerua ketanga agwa ama me agedu Chube ama ta gbu age kare, ama agedu kwian na ama ta gbu age kare, e giti ama igi tanre gai age kwian e takalin kare ñanale. Balaam kledu age me no kwian na takalin kare, Balaam ta chugleda bda giti, bda chagegda keru jwlitu gerudu kwian kare Balaam ole Balaam ta gbale me age me no dare ama kledu age kare, agwa Balaam me mo ta blitu, Balaam mo ta gbu age me no gwangerugu. Kwian daba tkanga tangle geru ngwale me uliage mo ta gbe age me no diali Balaam agedu kare.  
\v 17 Kwian ene ulita chi gwagwa ulen kare, kwian sie ole joge chi gwagwage chi jadale agwa chi gwagwa skwen ulen amage ama me ñage chi gwagwa ulen jai sie ole, chi me, ene kaire kwian daba tkanga tangle geru ngwalege me ñage kwian na ta gbe suge no. Kwian daba tkanga tangle geru ngwalege kaire salengwli bogakwa kle gwaluge noi ngwange noi gbale boi agwa noi me boi, mleuda bogakwa e dbe gire noi me boi, ene kaire kwian daba tkanga tangle geru ngwalege, ama kle gerule be age gire mo ta blite nganake ama gerule kare. Kwian daba tkanga tangle ene me ñage age no ni ñage daba chudaboi, nga dbigu giti nga jere jere, nga ege ji chuge kweri kle biale kwian ene ulita alin.  
\v 18 Ta me no ole kwian daba tkanga tangle geru ngwalege diali takalin daba na age me no ama kle age kare, talla ene ole ama kle gerule ngwale kle gerule kweri no no mo giti ama kle age no kare. Daba na nu mo ta gbaba me sbali Jesucristo gai ulia joge siere age me noge, mo ta gbaba me sbali me chage dare age me no kwian na agenga me no olege, kwian daba tkanga tangle geru ngwale me uliage ñage daba ene ta gbeni naskuni age me no joge siere geru uliage.  
\v 19 Kwian daba tkanga tangle geru ngwalege gerule kwian ole: “Ba age cha kle age kare, e no che ulita alin, age ulita che takalin kare e gerulla me.” Ama gerule ene kwian ole agwa ama agali talla me no ulita kle tale, talla e kle ama kage age me no diali, kwian ene ulita ta ngle me no molen.  
\v 20 Agwa kwian nu Jesucristo gaba mo Chugagwallale mo jwanngale siere ji chugege age me no gdale, Jesucristo giti kwian ene nu jogeba siere talla ulita age me noge, nga dba ai giti kwian ene ulita bai kaire mo ta bliteni naskuni age me no diali mo chuge ngwadi age talla me no kle ama kage age kare, kwian ene chege mo ta gbe age ma me no dare ngeru bebi Jesucristo gai uliage.  
\v 21 Kwian ene ulita geru no ulia Jesucristo giti uñe trate trate, uñale ama ulitage ama chagedale no trate Jesucristo takalin kare diali, agwa ama mo ta bliteni naskuni chage age me no ama chagedu ngeru kare, ma no kwian ene ulita me geru ulia keruchugu gwangea ni geru gau ulia dale.  
\v 22 Kle boi salengwli kwian gweale ta molen ngle gerule kare, ama gerule ene: 
\q1 “To allekwa mlienga, to amaña mo allekwalla guteni naskuni. 
\q1 Kaire chunchi gligabada trate gire sugeti ama mo kageni sugaska blebitale naskuni.” 
\m Boi ene kwian ole kwian nu mo ta blitaba geru Jesucristo giti gai ulia age no Jesucristo takalin kare gire ama mo ta gbe joge siere geru ege jogeni age me no naskuni tanre ngeru kare. 
\c 3  
\s1 Pedro kwian Chubenu ta gbe chke 
\s1 Jesucristo chieni chuia giti 
\p  
\v 1 Cha daballa cha ibotea Jesucristo giti, bitabokedale cha kle chada dege ba ulita alin, cha chada degu ngeru, kaire cha kle chada ai na dege, chada e ulita giti cha ta ba ta gbakalin tachke trate geru ulia giti.  
\v 2 Unsuialin kwian tanre Chube gerua ketanga gerudu trate Jesucristo be boi giti, ba geru e ulita uñe, cha takalin ba ulita tachke geru e giti. Kaire cha takalin ba ulita tachke geru giti kwian Jesucristo gerua ketanga ba tku tangle ama geru Jesucristonu ketu bage kare, Jesucristo che Chugagwalla che jwannga siere ama ulita gbu geru ulia ama giti kete kwiange, ba mo ta gbale diali chege geru uliadi, ene ba mi mo ta blite. 
\p  
\v 3 Cha takalin ba ulita tachke ma no ulita cha kle chada ai dege giti, chui bdagli ngwange kwian tanre be mo ta gbe toi age me no kwian takalin kare, kwian ene ulita be tañachuge me no Cristo giti be Cristo gerua Cristo chieni giti gbe gidagda, kwian ene geru kade Cristo be chieni giti be gerule:  
\v 4 “¿Boidu mine Cristo be chieni ole? Geru kle ama be chieni agwa ama me chie gda uñale, ama mi chieni dale, kwian kle geru jinade ngwale. Nga ulita jo dodaba nga kle kare kle, nga me boi gda uñale nga jo dodaba suiage gwaiguda, che enusulian unsuialin ulita tigedu, ulita jokeda, kle kaire nege tangle me boi gda uñale Cristo chieni giti, ulita kle salengwli nga jo dodaba suia kare.”  
\v 5 Kwian gerule ene, Chube agedu ulita ngeru kwian me ta gbakalin gdadi, kwian me mo ta gbakalin suge unsuialin Chube gerudu nga ole gire nga ngaña chegu dodaba, gire Chube gerudu chi ole gire chi nga jigu ngwale gire chi tanege dbi chegu, Chube nga ulita dodadu unsuialin ene, agwa kwian ene gerule: “E me boidu ene ulia.”  
\v 6 Kaire kwian ene me mo ta gbakalin suge Chube ji gbu kwian agenga me no ulita alin Noé suiale, Chube nga dba ai ulita unsuialin kagunga kwian agenga me no ulita ole llagli chi kote.  
\v 7 Chube agedu ene unsuialin kwian chudalla nge ulita ole agwa nege Chube kle nga dba ai ulita kaire nga ngaña ulita manade chui bdagli alin, chui e Chube ji gbe chuia kwian agenga me no ulita alin, chui bdaglige Chube amaña be age nakwaite be nga dba ai kaire nga ngaña kagenga ulita jita kote, chui ege kwian agenga me no ulita be kle ji chuge sugekare Chubege jita eske. 
\p  
\v 8 Cha daballa cha ibotea Jesucristo giti, cha ta ba ulita ta gbakalin dare, cha takalin ba me ta jogenga Chube me chui gbe gdadi salengwli kwian kle chui gbe gdadi kare, chui gbaite Chube alin chura ngle mil kare, chura ngle mil Chube alin chui gbaitre alin kare.  
\v 9 Chube alin nga bebi joge sbali malen Jesucristo bebi chieni Chube gerudu kare Jesucristo be chieni giti, kwian gweale kle tañachuge Jesucristo mi chieni blike, agwa kwian ene me kle tañachuge no trate Jesucristo chieni giti, Jesucristo ñage chieni blike agwa Chube kle mo ta dbe no kwian ulita ole, Chubege uñale kwian ulita bebi ama uñe, Chube me takalin ni kwian gdaite jogenga sugekare amage, malen Chube kle manade, ene chui kle kwian alin mo ta blite Chube ole age Chube takalin kare ene kwian ulita be kle biale joge Jesucristo ole Jesucristo chieni chuiage.  
\v 10 Che Chugagwalla Jesucristo chieni chuia be chke blike kwian skwe boanga kle chke kle kwian gai alenske kare, ene che Chugagwalla Jesucristo be chkeni, chui ege kwian me kle Jesucristo chieni chuia manade ngwange kwian ene be skate alenske, chui ege nga ngaña ulita nga dba ulita be boi tirare be jogenga ulita jita kote, jita kweri be kle gdade kweri tirare, nga ngaña be jogenga ulita jita e kote, chui, dai, beu ulita be liedba ulita, kaire nga dba ulita be jogenga ulita jita e kote, lle nga dba ai ulita giti be kuge, ni lle gdaite chegeda.  
\v 11 Nga ulita be boi ene, nga ulita be jogenga, e suge bage trate be boi ene ulia ma no ba ulita mo ta gbadale chage ma trate ta giti Chube ole diali toi no trate Chube gwa giti age Chube takalin kare.  
\v 12 Ba mo ta gbadale manade toi no trate Jesucristo chieni chuia ngwange, ba toi no trate Chube takalin kare, ene ba be kle biale joge Jesucristo ole ama chieni chuiage, ene ba be takalin Jesucristo chieni chuia chke blike. Chui ege nga ngaña Chube be kagenga ulita jita kote, chui, dai, beu, kaire lle na ulita nga ngaña be liedba jita kwira jute kote.  
\v 13 Agwa che ulita Chubenu kle nga na jagere manade ngwange Chube gerudu kare, nga ngaña nga dba jagere be kle dodaba, nga ege che be toi, nga ege ni age me no gdaite be kle, ulita be kle no trate. 
\p  
\v 14 Cha no no ba ulita ole malen cha takalin ba ulita mo ta gbe toi no diali Chube takalin kare ba kle Jesucristo chieni chuia manade gire, ba mo ta gbe age no ene diali, Jesucristo chieni chuia chke gire ba be kle biale ama gai ngwange no ta no trate ole, ba ta be kle no Chube ole, ba me skatedale kwachie amage ta me no ole age me no.  
\v 15 Ba tachkedale che Chugagwalla Jesucristo chieni chuia giti, Jesucristo bebi chieni e me gerule ama mi chieni dale, me ene, ama kle manade, uñale amage kwian ulita bebi ama gai ulia, ama kle mo ta dbe no kwian ulita ole, ama takalin kwian ulita ama gai ulia ene kwian ulita tien gitiru ji chugege age me no gdale. Ba me kledale toi ba me geru uñe kare Jesucristo chieni giti, cha kle chada ai dege kare ba ulita alin Jesucristo chieni giti, kaire Chube ta ngle ketu Pabloge chada dege ba ulita alin Jesucristo chieni giti, Pablo che daballa Jesucristo giti, che ulita no ama ole.  
\v 16 Pablo chada ngle degu, chada gdaite gdaite giti Pablo geru tanre degu, kaire geru degu Jesucristo chieni giti. Pablo geru degu tanre, geru gweale kle degaba mno, geru me suge blike. Kwian me mo ta gbaba kiraske Chube gerua uliadi, kwian enege geru me suge trate, ama me ta geru e jwankalin no ene geru suge trate amage, Pablo geru degaba kwian ene ulita blite nganake ama tañachuge kare, kaire ama Chube gerua ulita degaba unsuialin blite nganake ama tañachuge kare. Kwian ene agali mo ta gbe joge siere Chube gerua uliage, kwian ene be ji chuge kweri bdagli sugekare Chubege.  
\v 17 Kwian ene daba tkanga tangle geru me uliage be joge chke ba ulitaske be gerule geru ngwale giti ama tañachuge kare, malen cha kle ba ulita ta gbe ngeru kwian enege geru ulia giti. Ba ulita cha daballa cha ibotea Jesucristo giti, cha no no ba ole, cha gerule ba ulita ole ba mo ta gbadale chage ta giti Chube gerua ulia gai ma no, ene kwian daba tkanga tangle geru me uliage chke baske ba anblite geru amanudi be suge bage kwian e me kle chage geru ulia ole ama kle chage geru ngwale ole, ene ba mo ta gbaba no geru ulia ole ba mi mo ta blite joge siere geru uliage ba mi geru ngwale gai ulia.  
\v 18 Ba ulita gdaite gdaite mo ta gbadale Jesucristo che Chugagwalla che jwannga siere uñe ma no diali chui kaire kaire, ene Jesucristo ba ta gbe suge ma ngle diali Jesucristo no ba ole Jesucristo age no ba alin. Jesucristo che Chugagwalla kweri no no, ama giti che ulita gerudale no nege dale kaire diali chui tangle. Ene nobi. 
\p Geru ai ene ulita cha Simón-Pedro chada degu ba kwian Chubenu ulita alin. Che kle meni.