\id TIT Titus - Waima - Namsoo Kim - DEC 5, 2002 
\h Tito 
\toc1 Paulo Ena Marere  TITO  Herenai 
\toc2 Tito 
\mt2 Paulo Ena Marere  
\mt1 TITO  
\mt2 Herenai  
\is1 Puka Aona Irerena 'Abina  
\ip Tito hanona Iuda hauna aha'i. 'A ia eraona kabe aonai, Paulo ebaraina ena iuhubeau akana aonai. Paulo ehore Tito hanona Krete kereibuanai ehabona, ia kehore a'ikakauma haukia iha'inikia akana kebabaina 'eka weianai.  
\ip Marere neiana aonai, 'abi kori'uaina hauna neiana. Kreta haukia ekia hoahoa hanona a'i tenamo harai (1.10-13). Paulo e'abi, a'ikakauma haukia i'uaiaikia akana nenuatae aina hauna ena hoahoa hanona katenamo harai. Abomo maearima iba'iobikia taearana Tito ehina bena, ihobona hau mai babi'e maearima 'aru'arukia mai ta'ara'i haukia. Marere puanai hanona Paulo ehore Tito ehina bena hau mai babi'e keba'iobinakia aokia katehamomo. Ia ha ha herekiai aka namokia katebabai mai maearima baika herekiai abomo. Ia hanona opuere 'abikia a'i katehina mai maearima baika kipokia a'i katebaiharatae.  
\is1 Puka Paipana Apa'uakia  
\io1 a. Roba iahu. (1.1-4)  
\io1 b. Tirama ena marea aka haukia. (1.5-16)  
\io1 c. A'ikakauma haukia ekia mauri. (2.1-15)  
\io1 d. Bahiahi 'abikia. (3.1-11)  
\io1 e. 'Abi orekia. (3.12-15)  
\c 1  
\s1 Banamo 'Abina.  
\p
\v 1 Au Paulo, Tirama ena ta'ara a'i mai Iesu Keriso ena iuhubeau hau'u. Au hanona teuhuna'u maearima weiakia Tirama etina'anakia haukia ekia a'ikakauma kabarainakia Tirama ena 'abi tohana kate'iobina weianai Tirama katemariki aina.  
\v 2 A'ikakauma mai aotipa weianai mauri banai banai katebuabena Tirama hanona aba wa'i baha hanopaka a'i erama baha aonai mauri neiana e'abi'uai aina, ia hanona a'i nibai'oi.  
\v 3 Aba eraona 'uaina ba ena rani tohanai ena pou namona ebawaira tinana maearima ikoikiai kate'iobina, weiana hauna nairoro aina, Tirama ibamaurika hauna ebatohana'u ia ena aka neiana ibabainai.   
\p
\v 4 Tito, naha'u tohana eka a'ikakauma hamona aonai, au oi narere beni'o. Tirama aika hamaka mai Keriso Iesu aika ibamaurika hauna aoko'o hoana mai baibua katebeni'o.   
\s1 Tito Ena Aka Krete Aonai, Kiro Haukia Katea'i taeanakia.  
\p
\v 5 Krete ai ahaboni'o ena poki hanona aka ikoinai a'i teore haukia koa'ia'i harainakia ba aiara ikoikiai aokiai Tirama ena mareai kiro haukia kotina'anakia 'uai akana katebabaina, 'iobi abeni'o haunai koaka.  
\v 6 Kiro hauna hanona behoai a'i tikaiahina hauna, atawana babi'ena hamona, nahuna katea'ikakauma abomo aia kateka'aina, a'i kateripuripu.  
\v 7 Pokina Tirama ena aka neiha 'ininakia hauna hanona beho ai a'i tikaiahina, kipona ena nuataeai a'i keka'a, 'ao a'i keopuere noanoa, a'i keinu 'ari, a'i keripuripu, mai moni a'i kenua ki'aina.  
\v 8 Baki haukia kea'i taeanakia ena ituai mai taba namona hauna keraoana'au aina, aoberoai kemiaho, bero taearanai kemauri, ena mauri kebaibeni Tirama herenai, mai aona kebairobe.  
\v 9 Tirama ena 'abi tohana weiana teba'iobi aina haunai kea'i 'ini. Taeara neianai ba'iobi tohana keba'iobinakia maearima aokia keba taburanakia, mai weiakia ba'iobi tohana ti'oatana haukia ekia beho kebaberonakia.   
\s1 Ba'iobi Haukia Bai'oikia Kateba'oronakia.  
\p
\v 10 Pokina bai'oata haukia bo'okia weia ekia 'abi 'abaea 'abi 'abaeai maearima ti'oinakia, ba weiakia tetarenakia haukia bo'okia abokiamo weia.  
\v 11 Maearima weiakia kato ba'oronakia 'urukia kepua, pokina a'ikakauma haukia ekia itu haukia bo'ona aokia tibaro'arina, a'i pateba'iobiai tabakia tiba'iobiai moni iraonanai haumaea akakia weiakia tibabai.  
\v 12 Kerete haukia kipokia ekia mahabanai hauna ha Kerete haukia ehina benakia etibaha, “Kerete haukia hanona bai'oi haukia, 'aki aiporokia ki'a obokia 'abakia, te'aboro kipokia mo nuakia tiraonanakia.”  
\v 13 Neiana hanona 'abi tohana ehinana, ua buonai kobata ki'anakia, weianai hanona ekia hoa hoa katebero Tirama katea'ikakauma taburana.  
\v 14 Ba Iuda haukia ekia ori 'ao kikipa 'ai'aikia mai weiakia maearima ekia rauhubu 'abikia aiakia a'i kateo'o, weiakia hanona maearima herekiai timai Tirama ena 'abi tohana ti'oatana.   
\p
\v 15 Weiakia aokia tebero harai haukia hanona herekiai taba ikoinai tebero harai, ia weiakia aokia ki'ai tebonu haukia mai a'i tia'ikakauma haukia hanona herekiai taba ha a'i ebero. Ekia raona mai aokia tohana hanona teki'a.  
\v 16 Ia ti'abi Tirama te'iobi haraina, iamo ekia babai ai hanona Tirama a'i tia'i taeana. Ia hanona maearima weiakia 'arikia a'i ni'ari haukia aia a'i tika'aina haukia haeamona taba namona ha katebabaina herekiai hanona a'i ketaina.   
\c 2  
\s1 A'ikakauma Berona Tohana Keba'iobinakia.  
\p
\v 1 Ia oi hanona a'ikakauma berona tohana koba'iobi ainakia taeara weianai katemauri.  
\v 2 Hau kirokia koba'iobinakia katebakiro, ekia hoahoai maearima ia katemariki ainakia, aoberoai katemauri mai ekia a'ikakauma ketabura harai, kate raona'au haeamona katebapahihi.   
\p
\v 3 Taeara ihobonaimo babi'e kirokia koba'iobinakia Tirama ena nuatae maurinai ketemiaho, baika herekiai a'i kate'uahi 'uahi, 'ao a'i kateinu 'ari, ia aka namo taearakia kateba'iobi ainakia.  
\v 4 Weiana ia katehore babi'e 'aru'arukia kateba marerenakia kipokia atawakia mai nahukia kateraona'au ainakia,  
\v 5 kateaobero mai ekia hoahoai katebero harai, ekia itu akakiamo katea'i rea, katerabo harai, mai atawakia taikiai katetai, weiana hau ha Tirama ena 'abi a'i kebaki'ana.   
\p
\v 6 Taeara ihobonaimo, hau 'aru'arukia koba taburanakia aoberoai katemauri.  
\v 7 Oi hanona taba ikoikia aokiai ihaiha namona kobaihanakia emu babai namokiai. Emu ba'iobi aokiai hanona hoahoa beronai mai aomu tohanai koba'iobi.  
\v 8 'Abi berona tohanai ko'abi'abi weiana tai ha a'i ke'abi ki'a bena. Ba weiakia oi ti'oatani'o haukia katehaumaea pokina herekai 'abi ki'a obona katehinana 'ekana aha'i.   
\p
\v 9 Ta'ara'i haukia koba'iobinakia taba ikoikiai aokiai ekia poki haukia aiakia kateka'ainakia, aokia kateba namonakia mai ekia 'abi a'i kateba muenakia.  
\v 10 Ekia poki haukia herekiai a'i katebainao iamo taeara ikoikiai aokiai hanona ekia namo mai aia ibabua 'au hoana katebawaira tinana, weianai maearima Tirama aika ibamaurika hauna i'iobina katenuataeai taburana.   
\s1 Keriso Ena Mue Mai Wapuna Naha'imana Aonai.  
\p
\v 11 Hoahoa uahomakiai kahamiaho, pokina Tirama ena aoko'o hoana weiana maearima ikoikiai keba maurinakia hauna aba ebawaira tinana.  
\v 12 Aoko'o hoana weiana aika niba'iobinaka Tirama ibaki'ana maurinai a'i kahamauri mai hanopaka inuatae aina akakia ki'a obokia a'i kahababai, iamo bakiroai mai beroai kahamiaho, haeamona Tirama ena nuatae maurina kahamauri aina hanopaka neiana aonai.  
\v 13 Aika hanona ua kahamiaho aiho eka buabeni apa'uana weiana Tirama apa'uana mai ibamaurika hauna Iesu Keriso ena mue mai wapuna nuabina naha'imana aonai.  
\v 14 Keriso kipona ena mauri ebaibeni aika paukai weiana 'araka ehorenakia babai ki'a ikoikiai aokiai erubunaka mai ki'a aha'i haukai ebaonaka ia kipona 'euna tohaka, maearima weiaka aoka tohakiai nahanuatae rani ikoikiai namo akakia mo kahababainakia.   
\p
\v 15 'Abi neiakia koba'iobiai mai maearima koba taburanakia, abomo ekia mauriai taba teki'a haukiai mai taburamu maikoinai kobaberonakia. Hau ha a'i koiha haona oi a'i kebamiori po'oni'o.   
\c 3  
\s1 A'ikakauma Haukia Kateba'oru Aka Namokia Ibabaikiai.  
\p
\v 1 A'ikakauma haukia kobaraonanakia Kabamani haukia mai poki haukia ekia hiabu ba'anai katemiaho, aiakia kateka'aina abomo kateba'oru aka namokia ibabaikiai.  
\v 2 Kohina benakia hau ha herenai a'i kate'abi ki'a, baibuai katemiaho, kate'amari 'amari, mai katerabo harai maearima ikoikiai herekiai.   
\p
\v 3 'Uainai aika abomo hapo'o, aia a'i haka'ai, te'oi ahinaka habeho, mai hauani ena nuatae akakia ki'a obokia ta'arakia ha'i abomo haonamo ainakia. Haeamona eka mauri aokiai ki'a akakia hababai mai hawamuru, maearima baika te'oatanaka, mai aika ha ha abomo kipoka habai'oataina.   
\p
\v 4 Iamo Tirama aika ibamaurika hauna ena rabo harai mai ena raona'au tewaira tina raninai,  
\v 5 aika ebamaurinaka. Weiana hanona aika eka aka bero paunai aha'i, 'a ia kipona ena aoko'o hoanai ebamaurinaka. Auba Robeai eba'uerenaka harama mue maearima mahamahakai haeao ebamaurinaka.  
\v 6 Tirama ehore ena beruberuai Auba Robe ahakai eheina ibamaurika hauna Iesu Keriso paunai.  
\v 7 Weiana buonai Tirama ena aoko'o hoanai bero ebenaka ia wairanai, weiana aika mauri banaibanai nahabuabena hauna kaha'ina.  
\v 8 Ba'iobi neiana hanona 'abi tohana, ba au nanuatae oi ko'abi taburaina maearima hanona taba neiakia obokia kateobo. Ba maearima weiakia Tirama tia'ikakaumana haukia hanona kate'ima 'ima harainakia aka namokia katebabai ekia mauri aokiai. Neiakia hanona taba namokia maearima ikoikiai katebarainakia.   
\s1 Hoahoa Ki'a Obokia Herekiai Kokapare.  
\p
\v 9 Iamo po'o baihara taekia, mai rama kupu torikia kikipakia, mai Mose ena rauhubu paunai tibaiara 'ao ti'au haukia herekiai kokapare. Taba weiakia hanona anikia aha'i mai hau ha a'i katebaraina.  
\v 10 Baiata hore nibaramanakia hauna rani kori'uaina mai ibaruana korobena, ba murinai hanona kohabo 'abaeana kateba karahina.  
\v 11 Oi ko'iobina maearima uahomakia hanona taeara tohana tehabona mai ia hanona ki'a haukia, kipokia ekia ki'a tihore tibatohanakia ia hanona tebeho.   
\s1 Paulo Ena Nuatae 'Abina Mai Banamo 'Abina Orena.  
\p
\v 12 Weiana au Aretema 'ao Tukiko kauhuna kewahi heremu 'ekamu kea'ina raninai, taeara kotabu komai biai here'u weia Nikapoli ai, pokina au ao'u aba a'ia'i haraina weia kamiaho 'ama ranina neiana aonai.  
\v 13 Sena rauhubu hauna mai Apolo ohi kobarainakia ekia harima taearana koa'ia'i haraina weiana ia taba ikoikia ṯenuatae ainakia haukia katea'inakia.   
\p
\v 14 Eka maearima 'iobi katea'ina ekia mauriai aka namokia katebabai ba maearima weiakia taba ṯenuataeai haukia katebarainakia. Weiana a'i tememiaho 'abaea ekia mauri buabuakia a'i temeaha'i.   
\p
\v 15 Maearima neia here'uai haukia ikoikiai ekia banamo 'abikia ṯeuhunakia heremu. Emai banamo 'abikia eka maearima ikoikiai weiakia a'ikakauma aonai tiraona'au ainamai haukia kobenakia.  
\p Nabahuba'ari Tirama ena aoko'o hoana ikoimiai heremiai kemiaho.