\id 1JN - Buglere NT -Panama 2008 (DBL -2013) 
\h 1 JUAN 
\toc1 Juan Nu Chada Degaba Gwangea 
\toc2 1 Juan 
\toc3 1Jn 
\mt1 Juan Nu Chada Degaba Gwangea 
\mt2 Primera Carta de Juan 
\ip Kwian geru jwannga Jesucristoge kada Juan chada ai degu kagadale kwian Jesucristo gerua gangage toinga una ulitage nga kweri kada Asiage. Juan nu jogeba juma Juan kledu toi una Efesoge gire ama chada ai degu. 
\ip Juan chada ai degu kwian Chubenu ta gbagda Chube no no ama ulita ole Chube agedu tanre no ama ulita alin Jesucristo giti, Jesucristo gai ulia giti ama Chubenu. Kwian Chubenu mo ta gbadale age Chube takalin kare kaire mo ta dbadale no daba na ole, age ene giti chke uñale trate trate kwian tale ama ulia Chubenu. 
\ip Kaire Juan chada ai degu kwian Chubenu ta gbagda kwian na kle chage geru me ulia dbe giti. Kwian daba tkanga tangle geru me uliage kledu gerule kwian ole Chube me Jesucristo kagu nga dba ai giti che kwian kare, kwian daba tkanga tangle e kledu gerule Jesucristo medu kwian kare chku salengwli kwiandi kare agwa ulia ama me kwian dale ama jegwale me chenu kare kaire ama me Chube Kirolla. Chada ai giti Juan kwian ta gbu me kwian kle gerule ene kerua gbe gdadi, kwian ene kle sole ngwale ta daba anblitakalin geru me uliage. Juan chada ai degu kwian Chubenu ta gbagda geru ulia giti. 
\c 1  
\s1 Juan geru ulia Jesucristo giti gbe chke uñale kwiange 
\p  
\v 1 Cha chada ai dege Jesucristo giti ba ulita Chubenu alin: 
\p Jesucristo klebi enebi Chube nga ulita lle ulita kwian ulita dodadu gwangeabi gire, Jesucristo kwian ta gbanga toi Chube ole, Jesucristo giti cha kle chada ai dege ba ulita Chubenu alin. Chube Jesucristo kagu toi nga dba ai giti kwianske geru gbagda chke uñale kwiange Jesucristo giti kwian ñage toi ule Chube ole diali chui tangle. Jesucristo chku nga dba ai giti, cha ulita geru jwannga amage chagedu ama ole ule cha ama keruchugu gerule mo olodi agali kaire cha ulita gwagedu agali mo gwagwa giti amadi age no kwianske, kaire cha ulita agali ama gau kodi, cha ulitage sugedu Chube ama kagu nga dba ai giti kwian kare, ama chagedu kwian kare nga dba ai giti, ama giti cha kle chada ai dege ba ulita ta gbagda.  
\v 2 Gwangeabi Jesucristo klebi enebi mo Ñenua Chube ole nga ngaña giti, bigire Jesucristo chku nga dba ai giti kwian kare toi kwianske, cha ulita gwagedu Jesucristodi age no kwianske kwian alin, cha kle geru e trage kwian ole, kaire cha ba ulita ta gbe chke ama giti kaire ama agedu giti. Cha gerule ba ole, Jesucristo giti che be toi no diali chui tangle ama ole kaire Chube ole nga ngaña giti.  
\v 3 Cha ba ulita ta gbe chke Jesucristo giti, cha ulita gwagedudi mo gwagwa giti kaire cha ulita geru keruchugu mo olodi, cha geru e kete ba ulitage chada ai giti, ene ba ulita ta chege ule kwaitre alin mo skatemanallale cha ulita ole Jesucristo giti cha ulita kle mo ta gbe Chube che Ñenua ole kare kaire cha ulita kle mo ta gbe ule Jesucristo ole kare.  
\v 4 Cha kle geru ai dege ba ulita alin chada ai giti, ba geru ai ulita gbe gdadi, ene che ulita ta chege diali ule kwian gdaitre alin kare nga suga no ole diali Chube giti. 
\s1 Kwian bai gerule ama Chube uñe kwian ene me chagedale kwian me Chube uñe chage kare 
\p  
\v 5 Geru ai ulita Jesucristo giti Jesucristo cha ulita tku tangle kare, geru ai amaña cha kete ba ulitage: Chube no salengwli jichra chratigenga no kle gwade kare, Chube no trate ulita diali, ama ta me nga jereske kare ole ni lle me no gweale kle ama tale, ama no diali ama kwian ta gbanga toi no trate salengwli jichra kle kwian gbe ten kare.  
\v 6 Che ulita bai kaire kle gerule che Chube uñe che kle mo ta gbe chage no Chube ole gire che mo ta gbe toi nganake kwian me Chube uñe kle toi kare, age ene me no Chube dollale kwian me Chube uñe kle age kare, ene che kle sole ngwale che kle gerule alin kaire ni mo ta gbe age ulia che kle gerule kare Chube uñe giti, che age ene che kle chage nga jereske kare.  
\v 7 Agwa cha gerule ba ole, Chube no trate ulita, che ulita Chubenu toidale age no diali Chube takalin kare, ene che ulita Chubenu ta chege ule kwaitre alin mo skatemanallale Jesucristo giti, ene Chube Kirolla Jesucristo jokeda giti che chege no trate Chube gwa giti age me no ulitage. 
\p  
\v 8 Che mo ta gbe tañachuge mo tale gerule che me kwian agenga me no age me no me kle che tale, che kle gerule ene che agali kle mo ta gbe mo anblite Chube gwage, che me kle gerule ulia mo giti, che kwian che ta agenga me no.  
\v 9 Malen talla me no kle che tale che age gweale me no, che mo ta gbale gerule Chube ole che agedu me no giti, Chube ta no trate molen ama diali mo ta gbe age no diali che alin, malen Chube che agedu me no ulita talla mlienga ama tale ama mi tachke dare che agedu me no giti, ama be che ta lite no trate che mi chege jiske Chube gwa giti che agedu me no giti.  
\v 10 Che gerule mo giti che me agenga me no sidri Chube dollale, che kle gerule ene che kle mo gbe Chube ite sole che me mo ta ketaba ulia amage ama gerua gai ulia, ama gerua ulita me kle che tale dale. 
\c 2  
\s1 Jesucristo kwian Chubenu ka chudaboanga 
\s1 gerule Chube ole kwian alin 
\p  
\v 1 Cha bitalla ulita Jesucristo giti, ba cha alin ulita salengwli cha olia kare, cha no ba ulita ole, malen cha chada ai dege ba alin ba ta gbagda, ene ba mi age me no gweale. Agwa kaire ba gweale age me no Chube dollale, gire sugedale bage che kwian Chubenu ka chudaboanga gdaite gerunga che alin Chube ole gdaite kle, ama kada Jesucristo ama no trate ulita ama agenga diali no, Jesucristo kle ama Ñenua Chube ngwadi gerunga no che alin Chube ole diali.  
\v 2 Jesucristo agali mo ketu gwaleda kruge che ulita agedu me no ulita giti, Jesucristo jokeda giti che ulita chegu trate Chube gwage me jiske, Jesucristo me jokeda che alin allabi agwa kaire Jesucristo jokeda kwian nga ulitamu alin, kwian ulita agenga me no, Jesucristo jokeda giti kwian ulita chege trate Chube gwage me jiske, kwian agedu me no Chube talla e ulita mlienga kwian Jesucristo gai ulia giti. 
\p  
\v 3 Chube geru gbu kare kwian alin che geru e gai dage geru e gbe gdadi age Chube gerua gerule kare, ene suge chege mo tale geru e giti che Chube uñe ulia.  
\v 4 Kwian gweale gerule: “Cha Chube uñe”, kwian gerule ene agwa me Chube gerua gai dage me age Chube gerua gerule kare, kwian ene me Chube gerua uñe ulia, Chube gerua me kle kwian ene tale, kwian ene kle sole mo ole naskuni Chube gwa giti.  
\v 5 Agwa kwian bai kaire kle Chube gerua gai dage ulia kle Chube gerua gbe gdadi, kwian ene kle mo ta gbe no Chube ole ulia. Cha gerule ba ole, che Chube gerua gai dage age geru e kle gerule kare, ene suge chege trate ulia che ta kle ule Chube ole che Chubenu ulia.  
\v 6 Kwian bai kaire gerule ama ta kle ule Chube ole ama Chubenu, kwian ene mo ta gbale chage no trate toi nga dba ai giti Jesucristo toidu trate no kwianske nga dba ai giti kare. 
\s1 Kwian geru no Chubenu gadale dage 
\s1 mo ta dbe no daba ulita ole 
\p  
\v 7 Cha bitalla ulita Jesucristo giti, cha gerule ba ole, ba mo ta dbadale no daba ole ongoru ongoru. Geru ai ulita cha kle dege ba alin geru ai me jagere dale, geru ai amaña sbalibi ba nu keruchugababi gwangeabi ba Jesucristo gerua gau uliabi gire.  
\v 8 Agwa nege geru ai cha kle dege ba alin ba ta gbagda geru amaña giti naskuni geru ai geru jagere ba ulita alin kare. Uñale bage Jesucristo toidu suiage tangle kwianske ulia ama mo ta du no kwian ulita ole diali, e kare ene ba kle mo ta dbe no daba ole ongoru ongoru Jesucristo toidu kare. Ulia ba kle mo ta gbe age geru ai kle gbaba kare gire ba me kle chege toi diali me no ba toidu ngeru kare. Ba bebi Jesucristo gerua gai ulia gire ba chagedu age me no diali, ba mo ta gbu Chube gerua gbe gdadi gire ba me chegu toi ba toidu ngeru kare, nege tangle Chube gerua giti ba kle chage age no Chube takalin kare. 
\p  
\v 9 Kwian bai kaire kle gerule ama kle toi age no Chube gerua kle gerule kare agwa kwian ene me kle mo ta dbe no daba ole ulia, kwian ene me kle toi no Chube takalin kare ama kle chage toi nga jereske kare kle chage age me no Chube dollale salengwli kwian me Chube uñe kle chage age kare.  
\v 10 Agwa kwian bai kaire kle mo ta dbe no daba ole ulia, kwian ene kle age no Chube takalin kare. Kwian kle joge chage ngajudige jonkare ama ñage ten jondi no trate, ama me kle sera jwatenga lle gwealege jonkare baini kaire ama chage ngwadige, nga chra giti ama ñage ten no ulita. E kare ene kwian bai kaire kle mo ta dbe no daba ole Chube takalin kare, kwian ene me kle mo gbe age me no Chube dollale.  
\v 11 Agwa kwian bai kaire me kle mo ta dbe no daba ole, kwian ene kle age me no Chube dollale, e salengwli ama kle chage toi diali nga jereske kare. Uñale bage che me jichra dbe ngajrege che chage nga jereske, chege me uñale jon che kle chage giti joge bai ngnagu kaire che sera ñage jwatenga lle gwealege nga jeresaske, nga jereske che me ten jondi. E kare ene kwian bai kaire me kle mo ta dbe no daba ole, kwian enege me chke uñale ama agedale no mine Chube takalin kare. 
\s1 Kwian Chubenu me mo ta gbadale chage age me no kwian me Chubenu kle chage kare 
\p  
\v 12-14 Ba ulita cha olia kare, uñale chage ba che Ñenua Chube uñe, uñale chage Jesucristo agedu giti Chube ba agedu me no talla mliunga ulita ama mi tachke dare ba agedu me no giti, ene ba chege trate Chube gwa giti, malen cha chada ai dege ba alin ba ulita ta gbagda. 
\p Cha chada ai dege ba kwian juma ulita alin, ba geru Jesucristo giti uñe trate, uñale bage Jesucristo klebi enebi lle ulita gwangeabi, malen cha kle chada ai dege ba alin ba ta gbagda dare. 
\p Cha chada ai dege ba ulita kirogwa biale alin, ulia ba mo ta gbaba kiraske Chube gerua giti, ba Chube gerua Jesucristo giti gau ulia mo tale kaire Chube kiralla giti ba kle kirachke che dolla Satanádi, malen cha kle chada ai dege ba alin ba kira gbagda, ene ba ulita chege ma kiraske chada ai batenga giti. 
\p  
\v 15 Cha gerule ba ulita ole, ba me mo ta gbadale nga suga no ole age me no ulita giti kwian me Chube uñe kle age kare, kwian me Chube uñe diali kle mo ta gbe toi ama takalin kare. Ba kwian Chubenu ulita bai kaire kle mo ta gbe toi kwian me Chubenu kare mo ta gbe lle tanre ngwale gai mau alin, ba kle age ene ba me kle mo ta dbe no Chube che Ñenua ole, ba kle mo gbe Chube che Ñenua dollale.  
\v 16 Cha gerule ba ole, kwian me Chubenu agenga me no kle age ulita ai kare ene: Kwian kle mo ta gbe tañachuge age me no giti kaire ama kle age me no ama kle tañachuge kare, kaire agwe kwian kle gwage lle tanredi ama takalin chege lle e ole ulita mau alin, kaire agwe kwian kle tañachuge igi giti alin allabi kwian kle mo sobade daba nadi lle molen tanre ole giti. Cha gerule ba ole, kwian kle tañachuge me no age ai kare ulita, talla ai kare me kle chie dale Chube che Ñenuage, Chube me kle kwian ta gbe age me no ai kare. Che dolla Satanás kle kwian ta gbe tañachuge me no age me no ulita ene. Malen cha gerule ba ole, ba me mo ta dbadale chege age me no kwian me Chubenu kle age kare.  
\v 17 Nga dba ai che toige mi chege chui tangle dale nege tangle kare, kwian ulita bai kaire kle age me no Chube dollale kwian ene be chege sugekare Chubege boalenga ngwale diali dale alin, agwa ulia kwian ulita bai kaire age Chube takalin kare mo ta gbe trate no Chube ole kwian ene be toi Chube ole chui tangle diali. 
\s1 Kwian Chubenu geru ulia gadale ulia gwangerugu 
\s1 me mo chuge ngwadi geru Cristo dollale keruchuge 
\p  
\v 18 Ba ulita Jesucristo gerua gaba ole cha gerule ba cha olia kare Jesucristo giti, cha ba ulita ta gbe chui bdagli ngnagu giti, ba ulita geru keruchugu chui bdagli ngnagu giti chui ege kwian gdaite ta me no Cristo ole be chie be mo tke dole Cristo ole, chui e kle chke bedre bedre kwian tanre me no kle chage ba ulitaske kwian Cristo dollale ama kle gerule me no Cristo giti, e giti chke uñale trate chege chui bdagli kle chie ma dbigu, kwian Cristo dollale tanre kle chage che ulitaske nege.  
\v 19 Kwian tanre Cristo dollale kledu che kwian Chubenuske mo lite che ole ule Chube gerua jwen, agwa ulia ama ta me kle Chube gerua gai ulia ama me mo ta du che ta kare geru ulia ole, ama me che bitalla Jesucristo giti dale, ama che bitalla Jesucristo giti ulia, ene ama chegu che ulita ole diali, agwa ama me ulia che bitalla Jesucristo giti malen ama jo siere che ulitage, ama jo siere giti suge trate chege ama me Chubenu, ene ñage suge ma trate chege kwian ene ulita me Chubenu ama geru ngwale traganga. 
\p  
\v 20 Agwa ba ulita kle geru ulia Jesucristo giti gai ulia, ba ulita tale uñale Jesucristo giti Chube mo Oña kagu ba ulita tale ene geru Jesucristo giti suge trate bage.  
\v 21 Cha kle chada ai dege ba ulita alin ba ta gbagda, e me kle gerule ba ulita me geru ulia Jesucristo giti uñe, uñale chage ba ulita geru uñe trate geru ulia giti, agwa cha kle chada dege ba ulita alin nakwaite ene geru ulia suge bage ma trate, Chube Oña kle ba ta gbe suge geru bai ulia giti kaire Chube Oña kle ba ta gbe suge geru bai me ulia giti.  
\v 22 Gire cha geru kade bage ai kare: ¿Chema kwian songa ngwale? Kwian bai kaire kle gerule Chube me nu Jesucristo kagaba kwian kare kwian jwanngale siere ji chugege age me no gdale, kwian ene songa ngwale. Kwian ene kle gerule Cristo dollale, kwian ene kle mo ta gbe tañachuge mo tale Chube giti ene: “Chube me che Ñenua dale”, kaire kle tañachuge mo tale Jesucristo giti ene: “Jesucristo me Chube Kirolla dale.” Kwian bai kaire kle tañachuge ene ai kare, kwian ene kle tañachuge me no Chube dollale kaire Jesucristo dollale.  
\v 23 Kwian bai kaire me Chube Kirolla Jesucristo gai ulia kwian e me Jesucristo Ñenua Chube gai ulia kaire, agwa kwian bai kaire gerule no kwian na gwa giti ama Jesucristo gerua ganga ulia, kwian ene ulia Jesucristonu kaire kwian ene Chubenu.  
\v 24 Malen cha gerule ba ole, ba geru ulia ba nu keruchugababi gwangea ogadale no mo tale, ba tañachugadale geru e giti diali. Geru ulia ba keruchugubi gwangeabi kle ba tale diali, gire ene ba ta be chege ule Chube Kirolla Jesucristo ole kaire Jesucristo Ñenua Chube ole.  
\v 25 Jesucristo agali gerudu che ulita amanu mo ta gbale chege ene ule ama ole kaire Chube ole, ene che ulita amanu be toi chui tangle diali Chube ole. 
\p  
\v 26 Cha kle chada ai dege ba ulita alin ene suge bage kwian agenga Cristo dollale giti ama kle sole ngwale ba ulita anblitanga geru ngwalege.  
\v 27 Kaire Chube Oña kle ba tale Jesucristo ama kagu kare ba ta gbanga diali geru ulita ulia giti, gire ba me kwian na gbadale mo tke tangle geru ulia giti. Ulia Chube Oña no agali kle ba tke tangle lle ulita giti, geru e Chube Oña kle ba tke tangle giti geru e ulia, me ngwale dale. Ba ta chegedale ule diali Jesucristo ole Chube Oña ba tkaba tangle kare, ba me mo ta gbale joge siere Chube Oñage. 
\p  
\v 28 Cha gerule ba ulita ole ba ulita cha olia kare Jesucristo giti, che ulita mo ta gbale ule Jesucristo ole diali, ene suge chege ama chieni chuiage che mi skwen kennga amage ni ibule ama ngeru che ageba me no gdale.  
\v 29 Uñale ba ulitage Jesucristo no trate agenga no diali, kaire chkedale uñale bage kwian bai kaire kle chage age ulita trate Chube takalin kare, kwian ene ulia Chube olia. 
\c 3  
\s1 Kwian Chubenu toidale age no trate diali 
\s1 Chube takalin kare 
\p  
\v 1 Ulia cha takalin bage suge Chube giti trate, che Ñenua Chube no no che ulita ole, che ama gerua gai ulia gire che ulita chege ama oliale, uliabi Chube che gau ama oliale, malen kwian me Chubenuge me suge che kwian Chubenu mine, kwian ene me Chube uñe malen kwian ege me suge che Chube olia kle toi giti.  
\v 2 Ba cha bitalla ulita Jesucristo giti, ba ole cha gerule ulia, che ulita Chube oliale che ama gerua gaba giti. Chege me uñale trate che be chege mine bdagli, agwa uñale chege Jesucristo chieni gire che be gwage amadi agali mo gwagwa giti, chege be suge trate ama giti, chui ege che be chege no trate ama kare.  
\v 3 Che ulita bai kaire kle mo ta gbebi biale Jesucristo chieni chuia manade ngwange, che kle mo ta gbe toi no trate salengwli Jesucristo no trate kare.  
\v 4 Agwa kwian bai kaire kle age me no, kwian ene kle age Chube dollale, kwian ene me kle Chube gerua tallade kwian ene kle age diali me no.  
\v 5 Agwa bage ulita uñale Jesucristo ni agenga me no sidri, ama no trate agenga no diali, ama chku nga dba ai giti che agenga me no ta blite ama ole talla me no jwennga siere chege, ama giti che tien gitiru ji chugege age me no gdale. Jesucristo no trate ulita,  
\v 6 malen kwian bai kaire ta kle ama ole kwian ene me mo ta gbe age me no dare ama mo ta gbe age Chube takalin kare. Agwa kwian bai kaire kle chage age me no diali, kwian enege me suge Jesucristo giti ama me kle Jesucristo gerua gai ulia me Jesucristo uñe. 
\p  
\v 7 Ba ulita cha olia kare, cha gerule ba ole, ba me ni kwian gdaite chuge ngwadi ba ulita anblite ngwale age me noge. Kwian bai kaire kle age no trate diali Chube gwa giti, kwian ene no trate salengwli Jesucristo no trate kare.  
\v 8 Agwa kwian bai kaire kle age me no diali ama kle tañachuge kare, kwian ene che dolla Satanánu, che dolla Satanás agedu me no gwangeabi kaire kle age diali, malen Chube Kirolla Jesucristo chku kwianske nga dba ai giti, ama chku kirachke che dolla Satanádi ene che dolla Satanás me chege age ulita Satanás takalin kare.  
\v 9 Ulia che Chube oliale che me kle chage age me no diali, che kwian Chubenu ulitage Chube ta jagere ketaba toigda no Chube takalin kare malen che kwian Chubenu me kle chage mo ta gbaba age me no diali, che ulia Chube oliale, Chube che ta blitu toi no Chube takalin kare.  
\v 10 Kwian kle mo ta gbe age giti chke nate uñale chege trate ama Chubenu o ama che dolla Satanánu. Kwian bai kaire kle chage age me no, kwian kle age giti chke nate uñale chege ama me Chube oliale dale, ama che dolla Satanás oliale ama kle mo ta gbe agenga diali me no. Kaire kwian bai kaire me kle mo ta dbe no daba ole, e giti chke nate uñale chege ama kaire me Chube oliale dale, ama che dolla Satanás oliale. 
\s1 Kwian Chubenu mo ta dbadale no daba ole diali 
\s1 daba chudaboanga no 
\p  
\v 11 Ulia geru ai jo ba tkaba tanglebi, geru ai ene: Che mo ta dbadale no daba na ulita ole diali, kaire daba mo ta dbadale no che ole diali, che ongoru ongoru mo ta dbadale no mo ole nga suga no ole diali, geru ai chége uñalebi.  
\v 12 Che me mo ta gbadale me no daba ole che enusulian unsuialin kada Caín agedu kare, unsuialin Caín mo ta gbu me no ama mo daballa guda, Caín dolla Satanás olia. Cha geru kade bage ene: ¿Uñale bage mineade Caín mo daballa guda? Ulia cha gerule ba ole, Caín gwagedu ama daballadi age no ulita diali Chube gwa giti, sugedu Caínge Caín me no mo daballa kare Chube gwa giti, ama ta me no agenga me no diali agwa ama daballa agedu no diali Chube gwa giti, sugedu Caínge ene malen ama ta skochiu ama mo daballa guda.  
\v 13 Ulia ulia cha gerule ba cha bitalla ulita Jesucristo giti ole, sugedale bage kwian me Chubenu be jainchke badi ama be ba gbe boi daga ngwale Caín agedu mo daballa ole kare, ulia be boi ene ba ole agwa e giti ba me mo talladale.  
\v 14 Agwa ulia che Chubenu mo ta dbe no daba na ole gire e giti suge chege ulia che ta me ngeru kare che bebi Chube gerua Jesucristo giti gai ulia gire. Ne suiale che chegu sugekare Chubege che me Chube uñu malen che me mo ta du no daba ole. Agwa che me chegu e kare malen che mi joge boadalenga daga ngwale ji chuge tanre ngwadi che agedu me no kbiale, nege tangle Jesucristo gerua gai ulia giti che ta kle Chube ole, che kle mo ta dbe no daba ole giti suge chege che Chubenu ulia, che be toi chui tangle Chube ole. Suge chege kwian bai kaire me kle mo ta dbe no daba ole kwian e me Chubenu, ama be toi diali sugekare Chubege ama me Jesucristo gerua gai ulita giti.  
\v 15 Kwian bai kaire kle jainchke dabadi ene kaire kwian tale kwian kle mo ta gbe me no salengwli kwian daba gwangada kare, bage uñale ni kwian gdaite mo gwangada ñage mo ta gbe no jogedale toi chui tangle Chube ole nga ngaña giti. 
\p  
\v 16 Ulia Jesucristo mo ketu boalenga daga ngwale mo gwangeda che giti kwian agenga me noge, malen suge trate chege che mo ta dbadale no mine daba ole. Jesucristo mo ketu boalenga daga ngwale che ulita giti, e kare ene agwe che mo chugale ngwadi boi daga ngwale daba chudaboi giti Jesucristo agedu kare, che mo ta gbadale daba chudaboi no diali che ñage mangire batre kare.  
\v 17 Kwian gweale Chubenu lle molen tanre gire ama gwage daba nadi me lle molen, kwian lle molen daba ene chudaboadale, agwa kwian lle molen gwage dabadi me lle molen gire kwian me tai dage dabage kwian e me lle kete dabage, ¿ba tañachuge mine kwian ene giti? ¿Kwian e kle mo ta gbe no Chube ole? ¿Chube talla kle ama tale? Me dale.  
\v 18 Ba ulita cha olia kare Jesucristo giti, ba ole cha gerule, che Chubenu ulia me mo ta gbadale gerule alin allabi che no daba ole agwa me age no daba alin me daba chudaboi, che me kle mo ta gbe no daba ole ulia, che gerule che no daba ole che daba chudaboadale, ene ulia che kle tai dage dabage.  
\v 19 Che age no daba alin che toi ulita Chube gerua kle gbaba kare che alin, gire ene chege suge che kle age Chube takalin kare che Chubenu ulia, kaire agwe chege suge che ta kle no trate Chube gwa giti me jiske Chubege.  
\v 20 Che tañachuge mo tale che jiske lle gweale giti Chube gwage, che suge moge ene agwa kaire agwe sugedale chege Chube kiraske ama diali che age me no talla mlienga che chudaboi kade amage gire, amage suge che ta mine ama ole, ama alinge allabi uñale che jiske che me jiske ama gwa giti, ama ñage che ta gbe suge moge me jiske ama gwa giti. 
\p  
\v 21 Ba ulita cha bitalla Jesucristo giti, cha no ba ole, cha gerule ba ole, ulia che tale che me suge moge jiske lle gweale giti Chube gwa giti gire ene ulia che me mo ta dbalenga kennga gerule Chube ole, uñale chege che kle no trate ama gwa giti ama be che kerua gai ngwange no.  
\v 22 Ulia che Chubenu ulita kle Chube gerua Chube gbu che alin gai ulia, kaire che kle age ulita ama takalin kare ama gwa giti, gire ene Chube be lle ulita che kade amage ama be kete chege che kle ama gai ulia ñanale.  
\v 23 Chube geru jigu gbaba che alin ulita, geru e kle gerule ene: Che Chube Kirolla Jesucristo gadale ulia mo Chugagwallale kaire agwe che mo ta dbadale no diali daba ole ulita ongoru ongoru Chube che gbu age kare ulita.  
\v 24 Che ulita bai kaire kle Chube gerua gai dage ulia age diali Chube takalin kare, gire ene che ta kle Chube ole kaire Chube kle mo Oña gbe che tale che ta gbagda suge che Chubenu ulia. 
\c 4  
\s1 Kwian Chubenuge sugedale chema kle gerule ulia 
\s1 Chube talla giti chema kle gerule ngwale 
\s1 dolla Satanás talla giti 
\p  
\v 1 Cha bitalla ulita Jesucristo giti, cha no ba ole, cha ba ta gbe ene: Ba me mo ta gbadale kwian ulita gerua gai ulia kwian gerule ba ole ama kle chage kwian tke tangle Chube gerua ulia giti gire. Ba me ama ulita kerua gai ulia blikare dale, agwa ma no ba kwian ene ta chugeda ulia ama kle chage Chube Oña talla giti o ama kle chage che dolla talla giti. Ba ama ta chugadaleda, ene be suge ma trate bage ama ulia Chubenu o me. Ulia ulia nga dba ai ulitage kwian tanre kle chage daba tke tangle geru ngwale me uliage, kwian e kle gerule ama kle chage geru ulia Chube giti kete kwiange, agwa me ulia dale ama kle kwian anblite ngwale.  
\v 2 Ba kwian ulita ta chugaleda ama kle chage geru Chube giti ulia trate dbe Chube Oña kirallaske o me, ba kwian ta chugaleda ene: Kwian bai kaire gerule ulia Chube Kirolla Jesucristo chku nga dba ai giti kwian kare, kwian ene ulia kle gerule Chube talla giti, Chube Oña kle kwian ene tale.  
\v 3 Agwa kwian bai kaire kle gerule Jesucristo me chku kwian kare nga dba ai giti, kwian ene tale Chube Oña me kle dale, kwian ene kle chage Jesucristo dolla talla giti, malen ama me kle gerule trate Jesucristo giti. Ba nu geru keruchugababi kwian gdaite be chie mo tke dole Cristo dollale che dolla Satanás kirallaske, agwa bage sugedalebi kwian tanre klebi chage che dolla Satanás talla ole nga dba ai gitibi. 
\p  
\v 4 Ba ulita cha olia kare Jesucristo giti, ba ulita Chubenu ole cha gerule, Chube Oña kle ba tale, ama ma kiraske che dolla Satanáge malen ba kirachku kwian kle chage geru ngwale me ulia dbe Satanás kiralla gitidi. Che dolla Satanás kle kwian e tale ama me kiraske Chube Oña kare, malen kwian e me ñage ba anblite geru ngwaledi ama takalin kare.  
\v 5 Kwian daba tkanga tangle geru ngwalege ulita agenga me no ama ulita kle mo ta gbe tañachuge me no Chube dollale diali gire ama kle geru ngwale me no Chube dollale trage daba tanre ole, kwian na geru me ulia uñe ama daba tkanga tangle geru ngwalege keruchuge no mo anblitange.  
\v 6 Agwa che me kwian daba tkanga tangle e kare, che me kle ama kerua gbe gdadi, che Chubenu ulia, kwian bai kaire ulita Chube uñe me kle kwian daba tkanga tangle geru me uliage keruchuge dale ama kle che Chubenu gerua keruchuge, agwa kwian me Chubenu me ta che kwian Chubenu keruchugakalin. Gire ene suge chege trate ulia chema chema kle chage Chube Oña kirallaske Chube talla giti geru ulia trage kaire suge chege trate chema chema kle chage che dolla Satanás talla giti geru ngwale trage kwian ole. 
\s1 Chube ulia no trate, ama ta dbe no diali kwian ulita ole 
\p  
\v 7 Ba ulita cha bitalla Jesucristo giti, cha gerule ba ulita ole, che mo ta dbadale no daba na ulita ole ongoru ongoru, che ulita bai ta suge no daba ole Chube kle ta ene kete chege, ama ta ene no molen. Kwian ulita mo ta dbe no daba ole, kwian ene Chube olia kwian ene Chube uñe ulia.  
\v 8 Kwian me mo ta dbe no daba na ole, kwian ene me Chube uñe. Chube ta dbe no diali kwian ulita ole Chube age no kwian ulita alin malen kwian bai Chube uñe ta ene molen kaire daba na ole, kwian ene Chubenu ulia.  
\v 9 Chube no no che ulita ole malen ama mo Kirolla gdaitre alin kagu nga dba ai giti che alin, ene che Chube Kirolla gai ulia giti che joge toi diali chui tangle Chube ole nga ngaña giti. Chube agedu no ene che alin gire e giti sugedale chege trate Chube ta no no che ole ulia.  
\v 10 Chube talla no no che ole ngeru chege, che bebi mo ta dbe no Chube ole Chube nu mo ta gbaba no che ole ngeru, Chube tale agedu no che ulita alin ama ta no no che ole, malen Chube mo Kirolla gdaitre alin kagu nga dba ai giti mo kete gwaleda kruge che agedu me no giti, ene Chube Kirolla giti che ulita me chegedale jiske che agedu me no giti gdale. 
\p  
\v 11 Ba ulita cha bitalla Jesucristo giti, ba ole cha gerule, Chube no che ole malen ama agedu no che ulita alin ene kaire che mo ta dbadale no no daba na ole ongoru ongoru Chube mo ta du no che ole kare.  
\v 12 Chubedi ni bitaite che nu gwageba agwa che mo ta gbe no daba ole toi no daba ole ongoru ongoru Chube takalin che toi kare, gire ene suge chege ulia Chube Oña kle toi che tale che ta gbe ma no gwangerugu chui kaire kairege, kaire che mo ta gbe no daba ole diali, ene nga suga noare Chubedi ama talla no kle che ta gbe toi age no trate ama takalin kare.  
\v 13 Suge trate chege Chube mo Oña gbu che tale malen suge chege trate ulia che kle toi Chube talla ole che Chubenu, suge chege kaire Chube Oña giti che kle toi ama takalin kare, Chube Oña che ta gbe suge Chube kle diali che ole che kira gbanga.  
\v 14 Cha ulita gwagedu mo gwagwa giti Jesucristodi nga dba ai giti, cha chagedu ama ole ule, cha ulitage sugedu trate Chube Jesucristo Ñenua Chube ama kagu nga dba ai giti kwian ulita jwanngale siere ji chugege age me no gdale, ene kwian ñage toi Chube ole.  
\v 15 Kwian bai kaire gerule Jesucristo giti Jesucristo Chube Kirolla, kwian ene tale Chube Oña kle toi Chube Oña kle ama ta gbe gerule ene no Jesucristo giti, kwian e kle mo ta gbe ulia toi Chube ole Chube kle toi ama tale. 
\p  
\v 16 Chube Oña giti Chube che ta gbe chke suge trate ulia Chube no che ole. Chube ta dbe no diali kwian ulita ole, kwian bai kaire toi Chube talla giti no daba na ole, kwian ene kle toi Chube talla ole Chube kle toi ama tale, kwian ene Chubenu.  
\v 17 Jesucristo Chube Kirolla toidu nga dba ai giti ama mo ta gbu no kwian ulita ole, ene kaire che Chube olia mo ta gbale chege nege tangle toi no kwian ole Jesucristo toidu kare. Ene chui bdaglige ji chuge chuia be chke che me ta dbadale kennga Chube ngeru che ta me sugedale moge jiske Chube gwa giti che agedu me no giti gdale.  
\v 18 Che ulita bai kaire Chubenu chége sugedale Chube no trate che ole malen che me mo ta dbadale kennga Chubedi ni tañachuge Chube be ji gbe tirare che giti che nu ageba me no gdale. Chube no no che ole malen Chube kle ta kennga jwen siere chege. Kwian bai kaire kle mo ta dbe kennga Chubedi, kwian enege me suge trate Chube ulia no ama ole Chube ama chudaboanga. 
\p  
\v 19 Ulia Chube mo ta gbu no che ole gwangerutabi malen che no Chube ole kaire che no daba na ulita ole.  
\v 20 Kwian gweale gerule: “Cha mo ta dbe no Chube ole”, gire sugeti ama mo ta dbe jainchke daba na Chubenudi, kwian ene me no Chube ole ama kle sole ama me kle gerule ulia ama no Chube ole, ama me no mo salengwli ole kaire ama me no Chube ole. Mo gwagwa giti kwian kle gwage dabadi, ama kle mo ta dbe me no daba ole ama me ñage gerule ama no Chube ole, ama me ñage gwage Chubedi mo gwagwa giti ama kle gwage dabadi kare, ¿mine kwian ene ñage gerule ama no Chube ole? Che mo ta dbe no Chube ole kaire che mo ta dbadale no daba Chubenu ole.  
\v 21 Jesucristo geru jigu gbaba che alin mo ta dbe no daba ole giti, geru e gerule ene: Kwian bai kaire mo ta dbe no Chube ole kwian ene mo ta dbadale no kaire daba Chubenu ole. 
\c 5  
\s1 Kwian Chubenu kirachke dolla Satanádi 
\s1 Chube kirallaske 
\p  
\v 1 Kwian ulita bai kaire mo ta gbe Jesucristo gai ulia, suge kwian enege ulia Jesucristo Chube Kirolla Chube nu ama kagaba kwian ulita jwanngale siere ji chugege age me no gdale, kwian ene Chube olia. Kwian Chubenu ulita bai kaire mo ta dbe no Chube ole kwian ene kaire mo ta dbe no kwian na Chube olia ulita ole.  
\v 2 Che mo ta dbe no ulia che Ñenua Chube ole che age ulita ama gerule kare, gire ene kaire suge trate chege che kle mo ta dbe no daba na Chubenu ulita ole daba e Chube olia kaire.  
\v 3-4 Che no Chube ole gire ene che agedale ulita diali Chube gerua gbaba gerule kare. Che mo ta gbe age Chube takalin kare gire ama kle che kira gbe age ulita diali ama kirallaske ene me mno che alin toi ama takalin kare, ama kirallaske che Chube olia ñage mo ta gbe me age me no dale kwian me Chubenu kle age kare. Uñale chege che mo ta gbe Jesucristo Chube Kirolla gai mo Chugagwallale che chudaboangale gire ene che ñage chege sugekare kwian me Chubenu kle age me no ulita karege, kwian me Chubenu kle mo ta gbe age me no diali Chube dollale che dolla Satanás kle ama ta gbe age kare, Chube kiralla giti che kirachke che dolla Satanádi.  
\v 5 Ulia cha gerule ba ole, kwian ulita bai kaire kle mo ta gbe Jesucristo gai ulia Chube Kirollale, kwian ene kirachke che dolla Satanádi Chube kiralla giti, kwian ene chege kiraske toi no trate Chube takalin kare kwian me Chubenu gwa giti. 
\s1 Ñage chke uñale trate kwiange 
\s1 Jesucristo ulia Chube Kirolla 
\p  
\v 6 ¿Mine ñage chke uñale chege Jesucristo ulia Chube Kirolla? Ñage suge trate chege ene ai giti: Chube Jesucristo kaitu nate ama Kirollale Jesucristo ñere chiske gire, Chube kerua nga ngaña giti sugedu kwiange nga dba ai giti chui ege gerule ulia Jesucristo ama Kirolla. Chube me gerudu Jesucristo giti Jesucristo ñeangu chiske chuiage alin allabi, agwa kaire Chube gerudu nabitaite ama Kirolla giti Jesucristo bebi jogekeda kruge gire. Chube Oña gerunga ulia diali ama kaire kle kwian ta gbe suge Jesucristo gai ulia Chube Kirolla.  
\v 7-8 Geru gbamai kle Jesucristo kaite nate ulia Jesucristo Chube Kirolla, geru gbamai ai kle gerule ene: Bitaite Chube kerua sugedu kwiange gerule Jesucristo giti Jesucristo ñeange chiske chuiage kaire bitabokedale Chube gerudu Jesucristo giti Jesucristo kledu bedre jogekeda kruge gire, kaire bitamaidale Chube Oña kle kwian ta gbe suge Jesucristo ulia Chube Kirolla. Geru ai gbamai Jesucristo giti kle gerule salengwli Jesucristo kaite nate Jesucristo ulia Chube Kirolla.  
\v 9 Che kle daba na keruchuge geru gweale ama kle trage giti che kle geru e keruchuge che kle geru e gai blikare ulia mo tale, che ñage Chube gerua ulia Chube Kirolla giti gai ma no blikare mo tale, Chube gerua Jesucristo giti ma ñanaske kwian geruage che Chube gerua gadale ma ulia kwian geruage geru e kle gbaba Jesucristo Chube Kirolla giti.  
\v 10 Che ulita bai kaire kle Jesucristo gerua gai ulia chege suge trate mo tale Jesucristo ulia Chube Kirolla. Agwa kwian bai kaire me kle Chube gerua Jesucristo giti gai ulia, kwian ene kle Chube gbakalin chege sole kare, kwian e me kle geru no Chube Kirolla giti gai ulia, ama kle Chube gerua Jesucristo giti gai geru ngwale kare.  
\v 11 Ai geru ulia Jesucristo giti che ulita alin: Chube che gbe toi diali chui tangle ama ole che Chube Kirolla Jesucristo gai ulia giti.  
\v 12 Kwian bai kaire Jesucristo gai ulia mo Chugagwallale kwian ene Chubenu toi diali chui tangle Chube ole, agwa kwian bai kaire me Jesucristo Chube Kirolla gai ulia mo Chugagwallale, kwian ene me Chubenu me ñage toi Chube ole chui tangle. 
\s1 Juan geru gbe bdagli kwian Chubenu ulita alin 
\p  
\v 13 Cha kle chada ai dege ba ulita alin bai kaire Chube Kirolla gai ulia mo Chugagwallale, ene suge trate bage ba ulita Chube Kirolla gaba ulia giti ba be toi diali chui tangle Chube ole nga ngaña giti.  
\v 14 Che ta kle ule Chube ole che ta kle biale age ulita Chube takalin kare gire che kle mo ta gbe gerule Chube ole lle gweale giti, sugedale chege ulia Chube be che keruchuge ama be age che alin be che chudaboi ulita che kle kade amage kare.  
\v 15 Uñale chege Chube kle che keruchuge che kle gerule ama ole gire, kaire ene agwe uñale chege Chube klebi age no che alin lle bai ulita che kle kade amage giti. 
\p  
\v 16 Chege chke uñale daba che bitalla Jesucristo giti gweale kle chage age me no gweale Chube dollale che gwage agwa ulia ama me kle mo ta gbe mo tke dole Chube ole chui tangle dale, gire daba e giti che gerudale Chube ole gire ene Chube be daba e ta me no blite be daba e gbe toi no chui tangle diali ama ole. Agwa kaire agwe chke uñale chege daba gweale kle mo tke dole Chube ole chui diali dale alin daba e kle age me no gweale mo gbe sugekare Chubege ama kle Chube gerua gai geru ngwale kare. Cha gerule ba ole, daba e kare giti ba me gerule Chube ole, daba e kle age giti ama kle mo gbe chege sugekare Chubege diali dale alin ama chege salengwli kwian jogebakeda kare Chube gwa giti.  
\v 17 Ulia age ulita me no, e diali Chube dollale, e diali me no Chube gwa giti. Agwa kaire age me no gweale giti kwian ñage tien gitiru ama mo ta blite naskuni Chube ole giti, gire ene ama me chege diali sugekare Chubege me chege kwian jogebakeda kare Chube gwa giti. 
\p  
\v 18 Uñale chage kwian mo ta gbaba Chube gai ulia kwian ene me mo ta gbe age me no Chube dollale, Chube Kirolla Jesucristo kwian ene ta manade no ama kle kwian ene kira gbe diali malen che dolla Satanás me ñage age me no kwian ene ole kirachke kwiandi, Chube ma kiraske che dolla Satanáge.  
\v 19 Uñale trate chege che Chubenu Chube che Chugagwalla che Chube gau ulia giti, agwa kwian me Chube gai ulia Satanás kwian ene ulita chugagwalla kwian ene age me no tanre Satanás takalin kare diali.  
\v 20 Che ulitage uñale trate Jesucristo Chube Kirolla chiu nga dba ai giti che alin, ama che ta gbu suge trate Chube mine, Jesucristo giti che Chube ulia uñe, Jesucristo giti suge trate chege Chube e Chube ulia. Chube Kirolla Jesucristo giti che Chubenu kaire che Jesucristonu, Jesucristo giti che be toi diali chui tangle Chube ole Jesucristo ole nga ngaña giti.  
\v 21 Ba ulita cha olia Jesucristo giti, cha no no ba ulita ole, cha gerule ba ulita ole, ba ulita mo ta manadale no ba me mo ta gbe chage geru ngwale nate ba me lle oña ngwale gai mo chubeale, ba ulita mo ta gbale Jesucristo ole. 
\p Geru ai ene ulita cha chada degu ba kwian Chubenu ulita alin. Che kle meni.