\id 2CO Kriol Nth Australia 2 Corinthians (46 KR 2 co.txt) sildarwin@sil.org 
\h Sekan Karinthiyans 
\toc3 2 Karin 
\toc2 Sekan Karinthiyans 
\toc1 Sekan Karinthiyans Pol Bin Gibit Ensa Langa Det Tjetjmob Hubin Meigim Trabul Blanga Im 
\mt1 Sekan Karinthiyans  
\mt2 Pol Bin Gibit Ensa Langa Det Tjetjmob Hubin Meigim Trabul Blanga Im  
\ip Pol bin raidimdan dijan leda langa ola Kristjan pipul langa det taun gulum Korinth, dumaji deibin abum loda trabul langa olabat tjetj, en sambala pipul deya bin tok Pol nomo bin speshalwan mishanri. Wal Pol bin raidimdan dijan leda langa olabat blanga shoum olabat trubala im speshalwan mishanri en blanga sodimat detlot trabul blanga olabat en meigim olabat jidan strongbala. \fig |src="HK00170B.TIF" size="col" ref="1:0" \fig*  
\c 1  
\s1 Pol bin raidimdan leda  
\p
\v 1 Orait, mi na Pol, en mi speshalwan mishanri blanga Jisas Krais, dumaji God bin wandim mi blanga jidan speshalwan mishanri. En mi raidimbat dijan leda langa ol yumob Kristjan pipul deya langa det taun gulum Korinth en langa ola pipul blanga God deya langa det kantri gulum Akeiya. En det braja blanga wi neim Timathi im iya garram mi weya mi raidimbat dijan leda.\x + \xo 1:1 \xt Eks 1:1\x*   
\p
\v 2 Wal God det dedi blanga wi en Jisas Krais det Bos blanga wi garra brabli kainbala langa yumob en lukaftumbat yumob en meigim yumob jidan gudbalawei.   
\s1 Pol bin gibit theingks  
\p
\v 3 Wal wi garra gibit theingks langa God det Dedi blanga Jisas Krais det Bos blanga wi. Im na det brabli kainbala Dedi, en im na det God hu oldei album wi. \fig |src="Praise.tif" size="col" ref="1:3" \fig*  
\p Yumob sabi? Nobodi kaan album wi. Oni God na.  
\v 4 En ebritaim wen wi oldei abum trabul, im oldei album wi. En wen enibodi abum trabul, wi garra album im seimwei laik God oldei album wi. \fig Pol bin jandim leda langa najalot taun brom Korinth|src="map 2 Cor 1 Kr.tif" size="col" ref="1:4" \fig*   
\p
\v 5 Yu si? Wibin joinin garram Jisas Krais, en wi garra abum trabul seimwei laik imbin abum. En God garra album wi brabliwei seimwei laik imbin album Jisas.   
\p
\v 6 Wal trubala melabat dalim yumob. Melabat bilib langa Jisas Krais. En blanga tharran na pipul oldei gibit melabat trabul. En melabat abum det trabul wulijim melabat garra album yumob bilib brabliwei wulijim God garra seibum yumob. En im lagijat du wen God oldei album melabat. Im album melabat wulijim melabat garra album yumob go thru langa det trabul weya yumob abum seimwei laik melabat go thru langa det trabul weya melabat abum.   
\p
\v 7 Yu si? Yumob garra abum trabul seimwei laik melabat abum trabul. En melabat sabi yumob garra go thru langa det trabul en nomo slekap, dumaji mi sabi God garra album yumob seimwei laik im oldei album mi.   
\p
\v 8 Wal main braja en sista olabat, melabat wandim yumob garra jinggabat det trabul weya melabat bin abum deya langa det kantri gulum Eisha. Melabat bin abum trabul detmatj, en melabat nomo bin abum ronwan pawa blanga jidan strongbala blanga go thru langa det trabul, en melabat bin reken melabat garra dai.\x + \xo 1:8 \xt 1 Karin 15:32\x*  
\v 9 Trubala melabat bin filim det trabul garra meigim melabat dai. En wen melabat bin abum det filing, aibin sabi melabat nomo garram ronwan pawa blanga go thru langa detkain trabul.  
\p Yu si? Det trabul bin meigim melabat jinggabat God, en melabat bin trastim im blanga album melabat, dumaji im na garram det pawa blanga meigim ded pipul gidap laibala.  
\v 10 En nomeda det trabul bina meigim melabat dai, bat stil God bin seibum melabat brom det trabul. En im garra oldei seibum melabat.  
\p Yumob sabi? Melabat oldei trastim God blanga seibum melabat brom enikain trabul.  
\v 11 En yumob garra album melabat du. Yumob garra prei blanga melabat, dumaji wen loda pipul prei blanga melabat, God garra ensim detlot preya blanga olabat, en im garra gudbinji langa melabat, en afta loda pipul garra gibit theingks langa im.   
\s1 Pol bin jinggabat detlot pipul  
\p
\v 12 Wal melabat brabli gudbinji, dumaji det filing blanga melabat shoum melabat trubala melabat bin oldei jidan gudbalawei jis laik weya God bin wandim melabat blanga jidan. En det filing blanga melabat shoum melabat trubala melabat bin oldei tridim yumob brabli gudbalawei jis laik weya God bin wandim melabat blanga dum. Melabat nomo bin trikim yumob en dum nogudbala ting langa yumob.  
\p Yumob sabi? Melabat nomo bulurrum det wei blanga dijan wel hau pipul oldei jinggabat. Melabat oldei bulurrum det wei blanga God weya im oldei brabli kainbala langa melabat.  
\v 13 En wen melabat raidimbat dijan leda langa yumob, melabat nomo trai en trikim yumob. Melabat raidimbat dijan leda gudbalawei wulijim yumob garra sabi brabliwei wen yumob ridim.   
\p
\v 14 Wal melabat sabi yumob sabi melabat lilbit. Bat melabat wandim yumob garra sabi melabat brabliwei, en wen det laswan dei garra kaman weya melabat garra jandap lida langa Jisas Krais det Bos blanga melabat, yumob garra tok gudbinjiwei blanga melabat seimwei laik melabat garra tok gudbinjiwei blanga yumob.   
\p
\v 15-16 Wal aibin reken yumob garra gudbinji langa mi. En blanga tharran na aibin wandi kaman en luk langa yumob basdam. Bat ai nomo bin duwit.  
\p Yumob sabi? Aibin wandi kaman en luk yumob basdam wen aibin go langa det kantri gulum Mesadoniya, en aibin wandi kaman en luk yumob sekantaim wen aibin kambek brom det kantri, dumaji aibin wandi meigim yumob gudbinji, en afta yumob bina album mi meigim miselp redi blanga go langa det najawan kantri gulum Judiya.\x + \xo 1:15-16 \xt Eks 19:21\x*  
\v 17 Lagijat na aibin wandi dum. En aibin dalim yumob blanga det plen blanga mi. Bat ai nomo bin duwit.  
\p Wal yumob dalim mi na. Wen aibin meigim det plen blanga kaman en luk yumob, yumob reken aibin jis tok eniwei? Nomo, ai nomo bin tok lagijat, dumaji wen mi oldei meigimbat plen, mi nomo oldei jinggabat main ronselp en tok dubalawei.   
\p
\v 18 Yumob sabi? God im oldei tok trubala, en mi oldei tok trubala du. En wen aibin dalim yumob basdam ai garra kaman en luk yumob, ai nomo bin laiya langa yumob. Ai nomo bin tok dubalawei.   
\p
\v 19 Ebrijing weya aibin oldei dalimbat yumob im trubala, dumaji Jisas Krais det San blanga God im trubala. En mi en Sailas en Timathi bin oldei dalimbat yumob blanga im na. En im kaan tok dubalawei. Im oldei tok trubala.\x + \xo 1:19 \xt Eks 18:5\x*   
\p
\v 20 En wi sabi God bin meigim bigmob pramis langa oltestaman taim. En God bin meigim detlot pramis kamat trubala wen Jisas Krais bin kaman. En blanga tharran na wi oldei preisimbat God en tok, “Trubala.”   
\p
\v 21 Oni God na meigim wi jandap strongbala garram Jisas Krais, dumaji im na bin kadimat wi brom det olbalawei en pudum wi langa det nyubalawei,  
\v 22 en imbin makam wi blanga meigim wi blanga im, en imbin gibit wi det Holi Spirit blanga jidan insaid langa wi hat, en det Holi Spirit na det feswan ting weya God bin pramis blanga gibit wi, en det Holi Spirit shoum wi trubala God garra gibit wi ol detlot ting weya imbin pramisim wi.   
\p
\v 23 Wal yumob irrim mi na. Basdam aibin dalim yumob ai garra kaman en luk yumob deya langa Korinth. Bat afta aibin jinggabat na. If mi kaman deya, ai garra meigim ad blanga yumob. Bat ai nomo bin wandi meigim ad blanga yumob. En blanga tharran na ai nomo bin kaman deya. En God sabi dijan trubala mi dalimbat yumob.   
\p
\v 24 Wal mi nomo wandi fosim yumob en dalim yumob hau blanga bilib. Mi wandi wek mijamet garram yumob blanga meigim yumob gudbinji, dumaji mi sabi yumob bilib brabli strongbalawei.   
\c 2  
\p
\v 1 En blanga tharran na aibin jinggabat nomo blanga kaman en luk yumob igin, dumaji ai nomo bin wandi meigim yumob nogudbinji igin.   
\p
\v 2 Yumob sabi? If ai meigim yumob nogudbinji igin, wal nobodi kaan meigim mi gudbinji, dumaji wen yumob jidan nogudbinji, ai garra jidan nogudbinji du.  
\v 3 En blanga tharran na aibin raidimdan det najawan leda langa yumob weya aibin tok streidat langa yumob.  
\p Yu si? Ai nomo bin wandi kaman langa yumob en tok streidat langa yumob miselp, dumaji wen ai bina luk ol detlot nogudbala ting weya yumob bin dumbat, detlot nogudbala ting bina meigim mi nogudbinji brabliwei.  
\p Yumob sabi na? Wen ai kaman en luk yumob, ai wandim yumob garra meigim mi gudbinji, dumaji ai sabi wen mi gudbinji, yumob gudbinji du.  
\v 4 Bat wen aibin raidimdan det leda langa yumob, ai nomo bin gudbinji. Aibin brabli nogudbinji, en aibin wori blanga yumob detmatj, en aibin kraikrai blanga yumob du. Bat ai nomo bin raidimdan det leda blanga meigim yumob nogudbinji. Aibin raidimdan det leda blanga meigim yumob sabi mi laigim yumob detmatj.   
\s1 Yumob garra larramgo yu braja o sista fri  
\p
\v 5 Wal wanbala men deya langa yumob imbin meigim wi holot nogudbinji. Bat ai kaan tok lagijat, dumaji ai nomo wandi meigim ad blanga det men. Lagijat na ai garra tok. Det men nomo bin meigim mi nogudbinji. Imbin meigim yumob lilbit nogudbinji.   
\p
\v 6 Yumob sabi? Ai nomo wandi meigim ad blanga det men, dumaji yumob bin naf panishim im olredi.  
\v 7 En yumob garra larramgo im fri en meigim im gudbinji na, dumaji yumob nomo wandi meigim im nogudbinji detmatj bambai im gowei brom Jisas Krais det Bos blanga wi.\fig |src="AP-11-05.TIF" size="col" ref="2:7" \fig*  
\v 8 En blanga tharran na mi askimbat yumob blanga go langa im en shoum im yumob laigim im brabliwei.   
\p
\v 9 Yu si? Langa det leda weya aibin raidimdan langa yumob, aibin dalim yumob blanga panishim det men. En aibin raidimdan det leda blanga testim yumob blanga faindat if yumob garra duwit langa mi. En yumob bin duwit langa mi.   
\p
\v 10 Wal ai dalim yumob na. Yumob garra larramgo det men fri na. En wen yumob larramgo im fri, mi larramgo im fri du. Bat aibin olredi larramgo im fri. En aibin larramgo im fri lida langa Jisas Krais, dumaji ai wandi meigim yumob ol jidan gudbinji mijamet.  
\v 11 En ai wandim yumob garra jidan lagijat, dumaji wi sabi det plen blanga Seitin, en wi nomo wandim im garra bidim wi.   
\s1 Det gudnyus im jis laiga gudsmelwan medisin  
\p
\v 12 Wal yumob irrim mi na. Wen aibin go langa det taun gulum Trowes blanga dalimbat det gudnyus blanga Jisas Krais langa ola pipul deya, aibin faindat Jisas Krais det Bos blanga wi bin meigim ebrijing redi blanga mi blanga dum det wek.  
\v 13 Bat aibin wori blanga yumob detmatj, dumaji ai nomo bin faindim Taidas deya garram nyus brom yumob. En aibin sei gudbai langa detlot pipul deya langa Trowes, en aibin go langa det kantri gulum Mesadoniya.\x + \xo 2:13 \xt Eks 20:1\x*   
\p
\v 14-15 Wal nomeda wi abum loda wori, bat stil wi garra gibit theingks langa God, dumaji imbin joinimap wi langa Jisas Krais, en im oldei meigim wi win garram im, en God oldei yusum wi blanga meigim det gudnyus blanga Jisas Krais go ebriweya, en wen wi spredimat det gudnyus, wi jis laiga gudsmel, en det gudnyus im jis laiga gudsmelwan medisin.  
\v 16 En langa detlot pipul weya God garra seibum olabat, det gudnyus im jis laiga gudsmelwan medisin weya meigim olabat gudbala. Bat det gudnyus im jis laiga brabli nogudwan smel langa detlot najalot pipul, dumaji dei nomo bilib langa det gudnyus. En tharran na garra meigim olabat dai.  
\p Wal yumob dalim mi na. Hu garram det pawa blanga spredimat det gudnyus? Nobodi.   
\p
\v 17 Yumob sabi? Loda pipul yusum det wed blanga God jis laik detlot enijing weya dei selim langa shop blanga meigimbat mani. Bat dei nomo garram det pawa blanga spredimat det gudnyus. Bat mi nomo seim laik olabat, dumaji God na bin jandim mi. En mi oldei tok trubalawei lida langa im, dumaji mi wekinmen blanga Jisas Krais.   
\c 3  
\s1 Wekinmen blanga det nyubala lowa  
\p
\v 1 Wal wen melabat tok God na bin jandim melabat, maitbi yumob reken melabat tok praudbalawei blanga melabat ronselp. Bat najing. Melabat nomo reken miselp.\fig |src="HK00153B.TIF" size="col" ref="3:1" \fig*  
\p Bat sambala pipul reken miselp olabat mishanri. En olabat oldei wandim leda brom yumob blanga bekimap olabat, en olabat oldei garrimapbat det leda redi blanga shoum langa enibodi blanga meigim im sabi geman olabat mishanri. Bat melabat nomo wandim detkain leda, dumaji yumob na det leda blanga melabat.   
\p
\v 2 Yumob sabi? Ebribodi gin luk yumob bilib langa Jisas Krais, en tharran na meigim olabat sabi melabat mishanri brabli. Lagijat na yumob jis laiga leda blanga melabat. En melabat nomo garrimap det leda atsaidwei langa bingga. Melabat garrimap det leda insaidwei langa melabat hat.   
\p
\v 3 Yumob sabi? Jisas Krais na bin raidimdan det leda blanga melabat, dumaji im na bin tjeinjim yumob laif thru det wek weya melabat bin dum. En im nomo bin raidimdan det leda garram ink. Imbin raidimdan det leda garram det Holi Spirit blanga det laibalawan God. En im nomo bin raidimdan det leda langa ston. Imbin raidimdan det leda langa yumob hat.\x + \xo 3:3 \xt Eksa 24:12; Jera 31:33; Isik 11:19; 36:26\x*   
\p
\v 4 Wal melabat gin tok langa yumob lagijat, dumaji melabat sabi trubala God bin gibit melabat det pawa thru Jisas Krais blanga dum det wek blanga im.   
\p
\v 5 Yumob sabi wanim melabat toktok? Melabat kaan reken miselp en tok melabat gin dum det wek miselp, dumaji melabat nomo garram ronwan pawa blanga dum det wek. Nomo. Melabat bin gedim det pawa brom God.   
\p
\v 6 Yu si? God na bin gibit melabat det pawa blanga spredimat det nyubala lowa blanga im. Det olbala lowa im det lowa weya God bin gibit langa Mosis langa ston. En nomeda ola pipul bin bulurrum det lowa, bat stil det lowa nomo bin abum pawa blanga meigim olabat jidan laibala. Bat det nyubala lowa im det wei blanga det Holi Spirit. En wen enibodi bulurrum det nyubalawei, det Holi Spirit meigim im jidan laibala brabliwei.\x + \xo 3:6 \xt Jera 31:31\x*   
\p
\v 7 Wal wi sabi God bin raidimdan det olbala lowa langa ston basdam, en wen imbin gibit det olbala lowa langa Mosis, det lait blanga God bin shain langa im, en nomeda det lait bin goweigowei brom Mosis slobala, bat stil detlot Isreil pipul nomo bin oldei luk langa det feis blanga im. En nomeda ola pipul bin oldei dai wen deibin trai en bulurrum det lowa, bat stil imbin gudwan lowa.\x + \xo 3:7 \xt Eksa 34:29\x*  
\v 8 Bat det wei blanga det Holi Spirit im brabli gudwan.   
\p
\v 9 Yumob sabi? Det olbala lowa weya bin oldei meigim pipul dai bin gudwan lowa. Bat det nyubala lowa weya meigim pipul jidan raitwei langa God im mobeda lowa.   
\p
\v 10 Yu si? Det olbala lowa bin jidan gudwan lowa. Bat det nyubala lowa jidan brabli gudwan lowa. En det nyubala lowa mobeda langa det olbala lowa.   
\p
\v 11 Yumob sabi? Nomeda det olbala lowa bin jidan haibala, bat stil det olbala lowa nomo bin jidan longtaim. En det nyubala lowa garra jidan haibalawan na, dumaji det nyubala lowa jidan olagijawan.   
\p
\v 12 Wal wen melabat oldei dalimbat pipul blanga det gudnyus blanga Jisas Krais, melabat oldei tok strongbalawei nomo garram sheim, dumaji melabat sabi det nyubala lowa jidan olagijawan.  
\v 13 Ai nomo dum seimwei laik Mosis bin dum. Imbin gaburrumap miselp feis garram heinggitjif wulijim detlot Isreil pipul kaan luk det lait goweigowei.\x + \xo 3:13 \xt Eksa 34:33 \x*   
\p
\v 14-15 Yu si? Imbin jis laik sambodi bin jadimap det main blanga detlot Isreil pipul. En tudei wen dei irrim det olbala lowa, dei stil jadimap olabat main. Oni wanwei dei gin opinim olabat main en sabi God. Dei garra joinimap miselp langa Jisas Krais det Bos blanga wi.  
\v 16 En wen enibodi gibit miselp langa im, det Holi Spirit oldei opinim det main blanga im. Wi sabi tharran, dumaji langa oltestaman im tok blanga Mosis lagijat. Im tok, “Wen imbin oldei go en tok langa det Bos, imbin oldei deigimat det heinggitjif.”\x + \xo 3:16 \xt Eksa 34:34\x*   
\p
\v 17 Wal dijan wed weya melabat dalimbat yumob im tok blanga det Holi Spirit blanga Jisas Krais det Bos blanga wi. En wen det Holi Spirit jidan langa enibodi, im meigim im jidan fri.   
\p
\v 18 Yumob sabi na? Wi sabi hu Jisas Krais, dumaji det Holi Spirit bin opinim det main blanga wi, en imbin meigim wi sabi. En det Holi Spirit jidan Bos blanga wi, en lilbitlilbit ebridei im tjeinjimbat wi blanga meigim wi jidan seimwei laik Jisas Krais mowa en mowa ebridei.   
\c 4  
\s1 Det lait weya shain insaid langa wi hat  
\p
\v 1 Wal melabat nomo oldei nogudbinji en gibap, dumaji God oldei kain langa melabat, en im na bin gibit melabat dijan wek blanga dum.  
\v 2 En melabat bin gibit bekboun langa ol detlot nogudbala ting weya pipul oldei dumbat snikinwei. En melabat nomo tenimran det wed blanga God en dalimbat laiya en trikimbat pipul. Nomo. Melabat dalimbat olabat det trubala wed blanga God streidat, en lagijat na lida langa God mi tok blanga det filing blanga ebribodi. En tharran na meigim olabat sabi brabliwei melabat mishanri.   
\p
\v 3 Wal nomeda melabat oldei dalimbat det wed blanga God streidat, bat stil sambala pipul reken det wed im nomo kliya langa olabat. Bat det wed im nomo kliya oni langa detlot pipul hu garra go langa det helfaiya.  
\v 4 Detlot pipul na nomo bilib langa det wed, dumaji Seitin det nogudbala bos blanga dijan wel bin meigim olabat blainwan langa olabat main, en dei kaan luk det lait weya det gudnyus meigim shain langa olabat.  
\p Yumob sabi? Det gudnyus na dalimbat olabat hu Jisas Krais. En langa Jisas Krais na wi luk God, dumaji im na shoum wi God.  
\v 5 En wen melabat toktok langa yumob, melabat nomo dalimbat yumob blanga melabat ronselp. Melabat dalimbat yumob blanga Jisas Krais, en melabat dalim yumob im na det Bos blanga ebribodi, en melabat jidan mishanri blanga im blanga album yumob.   
\p
\v 6 Wal yumob jinggabat na. Longtaim God bin tok, “Larram lait kamat en shain brom det dakbala.” En lagijat gin imbin meigim det lait blanga im shain insaid langa wi hat, en det lait bin meigim wi sabi God brabliwei, dumaji wen wi sabi Jisas Krais, wi sabi God.\x + \xo 4:6 \xt Jen 1:3\x*\fig |src="HK00151B.TIF" size="col" ref="4:6" \fig*   
\p
\v 7 Wal det gudnyus weya melabat garram insaid langa melabat hat im brabli gudwan ting. En nomeda melabat rabishwan, bat stil God bin gibit melabat det gudnyus. En tharran na shoum melabat det brabli strongwan pawa weya melabat abum, im nomo blanga melabat ronwan pawa. Im blanga God ronwan pawa.   
\p
\v 8 Yumob sabi? Melabat oldei abum trabul. Bat det trabul kaan smeshimap melabat. En nomeda samtaim melabat nomo sabi wanim blanga dum, bat stil melabat kaan gibap.  
\v 9 En nomeda melabat oldei abum loda bedfren, bat stil melabat oldei abum gudfren. En nomeda loda pipul oldei ardim melabat, bat stil dei kaan kilim melabat ded.   
\p
\v 10 Yu si? Pipul oldei gibit melabat adtaim seimwei laik deibin gibit langa Jisas wen deibin meigim im dai. En melabat abum det trabul wulijim ola pipul garra sabi det pawa blanga Jisas Krais na nomo larram olabat kilim melabat ded.  
\v 11 Olataim pipul meigim melabat gulijap dai dumaji melabat bulurrum Jisas Krais. En melabat abum det trabul wulijim ola pipul garra sabi Jisas Krais na meigim melabat jidan laibala.   
\p
\v 12 Yumob sabi na? Wen melabat dumbat det wek blanga Jisas Krais, melabat abumbat olkain trabul weya meigim melabat gulijap dai. Bat seimtaim wen melabat abum det trabul, det wek weya melabat dumbat meigim yumob jidan strongbala garram det laif weya Jisas Krais bin gibit yumob.   
\p
\v 13 Yumob sabi? Langa oltestaman im tok, “Aibin dalimbat, dumaji ai bilib.” En seimwei du melabat oldei dalimbat det gudnyus langa ola pipul, dumaji melabat bilib langa det gudnyus,\x + \xo 4:13 \xt Saam 116:10\x*  
\v 14 en melabat sabi God bin meigim Jisas Krais det Bos blanga wi gidap laibala brom dedbala, en melabat sabi im garra meigim melabat gidap laibala brom dedbala du, en im garra meigim melabat jidan lida langa im garram Jisas Krais mijamet garram yumob.   
\p
\v 15 Yumob sabi na? Melabat oldei abum olkain trabul blanga album yumob, en melabat oldei abum det trabul wulijim det gudnyus garra spredat mowa en mowa, en God garra brabli kainbala langa mowa en mowa pipul, wulijim mowa en mowa pipul garra gibit theingks langa God en preisim im.   
\s1 God garra gibit wi nyubala bodi  
\p
\v 16 Wal ai dalim yumob. Blanga tharran na wen wi abumbat trabul, wi nomo nogudbinji en gibap.   
\p
\v 17 Wi bodi go wikbala brom detlot trabul weya wi oldei abumbat. Bat insaidwei wi go mowa strongbala brabliwei ebridei.  
\p Yumob sabi? Detlot trabul weya wi abum dei nomo enijing, en dei kaan kipgon olagijawan. Bat det brabliwan laif garra jidan olagijawan, en wi garram det laif, en wi sabi det laif im brabli haibala langa detlot trabul.  
\v 18 En blanga tharran na wi nomo oldei jinggabat detlot trabul. Wi oldei jinggabat detlot ting weya God garra gibit wi. Nomeda wi kaan luk detlot ting garram wi ai dubala, bat stil wi oldei jinggabat detlot ting, dumaji wi sabi detlot ting weya wi luk garram wi ai dubala kaan jidan longtaim. Bat detlot ting weya wi kaan luk garram wi ai dubala garra jidan olagijawan.   
\c 5  
\p
\v 1 Yu si? Dijan bodi weya wi garram iya langa dijan wel im jis laiga tent weya wi jidan insaid. En wi sabi wen God garra pulumdan dijan tent, im garra gibit wi nyubala bodi deya langa hebin jis laiga haus blanga jidan insaid. Nobodi bin meigim det haus blanga wi. Oni God bin meigim. En det haus garra jidan olagijawan.  
\v 2 En wen wi oldei jinggabat detmatj, wi wandim det haus brom hebin. Nomo dijan tent brom dijan wel.  
\p Yumob sabi? Wi wandim God garra gibit wi det nyubala olagijawan bodi, en im garra meigim wi werrimon det nyubala bodi jis laik wi werrimon nyubala klos.   
\p
\v 3-4 Yu si? Wen wi jidan iya langa dijan wel garram dijan olbala bodi, wi oldei abum brabli nogudbala filing insaid langa wi, dumaji dijan olbala bodi blanga wi oldei abum loda trabul. En det filing blanga wi oldei wandim wi blanga tjakidawei dijan olbala bodi blanga wi jis laik wi tjakidawei olwan klos. Bat wi nomo wandi deigimat en tjakidawei ola olwan klos en jidan neigidbala. Nomo. Wi wandi werrimon nyuwan klos. En seimwei wi nomo wandi tjakidawei det olbala bodi en jidan nomo garram bodi. Wi wandi jidan garram det nyubala bodi, dumaji wi wandim det olagijawan laif garra deigim pleis blanga det olbala bodi weya garra binij.   
\p
\v 5 Wal God na bin meigim wi jidan redi blanga tjeinjim wi, en imbin gibit wi det Holi Spirit blanga im blanga shoum wi trubala im garra tjeinjim wi en gibit wi det olagijawan laif.  
\v 6 En blanga tharran na wi jidan strongbala. Bat wi sabi wen wi jidan langa dijan bodi iya langa dijan wel, wi nomo jidan gulijap langa Jisas Krais det Bos blanga wi. Wi jidan longwei brom im, dumaji im jidan deya langa hebin wansaid langa im dedi.  
\v 7 En nomeda wi kaan luk im garram wi ai dubala, bat stil wi bilib langa im. Lagijat na wi jidan langa dijan laif.  
\v 8 En wi jidan strongbala du.  
\p Bat ai dalim yumob. Ai wandi libum dijan bodi iya langa dijan wel en go en jidan garram Jisas Krais det Bos blanga wi.  
\v 9 Tharran na garra meigim mi gudbinji. Bat ai kaan meigim miselp gudbinji. Ai garra meigim det Bos blanga wi gudbinji. Nomeda wujan bodi mi jidan, bat stil ai garra meigim im gudbinji, dumaji ebribodi garra jandap lida langa im bambai,  
\v 10 en im garra jadjim ebribodi, en im garra peiyimbek ebribodi blanga ola nogudbala ting weya deibin dumbat langa dijan laif, en im garra peiyimbek ebribodi blanga ola gudbala ting weya deibin dumbat langa dijan laif du.\x + \xo 5:10 \xt Rom 14:10\x*   
\s1 Wi jidan fren blanga God  
\p
\v 11 Wal ai sabi hau blanga bradin langa God. En blanga tharran na mi oldei trai en meigim najalot pipul sabi im du.  
\p Wal God im sabi mi brabliwei. En mi wandim yumob garra sabi mi brabliwei du, en mi wandim yumob garra abum det raitwan filing blanga mi du.   
\p
\v 12 Yumob sabi wanim mi toktok? Sambala pipul reken mi nomo mishanri. Bat olabat luk oni atsaidwei. Dei nomo luk langa mi insaidwei.  
\p Wal yumob sabi mi brabliwan mishanri. En wen mi tok mi brabliwan mishanri, mi nomo reken miselp blanga meigim yumob laigim mi blanga main ronselp. Nomo. Mi trai en meigim yumob sabi mi brabliwei wulijim yumob garra abum det raitwan ensa blanga gibit langa detlot pipul hu reken mi nomo mishanri.   
\p
\v 13 Yumob sabi? Sambala pipul reken mi medwan. Bat ai kaan jinggabat olabat, dumaji mi dum det wek blanga God. En sambala pipul reken mi garram gudwan main. Bat ai kaan jinggabat olabat, dumaji mi dum det wek blanga album yumob.   
\p
\v 14 Yu si? Mi dumbat det wek dumaji Jisas Krais laigim mi, en ai sabi imbin dai blanga ebribodi, en ola pipul hu bilib langa im bin joinin langa im weya imbin dai.  
\v 15 En ai sabi imbin dai blanga wi wulijim wi kaan jidan blanga wi ronselp. Wi garra jidan blanga im, dumaji im na bin dai blanga wi, en imbin gidap laibala brom dedbala blanga album wi.   
\p
\v 16 Wal basdam wen wi nomo bin bilib langa Jisas Krais, wibin oldei jinggabat im eniwei. Bat wi nomo jinggabat im nogudbalawei na, dumaji wi bilib langa im na, en wi sabi hu im. En seimwei wi kaan jinggabat enibodi eniwei.  
\v 17 Wi garra jinggabat pipul gudbalawei, dumaji wen enibodi joinap garram Jisas Krais, im jidan nyuwan, en det olbalawei blanga im gowei, en det nyubalawei kaman.  
\v 18 Bat im nomo tjeinjim miselp. God na tjeinjim im.  
\p Yumob sabi? Basdam aibin jidan bedfren blanga God. Bat thru Jisas Krais imbin tjeinjim mi, en imbin meigim mi fren blanga im, en imbin gibit mi det wek blanga kipgon meigimbat ola pipul jidan fren blanga im du.  
\v 19 En mi oldei dalimbat olabat God wandi meigim ebribodi jidan fren blanga im thru Jisas Krais, en mi dalimbat olabat wen dei bilib langa Jisas Krais, God kaan bukumdan ol detlot nogudbala ting weya deibin dumbat. Tharran na det wed weya God bin gibit langa mi blanga dalimbat ebribodi.   
\p
\v 20 Wal mi jis laiga mesinja blanga Jisas Krais, en wen mi tok langa yumob, im jis laik God imselp askimbat yumob thru mi. En mi askim yumob blanga Jisas Krais blanga larram God tjeinjim yumob en meigim yumob jidan fren blanga im.   
\p
\v 21 Yumob sabi? Jisas Krais nomo bin dum eni nogudbala ting. Bat God bin wandi album wi, en imbin meigim im jidan jis laiga sekrifais ofring blanga ola nogudbala ting weya wibin dumbat, en blanga tharran na thru Jisas Krais wi gin jidan raitwei langa God.   
\c 6  
\p
\v 1 Wal God bin meigim mi mishanri blanga im, en mi wek mijamet garram im.  
\p En ai dalim yumob. God bin brabli kainbala langa yumob. En blanga tharran na mi askimbat yumob nomo blanga slekbek en gibap.   
\p
\v 2 Wal yumob jinggabat det wed langa oltestaman weya im tok, “Wen imbin taim blanga God blanga kain langa yumob, imbin irrim yumob. En wen imbin taim blanga im blanga seibum yumob, imbin album yumob.” Lagijat na im tok langa oltestaman.  
\p En ai dalim yumob. Tudei na God wandi kain langa yumob. En tudei na im wandi seibum yumob.\x + \xo 6:2 \xt Aisai 49:8\x*   
\s1 Ola adtaim weya mishanri bin abum  
\p
\v 3 Wal mi nomo oldei dum enijing blanga blokim det wei blanga enibodi weya im wandi bulurrum Jisas Krais, dumaji mi nomo wandim enibodi garra faindim folt langa det wek main.  
\v 4 En blanga tharran na mi oldei shoum ebribodi mi jidan wekinmen blanga God.   
\p
\v 5 Yumob sabi? Pipul bin oldei fait langa mi en beldim mi en pudum mi langa jeil. En aibin oldei abum detmatj wek blanga dum en nomo naf taim blanga silip en nomo naf daga blanga dagat. Bat aibin oldei go thru langa ol detlot trabul gudwei. En tharran na shoum ola pipul mi wekinmen blanga God.\x + \xo 6:5 \xt Eks 16:23\x*   
\p
\v 6-7 Wal ai nomo bin oldei dum nogudbala ting. Aibin oldei kain langa pipul. Nomeda detlot pipul nomo bin kain langa mi, bat stil aibin kain langa olabat, en aibin laigim olabat brabliwei. En ai sabi det wed blanga God trubalawei, en mi oldei tok trubalawei du, en mi garram det Holi Spirit, en mi garram det pawa blanga God. Ol detlot ting na shoum ola pipul mi wekinmen blanga God.  
\p Wal ai nomo fait langa pipul. Ai fait langa Seitin. Bat ai nomo fait langa im garram naif en spiya. Ai fait langa im garram ol detlot ting weya God gibit langa mi.  
\p Yumob sabi wanim mi toktok? Mi oldei jidan raitwei langa God, en God im oldei album mi. Lagijat na mi fait langa Seitin.   
\p
\v 8 Yu si? Sambala pipul meigim mi haibala, en sambala pipul meigim mi lobala. Sambala pipul tok nogudbalawei blanga mi, en sambala pipul tok gudbalawei blanga mi. En nomeda sambala pipul reken mi laiyawan, bat stil mi oldei tok trubalawei.  
\v 9 En nomeda sambala pipul reken dei nomo sabi mi, bat stil ebribodi sabi mi. En nomeda aibin abum detmatj trabul weya bina meigim mi dai, bat stil mi jidan laibala. En nomeda pipul bin panishim mi detmatj, bat stil nobodi bin kilim mi ded.  
\v 10 En nomeda aibin oldei nogudbinji, bat stil aibin oldei gudbinji. En nomeda mi oldei jidan powan nomo garram eni mani, bat stil mi oldei meigim loda pipul jidan ritjwan langa det wei blanga God. En nomeda mi nomo garram enijing langa dijan wel, bat stil mi garram detmatj enijing weya God bin gibit mi.   
\p
\v 11 Wal main fren olabat deya langa Korinth, aibin tok streidat langa yumob brom main hat.  
\v 12 Ai nomo bin jadimap main hat langa yumob. Bat yumob na bin jadimap yumob hat langa mi.  
\v 13 En mi dalim yumob jis laik yumob jidan main ronwan biginini olabat. Yumob garra abum det seimwan filing laik mi, en yumob garra opinim yumob hat langa mi.   
\s1 Wi kaan miksimap gudbala en nogudbala  
\p
\v 14 Wal yumob jinggabat na. Lait en dakbala kaan jidan seimtaim. En seimwei lagijat du yumob kaan go en miksimap miselp garram detlot pipul hu nomo laigim Jisas Krais, dumaji gudbala en nogudbala kaan jidan wanbala.   
\p
\v 15 Yumob sabi? Jisas Krais en Seitin det brabliwan laiyinbala kaan jidan fren gija. En detlot pipul hu bilib langa Jisas Krais kaan abum seimwan main laik detlot pipul hu nomo bilib langa im.  
\v 16 En det seikridwan pleis blanga God kaan jidan garram detlot drimin.  
\p Wal yumob jinggabat na. Wi na det seikridwan pleis blanga det laibalawan God, dumaji weya God jidan, tharran na det seikridwan pleis blanga im. En langa oltestaman im tok, “God im jidan garram im pipul olabat, en im jidan God blanga olabat, en olabat jidan pipul blanga im.”\x + \xo 6:16 \xt Labid 26:12; Isik 37:27; 1 Karin 3:16; 6:19\x*  
\v 17 En blanga tharran na God det Bos blanga wi bin tok wi garra gowei brom detlot pipul hu nomo blanga im pipul. Wi garra kadimat miselp brom olabat, en wi kaan joinin langa enijing weya nomo gudwan. En God bin tok im garra gudbinji langa wi,\x + \xo 6:17 \xt Aisai 52:11\x*  
\v 18 en im garra jidan dedi blanga wi, en wi garra jidan san en doda blanga im.\x + \xo 6:18 \xt 2 Sem 7:14; 1 Kran 17:13; Aisai 43:6; Jera 31:9\x*   
\c 7  
\p
\v 1 Wal main gudfren olabat, wen God bin tok detlot wed, imbin pramisim detlot wed langa wi. En blanga tharran na wi garra meigim miselp klinbala en nomo bulurrumbat detlot nogudbala ting weya meigim wi nogud insaidwei en atsaidwei. En wi garra trai en jidan brabli gudbalawei nomo garram enijing rong, dumaji wi garra rispek God brabliwei.   
\s1 Pol bin gudbinji blanga detlot pipul  
\p
\v 2 Wal yumob garra opinim yumob hat langa mi, dumaji ai nomo bin dum nogudbala ting langa enibodi, en ai nomo bin meigim enibodi jidan nogudbala, en ai nomo bin trikimbat enibodi blanga gajimbat enijing brom olabat.   
\p
\v 3 Wal ai nomo tok lagijat blanga pudum bleim langa yumob. Nomo. Aibin dalim yumob bifo, en ai garra dalim yumob igin. Ai laigim yumob brabliwei, en wi ol jidan wanbala. En nomeda maitbi ai garra dai weya mi dum det wek, bat stil ai garram det gudwan filing blanga yumob.   
\p
\v 4 Wal ai trastim yumob brabliwei, en mi oldei tok gudbinjiwei blanga yumob. En nomeda mi abumbat loda trabul, bat stil yumob oldei meigim mi strongbala, en mi brabli gudbinji.   
\p
\v 5 Yumob sabi? Wen aibin go langa det kantri gulum Mesadoniya, aibin abum detmatj trabul brom detlot pipul hu nomo bilib langa det gudnyus, en aibin wori blanga yumob detmatj du.\x + \xo 7:5 \xt 2 Karin 2:13\x*  
\v 6 Bat God oldei album detlot pipul hu wori miselp, en imbin album mi du, en wen Taidas bin kaman deya langa mi brom yumob, God bin meigim mi strongbala.   
\p
\v 7 Wen aibin luk Taidas, aibin gudbinji. En wen imbin dalim mi yumob bin meigim im gudbinji, det wed bin meigim mi brabli gudbinji. En imbin dalim mi yumob bin nogudbinji blanga ol detlot nogudbala filing weya yumob bin abum blanga mi basdam, en imbin dalim mi yumob bin wandi luk mi, en yumob bin oldei tok gudbalawei blanga mi. En tharran na meigim mi gudbinji brabliwei.   
\p
\v 8 Wal nomeda det najawan leda weya aibin jandim langa yumob bin meigim yumob nogudbinji, bat stil mi nomo sori aibin jandim det leda. Basdam aibin sori, dumaji aibin irrim det leda bin meigim yumob nogudbinji.  
\v 9 Bat wen aibin meigim yumob nogudbinji, yumob bin tjeinjim det nogudbalawei blanga yumob. En tharran na meigim mi gudbinji. En yumob gudbinji du.  
\p Yu si? Ai nomo bin ardim yumob, dumaji God bin yusum det leda weya bin meigim yumob nogudbinji blanga meigim yumob tjeinjim det nogudbalawei blanga yumob.   
\p
\v 10 Yumob sabi? Wen enibodi jidan nogudbinji blanga ola nogudbala ting weya imbin dumbat, en im tjeinjim det nogudbalawei blanga im, wal God garra seibum im. En tharran na meigim im gudbinji. Bat wen im jidan nogudbinji eniwei, en im nomo tjeinjim det nogudbalawei blanga im, wal det nogudbinji garra meigim im dai.   
\p
\v 11 Yu si? Det leda bin meigim yumob nogudbinji. Bat God bin yusum det leda blanga tjeinjim yumob, en imbin meigim yumob jinggabat, en imbin meigim yumob wandi jidan nomo garram enijing rong.  
\p Yumob sabi? Det leda bin meigim yumob abum det gudwan filing blanga mi, en yumob wandi luk mi na. Bat yumob nomo wandim mi blanga kaman langa yumob nogudbinjiwei. En det leda bin meigim yumob jinggabat det men hubin dum det nogudbala ting weya bin meigim det trabul kaman langa yumob. En yumob bin gitwail langa det men, en yumob bin streitinimap im.  
\p Wal ai sabi na yumob bin album miselp streitinimap det trabul, en yumob nomo garram enijing rong langa yumob na.   
\p
\v 12 Yu si? Ai nomo bin jandim det leda langa yumob oni blanga meigim yumob streitinimap det men hubin dum det nogudbala ting. En ai nomo bin jandim det leda langa yumob oni blanga meigim yumob jinggabat det sambodi weya det men bin dum det nogudbala ting. Nomo. Aibin jandim det leda langa yumob blanga gibit yumob tjens blanga shoum God yumob rispek mi.  
\v 13-14 En yumob bin meigim mi brabli gudbinji, dumaji yumob bin shoum ebribodi yumob rispek mi brabliwei.  
\p Wal basdam wen aibin jandim Taidas langa yumob, aibin tok brabli gudbinjiwei blanga yumob, en aibin dalim im yumob garra album im. En yumob nomo bin meigim mi sheim, dumaji yumob bin album im gudbalawei. En wen imbin kambek langa mi, aibin luk imbin gudbinji. En imbin meigim mi gudbinji, dumaji yumob bin meigim im gudbinji.  
\p Yu si? Aibin oldei tok trubalawei langa yumob, en seimwei det wed weya aibin tok langa Taidas blanga yumob bin trubala.  
\v 15 En wen imbin kaman langa yumob deya langa Korinth, yumob bin redi blanga duwit langa im, en yumob bin welkam im, en yumob bin teiknodis langa im brabliwei.   
\p
\v 16 Wal mi brabli gudbinji na, dumaji ai gin trastim yumob brabliwei na.   
\c 8  
\s1 Wi garra gibitbat mani gudbinjiwei  
\p
\v 1 Wal main braja en sista olabat, God bin brabli kainbala langa ol detlot bilibamob langa det kantri gulum Mesadoniya, en ai wandim yumob garra sabi hau imbin wek langa olabat laif.  
\v 2 Nomeda loda trabul bin testimbat olabat adbalawei, bat stil deibin brabli gudbinji. En nomeda dei nomo bin abum enijing, bat stil deibin gudbinji blanga gibit loda mani blanga album olabat Kristjan braja en sista deya langa det najawan kantri gulum Judiya.   
\p
\v 3 Trubala ai dalim yumob. Deibin gibit mani detmatj. En deibin gibit det mani gudbinjiwei du.  
\v 4 Nomeda deibin brabli powan, bat stil deibin kipgon askimbat mi blanga larram olabat joinin en album detlot Judiya pipul.\x + \xo 8:4 \xt Rom 15:26\x*   
\p
\v 5 Wal ai dalim yumob. Aibin reken oni lilbit dei garra gibit. Bat dei nomo bin gibit oni mani. Deibin gibit miselp langa Jisas Krais det Bos blanga wi du. En afta deibin meigim miselp wekinmen blanga album mi jis laik God bin wandim olabat blanga dum.   
\p
\v 6 Wal wen Taidas bin kaman langa yumob deya langa Korinth, yumob bin stat gibitbat mani blanga album detlot Judiya pipul du. En aibin dalim Taidas blanga kipgon albumbat yumob boksimap detlot mani, dumaji det mani im jis laiga speshalwan ofring weya yumob garra gibit blanga album detlot Judiya pipul, en tharran na garra shoum olabat yumob laigim olabat.   
\p
\v 7 Wal ai wandim yumob garra gibit det mani, dumaji im brabli gudbala ting blanga dum. En ai sabi yumob oldei dumbat gudbala ting, dumaji yumob bilib langa Jisas Krais brabliwei, en yumob garram det pawa blanga dalimbat det trubala wed brabliwei, en yumob garram det pawa blanga sabi ebrijing du, en yumob garram det raitwan filing blanga dum ebrijing brabliwei. En yumob laigim mi brabliwei du.   
\p
\v 8 Wal mi nomo fosim yumob blanga gibit det mani. Bat aibin dalim yumob blanga detlot pipul langa Mesadoniya hubin brabli gudbinji blanga gibitbat mani, dumaji ai wandi trai en faindat if yumob laigim detlot Juda pipul seimwei laik detlot Mesadoniya pipul laigim olabat.   
\p
\v 9 Yu si? Jisas Krais det Bos blanga wi bin brabli kainbala langa wi. Nomeda imbin brabli ritjwan wen imbin jidan langa hebin, bat stil imbin meigim miselp powan wen imbin godan langa dijan wel blanga album wi.  
\p Yumob sabi? Imbin meigim miselp powan wulijim wi garra jidan ritjwan garram im pawa.   
\p
\v 10 Wal ai dalim yumob na. Yumob na det feswan hubin wandi gibitbat det mani. En lasyiya yumob bin stat gibitbat det mani bifo ebribodi. Bat yumob bin stap hafwei. En ai reken im mobeda blanga yumob blanga kipgon gibitbat det mani.   
\p
\v 11 Wal yumob garra binijimap dijan wek weya yumob bin stadimof. Yumob bin brabli gudbinji blanga dum. En yumob garra brabli gudbinji blanga binijimap wanim yumob bin wandi dum.  
\p Yumob sabi? If yumob garram bigmob mani, wal yumob garra gibit bigmob mani. En if yumob garram lilbit mani, wal yumob garra gibit lilbit mani.  
\v 12 En if yumob gibit det mani gudbinjiwei, wal God garra gudbinji blanga det ofring weya yumob gibit im. Nomeda yumob nomo garram bigmob mani blanga gibit im, bat stil im garra gudbinji langa yumob, dumaji im sabi yumob nomo garram bigmob mani.   
\p
\v 13 Wal wen mi dalim yumob blanga gibitbat mani, mi nomo trai en meigim ad blanga yumob en isi blanga najalot pipul. Nomo. Mi trai en meigim lebul blanga ebribodi.   
\p
\v 14 Yumob sabi? Yumob garra album detlot pipul hu nomo garram enijing, dumaji tudei yumob garram bigmob. Bat bambai wen yumob nomo garram enijing, en detlot pipul garram bigmob mani, wal olabat garra album yumob. Lagijat na ola bilibamob garra jidan lebul.   
\p
\v 15 Yu si? Jis laik im tok langa oltestaman, “Detlot pipul hubin gajim blendibala daga nomo bin abum eni leftobawan daga, en detlot pipul hubin gajim lilbit daga nomo bin shot blanga daga.”\x + \xo 8:15 \xt Eksa 16:18\x*   
\s1 Taidas en dubala braja  
\p
\v 16 Wal ai gibit theingks langa God, dumaji imbin meigim Taidas wandi album yumob brabliwei seimwei laik mi oldei wandi album yumob.  
\v 17 En wen aibin askim Taidas blanga gobek igin en album yumob deya langa Korinth, imbin gudbinji blanga go, en ai nomo bin fosim im blanga go, dumaji im go garram im ron filing.   
\p
\v 18 Wal ai garra jandim det najawan braja blanga wi garram Taidas. Ola bilibamob langa ebri tjetj ebriweya rispek det braja, dumaji im oldei dalimbat det gudnyus brabliwei,  
\v 19 en ola bilibamob bin pikimat im, en deibin dalim im blanga kaman garram mi en detlot najalot braja wen melabat deigim det mani langa Judiya, en melabat garra gibitatbat det mani blanga shoum rispek langa Jisas Krais det Bos blanga wi en blanga shoum detlot Judiya pipul melabat wandi album olabat.   
\p
\v 20 Wal loda pipul bin gibit bigmob mani blanga dijan ofring, en melabat garra hendulum det mani brabli gudbalawei, dumaji melabat nomo wandim enibodi garra agamin blanga det mani,  
\v 21 en melabat garra meiksho melabat hendulum det mani raitwei. Nomo oni langa Jisas Krais det Boswan weya im lukinat langa melabat. Bat langa ol detlot pipul weya dei lukinat langa melabat du.\x + \xo 8:21 \xt Prab 3:4\x*   
\p
\v 22 Wal ai garra jandim najawan braja blanga wi garram Taidas dubala. Aibin testimbat im blendi taim, en aibin oldei faindim im oldei gudbinji brabliwei blanga album mi. En im brabli wandi go langa yumob, dumaji im sabi yumob garra dum wanim God wandim yumob blanga dum.   
\p
\v 23 Wal yumob sabi minbala Taidas jidan gudfren gija en minbala oldei wek mijamet blanga album yumob. Bat det dubala braja weya garra go garram im, dubala oldei wek blanga detlot najalot tjetj, en dubala oldei meigim ola pipul preisimbat Jisas Krais.   
\p
\v 24 Wal wen Taidas en det dubala braja kamat langa yumob, yumob garra shoum olabat yumob laigim olabat, en ola najalot bilibamob garra luk trubala yumob laigim olabat, en dei garra sabi wen aibin tok gudbinjiwei blanga yumob, aibin tok trubalawei.   
\c 9  
\s1 Wi garra gibit ofring gudbinjiwei  
\p
\v 1 Wal ai kaan raidimbat enimo wed langa yumob blanga dalim yumob blanga det mani weya ola bilibamob garra boksimap blanga album detlot braja en sista blanga wi langa Juda, dumaji olredi yumob sabi blanga det mani,  
\v 2 en ai sabi yumob wandi gibitbat mani blanga album olabat, en aibin dalim ola bilibamob langa det kantri gulum Mesadoniya blanga yumob. Aibin tok, “Ola braja en sista blanga wi langa det kantri gulum Akeiya bin redi brom lasyiya blanga gibitbat mani blanga album detlot bilibamob langa Juda.” Lagijat na aibin oldei tok gudbinjiwei blanga yumob. En wen deibin irrim det nyus blanga yumob, det nyus bin meigim olabat wandi gibitbat mani du.   
\p
\v 3 Wal mi jandim Taidas en det dubala braja blanga wi langa yumob na, dumaji ai nomo wandim yumob garra tenimran det wed weya aibin tok blanga yumob en meigim det wed laiyawan.   
\p
\v 4 Yumob sabi? Ai wandim yumob garra redi blanga gibitbat det mani jis laik weya aibin tok, dumaji sambala braja blanga wi brom Mesadoniya maitbi garra kaman garram mi wen ai garra go deya langa yumob, en if dei luk yumob nomo redi blanga gibitbat det mani, wal im garra meigim mi sheim, dumaji aibin reken trubala yumob bin redi blanga gibitbat det mani. En if yumob kaan gibitbat det mani, im garra meigim yumob sheim du.   
\p
\v 5 Wal blanga tharran na aibin jinggabat blanga askimbat Taidas en det dubala braja blanga wi blanga go lida langa mi en boksimap det mani redi blanga gibit weya yumob bin pramis blanga gibit. Lagijat na yumob garra abum bigmob mani redi, en yumob garra gibit det mani yumob ronselp gudbinjiwei, dumaji wen ai garra kaman langa yumob, if yumob nomo abum det mani redi, wal ai garra fosim yumob blanga gibit det mani, en ai garra meigim yumob nogudbinji.   
\p
\v 6 Wal yumob jinggabat na. Det mani im jis laiga sid daga. En wen enibodi plentim lilbit sid, im growimap lilbit daga. Bat wen im plentim bigmob sid, im growimap bigmob daga.\fig |src="DN00470b.tif" size="col" ref="9:6" \fig*   
\p
\v 7 Yu si? Ebribodi garra jinggabat langa im ronselp haumatj mani im garra gibit. Im kaan larram enibodi fosim im blanga gibit det mani. Im garra gibit det mani gudbinjiwei, dumaji God laigim detlot pipul wen dei gibit ofring gudbinjiwei.  
\v 8 En seimtaim God oldei gibit wi ebrijing weya wi wandim wulijim wi garra abum naf blanga dumbat ola gudbala ting weya im wandim wi blanga dum.  
\v 9 En wi garra yusum detlot ebrijing weya im gibit wi blanga dum gudbala ting langa pipul, dumaji langa oltestaman im tok, “Gudbala pipul oldei gibit enijing langa detlot pipul hu nomo garram enijing, en dei oldei tridim olabat raitwei olataim.” Lagijat na im tok langa oltestaman.\x + \xo 9:9 \xt Saam 112:9\x*   
\p
\v 10 Yumob sabi na? God na oldei gibit wi det sid blanga plentim en det daga blanga dagat. En im garra gibit yumob detmatj enijing du wulijim yumob garra abum bigmob mani blanga album detlot braja en sista blanga wi langa Judiya en tridim olabat raitwei.\x + \xo 9:10 \xt Aisai 55:10\x*  
\v 11 Im garra meigim yumob brabli ritjwan garram loda mani wulijim yumob garra oldei album najalot pipul brabliwei olataim, en loda pipul deya langa Judiya garra gibit theingks langa God blanga det mani weya yumob garra gibit olabat thru langa mi.   
\p
\v 12 Yu si? Wen yumob gibit mani blanga album God pipul olabat, yumob nomo oni album olabat. Yumob meigim olabat gibit theingks langa God brabliwei du.  
\v 13 En wen yumob gibit det mani blanga album detlot bilibamob langa Juda, det mani shoum olabat trubala yumob bilib langa Jisas Krais det Bos blanga wi brabliwei, en loda pipul garra preisimbat God, dumaji yumob tok yumob bilib langa det gudnyus blanga Jisas Krais en seimtaim yumob duwit langa im, en dei garra preisimbat God blanga wanim yumob bin dum blanga albumbat olabat en ola najalot pipul weya yumob albumbat olabat du.  
\v 14 En nomo oni tharran. Detlot Judiya pipul garra abum filing blanga yumob du, en dei garra prei blanga yumob, dumaji God bin brabli kainbalawan langa yumob weya imbin meigim yumob abum det filing blanga olabat.   
\p
\v 15 Wal wi garra gibit theingks langa God blanga Jisas Krais det san blanga im weya imbin gibit langa wi, dumaji im na mowa haibala langa enijing weya wi gibit.   
\c 10  
\s1 God garra meigim wi haibala blanga dum im wek  
\p
\v 1 Wal yumob irrim mi na, dumaji ai garra tok blanga main ronselp na. Sambala pipul reken wen mi deya garram yumob, mi brabli isiwan langa yumob, en dei reken wen mi longwei brom yumob, mi brabli ad langa yumob. Bat ai dalim yumob. Jisas Krais im kainbala, en im isiwan.  
\v 2 En blanga tharran na mi askimbat yumob nomo blanga fosim mi blanga tok rafwei langa yumob wen mi kaman langa yumob, dumaji ai sabi ai gin hendulum detlot pipul hu reken mi bulurrum det wei blanga dijan wel.   
\p
\v 3 Wal trubala mi jidan langa dijan wel. Bat mi nomo bulurrum det wei blanga dijan wel en fait seimwei laik ola pipul langa dijan wel oldei fait.  
\v 4 Mi nomo yusum detlot ting weya dei oldei yusum blanga fait langa dijan wel. Mi oldei yusum det pawa blanga God blanga fait langa det enami weya blandim miselp langa brabli strongbala pleis, en mi oldei bidim det enami.  
\v 5 Bat det enami nomo pipul. Mi fait langa laiyawan wed, en mi oldei bidim detlot laiyawan wed, en mi oldei tjakidawei ola praudbala wed weya stapam pipul brom sabi God, en mi oldei go shotkat langa detlot nogudbala wed weya pipul jinggabat, en mi oldei tenimran detlot wed blanga meigim olabat duwit langa det wed blanga Jisas Krais.   
\p
\v 6 Yumob sabi wanim mi toktok? Wen yumob shoum miselp yumob sabi hau blanga bulurrum Jisas Krais brabliwei, wal brom det taim na mi redi blanga streitinimap enibodi brom yumob hu nomo duwit langa Jisas Krais.   
\p
\v 7 Bat yumob nomo sabi hau blanga bulurrum Jisas Krais brabliwei yet, dumaji yumob oldei lukinatbat ebrijing atsaidwei. Ai sabi tharran, dumaji sambala pipul deya reken olabat blanga Jisas Krais en seimtaim dei reken mi nomo blanga im. Bat dei garra jinggabat adbala, dumaji mi blanga Jisas Krais seimwei laik olabat blanga im.   
\p
\v 8 Wal Jisas Krais det Bos blanga wi bin gibit mi pawa blanga meigim yumob jandap strongbala. Im nomo bin gibit mi det pawa blanga meigim yumob wikwan. En nomeda mi tok praudbalawei blanga det pawa, bat stil mi nomo sheim blanga tok praudbalawei, dumaji dijan wed weya mi dalim yumob im trubala.  
\v 9 Ai garram pawa brom God. Bat wen mi tok streidat langa yumob langa detlot leda weya mi jandim langa yumob, ai nomo wandim yumob garra reken mi trai en bradinim yumob.   
\p
\v 10 Yumob sabi? Sambala pipul deya oldei tok, “Wen Pol jandim leda langa wi, im oldei tok brabli rafwei en strongbalawei langa det leda. Bat wen im iya garram wi, im oldei jandap wikwan, en det wed blanga im wikwan du.” Lagijat na sambala pipul oldei tok.  
\v 11 Bat detlot pipul garra jinggabat, dumaji wen mi kaman langa yumob, ai garra dum wanim aibin dalim yumob ai garra dum langa det leda weya aibin raidimdan langa yumob wen aibin longwei brom yumob.   
\p
\v 12 Wal sambala pipul deya reken miselp olabat haibala. Bat olabat brabli granggibala, dumaji dei oni luk langa olabat ronselp. Dei nomo luk langa najalot pipul. Im jis laik dei meigim olabat ronwei blanga meshurum miselp en faindat hau haibala olabat.  
\p Wal ai dalim yumob. Ai kaan dum detkain ting en joinin langa detlot pipul en meshurumbat miselp en meigim miselp haibala.  
\v 13 En nomeda mi oldei tok praudbalawei, bat stil mi nomo tok praudbalawei blanga ebrijing. Oni blanga det wek weya God bin gibit mi blanga dum. En imbin gibit mi det wek blanga dum garram yumob du.   
\p
\v 14 Yu si? Wen mi tok strongbalawei langa yumob, ai nomo reken miselp haibala, dumaji God na bin gibit mi det wek blanga bajimap det gudnyus blanga Jisas Krais langa yumob.   
\p
\v 15 Yumob sabi? Mi nomo pudum miselp langa detlot najalot pipul wek en tok praudbalawei blanga olabat wek weya God bin gibit olabat. Nomo. Ai wandi kipgon dumbat dijan wek garram yumob en meigim yumob bilib brabli strongbalawei, en lagijat na det wek blanga main garra kipgon gro mowa en mowa garram yumob,  
\v 16 en afta ai gin go en dalimbat det gudnyus blanga Jisas Krais langa ola pipul langa detlot kantri weya nobodi bin deigim det gudnyus bifo. En wen ai go langa detlot kantri, ai kaan tok praudbalawei blanga miselp blanga det wek weya sambodi bin dum langa ola najalot kantri.  
\v 17 En ai kaan tok praudbalawei blanga det wek weya mi dum miselp du, dumaji langa oltestaman im tok, “If enibodi wandi tok praudbalawei, wal im garra tok praudbalawei blanga God.”\x + \xo 10:17 \xt Jera 9:24\x*   
\p
\v 18 Yumob sabi? God nomo gudbinji langa detlot pipul hu reken olabat haibala. Nomo. Im gudbinji langa detlot pipul weya Jisas Krais det Bos blanga wi meigim olabat haibala.   
\c 11  
\s1 Trubala speshalwan mishanri en laiyawan speshalwan mishanri  
\p
\v 1 Wal ai garra meigim miselp haibala na, en ai garra tok praudbalawei. En yumob garra kipgon irrimbat mi.   
\p
\v 2 Wal yumob jinggabat na. Yumob jis laiga yanggel weya nomo bin silip garram enibodi, en mi na bin pramisim yumob langa wanbala men, en det men na Jisas Krais. En blanga tharran na God nomo wandim yumob blanga laigim enibodi. En ai nomo wandim yumob blanga laigim enibodi du.   
\p
\v 3 Yumob sabi? Seitin bin trikim det gel neim Ib garram laiyawan wed, en imbin deigidawei im. En mi bradin maitbi im garra meigim yumob jinggabat rongwei en deigidawei yumob en meigim yumob nomo laigim Jisas Krais en nomo bulurrum im.\x + \xo 11:3 \xt Jen 3:1-5,13\x*   
\p
\v 4 Yumob sabi wanim mi toktok? Wen enibodi kaman langa yumob en tok laiyawan wed blanga difrinwan Jisas brom det Jisas weya aibin dalimbat yumob, wal yumob oldei gudbinji langa im. En wen enibodi kaman langa yumob en wandi gibit yumob difrinwan spirit brom det Holi Spirit weya yumob bin gedim, wal yumob oldei gudbinji langa im du. En wen enibodi kaman langa yumob garram difrinwan gudnyus brom det gudnyus weya yumob bin bilib, wal yumob oldei gudbinji langa im du.   
\p
\v 5 Yu si? Geman yumob garram olkain haibala speshalwan mishanri. Bat ai reken mi nomo lobala langa olabat.  
\v 6 En nomeda loda pipul reken mi nomo sabi toktok, bat stil ai sabi ebrijing. En wen aibin deya garram yumob, aibin shoum yumob trubala mi sabi ebrijing. Olkain aibin shoum yumob.   
\p
\v 7 Wal yumob jinggabat na. Wen aibin dalimbat yumob det gudnyus blanga God, ai nomo bin meigim yumob gibit mi mani. Aibin meigim miselp lobala blanga meigim yumob haibala.  
\p Wal yumob dalim mi na? Aibin dum nogudbala ting tharran? Nomo. Aibin dum gudbala ting.   
\p
\v 8 Yu si? Wen aibin wek deya garram yumob, ai nomo bin gajimbat mani brom yumob. Ola najalot tjetj bin gibit mi mani, en aibin gajim det mani brom olabat blanga album yumob.  
\v 9 En wen aibin wandim enijing, ai nomo bin gibit yumob adtaim. Detlot braja en sista blanga wi hubin kaman brom Mesadoniya bin gibit mi ebrijing aibin wandim. Lagijat na aibin dum wen aibin deya garram yumob. En ai garra kipgon dum lagijat du, dumaji ai nomo wandi meigim ad blanga yumob.\x + \xo 11:9 \xt Falip 4:15-18\x*  
\v 10 En ai garra toktok praudbalawei blanga tharran. En nobodi kaan meigim mi fosim enibodi iya langa dijan kantri Akeiya blanga gibit mi mani. En Jisas Krais na sabi mi tok trubalawei.   
\p
\v 11 Wal wotfo ai nomo bin meigim yumob gibit mi mani? Dumaji mi nomo laigim yumob? Nomo. Dumaji mi laigim yumob. En God sabi mi laigim yumob.   
\p
\v 12 Wal ai kaan gajimbat mani brom yumob seimwei laik detlot laiyawan speshalwan mishanri oldei gajimbat, dumaji ai nomo wandim yumob blanga reken olabat dum det wek seimwei laik mi dum.  
\v 13 En ai nomo wandi gibit tjens langa olabat blanga tok praudbalawei, dumaji olabat nomo trubala speshalwan mishanri. Olabat gemanwan, en dei dalimbat laiya blanga olabat wek, en dei meigim miselp luk jis laiga trubalawan speshalwan mishanri blanga Jisas Krais.   
\p
\v 14 Wal wi kaan hatjamp blanga tharran, dumaji Seitin du gin tenim miselp en meigim miselp luk jis laiga einjul.  
\v 15 En if im meigim miselp luk jis laiga einjul, wal wi sabi im wekinmen olabat garra meigim miselp luk jis laiga wekinmen blanga det gudbalawei. Bat bambai God garra peiyimbek olabat blanga detlot nogudbala ting weya dei dumbat.   
\s1 Ola trabul weya Pol bin abum  
\p
\v 16 Wal wanmo ai dalim yumob. Ai nomo wandim enibodi garra irrim mi tok praudbalawei en reken mi granggibala. Bat if enibodi reken mi granggibala, wal im rait, dumaji ai garra meigim miselp granggibala en tok praudbalawei.  
\v 17 Bat wen mi tok praudbalawei, mi nomo toktok hau Jisas Krais det Bos blanga wi wandim mi blanga tok. Nomo. Mi tok granggibalawei, dumaji mi reken miselp.   
\p
\v 18 Wal ai nomo wandi tok lagijat. Bat loda pipul deya langa yumob oldei toktok praudbalawei eniwei. En blanga tharran na maitbi ai garra tok praudbalawei langa yumob du.  
\v 19 Nomeda yumob reken yumob brabli klebabala, bat stil yumob oldei gudbinji langa granggibala. En blanga tharran na ai garra tok granggibalawei wulijim yumob garra lisin langa mi.   
\p
\v 20 Yumob sabi? Yumob oldei gudbinji langa detlot pipul hu meigim miselp bos blanga yumob, en yumob oldei gudbinji langa detlot pipul hu trikim yumob en pulumat yumob enijing, en yumob oldei gudbinji langa detlot pipul hu meigim miselp haibala langa yumob, en yumob oldei gudbinji langa detlot pipul hu oldei mokimbat yumob.   
\p
\v 21 Wal geman mi sheim blanga dalim yumob dijan. Bat wen aibin deya garram yumob, ai nomo bin tridim yumob adbalawei lagijat, dumaji aibin wikwan. Bat ai sabi ai garra tok praudbalawei langa yumob. Nomeda mi granggibala blanga tok lagijat, bat stil ai garra tok praudbalawei seimwei laik detlot pipul hu reken miselp mishanri blanga yumob.   
\p
\v 22 Wal yumob dalim mi na? Detlot pipul brom det Hibru traib? Wal mi brom det Hibru traib du. En detlot pipul Juwish pipul? Wal mi Juwish men du. En detlot pipul blanga Eibrahem biginini? Wal mi blanga Eibrahem biginini du.  
\v 23 En detlot pipul wekinmen blanga Jisas Krais? Wal mi wekinmen blanga Jisas Krais du. En ai garra tok brabli granggibalawei na. Mi mobedawan wekinmen, dumaji aibin wek brabli adbala, en deibin tjakam mi langa jeil lodataim, en deibin beldim mi garram wip lodataim, en aibin gulijap dai lodataim du.\x + \xo 11:23 \xt Eks 16:23\x*  
\v 24 Faibala taim detlot Juwish pipul bin beldim mi garram wip brabli adbalawei,\x + \xo 11:24 \xt Dyud 25:3\x*  
\v 25 en thritaim detlot Roman pipul bin beldim mi garram wadi, en wantaim sambala pipul bin stonim mi, en thritaim bout bin draun garram mi, en wantaim aibin langa solwoda brom ailibala raidap neksdei.\x + \xo 11:25 \xt Eks 14:19; 16:22\x*   
\p
\v 26 En wen aibin oldei trebul, aibin oldei abum trabul langa fladwoda en brom stilinbala en brom main ron Juwish kantrimen olabat en brom Jintail pipul du. Nomeda weya aibin oldei go, bat stil aibin oldei abum trabul langa taun en langa bush kantri en langa solwoda. En aibin abum trabul brom laiyawan bilibamob du.\x + \xo 11:26 \xt Eks 9:23; 14:5\x*  
\v 27 Aibin oldei adwek en swetgidap, en lodataim ai nomo bin abum taim blanga silip. En lodataim aibin jidan hanggri en thesti, dumaji ai nomo bin abum eni daga blanga dagat en woda blanga dringgim. En lodataim aibin jidan kolbala, dumaji ai nomo bin abum eni klos blanga werrimon blanga meigim miselp wombala.   
\p
\v 28-29 Ol detkain trabul na aibin oldei abum. En ebridei aibin oldei wori miselp nomo lilbit blanga detlot bilibamob langa ebri kantri, dumaji wen detlot bilibamob jidan wikwan, mi abum det seimwan filing en mi jidan wikwan du. En wen enibodi deigidawei detlot bilibamob en meigim olabat dumbat nogudbala ting, im meigim mi fil brabli nogud insaid.   
\p
\v 30 Wal ai dalim yumob. If ai garra tok praudbalawei, wal ai garra tok praudbalawei blanga detlot ting weya shoum mi detmatj mi jidan wikwan.   
\p
\v 31-33 Yumob sabi? Wen Eretas bin jidan king, det gabman bos blanga det taun gulum Dameskas bin jandim blijiman blanga blokim ola geit blanga det taun blanga gajulum mi. Bat sambodi bin pudumdan mi garram baskit snikinwei thru langa windo biyain langa det taun, en aibin gidawei. Trubala imbin hepin langa mi lagijat. En God det dedi blanga Jisas Krais det Bos blanga wi sabi mi nomo dalimbat yumob laiya. Oni im na wi garra preisimbat olagijawan.\x + \xo 11:31-33 \xt Eks 9:23-25\x*\fig |src="LB00333B.TIF" size="col" ref="11:31-33" \fig*   
\c 12  
\s1 Pol bin abum speshalwan drim  
\p
\v 1 Wal ai garra kipgon toktok praudbalawei langa yumob, dumaji yumob wandim mi blanga tok lagijat. En nomeda det praudbalawei kaan album enibodi, bat stil ai garra dalim yumob blanga sambala speshalwan drim weya Jisas Krais det Bos blanga wi bin shoum.   
\p
\v 2-3 Wal ai sabi wanbala men hubin bilib langa Jisas Krais, en ai garra tok praudbalawei blanga det men, dumaji 14 yiya taim God bin deigim im raidap langa top langa hebin langa det brabli gudbala kantri. Bat ai nomo sabi if imbin deigim im garram im bodi o garram im spirit. Oni God sabi.  
\v 4 Bat ai sabi wen imbin deya, det men bin irrim loda ting. Bat im nomo bin lau dalimbat enibodi blanga detlot ting weya imbin irrim.   
\p
\v 5 Wal mi na det men. Bat ai nomo bin wandi gulum main neim, dumaji ai nomo bin wandi tok praudbalawei blanga main ronselp en reken miselp mi strongbala. Bat ai gin tok praudbalawei lagijat weya mi jidan wikwan.   
\p
\v 6 Yuwai. Ai gin tok praudbalawei blanga main ronselp. En wen mi tok praudbalawei lagijat, mi nomo tok laiyawei jis laiga granggibala. Mi tok trubalawei. Bat ai kaan tok praudbalawei lagijat blanga main ronselp, dumaji ai nomo wandi dalimbat pipul blanga meigim olabat jinggabat mi haibala. Ai wandim olabat blanga luk det wek weya mi dumbat en irrim detlot wed weya mi dalim olabat, en brom detlot ting na weya mi dumbat ai wandim olabat blanga jinggabat mi raitwei.   
\p
\v 7 Wal God bin shoum mi olkain bigbala ting langa detlot speshalwan drim weya imbin gibit mi, en detlot ting bina meigim mi reken miselp en tok praudbalawei. Bat God bin gibit mi siknis blanga stapam mi brom reken miselp, en det siknis bin jis laiga mesinja brom Seitin weya bin oldei meigim mi brabli nogudbinji.   
\p
\v 8 Wal thritaim aibin prei en askim Jisas Krais det Bos blanga wi blanga deigidawei det siknis brom mi.  
\v 9 En imbin dalim mi im kaan deigidawei det siknis brom main bodi, dumaji imbin tok, “Mi oldei jidan brabli kainbala langa yu, en tharran naf blanga yu, dumaji wen yu jidan wikwan, det pawa blanga main jidan strongwan.” Lagijat na imbin tok langa mi.  
\p Wal mi brabli gudbinji blanga tok praudbalawei blanga main ronselp weya mi jidan wikwan, dumaji wen mi jidan wikwan, det taim na det pawa blanga Jisas Krais jidan garram mi.   
\p
\v 10 Yumob sabi? Pipul oldei gibitbat mi trabul dumaji mi dumbat det wek blanga Jisas Krais, en dei oldei gibitbat mi adtaim blanga det wek blanga im, en dei oldei tok nogudbalawei blanga mi, en dei oldei meigim mi jidan wikwan du. Bat nomeda mi oldei abum detkain trabul, bat stil mi oldei gudbinji, dumaji wen mi jidan wikwan garram main ronwan pawa, det taim na mi jidan strongbala garram det pawa blanga God.   
\s1 Pol bin wori blanga detlot pipul  
\p
\v 11 Wal mi brabli granggibala, dumaji aibin toktok praudbalawei iya langa dijan leda. Bat yumob na bin meigim mi tok lagijat, dumaji yumob na bina dalim ola pipul mi na det trubalawan mishanri. Bat yumob nomo bin dalim olabat.  
\p Wal ai dalim yumob. Mi nomo lobala langa detlot laiyawan speshalwan mishanri weya yumob oldei tok olabat haibala. Nomeda sambala pipul tok mi nomo sabi enijing, bat stil mi haibala langa detlot laiyawan mishanri.   
\p
\v 12 Yumob sabi? Wen aibin deya garram yumob, aibin meigim sikbala pipul gudbala en leimbala pipul wok. Olkain klebabala ting lagijat na aibin dum garram det pawa blanga God. En detlot ting na bin shoum yumob trubala mi speshalwan mishanri. En nomeda aibin abum loda trabul, bat stil aibin kipgon dumbat detlot ting.   
\p
\v 13 Bat yumob nomo bin jinggabat tharran. Yumob bin jinggabat oni wan ting. Ai nomo bin fosim yumob blanga peiyim mi eni mani. En blanga tharran na yumob reken ai nomo bin tridim yumob gudbalawei seimwei laik aibin tridim ola najalot bilibamob. Yumob reken aibin tridim yumob rafwei.  
\p Wal mi askim yumob blanga larramgo mi fri brom det nogudbala ting weya yumob reken aibin dum langa yumob.   
\p
\v 14 Wal yumob irrim mi na. Aibin deya garram yumob tutaim, en mi redi blanga kaman en luk yumob igin. En wen ai kaman deya, ai kaan fosim yumob blanga peiyim mi eni mani, dumaji ai nomo wandim yumob garra gibit mi enijing. Oni wan ting ai wandim. Ai wandim yumob.  
\p Yumob sabi? Yumob kaan peiyim mi eni mani, dumaji yumob jis laik main ronwan biginini olabat. En wi sabi ola biginini kaan peiyim olabat mami en dedi blanga lukaftumbat olabat. Nomo. Ola mami en dedi garra lukaftumbat olabat biginini eniwei.   
\p
\v 15 Wal mi brabli gudbinji blanga weistim ola enijing main blanga album yumob. En mi gudbinji blanga weistim main ron laif blanga yumob du.  
\p Yumob sabi? Ai kaan meigim yumob peiyim mi mani, dumaji mi laigim yumob detmatj. En tharran na bin meigim yumob laigim mi lilbit. Bat if ai bina laigim yumob lilbit en meigim yumob peiyim mi mani, wal yumob bina laigim mi detmatj.   
\p
\v 16 Wal ai nomo bin meigim ad blanga yumob. Bat sambala pipul tok aibin brabli klebabala, en aibin trikim yumob garram laiyinbala wed.   
\p
\v 17 Wal yumob dalim mi na. Hau aibin trikim yumob en gajimbat loda enijing brom yumob? Aibin trikim yumob en gajimbat enijing wen aibin jandim detlot wekinmen deya langa yumob? Nomo. Ai nomo bin trikim yumob en gajimbat enijing.   
\p
\v 18 Wal yumob dalim mi na. Basdam wen aibin jandim Taidas en det najawan braja blanga wi langa yumob, Taidas bin trikim yumob en gajimbat enijing brom yumob? Nomo. Im nomo bin trikim yumob en gajimbat enijing, dumaji minbala garram det seimwan filing blanga yumob, en minbala dum ebrijing seimwei du.   
\p
\v 19 Wal maitbi yumob oldei jinggabat mi trai en meigim miselp kliya brom detlot ting weya aibin dumbat. Bat mi nomo trai en meigim miselp kliya langa yumob. Nomo. Mi tok wanim Jisas Krais wandim mi blanga tok lida langa God.  
\p En main gudfren olabat, ebrijing weya mi dumbat, mi dum blanga album yumob en meigim yumob strongbala.   
\p
\v 20 Bat mi wori blanga yumob, dumaji wen ai kaman deya, maitbi ai garra faindim yumob jidan difrinwei brom hau ai wandim yumob garra jidan. En if ai faindim yumob jidan difrinwei, wal maitbi yumob garra faindim mi jidan difrinwei brom hau yumob bin wandim mi blanga jidan du.  
\p Yumob sabi? Mi wori blanga yumob, dumaji maitbi ai garra faindim yumob agamin gija en jelasbat en gulajambap en gitwail en toktok nogudbalawei en spredimatbat yan en reken miselp en nomo teiknodis langa enibodi.   
\p
\v 21 Ai sabi bigmob brom yumob bin dum olkain nogudbala ting weya olabat bodi bin wandim olabat blanga dum. Ai sabi olabat bin silipsilipbat garram enibodi en dumbat olkain nogudbala ting lagijat. En mi wori blanga yumob, dumaji wen ai garra kaman deya, God garra meigim mi brabli sheim, en ai garra brabli nogudbinji blanga ol detlot nogudbala ting weya yumob bin dumbat basdam, dumaji yumob nomo bin libum det olbalawei, en yumob kipgon dumbat ol detlot nogudbala ting.   
\c 13  
\s1 Yu garra testim miselp basdam  
\p
\v 1 \fig |src="HK00237B.TIF" size="col" ref="13:1" \fig*Wal aibin kaman en luk yumob tutaim olredi, en wen ai garra kaman igin, ai wandim yumob garra jinggabat det wed langa oltestaman weya im tok, “Wen enibodi wandi pudum bleim langa im braja o sista blanga nogudbala ting weya imbin dum, im garra abum 2 o 3 pipul hubin luk imbin dum det nogudbala ting blanga bekimap im weya im pudum bleim langa im braja o sista.”\x + \xo 13:1 \xt Dyud 17:6; 19:15\x*   
\p
\v 2 Wal wen aibin deya garram yumob det sekantaim, aibin dalim yumob dijan. En ai garra dalim yumob wanmo. Wen ai garra kaman langa yumob igin, ai garra gibit adtaim langa detlot pipul hubin kipgon dumbat nogudbala ting brom longtaim, en ai garra gibit adtaim langa detlot najalot pipul hubin kipgon dumbat nogudbala ting brom det taim wen aibin deya garram yumob.   
\p
\v 3 Yumob sabi? Yumob wandim pruf blanga shoum yumob Jisas Krais bin pikimat mi blanga dalimbat yumob blanga im. En wen mi kaman langa yumob, ai garra streitinimap yumob. En tharran na garra shoum yumob trubala Jisas Krais bin pikimat mi blanga dalimbat yumob blanga im, dumaji im na garra streitinimap yumob. En im nomo wikwan. Nomo. Im shoum yumob det pawa blanga im.  
\v 4 Nomeda imbin wikwan wen deibin kilim im ded deya langa det kros, bat stil imbin gidap laibala garram det pawa blanga God. En wen wi joinap garram im, wi jidan wikwan seimwei laik imbin jidan wikwan. Bat wen mi dum det wek, mi dum det wek garram det pawa blanga God, dumaji mi jidan garram im.   
\p
\v 5 Maitbi yumob nomo sabi? Jisas Krais jidan insaid langa yumob. Bat yumob garra testim yumob ronselp en faindat if yumob rili bilib langa im. En if enibodi faindat im nomo rili bilib, wal Jisas Krais nomo jidan insaid langa im.   
\p
\v 6 Wal ai wandim yumob garra sabi mi garram Jisas Krais insaid langa mi.  
\v 7 \fig |src="prayer.tif" size="col" ref="13:7" \fig*En mi oldei prei langa God blanga yumob, dumaji ai nomo wandim yumob blanga dum eni nogudbala ting. Bat ai nomo prei blanga yumob blanga meigim pipul tok mi gudbala mishanri. Nomo. Mi prei blanga yumob blanga meigim yumob kipgon dumbat gudbala ting. Nomeda pipul tok mi nomo gudbala mishanri, bat stil mi oldei prei blanga yumob wulijim yumob garra jidan strongbala.   
\p
\v 8 Yu si? Mi nomo jinggabat main ronselp. Mi oldei jinggabat yumob, dumaji ai kaan dum enijing weya garra rabishim det trubala wed blanga God. Ebrijing weya mi dum garra bekimap det wed blanga God.   
\p
\v 9 Yumob sabi na? Mi gudbinji wen mi jidan wikwan en yumob jidan strongwan. En mi oldei askim God blanga meigim yumob jidan brabli strongbala nomo garram enijing rong.   
\p
\v 10 Yu si? Blanga tharran na aibin raidimdan dijan leda langa yumob wen ai nomo bin deya garram yumob, dumaji wen ai garra kaman deya langa yumob, ai nomo wandi tok adbalawei langa yumob garram det pawa weya Jisas Krais det Bos blanga wi bin gibit mi, dumaji im nomo bin gibit mi det pawa blanga meigim yumob jidan wikwan. Imbin gibit mi det pawa blanga meigim yumob jidan strongbala.   
\s1 Pol bin tok gudbai  
\p
\v 11 Wal main braja en sista olabat, ai garra tok gudbai langa yumob na. Bat yumob garra trai en jidan nomo garram enijing rong, en yumob garra lisin langa det wed weya aibin dalim yumob, en yumob garra jidan mijamet garram seimwan main, en yumob garra jidan gudbalawei garram yumob braja en sista olabat. En God hu oldei laigim wi en hu oldei meigim wi jidan gudbalawei garra jidan garram yumob.   
\p
\v 12 Wal yumob garra tok gudei langa ola Kristjan pipul deya blanga yumob. En ola Kristjan pipul blanga wi iya tok gudei langa yumob du.   
\p
\v 13-14 Wal mi askim Jisas Krais det Bos blanga wi blanga jidan brabli kainbala langa yumob, en mi askim God blanga shoum yumob im laigim yumob, en mi askim det Holi Spirit blanga jidan mijamet garram yumob du.  
\p Binij na.