\id TIT - Romani Arli Bible (RAB)
\ide UTF-8
\h Tit
\toc1 O lil e Titese
\toc2 Tit
\toc3 Tit
\mt O lil e Titese
\c 1
\s E Pavlesoro pozdrav
\p
\v 1 Pisinava me, o Pavle, o sluga e Devlesoro hem o apostoli e Isuse Hristesoro, kova injum bičhaldo te barjarav i vera e Devlesere birimengiri hem o pendžariba e čačipnasoro savo legari ki pobožnost. 
\v 2 Adaja vera hem o pendžariba dena nada e večnone dživdipnastar, savese o Devel, kova nikad na hovaj, dinđa plo lafi angleder o početak e vremesoro. 
\v 3 A ano pravo vreme mothovđa plo lafi prekalo propovediba savoi maje poverime pali naredba amare Spasiteljesiri, e Devlesiri.
\p
\v 4 Pisinava e Titese, mle čačikane čhavese ani zajedničko vera:
\m Milost hem mir e Devlestar e Dadestar hem e Hriste Isusestar, amare Spasiteljestar.
\s E Titesiri služba ko Krit
\p
\v 5 Ačhavđum tut ko Krit te ćere okova so nane ćerdo đi o krajo hem ki đijekh diz te čhive starešinen, sar so me naredinđum će, 
\v 6 a o starešina te ovel manuš kastar našti ništa bišukar te vaćeri pe, rom jekha romnjakoro, hem te oven le čhave kolai vernici hem kolendar našti te vaćeri pe dai razmukle ili buntovna. 
\v 7 Adalese so, o nadgledniko, sar upravniko e Devlesere čheresoro, valjani te ovel manuš kastar našti ništa bišukar te vaćeri pe, te na ovel manuš kova nikas na šunela, te na holjani sigate, te na mačol, te na ovel nasilniko, te na džal palo nepošteno barvalipe. 
\v 8 Ali valjani te ovel gostoljubivo, te mangel o šukaripe, te ovel razumno, pravedno, sveto, uzdržljivo, 
\v 9 zorale te ićeri pe ko čačikano lafi amare sikavibnasoro, te šaj hrabrini averen saste sikavibnaja hem te uverini e protivnikonen.
\p
\v 10 Adalese so, isi but kolai buntovna, kola vaćerena čuče lafija hem ćerena averen te oven hovavde, a najangle maškaro okola kolai oti e jevrejengiri vera. 
\v 11 Olengere muja valjani te phanden pe, adalese so zbog o nepošteno barvalipe upropastinena sa e porodicen ađahar so sikavena len okova so na valjani. 
\v 12 Jekh olendar, lengoro proroko, korkoro phenđa: “O manuša tari Krit uvek hovavena, oni divlja zverija, lenja hem halane.” 
\v 13 Adavai čačikano vaćeriba. Adalese zorale ukorin len, te oven saste ani vera, 
\v 14 te na ićeren pe ko paramiza e jevrejengere hem ko naredbe e manušengere kola cidinde pe taro čačipe.
\p
\v 15 E čistonenđe sai čisto, a e meljardenđe hem e nevernikonenđe ništa nane čisto, nego hem lengiri godi hem i savest meljarde. 
\v 16 Vaćerena da pendžarena e Devle, ali pumare ćeribnaja dokažinena da na pendžarena le. Oni odvratna hem neposlušna, nesposobna zako bilo savo šukar delo.
\c 2
\s O dživdipe palo sasto sikaviba
\p
\v 1 A tu, Tite, vaćer okova so složini pe e saste sikavibnaja: 
\v 2 o purane te oven trezvena, cenime, razumna, saste ani vera, ano mangipe hem ani strpljivost.
\p
\v 3 Ađahar hem o puranja te ponašinen pe sar so džala ano redo okolenđe kolai sveta: te na ogovorinen hem te na robujinen e pibnase, nego te sikaven okova soi šukar, 
\v 4 te sikaven e terne đuvljen te mangen pumare romen hem e čhaven. 
\v 5 Te oven razumna, moralno čista, bućarne ano čher, šukar, pokorna pumare romenđe – te na kaljari pe e Devlesoro lafi.
\p
\v 6 Ađahar hem, hrabrin e terne muršen te oven razumna. 
\v 7 Ano sa ov lenđe primer ćerindoj šukar delja. Ano to sikaviba mothov čačikanipe hem ozbiljnost. 
\v 8 To sikaviba nek ovel sasto, te našti niko te vaćeri protiv oleste, te ovel lađardo to protivniko, adalese so nane le ništa bišukar te vaćeri amendar.
\p
\v 9 Sikav e robonen ko sa te pokorinen pe pumare gospodarenđe, te ugodinen lenđe hem te na irinen lenđe lafija, 
\v 10 te na čoren lendar, nego te mothoven pe sar manuša kolenđe šaj te verujini pe, te šaj o sikaviba amare Spasiteljesoro, e Devlesoro, ko sa te ovel mothovdo dai šukar.
\p
\v 11 Adalese so o Devel mothovđa pli milost savi šaj spasini sa e manušen. 
\v 12 Adaja milost sikaj amen te odreknina amen e biedevlesere dživdipnastar hem akala phuvjakere požudendar, te živina ano akava sveto razumno, pravedno hem pobožno, 
\v 13 adžićerindoj o blagoslovime dive savese nadinaja amen hem o slavno mothojba amare bare Devlesoro hem e Spasiteljesoro, e Isuse Hristesoro. 
\v 14 Ov dinđa korkoro pes zako amenđe te otkupini amen taro đijekh bezakonje hem te očistini pese e narodo savo pripadini lese, savoi željno te ćerel okova soi šukar.
\p
\v 15 Akava valjani te sikave. Hrabrin hem ukorin ano sa o autoritet. Niko te na dikhel tut po tele!
\c 3
\s Sar valjani te živinen o vernici
\p
\v 1 Podsetin e manušen te pokorinen pe e vladarenđe hem zako vlastija, te oven poslušna, hem spremna zako đijekh šukar delo. 
\v 2 Podsetin len nikastar te na vaćeren bišukar, te na oven kavgađije, hem te oven krotka hem ljubazna premalo sa o manuša.
\p
\v 3 Adalese so hem amen nekad injamle nerazumna, neposlušna, hovavde, robujinđam zako požude hem zako zadovoljstvija oti đijekh vrsta, nakhavindoj amaro dživdipe ano bišukaripe hem ani zavist. Mrzinde amen hem amen mrzinđam jekh avere.
\p
\v 4 A kad amaro Spasitelji, o Devel, mothovđa plo šukaripe hem plo mangipe e manušenđe, 
\v 5 ov spasinđa amen, ali na zbog amare pravedna delja save ćerđam, nego zbog plo milosrđe. Ov spasinđa amen prekalo thojba e neve bijandipnastar hem obnovinđa amen e Svetone Duhoja. 
\v 6 O Devel upra amende barvale čhorđa e Svetone Duho prekalo Isus Hrist, amaro Spasitelji, 
\v 7 te šaj, opravdime pali lesiri milost, te ova naslednici e večnone dživdipnastar savese nadinaja amen. 
\v 8 Akavai čačikano lafi, hem adalese mangava zorale te tvrdine, ađahar te šaj hem okola so verujinena ano Devel te posvetinen pe te ćeren šukar delja. Akavai šukar hem korisno e manušenđe.
\p
\v 9 Cide tut taro hulava debate hem taro rodoslovija, taro kavge hem taro rasprave zbog o Zakoni, adalese soi sa adava beskorisno hem nane vredno. 
\v 10 E manuše kova anela podela opomenin jekhvar, hem o dujto puti, a palo adaleste, ma više ništa te ovel tut oleja, 
\v 11 adalese so džane dai esavko manuš rumime hem da grešini. Ov korkoro pes osudinđa.
\s E Pavlesere završna lafija hem pozdravija
\p
\v 12 Kad ka bičhalav tute e Arteme ili e Tihike, de sa tutar te ave đi mande ko Nikopolj, adalese so adari mangava te nakhavav o jevend. 
\v 13 E Zino e advokate hem e Apolose šukar pomožin ko sa so valjani lenđe zako drom, te na falini lenđe ništa. 
\v 14 A hem amare manuša nek sikljoven te posvetinen pe te ćeren šukar delja kaj zako adava čače isi potreba, te na živinen beskorisno dživdipe.
\p
\v 15 Pozdravinena tut sare kolai mancar akate. Pozdravin sarijen kola mangena amen ani vera.
\p I milost tumencar sarijencar.