\id 1PE - Buglere NT -Panama 2008 (DBL -2013) 
\h 1 PEDRO 
\toc1 Pedro Nu Chada Degaba Gwangea 
\toc2 1 Pedro 
\toc3 1P 
\mt1 Pedro Nu Chada Degaba Gwangea 
\mt2 Primera Carta de Pedro 
\ip Pedro chada ai degangu ama chagedu ule Jesucristo ole geru jwen Jesucristoge Jesucristo toidu nga dba ai giti gire. Pedro chada ai degangu kwian Jesucristo gerua ganga ulia alin bai kaire toidu nga tanrege chagengale daba na jwiage. Pedro chada ai degangu suiale Pedro kledu toi una Romage, agwa Pedro una e ka gbu Babilonia chada ai giti (1 Pedro 5:13), kwian una Romamu me Chubenu kledu age tanre me no Chube dollale salengwli kwian una Babiloniamu kare, malen Pedro una Roma ka gbu Babilonia. 
\ip E suiale kwian Chubenu ulita kledu boi tanre daga ngwale Jesucristo gerua gai ulia gdale nga kaire kaire ama toidu ngwadige malen Pedro chada ai kagu ama ulita alin nga kaire kairege ama ulita kira gbagda Jesucristo giti. Chada ai giti Pedro kwian Chubenu ta gbu ama ulita toidale nga suga no ole ama kle boi daga ngwaleske, kwian mo ta gbadale age no trate ama kle boi daga ngwaleske salengwli Jesucristo agedu no kare ama boidu daga ngwaleske nga dba ai giti gire. 
\c 1  
\s1 Pedro gbi kage chada giti kwian Chubenu alin 
\p  
\v 1 Cha Pedro chada ai degange ba kwian ulita Chubenu alin nu jogeba kige bate kle toi nga nage me mo jwiage: 
\p Cha Jesucristo gerua ketanga cha gbi kage chada ai giti ba ulita alin bai kle toi nga Pontoge nga Galaciage nga Capadociage nga Asiage nga Bitiniage, ba ulita alin cha gbi kage.  
\v 2 Ba Chubenu ulita kle toi nga e kaire kairege cha gerule ba ole, Chube che Ñenua ba ulita gau gwangea unsuialin mo alin agedale ama takalin kare. Chube mo Oña giti ba ulita ta blitu ta gbu no ama ole ene suge ba ulitage Jesucristo jokeda giti ba chege no trate Chube gwage, ene kaire suge ba ulitage ba Chube gadale dage agedale Chube takalin kare. 
\p Cha takalin Chube age no no ba ulita alin diali Chube ba ta gbe nga suga no ole. 
\s1 Pedro kwian Chubenu ta gbe chke Chube agedu no Jesucristo giti ama ulita alin 
\p  
\v 3 Che ulita gerudale no no Chube giti, Chube che Chugagwalla Jesucristo Ñenua, ngeru che chagedu age me no diali che kledu chage ta me no ole, che ene gire Chube taidu dage tanre chege, Chube Jesucristo kagu nga dba ai giti che alin, Jesucristo jokeda che agedu me no giti gire ama jaba chkuni gwade, e giti Chube che ta blitu ene che ta me nge kare, Chube che ta gbu no trate age no ama takalin kare. Nege Jesucristo giti che kle chui manade gire che be joge toi ule Jesucristo ole nga ngaña giti Chube kle ngwadi.  
\v 4 Chube me jogeda Chube me boi, ama kle nga ngaña giti kle chui manade gire ba ulita amanu be kle nga ngaña giti ama kle ngwadi, chui e be chke gire ba be toi diali chui tangle no Jesucristo ole. Chube kle ngwadi ni lle gdaite me no sugaska kle, ni age me no gdaite kle, ulita no trate nga ngaña giti Chube kle ngwadi, ba joge toi nga ege ba be toi no diali Jesucristo ole chui tangle.  
\v 5 Ba ulita kle mo ta gbe Chube gai ulia mo tale diali, ba ta ene molen Chube ole ene Chube ba ulita manade no no mo kiralla giti Jesucristo chieni chuia alin, ene chui bdaglige Jesucristo be chieni ba jwen ba dbe toi ule ama ole nga ngaña giti, chui ege ba be tien gitiru lle ulita me no nga dba ai gitige.  
\v 6 Uñale trate ba ulitage be boi ene chui bdaglige malen nga suga no no ba ulitadi chui e manade, nege nga dba ai giti ba kle boi tanre daga ngwale, agwa uñale bage boi daga ngwale nga dba ai giti joge tangle me chege diali. Ba kle chui manade joge toi Jesucristo ole nga ngaña giti, e me joge tangle, e be chege diali.  
\v 7 Mo ta gbe Chube ole ulia salengwli oro kare, kwian oro guge jitage ene oro skwen ulia o me, oro ulia mi kuge ulita agwa me oro ulia be kuge ulita, oro ulia jage jitage. Ene kaire ba kwian Chubenu ulia jage boi daga ngwale ulitage ba mo ta gbe Chube gai ulia diali me mo ta gbe joge siere Chubege boi daga ngwale kote. Ba talla ene ma ñanaske ma no oroge, ba talla chege diali chui tangle, agwa oro me ene, oro ñage boi me chege chui tangle diali. Ba ulita mo ta gbe ma no diali ulia jage boi daga ngwale ulitage ba talla ñanaske tanre Jesucristo gwage, ene Jesucristo chieni chuiage ba kle biale joge toi ama ole, chui ege Jesucristo be gerule no no ba giti, ama be gerule ba ole: “Ba kwian no no, ba agedu no, ba mo ta gbu cha gai ulia cha Ñenua gai ulia diali, nga suga no no chadi ba giti.” Jesucristo be gerule ene ba ole chui bdaglige.  
\v 8 Ba me gwagedu Jesucristodi mo gwagwa giti ni ñage gwage amadi nege, agwa ba ulita ta kle ama ole ba kle mo ta dbe no ama ole, geru ama giti chku uñale bage, e giti ba kle mo ta gbe ama gai ulia. Nga suga no no badi Jesucristo giti, nga suga no kweri badi ni uñale bage ba gerule mine nga suga no tanre ole.  
\v 9 Uñale ba ulitage Chube be ba gai ngwange no nga ngaña giti ba mo ta gbu Jesucristo gai ulia giti nga dba ai giti. 
\p  
\v 10-11 Unsuialin Chube Oña kwian Chube gerua ketanga ta gbu gerule kwian ole Chube be age no kwian alin Chube be kwian jwannga siere Cristo kage kwian alin, kaire Chube Oña kwian Chube gerua ketanga ta gbu Cristo be boi giti, Chube kwian e ta gbu ai kare: Ngeru Cristo be boi tanre daga ngwale nga dba ai giti kwian me no kote gire Chube be ama dbeni naskuni nga ngaña giti, bdagli Chube be ama gbe no kweri kwian ulita gwa giti. Chube Oña kwian Chube gerua ketanga ta gbu geru ene Cristo giti kete kwiange, kwian Chube gerua ketanga geru e ketu kwiange, agwa geru e me sugedu trate ulita ama agalige. Malen ama geru kadu tanre mo tale e giti, ama geru kadu chema tra no giti Chube Oña kledu ama ta gbe gerule, kaire geru kadu ngaminegire Chube Oña kledu gerule giti be meñe.  
\v 12 Kwian Chube gerua ketanga kledu gerule Chube be age giti kwian alin, Chube kwian Chube gerua ketanga ene ta gbu suge trate Chube kle ama ta gbe gerule ulita Chube be age e me ama alin chui ege dale, agwa Chube ama ta gbu chui ege, chui nege tangle dale ba ulita alin. Chube Oña kwian ta gbu unsuialin, Chube Oña e amaña mo kira giti kle kwian nege gbe geru Cristo giti trage kwian ole, Chube Oña e chiu nga ngaña giti chku nga dba ai giti kwian ta gbe geru Cristo giti tragangale, ba geru e keruchugu Cristo giti, suge trate ba ulitage Chube agedu no ba alin Cristo giti. Lle boanga Chube alin nga ngaña giti ulita tañachuge tanre Chube agedu no giti kwian alin, takalin chke uñale agwa me suge amage. 
\s1 Kwian Chubenu mo ta gbadale trate diali 
\s1 Jesucristo chieni chuia manade ngwange 
\p  
\v 13 Chube agedu no tanre ba ulita alin Jesucristo giti malen ba mo ta gbadale biale tañachuge no ulita Chube takalin kare, ba me mo chugadale ngwadi tañachuge age me no, ba mo ta gbadale tañachuge diali Jesucristo chieni ba jwenni giti, ba kledale chui e manade diali nga suga no ole, chui ege Jesucristo be ba dbe nga ngaña giti Chube kle ngwadi, nga ngaña giti Chube be age no no ulita ba alin.  
\v 14 Kirogwa no mo ñenua gai dage mo ñenua kerua gbe gdadi kare, ene kaire ba Chubege, ba Chube gadale dage mo ta gbe age ama takalin kare diali. Toi aige gwangerugudba ba me tañachugadale age me no dare ba agedu ngeru kare, ngeru ba bebi Chube uñe gire ba kledu age me no ulita ba tadukalin kare. Agwa nege ba Chube uñe,  
\v 15 ba me chagedale dare ba chagedu ngeru kare, ba mo ta gbadale toi no trate Chube gwa giti, Chube no trate ba gau mo alin ene ba kaire mo ta gbadale chage no trate Chube ole.  
\v 16 Chube gerua degaba unsuialin gerule e giti, chada e gerule: 
\q1 “Chube gerudu: ‘Ba ulita chanu mo ta gbadale toi trate ta trate ole cha kare, cha no trate cha me agenga me no sidri, ene kaire cha takalin ba ulita chanu toi.’ ” 
\p  
\v 17 Ba ulita Chube kade mo Ñenua, Chube e amaña gerunga kwian gdaite gdaite giti bai jiske bai me jiske. Chube me kwian gweale gbe ma no kwian nage, Chube gwage kwian ulita kle agedi kle age no o kle age me no, kwian ulita bai kle age me no Chube kwian e gbe jiske. Bage suge Chube ene, malen ma no ba ulita mo ta gbadale Chube gai dage age no ama takalin kare chui tangle nga dba ai giti.  
\v 18-19 Ba enusulian ulita unsuialin chagedu geru ngwale nate, ama me Chube uñu me uñadu amage Chube uñe mine, ama chegu jiske Chube gwage ama agedu me no giti. Chube ba ulita jun siere ba enusulian chagedu karege, nege ba Chube uñe Jesucristo giti, nege ba Chubenu. Ba ulitage uñale trate Chube me ba jun siere ji chugege age me no gdale oro giti ni igi giti, oro kaire igi me jage diali, Chube gwage oro kaire igi ngwale. Agwa Chube gwage Cristo no trate ulita ñanaske tanre, Cristo jage diali, Cristo alin giti Chube ba jun siere ji chugege ba age me no gdale. Cristo jokeda bitaitre alin ba age me no ulita giti bda cordero no no gwakle diali kare kwian israelita suiale kwian kle age me no kaire kaire giti.  
\v 20 Ngeru Chube bebi nga ulita dodade Chube Cristo gbu biale agedale kwian alin, e kledu biale ene unsuialin chui nege dale alin. Cristo chku ama agedu no ba ulita alin,  
\v 21 ama jokeda ba ulita alin gire Chube ama gbuni gwade ama duni nga ngaña giti toini ule diali, ama giti ba ulita Chube uñe ba ulita Chube gai ulia, nege Cristo giti ba ulita kle mo ta gbe Chube ole diali, bage suge Cristo giti ba kle chui manade gire ba be joge toi diali chui tangle Chube ole. 
\p  
\v 22 Nege ba ulita geru Cristo giti gai dage, ba kle Chube gerua gbe gdadi, geru e ulia giti ba kle mo ta gbe joge siere age me noge mo ta gbe age no geru e gerule kare, ene geru e giti ba no no daba na Chubenu ole. Geru ulia giti ba ulita mo ta gbadale diali gwangerugu mo ta dbe ma no trate daba na ole.  
\v 23 Chube gerua ba ta blitu, nege ba kwian Chubenu, e salengwli ba medunga nabitaite kare Chube gerua giti, e me salengwli ba medunga chebia kote ngeru kare ñenua nga dba ai giti ole kare, ba medunga ngeru e me jage, e boi. Agwa Chube ba ta blitu jagere mo gerua giti e ba medunga nabitaite kare, Chube gerua ba ta blitu giti ba be toi diali chui tangle Chube ole, Chube gerua me boi, Chube toi diali chui tangle, Chube me boi.  
\v 24 Chube gerua degaba unsuialin gerule kwian giti kaire Chube gerua giti, chada e gerule: 
\q1 “Kwian ulita salengwli ngauda kare, ngauda tige gire ngauda jogeda, kwian ene kaire. 
\q1 Kwian lle tanre no ulita molen nga dba ai giti, lle e ulita salengwli glijra kare, glijra no agwa sugeti alin, glijra me jage chui tangle, glijra ulita jain, ene kaire lle no tanre kwiannu me jage, ene kaire kwian me jage. 
\q1  
\v 25 Agwa Chube gerua me boi, Chube gerua jage diali chui tangle.” 
\m Chube gerua e geru Cristo kwian jwannga siere giti, geru e amaña Cristo giti jo tragaba ba ulita ole. 
\c 2  
\p  
\v 1 Chube gerua Cristo giti ba ta blitu, malen ba ulita mo ta gbadale joge siere age me no ulitage, ba ulita me agedale me no dare. Ba ulita me ñage sole dare. Ba ulita me gerudale alin ba kle age no gire age me no, ba ulita agedale no ba kle gerule kare. Ba ulita me ta dbadale tañachuge me no dabadi lle dabanu giti. Ba ulita me gerudale me no ngwale dabadi.  
\v 2-3 Ba ulita mo ta gbale kirogwa soli bebitra kle mo ta gbe jusuli jai kare diali ene ama tige no ama kira molen ama me oga. Ene kaire ba ulita nu Chube gerua Cristo giti gaba biale gwangea, ba mo ta gbadale geru Cristo giti batenga diali geru jwen geru e uliage diali kirogwa bebitra diali jusuli jakalin kare, ene geru ulia jwen giti ba kira gai ma no diali ba mo ta gbe chage no Chube takalin kare, ene ba kle biale joge toi chui tangle diali bdagli Chube ole sugekare age me no ulitage. Cha gerule ba ole, ba mo ta gbu geru ulia uñe ene suge trate bage ulia Chube no ba ole, ene ama gerua skwendale no bage ene ba takalin diali geru e jwen dare, ene geru e giti ba ñage age ma no diali Chube takalin kare geru e gerule kare. 
\s1 Kwian Jesucristo gai ulia giti kwian mo ta blite 
\s1 lle boi no Chube alin 
\p  
\v 4-5 Chube Jesucristo gbu age no kwian ulita alin, Chube gwage Jesucristo no trate ulita ñanaske tanre, agwa kwian ulita me mo ta dbe no Jesucristo ole me ama gai no mo alin, kwian ene gwage Jesucristo ngwale. Ba ulita Chubenu ba Jesucristo gau ulia giti ba mo ta gbadale Chugagwalla Jesucristo ole diali, Jesucristo giti ba ñage mo ta gbe joge siere age me no ulitage mo ta gbe Chube alinge lle boi no no ama alin diali ama takalin kare, ene ba ñage mo ta dbe no trate diali gerudale Chube ole daba na giti, ene ba ulita chege ke ulla dodaba kare kiraske. Kwian ke ulla dodanga ke gbaite ma no kweri ke nage gbe ngeru u dodangwa, gire u dodanga ke gbaite gbaite na gbe ule, ene u joge ulita dodaba no, ene kaire Chube ba kwian ulita amanu gdaite gdaite ta gbe ule kwaitre alin.  
\v 6 Jesucristo salengwli ke ma no ke ma kweri kare, Chube gerua degaba unsuialin gerule e giti, chada e gerule: 
\q1 “Cha ke kweri gbe una Jerusalénge, ke e ma no ke na ulitage, cha ke e gau, ke e no no kiraske tanre. 
\q1 Kwian ke e gbe gdadi kwian me lentige, kwian ene be chege no diali, nga be suga no kwian enedi, kwian ene mi ta chege olire.” 
\m  
\v 7 Ba ulita nu Jesucristo gaba ulia mo alin, ba alin Jesucristo no no, agwa kwian me Jesucristo gai ulia mo alin kwian ene alin Jesucristo ngwale. Kwian me Jesucristo gai ulia giti Chube gerua degaba unsuialin gerule, chada e gerule: 
\q1 “Kwian u dodanga ke gbu gerere, ke gbaite ama mliunga, ama gerudu ke e me no dale, agwa gire ke e ama mliunga, ke e ma no ke na ulitage.” 
\m  
\v 8 Kaire Chube gerua degaba unsuialin gerule ene: 
\q1 “Kwian me ke e gbe gdadi, kwian tanre be lentige ke ege.” 
\m Kwian me Jesucristo gai ulia, kwian ene me kle Chube gerua gbe gdadi me kle age Chube gerua gerule kare, malen kwian ene ole be boi tirare me geru gbe gdadi giti gdale, bdagli kwian ene be boi daga ngwale be chege sugekare Chubege ta olire Chube geru gbu kare unsuialin kwian me Jesucristo gai ulia giti.  
\v 9 Agwa ba ulita Jesucristo gau ulia, Chube ba gau mo alin, ba Chube olia, Chube ba gau lle boangale Chugagwalla Jesucristo alin, Chube ba gau toidale no trate mo gwa giti, Chube ba gau mo alin Jesucristo giti, ba Chubenu ulia. Ngeru ba me Jesucristo uñu ba chagedu nga jereske kare, ba chagedu age me no sugekare Chubege, ba kledu ene gire Chube ba ta gbu suge Jesucristo giti salengwli jichra kle kwian gbe ten nga jereske kare, Jesucristo giti Chube ba ta blitu joge siere age me noge. Chube agedu no no ene Jesucristo giti ba alin, ama agedu ulita no ba alin ba tragadale kwian na ole.  
\v 10 Ngeru ba ulita me Chubenu ni ba Chube uñu, agwa nege ba ulita Chubenu ba Jesucristo gau ulia. Ngeru ba chagedu sugekare Chubege me uñadu bage Chube tai dage bage Chube ta agekalin no ba alin, agwa nege chku uñale ba ulitage Jesucristo giti, Jesucristo giti suge bage Chube no no ba ole Chube tai dage ba ulitage, ngeru e ulita me uñadu bage malen ba ulita kledu nga jereske kare. 
\p  
\v 11 Cha daballa cha ibotea Jesucristo giti, cha no no ba ulita ole, cha takalin ba ulita me mo chuge ngwadi talla age me no nga dba ai gitige ba ta gbe age kare, diali talla age me no gbakalin siere age noge. Ba ulita kle toi nga dba ai giti sugeti alin, ba mi kle diali nga dba ai giti chui tangle malen ma no ba ulita tañachugadale Chube giti age no Chube takalin kare.  
\v 12 Ba ulita mo ta gbadale toi no trate Chube takalin kare kwian me Chube uñe gwa giti, ba ulita mo ta gbe toi no ene trate kwian me Chube uñe gwa giti kwian me Chube uñe gerule me no badi ba kwian agenga me no kare agwa ba ulita mo ta gbe toi no kwian eneske diali age no kwian ole, ene bdagli Chube be kwian ene gerudu me no badi ta blite, ene be suge kwiange ba kledu age ulita ngeru no Chube takalin kare gire kwian ene be gerule no Chube giti. 
\s1 Kwian Chubenu mo chugagwalla nga dba ai giti 
\s1 gadale dage 
\p  
\v 13 Ba ulita mo chugagwalla ulita nga dba ai giti gadale dage age ama gerule kare, Chugagwalla Chube takalin ba mo ta gbe age no ene chugagwalla nga dba ai giti ole. Chugagwalla ma kweri chugagwalla na ulitage nga dba ai giti, ba ulita ama gadale dage,  
\v 14 chugagwalla ulita ma soli chugagwalla ege, ba ama ulita gadale dage kaire. Chugagwalla kweri nga dba ai giti chugagwalla soli gbe kwian agenga me no gbe ji chuge age me no gdale, kaire chugagwalla kweri amaña chugagwalla soli gbe gerule no kwian bai kle age no giti, ba mo chugagwalla ene ulita gadale dage age ama gerule kare. 
\p  
\v 15 Chube takalin ba ulita Chubenu mo ta gbe toi age no diali kwian me Chube gerua uñeske, kwian e gweale ni ta Chube gerua uñakalin, ama tañachuge geru e ngwale, ama gerule geru e dollale. Ba toi age no kwian eneske Chube takalin kare, ene ba kle age no giti kwian e ulita mi ñage gerule dare me no Chube gerua dollale.  
\v 16 Ba ulita Chubenu tiun gitiru Jesucristo giti ji chugege age me no gdale, agwa e me gerule ba ñage mo chuge ngwadi age me no dare, ba me ñage tañachuge: “Cha ñage age me no, Jesucristo e jia junnga, mi boi cha ole cha age giti.” Me ene, ba tiun gitiru Jesucristo giti mo ta gbadale age no Chube alin Chube takalin kare, ba agedale no diali kwianske Jesucristo takalin kare.  
\v 17 Ba ulita mo ta dbadale no daba Chubenu na ulita ole. Ba ulita mo ta gbadale Chube gai dage no no. Ba ulita mo ta gbadale mo chugagwalla ma kweri chugagwalla na ulitage nga dba ai giti gai dage no. Ba kwian ulita gadale dage no. 
\s1 Kwian Chubenu lle boanga mo chugagwalla alin 
\s1 mo chugagwalla gadale dage 
\p  
\v 18 Lle boanga mo chugagwalla alin, ba mo ta gbadale no mo chugagwalla ole mo chugagwalla ba gbe age kare, ba mo chugagwalla gadale dage diali, ba lle boadale no ama alin. Mo chugagwalla age no ba ole ba gbe age no, me e alin giti bage suge mo chugagwalla no kle age no ba ole malen ba lle boadale no ulita mo chugagwalla alin, me ene, mo chugagwalla age me no ba ole ba gbe lle boi mno age dagale ba ole, ba mo ta gbadale no diali mo chugagwalla ole.  
\v 19 Kwian gweale me no ba kwian Chubenu ole kwian ene ba gbe boi daga ngwale ba kle age no Chube takalin kare giti, boi daga ngwale eneske ba tachke Chube giti Chube kle ba ole Chube gwage ulita uñale kle boi ba ole, ba tachke ene Chube giti, kaire ba mo ta gbe jage ulita ta no ole, ba age ene Chube be age no no ba alin Chube be ba chudaboi.  
\v 20 Agwa kwian gweale ba gbe ji chuge ba agedu gweale me no giti gire ba mo ta gbe jage ji chuge ba agedu me no giti, Chube me age no sidri ba alin ba mo ta gbe jage ene giti, ba agali jiske ba agedu me no ene giti, ba ji chugadale e gdale. Ba mo ta gbe jage ji chuge ba agedu me no giti e me ñanaske Chube gwage, agwa ba boi daga ngwale ba kle age no giti ba mo ta gbe jage ta no ole ulita kle boi giti, e ñanaske Chube gwage.  
\v 21 Ba boidale daga ngwale age no giti Cristo agedu kare, Cristo chagedu nga dba ai giti ama boidu tanre daga ngwale age no giti ba ulita alin, e chegu egdage ba ulita alin ba ulita mo ta gbadale ene Cristo agedu kare, ama no kwian ole ama mo ta gbu age no diali kwian ole boi daga ngwaleske nga dba ai giti, ama agedu ene ba ulita alin, ene chkedale uñale bage ba ulita mo ta gbadale Cristo mo ta gbu kare.  
\v 22 Cristo me agedu me no sidri, ni ama gerudu me no sidri kwian ole, ni ama sodu sidri kwian ole.  
\v 23 Kwian ka bo mno me no Cristo ole, Cristo me kwian ka junnga ka boi mno kwian ole. Cristo kledu ji chuge boi tanre daga ngwale kwian me no kote, Cristo me kwian oña bo dagale kwian kledu age giti ama ole, agwa Cristo mo jigu Chube kote kaire kwian kle age me no ama ole jigu Chube kote, uñadu amage Chube alin be ji gbe trate kwian kle age me no alin, ene chkedale uñale bage ba ulita mo ta gbadale Cristo mo ta gbu kare.  
\v 24 Cristo agali mo chugu ngwadi jogeda kruge che ulita alin che agedu me no giti, ama ji chugu che giti ene che ulita me chege jiske dare Chube gwage che agedu ulita me no giti. Cristo giti Chube che ta blitu, ene gwangerugu che age me no talla chugadale ngwadi che mo ta gbadale me jogeni naskuni age me no dare, ma no che mo ta gbadale diali toi age no Chube takalin kare. Ngeru ba ulita mo ta du diali age me no, e giti ba chegu jiske sugekare Chubege, agwa Cristo jokeda giti ba Chubenu ba chege trate Chube gwage.  
\v 25 Ngeru ba ulita bebi Cristo gai ulia gire ba me Chubenu ba ulita chagedu sugekare mo mananga Chubege salengwli bda oveja me mo manangage kare, ngeru ba ulita me kledu tañachuge Chube giti ba ulita ta kledu sugekare Chubege, agwa nege ba ulitage uñale Cristo giti ba Chubenu, Cristo ba Chugagwalla ama ba ulita mananga. 
\c 3  
\s1 Pedro chada degange onbrenu muirenu mo jwanba giti 
\p  
\v 1-2 Ba muinga ulita Chubenu mo jwanba ba mo ñengula kerua gbadale gdadi, ba ulita agedale mo ñengula gerule kare diali. Ba gweale mo ñengula me Chubenu, ba mo ñengula gadale dage, ba agedale no trate mo ñengula alin mo ta dbe no diali mo ñengula ole. Ba me gerudale tanre mo ñengula ole Chube giti ene ba tañachuge ñengula be Chube gerua gai ulia, me ene, ba mo ta gbadale age no diali ta giti mo ñengula gwa giti ene suge amage Chube gerua geru ulia, ene ba ñengula ñage ta jwlite Chube geruadi Chube gerua gai ulia ba mo ta gbe age no giti ama alin ba kle ama gai dage giti.  
\v 3 Ba muinga ulita Chubenu me tañachugale mo dodade no trate alin giti mo ñengula gwa giti ene ba tañachuge ama be no ba ole be ba keruchuge gerule Chube giti. Ba mo dodade no trate lle tanre kwangle giti, lle chrachienga no kwangle takalinge mo dodagda, mo chuga dodade no, mo chugaga lite no, ñometra kwangle no mo ngama tkagda, ulita mo dodade no trate, mo dodade no ene alin giti ba me tañachugadale ene ba ñengula be no ba ole be ba keruchuge gerule Chube giti be Chube gai ulia, me ene.  
\v 4 Ma no ba ulita muinga Chubenu mo ta gbadale tañachuge mo talla kle mine Chube ole, ba mo ta gbadale no trate age no diali me mo ta dbe skochie, agwa ma no mo ta gbe toi no taingwli mo ñengula ole, ba mo ta dbe no ene ta e mi jogenga, ta ene chege diali chui tangle e no ulita Chube gwa giti. Toi ta ene ole mo ñengula ole, ene ba giti ñage suge mo ñengulage Chube gerua no Chube gerua ulia ene ba ñengula ñage Chube gai ulia mo alin.  
\v 5 Unsuialin muinga bai chagedu mo ta gbe no trate Chube gwa giti, ama ulita ta du no mo ñengula ole kaire, ama mo ta gbu no trate age no diali, ama me ta du skochie, ama ta gbu toi taingwli mo ñengula ole. Muinga e Chube gau ulia diali, kaire ama mo ñengula gau dage mo chugagwallale.  
\v 6 Sara muinga ene, ama mo ñengula Abraham gau dage agedu ulita Abraham gerudu kare, ama Abraham gau mo chugagwallale. Ba muinga Chubenu ulita agedale no diali mo ñengula ole, ene ba me mo ta dbadale kwachie mo ñenguladi ba diali kle age no ama ole, ba age ene ulita gire ba Sara jian kare, Sara toidu no ene Abraham ole. 
\p  
\v 7 Cha gerule ba kwian onbre ole, ba ulita Chubenu mo jwanba mo ta dbadale toi no ta giti mo muingalla ole, ba mo muingalla manadale no, ama me kira molen tanre ba kwian onbre kare, ama me salengwli onbre kare, agwa Chube gwage ba gdaboke salengwli, Chube ba gdaboke gau toidale no ule diali chui tangle Chube ole. Ba mo ta dbe no ene mo muingalla ole, ene age me no mo muingalla ole talla me kle ba tale, ene ba gerule Chube ole Chube ba keruchuge, ba gdabonate kle mo ta gbe gdaitre alin e no Chube gwage, ene Chube age no ba gdabonate alin. 
\s1 Kwian Chubenu mo ta gbadale age no daba na ulita ole 
\p  
\v 8 Cha gerule ba Chubenu ulita ole, ba ulita mo ta gbadale tañachuge salengwli daba Chubenu na ulita ole kwian gdaitre alin kare ta dbe toi no modi, ba ulita ta sugedale salengwli ulita, ba ulita nodale mo bitalla Jesucristo giti ole, ba ulita mo ta dbadale no no age no daba na alin daba na gai ma kweri moge.  
\v 9 Daba na age me no ba ole ba me agedale me no ama ole ama age kare, ma no ba age no ama ole. Daba na kira bate ka boi me no ba ole ba me kira bate ka boi gwangoguda ama kle age kare, ma no ba gerule no ama ole ba age no ama alin Chube agedu no ba alin kare. Chube ba gau mo alin agedale no, Chube takalin ba age no daba na ulita ole me tañachuge daba kle age no o kle age me no ba ole, ba agedale no diali daba ulita ole, ene Chube be age no ba alin.  
\v 10 Chube gerua degaba unsuialin gerule ene: 
\q1 “Kwian ta toikalin no nga suga no ole chui gdale, kwian ene mo ta gbadale me gerule sidri me no me gerudale sole. 
\q1  
\v 11 Ma no mo ta gbadale joge siere age me noge mo ta gbadale age no mo ta gbadale toi no taingwli daba na ulita ole diali gwangerugu. 
\q1  
\v 12 Kwian agenga no Chube gwage Chube takalin kare, Chube kle kwian ene manade no, kwian ene kle chudaboi kade Chubege, Chube kle ama keruchuge. 
\q1 Agwa kwian agenga me no Chube gwage, Chube skochie kwian ene ole, Chube ji gbe kwian alin kwian age me no gdale, kwian ene me kle age Chube takalin kare.” 
\m Chube gerua degaba unsuialin gerule ene. 
\p  
\v 13 ¿Chema ñage age me no me no ba ole ba ulita kle mo ta gbe diali age no Chube takalin kare? Ba kle age no giti kwian me ñage age me no ba ole.  
\v 14 Agwa kwian gweale age daga ngwale ba ole ba kle mo ta gbe age no Chube takalin kare giti, ba me mo ta dbale olire, Chube be age no no ba alin malen ba ñage mo ta dbe nga suga no ole. Ba me kwachiedale kwian ba oña boi dagale ba kle age no giti,  
\v 15 ma no ba kle boi daga ngwaleske ba mo ta gbadale diali Cristo gai dage mo Chugagwallale. Kwian agenga me no ba ole, kaire kwian na geru kade bage ba kle Cristo gai giti, kwian ene kalen ba ulita mo ta gbadale biale jainnga no trate ta no ole Cristo giti.  
\v 16 Ba ulita Cristonu mo ta gbadale toi no trate Chube takalin kare diali, ene be suge trate trate ba tale ba kle age no Chube takalin kare ba me jiske Chube gwage, ene kwian agenga me no ba ole gerule me no badi ba kle age no giti gire be suge kwian na tanrege kwian kle gerule me no badi kle sole, gire bdagli kwian kle gerule ene badi be ibule tanre mi gerule dare me no badi.  
\v 17 Boi daga ngwale daba na kote age no giti, e no, e ñanaske Chube gwage, agwa boi daga ngwale age me no gdale daba na kote, e me salengwli age no giti kare. Chube takalin che boi ene daga ngwale age no giti daba na kote che boidale, che me talladale boi age no giti, che mo ta gbadale age diali no ngerugu.  
\v 18 Cristo kaire ji chugu age no giti, Cristo jokeda che ulita agedu me no alin, ama che ulita agedu me no jia junnga bitaitre alin ulita, ene che ulita chege no Chube gwage ama gai ulia giti, ama gai ulia giti che ta chege no Chube ole. Cristo me jiske, ama me agedu me no ni sidri agwa ama jokeda kwian ulita agenga me no giti. Cristo jegwale alin ji chugu tanre daga ngwale kaire ama jokeda, agwa ama oña chegu gwade,  
\v 19 gire ama oña jo nga kwian jogebada oña kle ngwadi, nga ege Chube me oña e chuge ngwadi joge siere, nga ege kwian ulita me no oña kledu, oña e ulitage Cristo oña jo gerule Cristo agedu giti kaire Cristo be age giti.  
\v 20 Kwian e me Chube gau dage unsuialin Noé chuiage, Chube gerudu Noé ole Chube be kwian agenga me no ulita kagenga chi kote, Chube Noé gbu du dodade. Noé kledu du dodade Chube manadu, Chube me agedu blike, ene Chube tadukalin kwian agenga me no mo ta blite, Noé bebi du dodade ulita kwian tanrege chku uñale Noé kledu du dodade, sbali sbali Noé kledu du dodade, du jo ka giti gire Chube ji gbe kwian agenga me no ulita alin chuia chku, chui ege kwian ulita jonga chi kote, kwian gdapa alin tiun gitiru duge chiga giti. Boidu ene unsuialin Noé chuiage, Noé Chube gau dage malen ama me jonga chi kote, ama chegu no duge chiga giti, e giti Noé tiun gitiru Chube ji gbu kwian agenga me no ulita alinge.  
\v 21 E salengwli che Chube gai dage che mo ñeange chiske mo gange ngaña chigage kare, che Chube gai dage giti che tien gitiru ji chugege che agedu me no gdale. E me gerule che mo ñeange chiske giti che jegwale chege no trate chi kote, me ene, che mo ñeange chiske mo gange ngaña chigage, che age ene che kle mo ta gbe ulia Chube ole Cristo jokeda Cristo chkuni gwade giti, che kle chudaboi kade amage, che takalin ama che ta gbe toi no trate ama takalin kare.  
\v 22 Cristo jokeda chkuni gwade, gire joni nga ngaña giti Chube kle ngwadi, nege ama kle Chube ngena Chube ko taingwli giti. Lle boanga Chube alin nga ngaña giti, Cristo ama ulita Chugagwalla, kaire Cristo ma kweri ma kiraske dolla Satanáge kaire Satanás chudaboangalla ulitage. 
\c 4  
\s1 Kwian Chubenu me mo ta dbadale tañachuge dare 
\s1 agedu ngeru bebi Cristo uñe kare 
\p  
\v 1 Cristo chagedu nga dba ai giti kwian kare ama boidu tanre daga ngwale, ama me talladu e giti, ama jagedu boi daga ngwalege me agedu me no sidri eske. Ene kaire ba boi daga ngwale ba me talladale boi daga ngwale giti, ma no ba mo ta gbadale jage boi daga ngwalege mo ta dbe Cristo mo ta du kare boi daga ngwaleske, ba mo kira gbadale me mo chuge ngwadi age me no boi daga ngwaleske.  
\v 2 Ene suge bage ba me toidale dare gwangerudba age me no ba agedu ngeru kare, ene ba mo ta gbe toi no trate Chube takalin kare, ba toi nga dba ai giti dare age Chube takalin kare me kwian takalin kare kwian kle tañachuge kare.  
\v 3 Kwian me Chube uñe me age no Chube takalin kare, kwian ene mo ta gbe age tanre me no diali ai kare: Diali muire onbre takalin mo chuge ke giti, diali ama ulita ta agekalin me no. Ama lle gage janga chage llale. Ama nga ollade lle gage giti, ama lle gage jai ngle ngle jogengaleda. Ama age tanre me no ollade ule lle oña dodaba mo kodi ole, ama lle oña e gai mo chubeale. Kwian ulita me Chube uñe age ene, ba ulita kaire kledu age ene ule kwian ene ole, sbali sbali ba chagedu age ulita ene salengwli, agwa nege ba Chubenu ba ulita me kle age me no ba agedu kare ngeru ule.  
\v 4 Kwian agenga me no ulitage me suge mineade ba ulita me chege ama ole age dare ama age kare, ba kle age nganake, e giti kwian agenga me no diali kle gerule me no ba ulitadi toi Chube takalin kare giti.  
\v 5 Kwian ene ulita agenga me no diali, chui bdaglige Cristo be kle biale ji gbe ama ulita alin ama agedu me no giti, chui ege kwian e be kle Cristo gwa giti be suge trate trate kwian ege ama jiske agedu giti ulita, chui bdaglige Cristo be ji gbe kwian gwade alin kaire kwian jaba chkeni gwade alin. Ba me talladale kwian ene ngeru, ba ama chugale ngwadi Cristoge, Cristo alin ñage ji gbe kwian ene agenga me no ulita alin.  
\v 6 Agwa Cristo mi age ene kwian ole bai kaire mo ta gbe age no Chube takalin kare, kwian enege geru Cristo giti jo ketaba, kwian kledu gwade gire geru e jo ketaba kwiange, ama ulita bai kaire Cristo gau mo jwanngale siere ji chugege age me no gdale chegu no trate Chube gwage, kwian ene jokeda kwian ulita jogeda kare agwa ama oña me jo sugekare Chubege, ama be toi no diali chui tangle Chube ole Chube kle toi kare, Cristo mi ji gbe kwian ene alin chui bdaglige. 
\p  
\v 7 Chui bdagli chege kodi malen ba ulita Chubenu mo ta gbadale tañachuge no trate diali Chube takalin kare me mo chuge ngwadi tañachuge age me no, ene ba ñage gerule no Chube ole ta no trate giti diali.  
\v 8 Ba ulita mo ta dbadale no ngle modi daba ole, ene daba na ñage age tanre me no ba dollale ba me skochie dabadi ba me daba mlienga, ta no tanre ole ba ñage daba agedu me no talla mlienga ulita diali, ta dbe age no ene daba ole e no no.  
\v 9 Ba ulita Chubenu ba daba basanga Chubenu na gadale ngwange no mo ullage ta no giti, ba ulita agedale ene modi ongoru ongoru, ba daba ulladale, kaire ba gbengwa ketadale gbegda daba alin, ba me gerule sidri me no daba basanga Chubenu gdaite ole u gdale bligda gdale.  
\v 10 Chube agedu no no ba ulita alin, Chube ta ketu ba ulitage gdaite gdaite lle kaire kaire boadale Chube takalin kare daba Chubenu chudaboagda, ba ulita mo ta gbadale lle boi no Chube ta ketu bage kare age.  
\v 11 Ba bai kaire gerunga Chube giti daba ole ba mo ta gbadale gerule Chube ba ta gbe gerule kare me gerule gballa mo ta giti. Ba bai kaire daba chudaboanga ba daba chudaboadale Chube kiralla giti age Chube ba ta gbe kare me daba chudaboi mo ta giti gballa. Ba ulita kaire kaire mo ta gbadale lle ulita boi no Chube ta ketu bage kare, ba agedale ulita no, ene gire daba na be gwage ba kle agedi be suge amage Chube agedu no no ba alin Jesucristo giti, e giti daba be gerule no no Chube giti. Chube no Chube kira molen, Chube kiralla me bidege, Chube kiralla chege diali chui tangle. Che ulita amanu gerudale no ama giti diali. Ene nobi. 
\s1 Cristo gai ulia giti kwian boi daga ngwale, 
\s1 eske ama mo ta gbadale jage nga suga no ole 
\p  
\v 12 Cha daballa cha ibotea Jesucristo giti, cha no no ba ulita ole, cha takalin suge ba ulitage ba me ñage tañachuge tanre mo ta dbe kennga ba kle boi daga ngwale giti, ba alin allabi me kle boi daga ngwale Cristo gai ulia giti, kaire kwian na tanre Chubenu kle boi daga ngwale salengwli ba kle boi kare, ba mo ta gbadale gwangerugu jage boi daga ngwaleske, ene ba ta be chege ma kiraske Chube ole boi daga ngwaleske.  
\v 13 Ba boi daga ngwaleske ba mo ta gbadale suga no, sugedale bage Cristo boidu daga ngwale kaire, ene kaire ba amanu boidale daga ngwale, ba mo ta gbe suga no boi daga ngwaleske nege nga dba ai giti, ene kaire nga be suga no no badi Cristo chieni chuiage, chui ege Cristo be chkeni mo kiralla giti, gire be suge ba ulitage Cristo no Cristo kweri.  
\v 14 Kwian ba oña boi dagale ka boi ba ole me no Cristo gai ulia giti ba me kwachiedale kwian ene ngeru, sugedale bage Chube Oña kiraske no diali kle ba ulita ole, diali kle ba ulita Chubenu kira gbe.  
\v 15 Ba Chubenu me daba gwaleda, ba me skwe boadale, ba me agedale me no sidri daba na ole, boi kle sugekare gire ba me jogedale boiske gerule kle boi ulita giti, ba gweale ji chuge age e kare giti e me no me no, ji chuge ngwale age ene giti gweale boi, ene ba nga dbale ibule tanre mo giti.  
\v 16 Agwa ba ji chuge Cristo gai ulia giti Cristo gerua dbe giti ba me nga dbale ibule mo giti, ma no ba mo ta dbe nga suga no ole e giti, ba gerudale no Chube ole: “Chube, nga suga no chadi Cristo giti cha banu, e no no cha alin.” 
\p  
\v 17 Nege nga dba ai giti kwian Chubenu age me no, Chube kwian ene chuge ngwadi boi daga ngwale age me no e gdale, ene kwian ta mo ta gbakalin ma kiraske chege siere age me noge, ene me ibule Chube gwa giti chui bdaglige. Chui bdaglige Chube be gerule kwian ulita ole kwian agedu giti ulita nga dba ai giti, ngeru be gerule kwian Chubenu ulita giti bigire be gerule kwian me Chubenu ulita giti, chui ege Chube be ji gbe kweri kweri kwian ulita alin bai kaire me Chube gerua ulia no gau mo alin. Kwian Chubenu ole boi dagale nga dba ai giti agwa chui bdaglige ama be tien gitiru Chube ji gbege.  
\v 18 Chube gerua degaba unsuialin gerule e giti, chada e gerule: 
\q1 “Kwian Chubenu kle mo ta gbe Chube ole diali, kwian ene me ji chugadale nga dba ai giti, agwa ama kle ji chuge boi daga ngwale gweale, bdagli ama be tien gitiru boi daga ngwale ulitage be toi Chube ole diali chui tangle. 
\q1 Agwa kwian me Chubenu agenga me no Chube dollale, ama be ji chuge ma tirare chui bdaglige, ama chudaboanga me, ama be chege boi daga ngwale sugekare Chubege diali chui tangle.” 
\m Chube gerua degaba unsuialin gerule ene.  
\v 19 Ba boi daga ngwale nga dba ai giti, Chube takalin ba boi daga ngwale ba boidale daga ngwale, agwa Chube me ba chuge ngwadi sugekare amage. Ba me tañachugale kle boi giti, ma no mo ta gbe diali age ma no ngerugu diali Chube takalin kare mo jige Chube kote, Chube ba dodanga, Chube no no ba ole, Chube mo kiralla giti kle ba manade. 
\c 5  
\s1 Kwian Chubenu chugagwalla kaire kwian Chubenu 
\s1 ulita mo ta gbadale no modi diali 
\p  
\v 1 Nege cha gerule ba daba Chubenu chugagwalla ulita ole, cha daba Chubenu chugagwalla ba ulita kare. Cha gwagedu mo gwagwa giti Cristodi ji chuge dagale nga dba ai giti, Cristo chieni chuiage che ulita be gwage Cristodi ule, chui ege che ulita be joge toi ule ama ole nga ngaña giti.  
\v 2 Agwa nege nga dba ai giti ba daba Chubenu chugagwalla ulita, ba daba Chubenu ulita manadale no Chube geruadi, ba ulita daba Chubenu chugagwalla mo ta gbadale daba Chubenu manade no Chube geruadi ta no ole Chube takalin kare, me tañachuge mo tale: “Cha me ta agekalin agwa cha agedale.” Me ñage tañachuge ene, ni tañachuge ngeru igi gai tanre daba manade Chube geruadi ñanale, ba lle ulita boale no ta no giti daba Chubenuske.  
\v 3 Ba ulita daba Chubenu chugagwalla me tañachugadale ba daba Chubenu ulita kaganga, ba me ta sugedale ba daba Chubenu ulita mananga Chube geruadi malen ba ama mauña, ba me tañachugadale ene. Agwa ba ulita daba Chubenu chugagwalla chagedale ta giti ta no ole daba Chubenu ulitaske, ba chagedale age no daba Chubenuske, ene daba Chubenu ulita be gwage badi be ta agekalin no ba kle age kare.  
\v 4 Ba ulita daba Chubenu chugagwalla mo ta gbe daba Chubenu manade Chube geruadi ta no ene ole, ene Cristo daba Chubenu ulita mananga ma kweri chkeni chuiage ama be lle no no kete ba ulita daba Chubenu chugagwallage ba daba Chubenu manadu no ñanale, lle e me boi ni jogenga, lle e chege diali chui tangle. 
\p  
\v 5 Ene kaire cha gerule ba kwian Chubenu ulita ole kle mo lite Chube geruadi, ba ulita mo ta gbale no daba ba chugagwallale ole ongoru kaire ulita mo ta dbe salengwli modi, ba ulita daba ba chugagwallale gadale dage diali. Kaire ba ulita Chubenu mo ta gbadale daba na ulita gai dage ongoru ongoru moske me sugedale mo tale ma kweri daba nage. Chube gerua degaba unsuialin gerule e giti, chada e gerule: 
\q1 “Kwian me ñage tañachuge mo tale: ‘Cha ma kweri daba nage.’ 
\q1 Chube me age no kwian ene alin me kwian ene chudaboi, agwa kwian tale suge soli Chube mo ta dbe no kwian ene chudaboi.” 
\m Chube gerua degaba unsuialin gerule ene.  
\v 6 Ba ulita Chube gadale ma kweri moge, ba Chube gadale mo Chugagwallale, ba mo chugadale ngwadi Chube kirallage age, ene chui be chke gire Chube be ba ulita gbe kweri.  
\v 7 Ba ulita mo ta ulita jigadale Chube kote, boi dagale ba ole ba me mo ta dbale tañachuge tanre kle boi giti, ñage jige ulita Chube kote, uñale Chubege kle boi ulita ba ole, Chube no ba ole, Chube ba chudaboi, ama mo ta gbe age no ba alin, ama diali kle ba manade no no. 
\p  
\v 8 Ba ulita mo ta gbadale tañachuge no trate ulita me mo chugadale ngwadi tañachuge age me no, ba ulita kledale biale ta giti diali me mo ta chugale ngwadi chage alenske. Gude saingwli kle chage diali lle jinade gutadale, ene kaire che dolla Satanás kle chage kwian nate kwian ta gbale siere Chubege, che dolla Satanás ta agekalin me no kwian Chubenu ole ta kwian Chubenu ta gbakalin siere Chubege.  
\v 9 Satanás age gweale me no ba ole ba ta gbale siere Chubege, ba mo ta gbadale kiraske me Satanás chuge ngwadi ba ta gbe siere Chubege, ba mo ta gbadale diali Chube gai ulia ma no gwangerugu, ba boi daga ngwale Chube gai ulia giti sugedale bage me kle boi ene ba alin ole, uñale bage daba Chubenu nga na ulitage kle boi salengwli ba ulita kle boi kare.  
\v 10 Chube no no ba ulita ole, ta ene ole ama ba ulita gau mo alin Jesucristo giti, Jesucristo giti chui bdaglige ba ulita be kle ule Chube ole diali chui tangle nga ngaña giti, agwa nege nga dba ai giti ba boi daga ngwale sugeti, boi daga ngwaleske Chube agali be ba ta gbe ma trate ma kiraske ngerugu, ene diali ba ta be chege Chube ole, ene ba mi mo ta blite che dolla Satanás ole.  
\v 11 Chube alin allabi no kira molen tanre diali, ama kiralla me bidege, ama kiralla ma kweri na ulitage diali. Ene nobi. 
\s1 Pedro gbi jige bdagli chada ai giti kwian Chubenu alin 
\p  
\v 12 Silvano chada ai degu cha Pedro kle gerule kare kagadale ba ulita alin, uñale chage Silvano mo ta gbanga Jesucristo gai ulia diali, ama cha daballa Jesucristo giti. Cha kle Silvano gbe chada ai buli dege ba ulita alin, chada ai giti cha kle gerule ba ulita ole ba kira gbadale chage gwangerugu Chube ole me joge siere Chubege. Chube no no ba ulita ole, Chube kle age no no ba ulita alin, cha gerule ba ole ba ulita tachkedale diali Chube kle age giti no ba alin, ba me jogedale siere Chubege ba kle boi dagale giti. 
\p  
\v 13 Kwian Chubenu ulita kle mo lite aini una Babiloniage gbi kage ba ulita alin, Chube kwian una aige gau mo alin Chube ba ulita gau mo alin kare. 
\p Kaire Marcos gbi kage ba ulita alin, ama cha kirolla kare Jesucristo giti. 
\p  
\v 14 Ba ulita gbi kade no no moge ta no ole dabage ulita. 
\p Ba ulita Cristonu, cha takalin ba ulita gdaite gdaite mo ta dbe nga suga no ole Cristo giti. 
\p Geru ai ene ulita cha Pedro chada degangu ba kwian Chubenu ulita alin. Che kle meni.