\id 2CO - Buglere NT -Panama 2008 (DBL -2013) 
\h 2 CORINTIOS 
\toc1 Pablo Nu Chada Degaba Bitabokedale Kwian Chubenu Una Corintomu Alin 
\toc2 2 Corintios 
\toc3 2Co 
\mt1 Pablo Nu Chada Degaba Bitabokedale Kwian Chubenu Una Corintomu Alin 
\mt2 Segunda Carta de Pablo a los Corintios 
\ip Pablo kledu toi nga kweri kada Macedoniage gire ama chada ai degangu bitabokedale kagale kwian Jesucristo gerua ganga alin una Corintoge. Pablo skatemanalla kada Tito chku Pablo kle ngwadi, Tito geru ketu Pabloge kwian Chubenu una Corintomu Pablo chadalla ngeru gau ngwange giti. Chada ngeru giti ulia Pablo ka bo mno kwian ole ta no giti kwian kledu age me no gdale. Tito giti Pabloge chku uñale kwian gweale Jesucristo gerua ganga una Corintomu Pablo chadalla ngeru gau ngwange no ama mo ta blitu ama kledu age me no ngeru ama chugu ngwadi. Agwa kwian Chubenu na gweale skochiu tanre Pablodi ama chada degangu gdale, kwian e kledu gerule Pablodi Chube me Pablo gau Jesucristo gerua ketangale dale Pablo kle gerule kare, gire kwian e chegu chage age me no ama kledu age ngeru kare. 
\ip Geru e ulita chku uñale Pabloge gire Pablo chada ai degangu kwian Chubenu alin una Corintoge. Chada ai giti Pablo kwian ta gbu suge ulia Chube nu Pablo gaba kwian Jesucristo gerua ketangale kaire Pablo kwian ta gbu suge kwian igi litadale kwian Jesucristo gerua ganga nga nage me lle molen chudaboagda. 
\c 1  
\s1 Pablo gbi kage chada giti kwian Chubenu 
\s1 una Corintomu alin 
\p  
\v 1 Cha Pablo chada ai degange ba ulita Chubenu alin kle mo lite Chube geruadi una Corintoge kaire daba Chubenu na ulita alin kle toi una na kaire kairege nga kweri Acayage: 
\p Chube tale Chube cha gau cha gbu Jesucristo gerua ketangale, cha ule daba Timoteo ole gbi kage chada ai giti ba ulita Jesucristo gerua gaba alin.  
\v 2 Cha takalin Chube che Ñenua kaire Jesucristo che Chugagwalla age no no ba ulita alin ama ba ulita ta gbe suga no. 
\s1 Kwian Chubenu boi daga ngwale, Chube kwian ene 
\s1 ta gbe suga no boi daga ngwaleske 
\p  
\v 3 Che ulita gerudale no no Chube giti, ama che Chugagwalla Jesucristo Ñenua, ama tai dage chege diali ama che chudaboi ama che ta gbe suga no.  
\v 4 Che kle boi daga ngwale gire Chube che chudaboi, ama che kira gbe ama che ta gbe suga no, ene kaire daba na kle boi daga ngwale che ñage daba ene chudaboi ta gbe suga no Chube che chudabo kare ta gbe suga no che kle boi daga ngwaleske.  
\v 5 Cristo chagedu nga dba ai giti, ama boidu tanre daga ngwale kwian ama dollale kote, che boi ene kaire daga ngwale Cristo gerua dbe giti Cristo che chudaboi ta gbe nga suga ma no ole boi daga ngwaleske. 
\p  
\v 6 Cha ule Timoteo ole kle boi tanre daga ngwale Cristo gerua dbe giti, kaire cha boidu daga ngwale Cristo gerua dbe giti ba ulita alin ba ulitaske, ene ba geru Cristo giti keruchugu ba geru Cristo giti gau ulia ene ba ulita ta chegu suga no geru e ole, ba tiendu gitiru ji chugege ba agedu me no gdale, geru Cristo giti no no ba ulita alin. Kaire Cristo cha chudaboi ta gbe suga no boi daga ngwaleske, ene suge chage cha ba chudaboi mine ta gbe suga no ba kle boi daga ngwale Cristo gerua dbe giti cha kle boi daga ngwale kare, cha ba chudaboi ta gbe suga no boi daga ngwaleske Chube kle cha chudaboi ta gbe suga no kare, ene ba boi daga ngwale ba ñage jage ba mi joge siere Cristo geruage.  
\v 7 Geru chku uñale chage ba ulita giti ba kle boi daga ngwale Cristo gerua dbe giti, e giti chke uñale chage ba kle mo ta gbe no Cristo ole, kaire boi daga ngwaleske Chube kle ba chudaboi ba ta gbe nga suga no ole ene ba kle ñage ta chege kiraske Cristo geruage diali, e giti nga suga no chadi ba ulita giti. 
\p  
\v 8-9 Cha bitalla Jesucristo giti, cha ta ba ta gbakalin chke boidu cha ole nga kweri Asiage giti, nga Asiage Jesucristo gerua dbe giti cha boidu tanre daga ngwale kwian geru dollale kote, kwian Jesucristo gerua dollale nga ege agedu tanre me no cha ole, e kote cha kira ulita jonga, cha tañachugu kwian e be cha gweda geru gdale, ulia cha tañachugu cha mi tien gitiru gwade, agwa uñadu chage Chube kwian jaba gbanga gwadeni kledu cha ole, sugedu trate chage boi tirare eneske cha agali me ñage age no mo alin agali agwa Chube alin ñage age no cha alin cha chudaboi, cha gballa me ñage mo gbe siere kwian kle age tirare me no cha olege, cha mo jigu Chube kote, Chube agedu no cha alin.  
\v 10 Chube cha chudabo tanre nga Asiage, ama cha jun siere kwian tadu agekalin tirare cha olege nga ege, ene kwian me ñadu cha gweda. Chube cha chudabo nga Asiage kare, ene kaire uñale trate chage Chube be cha chudaboi diali cha be boi tirareske ulita, Chube be cha jwen siere diali kwian ta agekalin tirare cha olege.  
\v 11 Noare ba ulita mo ta gbe gerule Chube ole cha giti, ba ulita chudaboi kade Chubege cha alin cha kle boi tirareske. Ba ulita gerule ene Chube ole cha giti, Chube be cha chudaboi gire be suge ba ulitage Chube kle age no cha alin, e giti ba ulitadi nga be suga no gire ba ulita be gerule no no Chube ole ama kle age giti. 
\s1 Pablo mo ta blite me joge tienda kwian una Corintomudi Pablo tañachugu ngeru kare 
\p  
\v 12 Nga suga no chadi cha tale cha suge moge ulia nga ulita baini kaire cha jogeba ngwadi cha chagedu kwian ulitaske age no trate Chube takalin kare, cha kledu ba kwian una Corintomu ulitaske cha chagedu age no ene kaire. Cha agali mo talla giti me mo ta gbu chage ene, me ene, agwa Chube agedu no cha alin, ama cha ta gbu, ama cha kira gbu diali, ene cha ñadu chage age no trate ama takalin kare.  
\v 13-14 Diali geru cha kle degange kare ba ulita alin, geru e me mno ba alin ñage suge trate ba ulitage, agwa ba ulita gwealege me suge trate, ba gweale kle tañachuge me no cha giti kle tañachuge cha me kle age ulia cha kle chada degange kare, cha takalin ba ulita baige kle tañachuge ene cha giti chke uñale trate trate geru cha kle degange kare ba ulita alin geru e ulia ulita, cha me kle sole chada giti ni cha kle ba anblite. Cha takalin suge trate ba ulitage cha kle mo ta gbe chage no Jesucristo gerua dbe no kwian ulitaske Chube takalin kare, ene bdagli che Chugagwalla Jesu chieni chuiage nga be suga no ba ulitadi cha giti kaire nga be suga no chadi ba ulita giti.  
\v 15 Ngeru cha tañachugu ba ulita kle mo ta dbe no cha ole ba ulita be cha gaini ngwange no diali, malen cha tañachugu joge chke bitaboke baske tienda ba ulitadi, ene bitaboke ba ña kira gai cháge Jesucristo gerua giti.  
\v 16 Cha tañachugu joge nga kweri Macedoniage agwa ngeru cha be joge chke ba ngwadi, gire cha be joge dare nga Macedoniage, gire nga Macedoniage cha chieni ba ngwadi nakwaite, cha chege sugeti ba ole ene ba gweale be ñage cha chudaboi cha gatedi joge dare nga kweri Judea ngnagu.  
\v 17 Cha tañachugu joge chke ba ngwadi ene, agwa cha me ñadu, ¿e giti ba gweale kle tañachuge chadi cha mo ta gbu joge agwa ulia cha me tadu jogekalin cha mo ta gbu kare? Cha geru ketu bage cha be joge tienda ba ulitadi, gire cha me jo, ¿e giti ba gweale kle tañachuge chadi cha gerudu ta boke ole sole ba ole?  
\v 18 Uñale trate Chubege cha ta mine giti cha gerule ba ole, uñale Chubege cha kle mo ta gbe gerule ulia ba ole diali, cha me kle gerule ta boke ole sole ba ole.  
\v 19 Cha ta chagekalin age no ulita Chube Kirolla Jesucristo agedu kare nga dba ai giti, malen cha me sole ba ole. Cha kaire Silvano kaire Timoteo cha gdamai chagedu ba ulitaske Jesucristo gerua trage ba ulita ole cha me sodu ba ole, cha gerudu ulia ba ole Jesucristo giti. Jesucristo diali gerudu ulia ni sodu sidri, Jesucristo agedu ulia diali ama gerudu kare.  
\v 20 Kaire Jesucristo agedu ulita kwian alin Chube gerudu unsuialin Chube be Jesucristo gbe age kare, Jesucristo agedu no ene ulita giti che ulita gerule no no Chube ole.  
\v 21 Chube ba ulita kaire cha ulita ta gbu Cristo gai ulia, ama che ulita ta gbu chage kiraske Cristo geruage, Chube che ulita gau mo alin geru dbe ama alin kwianske.  
\v 22 Che ulita Chubenu ulia, ama mo Oña gbu che tale, Chube Oña diali kle che ole kle che ta gbe suge trate che Chubenu bdagli che be toi diali chui tangle Chube ole.  
\v 23 Ulia ngeru cha tañachugu joge una Corintoge tienda ba ulitadi gerule ba ulita ole agali, agwa bdagli cha tañachugu ma no ba ulita alin cha me joge ba ngwadi cha tañachugu ngeru kare, malen cha mo ta blitu cha me jo. Ba ñage tañachuge cha me kle gerule ulia, agwa uñale Chubege cha kledu tañachuge mine ba ulita giti, cha me kle gerule ene ulia ba ole Chube be cha gbe jiske cha kle gerule giti ba ole.  
\v 24 Cha me ta jogekalin llani gerule mno ba ole mo ta gbe Jesucristo gai ma no giti, me ene, uñale chage ba ulita mo ta gbu no Jesucristo ole Jesucristo gai ulia, cha ta jogekalin llani cha ta ba ulita chudaboakalin kira gai ma dare Jesucristo giti, ene ba ulita chege kiraske nga suga no ole Jesucristo geruadi. 
\c 2  
\p  
\v 1 Cha joge ba ngwadi tienda badi cha ka boadale mno ba ulita ole agali ba kle age giti, cha ka boi ene ba ole ba be chege ta olire tanre, malen cha mo ta blitu me joge tienda badi nakwaite, cha me ta ba ta gbakalin olire ibule cha ka boi ba ole giti.  
\v 2 Cha ka boi mno ba ole cha ba ta gbe olire cha kaire be chege ta olire ba ulita giti, cha kle ba ulita gbe chege ta olire e giti cha be chege ta olire kaire, chadi nga suga no ba ulita ta kle nga suga no ole.  
\v 3 Sugedu chage ene malen cha chada degangu ba ulita alin, cha geru gbu chada giti alin kagu ba ulita alin, ene cha me ka boadale ba ole agali. Cha me tadu jogekalin agali gwage badi chege ta olire ba ulita kle age giti, cha tañachugu ma no chada degange ba alin, ene ba ulita agali ñage mo ta gbe ba kle age giti chuge ngwadi mo ta gbe ma no age no Chube takalin kare, ba age ene, chadi nga be suga no, kaire ba ulitadi nga be suga no.  
\v 4 Cha kledu chada e degange kagadale ba ulita alin cha tañachugu tanre ta olire ole ba ulita giti, cha olidu tanre, cha chada e degangu ba ulita alin me ba ta gbagda olire agwa cha tadukalin suge trate ba ulitage ulia cha no no ba ole cha ta ba ta gbakalin suge ulita ba kle age giti ba chudaboi. 
\s1 Pablo takalin kwian Chubenu ulita una Corintomu kwian onbre gdaite agedu me no talla mlienga 
\p  
\v 5 Cha chada degangu ngeru cha kagu ba ulita alin, chada e giti cha ba ta gbu age onbre gdaite ole ama kledu age me no me no ba ulitaske, onbre e cha ta gbu olire ama kledu age me no baske giti, me cha alin allabi ta olidu ama kledu age giti, kaire ba ulita gweale ta olidu tanre ama kledu age giti.  
\v 6 Ba ulita kwian onbre ene gbu ji chuge nobi, ba me ama gbe ji chuge dare.  
\v 7 Ma no ba ulita mo ta gbe no ama ole ama chudaboi ama agedu ulita talla mlienga, ba me ama jige ta olire ole, ama chege ta olire ole ama ta ñage chege bate Chubege ama ña joge siere Chubege ta olire ole.  
\v 8 Ba me ama chugale ngwadi ta olire ole, malen cha takalin ba ulita ama gaini naskuni baske ba age no ama alin, ene be suge trate amage ba kle mo ta dbe no ulia ama ole.  
\v 9 Cha geru gbu ngeru ba alin chada giti ba ulita agedale mine kwian onbre ene ole, ene ba be age kwian ene ole giti be chke uñale chage ba ta agekalin cha gerule kare cha gai dage ulia o me. Ba agedu cha gerudu kare kwian ene ole, ba ji gbu ama alin.  
\v 10 Ba ulita onbre gdaite ene agedu me no ene talla mliunga, cha kaire mo ta gbe daba ene agedu me no ene talla mlienga Cristo gwa giti Cristo takalin kare. Che ulita Chubenu mo ta gbe ule ene daba age me no talla mlienga,  
\v 11 ene dolla Satanás me ñage age che ulita Chubenuske ama takalin kare, uñale che Chubenuge dolla Satanás takalin age mine kwian ole. 
\s1 Pablo takalin Tito chieni blike 
\p  
\v 12 Cha jo chke una Troage geru che Chugagwalla Cristo giti tragadale kwian una emu ole, cha kledu eni kwian tanre ta kle biale geru Cristo giti gai ulia, cha geru Cristo giti ketu amage, ama cha keruchugu no ama geru gau ulia.  
\v 13 Cha jo chke una Troage cha tañachugu cha daballa Cristo giti kada Tito be skwen chage una ege ene Tito giti geru ba giti be chke uñale chage ba ulita kle mine, agwa Tito me kledu eni bebi chke. Cha kledu una ege cha ta olidu tanre chege tañachuge tanre ba ulita giti, cha tadukalin Tito chke blike geru trage cha ole ba ulita giti, malen cha me chegu manade sbali eni, cha jo siere kwian ulita una emuge, cha jo nga kweri Macedoniage Tito manade ngwange. 
\s1 Pablo kle chage nga ulitage geru Cristo giti 
\s1 kete kwian nga ulitamuge 
\p  
\v 14 Cha gerule no no Chube giti, diali ama kle cha chudaboi tanre nga ulitage baini kaire cha joge ngwadi, diali ama kle cha ta gbe chage no mo ta dbe no Cristo ole gerule no trate Cristo giti kwian ulita ole, ene cha giti geru Cristo giti ñage chke uñale kwian nga ulitamuge. Cristo gerua kle chage kwianske nga ulitage lle ñachke no ñalla kare, geru kle skwen no kwiange.  
\v 15 Cha kle chage geru Cristo giti trage kwian ulita ole, e giti nga suga no no Chubedi, ene geru Cristo giti ñage chke uñale kwian ulitage, ene kwian ulita ñage geru amaña keruchuge ñage mo ta gbe geru gai ulia mo alin. Kwian gweale geru gai ulia agwa gweale me geru gai ulia,  
\v 16 kwian bai me geru gai ulia, kwian ene chege diali sugekare Chubege, geru me skwen no kwian enege, agwa kwian bai geru gai ulia, geru skwen no amage, geru kwian ene ta gbe Chube ole, kwian ene Cristo gerua gai ulia giti be toi diali chui tangle Chube ole. Cha agali gballa me kledu biale mo ta gbaba geru ene Cristo giti dbe kwian ulitaske Chube takalin kare,  
\v 17 agwa Chube cha gau cha kagu geru Cristo giti dbe kwian ulitaske, cha kle geru kete kwiange Chube cha ta gbe kare Chube kirallaske me mo kirallaske. Cha me kle geru dbe kwian na tanre kle geru dbe kare, kwian ene kle chage geru dbe gire kle igi kade mo alin geru dbe giti, cha me kle mo ta dbe age ene kwian geru ganga ole. 
\c 3  
\p  
\v 1 Cha gerule ene ba ole ene ñage suge bage cha kle lle boi giti no Chube alin, ¿e giti ba tañachuge cha ta mo gbakalin ma no ma kweri ba ulita gwage? Me dale, ba ulita cha uñe, ba ulitage uñale cha kwian mine. ¿Daba nu chada degaba gerule no cha giti ole cha chagedale? ¿Cha chada e kaitadale ba ulitage kwian gweale kle age kare ene ba ulita cha gai ngwange no moske? ¿Cha chada kadadale bage gerule no cha giti ene cha ña chage chada e ole nga na ulitage Cristo gerua dbe, ene kwian nga na ulitamu cha gai ngwange no?  
\v 2 Me ene dale, cha me chagedale chada e kare ole. Ba me tañachugadale kwian gweale chada degadale cha giti ene suge bage cha kwian mine, me ene, ba ulita bai nu Cristo gerua gaba ulia tachkedale mo giti, ene be suge trate bage cha chagedu geru dbe no baske, geru e agedu tanre no ba tale, geru e ba ta blitu, ba me kle chage nge kare. Diali cha kle tachke ene ba ulita giti, ba kle cha tale diali cha kle tachke ba ulita giti. Boidu ba ulita tale Cristo gerua giti kle chke uñale kwian tanrege baini kaire cha kle chage ngwadi, ene e giti suge kwian nga ulitamuge cha kle chage Cristo gerua dbe no ulia, e ma no chagé chada olege nga kaire kairege.  
\v 3 Cristo agedu tanre no ba ulita tale cha Cristo gerua du baske giti, cha chage nga kaire kairege e trage kwian ole, e salengwli cha kle chada degaba gerule no ba giti dbe kaite kwian ulitage kare, agwa e me chada ulia degaba mo kodi chada degagda giti ni chada jo degaba ke kwale giti kare, me e kare, Cristo agedu ba ulita tale Chube Oña giti, Chube gwade, kaire Chube Oña gwade, Chube Oña agedu ba ulita tale e chege diali ba tale me chada degaba batenga alin kare.  
\v 4 Cristo giti uñale trate trate chage cha kle lle boi no Chube alin Chube takalin kare.  
\v 5 E me gerule cha agali gballa mo talla giti kle mo ta gbe lle boi no Chube alin Chube takalin kare, me ene, Chube kle cha ta gbe kle kira kete chage kle cha chudaboi, ulita cha kle age no Chube kle ta e kete chage age ama takalin kare ene cha ñage chage Cristo gerua dbe kwianske. 
\s1 Chube gerua jagere Cristo giti ma no Chube nu 
\s1 mo gerua gbaba ngeruge Moisés giti 
\p  
\v 6 Unsuialin Chube Moisés ta gbu Chube gerua dege kwian israelita alin, Moisés geru e degu kwian alin, kwian me ñadu age geru e ulita gerule kare, malen geru e giti kwian chegu jiske sugekare Chubege. Agwa nege tangle Chube cha gau Chube cha gbu geru no jagere trage kwian ulita ole, Chube kle kira kete chage kle ta kete chage geru e jagere dbe kwianske, Chube Oña giti geru e suge kwiange, kwian geru e gai ulia giti kwian chege toi diali chui tangle ule Chube ole.  
\v 7 Chube agali mo gerua unsuialin ketu Moisége, Moisés geru e degu ke kwale giti Chube ama ta gbu chada dege kare, gire Moisés joni kwian israelitaske Chube chralla ole geru degaba dbe, Moisés gwa chrachiunga chui chrachienga kare, kwian israelita ulita me ñadu gwage ama gwadi chra kote. Agwa Moisés gwa me chegu chrachiedalenga diali, Moisés gwa chrachienga e jo tangle. Chube nu geru gbaba ene kwian alin Moisés giti geru no no, agwa kwian agali me ñadu mo ta gbe age ulita geru e gerule kare, malen kwian chegu jiske sugekare Chubege.  
\v 8 Geru e chku kwianske Moisés giti Chube chralla ole, geru e no, agwa ulia Chube gerua jagere ma no ma kiraske ulita, geru jagere joge chke kwian tale Chube Oña kiralla giti, geru jagere giti Chube Oña kwian ta blite Chube ole ene kwian ñage age no ulita Chube takalin kare.  
\v 9 Moisés Chube gerua unsuialin ketu kwiange Chube kirallaske, ulia geru e no, agwa geru e me kwian ta blitu Chube ole age Chube takalin kare, malen kwian ulita chegu sugekare Chubege jiske Chube gwage, Chube gerua unsuialin me kwian ta gbu trate Chube ole, agwa Chube gerua jagere ma no ma kiraske Chube gerua unsuialinge, kwian Chube gerua jagere gai ulia giti kwian me chege jiske Chube gwage, Chube gerua jagere kwian ta blite Chube ole age Chube takalin kare, ene kwian chege no trate Chube gwage.  
\v 10 Unsuialin Moisés Chube gerua degu kwian alin, geru e alin allabi kledu kwian alin, e geru no kwian alin, agwa nege Chube gerua jagere chku kwianske, geru e ma no ulita Chube gerua unsuialinge, Chube gerua unsuialin me Chube gerua jagere nege kare,  
\v 11 Chube gerua unsuialin chegu sugeti alin, agwa Chube gerua jagere ma kiraske ma kweri be chege diali chui tangle. 
\p  
\v 12 Uñale chage trate trate Chube gerua jagere geru no no kwian ulita alin geru e be chege diali chui tangle, malen cha kle mo ta gbe diali geru e ulita trage no trate kiraske kwian ulita ole, cha takalin geru e no chke uñale kwian ulitage.  
\v 13 Nege Chube gerua jagere giti cha me kle age salengwli Moisés agedu kare, nege Chube gerua chege che tale diali, che ña geru e kete diali kwian ulitage, agwa unsuialin me boidu ene. Unsuialin chui gwealege kaire kairege Chube mo gerua ketu Moisége tragadale kwian israelita ole gire Moisés joni kwian israelitaske Chube chralla ole, Moisés kledu Chube gerua kete kwian israelitage Moisés gwa chegu chrachienga Chube chralla ole, agwa Moisés gerudubi ulita gire bedre bedre gwa chra jongwa, malen Moisés ñomedrega gbu mo gwa giti ene kwian me gwage gwa chra jogenga.  
\v 14 Unsuialin Moisés Chube gerua tragu kwian israelita ole, geru e me sugedu trate ulita kwiange, kaire kle boi ene kwian israelita ole nege tangle Chube gerua Moisés degu unsuialin giti, nege tangle kwian israelita kle Moisés nu Chube gerua unsuialin degaba batenga, geru me sugekalin amage, ama me ta Cristo gakalin ulia, Cristo gai ulia alin giti geru ñage suge kwiange, kwian ulita bai kaire Cristo gai ulia Cristo kwian ene ta gbe chke suge Chube gerua unsuialinge.  
\v 15 Unsuialin tangle Chube gerua me sugedu kwian israelitage kle kaire kwian israelita ulita nege tanglege, kwian israelita ulita nege tangle Chube gerua unsuialin Moisés nu degaba batenga, geru e me suge trate ulita amage.  
\v 16 Agwa nege bai kaire mo ta gbe Chugagwalla Jesucristo gai ulia mo tale, Jesucristo kwian ene ta gbe chke suge Chube geruage.  
\v 17 Chugagwalla Jesucristo ule Chube Oña ole gdaitre alin, kwian bai kaire Jesucristo gai ulia kwian ene tale Chube Oña kle toi, kwian ene me chege dare tañachuge Moisés nu Chube gerua degaba alin giti age geru e alin gerule kare, Chube Oña kle kwian ene ta gbe suge age Chube takalin kare.  
\v 18 Che ulita Jesucristo gau ulia, e giti che ulitage suge trate che Chugagwalla Jesucristo no no Jesucristo kweri, bedre bedre suge ma no ma trate che ulitage Jesucristo mine, chui kaire kairege Chube Oña kle che ta gbe ma no age Jesucristo kare, ene kwian na gwage Jesucristodi che giti. 
\c 4  
\s1 Chube Pablo kira gbe geru Jesucristo giti 
\s1 dbe gwangerugu boi daga ngwaleske 
\p  
\v 1 Chube taidu dage chage agedu no cha alin, ama agali cha gau cha gbu ama gerua jagere Jesucristo giti dbe kwianske, malen cha me skwatige cha me e chuge ngwadi, cha mo ta gbe gwangerugu geru dbe Chube alin.  
\v 2 Cha me mo ta gbe chage age me no sugaska skwlenre dare, cha age me no ulita chugu ngwadi cha kle mo ta gbe chege sugekare age me no ulita sugaskage. Nege cha kle mo ta gbe chage age no ulita Chube gwa giti kaire kwian ulita gwa giti, cha me kle chage geru ngwale me ulia trage kwian ole ene kwian anblite geru me uliage, cha me kle Chube gerua blite nganake tragadale kwian ole cha takalin kare, me ene, cha kle mo ta gbe geru ulia Jesucristo giti alin trage no trate diali kwian ulita ole Chube takalin kare, ene ñage suge kwiange cha kle geru no ulia trage ama ole.  
\v 3 Cha kle geru ulia Jesucristo giti dbe kwianske, cha kle geru e trage no trate ulita kwian ulita ole, kwian bai kairege geru me suge kwian ene kle sugekare Chubege jiske Chube gwage.  
\v 4 Che dolla Satanás kle ko gate kwian ene ta giti, malen kwian ene ta kle nga jereske kare sugekare Chubege, kwian ene kle age Satanás takalin kare, malen kwian me Cristo gai ulia, me suge kwian enege Cristo no kweri Cristo Chube Cristo giti ama ñage Chube uñe.  
\v 5 Diali cha kle chage geru dbe kwianske cha geru Jesucristo giti trage no kwian ulita ole, cha me chage kwianske gerule no mo giti: “Cha kwian no no, cha ba jwannga siere ji chugege age me no gdale.” Me ene, cha me gerule ene mo giti, agwa cha gerule ene Jesucristo giti, ulia Jesucristo no no, ama che Chugagwalla ama che jwannga siere ji chugege che age me no gdale, cha geru e dbanga alin, cha lle boanga alin allabi Jesucristo alin ba ulitaske ba ulita ta gbe Jesucristo geruadi. 
\p  
\v 6 Unsuialin nga ulita kledu nga jereske gire Chube nga gwangea dodadu, Chube nga chra gbu gire nga jere chegu sugekare nga chrage, nga chra chegu sugekare nga jerege. Chube e amaña Jesucristo kagu nga dba ai giti chage kwianske kwian ta gbe Chube uñe, kwian me Chube uñe kle chage nga jereske kare, Jesucristo kwian ta gbe suge salengwli jichra kwian gbe ten nga jereske kare, Jesucristo giti che Chube uñe, Jesucristo giti suge trate chege Chube noare kweri.  
\v 7 Chube gerua Jesucristo giti geru no no ma no geru na ulitage, Chube geru e ketu chage dbadale kwian ulitaske. Cha ngwale, cha agali gballa me ñage Chube gerua no ene trage no kwian ole, agwa Chube kle kira kete kle ta kete chage geru e trage no ama takalin kare, ene kwian cha keruchuge geru Jesucristo giti trage ama ole, suge amage cha kle gerule Chube kirallaske me mo kirallaske.  
\v 8 Cha kle geru dbe giti cha kle boi tanre daga ngwale, cha me ña kige boi daga ngwale ege, agwa cha me kle mo ta dbe olire tanre e giti. Chui gwealege cha kle tañachuge tanre cha agedale mine boi daga ngwaleske, agwa cha me mo ta gbe blite geruge.  
\v 9 Kwian tanre kle age cha dollale kle chage cha nate age me no cha ole geru dbe giti, agwa cha tale suge cha me kle gballa Chube kle cha ole kle cha manade diali. Kwian kle age tanre dagale cha ole ta cha gwakalinda agwa me ñadu cha gweda, malen cha kle gwade chage gwangerugu geru Jesucristo giti dbe kwianske.  
\v 10 Baini kaire cha joge ngwadi cha chage gwangerugu geru Jesu giti dbe, geru dbe ene giti diali kwian ta cha gwakalinda, agwa cha me kle tañachuge tanre e giti, cha tañachuge Jesu giti, Jesu bole ene kaire, cha takalin kwian tanre Jesu uñe cha giti malen cha kle mo ta gbe chage gwangerugu geru Jesu giti trage kwian ole me tañachuge kwian kle age giti cha ole.  
\v 11 Cha kle toi nga dba ai giti cha kle Jesu gerua dbe kwianske, Jesu gerua dbe giti cha kle boi tanre daga ngwale tirare kwian Jesu gerua dollale kote, kwian me geru uñe ta cha gwakalinda Jesu gerua dbe giti, agwa cha kle mo ta gbe biale jogeda Jesu gerua dbe giti diali baini kaire cha chage ngwadi, ene suge kwian nage ulia Jesu kle gwadeni Jesu kle cha kira gbe geru dbe gwangerugu malen cha me kwachie.  
\v 12 Cha mo ta gbu ene mo chuge ngwadi jogengaleda geru dbe giti ba ulitaske, ene cha giti ba ulita geru Jesu giti keruchugu ba ulita geru gau ulia ba ulita ta sugedu toi Jesu gerua ole ene ba be toi diali Chube ole chui tangle. 
\p  
\v 13 Kwian unsuialin ta du no Chube ole, ama chada degu talla suge Chube ole giti, chada e gerule: 
\q1 “Cha Chube gai ulia, malen cha gerule no Chube giti kwian ole.” 
\m Kwian unsuialin chada degu ene, ama Chube gau ulia, ene kaire cha Chube gerua Jesu giti gai ulia, malen cha kle mo ta gbe gerule no trate Jesu giti kwian ulita ole.  
\v 14 Chube che Chugagwalla Jesu jaba gbuni gwade, ene kaire uñale chage cha Jesu gai ulia giti Chube be cha jaba gbeni gwade kaire ama Jesu jaba gbuni gwade kare, uñale chage bdagli Jesu be cha dbe ule ba ulita ole nga ngaña giti Chube kle ngwadi toidale diali ule ama ole, malen cha me kwachie jogeda geru dbe giti nga dba ai giti kwianske.  
\v 15 Cha me ta chugu geru Jesu giti dbe cha kle boi daga ngwaleske, boi daga ngwale sketangle cha geru du ba alin cha geru ketu bage, ene geru ñadu joge chke ba tale, ba ulita geru gau ulia, baske kwian na tanre ñage Jesu gai ulia ba giti, ene kwian nglege suge Chube noare kweri Chube agedu tanre no ama alin Jesu giti, ene kwian ngle ñage gerule no no Jesu giti Chube ole.  
\v 16 Malen cha me ta chuge geru dbe gwangerugu, cha me kwachie boi daga ngwale geru dbe giti. Cha kle toi nga dba ai giti, diali chui kaire kairege bedre bedre cha kle joge ma juma, kira me chege, agwa cha tale chui kaire kairege cha ta chege ma no ma kiraske Chube ole, cha ta suge moge cha kwian jagere kare Chube gerua ole.  
\v 17 Nege toi nga dba ai giti boi daga ngwaleske cha kle tañachuge diali bdagli giti cha be joge toi nga ngaña giti Chube kle ngwadige, tañachuge e giti cha kira gbeda jage boi daga ngwaleske nga dba ai giti, uñale chage cha kle boi daga ngwale nege e me chege diali, e be joge tangle, malen suge chage e sugeti alin. Agwa cha joge toi nga ngaña giti gire cha be joge siere boi daga ngwale ulita nga dba ai gitige, nga ngaña giti cha be toi no diali nga suga no ole chui tangle Chube ole, e me joge tangle, e chege diali cha alin.  
\v 18 Malen cha me mo tallade tanre kle boi cha ole nga dba ai giti, boi cha ole nga dba ai giti ulita joge tangle, agwa Chube be age no ulita cha alin chui bdaglige mi joge tangle, e be chege diali cha alin malen cha kle mo ta gbe diali tañachuge me kle boi nege giti agwa cha kle mo ta gbe tañachuge Chube giti, bdagli cha be kle toi no nga ngaña giti Chube ole diali chui tangle, uñale chage toi Chube ole e chege diali chui tangle. 
\c 5  
\p  
\v 1 Nege che ulita kle toi nga dba ai giti, agwa che mi chege toi diali, che ulita be jogeda che jegwale be tugeda, agwa chui gwealege che be joge toi nga ngaña giti Chube kle ngwadi, chui ege Chube agali be jegwale na me boi kete chege ene che be ña toi diali chui tangle Chube ole nga ngaña giti.  
\v 2 Nege nga dba ai giti che tañachuge tanre mo jegwale me jage giti malen che kle jegwale jwlite chuia manade, chui ege che be jegwale na jagere me boi gai toi nga ngaña giti Chube ole diali chui tangle, che takalin chui e chke blike,  
\v 3 ene che mi tañachuge dare che jegwale me jage jegwale jogeda giti, uñale chege che be chege toi no jegwale na jagere me boi ole diali chui tangle.  
\v 4 Nege nga dba ai giti che jegwale boi daga ngwale diali, che chege tañachuge tanre che jegwale me jage jegwale jogeda giti, che me no jogeda ole, malen che takalin jegwale jwlite chuia chke blike, ene che be jegwale na jagere gai, ene che me chege tañachuge dare jogeda giti, che jegwale na jagere mi jogeda be chege toi diali chui tangle Chube ole.  
\v 5 Che bebi jegwale ene gai, che kle aini jegwale nga dba ai giti ole agwa Chube Oña kle che tale che ta gbe suge trate jegwale na jagere giti chui be chke gire Chube be che jegwale me jage blite jegwale na jagere jage diali ole, Chube agali mo Oña ketu chege che ta gbe suge ene.  
\v 6-7 Nege che kle toi nga dba ai giti jegwale nga dba ai giti ole che me kle ule che Chugagwalla Jesucristo kle ngwadi, che kle nga dba ai giti che me ñage gwage Jesucristodi, che kle bate amage, agwa che tale che kle toi ama gai ulia diali, che tale suge trate che be jegwale jagere molen toi ule Jesucristo ole diali chui tangle, malen nege nga dba ai giti che kle mo ta dbe kiraske nga suga no ole, ulia che be kle ama ole.  
\v 8 Ma no che alin che jogeda blike, ene che joge siere nga dba ai gitige che ñage toi nga ngaña giti ule che Chugagwalla Jesucristo ole, agwa nege che kle toi nga dba ai giti nga suga no ole che jogeda chuia manade ngwange, uñale chege che be joge toi Jesucristo ole chui ege.  
\v 9 Che jogeda o che toi gwade che kle mo ta gbe diali age no Jesucristo takalin kare.  
\v 10 Chui be chke che ulita be joge chke Cristo kle ngwadi che ulita be kle ama gwa giti ama be gerule che ulita ole che agedu giti nga dba ai giti agedu no o me agedu no, kaire kaire be ñanalla gai agedu no giti ñanale malen che kle toi nga dba ai giti che mo ta gbadale age no diali Cristo takalin kare. 
\s1 Pablo takalin kwian una Corintomuge suge trate ulia Pablo geru ulia Cristo giti dbanga kwianske ta no giti 
\p  
\v 11 Uñale chage chui bdaglige che Chugagwalla Jesucristo be gerule cha ole cha agedu giti nga dba ai giti malen suge chage cha ama gadale dage no diali age no ama takalin kare. Kaire cha takalin chke uñale kwian ulitage kwian Jesucristo gadale dage, malen cha kle geru Jesucristo giti trage kwian ulita ole ene kwian ñage Jesucristo gai kweri Jesucristo gai dage. Uñale trate Chubege cha chage ta mine giti ama gerua dbe, cha takalin ba ulitage suge kaire ba tale cha geru du ba ulitaske ta no giti.  
\v 12 Cha kle gerule no ene mo giti ba ulita ole cha me kle gerule cha takalin ba cha gai ma no ma kweri kwian na ulitage, me ene, agwa cha takalin suge trate ba ulitage cha geru ulia dbanga ta no giti, ene kwian geru dbanga gweale na gerule ba ole cha dollale cha giti ene ba ñage mo ta gbe gerule no ulia cha giti geru dbanga ene ole, geru dbanga ene diali ta mo gbakalin kweri daba na gwage, kwian ene geru dbe ta me no ene ole agwa geru ulia me kle ama tale ni ama kle geru ulia dbe.  
\v 13 Diali cha kle chage geru Jesucristo giti trage tanre kwian ulita ole, e giti kwian gweale kle tañachuge me no chadi kle gerule cha kwian jwligebanga, agwa cha kle mo ta gbe diali lle boi Chube alin Chube takalin kare me tallade kwian kle gerule kare cha giti. Agwa cha takalin suge trate ba ulitage ulia cha kwian mine cha chagedu baske geru kete ba ulitage ta no giti, ene cha agedu no ba ulita alin.  
\v 14 Suge trate chage Cristo no no cha ole malen cha me ta agekalin dare cha agali agekalin kare, me ene, cha ta mo ta gbakalin diali age no Cristo alin Cristo takalin kare ama gerua dbe kwian na ulitaske. Uñale chage Cristo jokeda kwian ulita jwanle siere ji chugege age me no gdale, Cristo jokeda giti kwian ulita bai kaire ama gai ulia chege jogebada kare mo talla age ngeruge.  
\v 15 Cristo jokeda kwian ulita alin ene kwian ulita bai kaire Cristo gai ulia kwian ene ulita me toidale tañachuge mo giti age ngeru kare mo alin ama takalin kare, me ene, kwian ene ulita mo ta gbale age Cristo takalin kare tachkedale diali Cristo agedu ama alin giti, Cristo jokeda chkuni gwade kwian ene ulita giti malen ama toidale age no diali Cristo alin.  
\v 16 Nege cha Cristonu malen cha me tañachuge cha tañachugu ngeru kare, ngeru cha bebi Cristo gai ulia cha tañachugu kwian ulita nga dba ai giti tañachuge kare daba na giti, diali cha chegu tañachuge daba na ulita giti bai ma no bai ma kweri bai gerule ma no, e suiale cha tañachugu ene kare daba ulita giti diali. Ene kaire ngeru cha tañachugu Cristo giti, chage sugedu ama me kweri, cha ama gau kwian ngwale kare, agwa nege cha me tañachuge ene kare dare, nege suge trate chage Cristo chema ulia, ama cha ta blitu nganake.  
\v 17 Ene kaire kwian Cristo gai ulia kwian ene kwian jagere kare, kwian ene tañachuge nganake tañachugu ngeruge, ta agekalin nganake agedu ngeruge, kwian ene ta suge nganake ulita jagere.  
\v 18 Chube alin ñage age ene kwian tale Cristo giti. Ngeru cha kledu tañachuge ulita age ulita Chube dollale, agwa Cristo giti Chube cha gbu ama skatemanallale, ene nege Cristo giti cha ta chege no Chube ole, nege Chube kle cha kage geru Cristo giti kete kwian nage, ene kwian na kaire ñage chege Chube skatemanallale Cristo gai ulia giti.  
\v 19 Cristo giti Chube agali kwian ulita gbu mo skatemanallale ni tañachuge kwian ulita kledu age me no ama dollale giti. Geru e chkedale uñale kwian ulitage malen Chube cha gbu geru Cristo giti kete kwian ulitage, ene kwian ñage geru e gai ulia mo alin, ene ama ta chege no Chube ole.  
\v 20 Cha kwian chagenga Chube gerua Cristo giti dbe kwian ulitaske, me cha tale cha kle gerule kwian ole agwa cha kle gerule Chube takalin kare Chube cha ta gbe gerule kare. Cristo kalla giti cha gerule kwian bai me Cristo gai ulia ole ama mo ta gbadale no Chube ole Cristo giti, Cristo gai ulia giti ama me chege dare Chube dollale agwa Cristo giti Chube ama ta blite Chube ama gbe mo skatemanallale.  
\v 21 Cristo chagedu nga dba ai giti kwianske Cristo agedu no trate ulita ni agedu me no sidri, agwa Chube ama gbu che agedu me no ulita jia chuge, ene che Cristo gai ulia giti che me chege jiske Chube gwage agwa che chege no trate Chube gwage Cristo giti. 
\c 6  
\p  
\v 1 Cha lle boanga Chube alin, Chube ta du no ba ulita ole cha kage baske geru Jesucristo giti kete bage, nege cha gerule ba ulita ole cha me takalin ba geru Chube agedu no ba alin Cristo giti gai ngwale, ba mo ta gbadale geru e gai no no diali.  
\v 2 Chube gerudu kwian unsuialin ole, Chube gerua e chegu degaba gerule ene: 
\q1 “Ba mo chudaboi kadu chage, blike cha ba keruchugu, cha tadukalin ba chudaboi malen cha ba jun siere.” 
\m Chube gerudu ene kwian unsuialin ole, ene kaire nege Chube kle gerule ene ba ulita ole, nege Chube ta ba jwankalin siere ji chugege ba agedu me no gdale, ba me ñage manade dare ba chudaboi kadadale Chubege, nege nege ba Chube gadale ulia ba mo chudaboi kadale Chubege, ene Chube be ba keruchuge blike, Chube be ba chudaboi be ba jwen siere ji chugege age me no gdale. 
\p  
\v 3 Cha kle lle boi Chube alin geru Jesucristo giti dbe kwian ulitaske, diali cha kle mo ta gbe chage ta giti trate me age sidri me no kwian ulita gwa giti, ene kwian gdaite me ñage gerule me no Jesucristo geruadi cha kbiale.  
\v 4 Diali cha kle mo ta gbe age no ulita kwianske, ene ñage suge trate kwian ulitage cha agali me kle mo gbe gerule Jesucristo giti agwa ulia cha lle boanga Chube alin, ene cha giti kwian ñage geru Jesucristo giti uñe. Geru dbe giti cha kle boi tanre daga ngwale, agwa diali boi daga ngwaleske cha diali kle mo ta gbe chege jage geru dbe gwangerugu. Cha me lle molen toidale no, kwian age tanre me no cha dollale,  
\v 5 kwian cha kwabate tanre mno, kwian cha tke skage, kwian mo lite mo tke dole cha ole, cha kira me lle boi chui gdale, cha me ña gbe no lle tanre kle cha alin boadale, chui gwealege cha kle toi bli ole. E ulitaske cha kle mo ta gbe jage geru dbe, cha takalin kwian ulita geru Jesucristo giti uñe.  
\v 6 Kaire cha mo ta dbe toi no trate kwian gwa giti, cha Chube gerua Jesucristo giti uñe trate tragadale kwian ole, kwian gweale age me no cha dollale cha me ta dbe me no skochie amadi, cha age no kwian ulita alin kwian chudaboi no, Chube Oña kle cha tale cha ta gbe age no Chube takalin kare, cha mo ta dbe no ulia daba ulita ole,  
\v 7 diali cha geru ulia trage kwian ole, cha me sole kwian ole, cha kle age ulita Chube kirallaske me mo kirallaske, cha mo ta gbe kiraske age no diali ene cha me mo chuge ngwadi age me no sidri, ene diali cha chege kira ole chage trate gwangerugu geru ulia dbe.  
\v 8 Kwian gweale cha gai dage gerule no cha giti, gweale me cha gai dage gerule me no chadi cha dollale. Kwian tanre gerule chadi cha kwian me no cha kwian songa ngwale cha kwian anblitanga, agwa uñale chage cha kle geru ulia kete kwian ulitage.  
\v 9 Uñale trate kwiange cha lle boanga ulia Chube alin agwa ama kle cha gai kwian ngwalere. Bitangle cha tañachugu cha be jogeda agwa cha kle chage toi gwade. Cha gbere boi tanre daga ngwale gwaleda agwa cha me jokeda.  
\v 10 Cha tañachuge boi daga ngwale alin giti cha ta chege olire agwa eske cha tañachuge Jesucristo giti chadi nga suga no mo tale diali geru dbe giti. Cha me lle molen ketadale kwiange agwa geru kete giti ene kwian tanre geru ulia gai mo alin, e no. Cha me lle molen sidri mo alin nga dba ai giti agwa cha Jesucristo uñe, cha alin Jesucristo ma no ulitage. 
\p  
\v 11 Cha bitalla ulita Jesucristo giti una Corintomu, cha kle gerule ulia trate ba ulita ole chada ai ulita giti, ene ñage suge trate bage cha kle tañachuge mine ulita ba giti. Cha gerule ulia ba ole cha no no ba ulita ole,  
\v 12 cha me kle mo ta dbe me no ba ulita ole, cha me kle mo ta gbe tañachuge sugekare bage agwa ba ulita kle mo ta gbe tañachuge nganake chage mo ta gbe sugekare chage cha dollale.  
\v 13 Cha gerule ba ulita ole, cha no ba ulita ole ñenua no mo kirolla ole kare, ñenua gerule no trate mo kirolla ole kare ene kaire cha gerule ba ulita ole trate, cha takalin ba ulita mo ta dbe no cha ole cha kle mo ta dbe no ba ulita ole kare. 
\s1 Kwian Cristo ganga ulia me mo chugadale ngwadi chage ule gdaitre alin kare kwian me Cristo ganga ulia ole 
\p  
\v 14 Ba ulita Cristo ganga ulia me mo chugadale ngwadi mo gbe chage ule gdaitre alin kare kwian me Cristo ganga ulia ole, ba ulita kle mo ta gbe Cristo gai ulia ta gdaitre alin ole me ñage mo ta gbe ule kwian na me Cristo gai ulia ole, kwian Cristo ganga ulia me chage age salengwli me tañachuge salengwli kwian me Cristo ganga ulia kle age kle tañachuge kare, kwian Cristo ganga ulia ta chagekalin age no Chube takalin kare agwa kwian me Cristo ganga ulia chage age me no Chube dollale.  
\v 15 ¿Cristo talla salengwli dolla Satanás talla ole? Me dale, Satanás tañachuge nganake Cristo tañachuge nganake. Ene kaire kwian Cristo ganga ulia talla me salengwli kwian me Cristo ganga ulia talla ole.  
\v 16 Lle oña dodaba mo kodi kwian kle gai mo chubeale, ¿lle oña e talla tañachuge mine ule kwian talla ole? Lle oña e jaba, che talla me ñage tañachuge ule e ole. Che Cristo ganga ulia me kle lle oña jaba gai mo chubeale, che talla Chube gwadenu, che talla Chube gwade toingwalla, Chube gerua degaba unsuialin gerule e giti, chada e gerule: 
\q1 “Chube gerudu: ‘Kwian bai kaire cha gai dage, cha be toi kwian ene tale diali, baini kaire ama joge ngwadi cha be kle ama ole, cha ama Chubea, ama kwian chanu.’ 
\q1  
\v 17 Kaire Chube gerudu: ‘Ba ulita jogedale siere kwian me kle cha gai uliage kwian kle lle oña dodaba mo kodi gai mo chubealege, ba me tañachugadale ama kle tañachuge kare, ba me mo chugadale ngwadi age me no cha dollale ama kle age kare, ba chegedale sugekare e ulitage, ene cha be ba gai mo alin ba be chege chanu,  
\v 18 ba ulita be chege cha kirollale cha jianle, cha be chege ba ulita Ñenuale.’ 
\q1 Chube che Chugagwalla kiraske kweri gerudu ene ulita kwian monu ole.” 
\m Chube gerua degaba unsuialin gerule ene. 
\c 7  
\p  
\v 1 Cha bitalla Cristo giti, cha no no ba ulita ole, cha gerule ba ulita ole ulia Chube age ene ulita che alin ama gerudu kare, malen che ulita Chubenu mo ta gbadale chege sugekare age me no ulitage tañachuge me no ulitage, che mo ta gbadale Chube gai dage, ene che be age ma no tañachuge ma no trate diali Chube takalin kare. 
\s1 Nga suga no Pablodi kwian Chubenu 
\s1 una Corintomu ulita giti 
\p  
\v 2 Cha gerule ba ulita ole, cha takalin ba ulita mo ta dbe no cha ole me chege tañachuge dare me no chadi, cha me agedu me no sidri ba ulita ole, cha me gerudu me no ba ole ni agedu me no ba gwa giti ba ta gbale age me no, cha me ba anblitu ene cha lle jwandalenga ba ngeru mo alin, cha me agedu ene ba ulitaske, cha agedu no ba ulita alin malen ba ulita mo ta gbadale no cha ole.  
\v 3 Cha kle gerule kare ba ole cha me kle gerule badi me no, me ene, uñale bage cha ta mine ba ole, cha gerudu kare ba ole ngeru cha no no ba ole, cha be chege mo ta dbe no ene ba ole diali, cha be jogeda mo ta dbe no ene ba ole.  
\v 4 Cha kle gerule ulia trate ba ulita ole cha kle tañachuge mine ulita ba giti, cha tale nga suga no no chadi ba giti, kaire cha kle gerule no ba giti daba na ulita ole. Cha kle boi tanre daga ngwale Cristo gerua dbe giti agwa eske cha kle tañachuge ba giti, ene chadi nga suga no no tanre, kaire cha kira gai chage gwangerugu geru dbe. 
\p  
\v 5 Cha chku aini nga kweri Macedoniage cha tañachugu kwian me cha chugedi agwa me boidu ene, kwian me cha chugu ngwadi geru dbe taingwli, kwian tanre agedu me no cha dollale, boi daga ngwaleske kaire cha tale cha tañachugu tanre ba ulita giti, cha tadukalin ba me joge siere geru uliage.  
\v 6 Cha kledu tañachuge tanre ene ta olire ole gire Chube cha ta gbu nga suga no ole Chube kle age no diali kare kwian ulita kle ta olire alin, Chube cha ta gbu nga suga no ole Tito giti, Tito chku aini cha kle ngwadi.  
\v 7 Tito kleduni ule cha ole e cha ta gbu nga suga no ole, me e alin agwa Tito chiu geru ba giti dbe, e giti nga sugedu ma no chadi. Tito gerudu cha ole nga suga no no amadi ba ulita giti ba kle age giti Chube takalin kare, kaire ama gerudu cha ole ba ulita no cha ole takalin gwage chadi mo gwagwa giti, kaire ama gerudu ba ulita ta suge olire cha giti cha kle ta olire giti ba agedu giti cha dollale. Geru e ulita chku cha kote Tito giti, e cha ta gbu nga suga no no ole. 
\p  
\v 8 Cha chada degangu kagadale ba ulita alin cha ta olidu tanre chada e degange giti, uñadu chage ba chada e batenga giti ba be ta olire tanre. Tito giti chku uñale chage ba ta olidu ulia cha tañachugu kare chada e giti, agwa cha me tañachuge e giti, e sugeti alin.  
\v 9 Nege nga suga no no chadi, suge chage chada e giti Chube ba ta gbu tachke ba kledu age me no Chube dollale giti, ba ta olidu ba kledu age giti ba mo ta blitu naskuni Chube ole age Chube takalin kare, suge chage cha me agedu me no ba ole chada e degange giti agwa cha ba ulita chudabo, malen nga suga no chadi.  
\v 10 Chube kwian ta gbe suge olire kwian kle age me no giti, kwian ene tachke Chube giti, suge amage ama kle age Chube dollale gire kwian mo ta blite age me no chuge ngwadi ulita mo ta gbeni Chube ole age no Chube takalin kare, kwian ene tien gitiru ji chugege ama agedu me no gdale, bdagli ama chege nga suga no ole. Agwa kwian ta olire lle kle boi nga dba ai alin giti, kwian ene ñage mo ta gbe skochie Chubedi kle boi giti, ta e me kwian ta gbe tachke no Chube giti, ene kwian me mo ta gbe Chube ole, kwian ene chege ta olire diali sugekare Chubege.  
\v 11 Nege ñage suge trate ba ulitage Chube me ba ulita ta gbu suge olire ngwale cha chada degangu giti ba alin, me ene, e ba ulita chudabo, chada e giti Chube ba ta gbu suge olire, ene sugedu trate ba ulitage ba kledu age me no Chube dollale ba kledu daba gdaite baske chuge ngwadi age me no me no, Chube ba ta gbu suge olire e giti gire blike ba tadu e ulita dodakalin. Ba skochiu mo ole ba kledu age giti, kaire ba tale kwachiu mo giti Chube gwa giti, sugedu bage ba me ñage daba gdaite ene kle age me no baske chuge ngwadi age dare ama kle age kare, malen ba mo ta gbu age daba ene ole cha gerudu kare ba ole chada ngeru giti, ba daba ene gbu ji chuge ama kle age giti. Nege suge chage ulia ba me no age me no ole ba ta agekalin Chube takalin kare, kaire suge chage ba mo ta gbu no cha ole malen ba ta gwagekalin chadi mo gwagwa giti.  
\v 12 Cha chada degangu ngeru ba ulita alin, cha gerudu ba ole ba daba gdaite gbadale ji chuge ama kle age me no mo ñenua ole giti, cha chada e degangu cha kledu tañachuge daba ene gdaite giti kaire ama ñenua giti, agwa cha kledu tañachuge ma ngle ba Chubenu ulita una Corintomu giti, cha tadu ba ulita chudaboakalin mo ta gbe ma no Chube ole age ma no Chube takalin kare, cha tadukalin ba ulita cha gerua gbe gdadi age Chube gwa giti cha gerudu kare chada e giti.  
\v 13 Ba ulita cha gerua gbu gdadi agedu cha gerudu kare, malen nege nga suga no cha tale ba agedu giti cha chada degangu ba ta gbu kare, me e alin, kaire cha ta suge ma no gwage Titodi nga suga no no ole ba ulita giti, Tito kira jagere gau ba ulitage.  
\v 14 Uñale ba ulitage cha kledu baske cha gerudu ulia diali ba ulita ole, cha me sodu, ene kaire cha gerudu ulia Tito ole ba ulita giti. Tito bebi joge chke baske gire cha gerudu ama ole ba ulita giti nga suga no chadi ba ulita giti ba kwian no ba kle cha gai ngwange no, ene kaire agwe Tito joge chke ba ulitaske gire ba ulita Tito gai ngwange no kaire. Cha gerudu ene Tito ole ba giti, boidu ene Tito ole ama jo chke baske giti cha gerudu kare, sugedu Titoge cha me gerudu ngwale ama ole ba kwian no, e giti nga suga no no chadi.  
\v 15 Nege Tito ma no ba ulita ole ngeruge, ama kledu baske ba agedu ulita no ama alin, ba ulita ama gau ngwange no moske, ba me ama gau kwian ngwale kare, ba ama gau dage no no, ba ama kerua gbu gdadi ba agedu ama gerudu kare.  
\v 16 Uñale trate chage nege ba ulita kle mo ta gbe chage age Chube takalin kare, kaire ba ulita kle mo ta dbe no cha ole, malen nga suga no chadi ba ulita giti, nege cha ñage tañachuge ma no dare ba ulita giti. 
\c 8  
\s1 Pablo kwian Chubenu ta gbe igi lite ole ta no giti 
\s1 daba Chubenu nga namu chudaboagda 
\p  
\v 1 Cha bitalla Jesucristo giti, nege cha ta gerukalin ba ulita ole Chube kle age giti daba Chubenu ulitaske nga tanre Macedoniage, Chube kle kwian amanu ulita nga ege ta gbe age Chube takalin kare.  
\v 2 Kwian Chubenu ulita nga Macedoniage kle boi tanre daga ngwale Jesucristo gai ulia giti, agwa eske nga suga no amadi diali. Ama me igi tanre molen agwa ama igi gweale sidri gai mo alin gire diali ama ulita daba na me lle molen chudaboi igi e giti, ama me tañachuge igi ngle igi me ngle agwa ama daba na chudaboi ama igi tanre molen kare.  
\v 3 Diali ama ulita kle igi kete daba na chudaboagda ama ñage kare, kaire kle mo ta gbe igi kete ma ngle ta no giti ama kle ketege, uñale chage trate ama ulita kle age ene.  
\v 4 Ama ulita tadu mo ta gbakalin ule daba Chubenu nga namu ole daba Chubenu una Jerusalénmu chudaboale, malen ama gerudu tanre cha ole ama ta igi litakalin ole daba Chubenu una Jerusalénmu alin.  
\v 5 Ama igi litu ole ma ngle cha tañachugege, ama me igi alin ketu agwa ngeru ama ulita agali mo ta gbu Chube ole age Chube takalin kare me age ama agali takalin kare, kaire ama ulita mo ta gbu cha gai dage cha chudaboale geru Cristo giti dbe kwianske.  
\v 6 Cha takalin ba ulita age ene kaire mo ta gbe igi lite ole ta no giti kwian Chubenu nga Macedoniamu kle age kare, malen cha gerudu Tito ole noare ama jogeni nakwaite ba ulita kle ngwadi ba ta gbale tachke igi na lite ole, Tito jogeni Tito ñage igi gai ulita ama agedu ngeru kare, ene igi ulita chke kwaitre alin dbadale kwian Chubenu una Jerusalénmu alin.  
\v 7 Ulia ba ulita kwian no kle age tanre no, ba kle mo ta gbe kiraske Jesucristo gai ulia diali, ba geru Jesucristo giti uñe no, ba ñage geru e trage no trate kwian ole, ba kle biale diali cha chudaboi, ba kle mo ta dbe no cha ole. Ba ulita kwian no ene, agwa kaire cha takalin ba ulita mo ta gbe igi lite ole no diali ta no giti daba na chudaboagda.  
\v 8 Cha me kle gerule ba ole ba kage age cha takalin kare igi lite ole giti, me ene, agwa cha takalin chke uñale ba ulitage daba Chubenu nga Macedoniamu kle mo ta gbe age giti no daba na chudaboi igi giti, cha kle geru e kete bage ene ba ulita ñage tañachuge mo giti, ene be suge bage ba kle mo ta dbe no ulia daba na ole kaire Chube ole ba be mo ta gbe age no ene daba Chubenu alin daba chudaboagda daba Chubenu nga Macedoniamu agedu kare.  
\v 9 Uñale ba ulitage che Chugagwalla Jesucristo agedu no no ba ulita alin ta no giti, ba chegu sugekare Chubege gire Jesucristo mo ta gbu ba chudaboi chie nga dba ai giti, Jesucristo kledu nga ngaña giti, ama lle no no tanre molen nga ngaña giti, ama e ulita chugu ngwadi chiu nga dba ai giti me lle molen, ama jokeda ba ulita alin, ene ama agedu giti ba alin ba me chege sugekare Chubege dare, Jesucristo gai ulia giti ba chege Chubenu. 
\p  
\v 10 Igi lite ole giti cha gerule ba ulita ole, chura jo tangle giti ba ulita mo ta gbu igi lite ole daba Chubenu una Jerusalénmu alin, kwian gweale me ba gbu age ene igi lite ole agwa ba agali mo ta gbu igi lite ole ta no giti.  
\v 11 Cha takalin ba mo ta gbe igi lite ole kwaite ba ulita gdaite gdaite igi gbe ule ba ulita ñage kare, ba ulita mo ta gbu ngeru igi lite ole ta no giti, ene kaire ba mo ta gbale ta amaña ole igi lite ole kwaite, ene igi ulita chke kwaitre alin kagadale daba Chubenu una Jerusalénmu alin.  
\v 12 Ba tale ba gdaite gdaite agali igi kete ta no giti ba ñage kare, e no Chube gwage, ba bai igi kete ta no giti ba ñage kare Chube ba ta gbe kare, ba age ene ba kle age no Chube gwage kle igi kete Chube takalin kare, Chube me ba ta gbe igi kete ma ngle ba me igi molen batre, me ene, Chube ba ta gbe ba igi molen batre gweale kete daba chudaboagda.  
\v 13 Cha me kle gerule ba igi ulita monu kete daba me lle molenge chudaboagda bigwa ba ulita be chege me lle molen.  
\v 14 Cha me kle gerule ene, agwa cha takalin daba ulita Chubenu toi lle salengwli molen ulita toigda, malen noare ba ulita daba me lle molen chudaboi lle gweale monu kete dabage, ene daba na me lle molen ñage toi no. Nege ba ulita lle tanre molen mo alin, daba na me lle ene molen mo alin toigda, malen ba daba chudaboale, ene chui gwealege ba ulita me chege lle molen, ene daba na ulita ñage ba ulita chudaboi, age ene ba ulita ñage chege lle salengwli molen ulita toigda diali.  
\v 15 Unsuialin Moisés suiale kwian ulita daba chudabo ene modi ongoru ongoru, ene kwian ulita ñadu toi no, Chube gerua degaba unsuialin gerule e giti, chada e gerule: 
\q1 “Kwian bligda litu ole ngle mo alin bligda me cheguda sidri, ama bligda monu ulita girabatu daba na ole. 
\q1 Daba gweale me ñadu bligda lite ole ngle agwa kwian bligda litu ole ngle bligda ketu daba enege gutadale, ene ama me chagedu bli ole.” 
\m Chube gerua degaba unsuialin gerule ene. 
\p  
\v 16 Chube Tito ta gbu suge salengwli Chube cha ta gbu suge ba ulita giti kare, cha no no ba ulita ole, cha ta ba chudaboakalin suge ma no Chube takalin kare, ene kaire Tito ta suge ba ulita giti. E giti cha gerule no Chube ole Chube Tito ta gbu suge ene ba ulita giti.  
\v 17 Cha gerudu Tito ole ama kage nakwaite baske giti, ama gerudu no ama alin, kaire mo tale ama agali ta jogekalin ba ulita ngwadi, ama agali no no ba ulita ole ta jogekalin ba ngwadi ba ulita chudaboale ta suge ma no age Chube takalin kare.  
\v 18 Tito be jogeni ba ngwadi cha be daba na gdaite kage ule, daba e geru Jesucristo giti dbanga no no daba Chubenuske kle geru Jesucristo giti trage trate kwianske, daba Chubenu ulita nga kaire kairege aini kle gerule no daba e kle geru dbe giti.  
\v 19 Kaire daba ulita Chubenu nga aige daba e gdaite amaña gau kagale ule cha gatedi igi dbe daba Chubenu una Jerusalénmu alin, ama ole ule cha be igi ulita kete daba una Jerusalénmuge ene cha ta kwian ta gbakalin gerule no Jesucristo giti che kle age giti ama alin, ene suge amage ulia che no ama ole che kle ama chudaboi.  
\v 20 Cha mi joge igi ngle dbe gballa kwian una Jerusalénmu alin, ene daba gweale me ñage gerule me no chadi igi giti me ñage tañachuge cha kle igi lite ole ngle igi e gweale gai mo alin.  
\v 21 Uñale Chubege cha be igi ulita kete agwa cha takalin suge trate daba ulitage ulia cha be igi ulita kete, malen daba e gdaite no no be cha gatedi igi dbe daba una Jerusalénmu alin, ene daba gweale me ñage tañachuge cha igi ngle gweale gai mo alin.  
\v 22 Daba e amaña be joge ule Tito ole ba ngwadi, kaire daba na gdaite be joge ule, daba na gdaite e kledu chage tanre cha ole, diali ama mo ta gbu age no ulita Chube takalin kare, malen uñale chage ama kwian no, cha kle ama kage ule kaire. Nege geru ulita ba giti chku uñale amage malen nga suga no amadi ba ulita giti, ama ta jogekalin baske ba kira gbe ma no Chube giti. 
\p  
\v 23 Kwian gweale baske geru kade bage Tito giti ba gerule Tito cha chudaboanga geru Cristo giti dbe, ama lle boanga cha ole Cristo gerua dbanga ba ulita alin. Kaire kwian gweale baske geru kade bage daba boke kle chage Tito ole giti ba gerule kwian Chubenu nga aimu daba e boke kagu ule Tito ole, daba e boke no no Cristo ole lle boanga Cristo alin kaire.  
\v 24 Tito joge chke ba ngwadi ule daba boke e ole ba ama gdamai gai ngwange no ba age no ama gdamai alin mo ta dbe no ama ole, ba age ene, ene kwian Chubenu ulita ama kagangage be suge trate ba ulita kwian no ba ulita agenga no daba alin, ene nga be suga no chadi ba giti ene cha me gerudu no ba giti ngwale daba Chubenu ulita nga aimu ole. 
\c 9  
\p  
\v 1-2 Uñale chage ba ulita ta no giti kle mo ta gbe daba na Chubenu me lle molen chudaboi igi giti malen cha me ñage chada degange dare ba ulita alin ba ta gbale igi lite ole giti daba na Chubenu chudaboagda. Nga kweri aini Macedoniage baini kaire cha kle chage ngwadi diali cha kle gerule no no ba kwian Chubenu ulita nga kweri Acayamu giti, cha kle gerule chura jo tangle ba ulita mo ta gbu igi lite ole daba Chubenu nga namu alin daba chudaboagda, daba Chubenu nga aimu Macedoniage cha keruchugu gerule ba giti, ba kle age giti ama tanre mo ta gbu age ene kaire ba kle age kare igi lite ole daba na chudaboagda.  
\v 3-4 Cha kle daba gdamai kage baske ngeru chage ba ulita ta gbale biale age igi gbe ulita biale, ene cha joge chke ba ngwadi ule daba gweale nga Macedoniamu ole ba ulita be skwen biale age no cha gerudu kare ba giti. Cha joge chke ba ngwadi ule daba gweale nga Macedoniamu ole ba ulita me kle igi gbaba biale nga be chie ibule tanre chadi, be suge daba nga Macedoniamuge cha kle gerule ngwale ba ulita giti no. Kaire nga be chie ibule tanre ba ulitadi cha ngeru daba nga Macedoniamu ngeru, uñale bage cha kle gerule no ba giti daba nga Macedoniamu ulita ole.  
\v 5 Cha me takalin boi ene malen cha kle daba gdamai kage ba ngwadi ba ulita ta gbe biale kwaite ngeru cha be joge chkege, kwian e gdamai ñage ba ulita chudaboi igi lite ole ba ulita gdaite gdaite ñage kare igi kete mo ta giti ta no ole igi gbe biale ba igi oña gbu kare kagale daba Chubenu una Jerusalénmu alin, ene suge ulia ba ulita mo ta gbu no ta no giti igi gbe biale me sugedale ba kle igi kete ta me no giti daba alin.  
\v 6-7 Ba ulita tachkedale ai giti kwian ta igi ketakalin daba na chudaboagda, kwian ene igi kete mo ta giti ta no ole kwian ñage kare me tañachuge me no sidri igi e kete giti, Chube be age no tanre kwian ene alin. Agwa kwian igi sidri alin kete ta me no ole me ta igi ketakalin, kwian ene alin Chube be age no sidri alin. E salengwli kwian chude ngama gbe kweri kwian ene chude gai ngle, agwa kwian chude ngama gbe soli kwian ene chude bedre gai. Ene kaire ba ulita Chubenu gdaite gdaite mo ta gbe igi kete mo ta giti no ñage kare agwa me igi kete ta me no giti me ta igi ketakalin kare, ba igi kete ta no giti, ene kaire Chube be age no ba gdaite gdaite alin ulita, age ta ene giti Chubedi nga suga no kwian igi kete nga suga no ole ta no giti.  
\v 8 Ba igi kete ta ene giti Chube be age no no ba alin, Chube be ba manade no ene ba be lle molen toigda no, Chube be ba chudaboi ene ba be lle ma ngle molen ene ba ña daba chudaboi ma no dare, kaire ba be lle molen toigda mo alin.  
\v 9 Chube gerua degaba unsuialin gerule e giti, chada e gerule: 
\q1 “Kwian bai age no ta no giti daba me lle molen alin daba chudaboagda, kwian ene be lle ma ngle molen diali daba chudaboagda ma no dare kaire toigda no mo alin.” 
\m Chube gerua degaba unsuialin gerule ene.  
\v 10-11 Chube chude dodadu kwian alin tkale, Chube chude e gbe jrien ma ngle, ene bligda ngle kle, kwian bligda gai mo alin ama takalin kare gutadale. Ene kaire ba age no ta no giti daba me lle molen alin daba chudaboagda, Chube e amaña chude gbanga jrien ma ngle be lle ulita gbe jrien ba alin, Chube be ba chudaboi, ene ba be lle tanre molen ba lle molen ngeruge, ene ba be ñage toi no, kaire ba be ñage daba na chudaboi. Ba ulita kle igi lite ole kage cha ole daba alin, igi e joge chke ama kote gire ama ulita ñage gerule no no Chube ole cha kle ba igia dbe giti ama alin.  
\v 12 Ulia daba e me lle molen toigda no, ba kle ama ulita chudaboi tanre ba igia giti, kaire igi dbe giti ama alin ama ulitage mo tale be suge nga suga no ole, amage be suge Chube agedu no ama ulita alin ba ulita giti gire ama be gerule no no Chube ole e giti.  
\v 13 Igi e be joge chke daba e kote be chke uñale ama ulitage ba ulita igi e kagu ama alin ta no giti, ba ama chudaboi ene giti be suge ama ulitage ba ulita kle Cristo gai ulia ba kle age no Cristo takalin kare, gire ama be gerule tanre no Chube ole ba ulita giti ba mo ta gbu age no giti ama alin kaire daba Chubenu nga namu ulita alin.  
\v 14 Age ene giti daba e ulita be mo ta dbe no no ba ulita ole, ta ene giti ama ulita be gerule Chube ole ba ulita giti diali, be chudaboi kade Chubege ba ulita alin, kaire ama be gerule no Chube ole Chube ba ulita ta gbu age no ama alin ama chudaboi giti.  
\v 15 Che ulita gerudale no no Chube giti Chube mo Kirolla ketu che alin, e giti geru me che alin gerudale no mine Chube ole Chube Kirolla giti, Chube Kirolla giti che ulita ta suge no gdaitre alin malen che ulita ñage mo ta gbe no daba na chudaboi. 
\c 10  
\s1 Pablo kwian Chubenu ta gbe tachke mo giti 
\s1 ulia Pablo lle boanga Cristo alin 
\p  
\v 1 Cha takalin suge trate ba ulitage cha kle gerule ba ulita ole cha kle baske o cha kle bate bage diali cha kle mo ta gbe gerule ta no no giti Cristo talla ole. Ba gweale kle gerule me no chadi kle gerule: “Pablo kle che ulitaske ama kle gerule nganake, ama kle bate ama kle gerule nganake, ama kle che ulitaske ama kle chage ta kwachie ole gerule che ulita gwa giti, agwa ama kle bate gire ama me kennga ama kle mo gbe gerule kiraske mno che ole chada giti.” Ba gweale kle gerule ene me no chadi.  
\v 2 Cha gerule ulia ba ulita ole, cha be joge chke baske cha me kennga gerule kiraske ba ole ka boi mno ba ole, agwa cha me ta gerukalin ene ba ole, malen cha gerule ba ulita ole chada ai giti ba ulita mo ta gbe age no joge siere ba kle age me noge, ene cha joge chke baske cha be ñage gerule no ba ulita ole. Agwa cha joge chke ba ulitaske ba gweale skwen chage gerule me no chadi gerule cha giti cha agali kle mo gbe geru dbe mo talla giti cha takalin kare me Chube talla giti, ba gweale skwen chage gerule ene cha be gerule mno ba ole me ta kennga ole.  
\v 3 Cha kwian agwa cha me kle mo ta gbe age kwian ta agekalin kare, cha kle mo ta gbe age Chube takalin kare Chube gerua Cristo giti dbe kwianske, cha kira gbagda me kwian kiralla agwa e Chube kiralla,  
\v 4 Chube kira e kete chage, kira e giti che dolla Satanás kiralla me kirachke kira Chubenudi, Chube kiralla kwian kle gerule me no Chube dollale ta blite.  
\v 5 Kwian gweale mo ta gbe Chube dollale mo ta gbe ma kweri Chubege gerule Chube gerua Cristo giti geru ngwale, kwian ene me no geru Cristo giti ole, Chube kle kira kete chage gerule no trate Cristo giti kwian ene ole, ene gerule Chube kiralla giti kwian ole cha kwian Cristo dollale ta gbe mo ta blite Cristo ole, kwian ene Cristo gai ulia mo ta gbe chage tañachuge diali Cristo giti age Cristo takalin kare.  
\v 6 Chage suge ba ulita Chubenu una Corintomu be cha gerua gbe gdadi cha kle gerule kare chada ai ulita giti, chage suge ba ulita be joge siere ba kle age me noge ba be mo ta gbe age ulita Chube takalin kare cha kle chada degange ba alin kare, ene cha joge chke baske ba ulita be skwen chage age no ulita Chube takalin kare. Agwa ba ulitaske ba gweale me cha gerua gbe gdadi skwen chage age me no Chube dollale, Chube be kira kete chage ka boi mno ba ole ba kle age giti, Chube kiralla giti cha be ba gbe ji chuge ba kle age me no Chube dollale giti.  
\v 7 Kwian gweale baske kle gerule me no chadi cha dollale me kle cha gai lle boangale ulia Cristo alin, kwian ene kle gerule me no chadi ama kle tañachuge kare agwa me suge amage cha tale cha ta suge mine. Kwian ene kle gerule ama Cristonu ama lle boanga Cristo alin, e ulia ama kle gerule kare ene sugedale trate amage kaire cha Cristonu cha lle boanga ulia Cristo alin, ama me ñage tañachuge mo giti alin ama alin Cristonu ama alin lle boanga Cristo alin.  
\v 8 Cha gerule ulia ba ulita ole cha lle boanga ulia Cristo alin, cha kle lle boi no Cristo alin Cristo takalin kare Cristo cha ta gbu kare, cha me ibule gerule no ene mo giti, suge chage cha me kle age no ene mo talla giti mo kiralla giti, me ene, Cristo cha gau cha gbu lle boi ama alin baske, ama mo talla mo kiralla ketu chage ene cha ba chudaboale mo ta gbe ma no Cristo ole diali age ma no diali Cristo takalin kare, Cristo me kira ketu chage agedale me no ba ole ba ta gbe tañachuge sugekare amage. 
\p  
\v 9 Cha me takalin suge bage cha kle chada degange ba alin cha ta ba kwa jigakalin ka boi ba ole cha kle chada degange giti ba alin, me ene, diali cha kle chada degange ta no ole ba ulita chudaboagda mo ta gbe age ma no diali Cristo takalin kare.  
\v 10 Kwian gweale baske cha dollale kle gerule me no chadi, ama kle gerule: “Pablo kle bate chége ñage gerule kiraske mno che ole chada giti agwa chke cheske gire ama me gerule ene che ole kwian geru mauña kare, ama mo ta dbe kwachie gerule mno che ulita gwa giti, malen che me ama gadale dage, ama me geru mauña ulia, ama kwian ngwale.”  
\v 11 Kwian gweale kle gerule me no ene chadi, cha takalin suge kwian enege cha kle baske cha kle gerule ta amaña ole kaire cha kle bate bage cha kle gerule ta amaña ole. Cha kle chada degange ta no giti, cha me kle mo ta blite, ba me ñage tañachuge cha kle baske cha gerule nganake gire cha joge bate cha chada degange ta nganake ole, me ene. 
\p  
\v 12 Kwian gweale baske kle mo gbe ma kweri daba na ulitage, kwian ene agali kle gerule no kweri diali mo giti daba na ulita ole, daba ene kle tañachuge no no mo tale mo giti: “Ulia cha geru uñe ma ngle daba nage, diali cha kle age ma no ulita daba na ulitage, ulia cha kwian ma no ma kweri daba na ulitage.” Kwian ene ulita kle tañachuge ene mo giti kle tañachuge ngwale, ama ta me. Cha me tañachuge ene mo giti kwian e tañachuge kare, cha me toi tañachuge chema geru uñanga ma ngle ulia chema agenga ma no ulia daba nage.  
\v 13 Ma no diali cha kle mo ta gbe tañachuge mo giti cha kle lle boi no Chube alin Chube takalin kare o me, diali cha kle Chube chuge ngwadi cha ta gbe joge nga kaire kairege baini kaire Chube ta cha kagakalin ngwadi ama gerua dbe kwianske, cha agali me kle mo ta gbe joge geru dbe cha takalin kare. Chube cha ta gbu joge ba ulitaske malen cha ñadu joge chke baske Chube gerua dbe ba ulitaske una Corintoge.  
\v 14 Ulia Chube cha ta gbu joge ba ngwadi ama gerua dbe ba ulitaske, cha agali me mo ta gbu geru e dbe baske, Chube cha kagu malen cha ñadu baske. Kwian gdaite me ñage gerule cha me jo geru dbe baske, e me ulia, cha jo chke geru Cristo giti dbe ba ulitaske ngeru geru dbanga na ulitage.  
\v 15 Nege daba gweale na kle lle boi Chube alin ba ulitaske, cha me lle boaba nobi e gai mo alin gire gerule no mo giti daba na nu lle boaba baske giti. Cha me kle tañachuge daba bai lle bo giti Chube alin, cha kle tañachuge ba ulita ta mine Cristo ole giti, cha takalin ba ulita mo ta gbe Cristo gai ulia ma no diali, cha geru Cristo giti du baske, cha takalin ba ulita mo ta gbe geru e gai ulia ma no diali, ene ba ulita chege mo ta gbaba diali gerudi. Cha takalin geru Cristo giti chke uñale kwian ulitage malen cha takalin ba ulita mo ta gbe chage ma no geru e gerule kare, ene ba ñage cha chudaboi geru dbe baske, ene ba giti kwian na ñage Cristo gai ulia mo alin.  
\v 16 Ba ulita ta chege ta gbaba kiraske Cristo geruage, ene cha ba jige lle boi gballa Chube alin cha joge nga suga no ole geru Cristo giti dbe nga na batege baini kwian geru dbanga me kle geru dbe ngwadi, ene kwian me gerule chadi cha kle joge geru dbe daba na nu lle boaba Chube alin taneage daba Chubenu nga ege gai mo alin.  
\v 17 Kwian geru dbanga bai kaire ta gerukalin no kweri mo giti, geru dbanga ene tachkedale Chube gerua degaba unsuialin gerule kare, chada e gerule: 
\q1 “Kwian ta mo ta dbakalin gerule no kweri trate kle boi mo kiralla giti, ma no kwian ene mo ta dbadale gerule no kweri Chube giti Chube kle ama ta gbe age me ama agali kle mo ta gbe.” 
\m  
\v 18 Kwian lle boanga no ulia Chube alin me gerule blike agali daba na ole ama lle boanga ma no Chube alin, ama agali me ñage gerule ulia ama lle boanga no, Chube alin gwage kwian bai lle boanga no ulia, Chube alin ñage gerule no kwian ene giti, agwa kwian agali me ñage gerule no mo giti ama lle boanga no. 
\c 11  
\s1 Pablo me takalin kwian Chubenu mo anblitange 
\s1 kwian geru me ulia dbangage 
\p  
\v 1 Cha be gerule kare ba ulita ole chada ai giti nege ba gweale ñage tañachuge cha kle gerule tanre ngwale, agwa chada ai giti cha be gerule ba ole cha ta suge ba ulita giti trage ba ole, cha takalin ba ulita mo ta gbe geru ai keruchuge no.  
\v 2 Cha tañachuge tanre ba ulita giti, cha tañachuge ba giti me cha talla, Chube kle cha ta gbe tañachuge ba ulita giti. Cha geru Cristo giti du ngeru baske, cha giti ba Cristo gau ulia malen cha ta ba manakalin no Cristo geruadi, cha takalin ba ulita mo ta gbe cha geru ketu bage kare Cristo giti e alin gai mo alin diali me kwian geru nganake dbanga chuge ngwadi ba ta gbe joge siere geru uliage joge geru na nate, cha takalin ba mo ta gbe diali geru uliage ba ulita mo ta gbaba geru gbaitre alin Cristo giti gai ulia mo alin.  
\v 3 Cha kwachie ba ulita nu geru ulia gaba giti, kwian na me geru ulia dbanga ñage ba anblite ñage ba ta gbe tañachuge nganake geru me uliage giti, ene ba joge siere geru uliage joge geru me ulia nate. Cha me takalin boi ene ba ulita ole salengwli boidu unsuialin Eva ole kare, dolla Satanás Eva anblitu ene Eva jo siere Chube geruage Eva Satanás gerua gau ulia agedu Satanás gerudu kare. Ene kaire cha me takalin ba ulita mo chuge ngwadi mo anblitange kwian geru me ulia dbangage mo ta gbe tañachuge nganake ene ba ulita me mo ta gbe geru gbaitre alin Cristo giti gai ulia mo alin me age Cristo takalin kare.  
\v 4 Kwian gweale joge chke ba ulitaske geru nganake kete ba ulitage cha geru ketu bage kare ba ulita kle kwian ene kerua gbe gdadi, kwian ene geru nganake Jesu giti kete bage geru nganake Chube Oña giti kete bage geru nganake kwian tien gitiru ji chugege age me no gdale giti kete bage, geru e ulita nganake cha geru ketu bage kare, cha geru ketu bage ba geru e gau ulia, agwa nege ba kle mo ta blite geru nganake me ulia ole.  
\v 5 Kwian kle geru dbe baske kwian enege suge ama ma kweri ama mo gbe geru uñanga ma kweri chage, ba kle kwian ene kerua gbe gdadi ama gai dage, ba no ama ole, ba tañachuge ama geru uñanga ma no chage ama gerunga ma no trate, ba kle chage ama nate, agwa cha alin kwian ene me ma kweri chage me geru uñanga ma giti dare chage.  
\v 6 Ba gweale ñage tañachuge chadi cha gerule kwira gaba kwian me gerunga ulleke kare, agwa e me gerule cha me geru uñanga, cha geru Jesucristo giti uñanga no trate, uñale ba ulitage cha kledu baske cha gerudu ba ole geru ulia giti kaire cha toidu geru ulia gerule kare baske, e giti ñage suge trate ba ulitage cha geru ulia uñanga, cha me gerudu alin ba ole gire toidu nganake kwian me geru ulia uñe kare. 
\p  
\v 7 Ba gweale tañachuge cha agedu me no geru Jesucristo giti dbe ngwale ba ulitaske me igi kade bage geru dbe ñanale kwian geru dbanga na ulita kle igi kade kare, agwa cha tañachugu ma no ba ulita alin cha ba ta gbe tañachuge Jesucristo gerua alin giti me igi giti, malen cha mo ta gbu lle boi mo kodi, ene cha agali igi gau lle boi ñanale toigda baske, ene cha me igi kadu bage mo alin toigda.  
\v 8 Kaire daba Chubenu nga namuge mo tale ama cha chudabo igi giti ene cha ñadu toi baske geru Jesucristo giti dbe bage me igi kade bage geru dbe giti.  
\v 9 Cha kledu toi geru dbe baske cha tadu igige mo alin toigda, chui gwealege cha toidu bli ole cha tadu llege mo alin gutadale, agwa cha me mo ta gbu igi kade bage toigda ni lle gweale na kade bage mo alin, cha me tadukalin ba llea gai mo alin toigda ene ba me cha chudaboale diali. Mo tale daba Chubenu nga Macedoniamu cha chudabo igi giti, sugedu amage cha me lle molen mo kaire toigda no malen ama chiu igi dbe cha alin, mo tale ama cha chudabo ene. Agwa ba ulitaske cha me mo chugu ngwadi lle banu kade mo alin, cha mo ta gbu age ene toi baske cha be mo ta gbe age ene toi dare cha mo ta gbu kare toi baske kare.  
\v 10 Cha Cristo gai ulia, Cristo talla kle cha tale malen cha kle mo ta dbe gerule ulia diali, cha gerule ulia ba ulita ole cha mi igi kade dale mo alin ba daba Chubenu ulitage nga kweri Acayamu, e giti nga suga no chadi geru dbe giti ba ulitaske.  
\v 11 ¿Mineade cha mo ta gbe ene ba ole? ¿E gerule cha me no ba ole? Chubege uñale cha ta mine ulita ba ole, uñale amage cha no ba ulita ole.  
\v 12 Diali cha be mo ta gbe chage gwangerugu geru Cristo giti dbe me igi kade bage geru dbe baske giti, ene kwian na kle geru dbe baske kle igi kade ba ulitage geru dbe giti ama me ñage gerule ama kle lle boi Chube alin baske salengwli cha kle lle boi Chube alin kare, kwian ene takalin ba ulita ama gai dage gerule no ama giti ama kwian lle boanga no Chube alin,  
\v 13 ama kle gerule no mo giti ba ulita ole kle mo gbe suge ba ulitage Jesucristo gerua ketangale kare, agwa kwian ene me kle gerule ulia mo giti ba ole, ama kle ba anblite, ama me Jesucristo gerua ketanga ulia, ama geru me ulia dbanga, ama me lle boanga ulia Chube alin ama lle boanga dolla Satanás alin.  
\v 14 Kwian ene ulita kle age dolla Satanás age kare, dolla Satanás agali agenga me no Chube dollale agwa diali ama kle mo gbe suge kwiange agenga no trate lle boanga no no ulia Chube alin kare.  
\v 15 Ene kaire kwian lle boanga Satanás alin age salengwli Satanás age kare, kwian lle boanga Satanás alin diali kle mo gbe suge kwiange agenga no no kare, agwa ama tale ama kwian me no me no, bdagli Chube be ji gbe kweri kwian ene alin kwian agedu me no ulita giti. 
\p  
\v 16 Cha gerule nakwaite ba ulita ole, ba me tañachuge chadi cha kle gerule tanre ngwale mo giti, agwa gweale tañachuge chadi cha kle gerule tanre ngwale mo alin cha chugene gerule ngwale mo giti, ene kaire cha ñage age sidri kwian me geru ulia dbanga kle gerule no mo giti kare mo gbe kweri baske kle age kare.  
\v 17-18 Kwian geru me ulia dbanga baske kle gerule tanre no mo giti ba ole ama kle age giti, ene kaire cha ñage gerule no mo giti cha kle lle boi Cristo alin giti, cha kle gerule kare mo giti Cristo me kle cha ta gbe gerule ene, agwa suge chage cha ñage gerule no mo giti.  
\v 19 Ba ulita kle kwian ulita geru me ulia dbanga baske chuge ngwadi gerule tanre no mo giti ba ole, ba ulita kle ama kerua gbe gdadi ba kle ama gai dage. Ulia ba ulita ta ngle molen geru uñanga gire ¿mineade ba kle mo ta gbe tañachuge no kwian ene ulita kle gerule giti agwa cha gerule sidri no mo giti ba tañachuge cha kle gerule tanre ngwale?  
\v 20 Kwian ene ulita kle age tanre me no ba ulita ole, ama mo gbe ba chugagwallale ama ba gbe lle boi mo alin, ama ba llea ba igia kade bage mo alin, ama ba anblite mo gai ulia, ama age ba ole me no ama takalin kare, amage suge ama kweri ba chugagwalla malen ama ñage age ene ba ole, ama ba bate gwage, ama ulita age ene me no ba ulita ole agwa ba kle mo ta dbe no jage ulita ta no giti kwian ene ulita kote.  
\v 21 Cha kledu baske cha me agedu ba ole kwian nege kle baske kle age dagale ba ole kare, kwian kle age dagale ba ole sketangle ba kle ama gai no ba chugagwallale, cha me agedu me no ene ba ole, ¿e giti ba me kle cha gai no? Kwian kle age me no ba ole agwa amage suge ama kle age no, ama gerule no mo giti diali ama kle age giti, cha kaire ñage gerule no mo giti cha kle age ulita giti, ñage suge bage cha kle gerule ngwale agwa cha kle gerule ulia cha kle age giti.  
\v 22 Kwian geru me ulia dbanga baske ama ulita kle gerule no mo giti: “Cha alin ulia kwian hebreo chudalla, cha gerunga hebreo.” Cha ene kaire hebreo chudalla, cha gerunga hebreo. Ama ulita gerule no mo giti: “Cha kwian israelita ulia Chube nu cha chudalla gaba mo alin.” Cha kaire kwian israelita Chube nu kwian gaba mo alin bitalla. Ama ulita gerule no mo giti: “Cha ulia Abraham chudalla.” Cha kaire Abraham chudalla.  
\v 23 Ama ulita gerule no mo giti: “Cha alin lle boanga Cristo alin no no ulia.” Cha kaire lle boanga Cristo alin. Ba ulita ñage tañachuge chadi cha kle gerule ulita no ene ngwale mo giti agwa cha kle gerule ulia, cha lle boanga Cristo alin ma no ama ulitage, cha lle bo ma ngle Cristo alin ama ulitage, kaire cha boidu daga ngwale ma ngle ma tirare ama ulitage Cristo gerua dbe giti, cha jo tkaba skage geru dbe giti bita ma ngle ama ulitage, kwian geru ulia dollale cha kwabatu ma ngle ama ulitage, bitangle kwian geru ulia dollale tadu cha gwakalinda geru dbe giti. Agwa kwian ulita geru me ulia dbanga kle gerule no mo giti alin, ama kle gerule alin mo giti agwa me kle boi dagale cha kle boi kare.  
\v 24 Bitatiga kwian israelita cha kwabatu ji chugale tanre bita kaire kairege kwian israelita cha kwabatu treinta y nueve.  
\v 25 Bitamai cha jo bataba tanre glita giti. Bitaite cha jo skiaba ke giti. Bitamai cha chagedu duge du jonga bleske. Bitaite cha biri jogeda chi kote, chui ege du jonga bleske cha chegu blega giti chui gbaite ngajrege chui gbaite ngajudi.  
\v 26 Cha chagedu tanre nga tanrege geru Cristo giti dbe kwianske diali cha chi tira chugu, cha kwian skwe boanga tiralla chugu, cha mo bitalla israelita tiralla chugu, cha kwian me israelita tiralla chugu, cha kwian toinga ngle ngwadi tiralla chugu, cha kwian toinga me ngle ngwadi tiralla chugu, cha ble tira chugu, kaire cha daba me geru ulia uñanga tiralla chugu, diali cha chagedu boi tirare eneske.  
\v 27 Cha kira ulita jonga lle boi tanre kote, kaire boi tanre daga ngwale kote bitangle cha me ñadu gbe no, cha bli chugu tanre kaire cha sie chugu tanre bitangle cha chagedu bliage, kaire cha nga skeke tanre chugu ñometra me mo ngama tkagda no nga skeke alin.  
\v 28 Boi daga ngwale ene ulitaske cha kle mo ta dbe tañachuge diali tanre kwian Chubenu nga ulitage giti, cha takalin daba Chubenu ulita mo ta gbe no diali geru uliadi age no diali Chube takalin kare.  
\v 29 Suge chage kwian Chubenu gweale me kle mo ta gbe no kiraske geru uliadi, cha mo ta dbe olire tanre daba ene giti. Kaire suge chage kwian gweale daba Chubenu gweale ta gbe age me no ta gbe joge siere geru uliage, cha skochie tanre kwian enedi daba gdale.  
\v 30 Kwian geru me ulia dbanga kle gerule me no chadi ba ulita ole malen cha gerudale no sidri mo alin chada ai giti ba ulita ole, agwa cha kle gerule kare mo giti chada aige giti cha takalin suge trate ba ulitage cha agali gballa me kira molen lle boi no Cristo alin.  
\v 31 Cha kle gerule kare mo giti ba ulita ole chada ai giti uñale Chubege cha kle gerule ulia ulita, Chube che Chugagwalla Jesucristo Ñenua, noare che ulita gerudale no diali Chube alin giti. Cha gerule no Chube giti ama agedu no no cha alin una Damascoge giti,  
\v 32 cha kledu una Damascoge, e suiale chugagwalla gdaite lle boanga chugagwalla rey kada Aretas ole, chugagwalla gdaite e guardia donga gbu cha jege ngwange una ugakallage cha gadale agedale me no cha ole,  
\v 33 agwa Chube daba gweale una Damascomu ta gbu cha chudaboi, una keuda gerea uga gwealege daba cha tku jondoi una gerea gití dbige skige, ene cha tiun gitiru guardia dongage. 
\c 12  
\s1 Pablo gerule ama jo dbaba bate nga ngaña giti 
\s1 Cristo kle ngwadi 
\p  
\v 1 Uñale chage cha agali gerule no mo giti e ngwale cha alin agwa cha gerudale ba ulita ole che Chugagwalla Cristo kle age giti cha alin, cha gerule Cristo kle cha ta gbe chke suge giti Cristo kle cha gbe gwage amadi giti.  
\v 2-3 Chura gdataboko giti gdabaga jo tangle e suiale cha jo dbaba bate nga ngaña giti Cristo kle ngwadi, me uñale chage cha jo jegwale ole o cha oña alin jo, Chube alinge uñale cha jo mine, agwa uñale chage ulia cha jo dbaba bate nga ngaña giti Cristo kle ngwadi.  
\v 4 Cha kledu nga ngaña giti cha geru tanre no keruchugu ni cha ñage geru e jwen kate gerule, kaire geru e Chube me takalin cha e trage kwian ole.  
\v 5 Boidu ene cha ole giti cha ñage gerule no mo alin giti agwa cha me ta mo ta gbakalin gerule no mo giti cha agali kle boi mo kira giti kare, nga suga no chadi cha kwian mo kira giti cha me ñage age agwa Chube ñage age cha ole cha gbe age ama takalin kare ama alin, cha takalin suge bage ene ulita kle boi cha ole me cha kiralla giti.  
\v 6 Cha takalin cha ñage mo ta gbe gerule no mo giti tanre cha kle age no giti, ñage suge kwiange cha kle gerule ngwale agwa me ene, ulita cha kle gerule kare e ulia. Agwa cha me mo ta gbakalin gerule tanre no mo giti kwian ta gbadale tañachuge no cha giti cha gai dage no, ma no cha chage toi no geru Cristo giti dbe kwianske ene kwian gwage chadi cha kle toi mine, kwian cha keruchuge cha kle gerule mine, ene kwian agalige ñage chke uñale cha kwian no cha kwian me no.  
\v 7 Cha kledu nga ngaña giti Cristo kle ngwadi cha gwagedu lle tanre nodi cha geru tanre no keruchugu, Chube me tadukalin cha boidu ene giti cha tañachuge mo giti cha ma no ma kweri Chube gwage daba nage, Chube me tadukalin cha tañachuge ene mo giti malen Chube Satanás chugu ngwadi age me no cha ole, Satanás cha gbu toi oga skibachie diali.  
\v 8 Cha Chugagwalla Cristo ole cha gerudu bitamai cha skibachie jwennga,  
\v 9 agwa Cristo gerudu cha ole: “Cha no no ba ole agwa cha me ba skibachie jwennga, ma no cha be kira kete bage diali jage skibachiege chage gwangerugu cha gerua dbe, ene kwian gwage badi ba skibachieske be chke uñale trate amage ba agali me kle mo kira gbe lle boi cha alin cha gerua dbe, kwiange be suge trate cha kle mo kiralla kete bage diali malen ba ñage chage gwangerugu cha gerua dbe.” Cristo gerudu ene cha ole malen cha mo ta gbu nga suga no ole toi oga skibachieske, ene cha agali me kira molen giti ñage suge kwiange Cristo kle mo kiralla kete chage.  
\v 10 Cha toi oga skibachie. Kwian ka boi cha ole Cristo gerua dbe giti. Lle me cha ole toigda. Kwian cha jrite nate Cristo gerua dbe gdale. Cha boi dagale tanre Cristo gerua dbe giti kwian kote. E ulitaske cha me tallade, nga suga no chadi toi boi ene Cristo gerua dbe giti, boi ene ulitaske cha skwatige cha kira ulita jogenga agwa Cristo cha gbe kiraske ma no boi ene ulitaske gire cha chege ma kiraske Cristo giti Cristo gerua dbe gwangerugu. 
\s1 Pablo tañachuge tanre kwian Chubenu ulita una Corintomu giti, Pablo ta ama ulita chudaboakalin 
\p  
\v 11 Ba ulita ñage tañachuge cha kle gerule no ngwale mo giti ba ole chada ai giti agwa ba ulita cha uñe, sugedale trate bage cha kwian mine. Kwian geru me ulia dbanga gerule me no chadi cha gbe kwian me no ngwalere ba gwage, ba gerudale no ama ole cha giti agwa ba me kle age ene, malen cha agali gerudale no sidri mo giti ba ulita ole chada ai giti ba ta gbale suge cha giti. Kwian geru me ulia dbanga kle gerule no mo giti ama alin Jesucristo gerua ketanga no ulia, agwa cha gerule trate ba ulita ole ama me ma kweri chage, cha Jesucristo gerua ketanga ulia.  
\v 12 Cha kledu baske Cristo gerua dbe, boi daga ngwaleske cha mo ta nodu age baske, cha lle daga ngwale no tanre dodadu Chube kiralla giti ba ulita gwa giti malen e giti sugedale trate ba ulitage cha Jesucristo gerua ketanga ulia.  
\v 13 E giti cha ñadu igi kade bage toigda agwa cha me agedu ene, kwian Chubenu nga namu igi ketu chage toigda, ene cha ñadu chage gwangerugu Cristo gerua dbe, cha igi e gau mo alin agwa cha kledu geru dbe baske sugedu chage ma no cha me lle kade igi kade bage mo alin toigda. Cha igi gau daba nga namuge toigda agwa cha me igi gau bage, e giti ba gweale kle tañachuge cha agedu me no ba ole me igi kade bage cha takalin ba e talla mlienga. 
\p  
\v 14 Nege bitamaigedale cha kle biale joge kwaite baske, cha be jogeni baske cha mi mo chuge ngwadi mo manange ba ulitage igire bligdale toigda no baske diali cha agedu ngeru kare, cha kle chage ba ulitaske geru dbe, e giti cha me kle mo ta gbe lle banu gai mo alin geru dbe ñanale, me ene, cha kle age no ba ulita alin geru ulia kete bage ene ba geru ulia uñe. Chkedale uñale trate bage ñenua ta molen age no mo kirolla alin me kirogwa age no mo ñenua alin, ñenua igi lite ole mo kirogwalla managda, kirogwalla me agedale ene mo ñenua alin, cha ene kare geru ulia dbe baske giti, cha kle geru kete bage ñenua kle age mo kirogwalla alin kare.  
\v 15 Cha kle mo ta dbe no ba ulita ole malen igi monu giti cha kle mo kira gbe ba chudaboale, cha kle lle gige mo alin, cha igi ulita monu mlienga geru ulia dbe giti ba ulitaske, kaire cha agali kiralla cha gbe ba alin lle boagda baske, cha kira be bidege chui gwealege agwa nege cha kira kle cha kle mo ta gbe age no ba ulita alin ba ta gbagda ma no geru uliadi dare, cha kle mo ta gbe ene ba ulita ole, ba kle mo ta gbe tañachuge nganake, suge chage cha kle mo ta gbe ma no ba ulita ole diali agwa ba ulita me kle mo ta gbe no cha ole, diali ba kle mo ta gbe tañachuge sugekare chage. 
\p  
\v 16 Cha me mo chugu ngwadi mo manadale ba ulitage igire bligdale, cha lle bo mo kodi giti cha toidu. Agwa gweale kle gerule chadi cha ba anblitu igi lite ole daba nga namu chudaboagda agwa me ene ulia cha gerudu kare, kle tañachuge cha igi e gau mo alin.  
\v 17 ¿Ba kle tañachuge cha daba gweale gau kagu baske ba ulita anblitadale ene cha ña igi gai mo alin daba e giti?  
\v 18 Cha Tito kagu joge tienda badi, Tito ole cha daba Chubenu na kagu ule kaire. ¿Ba kle tañachuge Tito ba anblitu igi gai mo alin kaire cha alin? Me ene, Tito kaire cha ta salengwli no ba ulita ole, cha kle baske cha age no ba alin cha gerule ulia ba ole, kaire Tito kle baske Tito age no ba alin Tito gerule ulia ba ole. 
\p  
\v 19 Ba gweale ñage tañachuge chadi cha kle chada ai degange ba ulita alin ba ta blitagda tañachuge no cha giti me tañachuge dare cha agedu ulia me no ba kle tañachuge kare, me ene, ulita cha kle gerule kare ba ole ba ulita chudaboagda ta suge ma no gwangerugu Cristo giti, suge chage cha kle gerule Chube gwa giti ba ole cha Cristo uñanga ulia age Cristo takalin kare. Ba ulita cha bitalla kare Cristo giti, cha no no ba ulita ole malen cha gerule ene ba ole, cha takalin ba ta chege no Cristo ole me tañachuge nganake.  
\v 20 Cha joge baske cha me takalin ba skwen ta nganake ole cháge, ba skwen ene cha ka boi ba ole, cha me takalin age ene ba ole, bage e mi skwen no kaire cha age ene ba ole. Cha me takalin baske talla ai kare kle ba gweale tale: Ta kira bate modi talla kle tale. Ta daba llenuge mo alin talla kle tale. Ta skochie talla kle tale. Tañachuge lle ngle gai mo alin allabi, me tañachuge daba na giti talla kle tale. Gerunga tanre ngwale dabadi talla kle tale. Gerule dabadi me no talla kle tale. Tañachuge mo giti ma kweri daba nage talla kle tale. Me tañachuge salengwli modi talla kle tale.  
\v 21 Cha be joge chkeni baske tiendaleda ba ulitadi, cha me takalin Chube cha ta gbe suge olire ibule ba ulita giti. Ba gweale muinga onbre skwen cháge mo ta gbe mo chuge ke giti, gweale skwen cháge mo ta gbe age me no ba kledu age me no tanre sbali kle age kaire nege, ba gweale skwen cháge age me no ene me ta mo ta blitakalin joge sugekare ba kle age me no ulitage cha be ta olire tanre ba ulita kle age me no giti. 
\c 13  
\s1 Pablo takalin kwian ulita mo ta blite joge siere 
\s1 age me noge ngeru Pablo joge chkege 
\p  
\v 1-2 Nege bitamaigedale cha be joge kwaite baske cha kledu baske cha jo bdagli bitabokege eni, chui ege cha gerudu ba ulita ole bai kaire kledu chage age me no ba mo ta blitadale joge siere age me noge, nege kaire cha gerule ene ba amaña ulita ole kaire kwian na ole cha me su gerule ole ngeru, ba kwian ene ulita ole cha gerule chada ai giti ba mo ta blitadale kaire joge siere age me noge. Ba ulita mi age ene cha kle gerule kare, nege cha be joge bitamai aige cha be joge mo ta gbaba biale ba ulita bai me mo ta blitaba joge siere age me noge gbe ji chuge mno mno agedu me no giti, cha mi tai dage ba ene ulitage. Kwian agenga me no gbe jiske giti Chube gerua degaba unsuialin gerule: 
\q1 “Sugedale ba ulitage daba gweale kle age me no, kwian gdaitre alin me ñage daba ene gbe jiske gballa, agwa kwian gdaboke gdamai gerule salengwli daba jiske giti, ene suge daba jiske ulia, ñage ji gbe daba alin ama agedu me no giti.” 
\m Chube gerua degaba unsuialin gerule ene. Cha be kle baske, ba bokege o ba kwian maige suge daba na kle age me no ñage trage cha ole mo gwallaske, bai kaire agedu me no cha be ama gbe ji chuge.  
\v 3 Ba takalin cha age gweale ba ole chkekalin uñale bage cha gerunga Cristo kiralla giti ulia o me, Cristo be cha ta gbe age ba ole be cha ta gbe gerule kiraske mno ba ole gbale ji chuge. Ba me ñage tañachuge Cristodi Cristo me ñage age cha giti ba ulita ole, me ene, Cristo kira molen, Cristo kiralla giti Cristo cha gbe age ba ulita ole ba gbale ji chuge ba age me no giti.  
\v 4 Cristo jokeda kruge ama mo chugu ngwadi ama me kira molen kare agwa nege ama kleni gwade toi Chube kirallaske ule Chube ole. Ene kaire cha kwian, cha kaire me kira molen Cristo mo chugu ngwadi me kira molen kare kledu nga dba ai giti, mo kira giti cha me ñage age gballa Cristo alin baske agwa cha mo ta gbe Cristo ole toi Cristo takalin kare ene cha toi Chube kiralla ole Cristo kle toi kare, ene cha ñage joge baske gerule kiraske mno ba ole Cristo kiralla giti. 
\p  
\v 5 Ba ulita agali mo ta gbadale tañachuge trate mo giti ba ta mine Jesucristo ole ene be suge ba agalige ulia ba Jesucristo gau ulia mo tale o me, suge bage ulia ba Jesucristo gau ulia mo tale ene uñale bage ba Jesucristonu Jesucristo kle ba ole, agwa suge bage ba me kle mo ta gbe Jesucristo ole ulia, ene ba me Jesucristonu ene Jesucristo me kle ba ole.  
\v 6 Cha takalin suge bage cha giti cha kle chage baske giti cha ulia Jesucristonu cha ulia mo ta gbaba Jesucristo gai ulia mo tale.  
\v 7 E me gerule ba ulita gerudale no cha giti cha kle lle boi no Chube alin no baske malen ba kle mo ta gbe age no Chube takalin kare, cha me kle tañachuge kwian gerule mine cha giti, me ene, cha kle tañachuge ma no ba ulita giti ba ulita kle chage mine, cha takalin ba ulita mo ta gbe toi ma trate sugekare age me noge diali, cha ta mo ta dbakalin age no ba alin ba chudaboagda chage ene, agwa kaire uñale chage ñage suge ba gwealege cha me ñage age ene ba alin, cha me tallade kwian tañachuge ene cha giti, cha ta ba ulita chudaboakalin.  
\v 8 Diali cha ba chudaboadale geru ulia giti ba kira gbe geru uliage age ulita trate baske geru ulia gerule kare, cha me ta agekalin sidri geru ulia dollale baske cha ta mo ta gbakalin diali age no geru ulia gerule kare.  
\v 9 Nga suga no no chadi joge chke baske me ka boi ba ole me gerule mno kiraske ba ole ba gbe ji chuge ba kle age me no giti. Cha me gerule mno kiraske ba ulita ole kwian gweale ñage tañachuge cha giti cha kwian ngwale cha me kle gerule Jesucristo kiralla giti, cha me tallade kwian kle tañachuge ene cha giti, ma no cha alin ba ulita skwen cháge mo ta gbaba age no ulita joge siere age me no ulitage, ene nga suga no chadi ba ulita giti. Diali cha kle gerule Chube ole ba ulita giti cha takalin Chube ba ta gbe ma no ama ole diali age ma no diali ama takalin kare.  
\v 10 Cha kle chada ai degange ba ulita alin ba ta gbagda ngeru, ene ba be kle biale cha ngwange cha geru gbu ba alin kare chada giti, ene cha mi gerudale mno ba ole ba kle age giti ulita. Ba me age cha kle gerule kare chada giti cha be gerule mno ba ole cha Chugagwalla Jesucristo kiralla giti cha be ba gbe ji chuge ba kle age me no gdale. Jesucristo cha gau kira ketu chage agedale ene e ba chudaboagda ta gbe chke ma no Jesucristo ole, Jesucristo me kira ketu chage agedale me no ba ole agwa Jesucristo kiralla giti cha ba ta gbe chke joge siere age me noge chage gwangerugu ma no Jesucristo geruadi. 
\s1 Pablo gbi kage bdagli kwian Chubenu 
\s1 ulita una Corintomu alin 
\p  
\v 11 Bdagli cha gerule ba ole chada ai giti ba ulita cha bitalla kare Jesucristo giti, cha takalin ba ulita toi ta suga no ole, cha takalin ba ulita mo ta gbe toi trate Chube gwa giti Chube takalin kare ba ulita mo ta gbale kira gbe modi ongoru ongoru chage gwangerugu Jesucristo geruadi ba ulita toidale ta suge salengwli modi ta taingwli ole me kira bate modi, ba ulita toi ene Chube che ta gbanga no daba na ole che ta gbanga nga suga no ole, ama be kle ba ulita ole diali. 
\p  
\v 12 Ba ulita gbi kade no no moge ta no ole dabage ulita. 
\p  
\v 13 Daba aini ulita nu mo ta gbaba Jesucristo gai ulia, ama ulita gbi kage no no ba ulita alin. 
\p  
\v 14 Cha takalin che Chugagwalla Jesucristo age tanre no no ba ulita alin, cha takalin suge trate ba ulitage Chube no no ba ulita ole, kaire cha takalin suge trate ba ulitage Chube Oña kle ba ulita ole diali, ama me ba chuge ngwadi gballa sugeti ama chege ba ulita ole, cha takalin geru ai suge trate ba ulitage Chube Oña geru ai ulita gbe suge ba tale. 
\p Geru ai ene ulita cha Pablo chada degangu ba ulita kwian Chubenu una Corintoge alin. Che kle meni.