\id JAS KRIOL Nth Aust James (59 KR jam.txt) sildarwin@sil.org 
\h Jeims 
\toc3 Jeims 
\toc2 Jeims 
\toc1 Jeims Det Leda Blanga Dalim Kristjan Pipul Hau Blanga Jidan 
\mt1 Jeims  
\mt2 Det Leda Blanga Dalim Kristjan Pipul Hau Blanga Jidan  
\ip Wal det braja blanga Jisas neim Jeims bin raidimdan dijan leda langa ola Kristjan pipul, en imbin dalim olabat, dei kaan jis bilib langa Jisas Krais. Dei garra dum detlot gudbala ting du weya God wandim olabat blanga dum. \fig |src="JK James Title.tif" size="col" ref="1:0" \fig*  
\c 1  
\s1 Jeims bin raidimdan leda  
\p
\v 1 1 Orait, mi na Jeims, en mi wekinmen blanga God en blanga Jisas Krais det Boswan. En mi raidimbat dijan leda langa ola Kristjan pipul langa ebri kantri, en mi tok gudei langa main Kristjan braja en sista olabat.\x + \xo 1:1 \xt Meth 13:55; Mak 6:3; Eks 15:13; Galei 1:19\x*   
\s1 Trabul garra testimbat yu  
\p
\v 2 Wal yumob jinggabat na. If enikain trabul kaman langa yumob, wal yumob kaan nogudbinji.  
\v 3 Yumob garra gudbinji, dumaji yumob sabi det trabul garra testimbat yumob, blanga meigim yumob jidan mowa strongbala blanga bilib langa God en im san Jisas Krais.   
\p
\v 4 Wal wen trabul testimbat yumob, yumob garra meiksho yumob garra kipgon trastimbat God, dumaji det trabul weya testimbat yumob garra meigim yumob jidan brabli gudwei nomo garram enijing rong langa det laif blanga yumob.   
\p
\v 5 En wen yumob nomo sabi wanim yumob garra du, wal yumob garra askim God blanga shoum yumob, dumaji im na gin shoum yumob en meigim yumob sabi. Im kaan gitwail langa yumob wen yumob askim im. Im oldei shoum ebribodi wen dei askim im, dumaji im nomo gridiwan en im nomo wandi kipum det ensa brom yumob.  
\v 6 Bat wen yumob askim God, yumob kaan bilib hafenhaf. Yumob garra trastim im wanwei blanga album yumob, dumaji if yumob nomo jinggabat wanwei, wal yumob jis laiga weib langa solwoda weya det win blowimbat im ebriwei.  
\v 7-8 En God kaan album detkain men weya jinggabat eniwei. Im kaan album det men hu nomo jinggabat wanwei.   
\s1 Powan en ritjwan Kristjan pipul  
\p
\v 9 Wal ola Kristjan pipul hu jidan powan garra gudbinji, dumaji God garra meigim olabat ritj langa im wei.  
\v 10 Nomeda God deigidawei ola enijing brom detlot Kristjan pipul hu jidan ritjwan, bat stil dei garra gudbinji du. Ola ritjmen dei jis laiga purdiflawa.  
\v 11 Wen det san im kamat garram brabli hotwan win, det purdiflawa im draiyap na, en ola ritjwan kala blanga det purdiflawa im binij. Lagijat na det ritjmen garra binij wen im stil bisi dumbat wek.\x + \xo 1:11 \xt Aisai 40:6,7\x*   
\s1 Testimbat en temtimbat  
\p
\v 12 Wal wen trabul kamat langa yumob blanga testimbat yumob, yumob garra gudbinji if yumob nomo gibap, dumaji yumob garra win det prais weya God bin meigim det pramis blanga gibit langa detlot pipul hu laigim im.  
\p Yumob sabi? Imbin pramis blanga gibit det brabli gudwan laif langa detlot pipul hu laigim im.   
\p
\v 13 Wal wen trabul temtimbat yumob, yumob kaan tok God im temtimbat yumob, dumaji nomo eni nogudwan ting kaan temtimbat God, en God kaan temtimbat enibodi du.  
\v 14 Yumob oldei temtimbat miselp wen yumob jinggabat nogudbalawei, en det ting na deigidawei yumob brom det wei blanga God, en afta yumob faindim miselp langa trep na.   
\p
\v 15 Yumob sabi? Wen yumob jinggabat nogudbala ting, afta na yumob garra dumbat det ting, en wen yumob kipgon dumbat det nogudbalawei, tharran na meigim yumob dai.   
\p
\v 16 Wal main braja en sista olabat, yumob nomo wandi trikim miselp en jinggabat rongwei.  
\v 17 God kaan temtimbat yumob, dumaji ola gudbala ting kaman brom hebin, en nomo eni nogudbala ting kaan kaman brom God.  
\p Wal yumob jinggabat na. God bin meigim det san en mun blanga gibit wi lait. Bat wen dubala godan, im go dakbala na. Bat God im nomo lagijat. Im gibit wi lait olataim. Oni wanwei im oldei jidan. En im kaan tenim miselp en meigim miselp dakbala. Im kaan tenim miselp en meigim miselp nogudbala. Im jidan gudwei olagijawan.   
\p
\v 18 Wal wen wibin lisin langa det trubala wed, God bin gibit wi nyubala laif. Imbin gibit det gudbala laif langa wi. Nomeda imbin meigim ebribodi, bat stil imbin wandi meigim wi det feswan speshal pipul blanga im.   
\s1 Yumob garra lisin en dum  
\p
\v 19 Wal main braja en sista olabat, yumob jinggabat na. Yumob kaan tok streidawei.  
\v 20 Yumob garra lisin basdam en nomo gitwail fo najing, dumaji wen yumob gitwail, yumob kaan dum detlot gudbala ting weya God wandim yumob blanga dum.   
\p
\v 21 Wal yumob garra libum ol detlot nogudbalawei blanga yumob, en yumob garra gibit miselp langa God, en yumob garra lisin langa det wed weya imbin gibit langa yumob, dumaji det wed na gin seibum yumob.   
\p
\v 22 Wal if yumob bin lisin langa det wed garram yumob irriwol en afta yumob fogedabat det wed, wal yumob rong deya, dumaji yumob kaan jis lisin langa det wed, yumob garra duwit.  
\v 23 En if yumob lisin langa det wed en yumob nomo duwit, wal yumob jis laiga granggibala men wen im luk miselp langa det glas.  
\v 24 Im luk brabliwei langa im feis, en wen im gowei, im foget streidawei wanim im luk laik.  
\p Wal yumob kaan dum lagijat. Yumob nomo wandi foget det wed wen yumob lisin.  
\v 25 Det trubala wed blanga God, tharran na det lowa weya garra meigim yumob fri. En wen yumob kipgon jinggabat det lowa brabli, en wen yumob kipgon teiknodis langa det lowa, wal God garra maindimbat yumob wen yumob dumbat ebrijing gudwei. Yumob kipgon lisinbat en nomo fogedabat det lowa, en wen yumob oldei duwit langa det lowa, wal God garra meigim yumob gudbinji.   
\p
\v 26 Wal if yumob tok yumob oldei bulurrumbat God, bat seimtaim yumob nomo hendulum yumob tang, wal najing. Yumob nomo bulurrum God. En if yumob tok enikain nogudbala ting, wal yumob oni dalimbat laiya.  
\v 27 Wi dedi God bin shoum wi hau im wandim wi garra bulurrum im. Imbin shoum wi blanga album detlot biginini en olgamen hu nomo garram enibodi blanga lukaftumbat olabat wen dei abum trabul. En imbin shoum wi blanga maindim miselp du en nomo larram enijing iya langa dijan kantri meigim wi go nogudwei. En if yumob dum lagijat na weya God bin shoum wi, wal tharran na yumob bulurrum God trubalawei.   
\c 2  
\s1 Wi garra tridim ebribodi seimwei  
\p
\v 1 Main braja en sista olabat, dumaji wi bilib langa wi haibala Bos, Jisas Krais, wi garra tridim ebribodi seimwei.   
\p
\v 2-3 Wal ai garra dalim yumob stori na. Wantaim dubala men bin kaman langa sebis. Wanbala bin ritjmen, en imbin werrimon gudwan klos, en imbin abum golwan ring langa im bingga. Det najawan men bin powan, en imbin werrimon rabishwan klos. En wen detlot pipul deya bin luk det dubala men, deibin dalim det ritjmen blanga jidan langa gudwan pleis, en deibin dalim det pomen blanga jidan langa nogudwan pleis.  
\p Wal yumob jinggabat na. Detlot pipul bin tridim det dubala men difrinwei, dumaji deibin luk dubala atsaidwei langa det klos weya dubala bin werrimon.  
\p Wal wanim yumob reken? Deibin dum gudbala ting deya? Najing. Dei nomo bin dum gudbala ting, dumaji God nomo luk wi atsaidwei. Im luk langa insaidwei langa wi hat. En if yumob bilib langa Jisas Krais det Haibala Bos, wal yumob kaan tridim pipul difrinwei.  
\v 4 Yumob kaan kadimat pipul en pudum langa difrinwan pleis, dumaji wen yumob kadimat pipul lagijat, im jis laik yumob meigim miselp bos, en jinggabat nogudbalawei.   
\p
\v 5 Wal main braja en sista olabat, yumob lisin langa mi na. God bin pikimat detlot po pipul langa ebri kantri blanga meigim olabat jidan blanga im. Olabat oldei trastimbat im brabliwei, en dei garra jidan ritjwan langa det gudwan pleis blanga im, dumaji imbin meigim pramis langa detlot pipul hu laigim im, en imbin dalim olabat dei garra jidan garram im langa hebin.  
\v 6 En if yumob kadimat olabat, wal yumob nomo shoum rispek langa olabat, en yumob nomo tridim olabat gudwei.  
\p Wal yumob dalim mi na. Hulot pipul oldei meigim trabul langa yumob? Ola po pipul o ritj pipul? Detlot ritj pipul na oldei deigim yumob langa kot, indit?  
\v 7 En detlot ritj pipul na oldei toktok nogudbalawei blanga Jisas Krais, en dei oldei mokimbat det neim blanga Jisas Krais weya God bin gibit langa yumob.   
\p
\v 8 Wal if yumob bulurrum God, wal yumob garra bulurrum det lowa blanga im brabliwei. En yumob faindim det lowa langa oltestaman weya im tok, “Yumob garra laigim enibodi jis laik yumob laigim yuselp.” En if yumob bulurrum det lowa, wal yumob dum gudbala ting.\x + \xo 2:8 \xt Labid 19:18\x*  
\v 9 Bat if yumob kadimat enibodi wen yumob luk langa im atsaidwei, wal yumob dum nogudbala ting deya, dumaji det lowa bin kamdan langa yumob, en yumob bin breigim det lowa, en tharran na shoum yumob bin dum rong.  
\v 10 Nomeda yumob bin breigim oni wanbala lowa, bat stil im jis laik yumob bin breigim ebri lowa.   
\p
\v 11 Wal yumob jinggabat na. God bin tok, “Nomo stilimbat najamen waif.” En, “Nomo medrim enibodi.” Wal maitbi yumob nomo bin stilim najamen waif. Bat maitbi yumob bin medrim sambodi. Wal yumob bin stil breigim det lowa. Yumob sabi?\x + \xo 2:11 \xt Eksa 20:13,14; Dyud 5:17,18\x*   
\p
\v 12 Wal ebritaim yumob tok en dum enijing, yumob garra tok en dum gudbala ting, dumaji yumob bilib langa God, en God garra deigim yumob langa kot garram det lowa blanga im weya gin meigim wi fri,  
\v 13 en wen God garra abum det laswan kotkeis garram ebribodi, im kaan kain langa enibodi hu nomo bin kain langa najalot pipul. Bat det sambodi hubin kain langa ebribodi, wal im garra go fri.   
\s1 Wi garra bilib en dum  
\p
\v 14 Wal main braja en sista olabat, if enibodi tok im bilib langa God, en im nomo dum eni gudwan ting blanga shoum im bilib, wal im nomo laigim God. En if enibodi bilib lagijat nomo garram ekshan, wal God kaan seibum im.   
\p
\v 15 Wal yumob jinggabat na. Maitbi yumob luk sambala Kristjan pipul deya nomo garram gudwan klos en nomo garram daga.  
\v 16 Wal wanim yumob garra du? Maitbi yumob jis tok langa olabat en dalim olabat, “Yumob rait. Yumob jis werrimon womwan klos en dagat blendibala daga, en God garra album yumob.” Maitbi yu tok langa olabat lagijat en nomo dum enijing blanga album olabat.   
\p
\v 17 Wal yumob kaan dum lagijat langa olabat, dumaji wen yumob tok yumob bilib en yumob nomo dum gudbala ting langa pipul blanga shoum olabat yumob bilib, wal yumob jis laiga dedbala.   
\p
\v 18 Wal maitbi yumob nomo agri blanga tharran deya weya aibin tok. Maitbi yumob tok, “Sambala pipul reken dei garra jis bilib, en dei reken tharran im naf. En najalot pipul reken dei garra jis dum det ekshan, en dei reken tharran im olrait. En ai reken dubala gija rait.” Maitbi yumob tok lagijat langa mi. Bat ai dalim yumob. Nobodi kaan bilib brabli if im nomo dum det ekshan. Yu si? Yumob sabi ai bilib brabliwei, dumaji yumob gin luk det ekshan main.   
\p
\v 19 Wal yumob lisin langa mi na. Im rili gud if yumob tok yumob bilib oni wanbala God im jidan. Bat ola dibuldibul bilib lagijat du, en olabat brabli bradin langa God.   
\p
\v 20 Yumob sabi na yumob brabli granggibala if yumob bilib nomo garram ekshan, dumaji if yumob bilib en yumob nomo dum gudbala ting, wal im nogud blanga yumob.   
\p
\v 21 Wal yumob jinggabat na hau wi grengrenfatha Eibrahem bin jidan raitwei langa God. God bin meigim im jidan raitwei langa im wen Eibrahem bin deigim im san Aisik blanga kilim im ded en gibit im laiga sekrifais ofring langa God. Imbin go rait deya langa det pleis weya God bin dalim im blanga kilim Aisik, en im bina kilim im ded. Bat God bin stapam im.\x + \xo 2:21 \xt Jen 22:1-14\x*   
\p
\v 22 Wal yumob luk na. Eibrahem bin bilib, en imbin dum det ekshan. En det ekshan blanga im, shoum imbin bilib brabliwei.  
\v 23 Trubala im tok langa Jenasis, “Eibrahem bin bilib langa God, en God bin meigim im jidan raitwei langa im, en God bin gulum im fren.”\x + \xo 2:23 \xt Jen 15:6; 2 Kran 20:7; Aisai 41:8\x*   
\p
\v 24 Yumob sabi na yumob kaan jis bilib. Yumob garra dum det ekshan du.   
\p
\v 25 God bin dum lagijat gin langa det gel neim Reiheb hubin oldei silip garram eni men. Wen det dubala Isreil men bin go langa Jeriko, det gel bin album dubala gidawei, en God bin meigim det gel jidan raitwei langa im, dumaji det gel bin dum det ekshan.\x + \xo 2:25 \xt Josh 2:1-21\x* \fig |src="SIL James 2.25.tif" size="col" ref="2:25" \fig*   
\p
\v 26 Yumob sabi na wen det spirit gowei brom det bodi, det bodi jidan dedbala. En im lagijat du wen yumob bilib nomo garram ekshan. Yumob jidan jis laiga dedbala.   
\c 3  
\s1 Hau wi garra hendulum wi tang  
\p
\v 1-2 Wal main braja en sista olabat, yumob jinggabat detlot titja hu oldei titjimbat God wed langa ola pipul. God garra jadjim detlot titja brabli strongbalawei, en blanga tharran na oni sambala pipul garra jidan titja. Ebribodi oldei meigim misteik. If wi nomo tok eni nogudbala ting wi gin hendulum miselp brabli gudbalawei.   
\p
\v 3 Wal yumob jinggabat na. Wen yumob pudum bit langa hos mawus, yumob gin meigim im duwit en go eniwei yumob wandim.\fig |src="LB00035B.TIF" size="col" ref="3:3" \fig*  
\v 4 En im lagijat gin langa bigwan bout. Wen det strongwan win blowim det bout eniwei, det boutmen gin tenimran det bout garram det lilwan rada, en det bout im ran weya det boutmen wandim im blanga go.  
\v 5 En lagijat du langa wi tang. Nomeda det tang im lilwan ting langa wi bodi, bat stil im gin tok olkain gudbala en nogudbala ting.  
\p Yumob jinggabat na. Det tang im jis laiga lilwan faiya. Nomeda det faiya im lilwan, bat stil im gin barnimap bigwan bush kantri.  
\v 6 En lagijat du det tang im jis laiga lilwan faiya insaid langa yumob bodi, en det faiya im kamat brom det helfaiya, en im spredimat ola nogudbala ting ebriweya insaid langa yumob, en im meigim yumob laif nogud.   
\p
\v 7 Wal pipul gin hendulum olkain wailwan enimul. Dei gin hendulum ola fish en bard en sneik.  
\v 8 Bat dei kaan hendulum olabat tang. Det tang im nogud jis laik im garram strongwan poisin, en nobodi kaan hendulum im.  
\v 9-10 Wi yusum det tang blanga gibit theingks langa God det Bos blanga wi en det dedi blanga wi. En wi yusum det tang blanga sweya en mokimbat wi braja en sista olabat du. Garram det seimwan mawus wi gibit theingks en wi sweyasweyabat. Wal tharran im nogud, en wi nomo wandi dum lagijat, dumaji God bin meigim wi holot laik im.\x + \xo 3:9-10 \xt Jen 1:26\x*   
\p
\v 11-12 Wal main braja en sista olabat, yumob jinggabat na. Freshwoda en solti woda nomo kamat mijamet brom wanbala spring, dumaji det spring weya garram solti woda kaan meigim kamat switwan woda. En im seimwei lagijat du garram ola daga weya kamat brom tri. Det olibtri daga kaan kamat brom det figtri, en det greiptri kaan abum det figtri daga. \fig |src="HK00112B.TIF" size="col" ref="3:11,12" \fig*   
\s1 Klebabalawei  
\p
\v 13 Wal yumob jinggabat na. If enibodi reken im klebabala en sabi det wei blanga God, wal im garra dumbat det raitwan ekshan blanga shoum ola pipul. Lagijat na im garra shoum olabat. Im garra jidan brabli gudbalawei.  
\v 14 En if im reken im klebabala, bat insaid langa im hat im jelas o maitbi im abum nogudwan filing o maitbi im gridiwan, wal im nomo klebabala. Im kaan tok praudbalawei.  
\v 15 Im kaan dalimbat laiya im klebabala, dumaji detkainwei nomo kaman brom hebin. Detkainwei kamat brom dijan kantri. Im meigimapbat im ronwan stori, en im brom det dibuldibul na.  
\v 16 En if im jelas en gridi, wal im bulurrum im ronwei, en im dumbat olkain nogudbala ting.   
\p
\v 17 Wal nomo enijing rong langa det klebabalawei brom hebin, en detlot pipul hu bulurrum det klebabalawei brom hebin kaan meigimbat eni trabul, dumaji dei garra kain langa enibodi, en dei garra laigim olabat, en dei garra fil sori blanga olabat, en dei garra dumbat gudbala ting blanga olabat du. Dei kaan toktok dubalawei en kadimatbat pipul jis fo najing.  
\v 18 Bat det men hu oldei kadimatbat pipul wen dei agamin en faidabat, tharran im jis laik im plentimbat sid, en afta det sid im gro, en det gudwan daga im kamat na. Lagijat na wen det men albumbat enibodi, ola gudbala ting garra kamat brom im.   
\c 4  
\s1 Yumob kaan bulurrum dubalawei  
\p
\v 1 Wal yumob dalim mi na. Wotfo yumob oldei agamin en faidabat? Ai dalim yumob wotfo. Ol yumob Kristjan pipul oldei agamin en faidabat, dumaji yumob oldei jinggabat yumob ronselp blanga meigim miselp sedisfaid langa yumob ron bodi. Blanga tharran na yumob oldei faidabat.  
\v 2 En wen yumob wandim det ting en yumob nomo gedim, wal yumob go en medrimbat enibodi blanga det ting. En wen yumob wandi pulumat samting brom enibodi en im kaan gibit yumob, wal yumob stat agamin en fait na.  
\p Wal yumob kaan gedim enijing yumob wandim, dumaji yumob nomo askim God blanga det ting.  
\v 3 Maitbi yumob askimbat God blanga enijing, en im nomo gibit langa yumob. Bat im nomo bin gibit langa yumob, dumaji yumob wandi yusum det ting blanga yumob ronselp, en yumob wandi meigim yumob selp sedisfaid.   
\p
\v 4 Wal ol yumob pipul reken miselp Kristjan. Bat yumob nomo bulurrum God brabliwei, dumaji yumob laigim ola enijing langa dijan wel. En if yumob laigim ola enijing langa dijan wel, wal yumob meigim miselp bedfren langa God.   
\p
\v 5 Wal God bin gibit det spirit langa wi, en trubala im tok langa oltestaman, God wandim det spirit blanga wi brabliwei.   
\p
\v 6 Yumob sabi? Yumob laigim ola enijing langa dijan wel. Bat God laigim yumob detmatj. En langa oltestaman im tok, “God nomo laigim detlot pipul hu meigim miselp haibala langa im. Bat im oldei album detlot pipul hu meigim miselp lobala langa im.”\x + \xo 4:6 \xt Prab 3:34\x*   
\p
\v 7 Wal blanga tharran na, yumob garra gibit miselp langa im, en yumob garra jandap strongbalawei langa Seitin blanga meigim im gowei brom yumob.  
\v 8 En if yumob wandim God garra kaman en jidan garram yumob, wal yumob garra bulurrum im, en afta im garra kaman langa yumob.  
\p Wal ol yumob Kristjan pipul garra stap dumbat ola nogudbala ting. Yumob oldei jinggabat dubalawei en yumob garra tenim miselp brom detkain en jinggabat oni wanwei.  
\v 9 Yumob garra fil sori en kraikraibat blanga detlot nogudbala ting weya yumob bin oldei dumbat. Yumob kaan laf en jidan gudbinji. Yumob garra krai en jidan nogudbinji,  
\v 10 en yumob garra meigim miselp lobala langa God, en afta im garra lidimap yumob. \fig |src="GTJames0408to10Mourning.tif" size="col" ref="4:10" \fig*   
\s1 Nomo jadjimbat yumob Kristjan braja en sista en tok praudbalawei  
\p
\v 11 Wal main braja en sista olabat, yumob kaan tokabat yumob Kristjan braja en sista olabat. En if yumob tok nogudbalawei langa yumob braja o sista en yumob trai en jadjim im, wal im jis laik yumob meigim miselp bos blanga det lowa, en yumob nomo oldei dum wanim det lowa dalim yumob blanga dum, dumaji yumob reken det lowa im nogud.  
\v 12 Bat oni God gin meigim lowa en jadjimbat pipul. Oni im na gin seibum enibodi en jandim enibodi langa det helfaiya. En wen yumob tok nogudbalawei langa yumob Kristjan braja o sista, wal hu yumob reken miselp? Yumob kaan meigim miselp God.   
\p
\v 13 Wal yumob jinggabat na. Yumob kaan tok, “Tumorro ai garra go samweya tharrei en stap deya wan yiya blanga selimbat enijing blanga meigimap mani.”\x + \xo 4:13 \xt Prab 27:1\x*  
\v 14 Yumob kaan tok lagijat, dumaji yumob nomo sabi wanim garra hepin langa yumob laif tumorro. Yumob jis laiga lilwan smok weya im kamat en afta im gon.  
\v 15 Wal yumob garra tok lagijat, “If God wandim, wal ai garra jidan laibala, en ai gin dum det ting.”  
\v 16 Bat yumob nomo jinggabat lagijat, dumaji yumob oldei meigim miselp haibala en tok praudbalawei. Bat yumob kaan tok praudbalawei, dumaji im nogud.   
\p
\v 17 Yumob sabi na? If yumob sabi det gudbalawei, en yumob nomo bulurrum det gudbalawei, wal im nogud, dumaji yumob dum nogudbala ting.   
\c 5  
\s1 Woning blanga ritj pipul  
\p
\v 1 Wal ol yumob ritj pipul, yumob lisin langa mi na. Yumob garra kraikrai, dumaji bigwan trabul garra kaman langa yumob,  
\v 2 en ola gudwan enijing blanga yumob garra binijap. Ol detlot insek garra dagat ola gudwan klos blanga yumob,  
\v 3 en ola gol en silba blanga yumob garra go rastiwan. En wen God garra jadjim yumob, ol detlot rastiwan gol en silba garra jidan pruf blanga yumob weya yumob bin bulurrum det nogudbalawei en bin oldei jidan gridiwan. Det gol en silba garra binij wen dei go rastiwan, en yumob garra binij du jis laik faiya garra barnimap yumob.\x + \xo 5:3 \xt Meth 6:19 \x*  
\p Wal yumob brabli granggibala. Yumob kipgon hipimapbat detlot ritjwan enijing blanga yumob raidap det taim wen God garra kaman en jadjim yumob,  
\v 4 en im garra nogud blanga yumob, dumaji yumob nomo peiyimbat detlot wekinmen blanga yumob. Nomeda dei kipgon jinginat langa yumob blanga peiyim olabat, bat stil yumob nomo oldei lisin langa olabat. Bat God det Boswan blanga ebrijing lisinbat langa olabat weya dei jinginatbat.\x + \xo 5:4 \xt Dyud 24:14,15 \x*   
\p
\v 5 Wal yumob bin meigim loda mani blanga abum gudtaim iya langa dijan kantri. En tharran na meigim yumob jis laiga buligi weya dei oldei fetinimap im raidap det rait taim garra kaman blanga kilim im.  
\v 6 En im nogud weya yumob oldei deigim gudbala pipul langa kot, en afta yumob medrim olabat. Yumob oldei medrim detkain pipul weya oldei trai en stapam yumob.   
\s1 Weidabat en prei  
\p
\v 7 Wal main braja en sista olabat, yumob nomo wandim slekbek. Yumob garra weit en jandap strongbala raidap Jisas Krais det Bos blanga wi garra kambek.  
\p Wal yumob jinggabat det fama. Wen im plentim ola sid langa graun, im kaan meigim det daga kamat streidawei. Im garra weit raidap det rein buldan blanga meigim det daga kamat.  
\v 8 En lagijat na yumob garra weit en jandap strongbala, dumaji im gulijap taim blanga Jisas Krais det Bos blanga wi garra kambek.   
\p
\v 9 Wal main braja en sista olabat, yumob nomo wandi pudum bleim langa yumob braja o sista blanga ola trabul weya yumob oldei abum. If yumob pudum bleim langa yumob braja o sista, wal God garra jadjim yumob en faindim yumob gilti. En aibin gibit yumob woning, dumaji God im redi blanga kambek en deigim wi langa kot.   
\p
\v 10 Wal main braja en sista olabat, yumob jinggabat detlot speshalwan mesinja hubin oldei tok blanga Jisas Krais det Boswan. Nomeda deibin abum loda trabul, bat stil deibin weidabat en nomo slekbek,  
\v 11 en deibin gudbinji brabliwei, dumaji dei nomo bin tenbek. Wi sabi tharran, en wi garra jidan lagijat du.\x + \xo 5:11 \xt Job 1:21,22; 2:10; Saam 103:8 \x*  
\p Wal yumob jinggabat det stori blanga det olmen neim Job. Imbin kipgon weidabat en nomo gibap, en God bin oldei lukaftumbat im. En God garra oldei lukaftumbat wi lagijat du, dumaji im brabli soribala en kainbala.   
\p
\v 12 Wal main braja en sista olabat, yumob lisin langa mi na. Wen yumob tok enijing o meigim pramis, yumob nomo wandi yusum God neim eniwei blanga meigim det wed blanga yumob strongbala. Yumob nomo wandi yusum im neim o det neim blanga eni kantri o enijing blanga meigim det wed blanga yumob strongbala. Yumob garra jis tok streidat. Wen yumob wandi tok yuwai, wal yumob garra jis tok yuwai. En wen yumob wandi tok nomo, wal yumob garra jis tok nomo. If yumob yusumbat detlot najalot wed blanga bekimap det wed blanga yumob, wal God garra jadjim yumob blanga tharran, dumaji im nogud.\x + \xo 5:12 \xt Meth 5:34-37\x*   
\p
\v 13 Wal if enibodi abumbat trabul, im garra prei langa God. En if enibodi gudbinji, wal im garra sing blanga gibit theingks langa God.  
\v 14 En if enibodi sik, wal im garra askim ola tjetj lida blanga kaman langa im, en dei garra go langa im, en dei garra prei blanga im, en dei garra rabum im garram det oliboil, en dei garra yusum det neim blanga Jisas Krais det Bos blanga wi blanga album det sikwan.\x + \xo 5:14 \xt Mak 6:13\x*  
\v 15 En wen dei prei lagijat en dei bilib brabliwei, wal Jisas Krais det Bos blanga wi garra meigim det sikwan gudbala. En if det sikwan bin dumbat eni nogudbala ting, wal Jisas Krais det Bos blanga wi garra meigim im fri brom ol detlot nogudbala ting.   
\p
\v 16 Wal yumob garra dalim miselp blanga eni nogudbala ting weya yumob bin dumbat, en yumob garra prei blanga yumob selp, en afta God garra meigim yumob gudbala, dumaji det preya blanga gudbala pipul im brabli strongbala.   
\p
\v 17 Wal yumob jinggabat det speshalwan mesinja neim Ilaija. Imbin seim laik wi, en wen imbin prei brabli strongbalawei blanga stapam det rein, fo thri en haf yiya nomo eni rein bin buldan langa det kantri.\x + \xo 5:17 \xt 1 King 17:1; 18:1\x*  
\v 18 En afta na imbin prei igin, en det rein bin buldan na, en ola daga langa det kantri bin gro igin.\x + \xo 5:18 \xt 1 King 18:42-45\x*   
\p
\v 19-20 Wal main braja en sista olabat, yumob jinggabat na. Maitbi wanbala deya langa yumob bin gowei brom det trubalawei. En if enibodi bringimbek im brom im nogudbalawei, wal im seibum im brom det helfaiya, en God garra larramgo im fri brom ol detlot nogudbala ting weya imbin dumbat.\x + \xo 5:19-20 \xt Prab 10:12; 1 Pida 4:8\x*  
\p Binij na.