\id COL KRIOL Nth Aust Colossians (51 KR col.txt) sildarwin@sil.org 
\h Kaloshans 
\toc3 Kalosh 
\toc2 Kaloshans 
\toc1 Kaloshans Jisas Krais Det Brabli Haibalawan Blanga Ebrijing 
\mt1 Kaloshans  
\mt2 Jisas Krais Det Brabli Haibalawan Blanga Ebrijing  
\ip Wal Pol bin raidimdan dijan leda langa ola Kristjan pipul langa wan taun gulum Kalosai, en imbin dalim olabat blanga kipgon bulurrumbat det brabli trubalawei blanga det gudnyus blanga Jisas Krais. Imbin dalim olabat lagijat dumaji sambala pipul bin trai en tenimran det trubala wed en meigim detlot pipul bulurrum ola difrinwan lowa weya men bin meigim. Wal Pol bin dalim olabat Jisas Krais bin meigim olabat fri wen imbin dai deya langa det kros, en wen olabat bin bilib langa im, olabat bin dai garram im. Bat Jisas Krais bin meigim olabat gidap laibala brom dedbala, en imbin gibit langa olabat nyubala laif, en im na det laif blanga olabat.  
\c 1  
\s1 Pol bin raidimdan dijan leda  
\p
\v 1-2 Orait, mi na Pol, en mi speshalwan mishanri blanga Jisas Krais, dumaji God bin pikimat mi.  
\p Wal mi en det braja blanga wi neim Timathi, minbala raidimdan dijan leda langa ol yumob Kristjan pipul deya langa det taun gulum Kalosai. Yumob minbala braja en sista olabat, en yumob God pipul olabat, en yumob bulurrum Jisas Krais trubalawei du.  
\p Wal minbala wandim God det Dedi blanga wi garra kain langa yumob en lukaftumbat yumob en meigim yumob jidan gudbalawei. \fig |src="HK-71E.TIF" size="col" ref="1:0" \fig* \fig Det taun gulum Kalosai|src="map Coloss 1 K.tif" size="col" ref="1:1,2" \fig*   
\s1 Pol bin prei blanga olabat  
\p
\v 3-4 Wal wen minbala oldei prei blanga yumob, \wj Prayer \wj* minbala oldei gibit theingks langa God det Dedi blanga Jisas Krais det Bos blanga wi, dumaji minbala bin irrim det wed weya yumob bilib langa Jisas Krais brabliwei en weya yumob laigim ola pipul blanga God brabliwei du.   
\p
\v 5 Wal yumob bilib brabliwei en laigim ola Kristjan pipul, dumaji wen det trubalawan wed brom det gudnyus bin kaman langa yumob basdam, yumob bin irrim God bin pramis blanga gibit yumob det olagijawan laif langa hebin,  
\v 6 en wen yumob bin irrim det gudnyus, yumob bin sabi hau God bin brabli kainbala langa wi, en brom det taim na raidap tudei det gudnyus bin wek langa yumob laif brabliwei, en det gudnyus kipgon spredatbat ebriweya langa ebri kantri.   
\p
\v 7 Wal yumob bin irrim det gudnyus brom det gudfren blanga minbala neim Apefras. Melabat ol jidan wekinmen mijamet, en im brabli trubala wekinmen blanga Jisas Krais, en imbin deigim pleis blanga minbala wen imbin dalimbat yumob det gudnyus,\x + \xo 1:7 \xt Kalosh 4:12; Fai 1:23\x*  
\v 8 en im na bin dalim det wed langa minbala blanga yumob weya det Holi Spirit bin meigim yumob laigim ola pipul blanga God brabliwei.   
\p
\v 9 Wal brom det taim weya minbala bin irrim det wed blanga yumob raidap tudei minbala bin oldei prei blanga yumob, en minbala oldei askimbat God blanga meigim det Holi Spirit blanga im shoum yumob wanim im wandim yumob blanga dum, en minbala oldei askim im blanga meigim yumob sabi wanim im wandim brabliwei.  
\v 10 Lagijat na minbala oldei prei blanga yumob, dumaji wen yumob sabi wanim God wandim, yumob gin jidan hau im wandim yumob blanga jidan, en yumob gin oldei dum detlot ting weya meigim im gudbinji. En wen yumob jidan hau im wandim yumob blanga jidan, wal yumob oldei dumbat olkain gudbala ting, en ebridei yumob sabi God mowa en mowa.   
\p
\v 11 Wal minbala oldei askimbat God blanga yusum det brabliwan pawa blanga im blanga meigim yumob jidan strongbala wulijim yumob kaan slekbek en gitwail wen trabul kaman langa yumob.  
\v 12 En yumob garra gibit theingks langa wi Dedi gudbinjiwei, dumaji im na bin meigim wi jidan raitwei langa im wulijim wi garra gedim ol detlot gudbala ting weya imbin pramis blanga gibit langa detlot pipul hu garram det lait blanga im,  
\v 13 en imbin seibum wi brom det pawa blanga det dakbalawei, en imbin bringimap wi blanga jidan garram im brabli ronwan San,  
\v 14 en im san na bin pei blanga larramgo wi fri brom ol detlot nogudbala ting weya wibin oldei dumbat.\x + \xo 1:14 \xt Ifi 1:7\x*   
\s1 Jisas Krais det haibalawan San  
\p
\v 15 Wal nobodi kaan luk God. Bat wi gin luk Jisas Krais. En im na wulijim God. En im det feswan San hu jidan Bos blanga ebrijing weya God bin meigim, dumaji thru im na God bin meigim detlot ebrijing iya langa graun en deya langa hebin.  
\v 16 Imbin meigim ebrijing weya wi gin luk en ebrijing weya wi kaan luk, en imbin meigim ola einjul en olkain spirit en olkain pawa en ola bos ebriweya langa graun en langa hebin. God bin meigim ebrijing thru Jisas Krais, en imbin meigim ebrijing blanga Jisas Krais du.  
\v 17 En bifo God bin meigim ebrijing, Jisas Krais bin oldei deya, en im na holdimap ebrijing weya God bin meigim, en im stil meigim detlot ting kipgon. \fig |src="GT Col1.15.tif" size="col" ref="1:17" \fig*   
\p
\v 18-19 Wal ol wi Kristjan pipul jidan jis laiga bodi, en Jisas Krais na det hedpat blanga det bodi. Im na det laif blanga wi, en wi det tjetj blanga im. En im na det feswan hubin gidap laibala olagijawan brom dedbala. Imbin gidap feswan lagijat wulijim im garra jidan haibala langa ebrijing, dumaji God bin insaid langa im, en dubala jidan wanbala, en God bin gudbinji im San jidan wulijim im.\x + \xo 1:18-19 \xt Ifi 1:22,23\x*  
\v 20 En God bin wandi bringimbek ebrijing langa imselp thru im San, en imbin meigim ebrijing jidan gudwei langa imselp thru det blad weya im San bin weistim langa det kros.\x + \xo 1:20 \xt Ifi 2:16\x*   
\p
\v 21 Basdam yumob bin jidan longwei brom God, en yumob bin jidan enami blanga im, dumaji yumob bin oldei dumbat en jinggabat olkain nogudbala ting.  
\v 22 Bat God bin bringimbek yumob langa imselp thru Jisas Krais wen imbin dai. Imbin bringimbek yumob wulijim yumob garra jandap brabli gudwan lida langa im, nomo garram eni bleim en nomo garram enijing rong.   
\p
\v 23 Wal yumob garra kipgon bilib en jandap brabli strongbalawei, en yumob kaan larram enikain ting deigidawei yumob brom det pramis weya God bin gibit langa yumob wen yumob bin irrim det gudnyus.  
\p Wal det gudnyus weya yumob bin irrim bin spredatbat ebriweya langa ebribodi langa ebri kantri, en blanga det gudnyus na God bin meigim mi jidan wekinmen blanga im.   
\s1 Det plen blanga God  
\p
\v 24 Wal nomeda mi abum trabul en pein weya mi jidan iya langa jeil, bat stil mi gudbinji, dumaji aibin dalimbat det gudnyus blanga album yumob, en blanga tharran na dijan trabul bin kaman langa mi. Dijan trabul weya mi abum langa main bodi im jis laik det trabul weya Jisas Krais bin abum. Imbin gibit mi dijan trabul, en ai garra go thru langa dijan trabul blanga album ola pipul blanga God. Olabat na det tjetj blanga God, en dei jidan jis laiga bodi blanga Jisas Krais.   
\p
\v 25 Wal God bin meigim mi jidan wekinmen blanga album im pipul olabat, en imbin dalim mi blanga dalimbat det wed blanga im brabliwei.  
\v 26-27 Imbin blandim det wed brom ebribodi basdam. Bat tudei imbin shoum im pipul olabat det brabliwan plen blanga im weya imbin abum brom longtaim.  
\p Yumob sabi? Bifo nobodi bin sabi Jisas Krais garra jidan insaid langa wi. Bat tudei wi sabi, dumaji God bin pikimat det rait taim blanga shoum wi wanim im wandim garra hepin langa ebribodi. Jisas Krais jidan insaid langa wi, en blanga tharran na wi sabi wi garra jidan langa det brabli shainiwan lait blanga God.   
\p
\v 28 Wal melabat oldei dalimbat ebribodi blanga Jisas Krais. Brabliwei melabat oldei titjimbat olabat en lenimbat olabat wulijim ebribodi hubin joinap garram Jisas Krais garra jandap lida langa God nomo garram enijing rong.  
\v 29 Blanga tharran na mi oldei adwek nomo lilbit, en mi oldei yusumbat det brabli strongwan pawa blanga Jisas Krais weya imbin gibit langa mi.   
\c 2  
\p
\v 1 Wal ai wandim yumob garra sabi mi oldei adwek brabliwei blanga ol yumob Kristjan pipul deya langa det taun gulum Kalosai en blanga ol detlot Kristjan pipul langa det taun gulum Leiyadasiya en blanga ol detlot najalot Kristjan pipul hu nomo bin luk mi.  
\v 2 Mi oldei adwek blanga meigim yumob jidan strongbala en blanga meigim yumob wandi kipgon bulurrumbat det trubala wed. En mi oldei adwek blanga joinimap yumob en meigim yumob laigim gija en jidan wanbala. En mi oldei adwek blanga meigim yumob sabi brabliwei det plen blanga God weya nobodi bin sabi bifo. Det plen na im Jisas Krais. En wen yumob sabi det plen brabliwei, wal yumob garra jidan brabli gudbinjiwei,  
\v 3 en yumob garra sabi brabliwei ola gudbala ting, dumaji Jisas Krais na shoum wi ol detlot gudbala ting blanga God weya nobodi bin sabi bifo.   
\p
\v 4 Wal aibin dalim yumob tharran, dumaji yumob kaan larram enibodi trikim yumob garram difrinwan wed.  
\v 5 Nomeda det wed im saun gudwan, bat stil yumob kaan teiknodis langa det wed, dumaji nomeda mi nomo deya garram yumob, bat stil main filing im oldei deya garram yumob, en mi brabli gudbinji blanga yumob, dumaji ai sabi yumob bilib langa Jisas Krais brabliwei, en yumob oldei dum ebrijing gudbalawei en nomo madulumap miselp, en yumob nomo oldei larram enibodi deigidawei yumob.   
\s1 Teiknodis langa det trubalawan wed  
\p
\v 6 Wal yumob bin bilib langa Jisas Krais, en yumob bin larram im jidan Bos langa yumob laif. En yumob garra kipgon jidanbat garram im,  
\v 7 en yumob garra meigim miselp strongbala langa im jis laiga strongwan tri weya det rutpat godan longwei insaid langa graun. En yumob garra meigim miselp strongbala jis laiga strongwan haus weya dei bildimap langa strongbala graun. Lagijat na yumob garra bilib strongbalawei jis laik melabat bin lenimbat yumob blanga bilib, en yumob garra oldei gibit theingks langa God.   
\p
\v 8 Wal yumob garra oldei wotjimbat miselp en nomo larram enibodi deigidawei yumob garram olkain wed weya kamat brom pipul. Yumob nomo wandi larram enibodi meigim yumob jidan laiga prisana blanga im, dumaji detkain wed weya im tok im laiyawan wed weya pipul oldei jinggabat, en im kamat brom ola nogudbala boswan spirit langa dijan wel.  
\v 9 Ol detkain wed nomo kamat brom Jisas Krais, dumaji wen imbin iya langa dijan wel, God bin jidan holbit langa det bodi blanga im,  
\v 10 en wen yumob bin joinap garram im, imbin gibit yumob ebrijing blanga jidan raitwei garram im, en im na haibala Bos langa ola spirit en dibuldibul en pawa ebriweya langa dijan wel.   
\p
\v 11-12 Wal wen yumob bin joinap garram Jisas Krais, yumob bin sekamsais. Bat nomo det sekamsais weya pipul dum langa olabat bodi. Det sekamsais weya Jisas Krais bin kadimat yumob brom det olbalawei blanga yumob, dumaji wen yumob bin beptais, im jis laik yumob bin dai, en deibin gaburrumap yumob garram im, en yumob bin gidap laibala brom dedbala garram im du, dumaji yumob bin bilib langa det pawa blanga God weya bin meigim im gidap laibala.\x + \xo 2:11-12 \xt Rom 6:4\x*   
\p
\v 13 Yumob sabi? Basdam yumob bin jidan dedbala dumaji yumob bin dumbat olkain nogudbala ting, en ol yumob Jintail pipul nomo bin abum det lowa weya God bin gibit langa Mosis blanga meigim miselp fri. Bat tudei God bin gibit yumob laif garram Jisas Krais, en imbin larramgo wi fri brom ol detlot nogudbala ting weya wibin oldei dumbat.\x + \xo 2:13 \xt Ifi 2:1-5\x*  
\v 14 Imbin jis laik imbin gajim det peipa weya imbin bukumdan ol detlot nogudbala ting blanga wi, en imbin rabumof ol detlot nogudbala ting, en imbin gajim det najawan peipa garram detlot lowa weya bina meigim wi dai, en imbin deigim det dubala peipa, en imbin neilimap dubala ontop langa det kros, en deya na imbin binijimap ebrijing. Imbin jis laik imbin dum lagijat na.\x + \xo 2:14 \xt Ifi 2:15\x*  
\v 15 En deya na langa det kros imbin bidim ol detlot spirit en dibuldibul en pawa ebriweya langa dijan wel, en imbin meigim olabat sheim miselp jis laik ol detlot prisana weya detlot boswan solja oldei bringimbek brom fait.   
\p
\v 16 Wal nobodi kaan meigim yumob bulurrum detlot lowa blanga ola daga en dringk en blanga detlot serramoni weya dei abum ebriyiya en ebrimanth en ebriwik.\x + \xo 2:16 \xt Rom 14:1-6\x*  
\v 17 En if enibodi tok nogudbalawei langa yumob blanga detkain ting, wal yumob kaan teiknodis langa im, dumaji ol detkain ting nomo enijing. Detkain ting bin oni jidan laiga pitja blanga shoum ola pipul wanim garra kaman. Bat det brabliwan ting bin kaman olredi, en Jisas Krais na det brabliwan ting.\fig |src="Col 2.tif" size="col" ref="2:17" \fig*   
\p
\v 18 Wal if enibodi dalim yumob blanga dum olkain ting langa yumob bodi blanga meigim miselp lobala, en if enibodi dalim yumob blanga weship langa ola einjul, wal yumob kaan teiknodis langa im. Nomeda im tok nogudbalawei blanga yumob, bat stil yumob kaan teiknodis langa im, dumaji detkain pipul reken God oldei gibit olabat speshalwan wed thru langa drim, en dei oldei reken miselp haibala langa ola najalot pipul. Bat olabat ronwan main oldei meigim olabat jinggabat nogudbalawei lagijat.   
\p
\v 19 Wal yumob kaan teiknodis langa detkain pipul, dumaji olabat go olabat ronwei, en dei nomo joinap garram Jisas Krais. Ol wi Kristjan pipul jidan jis laiga bodi blanga Jisas Krais. Im na det hedpat blanga wi, en im joinimap wi jis laik ola difrinwan pat blanga det bodi, en God im growimap det bodi hau im wandim det bodi blanga growap.\x + \xo 2:19 \xt Ifi 4:16\x*   
\s1 Jisas Krais na det laif blanga wi  
\p
\v 20 Wal ola nogudbala spirit langa dijan wel nomo jidan bos blanga yumob na, dumaji yumob bin dai garram Jisas Krais.  
\p Wal wotfo yumob kipgon bulurrumbat ol detlot ting blanga dijan wel?  
\v 21 En wotfo yumob kipgon bulurrumbat detlot lowa weya tok yu kaan dagat det daga en yu kaan tatjim det ting?  
\v 22 Ola daga en ola enijing kaan jidan longtaim. Dei oldei binij streidawei wen yu yusum.  
\p Wal ol detlot lowa bin kamat brom pipul,  
\v 23 en dei dalim yu blanga dum olkain ting langa yu bodi geman blanga meigim miselp lobala, en dei dalim yu blanga weship langa ola einjul. En pipul reken detkain lowa na brabli gudwan. Bat detkain lowa nomo gudwan, dumaji yu ronwan bodi oldei wandi dum olkain nogudbala ting, en detkain lowa kaan meigim yu jidan bos blanga det bodi blanga yu.   
\c 3  
\p
\v 1 Yu si? Yumob garra oldei jinggabat en wandim detlot gudbala ting deya langa hebin, dumaji yumob bin gidap laibala garram Jisas Krais, en im jidan deya na raidensaid langa God.\x + \xo 3:1 \xt Saam 110:1\x*  
\v 2 En yumob garra oldei jinggabat ol detlot gudbala ting na, nomo detlot nogudbala ting iya langa dijan graun.  
\v 3 Yumob kaan jinggabat detlot nogudbala ting, dumaji yumob bin dai langa det olbala laif, en det brabliwan laif blanga yumob im deya garram Jisas Krais deya langa God weya nobodi kaan luk.  
\v 4 Jisas Krais na det laif blanga wi. En wen im garra kambek, det taim na wi garra jidan garram im garram det brabli shainiwan lait blanga im.   
\s1 Det olbala laif en det nyubala laif  
\p
\v 5 Wal yumob garra binijimap ol detlot nogudbala filing weya yumob oldei jinggabat, en yumob garra libum ol detlot nogudbalawei weya yumob oldei silipsilipbat garram enibodi, en yumob kaan jidan gridi en wandim olkain ting, dumaji wen yumob gridi, yumob larram detlot ting na deigim pleis blanga God langa yumob laif.   
\p
\v 6 Wal yumob garra libum ol detkain nogudbala ting, dumaji ol detkain ting na meigim God gitwail en panishim detlot pipul hu dumbat lagijat.   
\p
\v 7 Wal yumob bin oldei dumbat detkain nogudbala ting wen yumob bin bulurrum det olbalawei blanga yumob.  
\v 8 Bat tudei yumob garra tjakidawei ol detlot nogudbala ting. Yumob kaan gitwail en ardim enibodi, en yumob kaan dalimbat stori blanga ardim enibodi, en yumob kaan yusum ol detlot brabli nogudwan wed langa enibodi,  
\v 9 en yumob kaan dalimbat laiya du, dumaji yumob bin libum det olbala laif blanga yumob garram det nogudbalawei,\x + \xo 3:9 \xt Ifi 4:22\x*  
\v 10 en yumob bin go langa det nyubala laif, en God bin meigim yumob nyuwan, en ebridei im meigim yumob mowa en mowa laik im wulijim yumob garra sabi im brabliwei.\x + \xo 3:10 \xt Jen 1:26; Ifi 4:24\x*   
\p
\v 11 Yu si? God bin meigim wi laik im, en blanga tharran na ola Kristjan pipul jidan lebul. Nomeda wi Juwish pipul o Jintail pipul, bat stil wi ol jidan lebul. En nomeda wibin sekamsais o wi nomo bin sekamsais, bat stil wi ol jidan lebul. En nomeda wi streinja pipul brom longwei kantri o maiyal pipul hu nomo sabi enijing o wekinmen hu jidan laiga prisana o wekinmen hu jidan fri, bat stil wi ol jidan lebul, dumaji nobodi haibala. Oni Jisas Krais im haibala. En im na jidan insaid langa wi holot.   
\p
\v 12 Wal God im laigim yumob brabliwei, en imbin pikimat yumob blanga jidan im ronwan pipul olabat, en blanga tharran na yumob garra oldei abum filing blanga yumob Kristjan braja en sista olabat en kain langa olabat, en yumob garra meigim miselp lobala en nomo tridim enibodi adwei, en yumob kaan gitwail langa enibodi streidawei du.\x + \xo 3:12 \xt Ifi 4:2\x*  
\v 13 Yumob garra jis larramgo enibodi wen im tok nogudbalawei langa yu. Yumob garra larramgo im fri brom det ting jis laik Jisas Krais det Bos blanga wi bin larramgo wi fri.\x + \xo 3:13 \xt Ifi 4:32\x*  
\v 14 En yumob garra laigim yumob Kristjan braja en sista olabat brabliwei, dumaji wen yumob laigim gija brabliwei, im meigim yumob jidan wanbala.   
\p
\v 15 Wal Jisas Krais na garra meigim yumob jidan gudbalawei mijamet. En yumob garra larram im shoum yumob wanim yumob garra dum, dumaji God bin pikimat yumob blanga jidan wanbala en blanga jidan gudbalawei.  
\p Wal yumob garra oldei gibit theingks langa God,  
\v 16 en yumob garra oldei larram det wed blanga Jisas Krais jidan insaid langa yumob brabliwei, en yumob garra oldei titjimbat en lenimbat yumob Kristjan braja en sista olabat brabliwei, en yumob garra oldei sing ola song langa God gudbinjiwei,  
\v 17 en enijing yumob tok en dum, yumob garra dum brabli trubalawei, dumaji yumob bulurrum Jisas Krais det Bos blanga wi, en thru im na yumob garra oldei gibit theingks langa God det Dedi blanga wi.\x + \xo 3:17 \xt Ifi 5:19,20\x*   
\s1 Hau blanga jidan gudbalawei  
\p
\v 18 Wal ol yumob waif, yumob garra rispek yumob hasbin, dumaji yumob bilib langa Jisas Krais det Bos.\x + \xo 3:18 \xt Ifi 5:22; 1 Pida 3:1\x*   
\p
\v 19 Wal ol yumob hasbin, yumob garra laigim yumob waif en nomo tridim olabat nogudbalawei.\x + \xo 3:19 \xt Ifi 5:25; 1 Pida 3:7\x*   
\p
\v 20 Wal ol yumob biginini, yumob garra oldei teiknodis langa yumob dedi en mami, dumaji wen yumob lisin langa yumob dedi en mami, im meigim Jisas Krais det Bos blanga wi gudbinji.\x + \xo 3:20 \xt Ifi 6:1\x*   
\p
\v 21 Wal ol yumob dedi en mami, yumob nomo wandi meigim yumob biginini oldei apset, dumaji im mait meigim olabat nogudbinji olagijawan.\x + \xo 3:21 \xt Ifi 6:4\x*   
\p
\v 22 Wal ol yumob wekinmen, yumob garra oldei dum wanim yumob bos dalim yumob blanga dum. Yumob kaan wek nogudwei wen yumob bos nomo deya lukinat langa yumob. Yumob garra wek gudwei olataim. Bat yumob kaan wek gudwei oni blanga meigim yumob bos gudbinji blanga yumob. Yumob garra wek gudwei dumaji yumob rispek Jisas Krais det brabliwan Bos.\x + \xo 3:22 \xt Ifi 6:5-8\x*  
\v 23 En ebrijing weya yumob dum, yumob garra dum brabliwei jis laik yumob wek blanga Jisas Krais,  
\v 24 en yumob garra jinggabat bambai im garra gibit im pipul olabat ol detlot gudbala ting weya im garram blanga olabat. Im na det brabliwan Bos, en yumob wek blanga im na,  
\v 25 en if enibodi dum nogudbala ting, wal God garra panishim im blanga detlot nogudbala ting weya imbin dumbat, dumaji God oldei peiyimbek ebribodi blanga wanim dei dumbat.\x + \xo 3:25 \xt Dyud 10:17; Ifi 6:9\x*   
\c 4  
\p
\v 1 Wal ol yumob bos, yumob garra tridim yumob wekinmen olabat raitwei, dumaji yumob sabi yumob garram Bos du deya langa hebin. \x + \xo 4:1 \xt Ifi 6:9\x*   
\p
\v 2 \wj Prayer \wj* Wal ol yumob Kristjan pipul, yumob garra oldei kipgon prei. En wen yumob prei, yumob garra oldei jinggabat gudwei, en yumob garra oldei gibit theingks langa God.  
\v 3 En yumob garra oldei prei blanga mi en main wekinmen olabat du. Yumob garra askimbat God blanga gibit melabat tjens blanga dalimbat det wed blanga Jisas Krais. Nobodi bin sabi det wed bifo Jisas Krais bin kaman en shoum wi. En tudei mi iya langa dijan jeil dumaji mi oldei dalimbat det wed blanga im.   
\p
\v 4 Wal yumob garra askim God blanga album mi dalimbat det gudnyus brabliwei wulijim ola pipul garra sabi, dumaji God wandim mi blanga tok brabliwei lagijat na.   
\p
\v 5-6 En yumob garra oldei jinggabat brabliwei hau yumob oldei tridimbat detlot pipul hu nomo bilib. Yumob nomo wandi weistimbat taim, dumaji yumob garra tok gudbalawei langa detkain pipul blanga meigim olabat jinggabat Jisas Krais, en yumob garra sabi hau blanga gibit olabat det raitwan ensa wen dei askimbat yumob kwestjan.\x + \xo 4:5-6 \xt Ifi 5:16\x*   
\s1 Pol im tok gudbai na  
\p
\v 7-8 Wal ai garra jandim det braja blanga wi neim Titjakas langa yumob. Minbala jidan wekinmen mijamet, en wi ol laigim im brabliwei, en im brabli trubala wekinmen blanga Jisas Krais det Bos blanga wi. En ai garra jandim im langa yumob blanga dalim yumob blanga mi, en im garra dalim yumob ola nyus blanga melabat iya langa dijan pleis weya mi jidan, en im garra album yumob en meigim yumob gudbinji.\x + \xo 4:7-8 \xt Eks 20:4; Ifi 6:21,22; 2 Tim 4:12\x*   
\p
\v 9 Wal ai garra jandim det najawan braja blanga wi neim Onesamas garram Titjakas. Imbin kaman brom yumob, en wi laigim im brabliwei, en wi trastim im du. En dubala garra dalim yumob ebrijing wanim bin hepin iya.\x + \xo 4:9 \xt Fai 1:10-12\x*   
\p
\v 10 Wal det Juwish men neim Aristakas im jidan prisana iya du langa dijan jeil garram mi, en im tok gudei langa yumob. En det najawan Juwish men neim Mak det barnga blanga Banabas im tok gudei langa yumob du. Yumob bin gedim wed olredi blanga welkam Mak if im kamat langa yumob bambai.\x + \xo 4:10 \xt Eks 12:12,25; 13:13; 15:37-39; 19:29; 27:2; Fai 1:24\x*  
\v 11 En det Juwish men neim Joshuwa weya sambala pipul oldei gulum Jastas im tok gudei langa yumob du. Nomo enimo Juwish men wek garram mi dalimbat det gudnyus blanga Jisas Krais det brabliwan King. Oni detlot thribala Juwish men na, en deibin album mi langa ebrijing brabliwei.   
\p
\v 12 Wal det najawan men brom yumob neim Apefras im iya garram mi, en im tok gudei langa yumob du. Im wekinmen blanga Jisas Krais, en im oldei prei blanga yumob brabliwei, en im oldei askimbat God blanga meigim yumob jandap brabli strongbala en jinggabat wanwei en sabi en dum ebrijing God wandim.\x + \xo 4:12 \xt Kalosh 1:7; Fai 1:23\x*  
\v 13 Trubala ai dalim yumob. Aibin luk im oldei adwek blanga yumob pipul deya langa Kalosai, en im oldei adwek blanga ol detlot pipul langa det dubala taun gulum Leiyadasiya en Hiriyapalas du.   
\p
\v 14 Det dokta neim Luk im brabliwan fren blanga wi, en im en det men neim Dimas dubala tok gudei langa yumob du.\x + \xo 4:14 \xt 2 Tim 4:10,11; Fai 1:24\x*   
\p
\v 15 Wal yumob garra tok gudei langa ola Kristjan braja en sista blanga wi deya langa Leiyadasiya, en yumob garra tok gudei langa det gel neim Nimfa en langa ola Kristjan braja en sista olabat hu oldei abumbat miting deya langa im kemp.   
\p
\v 16 Wal afta wen yumob ridim dijan leda deya langa yumob tjetj, yumob garra jandim dijan leda langa det tjetj deya langa Leiyadasiya. Aibin jandim wanbala leda langa olabat du, en afta wen dei ridim det leda, dei garra jandim det leda langa yumob blanga ridim langa yumob tjetj du.   
\p
\v 17 Wal yumob garra dalim Akapas blanga binijim det wek weya Jisas Krais det Bos blanga wi bin gibit im blanga dum.\x + \xo 4:17 \xt Fai 1:2\x*   
\p
\v 18 Wal mi na, Pol, mi tok gudei langa yumob. En garram main ronwan bingga aibin raidimdan dijan laswan wed.  
\p Wal yumob garra jinggabat mi weya mi taidap garram tjein iya langa dijan jeil.  
\p Wal mi askim God blanga jidan brabli kainbala langa yumob.  
\p Binij na.