\id 1CO - Buglere NT -Panama 2008 (DBL -2013) 
\h 1 CORINTIOS 
\toc1 Pablo Nu Chada Degaba Gwangea Kwian Chubenu Una Corintomu Alin 
\toc2 1 Corintios 
\toc3 1Co 
\mt1 Pablo Nu Chada Degaba Gwangea Kwian Chubenu Una Corintomu Alin 
\mt2 Primera Carta de Pablo a los Corintios 
\ip Pablo kledu una Efesoge gire ama chada ai degangu kagale kwian ulita Jesucristo gerua gaba alin una kada Corintoge nga kweri Greciage. Pablo agali Chube gerua Jesucristo giti du ngeru una Corintoge, ama toidu eni chura gdaite giti bonga kwian una emu tke tangle Jesucristo giti. Una ege kwian tanre Jesucristo gerua gau ulia Pablo giti (Hechos 18:1-21). 
\ip Pablo jo siere una Corintoge gire ama jo chage una na tanrege gdaite gdaite Jesucristo gerua dbe kwian ulitage. Pablo kledu toi una Efesoge gire geru chku uñale Pabloge kwian Jesucristo gerua gaba una Corintomu me kle toi no Chube takalin kare, ama kle age me no tanre kwian me Chubenu kle age kare. Kaire kwian Chubenu una Corintomu agali chada kagu Pabloge Pablo ta gbe kle boi giti ulita kwian Chubenuske una ege. Geru e ulita chku nate uñale Pabloge malen Pablo chada ai degangu kwian Chubenu una Corintomu ulita ta gbagda me mo chuge ngwadi toi dare age me no Chube dollale. Chada ai giti Pablo ka bo mno ta no ole kwian kle age me no giti, kaire Pablo ama ulita tku tangle mo ta gbadale mo lite no ule Chube geruadi giti. 
\c 1  
\s1 Pablo gbi kage chada giti kwian Chubenu 
\s1 una Corintomu alin 
\p  
\v 1-2 Cha Pablo chada ai degange ba ulita Chubenu alin kle mo lite Chube geruadi una Corintoge: 
\p Chube tale Chube cha gau cha gbu Jesucristo gerua ketangale. Jesucristo gai ulia giti mo alin ba ulita chegu trate Chube gwage, Jesucristo giti ba ulita chegu Chubenu, kaire kwian tanre nga na ulitage chegu Chubenu Jesucristo giti, kwian ene ulita kle mo ta gbe ba kle mo ta gbe kare Jesucristo gai mo Chugagwallale gerule no no modi Jesucristo giti, Jesucristo che Chugagwalla, kaire Jesucristo ama ulita Chugagwalla. 
\p Cha Pablo ule daba Sóstenes ole gbi kage chada ai giti ba kwian Chubenu ulita una Corintomu alin.  
\v 3 Cha takalin Chube che Ñenua kaire Jesucristo che Chugagwalla age no ba ulita alin ba ulita ta gbe suga no diali. 
\s1 Chube age tanre no kwian tale Jesucristo giti 
\p  
\v 4 Uñale chage Chube agedu no no ba ulitaske Jesucristo giti, Chube agedu no no ba ulita alin, Chube ba ta blitu, Chube ba ulita ta gbu suge age Chube takalin kare, e giti cha gerule no no Chube ole ba ulita giti diali.  
\v 5 Jesucristo giti Chube ta ngle ketu ba ulitage lle boi no no kwianske Chube alin Chube takalin kare, Jesucristo giti geru ulia suge trate ba ulitage, kaire Jesucristo giti ba ulita ta molen geru e trage no no daba na ole.  
\v 6 Cha geru Cristo giti tragu ba ulita ole, geru e jo chke ba ulita tale, geru e ba ulita ta blitu, nege ba me kle mo ta gbe chage ba chagedu ngeru kare. Nege ba kle mo ta gbe chage me ngeru kare, e giti chke uñale trate kwian nage geru e me geru ngwale, geru e ulia kiraske, geru kwian ta blite chage nganake Chube takalin kare.  
\v 7 Chube ta ngle ketu ba ulitage, ene diali ba ñage chage gwangerugu geru uliadi lle boi no kwianske Chube takalin kare ba kle che Chugagwalla Jesucristo chieni chuia manade gire.  
\v 8 Chube be ba ulita ta gbe no diali gwangerugu ama geruadi, ene ba be kle biale chui bdagli alin, ene che Chugagwalla Jesucristo chieni chuia chke ba me skwen jiske Chube gwage.  
\v 9 Chube ba ulita gau ba ulita ta gbu mo Kirolla Jesucristo uñe, Chube ba ta gbu Jesucristo ole, Chube me takalin ba ta chege sugekare Jesucristoge. Chube agedu no ene ba ulita alin, Jesucristo giti ba ulita Chubenu malen ñage suge trate ba ulitage Chube be ba ulita manade no chui bdagli alin Chube gerudu kare, Chube gerudu be kwian amanu ulita manade no chui bdagli alin, Chube age ama gerule kare. 
\s1 Kwian Chubenu ulita mo ta gbadale tañachuge 
\s1 salengwli modi geru giti 
\p  
\v 10 Cha bitalla ulita Jesucristo giti, cha gerule ba ulita ole Jesucristo kiralla giti cha takalin ba ulita mo ta gbadale ule salengwli, ba me kira batadale modi geru giti, ba nodale daba ole, ba mo ta gbadale toi taingwli modi, ba mo ta gbadale tañachuge salengwli modi, ba mo ta gbadale gerule salengwli modi geru ulia giti.  
\v 11 Che kle gerule ene ba ole, ulia geru chku uñale chage daba Cloé bitalla giti ba ulita kle mo ta gbe kira bate modi geru giti me kle tañachuge salengwli.  
\v 12 Cha gerule ba ulita ole trate trate ba kle tañachuge kare giti, cha alin me no ba gweale kle tañachuge ai kare, ba gweale kle gerule: “Pablo alin gerule ulia, cha Pablo alin gerua gai ulia.” Gweale na kle gerule: “Apolos alin gerule ulia, cha Apolos alin gerua gai ulia.” Gweale na kle gerule: “Pedro alin gerule ulia, cha Pedro alin gerua gai ulia.” Gweale na kle gerule: “Cha alin allabi kle Cristo gerua gai ulia, cha alin allabi Cristonu ulia.”  
\v 13 ¿Ba ulita tañachuge Cristo ba jwannga siere ngle kle mo kaire kaire ba ulita alin? Ba kle tañachuge ene ba me kle tañachuge no, Cristo ba jwannga siere gdaitre alin kle ba ulita alin. Ba gweale kle gerule ba Pablo alin gerua gai ulia, ¿ba kle tañachuge cha Pablo jokeda ba ulita agedu me no giti? ¿Ba jo ñeaba chiske gaba ngaña chigage cha kalla giti? Me ene ulia ba kle tañachuge kare.  
\v 14-15 Nga suga no chadi cha me ba ulita ñeu chiske gau ngaña chigage, ene ni ba gdaite ñage gerule cha ba ñeu chiske mo kalla giti. Cha daba boke kada Crispo kaire Gayo alin ñeu chiske, cha agedu ene cha agedu Cristo kalla giti agwa cha me agedu mo kalla giti.  
\v 16 Kaire cha Estéfanas Estéfanas bitalla ñeu chiske Cristo kalla giti, daba e alin allabi cha ñeu chiske agwa cha me tachke daba na giti, cha tañachuge kwian dare cha me su ñe chiske.  
\v 17 Cristo me cha gbu chage kwianske kwian ñe chiske, Cristo me lle e kare ketu chage boadale, agwa ama cha gbu geru ama giti kete kwiange, cha kle geru Cristo giti trage kwian ole cha me kle gerule mo ta giti sugekare cha tañachuge kare, me ene, cha kle gerule no trate Cristo jokeda kruge giti Chube cha ta gbe gerule kare, ene geru Cristo giti ñage suge trate kwiange ñage kwian ta blite. Cha gerule mo ta giti cha tañachuge kare cha kle gerule ngwale, ene geru ulia Cristo giti me ñage suge kwiange me ñage kwian na ta blite.  
\v 18 Che ulita Chubenuge suge geru Cristo jokeda kruge giti geru e no geru kiraske, uñale chege Cristo jokeda kruge giti Chube che jwen siere ji chugege che agedu me no gdale. Agwa kwian me Chubenu ama Cristo jokeda kruge gerua gai ngwale, kwian ene kle jogebanga geru uliage, kwian ene be joge sugekare Chubege ji chugale.  
\v 19 Kwian ene geru nga dba ai giti alin uñanga, ama giti Chube gerua degaba unsuialin gerule: 
\q1 “Kwian mo ta gbanga no diali geru nga dba ai giti alin jwen tanre, kwian ene tachke ngle blike geru giti, kwian ene ta molen tanre geru nga dba ai giti ole, agwa chui be chke gire Chube be kwian ene ulita ta gbe suge e ulita ngwale Chube gwage.” 
\m Chube gerua degaba unsuialin gerule ene.  
\v 20 Kwian geru nga dba ai giti uñanga trate no ulita, kaire kwian geru nga dba ai giti jwannga tanre diali ama takalin kare, kaire kwian geru nga dba ai giti traganga daba na ole diali, kwian ene ulita ta molen tanre geru nga dba ai giti alin ole, agwa ama me Chube gerua Cristo giti gai ulia, Chube gwage kwian ene me ta molen dale, kwian ene ulitage Chube gerua me suge.  
\v 21 Kwian ta ngle molen geru nga dba ai giti alin ole, ta ene giti kwian kle tañachuge ama ñage Chube uñe, agwa me ene kwian kle tañachuge kare, Chube talla ngle ole Chube mo ta gbu age nganake kwian kle tañachuge karege, Chube mo ta gbu kwian jwen siere ji chugege age me no gdale geru Cristo jokeda kruge giti me kwian ta ngle molen giti. Kwian me geru Cristo giti gai ulia, kwian ene alin geru e ngwale, agwa kwian geru e gai ulia, geru e ñanaske kwian ene alin, Cristo alin giti kwian Chube uñe, Cristo alin giti Chube kwian jwen siere ji chugege age me no gdale. 
\p  
\v 22 Kwian israelita tanre me geru Cristo giti gai ulia, ama takalin Chube lle daga ngwale no tanre dodade mo kiralla giti ama gwa giti, ene e giti ama tañachuge be Chube gerua Cristo giti gai ulia. Kaire kwian griego tanre me geru Cristo giti gai ulia, ama ulita kle mo ta gbe ma no diali geru gweale jagere jinade jwandale, ene kwian griego tañachuge ama ñage Chube uñe.  
\v 23 Agwa che ulita Chubenu kle geru Cristo jokeda kruge giti gai ulia, uñale chege Cristo alin giti che Chube uñe, che ulita kle geru e trage kwian na ulita ole. Geru Cristo jokeda kruge giti kwian israelita tanre me ta chege no, ama me no geru e ole. Kaire kwian me israelita tanre tañachuge geru Cristo jokeda kruge e ngwale, ama tañachuge: “¿Chema ñage Chube uñe jogeda ene giti?”  
\v 24 Agwa kwian gweale israelita, kaire griego, Chube nu kwian ene gaba mo alin, Chube kwian ene ta gbu geru Cristo giti gai ulia, kwian ene ulitage uñale trate trate Cristo giti ama Chube uñe, suge ama ulitage Chube kira molen Cristo kira e amaña molen, Chube ta molen Cristo ta e amaña molen.  
\v 25 Kwian me Chubenuge ñage suge Chube agedu Cristo giti e ngwale e me kiraske, agwa me ene, Chube ta ma ngle molen kwian ulitage, Chube kira ma kweri molen kwian ulitage, ta ngle ene giti kira kweri ene giti Chube agedu Cristo giti kwian ulita alin, Chube agedu ene Chube me agedu ngwale.  
\v 26 Ba cha bitalla Cristo giti, ba ulita tachkedale mo giti, ngeru Chube bebi ba ulita ta gbe Cristo gai ulia uñale bage ba ulita me kwian kweri kwian na gwage kwian tañachuge kare, ba ulita me kwian ta ngle molen kwian na gwage kwian tañachuge kare, ba ene gire Chube ba gau mo alin. Ba bedre alin kwian ta ngle molen kwian na gwage kwian tañachuge kare, ba bedre alin daba chugagwalla, ba bedre alin daba chugagwalla bitalla.  
\v 27 Kwian me ta ngle molen kwian na gwage kwian tañachuge kare, Chube kwian ene gau mo alin, Chube kwian ene ta gbe ngle Chube geruadi, ene kwian talla ngle geru nga dba ai gitige be ibule mo giti, be suge amage kwian me talla ngle gerule ma kweri ma ngle Chube giti kwian talla ngle nga dba ai gitige. Kwian me kweri me kira molen kwian na gwage kwian tañachuge kare, Chube kwian ene gau mo alin, ene kwian kweri kwian geru mauña nga dba ai giti be ibule mo giti, be suge amage ama soli Chube gwage.  
\v 28 Kwian me ñanaske kwian na gwage, Chube kwian ene gau mo alin, ene kwian kle mo gai ma kweri daba na ulitage be ibule mo giti, be suge amage ama kle age ulita mo kirallaske e ngwale Chube gwage, Chube me kwian gai mo alin kwian kle age no giti.  
\v 29 Chube kle age ene kwian ole, ene ñage suge kwian ulitage ni kwian gdaite ñage mo gbe ma kweri Chubege ni kwian gdaite kwian Chubenu mo kira giti.  
\v 30 Chube agali che ulita gau che ta gbu Jesucristo gai ulia, ene che talla chege diali Jesucristo ole. Jesucristo giti Chube che ta gbe ngle, kaire Jesucristo giti Chube che jun siere ji chugege che agedu me no gdale, Jesucristo giti che chege trate Chube gwage, Jesucristo giti che kle biale joge toi Chube ole bdagli.  
\v 31 Chube agali agedu ene ulita ba ulita alin Jesucristo giti, malen ba ulita agedale Chube gerua degaba unsuialin gerule kare, chada e gerule: 
\q1 “Kwian ta mo ta dbakalin gerule no kweri trate kle age mo kiralla giti, ma no kwian ene mo ta dbadale gerule no kweri Chube giti Chube kle ama ta gbe age, me ama agali kle mo ta gbe age.” 
\m Chube gerua degaba unsuialin gerule ene. 
\c 2  
\s1 Pablo geru Jesucristo giti dbe ta trate ole 
\s1 kwian Chubenuske 
\p  
\v 1 Ba ulita cha bitalla Jesucristo giti, uñale ba ulitage cha kledu baske geru Jesucristo giti dbe cha geru Jesucristo giti tragu ba ulita ole, geru e kledubi Chube ole unsuialin, ni kwian gdaite e uñu. Cha gerudu ba ole geru e giti ta gude che ulita kle gerule kare, cha me gerudu ba ole kwian geru uñanga kweri kle gerule kare.  
\v 2 Cha kledu ba ulitaske cha mo ta gbu geru Jesucristo giti alin trage ba ulita ole, cha mo ta gbu trate Jesucristo jokeda kruge trage ba ole, cha tadukalin Jesucristo jokeda kruge gerua chke uñale trate ba ulitage.  
\v 3 Cha jo chke geru dbe ba ulitaske ta kwachie ole, cha ta jwatu mo giti geru Jesucristo giti dbe baske, sugedu chage cha me kira molen, sugedu chage cha me ñage Chube gerua Jesucristo giti trage trate ba ole.  
\v 4 Agwa cha mo ta gbu geru Jesucristo giti trage ba ulita ole, cha geru Jesucristo giti du ba ulitaske cha me gerudu ba ole kwian geru uñanga kweri gerule kare ene ba ta jwlitedale gerudi. Agwa cha me agedu ene, cha mo ta chugu ngwadi Chube Oñage, ene cha ñadu gerule ba ole Chube Oña kiralla giti me mo kiralla giti, ene Chube Oña ba ta blitu gerudi,  
\v 5 ene Chube Oña kiralla giti suge trate bage geru Jesucristo giti e Chube gerua ulia, geru e me geru ngwale kwian nga dba ai giti gerua, me ene dale, ba kle mo ta gbe geru Jesucristo giti gai ulia mo alin, geru e Chube gerua no kiraske. 
\s1 Chube Oña kwian ta gbe suge Chube giti 
\p  
\v 6 Kwian nu mo ta gbaba sbali geru Jesucristo giti gai ulia, kwian ene ulita nu ta jogeba chke Jesucristo geruadi, kwian ene ole cha geru ma mno Jesucristo giti trage, geru Jesucristo giti me che mo salengwli gerua ni kwian chugagwalla nga dba ai giti gerua, kwian chugagwalla ulita nga dba ai giti gdaite gdaite be joge tangle, ama me chege kwian chugagwallale diali chui tangle.  
\v 7 Geru Jesucristo giti, e Chube gerua, geru e kledu Chube ole Chube bebi nga dba ai dodade gire, sbali geru e kledu skwlenre Chube ole kwiange, agwa nege cha kle geru e trage kwian Chubenu ulita ole, Jesucristo giti che ulita Chubenu be toi Chube ole bdagli nga ngaña giti Chube kle ngwadi.  
\v 8 Kwian chugagwalla nga dba ai giti ni gdaitege sugedu Jesucristo ulia kwian Chugagwalla ma kweri Jesucristo ulia Chube Kirolla kagaba nga dba ai giti. Sugedu kwian chugagwallage Jesucristo Chube Kirolla, ene ama me Jesucristo gbu kruge ngaña gwadaleda, agwa kwian chugagwalla nga dba ai giti me sugedu amage Jesucristo giti.  
\v 9 Me sugedu kwian enege Chube agedu no ngle kwian alin Jesucristo giti, Chube gerua degaba unsuialin gerule be boi ene giti, chada e gerule: 
\q1 “Chube be age no ngle kwian alin bai kaire mo ta dbe no ulia Chube ole, agwa mi suge kwian me Chubenu gdaitege Chube kle age ulita giti, kwian talla giti kwian tañachuge kare ni suge trate kwian gdaitege Chube age giti.” 
\m Chube gerua degaba unsuialin gerule ene.  
\v 10 Me sugedu kwian chugagwalla nga dba ai gitige Jesucristo giti, agwa che ulita Chubenuge suge Jesucristo giti, Chube Oña che ulita ta gbu suge Chube kle age no ngle che ulita alin Jesucristo giti, uñale trate Chube Oñage Chube kle age ulita giti, Chube Oña Chube talla uñe trate ulita.  
\v 11 Kwiange kwian na talla me uñale, kwian agalige alin mo talla uñale, ene kaire kwiange Chube talla me uñale, agwa Chube Oñage alin Chube talla uñale trate.  
\v 12 Chube mo Oña ketu che ulita Chubenuge, ene Chube Oña giti suge trate chege Chube kle age no no che alin Jesucristo giti, che salengwli me kle che ta gbe suge ene, Chube Oña alin che ta gbe suge Chube giti.  
\v 13 Geru ai cha kle gerule kare ba ole geru e me cha talla me cha gerua, cha me geru e gweale jun mo ta giti gballa cha tañachuge kare, me ene, geru e Chube Oña kle kete chage, Chube Oña kle cha ta gbe geru e trage ba kwian ulita Chubenu ole, Chube Oña kle ba tale Chube Oña kle cha tale kare, ene geru Chube giti cha kle gerule kare suge bage ulita.  
\v 14 Kwian me Chubenu, Chube Oña me kle kwian ene tale, kwian enege geru Chube giti me suge ama me geru Chube giti gai ulia, kwian ene kle geru Chube giti gai geru ngwale kare, Chube Oña alin kwian ta gbe suge Chube giti, kwian me Chube Oña molen me ñage suge kwian enege Chube giti.  
\v 15 Agwa kwian Chubenu Chube Oña molen ama tale, Chube Oña kwian ene ta gbe suge ulita trate Chube giti, kwian Chubenu talla ene me suge kwian me Chubenuge.  
\v 16 Chube gerua degaba unsuialin gerule: 
\q1 “¿Chema che Chugagwalla Chube talla ulita uñe? ¿Chema ñage ama tke tangle? Ni kwian gdaite.” 
\m Chube gerua degaba unsuialin gerule ene Chube giti. Ulia kwian gballa me ñage Chube talla uñe, agwa Cristo giti Chube Oña che ulita Chubenu ta gbe Cristo mine, ene che tañachuge Cristo tañachugu kare chagedu kare nga dba ai giti. 
\c 3  
\s1 Kwian Chube gerua Jesucristo giti dbe kwian nage 
\p  
\v 1 Cha bitalla Cristo giti, Chube Oña kle ba tale agwa ba me ama chugu ngwadi ba ta gbe kiraske Chube geruadi, malen cha me ñadu gerule ba ole kwian Chube gerua uñanga sbali ole kare, cha gerudu ba ulita ole ta gude cha gerule kirogwa ole kare, ba bebi ta joge chke trate Chube geruadi, ba ulita ta kirogwa kare kirogwa kle tañachuge kare, ene ba ta Cristo geruadi.  
\v 2 Kirogwa soli me ñage bligda mno gute, kirogwa soli jusuli alin jai. Ene kaire ba ta kirogwa kare Chube geruadi, ba ta me kledu biale Chube gerua ulita keruchuge, e me ñadu suge bage malen cha me Chube gerua mno tragu ba ole, cha gerudu ba ole geru me mno giti ene geru suge bage, Chube gerua mno me sugedu bage, ni nege Chube gerua mno suge bage dare.  
\v 3 Ba me kle Chube Oña chuge ngwadi ba ta gbe suge, ba Chubenu agwa ba kle mo ta gbe tañachuge kwian me Chubenu kle tañachuge kare. Ba ulita Chubenu me kle mo talla me no mlienga, talla me no kle diali ba ulita tale, ba kle kira bate modi, ba kle mo ta dbe me no dabadi daba lle molendi daba kle age no giti. Ba age ene ba kle age kwian me Chubenu kle tañachuge kare kwian me Chubenu ta agekalin kare, ba kle age ene ba me kle mo ta gbe tañachuge age Chube Oña ba ta gbe age kare, malen ba gdaite gdaite kle tañachuge nganake.  
\v 4 Ba gweale kle gerule: “Pablo alin gerule ulia, cha Pablo alin gerua gai ulia.” Ba gweale na kle gerule: “Apolos alin gerule ulia, cha Apolos alin gerua gai ulia.” Ba gerule ene ba kle age kwian ulita me Chube uñe kle tañachuge kare kle age kare.  
\v 5 Cha Pablo kaire Apolos bonate salengwli lle boanga Chube alin, cha Pablo me ma kweri Apologe, Apolos me ma kweri chage, cha boke lle bo mo kaire kaire Chube gerua amaña dbe Chube cha ta gbu lle boi kare, cha giti Apolos giti ba Chube gerua keruchugu ba geru gau ulia.  
\v 6 Cha jo Chube gerua dbe ngeru baske, Apolos jo cha nate geru amaña trage ba ole ene geru sugedu ma no bage, agwa Chube ba ulita ta blitu gerudi, Chube ba ta gbu ene geru sugedu trate ulita bage. E salengwli cha chude tku kare, Apolos chi dreunnga chude giti kare, agwa Chube chude ulita gbu tige kare.  
\v 7 Cha Chube gerua dbanga ngeru baske, Apolos ba ta gbanga geru e uñe ma trate. Ni cha boke gdaite ma kweri dabage ba ta gbanga, agwa Chube alin ba ta gbanga suge trate trate ulita geru giti ene ba mo ta blitu gerudi geru gai ulia.  
\v 8 Cha Pablo kaire Apolos cha boke salengwli, gdaite me ma no nage Chube gwage, cha boke Chube gerua dbe giti Chube be e ñanalla kete cha bokege lle boi no mo kaire kaire ñanale.  
\v 9 Cha gdabonate lle boanga Chube alin Chube gerua amaña dbanga baske, ene cha boke giti Chube gerua jo chke ba ulita tale. Ba ulita Chubenu ba ta dbi kare, Chube gerua chude kare, Chube gerua jo chke ba tale salengwli chude joge chke dbiske kare. Kwian chude ngama mananga chude manade no ama chude juge nate, ene chude ñage tige ma no. Ene kaire cha boke kle ba ulita chudaboi Chube geruage ene Chube age no ba tale, ene bedre bedre Chube ba ta gbe ma trate ama geruadi. 
\p Kaire ba ulita Chubenu ba ta u kare.  
\v 10 Kwian u dodanga no noge uñale u dodade no, ngeru ama bubita no tke kejre dbige u dodangwa. Ene kaire cha Chube gerua dbanga no, Chube cha gau Chube ta ketu chage, ta e amaña giti cha ba ulita ta gbu chke trate Jesucristo giti, e salengwli kwian u dodanga no bubita no tkanga kejre dbige kare. Nege kwian daba tkanga tangle kle baske ba chudaboi geru giti, ene geru kle suge ma trate bage, ene ba ta ñage chege ma kiraske Chube geruadi salengwli u chege dodaba no kare. Kwian ulita bai kaire kle ba tke tangle geru giti mo ta gbadale geru no ulia alin trage ba ole.  
\v 11 Kwian geru amaña kete bage Jesucristo giti cha geru ketu bage kare, kwian ene kle age no kle gerule ulia, Jesucristo alin giti kwian chege Chubenu.  
\v 12 Kwian geru nganake dbe bage, geru e ngwale, e me jage, e me ba ta gbe suge Chube giti. Agwa kwian geru ulia Jesucristo giti dbe bage trage ba ole, geru e jage diali chui tangle, geru e ba ta gbe suge ma no Chube giti.  
\v 13 Jesucristo chieni chuiage be chke uñale trate trate kwian Chube gerua dbanga ulitage ama geru Jesucristo giti du no kwiange Chube takalin kare o me, chui ege Chube be gerule trate trate ama gerua dbanga ulita ole bai geru Jesucristo giti du no ama alin nga dba ai giti bai me geru Jesucristo giti du no ama alin.  
\v 14 Kwian Chube gerua dbanga bai kaire Chube gerua du no Chube alin nga dba ai giti daba na ta gbe suge Jesucristo giti, geru dbanga ene giti daba na geru Jesucristo giti gau ulia, daba ene chege Chubenu diali chui tangle, chui bdaglige geru dbanga no ene be geru Jesucristo giti du no ñanalla gai.  
\v 15 Agwa kwian Chube gerua dbanga me Chube gerua du no Chube alin nga dba ai giti, geru dbanga ene Chube gerua du ngwale, geru dbanga e giti daba na me Jesucristo uñu, chui bdaglige ama agali be chege toi Chube ole diali, agwa Chube mi gerule no ama giti, ama mi Chube gerua du ñanalla gai. 
\p  
\v 16 Uñale ba ulita Chubenuge Chube alin ba ulita talla Chube toingwalla, Chube Oña kle toi ba tale, ba tachkedale e giti.  
\v 17 Kwian gweale ba Chubenu ta gbe siere Jesucristoge ba ta gbe age me no Chube dollale, Chube be ji gbe kweri kwian ene alin. Chube toingwalla no trate, ba ulita Chubenu ba talla Chube toingwalla, malen ba agali mo ta manadale no trate diali Chube alin. 
\p  
\v 18 Ba ulita gdaite me mo anblitadale agali, ba ulitaske gweale gdaitege suge moge geru nga dba ai giti uñanga tanre, geru e uñe giti kwian tañachuge ama ta ngle molen, ma no kwian ene mo gbe me geru uñanga kare, ene ama ñage tachke ma ngle Chube gerua giti, ene kwian ta molen ulia.  
\v 19 Kwian ta ngle molen geru nga dba ai giti alin ole, Chube gwage e ngwale e me ñanaske. Chube gerua degaba unsuialin gerule kwian ta ngle ole giti, chada e gerule: 
\q1 “Kwian ta ngle molen geru nga dba ai giti alin ole tañachuge ama ñage age ulita tañachuge kare, agwa Chube me kwian ene chuge ngwadi age kwian ta agekalin kare.” 
\m  
\v 20 Kaire Chube gerua degaba unsuialin gerule: 
\q1 “Kwian ta ngle molen geru nga dba ai giti alin ole, kwian ene talla Chube gwage ngwale.” 
\m Chube gerua degaba unsuialin gerule ene kwian ta ngle ole giti.  
\v 21-23 Chube alin kwian ta gbe chke ngle, malen ni kwian gdaite gerudale no mo salengwli giti, ma no gerule no Chube giti, Chube alin kwian ta gbe chke ngle no. Ba ulita Chubenu ni ba gdaite gerudale dare no kwian gweale giti, ba me gerudale dare: “Pablo alin gerule ulia, cha Pablo alin gerua gai ulia.” Me gerudale: “Apolos alin gerule ulia, cha Apolos alin gerua gai ulia.” Me gerudale: “Pedro alin gerule ulia, cha Pedro alin gerua gai ulia.” Ba ulita me gerudale ene cha gdamai giti ni kwian Chube gerua dbanga na gweale giti: “Ama alin geru ulia dbanga, malen cha ama alin gai ulia.” Ba me ñage gerule ene. Ba ulita Cristonu, Cristo Chubenu, Cristo alin giti Chube kle age tanre no ba ulita amanu alin. Cha Pablo kaire Apolos kaire Pedro cha gdamai salengwli, cha me ma kweri Apologe ni Pedroge, ni gdaite ma no daba nage, Chube cha gdamai gau Cristo cha gdamai kagu ama gerua amaña dbe ba ulitaske, Cristo giti cha gdamai lle boanga Chube alin ba ulitaske. Kaire Cristo giti lle ulita no kle nga dba ai giti ba ulita alin toigda. Cristo giti ba ñage toi no nga suga no ole nga dba ai giti. Cristo giti ba me tañachugadale jogeda giti, uñale bage ba jogeda ba be joge toi Chube ole. Cristo giti ba ñage toi no Chube takalin kare nga dba ai giti. Cristo giti ba ñage kle biale chui manade gire ba be kle Chube ole diali chui tangle. 
\c 4  
\s1 Kwian ulita Jesucristo gerua dbanga kwian nage 
\s1 mo ta gbadale lle boi no Chube alin 
\p  
\v 1 Ba ulita tachkedale cha ulita Jesucristo gerua dbanga bage giti, ba cha ulita gadale ulia Jesucristo gerua dbangale lle boangale Cristo alin. Chube cha ulita gau gbu lle boi mo alin daba tke tangle Chube gerua Cristo gitige, ene cha ulita giti geru Cristo giti ñage chke uñale kwian me geru uñege.  
\v 2 Suge trate cha ulitage Chube kwian gai lle boi mo alin, kwian ene ulita mo ta gbadale lle boi no ulita diali Chube alin Chube takalin kare.  
\v 3 Ba gweale gerule cha giti cha kle lle boi no o cha me kle lle boi no Chube alin, cha me tallade e giti, ni cha tallade kwian na ulita gerule no o gerule me no cha kle age giti Chube alin, ni cha agalige ñage suge trate mo giti cha kle lle boi no o cha me kle lle boi no Chube alin.  
\v 4 Cha tale cha suge cha me jiske cha kle lle boi no Chube alin, e me gerule Chube gwage cha kle age no trate, uñale chage che Chugagwalla Cristo alin allabi ñage gerule cha ole cha kle lle boi no Chube alin o cha me kle lle boi no, ama alinge uñale trate.  
\v 5 Cristo alinge uñale trate kwian lle boanga Chube alin talla mine, Cristo alin ñage gerule trate kwian ene ulita kle age giti kwian kle lle boi no Chube alin o me kle lle boi no, ni kwian gdaite ñage gerule trate daba na giti kle lle boi no Chube alin o me kle lle boi no. Malen cha gerule ba ulita ole, ba me gerudale cha ulita lle boanga Chube alin giti blike kle lle boi no o me kle lle boi no Chube alin, ba manadale, nege cha ulita lle boanga Chube alin talla ulita kle skwlenre bage agwa che Chugagwalla Cristo chieni chuiage kwian lle boanga ulita talla ulita be chke uñale nate, chui ege Cristo be gerule trate ulita kwian lle boanga Chube alin ulita giti bai lle bo no Chube alin bai me lle bo no Chube alin, chui ege Chube be gerule no no lle boanga no ulita ole lle boanga lle bo no ama alin giti. 
\p  
\v 6 Cha bitalla ulita Cristo giti, cha gerudu tanre ngeru ba ole mo giti kaire Apolos giti, e giti cha ta ba chudaboakalin suge trate ba me ñage daba Chubenu chugagwalla gdaite gai ma no daba Chubenu chugagwalla nage. Cha takalin suge trate bage ba ulita agedale Chube gerua degaba unsuialin gerule kare, ba mo ta gbadale age chada e alin gerule kare, ene ba gdaite gdaite me daba Chubenu chugagwalla gdaite gai ma no daba Chubenu chugagwalla nage, ene ba ulita Chubenu chege tañachuge salengwli, ba ulita chege mo ta dbe no daba na ulita ole.  
\v 7 Ni ba gdaite tañachugadale mo giti ma no ma kweri daba na ulitage, ba agali me mo dodadu, ba agali me ta ketu moge age ba kle age kare, Chube ba dodadu Chube ba ta gbu mo kaire kaire ama takalin kare. Chube ta ngle ketu bage age gweale ma no daba nage e me gerule ba ma no daba nage, me ene, e gerule Chube ta no ole agedu no ba alin, ba gerudale no no Chube alin giti allabi.  
\v 8 Agwa ba ulita me kle mo ta dbe ene gerule no Chube alin giti, ba gweale kle tañachuge no kle gerule no mo alin giti, bage suge ba alin allabi no kweri ta ngle molen, bage suge ba Chube gerua ulita uñe trate, bage suge ba Chube gerua ulita mauña, ba tañachuge ba alin allabi ñage kwian ta gbe geru e giti, bage suge cha ulita Jesucristo gerua ketanga kwiange cha ulita kwian ngwale, ba me takalin cha ulita ba chudaboi dare geru giti. Ulia ba Chube gerua ulita uñe trate ba geru e ulita mauña, cha alin e no, ba ene gire cha ñage mo ta dbe nga suga no ole Chube gerua dbe kwianske ule ba ole, agwa me ene, kwian Chube gerua uñanga ulia ama me kwian ene ba kle tañachuge kare.  
\v 9 Chage suge Chube kle cha ulita gbe Jesucristo gerua ketanga ba nate. Cha ulita Jesucristo gerua ketanga bebi toi no ba kle toi kare, kwian kle ba gai kwian no kweri kare, agwa kwian me kle cha ulita gai ene. Cha kle geru Cristo giti trage kwian ole, kwian kle cha ulita gbe boi daga ngwale geru e dbe giti, kwian ta cha ulita gwakalinda, kwian nga dba ai giti kaire lle boanga Chube alin nga ngaña giti gwage cha ulitadi cha kwian me no kare.  
\v 10 Ba ulitage suge ba ta ngle molen, ba tañachuge ba geru ulita Cristo giti uñanga trate, agwa cha ulita geru Cristo giti traganga, cha geru Cristo giti dbe giti ba tanre gwage chadi cha kwian ngwale me ta molen kare. Ba ulita kiraske kwian na gwage, agwa cha ulita kira me ba gwage. Kwian na gerule no ba giti ba gai dage, agwa cha ulita me ene ba gwage, ba gerule me no cha ulita giti cha ulita gai kwian ngwale kare.  
\v 11 Cha ulita kle boi tanre daga ngwale, diali cha ulita bli chuge tanre, sie chuge tanre, ñometra me kaire mo ngama tkagda, u me toingwa, kwian age me no tanre cha ulita ole,  
\v 12 cha ulita mo kira giti skwatige sketangle lle boadale mo kodi ene cha ñage bligda molen. Kwian cha ulita oña boi daga ngwale, gwangoguda cha gerule no kwian ene ole me ama oña boi. Kwian chage cha ulita nate cha ulita gbale boi daga ngwale, cha ulita mo ta gbe jage, cha me tallade kwian kle age me no cha ole giti.  
\v 13 Kwian gerule me no cha ulitadi, cha ulita jainnga kwian ene kalen ta no ole, cha ulita gerule no gwangoguda. Kwian ulita cha ulita gai lle me no mliabanga kare, cha ulita ngwale kwian ulita gwage, cha me ñanaske kwian ulita alin. Cha ulita ole sbali kledu boi ene, kle boi kaire nege tangle cha ulita ole. 
\p  
\v 14 Cha kle chada ai degange ba ulita alin cha kle gerule kare ba ulita ole, cha me kle ba ta gbe ibule ba kle age giti, agwa cha kle ba chudaboi ba ta gbe suge tachke gwangerugudba Chube takalin kare, cha kle gerule kare ba ole mo kirogwallanu kare, cha no no ba ulita ole.  
\v 15 Kwian ngle ngle kle ba tke tangle Cristo giti, agwa cha geru Jesucristo giti du baske ma ngeru kwian daba tkanga tangle ulitage, malen cha alin allabi ba ñenua kare ba ulita ta gbanga geru Jesucristo giti gai ulia.  
\v 16 Ba ulita cha kirogwalla kare Jesucristo giti, cha ba ulita ñenua kare, cha takalin ba ulita mo ta gbe chage Jesucristo ole cha kle chage kare.  
\v 17 Ba ulita chagedale cha kle chage kare mo ta gbe Jesucristo ole mo ta gbe age Jesucristo takalin kare. Nege cha me kle baske ba me ñage gwage chadi cha kle chage mine ulita, malen cha Timoteo kagu ba ngwadi ba ulita ta gbe chke cha giti, Timoteo cha kirolla kare che Chugagwalla Jesucristo giti, cha no no ama ole, ama diali kle mo ta dbe no cha ole kaire Chube ole. Timoteo be gerule ba ulita ole cha kle gerule mine kwian Jesucristo gaba ole nga ulitage, baini kaire cha kle joge chke ngwadi cha kle kwian Jesucristo gaba tke tangle Jesucristo giti, Timoteo be gerule e giti ba ulita ole.  
\v 18 Ba ulitaske gweale kle tañachuge ba kle age no ulita, ba gweale ene suge kweri moge gerule no mo giti, ba ene kle tañachuge cha kennga joge chke agali baske gerule ba ole ba kle age giti malen cha Timoteo kagu. Agwa me ene ba gweale kle tañachuge kare.  
\v 19 Chube takalin, me sbali cha be joge llani ba ulitaske, mo gwagwa giti cha be ba kwian kle tañachuge ene uñe, ene be chke uñale chage ulia ba kle gerule Chube kiralla giti o ba kle gerule alin ba kle tañachuge kare gballa mo ta giti.  
\v 20 Kwian kle mo ta gbe Chube ole Chube gai mo Chugagwallale ulia, kwian ene me gerule alin no mo giti kle age giti, kwian ene kle Chube kiralla gai mo ta gbe age no diali Chube takalin kare.  
\v 21 ¿Ba ulita alin bai ma no? ¿Ma no ba alin cha joge chke llani baske ka boi mno ba ole ba kle age giti? ¿O ma no ba alin cha joge chke llani gerule ba ole taingwli ta no giti ba kle age giti? 
\c 5  
\s1 Daba gdaite agenga me no gbale ji chuge 
\s1 sugekare daba Chubenu kle mo litege 
\p  
\v 1 Chku uñale chage daba gweale giti, daba e geru tragu cha ole ba ulita Chubenuske kwian gdaite kle toi mo ñenua muiralla ole mo muiralla kare, e me no me no, ni kwian me Chube uñe mo ta gbe age toi ene ama kle toi kare.  
\v 2 Ba ulitaske kwian gdaite kle age ene me no me no, ni ba gdaite kle tallade e giti, ba ulita kle mo ta dbe tañachuge ulita kle chage no, agwa me ene. Sugedale ba ulitage ulita me kle chage no, ba ulita mo ta dbadale olire tanre kle boi giti baske. Gdaite kle toi mo chebigdalla ole mo muiralla kare kle mo lite ule ba ulita ole Chube geruadi, ba ama kagadale siere blike ba ulita kle mo litege.  
\v 3-4 Ulia cha me kle ba ole ule llani ba ulita kle ngwadi, agwa chage suge mo tale cha kle ba ulita ole llani kare, cha kle tañachuge tanre kle boi baske giti. Cha gerule ba ole chada ai giti cha kle ba ole ule llani kare, che Chugagwalla Jesucristo kiralla giti cha gerule trate ba ulita ole onbre gdaite giti kle toi mo chebigdalla ole mo muiralla kare, onbre e jiske Chube gwage, ba mo lite chuia gbadale gerudale onbre jiskenga e ole, chui ege cha talla be kle ba ole, che Chugagwalla Jesucristo kiralla giti ba onbre e kagadale siere ba ulita Chubenuge,  
\v 5 ba ama chugale ngwadi sugekare toi dolla Satanás takalin kare. Gire onbre e be age tanre me no Satanás takalin kare, e giti ama be boi tanre daga ngwale, boi daga ngwaleske ama ñage tachke Chube giti mo ta blite Chube ole joge siere ama kle age me noge, ene che Chugagwalla Jesucristo chieni chuiage ama oña be joge toi Chube ole diali chui tangle. 
\p  
\v 6 Ba ulitage suge ba kle age no ulita, ba kle tañachuge ba ulita kwian no trate, agwa me ene ba kle tañachuge kare, baske kwian agenga me no kle. Uñale ba ulitage levadura sidri harina ngleske harina ngle ulita gbe sie kweri, ene kaire kwian gdaite agenga me no kle baske, bedre bedre kwian ene talla me no joge chke ba tale, ene bdagli ba ulita chege ta me no ole age salengwli kwian ene kare.  
\v 7-8 Ba ulita bebi Chube uñe gire ba ulita talla sugaska, ba agedu me no diali ba talla sugaska ba ta gbu age kare. Jesucristo jokeda che ulita agedu me no giti, malen nege che ñage toi nganake age no Chube takalin kare. Cha gerule ba Chubenu ulita ole, Jesucristo agedu ba alin giti ni lle gweale me no kledale ba tale, ba ulita mo ta gbadale ta jogenga mo talla sugaska ulitage, ba ulita mo ta gbadale age no diali Chube takalin kare. Ba mo ta gbe ene gire nga be suga no badi, ba mi chage dare tañachuge me no age me no tanre ba agedu ngeru kare, ba be chege age no gerule no ta no trate ole Chube takalin kare. 
\p  
\v 9 Cha chada degangu ba alin ngeru, chada e giti cha geru gbu ba ulita alin ba me chegedale ule ni sugeti alin kwian agenga me no ai kare ole: muinga onbre kle mo chuge ke giti, onbre toi mo chebigdalla ole mo muiralla kare. Cha geru gbu ba ulita alin ba chegedale sugekare kwian ene kare ulitage diali.  
\v 10 Cha gerudu kare ba ole cha me kledu gerule kwian me Chube gaba giti, mo chuganga ke giti, mo ta gbanga takalin lle ulitage mo alin, skwe boanga daba ngeru, lle oña ngwale ganga mo chubeale. Cha me kledu gerule ba ole ba chegedale siere kwian ene ulitage, me ene, ba joge siere kwian agenga me no ene ulitage ba me ñage chege toi nga dba ai giti, kwian agenga me no ene diali be kle.  
\v 11 Cha me kledu gerule ba ole kwian ene giti, agwa cha kledu gerule kwian kle mo gai dabale Jesucristo giti gire ama chage nganake age me no ulita tanre, mo chuganga ke giti, mo ta gbanga takalin lle ulitage mo alin, lle oña ngwale ganga mo chubeale, geru jinanga dabadi, lle gage janga diali, skwe boanga daba ngeru. Kwian ene kle mo lite ba ole, kwian ene giti cha kle gerule, ba ulita kle mo ta gbe chage ulia Chube ole me chegedale ule kwian ene ole ni blire ule.  
\v 12-13 Kwian me Chubenu kle age me no me kle mo lite ule ba ole Chube geruadi, kwian ene giti che Chubenu me talladale, Chube be ji gbe kwian ene ulita alin. Agwa kwian kle mo lite ule ba ole diali Chube geruadi, kwian ene bai kaire kle mo ta gbe age me no diali me mo ta gbe joge siere age me noge kle ba ulitaske kle mo lite diali ba ole, kwian agenga me no ene, ba ama kagadale siere ba ulita kle mo ta gbe chage ulia Chube olege. 
\c 6  
\s1 Kwian Chubenu me daba na Chubenu gbadale 
\s1 mo gwallaske chugagwalla me Chubenu gwa giti 
\p  
\v 1 Ba ulita Chubenu ba gweale ta daba gbakalin mo gwallaske daba agedu ba dollale giti, ba daba ene dbadale daba Chubenu chugagwalla ngwadi gbale mo gwallaske. ¿Mineade ba kwian Chubenu me kle tachke e giti? ¿Mineade ba kwian Chubenu kle daba na Chubenu dbe gbale mo gwallaske chugagwalla me Chubenu gwa giti?  
\v 2 Bdagli che ulita Chubenu be kle ule Chube ole Chube be che gbe gerule kwian me Chubenu ulita giti ama agedu me no giti, ¿ba me tachke e giti? Ba ulitage uñale Chube be ba gbe gerule kwian me Chubenu ulita giti bdagli, e ma kweri agwa Chube be ba gbe age. Kle boi ba ulitaske nga dba ai giti, e soli, ¿mineade ba me tachke geru trage modi mo gwallaske daba age ba dollale ole?  
\v 3 Kaire uñale ba ulitage bdagli che Chubenu ulita be chege ma kweri lle boanga Chube alin nga ngaña giti ulitage, che be chege ama kaganga. Chube be kwian amanu gbe age ene chui bdaglige, nege ulita kle boi nga dba ai giti daba Chubenuske che ña e trage modi taingwli.  
\v 4 E ulita uñale ba ulitage ¿lledale ba gweale kle daba Chubenu dbe chugagwalla me Chubenu ngwadi gbale mo gwallaske daba agedu ba dollale giti? E me no age ene, chugagwalla ene me ñage daba Chubenu chudaboi age no modi Chube takalin kare.  
\v 5 Ba ibudale tanre ba kle age giti daba Chubenu ole daba dbe chugagwalla me Chubenu ngwadi. Ba ulitaske daba gweale ta molen ñage gerule daba agedu ba dollale ole geru trage no modi daba ole daba kle age giti, daba e kare kle ba ulitaske, daba age gweale ba dollale ba daba e dbadale daba Chubenu ta molen ngwadi geru tragadale ta no giti ama gwa giti daba agedu ba dollale giti. ¿Mineade ba me kle mo ta gbe tañachuge age ene? Cha gerule ba ole, ba agedale moske no, agwa ba me kle age.  
\v 6 Ba gweale kle kira bate modi moske daba na Chubenu ole, ba me kle mo ta gbe geru trage modi taingwli geru e chuge ngwadi ngwedi dabage mo ta gbe no daba ole. Ba me kle kira bate modi moske alin ngmadi, agwa ba Chubenu kle joge daba Chubenu gbe jiske chugagwalla me Chubenu gwa giti. ¡Ba me ñage age ene!  
\v 7 Ba ulita Chubenu gweale kle kira bate modi moske e me no, ene ba ulita mi ñage chage no gwangerugu kwian gwage Chube takalin kare. Daba kle age gweale ba dollale, ba me talladale e giti, daba skwe boi ba ngeru ba me daba e gbadale mo gwallaske ni chugagwalla Chubenu ngwadi, ma no ba mo ta gbe chege kamne me kira bate daba ene ole me mo ta gbale blike skochie daba ene ole, ba mo ta gbadale age no ama alin diali.  
\v 8 Agwa ba me kle mo ta gbe age no ene, ba agali kaire kle age ba daballanu Jesucristo giti dollale, ba agali kle skwe boi ba daballanu Jesucristo giti ngeru.  
\v 9 Ba ulitage uñale trate kwian agenga me no daga ngwale me ñage joge toi Chube ole nga ngaña giti, ba ulita me mo chugadale ngwadi age me no, ba me ñage tañachuge ba chege age me no diali ba be ñage toi Chube ole, me ene, ba be tañachugale ba tañachuge kare, cha gerule ba ulita ole, kwian age ai kare ulita me ñage joge toi Chube ole bdagli: Onbre muinga mo chuganga ke giti. Kwian lle oña ngwale dodaba mo kodi gai mo chubeale. Muinga onbre nu mo jwanba mo chuge ke giti. Onbre chage mo salengwli ole onbre kle chage muinga ole kare, muinga chage mo salengwli ole muinga kle chage onbre ole kare.  
\v 10 Kwian skwe boanga daba ngeru. Kwian mo ta dbanga no igi alin ole, ama takalin lle tanrege mo alin. Kwian lle gage janga diali. Kwian geru jinanga dabadi daba na ole. Kwian daba na anblitanga agedale me no daba ole. Kwian ulita agenga me no ene diali, ni gdaite ñage joge toi Chube ole nga ngaña giti.  
\v 11 Ba gweale kledu age ene ngeru ba bebi Jesucristo gai suiale, agwa nege tangle Jesucristo gai giti ba agedu me no ene ulita Chube talla mliunga, ba chegu no trate Chube gwage, ba tiun gitiru ji chugege ba agedu me no ulita gdale che Chugagwalla Jesucristo giti, kaire mo Oña giti Chube ba ta gbe toi no gwangerugu trate Chube alin. 
\s1 Kwian Chubenu me mo chugadale ngwadi 
\s1 age me no dare 
\p  
\v 12 Ba ulita Chubenu agwa ba ulita me kle age Chube alin Chube takalin kare diali, ba gweale kle gerule mo giti: “Cha ñage age ulita cha takalin kare.” Ba gweale kle tañachuge e no agwa suge chage ulita me no cha alin age, ulita me cha ta gbe no Chube ole. Cha mo chuge ngwadi age ulita cha ta agekalin kare cha be chege age me no diali, cha mi ñage joge siere age me noge, malen cha me mo chuge ngwadi age cha takalin kare.  
\v 13 Che ñage gerule bligda giti kaire che kde giti: “Bligda kle che alin gutadale, che bligda gute gire bligda joge che kdege.” Ulia bligda che kde alin che kde bligda alin, e ulita ene agwa lle e boke mi chege diali alin, chui be chke gire Chube be bligda ulita kagenga be che kde ulita kagenga. Che ñage gerule ulia che kde giti che kde bligda alin, agwa che me ñage gerule che jegwale giti che jegwale mo chuge diali ke giti alin. Me ene, che me mo jegwale chugadale ngwadi mo chuge ke giti, che jegwale me mo chugadale ke giti alin, che jegwale che Chugagwalla Jesucristo alin. Jesucristo che jegwale dodadu mo alin lle boadale no ama alin, Jesucristo kira kete chege lle boi no ama alin ama takalin kare.  
\v 14 Chube mo kiralla giti che Chugagwalla Jesucristo gbuni gwade, Chube be age ene kaire che ulita amanu mi kle gwade ole, chui bdaglige ama be che ulita gbeni gwade. 
\p  
\v 15 Ba ulita Cristo gaba ulia, uñale ba ulitage ba jegwale Cristo jegwalenu kare, ¡ba ulita tachkedale e giti! Ba kwian onbre Cristonu me ñage tañachuge ba ñage tien ule muinga chagenga onbre na na nate mo chbadanga ole, ba kwian onbre Cristonu me ñage tien ule muinga ene ole, ¡e me no me no!  
\v 16 Uñale ba ulitage Chube gerua degaba unsuialin gerule onbre tien ule muinga ole giti, chada e gerule: 
\q1 “Onbre muire, ama gdabonate chege kwian gdaitre alin kare.” 
\m Ba tachkedale e giti. Muinga chagenga onbre na na nate mo chbadanga, ba kwian onbre Cristonu tien ule muinga ene ole ba chege gdaitre alin kare ama ole, ba me ñage age ene, ba Cristonu, ba mo ta gbale chege chage trate Cristo ole.  
\v 17 Kwian ulita bai kaire Chugagwalla Cristo gai ulia, kwian ene Cristonu, kwian mo ta gbe ule Cristo ole kwian ene chege gdaitre alin Cristo ole,  
\v 18 kwian ene mo ta gbadale age no diali Cristo takalin kare me mo chugale ngwadi age me no. Ba ulita muirenu onbrenu mo ta gbadale chege sugekare diali mo chuge ke gitige. Kwian age me no ulita sugekare mo chuge ke gitige, e me no agwa e me kwian jegwale gbe me no salengwli mo chuge ke giti kare, kwian mo chuge ke giti kwian jegwale gbe chege me no, kwian ene ta gbe chege me no sugaska agali Chube gwage.  
\v 19 ¿Me uñale ba ulita Chubenuge ba jegwale kaire ba talla u kare Chube Oña alin? Chube mo Oña ketu bage toi ba ulita tale, ba mo jegwale mo talla manadale no trate Chube Oña alin. Jesucristo giti ba Chubenu, ba me mo mauña agali,  
\v 20 ba jegwale ba talla ulita Chubenu, Chube Cristo ketu gwaleda ba agedu me no ulita giti malen ba ulita me mo jegwale mo talla chugadale ngwadi age me no dare, ba mo ta gbadale diali age no trate Chube takalin kare. 
\c 7  
\s1 Pablo gerule mo jwen giti 
\p  
\v 1 Nege cha jainnga ba kalen ba chada degu giti, ba chada degu geru kadadale chage geru tanre giti. Ngeru cha gerule ba ole mo jwen giti: Ma no kwian onbre alin onbre ulita me mo jwen muinga ole.  
\v 2 Agwa ulia mno muinga alin onbre alin toi gballa, diali onbre muinga takalin mo chuge ke giti malen ma no muinga onbre mo jwandale, onbre gdaite gdaite muinga monu alin toidale ole mo kaire, muinga gdaite gdaite onbre monu alin ole toidale mo kaire.  
\v 3-4 Muinga mo jwanba onbre ole muinga jegwale ulita me muinganu gballa, muinga jegwale mo ñengulallanu, ene kaire onbre jegwale ulita mo muingallanu. Muinga me monu gballa, onbre me monu gballa, muinga mo ñengulallanu, onbre mo muingallanu. Malen onbre mo ta gbadale tien ule mo muingalla alin ole, ene kaire muinga mo ta gbale tien ule mo onbrella alin ole.  
\v 5 Me no onbre me mo muingalla chuge ngwadi tien ule mau ole, me no muinga me mo ñengulalla chuge ngwadi tien ule mau ole. Onbre muinga gdabonate gdaitre alin kare, ama gdabonate ña mo ta gbe me tien ule ene chui gai gerungwa Chube alin ole, chui e joge tangle ñage tienni ule, onbre me ñage chege sugekare diali mo muingallage, onbre chege sugekare mo muingallage dolla Satanás ñage ama boke ta gbe age me no, malen onbre muinga chegedale ule diali.  
\v 6 Cha me kle gerule ba ulita mo jwandale, agwa ba ñage mo jwen ba takalin kare bai ma no ba alin.  
\v 7 Cha alin suge ma no kwian ulita me mo jwen, ma no kwian ulita chege cha kare gballa me mo jwen, agwa Chube kwian gdaite gdaite talla jigu mo kaire kaire, gdaite tañachuge nganake, na tañachuge nganake, malen kwian ñage age kwian tañachuge kare bai ma no mo alin.  
\v 8 Kwian biale muire onbre me mo jwanba, kaire muinga chegeba oli mo onbrellage onbre chegeba oli mo muingallage, cha alin ma no kwian ene ulita chege gballa cha kare.  
\v 9 Agwa onbre diali tañachuge muinga nate mo alin, muinga diali tañachuge onbre nate mo alin, ma no mo jwen me chege tañachuge alin onbre muire nate muire onbre nate.  
\v 10 Agwa muinga nu mo jwanba onbre ole, onbre nu mo jwanba muinga ole, kwian ene ulita alin cha geru gbe, geru e me cha gerua e Jesucristo gerua, Jesucristo kledu nga dba ai giti ama geru e jigu kwian alin, Jesucristo takalin muinga mo jwanba me mo ñengulalla chuge ngwadi.  
\v 11 Agwa muinga mo ñengulalla chuge ngwadi, muinga ene me mo jwandale onbre na ole, chegedale toi gballa, kaire ñage mo ta gbeni no naskuni mo ñengulalla ole. Ene kaire onbre me mo muingalla chugadale ngwadi. 
\p  
\v 12 Cha ta gerukalin gweale ba ulita ole, ai me Chugagwalla Jesucristo gerua, ai cha kle tañachuge kare: Daba gweale Chubenu muingalla me Chubenu me ta mo ta blitakalin Chube ole agwa muinga mo ta gbe toi ñengulalla ole gwangerugu, onbre Chubenu me ñage muinga ene chuge ngwadi.  
\v 13 Kaire muinga Chubenu ñengulalla me Chubenu me ta mo ta blitakalin Chube ole agwa onbre mo ta gbe toi muingalla ole gwangerugu, muinga Chubenu me ñage onbre ene chuge ngwadi.  
\v 14 Muinga Chubenu ñengulalla me Chubenu, muinga giti Chube age no onbre alin onbre ñage Chube uñe muinga giti, kaire onbre Chubenu muingalla me Chubenu, onbre giti Chube age no muinga alin muinga ñage Chube uñe onbre giti. Malen muinga Chubenu chegedale toi mo ñengulalla me Chubenu ole, onbre Chubenu chegedale toi mo muingalla me Chubenu ole, ama boke chege ule giti Chube age no ama olia alin kaire, ama olia ñage Chube uñe.  
\v 15 Agwa onbre me Chubenu ama ta jogekalin siere mo muingalla Chubenuge, muinga me Chubenu ta jogekalin siere mo ñengulalla Chubenuge, me ta toikalin ule, muinga Chubenu mo ta gbadale mo ñengulalla me Chubenu chuge ngwadi joge, onbre Chubenu mo ta gbadale mo muingalla me Chubenu chuge ngwadi joge, ma no age ene me chege kira bate toi ule giti, Chube ba ulita gau mo alin toidale no modi me kira batadale modi.  
\v 16 Cha gerule ba muinga Chubenu ulita ole bai kaire mo ñengulalla me Chubenu, bage me uñale ba ñengulalla me Chubenu be Chube uñe ba giti o me, malen ba ñengulalla ta jogekalin siere bage ma no ba ama chuge ngwadi joge me chege kira bate toi ule giti. Kaire cha gerule ba onbre Chubenu ulita ole bai kaire mo muingalla me Chubenu, bage me uñale ba muingalla me Chubenu be Chube uñe ba giti o me, malen ba muingalla ta jogekalin siere bage ma no ba ama chuge ngwadi joge me chege kira bate toi ule giti. 
\p  
\v 17 Onbre me Chubenu muinga me Chubenu mo jwanba kle toi ule gire Chube onbre e ta gbe Chube gai ulia, onbre e Chubenu me mo ta gbadale joge siere mo muingalla me Chubenuge, onbre e chegedale toi mo muingalla ole mo ta gbe age no diali gwangerugu Chube takalin kare Chube ta ketu amage age kare. Ene kaire muinga me Chubenu onbre me Chubenu mo jwanba gire Chube muinga e ta gbe Chube gai ulia, muinga e Chubenu me mo ta gbadale joge siere mo ñengulalla me Chubenuge, muinga e chegedale toi mo ñengulalla ole mo ta gbe age no diali gwangerugu Chube takalin kare Chube ta ketu amage age kare. Cha kle gerule kare, cha kle geru e gbe kwian Chubenu ulita alin kle mo lite Chube geruadi una kaire kaire nga ulitage. 
\p  
\v 18 Kwian gweale mo kwara tkabanga kwian israelita suia kare, Chube kwian ene gai mo alin Chube ta kete amage age no Chube alin, kwian ene me tañachugadale mo giti: “Me no cha mo kwara tkabanga, cha mo kwara dodadale naskuni ene cha ñage age ma no Chube alin Chube takalin kare.” Kwian me tañachugadale ene. Ene kaire kwian me mo kwara tkabanga, Chube kwian ene gai mo alin Chube ta kete amage age no Chube alin, kwian ene me tañachugadale: “Cha me mo kwara tkabanga, cha mo kwara tkadalenga, ene cha ñage age ma no Chube alin Chube takalin kare.” Kwian me tañachugadale ene, kwian ulita chegedale Chube kwian ta gbu Chube gai ulia suiage mo ta gbe age Chube takalin kare, me tañachugadale age gweale mo alin ene suge trate Chube gwa giti, me ene dale.  
\v 19 Kwian Chubenu me tañachugale mo kwara tkangenga me mo kwara tkangenga giti, agwa ma no kwian Chubenu mo ta gbe tañachuge Chube alin giti Chube gerua gbe gdadi Chube gai dage.  
\v 20 Kwian Chubenu ulita chegedale Chube kwian ta gbe Chube gai ulia suiage mo ta gbe age Chube takalin kare.  
\v 21 Ba gweale lle boanga mo mauña alin gire Chube ba ta gbu Chube gai ulia ene ba chegu Chubenu, ba me tañachugadale ba tiendale gitiru mo mauñage ene ba ñage mo ta gbe lle boi ma no Chube alin, me ene. Ba me ñage tien gitiru mo mauñage ba me talladale e giti, ba Chubenu. Chui gwealege ba ñage tien gitiru mo mauñage, e no ba alin, ene ba chege sugekare mo mauñage lle boale Chube alin allabi.  
\v 22 Kwian bai kaire lle boanga mo mauña alin gire Chube kwian ta gbe Chube gai ulia, Cristo giti Chube kwian ene ta gbe joge siere age me noge, agwa ama chege lle boi mo mauña alin kaire Cristo alin. Kwian na me lle boanga mo mauña alin gire Chube kwian e ta gbe Chube gai ulia, Cristo giti Chube ama ta gbe joge siere age me noge kaire, kwian ene chege lle boangale Cristo alin.  
\v 23 Chube Cristo ketu gwaleda ba ulita agedu me no ulita giti, Cristo giti ba Chubenu, Cristo giti Chube ba ta gbu joge siere age me noge. Ba ene, malen ba me mo chugadale ngwadi age naskuni me no kwian takalin kare, ma no ba agedale Chube takalin kare, Chube ba ulita Chugagwalla.  
\v 24 Cha gerule ba ulita ole cha daballa cha ibotea Jesucristo giti, ba ulita chegedale Chube ba ta gbu Chube gai ulia suiage mo ta gbe age Chube takalin kare. Baini kaire ba gdaite gdaite Chubenu kle ngwadi kle lle kaire kaire boi, ba ulita mo ta gbadale tañachuge Chube giti diali toi ama takalin kare. 
\p  
\v 25 Nege cha gerule dare ba ulita ole cha kle tañachuge kare mo jwen giti, Chugagwalla Jesucristo me su geru ai kete chage agwa uñale bage cha ñage gerule ulia Jesucristo takalin kare, sbali Jesucristo agedu no cha alin ama cha gbu lle boangale ama alin, malen e giti ba ñage cha gerua ai gai ulia gbe gdadi. Cha gerule kwian biale onbre muire me mo jwanba giti,  
\v 26 chage suge kwian ene chegedale gballa me mo jwen, toi suiale nege tangle kwian Chubenu kle boi tanre daga ngwale Jesucristo gai ulia giti, mnoare toi nege tangle malen ma no me mo jwen.  
\v 27 Bai kaire mo jwanba me ñage mo muingalla chuge ngwadi, bai kaire me mo jwanba ma no me muinga jwen.  
\v 28 Ba mo jwen e me gerule ba kle age me no, muirenu onbrenu mo jwen e me gerule kle age me no, agwa kwian mo jwanba, lle ma tanre mno boadale kwian ene alin kwian gballage, cha takalin e me boi bai kaire me mo jwanba ole malen cha kle gerule ma no me mo jwen. 
\p  
\v 29 Cha bitalla Jesucristo giti, cha kle gerule kare ba ulita ole, e giti cha takalin chke uñale bage Jesucristo chieni chuia kle kodi malen ba ulita mo ta gbadale tañachuge ma ngle Chube giti lle boi ma no ama alin. Onbre bai kaire mo jwanba me ñage tañachuge mo muingalla alin giti, kaire onbre mo jwanba mo ta gbadale lle boi Chube alin.  
\v 30 Kwian bai kaire kle ta olire me ñage chege mo ta gbe ta olire alin ole, ma no mo ta gbe lle boi ma no Chube alin. Kwian bai kaire kle toi nga suga no ole me ñage chege toi mo ta gbe nga suga no alin ole, ma no mo ta gbe toi nga suga no ole lle boi Chube alin. Kwian bai kaire kle mo ta gbe lle tanre gige mo alin diali, ma no kwian ene mo ta gbe suge me lle molen kare, ma no mo ta gbe lle boi no Chube alin.  
\v 31 Che ulita kle toi nga dba ai giti, agwa che me ñage mo ta gbe chege tañachuge mo llea ulita nga dba ai alin giti, lle nga dba ai giti me chege diali chui tangle, malen ma no che ulita mo ta gbe tañachuge Chube giti lle boi no ama alin nga dba ai giti. 
\p  
\v 32 Ba ulita me mo jwanba ole cha gerule, cha ta ba ta gbakalin suge ma no ba chege gballa me mo jwen, ene ba me chege tañachuge kwian mo jwanba kle tañachuge kare. Kwian onbre gballa me mo jwanba, onbre ene me tañachuge salengwli onbre mo jwanba kare, onbre gballa mo ta gbe lle boi no diali Chube alin Chube takalin kare me tañachuge lle na giti.  
\v 33-34 Agwa kwian onbre mo jwanba me ñage tañachuge lle gdaitre alin giti, ama tañachuge lle boke giti, tañachuge Chube giti agwa kaire tañachuge lle nga dba ai giti nate age no mo muingalla alin. Ene kaire muinga gballa me mo jwanba ni mo jun bitaite onbre ole, muinga ene mo ta gbe lle boi no diali Chube alin Chube takalin kare me tañachuge lle na giti, ta mo ta gbakalin chege lle boi Chube alin ole diali. Agwa muinga mo jwanba me ñage tañachuge lle gdaitre alin giti, ama tañachuge Chube giti, kaire ama tañachuge lle nga dba ai giti nate age no mo ñengulalla alin.  
\v 35 Cha kle gerule ai kare ba ulita me mo jwanba ole, e me gerule ba me mo jwandale, me ene, agwa cha ta ba chudaboakalin, cha kle gerule ba ulita ole ba mo ta gbadale toi no trate Chube takalin kare, ene ba ñage mo ta gbe lle boi ma no diali Chube alin. 
\p  
\v 36 Ñenua gweale tañachuge mo jian biale giti jian mo jwandale, suge ñenuage jian jo juma sbali ama mo jwandale, ñenua kle tañachuge no ene, ñenua mo jian gbe ule onbre ole e me gerule ñenua kle age me no, no mo jian gbe ule.  
\v 37 Agwa ñenua na gweale tañachuge mo jian giti me no mo jian mo jwen, ñenua mo ta gbe me mo jian gbe ule onbre ole ñenua kle age no mo jian alin kaire.  
\v 38 Ñenua bai kaire mo jian gbe ule onbre ole, ñenua e age no, agwa ñenua bai kaire me mo jian gbe ule onbre ole, ñenua ene age ma no. 
\p  
\v 39 Muinga Chubenu mo jwanba, muinga ene ñengulalla kle gwade muinga chegedale toi mo ñengulalla ole, muinga me ñage joge siere mo ñengulallage mo jwen onbre na ole. Agwa muinga ñengulalla jogeda, muinga ene ta mo jwankalin onbre na ole ama ñage mo jwen ama takalin kare, ama mo jwandale onbre Chubenu ole.  
\v 40 Cha tañachuge muinga ñengulalla jogeda ma no muinga ene me mo jwen, ene nga suga ma no muingadi. E cha kle tañachuge kare, kaire suge chage Chube Oña kle cha ta gbe gerule ene ulita. 
\c 8  
\s1 Pablo gerule bligda kaitaba lle oña 
\s1 kwian kle gai chuberege giti 
\p  
\v 1 Ba chada degu cha alin ba ulita geru kadu chage bligda giti ba ñage bligda kaitaba lle oña kwian kle gai chuberege gute o me. Uñale trate che ulitage che ñage bligda ene gute, bligda ene me age me no che ole, bligda ene gute me che gbe me no jiske Chube gwage. E uñale trate chege, e giti che chege tañachuge mo giti che ma no ma kweri Chube gwage daba nage baige suge bligda ene me no ama alin gutadale, che tañachuge ene che me kle tañachuge no daba na alin. Ma no ba ulita mo ta dbe no daba na ulita ole bai kaire bligda ene gute bai kaire me bligda ene gute, ba mo ta dbe ene daba na ulita ole ba kle mo ta gbe age no diali Chube takalin kare.  
\v 2 Ba gweale bligda ene gute giti ba tañachuge ba geru uñanga ma no giti dare, ba gweale na me bligda ene gute giti ba tañachuge ba geru uñanga ma no giti dare, agwa ulita tañachuge ba me geru ulia uñe trate.  
\v 3 Ma no ba ulita mo ta dbe no salengwli daba na Chubenu ole kaire mo ta dbe no Chube ole, Chube alinge uñale ba talla mine. 
\p  
\v 4 Ba ulita kle tañachuge bligda kaitaba lle oña kwian kle gai chuberege giti ba ñage bligda ene gute o me. Uñale trate che ulitage lle oña e lle ngwale, lle oña me ñage bligda blite me ñage age bligda ole, malen che me tañachugadale bligda ene giti, uñale chege lle oña e ngwale, me Chube ulia, Chube ulia gdaitre alin.  
\v 5 Kwian me Chube ulia uñe kle gerule chube na tanre kle nga ngaña giti kaire nga dba ai giti, kwian ene alin chube ngle kle, kwian ene kle lle tanre ngwale gai mo chubeale, agwa lle e me Chube ulia.  
\v 6 Uñale trate che ulita Chubenuge Chube gdaitre alin kle, Chube e che Ñenua. Kaire che ulita Chubenu alin Chugagwalla gdaitre alin kle, e Jesucristo. Chube kaire Jesucristo nga ulita dodadu lle ulita dodadu kwian ulita dodadu, ama giti che ulita kle toi gwade.  
\v 7 Chege suge trate Chube gdaitre alin kle, uñale chege lle oña ulita kwian kle gai chubere lle oña e ulita ngwale me kle gwade me ñage age. Agwa che bitalla Chubenu ulitage me suge ene trate, daba gweale me Chube ulia gaba sbali, ama me Chube gerua uñe trate. Daba ene bebi Chube ulia uñe ama lle oña e gau mo chubeale, nege ama kle Chube ulia gai mo Chubeale agwa suge amage lle oña e kiraske ñage age bligda ole, malen ama tale suge me no bligda kaitaba lle oña ege gute, ama bligda ene gute ama agali tañachuge chege me no Chube gwage.  
\v 8 Sugedale trate che Chubenu ulitage bligda ene gute o me bligda ene gute e salengwli Chube gwage, Chube me tañachuge e giti. Che geru gaba sbali chege suge che ñage bligda kaitaba lle oña ngwalege gute, e me gerule che ma no Chube gwage daba na me bligda ene gutege, kaire e me gerule daba me bligda ene gute ama chege me no Chube gwage, e me ene dale, che chege no trate Chube gwage che mo ta gbe ama gai ulia giti.  
\v 9 Ba ulita Chube gerua gaba sbali ba ta suge ba ñage lle ulita gute agwa daba na me Chube gerua gaba sbali ta me suge ene, ama tale suge me no Chube gwage lle ulita gute. Bage suge ba ñage age ulita agwa ba me agedale daba me geru gaba sbali gwa giti, ba age daba ene gwa giti daba e ñage age ba kle age kare, ba giti daba e kle age mo ta suge dollale naskuni, ama tale suge me no age agwa ama age, ene ba giti daba e ñage mo ta gbe siere Chubege age me no naskuni.  
\v 10 Bage uñale bligda kaitaba lle oña ngwalege no gutadale, e bligda no, lle oña me ñage age bligda ole. Bage suge ene agwa daba na me Chube gerua gaba sbalige me suge ene, amage suge me no bligda kaitaba lle oña ngwalege gute, suge amage ama bligda ene gute ama kle age me no Chube dollale. Daba ene gwa giti ba blire bligda kaitakle lle oñage ngwadi, daba gwage badi age ene, ama tale ama be chege tañachuge tanre ba kle blire giti gire ama be age ba kle age kare, ama tale suge ama bligda ene gute ama kle age me no Chube dollale malen ama mi bligda ene gute ta trate ole, ene ba kbiale daba ene kle age mo ta suge dollale naskuni.  
\v 11 Ba kle tañachuge kare ba age daba na gwa giti, daba e ñage tañachuge me no, ama ñage mo ta gbe siere Chube geruage ba kle age giti, ma no ba me agedale, daba e alin Cristo jokeda, ama Cristonu, Cristo agedu no daba e alin kaire, me no ba daba ta gbe tañachuge me no joge siere Chube geruage bligda gute giti.  
\v 12 Uñale bage daba na alin me no bligda kaitaba lle oñage gute agwa ba lle ene gute dare daba gwage, ba age ene ba kle daba e ta gbe mo ta suge dollale naskuni, ba kle age ene ba me kle age me no daba ene alin ole ba kle age me no Cristo dollale.  
\v 13 Ulia suge chage ene: Cha kle blire giti cha daba gbe siere Chube geruage, suge chage cha kle age me no ama ole bligda giti, ma no cha me bligda ene gute dare, ene daba me geru gaba sbali me tañachuge me no, ene ama mi joge siere geru uliage cha blire giti. Che gdaite gdaite tañachugadale no no ene ulita daba me Chube gerua gaba sbali alin. 
\c 9  
\s1 Pablo gerule mo giti ama Jesucristo gerua ketanga 
\p  
\v 1 Cha Jesucristo gerua ketanga, kwian ngwale me cha gau geru Jesucristo giti ketangale kwian na ulitage, ni kwian gdaite kle cha kage, che Chugagwalla Jesucristo kle cha ta gbe gerule ama giti. Jesucristo agalidi mo gwagwa giti cha gwagedu, ama cha gau geru amanu ketangale kwian ulitage malen cha ñadu geru amanu kete ba ulitage, ene cha giti ba mo ta blitu Jesucristo gai ulia.  
\v 2 Kwian gweale kle gerule me no cha giti, kle gerule cha me Jesucristo gerua ketanga ulia agwa ba ulitage sugedale trate trate cha Jesucristo gerua ketanga ulia, cha giti ba ulita geru ulia Jesucristo giti uñu malen ba ulitage bai kaire nu geru gabage sugedale cha me kwian ngwale kwian na kle tañachuge kare.  
\v 3 Kwian kle gerule cha dollale cha kwian ngwale cha me Jesucristo gerua ketanga ulia, kwian kle tañachuge ene giti cha gerule,  
\v 4 geru dbe giti ñanale cha tadukalin cha ñadu bligda kade chi kade bage mo alin toigda.  
\v 5 Kaire cha tadukalin cha ñadu mo jwen muinga ole muinga dbe ule geru dbe baske kwian Jesucristo gerua ketanga na ulita agedu kare, Pedro agedu ene, kaire che Chugagwalla Jesucristo daballa ulita agedu ene.  
\v 6 Kaire Jesucristo gerua ketanga ulita kle igi kade ba Chubenuge mo alin toigda geru dbe ñanale, cha tadukalin cha ñadu age ene kaire, agwa cha me mo ta gbu age ene, cha ule Bernabé ole geru du baske kaire mo ta gbu lle boi mo kodi igi gadale mo alin toigda.  
\v 7 Guardia donga lle boi mo chugagwalla alin chui gdale, ¿ama kle lle boi ngwale? Me ene, guardia donga igi gai lle boi ñanale, ene ama ñage lle gige mo alin toigda. Kwian chude ngama gbe, bligda suiage kwian chude ngama gbanga ñage bligda e gai ama takalin kare, ama bligda mauña. Ni kwian gdaite ñage gerule bligda mauña me ñage bligda gai mo alin. ¿Kwian gweale ñage gerule bda oveja mananga me ñage oveja jusulia jai? Me ene, ama oveja mananga, ama ñage oveja jusulia gai mo alin jadale.  
\v 8 Ba me ñage tañachuge chadi cha kle gerule mo chugale gballa, me ene, Moisés nu Chube gerua degaba unsuialin gerule ene kaire,  
\v 9 chada e gerule: 
\q1 “Chbi lle boagda gbe trigo mongenga sulikwage, ba chbi gbe chage tangle trigo giti ba me chbi ka lugadale, ene chbi bli ole ama ñage trigo gute ama trigo mongenga ñanale.” 
\m Chube gerua degaba e me kle gerule Chube tañachuge ulia chbi alin giti,  
\v 10 agwa kaire Chube tañachuge ma kwian ulita Jesucristo gerua ketanga giti, kwian lle ketadale geru ketangage geru dbe ñanale, ene geru ketanga ñage toi salengwli kwian chude ngama gbanga bligda suia bligda gai ko ñanale, kaire chude skutanga chude skute bligda gai ko ñanale, ene ama ñage bligda gute toidale.  
\v 11 Cha geru Jesucristo giti du ngeru ba ulitaske, cha giti ba Jesucristo uñu, e giti cha ñage chudaboi kade ba ulitage, bligda, u, igi kade.  
\v 12 Kwian gweale na geru dbanga kle mo ko ñana gbe bage geru dbe giti cha kaire ñage mo ko ñana gbe bage ma kweri, cha geru dbanga ngeru baske. Agwa cha me mo ta gbu age ene ba ole, cha mo ta gbu jage cha lle molen cha me lle molen cha me talladu e giti, cha me mo ko ñana gbu ba ulitage geru dbe giti, cha mo ko ñanalla ulita chugu ngwadi ngwale, cha tadukalin ba geru Cristo giti keruchuge me ta gbe tañachuge lle na giti me ta gbe joge siere geru uliage. 
\p  
\v 13 Uñale ba ulitage bligda dbakle chke u gerungwa Chube olege una Jerusalénge, kwian lle boanga u ege ñage bligda e gweale gute. Ene kaire bda dbakle chke u ege, kwian lle boanga u ege bda gwangada, ama bda gweda bda guge bda gugangwa giti, ama kle lle ene boi ama ñage samla bita gweale gai mo alin gutadale.  
\v 14 Ene kaire che Chugagwalla Jesucristo nu geru gbaba kwian bai kaire ama gerua dbanga lle gweale gadale ko ñanale geru dbe giti, ene ama ñage toi geru dbe dare.  
\v 15 Agwa cha ni kle tañachuge age ene, ma no cha alin cha me mo ko ñanalla gai bage Jesucristo gerua dbe giti, ni cha kle tañachuge cha chada ai degange giti ba agedale cha alin ba lle gweale ketadale chage geru dbe baske giti ñanale, me ene. Nga suga no no chadi Jesucristo gerua dbe me mo ko ñana gbe kwiange geru dbe giti, ma no cha alin jogeda ta suga no giti bli ole me lle kade kwiange toigda.  
\v 16 Cha me kle geru Jesucristo giti dbe kwianske mo tale malen cha me ñage mo gai dage Jesucristo gerua dbe giti, Chube cha gbu malen cha geru dbadale, cha mi geru dbe gdale Chube be ji gbe cha alin.  
\v 17 Cha ta lle boakalin no Chube alin geru dbe ama takalin kare, e no Chube gwage, cha lle boi Chube alin ta ene giti Chube be age no cha alin. Agwa kaire cha me ta ene molen cha mo ta gbadale geru dbe, Chube cha gbu geru dbe malen cha mo ta gbadale geru dbe no ama takalin kare.  
\v 18 Cha Jesucristo gerua traganga kwian ole, e giti cha ñage mo ko ñanalla gbe kwiange agwa cha alin ma no me lle kade kwiange toigda geru dbe ñanale, nga suga no no chadi Jesucristo gerua dbe me mo ko ñana gbe kwiange geru dbe giti, nga suga no ene cha alin e salengwli cha kle lle gweale gai geru dbe ñanale kare. 
\p  
\v 19 Cha me lle boanga ni kwian gdaite alin ni kwian gdaite cha gau lle boale mau alin, agwa cha agali mo chugu ngwadi lle boangale kwian ulita alin, ene cha takalin kwian ngle Cristo gai ulia.  
\v 20 Cha kle chage kwian israelitaske cha kle mo ta gbe kwian israelita kare chage kwian israelita suia kare, kwian israelita kle mo ta gbe Moisés nu Chube gerua degaba alin ole, cha kle chage kwian eneske cha kle mo gbe age geru e gerule kare. Chage suge mo tale ulia cha me agedale ulita geru e gerule kare ene cha chege no Chube gwa giti, agwa cha mo gbe chage ene kwian israelitaske ene cha ña kwian israelita ta gbe suge Cristo gai ulia.  
\v 21 Ene kaire cha kle chage kwian me israelitaske cha kle mo ta gbe kwian me israelita kare chage kwian me israelita suia kare, cha kle chage kwian eneske cha kle mo gbe age kwian ene kle age kare me tañachuge Moisés nu Chube gerua degaba kwian israelita alin giti. E me gerule cha me kle Chube gai dage cha me kle age Chube takalin kare, me ene, diali cha kle mo ta gbe age Cristo geru gbu kwian ulita alin gerule kare. Cha kle mo gbe chage kwian me israelita suia kare ene cha ña kwian me israelita ta gbe suge Cristo gai ulia.  
\v 22 Daba me Chube gerua gaba sbali, daba ene me geru uñe trate, daba eneske cha me chage kwian geru uñanga kweri kare, cha kle amaske cha mo gbe chage ama suia kare, ene cha ña ama ta gbe suge Jesucristo gai ulia ma no gwangerugu. Kwian suia kaire kaireske cha kle chage cha mo gbe chage ama suia kare, ene cha ña Jesucristo gerua dbe ma no kwian ulitaske kwian gweale mne kaire kaire ta gbe Jesucristo gai ulia.  
\v 23 Cha kle age ene cha takalin Chube gerua Jesucristo giti chke uñale kwian ulitage ama ulita geru Jesucristo giti gai ulia, ene chadi nga chege suga no ule kwian Jesucristo gerua gai ole.  
\v 24 Cha ta mo ta gbakalin chage no ta giti Chube ole Chube takalin kare diali kwian ulita bai kaireske cha kle chage geru Jesucristo giti dbe, e salengwli kwian jritenga kare, kwian mneite jritenga, gdaitre alin jrite ma blike ta giti kwian jritenga ulitage, jritenga gdaite e lle no gai jrite ñanale. Ene kaire ba ulita mo ta gbadale chage no ta giti Chube ole Chube takalin kare, ene ba agedu no ama tadukalin kare ñanale Chube be ñanalla kete bage bdagli nga ngaña giti Chube kle ngwadi.  
\v 25 Kwian kolanga boladi ta kolakalin no trate ama me ñage mo chuge ngwadi age ama ta agekalin kare, ama mo gbadale biale kolale no. Kolanga age ene ama takalin kolagda ñanalla gai mo alin, agwa ama mo chuge ngwadi age nganake me ñage kolagda ñanalla gai. Kolanga kolagda ñanalla e gai agwa e me jage diali. Ene kaire che ulita Chubenu me ñage mo chuge ngwadi age che ta agekalin kare, che mo ta gbadale biale chage no Chube ole age Chube takalin kare, che age no ama takalin kare ñanale Chube be ñanalla kete chege, ñanalla e mi jogenga dale, e jage diali.  
\v 26 Uñale trate chage cha age no Chube takalin kare Chube be ñanalla kete chage, malen cha agali kle mo ta gbe chage no ta giti Chube ole Chube takalin kare, cha kle mo ta gbe lle boi no ama alin ama takalin kare,  
\v 27 cha me kle mo chuge ngwadi age cha agali ta agekalin kare, ma no diali cha kle mo ta gbe no trate age Chube takalin kare, ene cha ñage daba na tke tangle no Chube geruage. Cha me age Chube takalin kare, ene cha me ñage daba tke tangle no Chube geruage, Chube mi gerule no cha giti, Chube mi ñanalla kete chage age giti. 
\c 10  
\s1 Kwian Chubenu me mo ta gbadale age Chube dollale enusulian unsuialin agedu kare 
\p  
\v 1 Cha bitalla Jesucristo giti, cha gerule ba ulita ole, cha takalin ba ulita tachke boidu che enusulian unsuialin ole giti, che enusulian unsuialin jo siere nga Egiptoge gire Chube bogakwa gbu ama ulita jonlla dbe, bogakwa e jo che enusulian unsuialin dbe ble kada Mar Rojoske tangle, ulita jo tangle seradi.  
\v 2 Che enusulian unsuialin ulita Moisés gau mo chugagwallale, ama ulita chegu ule Moisés ole, ama ulita chagedu ule Moisés ole baini kaire bogakwa jo ama jonlla dbe, ene bogakwa ama jonlla du bleske tangle, ama ulita jo tangle seradi ule Moisés ole, Chube che enusulian unsuialin ulita chudabo ene.  
\v 3 Kaire Chube bligda dregaitre alin kagu che enusulian unsuialin ulita alin gutadale, bligda e chiu nga ngaña giti, che enusulian unsuialin ulita bligda e gutu.  
\v 4 Che enusulian unsuialin chagedu chi me jwiage, nga ege chi me ama alin jadale, Chube chi gbu chie kege kwian alin jadale, ulita chi e jau, chi ama kira gbu. Che enusulian unsuialin me toidu chi e alin giti, me ene, Cristo agedu no ama alin diali, che enusulian unsuialin me ñadu gwage Cristodi agwa Cristo kledu ama ole diali, Cristo ama ulita manadu baini kaire ama jo ngwadi ene ama ñadu toi.  
\v 5 Cristo che enusulian unsuialin chudabo tanre agwa ama ulita me mo ta gbu age no Chube takalin kare, che enusulian unsuialin ngle agedu me no Chube gwage malen Chube ama chugu ngwadi jogeda nga gballage kledu chage ngwadi.  
\v 6 Boidu ene che enusulian unsuialin ulita ole ama agedu me no gdale, che ulita tachkedale e giti ene suge chege che me mo ta gbale mo chuge ngwadi age me no che enusulian unsuialin agedu kare. 
\p  
\v 7 Cha gerule ba ulita ole, ba me lle oña dodaba mo kodi ollade, ba me agedale che enusulian unsuialin gweale agedu kare, Chube gerua degaba unsuialin gerule che enusulian agedu giti, chada e gerule: 
\q1 “Ama mo litu ule chui ollade blire lle jai, bligda kdeale ama ulita skwendu gdate tanre lle oña dodaba mo kodi gai mo chubeale ollade, kaire onbrenu muirenu tanre mo chugu ke giti.” 
\m Chube gerua degaba unsuialin gerule ene che enusulian unsuialin agedu giti, ba ulita me lle oña olladale ama agedu kare.  
\v 8 Kaire che ulita onbre muire me mo chugadale ke giti che enusulian unsuialin gweale agedu kare, che enusulian unsuialin agedu tanre me no, e giti Chube ji gbu ama alin, kwian veintitres mil jokeda chui gbaitre alin.  
\v 9 Che me mo ta gbadale mo chuge Chube ole tañachuge che ñage age tanre me no Chube me tallade e giti Chube no che ole malen Chube mi ji gbe che alin che age tanre me no ene gdale, che me mo ta gbale age ene Chube dollale. Che enusulian unsuialin gweale tañachugu ene age tanre me no, ama tañachugu Chube no Chube me ji gbe ama alin, agwa age me no ene giti Chube ji gbu kwian ene ulita alin, kwian tanre lentigu jorisige, ama ulita jokeda.  
\v 10 Ba me gerudale kwian Chube gerua dbanga baskedi Chube gerua dbanga dollale, ama ba ulita Chubenu chugagwalla Chube geruadi, ba gerule amadi ama dollale Chube be ji gbe ba alin. Boidu ene che enusulian unsuialin ole, ama gweale gerudu ene chugagwalladi ama chugagwalla dollale, age me no ene giti Chube lle boanga mo alin nga ngaña giti kagu ji gbe kwian ene ulita alin, lle boanga Chube alin kwian ene ulita guda.  
\v 11 Boidu ene ulita che enusulian ole unsuialin, e jo degaba che alin che kle toi nege tangle chui bdagli ngnagu alin, ene chke uñale che ulitage chada jo degaba boidu ene enusulian oña ole giti, sugedale chege che me mo ta gbadale age che enusulian unsuialin agedu kare.  
\v 12 Ba gweale tañachuge ai kare mo giti: “Cha kwian no trate, cha kle age no trate diali ulita, cha me kle age me no sidri.” Ba kle tañachuge ene mo giti ba chagedale ta giti, ba kwian, kwian ulita ñage mo ta gbe age me no ba enusulian unsuialin agedu kare, malen ba mo ta gbadale chage ta giti me mo chuge ngwadi age gweale me no.  
\v 13 Ba tale suge age gweale me no ba tachkedale ai giti: Kle boi ene kaire daba na ulita ole, daba ulita ta suge ba ta suge kare. Ba talla ene molen ba tachkedale Chube giti, Chube kle ba ole diali, ama ba chudaboi ba kira gbe ene ba me age me no ba ta agekalin kare. Ba tale ba ta agekalin gweale me no ba Chube chuge ngwadi ba chudaboi, ene Chube be ba ta gbe joge siere talla enege ene ba mi age me no ba takalin kare. 
\p  
\v 14 Cha daballa cha ibotea Jesucristo giti, cha no no ba ulita ole, uñale chage Chube kle ba ole ba chudaboi, malen cha gerule trate ba ulita ole, ba mo ta gbadale chege sugekare lle oña kwian kle gai mo chubealege.  
\v 15 Cha kle gerule ba kwian ulita chuga molen ta molen ole, cha kle gerule kare giti ba ñage tañachuge e giti cha kle gerule ulia o me.  
\v 16 Che Chubenu kle mo lite ule tachkedale Cristo jokeda giti che ulita kle pan gute uva chia jai. Che kle uva chia jai, ngeru che gerule no Chube ole uva chia giti gire che e jai, uva chia jai giti che kle mo ta gbe tachke Cristo bea giti. Kaire che kle pan gute, ngeru che gerule no Chube ole pan giti gire che e gute, pan gute giti che kle mo ta gbe tachke Cristo jaba giti. Che pan gute uva chia jai ule daba na Cristo jokeda ganga ulia ole e gerule che kle mo ta gbe ule Cristo ole kaire daba na Cristo ganga ulia ulita ole.  
\v 17 Che Chubenu kwian ngle, agwa pan gute ule modi giti che ta suge che kwian gdaitre alin kare. 
\p  
\v 18 Ba tachkedale kwian israelita ulita giti, ama mo lite samla guge samla gugangwa giti u gerungwa Chube olege, gire ama samla e gweale gute ule, ama age ene ama kle mo ta gbe ule daba na ole Chube olladale, ene ama ulita kle Chube gai mo Chubeale.  
\v 19 Ene kaire kwian chudalla na me israelita kle lle oña dodaba mo kodi gai mo chubeale, lle oña ngwale ege ama bligda kaite gire ama ulita bligda ene gweale gute, ama age ene ama kle mo ta gbe ule lle oña e gai mo chubeale. Kwian ene kle lle oña e gai lle oña gwade kare tañachuge lle oña kle bligda gbe ma no ama alin gutadale, agwa che Chubenuge uñale e me ulia, che alin lle oña e ngwale me ñage age bligda ole.  
\v 20 Kwian bligda kaite lle oñage, kwian ene me Chube ulianu, ama kle lle oña gai mo chubeale, ama kle bligda kaite lle oñage, ama me kle age Chube ulia alin agwa ama kle age che dolla Satanás alin kaire Satanás chudaboangalla ulita alin. Cha takalin ba chege sugekare age enege, cha me takalin ba mo ta gbe ule kwian ene ole age che dolla Satanás ule Satanás chudaboangalla ulita alin.  
\v 21 Ba me ñage mo ta gbe mo lite ule daba Chubenu ole pan gute uva chia jai tachkedale Jesucristo giti gire kaire mo ta gbe mo lite ule kwian me Chubenu ole bligda kaitaba lle oña ngwalege gute lle oña gai mo chubeale. Ba me ñage ta boke gai age Chube alin kaire dolla Satanás ule Satanás chudaboangalla ulita alin.  
\v 22 Chube takalin che ulita Chube alin gai mo Chubeale, che lle na gai mo chubeale Chube skochie, Chube me takalin che lle na gai mo chubeale. Chube skochie chedi age ene giti Chube ji gbe mno che mi ña jage e kote. 
\p  
\v 23 Che ulita Chubenu mo ta gbadale age Chube alin Chube takalin kare diali, ene che be ñage mo ta gbe ma no Chube ole diali, kaire che be ñage daba na Chubenu chudaboi mo ta gbe ma no Chube ole. Che ulita ñage gerule mo alin: “Cha ñage age ulita cha takalin kare me tañachuge daba na giti.” Che ñage gerule ene agwa age ulita me no che alin, ulita me che ta gbe no Chube ole, kaire ulita me daba na chudaboi mo ta gbe Chube gai ma no Chube takalin kare.  
\v 24 Che me ñage tañachuge mo giti alin age che takalin kare ulita no che alin, che me ñage tañachuge ene, agwa kaire no mo ta gbe tañachuge daba na ulita giti che kle age e no o me no daba na alin.  
\v 25 Ba ulita joge samla gige samla chbadakle ngwadi, ba samla gige ba me geru kadadale samla e jo kaitaba o me jo kaitaba lle oña kwian kle gai chuberege, ene ba ñage samla e ulita gute me tañachuge samla giti.  
\v 26 Chube nga ulita dodadu, Chube lle jigu gutadale kwian alin, che ñage lle e ulita gute, lle oña ngwale me ñage age e ole. 
\p  
\v 27 Kwian me Chubenu ba gweale Chubenu kade blire ule, ba ta jogekalin ba ña joge kwian ene ngwadi blire, ba ulla bligdadi ba bligda gutadale kamne, ba me geru kadadale samla bligdalla giti: “¿Samla e me jo kaitaba lle oñage?” Ba me geru kadadale ene, ene kwian na gweale Chubenu kle eni me tañachuge samla bligdalla giti.  
\v 28 Agwa daba na gweale Chubenu kle eni blire ule kaire, ama me geru gaba sbali, amage chke uñale kwian na giti samla e jo kaitaba lle oñage gire ama gerule ai kare ba ole: “Samla e jo kaitaba lle oña kwian kle gai chuberege, che kwian Chube ulianu me ñage samla e gute.” Daba ene ole ba me samla ene gutadale, daba ege tale suge me no samla ene gute, amage suge ama samla ene gute ama kle age me no Chube dollale, ba me samla ene gute ene ba me kle age daba ta suge dollale, ba mo ta gbadale age no daba ene alin me mo alin.  
\v 29 Cha kle gerule ba ole kwian na me kle tañachuge ba kle tañachuge kare giti, ba tale suge ba ñage bligda ulita gute agwa daba na tale suge me ñage bligda jo kaitaba lle oñage gute, ama alin e me no. Ba gweale ñage geru kade e giti, ba gerule: “Cha tale suge cha ñage bligda ulita gute, ulita no cha alin, cha tale suge ene, ¿lledale cha tañachuge daba na giti mo ta gbe me age ama ta suge dollale?  
\v 30 Cha blire, cha gerule no Chube ole bligda giti, cha bligda gute, e no cha alin, ¿lledale daba na me bligda ene gute be gerule me no chadi bligda giti? Daba me kle e gute.”  
\v 31 Ba ulita tachkedale ai giti: Ba kle age ulita giti kaire blire giti chi jai giti mo ta gbale age no diali kwianske me tañachuge mo alin giti age ba takalin kare, ma no mo ta gbale age no ulita Chube takalin kare kwian ulitaske, ene kwian gwage badi suge amage Chube kle age no ba tale kle ba ta gbe age, ene kwian gwage badi gerule no no Chube giti.  
\v 32 Kwian israelita gwa giti kwian me israelita gwa giti kaire kwian Chubenu ulita gwa giti ba mo ta gbadale age trate ene Chube takalin kare, ene ba mi kwian gdaite ta gbe age me no Chube dollale ba kle age giti.  
\v 33 Cha kle gerule kare ba ulita ole cha kaire kle mo ta gbe age ene diali tañachuge ngeru no kwian na ulita alin, cha me tañachuge ngeru mo giti age mo alin cha takalin kare, me ene, cha kle mo ta gbe tañachuge kwian na giti. Cha kle age ene kwianske cha takalin kwian na tanre ñage mo ta gbe Cristo gai ulia cha giti. 
\c 11  
\p  
\v 1 Cha kle mo ta gbe gwage Cristo nate Cristo chagedu kare kwianske nga dba ai giti, ene kaire ba ulita mo ta gbadale gwage cha nate cha kle chage kare kwianske. 
\s1 Muinga onbre gadale dage gerudi mo litangwage 
\p  
\v 2 Uñale chage ba ulita me kle ta jogenga chage, no ba kle tachke cha giti, kaire noare ba kle age cha ba tku tangle kare geru ulia Cristo gitige, chadi nga suga no no ba kle mo ta gbe age ene giti.  
\v 3 Agwa cha takalin kaire geru ai kare suge ba ulitage: Chube Cristo Chugagwalla, ene kaire Cristo kwian onbre ulita Chugagwalla, onbre mo jwanba mo muingalla chugagwalla.  
\v 4 Kwian kle mo litaba Chube geruadi, kwian onbre mo litaba eneske bai kaire kle gerule Chube ole o kle Chube gerua kete kwian mo litabage Chube ama ta gbe gerule kare, onbre ene me ñage gerule sombrero ole chugage, onbre gerule sombrero ole chugage me kle mo Chugagwalla Cristo gai dage me kle Cristo gai mo Chugagwallale.  
\v 5 Ene kaire muinga bai kaire kle gerule Chube ole o kle Chube gerua kete kwian mo litabage Chube ama ta gbe gerule kare, muinga ene me ñage gerule chuga ngwale, ama ñometra gweale gbale chuga giti, muinga me age ene me kle mo ñengulalla gai mo chugagwallale me kle mo ñengulalla gai dage, muinga ene kle mo gbe ma kweri mo ñengulallage kwian ulita gwa giti, muinga ene giti ñengulalla mo ta dbe ibule tanre. Muinga me ñometra gweale gbe mo chuga giti, kwian na gwa giti muinga ene salengwli muinga nu chugaga itaba kare ama chuga taglale kare.  
\v 6 Muinga me ta ñometra gweale gbakalin mo chuga giti, ma no muinga ene mo chugaga ite ulita, ene ama chege onbre kare kwian na gwage, ma no muinga ene chuga chege taglale, agwa muinga me no ene ole, amage suge ama ibule chage chuga taglale, ma no muinga ene ñometra gweale gbe mo chuga giti mo ñengulalla gai dage mo chugagwallale.  
\v 7-8 Ngeru Chube onbre dodadu salengwli mo kare, Chube me muinga dodadu ngeru, onbre giti Chube muinga dodadu, ene onbre chegu muinga chugagwallale, malen onbre gerudale Chube ole chuga ngwale mo litangwa Chube geruadi ngwadi, muinga onbre gadale dage malen me ñage gerule Chube ole chuga ngwale mo litangwa Chube geruadi ngwadi. Chube onbre dodadu salengwli mo kare, Chube onbre chugagwalla onbre Chube gadale dage. Muinga gda gweale me jo dodaba onbrere, agwa onbre gda gweale jo dodaba muingale, onbre giti Chube muinga dodadu, malen onbre muinga chugagwalla muinga onbre gadale dage.  
\v 9 Chube onbre dodadu ngeru, chudaboanga me ama alin malen Chube muinga dodadu onbre alin, Chube me onbre dodadu muinga alin,  
\v 10 malen muinga ñometra gweale gbadale mo chuga giti mo litangwa Chube geruadi ngwadi, ene ama kle mo ñengulalla gai mo chugagwallale gai dage, e giti nga suga no lle boanga Chube alin nga ngaña giti ulitadi.  
\v 11-12 Che ulita Jesucristonuge sugedale Chube onbre kaire muinga dodadu, Chube gwage gdaite me ma no gdaitege, onbre giti muinga jo dodaba onbre alin, ene kaire onbre ñage toi muinga ole, muinga giti onbre jrien, Chube kle onbre muire ulita gbe jrien. 
\p  
\v 13 Uñale ba ulitage ba suiale muinga kle gerule Chube ole mo litangwa Chube geruadi ngwadi, muinga ene ñometra gweale gbadale mo chuga giti, ba suiale muinga me age ene ama me kle mo ñengulalla gai dage mo chugagwallale.  
\v 14 Chube che onbre kaire muire jigu chugaga manade mo kaire kaire, ba suiage onbre chugaga manade jeike, suge me no onbre alin chugaga manade jeike muinga kare.  
\v 15 Agwa ba suiage muinga chugaga dbe onbre kare muingage me suge no ene, muingage suge ama chugaga jeike e no ama alin, Chube muinga jigu ene chugaga tige jeike, ene ama me chugaga dbe onbre chugaga kare, ene ama me tañachuge lle na gbe mo chuga giti, agwa ama chuga kle chugagaske.  
\v 16 Ba gweale tañachuge me ene cha kle gerule kare muinga giti, ba ta kira batakalin geru ene giti, chkedale uñale bage cha ulita kwian Jesucristo gerua ketanga kle kwian ulita tke tangle muinga ulita bai kaire kle gerule Chube ole mo litangwa Chube geruadi ngwadi muinga ene ñometra gweale gbadale mo chuga giti, daba Chubenu nga na ulitage kaire tañachuge cha kle tañachuge kare. 
\s1 Pablo ka boi kwian ole kwian me kle 
\s1 mo ta gbe chke no Jesucristo jokeda giti 
\p  
\v 17 Nege cha gerule ba ulita ole lle na kle boi baske giti, nga me suga no chadi ba kle age giti. Chage suge ba ulita kle mo lite ba ulita mo ta gbadale no mo chudaboi modi, agwa me kle boi ene baske, ba kle mo ta gbe age nganake.  
\v 18 Ngeru cha gerule ba ole ai giti: Geru chku cha kote ba ulita giti, kwian gerudu cha ole ba kle mo lite Chube geruadi ba ulita me kle tañachuge salengwli kwaitre alin ba ulita kle kira bate modi moske, cha tañachuge kle boi ene ulia baske daba gweale kle gerule cha ole kare.  
\v 19 Ba ulita kle mo lite ngwadi Chube geruadi diali ba gweale kle geru ulia Jesucristo giti gai, na kle geru nganake gai, malen baske kwian ulita mo gbadale mneite kaire kairege, ene be chke uñale trate ulia kwian bai kle Jesucristo gerua gai ulia bai kle joge siere geru uliage geru nganake gai.  
\v 20 Kle boi ene baske malen ba ulita me kle mo lite no ule tañachuge salengwli kwaitre alin. Ba ulita kle mo lite ule blire tachkegda Jesucristo jokeda giti agwa ba me kle mo ta gbe ule tachke ulia Jesucristo agedu giti, ba kle age ba takalin kare, ba age ene ba ta chege sugekare Jesucristo ageduge.  
\v 21 Ba gweale kle bligda dbe mo litangwage agwa ba me kle bligda gute ule salengwli modi daba na ole, ba kle mo ta gbe kibale bligda giti, ba kle blire ngle kle lle jai ngle joge llale, ba gweale kle age ene, daba me bligda ene kare molen kle mo lite ule, daba ene chege bli ole.  
\v 22 Ba bai kle blire ene daba na gwage, ¿mineade ba me kle blire mo ullage ngle lle jai ngle ba takalin kare? ¿O ba ulla me agengwa ene? Ba me ñage age me no ene daba na ole mo litangwa Chube geruadi ngwadi, kaire ba me ñage age ene ibu gbe daba na Chubenu me bligda molendi. ¿E giti ba tañachuge cha gerudale no ba kle age giti? Ulita ba kle age giti ba takalin kare sugekare Jesucristo agedu gitige, cha me gerule sidri no ba ole e giti. 
\p  
\v 23-24 Chage che Chugagwalla Jesucristo geru ketu blire giti tachkegda ama agedu giti, cha ba tku tangle geru e amaña giti Jesucristo ketu chage kare, cha geru e amaña kete bage nege nakwaite, Jesucristo geru e jigu ene: Chui amañage ngajrege Jesu bebi mo gange kwian me noge, ngeru ege Jesu mo litu ule blire geru jwannga amage gdataboko giti gdaboke ole. Jesu pan gau kote gerudu Chube ole pan giti: “Cha Ñenua, noare ba pan ai ketu cha ulitage gutadale.” Jesu gerudu ene Chube ole pan giti gire Jesu pan skutunga ketu kwian geru jwannga kaire kairege gutale, Jesu gerudu geru jwannga ulita ole: “Pan ai cha uda kare, cha ketabe gwaleda ba ulita giti, ba blire ai kare cha talla ole diali, ene ba tachke chage, ene ba mi ta jogengwa cha agedu giti ba alin.”  
\v 25 Jesu gerudu ene pan giti gire blidu ulita geru jwannga ole. Gire Jesu agedu pan ole kare ene kaire Jesu agedu giskagba uva chia ole, Jesu chi jangwa gau kote uva chia ole gerudu geru jwannga ulita ole: “Uva chia ai cha be kare, ba uva chia ai jai cha talla ole diali, ene ba ulita be tachke cha bege cha jogeda giti ba ulita alin, cha jogeda giti be suge trate ba ulitage Chube kle geru jagere gbe ba ulita alin.”  
\v 26 Jesu geru jigu ene kwian monu alin, malen cha gerule ba ulita ole, ba ulita mo ta gbadale age Jesu geru jigu kare, ba ulita age ene mo ta gbe pan gute uva chia jai ba kle tachke Jesu jokeda giti, ba agedale diali ene Jesu chieni chuia manade ngwange.  
\v 27 Ba ulita kle mo lite pan gute uva chia jai tachkegda Jesucristo jokeda giti bai kaire me tañachuge Jesucristo agedu giti ba alin ni mo ta gbe e gai dage ni mo ta gbe age Jesucristo geru jigu gerule kare, ba kle age ene ba kle mo gbe jiske Chube gwage kle age me no Jesucristo agedu dollale kle Jesucristo jokeda gai ngwale. Me no age ene ta ene giti,  
\v 28 malen ba ulita Chubenu gdaite gdaite tañachugale mo ta giti ngeru ta suge mine moge kle no o me no Jesucristo ole kle mo ta gbe age no Jesucristo takalin kare o age me no gweale kle ba tale, tañachugale ene ngeru pan gute uva chia jaige tachkegda Jesucristo jokeda giti.  
\v 29 Bai kaire pan gute uva chia jai me tañachuge mo giti ni tachke Jesu agedu giti ba alin, bai kaire kle blire ta ene giti ba agali kle mo gbe jiske Chube gwage, ba kle age ene ba kle Jesucristo jokeda gai ngwale kare.  
\v 30 Blire ta ene giti gdale ba tanre oga jingme kote, kira me, kaire gweale jokeda, Chube kle ji gbe ene ba alin ba kle age giti, ene ba tachke ba me kle age no Chube gwage.  
\v 31 Che Chubenu gdaite gdaite mo ta gbe tañachuge mo ta giti ta suge mine moge Jesucristo ole, mo ta gbe biale ene ngeru, ene Chube me ji gbadale che alin.  
\v 32 Ama ji gbe che alin e me gerule ama kle age me no che ole, agwa ama ta che tkakalin tangle che ta gbe suge chage mine ma no ama ole, ene che me chege jiske ji chugadale ule kwian ulita me Chubenu agenga me no ole. 
\p  
\v 33 Cha daballa cha ibotea Jesucristo giti, cha gerule ba ulita ole ba kle mo lite giti blidale tachkegda Jesucristo giti, ba mo lite ule blidale ma no ba ulita mo ta gbe salengwli blidale, ba daba ulita manadaledi blidale kwaitre alin ule, ba me blidale blike ngeru daba Chubenu na ulitage.  
\v 34 Ba gweale bli ole ma no blire no mo ullage, ene me tañachuge chie blire unchkedale ba takalin kare mo litangwage tachkegda Jesucristo giti, ba age ene Chube me ji gbe ba alin mo lite ene giti. 
\p Kaire lle na tanre kle gerudale ba ole, agwa cha mi chada degange e giti, cha be joge chui gwealege baske geru trage agali ba ole geru gweale cha me degangu chada aige. 
\c 12  
\s1 Chube Oña ta kete kwian Chubenuge lle kaire kaire 
\s1 boi mo kaire kaire Chube alin 
\p  
\v 1 Cha daballa cha ibotea Jesucristo giti, ba geru kade na degu cha alin, nege cha gerule ba ole e giti. Cha takalin suge trate ba ulitage ai giti: Chube Oña kle ta kete kwian Chubenuge lle kaire kaire boadale no mo kaire kaire Chube alin.  
\v 2 Uñale ba ulitage ngeru ba bebi Jesucristo gai ulia, e suiale che dolla Satanás kledu ba ta gbe lle oña dodaba mo kodi me ñage gerule ba ole gai mo chubeale, chui ege ba me Jesucristo uñu, nege ba Jesucristo uñe ba me kle lle oña gai dare mo chubeale, nege Jesucristo kle ba ta gbe.  
\v 3 Malen chkedale uñale ba ulitage kwian bai kle gerule Chube Oña kiralla giti, kwian ene gerule no Jesucristo giti: “Jesu ulita Chugagwalla.” Agwa kwian bai gerule me no Jesucristodi, kwian ene me kle gerule Chube Oña kiralla giti, kwian kle gerule Chube Oña kiralla giti me gerule ni sidri me no Jesudi, kwian me kle gerule Chube Oña kiralla giti gerule me no Jesudi, ba me kwian ene keruchuge, kwian Jesu gai ulia mo Chugagwallale, ba kwian ene alin keruchuge. 
\p  
\v 4 Chube Oña kle ta kete kwian Chubenu ulitage gdaite gdaite lle kaire kaire boadale Chube alin, malen kwian Chubenu ulita me kle lle amaña boi Chube alin, agwa Chube Oña amaña gdaitre alin kle ta ene kete kwian Chubenu ulitage lle boadale mo kaire kaire.  
\v 5 Kwian Chubenu ulita me kle lle amaña boi Chube alin, agwa ulita kle Jesucristo amaña gai mo Chugagwallale kle lle boi Jesucristo takalin kare.  
\v 6 Kwian Chubenu ulita me kle lle amaña boi Chube alin, agwa Chube amaña kle kwian monu ulita ta gbe kiraske lle boi no Chube alin Chube Oña ta ketu kwiange lle boi mo kaire kaire kare.  
\v 7 Kwian Chubenu gdaite gdaitege Chube Oña ta kete lle kaire kaire boi daba na Chubenu ulita chudaboagda ta gbe ma no Chube geruadi, Chube Oña kiralla giti kwian Chubenu ñage age ene daba chudaboi.  
\v 8 Chube Oña ta kete kwian gwealege gerule ta ngle ole. Chube Oña amaña ta kete kwian gweale nage Chube gerua uñe trate Chube gerua trage trate kwian ole.  
\v 9 Chube Oña amaña ta kete kwian gweale nage Chube gai ulia ma no daba na ulitage, kwian ene lle kade Chubege suge trate amage Chube be age ama alin. Kwian nage Chube Oña ta kete kwian oga dodade.  
\v 10 Kwian nage Chube Oña ta kete lle daga ngwale no tanre dodade Chube kiralla giti. Chube Oña ta kete kwian nage Chube gerua kete kwian nage. Chube Oña ta kete kwian nage chke uñale daba na giti bai kle gerule ulia Chube Oña kiralla giti bai me kle gerule ulia Chube Oña kiralla giti. Chube Oña ta kete kwian nage gerule kwira nale me jwanba. Chube Oña ta kete kwian nage daba keruchuge gerule kwira nale me jwanba geru e blite tragale kwian ole kwian e kwirale.  
\v 11 Kwian Chubenu ulita boi ene gdaite gdaite tale, Chube Oña gdaitre alin kle age kwian gdaite gdaite tale, Chube Oña e amaña ta kete kwian ulitage age mo kaire kaire Chube Oña takalin kare. 
\p  
\v 12 Che gdaite jegwale ngle molen, agwa ulita gdaitre alin ule. Ene kaire kwian ngle Cristo giti kwian gdaitre alin kare.  
\v 13 Che ulita me chudalla gdaitre alin agwa Chube Oña che ulita ta gbu ule kwian gdaitre alin kare, che gweale israelita gweale me israelita, che gweale lle boanga mo mauña alin gweale me lle boanga mo mauña alin. Che ulita mo kaire kaire kwian ene agwa Chube Oña che ulita ta gbe kwian gdaitre alin kare Jesucristo giti, Chube Oña amaña gdaitre alin kle toi che ulita tale, Chube Oña kle che ulita ta gbe ule.  
\v 14 Che jegwale me gdaitre alin kle, che jegwale ngle molen, agwa ulita gdaite gdaite me ñage age gballa sugekare, ulita kle ule moge, ene kle no ulita.  
\v 15 Che sera me gerule che ko giti: “Cha me ko kare, ko ma no cháge, malen cha me jegwalenu.” E me gerule ulia sera me jegwalenu, diali sera chege jegwalenu, ko me ma no serage, ama boke salengwli.  
\v 16 Kaire che olo me gerule che gwagwa giti: “Cha me gwagwa kare, gwagwa ma no cháge, malen cha me jegwalenu.” E me gerule ulia olo me jegwalenu, diali olo chege jegwalenu, gwagwa me ma no ologe, ama boke salengwli.  
\v 17 Che ulita jegwale gwagwa alin kle, e kle ene che olo me, che me ñage nga keruchuge. Kaire che ulita jegwale olo alin kle, e kle ene che se me, ñalla me suge chege.  
\v 18 Agwa Chube me che dodadu ene, Chube che jegwale tanre gbu ule mo kaire kaire ama tadukalin kare ulita chege no.  
\v 19 Chube che olo alin dodadu jegwale ulita, e ene che me kwian.  
\v 20 Chube che jegwale tanre ulita dodadu, ene ulita kle no ule gdaitre alin.  
\v 21 Gwagwa me ñage gerule ko ole: “Ba me no cha kare, ba ngwale, cha me takalin bage.” Kaire chuga me ñage gerule sera ole: “Ba me no cha kare, ba ngwale, cha me takalin bage.”  
\v 22 Ulia jegwale tanre ulita no che alin, jegwale tanre ulita me kle che ole che me ñage toi no. Che me tañachuge jegwale tanre gdaite giti: “Jegwale e gdaite soli ngwale me no, cha me takalin jegwale ege, ma no cha jegwale e jwennga.” Che me tañachuge ene, che no jegwale gdaite soli e ole, suge chege jegwale soli e me che me ñage toi.  
\v 23 Jegwale gweale giti che me tañachuge, agwa che kle mo ngama tke ma no chegedale ma no kwian na gwa giti. Che jegwale gweale kwian ni gwage edi, che me e ngama tke che ibule tanre, malen che e ngama tke ma no ñometraske jegwale na ulitage, ene che me ibule.  
\v 24 Agwa jegwale gweale na, kwian ulita ñage gwage edi, ni che tañachuge e ngama tke. Chube che jegwale tanre ulita dodadu gbu ule no mo kaire kaire jegwale ulita ole, jegwale gweale me ma no jegwale na ulitage, ulita salengwli no che alin malen che jegwale ulita manade no,  
\v 25 ene jegwale gweale me suge sugekare jegwale nage, boi gweale, ulita suge salengwli.  
\v 26 Jegwale gweale skibachie jegwale ulita suge skibachie moge kaire. Kaire che jegwale gweale manade no, e no jegwale ulita alin. 
\p  
\v 27 Ene kaire ba ulita Chubenu, ba Cristo jegwalenu kare, ba ulita gdaite gdaite Cristo jegwale gwealenu kare.  
\v 28 Kwian Chubenu ulitaske Chube ta kete kwian monu gdaite gdaitege age mo kaire kaire Chube takalin kare, ene kwian Chubenu chege Cristo jegwalenu gdaitre alin kare. Chube kwian gweale gbu ma kweri daba nage, Chube ta kete kwian enege Jesucristo gerua kete, Chube ta kete kwian gweale nage Chube gerua kete kwian nage Chube Oña kle geru kete amage kare, Chube ta kete kwian na gwealege daba tke tangle Chube geruage. Lle e kare gdamai boi, e ma no Chube gwage. Ege dare Chube ta kete kwiange lle ai kare boi: lle daga ngwale no dodanga Chube kiralla giti, oga dodanga Chube kiralla giti, daba chudaboanga, daba kaganga, gerunga kwira nale me jwanba. Chube ta ketu kwian ene ulita gdaite gdaitege age mo kaire kaire Chube takalin kare.  
\v 29 Agwa Chube me ta ketu kwian ulitage lle amaña boi Chube alin dabaske, Chube me ta kete kwian ulitage Jesucristo gerua kete, Chube me ta kete kwian ulitage Chube gerua kete kwian nage Chube Oña kle geru kete amage kare, Chube me ta kete kwian ulitage daba tke tangle Chube geruage, Chube me ta kete kwian ulitage lle daga ngwale no dodade Chube kiralla giti,  
\v 30 Chube me ta kete kwian ulitage oga dodade Chube kiralla giti, Chube me ta kete kwian ulitage gerule kwira nale me jwanba, Chube me ta kete kwian ulitage daba keruchuge gerule kwira nale me jwanba gire geru e blite tragale kwian ole kwian e kwirale. Chube me ta kete kwian ulitage lle amaña boi dabaske, Chube ta kete kwian mo kaire kairege lle boi Chube alin Chube takalin kare.  
\v 31 Chube ta kete kwian gwealege Jesucristo gerua kete, Chube ta kete kwian gweale nage Chube gerua kete kwian nage Chube Oña kle geru kete amage kare, Chube ta kete kwian na gwealege daba tke tangle Chube geruage. Lle e kare gdamai boi e ma no Chube gwage, no ba ulita mo ta gbe lle e kare kade Chubege boadale Chube alin, e no, agwa kaire cha ba ta gbe suge lle ma no e ulitage giti: Mo ta dbe no ulita daba ulita ole, e ma no Chube gwage. 
\c 13  
\s1 Kwian Chubenu ulita mo ta dbadale no 
\s1 daba na ulita ole diali 
\p  
\v 1 Chube ta kete chege gerule kwira nale me jwanba, agwa che me no daba na ole, ngwale che ñage gerule kwira nale me jwanba. Che me gerule ta no ole daba na ole che kerusuge daba nage lle dagaklenga kle gdade me no kare lle gdade sugaska ologe kare. Che kerusuge ene daba nage, ngwale che kle gerule kwira nale.  
\v 2 Chube ta kete chege Chube gerua kete kwiange Chube Oña kle geru kete chege kare, chege Chube talla ulita suge trate, che geru ulita tanre uñanga Chube giti, che kwian ene agwa che me no daba na ole che kle age ngwale. Diali che Chube gai tanre ulia, ta ene ole che lle kade Chubege, uñale chege che gerule jwichuga giti Chube ole jwichuga jwen gbe nga nage, Chube age, che kwian ene agwa che me no daba na ole ngwale che kle ta dbe ene.  
\v 3 Che lle monu ulita girabate kwian me lle molen ole, kaire che mo chuge ngwadi mo gugange gwade geru dbe giti kwian geru dollale kote, che kwian ene agwa che me no daba na ole che kle age ulita ngwale. 
\p  
\v 4 Ulia che no daba na ole che mo ta dbale ai kare daba ole: 
\q1 Mo ta gbe jage me skochie dabadi. 
\q1 Age no daba alin. 
\q1 Me tañachuge me no dabadi daba lle no tanre molen giti. 
\q1 Me mo gai dage dabadi, me tañachuge mo giti ma kweri dabage. 
\q1  
\v 5 Mo ta gbe daba gai dage. 
\q1 Me tañachuge mo giti alin age no mo alin. 
\q1 Me mo ta gbe skole daba ole. 
\q1 Daba age me no ole me oge mo tale. 
\q1  
\v 6 Me nga dbe suga no daba kle age me no giti, agwa nga dbe suga no daba e amaña kle age no Chube takalin kare giti. 
\q1  
\v 7 Ta dbe olire daba giti daba kle age me no giti agwa diali no daba ole, diali mo ta gbe tañachuge no daba ene giti, mo ta gbe no daba manadedi chui gwealege daba ñage mo ta blite nganake no, ta dbe no daba ole diali ni mo ta blite sidri me no daba ole. 
\p  
\v 8 Ta dbe no diali daba ole, e me joge tangle, nege kaire chui bdaglige be chege diali. Chui gweale be chke, chui ege kwian me Chube gerua ketadale dare ni kwian gerudale kwira nale me jwanba ni kwian tañachugadale dare Chube gerua uñe trate giti. Geru kete, gerule kwira nale me jwanba, kaire Chube gerua uñe trate, e ulita no nege alin, e mi chege diali, e ulita be joge tangle chui bdaglige, agwa ta dbe no daba ole e chege no diali chui tangle.  
\v 9 Nege nga dba ai giti che me ñage Chube gerua ulita uñe trate no, che me kwian trate, Chube gerua ulita me ñage suge trate chege, malen che me ñage geru e ulita kete daba nage.  
\v 10 Agwa Jesucristo chieni chuia be chke gire che ulita be geru Chubenu ulita uñe trate, chui ege Chube gerua ulita be suge trate trate che ulitage, malen che mi daba na Chubenu tkadale tangle dare geru e giti. 
\p  
\v 11 Cha kledu soli cha ta me kledu kwian juma talla kare, cha gerudu cha tañachugu kirogwa ulita gerule tañachuge kare, cha tigedu cha jo juma cha me tañachugu dare kirogwa soli kle tañachuge kare, cha kirogwa talla ulita chugu ngwadi.  
\v 12 Ene kaire nege che ta kirogwa talla kare Chube gerua ole, Chube gerua ulita me suge trate chege, che talla ulita nege Chube geruadi bebi kle trate, nege che ta suge Chube geruadi salengwli che gwage mo oñadi chi oña juda me noge kare, me gwage trate mo gwadi. Agwa chui gwealege che be gwage mo gwagwa giti Jesucristodi, chui ege be suge chege trate Chube gerua giti, chui ege che be Chube gerua uñe trate trate Chube che ta uñe nege kare. 
\p  
\v 13 Che mo ta gbadale age gdamai aige: Che mo ta gbadale Chube gai ulia diali. Che mo ta gbadale tañachuge diali Chube be age che alin bdagli giti, che chui e manadale nga suga no ole. Che mo ta gbadale no daba na ulita ole. Ai gdamai ulita no, e chege diali chui tangle, agwa gdaite ma no gdabokege, e mo ta dbe no daba ole diali. 
\c 14  
\s1 Kwian Chubenu mneiteske Chube gerua ketanga 
\s1 kaire gerunga kwira nale mo ta gbale 
\s1 daba ulita chudaboi gerudi 
\p  
\v 1 Cha gerule ba Chubenu ulita ole, diali ba ulita mo ta dbadale chege no daba na ulita ole, kaire ba ulita gdaite gdaite mo ta gbale diali gerule Chube ole mo giti Chube ta kete bage lle gweale boi no Chube alin daba Chubenu ulitaske Chube takalin kare. Ba ta gerukalin Chube ole Chube ta kete bage gerule Chube Oña kiralla giti kwira nale ba me jwanba, e no, agwa ma no ba mo ta gbale gerule Chube ole Chube ta kete bage Chube gerua kete daba nage Chube Oña kiralla giti daba kle gerule kare kwirale.  
\v 2 Chube Oña kiralla giti kwian gerule kwira nale kwian me jwanba, e no, agwa me suge daba nage, kwian gerule kwira nale suge Chube alinge allabi kwian kle gerule mine, gerule kwira nale me jwanba e me daba na chudaboi.  
\v 3 Agwa Chube Oña kiralla giti kwian Chube gerua kete dabage daba kle gerule kare kwirale, geru e ñage suge daba nage, geru e daba chudaboi, daba kira gai geru ege, daba tige gerudi, geru e daba ta gbe suga no.  
\v 4 Daba Chubenuske bai kaire kle gerule kwira nale kle age mo alin allabi kle mo alin allabi chudaboi Chube geruadi, agwa bai kaire kle Chube gerua kete daba ulitage daba kle gerule kare kwirale, geru ketanga ene daba Chubenuske kle age no daba Chubenu ulita alin kle daba Chubenu ulita chudaboi ta gbe no chage Chube geruadi.  
\v 5 Cha alin no ba ulita ñage gerule kwira nale me jwanba, agwa kaire ma no cha alin ba ulita geru Chubenu kete trate kwian kle gerule kare kwirale Chube kle ba ta gbe kare geru kete, e ma no gerule kwira nalege. Geru kwira nale kwian na ñage geru e blite tragale kwian ole kwian kle gerule kare kwirale, ene kwian Chubenu ulitage suge kle gerule mine, ene kwian Chubenu ulita ñage mo ta gbe ma no dare Chube geruadi. 
\p  
\v 6 Ba cha daballa cha ibotea Jesucristo giti, cha gerule ba ulita ole, cha joge baske geru Chubenu trage kwira nale me ba kle gerule kare kwirale, ngwale cha geru Chubenu trage baske, geru kwira nale me ba gerule kare me ba chudaboi. Agwa cha joge baske geru Chubenu trage ba kle gerule kare kwirale, cha gerule trate trate ba kle gerule kare kwirale Chube giti geru kete trate bage Chube cha ta gbe gerule kare, cha ba tke tangle geru uliage Chube cha tku tangle kare ba kle gerule kare kwirale, ene geru ulita ñage suge bage.  
\v 7 Kwian kle ngwanegda gbe ngwane me mo kobara gbe no ngwanegda uga giti, ene ngwanegda kerua me suge no trate kwian nage, me uñale kle ngwanegda gbe ngwane mo gate mine giti. Kaire kwian kle gitara dagenga me mo kobara gbe no giskalla kaire kaire giti, ene gitara kerua me suge no trate kwian nage, me uñale kle mo gate mine dagenga.  
\v 8 Kaire kwian trompeta daganganga ngwane trompetage guardia donga alin guardia donga gbale ta gbe biale dole, kwian trompeta daganganga me trompeta kerua gbe no trate guardia donga alin guardia dongage mi suge ama dódale, ama mi mo gbe biale dole.  
\v 9 Ene kaire kle boi kwira nale giti ba ulita Chubenuske, ba gweale kle gerule Chube giti daba Chubenuske kwira nale me daba kle gerule kare, ¿ene ba kle gerule kare be suge mine dabage? Me suge dale, ngwale ba kle gerule daba ole.  
\v 10 Uñale chage kwira ngle kle nga dba ai giti, kwira e ulita kaire kaire mo kwirale suge trate.  
\v 11 Kwian gerule kwira nale cha ole, chage geru me suge, cha me ama bitalla ama me cha bitalla, cha nga namu kare ama alin, ama nga namu kare cha alin, ni cha ña geru trage modi.  
\v 12 Malen cha gerule ba ulita ole, ba ulita takalin Chube Oña ta kete bage lle gweale boi Chube alin daba Chubenuske, ma no ba ta kade Chube Oñage daba Chubenu na tkale tangle Chube geruage daba kle gerule kare kwirale, ene ba daba na Chubenu ulita chudaboi ta gbe ma no chage Chube geruadi.  
\v 13 Bai kaire kle gerule daba Chubenuske kwira nale me jwanba Chube Oña kiralla giti, kwian e gerudale Chube ole Chube Oña ta kete amage suge kwira nale e blite tragale daba ole daba e kwirale, ene suge daba ulitage ama kle gerule mine kwira nale.  
\v 14 Cha gerule Chube ole daba Chubenuske kwira nale me daba kle gerule kare kwirale ni cha kle gerule kare kwirale, cha gerule Chube ole kwira enere Chube Oña cha ta gbe kare, cha kle gerule Chube ole agwa geru e me suge dabage ni suge chage, cha kle gerule ene alin e me daba chudaboi.  
\v 15 E boi ene cha ole, ¿cha agedale mine ene geru suge dabage? Ma no cha kle gerule Chube ole daba Chubenuske cha mo ta gbale no diali gerule Chube ole daba kle gerule kare kwirale, ene geru suge dabage daba chudaboi ta gbe suge no Chube ole. Kaire cha kle mo gate Chube giti daba Chubenuske, ma no cha mo ta gbale no diali mo gate daba kle gerule kare kwirale, ene mo gate gerua suge dabage daba chudaboi ta gbe suge no Chube ole.  
\v 16 Ene kaire ba ulita mo ta gbadale gerule no Chube ole daba Chubenuske Chube kle age giti daba kle gerule kare kwirale, ene geru suge dabage, ene daba ñage mo ta gbe ule ba ole gerule Chube ole. Ba kle gerule no Chube ole daba Chubenuske kwira nale me daba kle gerule kare kwirale, geru e me suge dabage, ene daba me ñage mo ta gbe ule ba ole ba kle gerule kare Chube ole.  
\v 17 Ba gerule no Chube ole daba Chubenuske Chube kle age giti kwira nale me daba kle gerule kare kwirale, e no ba alin agwa e me suge daba nage, e me daba na ta gbe chke ma no Chube geruadi.  
\v 18 Cha gerule no no Chube ole Chube kle cha ta gbe gerule kwira na tanrere ma ngle ba ulita Chubenu kle gerule kwira nalege.  
\v 19 Cha ñage gerule kwira nale tanre daba Chubenuske agwa suge chage geru e me suge dabage, ma no cha gerule bedre daba kle gerule kare kwirale daba tke tangle Chube geruage, ene daba Chubenuge geru suge. E ma no cha gerule tanre kwira nalege me daba kwirale ni geru gbaite suge dabage. 
\p  
\v 20 Cha daballa cha ibotea Jesucristo giti, ba ulita mo ta gbadale tañachuge kirogwa kare age me no giti, kirogwa bebi ni tachke mine age me no kwian juma kare. Noare ba ulita mo ta dbadale tañachuge kirogwa talla kare age me noge, agwa cha kle Chube gerua trage ba ole nege kare, geru ege ba mo ta gbadale tañachuge no kwian juma talla kle tañachuge kare. Noare ba chege diali tañachuge kirogwa talla kare age me no gerua ole, agwa Chube gerua ole ba me ñage chege tañachuge dare kirogwa talla kare, ba me ñage chege tañachuge dare gerule kwira nale alin giti.  
\v 21 Chube gerua degaba unsuialin gerule kwian israelita me Chube gau ulia kwira nale giti, chada e gerule: 
\q1 “Chube gerudu, ‘Cha be kwian chudalla na me israelita gbe cha gerua kete kwian israelita me cha gabage kwian me israelita kwirale, ni ene kwira na ene giti kwian israelita be mo ta gbe cha ole cha gai ulia.’ ” 
\m Unsuialin Chube agedu ene kwian israelita me ama gaba ulia ole.  
\v 22 E giti suge kwian me Chube gaba ulia me mo ta blite Chube ole geru kwira nale giti, geru e me suge kwiange, kwian me Chube gaba Chube gerua keruchuge kwira nale me kwian kle gerule kare kwirale, kwian ene chege sugekare Chubege. Agwa Chube kwian ta gbe geru amanu kete kwian monuge kwian kle gerule kare kwirale, kwian Chube gaba geru e keruchuge, kwian ene ta chege ma no Chube ole geru e giti.  
\v 23 Kwian me Chubenu kaire kwian gweale na me Chube gerua gaba sbali joge chke ba kwian Chubenu ulita kle mo litaba ngwadiske, ba kwian Chubenu ulita kle gerule kwira nale, kwian ene ba ulita keruchuge ama be tañachuge ba ulita kwian jwligebanga.  
\v 24 Agwa kwian me Chubenu kaire kwian gweale na me Chube gerua gaba sbali joge chke ba kwian Chubenu ulita kle mo litaba ngwadiske ba ulita keruchuge gerule Chube kle ba ta gbe kare gerule Chube giti mo kwirale, geru e Chube giti suge amage, ama tachke mo giti, suge amage ama agenga me no Chube gwage, ene ama agali chege tañachuge mo tale ulita kle age giti,  
\v 25 suge trate amage Chube ama talla me no ulita uñe trate, ene ama mo ta gbe no Chube ole jongnagwa skute dba Chube gai dage, suge amage Chube kweri, ulia Chube kle ba ulita tale malen ba ñage Chube gerua trage trate. 
\p  
\v 26 Cha daballa cha ibotea Jesucristo giti, cha takalin suge ba ulitage cha kledu gerule kare, ba ulita mo lite ule Chube geruadi, gweale ñage mo gate Chube giti, na gweale ñage daba tke tangle, na gweale ñage Chube gerua kete dabage Chube ama ta gbe gerule kare, gweale na ñage gerule kwira nale me jwanba, gweale na ñage kwira nale blite tragale daba ole daba e kwirale. Ba ulita gdaite gdaite kle lle ene kare boi kaire kaire daba Chubenuske, ba mo ta gbale tañachuge daba Chubenu na giti Chube gerua gbe chke ma ngle daba tale, ene daba mo ta gbe chage ma no Chube geruadi.  
\v 27 Ba ulita kle mo litaba, gweale ta gerukalin kwira nale me jwanbale, gdaboke gdamai alin ñage gerule kwira nale, ama daba manadaledi, gdaite gerule ngeru gire na ñage gerule, me ñage gerule ule kwaitre alin, kaire gweale kwira e blitadale tragale daba ulita kle mo litaba gerule kare kwirale.  
\v 28 Kwian gweale ta gerukalin kwira nale ba Chubenu ulita kle mo litabaske agwa daba na geru e blitanga me geru e tragadale ba ulita ole ba ulita kle gerule kare kwirale, ene ma no kwian gerunga kwira nale me gerule ba ulita kle mo litabaske gerule kweri, ma no kwian ene chege gerule gballa kamne mo tale Chube ole.  
\v 29 Kaire ba Chubenu ulita kle mo litabaske kwian gweale Chube gerua ketanga dabage Chube ama ta gbe gerule kare, kwian ene gdaboke gdamai alin ñage geru kete daba Chubenu ulita kle mo litabage, ulita kle mo litaba geru e keruchugadale ta giti mo ta gbale tañachuge trate kwian kle gerule giti geru e ulia Chube gerua o me.  
\v 30 Kwian Chube gerua ketanga gdaite bebi gerule ulita gire Chube kwian na ta gbe geru monu ketadale kwian kle mo litaba alin kaire, kle gerule ngeru chegedale kamne daba na e Chube ama ta gbu gerule chuge ngwadi Chube gerua kete Chube ama ta gbu gerule kare.  
\v 31 Age ene gdaite gdaite Chube gerua ketanga kwiange mo kaire kaire ñage Chube gerua trage Chube ama ta gbe gerule kare, ene kwian ulita kle mo litaba geru keruchuge no geru uñe trate Chube gerua keruchuge giti, ene kwian ulita ñage kira gai modi Chube geruage mo ta gbe chage ma no.  
\v 32 Chube kwian ta gbe geru monu kete kwiange, kwian ene Chube gerua ketanga ulita mo ta gbale no no geru kete kwiange me ulita gerule ule kwaitre alin, ma no daba manadedi gerule gdaite gdaite, ene geru ulita suge kwian ulita kle mo litabage.  
\v 33 Chube me takalin kwian Chube gerua ketanga ulita gerule ule kwaitre alin, kwian Chube gerua ketanga ulita gerule ule kwaitre alin geru me ñage suge kwian kle mo litabage, Chube me takalin boi ene kwian kle mo litabaske, Chube takalin kwian ulita kle mo litaba ñage Chube gerua keruchuge no, ene geru suge kwian ulitage kwian ulita ta suge no geru giti. 
\p Ba Chubenu ulita una Corintomu mo ta gbale age daba Chubenu nga na ulitage kle age kare,  
\v 34 ba ulita kle mo lite Chube geruadi gire muinga ulita chegedale kamne Chube gerua keruchuge alin, muinga ulita mo ñengulalla gadale mo chugagwallale Moisés nu Chube gerua degaba unsuialin gerule kare malen muinga ulita chegedale kamne daba Chubenu kle mo litaba ngwadi.  
\v 35 Muinga ta geru kadakalin Chube gerua gweale giti, ma no geru kade mo ullage mo ñengulallage, me no muinga alin gerule Chube gerua gweale giti kwian ulita gwa giti kle mo litaba ngwadi. 
\p  
\v 36 Ba ulita tachkedale mo giti, baske Chube gerua me jo chke ngeru, ba ulita me tañachugadale ba alin allabi Chube gerua uñe daba nage malen ba ulita agekalin moske ba takalin kare, cha gerule ba ole ba me ñage tañachuge ene, e me ulia.  
\v 37 Ba gweale ta suge moge Chube kle ta kete bage geru kete daba ulita mo litaba Chubenuge daba kle gerule kare kwirale, gweale na ta suge moge Chube kle ta kete bage gerule Chube Oña kiralla giti kwira nale me jwanbale, ba kwian ene ulia be suge trate bage Chube kle cha ta gbe chada ai degange ba alin, ba be age chada ai kle gerule kare  
\v 38 Bage chada ai me suge ene, ba me age chada ai Chube cha ta gbu degange kare, ba tañachuge geru ai cha agali gerua me Chube gerua, ba tañachuge ene, Chube gwage ba me Chube gerua ketanga ulia daba ulita mo litaba Chubenuge ba me gerunga kwira nale ulia Chube Oña kiralla giti, Chube gwage ba kwian ngwale, Chube me ta ketu bage ama gerua kete daba nage Chube me ta ketu bage gerule kwira nale me jwanba. 
\p  
\v 39 Cha daballa cha ibotea Jesucristo giti, cha gerule trate ba ulita ole, diali ba ulita gerudale Chube ole mo giti Chube ta kete bage ama gerua kete daba nage daba kle gerule kare kwirale, e no ba ulita alin. Daba gweale ta gerukalin kwira nale ba ulita kle mo litabaske, ba me ñage gerule daba ene ole ni gdaite ñage gerule kwira nale. Agwa ba ulita bai kaire kle gerule kwira nale bai kaire kle Chube gerua kete dabage Chube ta kete bage kare daba kle gerule kare kwirale,  
\v 40 ba ulita mo ta gbadale age modi Chube takalin kare. Ba ulita me gerudale ule kwaitre alin, agwa ba daba manadaledi gerule gdaite gdaite, ene ba ulita ñage mo lite no ule tañachuge salengwli Chube gerua giti, ene ba ulita ñage gerule no Chube giti. 
\c 15  
\s1 Jesucristo jokeda chkuni gwade, ene kaire 
\s1 kwian ulita nu Jesucristo gaba ulia kwian ene 
\s1 jaba be chkeni gwade chui bdaglige 
\p  
\v 1 Cha daballa cha ibotea Jesucristo giti, cha takalin ba ulita tachkedale cha geru Cristo chkuni gwade giti ketu bage kare, ba ulita geru e Cristo chkuni gwade giti gau ulia kaire ba kle mo ta gbe gwangerugu geru edi.  
\v 2 Cristo gerua e gai ulia giti ba tiendu gitiru ji chugege ba agedu me no gdale. Ulia ba geru e gau ulia mo alin diali, ene ba me geru gau ngwale. Agwa ba me kle geru gai ulia ene, ba geru e gau ngwale me kle mo ta dbe ulia gerudi. Agwa ba ulita mo ta gbu geru e gai ulia.  
\v 3-4 Cha kledu baske cha ba tku tangle ngeru Cristo giti Cristo cha ta gbu kare, cha ba tku tangle Cristo giti Cristo jokeda che ulita alin che agedu me no giti, Cristo jaba jo ogaba keugage, chui maike chku Cristo chkuni gwade, boidu ene ulita Cristo ole Chube gerua degaba unsuialin gerule kare.  
\v 5 Cristo chkuni gwade ama medu Pedroge, kaire chui nage Pedro kledu kwian Jesucristo gerua ketanga na ulita ole ama gdataboko giti gdaboke ulita gwagedu Cristodi gwadeni mo gwagwa giti.  
\v 6 Chui nage kwian nu Cristo gaba ulita quinientos kledu mo litaba Cristo medu gwadeni ama ulitage, kwian ene ulita gwagedu Cristodi gwadeni, nege kwian ene gweale jogebada agwa ngle kle toi gwade bebi jogeda ñage gerule ulia ama gwagedu Cristodi gwadeni mo gwagwa giti.  
\v 7 Kaire Cristo medu Santiagoge, chui nage kwian Jesucristo gerua ketanga ulita kledu mo litaba ama ulita gwageduni Cristodi gwadeni.  
\v 8 Bdagli cha Pablo gwagedu amadi mo gwagwa giti, chui ege Cristo cha ta blitu ama ole, ama cha gbu ama gerua ketangale, Cristo cha gau bdagli kwian Jesucristo gerua ketanga na ulitage,  
\v 9 cha ma soli ama ulitage ni cha ka chegedale kwian Jesucristo gerua ketangale. Ngeru cha bebi Cristo gai ulia cha chagedu age me no tanre kwian nu Cristo gaba ulia dollale, cha ene gire Cristo cha gau mo alin, Cristo cha ta blitu ama gai ulia, ama cha gbu ama gerua ketangale.  
\v 10 Chube agedu no no cha alin, ama cha gau lle boi ama alin, ama ta ketu chage lle boi ama alin ama takalin kare. Chube me cha gau ngwale dale, me ene, cha kle lle boi no no, cha kle lle boi ma giti dare kwian Jesucristo gerua ketanga na ulitage. Cha kle lle boi ene cha me kle age mo kiralla giti, Chube no no cha ole, Chube mo kiralla giti cha chudaboi lle boi no.  
\v 11 Ba me tañachugadale bai lle bo ngle bai me lle bo ngle Chube alin, cha lle bo ma no ma ngle o Jesucristo gerua ketanga ngeru lle bo ma no ma ngle. Cha ulita Jesucristo gerua ketanga kle geru amaña kete kwiange Cristo jokeda chkuni gwade giti, ba ulita geru e gau ulia, e giti ba mo ta gbadale diali. 
\p  
\v 12 Cha ulita geru dbanga Cristo giti Cristo jokeda chkuni gwade, e uñale ulia cha ulita geru dbangage, ba ulita geru e gau ulia, ¿mineade ba gweale kle gerule jaba mi chke gwadeni?  
\v 13 Ba gweale kle gerule kare jaba mi chkeni gwade, e ene ulia e suge Cristo jokeda ama me chkuni gwade.  
\v 14 Cristo me chkuni gwade ba gweale kle tañachuge kare, e ene ulia ene cha kle gerule kare Cristo giti ba ole cha kle gerule ngwale, ba mo ta gbu geru gai ulia cha gerudu kare, e ngwale kaire.  
\v 15 Cha ulita Cristo gerua dbanga kle gerule ulia Chube Cristo jaba gbuni gwade, agwa ba gweale kle gerule jaba me chkeni gwade, e ene ulia ba kle gerule kare ene Chube me Cristo jaba gbuni gwade cha ulita kle gerule kare, ene kaire Chube mi che Chubenu jaba gbeni gwade, e ene ulia ba kle gerule kare ene cha ulita kle sole, ene cha me kle gerule ulia Chube giti.  
\v 16 Ba gweale kle tañachuge jaba mi chkeni gwade, e ene ulia e suge Cristo jokeda Cristo me chkuni gwade.  
\v 17 Cristo me chkuni gwade, ngwale ba ulita kle mo ta gbe Cristo gai ulia. Cristo me chkuni gwade, ni ba gdaite tien gitiru ji chugege ba agedu me no gdale.  
\v 18 Cristo me chkuni gwade, kwian Cristo gau ulia kledu gwade gire jokeda mi chkeni gwade, ama jonga ulita, ama chege sugekare Chubege diali chui tangle.  
\v 19 Cristo me chkuni gwade, ene che Cristo gai ulia toigda no nege alin nga dba ai giti alin allabi, e ene alin allabi, ene che jogeda giti che be kwachie tanre, nga na me che alin, ni nga be suga no chedi nga dba ai giti tañachuge mo giti.  
\v 20 Agwa Cristo jokeda, ama me chegu jogebada, agwa ulia ama chkuni gwade, ama ngeru chkenga gwadeni jondege, ene ama giti kwian ulita bai kaire ama gaba ulia jogeda be chkeni gwade toi ule ama ole.  
\v 21 Kwian gdaitre alin kada Adán giti jogeda chegu kwian ulita alin, ene kaire kwian gdaitre alin kada Cristo giti chkeni gwade chegu kwian ulita alin.  
\v 22 Adán agedu me no giti kwian ulita chegu sugekare Chubege kaire jogeda, ene kaire Cristo jokeda chkuni gwade giti kwian ulita bai kaire Cristo gai ulia, kwian ene jogeda ama me chege sugekare Chubege, ama be chkeni gwade toi gwadeni ule Chube ole.  
\v 23 Ngeru Cristo jokeda chkuni gwade, e giti suge trate chege kwian Cristonu jogebada be chkeni gwade Cristo chkuni gwade kare. Cristo chkuni gwade gire joni nga ngaña giti, ama be chieni kwian amanu jwen, chui ege kwian amanu jogebada be chkeni gwade be joge toi ama ole nga ngaña giti. Be boi ene chui bdaglige.  
\v 24-25 Chube Cristo kagu nga dba ai giti, gire Chube kwian ulita nga ulita lle ulita jigu Cristo kote, Cristo chegu e ulita Chugagwallale. Nege Cristo kle nga ngaña giti ama chege kaire kwian ulita nga ulita lle ulita Chugagwallale, agwa ama bebi mo gbe kirachke Chube dollaledi ulita. Nege Cristo kle manade, chui bdaglige Cristo be chieni kwian amanu gbaleni gwade dbale toi nga ngaña giti Chube kle ngwadi, chui ege Cristo be kirachke dolla Satanádi be kirachke chugagwalla ulita Chube dollaledi nga ngaña gitidi nga dba ai gitidi, kaire be kirachke lle ulita me no Chube dollaledi. Cristo be kirachke e ulita me nodi gire Cristo be kwian amanu ulita kete ama Ñenua Chubege, ulita be chege Chube kote, Chube be chege ulita Chugagwallale.  
\v 26 Nege nga dba ai giti jogeda kle kwian ulita alin, agwa chui bdaglige kwian Cristonu ulita mi chege jogebada, Cristo be kwian monu ulita gbeni gwade toidale ule Chube ole, kwian mi jogeda dare.  
\v 27 Chube gerua degaba unsuialin gerule Cristo giti, chada e gerule: 
\q1 “Chube ama gbu ma kweri lle ulitage kwian ulitage, Chube lle ulita kwian ulita jigu ama kote, ama chege ulita Chugagwallale.” 
\m Chube gerua degaba unsuialin ene me gerule Cristo ma kweri Chubege, me ene, Chube lle ulita kwian ulita jigu Cristo kote.  
\v 28 Chui bdaglige be suge trate trate kwian ulitage Cristo ma kweri lle ulitage kwian ulitage, Cristo ulia lle ulita kwian ulita Chugagwalla, chui ege Cristo be lle ulita kwian ulita keteni naskuni Chubege, Chube be chege Cristo Chugagwallale kwian ulita Chugagwallale kaire lle na ulita Chugagwallale, ene Chube be chege ma kweri ulia lle ulitage kwian ulitage, Chube be chege kwian ulita Chugagwalla kaire lle ulita Chugagwalla. 
\p  
\v 29 Kwian me mo ñeaba chiske jogeda, ba kle gwade mo ñeange chiske kwian jaba ene giti ene tañachuge jaba chege mo ñeaba chiske kare kwian jaba agali kle gwade kare, ulia suge bage jaba mi chkeni gwade, ¿lledale ba kle age ene? Ba kle age ngwale.  
\v 30 Ulia jaba mi chkeni gwade, ¿lledale cha kaire Cristo gerua dbanga na ulita kle mo chuge ngwadi diali chui kaire kaire boi daga ngwale jogedaleda geru dbe giti? Ulia jaba mi chkeni gwade cha ulita kle age ene ngwale.  
\v 31 Diali chui kaire kaire kwian kle age me no cha dollale kwian kle chage cha nate cha gwaleda geru dbe giti, agwa cha me tallade e giti, suge trate chage cha me kle boi ene ngwale cha kle boi geru dbe bage gdale, malen nga suga no chadi geru dbe giti, kaire nga suga no chadi ba giti, ba geru Cristo giti keruchugu cha giti, geru e giti ba Cristo che Chugagwalla gau ulia mo alin.  
\v 32 Cha boidu tanre daga ngwale una Efesoge kwian Cristo gerua dollale kote, kwian una Efesomu agedu tanre me no cha dollale. Ulia jaba mi chkeni gwade, ¿lledale cha mo chugu ngwadi boi tanre daga ngwale ene kwian ene kote? Ulia jaba mi chkeni gwade ma no cha chage nga dba ai giti age kwian gweale kle gerule kare, ama gerule: “Me sbali che be jogeda malen nege ma no che nga ollade blire ngle lle gage jai ngle ngeru che jogedage.” Agwa cha me tañachuge ene, suge trate chage jaba be chkeni gwade malen cha mo chuge ngwadi boi daga ngwale Cristo gerua dbe giti, uñale chage cha me kle boi ene ngwale geru dbe giti.  
\v 33 Ba ulita me mo chugadale ngwadi mo anblitange tañachuge kwian gweale me geru gai ulia kle gerule kare jaba mi chkeni gwade giti, ba chegedale siere kwian kle gerule enege, ba chage kwian ene ole ama be ba ta gbe siere ba nu geru ulia gabage.  
\v 34 Ba ulita bai kaire kle mo ta gbe geru me ulia ole, ba mo ta gbadaleni naskuni tañachuge no geru ulia giti me age me no dare, ba gweale me Chube uñe ulia malen ba kle mo ta gbe joge siere geru uliage, nga chiedale ibule badi cha kle gerule kare ba ole. 
\p  
\v 35 Cha tañachuge ba gweale ta geru kadakalin ai kare chage jaba chkeni gwade giti: “¿Jaba tugebada be chkeni gwade mine? ¿Be jegwale mine molen?”  
\v 36 ¡Nga ngwale chuga giti me tachke jaba chkeni gwade giti! Ba tachkedale chude giti, chude tke dbiske, chudegba giti tangle e tugeda, chudenuma na chie, ene tige.  
\v 37 Chudegba tke, chude amaña mi chke ngaña jegwale amaña ole, be jegwale nganake molen, chude chke ngaña jegwale na ole. Chude gbaba ai kare: aro, eu, chude gba chudea na. Chude ene tke, chude gwatige,  
\v 38 Chube chude kaire kaire gbe tige jegwale ole mo kaire kaire Chube takalin kare.  
\v 39 Chude chudalla mo kaire, kwian chudalla mo kaire, bda chudalla mo kaire, bdada chudalla mo kaire, ngwe chudalla mo kaire, ulita chudalla jegwale mo kaire kaire molen, Chube e ulita kaire kaire dodadu Chube takalin kare.  
\v 40 Lle ulita nga ngaña giti jegwale nganake molen lle ulita nga dba ai giti jegwale molenge, lle nga ngaña giti meñe no no, kaire lle nga dba ai giti meñe no no, agwa lle nga ngaña giti me meñe salengwli lle nga dba ai giti kare, lle nga ngaña giti meñe nganake.  
\v 41 Chui, dai, beu ulita chrachienga no, agwa ulita me chrachienga salengwli, chui chra nganake dai chrage, dai chra nganake beu chrage, beu ulitaske beu chra gweale nganake beu chra nage, Chube e ulita kaire kaire gbu chrachienga Chube takalin kare.  
\v 42 Che ñage gerule ene kaire mo jegwale giti, che kle toi nga dba ai giti che jegwale boi, che jegwale jogeda tugeda, che jegwale nege nga dba ai giti me chege diali, agwa che jaba chkeni gwade chuia be chke, chui ege che jaba be chkeni gwade che jegwale be nganake, jegwale e mi boi be chege diali.  
\v 43 Nga dba ai giti che jogeda, che jaba joge dbiske, jaba jogenga ngwale trenmalin, agwa che jaba chkeni gwade, ene che be jegwale no no molen diali chui tangle. Che jaba joge dbiske jaba me kira molen me ñage age mo alin, agwa che jaba chkeni gwade, ene che be jegwale kiraske molen diali chui tangle, kira me salengwli toidu nga dba ai giti kiralla ole kare.  
\v 44 Che jegwale nga dba ai giti me ñage toi diali chui tangle, e jogeda, agwa che jaba chkeni gwade jegwale na ole, jegwale e me boi me jogeda, e chege diali. Che ulita jegwale molen toidale nga dba ai giti, jegwale e boi. Ene kaire jegwale na me boi kle che ulita alin che jaba be chkeni gwade gire. 
\p  
\v 45 Chube gerua degaba unsuialin gerule Chube kwian ngeru dodadu giti, chada e gerule: 
\q1 “Chube dbi dodadu gbu gwade, e kwian ngeru toidu nga dba ai giti kada Adán.” 
\m Chube gerua degaba unsuialin gerule ene Adán giti. Adán toidu jokeda, Adán giti kwian ulita jegwale nga dba ai giti molen, jegwale e boi jogeda. Agwa Cristo chiu Adán nate, Cristo giti kwian jaba be chkeni gwade jegwale na ole, jegwale e me boi chege diali.  
\v 46 Kwian ulita jegwale molen nga dba ai giti, jegwale e boi jogeda, agwa bdagli kwian be jegwale na molen, jegwale e me boi me jogeda chege toi diali chui tangle nga ngaña giti ule Chube ole.  
\v 47 Dbi jo dodaba kwianle chegu kwianle gwangea nga dba aimu, e Adán, agwa Cristo chiu nga ngaña giti Chube kle ngwadi.  
\v 48 Dbi jo dodaba Adánle, Adán jokeda gire Adán joni dbiske, che ama kare malen che ulita jogeda joge dbiske kaire Adán kare. Agwa kaire Cristo be jaba gbeni gwade chuiage, chui ege che Cristonu be jegwale na gai, Cristo be e kete chege ama jegwalenu kare toidale ule ama ole.  
\v 49 Nege che ulita kle toi nga dba ai giti che jegwale Adán kare, Cristo chagedu nga dba ai giti ama kwian Adán kare kaire, Cristo jokeda chkuni gwade gire Cristo jegwale jagere nganake gau, ene kaire che Cristonu, bdagli che be chkeni gwade che be Cristo kare. 
\p  
\v 50 Cha daballa cha ibotea Cristo giti, cha gerule ba ulita ole, che jegwale nga dba ai giti me ñage joge jegwale e ole llagli toi nga ngaña giti Chube kle ngwadi, che jegwale nga dba ai giti me ñage toi diali chui tangle, che jegwale nga dba ai giti boi jogeda me chege diali, malen me ñage joge toi nga ngaña giti diali chui tangle.  
\v 51 Cha geru no kete ba ulitage Chube be age giti che ulita ole, geru ai ni uñale ba gdaitege, che Chubenu ulita mi kle jogebada Cristo chieni chuiage, agwa bai kaire be kle gwade chui ege jegwale ulita be jwlite nganake.  
\v 52 Ulita be boi blike gwagwa gwe gwagwa jrainnga kare, trompeta be gdade kweri gire che Chubenu ulita jogebada Chube be che jaba gbeni gwade jegwale na me jogeda ole, ene kaire che Chubenu ulita kle gwade Chube be jegwale nganake gbe che alin, jegwale e mi jogeda.  
\v 53 Che jegwale ulita nga dba ai giti boi jogeda me chege diali, malen che jegwale ulita be jwlite nganake jogedale toi nga ngaña giti Chube kle ngwadi, jegwale e mi boi mi jogeda be chege diali chui tangle.  
\v 54 Che jegwale nga dba ai giti be jogeda, agwa chui bdaglige che jegwale ulita be jwlite jegwale na me jogeda ole be joge toi nga ngaña giti Chube kle ngwadi diali chui tangle. Chui ege be boi Chube gerua degaba unsuialin gerule kare, chada e gerule: 
\q1 “Jogeda mi chege dare che alin,  
\v 55 che jaba chkeni gwadege gwangerugu che mi jogeda kwaite, malen nege che me kwachiedale jogeda giti.” 
\m Chube gerua degaba unsuialin gerule ene jogeda giti.  
\v 56 Kwian age me no giti kwian chege sugekare Chubege, malen kwian kwachie jogeda giti. Moisés nu Chube gerua degaba giti suge kwiange kwian agali gballa me ñage mo jwen siere ji chugege age me no gdale, malen kwian chege kwachie ta olire tanre jogeda giti.  
\v 57 Agwa che gerudale no no Chube ole Chube agedu no che alin che Chugagwalla Jesucristo giti, jogeda Jesucristo talla gai ulia ole che me kwachie, ama chkuni gwade malen che jogeda che mi chege jogebada diali. 
\p  
\v 58 Cha daballa cha ibotea Jesucristo giti, cha no no ba ulita ole. Uñale ba ulitage bdagli ba be chkeni gwade toi diali chui tangle ule Chube ole, malen cha gerule ba ole, ba ulita mo ta gbadale diali gwangerugu Chube ole me mo chuge ngwadi ta gbe joge siere sidri Chubege. Ba ulita mo ta gbadale ma no dare lle boi Chube alin che Chugagwalla Jesucristo gerua kete kwiange, uñale ba ulitage ba mo ta gbe Jesucristo gerua dbe kwiange, lle ene boi Chube alin Chube takalin kare ba me kle lle boi ngwale. 
\c 16  
\s1 Igi lite ole daba Chubenu una Jerusalénmu chudaboagda 
\p  
\v 1 Ba geru kadu chage igi lite ole giti daba Chubenu una Jerusalénmu alin malen nege cha gerule ba ulita ole igi giti cha gerudu daba Chubenu kle mo lite Chube geruadi nga kweri kada Galacia ole kare.  
\v 2 Ba ulita gdaite gdaite kle igi gai mo alin mangire batre, domingo kaire kairege ba ulita mo ta gbadale igi gweale oge ketadale gbale ule daba Chubenu nga namu alin, ba igi ulita gbe biale, ene cha joge chke igi kle biale litaba ole.  
\v 3 Cha be joge chke ba ngwadi gire ba be daba gai igi dbadale daba Chubenu una Jerusalénge alin, cha be chada dege ba igi litu ole giti kagadale ule daba e ole.  
\v 4 Chage suge no cha alin joge ule gire cha agali be joge ule daba gatedi igi dbe. 
\s1 Pablo mo ta gbe jogeni tienda kwian Chubenu 
\s1 una Corintomudi 
\p  
\v 5 Cha be jogeni una Corintoge ba ulita kle ngwadi tienda ba ulitadi, agwa ngeru cha kle tañachuge joge nga Macedoniage tienda daba Chubenudi nga ege, chegé sugeti nga ege gire cha be joge dare, cha kle tañachuge joge chke ba ngwadi una Corintoge.  
\v 6 Cha kle tañachuge cha joge chke ba ngwadi cha ta chegekalin chui tanre ba ole baske noi suia tke tangle, gire cha be joge dare. Cha takalin ba ulita cha chudaboi joge dare baini kaire cha be joge ngwadi geru Jesucristo giti dbe, ba cha chudaboi gerule Chube ole cha giti, kaire gweale cha gatedi joge dare nga na bai kairege.  
\v 7 Cha joge chke baske cha me ta gwagekalin alin ba ulitadi gire blike joge tangle, agwa ma no cha alin cha chege chui tanre ba ulita ole, Chube takalin cha chege baske chui ngle cha be chege ba ulita ole chui ngle.  
\v 8 Agwa nege cha kle aini una Efesoge, cha be chege aini chui Pentecostés manade ngwange olladadale.  
\v 9 Aini una aige kwian tanre kle age me no cha dollale Jesucristo gerua dbe gdale, agwa kaire kwian tanre Jesucristo gerua uñakalin, kwian ene ta kle biale Jesucristo gerua keruchuge, malen cha chege aini chui dare Jesucristo gerua ketadale kwiange no no, ene kwian tanre una aige ñage Jesucristo gai ulia. 
\p  
\v 10 Timoteo joge chke ba ngwadi ba mo ta gbadale ama gai ngwange no, ene ama be suge moge ama kle mo bitallaske kare. Timoteo Jesucristo gerua traganga kwian ole cha Jesucristo gerua traganga kare,  
\v 11 malen ni ba ulita gdaite tañachugadale me Timoteo gai ngwange no, ba me tañachuge ene agwa ma no ba age no ama alin ama chudaboi ama be kle baske gire, kaire ba ulita ama chudaboale chieni nga suga no ole aini cha kle ngwadi, aini cha kle daba Chubenu ulita ole Timoteo manade ngwange.  
\v 12 Uñale chage ba kledu Apolos manade ngwange agwa ama me su joge nege, cha tañachugu noare Apolos joge ule Timoteo ole daba na ole ule tienda badi, cha gerudu tanre tanre ama ole joge giti, agwa ama me tadu jogekalin ule ai suiale, cha tañachuge ama be joge chui gweale nage ama be kle biale gire be joge. 
\s1 Pablo kwian Chubenu ta gbe suge toi ta giti gerudi 
\p  
\v 13 Ba ulita Chubenu kledale ta giti mo ta gbe ma no diali Jesucristo gerua ulitage. Ba ulita me mo ta dbale kwachie ba kle geru gai giti, ba me ta dbale kwachie gerule kwian na ole geru ba kle gai giti, ba ulita mo ta gbale gwangerugu kiraske gerudi, ene ba me mo anblitange, ene kwian geru dollale me ñage ba ta blite nganake. 
\p  
\v 14 Diali ba ulita mo ta dbadale no Chube ole kaire ba mo ta dbadale no kwian na ulita ole, ba agedale ulita ta no ole ta giti Chube alin kaire kwian na alin. 
\p  
\v 15 Cha bitalla Jesucristo giti una Corintoge, uñale ba ulitage cha jo chke ba jwiage nga kweri kada Acayage geru Jesucristo giti dbe ba ulitaske daba gdaite kada Estéfanas ule mo muingalla ole mo olia ulita ole gwangea Jesucristo gau ulia, chui ege gwangerugu ama ulita mo ta gbu diali lle boi daba Chubenuske daba Chubenu manade Jesucristo geruage daba chudaboi ta gbe chage Jesucristo geruadi.  
\v 16 Cha takalin ba Chubenu ulita daba e gai dage age ama gerule kare Jesucristo gerua giti. Kaire daba na ulita kle lle boi ene baske kle ba chudaboi, ba ama gai dage kaire.  
\v 17 Nga suga no no chadi Estéfanas chku aini cha kle ngwadi tienda chadi ule Fortunato ole Acaico ole, ba ulita me ñadu chie ule tienda chadi, agwa daba e gdamai giti cha suge moge ba ulita kle aini cha ole kare.  
\v 18 Ama gdamai kle cha ole kle cha ta gbe suge tanre kiraske Jesucristo gerua giti ama kle ba ulita ta gbe diali gerudi ama kle ba ole kare. Daba e kare na ulita kle lle boi baske no Chube alin, ba ulita daba ene gadale dage, ba gerudale no ama ole ama kle lle boi no Chube alin baske giti. 
\s1 Pablo gbi kage bdagli kwian Chubenu 
\s1 ulita una Corintomu alin 
\p  
\v 19 Daba ulita aini Chubenu nga kweri Asiage gbi kage ba ulita alin. Daba Aquila ule Prisca ole, kaire daba Chubenu na ulita kle mo lite Aquila ngwadi Chube geruadi gbi no tanre kage ba ulita alin che Chugagwalla Jesucristo giti.  
\v 20 Daba ulita Chubenu aini nga kweri Asiamuge gbi kage ba ulita Chubenu toinga una Corintomuge. Ba ulita gbi kade no no moge ta no ole dabage ulita. 
\p  
\v 21 Cha Pablo kle gbi ai bdagli dege agali mo kodi chada ai giti kage ba ulita alin. 
\p  
\v 22 Kwian gweale me mo ta dbe no che Chugagwalla Jesucristo ole, ulia ma no bdagli kwian ene chege sugekare Chubege chui tangle diali ji chugadale kweri. 
\p Cha takalin che Chugagwalla Jesucristo chieni blike.  
\v 23 Cha takalin che Chugagwalla Jesucristo age no no ba ulita alin.  
\v 24 Cha takalin suge trate ba ulitage cha no no ba ulita ole Jesucristo giti. 
\p Geru ai ene ulita cha Pablo chada degangu ba ulita kwian Chubenu una Corintoge alin. Che kle meni.