\id 1TI - Buglere NT -Panama 2008 (DBL -2013) 
\h 1 TIMOTEO 
\toc1 Pablo Nu Chada Degaba Gwangea Timoteo Alin 
\toc2 1 Timoteo 
\toc3 1Ti 
\mt1 Pablo Nu Chada Degaba Gwangea Timoteo Alin 
\mt2 Primera Carta de Pablo a Timoteo 
\ip Pablo chudaboangalla gdaite kada Timoteo ama nga Asiamu, ama ñenua kwian griego ama chebia muinga israelita. Timoteo Pablo uñu una kada Listrage, Timoteo Jesucristo gerua gau ulia Pablo giti gire Pablo Timoteo gau chage ule ama ole Jesucristo gerua dbe una tanrege (Hechos 16:1-4). Sbali Timoteo chagedu Pablo ole Jesucristo gerua dbe, gire Pablo Timoteo kagu una Efesoge kwian Chubenu una emu chudaboi, Timoteo chegu kwian Chubenu una Efesoge chugagwalla kwian mananga Jesucristo geruadi. 
\ip Pablo chada ai degangu kagale Timoteoge Timoteo ta gbagda toi no daba chugagwallale daba gwa giti. Chada ai giti Pablo Timoteo ta gbu kwian daba tkanga tangle geru me uliage giti Timoteo daba Chubenu manadale no kwian e ngeru ene daba Chubenu me mo anblitange geru ngwale gai ulia. Kaire chada ai giti Pablo Timoteo ta gbu kwian Chubenu chugagwalla ulita toidale no trate kwian Chubenu gwa giti. 
\c 1  
\s1 Pablo gbi kage chada giti Timoteo alin 
\p  
\v 1-2 Cha Pablo chada ai degange ba alin Timoteo: 
\m Chube che jwannga siere kaire Jesucristo ama cha gbu ama gerua ketangale, Jesucristo che Chugagwalla, ama be chieni, che kle ama chieni chuia manade ngwange nga suga no ole. Timoteo, ba Jesucristo gerua gau ulia giti ba cha kirolla kare, cha takalin Chube che Ñenua kaire Jesucristo che Chugagwalla age noare ba alin ama tai dage bage ama ba ta gbe suga no diali, ene ba tale nga be kle suga no no badi, cha takalin ba toi Jesucristo talla ole diali. 
\s1 Pablo me takalin kwian daba tkanga tangle 
\s1 geru ngwalege daba tke tangle dare 
\p  
\v 3 Timoteo, che kledu ule una Efesoge, cha bebi joge nga kweri Macedoniage gire cha gerudu ba ole ba chegedale una Efesoge. Nege cha gerule nabitaite ba ole ba chegedale ngmadi una Efesoge daba ulita tke tangle dare geru uliage Jesucristo giti. Kwian gweale kle una Efesoge kle daba tke tangle geru ngwalege, ba me kwian ene chuge ngwadi daba tke tangle dare, ama me kle geru ulia dbe.  
\v 4 Ama diali kle tañachuge geru unsuialin alin giti, kaire ama kle tañachuge mo enusulian unsuialin ulita agedu kare, ba me kwian ene keruchuge. Geru unsuialin tanre ngwale kle, kwian tañachuge mo kaire kaire geru e giti, kwian ulita chege geru trage tanre geru ngwale giti, ulita ta me chege salengwli geru giti gire kwian ulita kira bate modi geru giti, ta ene ole ama me ñage daba na tke tangle geru uliage Chube takalin kare. Kwian ulita ene me che chudaboi geru Jesucristo giti dbe kwian nage, Chube takalin kwian ulita Jesucristo gai ulia. Ba gerudale kwian me geru ulia dbanga ole ama me tañachugale dare ama kle tañachuge kare, me ñage daba tke tangle dare geru ngwalege, e me kwian chudaboi geru ulia gai.  
\v 5 Ba gerudale ene kwian me geru ulia dbanga ole, ene be suge amage ama mo ta blitadale ene ama ñage age Chube takalin kare, ama me agedale ama agali takalin kare. Chube takalin che mo ta gbe ulia no trate ulita daba ole. Che agedale no ta no giti, che agedale no diali Chube takalin kare ene che me jiske, che mo ta dbadale ulia Chube gai me gerule alin: “Cha Chube gai ulia.” Kwian mo ta gbadale age no diali ulita ene, gire ama ñage ta dbe no ulita daba ole.  
\v 6 Kwian gweale me mo ta gbe age no ene malen diali ama kle chege geru trage geru ngwale alin giti.  
\v 7 Ama kle mo ta gbe kwian na tke tangle Moisés nu Chube gerua degaba unsuialin giti, ama kle mo ta gbe kwian tke tangle ta giti Moisés nu Chube gerua degaba giti, agwa gire ama agalige geru me suge ni ñage tachke Moisés nu Chube gerua degaba gerule kare me ñage kwian tke tangle no, ama ta kle nga jereske kare geruge.  
\v 8 Uñale chage Moisés nu Chube gerua degaba kwian alin geru e no, kwian bai kaire daba tke tangle geru ege Moisés nu Chube gerua degaba sugedale amage lledale Chube geru e gbu kwian alin.  
\v 9 Kwian kle age no ulita geru kle gbaba me kwian ene gbe jiske, geru kle gbaba kwian agenga me no ulita alin, geru kle gbaba kwian ai kare gbale jiske: Kwian me ta agekalin geru gbaba gerule kare, ama age me no geru dollale. Kwian me Chube gerua gai ulia, ama age me no alin diali. Kwian alin Chube me kweri, ama ta kle sugekare Chubege. Kwian mo ñenua gweda mo chebia gweda, kaire kwian daba gwangada.  
\v 10 Muirenu onbrenu kle mo chuge ke giti. Onbre chage mo salengwli ole onbre kle chage muinga ole kare, muinga chage mo salengwli ole muinga kle chage onbre ole kare. Kwian skwe boi dabage gire daba gbe lle boi ngwale mo alin. Kwian sole daba ole. Kwian daba me jiskenga gbe jiske. Geru kle gbaba kwian ulita alin bai kle age ene Chube dollale, kwian ulita bai kle age ene me kle age geru ulia gerule kare.  
\v 11 Geru e Chube gerua noare, Chube cha gau ama gerua noare trage kwian ulita ole, geru e ole kwian mo ta blitadale cha kle geru dbe kare ole. 
\s1 Jesucristo age no Pablo alin 
\p  
\v 12 Jesucristo che Chugagwalla diali kira kete chage lle boi ama alin, nga suga noare chadi e giti. Uñale amage cha be lle boi no ama alin, malen ama cha gau ama cha gbu geru amanu trage no diali kwian ulita ole, nga suga noare chadi.  
\v 13 Ngeru cha agedu tanre Jesucristo dollale, cha gerudu me no amadi, cha chagedu kwian ama gerua gau ulia nate ka boi kwian ole geru e giti, diali cha tadu kwian ene tkakalin skage. Jesucristo gwagedu chadi lle e boi, cha bebi ama gai ulia, me uñadu chage cha kledu age Chube dollale, ulita sugedu chage age no moge. Cha ene gire Jesucristo taidu dage chage, ama agedu no cha alin, ama cha gau lle boi ama alin, cha agedu me no ama talla mliunga ulita, gire ama cha gbu ama gerua dbe.  
\v 14 Nege cha Jesucristonu, malen diali ama kle cha ta gbe Chube gerua gai ulia gwangerugu, kaire ama kle cha ta gbe ma no diali mo ta dbe no daba na ole ulita. Ulia Jesucristo agedu no cha alin.  
\v 15 Jesucristo chiu nga dba ai giti kwian ulita jwen siere ta blite age no Chube takalin kare, ene kwian mi ji chuge bdagli agedu me no gdale. E ulia ulia malen kwian ulita geru e gadale ulia. Ñage gwage chadi, cha kwian gdaite agenga me no me no kwian na ulitage.  
\v 16 Cha ene Chube taidu dage chage, cha agedu me no ama talla mliunga. Nege kwian agenga me no na ñage gwage chadi, ene suge amage Jesucristo ta no molen kwian alin bai ama gai ulia, Jesucristo ñage age ama alin Jesucristo agedu cha alin kare. Kwian bai Jesucristo gai ulia Chube be ama ta blite, ene Chube be kle ama ole diali.  
\v 17 Che Chugagwalla Chube gdaitre alin allabi, ama me jogeda, amadi che me ñage gwage. Chube kwian ulita Chugagwalla unsuialin, nege, kaire diali gwangeruda alin. Che ama gadale dage, che gerudale noare ama giti diali chui ulita. Ene nobi. 
\p  
\v 18 Timoteo, ba cha kirolla Jesucristo giti, cha gerudu ba ole ba me kwian kle daba tke tangle geru ngwalege chuge ngwadi daba tke tangle dare, ba daba ulita tke tangle geru ulia Jesucristo gitige. Me cha alin allabi kle gerule ene ba ole, sbali kwian Chube gerua ketanga gerudu ba ole: “Chube ba gau ama gerua dbe kwian nage.” Ba tachkedale geru e giti Timoteo, ene ba be kira gai lle boi no Chube alin, kwian ba dollale Chube gerua giti ba me tallade, ba chage gwangerugu lle boi Chube alin.  
\v 19 Ba Chube gerua gadale ulia diali, ba me geru e chuge ngwadi, kaire ba agedale no diali, ene ba ta suge bage ba me jiske. Kwian gweale Chube gerua gau ulia, uñale amage me no age me no agwa ama agedu me no tanre, diali ama agedu ene malen bdagli ama Chube gerua chugu ngwadi.  
\v 20 Kwian kada Himeneo, na kada Alejandro agedu ene, ama gerudu tanre Chube dollale malen cha ama chugu ngwadi age me no che dolla Satanás kirallaske, ene ama be age tanre me no gire bdagli be suge amage ama kle age me no, ama me ñage gerule dare Chube dollale. 
\c 2  
\s1 Kwian Chubenu ulita gerudale Chube ole 
\s1 kwian nga ulita giti 
\p  
\v 1 Cha gerule ba ole, ba ulita bai kaire Chube gaba ulia gerudale Chube ole kwian nga ulitage giti, ba chudaboi kade Chubege kwian ulita alin diali. Chube age no kwian ene alin gire ba gerudale: “Chube, noare ba kle kwian ulita chudaboi, noare ba kle ama manade.”  
\v 2 Ba me ta jogenga gerule Chube ole che chugagwalla nga dba ai ulitage giti, ba chudaboi kade Chubege che chugagwalla nga dba ai giti alin, ene Chube che chugagwalla nga dba ai giti ta gbe kwian kage no ta gbe kwian chudaboi, ene che ulita ñage toi no.  
\v 3 Gerule ene chugagwalla nga ulitage giti, kaire gerule kwian nga ulitage giti Chube ole, e no. Ba age ene giti Chubedi nga suga noare. Chube che jwannga siere,  
\v 4 ama takalin kwian ulita geru amanu ulia uñe kwian ama gai ulia, ene bdagli kwian ñage tien gitiru ji chugege agedu me no gdale.  
\v 5 Chube gdaitre alin allabi kwian ulita alin, ngeru kwian ulita Chube dollale, Jesucristo alin ñage kwian ta gbe no Chube ole.  
\v 6 Jesucristo chiu nga dba ai giti kwian kare, ama mo chugu ngwadi kwiange mo gweda, ama jokeda kwian ulita agedu me no Chube dollale giti, ene kwian me ji chugadale bdagli. Chube chui gbu Jesucristo kage, Jesucristo boidu ulita Chube gerudu kare, ene chke uñale kwian ulitage ulia Chube ta kwian ulita jwankalin siere ji chugege age me no gdale.  
\v 7 Chube cha gau geru Jesucristo giti dbe kwian me israelita alin, Chube takalin cha ama gerua kete kwian me israelita ulitage, ama takalin cha kwian me israelita ta gbe ama geruadi. Cha kle gerule ulia cha me kle sole, cha me kle age mau tale, Chube cha gbu ama gerua trage, cha ama gerua gai ulia diali. 
\p  
\v 8 Kwian nga ulitage bai nu Chube gerua Jesucristo giti gaba ulia nga bainige kaire kle mo lite geru trage Chube giti, kwian onbre kwian muire kle mo lite ene Chube geruadi cha takalin kwian onbre ulita gerudale ta no trate giti Chube ole, me gerule ta skole dabadi ole, me gerule tañachuge me no dabadi ka boi me no daba ole.  
\v 9-10 Kaire cha takalin muinga ulita mo ngama dbadale no trate modi. Muinga me tañachugadale mo tale: “Cha ta toikalin lle no noske alin, cha takalin sarsia kwanglege, cha takalin igigwa kwanglege, cha ta mo ngama tkakalin ñometra kwangleske, cha mo chugaga dodade lite trate cha ta lle tanre kwangle gbakalin mo chugagage. Cha mo dodade ene kwian ulita be gwage chadi cha noare.” Muinga Chube uñe me tañachugadale ene, ma no muinga tañachuge mo tale muinga ta mine Chube ole, ma no muinga nu Chube gerua gaba Jesucristo giti ulia age no trate ulita Chube takalin kare, diali ama mo ta gbe age no kwian na gwage, ene kwian gerule ama giti ama muinga no ama kle mo ta gbe chage Chube ole.  
\v 11 Muinga kaire onbre mo lite ole Chube geruadi, muinga ulita chegedale kamne Chube gerua keruchuge alin, muinga ulita kwian tkanga tangle gadale dage.  
\v 12 Cha me takalin muinga kwian mo litaba Chube geruadi ulita tke tangle, muinga ulita chegedale kamne. Kaire cha me takalin muinga mo gbe ma kweri onbrege onbre kage.  
\v 13 ¿Mineade gerule muinga me ñage mo gbe ma kweri onbrege? Chube Adán dodadu ngeru, Adán kwian onbre. Bigwa Chube Eva dodadu, Eva kwian muire.  
\v 14 Adán me mo anbligu che dolla Satanáge, Eva mo anbligu Satanáge gire Eva agedu me no Chube dollale, ama me agedu Chube gerudu kare, ama agedu Satanás gerudu kare. Eva agedu me no ene, malen cha me takalin muinga mo gbe ma kweri onbrege onbre kage.  
\v 15 Chube muinga dodadu kirogwa manade. Chube noare muinga ulita ole. Muinga bai mo ta gbe Chube gerua Jesucristo giti gai ulia diali bai mo ta gbe age no trate mo onbrella gdaitre alin ole onbre gai dage no, muinga ene kle toi Chube takalin kare ama be joge toi Chube ngwadi, ama mi ji chuge agedu me no gdale. 
\c 3  
\s1 Kwian Chubenu kwian ai kare gbadale mo chugagwallale 
\p  
\v 1 Geru ai ulia: Kwian gweale tañachuge mo tale: “Cha ta lle boakalin Chube alin, cha takalin kwian Chubenu ulita cha gai mo chugagwallale lle boi ama ole”, kwian tañachuge ene ama kle tañachuge no, lle e noare ama alin boadale.  
\v 2 Kwian Chubenu daba gai mo chugagwallale onbre ai kare gadale: Kwian Chubenu chugagwalla chagedale no trate diali kwian ulita gwa giti, ene kwian na me ñage gerule me no amadi. Ama toidale mo muingalla gdaitre alin ole. Ama me mo chugadale ngwadi age me no. Ama me mo chugadale ngwadi age ulita ama ta agekalin kare. Ama mo gadale dage kwian ulita ole. Ama kwian na gadale ngwange no mo ullage. Uñale amage kwian tke tangle mine Chube geruage.  
\v 3 Ama mo ta gbe me lle gage janga me chage llale. Ama me mo ta gbanga kira bate daba ole, ama toi taingwli daba ole. Ama agenga no kwian alin. Ama me tañachuge igi alin giti.  
\v 4 Mo ullaske ama mo gbadale chugagwallale no mo kirogwalla gbe mo gai dage age ama gerule kare,  
\v 5 mo ullaske ama me mo gbe mo kirogwalla chugagwallale no, gire ene kaire mi ñage mo gbe kwian Chubenu chugagwallale no.  
\v 6 Kwian Chubenu me Chube gaba ulia sbali me ñage chege kwian Chubenu chugagwallale. Kwian Chubenu daba me Chube gaba ulia sbali gbe chugagwallale daba e be ñage tañachuge mau giti: “Cha kweri kwian no, malen kwian cha gau ama chugagwallale.” Che dolla Satanás tañachugu ene, amage sugedu ama kweri, malen Chube ama gbu jiske Chube ama mliunga sugekare. Kwian age Satanás kare Chube be age kaire kwian ene ole.  
\v 7 Kwian Chubenu chugagwalla chagedale no trate diali kwian me Chubenu gwa giti, ene kwian me Chubenu gwage amadi ama no. Kwian Chubenu chugagwalla age me no, ene kwian me Chubenu ñage gerule me no kwian Chubenu chugagwalladi, e dolla Satanás takalin kare. 
\s1 Kwian Chubenu kwian ai kare gbadale 
\s1 mo chugagwalla chudaboangale 
\p  
\v 8 Ene kaire kwian Chubenu chugagwalla chudaboanga ai kare gadale: Ama agedale no diali, ene ama no kwian na gwage, kwian na ama gai dage. Kwian ulita ole ama gerudale diali ulia. Ama mo ta gbe me lle gage janga me chage llale. Ama me tañachugadale igi gai lle giti ngwale daba ngeru.  
\v 9 Ama Chube gerua Jesucristo giti gadale ulia diali, me tañachugadale sidri geru e me ulia, Chube ama ta gbe, ene chke uñale amage Chube gerua ulia.  
\v 10 Kwian be chege kwian Chubenu chugagwalla chudaboangale, ngeru kwian Chubenu ulita gwagedale amadi chui gwealege ama be chage mine, ama chage no Chube takalin kare, gire kwian Chubenu ñage ama gbe chugagwalla chudaboangale.  
\v 11 Kaire muinga agedale diali no mo onbrella kare, ene ama no kwian na gwage, kwian na ama gai dage. Ama me gerudale ngwale kwiandi. Ama me mo chugadale ngwadi age me no. Ama mo ta dbadale lle boi no diali.  
\v 12 Kwian Chubenu chugagwalla chudaboanga toidale muinga gdaitre alin ole. Ama mo gbadale mo kirogwalla chugagwallale no mo ullage, kaire mo gbadale kwian na kle toi mo ullage chugagwallale.  
\v 13 Kwian chege kwian Chubenu chugagwalla chudaboangale, ama lle boi no ama no kwian na gwage, kwian be ama gai dage. Kaire ama gerule Jesucristo giti kwian be ama keruchugakalin, ene ama be ta gbe ma no gerule Jesucristo giti kwian ole. 
\s1 Kwian Chubenu ulita Chube gerua manadale no 
\p  
\v 14-15 Cha kle tañachuge joge tienda blike badi, me uñale chage cha ñage joge blike ba ngwadi o me, malen cha kle chada ai ulita degange ba alin. Cha ba ta gbe chada ai giti, ba kwian Chubenu ulita mo ta gbadale chage no Chube takalin kare. Chube gwade, ama gerua ulia, kwian ulita bai Chube gerua gaba ulia ama Chubenu. Kwian Chubenu ulita geru tragadale no Chube gerua giti daba na ole, Chube gerua manadale diali no me kwian na chuge ngwadi geru ulia blite nganake.  
\v 16 Ulia Chube geru noare ketu chege, geru e kweri che alin, geru e gerule Jesucristo giti: 
\q1 Jesucristo chku nga dba ai giti kwian kare. 
\q1 Chube Oña giti chku uñale kwiange Jesucristo agedu no trate ulita nga dba ai giti. 
\q1 Lle boanga Chube alin nga ngaña giti gwagedu Jesucristodi age no ulita. 
\q1 Geru Jesucristo giti no chagedu nga ulitage, kwian nga ulitage geru e keruchugu, kwian nga ulitage gweale geru Jesucristo giti gau ulia. 
\q1 Chube Jesucristo duni nga ngaña giti, Chube Jesucristo gbuni Chube kle ngwadi. 
\m Ulia geru e noare, geru ulia, kwian Chubenu ulita geru e manadale no. 
\c 4  
\s1 Kwian Chube gerua Jesucristo giti gaba ulia gweale 
\s1 be joge siere Chube geruage 
\p  
\v 1 Kwian Chube gerua ketanga, amage Chube Oña geru ketu, Chube Oña gerudu trate ama ole: “Chui bdagli ngwange kwian gweale Chube gaba ulia be Chube talla mlienga be joge siere Chube geruage gire be chage geru na me ulia nate. Kwian ene ulita be chage kwian kle daba tke tangle che dolla geruage keruchuge, geru e geru ngwale ulita, kwian be geru ngwale gai ulia be Chube gerua ulia chuge ngwadi.”  
\v 2 Cha gerule ba ole Timoteo, kwian e be takalin kwian daba tkanga tangle geru ngwalege keruchuge, daba tkanga tangle e me gerule ulia me daba tke tangle geru uliage. Ama age diali tanre me no, me suge dare amage ama kle age me no, ama tañachuge ama no.  
\v 3 Kwian daba tkanga tangle geru ngwalege gerule: “Kwian me ñage mo jwen kaire me ñage bligda ulita gute, bligda gweale me no gutadale.” Kwian e me kle gerule ulia. Chube bligda ulita dodadu kwian alin gutadale. Kwian bai kaire Chubenu Chube gerua gaba ulia ñage bligda ulita gute, ama gerudale no Chube ole bligda giti uñale amage Chube lle ulita dodadu ama alin.  
\v 4 Chube nu lle ulita dodaba, lle e ulita no. Chube bligda ulita dodadu gutadale kwian alin, e ulita no, che me ñage gerule bligda gweale me no sugaska gutadale. Ulia Chube bligda ulita dodadu che alin, che ñage bligda ulita gute,  
\v 5 Chube gerua gerule ene. Che gerule no Chube ole bligda giti gire che bligda ulita gute, e noare Chube alin. 
\s1 Pablo takalin Timoteo Jesucristo gerua trage no 
\s1 kwian ulita ole 
\p  
\v 6 Timoteo, ba kwian Chubenu ulita tkadale tangle no cha gerudu kare bligda giti. Ba kwian tke tangle ene ulita, ene ba kwian Chubenu chudaboanga no Jesucristo alin, ene be suge kwian ulitage ba nu Chube gerua jwanba no, ba mo ta gbaba Chube gerua gai dage, ba kle age Chube gerua gerule kare.  
\v 7 Kwian gerule ba ole geru gweale me no unsuialin giti ba me ñage geru e keruchuge geru e gbe gdadi, geru e me gerule ulia Chube giti. Ma no ba mo ta gbe tañachuge diali Chube gerua giti ta gbe age no diali Chube takalin kare.  
\v 8 Che kolale, che jrite, ene che kwangitra jrite no kira giti. E ulita no che alin, agwa e sugeti alin. Kaire che mo ta gbadale tañachuge diali Chube gerua giti ta gbe age ulita ama takalin kare, ene che chege Chube kirallaske. E no che alin nege nga dba ai giti kaire chege che alin diali chui na ulita bdagli nga ngaña giti Chube ngwadi.  
\v 9 Cha gerudu kare, e ulia, kwian ulita ñage e gai ulia.  
\v 10 Uñale chege e ulia, malen che mo ta gbe diali lle boi no Chube alin. Kwian tanre ka boi che ole Chube gerua giti, che me tallade, che mo ta gbaba Chube alinge. Chube gwade, ama alin ñage kwian jwen siere bai kaire Jesucristo gai ulia, ene kwian me ji chuge bdagli agedu me no gdale. 
\p  
\v 11 Ba gerudale kwian Chubenu ulita ole, ba ama tkadale tangle Chube geruage, kwian nu Chube gerua gaba me ñage tañachuge geru ngwale giti.  
\v 12 Ba kwian Chubenu ulita tke tangle Chube geruage, ama gweale gwage badi gerule ba me ñage kwian tke tangle ba biale me geru uñe. Kwian gerule ene ba me talladale, ma no ba age no ulita ama gwa giti, ba gerule no diali ama ole, ba ama ulita gai dage, ba ta dbe no ama ulita ole, ba Chube gai ulia diali, ba age no trate ulita diali Chube takalin kare. Ba chage ta age no ene ole, kwian Chubenu ulita gwage badi be suge amage ama chagedale ba kle chage kare, ba kwian biale no, ama me ñage gerule me no badi.  
\v 13 Cha bebi joge chkeni ba ngwadi, diali ba mo litadale kwian Chubenu ulita ole, ba Chube gerua degaba batadalenga kwian Chubenu ulita alin, ba kwian Chubenu ulita ta gbe Chube geruadi, kaire ba ama tke tangle no Chube geruage.  
\v 14 Sbali kwian Chube gerua ketanga gerudu ba ole: “Timoteo, Chube geru ketu chage ba giti Chube ba gau ama gerua Jesucristo giti dbe kwian ulitage, nege joga lle e boi Chube gerudu kare, Chube be kira kete bage ama gerua dbe.” Kwian Chube gerua ketanga gerudu ene ba ole, kaire chui amañage kwian Chubenu chugagwalla ulita ko gbu ba giti gire Chube ba ta gbu lle boi ama alin. Cha gerule ba ole ba me ñage e kagenga ngwale, Chube ba gbu lle boi ama alin.  
\v 15 Ba mo ta dbadale diali lle boi no Chube takalin kare, ba lle boi ene gire kwian ulita ñage gwage edi diali ba kle lle boi ma no.  
\v 16 Ba kwian Chubenu tkadale tangle no Chube geruage, ba chagedale no Chube takalin kare. Ba mo ta gbe age ene ulita diali, ene ba mi joge siere Chube geruage, kaire kwian bai kle ba keruchuge mi joge siere Chube geruage, ba age ene diali ba ulita be tien gitiru geru ngwalege. 
\c 5  
\s1 Kwian Chubenu toidale no daba ole 
\p  
\v 1 Kwian onbre juma Chubenu gweale age me no, ba me ka boi ama ole, ba mo ta dbale no ama ole ba mo ta dbe mo ñenua ole kare, ba gerudale no ama ole ta giti ama agedu me no giti. Ba mo ta dbale no onbre biale ole ba mo ta dbe mo daballanu ole kare.  
\v 2 Ba mo ta dbale no muinga juma ole ba mo ta dbe mo chebia ole kare. Ba mo ta dbale no muinga biale ole ba mo ta dbe mo iboteanu kare, mo tale me tañachuge me no sidri ama ulitadi. 
\p  
\v 3 Ba gwage muinga gwealedi muinga onbrella jogebada muinga chegeba gballa ama chudaboanga me, ba ule kwian Chubenu ulita ole muinga ene chudaboadale.  
\v 4 Muinga gweale me chege ñengulage, ama chege kirollage bdadallage, kirolla ñage mo chebia chudaboi kaire bdadalla ñage mo sulian chudaboi, kirolla kaire bdadalla me ñage chudaboi kade kwian nage mo chebia alin mo sulian alin. Chebia, sulian ama manadu no ulita jo juma, malen kirolla mo chebia chudaboadale bdadalla mo sulian chudaboadale, Chube gwage age ene e ulita no, Chubedi nga suga no kwian age ene mo bitalla alin.  
\v 5 Muinga me chege ñengulage, ama me kirolla molen me bdadalla molen me bitallanu molen, muinga ene mo chugadale ngwadi Chube kote, ama mo ta gbadale gerule Chube ole diali nga ju nga jere chudaboi kade Chubege.  
\v 6 Muinga me chege ñengulage ama me tañachuge Chube giti ama ta agekalin ama takalin kare, chagenga ngwale sugekare Chubege, muinga ene ta kle bate Chubege jaba kare, ama ta me kle Chube ole ni age Chube takalin kare. 
\p  
\v 7 Timoteo, ba gerule kwian Chubenu ulita ole ama muinga me chege ñengulage chudaboadale ene cha gerudu kare. Kwian Chubenu age ene ama kwian no, ama kle age no Chube takalin kare.  
\v 8 Kwian Chubenu gweale gwage mo bitalladi, mo bitalla me kle toi no, kaire chebialla, sulianlla, kwian Chubenu me tañachuge mo bitalla ene giti chudaboi, kwian Chubenu ene me kle age Chube takalin kare, ama me kle Chube gerua gai dage. Kwian me Chube uñe age ma no kwian e Chube uñege, kwian me Chube uñe tai dage mo bitallage, ama age no mo bitalla alin. Kwian Chube uñe me mo ta dbe no mo bitalla chudaboi ama ta me kle Chube ole ni kle Chube gai ulia. 
\p  
\v 9 Ba kwian Chubenu ulita agedale ene: Muinga me chege ñengulage ulita ba me kalla gbe chada giti, ba muinga ai kare alin kalla gbe chada giti: Muinga churalla chku sesenta alin gwangerugu, muinga toidu onbre gdaitre alin ole,  
\v 10 uñale kwian Chubenu ulitage muinga toidu ulita no lle no bo, muinga mo kirolla manadu no, muinga noare kwian basanga ole mo ullage kle kwian basanga gai ngwange no mo ullage, muinga ta dbe daba Chubenu na chudaboi diali, muinga daba kle boi daga ngwale chudaboi no ama kira gbe, kaire muinga kle lle na tanre noare dodade.  
\v 11 Ba muinga juma ene kare kalla gbe chada giti, muinga kle biale me chege ñengulage me churalla sesenta molen, ba me muinga ene kalla gbe chada giti. Muinga ene ñage gerule: “Cha mi mo jwen nabitaite, cha be chege toi gballa lle boi Jesucristo alin.”  
\v 12 Ñage gerule ene gire chui gwealege ama be takalin mo jwen nabitaite be age ama takalin kare me Jesucristo takalin kare. Ama be chege jiske, ama gerudu alin gire me mo ta gbu age ama gerudu Chube gwa giti kare.  
\v 13 Ñage boi ene kaire muinga kle biale me chege ñengulage ñage kianchienga, ama chui chuge chagenga alin, kaire chui chuge ngwale gerule dabadi daba na ole, ama takalin kwian ulita kle boi chke uñale amage, geru mau me tragale ama geru trage daba na ole.  
\v 14 Malen cha takalin muinga kle biale me chege ñengulage ama mo jwandale, ene ama kirogwa molen ama kirogwa manade no ama lle boi no mo ullage. Ene kwian me Chube uñe me ñage gerule sidri me no muinga enedi kaire kwian Chubenu ulitadi.  
\v 15 Cha gwagedu muinga Chubenu gwealedi kle biale me chegu ñengulage, ama jo siere Chube geruage, ama agedu che dolla Satanás takalin kare. 
\p  
\v 16 Onbre Chubenu gweale, muire Chubenu gweale bitalla chege gballa, ñengula jogeda, ama mo bitalla chudaboadale, ama me ñage kwian na Chubenu ulita chuge ngwadi mo bitalla manade, ama agali mo bitalla manadale. Ama age ene mo bitalla alin, ene kwian na Chubenu ulita ñage muinga na chudaboi, ulia muinga me bitallage kwian Chubenu ulita ama chudaboadale. 
\p  
\v 17 Kwian Chubenu chugagwalla nga ulitage lle boi no kwian Chubenu kaire kaire alin, kwian Chubenu ulita mo chugagwalla kaire kaire chudaboadale no no bligda giti ñometra giti igi giti, chugagwalla Chube gerua trage no kwian ole diali kwian tke tangle no Chube geruage, kwian Chubenu mo chugagwalla ene manadale no.  
\v 18 Chube gerua degaba unsuialin gerule: 
\q1 “Chbi lle boagda gbe trigo mongenga sulikwage, ba chbi gbe chage tangle trigo giti ba me chbi ka lugadale, ene chbi bli ole ama ñage trigo gute ama trigo mongenga ñanale.” 
\m Kaire Chube gerua degaba unsuialin gerule: 
\q1 “Kwian lle boi ama lle e boi ñanalla gadale.” 
\p  
\v 19 Timoteo, kwian gdaite chke ba ngwadi kwian Chubenu chugagwalla gbe jiske bage, ama me chie boke kwian mai gerule salengwli ba me ama kerua gbe gdadi.  
\v 20 Boke kwian mai chke gerule ulia kwian Chubenu chugagwalla giti ama agedu me no, suge bage ulia ama kle age me no ba ka boi ta no giti chugagwalla ole kwian Chubenu na ulita gwa giti, ene kwian Chubenu na mi age ama age kare.  
\v 21 Chube gwa giti Jesucristo gwa giti lle boanga nga ngaña giti Chube alin ulita gwa giti cha kle geru ai gbe ba alin. Ba me talladale kwian ba skatemanalla noare kwian me ba skatemanalla noare, ba agedale salengwli ama ulita ole, cha takalin ba age ene ulita cha gerudu kare ba ka boi kwian Chubenu chugagwalla bai kaire kle age me no ole.  
\v 22 Ba me kwian gai blike ko gbe ama giti gerule ama ole ama be chege kwian Chubenu chugagwallale, me uñale bage ama kwian no no o me. Ba kwian gweale gbe blike kwian Chubenu chugagwalla gire bigwa chke uñale ama kwian me no kle age me no, gire kwian Chubenu ulitage be suge ba no ama kle age me no ole ba ama gbu daba chugagwalla. Ba mo ta gbadale age no ulita trate diali, ba me kwian gbe blike mo tale daba chugagwallale.  
\v 23 E me gerule ba chi alin jadale ba me vino jadale, chui gweale ba oga kde ole, ma no ba vino jai sidri, ene ba me oga kde ole. 
\p  
\v 24 Cha gerule nabitaite ba ole ba kwian Chubenu chugagwalla gadale ta giti, me uñale chema no chema me no. Kwian gweale age me no chke uñale nate blike, suge kwian ulitage ama kwian agenga me no. Kwian na age me no me chke uñale nate blike, ama age me no ulita chege skwlenre, agwa chuia nale chke uñale nate ama kwian agenga me no.  
\v 25 Ene kaire kwian lle no boanga chke uñale nate blike, suge kwian ulitage ama kwian no. Na lle no boanga me chke uñale nate blike, ama lle no boi ulita chege skwlenre, agwa ulita lle no boi mi chege ogabada, chui gwealege be chke uñale nate. 
\c 6  
\p  
\v 1 Kwian daba gai gbe lle boi mau alin, kwian e amanu, ama chege diali lle boi mo mauña alin, kwian Chube uñe ama toi ene lle boi mo mauña alin ama mo mauña gadale dage diali, ama age ene kwian na gwage amadi me gerule me no Chubedi kaire me gerule me no Chube geruadi.  
\v 2 Kwian Chubenu daba na Chubenu gai gbe lle boi mau alin, lle boanga toi lle boi mo mauña alin ama me tañachugadale mo tale mo mauña giti: “Ama cha daballa Chube giti malen ama me ñage cha kage, cha me ama gadale dage.” Lle boanga me tañachugadale ene dale. Ama boke Chubenu, ma no tañachuge lle boi no no mo mauña alin diali. Mo mauña Chube gerua gau ulia, kaire Chube noare ama boke ole, malen lle boanga Chubenu lle boadale no mo mauña Chubenu alin. 
\p Ba kwian ulita tke tangle, ba gerule kwian ole ama agedale cha chada ai ulita degu gerule kare. 
\p  
\v 3 Kwian gweale daba tke tangle geru ngwalege, me chada ai cha degu gerule kare, ama me gerule che geru jun che Chugagwalla Jesucristo gerua kle gerule trate kare, me gerule che geru gau ulia gerule kare.  
\v 4 Kwian ulita daba tke tangle geru ngwalege ene, ama tañachuge mau giti: “Cha noare, cha kwian kweri, cha alin allabi ñage kwian tke tangle no, kwian na me cha kare.” Amage suge ama kwian no, ulia me ene, ama kwian tke tangle geru ege, ama agalige geru me suge. Kwian ene ta kle diali kira batakalin kwian na ole geru ngwale giti, ama gwage kwian nadi gerule ma no amage gire ama ta skochie ama ta gerukalin no ene daba na gerule kare, ama ta daba sko jwankalin, ama ka boi daba ole, ama gballa tañachuge: “Kwian na tañachuge me no chadi.”  
\v 5 Kwian ene ta me no, ama me ñage tañachuge no trate malen diali ama kira bate geru ngwale giti, ama me Chube gerua Jesucristo giti gai ulia. Kaire ama gerule kle kwian tke tangle ulia Chube geruage, agwa ulia me ene, ama tañachuge nganake, ama tañachuge mo tale: “Noare cha kwian tke tangle Chube giti, kwian tke tangle ñanale cha igi gai no.” Kwian ta enege ba jogedale siere. 
\s1 Chube gerua ma ñanaske lle ulitage 
\p  
\v 6 Ulia che Chube gerua uñe, chege suge Chube gerua ma ñanaske lle ulitage. Lle ngle lle me ngle, che me tallade lle molen mangire batre ole, che nga dbadale suga no diali lle ngle ole lle me ngle ole.  
\v 7 Che tachkedale mo giti che medunga chebia kote che me chiu lle dbe dale, che jogeda che me ñage lle dbe mo ole llagli.  
\v 8 Che kle gwade che bligda molen che ñometra molen toigda, che nga dbale suga noare bligda ole ñometra ole ngle o me ngle ole.  
\v 9 Kwian ulita me tañachuge ene, kwian gweale tañachuge: “Cha ta igi tanre lle tanre gakalin mau alin.” Kwian tañachuge ene ama takalin igi nglege, ama me gwagedale igidi, ama gwage igidi ta igi gakalin mau alin. Ama tañachuge: “Cha kwian anblite lle gwealedi, ene cha ñage igi tanre gai mau alin.” Diali kwian ene age me no, ama ta me no, me suge amage e giti ama boi tanre me no boi tanre daga ngwale.  
\v 10 Igi ole ngle kwian ñage age tanre me no igi giti, kwian igi molen ngle ama takalin igi ma nglege, kwian ene age dagale daba ole ama igi jwennga daba ngeru ngwale lle gweale giti. Kwian gweale jo siere Chube geruage, ama me tañachuge Chube giti, ama tañachuge igi alin giti mau alin, kwian ene boi daga ngwale ama chege ta olire diali ama agali kle age giti. 
\s1 Pablo Timoteo ta gbe chage kiraske Chube takalin kare 
\p  
\v 11 Timoteo, ba Chubenu, ba me agedale kwian kle tañachuge igi alin giti kare, ba agedale nganake diali, ba mo ta gbadale toi ai kare: Ba chagedale no trate. Ba agedale Chube takalin kare diali. Ba mo ta gbadale Chube gai ulia. Ba ta dbadale no kwian ulita ole. Jesu gerua dbe giti ba boi daga ngwale ba me talladale. Ba agedale ta no giti kwian ulita alin.  
\v 12 Geru ulia Chube giti ba uñe, ba mo ta dbale chage kiraske diali Chube takalin kare. Chube ba gau toi ama ole diali chui ulita, malen ba gerudu kwian ngle gwa giti: “Cha Chube gai ulia, cha be mo ta gbe chage ama ole diali.” Ba gerudu ene kwian ngle gwa giti, nege ba me ta jogenga ba Chube gerua gau chuiage giti.  
\v 13 Ba tachkedale cha talla giti gballa cha me kle chada ai degange ba alin, Chube gwa giti Jesucristo gwa giti cha kle geru ai gbe ba alin. (Chube kweri, ama giti lle ulita gwade kle nga dba ai giti nga ngaña giti kaire. Jesucristo dule Poncio-Pilato ngwadi, Jesucristo gerudu ulia mau giti Poncio-Pilato gwa giti.)  
\v 14 Ba mo ta gbadale age no ulita Chube gerua gerule cha degangu kare. Cha geru ai gbe ba alin ba geru ai gadale dage, ba me geru ai blitadale nganake, ene che Chugagwalla Jesucristo chieni chuiage ba be kle biale trate Jesucristo ngwange.  
\v 15 Chui gwealege Jesucristo be chieni Chube Jesucristo chuia gbu kare, Chube alin allabi ama noare ama kweri, ama kwian Chugagwalla nga dba ai giti ulita Chugagwalla, ama kwian ulita Chugagwalla kaire ama ma kweri lle ulitage.  
\v 16 Chube alin allabi me jogeda. Chube chrallaske kwian me ñage gwage, kwian gwagwa jogenga Chube chralladi malen kwian me ñage joge chke Chubedige, kwian gdaite me gwagedu Chubedi, ni malen kwian gdaite ñage gwage Chubedi mo gwagwa giti, che me ten amadi agwa suge chege ulia Chube noare, ama kweri, kwian ulita gerudale noare Chube giti diali, noare Chube kwian ulita Chugagwalla diali. Ene nobi. 
\p  
\v 17 Kwian lle tanre molen igi tanre molen, ba gerudale kwian ene ole ama me ñage tañachuge mau giti: “Cha lle tanre molen malen cha ma no kwian na ulitage.” Me ñage tañachuge ene. Kwian lle ulita tanre molen, lle e me ñage ama chudaboi diali, lle ulita tanre me jage diali. Ma no tañachuge Chube giti Chube ñage ama chudaboi diali. Chube gwade, ama lle ulita noare kete chege toi no diali.  
\v 18 Kaire ba gerudale kwian ene ole ama agedale no daba na alin, noare ama ta diali lle ketakalin daba nage, diali tañachuge daba na chudaboi bai me lle molen.  
\v 19 Ama daba na chudaboadale ene nga dba ai giti, ene nga ngaña giti Chube kle lle noare oge ama alin bai nu Chube gerua gaba ulia, bdagli Chube be ama gbe toi diali chui ulita Chube ole. 
\s1 Pablo chada degange bdagli Timoteo alin 
\p  
\v 20 Timoteo, Chube ba gau ba gbu daba tke tangle ama geruage, noare ba daba tke tangle geru e alin allabige. Kwian gweale kle geru ngwale trage daba ole, ba me geru e gbe gdadi. Kwian geru jun gballa mo chugadi geru tanre degu, kwian gerule geru e alin no, geru e alin ulia. E me gerule ulia, geru e me gerule Chube gerua gerule kare.  
\v 21 Kwian gweale geru e keruchuge geru e gai ulia gire ama joge siere geru uliage. 
\p Cha takalin Chube age no no ba alin. 
\p Geru ai ene ulita cha Pablo chada degangu ba alin Timoteo. Che kle meni.