\id 1PE 1 Peter - Waima - Namsoo Kim - December 5, 2002 
\h 1 Petero 
\toc1 Marere Kori'uaina  PETERO  Ererena Hauna 
\toc2 1 Petero 
\mt2 Marere Kori'uaina  
\mt1 PETERO  
\mt2 Ererena Hauna  
\is1 Puka Aona Irerena 'Abina  
\ip Marere neiana hanona a'ikakauma haukia bo'ona atetua rarikia titabu ahi haukia kebarainakia ekia a'ikakauma keba taburanakia. A'ikakauma haukia nehina benakia ia hanona Iesu Keriso pouna namona kateraona 'inina. Weiana Iesu hanona e'ari haeamona emikiri mue, mai ena 'abi'uai ia kemue kemai. Ena 'abi'uai kateraona taburanakia mai bakirokia katebai'ima keaomo kemai. Weiana a'ikakauma haukia ikoikiai ekia a'ikakauma kehobonakia. Ua buonai ia hanona ekia a'ikakaumai katekori 'ini keaomo Keriso kemue kemai. Ba rani weianai ia hanona 'arakia katea'i.  
\is1 Puka Paipana Apa'uakia  
\io1 a. Roba iahu. (1.1-2)  
\io1 b. Tirama ena bamauri teba'iobi. (1.3-12)  
\io1 c. Mauri robena. (1.13—2.10)  
\io1 d. A'ikakauma haukia ekia hoahoa hau haiara aokiai. (2.11—4.19)  
\io1 e. 'Uai haukia ekia aka. (5.1-11)  
\io1 f. 'Abi orekia. (5.12-14)  
\c 1  
\s1 Banamo 'Abina.  
\p
\v 1 Au Petero Iesu Keriso ena iuhubeau hau'u, Tirama etina'animi haumi torama otaraina hano haeai ai ṯomiaho haumi, Ponto ai, Galatia ai, Kapadokia ai, Asia ai mai Bitunia ai ṯomiaho haumi narerebenimi.  
\v 2 Tirama aika hamaka ena 'iobi 'uai ihobonai etina'animi ba Auba Robe hanona wai aba eba robenimi, weiana Iesu Keriso aiana katoka'aina ia aruarunai emi ki'a keutunakia. Nabahuba'ari Tirama ena aoko'o hoana mai baibua hanona heremiai keapa'ua.   
\s1 Tirama Kahabanamona Buabeni Tohana Ebenaka.  
\p
\v 3 Eka Obiapaka Iesu Keriso Hamana Tiramana kahabanamona, ia ena aoko'o eapa'ua paunai Iesu Keriso e'ari ena mikiri mue maurina aonai aika ebarama muenaka, ba buabeni tohana ebenaka.  
\v 4 Aika nahabuabena itau Tirama nahuna kebenakia. Banamo weiana hanona aba eba'oruna kupai ua'a wai 'eumi, a'i keki'a, a'i ke'opu, abomo a'i ke'akauma.  
\v 5 Tirama ena hiabu nihore ni'aeanimi emi a'ikakauma paunai keaomo bamauri weiana aba eba'oruna kebawaira tinana rani orenai hauna katoa'ina.   
\p
\v 6 Neiana buonai aomi kenamo katoaonamo ki'a baha, iamo bariu rani papana aomi tiaro'ari pokina baihobo haeai haeai tihobonimi paunai.  
\v 7 Baihobo weiana hanona emi a'ikakauma ena namo kebatohana. 'A a'ikakauma ena namo hanona gold weiana irubai tebanamona iamo aba ke'akauma hauna ena namo etara haona. Emi a'ikakauma weiana tebahobona tebanamona hauna hanona Iesu Keriso kewaira tina berauranai ibanamomi, ia'i taeami mai imarikiaimi tabanai keao.  
\v 8 Iesu a'i toiha 'apuana iamo turaona'au aina. Bariu a'i ṯoihana ia tua'ikakaumana ba tuaonamo aina, aonamo apa'uana mai namona weiana hanona 'abiai ihina haraina a'i ketaina.  
\v 9 Pokina emi a'ikakauma buabuana tua'ina, weiana hanona aubami ibamaurikia tabana.   
\p
\v 10 Mahabanai haukia weiakia Tirama ena aoko'o hoana wai heremiai kekara'au hauna temahabanai haukia tehore bamauri weiana tetabu haraina abomo temarereai haraina.  
\v 11 Auba Robe Keriso euhuna hauna hanona mahabanai haukia aokiai emiaho, Keriso ena haiara mai ena nuabi weiana haiara murinai kemai hauna eba'iobinakia ihobonai ia hanona tebahobona kate'iobina rani tabanai abomo hoana aea homana.  
\v 12 Tirama mahabanai haukia herekiai ebawaira tinana ekia aka hanona kipokia ekia namo paunai aha'i ia wai emi namo paunai, abomo bariu pou namona neiana hanona teiroro aina haukia tehore Auba Robe kupai euhu ririna emai hauna ena baraibarai ai teba'iobinimi. Taba neiakia hanona aneru abomo tenuatae kateiha tinanakia.   
\s1 Mauri Robenai Kahamiaho.  
\p
\v 13 Ua buonai aomi katoa'ia'i haraina, katoba'oru emi buabeni maikoina hanona Iesu Keriso kewaira tina raninai aoko'o hoana kekara'au 'eumiai.  
\v 14 Bariu aiao'o miorimiai katoao, hauanimi ekia nuatae babaikia ki'a obokia 'uainai a'i to'iobi raninai tobabainakia haukia a'i katobabainakia.  
\v 15 'A eaparinimi Tiramana erobe 'abana wai abomimo katorobe emi hoahoa ikoikiai aokiai.  
\v 16 Puka robenai aba tererena,  
\q1 “Wai hanona katorobe  
\q1 pokina au hanona narobe.”   
\qr Lev 11.44, 45  
\p
\v 17 Wai tu'arara Hamaka, ia hanona maearima nibabakainakia raninai ihaihana enamo hauna a'i niraonana ia ha ha ena aka ena aka paukiai kebabakainakia. Ua buonai emi miaho neia hanopakai hanona mai ta'umi katomiaho ihobona hano haeai haumi 'abana.  
\v 18 Wai aba ṯo'iobina, Tirama wai emi mauri ki'a obona weiana 'aba'abami tebenimi hauna aonai ebamaurinimi hanona hanopaka tabakia weiakia aba kate'akauma haukia silba 'ao gold 'abakiai a'i ekawanimi,  
\v 19 ia Keriso aruaruna namona 'akina mamoe nahuna weiana haunai mani'a 'ao ki'a ha aha'i mamoena 'abanai ekawanimi.  
\v 20 Tirama hanona aba wa'i baha hanopaka a'i erama baha aonai ia etina'ana, ba rani orena neianai ewaira tina wai paumiai.  
\v 21 Wai Keriso paunai Tirama tua'ikakaumana, ia hanona Keriso 'ariai ebamikiri muena haeamona nuabi ebena. Ua buonai wai emi a'ikakauma mai emi buabeni hanona Tirama aonai nemiaho.   
\p
\v 22 Bariu Tirama ena 'abi tohana ia'itaeanai aubami aba toutu harainakia, uaho'abami kato raona'auai tohanakia mai taearana buonai, 'abami katoraona'au ainakia mai aomi ikoinai.  
\v 23 Wai torama mue hanona uho weiana kepari haunai aha'i, iamo weiana a'i kepari hauna Tirama ena 'abi nimauri mai nemiaho banaibanai haunai torama mue.  
\v 24 Pokina Puka robenai tererena 'abana,  
\q1 “Maearima ikoikiai  
\q1 hanona tubu 'abana,  
\q1 abomo ekia nuabi hanona  
\q1 tubu taitaina 'abana.  
\q1 Tubu ni'ororo taitaina  
\q1 ni'eho niobo.   
\q1
\v 25 'A Obiapaka ena 'abi hanona  
\q1 kemiaho keaomo banaibanai.”  
\qr Isa 40.6—8  
\m 'Abi neiana hanona pou namona weiana teiroro aina heremiai.   
\c 2  
\p
\v 1 Ua buonai wai kipomi ki'a akakia ikoikiai, bai'oi, ahu 'oi'oi, wamuru, 'uahi'uahi ikoikiai katone'e 'akaumanakia.  
\v 2 Miori 'oru'oruna niramahi 'ae nenuatae 'abana, rani ikoinai auba ena bamarere namona katonuatae aina, weianai katoapa'ua keaomo bamauri katoa'ina.  
\v 3 Pokina wai hanona Obiapaka ena banamo aba tonobai 'apuana.   
\s1 Obiapaka Hanona Pihara Maurina, Wai Hanona Tirama Ena Maearima.  
\p
\v 4 Katomai Obiapaka Iesu herena, ia hanona pihara maurina, hanopaka maearimakia tebaoaoaina 'a Tirama ehore pihara weiana etina'ana, ba eihana hanona enamo ki'a baha ia herenai.  
\v 5 Wai abomo pihara maurikia 'abana, Auba Robe ena hiabuai Tirama ena marea robenai katoao, wai hanona ia ena robe haumi emi mauri katobena baibeni tabanai keao Tirama kehore mai aonamona kea'i taeanimi Iesu Keriso paunai.   
\p
\v 6 Puka Robenai ṉa erere aihona,  
\q1 “Katoihana au pihara ha a'itaeana  
\q1 weiana hanona 'uni'uni piharana\f + \fr 2:6 \ft (6) 'ao \+it itu ibakori'au piharana\+it*\f*  
\q1 namona 'akina  
\q1 Siona oeonai nahorotina,  
\q1 taba ikoikiai ia ahanai  
\q1 katebakori 'aunakia,  
\q1 ia kea'ikakaumana hauna hanona  
\q1 a'i kehaumaea.”   
\qr Isa 28.16  
\m
\v 7 Ua buonai tua'ikakaumana haumi heremiai hanona enamo ki'a baha, 'a ia a'i tia'ikakaumana haukia herekiai hanona pihara 'abaeana aba tererena 'abana,  
\q1 “Itu ibakorina haukia tebaki'ana  
\q1 piharana hanona aba itu  
\q1 'uni'unina piharanai eao.”   
\qr Sal 118.22  
\m
\v 8 Abomo,  
\q1 “Maearima pihara weianai  
\q1 tikai tiehe herea  
\q1 haeamona tiehe ta'erai ti'eho.”  
\qr Isa 8.14  
\m Tirama ena 'abi a'i teona a'i teka'aina paunai ia ti'eho, weiana hanona ia itaukia Tirama ena raona ihobonai.   
\p
\v 9 'A wai hanona Tirama etina'animi maearimami, obia 'arana ena robe haumi, robe itubuna, maearima weiakia Tirama 'euna haumi. Tirama ea'i taeanimi hanona ena hoahoa namokia katohina pounakia paunai, weiana ia hanona wai wapura aonai eapari ahinimi ena ea namona 'akina aonai ebakatotonimi.  
\v 10 'Uainai wai hanona Tirama ena maearima aha'i 'a bariu hanona wai aba Tirama ena maearima, 'uainai wai hanona Tirama a'i eaoko'o ainimi 'a bariu hanona Tirama ena aoko'o aba toa'ina.   
\s1 Tirama Ena Ta'ara'i Hauka.  
\p
\v 11 E'u raona'au haumi e, wai hanona hano haea mai kaoao 'abaea haumi hanopaka neiana aonai, nabahi ahinimi, hauanimi ekia hoahoa opukia a'i katobabai, weiakia tihore aubami ṯehuarina.  
\v 12 A'i tia'ikakauma haukia baiatakiai emi hoahoa katobaberona, tia'i ki'animi aka ki'a haumiai tibaonimi haukia emi hoahoa namokia kateiha, weiana Tirama atana katebanamona ia ena mai raninai.   
\p
\v 13 Maearima ekia hiabu haukia ikoikiai aiakia katoka'ainakia, weiana hanona Obiapaka imarikiaina paunai, hanopaka obia 'arana aiana katona ia hanona poki hauna,  
\v 14 abomo kabamani haukia aiakia katona, ia hanona poki hauna euhunakia tiaka ki'a haukia kateba haiaranakia, 'a babai harai haukia kateba namonakia.  
\v 15 Pokina Tirama ena nuatae hanona emi babai haraiai bapo'o po'o haukia ekia aotipa 'abikia kekaiabunakia.  
\v 16 Rauhubu herenai to'abaea haumiai katomiaho, 'a emi miaho 'abaea weiana aka ki'a ikaikauna tabanai a'i keao, wai hanona Tirama ta'arana ia'inai katoao.  
\v 17 Maearima ikoikiai katomariki ainakia, 'abami kato raona'au ainakia, Tirama katota'u aina, obia arana katomariki aina.   
\s1 Keriso Ehaiara Ihobonai Kahahaiara.  
\p
\v 18 Ta'ara'i haumi e, emi poki haukia aiakia katoka'aina mai ta'umi, namo 'ao 'abi bero haukia herekiai mo aha'i ia aibara haukia herekiai abomo.  
\v 19 Ena ki'a aha'i ia Tirama niraonana paunai hauhaiara nihoaina hauna weiana hanona Tirama ia kebanamona.  
\v 20 Katoaka ki'a kateahunimi aonai katobapahihi ena namo hanona taba? 'A aka namokia katobabai katohaiara aonai katobapahihi weiana hanona mai banamona Tirama wairanai.   
\p
\v 21 Neiana paunai Tirama wai eaparinimi. Keriso hanona ehau haiara wai paumiai, ehabonimi ibabataiai eao wai murinai katoao 'apunai katoka'a.   
\q1
\v 22 “Keriso hanona ki'a ha  
\q1 a'i ebabaina abomo pinanai  
\q1 bai'oi 'abina ha a'i  
\q1 tetabu ahina.”   
\qr Isa 53.9  
\m
\v 23 Tehinabe ki'ana ia aiakia a'i ebamuena, haiara eonobaina ia a'i ebaro 'arinakia, 'a ikoinai hanona beroai nibakai Tiramana imanai eutanakia.  
\v 24 Keriso hauaninai eka ki'a ehoainakia matiu ibiri ropo ubinai e'ari hanona ki'a 'eunai kaha'ari 'a bero 'eunai kahamauri. Ena imoa mani'akiai wai aba ebanamonimi.   
\p
\v 25 'Uainai wai hanona e'akauma mamoena 'abana, ia bariu hanona aba tomue tomai aubami i'imakia mai iha'inikia hauna herena.   
\c 3  
\s1 Hawainibe Haukia Mai Babi'ekia Ekia 'Abi.  
\p
\v 1 Babi'e e, ihobona ta'ara'i haukia ekia poki haukia aiakia tika'aina 'abana, atawami aiakia katoka'ainakia, weiakia Obiapaka ena 'abi a'i tia'i taeana haukia hanona 'abiai aha'i iamo wai emi babai haraiai katobaraona kabenakia,  
\v 2 emi babai berokia mai mariki akakia kateiha paukiai.  
\v 3 Wai emi taitai hanona hauanimi kapena ibataitaina paunai aha'i, buimi taitaikia 'ao haiami 'abakia gold 'ao taba 'imarekia 'ao emi ibatoto 'arakia rarikia 'abakia aha'i.  
\v 4 'A aomi tohakia haukia, raona namona 'aiaununa ena namo a'i ke'akauma haunai katoba taitainakia hanona Tirama wairanai ena namo eapa'ua.  
\v 5 Pokina 'uaina raninai robe babi'ekia weiakia ekia buabeni Tirama herenai haukia ua tetaitai aiho, atawakia aiakia teka'ai harainakia.  
\v 6 Sara atawana Aberahamo aiana eona mai eaparina ena obia. Wai abomo bero akana katobabaina mai rani ikoinai a'i katota'u hanona nahuna babi'emiai katoao.   
\p
\v 7 Hau e, taeara ihobonai wai abomimo atawami kipokia katomiaho haeamo mai 'iobi haraimi ia hanona hauani akakiai te'abe'abe katomariki ainakia, pokina Tirama ena mauri tohana beruberuna kipokia katoa'i haeamona, ua homanai emi bahuba'ari taearana a'i mekaiabu marikina.   
\s1 Aka Bero Paunai Kahahaiara.  
\p
\v 8 'Abi orena neiana, ikoimiai aomi kehamomo, kipokia katoraonaraona, katoraona'au ainimi uaho'aba 'abakia, katoaoko'o ainimi, abomo kato 'aiaunu.  
\v 9 Ekia aka ki'a a'i katoba muena herekiai a'i katoaka ki'a, 'ao ekia 'abi ki'a 'arakia a'i katohore herekiai a'i kato'abi ki'a, 'a tia'i ki'animi haukia hanona katoba namonakia, pokina weiana paunai eaparinimi Tirama ena banamo katoa'ina.   
\p
\v 10 Pokina Puka robenai aba tererena,  
\q1 “Hau ha kenuatae mauri namona  
\q1 mai rani namona keihana hanona  
\q1 maeana ke'ima haraina pinanai  
\q1 ki'a 'abina a'i kehinana,  
\q1 pinana paruanai bai'oi 'abina  
\q1 a'i kehina 'apuana.   
\q1
\v 11 Ki'a kehabonakia aka  
\q1 namokia kebabainakia,  
\q1 baibua ketabuna murinai ke'au.   
\q1
\v 12 Pokina Obiapaka mahana hanona  
\q1 aka bero haukia neihanakia,  
\q1 haiana hanona ekia noinoi  
\q1 nibahubahu ainakia,  
\q1 'a Obiapaka wairana hanona  
\q1 aka ki'a haukia niwairanakia  
\q1 ni'oatanakia.”   
\qr Sal 34.12-16  
\p
\v 13 Wai aka namona ṯonuaki'aina katobabaina hanona tai kehore wai keba haiaranimi?  
\v 14 Ia aka berokia katobabainakia mo katohau haiara raninai wai hanona katonamo Tirama wairanai. “Ekia bai'oata 'abikia a'i katota'u ainakia aomi a'i kearo'ari.”  
\v 15 'A Keriso hanona aomiai katomariki aina emi Obiapaka robena. Ba rani ikoinai katoba'oru, emi buabeni weiana aomiai nemiaho hauna anina katebakai bakai aina maearimakia ekia bakaibakai 'abina katobamuena mai baibuami abomo mai marikimi.  
\v 16 Rani ikoinai emi mauri aonai aomi kebero Tirama wairanai. Weiana maearima weiakia emi aka namokia Keriso aonai tubabai haukia ṯehinabe ki'animi haukia aka weiakia katehore kateba haumaeanakia.  
\v 17 Pokina Tirama ena nuatae raninai aka namonai katohau haiara hanona enamo, emi aka ki'a paunai katohau haiara hanona a'i enamo.   
\p
\v 18 Pokina Keriso rani hamonai e'ari ki'a ia'iobokia akakia ikoinai paunai, ia beho aha'i hauna ehore beho haukia 'ekakiai e'ari pokina keaoainaka Tirama herena. Hauanina teahu 'arina, ia aubai emauri mue.  
\v 19 Keriso hanona aubai eao tekaiabunakia aubakia herekia eiroronakia.  
\v 20 Auba weiakia hanona 'uaina 'akinai Noa aunohi ebabaina raninai, maearima weiakia Tirama aiana a'i teka'aina ia aona eba pahihina ebai'ima kateraona kabe haukia. Ia aunohi weiana aonai hanona a'i tebo'o, haukia 'ababani mo bei weiana aonai ebamaurinakia.  
\v 21 Ibabataina bei hanona 'uere robe weiana Iesu Keriso ena mikiri mue paunai wai nibamaurinimi hoana, hauanimi 'opuna katoutuna paunai aha'i ia kato'abi'uai\f + \fr 3:21 \ft (21) 'ao \+it tiao\+it*\f* aomi mai mahamahakia Tirama wairanai.  
\v 22 Keriso hanona aba kupai ekara'au, bariu Tirama itipana tainai marikiaina 'ekanai emiati, aneru, obia aubakia mai hiabu haukia ikoikiai nipoki ainakia.   
\c 4  
\s1 Eka Mauri Katehaeai.  
\p
\v 1 Keriso hauaniai ehaiara buonai, wai abomo raona weiana ihobonai aomi katoba taburanakia, pokina hauani kehaiara hauna hanona ki'a kehabonakia.  
\v 2 Ua buonai emi mauri ranikia ikoikiai aokiai hauani ena nuatae ki'a obokia a'i katobabai, ia Tirama ena nuatae akakia katobabainakia.  
\v 3 'Uainai wai hanona rama haeai haukia ekia nuatae ihobokiai tomiaho. Maha porepore, nuatae ki'a obokia akakia tobabai, toinu 'ari, tobaripu ripu, tobapo'o po'o, kaiba'uku tokuti ainakia.  
\v 4 Bariu maearima weiakia hanona teta'uta'u huri tehinabe ki'animi, pokina wai ia kipokia a'i tubahamomo a'i tubaripu ripu paunai.  
\v 5 'A ia hanona ekia babai paukiai aba eba'oru mauri mai 'ari haukia kebakainakia Tiramana wairanai katekoroti ekia pou katehina.  
\v 6 Weiana paunai pou namona 'ari haukia herekiai eiroro aina, ia abokiamo hauanikia hanona bakai tea'ina maearima ikoikiai 'abana, 'a aubakia hanona katemauri Tirama ena nuatae ihobona.   
\s1 Tirama Ena Aoko'o Hoakia I'ima Haraikia Haukai Kahaeao.  
\p
\v 7 Taba ikoikiai ekia pua hanona aba nimai, ua buonai kipomi katoraona harainimi aomi katoba kironakia ba katobahuba'ari.  
\v 8 'A apa'uana tohana hanona 'abami katoraona'au ainakia mai aomi ikoikiai, pokina raona'au hanona ki'a bo'ona nibahu abunakia.  
\v 9 Emi ituai 'abami ha ha katoa'i taeanakia ia a'i katoururu ainakia.  
\v 10 Tirama wai ha ha ena aoko'o hoanai beruberu ebenimi, weianai ha ha katobarainimi Tirama ena aoko'o hoana haeai haeai i'imana haumi namomiai katoao.  
\v 11 Hau ha keiroro raninai ia hanona 'abi weiana Tirama herenai nimai hauna ihobonai keiroro aina, haeamona hau ha nenuatae kebarai barai, weiana hanona Tirama tabura ebena hauna ihobonai keakaina. Taba weiakia ikoikia aokiai Tirama atana kahabanamona Iesu Keriso paunai. Nuabi mai hiabu ia 'euna keaomo banaibanai. Amen.   
\s1 Kahahaiara Keriso Ena Maearimai Nahaeao Paunai.  
\p
\v 12 E'u raona'au haumi e, baihobo haiarana 'eumi katerama hanona a'i katokai'au kai'au a'i katoraonana taba haeai ha 'eumiai erama. Aha'i.  
\v 13 'A katoaonamo, pokina wai hanona Keriso ehau haiara 'abanai tuhau haiara, Keriso ena nuabiai kewaira tina aonai katoaonamo wairai.  
\v 14 Wai Keriso ena maearimai paunai ṯehinabe ki'animi raninai, banamona hanona wai 'eumi pokina Tirama ena Auba weiana nuabi Auba Robena hanona wai ahamiai.  
\v 15 A'i enamo wai ha kehau haiara ahuahu paunai 'ao bainao paunai 'ao aka ki'a paunai 'ao maearima haeai ekia aka aokiai nitoto paunai.  
\v 16 'A wai ha kehau haiara Keriso ena maearima paunai, ia hanona a'i kehaumaea 'a Tirama kebanamona ata weiana ea'ina paunai.   
\p
\v 17 Pokina ranina aba ekara'au Tirama ena maearima herekiai bakai kea'i ramana. Aika keba'uai ainaka raninai weiakia Tirama ena pou namona a'i tea'i taeana haukia herekiai hanona aea kepua aiho?  
\v 18 Puka robenai ṉa terere aihona,  
\q1 “Aka bero haukia bamauri  
\q1 ia'inai katearo'ari raninai  
\q1 Tirama a'i tia'i taeana haukia  
\q1 mai ki'a haukia aea  
\q1 katekori 'ini aiho?”   
\qr Aot 11.31  
\m
\v 19 Ua buonai weiakia Tirama ena nuatae paunai tihau haiara haukia hanona aka namokia mo katebabai, aubakia hanona ebabainakia Tiramana aia nibabua 'auna hauna imana aonai kateutanakia.   
\c 5  
\s1 Tirama Ena Mamoe To'una Katoiha 'Ininakia.  
\p
\v 1 Wai baiatamiai Tirama ena marea kiro haumi nabahi ahinimi, au abomo kiro hau'u, Keriso ehau haiara hanona au maha'uai aihana, nuabina kewaira tina aonai au mai e'u itau.  
\v 2 Tirama ena mamoe to'una i'imakia haumiai katoao katoiha 'ini harainakia Tirama ena nuatae ihobonai. Baoao baoaoai a'i katobabaina, ia aomi mai nuatae tohanai katobabai. Moni paunai a'i katoaka ia aomi mai aonamonai katoiha 'ininakia.  
\v 3 Wai katoiha 'ininakia haukia herekiai ekia poki haumiai a'i katoao, ia herekiai ibabatai namokia haumiai katoao.  
\v 4 Weiana mamoe i'ima poki hauna Keriso kekara'au raninai wai hanona 'ara ibahuabuna\f + \fr 5:4 \ft (4) obia ibau'una\f* nuabina a'i ke'akauma 'apua hauna katoa'ina.   
\p
\v 5 Hau 'aru'arumi e, taeara ihobonai kiro haukia aiakia katona, ikoimiai kipomi 'aiaunu ai katobarainimi, pokina Puka robenai ererena etibaha,  
\q1 “Tirama hanona apa haukia  
\q1 niwae'e ainakia,  
\q1 'a 'aiaunu haukia hanona  
\q1 keaoko'o ainakia.”   
\qr Aot 3.34  
\m
\v 6 Ua buonai kipomi katoba'aera 'aeranimi Tirama ena hiabu ba'anai kato'aiaunu, rani kemai aonai ia kehore wai kea'i taeanimi.  
\v 7 Aomi ekia aro'ari ikoikiai Tirama herenai katohorotinakia, pokina ia hanona wai ne'imanimi.   
\p
\v 8 Katoraona harai kato'ima 'ima harainimi. Emi 'ou hauna tiaporo hanona wai heremiai nikabanai kabanai neiki matoha mahi apa'uana atana laiona 'abana nibaitabu hau ha petonona hanona niraonana.  
\v 9 Emi a'ikakaumai katokori 'ini tiaporo katokaiabuna, pokina ṯo'iobina uaho'abami maikoinai hanopaka neiana aonai hanona hau haiara ihobona mo tihoaina.  
\v 10 Aoko'o hoana ikoinai pokina Tiramana weiana Keriso aonai eaparinimi ena miaho banaibanai nuabina aonai kebaka totonimi hauna kehore wai rani papana mo katohau haiara, murinai ia kipona kebabero 'aunimi, keba pahihinimi, kebataburanimi, keba kori 'ini harainimi.  
\v 11 Hiabu ikoikiai hanona Tirama 'euna keaomo banaibanai. Amen.   
\s1 Banamo 'Abina Orena.  
\p
\v 12 Sila ena baraibarai ai au marere papana neiana arere ko'ona. Au aihana ia hanona uaho'abaka tohana. Au arere benimi hanona aomi kabataburana mai kahina pouna Keriso paunai kahahau haiara hanona Tirama ena aoko'o hoana tohana. Wai aoko'o hoana neiana aonai katokori 'ini.   
\p
\v 13 Tirama ena marea maearimakia Babulono ai ṯemiaho wai kipokia Tirama ea'i taeanimi haukia tehore ekia banamo 'abikia tebenimi, Mareko a'ikakaumai naha'u abomo ena banamo 'abina ebenimi.  
\v 14 Raona'au hoana baipaunai ha ha emi banamo katobaibeni.  
\p Au nabahuba'ari Keriso aonai ṯomiaho haumi ikoimiai baibua aonai katomiaho.