\id PHP - Romani Arli Bible (RAB)
\ide UTF-8
\h Filipljanenđe
\toc1 O lil e Filipljanenđe
\toc2 Filipljanenđe
\toc3 Fil
\mt O lil e Filipljanenđe
\c 1
\s E Pavlesoro pozdrav
\p
\v 1 Me o Pavle hem o Timotej, o sluge e Hriste Isusesere, pisinaja sa e Devlesere manušenđe ano Hrist Isus kolai ani diz Filipi, sa tumare starešinenđe hem e đakonenđe:
\p
\v 2 Milost tumenđe hem mir e Devlestar, amare Dadestar, hem e Gospodestar e Isuse Hristestar.
\s E Pavlesiri molitva zako Filipljanja
\p
\v 3 Zahvalinava mle Devlese kad god setinav man tumenđe. 
\v 4 Ani đijekh mli molitva zako sarijenđe tumenđe, uvek molinav man radosno 
\v 5 zbog tumaro učestvujiba ano širiba o evanđelje taro prvo dive đi akana. 
\v 6 Uverime injum da o Devel, kova započinđa te ćerel ana tumende okova soi šukar, ka dovršini adava đi ko Dive kad o Hrist Isus ka avel.
\p
\v 7 Ispravnoi ađahar te mislinav sarijendar tumendar, adalese so akharava tumen ano mlo vilo, sarijen tumen kola učestvujinena mancar ani milost e Devlesiri, sar ano mle okovija, ađahar hem ano braniba hem ano potvrdiba o evanđelje. 
\v 8 O Develi maje svedoko kobor, e Hriste Isusesere mangipnaja, but mangava tumen. 
\v 9 Hem akavai mli molitva:
\b
\mi tumaro mangipe sa više te barjol ano čačikano džandipe hem ani šukar procena, 
\v 10 te šaj prosudinen soi šukar, sar te šaj oven čista hem bizi mana zako Dive e Hristesoro, 
\v 11 pherde plod oti pravednost savo avela prekalo Isus Hrist, ki slava hem ki hvala e Devlese.
\s E Pavlesoro phandlipe ohrabrini averen te širinen o evanđelje
\p
\v 12 Phraljalen, mangava te džanen da akava so ovela mancar, ćerđa te širini pe o evanđelje. 
\v 13 Ađahar sa e carikana stražaće hem sarijenđe averenđe ulo jasno da akharava o okovija zbog o Hrist. 
\v 14 I većina e phraljendar, ohrabrime ano Gospod mle okovencar, sa više bizi dar lena te vaćeren o lafi e Devlesoro.
\p
\v 15 Čače, nesave propovedinena e Hriste tari zavist hem sar te takmičinen pe, a avera adava ćerena taro šukar namere. 
\v 16 Adala avera ćerena taro mangipe, adalese so džanena so akari ano phandlipe injum zbog o braniba o evanđelje, 
\v 17 a okola o prva na vaćerena e Hristestar čačikane, nego tari sebičnost, mislindoj da ađahar ka ćeren te ovel maje po phare ano phandlipe. 
\v 18 Ali so akana? Ko bilo savo način, oto šukar namere ili na, vaćeri pe e Hristestar, hem adalese radujinav man.
\p I ka radujinav man, 
\v 19 adalese so džanav da akava so mancar ovela, zbog tumari molitva hem zbog i pomoć e Isuse Hristesere Duhosiri, ka preirini pe ko mlo oslobođenje. 
\v 20 Čačikane adžićerava hem nadinav man da ano nisoste naka lađarav man, nego da uvek, sar hem akana, ka ovav bizi dar zako Hrist hem da ov ano mlo telo ka proslavini pe, bilo te živinav ili te merav. 
\v 21 Adalese soi maje o Hrist dživdipe, a o meriba dobitak. 
\v 22 Ali, te nastavinđum te živinav ano telo, adava ka značini maje plodno buti. A so ka izabirinav, na džanav. 
\v 23 Pritiskime injum taro duj strane: mangava te džav hem te ovav e Hristeja, soi maje but po šukar, 
\v 24 ali zbog tumendei po bitno te ačhovav ano telo. 
\v 25 Uverime injum ko adava. Ka ačhovav tumencar te barjoven hem te radujinen tumen ani vera. 
\v 26 Ađahar, kad palem ka avav kora tumende, ka ovel tumen više soja te hvalinen tumen mancar ano Hrist Isus.
\p
\v 27 Samo živinen dostojno palo e Hristesoro evanđelje. Ađahar, bilo te avav hem te dikhav tumen, ili samo te šunav tumendar, ka džanav da zorale terđovena ano jekh duho hem sar jekh marena tumen zaki vera oto evanđelje, 
\v 28 bizo ano nisoste te daran e protivnikonendar. Olenđei adava znako zaki propast, a tumenđe zako spasenje, hem adava e Devlestar. 
\v 29 Adalese so, tumenđei dindi i milost na samo te verujinen ano Hrist, nego hem te patinen zbog olese. 
\v 30 Hem tumen injen ani isto borba zaki savi dikhljen da man isi, a hem akana šunena da isi man.
\c 2
\s I poniznost e hrišćanengiri te ovel sar e Hristesiri
\p
\v 1 Adalese, te isi tumen nesavo ohrabrenje ano Hrist, nesavi uteha lesere mangipnastar, nesavo zajedništvo ano Duho, nesavi nežnost hem saosećanje, 
\v 2 onda ćeren mli radost te ovel pherdi: oven jekh ano misliba, nek ovel tumen jekh mangipe, oven jekh ano duho hem roden jekh svrha. 
\v 3 Ništa ma ćeren tari sebičnost ni zaki beskorisno slava, nego ani poniznost jekh avere dikhen sar po bare tumendar. 
\v 4 Ma dikhen samo tumari korist, nego đijekh te dikhel hem i korist averengiri.
\p
\v 5 Razmislinen maškara tumende isto sar hem o Hrist Isus:
\b
\q1
\v 6 Ov, kova palo plo obličje inele isto sar o Devel,
\q2 na zahtevinđa plo pravo te ovel jednako e Devleja,
\q1
\v 7 nego odrekninđa pe oto sa. Lelja o obličje e slugasoro
\q2 hem bijandilo ano manušikano obličje.
\q1 I kad mothovđa pe sar manuš,
\q2
\v 8 ponizinđa korkoro pes hem inele poslušno sa đi ko meriba,
\q2 čak đi ko meriba ko krsto.
\q1
\v 9 Adalese o Devel vazdinđa le upreder sa
\q2 hem dinđa le anav savoi upreder sa o anava,
\q1
\v 10 te šaj anglo e Isusesoro anav perel đijekh koč
\q2 ko nebo, ki phuv, hem tali phuv,
\q1
\v 11 hem đijekh čhib te priznajini dai o Isus Hrist Gospod,
\q2 ki slava e Devlese e Dadese.
\s O hrišćanja valjani te oven svetlost ano sveto
\p
\v 12 Adalese, mle manglalen, sar so uvek injenle poslušna, na samo kad me injumle adathe, nego po više hem akana kad na injum adathe, daraja hem tresibnaja napredujinen ano tumaro spasenje. 
\v 13 Adalese so, o Develi adava kova ana tumende ćerela te mangen hem te ćeren okova soi pali olesiri volja.
\p
\v 14 Sa ćeren bizo gunđiba hem raspraviba, 
\v 15 te oven bizi mana hem čista, savršena čhave e Devlesere maškari bišukar hem rumime generacija, ani savi svetlinena sar o čerenja ano svemir, 
\v 16 zorale ićerindoj o Lafi e dživdipnasoro, te šaj ponosinav man ko Dive e Hristesoro, da na prastandiljum džabe, ni da trudinđum man džabe. 
\v 17 Ali, hem te mlo dživdipe mora te čhorđol sar žrtva zaki tumari vera, radosno injum hem radujinav man tumencar sarijencar. 
\v 18 Ađahar hem tumen oven radosna hem radujinen tumen mancar.
\s O Timotej hem o Epafrodit
\p
\v 19 Ali nadinav man ano Gospod Isus da sigate ka bičhalav tumenđe e Timoteje, te šaj hem me te ohrabrinav man kad ka dodžanav sar tumen injen. 
\v 20 Adalese so niko nane maje edobor paše sar ov, kova ka mothoj da čače brinini pe zako tumaro šukaripe. 
\v 21 Adalese so, sare rodena pumaro, a na okova soi e Isuse Hristesoro. 
\v 22 Ali tumen džanen da o Timotej dokažinđa pe, adalese so mancar, sar o čhavo e dadeja, služinđa ano širiba o evanđelje. 
\v 23 Adalese, nadinav man da ka bičhalav le tumende kad ka dikhav so ka ovel mancar. 
\v 24 A uverime injum ano Gospod da sigate hem me lično ka avav.
\p
\v 25 Palem, mislinava dai potrebno te bičhalav tumenđe palal e Epafrodite, mle phrale, e saradniko hem e saborco, kovai tumendar bičhaldo te pomožini maje ano mle potrebe. 
\v 26 Adalese so, ov but manglja te dikhel tumen hem inele uznemirime so šunđen da inele namborme. 
\v 27 A čače inele edobor namborme đi o meriba, ali o Devel smilujinđa pe lese, hem na samo lese, nego hem maje, te na ovel maje po phare. 
\v 28 Adalese mangava po sig te bičhalav le hem te šaj palem radujinen tumen kad ka dikhen le, a onda hem me naka brininav edobor. 
\v 29 Adalese, priminen le ano Gospod ani sa i radost hem poštujinen esavken sar oleste. 
\v 30 Adalese so, ov samo so na mulo zaki buti e Hristesiri – plo dživdipe rizikujinđa sar te pomožini okoleja so tumen našti ine te pomožinen maje.
\c 3
\s Najbaroi dobitak o Hrist
\p
\v 1 A akana te phenav tumenđe, mle phraljalen, radujinen tumen ano Gospod! Nane maje pharo palem te pisinav tumenđe akala stvarija, a ka pomožini tumenđe te oven po sigurna.
\p
\v 2 Arakhen tumen okole đuklendar, okolendar kola ćerena bišukar buća, e kasapendar kola rodena o obreziba e telosoro. 
\v 3 Adalese so, amen injam o čačikano obreziba, amen kola služinaja e Devlese lesere Duhoja hem hvalinaja amen e Hriste Isuseja hem amaro pouzdanje nane ano telo, 
\v 4 iako me čak hem ano telo šaj te pouzdajinav man.
\p Te neko mislini da šaj te pouzdajini pe ano telo, me šaj po više: 
\v 5 injum obrezime ko oftoto dive, injum taro e izraelesoro narodo, taro pleme e Venijaminesoro, Jevrejco oto Jevreja, palo Zakoni farisej, 
\v 6 pali revnost progoninđum e Khanđirja, pali e zakonesiri pravednost injum bizi mana.
\p
\v 7 Ali okova so nekad mislinđum dai dobitak, adava akana, zbog o Hrist, dikhava dai gubitak. 
\v 8 I na samo adava, nego mislinava dai sa gubitak kad uporedini pe e najbare dobitkoja – o pendžariba e Hriste Isuse, mle Gospode. Sa ačhavđum zbog o Hrist. Hem sa adava dikhava sar đubre, samo sar te dobinav e Hriste 
\v 9 hem te arakhav man ano leste – na pali mli pravednost savi avela taro ićeriba o Zakoni, nego pali okoja savi avela prekali vera ano Hrist: pali pravednost savi avela e Devlestar prekali vera. 
\v 10 Sa so mangava adavai te džanav e Hriste hem o zoralipe savo vazdinđa le taro mule. Mangava te ovel man udeo ano lesere patnje hem te ovav jekh oleja, čak hem ano lesoro meriba, 
\v 11 sar te šaj, nesar, ovav vazdime taro mule.
\s Ustrajno đi ko cilj
\p
\v 12 Pana na doresljum adava hem pana na uljum savršeno, ali ustrajno dikhava te osvojinav adava cilj zako savo o Hrist osvojinđa man. 
\v 13 Phraljalen, me na mislinava da već osvojinđum o cilj, ali jekh ćerava: bistrava okova soi pala mande, a dava sa mandar te doresav adava soi angla mande. 
\v 14 Prastava nakoro cilj, nakori nagrada zaki savi o Devel palo Hrist Isus vičini amen ko nebo.
\p
\v 15 Adalese, sare kola injam zrela valjani te razmislina ađahar. A te nane tumen isto mišljenje ko nešto, o Devel hem adava ka razjasnini tumenđe. 
\v 16 Samo, valjani te ićera amen ko čačipe đi savo resljam.
\p
\v 17 Phraljalen, pridružinen tumen okolenđe kola dikhena pe upra mande, hem posmatrinen okolen kola živinena palo primer savo dinđam tumen. 
\v 18 Adalese so, but okola kolendar but puti vaćerđum tumenđe, a akana hem asvencar vaćerava, živinena sar neprijatelja e sikavibnasere da o Hrist mulo ko krsto. 
\v 19 Lengoroi kraj o uništenje, lengoroi devel o vođi, ćerena pe barikane adaleja savestar valjani te lađan hem mislinena samo ko akala phuvjakere stvarija. 
\v 20 A amen injam dizutne e nebosere, kotar jedva adžićeraja e Spasitelje, e Gospode e Isuse Hriste. 
\v 21 Ov ka preobrazini amaro bizoralo telo savo merela hem ka ćerel le esavko sar soi lesoro slavno telo, palo zoralipe saveja sa šaj te čhivel tali pli vlast.
\c 4
\p
\v 1 Adalese, mle mangle phraljalen, kolen jedva adžićerava te dikhav, kola injen mli radost hem mli kruna, zorale terđoven ano Gospod, mle manglalen.
\s E Pavlesere završna savetija
\p
\v 2 Molinava e Evodija hem e Sintiha te oven složna ano Gospod. 
\v 3 Oja, hem tut molinava, mle čačikane amale, pomožin adale đuvljenđe te oven složna, adalese so phari buti ćerde zajedno mancar ko vaćeriba o evanđelje, zajedno e Klementeja hem mle avere saradnikonencar, kaserei anava zapisime ani Knjiga e dživdipnasiri.
\p
\v 4 Radujinen tumen ano Gospod uvek! Palem phenava: radujinen tumen! 
\v 5 Nek tumari nežnost ovel pendžarutni sa e manušenđe. O Gospodi paše! 
\v 6 Ma brininen tumen zako ništa, nego ano sa molibnaja hem rodibnaja ano zahvaliba anen tumare molbe anglo Devel, 
\v 7 hem e Devlesoro mir savoi upreder đijekh manušikano haljojba ka arakhi tumare vile hem tumare mislija ano Hrist Isus.
\p
\v 8 Ko kraj, phraljalen, mislinen oto sa soi čačikano, soi plemenito, soi pravedno, soi čisto, soi ljubazno, soi ko šukar glaso, soi časno, soi vredno te hvalini pe. 
\v 9 Ćeren okova so mandar sikliljen, priminđen, šunđen ili dikhljen, hem o Devel, kova dela mir, ka ovel tumencar.
\s E Pavlesiri zahvalnost zaki lengiri pomoć
\p
\v 10 But radujinav man ano Gospod so palem mothovđen da brininena tumen maje. Tumen hem angleder brininđen maje, ali na ine tumen prilika adava te mothoven. 
\v 11 Na phenava akava adalese so injum ani potreba, adalese so, sikliljum te ovav zadovoljno ano sa o situacije. 
\v 12 Džanav sari kadi manuš ani potreba, hem džanav sari kad isi le but. Sikliljum ko sa: hem te ovav čalo hem te ovav bokhalo, hem te ovel man but hem te na ovel man dovoljno. 
\v 13 Sa adava šaj ano Hrist kova dela man zoralipe.
\p
\v 14 A palem, šukari adava tumendar so pomožinđen maje ani mli nevolja. 
\v 15 A hem tumen, o Filipljanja, džanen: pana ko početak kad priminđen o evanđelje, kad dželjum tari Makedonija, nijekh khanđiri na dinđa man pomoć, sem tumende. 
\v 16 Čak hem ko Solun više puti bičhalđen maje pomoć kad injumle ani potreba. 
\v 17 Nane da rodava daro tumendar, nego rodava tumen te priminen nagrada zako tumaro dejba. 
\v 18 Akana isi man sa so valjani maje hem buderi sar e Epafroditestar priminđum okova so bičhalđen maje. Tumaroi daro sar prijatno miris, prihvatljivo hem šukar žrtva e Devlese. 
\v 19 A mlo Devel, palo barvalipe oti pli slava ano Hrist Isus, ka pherel đijekh tumari potreba.
\p
\v 20 E Devlese, amare Dadese, nek ovel slava zauvek. Amen.
\s Završna pozdravija
\p
\v 21 Pozdravinen sa e Devlesere manušen ano Hrist Isus. Pozdravinena tumen o phralja kolai mancar. 
\v 22 Pozdravinena tumen sa e Devlesere manuša, a posebno okola tari palata e carosiri.
\p
\v 23 I milost e Gospodesiri e Isuse Hristesiri tumare duhoja.