\id 2CH KRIOL 2 Chronicles (14 KR 2ch.txt) sildarwin@sil.org 
\h Sekan Kranakuls 
\toc3 2 Kran 
\toc2 Sekan Kranakuls 
\toc1 Sekan Kranakuls Ola Stori Blanga Ola King Blanga Juda 
\mt1 Sekan Kranakuls  
\mt2 Ola Stori Blanga Ola King Blanga Juda  
\ip Wal langa dijan stori King Salaman bin bildimap det speshalwan Serramoni Pleis blanga God. Wen King Salaman bin dai im san bin jidan king, bat tenbala klen brom nowathwei bin pikimat najawan king en deibin gulum det nowathwan kantri Isreil. Det naja dubala klen langa sauthwei bin gulum olabat kantri Juda. Ol detlot stori iya na blanga detlot king blanga Juda en Isreil raidap langa detlot enamimob weya deibin deigimwei ola Isreil en Juda pipul prisana. Bambai det king brom Pesha neim Sairas bin larram detlot Juda pipul gobek langa Jerusalem blanga bildimbek det taun igin.  
\c 1  
\s1 King Salaman bin prei  
\r Fes Kings 3:1-15  
\p
\v 1 Wal Salaman det san blanga Deibid bin jidan nyuwan king blanga Isreil, en YAWEI det trubala God blanga im bin album im jidan brabli strongbala. \fig |src="2Chron Banner.tif" size="span" ref="1:0" \fig*   
\p
\v 2 Wal King Salaman bin gibit oda langa ola boswan solja hubin jidan bos blanga 1,000 men, en ola bos blanga 100 men, ola gabman bos en ola lida blanga ola difrinwan femili en ola najalot pipul.  
\v 3 Imbin gibit oda langa olabat blanga go garram im en weshipbat langa YAWEI deya langa im seikridwan tent weya Mosis bin pudumap langa det pleis gulum Gibiyan.  
\v 4 Wal det Seikridwan Boks bin jidan langa Jerusalem insaid langa det tent weya King Deibid bin pudumap. Imbin bringimap det Seikridwan Boks brom det taun gulum Kiriyajerim.\x + \xo 1:4 \xt 2 Sem 6:1-17; 1 Kran 13:5-14; 15:25—16:1\x*  
\v 5 Wal det kopawan teibul blanga ofring bin deya langa Gibiyan, lida langa det Seikridwan Tent blanga YAWEI. En King Salaman en ola pipul bin weshipbat YAWEI deya na. Besalel, det san blanga Yurai en det grensan blanga Huwa, bin meigim det kopawan teibul. \x + \xo 1:5 \xt Eksa 38:1-7\x*  
\v 6 King Salaman bin weship YAWEI lida langa det Seikridwan Tent, en imbin gibit 1,000 barnapwan sekrifais ontop langa det kopawan teibul blanga ofring.  
\v 7 Wal det nait God bin kamat langa King Salaman en imbin askim im, “Wanim yu wandim mi garra gibit yu?”  
\v 8 En King Salaman bin tok, “Yubin oldei laigim main dedi Deibid brabliwei, en afta yubin meigim mi jidan nyuwan king.  
\v 9 Wal YAWEI yu kipum det strongbala pramis yubin meigim langa main dedi. Yubin meigim mi jidan king blanga detmatj pipul weya nobodi kaan kaundimap.\x + \xo 1:9 \xt Jen 13:16; 28:14\x*  
\v 10 Wal yu garra meigim mi klebabala blanga sabi ebrijing gudwei wulijim ai gin jidan bos blanga dislot pipul blanga yu.”   
\p
\v 11 God bin tok langa im, “Yubin askimbat mi blanga gudbala ting. Yu nomo bin askimbat blanga mani en gol, o blanga yu kantri, o bidimbat ol yu enamimob, o jidan laibala longtaim. Yubin askim mi blanga meigim yu jidan klebabala blanga sabi ebrijing gudwei wulijim yu gin jidan bos blanga main pipul olabat.  
\v 12 Ai garra meigim yu jidan brabli klebabala wulijim yu garra sabi ebrijing. En ai garra gibit yu blendibala ebrijing du, en yu garra jidan nambawan king en mowa haibala langa eni king hubin jidan bifo o hu garra jidan bambai.”   
\s1 King Salaman bin jidan brabli strongbala king  
\r Fes Kings 10:26-29  
\p
\v 13 Wal King Salaman bin libum det pleis blanga weshipbat langa Gibiyan weya det Seikridwan Tent blanga YAWEI bin jidan. Imbin gobek langa Jerusalem en deya na imbin jidan king blanga ola Isreil pipul.  
\v 14 Wal King Salaman bin baiyim 1,400 bagi en 12,000 hosis. Sambala imbin abum langa Jerusalem, en sambala imbin libum langa najalot taun.\x + \xo 1:14 \xt 1 King 4:26\x*  
\v 15 Wen King Salaman bin jidan king blanga ola Isreil pipul detmatj silba en gol bin jidan deya langa Jerusalem jis laik bigismob ston. En detmatj gudwan sidatri bin jidan jis laik det sikamotri weya jidan ebriweya deya langa det Juda Beli.  
\v 16-17 En King Salaman bin abum sambala wekinmen hubin jidan langa det dubala kantri, Ijip en Salisha, blanga baiyimbat hosis en bigmob bagi blanga deigimbek langa Jerusalem. Brom deya deibin selim olabat langa det dubala king blanga ola Hitait en Siriya pipul. Deibin baiyim bagi fo 600 silba mani en hos fo 150 silba mani.\x + \xo 1:16-17 \xt Dyud 17:16\x*   
\c 2  
\s1 King Salaman bin gitredi blanga bildimap det Serramoni Pleis langa Jerusalem  
\r Fes Kings 5:1-18  
\p
\v 1 King Salaman bin jinggabat blanga bildimap serramoni pleis blanga weshipbat langa YAWEI, en imbin jinggabat blanga bildimap im ronwan haus du.  
\v 2 King Salaman bin pikimat 70,000 men blanga garrimap ola ebrijing, en 80,000 men blanga kadimbat ola ston ontop langa det hil kantri. En 3,600 najalot men bin jidan boswan lida blanga det wek.   
\p
\v 3 King Salaman bin jandim leda langa King Hairam langa Taya. Imbin dalim im, “Yu album mi laik yubin album main dedi Deibid wen yubin gibit im det sidatri wud blanga bildimap im gudwan haus.  
\v 4 Ai garra bildimapbat wanbala serramoni pleis blanga weshipbat YAWEI. Dijan pleis garra jidan seikridwan blanga mi en main pipul olabat blanga weshipbat langa YAWEI na. Melabat garra barnimap det gudsmelwan medisin en gibit det speshalwan damba blanga im olataim en melabat garra gibit barnapwan ofring ebri ailibala en ebri aftanun en ebri Sebathdei, en langa ebri Nyumanth serramoni en najalot holiwan dei, blanga preisimbat YAWEI, melabat God. Imbin dalim ola Isreil pipul blanga dum dislot ting olataim.  
\v 5 Ai garra bildimap brabli gudwan serramoni pleis, dumaji melabat God mowa haibala brom eni najalot drimin.  
\v 6 Bat nobodi kaan bildimap serramoni pleis blanga God, dumaji det skai im lilwan langa im. Ai gin oni bildimap speshalwan pleis blanga gibit sekrifais ofring langa God.\x + \xo 2:6 \xt 1 King 8:27; 2 Kran 6:18\x*  
\v 7 Wal yu jandim wanbala men hu sabi hau blanga kadimbat en meigim pitja garram gol, silba, kopa en aiyan, en blanga meigimbat bluwan, pepulwan en redwan matiriyal. Im garra wek garram detlot men hu wek gudwei garram bingga brom Juda en Jerusalem weya main dedi bin pikimat longtaim.  
\v 8 Ai sabi yu garram loda brabli klebabala men hu gin wek gudwei garram timba. Wal yu jandim langa mi sidatri, paintri en junipa timba brom Lebanan. Ai garra jandim main wekinmen olabat deya blanga album yu wekinmen olabat,  
\v 9 weya dei garra meigim redi loda timba. Dumaji dijan serramoni pleis weya ai garra bildimap garra jidan brabli bigwan en brabli purdiwan.  
\v 10 Ai garra jandim daga blanga yu wekinmenmob, 2,000 tan sid daga gulum wit, 2,000 tan sid daga gulum bali, 400,000 lita wain, en 400,000 lita oliboil.” Lagijat na King Salaman bin tok langa det leda.   
\p
\v 11 Wal King Hairam bin jandimbek leda langa King Salaman. Imbin dalim im, “Dumaji YAWEI laigim im pipul olabat detmatj, imbin meigim yu jidan king blanga olabat.  
\v 12 Preisimbat YAWEI det God blanga Isreil. Im na bin meigim skai en graun. Imbin gibit King Deibid brabli klebawan san hu sabi ebrijing wanim im garra dum. Im na garra bildimap serramoni pleis blanga YAWEI en haus blanga im ronselp.  
\v 13 Mi jandimbat yu brabli klebawan wekinmen neim Huram hu sabi meigimbat ebrijing brabli gudwei.  
\v 14 Im mami bin brom det klen blanga Den en im dedi bin kaman brom Taya. Im sabi hau blanga meigim ebrijing brom gol, silba, kopa, aiyan, ston en wud. Im sabi hau blanga meigim bluwan, pepulwan en redwan matiriyal en brabli gudwan matiriyal. Im gin kadimbat pitja eniwei yu dalim im. Im garra wek garram ola wekinmen blanga yu en detlot hubin wek garram yu dedi King Deibid.  
\v 15 Wal yu jandim detlot sid daga gulum wit en bali, en det wain en oliboil weya yubin pramisim.  
\v 16 Brom detlot bigwan hil langa Lebanan wi garra kadimdan ola sidatri yu wandim. Wi garra taiyimap holbit en pudum langa solwoda, wulijim dei gin flout olawei langa Jopa. Brom deya yu gin deigim langa Jerusalem.” Lagijat na King Hairam bin raidimbat det leda.   
\s1 Deibin stat bildimbat det Serramoni Pleis  
\r Fes Kings 6:1-38  
\p
\v 17 Wal King Salaman bin kaundimap ola pipul brom najalot kantri hubin jidan langa Isreil, jis laik im dedi Deibid bin dum. Deibin kaundimap 153,600 pipul hubin jidan deya.  
\v 18 Imbin kadimat brom detlot 70,000 pipul blanga garrimap ola ebrijing, en 80,000 pipul blanga kadimap ola ston langa detlot bigwan hil en 3,600 boswan lida blanga det wek.\f + \fr 2:18 \ft  Yu gin faindim det mep blanga det Serramoni Pleis langa Fes Kings 6:6.\f*   
\c 3  
\p
\v 1 King Deibid, det dedi blanga King Salaman bin olredi faindim gudwan pleis blanga bildimap det Serramoni Pleis. Imbin langa Jerusalem deya langa det bigwan hil gulum Moraiya weya YAWEI bin tok langa Deibid. Tharran bin det pleis weya Arauna det Jebusait men bin deigimatbat ola rabish brom det sid daga.\x + \xo 3:1 \xt Jen 22:2\x*  
\v 2 King Salaman bin stadimap det wek langa det sekan manth langa det namba 4 yiya weya imbin jidan king.  
\v 3 Det Serramoni Pleis weya King Salaman bin bildimap bin 27 mita longwei en 9 mita kroswei.\fig |src="wa04003b.tif" size="col" ref="3:3" \fig*  
\v 4 Det feswan rum insaidwei bin seim laik det Serramoni Pleis, 9 mita kroswei, en 13.5 mita apendan. Insaidwei langa det rum bin brabli purdiwan garram gol.  
\v 5 Det meinwan rum bin abum sidatri wud langa ola wol en deibin gaburrumap garram gudwan gol. Deibin abum pitja blanga pamtri en tjein oloba.  
\v 6 Det king bin meigim det Serramoni Pleis brabli purdiwan garram purdiwan ston en gol weya deibin bringimap brom det kantri gulum Pabaiyim.  
\v 7 Imbin yusum detlot gol blanga gaburrumap detlot wol, rufpat, step en dowawei langa det Serramoni Pleis. Langa detlot wol detlot wekinmen bin meigim loda pitja laiga det dubala sheip garram wing.  
\v 8 Det insaidwan rum bin det Brabli Seikridwan Rum en imbin nain mita longwei en nain mita kroswei seim laik det Serramoni Pleis. En deibin yusum mowa langa 20 tan gol langa det Brabli Seikridwan Rum.\x + \xo 3:8 \xt Eksa 26:33,34\x*  
\v 9 Deibin yusum 570 grem gol blanga meigim ola neil, en ola wol langa detlot ontopwan rum deibin gaburrumap garram gol.   
\p
\v 10 Det king bin gibit oda langa im wekinmen olabat blanga meigim dubala sheip garram wing brom aiyan en gaburrumap dubala garram gol. Deibin pudum dubala langa det Brabli Seikridwan Rum.  
\v 11-13 Det dubala enimul bin jandap mijamet en deibin feising langa det dowawei weya olabat gowin. Det dubala enimul bin abum dubala wing en det dubala wing bin 2.2 mita longwei, en wen det dubala wing bin spredat dubala bin tatjim miselp rait langa midul langa det rum, en det naja dubala wing bin tatjim det dubala wol. Detlot wing bin spredat 9 mita kroswei.\x + \xo 3:11-13 \xt Eksa 25:18-20\x*  
\v 14 Deibin meigim ketin blanga det Brabli Seikridwan Rum brom det brabli gudwan matiriyal en najalot matiriyal. Deibin meigim det ketin bluwan, pepulwan en redwan. Deibin pudum loda pitja blanga det enimul garram wing langa det ketin du.\x + \xo 3:14 \xt Eksa 26:31\x*   
\s1 Dubala kopawan pol  
\r Fes Kings 7:15-22  
\p
\v 15 Det king bin pudum dubala pol 15.5 mita apendan, en deibin pudum dubala lida langa det Serramoni Pleis. Dubala bin abum najawan ting laiga boul langa top, en deibin 2.2 mita apendan.  
\v 16 Topwei langa det dubala pol deibin pudum ola pitja garram tjein en 100 pamagrenit.  
\v 17 Deibin pudum det dubala pol lida langa det Serramoni Pleis. Det wanbala langa sauthwei bin neim Jeikin, en det wanbala langa nowathwei bin neim Bowes.   
\c 4  
\s1 Ola difrinwan ting deibin yusum langa det Serramoni Pleis  
\r Fes Kings 7:23-51  
\p
\v 1 King Salaman bin dalim im wekinmen olabat blanga meigim teibul blanga ofring garram kopa. Imbin 9 mita longwei en kroswei, en 4.5 mita apendan.\x + \xo 4:1 \xt Eksa 27:1,2\x*  
\v 2 En deibin meigim bigwan raunwan kopawan boul wulijim teingk. En imbin 2 mita apendan en 4 mita kroswei en 13 mita raidaran.  
\v 3 Det bigwan boul langa topwei bin abum pitja raidaran. En seimtaim deibin meigim pitja blanga ola buligi deya langa det bigwan boul.  
\v 4 En det boul bin jidan ontop langa 12 buligi deibin meigim garram kopa. Detlot buligi ol bin feising atsaidwei, thribala bin luk ebriwei.  
\v 5 Det saidpat langa det bigwan boul bin 75 milamita thik. Langa det topwan pat bin luk laiga kap, en imbin jis laik purdiflawa. Det bigwan boul bin holdim 60,000 lita woda.  
\v 6 Deibin meigim tenbala boul du, en deibin pudum faibala langa sauthsaid en faibala langa nowathsaid langa det Serramoni Pleis. Deibin yusum olabat blanga washimbat ola enimul pat blanga meigim redibala blanga barnapwan sekrifais ofring. Det woda langa det bigwan boul bin blanga detlot serramonimen blanga washimbat olabat ebrijing weya deibin yusumbat blanga sekrifais serramoni.\x + \xo 4:6 \xt Eksa 30:17-21\x*   
\p
\v 7-8 Deibin meigim tenbala goldinwan lempsten seim laik deibin meigim bifo en tenbala teibul en deibin pudum langa det meinwan rum langa det Serramoni Pleis. Deibin pudum faibala lempsten en teibul wansaid en faibala lempsten en teibul najasaid. Deibin meigim 100 golwan boul du.\x + \xo 4:7-8 \xt Eksa 25:31-40; Eksa 25:23-30\x*   
\p
\v 9 Deibin meigim insaidwan kotyad blanga detlot serramonimen en atsaidwan kotyad du. Detlot dowa deya langa det geitwei deibin abum kopa oloba.  
\v 10 Det bigwan boul bin jidan langa det kona sauthwei en sanraiswei langa det Serramoni Pleis.   
\p
\v 11-16 Det wekinmen neim Huram bin meigim loda pot, shabul en boul du. Imbin dum ebrijing weya imbin pramis King Salaman im garra dum blanga det Serramoni Pleis. Imbin meigim dubala kopawan pol, en dubala boul weya jidan ontopwei langa det dubala pol, en det pitja garram tjein langa det dubala boul ontop langa det dubala pol, en detlot 400 kopawan pamagrenit weya jidan dubala lain langa det dubala boul ontop langa det dubala pol. En imbin meigim detlot tenbala bagi, en detlot tenbala boul, en det bigwan boul, en detlot 12 buligi weya holdimap det bigwan boul, en detlot pot, shabul en fok. Huram det boswan bin meigim ol dislot ting brom shainiwan kopa blanga yusum langa det Serramoni Pleis blanga YAWEI, jis laik King Salaman bin dalim im.  
\v 17 Wal detlot wekinmen blanga King Salaman bin meigim ol detlot ting langa det pleis weya dei oldei meltimap ebrijing langa det dubala taun gulum Sukait en Sereda langa det Jodan Riba Beli.  
\v 18 Detmatj ebrijing deibin meigim deya en nobodi nomo bin weiyimbat detlot kopa.  
\v 19 Wal King Salaman bin gibit oda langa im wekinmen olabat blanga meigim ol dislot golwan ebrijing blanga det Serramoni Pleis, det teibul blanga ofring en detlot najalot teibul blanga det damba ofring blanga gibit langa God,  
\v 20 en detlot lempsten en ola lemp weya deibin meigim brom gudwan gol blanga barn lida langa det Brabli Seikridwan Rum.  
\v 21 Deibin meigim purdiflawa, en ola lemp en ola tul weya dei yusum blanga detlot lemp,  
\v 22 en detlot boul en dish blanga pudum ola gudsmelwan medisin en detlot dish blanga garrimap ola hotwan eshis. Ol dislot deibin meigim brom gudwan gol. Detlot atsaidwan dowa blanga det Serramoni Pleis en detlot dowa blanga det Brabli Seikridwan Rum deibin abum gol oloba.   
\c 5  
\p
\v 1 Wal wen King Salaman bin binijimap ol dislot wek langa det Serramoni Pleis, imbin pudum ol detlot ting weya im dedi Deibid bin gibit langa YAWEI deya langa detlot stowa rum, ola silba, ola gol en ola najalot ebrijing.\x + \xo 5:1 \xt 2 Sem 8:11; 1 Kran 18:11\x*   
\s1 Deibin bringimap det Seikridwan Boks langa det Serramoni Pleis  
\r Fes Kings 8:1-9  
\p
\v 2 Wal King Salaman bin jingat langa ol detlot lidamob brom ola klen en femili brom Isreil blanga go langa Jerusalem blanga deigim det Seikridwan Boks brom Saiyan, det taun blanga Deibid langa det Serramoni Pleis.\x + \xo 5:2 \xt 2 Sem 6:12-15; 1 Kran 15:25-28\x*  
\v 3 Deibin ol majurrumap miselp seimtaim weya deibin abum det speshalwan serramoni gulum Hampi.  
\v 4 Wen ola lidamob bin majurrumap miselp, detlot Libaimen bin lidimap det Seikridwan Boks,  
\v 5 en deibin garrimap langa det Serramoni Pleis. Detlot serramonimen en detlot Libaimen bin mubum det Seikridwan Tent blanga YAWEI du, en ol detlot ebrijing blanga det Tent langa det Serramoni Pleis.   
\p
\v 6 Wal King Salaman en ol detlot Isreil pipul bin majurrumap miselp lida blanga det Seikridwan Boks en deibin sekrifais loda ship en buligi, deibin adli kaundimap detlot enimul.\fig |src="LB00255B.TIF" size="col" ref="5:6" \fig*  
\v 7 Afta, detlot serramonimen bin garrimap det Seikridwan Boks blanga YAWEI en deigim insaid langa det Serramoni Pleis en pudum langa det Brabli Seikridwan Rum andanith langa det dubala enimul garram wing.  
\v 8 Detlot wing bin gaburrumap det Seikridwan Boks en detlot pol blanga garrimap det Seikridwan Boks.  
\v 9 En det laswan pat blanga det dubala pol bin stikinat, bat oni detlot pipul hu jandap lida langa det Brabli Seikridwan Rum gin luk det dubala pol. Det dubala pol stil jidan deya tudei.  
\v 10 Nomo enijing bin jidan insaid langa det Seikridwan Boks, oni det dubala speshalwan ston weya Mosis bin pudum wen imbin deya langa det hil gulum Sainai, langa det taim na wen YAWEI bin meigim brabli strongwan pramis garram detlot pipul blanga Isreil wen deibin kaman brom Ijip.\x + \xo 5:10 \xt Dyud 10:5\x*   
\s1 Det braitwan lait blanga YAWEI  
\p
\v 11-14 Ol detlot serramonimen brom ebri grup bin meigim miselp klinbala blanga serramoni. Detlot Libaimen hubin plei myusik bin neim Eisaf, Heiman en Jedathan, en detlot brom olabat femilimob bin werrimon klos brom brabli gudwan matiriyal. Detlot Libaimen bin jandap sanraiswei langa det teibul blanga ofring garram lilwan drum gulum simbul en det gita gulum hap. 120 serramonimen bin pleipleibat detlot longwan wisul garram olabat. Detlot singamob bin sing gudwei garram det myusik brom detlot longwan wisul, simbul en najalot ting. Deibin preisimbat YAWEI en sing dijan song, “Preisimbat YAWEI, dumaji im brabli gudbala, En im laigim ola pipul olagijawan.” En wen detlot serramoni men bin gowei brom det Serramoni Pleis, bigiswan klaud garram braitwan lait blanga YAWEI bin jandap deya en deibin lafta gowei brom det pleis.\x + \xo 5:11-14 \xt Eksa 40:34,35; 1 Kran 16:34; 2 Kran 7:3; Esra 3:11; Saam 100:5; 106:1; 107:1; 118:1; 136:1; Jera 33:11\x*   
\c 6  
\s1 King Salaman bin tok gudbalawei langa ola pipul  
\r Fes Kings 8:12-21  
\p
\v 1 Wal King Salaman bin prei,  
\q1 “YAWEI det trubala God, yu oldei jidan deya langa dakwan klaud.  
\v 2 Bat mi na bin bildimap brabli purdiwan Serramoni Pleis blanga yu, weya yu gin jidan olagijawan.”   
\p
\v 3 Ola pipul blanga Isreil bin jandap deya. En det king bin tenim miselp feis langa olabat, en imbin askim YAWEI blanga jidan gudwei langa olabat.  
\v 4 Imbin tok, “Preisimbat YAWEI det trubala God blanga ola Isreil pipul. Imbin kipum det pramis imbin meigim garram main dedi Deibid wen imbin tok dijan langa im,  
\v 5 ‘Brom det taim na wen aibin bringimap main pipul olabat brom Ijip raidap tudei, ai nomo bin pikimat eni taun langa Isreil blanga bildimap Serramoni Pleis weya olabat gin weship mi. En ai nomo bin pikimat enibodi blanga lidimbat ol main pipul.  
\v 6 Bat tudei na aibin pikimat Jerusalem, det pleis blanga weshipbat mi, en yu Deibid garra lidimbat main pipul olabat.’ Lagijat na YAWEI bin tok.   
\p
\v 7 “Main dedi Deibid bin wandim bildimap serramoni pleis blanga weshipbat YAWEI det trubala God blanga ola Isreil pipul,  
\v 8 bat YAWEI bin tok langa im, ‘Yubin rait wen yubin wandim bildimap serramoni pleis blanga mi,  
\v 9 bat yu kaan neba bildimap. Im blanga yu san, yu ronwan san na garra bildimap det serramoni pleis blanga mi.’\x + \xo 6:9 \xt 2 Sem 7:1-13; 1 Kran 17:1-12\x*   
\p
\v 10 “Wal YAWEI bin kipum im pramis na. Aibin jidan nyuwan king blanga Isreil pipul afta main dedi bin dai, en aibin bildimap dijan Serramoni Pleis blanga weshipbat YAWEI det trubala God blanga ola Isreil pipul.  
\v 11 Aibin pudum det Seikridwan Boks garram det dubala ston garram det brabli strongwan pramis weya YAWEI bin meigim garram ola Isreil pipul langa det Serramoni Pleis.” Lagijat na King Salaman bin tok.   
\s1 King Salaman bin prei  
\r Fes Kings 8:22-53  
\p
\v 12-13 Basdam King Salaman bin meigim fletwan flo garram kopa langa midul langa det kotyad. Imbin 2.2 mita ebriwei en imbin 1.3 mita apendan brom det graun. En King Salaman bin gowap langa det fletwan flo lida langa det teibul blanga ofring en imbin nildan lida langa ola pipul en imbin lidimap im bingga langa top,  
\v 14 \fig |src="prayer.tif" size="col" ref="6:14" \fig*en imbin prei, “YAWEI, trubala God blanga Isreil. Nomo eni God langa top o langa dijan wel laik yu. Yu kipum yu brabli strongbala pramis garram yu pipul en yu shoum olabat yu laigim olabat detmatj wen dei bulurrum yu en teiknodis langa yu wed holbit.  
\v 15 Yubin kipum det pramis yubin meigim garram main dedi Deibid, en tudei na ebri wed bin kaman trubala.  
\v 16 Wal YAWEI, trubala God blanga Isreil yu kipum det najawan pramis yubin meigim garram main dedi wen yubin dalim im wanbala biginini brom im femili lain garra oldei jidan king blanga Isreil if dei kipgon bulurrumbat yu lowa jis laik imbin dum.\x + \xo 6:16 \xt 1 King 2:4\x*  
\v 17 Wal YAWEI, trubala God blanga Isreil, larram ebrijing kaman trubala wanim yubin pramis langa yu wekinmen Deibid.   
\p
\v 18 “Bat God, gin yu jidan iya langa dijan wel garram men en wuman? Det skai im lilwan langa yu. Wal hau dijan Serramoni Pleis weya aibin bildimap jidan bigwan langa yu?\x + \xo 6:18 \xt 2 Kran 2:6\x*  
\v 19 YAWEI, main God, mi na wekinmen blanga yu. Yu irrim main preya en gibit mi wanim mi askimbat yu.  
\v 20 Yu wotjimbat dijan Serramoni Pleis deitaim en naitaim. Yubin pramis dijan garra jidan det pleis weya ola pipul garra weshipbat yu. Wal yu irrim mi wen ai luk langa dijan Serramoni Pleis wen mi prei.\x + \xo 6:20 \xt Dyud 12:11\x*  
\v 21 Wal yu irrim main preya en ola preya blanga ola Isreil pipul wen dei luk langa dijan pleis en prei du. En deya langa yu kemp langa top yu irrim melabat en yu larramgo melabat fri.   
\p
\v 22 “Wen sambodi reken enibodi bin dum nogudbala ting en dei bringimap im langa det teibul blanga ofring langa det Serramoni Pleis blanga meigim strongbala pramis en tok, ‘Ai nomo bin dum det ting’,  
\v 23 YAWEI, yu irrim mi langa top en yu jadjim yu wekinmen. Yu panishim det giltiwan, en yu larramgo fri det najawan hu nomo jidan giltiwan.   
\p
\v 24 “Wen det enamimob bidim ola Isreil pipul, dumaji deibin dumbat nogudbala ting, en afta olabat luk langa yu en kaman langa yu Serramoni Pleis en prei langa yu blanga larramgo olabat fri,  
\v 25 yu irrim olabat langa top. Yu larramgo olabat fri brom olabat nogudbalawei en bringimbek olabat langa det kantri weya yubin gibit langa olabat grengrenfathamob.   
\p
\v 26 “Wen yu holdimbek det rein, dumaji yu pipul olabat bin gibit yu bekboun, en afta, wen dei sori miselp en kaman langa dijan Serramoni Pleis en jidan lobala en prei langa yu,  
\v 27 YAWEI, yu irrim olabat langa top en larramgo fri detlot Isreil pipul brom det nogudbalawei blanga olabat en titjimbat olabat blanga jidan gudwei. En afta YAWEI, yu jandim rein langa dijan kantri blanga yu, weya yubin gibit langa yu pipul olabat blanga jidan olagijawan.  
\v 28 If nomo eni daga iya langa dijan kantri, o bigbala siknis kaman, o hotwan win kilim ola sid daga, o ola insek dagat detlot sid daga, o ola enami kaman en fait, o nogudwan siknis kaman,  
\v 29 yu irrim olabat preya. If yu pipul olabat sori miselp en jingat soribalawei langa yu, en lidimap olabat bingga en prei langa dijan Serramoni Pleis,  
\v 30 yu irrim olabat preya. Yu irrim langa yu kemp langa top en yu larramgo olabat fri. Oni yu na sabi wanim langa olabat hat. Yu jadjim ebribodi blanga wanim deibin dumbat,  
\v 31 wulijim yu pipul olabat garra rispek en duwit langa yu olataim olabat jidan langa dijan kantri weya yubin gibit langa melabat grengrenfathamob.   
\p
\v 32 “Wen pipul brom najawan kantri irrim yu garram detmatj pawa en yu redi blanga dum enijing, en dei kaman en prei langa dijan Serramoni Pleis,  
\v 33 yu irrim olabat preya brom yu kemp langa top en yu ensim olabat, wulijim ola pipul langa dijan wel garra sabi yu en duwit langa yu, jis laik yu pipul olabat dumbat. En wulijim dei garra sabi dijan Serramoni Pleis aibin bildimap, im det pleis weya dei garra oldei weshipbat langa yu.   
\p
\v 34 “Wen yu dalim yu pipul olabat blanga go en faitfait olabat enami, en olabat prei langa yu, nomeda weya dei jidan, en if dei luk langa dijan taun weya yubin pikimat blanga dijan Serramoni Pleis weya aibin bildimap blanga yu.  
\v 35 Yu irrim langa olabat preya brom yu kemp langa top en yu album olabat blanga bidim olabat enami.   
\p
\v 36 “Wen yu pipul olabat dum nogudbala ting langa yu, en nomo eni gudbala pipul jidan, en yu gitwail en larram olabat enami bidim olabat en deigimwei olabat prisana langa najawan kantri, nomeda det kantri im longwei,  
\v 37 yu stil irrim langa olabat preya. If olabat sori miselp deya langa det kantri en prei langa yu en dalim yu blanga olabat brabli nogudbalawei, wal yu irrim olabat preya YAWEI.  
\v 38 Langa det kantri na, if olabat brabli trubala en bilib brabliwei langa yu en dei luk langa dijan kantri weya yubin gibit langa olabat grengrenfathamob, dijan taun weya yubin pikimat, en dijan Serramoni Pleis det aibin bildimap blanga yu,  
\v 39 yu irrim langa olabat preya. Langa yu kemp langa top yu irrim olabat en yu jidan kainbala langa olabat en larramgo fri ol detlot pipul blanga yu brom olabat nogudbalawei.   
\p
\v 40 “Wal main God yu luk langa melabat en irrim melabat preya langa dijan pleis.  
\v 41 YAWEI, yu kaman en jidan iya langa yu Serramoni Pleis weya det Seikridwan Boks jidan. Yu gibit gudbala ting langa yu serramonimen blanga wanim dei oldei dumbat, en larram ol yu pipul jidan gudbinjiwei, dumaji yubin gud langa olabat.  
\v 42 YAWEI, nomo gibit bekboun langa det king yubin pikimat. Yu jinggabat hau yubin laigim yu wekinmen Deibid detmatj.” Lagijat na King Salaman bin prei.\x + \xo 6:42 \xt Saam 132:8-10\x*   
\c 7  
\s1 Deibin gibit det Serramoni Pleis langa YAWEI  
\r Fes Kings 8:62-66  
\p
\v 1 Wal wen King Salaman bin binij det preya, bigwan faiya bin kamdan brom top en barnimap det sekrifais ofring weya deibin gibit langa YAWEI, en det brabli braitwan lait blanga YAWEI bin braitinimap det Serramoni Pleis.\x + \xo 7:1 \xt Labid 9:23,24\x*  
\v 2 Dumaji det Serramoni Pleis bin brabli braitwan garram lait, detlot serramoni men nomo bin go insaid langa det pleis na.  
\v 3 Wen detlot Isreil pipul bin luk det faiya bin kamdan brom top en det brabli braitwan lait bin braitinimap det Serramoni Pleis, olabat holot bin baudan en weship langa YAWEI en preisimbat im, dumaji imbin brabli gudbala en imbin laigim olabat olagijawan.\x + \xo 7:3 \xt 1 Kran 16:34; 2 Kran 5:13; Esra 3:11; Saam 100:5; 106:1; 107:1; 118:1; 136:1; Jera 33:11\x*   
\p
\v 4 Wal King Salaman en ola pipul bin gibit ola sekrifais langa YAWEI.  
\v 5 Imbin sekrifais 22,000 buligi en 120,000 ship blanga feloship ofring. Lagijat na im en ola pipul bin gibit det Serramoni Pleis langa YAWEI.   
\p
\v 6 Wal ola serramonimen bin ol jandap langa olabat ron pleis, en deibin luk langa ola Libai pipul en deibin preisimbat YAWEI garram detlot myusik ebrijing weya King Deibid bin gibit. Deibin singim det song gulum Im Laigim Olabat Olagijawan, laik Deibid bin dalim olabat. Detlot serramonimen bin blowim detlot longwan wisul en ola pipul bin jandap.   
\p
\v 7 Wal King Salaman bin meigim seikridwan det midul pat langa det kotyad, det pleis weya bin lida langa det Serramoni Pleis, en deya na deibin gibit detlot holbit barnapwan sekrifais ofring, sid daga ofring, en det fetpat brom detlot feloship ofring. Imbin dum dijan, dumaji detlot ofring bin tumatj langa det teibul blanga ofring deibin meigim brom kopa.   
\p
\v 8 Wal King Salaman en ola Isreil pipul bin abum det speshalwan serramoni gulum Hampi fo 7 dei. Detmatj pipul bin deya. Deibin kaman longwei brom nowathwei raidap langa det jampap gulum Heimath en brom sauthwei raidap langa det boda blanga Ijip.  
\v 9 Deibin jidan fo 7 dei blanga gibit det teibul blanga ofring langa YAWEI en deibin jidan 7 dei mowa blanga det serramoni gulum Hampi. Langa det laswan dei deibin abum det binijimapwan serramoni,  
\v 10 en langa det namba 23 dei blanga det namba 7 manth, King Salaman bin jandimwei detlot pipul brabli gudbinjiwei langa olabat kemp, dumaji YAWEI bin gibit ola gudbala ting langa im pipul olabat, en langa King Deibid en langa King Salaman.   
\s1 God bin kamat langa King Salaman igin  
\r Fes Kings 9:1-9  
\p
\v 11 Wal wen King Salaman bin binij bildimbat det Serramoni Pleis en im bigwan haus gudwei,  
\v 12 YAWEI bin kamat langa im naitaim. Imbin tok langa im, “Aibin irrim yu preya en aibin pikimat dijan Serramoni Pleis weya ola pipul garra gibit sekrifais ofring langa mi.  
\v 13 Enitaim ai holdimbek det rein o jandim insek blanga dagat ola sid daga, o jandim nogudwan siknis langa main pipul olabat,  
\v 14 if dei prei langa mi en sori miselp en stap dumbat ola nogudbala ting, wal ai garra irrim brom top, en ai garra larramgo olabat fri brom olabat nogudbalawei, en meigim det kantri blanga olabat abum loda gudwan ebrijing igin.  
\v 15 Ai garra wotjimbat dijan Serramoni Pleis en ai garra jidan redi blanga irrim ola preya weya olabat garra tok iya,  
\v 16 dumaji aibin pikimat dijan pleis blanga main en iya na olabat garra weshipbat mi olagijawan. Ai garra wotjimbat im en lukaftumbat im olataim.  
\v 17 If yu wek langa mi trubalawei laik yu dedi Deibid bin dum, en duwit langa main lowa en dum ebrijing ai dalim yu,  
\v 18 ai garra kipum det pramis aibin meigim garram yu dedi Deibid wen aibin pramis im bigininimob garra jidan bos blanga ola Isreil pipul olataim.\x + \xo 7:18 \xt 1 King 2:4\x*  
\v 19 Bat if yu en yu pipul olabat nomo teiknodis en duwit langa ola lowa aibin gibit yu, en yu weship najalot drimin,  
\v 20 wal ai garra jandimwei yumob brom dijan kantri weya aibin gibit langa yu, en ai garra libum dijan Serramoni Pleis, dijan pleis weya aibin meigim seikridwan blanga weshipbat mi. En pipul ebriweya garra meigimbat fan en rabishim dijan pleis.   
\p
\v 21 “Dijan Serramoni Pleis im brabli gudwan tudei, bat bambai wen ai libum dijan pleis, ebribodi hu wokpas garra gedim shok en askim, ‘Wotfo YAWEI bin dum dijan langa det Serramoni Pleis en dijan kantri?’  
\v 22 Najalot pipul garra tok, ‘Dumaji deibin gibit bekboun langa YAWEI det trubala God blanga olabat hubin bringimat olabat grengrenfathamob brom Ijip. Deibin bulurrumbat najalot drimin en weshipbat olabat. Blanga tharran na YAWEI bin bringimap ol dislot nogudbala ting langa olabat.’” Lagijat na YAWEI bin tok.   
\c 8  
\s1 Ola ting King Salaman bin dum  
\r Fes Kings 9:10-28  
\p
\v 1 King Salaman bin deigim 20 yiya blanga bildimap det Serramoni Pleis en det speshalwan haus blanga im.  
\v 2 En imbin bildimbek detlot taun weya King Hairam bin gibit im, en imbin jandim pipul brom Isreil blanga jidan deya.  
\v 3 Imbin teikoba det taun gulum Heimath Soba,  
\v 4 en imbin meigim strongbala det taun gulum Palmira langa det deset kantri. Imbin bildimbek sambala taun langa Heimath weya imbin kipum ol im ebrijing gudwei langa ola stowa rum.  
\v 5 King Salaman bin bildimbek dis dubala taun igin, Apabetharan en Lowabetharan. Dubala bin strongwan taun weya dei gin lokimap gudwei.  
\v 6 Imbin bildimbek det taun gulum Beilath, en detlot taun weya imbin kipum im ebrijing gudwei, en detlot taun weya ol im solja en hosis en bagi bin jidan. Imbin dum ola ting imbin wandim dum langa Jerusalem en langa Lebanan en olaran det kantri weya imbin jidan king.  
\v 7-8 Ol detlot bigininimob blanga ola Keinanait pipul weya nomo bin gitkil wen ola Isreil pipul bin teikoba det kantri, King Salaman bin fosim olabat blanga adwek. Ol dislot pipul na bin detlot Hitait, Emarait, Perasait, Hibait en Jebusait pipul. En olabat bigininimob jidan wekinmen jis laiga prisana raidap langa dijan taim.  
\v 9 Wal detlot Isreil pipul nomo bin jidan wekinmen jis laiga prisana, bat deibin wek mijamet garram ola solja, ola bosmen blanga ola solja, en ola bos blanga ola bagi en blanga lukaftum ola hosis.  
\v 10 En 250 men bin jidan bos blanga ol detlot hu deibin fosim blanga wek langa ola difrinwan wek.   
\p
\v 11 Wal King Salaman bin deigim im waif, det doda blanga det king brom Ijip, brom det taun dei gulum Deibidtaun langa det haus imbin bildimap blanga im waif. Imbin tok, “Im nomo lau blanga jidan langa det haus blanga Deibid, hubin king blanga Isreil, dumaji eni pleis weya det Seikridwan Boks bin jidan, im brabli seikridwan pleis.”   
\p
\v 12 Wal King Salaman bin gibit sekrifais ofring langa YAWEI langa det teibul blanga ofring weya imbin bildimap lida langa det Serramoni Pleis.  
\v 13 Imbin gibit barnapwan ofring laik det lowa blanga Mosis bin tok blanga ebri seikridwan dei. Olabat bin ebri Sebathdei, en det Nyumanth serramoni en detlot thribala serramoni dei abum ebriyiya gulum Damba Nomo Garram Raising serramoni, en serramoni gulum Kukwan Daga en serramoni gulum Hampi.\x + \xo 8:13 \xt Eksa 23:14-17; 34:22,23; Nam 28:9-15; 28:16—29:39; Dyud 16:16\x*  
\v 14 King Salaman bin bulurrum ola lowa weya im dedi Deibid bin gibit im. Imbin dalim detlot serramonimen wanim dei garra dum ebridei, en detlot Libaimen du, hubin album detlot serramonimen garram olabat wek en blanga sing. Imbin dalim detlot blijiman wanim blanga dum ebridei langa ebri geit, jis laik Deibid det men blanga God bin tok.  
\v 15 Wal ola lowa weya Deibid bin dalim detlot serramonimen en Libaimen blanga detlot stowahaus en najalot ting, deibin dum holbit.   
\p
\v 16 Wal ola wek blanga King Salaman bin binij na brom wen imbin stadimap det Serramoni Pleis raidap imbin binij bildimbat det Serramoni Pleis. Ola wek bin brabli gudwan.   
\p
\v 17 Wal King Salaman bin go langa det dubala taun gulum Esiyangeba en Elath, weya bin jidan wansaid langa det solwoda gulum Redsi langa det kantri gulum Idam.  
\v 18 King Hairam bin jandim ola bigwan bout garram im ronwan bosmen en gudwan wekinmen langa detlot bout. Deibin go garram ola boswan blanga King Salaman langa Ofiya en deibin bringimbek langa King Salaman mowa den 15,000 kilogrem gol.   
\c 9  
\s1 Det kwin brom Shiba bin kaman en luk King Salaman  
\r Fes Kings 10:1-13  
\p
\v 1 Wal det kwin brom Shiba bin irrim blanga King Salaman, en imbin go langa Jerusalem blanga askimbat im adwan kwestjan. Imbin bringimap im ronwan wekinmenmob en loda kemul blanga garrimap gudsmelwan medisin, purdiwan ston en detmatj gol. Wen det kwin bin midap garram King Salaman imbin askimbat im loda adwan kwestjan.  
\v 2 King Salaman bin ensim ebri kwestjan. Nomo enijing bin brabli adwan blanga im.  
\v 3 Wal det kwin brom Shiba bin irrim King Salaman en hau im jidan brabli klebabalamen en imbin luk im haus weya imbin bildimap.  
\v 4 Det kwin bin luk ola gudwan daga imbin abum langa im teibul en weya ola boswan wekinmen bin oldei jidan. Imbin luk ola ting weya bin hepin langa det haus en hau deibin dum ebrijing. Imbin luk ola speshalwan klos ola haibala wekinmen bin werrimon en ola klos weya najalot pipul bin werrimon wen deibin lukaftum det king wen imbin abum padi. En imbin luk ola sekrifais ofring weya King Salaman bin gibit langa det Serramoni Pleis. Imbin brabli hatjamp wen imbin luk ol detlot ebrijing.   
\p
\v 5 Wal det kwin bin tok langa King Salaman, “Ol detlot stori aibin irrim blanga yu langa main ronwan kantri weya yu jidan brabli klebabala, im trubala tharran.  
\v 6 Ai nomo bin bilib wen deibin dalimbat mi blanga ol dislot ting. Aibin lafta kaman en luk miselp. Aibin oni irrimbat lilbit wanim klebabala ting yubin dumbat, dumaji ai nomo bin irrim brabliwei blanga dislot ebrijing.  
\v 7 Im brabli gudbala blanga ola wekinmen hu jidan iya garram yu, weya olabat irrim yu tok ebrijing.  
\v 8 Preisimbat YAWEI det God blanga yu. Imbin shoum yu im brabli gudbinji langa yu, dumaji imbin meigim yu jidan king blanga ola Isreil pipul. Im laigim ol im Isreil pipul brabliwei en im wandim olabat blanga jidan olagijawan. Imbin meigim yu jidan king wulijim yu gin titjimbat olabat im lowa en gibit olabat feyago.” Lagijat na det kwin bin tok.   
\p
\v 9 Wal det kwin bin gibit King Salaman ola ebrijing imbin bringimap, mowa den 4,000 kilogrem gol en blendibala gudsmelwan medisin en purdiwan ston. Nomo eni gudsmelwan medisin bin laik detlot weya det kwin bin gibit langa King Salaman.\x + \xo 9:9 \xt Meth 12:42; Luk 11:31\x*   
\s1 Ola gudwan ting blanga King Salaman  
\r Fes Kings 10:14-25  
\p
\v 10 Wal ol detlot wekinmen blanga King Hairam en King Salaman hubin bringimap detlot gol brom Ofiya bin bringimap junipatri en purdiwan ston du.  
\v 11 King Salaman bin yusum det wud blanga meigim step langa det Serramoni Pleis en blanga im ronwan haus. En imbin yusum det wud blanga meigim lilwan gita en najalot blanga pleipleibat myusik. Dumaji dei nomo bin abum enijing lagijat langa Juda bifo.   
\p
\v 12 Wal King Salaman bin gibit det kwin ebrijing imbin wandim, en imbin gibit im mowa igin. En det kwin en ol im wekinmen olabat bin gobek langa olabat ronwan kantri.   
\p
\v 13 Wal ebriyiya King Salaman bin gajim 23,000 kilogrem gol,  
\v 14 en mowa igin brom detlot pipul hubin baiyim en selim enijing langa im kantri. Detlot king brom det kantri gulum Areibiya en detlot lidamob brom Isreil bin gibit King Salaman detmatj silba en gol du.  
\v 15 Wal King Salaman bin meigim 200 bigwan shild, en deibin gaburrumap olabat garram 7 kilogrem gol,  
\v 16 en 300 lilwan shild, weya deibin gaburrumap garram 3 kilogrem gol. Deibin pudum ol detlot langa det Lebanan Tri Rum.  
\v 17 Det speshalwan tjeya blanga det king deibin meigim haf brom det shainiwan boun blanga det elafen gulum aibri en naja haf brom gudwan gol.  
\v 18 Siksbala step bin gowap raidap langa det tjeya, en deibin meigim step blanga im fut du weya deibin gaburrumap garram gol. Deibin pudum ampat lefthensaid en raidensaid en deibin meigim dubala sheip jis laik laiyan jandap langa dubala said.  
\v 19 En deibin meigim naja twelbala sheip jis laik laiyan jandap langa said en said langa det siksbala step weya bin go raidap langa det speshalwan tjeya. Nomo eni tjeya bin jidan lagijat langa dijan wel.   
\p
\v 20 Ola kap blanga King Salaman en ola ebrijing langa det rum gulum Lebanan Tri Rum, deibin meigim brom gudwan gol. Olabat bin reken det silba nomo brabli gudwan langa King Salaman taim.  
\v 21 Imbin abum loda bout weya bin jidan langa solwoda garram ola bout blanga King Hairam. Ebri 3 yiya detlot bout bin kambek garram gol en silba en det shainiwan boun blanga elafen gulum aibri en detlot enimul gulum mangki.   
\p
\v 22 King Salaman bin brabli ritjwan en imbin mowa klebawan king brom eni king langa dijan wel.  
\v 23 Olabat holot bin askim King Salaman wanim dei garra dum. Deibin wandi irrim ola klebabala wed God bin gibit im.  
\v 24 Deibin bringimap langa im loda presen, silba, gol, gudwan klos, spiya, gudsmelwan medisin, hosis en dongki. Deibin dum lagijat ebriyiya.  
\v 25 King Salaman bin abum 4,000 haus blanga im hosis en bagi, en imbin abum 12,000 hosis blanga wo. Sambala bin jidan langa Jerusalem en sambala langa najalot taun.\x + \xo 9:25 \xt 1 King 4:26\x*  
\v 26 Imbin jidan boswan lida blanga ola king brom detlot kantri gulijap Yufreitis Riba en raidap langa det kantri gulum Filastain en raidap langa det boda blanga Ijip.\x + \xo 9:26 \xt Jen 15:18; 1 King 4:21\x*  
\v 27 Wen King Salaman bin jidan king deibin yusum silba jis laik ston deibin abum detmatj, en deibin yusum detmatj sidatri wud, olabat bin reken imbin gro ebriweya laik detlot tri gulum sikamotri weya bin jidan detmatj na.  
\v 28 King Salaman bin bringimap hosis brom det kantri gulum Musrai en ola najalot kantri du.\x + \xo 9:28 \xt Dyud 17:16\x*   
\s1 Ola ting weya bin hepin langa King Salaman taim  
\r Fes Kings 11:41-43  
\p
\v 29 Ola ting King Salaman bin dum brom basdam raidap imbin binij, deibin raidimdan holot langa detlot buk gulum \it Ola Stori blanga Neithan, det Speshalwan Mesinja,\it* en \it Ola Stori blanga Ahija brom Shailo, \it* en \it Ola Drim blanga Ido, det Speshalwan Mesinja.\it* Ido bin raidimdan detlot stori blanga King Jerabowam, det san blanga Neibat, wen imbin jidan king langa Isreil du.  
\v 30 King Salaman bin jidan king blanga ola Isreil pipul fo 40 yiya en imbin jidan langa Jerusalem.  
\v 31 Imbin dai en deibin berrim im bodi langa Jerusalem, det taun blanga im dedi King Deibid, en im san Reiyabowam bin jidan det nyuwan king.   
\c 10  
\s1 Detlot klen langa nowath bin gibit bekboun langa Reiyabowam  
\r Fes Kings 12:1-20  
\p
\v 1 Wal Reiyabowam bin go langa det taun gulum Shekam, ola pipul brom Isreil bin kaman deya blanga meigim im jidan king.  
\v 2 Wen Jerabowam det san blanga Neibat bin irrim det King Salaman bin dai, imbin kambek brom Ijip, dumaji imbin go deya blanga haidim miselp brom King Salaman.  
\v 3 Wal detlot klen weya jidan nowathwei bin jandim wed langa im blanga kaman langa olabat. Deibin ol go mijamet langa King Reiyabowam en deibin tok langa im,  
\v 4 “Yu dedi King Salaman bin meigim melabat wek brabli adbala, bat if yu nomo meigim melabat wek brabli adbala lagijat, wal melabat gin dum enijing yu askim melabat blanga dum.”   
\p
\v 5 Wal King Reiyabowam bin tok, “Ai garra jinggabat dijan. Yumob garra kambek thrideistaim langa mi.” Wal ola pipul bin gowei na.   
\p
\v 6 King Reiyabowam bin askim ola olmen hubin jidan boswan lida blanga im dedi King Salaman, “Wanim ai garra dalim ola pipul?”   
\p
\v 7 Deibin tok, “If yu wandim ola pipul blanga album yu en duwit langa yu, wal yu garra kain langa olabat en tok langa olabat gudwei.”  
\v 8 Bat King Reiyabowam nomo bin teiknodis langa detlot olmen en imbin go langa ola yangmen hubin growap mijamet garram im en hubin jidan boswan lida blanga im na.  
\v 9 Imbin tok, “Wanim yumob reken ai garra dum? Wanim ai garra dalim detlot pipul hubin askim mi nomo blanga meigim olabat wek brabli adbala?”   
\p
\v 10 Deibin tok, “Wal melabat reken yu garra lafta tok, ‘Main dedi bin strongbala, bat ai garra jidan mowa strongbala.  
\v 11 Main dedi bin meigim yumob wek adbala, bat ai garra meigim yumob wek mowa adbala. Main dedi bin yusum wip langa yumob, bat ai garra yusum stokwip langa yumob.’”   
\p
\v 12 Wal thrideistaim Jerabowam en ola pipul bin kambek langa King Reiyabowam laik imbin dalim olabat.  
\v 13 King Reiyabowam nomo bin teiknodis langa detlot olmen hubin wek blanga im dedi en imbin tok rafwei langa ola pipul,  
\v 14 jis laik wanim detlot yangmen bin dalim im blanga tok, “Main dedi bin meigim yumob wek adbala, bat ai garra meigim yumob wek mowa adbala. Main dedi bin yusum wip langa yumob, bat ai garra yusum brabli strongwan stokwip langa yumob.”  
\v 15-19 Wen detlot pipul bin sabi King Reiyabowam nomo bin teiknodis langa olabat, deibin jingat adbala, “Wi kaan rispek langa Deibid femilimob na. Dei nomo bin album wi! Wi garra gobek langa wi ronwan kantri. King Reiyabowam gin lukaftumbat im ronwan pipul na.” Lagijat na deibin gibit bekboun langa im.  
\p Wal King Reiyabowam bin jandim Edaniram hubin jidan bos blanga ola wekinmen hu nomo bin gedim pei, blanga tok langa detlot pipul, bat deibin stonim im en kilim im ded. Wal King Reiyabowam bin go kwikbala garram im bagi en bin gobek langa Jerusalem.  
\p Brom det taim na ola Isreil pipul brom det nowathwan kantri gulum Isreil bin gibit bekboun langa ola bigininimob blanga Deibid langa det sauthwan kantri gulum Juda. En Reiyabowam bin jidan king oni blanga detlot pipul hubin jidan langa Juda. Basdam det speshalwan mesinja blanga YAWEI gulum Ahija brom Shilo bin tok langa Jerabowam hau ol dislot ting garra hepin, en imbin hepin lagijat na.\x + \xo 10:15-19 \xt 2 Sem 20:1\x* \fig Det nowathwan kantri gulum Isreil en det sauthwan kantri gulum Juda|src="map 1 Ki 12-19 K.tif" size="col" ref="10:15" \fig*   
\c 11  
\s1 Shemaiya bin gedim mesij brom YAWEI  
\r Fes Kings 12:21-24  
\p
\v 1 Wal wen King Reiyabowam bin kamat deya langa Jerusalem, imbin jingat en majurrumap 180,000 brabli gudwan solja brom det dubala klen gulum Benjamin en Juda. Imbin wandi go langa wo en jidan bos igin blanga detlot pipul brom det nowathsaid kantri langa Isreil.  
\v 2-3 Bat YAWEI det trubala God bin dalim det speshalwan mesinja gulum Shemaiya blanga gibit dijan wed langa King Reiyabowam, en langa detlot pipul blanga det Benjamin klen en det Juda klen.  
\v 4 YAWEI bin tok, “Yumob nomo go en fait langa yumob ronwan femilimob, ola Isreil pipul. Yumob ol gobek langa yumob ron kantri na. Mi na bin meigim dis ting hepin.” Wal deibin teiknodis langa YAWEI en olabat nomo bin fait garram King Jerabowam.   
\s1 King Reiyabowam bin meigim detlot taun jidan strongbala  
\p
\v 5-10 King Reiyabowam bin jidan langa Jerusalem en imbin meigim brabli strongbala ol dislot taun langa Juda en Benjamin, Bethlahem, Itam, Tekowa, Bethsuwa, Sako, Edulam, Geth, Maresha, Sif, Edaraiyim, Leikish, Esaka, Sora, Ejalan en Hebran.  
\v 11 Afta imbin meigim detlot taun brabli strongbala imbin pudum ola boswan solja lida langa ebri taun en imbin gibit daga, oliboil en wain langa ebriwan,  
\v 12 en imbin pudum shild en spiya deya du. Imbin jidan king blanga Juda en Benjamin na.   
\s1 Ola serramonimen en ola Libaimen bin kaman langa Juda  
\p
\v 13 Wal brom oloba langa det kantri gulum Isreil, ola serramonimen en ol detlot Libaimen bin kaman sauthwei langa Juda blanga albumbat King Reiyabowam.  
\v 14 Detlot Libaimen bin libum olabat fam en olabat bin go langa Juda en Jerusalem, dumaji King Jerabowam brom Isreil, en detlot king hubin kaman afta im nomo bin larram detlot serramonimen dum det wek blanga YAWEI deya langa Isreil.  
\v 15 King Jerabowam bin pikimat serramonimen blanga im blanga wek langa detlot pleis weya deibin oldei weshipbat detlot dibuldibul en drimin sheip deibin meigim jis laik buligi.\x + \xo 11:15 \xt 1 King 12:31\x*  
\v 16 Bat sambala Isreil pipul bin wandim weship YAWEI laik olabat grengrenfathamob bin dum, en deibin bulurrum detlot Libaimen langa Jerusalem, wulijim olabat gin gibit sekrifais ofring langa YAWEI.  
\v 17 Fo 3 yiya deibin album King Reiyabowam det san blanga Salaman en deibin meigim det kantri blanga Juda jidan brabli strongbala. Deibin wek gudwei blanga im laik deibin dum langa King Deibid en King Salaman bifo.   
\s1 Femili blanga King Reiyabowam  
\p
\v 18 Wal King Reiyabowam bin merrit langa det gel neim Mahalath. Im dedi bin Jerimath hubin san blanga Deibid, en im mami bin Ebiheil det doda blanga Eliyab en grendoda blanga Jesi.  
\v 19 Dubala bin abum thribala san neim Jeyus, Shemaraiya, en Seiham.  
\v 20 Bambai King Reiyabowam bin merrit langa Meiyaka det doda blanga Ebsalom, en deibin abum fobala san neim Abaija, Etai, Sisa en Shelomith.  
\v 21 King Reiyabowam bin abum 18 waif en imbin abum 60 mowa gel, en imbin jidan dedi blanga 28 san en 60 doda. Brom ol detlot waifmob imbin laigim Meiyaka brabliwei,  
\v 22 en imbin laigim det san blanga Meiyaka neim Abaija brabliwei. Imbin pikimat im blanga jidan det nekswan king.  
\v 23 King Reiyabowam bin sabi gudwei en imbin meigim im sanmob jidan bos blanga ola strongwan taun langa Juda en Benjamin. Imbin gibit olabat blendibala ebrijing en imbin faindim sambala waif blanga olabat.   
\c 12  
\s1 King Shishak bin teikoba Juda  
\r Fes Kings 14:25-28  
\p
\v 1 Wal wen Reiyabowam bin jidan king, im en ol im pipul olabat bin gibit bekboun langa det lowa blanga YAWEI.  
\v 2 Wal dumaji deibin lagijat, langa det namba 5 yiya wen Reiyabowam bin jidan king, YAWEI bin panishim olabat. King Shishak brom Ijip bin kaman blanga fait langa ola pipul langa Jerusalem garram im amimob.  
\v 3 Imbin abum 1,200 bagi, 60,000 hosmen en blendibala solja weya nobodi kaan kaundimap. Imbin abum detlot ami brom Libiya, Sukait en Ithiyopiya du.  
\v 4 Imbin teikoba ola strongwan taun langa Juda en imbin go raidap langa Jerusalem.   
\p
\v 5 Wal Shemaiya det serramonimen bin go langa King Reiyabowam en detlot lidamob brom Juda hubin majurrumap miselp langa Jerusalem, dumaji deibin ranawei brom King Shishak. Imbin tok langa olabat, “YAWEI bin tok, ‘Yumob bin gibit bekboun langa mi en libum mi, wulijim ai garra libum yumob langa King Shishak.’”   
\p
\v 6 King Reiyabowam en ola boswan blanga im, deibin brabli nogudbinji en deibin sabi deibin dum brabli nogudbala ting en deibin tok, “Ebrijing YAWEI dumbat im trubala.”  
\v 7 Wen YAWEI bin irrim olabat bin tok lagijat, imbin tok langa Shemaiya igin, “Dumaji olabat bin sori miselp blanga olabat nogudbalawei, ai kaan binijimap olabat. Mi wail langa olabat bat ai kaan larram King Shishak kilim olabat brabli,  
\v 8 bat ai garra larram King Shishak teikoba det pleis na en main pipul olabat garra sabi wen dei wek blanga det king im brabli adwek, bat im difrin if dei wek blanga mi.”   
\p
\v 9 Wal King Shishak bin kaman langa Jerusalem en imbin deigimwei ola brabli gudwan ebrijing brom det Serramoni Pleis en brom det bigwan haus blanga det king. Imbin deigimwei ebrijing en ola golwan shild weya King Salaman bin meigim du.\x + \xo 12:9 \xt 1 King 10:16,17; 2 Kran 9:15,16\x*  
\v 10 Wal King Reiyabowam bin meigim ola kopawan shild blanga deigim pleis blanga ol detlot gol en silba shild, en imbin dalim ola solja hubin oldei lukaftumbat det geit blanga det bigwan haus blanga maindimbat olabat.  
\v 11 Ebritaim wen det king bin oldei go langa det Serramoni Pleis, detlot solja bin oldei garrimap detlot shild blanga lukaftumbat det king, en afta deibin oldei pudumbek olabat langa det speshalwan rum blanga olabat.  
\v 12 Dumaji imbin dum wanim YAWEI bin tok, YAWEI nomo bin wandi binijimap im streidawei, en ebrijing bin jidan gudwei langa Juda.   
\s1 Wanim bin hepin langa King Reiyabowam taim  
\r Fes Kings 14:21,29-31  
\p
\v 13 Wal Reiyabowam bin 41 yiya ol wen imbin jidan king en imbin king fo 17 yiya langa Jerusalem, det taun weya YAWEI bin pikimat brom ola kantri langa Isreil blanga weshipbat im. Det mami blanga King Reiyabowam bin neim Neima en imbin brom det kantri gulum Eman.  
\v 14 Reiyabowam bin dum nogudbala ting, dumaji im nomo bin wandim dum wanim God bin wandim im blanga dum.   
\p
\v 15 Ola ting weya King Reiyabowam bin dum brom basdam raidap imbin binij, en ebrijing im femilimob bin dum deibin raidimdan holot langa det dubala buk gulum \it Ola stori blanga Shemaiya det speshalwan mesinja,\it* en \it Ola stori blanga Ido det speshalwan mesinja\it*. King Reiyabowam brom Juda en King Jerabowam brom Isreil bin oldei faitfaitbat.  
\v 16 King Reiyabowam bin dai en deibin berrim im bodi langa det pleis weya dei oldei berrim ola king deya langa Jerusalem, det taun blanga Deibid, en im san Abaija bin jidan det nyuwan king.   
\c 13  
\s1 King Abaija bin fait langa King Jerabowam  
\r Fes Kings 15:1-8  
\p
\v 1 Wal Jerabowam bin jidan king blanga Isreil fo 18 yiya. En langa det yiya na, deibin meigim Abaija jidan det nyuwan king blanga Juda.  
\v 2 Abaija bin jidan king fo thribala yiya langa Jerusalem. Im mami bin Maikaiya det doda blanga Yuriyel brom det taun gulum Gibiya.  
\p Bambai King Abaija en King Jerabowam bin gitredi blanga fait.  
\v 3 King Abaija bin abum 400,000 solja blanga im ami en King Jerabowam bin abum 800,000 solja blanga im ami.  
\v 4 Detlot ami bin midap langa det hil kantri gulum Ifreiyim. King Abaija bin gowap ontop langa det hil gulum Semaraiyim en imbin jingat langa King Jerabowam en ola Isreil pipul. Imbin tok, “Yumob irrim mi na.  
\v 5 Yumob nomo sabi? YAWEI det God blanga ola Isreil pipul bin meigim brabli strongbala pramis langa King Deibid, weya im femilimob garra jidan king blanga Isreil olataim.  
\v 6 Jerabowam det san blanga Neibat bin gibit bekboun langa Salaman, im king.  
\v 7 Bambai imbin majurrumap loda nogudwan men en deibin meigim King Reiyabowam dum wanim deibin wandim, dumaji imbin oni yangboi.   
\p
\v 8 “Bat yu en yu amimob reken yumob gin jandap strongbala en fait langa detlot pipul weya YAWEI bin gibit langa ola bigininimob blanga Deibid. Bat yumob oni sabi ola drimin sheip weya King Jerabowam bin meigim garram gol weya luk jis laik buligi.  
\v 9 Yu nomo garram bigininimob blanga Eran, ol detlot serramonimen blanga YAWEI langa yumob said, dumaji yubin jandimwei ol detlot serramonimen blanga YAWEI en ola Libai pipul du. En deya langa olabat pleis yumob bin meigim odinri pipul jidan serramonimen, jis laik ola najalot kantri dum. Enibodi hu bringimap boiwan buligi en 7 dediwan ship langa det ofring teibul blanga sekrifais gin jidan serramonimen blanga yumob drimin.   
\p
\v 10 “Bat melabat nomo bin gibit bekboun langa YAWEI. Ola bigininimob blanga Eran jidan serramonimen blanga melabat, en detlot Libai pipul album olabat.  
\v 11 Ebri ailibala en sangodantaim olabat oldei gibit barnapwan sekrifais ofring holbit en ola gudsmelwan medisin langa YAWEI. Dei pudum det seikridwan daga langa det teibul weya deibin meigim klinbala blanga serramoni. Dei laidim detlot lemp langa detlot golwan lempsten ebri naitaim wen im sangodan. Melabat oldei duwit wanim YAWEI wandim melabat blanga dum, bat yumob bin gowei en libum im.  
\v 12 Wal blanga tharran na God jidan garram melabat en im garra go lida langa melabat wen melabat go blanga fait wen detlot serramonimen blowim detlot longwan wisul. Wal im nomo eni gud yumob Isreil pipul. Yumob lafta gibap. Yumob kaan bidim YAWEI det God blanga yumob grengrenfatha weya olabat bin weshipbat.” Lagijat na King Abaija bin tok.   
\p
\v 13 Bat wen King Abaija bin stil toktokbat, King Jerabowam bin jandim sambala solja blanga fait det Juda amimob brom biyain, en najalot bin fait lida langa olabat.  
\v 14 Det ami blanga Juda bin sabi deibin git trep, en deibin prei langa YAWEI. Detlot serramonimen bin blowim detlot longwan wisul,  
\v 15 en ola solja bin jingat adbala. Wal King Abaija bin go lida langa im amimob blanga fait en God bin bidim King Jerabowam en im amimob.  
\v 16-17 Ola Isreil solja bin ranawei, en God bin album ola Juda solja kilim ded 500,000 Isreil solja.  
\v 18 Det amimob blanga Juda bin win, dumaji deibin trastim langa YAWEI det trubala God blanga olabat grengrenfathamob.   
\p
\v 19 Wal King Abaija bin kipgon ranimap en fait langa King Jerabowam en im amimob en imbin teikoba detlot Isreil taun gulum Bethel, Jeshana en Ifran en ola lilwan taun gulijap langa detlot thribala taun.  
\v 20 King Jerabowam nomo bin gajimbek im pawa olataim Abaija bin jidan king. YAWEI bin panishim King Jerabowam en imbin dai, bat King Abaija bin jidan mowa strongbala.  
\v 21 King Abaija bin abum 14 waif, 22 san, en 16 doda.  
\v 22 Ola ebrijing Abaija bin dum wen imbin jidan king deibin raidimdan langa det buk gulum \it Ola stori blanga Ido det speshalwan mesinja.\it*   
\c 14  
\p
\v 1 King Abaija bin dai en deibin berrim im bodi deya langa Jerusalem, en im san Asa bin jidan det nyuwan king, en det kantri Juda bin jidan gudwei fo 10 yiya. Dei nomo bin abum eni trabul.   
\s1 King Asa blanga Juda  
\p
\v 2 Wal King Asa bin duwit langa YAWEI det trubala God blanga im, en imbin dum ebrijing raitwei.  
\v 3 Imbin binijimap detlot teibul blanga ofring en serramoni pleis blanga detlot drimin blanga najalot pipul. Imbin smeshimap detlot stonwan drimin sheip, en kadimdan detlot seikridwan pol deibin yusum blanga weshipbat det gelwan drimin gulum Eshara.  
\v 4 En imbin dalimbat ebribodi langa Juda blanga weshipbat YAWEI jis laik olabat grengrenfathamob bin dum, en bulurrum en duwit langa ol im lowa en ola ting imbin titjimbat.  
\v 5 Imbin binijimap ebri seikridwan pleis en teibul blanga ofring weya deibin yusumbat det gudsmelwan medisin blanga detlot drimin blanga najalot pipul deya langa Juda.   
\p
\v 6 YAWEI bin meigim ola pipul langa Juda jidan gudwei. Olabat nomo bin abum trabul olataim Asa bin jidan king, en langa tharran taim King Asa bin meigim loda taun jidan brabli strongbala.  
\v 7 Imbin tok langa ola pipul, “Langa dislot taun wi garra bildimap wol en bigwan haus blanga wotjimbat blanga enamimob. Wi garra pudum geit weya wi gin lokimap garram ba. Dijan kantri blanga wi, dumaji wibin duwit langa YAWEI. Im na bin meigim wi jidan gudbalawei, nomo garram enami.” Wal ola pipul bin dum wanim King Asa bin tok.  
\v 8 King Asa bin abum bigwan ami garram brabli gudwan solja. Detlot solja bin 300,000, en deibin kaman brom det Juda klen en deibin abum bigwan shild en spiya. En najalot 280,000 solja bin kaman brom det Benjamin klen en deibin abum lilwan shild en bo en erro en deibin brabli strongbala solja.   
\s1 Juda bin bidim det ami brom Ithiyopiya  
\p
\v 9 Wanbala men neim Sera brom Ithiyopiya bin kaman garram 1,000,000 solja en 300 bagi langa det taun gulum Maresha deya langa Juda.  
\v 10 King Asa bin midim im deya en det dubala ami bin gitredi blanga fait deya langa det Sefatha Beli gulijap langa Maresha.  
\v 11 King Asa bin prei langa YAWEI im God, “YAWEI, oni yu na gin album melabat garram det pawa blanga yu blanga bidim detlot brabli strongbala amimob en melabat luk langa yu blanga album melabat. Dumaji melabat trastimbat yu en langa yu neim melabat garra fait langa detlot strongbala amimob. Yu nomo larram olabat bidim yu. Yu na YAWEI det trubala God blanga melabat.”  
\v 12 Wal YAWEI bin album King Asa en im amimob bidim det Ithiyopiya amimob. En detlot enami soljamob bin ol ranawei.  
\v 13 Bat King Asa en im amimob bin tjeisimap olabat raidap langa Gera. Deibin bidim olabat deya na. Detlot Ithiyopiya soljamob nomo bin faitbek na, najing.  
\p Detlot soljamob brom Juda bin gajim ebrijing weya ola Ithiyopiya soljamob bin abum.  
\v 14 Wen detlot pipul hubin jidan langa ola lilwan taun raidaran langa Gera bin irrim det nyus, deibin brabli bradin blanga YAWEI. Detlot Juda amimob bin fait langa ol detlot lilwan taun en deibin deigimwei ola gudwan ebrijing deibin wandim brom detlot taun.  
\v 15 En deibin binijimap ol detlot kemp du weya ola stakmen bin oldei jidan, en deibin gajim loda ship, gout en kemul en deibin gobek langa Jerusalem.   
\c 15  
\s1 King Asa bin binijimap ola drimin sheip langa Juda  
\p
\v 1 Bambai God bin tok langa Asaraiya det san blanga Oded.  
\v 2 Streidawei Asaraiya bin go langa King Asa en imbin tok, “Yu irrim mi na King Asa en ol yu pipul olabat blanga Juda en Benjamin. YAWEI det trubala God garra jidan garram yumob en im garra album yumob olataim if yumob duwit langa im en weshipbat im, bat if yumob kaan duwit langa im, wal im garra libum yumob.   
\p
\v 3 “Fo longtaim na, ola Isreil pipul nomo bin weshipbat langa YAWEI en nomo bin teiknodis langa detlot serramonimen hubin titjimbat olabat blanga God. Dei nomo bin kipum det lowa blanga God.  
\v 4 Bat wen trabul bin oldei kaman langa olabat deibin oldei wandim kambek langa YAWEI det trubala God blanga olabat en weshipbat im.   
\p
\v 5 “Loda nogudbala ting bin hepin langa det taim en im nomo bin seifwan pleis deya langa Isreil.  
\v 6 Detlot solja, deibin faitfait gija en binijimapbat pipul langa ebri kantri en taun, dumaji God bin meigim ebribodi abumbat trabul ebriweya.   
\p
\v 7 “Wal yumob garra jidan strongbala. Nomo gibap. God garra jidan gudwei langa yumob if yumob duwit langa im.” Lagijat na Asaraiya bin tok.   
\p
\v 8 Wal streidawei wen King Asa bin irrim wanim Esaraiya det speshalwan mesinja bin tok, imbin gibit oda langa im wekinmen olabat blanga binijimap ola drimin sheip langa Juda en Benjamin en langa detlot taun weya imbin gajimbek langa det kantri gulum Ifreiyim. En imbin meigim gudwan igin det teibul blanga ofring blanga YAWEI weya jidan langa det kotyad langa det Serramoni Pleis.   
\p
\v 9 Wal King Asa bin majurrumap ola pipul brom Juda en Benjamin, en detlot pipul hubin kaman basdam en jidan langa Juda brom detlot kantri gulum Ifreiyim, Manesa en Simiyan. Bigmob dislot pipul bin jidan trubala langa King Asa, dumaji deibin luk YAWEI bin jidan garram im.   
\p
\v 10 Wal langa det namba 15 yiya langa det namba 3 manth wen King Asa bin jidan king, deibin ol midap langa Jerusalem.  
\v 11 En langa det seimwan dei, deibin deigim 700 buligi en 7,000 ship en gout weya deibin gajim brom ola enimul deibin bringimbek brom det kantri gulum Gera en deibin gibit olabat blanga sekrifais ofring langa YAWEI.  
\v 12 Deibin meigim brabli strongbala pramis blanga weshipbat langa YAWEI hu olabat grengrenfathamob bin oldei weship,  
\v 13 en if enibodi yang o ol pipul, gel o boi nomo duwit langa YAWEI, wal dei garra kilim im ded.  
\v 14 Wal detlot pipul bin agri brabliwei blanga kipum det brabli strongbala pramis blanga YAWEI, en afta deibin abum bigbala padi en jingat gudbinjiwei en pleipleibat myusik.  
\v 15 Ebribodi bin brabli gudbinji dumaji deibin meigim det brabli strongbala pramis na. Deibin lukabat YAWEI en deibin faindim im en brom deya YAWEI bin larram olabat jidan gudbalawei nomo garram eni trabul brom ola enamimob.   
\p
\v 16 Wal King Asa bin jandimwei im grenmatha Meiyaka brom det speshalwan wek weya det mamiwan kwin bin oldei dum, dumaji imbin meigim brabli nogudwan drimin sheip blanga det drimin gulum Eshara. Wal King Asa bin kadimdan en bitsimap det nogudwan drimin sheip en imbin barnimap im langa det Kidron Beli.  
\v 17 Olataim King Asa bin jidan laibala imbin kipgon bulurrum YAWEI trubalawei, nomeda im nomo bin binijimap ola drimin sheip en nogudwan weship pleis langa Isreil.  
\v 18 Imbin pudum langa det Serramoni Pleis blanga YAWEI ola silba en gol enijing weya im en im dedi bin gibitbat langa im.  
\v 19 Wal Juda bin jidan gudbalawei nomo garram eni trabul brom olabat enamimob fo 35 yiya wen King Asa bin jidan king.   
\c 16  
\s1 King Beisha brom Isreil bin teikoba Juda  
\r Fes Kings 15:16-22  
\p
\v 1 Wal langa det namba 36 yiya wen King Asa bin jidan king, King Beisha brom Isreil bin kaman en fait langa ola Juda pipul en imbin teikoba det taun gulum Rema. Imbin meigim det taun jidan strongbala, en imbin pudum im amimob deya, wulijim nobodi gin gowin o kamat brom det kantri gulum Juda.  
\v 2 Wen King Asa bin irrim det nyus imbin gajim detlot silba en gol brom im ronwan haus en brom det Serramoni Pleis blanga YAWEI det trubala God. Imbin jandim ol detlot silba en gol langa det taun gulum Dameskas garram leda blanga King Benaded brom Siriya.  
\v 3 Det leda bin tok, “Ai reken wi lafta sainim peipa blanga meigim pramis wi garra jidan gudfren, jis laik wi dedimob bin dum. Ol dislot silba en gol im presen blanga yu. Maitbi yu garra breigim det pramis yubin meigim garram King Beisha brom Isreil en meigim im libum main kantri.”   
\p
\v 4 Wal King Benaded bin dum wanim King Asa bin askimbat im, en imbin jandim im ami brom Siriya blanga fait langa detlot Isreil pipul. Deibin gajim detlot taun gulum Aijon, Den, Ebulbethmaka, en ola taun langa Neftali weya deibin kipum ola ebrijing.  
\v 5 Wal wen King Beisha bin irrim dijan, imbin stapam det wek blanga im deya langa det taun gulum Rema.  
\v 6 King Asa bin gibit oda langa ebriwan langa Juda blanga deigimwei ola ston en wud weya King Beisha bin yusum blanga meigim Rema strongwan. En imbin meigim strongbala det dubala taun gulum Geba en Mispa garram detlot seimwan ston en wud.   
\s1 Henanai det speshalwan mesinja bin tok adbala langa King Asa  
\p
\v 7 Wal langa det taim na Henanai det speshalwan mesinja bin go langa King Asa en imbin tok, “Yubin askim det king brom Siriya blanga album yu, bat yu nomo bin askim YAWEI blanga album yu. Wal yu kaan neba bidim detlot Siriya pipul.  
\v 8 Wal yu jinggabat haumatj pawa det Ithiyopiya en Libiya ami bin abum, garram detmatj hosis en bagi en soljamob. Yubin trastim YAWEI blanga album yu det taim, en yubin bidim olabat.  
\v 9 YAWEI im oldei wotjimbat ebribodi, en im meigim strongbala detlot hu oldei duwit trubalawei langa im. Bat yubin dum nogudbala ting, en blanga tharran na yu kantri kaan jidan gudbala igin.”   
\p
\v 10 Wal wen King Asa bin irrim dijan imbin gitwail detmatj en imbin pudum Henanai langa jeil en imbin stat dumbat brabli krulbala ting langa im ronwan pipul olabat.   
\s1 King Asa bin dai  
\r Fes Kings 15:23,24  
\p
\v 11 Wal ebrijing King Asa bin dum wen imbin jidan king, deibin raidimdan langa det buk gulum \it Ola stori blanga ola king brom Juda en Isreil.\it*  
\v 12 Langa det namba 39 yiya wen King Asa bin jidan king, imbin abum brabli nogudwan siknis langa im fut, bat imbin oni luk langa dokta blanga album im. Im nomo bin askim YAWEI blanga album im.  
\v 13 Bambai 2 yiya taim imbin dai.  
\v 14 Bifo imbin dai deibin kadimat det rokwan greib blanga im deya langa det hil langa det taun blanga Deibid. Wal deibin berrim im bodi deya en deibin bilimap det pleis garram gudsmelwan oil en switwan smelwan ebrijing. Afta na, ola pipul bin meigim bigwan faiya blanga shoum rispek langa im.   
\c 17  
\s1 King Jehosafet blanga Juda  
\p
\v 1 Wal King Jehosafet det san blanga Asa bin jidan king en imbin brabli strongbala king en imbin meigim Juda mowa strongbala langa Isreil.  
\v 2 Imbin pudum soljamob langa detlot strongwan taun langa Juda, en langa det kantri, en langa detlot taun weya Asa bin teikoba langa det kantri gulum Ifreiyim.  
\v 3 Wal YAWEI det trubala God bin kain langa King Jehosafet, dumaji imbin dum wanim im dedi bin oldei titjimbat im, en im nomo bin oldei weshipbat det drimin sheip gulum Beil.  
\v 4 Imbin oldei weshipbat oni YAWEI hu im dedi bin oldei weshipbat en imbin duwit wanim God bin oldei dalim im. En im nomo bin bulurrum detlot ting ola king blanga ola Isreil pipul bin oldei dum.  
\v 5 Wal YAWEI bin meigim King Jehosafet jidan strongbala king blanga detlot Juda pipul, en ol detlot pipul bin oldei bringimap gudwan enijing langa im, wulijim imbin brabli ritjwan, en deibin meigim im brabli haibala langa olabat.  
\v 6 En imbin oldei dum gudwan wek blanga YAWEI en imbin bitsimap en binijimap ola enijing langa Juda weya deibin weshipbat det gelwan god gulum Eshara.   
\p
\v 7 Langa det namba 3 yiya wen imbin jidan king langa det kantri imbin jandim im faibala boswan wekinmen blanga go en titjimbat ola pipul langa detlot taun blanga Juda. Olabat neim bin Beneil, Obadaiya, Sekaraiya, Nethanel en Maikaiya.  
\v 8 En deibin pikimat nainbala Libaimen en dubala serramonimen blanga go garram olabat. Detlot Libaimen bin neim Shemaiya, Nethanaiya, Sebadaiya, Esahel, Shemiramoth, Jehonathan, Edanaija, Tobija en Tobadonija, en det dubala serramonimen bin neim Ilaishama en Jehoram.  
\v 9 Deibin gajim det buk garram ola lowa blanga YAWEI, en deibin go langa ol detlot taun blanga Juda, en deibin titjimbat ola pipul.   
\s1 King Jehosafet bin brabli haibalamen  
\p
\v 10 Wal YAWEI bin meigim ola pipul langa ola kantri gulijap langa Juda bradin blanga fait langa det King Jehosafet.  
\v 11 Sambala Filastain pipul bin bringimap loda silba en najalot gudwan enijing blanga King Jehosafet en sambala brom Areibiya bin gibit im 7,700 ship en 7,700 gout.  
\v 12 Wal King Jehosafet bin jidan mowa brabli haibala king na. Olaran langa Juda imbin bildimap brabli strongbala taun,  
\v 13 weya imbin hipapbat bigmob ebrijing.  
\p En langa Jerusalem na imbin abum ola brabli gudwan soljamob  
\v 14 brom olabat klen. Wal Edna bin det boswan blanga det Juda klen, en imbin abum 300,000 solja blanga im.  
\v 15 Jehohana det sekanwan bos bin jidan bos blanga 280,000 solja,  
\v 16 en Amasaiya det san blanga Sikri bin jidan det namba thri bos blanga 200,000 solja. Wal Amasaiya bin gibit miselp blanga wek blanga YAWEI.  
\v 17 Eliyada bin det bos blanga detlot solja blanga det Benjamin klen. Imbin brabli gudwan solja en imbin jidan bos blanga 200,000 solja en deibin fait garram bo en erro en garram shild.  
\v 18 En det sekanwan bos blanga det Benjamin klen bin Jehosabed en imbin jidan bos blanga 180,000 solja redi blanga fait.  
\v 19 Wal dislot solja bin oldei maindimbat en wek blanga det king langa Jerusalem, en imbin abum najalot soljamob langa detlot strongbala taun langa Juda.   
\c 18  
\s1 King Eiheb bin gedim woning  
\r Fes Kings 22:1-28  
\p
\v 1 Wal wen King Jehosafet brom Juda bin jidan ritjwan en haibala, imbin meigim plen blanga wanbala san brom im femili blanga merrit wanbala gel brom det femili blanga King Eiheb brom Isreil.  
\v 2 Bambai King Jehosafet bin go langa det taun gulum Sameriya blanga tok langa King Eiheb. Blanga shoum rispek langa King Jehosafet, King Eiheb bin kilim loda ship en buligi blanga abum padi. Imbin trai blanga askimbat King Jehosafet blanga joinin langa im en fait detlot pipul langa det taun gulum Remoth langa Giliyad.  
\v 3 Imbin tok, “Yu redi blanga kaman en album mi fait blanga gajimbek det taun gulum Remoth?”  
\p En King Jehosafet bin tok, “Mi redi blanga go garram yu en main amimob olabat redi du,  
\v 4 bat wi garra askim YAWEI det trubala God wanim wi garra dum basdam.”   
\p
\v 5 Brom deya King Eiheb bin majurrumap ola speshalwan mesinja. Deibin jidan 400 mesinja, en imbin askim olabat, “Im rait if minbala go en fait langa detlot pipul langa det taun gulum Remoth o najing?”  
\p Detlot speshalwan mesinja bin tok, “Yunbala go, dumaji God garra album yunbala blanga bidim olabat.”   
\p
\v 6 Bat King Jehosafet bin askim olabat, “Enimo speshalwan mesinja blanga YAWEI jidan iya blanga askim im wanim wi garra dum?”   
\p
\v 7 Wal King Eiheb bin tok, “Yuwai. Wanbala mowa speshalwan mesinja blanga YAWEI im jidan iya. Im Maikaiya, det san blanga Imla, bat ai nomo laigim im, dumaji im nomo tok gudbala ting blanga mi. Im oldei tok nogudbalawei blanga mi.”  
\p Wal King Jehosafet bin tok, “Yu nomo lau tok lagijat!”   
\p
\v 8 Brom deya King Eiheb bin dalim wan haibala wekinmen blanga bringimap Maikaiya langa im streidawei.   
\p
\v 9 Wal King Eiheb brom Isreil en King Jehosafet brom Juda bin werrimon detlot speshalwan klos blanga ola king. Dubala bin jidanbat deya atsaid langa det geit blanga Sameriya gulijap langa det pleis weya dei oldei deigimatbat ola rabish brom detlot sid daga. Ola speshalwan mesinja bin jandapbat deya lida langa dubala en toktok detlot wed weya dei reken YAWEI bin tok.  
\v 10 En wanbala speshalwan mesinja bin deya neim Sedakaiya det san blanga Kenana. Imbin oldei meigim sambala aiyanwan hon. En imbin tok langa King Eiheb, “YAWEI bin tok dijan, ‘Yunbala garra yusum dislot hon blanga fait langa ol detlot Siriya pipul, en yunbala garra binijimap olabat holbit.’”  
\v 11 En ola najalot speshalwan mesinja bin tok det seimwan wed, “Yunbala garra fait langa detlot pipul langa Remoth en yunbala garra bidim olabat. YAWEI garra meigim yunbala bidim olabat.”   
\p
\v 12 Det haibala wekinmen hubin go blanga gedim Maikaiya bin faindim im en imbin tok langa Maikaiya, “Ola najalot speshalwan mesinja bin tok det king garra binijimap ola Siriya solja, en yu garra lafta tok seimwei laik olabat bin tok.”   
\p
\v 13 Bat Maikaiya bin tok, “Trubala ai dalim yu. Ai garra oni tok wanim YAWEI bin dalim mi.”   
\p
\v 14 Afta na wen Maikaiya bin kaman deya langa King Eiheb, det king bin tok, “Maikaiya, wanim yu reken? Mi en King Jehosafet garra go en fait langa detlot pipul langa Remoth o najing?”  
\p Wal Maikaiya bin tok, “Yuwai, yunbala garra lafta go en fait en YAWEI garra meigim yunbala bidim olabat.”   
\p
\v 15 Bat King Eiheb bin tok, “Wen yu tok langa mi yu tok trubalawei garram det neim blanga YAWEI. Haumeni taim ai garra dalim yu dijan?”   
\p
\v 16 Wal Maikaiya bin tok, “Ai gin luk detlot solja blanga Isreil jidan ebriweya deya langa det hil kantri, jis laik ola ship weya nomo garram eni stakmen. En YAWEI bin tok, ‘Dislot men nomo garram king. Larram olabat gobek langa olabat kemp gudbalawei.’”\x + \xo 18:16 \xt Nam 27:17; Isik 34:5; Meth 9:36; Mak 6:34\x*   
\p
\v 17 Wal King Eiheb bin tok langa King Jehosafet, “Aibin dalim yu, im oldei gibit mi nogudwan nyus. Im oldei tok nogudbala ting blanga mi!”   
\p
\v 18 Wal Maikaiya bin kipgon tok, “Yu irrim wanim YAWEI tok na! Aibin luk YAWEI jidan deya ontop langa skai langa im speshalwan tjeya garram ola einjul blanga im jandapbat wansaid langa im.  
\v 19 Wal YAWEI bin askim olabat, ‘Hu garra trikim King Eiheb wulijim im garra go en gitkil deya langa Remoth?’ Sambala einjul bin tok wanbala ting, en najalot bin tok najawan ting.  
\v 20 Afta na wanbala spirit bin kaman en jandap lida langa YAWEI en imbin tok, ‘Ai garra trikim im.’ Wal YAWEI bin askim im, ‘Hau yu garra trikim King Eiheb?’   
\p
\v 21 “En det spirit bin tok, ‘Ai garra go en meigim ola speshalwan mesinja blanga im dalimbat laiya.’ En YAWEI bin tok, ‘Yuwai. Yu go trikim King Eiheb, dumaji detlot speshalwan mesinja garra teiknodis langa yu.’”   
\p
\v 22 Wal Maikaiya bin kipgon tok, “Wal King Eiheb, lagijat na dis ting bin hepin, dumaji YAWEI bin larram ol dislot speshalwan mesinja dalim yu laiyawan wed. Bat YAWEI imselp tok, ‘Brabli bigbala trabul garra kaman langa yu.’”   
\p
\v 23 Afta na det speshalwan mesinja neim Sedakaiya bin go langa Maikaiya en imbin hitim im langa im feis en Sedakaiya bin tok, “Wal brom wotaim det spirit blanga YAWEI bin libum mi en tok langa yu?”   
\p
\v 24 Wal Maikaiya bin tok, “Yu garra faindat wen yu go blanga blandim miselp rait insaid langa det haus.”   
\p
\v 25 Afta na King Eiheb bin dalim wanbala boswan wekinmen blanga im, “Go grebum Maikaiya en deigim im deya langa Sameriya langa det gabman bos neim Eman, en langa det hedbos neim Jowesh.  
\v 26 Dalim dubala blanga tjakam im insaid langa det jeil en deya na dei garra gibit im oni damba en woda raidap ai kambek.”   
\p
\v 27 Wal Maikaiya bin tok, “King Eiheb, if yu kambek, wal yu garra sabi YAWEI nomo bin tok thru langa mi. Ebribodi, yumob irrim mi! Yumob bin irrim wanim aibin tok!”   
\s1 King Eiheb bin dai langa Remoth  
\r Fes Kings 22:29-35  
\p
\v 28 Brom deya King Eiheb brom Isreil en King Jehosafet brom Juda bin go blanga fait langa det taun gulum Remoth deya langa det kantri gulum Giliyad.  
\v 29 King Eiheb bin tok langa King Jehosafet, “Wal wen wi garra go blanga fait, yu gin werrimon yu speshalwan king klos, bat mi ai garra trai en meigim miselp luk laik naja men.” Wal det king brom Isreil bin go blanga fait en imbin meigim miselp luk laik naja men.   
\p
\v 30 Det king brom Siriya bin dalim langa im boswan solja garram olabat bagi blanga fait oni langa det king brom Isreil.  
\v 31 Wal wen deibin luk King Jehosafet, garram det speshalwan klos, deibin reken imbin det king brom Isreil en deibin go blanga fait langa im. Bat King Jehosafet bin jingat en YAWEI bin lukaftumbat im en detlot enami bin tenbek brom im,  
\v 32 dumaji deibin sabi im nomo bin det king brom Isreil, en deibin stap det fait en deibin libum im na.  
\v 33 Bat wanbala solja brom Siriya bin shudum wan erro eniwei en imbin hitim King Eiheb rait weya im nomo bin gaburrumap miselp garram detlot speshalwan klos blanga fait. King Eiheb bin dalim im solja langa det bagi, “Deibin kilim mi! Gobek langa seifwan pleis na.”   
\p
\v 34 Wal wen det fait bin kipgon King Eiheb bin deya jidanbat langa im bagi wotjimbat detlot Siriya solja. En King Eiheb bin dai sangodantaim.   
\c 19  
\s1 Wanbala speshalwan mesinja bin tok adbala langa King Jehosafet  
\p
\v 1 Wal King Jehosafet brom Juda bin kambek seifwan en jidan langa im ronwan bigwan haus deya langa Jerusalem.  
\v 2 Wal wan speshalwan mesinja neim Jehu, hubin san blanga Henanai bin go blanga midap garram det king, en imbin tok langa im, “Wotfo yubin album detlot nogudbala pipul hu nomo laigim YAWEI det trubala God? Tharran na bin meigim YAWEI brabli wail langa yu.  
\v 3 Bat yu nomo brabli nogudbala. Yubin kadimat ol detlot seikridwan pol weya dei oldei weshipbat det gelwan drimin gulum Eshara, en yubin trai duwit blanga God.” Lagijat na Jehu bin tok.   
\s1 King Jehosafet bin meigim tjeinj  
\p
\v 4 Wal nomeda det King Jehosafet bin jidan langa Jerusalem, bat stil imbin go langa ola pipul nomeda weya deibin jidan, brom Biyashiba langa sauthwei, en imbin trebulin raidap langa det hil kantri blanga Ifreiyim langa nowathsaid, en imbin dalim ola pipul blanga kambek langa YAWEI, det God blanga olabat grengrenfathamob.  
\v 5 Imbin pudum haibala boswan jadjis langa ebri strongwan taun deya langa Juda,  
\v 6 en imbin dalim olabat, “Yumob garra lafta tok gudwei langa kotkeis, dumaji yu nomo wek blanga men bat yu wek blanga YAWEI, en im sabi wanim yu oldei dumbat wen yu kotimbat enibodi.  
\v 7 Wal yu garra lafta rispek langa im brabliwei, dumaji YAWEI nomo laigim yu garra toktok praudbalawei, en nomo gibitbat pipul feyago en deigim mani blanga enijing.” Lagijat na King Jehosafet bin tok.   
\p
\v 8 Wal deya langa Jerusalem King Jehosafet bin pikimat detlot Libaimen, en ola serramonimen, en sambala brabli gudwan lidamob blanga kotim enibodi langa God lowa en najalot lowa blanga pipul langa det taun.  
\v 9 Imbin dalim olabat dislot wed, “Yumob dum yumob wek brabliwei blanga YAWEI. Yumob garra rispek langa im en dum ebrijing im wandim yumob blanga dum.  
\v 10 Wal wen yumob kantrimen blanga detlot taun kaman en bringimap enibodi hubin medrim sambodi, o hubin breigim najalot lowa, yumob garra dalim im hau im garra jidan langa det kotkeis, wulijim im nomo dum nogudbala ting blanga YAWEI. If yumob nomo dum tharran, wal YAWEI garra wail langa yumob. Bat if yumob dum tharran wal yumob nomo gilti.  
\v 11 Wal Amaraiya det haibala serramonimen garra tok laswan wed garram enijing blanga serramonisaid kotkeis. En Sebadaiya det san blanga Ishmeil en det boswan blanga Juda, im garra tok laswan wed blanga najalot kotkeis. Detlot Libaimen garra lafta meiksho ebrijing garra hepin raitwei. Yumob kaan bradin blanga ol detlot ting weya yumob garra dum blanga YAWEI. Im garra oldei album yumob blanga dum ebrijing gudwei.”   
\c 20  
\s1 Det wo langa Idam  
\p
\v 1 Wal bambai na detlot ami blanga Moweb en Eman, en detlot Meyunait pipul deibin go langa wo blanga fait langa detlot Juda pipul,  
\v 2 en bambai sambala mesinja bin kaman blanga tok langa King Jehosafet, “Nomo jidanbat. Bigismob ami kaminap brom najasaid brom Idam en brom det Dedsi blanga binijimap wi. Deibin olredi teikoba Engedi.”   
\p
\v 3 Wal King Jehosafet bin bradin nomo lilbit en imbin lafta prei en askim YAWEI det trubala God blanga album im. En imbin dalim detlot pipul langa Juda nomo dagat eni daga, dumaji olabat garra jidan soribala,  
\v 4 en deibin go streidawei langa Jerusalem blanga askim YAWEI blanga album olabat.  
\v 5 Ola pipul brom Juda en Jerusalem bin majurrumap miselp langa det nyuwan yad blanga det Serramoni Pleis en King Jehosafet bin go en jandap lida langa ola pipul,  
\v 6 \fig |src="Prayer.tif" size="col" ref="20:6" \fig*en imbin prei adbala na, “YAWEI, yu na bin det boswan blanga melabat grengrenfathamob, en brom hebin yu na oldei hendulum ola pipul langa dijan wel. Oni yu na garram detmatj pawa en nobodi kaan bidim yu,  
\v 7 en yu blanga melabat God. Wen dislot Isreil pipul bin mub langa dijan kantri yubin jandimwei detlot pipul hubin jidan iya bifo en yubin gibit dijan kantri langa Eibrahem bigininimob.\x + \xo 20:7 \xt Aisai 41:8; Jeims 2:23\x*  
\v 8 En deibin jidan en deibin stat bildimap serramoni pleis blanga rispek langa yu, en wulijim yu garra irrim olabat en seibum olabat.  
\v 9 En deibin bilib if enijing hepin langa dijan kantri, maitbi wo o maitbi strongbala siknis garra kaman, wal ola pipul blanga yu gin kaman langa dijan Serramoni Pleis en prei langa yu en yu garra irrim olabat preya en seibum olabat.   
\p
\v 10 “Wal yu luk detlot Eman pipul en Moweb pipul en Idam pipul wandi fait langa melabat. Dislot seimwan hubin fait langa melabat grengrenfathamob wen deibin trebul brom Ijip, en yu nomo bin larram olabat binijimap detlot pipul.\x + \xo 20:10 \xt Dyud 2:4-19\x*  
\v 11 Wal tudei na dislot pipul bin wandim gajimbek olabat kantri brom melabat weya yubin gibit melabat basdam.  
\v 12 Wal yu na blanga melabat God! Yu panishim olabat, dumaji melabat kaan hendulum dislot ami. Olabat tumatj blanga melabat en melabat kaan sabi wanim melabat garra du, bat melabat wandim yu garra album melabat.” Lagijat na King Jehosafet bin prei.   
\p
\v 13 Wal ol detlot men brom Juda, en olabat waif en bigininimob, deibin jandapbat deya langa det Serramoni Pleis.  
\v 14 En det spirit blanga YAWEI bin kaman langa wan Libaimen weya imbin jandap deya langa detlot pipul en imbin neim Jahasiyel det san blanga Sekaraiya, en imbin brom det femili lain blanga Eisaf, Metanaiya, Jeiyel en Benaiya.  
\v 15 Wal Jahasiyel bin tok langa King Jehosafet en detlot pipul, “King Jehosafet en ebribodi brom Juda en Jerusalem, yumob garra irrim wanim YAWEI tok. Yumob kaan bradin blanga detlot enamimob. God garra album yumob en im garra fait blanga yumob.  
\v 16 Yumob garra gitredi tumorro blanga fait langa olabat wen dei kaminap brom det beli gulum Sis en yumob garra midim olabat gulijap langa det beli weya go raidap langa det bush kantri deya gulijap langa Jeruwel,  
\v 17 bat yumob kaan fait langa detlot ami. Yumob garra jis jandap deya en wotjim wanim YAWEI garra dum langa detlot enami. Ol yumob pipul brom Juda en Jerusalem, yumob kaan bradin. Yumob garra bidim detlot enami dumaji YAWEI garra jidan garram yumob olawei!”\x + \xo 20:17 \xt Dyud 20:1-4; Eksa 14:13,14\x*   
\p
\v 18 En King Jehosafet bin baudan raitdan garram im feis langa graun, en ola pipul bin baudan garram im en deibin weship langa YAWEI.  
\v 19 En sambala pipul blanga det Libai klen, brom det dubala femili gulum Kohath en Kora bin jandap en jinginat brabli adbala en deibin preisim YAWEI det trubala God blanga ola Isreil pipul.   
\p
\v 20 Ailibala neksdei ol detlot pipul bin go langa det deset kantri gulijap langa Tekowa, en wen deibin stat blanga gowei King Jehosafet bin tok langa ola pipul brom Juda en Jerusalem, “Yumob garra oldei trastimbat YAWEI det trubala God blanga yumob, en yumob garra bilib langa detlot wekinmen blanga im du wen olabat dalimbat yumob stori blanga im, dumaji oni YAWEI na gin album yumob blanga enijing. Yumob garra jinggabat langa im olataim.”  
\v 21 En imbin dalim ola pipul im plen en imbin dalim sambala men blanga go lida langa detlot solja wen dei wok en sing song en preisimbat YAWEI, dumaji im brabli holiwan en im na garram detmatj pawa. Deibin sing, “Preisim YAWEI! Im kipgon laigimbat pipul olagijawan.”   
\p
\v 22 En wen deibin stat blanga sing langa im na, YAWEI bin meigim ol detlot enamimob hatjamp.  
\v 23 En detlot Eman solja en Moweb solja bin fait en binijimap detlot Idam solja en afta deibin fait gija en binijimap miselp na.   
\p
\v 24 Wal wen detlot Juda soljamob bin galimap raidap langa top langa det haibala wol weya deibin luk langa det deset kantri, deibin luk detlot enamimob bin olredi dedwan en bin ol leidan ebriweya langa graun. Nomo enibodi bin ranawei, najing.   
\p
\v 25 Wal King Jehosafet en im ami bin go langa detlot kemp, en deibin faindim loda buligi, en loda klos, en najalot gudwan ting en deibin deya 3 dei gajimbat detlot ting, bat detlot ebrijing bin tumatj blanga olabat blanga deigimbek, en deibin lafta libum sambala ting deya.  
\v 26 Wal langa det namba 4 dei ebribodi bin ol majurrumap miselp langa Beraka Beli en deibin preisim YAWEI en gibit theingks langa im dumaji imbin album olabat. Blanga tharran na deibin gulum det beli “Beraka.”  
\v 27 Wal King Jehosafet bin deigimbek im amimob na langa Jerusalem en deibin brabli gudbinji, dumaji YAWEI bin oldei album olabat blanga bidim olabat enamimob.  
\v 28 En wen deibin ol kamat langa det taun deibin ol wok streit langa det Serramoni Pleis en deibin stat pleipleibat ola myusik.  
\v 29 Wen ola pipul brom najalot kantri bin irrim wanim YAWEI bin dum langa detlot enami blanga Juda, deibin ol bradin nomo lilbit.  
\v 30 Wal lagijat na YAWEI bin larram King Jehosafet en im pipul jidan gudbalawei, en imbin lukaftumbat olabat gudwei.   
\s1 King Jehosafet blanga Juda  
\r Fes Kings 22:41-50  
\p
\v 31 Wal Jehosafet bin 35 yiya ol wen deibin meigim im jidan det nyuwan king, en imbin jidan king langa Jerusalem fo 25 yiya. Im mami bin neim Esuba det doda blanga Shili.  
\v 32 King Jehosafet bin gudwan king en imbin dum ebrijing raitwei weya YAWEI bin dalim im blanga dum, jis laik im dedi Asa.  
\v 33 Bat im nomo bin binijimap detlot pleis weya ola pipul bin oldei weshipbat ola drimin sheip. En detlot pipul nomo bin weship det God blanga olabat grengrenfathamob holbit.   
\p
\v 34 Ebrijing weya King Jehosafet bin dumbat deibin raidimdan langa det buk gulum \it Ola stori blanga Jeihu det san blanga Henanai\it* weya jidan insaid langa najawan buk gulum \it Ola stori blanga ola king brom Isreil.\it*   
\p
\v 35 Langa det taim wen King Jehosafet bin jidan king blanga Juda imbin agri blanga wek gija garram King Eihesaiya det king blanga Isreil, bat King Eihesaiya bin dum loda brabli nogudbala ting.  
\v 36 Deibin bildimap bigismob bout langa det pleis gulum Esiyangeba.  
\v 37 Bat Eliyeisa det san blanga Dodabahu, brom det taun gulum Maresha bin gibit woning langa King Jehosafet. Imbin tok, “Dumaji yubin agri blanga wek gija garram King Eihesaiya, YAWEI garra bitsimap wanim yubin meigim.” En ol detlot bigismob bout bin ol binijap en dei nomo bin go langa det solwoda igin.   
\c 21  
\p
\v 1 Wal King Jehosafet bin dai en deibin berrim im bodi deya langa det greibyad blanga ola king langa Jerusalem, det taun blanga Deibid. En im san Jehoram bin jidan det nyuwan king.   
\s1 King Jehoram blanga Juda  
\r Sekan Kings 8:16-24  
\p
\v 2 Wal Jehoram det san blanga King Jehosafet bin jidan det nyuwan king blanga Juda. Imbin abum siks braja neim Esaraiya, Jehiyel, Sekaraiya, Esaraiyu, Maikul en Shefataiya.  
\v 3 Olabat dedi bin gibit olabat loda gol en silba en najalot gudwan ting. Imbin meigim olabat jidan boswan blanga ola strongbala taun langa Juda. Bat dumaji Jehoram bin det bigiswan san, imbin pikimat im blanga jidan king afta langa im.  
\v 4 Wen King Jehoram bin jidan brabli strongbala king, imbin kilim ol im brajamob en sambala boswan blanga Isreil du.   
\p
\v 5 King Jehoram bin 32 yiya ol wen imbin jidan nyuwan king en imbin jidan king langa Jerusalem 8 yiya.  
\v 6 Imbin dum ola nogudbala ting seimwei laik King Eiheb en detlot najalot king blanga Isreil bin dum, dumaji imbin merrit langa det doda blanga King Eiheb. Imbin dum nogudbala ting langa YAWEI,  
\v 7 bat YAWEI nomo bin wandi binijimap Jehoram, dumaji longtaim imbin meigim brabli strongbala pramis langa im wekinmen Deibid. Imbin dalim im ol im bigininimob garra oldei kipgon jidan king blanga Juda.\x + \xo 21:7 \xt 1 King 11:36\x*   
\p
\v 8 Wal langa det taim wen Jehoram bin jidan king, detlot Idam pipul bin gibit bekboun langa im. Dei nomo bin wandi bulurrum detlot Juda pipul, en deibin jidan bos blanga olabat ron kantri.\x + \xo 21:8 \xt Jen 27:40\x*  
\v 9 Wal King Jehoram en im solja olabat bin go garram ola bagi langa Idam. Wal detlot Idam soljamob bin jidan olaran langa olabat, bat wen imbin dakbala King Jehoram en ol im solja bin faindim wei blanga ranawei.  
\v 10 Wal brom det taim na detlot Idam pipul bin oldei jidan miselpmiselp brom detlot Juda pipul langa olabat ronwan kantri. En langa det seimtaim detlot pipul langa det taun gulum Libna nomo bin wandi bulurrum detlot Juda pipul, dumaji King Jehoram bin gibit bekboun langa YAWEI det God blanga im grengrenfathamob.  
\v 11 Imbin bildimap pleis blanga weship ola drimin sheip langa det hil kantri en bin lidimbat ola Juda pipul en Jerusalem pipul blanga weshipbat detlot drimin sheip.   
\p
\v 12 Wal det speshalwan mesinja gulum Ilaija bin jandim leda langa Jehoram en imbin tok, “YAWEI det trubala God blanga yu grengrenfatha Deibid tok im garra panishim yu, dumaji yu nomo bin bulurrum wanim yu dedi King Jehosafet en yu grenfatha King Asa bin titjimbat yu.  
\v 13 Bat yubin oldei dumbat ola nogudbala ting jis laik ola king blanga Isreil bin oldei dumbat, en yubin lidimbat ola pipul blanga Juda en Jerusalem blanga gibit bekboun langa God, jis laik King Eiheb en im bigininimob bin lidim ola Isreil pipul nogudbalawei. Yubin kilim ded yu brajamob en deibin mowa gudbala men brom yu.  
\v 14 Dumaji yubin jidan lagijat, YAWEI garra panishim yu pipul olabat, yu bigininimob, en yu waif olabat, en im garra binijimap ola gudwan ting blanga yu du.  
\v 15 Yu garra jidan brabli sowa langa yu binji en im garra go mowes ebridei.” Lagijat na Ilaija bin tok.   
\p
\v 16 Wal sambala Filastain pipul en Areibiya pipul bin jidan gulijap langa det pleis weya sambala Ithiyopiya pipul bin jidan langa solwodasaid. YAWEI bin meigim olabat gitwail en deibin go en fait langa King Jehoram.  
\v 17 Deibin teikoba Juda, en deibin deigim ola gudwan ting brom det haus blanga det king, en deibin deigimwei prisana ol detlot waif blanga det king, en ol im sanmob, bat deibin libum im yangiswan san gulum Eihesaiya.   
\p
\v 18 Afta ol dislot ting bin hepin YAWEI bin gibit det king det brabli nogudwan siknis langa im binji.  
\v 19 Fo 2 yiya det king bin go mowes raidap imbin dai garram loda pein. Ol im pipul olabat nomo bin laitim bigwan faiya blanga shoum olabat sori miselp laik deibin oldei dum blanga im grengrenfathamob.   
\p
\v 20 Jehoram bin jidan nyuwan king wen imbin 32 yiya ol en imbin jidan king langa Jerusalem 8 yiya. Nobodi bin fil sori blanga im wen imbin dai. Deibin berrim im bodi langa Jerusalem, bat dei nomo bin berrim im langa det speshalwan greibyad blanga ola king.   
\c 22  
\s1 King Eihesaiya blanga Juda  
\r Sekan Kings 8:25-29; 9:21-28  
\p
\v 1 Wal sambala Erab men bin go blanga fait en deibin kilim ola san blanga King Jehoram. Oni Eihesaiya det yangiswan bin stil jidan laibala. Wal detlot pipul langa Jerusalem bin meigim Eihesaiya jidan det nyuwan king blanga Juda.  
\v 2-3 Wen imbin 22 yiya ol deibin meigim im king en imbin jidan king fo 1 yiya deya langa Jerusalem. Im mami bin Ethalaiya det doda blanga King Eiheb, en grendoda blanga King Omri brom Isreil en imbin dalim im blanga dum ola nogudbala ting, jis laik King Eiheb femili bin dum.  
\v 4 Imbin dumbat nogudbala ting langa YAWEI. Afta im dedi bin dai, najalot blanga Eiheb femilimob bin dalim im wanim blanga dumbat en imbin brabli nogudwan. En tharran bin gibit im brabli bigis trabul.   
\p
\v 5 Wal King Eihesaiya bin album King Joram brom Isreil blanga fait langa King Heiseiyel brom Siriya. Ol detlot ami bin fait langa det taun gulum Remoth deya langa det kantri gulum Giliyad, en deya na King Joram bin gulijap gitkil langa det fait.  
\v 6 Brom deya imbin gobek en jidan deya langa det taun gulum Jesriyel raidap imbin fil gudwan igin, en King Eihesaiya bin go luk im deya.   
\p
\v 7 Wal wen King Eihesaiya bin go luk King Joram deibin midim wan men neim Jeihu det san blanga Nimshi. YAWEI bin pikimat im blanga binijimap det femili blanga Eiheb.  
\v 8 Wen Jeihu bin dumbat wanim God bin wandim langa det femili, imbin kaman langa sambala lida brom Juda en detlot san blanga detlot braja blanga King Eihesaiya weya bin kaman garram Eihesaiya. Wal Jeihu bin kilim olabat ded.  
\v 9 Imbin lukabat blanga King Eihesaiya en im wekinmen olabat bin faindim im langa Sameriya. Deibin deigim im langa Jeihu en Jeihu bin gibit oda blanga kilim im ded. Deibin berrim im bodi dumaji deibin rispek im grenfatha King Jehosafet, hubin wek blanga YAWEI gudwei.  
\p Nomo eni femili blanga King Eihesaiya bin jidan laibala blanga jidan king langa det kantri enimo.   
\s1 Ethalaiya det kwin blanga Juda  
\r Sekan Kings 11:1-3  
\p
\v 10 Wal wen Ethalaiya det mami blanga King Eihesaiya bin irrim im san bin dai, streidawei imbin gibit oda blanga kilim ded ola king femili langa Juda.  
\v 11 King Eihesaiya bin abum hafwan sista neim Jehosheba. Imbin merrit langa wan serramonimen neim Jehoiyada. Jehosheba bin haidim Jowesh, wanbala san blanga King Eihesaiya en imbin gajim wanbala gel blanga lukaftum im langa wan rum deya langa det Serramoni Pleis wen ol im braja bin gitkil. Imbin haidim im, wulijim Ethalaiya kaan kilim im.  
\v 12 Jehosheba bin maindimbat det lilboi Jowesh deya insaid langa det Serramoni Pleis fo 6 yiya. Langa ol det taim na Eihalaiya bin jidan kwin langa Juda.   
\c 23  
\s1 Jehoiyada bin meigim Jowesh king  
\r Sekan Kings 11:4-16  
\p
\v 1 Wal Jehoiyada det serramonimen bin weidabat 6 yiya en imbin reken im taim blanga dum samting. Imbin meigim plen garram 5 bosmen blanga ami, Esaraiya det san blanga Jeroham, Ishmeil det san blanga Jehohana, Esaraiya det san blanga Obed, Meiseiya det san blanga Edaiya en Ilaishafet det san blanga Sikri.  
\v 2 Deibin go langa ola taun langa Juda en deibin bringimap langa Jerusalem ola Libaimen en ola boswan blanga ola klen.   
\p
\v 3 Wal deibin majurrumap miselp langa det Serramoni Pleis en deibin meigim brabli strongbala pramis garram det san blanga det king neim Jowesh. Jehoiyada bin tok langa olabat, “Iya na det san blanga wi king hubin dai. Im garra jidan king jis laik YAWEI det trubala God bin pramisim langa King Deibid weya im bigininimob garra jidan king.\x + \xo 23:3 \xt 2 Sem 7:12\x*  
\v 4 Wal dijan na wanim wi garra dum. Wen detlot serramonimen en Libaimen kaman blanga wek langa Sebathdei, yumob garra kadimat miselp en meigim thribala grup. Wanmob garra wotjimbat det geit blanga det Serramoni Pleis, en najamob garra wotjimbat det bigwan haus blanga det kwin,  
\v 5 en najamob garra wotjimbat det Meinwan Ston Geit. En ola pipul garra majurrumap miselp langa det kotyad langa det Serramoni Pleis.  
\v 6 Nobodi kaan go langa detlot rum langa det Serramoni Pleis, oni detlot serramonimen en Libaimen hu wek deya. Detlot na gin gowin deya, dumaji dei jidan klinbala blanga serramoni. Ola najalot garra teiknodis langa YAWEI en jidan atsaidwei.  
\v 7 Detlot Libaimen garra wotjimbat det king. Dei garra bulurrum Jowesh ebriweya im go en yumob garra abum yumob bigwan naif redibala du blanga kilim enibodi hu trai kaman langa det Serramoni Pleis.” Lagijat na Jehoiyada bin tok.   
\p
\v 8 Detlot boswan solja bin teiknodis langa wanim Jehoiyada bin dalim olabat, en deibin bringimap langa im detlot men hubin binij wek det Sebathdei en detlot hu garra wek wulijim detlot boswan garra yusum ol detlot men.  
\v 9 Jehoiyada bin gibit detlot boswan solja ola spiya en shild weya bin jidan blanga King Deibid longtaim weya deibin kipumbat deya langa det Serramoni Pleis.  
\v 10 En imbin abum ola men deya redibala garram ola bigwan naif en deibin jandap olaran lida langa det Serramoni Pleis blanga maindimbat det king.   
\p
\v 11 Brom deya Jehoiyada bin lidim Jowesh atsaid, en imbin pudum det speshalwan het blanga ola king ontop langa im hed. En imbin gibit im det peipa blanga meigim im sabi wanim im garra dum wen im jidan king. Wal deibin meigim im jidan king. Jehoiyada det serramonimen en im sanmob bin spilim det oliboil ontop langa Jowesh hed en ola pipul bin jingat adbala, “King Jowesh garra jidan laibala longtaim!”   
\p
\v 12 Wal Kwin Ethalaiya bin irrim ola pipul bin jinginatbat blanga det king, en imbin go kwikbala langa det Serramoni Pleis weya ola pipul bin majurrumap miselp.  
\v 13 En deya na imbin luk det nyuwan king langa det Serramoni Pleis, jandapbat wansaid langa det longwan stonwan pol, deya na langa det pleis weya ola nyuwan king garra jandap. Ola boswan solja en ola pipul hubin blowimbat ola longwan wisul bin jandap olaran langa im. Ola pipul deya bin singsing gudbinjiwei en blowimbat ola longwan wisul. Ol detlot hubin plei det myusik langa det Serramoni Pleis bin lidimbat olabat langa det hepi taim. Kwin Ethalaiya bin brabli nogudbinji. Imbin breigimap im klos en imbin jingat, “Yumob bin trikimbat mi brabliwei. Yumob bin trikimbat mi brabliwei.”   
\p
\v 14 Wal Jehoiyada nomo bin wandi kilim Kwin Ethalaiya deya insaid langa det Serramoni Pleis, en imbin dalim ola boswan solja, “Deigim im atsaid deya langa midul langa detlot solja en kilim ded enibodi hu trai blanga seibum im.”   
\p
\v 15 Deibin grebum im en deigim im langa im bigwan haus en deibin kilim im deya langa Hos Geit.   
\s1 Jehoiyada bin meigim ebrijing gudwei  
\r Sekan Kings 11:17-20  
\p
\v 16 Wal Jehoiyada det serramonimen en King Jowesh en detlot pipul bin meigim brabli strongbala pramis langa YAWEI blanga jidan im ronwan pipul olabat.  
\v 17 Brom deya ola pipul bin go langa det weship pleis blanga det drimin gulum Beil en deibin pulumdan detlot drimin sheip. Deibin breigimap detlot teibul blanga ofring en ol detlot drimin sheip du. En deibin kilim ded Metan det serramonimen blanga det drimin gulum Beil deya lida langa ol detlot teibul blanga ofring blanga Beil.   
\p
\v 18 Wal Jehoiyada bin pudum detlot serramonimen en detlot Libaimen blanga lukaftum ola wek langa det Serramoni Pleis blanga YAWEI. Deibin lafta dum det wek weya King Deibid bin tok, en barnimap detlot sekrifais deibin gibit langa YAWEI jis laik det lowa blanga Mosis bin tok. Deibin bos blanga ola myusik en deibin brabli gudbinji.  
\v 19 Jehoiyada bin libum sambala solja blanga wotjimbat det Serramoni Pleis blanga YAWEI, wulijim nomo enibodi kaan gowin if dei nomo klinbala blanga serramoni.   
\p
\v 20 Afta Jehoiyada en ola boswan solja, en haibala pipul en ola najalot pipul bin deigim King Jowesh brom det Serramoni Pleis raidap langa det bigwan haus blanga king. Deibin gowin langa det meinwan geit en King Jowesh bin jidan langa det bigwan speshalwan tjeya.  
\v 21 Ola pipul bin jidan brabli gudbinjiwei na, en olabat bin jidan kwaitbala nomo garra eni trabul, dumaji Kwin Ethalaiya bin gitkil.   
\c 24  
\s1 Jowesh det king blanga Juda  
\r Sekan Kings 12:1-16  
\p
\v 1 Wal Jowesh bin oni 7 yiya ol wen imbin jidan det nyuwan king langa Juda. En imbin jidan king langa Juda fo 40 yiya na. En King Jowesh mami bin neim Saibiya, en imbin brom det taun gulum Biyashiba.   
\p
\v 2 Wal langa ol det taim wen Jehoiyada det serramonimen bin stil jidan laibala King Jowesh bin oldei dum ebrijing gudwei blanga meigim YAWEI det trubala God gudbinji langa im.  
\v 3 Jehoiyada bin pikimat dubala gel blanga jidan waif blanga King Jowesh en dubala bin abum san en dodamob blanga im.   
\p
\v 4 Bambai King Jowesh bin jinggabat blanga meigim det Serramoni Pleis jidan gudwei igin.  
\v 5 Imbin majurrumap ola serramonimen en Libaimen en imbin tok, “Yu garra go ebriweya langa Juda en yu garra gajim ola teks mani ola pipul garra pei ebriyiya. Ai wandim dijan mani streidawei, dumaji wi garra abum tharran mani blanga fiksimap det Serramoni Pleis.” Bat detlot Libaimen nomo bin go kwikbala blanga dum wanim det king bin dalim olabat.  
\v 6 Wal imbin tok langa Jehoiyada det haibala serramonimen, “Wotfo yu nomo bin jandim detlot Libaimen blanga gajim detlot teks mani? Mosis det wekinmen blanga YAWEI en ola pipul bin agri longtaim blanga yusum det mani blanga lukaftum det Seikridwan Tent.\x + \xo 24:6 \xt Eksa 30:11-16\x*  
\v 7 Wal wi lafta fiksimap det Serramoni Pleis gudwei, dumaji detlot san blanga det nogudbala wuman neim Ethalaiya bin bitsimap tharran. En deibin yusum sambala seikridwan enijing blanga weshipbat det drimin gulum Beil.”   
\p
\v 8 Wal King Jowesh bin gibit oda blanga meigim wudwan boks en pudum atsaid gulijap langa det geit blanga det Serramoni Pleis.  
\v 9 Imbin jandim leda ebriweya langa Juda en Jerusalem en imbin askim ebribodi blanga bringimap det teks mani langa det Serramoni Pleis jis laik Mosis bin askim olabat grengrenfathamob blanga dum.   
\p
\v 10 Ola lidamob en pipul bin ol agri, en deibin bringimap olabat mani langa Jerusalem en deibin pudum langa det boks.  
\v 11 Ebridei detlot Libaimen bin deigim det boks langa det Serramoni Pleis, en det wekinmen blanga det king en det wekinmen blanga det haibala serramonimen bin emtimat det boks en kaundimap detlot mani. Afta deibin pudumbek det emtiwan boks langa im pleis.  
\v 12 King Jowesh en Jehoiyada bin gibit detlot mani langa ola boswan blanga ol detlot wek weya deibin dum langa Serramoni Pleis. Deibin yusum detlot mani blanga peiyim ola men hubin wek garram ston, en ola kapinta, en detlot hubin wek garram aiyan en kopawan du.   
\p
\v 13 Ol dislot men bin go blanga wek streidawei blanga fiksimap det Serramoni Pleis en deibin ol wek adbala en imbin luk jis laik wen imbin jidan basdam.  
\v 14 Dei nomo bin yusum ol detlot teks mani blanga fiksimap det pleis en deibin gibit ola leftoba mani langa King Jowesh en Jehoiyada. Deibin yusum detlot mani blanga meigim ola dish en ebrijing brom gol en silba blanga pudum langa det Serramoni Pleis.  
\p Deibin gibit sekrifais weya meigim YAWEI gudbinji olataim langa det Serramoni Pleis raidap Jehoiyada det serramonimen bin dai.  
\v 15 Jehoiyada bin dai wen imbin 130 yiya ol,  
\v 16 en deibin berrim im bodi langa det pleis weya dei oldei berrim ola king, deya langa Jerusalem, dumaji imbin dum detmatj gudwan ting langa detlot pipul blanga Isreil, en blanga God en blanga det Serramoni Pleis.   
\s1 King Jowesh bin gibit bekboun langa YAWEI  
\p
\v 17 Afta Jehoiyada det serramonimen bin dai, ola lida blanga Juda bin go langa King Jowesh en deibin meigim im dum wanim deibin wandim.  
\v 18 Streidawei ola pipul blanga Juda bin stap weshipbat langa det Serramoni Pleis blanga YAWEI en deibin stat weshipbat detlot drimin sheip en det gelwan god gulum Eshara. Ol dislot nogudbala ting bin meigim YAWEI brabli wail langa ola pipul langa Juda en Jerusalem,  
\v 19 bat imbin stil kipgon jandimbat speshalwan mesinja blanga dalimbat detlot pipul blanga kambek langa im. Detlot pipul nomo bin wandi lisin.   
\p
\v 20 Wal det spirit blanga God bin tok langa Sekaraiya det san blanga Jehoiyada det serramonimen, en Sekaraiya bin dalim ebribodi wanim God bin tok, “Wotfo yumob nomo kipum main lowa? Dijan garra bringimap panishmen langa yumob. Yumob bin libum mi. Wal ai garra libum yumob du.”   
\p
\v 21-22 Wal King Jowesh bin fogedabat det dedi blanga Sekaraiya bin gudfren langa im. Wen ola pipul blanga Juda bin meigim plen blanga kilim Sekaraiya, King Jowesh bin joinin langa olabat en imbin gibit oda blanga stonim im raidap imbin dai langa det kotyad langa det Serramoni Pleis. Wen Sekaraiya bin gulijap dai imbin jingat, “Ai prei YAWEI garra luk wanim yumob dum en im garra panishim yumob.”\x + \xo 24:21-22 \xt Meth 23:35; Luk 11:51\x*   
\s1 King Jowesh bin dai  
\p
\v 23 Wal langa det draisisan taim langa det neksyiya detlot amimob brom Siriya bin teikoba Juda en Jerusalem en deibin kilim ol detlot lidamob. Deibin gajim ola gudwan ting blanga detlot pipul en deibin deigimbek langa olabat king langa Dameskas.  
\v 24 Nomeda detlot amimob brom Siriya bin brabli lilwan, bat YAWEI bin larram olabat bidim det brabli bigwan amimob blanga Juda, dumaji imbin panishim King Jowesh en ola pipul dumaji deibin tenawei brom im.   
\p
\v 25-26 Deibin ardim King Jowesh brabliwei langa det fait, en wen detlot Siriya amimob bin libum Juda, dubala boswan lida neim Seibad en Jehosabed bin meigim plen blanga peibek King Jowesh dumaji imbin kilim Sekaraiya. Dubala bin meigim plen en dubala bin kilim ded King Jowesh wen imbin stil leidanbat langa im sweig brom det taim weya detlot Siriya solja bin kilim im. Deibin berrim King Jowesh langa Jerusalem, bat dei nomo bin berrim im garram ola najalot king.  
\v 27 Det buk gulum “Detlot stori blanga ola king,” dalim mowa blanga detlot san blanga Jowesh, en wanim detlot speshalwan mesinja bin tok blanga im en hau imbin fiksimap det Serramoni Pleis. En Amasaiya det san blanga Jowesh bin jidan det nyuwan king.   
\c 25  
\s1 King Amasaiya blanga Juda  
\r Sekan Kings 14:2-6  
\p
\v 1 Amasaiya bin 25 yiya ol wen imbin jidan det nyuwan king. Imbin jidan langa Jerusalem fo 29 yiya. Im mami bin neim Jehoyadin en imbin brom Jerusalem.  
\v 2 King Amasaiya bin meigim YAWEI det trubala God gudbinji, bat im nomo bin jidan brabli trubala langa im.   
\p
\v 3 Wal wen King Amasaiya bin abum det brabliwan pawa blanga jidan king blanga Juda, imbin kilim ded detlot men hubin kilim im dedi ded.  
\v 4 Bat im nomo bin kilim ola biginini blanga detlot men, dumaji imbin teiknodis langa det lowa weya YAWEI bin gibit langa Mosis weya im tok oni detlot hubin dum nogudbala ting garra abum det panishmen.\x + \xo 25:4 \xt Dyud 24:16\x*   
\s1 Deibin bidim ola Idam pipul  
\r Sekan Kings 14:7  
\p
\v 5 Wal King Amasai bin jandim mesij langa detlot lida blanga det Juda en det Benjamin klen, en imbin majurrumap ola men hubin 20 yiya ol en oba. 300,000 men bin go langa Jerusalem. Deibin ol gitredi blanga fait garram spiya en shild. King Amasai bin pudum ola solja langa olabat femili grup en imbin pudum im ronwan boswan solja oba langa ebri grup.  
\v 6 King Amasaiya bin peiyim 4 tan silba fo 100,000 solja brom Isreil blanga album im.   
\p
\v 7 Bat wanbala speshalwan mesinja bin go langa det king en imbin tok, “Haibala king, nomo larram detlot Isreil solja go blanga fait garram yu. YAWEI bin tok im kaan album enibodi brom det nowathwan kantri gulum Isreil.  
\v 8 Yu mait reken olabat brabli strongbala blanga fait, bat God garra larram detlot enamimob bidim yu, nomeda yu fait brabli adbalawei. Im na meigim yu win det fait o im na larram detlot enamimob bidim yu.”   
\p
\v 9 Wal King Amasaiya bin tok, “Wanim ai garra dum blanga detlot silba aibin peiyim detlot soljamob?”  
\p Wal det speshalwan mesinja bin tok, “Wal YAWEI garra gibitbek langa yu mowa den wanim yubin gibit detlot soljamob.”   
\p
\v 10 Brom deya King Amasaiya bin gibit oda langa ol detlot soljamob brom Isreil blanga gobek langa olabat kantri. Bat wen deibin gowei, deibin brabli wail langa detlot Juda pipul.   
\p
\v 11 Afta wen King Amasaiya bin reken im soljamob strongbala igin imbin lidim im soljamob deya langa det pleis gulum Solt Beli en deibin kilim ded 10,000 Idam solja langa det fait.  
\v 12 En deibin deigim 10,000 solja prisana en deibin deigim olabat ontop langa wanbala haibala hil gulijap langa det taun gulum Sela en deibin pushumdan olabat en olabat bin ol gitkil wen olabat bin buldan langa detlot ston langa bodam.   
\p
\v 13 Wal langa det taim ol detlot Isreil soljamob weya King Amasaiya bin jandimbek langa olabat ronwan kantri bin teikoba ol detlot taun gulijap langa Sameriya en raidap langa Betharan. Deibin kilim 3,000 pipul en deibin deigimwei ola ebrijing blanga olabat.  
\v 14 Afta King Amasaiya bin bidim det Idam ami imbin gobek langa Jerusalem. Imbin deigimbek detlot drimin sheip blanga detlot pipul blanga Idam, en imbin pudumdan deya gudwei. En imbin pudumdan im hed langa detlot drimin sheip en imbin gibitbat sekrifais langa olabat.  
\v 15 Tharran na bin meigim YAWEI brabli wail, en imbin jandim speshalwan mesinja blanga askim King Amasaiya, “Wotfo yu oldei weshipbat dislot drimin sheip? Dei nomo bin seibum olabat ronwan pipul wen yubin fait langa olabat.”   
\p
\v 16 Bat bifo det speshalwan mesinja bin binij toktokbat King Amasaiya bin tok, “Yu nomo wekinmen blanga mi. Yu nomo tok najawan wed o ai garra kilim yu.”  
\p Det speshalwan mesinja bin tok wantaim en imbin stap. Imbin tok, “Basdam yubin dum nogudbala ting, en distaim yu nomo bin teiknodis langa main wed. Trubala, God garra panishim yu.”   
\s1 Isreil bin bidim Juda  
\r Sekan Kings 14:8-20  
\p
\v 17 King Amasaiya blanga Juda bin tok langa ol im boswan men en afta imbin jandim mesij langa King Jehowesh langa Isreil, “Yumob kaman en fait langa mi.”  
\v 18 King Jehowesh bin jandimbek dijan mesij langa im, “Wal wantaim wanbala bindiyai gras langa det hil kantri gulum Lebanon bin jandim mesij langa det bigwan sidatri, ‘Yu gibit yu doda blanga merrit langa main san.’ Bat wanbala wailwan enimul bin pudumbut langa det bindiyai gras en imbin dai.  
\v 19 Wal yu reken yu strongbala King Amasaiya, dumaji yubin bidim ola Idamait pipul bat yu wikwan laik det bindiyai gras. Yu garra jidan wan pleis langa yu kantri. Nomo meigimbat trabul, o yu en ol yu pipul olabat garra binij.” Lagijat na King Jehowesh bin tok.   
\p
\v 20 Bat King Amasaiya nomo bin teiknodis langa det wed. Wal God bin wandim panishim King Amasaiya dumaji imbin weshipbat detlot drimin sheip brom Idam.  
\v 21 Wal King Jehowesh brom Isreil en im amimob bin go en fait langa King Amasaiya deya langa det taun gulum Bethshemesh langa Juda.  
\v 22 Imbin bidim ola solja blanga King Amasaiya en deibin ol ranawei kwikbala langa olabat ronwan kantri.  
\v 23 King Jehowesh bin grebum King Amasaiya en meigim im jidan prisana en imbin kipgon langa Jerusalem. Deya na deibin breigimap det wol blanga det taun brom Ifreiyim Geit raidap langa det Kona Geit. Deibin breigimap 200 mita blanga det wol.  
\v 24 King Jehowesh bin gajim ola silba en gol ebrijing weya imbin faindim langa det Serramoni Pleis. Detlot bigininimob blanga Obedidam bin maindimbat ol detlot ebrijing. En imbin gajim ola brabli gudwan ebrijing brom det bigwan haus blanga det king en imbin deigim detlot ebrijing langa Sameriya en imbin deigimbek sambala prisana garram im du.   
\p
\v 25 Wal King Amasaiya bin jidan laibala fo 15 yiya afta King Jehowesh blanga Isreil bin dai.  
\v 26 Ola ebrijing weya King Amasaiya bin dumbat deibin raidimdan langa det buk gulum \it Ola stori blanga ola king brom Juda en Isreil.\it*   
\p
\v 27 Brom det taim wen King Amasaiya bin gibit bekboun langa YAWEI ola enamimob blanga im bin meigim sigridwan plen blanga kilim im. Wal King Amasai bin ranawei langa det taun gulum Leikish, bat im enamimob bin bulurrum im raidap deya en deibin kilim im ded.  
\v 28 Deibin lidimap im dedwan bodi ontop langa wanbala hos en deibin go raitbek langa Jerusalem. En deibin berrim im bodi langa det greibyad blanga ola king deya langa Jerusalem, det taun blanga Deibid.   
\c 26  
\s1 King Yusaiya blanga Juda  
\r Sekan Kings 14:21,22; 15:1-7  
\p
\v 1-3 Wal afta na ola pipul brom Juda bin meigim det san blanga Amasaiya gulum Yusaiya jidan det nyuwan king en imbin oni 16 yiya ol. Imbin jidan king deya langa Jerusalem en imbin jidan king fo 52 yiya. King Yusaiya mami bin neim Jekolaiya brom Jerusalem. Bambai na King Yusaiya bin teikoba det taun gulum Elath en imbin bildimap det taun igin afta im dedi bin dai.   
\p
\v 4 King Yusaiya bin jidan jis laik im dedi hubin oldei dumbat ola raitwan ting blanga YAWEI det trubala God.  
\v 5 Langa ol det taim wen Sekaraiya bin stil jidan laibala, imbin oldei titjimbat King Yusaiya gudwei en King Yusaiya bin bulurrum YAWEI trubalawei, en YAWEI det trubala God bin lukaftumbat im gudbalawei.   
\p
\v 6 Bambai King Yusaiya bin go en fait langa detlot Filastain pipul. Imbin breigimap detlot wol langa detlot taun gulum Geth, Jeimniya en Eshdad. Imbin bildimap nyuwan strongwan taun gulijap langa det taun gulum Eshdad en najalot pleis langa det kantri gulum Filastain.  
\v 7 God bin album im fait langa detlot Filastain soljamob en detlot Erab soljamob weya deibin jidan langa Gurbeil en Meyunait pipul.  
\v 8 Ol detlot Emanait pipul bin peiyimbat teks langa King Yusaiya en imbin jidan brabli strongwan garram detmatj pawa. Pipul bin irrim stori blanga im raidap langa Ijip.   
\p
\v 9 Wal King Yusaiya bin meigim Jerusalem brabli strongwan en imbin bildimap haiwan haus blanga lukinatbat langa det Kona Geit, en det Beli Geit en weya det wol tenaran.  
\v 10 Imbin bildimap haiwan haus blanga lukinatbat langa det plein kantri, en imbin grajim loda wodahol, dumaji imbin abum loda buligi langa det plein kantri sangodanwei. Dumaji imbin laigim ola fam, imbin askim pipul blanga plentimbat greiptri langa hil kantri en blanga growimap sid daga langa gudwan graun.   
\p
\v 11 Wal King Yusaiya bin abum detmatj solja oldei jidan redibala blanga fait. Jeiyel en Meiseiya bin bos blanga ola buk weya dubala bin raidimdan ebrijing blanga det ami, en Henanaiya bin det brabli boswan lida blanga olabat. Henanaiya bin jidan wekinmen blanga det king.  
\v 12 Det ami bin abum 2,600 boswan solja,  
\v 13 en deibin lukaftumbat 307,500 brabli strongwan solja. Olabat bin oldei lukaftumbat King Yusaiya brom ol im enamimob.  
\v 14 King Yusaiya bin gajim blanga detlot amimob ola shild, spiya, strongwan het, aiyanwan shet, bo en erro en ston blanga shangai.  
\v 15 Sambala men bin sabi hau blanga meigimbat detlot ting blanga shudum erro en tjakambat ston brom detlot haiwan haus blanga wotjimbat deya langa detlot wol blanga Jerusalem. Ebribodi langa ebri kantri bin sabi King Yusaiya en imbin jidan brabli strongwan, dumaji God bin album im.   
\s1 King Yusaiya bin brabli praudbala en imbin abum panishmen  
\p
\v 16 Bat bambai wen King Yusaiya bin gro mowa strongbala imbin jidan brabli praudbala en det praudbalawei bin meigim im go nogudwan. Imbin gibit bekboun langa YAWEI im God wen imbin go langa det Serramoni Pleis blanga barnim gudsmelwan medisin langa det teibul blanga gudsmelwan medisin ofring.  
\v 17 Esaraiya det serramonimen en 80 najalot gudwan serramonimen bin go langa det Serramoni Pleis blanga stapam det king.  
\v 18 Deibin tok, “King Yusaiya, yu nomo lau blanga barnim det gudsmelwan medisin blanga YAWEI. Oni detlot serramonimen hu jidan bigininimob blanga Eran lau dum tharran. Yu lafta gowei brom dijan seikridwan pleis. Yubin dum nogudbala ting langa YAWEI en im kaan album yu enimo.” Lagijat na deibin tok.\x + \xo 26:18 \xt Eksa 30:7,8; Nam 3:10\x*   
\p
\v 19 Wal King Yusaiya bin jandap deya langa Serramoni Pleis gulijap langa det teibul en imbin holdimbat det ting weya deibin barnim det gudsmelwan medisin. Imbin brabli wail detmatj langa detlot serramonimen en streidawei brabli nogudwan skin siknis bin kamat langa im forid.  
\v 20 Esaraiya en detlot najalot serramonimen bin hatjamp wen deibin luk langa det forid blanga King Yusaiya en deibin meigim im gowei brom det Serramoni Pleis. Imbin gowei kwikbalawei, dumaji imbin sabi YAWEI bin panishimbat im.   
\p
\v 21 Olataim King Yusaiya bin jidan laibala imbin abum det brabli nogudwan skin siknis en im nomo bin klinbala blanga serramoni. Imbin jidan langa im ronwan haus en im nomo bin lau blanga go langa det Serramoni Pleis igin. Im nomo bin lau blanga dum eni wek en im san Jotham bin jidan boswan blanga det kantri.   
\p
\v 22 Wal det speshalwan mesinja neim Aisaiya det san blanga Eimas bin raidimdan ola najalot ting King Yusaiya bin dum wen imbin jidan king.  
\v 23 King Yusaiya bin dai en deibin berrim im bodi langa det pleis weya dei berrim ola king. Dumaji imbin abum det brabli nogudwan skin siknis dei nomo bin berrim im bodi langa det speshalwan greibyad blanga ola king. En im san Jotham bin jidan det nyuwan king na.\x + \xo 26:23 \xt Aisai 6:1\x*   
\c 27  
\s1 King Jotham blanga Juda  
\r Sekan Kings 15:32-38  
\p
\v 1 Wal Jotham bin jidan king wen imbin 25 yiya ol, en imbin king langa Jerusalem fo 16 yiya. Im mami bin Jerusha det doda blanga Seidok.  
\v 2 King Jotham bin oldei meigim YAWEI gudbinji, jis laik im dedi bin dum, bat im nomo bin barnim gudsmelwan medisin deya langa det Serramoni Pleis laik im dedi bin dum. Bat detlot pipul langa Juda bin kipgon dumbat nogudbala ting.   
\p
\v 3 Wal King Jotham na bin bildimap det Nowath Geit langa det Serramoni Pleis en imbin bildimap det taun wol mowa langa det pleis gulum Ofel deya langa Jerusalem.  
\v 4 Langa det hil kantri blanga Juda imbin bildimap loda taun en langa det bush kantri imbin bildimap strongwan haus en haiwan haus blanga lukinatbat blanga eni trabul.  
\v 5 Imbin fait langa det king brom Eman en im amimob en imbin bidim olabat. Imbin fosim detlot pipul brom Eman blanga peiyim teks fo det neks 3 yiya. Deibin lafta pei garram 3,400 kilogrem silba, 1,000 tan sid daga gulum wit, en 1,000 tan sid daga gulum bali.  
\v 6 King Jotham bin go mowa strongbala, dumaji imbin trastimbat YAWEI det trubala God blanga im.  
\v 7 Ola ebrijing weya King Jotham bin dumbat deibin raidimdan langa det buk gulum \it Ola stori blanga ola king brom Isreil en Juda.\it*   
\p
\v 8 Wal Jotham bin jidan king wen imbin 25 yiya ol, en imbin king langa Jerusalem fo 16 yiya.  
\v 9 Imbin dai en deibin berrim im bodi langa Jerusalem, det taun blanga Deibid. En im san Eihes bin jidan det nyuwan king.   
\c 28  
\s1 King Eihes blanga Juda  
\r Sekan Kings 16:1-4  
\p
\v 1 Wal Eihes bin jidan king wen imbin 20 yiya ol, en imbin king langa Jerusalem fo 16 yiya. Im nomo bin bulurrum det gudbalawei weya im grengrenfatha Deibid bin dum. Imbin dum ol detlot ting weya bin meigim YAWEI det trubala God nogudbinji,  
\v 2 en imbin bulurrum det wei blanga ola king brom Isreil. Imbin meigim ola aiyanwan drimin sheip blanga Beil,  
\v 3 en imbin barnim gudsmelwan medisin langa Hinam Beli, en imbin sekrifais im ronwan sanmob laik deibin gibit barnapwan ofring langa detlot drimin sheip. Imbin dum detlot seimwan nogudbala ting weya ola pipul bin dum basdam weya YAWEI bin andimwei wen det Isreil ami bin kaminap.  
\v 4 King Eihes bin gibitbat sekrifais ofring langa ol detlot pleis weya deibin weshipbat ola drimin sheip langa ola hil en andanith langa ola sheiditri du.   
\s1 Siriya en Isreil bin fait langa Juda  
\r Sekan Kings 16:5  
\p
\v 5-6 Wal King Eihes en detlot pipul brom Juda bin gibit bekboun langa YAWEI det trubala God weya olabat grengrenfathamob bin weshipbat. Wal God bin panishim olabat wen imbin jandim ola enami blanga fait langa olabat. Det king blanga Siriya bin go en fait langa ola Juda pipul en deibin gajim bigmob pipul en deibin deigimwei prisana langa Dameskas. King Peka brom Isreil, det san blanga Remalai bin fait langa Juda en imbin kilim ded 120,000 brabli gudwan solja.\x + \xo 28:5-6 \xt 2 King 16:5; Aisai 7:1\x*  
\v 7 Langa det wo wanbala Isreil solja neim Sikri bin kilim thribala men, det san blanga King Eihes neim Meiseiya, en Esrikam det boswan blanga det haus blanga det king, en Elkana hubin sekan bos blanga det king.  
\v 8 Nomeda detlot Juda pipul bin kantrimen blanga ola Isreil pipul, bat detlot Isreil pipul langa det nowathwan kantri bin deigimwei prisana 200,000 wuman en biginini langa det taun gulum Sameriya en bigmob ebrijing du.   
\s1 Det speshalwan mesinja neim Oded  
\p
\v 9 Wal Oded bin jidan langa Sameriya en imbin speshalwan mesinja blanga YAWEI. Imbin midap garram det Isreil ami wen deibin kambek brom Juda en imbin tok langa olabat, “YAWEI det God blanga yumob grengrenfathamob bin larram yumob bidim det Juda ami, dumaji imbin wail langa olabat, bat YAWEI bin irrim hau yumob bin krul langa olabat.  
\v 10 Wal if yumob meigim detlot Juda en Jerusalem pipul jidan wekinmen jis laiga prisana en dumbat ola adwek, wal tharran meigim yumob gilti, dumaji yumob du bin dum nogudbala ting langa YAWEI.  
\v 11 Wal yumob irrim mi na. Yumob garra jandimbek dislot pipul langa olabat ron pleis. Olabat yumob ronwan kantrimen. If yumob nomo duwit, wal YAWEI garra gitwail en panishim yumob.”   
\p
\v 12 Wal langa det seimtaim fobala lida brom det nowathwan kantri gulum Isreil bin kaman, Esaraiya det san blanga Jehohana, Berakaiya det san blanga Meshilemoth, Jehiskaiya det san blanga Shalum, en Amasa det san blanga Heidlai. Deibin agri garram Oded det Isreil ami bin dum rong ting,  
\v 13 en deibin tok, “Yumob kaan bringimap dislot prisana langa Sameriya. Wal tharran wan mowa ting wibin dum rong langa YAWEI, en im olredi wail langa wi.”   
\p
\v 14 Wal deya lida langa detlot lidamob en langa ola pipul, det ami bin larramgo detlot prisana fri en ola enijing deibin gajim brom Juda deibin gibitbek langa olabat.  
\v 15 Detlot fobala lida bin gajim sambala klos weya deibin deigidawei en deibin gibit langa detlot prisanamob blanga werrimon. En deibin gibit olabat nyuwan klos en but en deibin gibit olabat samting blanga dagat en dringgim. En deibin klinim olabat sowa garram oliboil. Ol detlot wikwan pipul deibin pudum olabat langa dongki blanga raidim, en deibin deigimbek olabat langa Jeriko det taun weya bin abum loda pamtri. En detlot lidamob bin gobek langa Sameriya.   
\s1 Eihes bin askim det king blanga Asiriya blanga album im  
\r Sekan Kings 16:7-9  
\p
\v 16-18 Bambai na det Idamait ami bin fait langa Juda sanraiswei en deibin deigidawei sambala prisana. Langa det seim dei detlot Filastain pipul bin bitsimap sambala taun langa det hil kantri sangodanwei en langa det deset sauthwei. Deibin teikoba detlot taun gulum Bethshemesh, Ejalan, Gedaroth, Sako, Timna en Gimso en ol detlot lilwan taun raidaran en sambala Filastain pipul bin go en jidan langa detlot pleis.  
\p Wal King Eihes bin jandim wed langa King Tiglathpalisa brom Asiriya blanga album im.  
\v 19 Bat God bin panishim detlot Juda pipul garram ol dislot nogudbala ting, dumaji King Eihes nomo bin duwit langa im en im nomo bin stapam detlot Juda pipul brom bulurrumbat ola nogudbalawei.  
\v 20 Wal King Tiglathpalisa bin kaman, bat im nomo bin album King Eihes. Imbin gibit im brabli adtaim en meigim ebrijing mowes.  
\v 21 Wal King Eihes bin gibit im presen brom det Serramoni Pleis blanga YAWEI en brom det haus blanga im, en brom detlot haus blanga ola lidamob. Nomeda King Eihes bin gibitbat presen langa det king brom Asiriya, bat stil im nomo bin album King Eihes.   
\s1 Det laswan nogudwan ting King Eihes bin dum  
\p
\v 22 Wal nomeda ol dislot nogudbala ting bin hepin langa King Eihes imbin kipgon dumbat moweswan nogudbala ting langa YAWEI.  
\v 23 Imbin jinggabat langa imselp, “Maitbi detlot drimin blanga detlot Siriya pipul bin album det king blanga bidim mi. Maitbi if ai gibit sekrifais ofring langa detlot drimin sheip dei gin album mi.” Wal tharran bin det brabli nogudwan ting weya King Eihes bin dumbat en imbin go mowes blanga im en Juda bin binijap du.   
\p
\v 24 Wal King Eihes bin gajim ola gudwan ebrijing brom det Serramoni Pleis en imbin smeshimap holot na. En imbin lokimap ol detlot dowa deya langa det Serramoni Pleis. Imbin bildimap teibul blanga ofring blanga ola drimin brom najalot kantri langa ebri kona deya langa Jerusalem.  
\v 25 En langa ebri taun deya langa Juda imbin meigim detlot pleis blanga weshipbat ola drimin brom najalot kantri. Wal ol dislot ting bin meigim YAWEI det God blanga im grengrenfathamob brabli wail.   
\p
\v 26 Wal ola ting weya King Eihes bin dum deibin raidimdan langa det buk gulum \it Ola stori blanga ola king brom Isreil en Juda.\it*  
\v 27 King Eihes bin dai en deibin berrim im bodi langa Jerusalem, bat nomo langa det greibyad blanga ola king. Im san Hesakaiya bin jidan det nyuwan king.\x + \xo 28:27 \xt Aisai 14:28\x*   
\c 29  
\s1 King Hesakaiya blanga Juda  
\r Sekan Kings 18:1-3  
\p
\v 1 Wal Hesakaiya bin jidan king blanga Juda wen imbin 25 yiya ol, en imbin jidan langa Jerusalem fo 29 yiya. Im mami bin neim Abaija, hubin doda blanga Sekaraiya.  
\v 2 King Hesakaiya bin oldei bulurrum im grengrenfatha King Deibid en imbin oldei duwit wanim YAWEI det trubala God bin wandim.   
\s1 Deibin meigim det Serramoni Pleis klinbala blanga serramoni  
\p
\v 3 Wal langa det feswan manth langa det seim yiya wen Hesakaiya bin jidan king, im na bin opinimap detlot dowa langa det Serramoni Pleis igin en imbin fiksimap detlot dowa.  
\v 4 Imbin gedim sambala serramonimen en sambala Libaimen blanga kaman langa det sanraisaid kotyad langa det Serramoni Pleis,  
\v 5 en imbin tok langa olabat deya na, “Ol yumob Libaimen, yumob garra meigim miselp klinbala blanga serramoni, en meigim det Serramoni Pleis blanga YAWEI klinbala blanga serramoni du. Yumob garra deigimwei ola nogudwan ting brom det Serramoni Pleis.  
\v 6 Wi grengrenfathamob nomo bin bulurrum YAWEI holbit en deibin dum nogudbala ting langa im. Olabat bin tenim miselp bekboun brom det Serramoni Pleis weya im oldei jidan.  
\v 7 Deibin jadimap det dowa blanga det Serramoni Pleis, en deibin larram detlot lemp audim miselp, en deibin stap barnimbat det gudsmelwan medisin, en dei nomo bin gibit detlot barnapwan ofring.  
\v 8 Wal YAWEI bin brabli wail langa detlot Juda en Jerusalem pipul, en ebrijing wanim YAWEI bin dum langa olabat bin meigim ola najalot brabli hatjamp. Yumob sabi dijan im trubala.  
\v 9 Wi dedimob bin dai langa wo, en blanga wi waifmob en bigininimob deibin deigimwei olabat blanga meigim olabat prisana.   
\p
\v 10 “Wal ai garra lafta meigim brabli strongwan pramis na garram YAWEI det trubala God blanga ola Isreil pipul, wulijim im kaan wail langa wi enimo.  
\v 11 Wal yumob, main serramonimen, yumob nomo weistimbat taim na. Yumob na YAWEI bin pikimat blanga barnimbat det gudsmelwan medisin blanga im, en yumob garra lidim detlot pipul blanga weshipbat im.” Lagijat na King Hesakaiya bin tok.  
\v 12-14 En ol dislot Libaimen na bin deya. Mahath det san blanga Amasai en Jowal det san blanga Esaraiya bin brom det femili lain blanga Kohath. Kish det san blanga Ebdi en Esaraiya det san blanga Jehalalel bin brom det femili lain blanga Merarai. Jowa det san blanga Sima en Idin det san blanga Jowa bin brom det femili lain blanga Geshan. Shimri en Jeyuwel bin brom det femili lain blanga Elisafan. Sekaraiya en Metanaiya bin brom det femili lain blanga Eisaf. Jehuyel en Shimiyai bin brom det femili lain blanga Heiman. Shemaiya en Yusiyel bin brom det femili lain blanga Jedathan.   
\p
\v 15 Wal detlot men olabat bin majurrumap ola najalot Libaimen, en deibin meigim miselp klinbala blanga serramoni. En afta tharran deibin dum wanim det king bin dalim olabat blanga dum en deibin meigim det Serramoni Pleis klin blanga serramoni. Dumaji lagijat na det lowa blanga YAWEI bin tok.  
\v 16 Wal detlot serramonimen bin gowin insaid langa det Serramoni Pleis blanga klinimap det pleis, en deibin deigimat ebrijing brom insaid weya nomo bin klinbala blanga serramoni, en deibin deigim langa det kotyad blanga det Serramoni Pleis. Brom deya detlot Libaimen bin deigimat holot atsaid brom det taun, en deibin deigim langa Kidron Beli.   
\p
\v 17 Wal det wek bin stat langa det feswan dei langa det feswan manth, en langa det namba 8 dei deibin ol binij det wek langa ebri rum insaid langa det Serramoni Pleis. En afta deibin kipgon wek naja 8 dei, raidap det namba 16 dei langa det manth, en deibin meigim ebrijing redibala langa det Serramoni Pleis blanga weship YAWEI.   
\s1 Deibin meigim det Serramoni Pleis seikridwan igin  
\p
\v 18 Brom deya detlot Libaimen bin dalim King Hesakaiya, “Melabat bin binij wek na. Det Serramoni Pleis en det teibul blanga ofring, en det teibul weya dei oldei pudum det seikridwan damba, en ola ebrijing dei ol jidan brabli klinbala blanga serramoni na.  
\v 19 En melabat bin bringimbek ol detlot gudwan ebrijing weya King Eihes bin deigimwei longtaim, dumaji imbin gibit bekboun langa God. Wal melabat bin meigim ebrijing klinbala blanga serramoni igin. Ol detlot ebrijing jidan lida langa det teibul blanga ofring blanga YAWEI.” Lagijat na detlot Libaimen bin tok.   
\p
\v 20 Wal streidawei King Hesakaiya bin gajim detlot boswan wekinmen brom det taun en imbin bringimap olabat langa det Serramoni Pleis.  
\v 21 Deibin gajim 7 boiwan buligi, en 7 boiwan ship, en 7 lilwan boiwan ship, en 7 boiwan gout. En det king bin dalim det serramonimen brom det femili lain blanga Eran, “Yu garra barnim dislot enimul blanga sekrifais ofring langa det teibul blanga ofring blanga meigim fri detlot femili blanga main, en ola pipul langa Juda, en blanga meigim det Serramoni Pleis jidan klinbala blanga serramoni.”  
\v 22 Wal detlot serramonimen bin kilim detlot buligi basdam, en afta deibin kilim detlot ship, en afta detlot lilwan ship, en deibin spilim det blad blanga detlot enimul sekrifais langa det teibul blanga ofring.  
\v 23 En afta deibin gajim detlot gout en deibin deigim langa det king en langa detlot najalot pipul, en deibin pudum olabat bingga langa detlot enimul.  
\v 24 En afta detlot serramonimen bin kilim detlot gout en spilim det blad blanga olabat ontop langa det teibul blanga det sekrifais ofring blanga meigim fri detlot pipul brom olabat nogudbalawei, dumaji det king bin tok dei garra barnim detlot barnapwan ofring en detlot ofring blanga meigim detlot Isreil pipul fri brom olabat nogudbalawei.   
\p
\v 25 Wal King Hesakaiya bin dum wanim YAWEI bin dalim King Deibid basdam blanga dum thru langa det dubala speshalwan mesinja neim Ged en Neithan. En imbin pudum detlot Libaimen deya gin langa det Serramoni Pleis redi blanga plei detlot myusik.  
\v 26 Detlot myusik bin jis laik detlot myusik weya King Deibid bin oldei yusumbat. En detlot serramonimen bin jandap deya gin garram detlot longwan wisul.  
\v 27 Wal King Hesakaiya bin dalim olabat blanga barnim det barnapwan ofring, en seimtaim wen det barnapwan ofring bin barn, detlot pipul bin stat singsing en preisimbat YAWEI, en detlot wekinmen hu oldei pleipleibat det myusik deibin plei garram det longwan wisul en ol detlot myusik weya deibin yusumbat.  
\v 28 Ebribodi hubin deya bin joinin blanga det feloship serramoni, en deibin sing en pleiyim detlot myusik lagijat raidap detlot sekrifais ofring bin barn holot.  
\v 29 En King Hesakaiya en ol detlot pipul bin nildan en weship langa God.  
\v 30 Wal det king en detlot lidamob bin dalim detlot Libaimen blanga sing detlot song weya Deibid en Eisaf det speshalwan mesinja bin raidimdan blanga preisimbat YAWEI. Wal ebribodi bin sing gudbinjiwei en deibin nildan en weship langa God.   
\p
\v 31 Wal King Hesakaiya bin tok langa detlot pipul na, “Wal dumaji yumob jidan klinbala blanga serramoni, wal yumob garra bringimap sekrifais ofring blanga gibitbat theingks langa YAWEI.” En deibin duwit, en sambala deibin bringimap mowa enimul blanga sekrifais langa det barnapwan ofring.  
\v 32 Wal deibin bringimap 70 boiwan buligi, en 100 boiwan ship, en 200 lilwan boiwan ship blanga barnapwan ofring langa YAWEI.  
\v 33 En deibin bringimap 600 buligi en 3,000 boiwan ship blanga sekrifais.  
\v 34 En dumaji nomo naf serramonimen bin deya blanga kilim detlot enimul, wal detlot Libaimen bin lafta album olabat blanga binijimap det wek en raidap langa det taim wen mowa serramonimen bin meigim miselp jidan klinbala blanga serramoni. Mowa Libaimen den serramonimen bin oldei meigim miselp jidan klinbala redi blanga dum det wek.  
\v 35 Wal detlot serramonimen bin dum ola difrindifrinwan sekrifais weya deibin barnim holbit, en deibin barnim det fet blanga ola feloship ofring weya detlot pipul bin gibit langa YAWEI en afta deibin dagat det bif, en detlot serramonimen bin lafta spilim detlot wain du weya detlot pipul bin gibit garram olabat barnapwan ofring.  
\p Lagijat na deibin stat abumbat det weship langa det Serramoni Pleis igin.  
\v 36 Wal King Hesakaiya en detlot pipul bin brabli gudbinji, dumaji God bin album olabat dum dislot ting kwikbalawei.   
\c 30  
\s1 King Hesakaiya bin abum det Pasoba Serramoni  
\p
\v 1-3 Wal detlot pipul nomo bin abum det Pasoba Serramoni langa det rait taim langa det fes manth na, dumaji nomo matj serramonimen bin jidan klinbala blanga serramoni, en oni lilbit pipul bin kaman langa Jerusalem blanga det Pasoba Serramoni. Wulijim King Hesakaiya en im boswan wekinmen en detlot pipul blanga Jerusalem, deibin wandi abum det Pasoba Serramoni langa det sekan manth, en det king bin jandim wed langa ola Isreil pipul en Juda pipul. Imbin jandim leda langa detlot lida blanga det Ifreiyim klen en det Manesa klen blanga dalim olabat blanga kaman langa det Serramoni Pleis langa Jerusalem blanga abum det Pasoba Serramoni en blanga weshipbat langa YAWEI det trubala God blanga ola Isreil pipul.\x + \xo 30:1-3 \xt Nam 9:9-11\x*   
\p
\v 4 Wal King Hesakaiya en detlot pipul bin gudbinji wen deibin jinggabat tharran,  
\v 5 en deibin askimbat ola Isreil pipul brom det taun gulum Den langa nowathsaidwei raidap langa Biyashiba langa sauth, blanga kaman langa Jerusalem blanga abum det Pasoba Serramoni jis laik det lowa bin tok. Langa dijan taim mowa pipul bin kaman langa det serramoni, nomo laik longtaim.  
\v 6 Wal King Hesakaiya en im boswan wekinmen olabat bin jandim detlot mesinja oloba langa Juda en oloba langa Isreil garram dijan mesij na.  
\p Deibin tok, “Yumob Isreil pipul hu stil jidan laibala afta detlot Asiriya pipul bin teikoba dijan kantri. Yumob garra kambek langa YAWEI det trubala God, det God blanga Eibrahem, Aisik en Jeikob, en im garra album yumob.  
\v 7 Wal yumob kaan jidan laik ola grengrenfathamob blanga yumob, en laik detlot najalot Isreil pipul hubin gibit bekboun langa YAWEI. Yumob bin luk hau imbin panishim olabat brabliwei.  
\v 8 Wal yumob kaan kipgon dumbat nogudbala ting laik olabat. Yumob garra duwit langa YAWEI. Yumob garra kaman langa det Serramoni Pleis langa Jerusalem, weya YAWEI bin meigim seikridwan olagijawan, en yumob garra oldei weshipbat im, wulijim im kaan stil jidan wail langa yumob.  
\v 9 If yumob tenim miselp langa YAWEI, wal detlot enami hubin deigimwei ola femilimob blanga yumob en weya stil jidan prisana, wal dei garra kain langa olabat en dei garra larram olabat kambek langa olabat ronwan kantri. Wal YAWEI det trubala God blanga yumob, im oldei kain langa yumob, en if yumob kambek langa im, wal im kaan libum yumob miselp. Im garra jidan langa yumob.” Lagijat na detlot mesinja bin tok.   
\p
\v 10 Wal detlot mesinja bin go langa ebri taun en langa ol det kantri blanga detlot klen gulum Ifreiyim en Manesa, en longwei langa nowathsaid langa det Sebyulan klen, bat ola pipul bin laf langa olabat en mokimbat olabat.  
\v 11 Bat sambala klen bin stil jidan deya brom Esha, Manesa en Sebyulan hubin go langa Jerusalem.  
\v 12 God bin wek langa detlot Juda pipul du, en ol detlot pipul bin wandim blanga bulurrum im, en dum wanim det king en im wekinmen bin dalim olabat.   
\s1 Deibin abum det Pasoba Serramoni  
\p
\v 13 Wal bigmob pipul bin majurrumap miselp langa Jerusalem, en deibin abum det serramoni gulum Damba Nomo Garram Raising langa det sekan manth.  
\v 14 En deibin deigim ol detlot teibul weya deibin yusumbat langa Jerusalem blanga oldei barnimbat sekrifais ofring en barnim det gudsmelwan medisin langa najalot god. Deibin gajim en tjakidawei holot langa Kidron Beli.  
\v 15 En langa det namba 14 dei langa det seimwan manth deibin kilim detlot lilwan boiwan ship blanga det Pasoba Serramoni. En detlot serramonimen en detlot Libaimen hu nomo bin jidan klinbala blanga serramoni, deibin brabli sheim, en deibin gibit miselp langa YAWEI, en afta olabat bin lau blanga gibit barnapwan ofring langa det Serramoni Pleis.  
\v 16 Olabat na bin wek langa det Serramoni Pleis blanga bulurrum det lowa blanga Mosis, det ronwan men blanga YAWEI. En detlot Libaimen bin gibit detlot blad brom detlot sekrifais ofring langa detlot serramonimen, en deibin spilim ontop langa det teibul blanga ofring.  
\v 17 Dumaji loda pipul nomo bin jidan klinbala blanga det serramoni, wal dei nomo bin lau kilim detlot lilwan boiwan ship blanga det Pasoba Serramoni. Wal detlot Libaimen bin lafta kilim detlot lilwan boiwan ship blanga olabat en deibin gibit langa YAWEI.  
\v 18 Sambala pipul hubin kaman brom detlot klen brom Ifreiyim, Manesa, Isaka en Sebyulan nomo bin meigim miselp klinbala blanga det serramoni, dumaji dei nomo bin sabi brabli blanga det Pasoba Serramoni. Deibin dagat detlot lilwan ship bat dei nomo bin sabi det lowa. Wal King Hesakaiya bin lafta prei blanga olabat na.  
\v 19 Imbin prei, “YAWEI, det trubala God blanga ola grengrenfathamob blanga ola Isreil pipul, langa yu gudbalawei yu larramgo fri dislot pipul, nomeda olabat nomo klinbala blanga serramoni, bat dei wandi weshipbat yu garram olabat hat.” Lagijat na King Hesakaiya bin prei.  
\v 20 Wal YAWEI bin ensim det preya blanga King Hesakaiya en imbin larramgo fri detlot pipul en im nomo bin panishim olabat.  
\v 21 Blanga 7 dei detlot pipul hubin majurrumap miselp langa Jerusalem blanga det serramoni gulum Damba Nomo Garram Raising bin jidan brabli gudbinjiwei. En ebridei na detlot Libaimen en detlot serramonimen bin ol preisim YAWEI garram olabat laif holbit.  
\v 22 Wal King Hesakaiya bin preisim detlot Libaimen du wen deibin dum ol det wek gudwei blanga weship langa YAWEI.  
\s1 Det sekan serramoni  
\p Afta langa det 7 dei wen deibin gibitbat ola sekrifais ofring en preisimbat langa YAWEI det trubala God blanga ola Isreil pipul,  
\v 23 deibin wandim gibit mowa ebrijing langa det najawan 7 dei, en deibin brabli gudbinji.  
\v 24 Wal King Hesakaiya bin gibit detlot pipul 1,000 boiwan buligi, en 7,000 boiwan ship blanga kilim en dagat, en detlot boswan wekinmen olabat bin gibit langa detlot pipul 1,000 buligi en 10,000 boiwan ship. Wal detmatj serramonimen bin go thru langa det serramoni blanga meigim miselp klinbala blanga det serramoni.  
\v 25 Wal ebribodi bin brabli gudbinji blanga tharran. Detlot pipul langa Juda, en detlot serramonimen, en detlot Libai pipul, en detlot najalot pipul weya deibin kaman brom nowathsaid, en detlot najalot pipul brom najalot kantri hubin jidan langa Isreil en Juda olataim, olabat na bin brabli gudbinji.  
\v 26 Detlot pipul deya langa Jerusalem bin jidan brabli hepiwan, dumaji nomo enijing bin hepin lagijat brom det taim wen King Salaman det san blanga Deibid bin jidan king.  
\v 27 Wal detlot serramonimen en detlot Libaimen bin askim YAWEI blanga tok gudbala wed langa detlot pipul. En YAWEI bin irrim brom hebin wen deibin preya, en imbin ensim olabat preya.   
\c 31  
\s1 Detlot Isreil pipul bin binijimap ola drimin sheip  
\r Sekan Kings 18:4  
\p
\v 1 Afta wen det bigiswan padi bin binij, ol detlot Isreil pipul bin go langa ebri taun langa Juda, en deibin breigimap ol detlot seikridwan ston, en detlot drimin sheip weya deibin oldei weshipbat langa det laiyawan gelwan drimin gulum Eshara, en deibin breigimap detlot teibul blanga ofring weya deibin oldei weshipbat langa det najalot drimin sheip. Deibin dum seimwei langa detlot najalot kantri blanga Benjamin, Ifreiyim en Manesa. Afta tharran deibin ol gobek langa olabat ron kantri.  
\v 2 Wal King Hesakaiya bin kadimat detlot serramonimen en Libaimen, blanga difrindifrinwan wek. Sambala bin dumbat detlot barnapwan ofring, en sambala bin dumbat feloship ofring, en sambala bin lidimbat pipul blanga weship langa Serramoni Pleis, en sambala bin sing langa det geit blanga det Serramoni Pleis.  
\v 3 Wal King Hesakaiya bin bringimap im ron enimulmob blanga abum barnapwan ofring ebri ailibala en aftanun, en detlot najalot ofring blanga det Sebathdei, en det serramoni gulum Nyumanth en detlot najalot serramoni blanga YAWEI det trubala God.\x + \xo 31:3 \xt Nam 28:1—29:39\x*   
\p
\v 4 Wal King Hesakaiya bin dalim detlot pipul brom Jerusalem blanga bringimap ola ofring langa detlot serramonimen en langa detlot Libaimen wulijim dei gin gibit olabat taim blanga dum det wek blanga YAWEI.  
\v 5 En wen deibin irrim wanim det king bin tok, ol detlot Isreil pipul bin bringimap olkain speshalwan presen. Deibin bringimap ola sid daga en wain en oliboil en shugabeig en najalot daga brom olabat fam.\x + \xo 31:5 \xt Nam 18:12,13,21\x*  
\v 6 En ol detlot pipul hubin jidan deya langa detlot taun langa Juda, deibin ol bringimap olkain presen en buligi en ship en deibin bringimap sambala bigwan presen blanga gibit langa YAWEI.  
\v 7 Detlot presen deibin stat bringimap brom det namba 3 manth en deibin kipgon bringimap blanga naja 4 manth.  
\v 8 Wen King Hesakaiya en im wekinmen bin luk haumatj ting deibin pudumbat, olabat bin stat gibitbat preis en theingks langa YAWEI det trubala God en langa ola Isreil pipul.  
\v 9 En det king bin askim detlot serramonimen en detlot Libaimen weya detlot presen bin kaman brom.  
\v 10 En Esaraiya det haibala serramonimen brom det femili lain blanga Seidok, bin tok langa im, “Brom det taim wen detlot pipul bin stat bringimap detlot presen langa det Serramoni Pleis, melabat bin abum naf daga blanga dagat en mowa igin dumaji YAWEI bin gibit detmatj gudbala ting langa im pipul olabat.”   
\p
\v 11 Wal det king bin dalim olabat blanga klinim detlot stowa rum langa det Serramoni Pleis,  
\v 12 en pudum ol detlot presen en detlot enijing insaid langa detlot stowa rum blanga kipum seifwan. Wal deibin pikimat det Libaimen neim Konanaiya en im braja neim Shimiyai blanga jidan boswan blanga maindim detlot enijing.  
\v 13 En deibin pikimat naja tenbala men brom det Libai klen en deibin wek anda det dubala Libaimen. Olabat bin neim Jehiyel, Esasaiya, Neihath, Esahel, Jerimath, Josabed, Eliyel, Ismakaiya, Mahath en Benaiya. Ol dislot men bin dum det wek, dumaji King Hesakaiya en Esaraiya det haibala serramonimen bin gibit det oda.   
\p
\v 14 Wal Korei det san blanga Imna, imbin Libaimen en imbin bos blanga maindimbat det Sanrais Geit brom det Serramoni Pleis en imbin det boswan blanga detlot presen ofring weya ola pipul bin oldei gibit langa YAWEI en imbin gibit detlot presen langa detlot serramonimen en detlot Libaimen.  
\v 15 En langa detlot najalot taun weya detlot serramonimen bin oldei jidan, detlot Libaimen neim Idin, Miniyamin, Jeshuwa, Shemaiya, Amaraiya en Shekanaiya bin album Kore gudbalawei. Deibin oldei luk haumatj ofring daga detlot pipul bin gibit en deibin sherimat langa ol detlot Libaimen hubin oldei wek deya,  
\v 16 en deibin oldei gibit langa detlot men du weya bin 30 yiya ol o oba hubin wek langa det Serramoni Pleis ebridei.  
\v 17-19 Wal langa wan speshalwan buk deibin raidimdan ol detlot neim en klen blanga ola serramonimen, en ebri klen bin dumbat difrindifrinwan wek. En ol detlot Libaimen hubin 20 yiya ol o oba deibin raidimdan olabat neim en olabat wek. En langa det buk deibin raidimdan ola neim blanga ola waif en biginini blanga olabat. Ol detlot serramonimen en Libaimen bin oldei kipum miselp klinbala blanga serramoni, en deibin oldei jidan redibala blanga dum det wek enitaim blanga YAWEI. Sambala serramonimen en Libaimen bin jidan gulijap langa ola difrindifrinwan taun langa Juda en King Hesakaiya bin pikimat sambala men blanga deigim daga oni langa detlot serramonimen weya bin kaman brom det femili lain blanga Eran en langa ol detlot Libaimen hubin abum olabat neim langa det speshalwan buk.   
\p
\v 20 Ebriweya langa Juda, King Hesakaiya bin dum gudbala wek blanga detlot pipul en YAWEI bin brabli gudbinji.  
\v 21 King Hesakaiya bin brabli gudwan king. Ebrijing imbin oldei dum blanga det Serramoni Pleis en hau imbin sabi det lowa gudwei imbin dum brabliwei blanga YAWEI. Imbin kipgon bulurrumbat im brabli strongbalawei en nomo gibap.   
\c 32  
\s1 King Senakerib bin fait garram Juda en Jerusalem  
\r Sekan Kings 18:13-37; 19:14-19,35-37; Aisaiya 36:1-22; 37:8-38  
\p
\v 1 Afta King Hesakaiya bin bulurrum trubalawei ola lowa blanga YAWEI det trubala God, King Senakerib brom Asiriya bin kaman en fait langa Juda. Imbin fait ol detlot strongwan taun en imbin breigimap ola wol en imbin reken im gin teikoba olabat.  
\v 2 Wen King Hesakaiya bin irrim King Senakerib garra fait langa Jerusalem,  
\v 3-4 im en im wekinmen olabat bin meigim plen blanga go en kadimof det woda atsaid brom det taun, wulijim ola solja brom Asiriya kaan abum eni woda wen dei kaman blanga fait. Ola boswan wekinmen bin majurrumap miselp en stapam detlot springwoda weya randan olaran Jerusalem.  
\v 5 En King Hesakaiya bin abum loda wekinmen bildimbek ola wol weya bin buldan langa det taun. En deibin bildimap strongwan haus langa det wol blanga lukinatbat, en deibin bildimap atsaid wol blanga maindim det insaid wol. En deya langa sanraiswei langa Jerusalem deibin meigim strongwan det pleis weya deibin pudum bigiswan graun blanga bildimap det len. Imbin gibit oda blanga meigim blendibala shild en spiya du.  
\v 6 En imbin majurrumap ola men langa Jerusalem en imbin pudum sambala men brom im ami blanga jidan bos blanga olabat. Imbin majurrumap olabat holot deya langa opinwan miting pleis lida langa det taun geit en imbin tok,  
\v 7 “Yumob kaan bradin! Yumob garra meigim miselp strongbala. Yumob kaan jidan bradinbala blanga King Senakerib en im strongbala ami. Wi jidan mowa strongbala langa olabat,  
\v 8 dumaji YAWEI det God blanga wi im garra album wi en fait blanga wi. Detlot Asiriya solja oni odinri pipul en deibin kaman garram olabat ronwan pawa.” Ol dislot wed weya det king bin tok bin album detlot Juda pipul na.   
\p
\v 9 Bambai, wen King Senakerib en im ami bin kemp deya langa det taun gulum Leikish imbin jandim mesij langa King Hesakaiya en langa detlot Juda pipul deya langa Jerusalem.  
\v 10 Imbin tok, “Mi na King Senakerib brom Asiriya, en ai garram solja olaran Jerusalem. Yumob reken yumob gin jidan gudwei wen mi en main amimob garra binijimap yumob?  
\v 11 King Hesakaiya, det king blanga yumob, dalimbat yumob YAWEI det trubala God blanga yumob garra seibum yumob brom mi. Bat im dalimbat yumob laiyawan stori en yumob garra dai dumaji yumob garra jidan hanggriwan en thestiwan.  
\v 12 King Hesakaiya bin pulumdan ola pleis weya yumob bin weshipbat YAWEI, en im oni bin libum wanbala, indit? En imbin dalimbat yumob oni wan pleis yumob gin weshipbat, indit?  
\v 13 Wal yumob bin irrim wanim main grengrenfathamob en mi bin dum langa detlot najalot kantri. Wal yumob reken detlot drimin blanga ola najalot kantri bin bidim melabat?  
\v 14 Basdam nomo enibodi drimin bin kipum olabat seif brom ola king blanga Asiriya. Wal yumob reken yumob God gin album yumob en dum gudwan ting blanga yumob? Nomo!  
\v 15 Nomo larram King Hesakaiya trikimbat yumob. Nomo eni kantri o pipul gin jandap strongbala langa Asiriya. Trubala yumob God kaan seibum yumob.” Lagijat na King Senakerib bin tok.   
\p
\v 16 Wal detlot Asiriya boswan men bin kipgon toktok brabli nogudbalawei blanga YAWEI en im wekinmen King Hesakaiya.  
\v 17 Det leda brom King Senakerib bin meigim fan blanga YAWEI du. Det leda bin tok, “Detlot drimin brom najalot kantri kaan seibum pipul olabat brom det Asiriya ami, en det God weya King Hesakaiya oldei weshipbat kaan seibum yumob du.”  
\v 18 Detlot boswan bin tok ol dislot wed langa det Hibru langgus, wulijim ebribodi garra irrim en sabi brom det wol langa det taun, en dei garra jidan brabli bradinbala en wandi gibap.  
\v 19 Detlot boswan bin tokabat YAWEI laik dei reken im laiyawan drimin o drimin sheip weya sambodi bin meigim.   
\p
\v 20 Brom deya King Hesakaiya en det speshalwan mesinja neim Aisaiya, det san blanga Eimas bin prei langa God en askim im blanga album olabat.  
\v 21 Wal YAWEI bin jandim einjul blanga binijimap ol detlot solja en boswan blanga det Asiriya amimob. Wal det king bin gobek langa Asiriya, en imbin brabli sheim miselp. Wandei wen imbin go langa det serramoni pleis blanga im drimin, sambala san blanga im bin kilim im ded garram bigwan naif.   
\p
\v 22 Wal lagijat na YAWEI bin seibum King Hesakaiya en ola pipul langa Jerusalem brom Senakerib det king blanga Asiriya, en brom ol detlot enami blanga olabat. Imbin larram ola pipul jidan gudwei langa ola gulijapwan kantri.  
\v 23 Loda pipul bin kaman langa Jerusalem blanga bringimap ofring langa YAWEI en presen blanga King Hesakaiya. Wal brom det taim na ola pipul langa najalot kantri bin rispek King Hesakaiya.   
\s1 King Hesakaiya bin sikwan  
\r Sekan Kings 20:1-3,12-19; Aisaiya 38:1-3; 39:1-8  
\p
\v 24 Wal afta na, King Hesakaiya bin git sik en imbin gulijap dai. Imbin prei en YAWEI bin shoum im sain weya im garra gitbeda igin.  
\v 25 Bat King Hesakaiya bin brabli praudwan en im nomo bin gibit theingks langa YAWEI blanga wanim imbin dum blanga im en tharran na bin meigim YAWEI brabli wail en imbin panishim Juda en Jerusalem.  
\v 26 Bat bambai King Hesakaiya en ola pipul blanga Jerusalem bin sori miselp en deibin askim YAWEI blanga larramgo olabat fri. En YAWEI nomo bin panishim olabat raidap King Hesakaiya bin binij.   
\s1 King Hesakaiya en ol im ebrijing  
\p
\v 27 Wal King Hesakaiya bin jidan brabli ritjwan na, en ebribodi bin oldei rispek langa im. Imbin bildimap stowa rum blanga pudum im silba en gol en ola purdiwan ston, gudsmelwan medisin en shild en najalot gudwan ebrijing.  
\v 28 Imbin bildimap najalot stowa rum blanga pudum ola sid daga, wain, oliboil, en pleis blanga ol im buligi en pedik blanga ol im ship.  
\v 29 En God bin meigim King Hesakaiya brabli ritjwan, wulijim imbin baiyim mowa ship, gout en buligi, en imbin bildimap mowa taun du.   
\p
\v 30 King Hesakaiya bin meigim im wekinmen grajim hol blanga meigim det springwoda kaman brom Gihon en go langa det taun blanga Jerusalem. Ebrijing imbin dum bin hepin gudwei,  
\v 31 wulijim wen detlot lida brom Bebalon bin jandim mesinjamob blanga askim King Hesakaiya blanga det sain weya God bin gibit langa im, God bin larram King Hesakaiya gibit olabat im ron wed blanga testim im en blanga faindat if im brabli trubalawan.   
\s1 King Hesakaiya bin dai  
\r Sekan Kings 20:20,21  
\p
\v 32 Wal ebrijing weya King Hesakaiya bin dum wen imbin jidan king, en hau imbin brabli trubalawan langa YAWEI, im deya langa det dubala buk gulum \it Ola wed blanga Aisaiya det speshalwan mesinja en det san blanga Eimas,\it* en \it Ola stori blanga ola king brom Juda en Isreil.\it*  
\v 33 Wen King Hesakaiya bin dai deibin berrim im bodi langa det pleis weya dei berrim ola king. En ebribodi deya langa Juda en Jerusalem bin preisim im brabliwei. Im san Manesa bin jidan det nyuwan king na.   
\c 33  
\s1 King Manesa blanga Juda  
\r Sekan Kings 21:1-9  
\p
\v 1 Wal Manesa bin jidan det nyuwan king blanga Juda wen imbin 12 yiya ol en imbin jidan king langa Jerusalem fo 55 yiya.  
\v 2 King Manesa bin gibit bekboun langa God en imbin bulurrum ol detlot nogudwan ting blanga detlot pipul hu God bin andimwei brom Isreil.\x + \xo 33:2 \xt Jera 15:4\x*  
\v 3 Imbin bildimapbek detlot nogudwan seikridwan pleis weya im dedi King Hesakaiya bin pulumdan. Imbin bildimap detlot teibul blanga ofring blanga det drimin gulum Beil en imbin pudumap detlot seikridwan pol blanga weshipbat langa det gelwan drimin gulum Eshara, en imbin weshipbat olabat en detlot sta ontop langa skai du.   
\p
\v 4 En deya langa det Serramoni Pleis weya dei gin oni weshipbat langa YAWEI, King Manesa bin bildimap detlot teibul blanga ofring blanga detlot drimin brom najalot kantri.\x + \xo 33:4 \xt 2 Kran 6:6\x*  
\v 5 Imbin pudum ol detlot teibul blanga ofring blanga ol detlot sta langa det dubala kotyad deya langa det Serramoni Pleis.  
\v 6-7 En imbin pudumap purdiwan ston blanga najalot drimin langa det Serramoni Pleis. King Manesa bin dumbat detlot klebabala trik en najalot nogudwan ting en imbin askim detlot klebabalamen blanga dalim im wanim blanga dum. En imbin sekrifais im ronwan san olabat deya langa det pleis gulum Hinam Beli. Imbin dum bigismob nogudbala ting en imbin meigim YAWEI brabli wail.  
\p Longtaim God bin dalim King Deibid en im san Salaman, “Jerusalem im det pleis weya aibin pikimat brom eni najawan pleis deya langa Isreil. Im blanga main, en deya langa det serramoni pleis dei garra oni weshipbat mi olagijawan.  
\v 8 If main pipul olabat teiknodis en duwit langa main lowa en wanim aibin titjimbat thru langa main wekinmen Mosis, wal ai kaan neba meigim olabat gowei igin brom dijan kantri weya aibin gibit langa olabat grengrenfathamob.” Lagijat na God bin tok.\x + \xo 33:8 \xt 1 King 9:3-5; 2 Kran 7:12-18\x*   
\p
\v 9 Bat detlot pipul deya langa Juda en Jerusalem bin teiknodis langa King Manesa en deibin dum brabli nogudbala ting. Deibin dum moweswan ting den detlot pipul brom najalot kantri weya God bin binijimap olabat.   
\s1 King Manesa bin sori blanga im nogudbalawei  
\p
\v 10 Wal YAWEI bin trai wonim King Manesa en detlot pipul blanga olabat nogudbalawei, bat olabat nomo bin wandim irrim en teiknodis langa det wed blanga im.  
\v 11 Wal imbin larram det Asiriya boswan amimob teikoba Juda en deigimwei King Manesa prisana. Deibin pudum huk langa im nos en deibin taiyimap im garram tjein, en deibin deigim im langa Bebalon.  
\v 12 Wen King Manesa bin jidan prisana deya, imbin askim God blanga larramgo im fri en album im.  
\v 13 Wal YAWEI bin irrim det preya blanga King Manesa en imbin luk imbin jidan brabli soribala, en imbin larram im gobek langa Jerusalem en jidan king deya. King Manesa bin sabi na YAWEI bin det trubalawan God.   
\p
\v 14 Bambai na King Manesa bin bildimapbek detlot wol deya sanraisaid langa Jerusalem en imbin meigim im mowa haibala. Imbin go brom Gihon Beli raidap langa Fish Geit en raidaran langa det pleis blanga det taun gulum Hil Blanga Ofel. King Manesa bin pudum boswan amimen langa ola strongwan taun langa Juda.  
\v 15 King Manesa bin deigimwei brom det Serramoni Pleis ola drimin sheip en purdiwan ston blanga ola god brom najalot kantri. Imbin gajim ol detlot teibul blanga ofring weya imbin bildimap gulijap langa det Serramoni Pleis en langa najalot pleis deya langa Jerusalem. Imbin tjakidawei ol detlot ting atsaid brom det taun.  
\v 16 Afta tharran imbin bildimbek ol detlot teibul blanga ofring blanga YAWEI. Imbin gibit sekrifais blanga gibit theingks langa YAWEI en blanga askim im blanga lukaftumbat im gudwei. Imbin dalim ebribodi langa Juda blanga weshipbat YAWEI det God blanga Isreil.  
\v 17 Ola pipul bin duwit langa King Manesa, bat deibin weshipbat YAWEI langa olabat ronwan serramoni pleis.   
\s1 King Manesa bin dai  
\r Sekan Kings 21:17,18  
\p
\v 18 Wal ola ebrijing weya King Manesa bin dum wen imbin jidan king, en im preya langa YAWEI, en detlot woning brom im speshalwan mesinjamob, deibin raidimdan langa det buk gulum \it Ola stori blanga ola king brom Isreil.\it*  
\v 19 Ol dislot ting blanga King Manesa en im preya en det ensa brom God deibin raidimdan langa det buk gulum \it Ola stori blanga ola speshalwan mesinja.\it* Deibin raidimdan ola nogudbala ting weya King Manesa bin dum bifo imbin tenim miselp langa God igin. En deibin raidimdan ola pleis weya imbin pudum drimin sheip, en weya imbin pudum serramoni pleis blanga weship det gelwan god gulum Eshara.   
\p
\v 20 Wal King Manesa bin dai en deibin berrim im bodi gulijap langa det king haus. Im san Eman bin jidan det nyuwan king.   
\s1 King Eman blanga Juda  
\r Sekan Kings 21:19-26  
\p
\v 21 Wal Eman bin 22 yiya ol wen imbin jidan det nyuwan king blanga Juda, en imbin jidan king langa Jerusalem fo 2 yiya.  
\v 22 King Eman bin gibit bekboun langa YAWEI seim laik im dedi King Manesa bin dum, en imbin weshipbat en gibitbat sekrifais langa detlot drimin sheip im dedi bin meigim.  
\v 23 King Manesa bin kambek langa YAWEI bat King Eman nomo bin dum tharran. Imbin kipgon dum mowes nogudbala ting langa im dedi.   
\p
\v 24 Wal sambala boswan wekinmen blanga King Eman nomo bin wandim im en deibin kilim im ded deya langa im ronwan haus.  
\v 25 Bat detlot Juda pipul bin kilim detlot men hubin kilim det king en deibin meigim im san Josaiya jidan det nyuwan king.   
\c 34  
\s1 King Josaiya blanga Juda  
\r Sekan Kings 22:1,2  
\p
\v 1 Wal Josaiya bin 8 yiya ol wen imbin jidan det nyuwan king blanga Juda, en imbin jidan king langa Jerusalem fo 31 yiya.\x + \xo 34:1 \xt Jera 3:6\x*  
\v 2 Imbin bulurrum im grengrenfatha Deibid en imbin oldei duwit langa YAWEI det trubala God.   
\s1 King Josaiya bin stapam olabat weshipbat ola drimin brom najalot kantri  
\r Sekan Kings 23:4-20  
\p
\v 3 Wal wen King Josaiya bin oni 16 yiya ol imbin stat weshipbat God, jis laik im grengrenfatha Deibid bin dum. Bambai langa 4 yiya taim imbin binijimap ola nogudwan serramoni pleis langa Juda en Jerusalem, en detlot seikridwan pol blanga weshipbat det gelwan drimin gulum Eshara en detlot drimin sheip blanga detlot drimin brom najalot kantri.  
\v 4 Imbin lukinatbat wen deibin pulumdan detlot teibul blanga ofring blanga weshipbat det drimin gulum Beil, en wen deibin smeshimap detlot teibul blanga gudsmelwan medisin ofring. Ol detlot Eshara pol en drimin sheip en purdiwan ston blanga weship deibin smeshimap du. Ola lilwan pat bin buldan ebriweya en deibin tjakam ol detlot langa ola greibyad blanga detlot hubin oldei weshipbat detlot drimin sheip.\x + \xo 34:4 \xt 2 King 21:3; 2 Kran 33:3\x*  
\v 5 King Josaiya bin barnimap ola boun blanga detlot serramonimen blanga ol detlot drimin langa detlot teibul blanga ofring.  
\p Wal King Josaiya bin binijimap ol detlot drimin brom najalot kantri deya langa Juda en Jerusalem. Wen imbin dum lagijat wal imbin meigim Juda en Jerusalem klinbala brom ol detlot nogudbalawei.\x + \xo 34:5 \xt 1 King 13:2\x*  
\v 6 Imbin dum seimwan ting langa detlot taun weya bin bitsimap langa Manesa, Ifreiyim en Simiyan raidap langa det boda blanga Neftali.  
\v 7 Ebriweya langa det nowathwan kantri gulum Isreil, King Josaiya bin pulumdan ola teibul blanga ofring blanga detlot drimin sheip en ol detlot Eshara pol. Imbin smeshimap ola drimin sheip jis laik das en smeshimap ol detlot teibul blanga gudsmelwan medisin ofring. Afta tharran imbin gobek langa Jerusalem.   
\s1 Hilkaiya bin faindim det buk blanga God lowa  
\r Sekan Kings 22:3-20  
\p
\v 8 Wal langa det namba 18 yiya wen King Josaiya bin jidan king, imbin bitsimap ola nogudwan ting brom det kantri en brom det Serramoni Pleis blanga YAWEI, en imbin jandim thribala wekinmen blanga fiksimap det Serramoni Pleis. Deibin neim Shafan det san blanga Esalaiya, det gabman men brom Jerusalem neim Meiseiya en Jowa det san blanga Jowahes, hubin lukaftumbat ola gabman buk.  
\v 9 Dislot thribala men bin go langa Hilkaiya det boswan serramonimen, en deibin gibit im det mani weya detlot Libai blijiman bin oldei gajimbat brom detlot pipul langa Manesa en Ifreiyim en ebriweya langa det nowathwan kantri gulum Isreil, en brom detlot hubin jidan langa Juda en Benjamin en Jerusalem.  
\v 10 Ol detlot mani deibin gibit langa detlot boswan men hubin jidan bos blanga ola wek langa det Serramoni Pleis. Sambala mani deibin yusum blanga peiyim ola wekinmen,  
\v 11 en ola najalot mani deibin gibit langa ola kapinta en ola wekinmen. Deibin yusum detlot mani blanga baiyim ston en wud blanga bildimapbek ola najalot haus weya det najalot king nomo bin lukaftumbat.  
\v 12 Ola wekinmen bin brabli trubalawan men, en detlot fobala boswan wekinmen bin brom det Libai klen. Olabat neim bin Jeihath en Obadaiya brom det Merarai femilimob, en Sekaraiya en Meshalam brom det Kohath femilimob. En detlot Libaimen bin brabli klebabala blanga det myusik,  
\v 13 en sambala bin boswan blanga garrimapbat ola ebrijing en jidan bos blanga ola wekinmen. Najalot Libaimen bin jandap olaran en wotjimbat det Serramoni Pleis.   
\p
\v 14 Wal wen deibin gibit dislot mani langa detlot boswan lidamob brom detlot stowa rum, Hilkaiya bin faindim det buk weya bin abum ola lowa weya YAWEI bin gibit langa Mosis.  
\v 15 Hilkaiya bin gibit det buk langa Shafan det boswan lida en imbin tok, “Yu luk wanim aibin faindim iya langa dijan Serramoni Pleis. Det buk garram ola lowa blanga God.”   
\p
\v 16 Wal Shafan bin deigim det buk langa King Josaiya en imbin tok, “Yu wekinmenmob bin dumbat ebrijing weya yubin wandim.  
\v 17 Deibin gajimbat ola mani brom det Serramoni Pleis en deibin gibit langa detlot men hu lukaftumbat ola wek.  
\v 18 En wanmo ting ai garra dalim yu. Det serramonimen neim Hilkaiya bin gibit mi dijan buk.” En Shafan bin ridimat det buk adbala.   
\p
\v 19 Wal wen King Josaiya bin irrim wanim im tok langa det buk garram God lowa, imbin breigimap im klos en jidan soribalawei.  
\v 20 Streidawei imbin jingat langa Hilkaiya, Shafan, Ahikam det san blanga Shafan, Ebdan det san blanga Maikaiya, en im ronwan wekinmen Esaiya. Imbin tok,  
\v 21 “Maitbi YAWEI im brabli wail langa mi en ebribodi iya langa Isreil en Juda, dumaji melabat grengrenfathamob nomo bin teiknodis en bulurrum ola lowa weya deibin raidimdan langa dijan buk. Yumob go en faindat wanim YAWEI wandim wi blanga dum.”   
\p
\v 22 Wal Hilkaiya en detlot fobala men bin go streidawei blanga tok langa Hulda det speshalwan mesinja. Im hasbin bin Shalum hubin lukaftumbat ola klos blanga det king. Hulda bin oldei jidan langa det nowathsaid langa Jerusalem en wen deibin midim im langa im kemp imbin tok,  
\v 23 “King Josaiya bin jandim yu iya, en dijan wanim YAWEI det trubala God blanga Isreil bin tok langa im.  
\v 24 ‘King Josaiya, Mi na YAWEI. Ai garra panishim dijan kantri en ebribodi hu jidan iya, jis laik deibin raidimdan langa det buk.  
\v 25 Detlot pipul blanga Juda en Isreil bin gibit bekboun langa mi. Deibin gibit sekrifais ofring langa detlot god brom najalot kantri en deibin weshipbat ola drimin sheip. En ai kaan album olabat enimo. Mi brabli wail.  
\v 26-27 King Josaiya yu irrimbat wanim mi garra dum. Aibin luk yubin brabli nogudbinji wen yubin irrim wanim garra hepin langa dijan kantri en hau ola pipul garra binijap. Yubin breigim yu klos soribalawei, en aibin irrim yu kraikraibat.  
\v 28 Wal bifo ai binijimap dijan pleis yu garra dai gudwei.’” Lagijat na Hulda bin tok.  
\p Wal detlot men bin gowei en deibin dalim King Josaiya wanim Hulda bin tok.   
\s1 King Josaiya bin ridim det buk garram God lowa  
\r Sekan Kings 23:1-20  
\p
\v 29 Brom deya King Josaiya bin majurrumap ola lidamob brom Juda en Jerusalem,  
\v 30 en imbin go langa det Serramoni Pleis blanga YAWEI garram ol detlot pipul brom Juda en Jerusalem, en detlot serramonimen en ola Libaimen.  
\p Wal wen ebribodi bin deya King Josaiya bin ridimat adbala det buk garram det brabli strongbala blanga God lowa weya deibin faindim langa det Serramoni Pleis.\fig |src="CO01230B.TIF" size="col" ref="34:30" \fig*  
\v 31 Wen King Josaiya bin binij ridimbat, imbin jandap langa det pleis weya ola king jandap. Imbin meigim brabli strongbala pramis langa det neim blanga YAWEI blanga duwit trubalawei langa YAWEI en bulurrum im lowa en ola ebrijing weya imbin ridimbat langa det buk.  
\v 32 En imbin askim ola pipul langa Jerusalem en Benjamin blanga meigim det seimwan pramis langa olabat God weya olabat grengrenfathamob bin weshipbat en deibin duwit.  
\v 33 En King Josaiya bin binijimap ola drimin sheip langa ebri pleis deya langa Isreil, en imbin dalim ebribodi deya langa Isreil dei garra lafta weship oni langa YAWEI det trubala God blanga olabat grengrenfathamob olataim im jidan king.   
\c 35  
\s1 Det Pasoba Serramoni  
\r Sekan Kings 23:21-23  
\p
\v 1 Wal King Josaiya bin gibit oda blanga abum det Pasoba Serramoni deya langa Jerusalem blanga preisim YAWEI det trubala God. Wal langa det namba 14 dei langa det feswan manth deibin kilim detlot lilwan boiwan ship blanga abum det Pasoba Serramoni.  
\v 2 Langa det dei, King Josaiya bin meiksho ol detlot serramonimen bin sabi wanim wek dei garra dum langa det Serramoni Pleis.  
\v 3 Imbin majurrumap ola Libaimen hubin wek blanga YAWEI en hubin titjimbat ola pipul blanga im lowa, en imbin dalim olabat, “Yumob kaan garrimap det Seikridwan Boks brom wan pleis langa najawan pleis enimo. Im garra stap langa det Serramoni Pleis weya King Salaman det san blanga King Deibid bin bildimap. En deya na yumob garra wek blanga YAWEI en im Isreil pipul olabat.  
\v 4 Yumob garra meigim miselp redibala blanga dum det wek weya King Deibid en King Salaman bin gibit yumob femili.\x + \xo 35:4 \xt 2 Kran 8:14\x*  
\v 5 Yumob garra kadimat miselp langa femili grup en wek olaran det Serramoni Pleis, wulijim yumob gin album ola difrinwan femili hu weship deya.  
\v 6 Wen ola pipul bringimap langa yumob detlot boiwan ship blanga Pasoba Serramoni, yumob garra kilim en meigim redibala blanga sekrifais ofring blanga YAWEI. Yumob garra meiksho detlot pipul bulurrum ola lowa weya YAWEI bin gibit Mosis. Yumob nomo dum enijing weya meigim yumob nomo klinbala blanga serramoni.” Lagijat na King Josaiya bin tok.   
\p
\v 7 Wal King Josaiya bin gibit 30,000 ship en gout blanga det Pasoba Serramoni, en 3,000 boiwan buligi blanga najalot sekrifais brom im ronwan enimulmob blanga ola pipul.  
\v 8 Detlot boswan wekinmen blanga King Josaiya bin gibit sambala enimul langa detlot pipul, en langa detlot serramoni men en detlot Libaimen blanga yusum blanga sekrifais. Hilkaiya, Sekaraiya en Jehiyel hubin detlot boswan blanga det Serramoni Pleis bin gibit langa detlot serramonimen 2,600 lilwan ship en kidikidi blanga det Pasoba Serramoni en 300 buligi blanga najalot sekrifais.  
\v 9 Konanaiya, en im dubala braja neim Shemaiya en Nethanel, en najalot neim Hashabaiya, Jeiyel en Josabed, olabat bin lidamob blanga detlot Libaimen. Deibin gibit ola najalot Libai pipul 5,000 lilwan ship en kidikidi en 500 boiwan buligi blanga sekrifais ofring blanga det Pasoba Serramoni.   
\p
\v 10 Wal wen ebrijing bin jidan redibala blanga det Pasoba Serramoni, detlot serramonimen en detlot Libaimen bin jandap weya King Josaiya bin dalim olabat.  
\v 11 En detlot Libaimen bin kilim en skinimap detlot lilwan ship blanga det Pasoba Serramoni, en deibin gibit sambala blad langa detlot serramonimen hubin spilim langa det teibul blanga ofring.  
\v 12 Detlot Libaimen bin pudum wansaid ola difrinwan pat blanga detlot enimul wulijim detlot pipul garra lafta gibit blanga sekrifais blanga meigimbat YAWEI gudbinji, jis laik det lowa blanga Mosis bin tok. Deibin dum det seimwan ting garram ola buligi du.  
\v 13 Deibin sekrifais ol detlot enimul blanga Pasoba langa det teibul blanga ofring en deibin boilimap det najalot bif blanga det najalot ofring langa detlot sospen, biligan en pot. Streidawei deibin gibit langa detlot pipul wulijim dei gin dagat.\x + \xo 35:13 \xt Eksa 12:8,9\x*  
\v 14 Detlot serramonimen bin wek oldei gibitbat sekrifais en deibin barnim detlot enimul fet langa det teibul blanga ofring. Wen deibin binij dumbat det wek, detlot Libaimen bin gibit enimul blanga det Pasoba Serramoni blanga olabat ronselp en detlot serramonimen.  
\v 15 Langa det serramonitaim, sambala Libaimen bin meigim redi sambala enimul blanga det Pasoba Serramoni blanga detlot pipul hubin pleipleibat myusik en detlot wekinmen hubin oldei maindimbat det Serramoni Pleis. Deibin dum lagijat wulijim detlot Libaimen hubin kipgon pleipleibat myusik kaan libum det pleis. Detlot oda bin kaman brom King Deibid, Eisaf, Heiman en Jedathan, det speshalwan mesinja blanga det king. Detlot wekinmen hubin oldei maindimbat det Serramoni Pleis nomo bin libum det pleis du.\x + \xo 35:15 \xt 1 Kran 25:1\x*  
\v 16 Wal langa det dei na, deibin abum det Pasoba Serramoni blanga preisimbat YAWEI en deibin pudum ol detlot sekrifais ofring langa det teibul blanga ofring blanga im. Deibin dum jis laik King Josaiya bin tok.  
\v 17 Afta ola pipul bin abum det serramoni gulum Damba Nomo Garram Raising fo 7 dei.\x + \xo 35:17 \xt Eksa 12:1-20\x*  
\v 18 Pipul brom Jerusalem en brom ola taun oloba Juda en Isreil bin kaman. Dei nomo bin abum det Pasoba Serramoni lagijat brom det taim wen Semyul bin jidan speshalwan mesinja. Dei nomo bin abum eni Pasoba Serramoni lagijat bifo langa Isreil.  
\v 19 Ol dislot ting bin hepin langa det namba 18 yiya wen Josaiya bin jidan king.   
\s1 King Josaiya bin dai langa wo  
\r Sekan Kings 23:28-30  
\p
\v 20 Bambai na wen King Josaiya bin binij dum ola wek langa det Serramoni Pleis, King Neiko brom Ijip bin go garram im amimob langa det taun gulum Kakamish langa det Yufreitis Riba. En King Josaiya bin go garram im amimob nowathwei blanga midim det Ijip amimob blanga stapam det king.  
\v 21 Wal King Neiko bin jandim mesij langa King Josaiya, “Ai nomo wandim fait langa yu, king blanga Juda. Melabat kaan fait langa yu. Bat God bin dalim mi blanga go kwikbala en binijimap main enamimob. God im langa main said, en if yu stapam mi, wal God garra binijimap yu.”  
\v 22 Bat King Josaiya nomo bin teiknodis langa det woning brom King Neiko, nomeda imbin kaman brom God. Bat imbin tjeinjim miselp blanga luk laik najawan men en imbin go blanga fait langa King Neiko langa det beli gulijap langa Magido.   
\p
\v 23 Wal langa det wo wanbala solja brom Ijip bin shudum King Josaiya garram erro. En King Josaiya bin dalim im wekinmen, “Deigimbek mi kwikbala brom iya, dumaji mi ardim detmatj na.”  
\v 24 Deibin garrimap King Josaiya brom im ronwan bagi en bin pudum im langa najawan bagi en deibin deigim im langa Jerusalem weya imbin dai. Deibin berrim im bodi langa det pleis blanga ola king en ebribodi langa Juda en Jerusalem bin krai blanga im.   
\p
\v 25 Wal Jeramaiya det speshalwan mesinja bin raidimdan fyunral song blanga preisimbat King Josaiya. En brom det taim na wen enibodi deya langa Juda krai soribalawei blanga King Josaiya dei sing det song. Det song im deya langa det buk garram ola fyunral song.   
\p
\v 26-27 Wal ola najalot ting King Josaiya bin dum wen imbin jidan king, en wen imbin jidan brabli trubala en bulurrum YAWEI, deibin raidimdan langa det buk gulum \it Ola stori blanga ola king brom Isreil en Juda\it*.   
\c 36  
\s1 King Jowahes blanga Juda  
\r Sekan Kings 23:30-35  
\p
\v 1 Afta King Josaiya bin dai, detlot pipul blanga Juda bin meigim im san Jowahes det nyuwan king.  
\v 2 Imbin 23 yiya ol wen imbin jidan king blanga Juda, en imbin jidan king oni fo 3 manth.   
\p
\v 3 Brom deya King Neiko brom Ijip bin gajim King Jowahes en imbin meigim im prisana en imbin meigim Juda peiyim im 4 tan silba en 34 kilogrem gol blanga teks mani.  
\v 4 En King Neiko bin meigim det braja blanga King Jowahes neim Eliyakim jidan det nyuwan king blanga Juda en imbin gibit im nyuwan neim. Det neim bin Jehoiyakim. Imbin deigimwei King Jowahes prisana langa Ijip.\x + \xo 36:4 \xt Jera 22:11,12\x*   
\s1 King Jehoiyakim blanga Juda  
\r Sekan Kings 23:36—24:7  
\p
\v 5 Wal Jehoiyakim bin 25 yiya ol wen imbin jidan det nyuwan king, en imbin jidan king langa Jerusalem fo 11 yiya. King Jehoiyakim bin gibit bekboun langa YAWEI det trubala God blanga im en imbin dumbat brabli nogudwan ting.\x + \xo 36:5 \xt Jera 22:18,19; 26:1-6; 35:1-19\x*  
\v 6 Wen Jehoiyakim bin jidan king, King Nebakanesa brom Bebalon bin teikoba Juda. Imbin meigim King Jehoiyakim prisana en taiyimap im garram tjein en imbin deigim im langa det meinwan taun blanga Bebalon.\x + \xo 36:6 \xt Jera 25:1-38; 36:1-32; 45:1-5; Den 1:1,2\x*  
\v 7 King Nebakanesa bin deigimwei detmatj gudwan ebrijing brom det Serramoni Pleis blanga YAWEI en imbin pudum langa im ronwan bigwan haus langa Bebalon.  
\v 8 Ola najalot ting Jehoiyakim bin dum wen imbin jidan king en ola nogudbala ting weya imbin dumbat deibin raidimdan langa det buk gulum \it Ola stori blanga ola king brom Isreil en Juda.\it* En im san neim Jehoiyakin bin jidan det nyuwan king. \fig Det bigwan kantri gulum Bebalon|src="map 2 Chr 36-8 Kr.tif" size="col" ref="36:8" \fig*   
\s1 King Jehoiyakin blanga Juda  
\r Sekan Kings 24:8-17  
\p
\v 9 Wal Jehoiyakin bin 18 yiya ol wen imbin jidan nyuwan king blanga Juda. Imbin jidan king langa Jerusalem fo oni 3 manth en 10 dei. King Jehoiyakin bin gibit bekboun langa YAWEI en imbin dumbat ola nogudbala ting.  
\v 10 Langa det kolwethataim na, King Nebakanesa brom Bebalon bin deigimwei King Jehoiyakin prisana langa Bebalon. Imbin deigimwei mowa gudwan ting brom det Serramoni Pleis du, en imbin meigim Sedakaiya det nyuwan king.\x + \xo 36:10 \xt Jera 22:24-30; 24:1-10; 29:1,2; 37:1; Isik 17:12,13 \x*   
\s1 King Sedakaiya blanga Juda  
\r Sekan Kings 24:18-20; Jeramaiya 52:1-3  
\p
\v 11 Wal Sedakaiya bin 21 yiya ol wen deibin meigim im det nyuwan king blanga Juda en imbin jidan langa Jerusalem fo 11 yiya.\x + \xo 36:11 \xt Jera 27:1-22; 28:1-17\x*  
\v 12 Imbin gibit bekboun langa YAWEI im God en im nomo bin wandim tjeinjim im nogudbalawei nomeda Jeramaiya det speshalwan mesinja blanga YAWEI bin wonimbat im.   
\s1 Jerusalem bin binijap  
\r Sekan Kings 25:1-21; Jeramaiya 52:4-11  
\p
\v 13 Wal basdam King Nebakanesa bin fosim King Sedakaiya blanga meigim pramis langa God neim blanga jidan trubala langa King Nebakanesa. Bat King Sedakaiya bin gibit bekboun langa YAWEI det trubala God blanga ola Isreil pipul, en imbin gibit bekboun langa King Nebakanesa du.\x + \xo 36:13 \xt Isik 17:15\x*  
\v 14 En detlot pipul brom Juda en detlot serramonimen hubin jidan lida blanga olabat bin dum mowa nogudbala ting. Deibin bulurrumbat ola brabli nogudbalawei blanga ola najalot kantri en deibin meigim det Serramoni Pleis blanga YAWEI brabli nogudwan blanga weshipbat im.  
\v 15 Bat YAWEI bin fil brabli soribala langa im pipul olabat en im nomo bin binijimap det Serramoni Pleis, bat imbin jandim sambala speshalwan mesinja blanga wonim detlot pipul blanga olabat nogudbalawei.  
\v 16 Bat detlot pipul bin laf en tok rafwei langa detlot speshalwan mesinja. Dei nomo bin teiknodis wanim YAWEI bin trai dalimbat olabat, en bambai imbin brabli wail detmatj en imbin panishim Juda en Jerusalem brabliwei.   
\p
\v 17 Wal YAWEI bin jandim King Nebakanesa brom Bebalon blanga fait langa Jerusalem. King Nebakanesa bin kilim ola yangmen hubin jidan langa det Serramoni Pleis, en im nomo bin sori langa enibodi, nomeda olabat bin men o wuman, yang o ol. God bin larram im binijimap ebriwan langa det taun.\x + \xo 36:17 \xt Jera 21:1-10; 34:1-5\x*  
\v 18 King Nebakanesa bin deigimwei ebrijing brom det Serramoni Pleis. Imbin deigimwei ola gudwan ting brom ola stowa rum blanga det king en ol im boswan wekinmen. En imbin deigimbek ebrijing langa Bebalon.  
\v 19 Detlot amimob blanga King Nebakanesa bin barnimap det Serramoni Pleis en ola gudwan haus langa det taun, en imbin breigimdan ola taun wol.\x + \xo 36:19 \xt 1 King 9:8\x* \fig |src="CO01240B.TIF" size="col" ref="36:19" \fig*  
\v 20 En detlot hu nomo bin gitkil imbin deigimwei olabat prisana langa Bebalon weya deibin jidan jis laiga prisana dumbat ola adwek blanga det king en im sanmob raidap Pesha bin jidan brabli strongbala kantri.  
\v 21 Juda bin jidan emtiwan kantri, en imbin jidan lagijat fo 70 yiya. Dijan bin jis laik det Sebathdei spel weya det kantri nomo bin abum bifo. Ol dislot ting bin hepin jis laik Jeramaiya det speshalwan mesinja blanga YAWEI bin tok.\x + \xo 36:21 \xt Jera 25:11; 29:10\x*   
\s1 Sairas bin larram detlot Juwish pipul gobek  
\r Esra 1:1-4  
\p
\v 22 Wal bambai langa det feswan yiya weya Sairas bin jidan king langa Pesha, YAWEI bin dalim King Sairas blanga jandim mesij langa ola kantri blanga im. Ol dislot ting bin hepin jis laik Jeramaiya det speshalwan mesinja blanga YAWEI bin pramis.   
\p
\v 23 Dijan na wanim King Sairas bin tok, “Mi na King Sairas blanga Pesha. YAWEI det trubala God langa top bin meigim mi jidan king blanga ebri kantri langa dijan wel. Imbin pikimat mi blanga bildimap det Serramoni Pleis blanga im deya langa Jerusalem deya langa Juda. Wal YAWEI garra wotjimbat ol im pipul hu wandim gobek langa Juda.” Lagijat na King Sairas bin tok.\x + \xo 36:23 \xt Aisai 44:28\x*  
\p Binij na.