\id 1TH - Buglere NT -Panama 2008 (DBL -2013) 
\h 1 TESALONICENSES 
\toc1 Pablo Nu Chada Degaba Gwangea Kwian Chubenu Una Tesalónicamu Alin 
\toc2 1 Tesalonicenses 
\toc3 1Ts 
\mt1 Pablo Nu Chada Degaba Gwangea Kwian Chubenu Una Tesalónicamu Alin 
\mt2 Primera Carta de Pablo a los Tesalonicenses 
\ip Pablo jo una Tesalónicage nga kweri Macedoniage ngeru kwian nage Chube gerua Jesucristo giti kete kwian una emuge, Pablo chudaboangalla gdaboke kada Silas kada Timoteo jo ule. Una ege kwian tanre geru Jesucristo giti gau ulia, kwian e ulitaske kwian israelita gweale kledu. Kwian israelita e Jesucristo gerua gau gdale kwian israelita chugagwalla semadu tanre Pablo ole skochiu Pablodi, malen kwian israelita chugagwalla e ulita kira batu Pablo ole Pablo kaguni siere una ege ule chudaboanga boke ole (Hechos 17:1-14). 
\ip Pablo jo siere una Tesalónicage gire jo chage dare geru Jesucristo giti kete kwian una namuge, Pablo jo chke una Corintoge gire Pablo Timoteo kagu naskuni una Tesalónicage kwian Chubenu ulita chada jwen. Timoteo chiuni Pablo kle ngwadi ama Pablo ta gbu kwian Jesucristo gerua ganga una Tesalónicage kledu boi daga ngwale Jesucristo gerua gai ulia gdale agwa ama ulita kledu mo ta gbe kiraske me mo ta blite joge siere geru uliage. Geru e giti nga sugadu noare Pablodi, malen Pablo chada ai degangu kwian Chubenu ulita una Tesalónicage kira gbagda toi no Chube takalin kare. 
\c 1  
\s1 Pablo gbi kage chada giti kwian Chubenu 
\s1 una Tesalónicamu alin 
\p  
\v 1 Cha Pablo chada ai degange ba ulita Jesucristo gerua gaba ulia kle mo lite Chube geruadi una Tesalónicage alin: 
\p Cha ule Silvano ole Timoteo ole gbi kage ba ulita alin chada ai giti. Ba ulita kle mo lite Chube geruadi, ba che Ñenua Chubenu kaire ba che Chugagwalla Jesucristonu, cha takalin ama age no ba ulita alin ama ba ta gbe suga no. 
\s1 Kwian Chubenu una Tesalónicamu ta gbe no trate Jesucristo gerua gai ulia 
\p  
\v 2 Cha kle gerule Chube ole gire diali cha tachke ba ulitage, cha gerule no Chube ole ba ulita giti ene: “Chube, noare kwian banu una Tesalónicamu ulita kle chage no ba ole, cha takalin ba ama ta gbe age ene diali.  
\v 3 Noare ama ulita kle ba gai ulia kle mo ta gbe lle boi no ba alin diali kwianske. Noare ama kle mo ta dbe no kwian ole kaire ba ole. Ama me skwatige, boi daga ngwale giti me tallade, ama diali kle Chugagwalla Jesucristo chieni chuia manade.” Cha gerule ene ba giti diali chui tangle che Ñenua Chube ole.  
\v 4 Cha daballa cha ibotea Jesucristo giti, Chube noare ba ulita ole, uñale chage Chube ba ulita gau mau alin.  
\v 5 Cha jo chke geru Jesucristo giti dbe ba ulita una Tesalónicamuge cha me jo chke geru e kete bage gballa, Chube Oña kledu cha ole, ama cha ta gbu geru Jesucristo giti kete ba ulitage kiraske, uñale chage trate trate geru Jesucristo giti geru ulia, malen cha gerudu no trate ba ole Jesucristo gerua giti. Uñale ba ulitage cha chagedu baske geru Jesucristo giti dbe ba ulitage cha mo ta gbu chage no trate ba ulitaske, ene cha giti ba ñage geru ulia gai, cha agedu ene no ba ulita alin.  
\v 6 Ba ulita mo ta gbu chage cha chagedu kare kaire Chugagwalla Jesucristo chagedu nga dba ai giti kare. Ba Jesucristo gerua gau ta suga noare ole, e Chube Oña ba ta gbu, ba ulita boidu daga ngwale Jesucristo gerua giti, agwa ba ulita me talladu, ba geru ulia gau ulia diali no.  
\v 7 Ba ulita boidu daga ngwale sketangle ba mo ta gbu chage Jesucristo gerua ole diali. E chku uñale kwian Chubenu nga kweri Macedoniage nga kweri Acayage, suge amage ama ulita agedale kaire ba kle mo ta gbe Jesucristo geruage kare.  
\v 8 Ba ulita mo ta gbu ene Jesucristo gerua ole, ene ba giti geru Chugagwalla Jesucristo giti chagedu nga ulitage, me kwian nga Macedoniamu alinge me kwian nga Acayamu alinge geru e ulia chku uñale, agwa kaire kwian nga na ulitamuge chku uñale geru ulia kle ba ta blite giti, uñale kwian ulitage ba ulita mo ta gbu Chube alinge. Cha me ba tragadale kwian na ole, kwian ulitage uñale ba kle mo ta gbe Chube alinge.  
\v 9 Kwian ulita agali kle gerule cha jo chke baske ngwadi giti, ama kle gerule no ba giti, ba ulita cha gau ngwange no, ba Chube gerua keruchugu, ba mo ta blitu Chube ole, ba lle oña ngwale dodaba mo kodi gai chubere chugu ngwadi ulita gire ba tachku lle boi Chube gwade Chube ulia alin.  
\v 10 Kaire kwian ulita kle gerule ba ulita giti ba ulita kle Chube mo Kirolla Jesu gbuni gwade manade ngwange, ba takalin Jesu chieni ba alin, Jesu alin allabi be che ulita jwen siere Chube be ji gbe tirarege kwian me Jesu gau ulia alin chuia be chiege. 
\c 2  
\s1 Pablo Jesucristo gerua dbe kwian una Tesalónicamuske 
\p  
\v 1 Cha daballa cha ibotea Jesucristo giti, uñale ba ulitage cha jo chke ba ngwadi cha me jo chke Chube gerua Jesucristo giti dbe bage ngwale, ba ulita geru e gau ulia.  
\v 2 Uñale ba ulitage cha jo chke kwian una Filipomuske ama ka bo cha ole geru dbe gdale, gerudu me no agedu me no ulita cha dollale geru dbe giti amaske. Kaire cha jo chke baske una Tesalónicage gire kwian gweale agedu me no cha dollale salengwli kwian una Filipomu agedu cha ole kare, boidu ene ulita agwa cha me ta chugu geru Jesucristo giti dbe ba ulitage, ba geru gau ulia, Chube kledu cha ole, Chube cha chudabo cha kira gbu geru ulia kete bage.  
\v 3 Cha me geru ngwale du bage, cha me jogebanga geru uliage, agwa cha geru ulia du bage. Kaire cha me gerudu ta gweale age me no giti ole ba ulita anblitagda, cha me agedu mo tale ba gweale anblite lle gweale giti ene ba geru gadale ulia.  
\v 4 Me ene, Chube cha gau geru Jesucristo giti dbe kwiange gerule geru ulia gerule kare, Chube gwage che ulitadi, suge amage che ta mine, amage uñale che mine ulita, malen cha me gerudu kwian takalin kare, cha gerudu Chube takalin kare.  
\v 5 Cha jo baske cha me jo ta ai kare ole: Cha me mo ta gbu gerule no kwian ulita giti ene kwian ulitage suge cha kle gerule no ama giti ene ama igi ketadale chage cha gerule no ama giti ñanale. Uñale ba ulitage cha me agedu ene baske, Chube gwa giti cha agedu ulita no Chube takalin kare.  
\v 6-7 Cha me tañachugu ai kare mo tale: “Cha takalin kwian una Tesalónicamu kaire kwian nga nage gerule no cha giti kwian cha gbe kweri mo chugagwalla kare, ene kaire ama igi ketadale chage cha geru dbe amage ñanale.” Cha me tañachugu ene dale. Cristo cha gau cha kagu ama gerua dbe ba ulitage ñanale cha ñage igi kade bage, agwa cha alin ene me no geru dbe bage gire igi kade bage geru ñanale. Noare ba ulitaske cha mo ta gbu no ba ulita ole, cha ba manadu Chube geruage salengwli chebia kle kirogwa manade no kare.  
\v 8 Cha noare ba ulita ole, malen cha geru Jesucristo giti du bage, me e alin, kaire cha kledu biale mo ta gbaba jogeda ba ulita giti geru dbe bage giti, cha no no ba ulita ole.  
\v 9 Cha daballa cha ibotea Chubenu, ba tachke cha giti cha kledu baske cha lle bo nga ju nga jere, cha lle bo Chube alin ama gerua trage ba ole, kaire cha lle bo mo alin ene cha ñadu igi gai bligda gigagda, cha me tadukalin igi kade ngwale bage.  
\v 10 Ba ulita Chubenu gwa giti kaire Chube gwa giti cha chagedu baske trate Chube takalin kare, cha agedu ulita no, cha me agedu me no ni sidri lle gweale giti ene kwian na me ñage gerule cha giti cha agedu me no.  
\v 11-12 Kaire uñale ba ulitage cha agedu no ba ulita alin, cha ba ulita chudabo gdaite gdaite, cha ba ulita ta gbu suga no geru ulia giti. Salengwli ñenua mo kirolla chudaboi age no mo kirolla alin kare, ene cha agedu ba ulita alin, cha ba ta gbu chage ngerugu Chube geruage, cha ba ta gbu suga no, cha ba ta gbu chage trate kwian Chubenu chagedale kare. Chube ba ulita gau mau alin, ene chui bdagli ama be gerule nga ulita giti kwian ulita Chugagwallale gire ba ulita be joge toi ule ama ole nga no noge. 
\p  
\v 13 Diali cha gerule Chube ole ba ulita giti ta suga noare ole, ba ulita cha keruchugu Chube gerua Jesucristo giti trage, ba Chube gerua keruchugu gire ba Chube gerua gau ulia, sugedu bage ulia e Chube gerua me kwian gerua, ulia ba Chube gerua Jesucristo giti gau, geru e ba ta blitu, nege ba kle mo ta gbe toi Chube gerua gerule kare.  
\v 14 Cha daballa cha ibotea Chubenu, ba ulita boidu daga ngwale ba bitalla kote geru Jesucristo giti gdale, boidu ene kaire kwian Chubenu kle Jesucristo geruadi kle toi una kaire kairege nga kweri Judeage jo jritaba nate bitalla israelitage geru ulia gai gdale.  
\v 15 Kwian israelita e amaña bitalla che Chugagwalla Jesucristo guda. Ene kaire ngeru ama enusulian kwian ngle Chube gerua ketanga guda. Ene kaire nege kwian israelita me takalin cha chege Jesucristo gerua trage kwian ulita ole, cha kle joge chke nga kaire kairege, kwian israelita kle cha kage siere, ama me takalin geru uliage, kaire kle kwian ulita ta gbe siere geru uliage, ama me takalin kwian ulita geru e gai ulia, Chube gwage kwian ene kle age me no.  
\v 16 Cha kle chage kwianske cha ta Jesucristo gerua tragakalin kwian me israelita ole, ene be chke uñale kwian me israelitage Jesucristo giti ama ña tien gitiru ji chugege age me no gdale, agwa kwian israelita me cha chuge ngwadi geru Jesucristo giti trage kwian me israelita ole. Kwian israelita agedu tanre me no kle age me no diali, kwian ene ulita agali chege jiske ama kle age giti, Chube skwatige gwage amadi age me no tanre, age ene gdale Chube kle ji tirare gbe kwian ene ulita alin. 
\s1 Pablo ta jogekalinni daba Chubenu 
\s1 chada jwen una Tesalónicage 
\p  
\v 17 Cha daballa cha ibotea Jesucristo giti, cha kledu ba ole gire cha jo siere ba ulitage, ba chegu sugekare chage, me chui sbali agwa diali ba ulita giti cha kle tachke mo tale. Cha no ba ulita ole malen cha tañachuge tanre ba ulita giti cha ta jogekalinni tienda badi blike.  
\v 18 Cha Pablo agali chui gbu tanre joge tienda badi agwa cha me ñadu, che dolla Satanás me takalin cha joge baskeni, cha mo ta gbe joge gire Satanás age me no cha ole cha joge chuiage.  
\v 19 Che kle tañachuge che Chugagwalla Jesucristo chieni chuia giti, chui ege che be kle ule ama ole, chui ege cha be gwage badi ule Jesucristo ole, nga be suga no chadi ba ulita giti, cha ta be chege no no ba ulita giti, chui ege be suge chage cha me chagedu Jesucristo gerua dbe bage ngwale.  
\v 20 Jesucristo geruadi cha ta chege no no badi, noare ba geru gau ulia, ba ulita giti nga suga noare chadi. 
\c 3  
\p  
\v 1 Cha me ñadu chege tañachuge dare ba giti, ulita me uñale chage ba ulita Chubenu kle toi mine, bdagli cha tañachugu ma no cha chege gballa una Atenage Timoteo kage tienda ba ulitadi.  
\v 2 Gire cha Timoteo alin kagu gballa tienda ba ulitadi, Timoteo daba Chubenu lle boanga Chube alin ule cha ole, ama geru Cristo giti traganga kaire. Cha Timoteo kagu ba alin ama ba kira gbe Chube geruage ene ba me geru chuge ngwadi, ama ba ta gbe Chube geruage diali ene nga be suga noare badi geru giti.  
\v 3 Timoteo age ene ba alin ba chudaboi ta gbe Jesucristo geruadi ene ba mi joge siere geru Jesucristo gitidi, ba boi daga ngwale tanre ba me tallade, uñale ba agalige ulita che boidale daga ngwale geru Jesucristo giti gdale.  
\v 4 Cha kledu ba ole gire cha gerudu chui be chke che boi daga ngwale, uñale ba ulitage e boidu ulia cha gerudu kare.  
\v 5 Ba boi daga ngwaleske giti cha tañachuge tanre ba ulita giti, cha me ñadu manade dare, cha takalin ba chada chke uñale chage blike, me uñale chage ba kle mo ta gbe Chube geruadi o ba me kle mo ta gbe Chube geruadi. Cha kwachiu ba ulita giti che dolla Satanás ngeru, che dolla mo chuge ba ole ba ta blite naskuni age nge kare me no, ene ngwale cha jo geru dbe bage, ngwale cha jo gerule ba ole Jesucristo giti. Cha kledu tañachuge ene ulita, malen cha Timoteo kagu tienda ba ulitadi ene chke uñale chage ba kle mo ta gbe chage mine Chube geruadi. 
\p  
\v 6 Timoteo chiuni ba ngwadige Timoteo chkuni cha ngwadige, Timoteo geru tragu no ba ulita giti cha ole, ama gerudu ba ulita nu Chube gaba kle mo ta gbe diali Chube geruadi kaire ba ulita kle mo ta dbe no daba ole Chube ole. Kaire Timoteo gerudu cha ole ba kle tachke ta no ole cha giti, ba ta gwagekalinni chadi kaire cha kle tañachuge ba giti ba kle tañachuge cha giti kare.  
\v 7 Cha gerule ba ole daba Chubenu, cha kle chage geru Jesucristo giti dbe ngerugu kwiange, e giti cha kle boi tanre daga ngwale, cha ta olire e giti agwa nege ba ulita giti chadi cha ta suga noare, geru chku uñale chage ba ulita kle chage ngerugu no mo ta gbaba chage dare Jesucristo geruage ba geru gau ulia kare.  
\v 8 Nege uñale chage ba ulita kle mo ta gbe no trate chage che Chugagwalla Jesucristo ole diali, nga suga noare chadi ba ulita giti, kaire ba giti cha kira gai chage ngerugu geru dbe.  
\v 9 Chube gwa giti chadi nga suga no no ba ulita giti, cha gerule no no Chube ole ama agedu noare ba ulita alin ama ba ta gbu chage ene no, e giti cha gerukalin no ngle Chube ole ama agedu giti.  
\v 10 Chui gdale cha gerule Chube ole joge giti ba ngwadi, cha ta gwagekalinni badi, cha ta jogekalinni ba chudaboi Chube geruadi ba ta gbe geru uliage bai me chku uñale trate bage, e giti cha ta ba ta gbakalin ene chke uñale bage trate geru giti.  
\v 11 Cha kle gerule Chube che Ñenua ole kaire che Chugagwalla Jesu ole ama cha chudaboi, ene cha ñage joge tienda badi chui gwealege.  
\v 12 Kaire cha takalin che Chugagwalla ta ma no kete bage toi no daba ulita ole, daba Chubenu gdaite gdaite ole ta dbe no diali kaire kwian na ulita ole ba ta dbale no cha ta dbe no ba ulita ole kare.  
\v 13 Noare che Chugagwalla ba ta gbe chage no trate ngerugu che Ñenua Chube gwa giti, ene che Chugagwalla Jesu chieni ule kwian ulita amanu jogebada oña ole kaire lle boanga ama alin nga ngaña giti ole chuiage ba mi skate jiske Chubege. 
\c 4  
\s1 Chube takalin che toi trate Chube gwa giti 
\p  
\v 1 Cha daballa cha ibotea ulita Jesucristo giti, cha gerule ba ole, cha geru gbe ba ulita alin che Chugagwalla Jesu kalla giti: Ba ulita kle age kare Chube takalin kare cha ba tku tangle kare, Chube alin e no, ba agedale diali ene ngerugu ma no.  
\v 2 Uñale ba ulitage cha ba tku tangle che Chugagwalla Jesu geruage Jesu kiralla giti, uñale bage cha gerudu mine ba ulita ole.  
\v 3 Chube takalin ba ulita toidale trate no ama alin, ba ulita me agedale me no, me no onbre mo chuge ke giti muinga ole kaire me no muinga mo chuge ke giti onbre ole.  
\v 4 Ma no sugedale ba ulitage kwian onbre Chubenu ulita toidale trate mo muiralla ole, ba toidale no trate Chube gwa giti mo muiralla ole, ene daba na ulita be gwage badi ba kle toi no mo muiralla ole mo muiralla gai dage.  
\v 5 Me no tañachuge muinga na nate mau alin kwian me Chube uñe kle age kare.  
\v 6 Ba me agedale me no daba ole muinga giti chage daba muingalla ole daba ngeru. Che Chugagwalla Chube ji gbe mno mno age ene gdale kwian alin, uñale bage cha gerudu ngeru ulita e giti ba ole ba ta gbagda.  
\v 7 Chube me che gau mo ta dbe toi age me no diali, me ene, ama takalin che toi age no trate ama alin.  
\v 8 Kwian bai me geru ai ulita gbe gdadi me daba ta gbe chke me daba tke tangle geru ai ulita giti, kwian ene me kle age mo salengwli dollale, kle age Chube dollale, e Chube gerua me kwian gerua. Geru ai ulita giti chkedale uñale ba ulitage Chube mo Oña ketu ba gdaite gdaitege mo ta gbadale age no Chube Oña takalin kare. 
\p  
\v 9 Ta dbe no modi daba Chubenu ulita ole, e giti cha me chada degadale, Chube kle ba ta gbe kle ba tke tangle ta dbe no modi daba ulita ole.  
\v 10 Ulia ba ulita kle ta dbe no daba Chubenu ulita ole kle toi una kaire kaire nga Macedoniage, noare ba kle mo ta dbe ene modi. Cha gerule ba ole cha daballa cha ibotea Jesucristo giti, ba ta dbadale modi no diali ma ngle daba ole ngerugu.  
\v 11-12 Ba ulita mo gbadale toi ta taingwli modi daba ole, ba mo ta gbale chege lle boi diali mo alin mo kodi toigda cha gerudu kare ba ole, ba me daba na gbadale gdadi daba kle age mine o kle llema boi, ba me chegedale tañachuge ngwale daba kle age giti alin, agwa ma no ba chege mo ta gbe lle boi mau alin mo kodi, ene ba igi molen ba lle molen toigda, ene kwian na me Chubenu gwage badi ama ba gai dage gerule no ba giti. 
\s1 Che Chugagwalla Jesucristo be chieni 
\p  
\v 13 Cha daballa cha ibotea Jesucristo giti, cha takalin ba ulitage chkedale uñale trate trate daba Chubenu jogeda giti, ba ulita me chegedale ta dbe olire daba Chubenu jogeda nate kwian na me Jesucristo uñe kare, kwian me Jesucristo uñe, kwian enege suge ama bitalla jogeda ama tañachuge ama jogenga ulita.  
\v 14 Agwa che Chubenu che me tañachugadale ene kwian me Jesucristo uñe kare, che Jesu jokeda giti gai ulia, ulia Jesu jokeda gire chkuni gwade, ene kaire be boi kwian nu Jesu gaba ulia jogebada ole. Jesu giti Chube be kwian ene gbeni gwade Chube agedu Jesu ole kare.  
\v 15 Cha geru ai kete ba ulitage che Chugagwalla geru ketu chage kare: Kwian Chubenu ulita kle gwade che Chugagwalla chieni chuiage be chke, chui ege kwian Chubenu kle gwade mi joge ngeru daba Chubenu jogebadage.  
\v 16 Chui ege che Chugagwalla Jesucristo agali be chieni nga ngaña giti gerule kweri mo kirallaske, kaire lle boanga Chube alin chugagwalla nga ngaña giti be gerule kweri, lle ngwanegda Chube alin kada trompeta be gdade kweri. Ulita be kle boi ene gire kwian Jesucristo gaba ulia jogebada be chkeni gwade be joge ngeru kwian gwadege Jesucristo kle manade ngwadi.  
\v 17 Be boi ene ngeru kwian Jesucristo gaba jogebada jaba ole, gire kwian Chubenu Jesucristo gaba kle gwade be joge jaba chkuni gwade nate Jesucristo kle ngwadi bogakwaske, che ulita be kle ule Jesucristo ole nga ngaña giti Jesucristo ngwadi, ene che ulita be joge toi diali chui tangle che Chugagwalla Jesucristo ole.  
\v 18 Ba Chubenu gerudale diali geru ai ulita giti daba na Chubenu Jesucristo gaba ole, ba ulita Chubenu mo ta gbadale chke chage gwangeru daba ole Jesu be chieni chuiage giti. 
\c 5  
\p  
\v 1 ¿Ngaminegire Jesucristo chieni chuia be chke? ¿Be boi mine ulita ngeru? Cha daballa cha ibotea Chubenu, cha me chada degadale ba alin e giti.  
\v 2 Uñale ba ulitage che Chugagwalla Jesucristo be chieni chuia be chke salengwli kwian skwe boanga kle chke kare, kwian skwe boanga chke ngajrege chuia me uñale chege chui baige hora baige, skwe boanga be chke che skate alenske gire skwe boanga chke. Ene Jesucristo be chieni, kwian ulita be kle alenske ni be uñale kwiange Jesucristo be chieni chuia be chke.  
\v 3 Chui ege kwian tanre be kle gerule: “Che ulita kle toi no, ulita kle ngwedi, me kle boi tirare cheske.” Kwian be kle gerule ene gire sugeti blike Jesucristo be chieni, kwian me kle Jesucristo chieni chuia manade be chege sugekare Chubege ngwale dale, mi ñage tien gitiru, be boi tirare salengwli muinga kle skibachie kirogwa kle menga chebia kote kare.  
\v 4 Kwian be skate alenske che Chugagwalla chieni chuiage, kwian e be kle nga jereske kare, me uñale kwian ene ulitage be boi tirare giti me chke uñale. Cha daballa cha ibotea Chubenu, ba me kledale ta ene ole, ba me kle nga jereske kare, bage uñale che Chugagwalla be chieni, ba me skatedale alenske che Chugagwallage kwian kle ngajrege kare amage me uñale kwian skwe boanga be chke.  
\v 5 Ba ulita bebi Jesucristo gai ulia ba chagedu nga jereske kare me Chube uñe, Chube ba ta gbu suge Jesucristo giti salengwli jichra kle kwian gbe ten kare, gire ba Jesucristo gau ulia, ba chegu Chubenu. Che Chubenu me kle nga jereske kwian me Chube uñe kare, Jesucristo chieni chuiage ngwange che kledale biale ta giti, chui ege kwian me Chube uñe be chege sugekare Chubege agwa che ulita Chubenu be joge toi ule ama ole.  
\v 6 Che Chubenu mi boi kwian me Chube uñe kare, malen che Chubenu me mo ta chugale ngwadi chage alenske, ma no che mo ta gbadale chage ta giti no chage no trate Chube takalin kare, ene che be kle biale Jesucristo chieni ngwange.  
\v 7-8 Ngajrege kwian ulita kle gbe, me uñale kwiange kle boi mine ama jaba giti. Kaire ngajrege kwian kle lle jai kle joge llale, amage me uñale kle boi mine ulita. Ene kaire be boi Jesucristo chieni chuiage, kwian ulita me Chube uñe be skate alenske kwian kle gbe kare kaire kwian kle llale kare. Che Chubenu me chegedale ene, che ulita kledale Jesucristo manade ngwange, malen che ulita mo ta gbadale chage no trate Chube takalin kare, che mo ta gbadale Chube gai ulia diali, che mo ta dbadale no kwian ole Chube ole, che mo ta gbadale Jesucristo chieni chuia manade ngwange, chui ege Jesucristo giti alin che be tien gitiru be boi tirarege. Che ulita kledale biale mo ta gbaba Jesucristo ole tiendale gitiru ji chugege age me no gdale.  
\v 9 Chube me che gau gbale ji chuge, me ene, Chube che gau Jesucristo uñe ene che Chugagwalla Jesucristo giti che tien gitiru Chube be ji gbege.  
\v 10 Jesucristo jokeda che ulita alin ama chkuni gwade che ulita alin, ama be chieni chuiage, chui ege che ulita amanu bai kle gwade be joge toi ule ama ole, kaire che ulita bai jogebada jegwalege ama be che gbeni gwade che be joge toi ule ama ole.  
\v 11 Malen ba ulita daba ta kliadaleda daba ba ta kliadaleda, ba daba kira gbeda daba ba kira gbeda tañachuge ngerugu Jesucristo chieni chuia manade ngwange ba ulita kle age kare. 
\s1 Kwian Chubenu mo ta gbadale toi no moske 
\s1 Jesucristo geruadi 
\p  
\v 12 Cha daballa cha ibotea Jesucristo giti, cha gerule ba ulita ole, noare ba tañachuge no daba giti daba bai kle lle boi modi Chube alin baske, daba ba chugagwale kle che Chugagwalla Jesucristo gerua dbe ba ulitaske kle ba tke tangle che Chugagwalla Jesucristo geruage ene ba Jesucristo uñadale ma no ba chagedale ma no trate.  
\v 13 Daba ene kle lle boi no Chube alin baske ba ta dbadale no ama ole diali, ba ama gadale dage no. Kaire ba Chubenu ulita toidale ta no giti daba Chubenu na ulita ole diali. 
\p  
\v 14 Cha daballa cha ibotea Chubenu, cha gerule ba ulita ole, ba ulita lle boale no modi ule diali Chube alin, daba gweale Chubenu baske me ta lle boakalin ule Chube alin ba gerudale no ama ole ene ama lle boadale. Daba gweale me ta chagekalin dare Chube geruadi ba ama ta gbe chage dare gerudi. Daba gweale kle gerudi me kle chage trate ba ama chudaboi ta dbe chage trate gerudi. Daba ene ole ulita ba me skochiedale ba me skwatigedale ama chudaboi. 
\p  
\v 15 Kwian gdaite age me no daba ole gire mo jiale age me no kaire daba ole, ba me agedale ene, ma no ba mo ta gbadale age no diali daba ulita ole bai Chubenu bai me Chubenu ole. 
\p  
\v 16 Ba ulita kledale diali nga suga no ole. 
\p  
\v 17 Ba ulita gerudale Chube ole diali. 
\p  
\v 18 Ba kle toi no ba me kle toi no, diali ba ulita gerudale no Chube ole: “Chube, noare ba kle cha ole, noare ba kle cha chudaboi ulita.” Ba ulita Chube uñe Jesucristo giti Chube takalin ba age ene ulita diali. 
\p  
\v 19 Ba ulita Chube Oña chugadale ngwadi age no Chube Oña takalin kare age ba tale, ba ama chuge ngwadi mo ta gbe. 
\p  
\v 20 Kwian bai Chube gerua ketanga bage Chube Oña kiralla giti ba ama keruchugadale no Chube gerua giti, me no ba me ama keruchuge.  
\v 21 Ma no ba ama gerua gbe gdadi ulita kle gerule ulita Chube giti ulia o me, ene be chke uñale bage bai no ulia ba alin. Ama kle gerule Chube giti trate no ba e gai ba geru e gbe mo tale,  
\v 22 agwa geru gweale me ulia ba chugadale ngwadi, ma no ba joge siere geru ulita me noge kaire lle na ulita me noge. 
\s1 Pablo gbi jige bdagli chada ai giti kwian Chubenu 
\s1 una Tesalónicamu alin 
\p  
\v 23 Cha takalin Chube ta suga no mauña agali ba ta gbe suga no, kaire ama ba manade no trate ulita mau alin ba oña manade ba ta manade ba jegwale ulita manade no, ama ba ta gbe no, ene ba me mo chuge ngwadi age sidri me no. Chube ba ulita manade no ene, ene che Chugagwalla Jesucristo chieni chuiallage ba kledale biale no trate ama alin jogedale toi ama ole.  
\v 24 Chube ba ulita gau mau alin, ama be ba manade no trate Jesucristo chieni chuiallage, Chube me ta jogenga ba ulitage manade no, diali Chube mo ta gbe age ulita ba alin Chube gerule kare. 
\p  
\v 25 Cha daballa cha ibotea Chubenu ulita, cha takalin ba gerule Chube ole cha giti. 
\p  
\v 26 Cha takalin ba geru kete cha alin daba Chubenu ulitage cha gbi kage ama ulita alin ta no ole. 
\p  
\v 27 Cha Pablo chada ai kage daba Chubenu ulita alin, che Chugagwalla Jesucristo kiralla giti cha gerule ba daba Chubenu chugagwalla ulita una Tesalónicage ole ba chada ai batadalenga daba Chubenu ulita alin. 
\p  
\v 28 Cha takalin che Chugagwalla Jesucristo age no ba ulita alin. 
\p Geru ai ene ulita cha Pablo chada degangu ba kwian Chubenu ulita una Tesalónicage alin. Che kle meni.