\id MRK - Romani Arli Bible (RAB)
\ide UTF-8
\h Marko
\toc1 O evanđelje e Markosoro
\toc2 Marko
\toc3 Mk
\mt O evanđelje e Markosoro
\c 1
\s O Jovan o Krstitelj pripremini o drom e Isusese
\p
\v 1 Akavai o anglunipe oto Šukar lafi e Isuse Hristestar, e Devlesere Čhavestar.
\p
\v 2 Sar soi pisime ano Sveto lil e prorokosoro e Isaijasoro:
\b
\q1 “Ače, bičhalava mle glasniko angla tute,
\q1 kova ka pripremini će o drom.
\q1
\v 3 Ovi o glaso so vičini ani pustinja:
\q1 ‘Pripreminen o drom e Gospodese!
\q1 Ravnonen lese o droma!’ ”
\b
\p
\v 4 I ađahar alo o Jovan o Krstitelj. Ov živini ine ani pustinja hem propovedini ine e manušenđe da valjani te pokajinen pe zako pumare grehija hem te oven krstime sar te mothoven dai lenđe oprostime o grehija. 
\v 5 But manuša avena ine koro leste tari sa i regija Judeja hem taro Jerusalim. Priznajinena ine pumare grehija, a ov krstini len ine ani len Jordan. 
\v 6 A e Jovanesere šeja inele ćerde oto bala e kamilakere, a ko maškar inele phandlo kožno pojas. Hala ine skakavconen hem divljo avđin.
\p
\v 7 Propovedinđa vaćerindoj: “Pala mande avela o po baro mandar, kase na injum dostojno ni te teljovav o dorikha oti lesiri obuća te phravav. 
\v 8 Me krstinava tumen panjeja, a ov ka krstini tumen e Svetone Duhoja.”
\s O Isus krstini pe hem o Devel potvrdini le
\p
\v 9 Ko adava vreme o Isus alo tari diz Nazaret oti regija Galileja hem o Jovan krstinđa le ani len Jordan. 
\v 10 I odmah palo adava so o Isus iklilo taro pani, dikhlja sar o nebo phravđola hem sar o Duho huljela upro leste sar golubi.
\p
\v 11 A taro nebo šundilo o glaso e Devlesoro: “Tu injan mlo Čhavo o manglo! Tuja injum bahtalo!”
\s E Isuse ki pustinja kušini o beng
\p
\v 12 I odmah o Duho bičhalđa e Isuse ki pustinja, 
\v 13 hem adari inele saranda dive, a o Sotoni kušini le ine. Adari inele maškaro divlja životinje, a o anđelja kandena le ine.
\s O Isus lela te propovedini
\p
\v 14 Palo adava so o Jovan inele čhivdo ano phandlipe, o Isus dželo ki Galileja hem propovedinđa o Šukar lafi e Devlesoro. 
\v 15 Vaćerđa: “Alo o vreme! Alo paše o carstvo e Devlesoro! Pokajinen tumen zako tumare grehija hem verujinen ano Šukar lafi!”
\s O Isus vičini ple prvone učenikonen
\p
\v 16 Sar o Isus nakhela ine uzalo e Galilejakoro jezero, dikhlja e Simone hem lesere phrale e Andreja sar frdena o mreže ano pani, adalese so inele manuša so dolena maćhen.
\p
\v 17 I o Isus phenđa lenđe: “Phiren pala mande hem me ka ćerav tumen te dolen manušen sar maćhen!”
\p
\v 18 On odmah ačhavde pumare mreže hem džele palo leste.
\p
\v 19 Kad džele adathar hari po dur, o Isus dikhlja e Zevedejesere čhaven, e Jakove hem e Jovane, sar bešena ano čamco hem popravinena pumare mreže. 
\v 20 O Isus odmah vičinđa len, hem on ačhavde ano čamco pumare dade e Zevedeje e manušencar kola ćerena buti koro lende hem džele palo leste.
\s O Isus ispudini e demone e manušestar
\p
\v 21 Kad ale ano Kafarnaum, o Isus odmah ko savato đerdinđa ki sinagoga hem lelja te sikaj e manušen. 
\v 22 On inele zadivime lesere sikavibnaja, adalese so sikavđa sar okova kole isi autoritet, a na sar o učitelja e Zakonestar.
\p
\v 23 I otojekhvar ani lengiri sinagoga jekh manuš kova inele opsednutime bišukare duhoja lelja te vičini: 
\v 24 “So mangeja amendar, Isuse Nazarećanine? Aljan li te uništine amen? Džanav ko tu injan: o Sveco e Devlesoro.”
\p
\v 25 A o Isus ukorinđa le vaćerindoj: “Phand to muj hem ikljov olestar!” 
\v 26 Tegani o bišukar duho zorale tresinđa e manuše hem, vičindoj oto sa o glaso, iklilo olestar.
\p
\v 27 I sare but začudinde pe, i lelje maškar pumende te vaćeren: “Savo li akava nevo sikaviba, hem adava ano autoritet? Đi e bišukare duhenđe naredini hem on šunena le!” 
\v 28 I o glaso e Isusestar sig šundilo ko sa o thana ani regija Galileja.
\s O Isus sasljari e Petresere sasuja hem bute averen
\p
\v 29 I so iklile tari sinagoga, o Isus e Jakoveja hem e Jovaneja dželo ko čher e Simonesoro hem e Andrejasoro. 
\v 30 Adari e Simonesiri sasuj pašlili, adalese so ine la bari jag, i odmah phende adava e Isusese. 
\v 31 I o Isus alo uzalo late, dolinđa lakoro vas hem vazdinđa la. I jag muklja la, i oj lelja te poslužini len.
\p
\v 32 Kad peli i rat, kad o kham huljilo, ande koro leste sa e nambormen hem e manušen ano kolende inele o demonja. 
\v 33 Sa o dizutne čedinde pe anglo udar, 
\v 34 hem o Isus sasljarđa buten kola inele namborme oto razna nambormipa. Ispudinđa hem bute demonen, ali na muklja lenđe te vaćeren, adalese so džande koi ov.
\s O Isus propovedini ani regija Galileja
\p
\v 35 Rano sabajle, sar pana inele tomina, o Isus uštino, iklilo taro čher hem dželo ko jekh čučo than, hem adari molini pe ine. 
\v 36 O Simon hem avera kola inele oleja lelje te roden le, 
\v 37 i kad arakhle le, phende lese: “Sare rodena tut!”
\p
\v 38 Ov phenđa lenđe: “Hajde te dža hem avrethe, ko avera pašutne gava, hem adari te propovedinav, adalese so zako adava aljum.” 
\v 39 I ađahar džala ine maškar sa i Galileja hem propovedini ano lengere sinagoge hem ispudini e demonen.
\s O Isus sasljari e gubavco
\p
\v 40 A jekh gubavco alo koro Isus, pelo ko kočija anglo leste hem phenđa: “Te mangeja, šaj te sasljare man!”
\p
\v 41 E Isusese pelo žal, pružinđa plo vas, dolinđa le hem phenđa: “Mangava, ov sasljardo!” 
\v 42 Odmah i guba cidinđa pe olestar hem ov ulo sasto.
\p
\v 43 O Isus odmah phenđa lese te džal, ali zorale upozorinđa le: 
\v 44 “Dikh nikase te na vaćere akalestar, nego dža mothov tut e sveštenikose hem de žrtva zako to očistiba, sar so naredinđa o Mojsije, zako svedočanstvo olenđe.”
\p
\v 45 Ali o manuš, samo so dželo adathar, lelja sarijenđe te vaćeri so ulo lese, i o Isus našti ine više te đerdini javno ki bilo savi diz, nego ačhola ine avri ko čuče thana. A palem o manuša avena ine koro leste taro sa o strane.
\c 2
\s E Isuse isi pravo te oprostini o grehija
\p
\v 1 Nekobor dive palo adava, kad o Isus irinđa pe ko Kafarnaum, ano čher kaj bešela ine, o manuša šunde dai ov adari. 
\v 2 I edobor džene čedinde pe adari da na inele više than čak ni anglo udar. A ov propovedini lenđe ine o Lafi e Devlesoro.
\p
\v 3 Tegani ale koro Isus štar manuša akharindoj jekhe manuše kova našti ine te phirel ni te mrdini. 
\v 4 I sar taro narodo našti ine te aven anglo Isus, ćerde rupa ko tavani upreder o than kote inele o Isus prekali savi mukle e namborme sa e nosiljkaja ki savi pašlilo.
\p
\v 5 Kad o Isus dikhlja lengiri vera, phenđa e nambormese: “Mlo čhavo, oprostimei će te grehija!”
\p
\v 6 A adari inele nesave učitelja e Zakonestar kola ana pumende pučle pe: 
\v 7 “Sar šaj akava te vaćeri ađahar? Ov hulini! Ko šaj te oprostini o grehija sem o jekh Devel?”
\p
\v 8 O Isus odmah džanđa ano plo duho so on ađahar mislinena, i pučlja len: “Sose ađahar mislinena? 
\v 9 Soi po lokhe te phenel pe e manušese kova našti te phirel: ‘Oprostimei će te grehija’ ili te phenel pe: ‘Ušti, le ti nosiljka hem phir’? 
\v 10 Ka dokažinav tumenđe da man, e Čhave e manušesere, isi pravo ki phuv te oprostinav o grehija.” Tegani phenđa e manušese kova našti ine te phirel: 
\v 11 “Tuće vaćerava: ušti, le ti nosiljka hem dža čhere!”
\p
\v 12 I o manuš odmah uštino, lelja i nosiljka hem anglo sarijende iklilo avri. Sare divinde pe hem lelje te slavinen e Devle, vaćerindoj: “Nikad esavko nešto na dikhljam!”
\s O Isus vičini e Levije hem hala e grešnikonencar
\p
\v 13 I o Isus palem dželo uzalo jezero, a but manuša avena ine koro leste hem ov sikaj len ine. 
\v 14 Sar nakhela ine adathar, o Isus dikhlja e Levije, e Alfejesere čhave, sar bešela ko than kotar čedela pe o porez, i phenđa lese: “Phir pala mande!”
\p I ov uštino hem dželo palo leste.
\p
\v 15 I sar o Isus inele uzalo astali ano čher e Levijesoro, but carinici hem avera grešnici hale maro oleja hem lesere učenikonencar, adalese so inele but esavke manuša kola džana ine palo Isus.
\p
\v 16 Kad nesave učitelja e Zakonestar kola inele fariseja dikhle so o Isus hala e grešnikonencar hem e carinikonencar, pučle lesere učenikonen: “Sose tumaro učitelj hala e carinikonencar hem avere grešnikonencar?”
\p
\v 17 A o Isus šunđa adava, i phenđa lenđe: “E sastenđe na valjani doktori, nego e nambormenđe. Me na aljum te vičinav e pravednikonen, nego e grešnikonen.”
\s E Isuse pučena zako post
\p
\v 18 E Jovanesere e Krstiteljesere učenici hem o fariseja postinena ine. Nesave manuša ale koro Isus hem pučle le: “Sar adava e Jovanesere učenici hem e farisejengere učenici postinena, a te učenici na postinena?”
\p
\v 19 O Isus phenđa lenđe: “Šaj li e mladoženjasere amala te postinen kadi olencar o mladoženja? Na. Đikotei o mladoženja olencar, našti te postinen. 
\v 20 Ali ka aven o dive kad o manuša ka len lendar e mladoženja. Tegani, ko adala dive, ka postinen.
\p
\v 21 Niko na sivela o nevo kotor zako šeja upro purano fostani sar te pherel i rupa, adalese so, ko thojba, adava kotor ka čedel pe, ka pharaj pe oto purano fostani hem ka ćerel po bari rupa. 
\v 22 I niko na čhorela i nevi mol ano purane morćha. Te ćerđa pe ađahar, kad i mol ka zreloni, o morćha ka pharavđon hem ka oven uništime, a i mol ka čhorđol. Nego, i nevi mol čhorela pe ano neve morćha.”
\s O Isus po baro hem oto savato
\p
\v 23 Ko jekh savato o Isus nakhino maškaro njive, a lesere učenici odrumal lelje te čeden e đivesoro klaso.
\p
\v 24 Tegani o fariseja pučle le: “Dikh! Sose te učenici ćerena so palo zakoni na tromal pe ko savato?”
\p
\v 25 A o Isus phenđa lenđe: “Nikad li na čitinđen ano Sveto lil so ćerđa o David kad na inole so te hal, kad bokhalile ov hem okola so inele oleja? 
\v 26 Đerdinđa ano čher e Devlesoro, ano vreme e Avijataresoro e prvosveštenikosoro, halja o posvetime maro, savo nikase na inele muklo te han sem e sveštenikonenđe, hem čak dinđa okolenđe so inele oleja te han.”
\p
\v 27 I tegani phenđa lenđe: “O savatoi ćerdo zako manuš, a na o manuš zako savato. 
\v 28 Ađahar, me, o Čhavo e manušesoro, injum gospodari hem e savatesoro.”
\c 3
\s O Isus sasljari ko savato
\p
\v 1 Kad o Isus palem đerdinđa ki sinagoga, adari inele jekh manuš kasoro vas inele šuko. 
\v 2 Adari inele hem okola kola posmatrinena ine e Isuse te dikhen na li ko savato ka sasljari le, sar te šaj tužinen le. 
\v 3 O Isus phenđa e manušese kas inele šuko vas: “Ušti hem terđov ko maškar!”
\p
\v 4 I tegani pučlja len: “So tromal pe te ćerel pe ko savato: šukaripe ili bišukaripe? Te spasini pe o dživdipe ili te mudari pe?” A on trainde.
\p
\v 5 I dikhlja len holjame hem ine lese but phare zbog olengere steđime vile. I phenđa e manušese: “Pružin to vas!” Ov ispružinđa plo vas hem lesoro vas ulo sasto. 
\v 6 Tegani o fariseja iklile hem odmah e manušencar kola podržinena e Irode lelje te dogovorinen pe sar te mudaren e Isuse.
\s O manuša avena taro but thana te dikhen e Isuse
\p
\v 7 O Isus ple učenikonencar cidinđa pe adathar ko e Galilejakoro jezero, a palo leste džele but džene tari regija Galileja hem tari regija Judeja, 
\v 8 tari diz Jerusalim, tari regija Idumeja, tari aver strana oti len Jordan hem taro e dizjengere e Tiresere hem e Sidonesere pašutne thana. Sa adala manuša ale koro Isus, adalese so šunde so ćerela ine čudesija.
\p
\v 9 Tegani o Isus phenđa ple učenikonenđe te pripreminen lese o čamco, sar te na gurini pe o narodo ano leste. 
\v 10 Adava dive buten sasljarđa, i but namborme manuša gurinena pe ine nakoro leste te dolen pe upro leste sar te šaj oven sasljarde. 
\v 11 Kad dikhena le ine o manuša kola inele opsednutime e bišukare duhencar, perena ine anglo leste hem vičinena: “Tu injan o Čhavo e Devlesoro!” 
\v 12 A ov zorale upozorini len ine te na vaćeren averenđe koi ov.
\s O Isus birini dešu duje apostolen
\p
\v 13 Tegani dželo ki gora hem vičinđa okolen kolen ov manglja, hem on ale koro leste. 
\v 14 Olendar birinđa dešu dujen, kolen vičinđa apostolja, te oven oleja, te bičhali len te propovedinen 
\v 15 hem te ovel len autoritet te ispudinen e demonen. 
\v 16 A akavai o anava e dešu dujengere kolen birinđa:
\li1 Simon, kole vičinđa Petar,
\li1
\v 17 Jakov, e Zevedejesoro čhavo,
\li1 hem Jovan, e Jakovesoro phral, kolen vičinđa Voanirges, so značini “Čhave e gromesere”,
\li1
\v 18 Andreja,
\li1 Filip,
\li1 Vartolomej,
\li1 Matej,
\li1 Toma,
\li1 Jakov, e Alfejesoro čhavo,
\li1 Tadej,
\li1 Simon Zilot
\li1
\v 19 hem Juda Iskariot, kova posle izdajinđa e Isuse.
\s O Isus kandela pe e Devlesere zoralipnaja, a na e bengesere
\p
\v 20 Tegani o Isus đerdinđa ko jekh čher, a palem sa edobor džene čedinde pe da ov hem olesere učenici našti ine ni maro te han. 
\v 21 Kad e Isusesoro jeri šunđa zako adava, ale palo leste te legaren le, adalese so mislinde da dilindilo.
\p
\v 22 A o učitelja e Zakonestar kola ale taro Jerusalim vaćerena ine: “Opsednutimei e Veelzevuleja, e demonengere šerutneja, kasere zoralipnaja ispudini e demonen.”
\p
\v 23 O Isus vičinđa len uzala peste hem lelja te vaćeri lenđe ano uporedbe: “Sose bi o Sotoni ispudini e Sotone? 
\v 24 Tei nesavo carstvo ana peste podelime, adava carstvo našti te ačhol. 
\v 25 Hem tei nesavo čher ana peste podelime, adava čher naka šaj te ačhol. 
\v 26 I, te o Sotoni džala korkoro protiv peste hem tei ana peste podelime, ov našti te ačhol, nego alo lesoro kraj. 
\v 27 Ali niko našti te đerdini ko čher e zorale manušesoro hem te čorel lestar, a angleder adalestar te na phandel le. Tegani ka šaj te čorel sa oto čher. 
\v 28 Čače vaćerava tumenđe: e manušenđe ka šaj te oven oprostime sa o grehija hem o hule, 
\v 29 ali ko god hulini upro Sveto Duho nikad naka ovel lese oprostime, nego zako adava greh ka ovel zauvek krivo.”
\p
\v 30 Adava phenđa adalese so nesave učitelja e Zakonestar vaćerena ine dai ov opsednutime e bišukare duhoja.
\s E Isusesiri čačikani porodica
\p
\v 31 Tegani e Isusesiri daj hem lesere phralja resle adari. Sar terđovena ine avri, bičhalde nekas koro leste te vičini le. 
\v 32 A uzalo leste bešena ine but džene, i phende lese: “Eče, ti daj hem te phralja terđovena avri hem mangena te dikhen tut.”
\p
\v 33 A o Isus pučlja len: “Koi mli daj hem mle phralja?” 
\v 34 Tegani dikhlja nakoro manuša kola bešena ine ko krugo uzalo leste hem phenđa: “Ače, akalai mli daj hem mle phralja. 
\v 35 Adalese so, đijekh kova ćerela i volja e Devlesiri, ovi mlo phral, hem mli phen, hem mli daj.”
\c 4
\s O Isus vaćeri i priča oto sejači
\p
\v 1 O Isus palem lelja te sikaj e narodo uzalo jezero. Sa edobor džene čedinde pe uzalo leste, i adalese đerdinđa ko čamco upro jezero hem beštino, a sa o manuša ačhile ki phuv uzalo jezero. 
\v 2 I but so sikaj len ine ano priče. I sikavđa len ađahar: 
\v 3 “Šunen! Jekhvar iklilo o sejači te sejini. 
\v 4 I sar sejini ine, nesave zrnja pele ko drom, i o čiriklja ale hem sa hale len. 
\v 5 Nesave pele ko than kote inele hari phuv upro bara, i odmah lelje te ikljon, adalese so na inele ani hor phuv. 
\v 6 Ali kad iklilo o zoralo kham, thabile hem šućile, adalese so na ine len baro koreno. 
\v 7 A nesave pele maškaro kare. O kare barile hem tasavde len, i o zrnja na ande bijandipe. 
\v 8 A nesave pele ki šukar phuv, lelje te ikljon, barile hem ande bijandipe – trijanda puti više, šovardeš puti više, hem šel puti više.”
\p
\v 9 Hem phenđa: “Kas isi kana, nek šunel!”
\s Sose o Isus vaćeri ano priče
\p
\v 10 A kad ačhilo korkoro, okola so inele uzalo leste hem o dešu duj apostolja pučle le so manglja te vaćeri adale pričencar.
\p
\v 11 Ov phenđa lenđe: “Tumenđei dindo te džanen o garavdipe oto carstvo e Devlesoro, a averenđe, kolai avri, sa vaćeri pe ano priče, 
\v 12 sar te šaj:
\b
\q1 ‘Anglo jaćha te na dikhen,
\q1 anglo kana te na šunen
\q2 ni te haljoven,
\q1 sar te na irinen pe kora mande,
\q2 i te ovel lenđe oprostime.’ ”
\s Sostar vaćeri i priča oto sejači
\p
\v 13 Tegani o Isus pučlja len: “Sar na haljovena akaja priča? Sar onda ka haljoven avera priče?
\p
\v 14 O sejači sejini e Devlesoro lafi. 
\v 15 Nesavei manuša sar o drom ko savoi o Lafi sejime. Kad šunena le, odmah avela o Sotoni hem lela o Lafi savoi ano lende sejime. 
\v 16 Nesavei sar o than kote inele hari phuv upro bara ko savoi sejime o zrnja. Kad šunena o Lafi, odmah lena le radosno. 
\v 17 Ali, adalese so nane len baro koreno ana peste, na trajinena but. Kad avela i nevolja ili o progonstvo zbog o Lafi, odmah otperena oti vera. 
\v 18 Nesavei sar o than maškaro kare ko savoi sejime o zrnja. Adalai okola kola šunena o Lafi, 
\v 19 ali o brige akale dživdipnasere, o zavodljivost e barvalipnasoro hem o avera požude tasavena o Lafi, i našti anel plod. 
\v 20 A nesavei sar i šukar phuv ki savi sejime o zrnja. Adalai okola kola šunena hem lena o Lafi. On anena plod – trijanda puti više, šovardeš puti više, hem šel puti više.”
\s O Isus vaćeri i priča oti svetiljka
\p
\v 21 I tegani o Isus pučlja len: “Kad anena andre i svetiljka, tumen li čhivena la talo čaro ili talo than e pašljojbnasoro? Na! Nego čhivena la ko than zaki svetiljka. 
\v 22 Adalese so, sa soi čorale, ka otkrijini pe, hem sa soi garavdo, ka ikljol ko svetlost. 
\v 23 Te nekas isi kana, nek šunel!”
\p
\v 24 Hem phenđa lenđe akava: “Šunen šukar. Sava meraja merinena, esavkaja ka merini pe tumenđe hem buderi adalestar ka del pe tumenđe. 
\v 25 Adalese so, đijekhe kas isi džandipe, ka del pe lese pana, a okole kas nane, ka lel pe lestar hem adava so isi le.”
\s O carstvo e Devlesoroi sar o seme savo korkoro barjola
\p
\v 26 I phenđa: “O carstvo e Devlesoroi slično sar kad o manuš sejini o seme ki phuv, 
\v 27 i bilo te sovel ili te uštel, i rat hem o dive, o zrnja lena te ikljon hem barjona, a ov ni džanel sar. 
\v 28 I phuv korkori pestar anela bijandipe: najangle i čar, palo adava o klaso, i ko kraj o klaso pherđola điveja. 
\v 29 Kad o điv zreloni, o manuš odmah lela te čedel le, adalese so alo o vreme zako čediba.”
\s Priča oto zrno e gorušicakoro
\p
\v 30 Tegani o Isus phenđa: “Soja te uporedina o carstvo e Devlesoro? Ili, sava pričaja te objasnina le? 
\v 31 Ovi sar o zrno oti gorušica savoi najtikoro oto sa o zrnja save sejinena pe ki phuv. 
\v 32 Ali, kad sejini pe, barjola hem ovela po baro oto sa o biljke ki bašta, i mukela edobor bare granke da hem o čiriklja šaj te ćeren gnezdija ano lesoro hlado.”
\p
\v 33 Ano but esavke priče vaćeri lenđe ine e Devlesoro lafi, edobor kobor šaj ine te šunen, 
\v 34 hem na vaćerđa lenđe ništa bizo priče. A kad inele korkoro ple učenikonencar, tegani sa objasnini lenđe ine.
\s E Isuse šunena hem i barval hem o panja
\p
\v 35 I kad lelja te raćol, o Isus phenđa e učenikonenđe: “Te nakha ki aver strana oto jezero.” 
\v 36 I on ačhavde e narodo hem legarde pumencar e Isuse čamcoja ano savo već inele. A palo lende džana ine hem avera manuša čamconencar.
\p
\v 37 I muklja pe jekh zorali barval upro jezero. O talasija lelje te pheren o čamco panjeja edobor da samo so na ine te pheren le đi o muj. 
\v 38 A o Isus ko paluno deo e čamcosoro sovela ine pašljindoj šereja ko jastuko. Tegani o učenici džangavde le hem pučle le: “Učitelju, tuće li sa jekh so ka mera?”
\p
\v 39 I o Isus uštino, naredinđa e barvaljaće te ačhol hem phenđa e jezerose: “Train! Smirin tut!” Hem i barval ačhili hem ulo baro mir.
\p
\v 40 Tegani pučlja e učenikonen: “Sose injen edobor darutne? Pana li nane tumen vera?”
\p
\v 41 A on but darandile, i pučle jekh avere: “Kovai onda akava so đi o barvalja hem o jezero šunena le?”
\c 5
\s O Isus ikali e bišukare duhen e manušestar
\p
\v 1 I resle ki dujto strana oto jezero, ko krajo e gerasakoro. 
\v 2 I kad o Isus iklilo taro čamco, odmah nakoro leste, taro grobija, alo jekh manuš opsednutime bišukare duhoja. 
\v 3 Adava manuš živinđa maškaro grobija hem niko našti ine više te phandel le, čak ni lanconencar. 
\v 4 But puti phandena ine lanconencar lesere vasta hem lesere pre, ali ov čhinela ine o lancija, a phagela o okovija taro pre, hem niko na inele edobor zoralo te šaj smirini le. 
\v 5 Bizo ačhojba, i dive i rat, maškaro grobija hem maškaro bregija vičini ine hem khuvela pe barencar.
\p
\v 6 Kad odural dikhlja e Isuse, prastandilo hem pelo ko kočija anglo leste, 
\v 7 i vičinđa oto sa o glaso: “So mangeja mandar, Isuse, Čhaveja e Najbare Devlesereja? Hava tut sovli e Devleja te na mučine man!” 
\v 8 (Adalese so o Isus već naredinđa e bišukare duhose te ikljol adale manušestar.)
\p
\v 9 Tegani o Isus pučlja le: “Sar to anav?”
\p A ov phenđa lese: “Vičinena man Legija, adalese so but džene injam ano leste, sar vojska.” 
\v 10 I zorale molinđa e Isuse te na ispudini len taro adava krajo.
\p
\v 11 A adari ko brego inele jekh baro krdo oto bale save hana ine, 
\v 12 i o bišukar duhija molinde e Isuse vaćerindoj: “Bičhal amen ano okola bale, te đerdina ano lende.” 
\v 13 I ov muklja lenđe, i o bišukar duhija iklile e manušestar hem đerdinde ano bale. I sa o krdo, đi ko duj hiljade bale, prastandile taro brego ano jezero hem taslile.
\p
\v 14 A okola so arakhena ine e balen našle hem vaćerde adalestar e manušenđe ani diz hem ano gava, i o manuša ale te dikhen so adava ulo. 
\v 15 Ale koro Isus hem dikhle e manuše ano koleste angleder inele vojska oto bišukar duhija sar urjavdo hem saste gođaja bešela adari, i darandile. 
\v 16 Okola so dikhle adava vaćerde adale manušenđe sa so ulo e opsednutimeja hem e balencar. 
\v 17 Tegani on lelje te molinen e Isuse te džal taro lengoro krajo.
\p
\v 18 I sar o Isus đerdini ine ko čamco, o manuš ano koleste inele o bišukar duhija molinđa le te džal oleja, 
\v 19 ali o Isus na muklja lese, nego phenđa lese: “Dža čhere, te čherutnende, hem vaćer lenđe sa so ćerđa će o Gospod hem kobor inele će milosrdno.”
\p
\v 20 I o manuš dželo hem lelja te vaćeri ano Dekapolis sa so ćerđa lese o Isus. I sare divinde pe.
\s O Isus sasljari e namborma đuvlja hem vazdela taro mule e čhajorja
\p
\v 21 O Isus palem nakhino e čamcoja ki aver strana oto jezero. Uzalo leste čedinde pe but džene, a ov inele uzalo jezero. 
\v 22 Tegani alo jekh vođa e sinagogakoro palo anav Jair hem, kad dikhlja e Isuse, pelo mujeja đi phuv anglo lesere pre 
\v 23 hem zorale molinđa le: “Mli čhajori anglo meriba. Molinava tut, ava hem čhiv te vasta upro late, te sasljol hem te živini.”
\p
\v 24 I o Isus lelja te džal palo Jair, a palo leste džele but džene, kola lelje te gurinen pe ano leste.
\p
\v 25 Maškar olende inele hem jekh namborme đuvli kolatar dešu duj berš thavdinđa rat. 
\v 26 But patinđa ko doktorija hem sa so inola trošinđa upro lende, ali so te ovel laće po šukar, olaće inele po bišukar. 
\v 27 Kad šunđa e Isusese, nakhini maškaro narodo koro leste oto palal hem dolinđa pe upro lesoro fostani, 
\v 28 adalese so phenđa ana peste: “Samo te dolav man upro lesere šeja, ka ovav sasljardi.” 
\v 29 I otojekhvar ačhilo te thavdel latar o rat hem oj osetinđa ano telo soi sasljardi taro plo baro nambormipe.
\p
\v 30 O Isus odmah osetinđa so olestar iklilo zoralipe te sasljari nekas, i irinđa pe nakoro narodo hem pučlja: “Ko dolinđa pe upro mle šeja?”
\p
\v 31 O učenici phende lese: “Dikheja sar o narodo gurini pe uzala tute, a tu pučeja ko dolinđa pe upra tute!”
\p
\v 32 A o Isus lelja te rodel uzala peste te dikhel ko ćerđa adava. 
\v 33 Tegani adaja đuvli, tresindoj oti dar, adalese so džanđa so ulo laće, ali hem peli mujeja đi phuv anglo leste hem vaćerđa lese sa sar inele.
\p
\v 34 A o Isus phenđa laće: “Mli čhaj, ti vera sasljarđa tut. Dža ano mir hem ov sasti te bare nambormipastar!”
\p
\v 35 Sar o Isus pana vaćeri ine adava, ale nesave manuša taro čher e Jairesoro, e sinagogakere vođasoro, hem phende: “Ti čhaj muli. Sose više te mučine e učitelje?”
\p
\v 36 Ali o Isus na dinđa pažnja ko adava so phende, nego phenđa e sinagogakere vođase: “Ma dara! Samo verujin!”
\p
\v 37 I o Isus na muklja nikase te džal oleja, sem e Petrese, e Jakovese hem lesere phralese e Jovanese.
\p
\v 38 Kad resle đi ko čher e sinagogakere vođasoro, o Isus dikhlja so o manuša galaminena, so sa glasoja rovena e čhajorja. 
\v 39 I ov đerdinđa hem phenđa lenđe: “Sose galaminena? Sose rovena? I čhajori na muli, nego sovela.”
\p
\v 40 A on asandile lese, i ov ikalđa sarijen avri. Peja legarđa samo e čhajorjakere dade hem e daja hem ple trine učenikonen, hem đerdinđa adari kaj inele i čhajori.
\p
\v 41 I dolinđa la oto vas hem phenđa laće: “Talita kum!” (so značini: “Čhajorije, tuće vaćerava, ušti!”).
\p
\v 42 I odmah i čhajori uštini hem lelja te phirel, a on but inele začudime. Ola inele dešu duj berš. 
\v 43 Tegani o Isus zorale naredinđa lenđe te na vaćeren nikase so ulo hem phenđa lenđe te den la te hal.
\c 6
\s E Isuse na prihvatinena ano Nazaret
\p
\v 1 Tegani o Isus dželo adathar hem alo ko than kaj barilo, a oleja ale hem lesere učenici. 
\v 2 Kad alo o savato, ov lelja te sikaj e manušen ani sinagoga. But džene kola šunde le divinde pe hem pučle: “Kotar akalese adava? Savi adaja mudrost lese dindi? Sar šaj te ćerel esavke čudesija ple vastencar? 
\v 3 Ma ovi samo kaštarutno! Ovi o čhavo e Marijakoro, a phral e Jakovesoro, e Josesoro, e Judasoro hem e Simonesoro, hem lesere phenjai akate amencar.” I razočarinde pe hem na mangle te prihvatinen le.
\p
\v 4 Tegani o Isus phenđa lenđe: “E prorokose dela pe čast ko sa o thana, sem lese ano than kaj barilo, maškari lesiri familija hem lese ano čher.” 
\v 5 I adari našti ine te ćerel nijekh čudo, sem so čhivđa ple vasta upro nekobor namborme hem sasljarđa len. 
\v 6 I čudinđa pe so na ine len vera.
\p I o Isus džala ine ko pašutne gava hem sikaj e manušen.
\s O Isus bičhali e apostolen te vaćeren o evanđelje hem te sasljaren
\p
\v 7 I vičinđa kora peste e dešu duje apostolen hem lelja te bičhali len po dujen. Dinđa len autoritet upro bišukar duhija 
\v 8 hem naredinđa lenđe, sem štapi, te na legaren pumencar ko drom ništa aver, ni maro, ni torba, ni bakarna kovanice ano pojasija, 
\v 9 nego te urjen pe sandale, hem te na legaren pumencar aver gad.
\p
\v 10 Hem phenđa lenđe: “Kad đerdinena ko nesavo than, đikote na džana adathar, ačhoven ano jekh čher. 
\v 11 Te ko nesavo than na priminde tumen ili te na mangle te šunen tumen, ikljoven adathar hem tresinen i prašina tumare prendar, sar znako zako zoralo odbiba.”
\p
\v 12 I o apostolja džele hem propovedinde da o manuša valjani te pokajinen pe. 
\v 13 Ispudinde bute demonen, hem makhle uljeja bute nambormen hem sasljarde len.
\s Meriba e Jovanesoro e Krstiteljesoro
\p
\v 14 I o caro o Irod šunđa e Isusese, adalese so lesoro anav ulo prešundo. Nesave manuša vaćerena ine: “Ovi o Jovan o Krstitelj. Uštino taro mule hem adalese šaj te ćerel adala čudesija.” 
\v 15 Avera vaćerde: “Adavai o proroko o Ilija.” A avera vaćerde: “Ovi proroko sar so inele o proroci taro purano vreme.”
\p
\v 16 Ko adava, o Irod phenđa: “Ovi o Jovan, kasoro šero me čhinđum. Ov uštino taro mule!”
\p
\v 17-18 Adalese so, korkoro o Irod angleder bičhalđa te dolen e Jovane hem te frden le ano phandlipe, adalese so o Jovan phenela lese ine da na tromal te lel romnjaće e Irodijada, ple phralesere e Filipesere romnja, sava već lelja romnjaće. 
\v 19 I Irodijada adalese zamrzinđa e Jovane hem manglja te mudari le, ali našti ine te ćerel adava 
\v 20 adalese so o Irod darandilo e Jovanestar hem štitinđa le adalese so džanđa dai pravedno hem sveto manuš. Kad god o Irod šunela ine e Jovane, ovela ine but zbunime, a palem, mangela ine te šunel le.
\p
\v 21 A mothovđa pe šuži prilika e Irodijadaće kad o Irod zako plo bijando dive ćerđa gozba zako ple bitna službenici, zako e vojskakere narednici hem zako e galilejakere šerutne. 
\v 22 Kad đerdinđa e Irodijadakiri čhaj ki gozba hem kad čhelđa anglo lende, adava but inele šukar e Irodese hem lesere gostonenđe. I o caro phenđa e čhajaće: “Rode mandar sa so mangeja hem me adava ka dav tut.” 
\v 23 Hem halja laće sovli: “Ka dav tut sa so ka mange, đi ko ekvaš oto mlo carstvo.”
\p
\v 24 I oj iklili hem pučlja pe daja: “So te mangav?”
\pi A oj phenđa: “O šero e Jovanesoro e Krstiteljesoro.”
\p
\v 25 I čhaj odmah siđarđa koro caro hem phenđa lese: “Mangava odmah te de man ko čaro o šero e Jovanesoro e Krstiteljesoro.”
\p
\v 26 E carose but inele žao, ali zbog pli sovli anglo gostija na manglja te odbini la. 
\v 27 Odmah naredinđa e dželatese te džal hem te anel e Jovanesoro šero. Ov dželo, čhinđa lesoro šero ano phandlipe 
\v 28 hem anđa le ko čaro, i dinđa le e čhajaće, a oj dinđa le pe dajaće.
\p
\v 29 Kad šunde adava e Jovanesere učenici, ale hem lelje lesoro telo, i čhivde le ano grobo.
\s O Isus parvari više oto pandž hiljade manušen
\p
\v 30 O apostolja irinde pe koro Isus hem vaćerde lese sa so ćerde hem sostar sikavde e manušen. 
\v 31 I o Isus phenđa lenđe: “Te cida amen ko jekh čučo than, korkore, te odmorinen hari.” Adalese so but manuša avena ine hem džana, i na ine len vreme ni te han.
\p
\v 32 I on lelje korkore čamcoja te džan ko jekh čučo than. 
\v 33 Ali, but džene dikhle len sar džana hem pendžarde len, i taro sa o pašutne dizja prastandile adari phuvjaja hem resle angleder olendar. 
\v 34 Kad o Isus iklilo taro čamco, dikhlja bute manušen hem ine lese pharo olenđe, adalese so inele sar bakre bizo pastiri, i lelja but so te sikaj len.
\p
\v 35 I kad lelja te perel i rat, nakhle đi leste lesere učenici hem phende: “Ko akava than ništa nane, a već perela i rat. 
\v 36 Te muke ine e manušen te šaj džan ko pašutne thana hem gava te činenfse nešto hajbnase.”
\p
\v 37 A o Isus phenđa lenđe: “Den len tumen nešto hajbnase!”
\p On pučle le: “Mangeja amendar te dža hem te čina mare zako dušel srebrna kovanice hem te da len te han?”
\p
\v 38 A o Isus pučlja len: “Kobor mare isi tumen? Džan hem dikhen.”
\p Kad dikhle, phende so isi len pandž mare hem duj maćhe.
\p
\v 39 Tegani o Isus naredinđa sare, ko kupe, te bešen ki zeleno čar. 
\v 40 I on beštine ko kupe po šel hem po pinda.
\p
\v 41 Tegani lelja e pandže maren hem e duje maćhen, dikhlja nakoro nebo hem zahvalinđa e Devlese zako hajba. Phaglja o mare hem dinđa len ko ple učenici te podelinen len e manušenđe. Ađahar sarijenđe podelinđa hem e duje maćhen. 
\v 42 I sare hale đikote na čalile. 
\v 43 Palo adava, dešu duj pherde korpe čedinde pe okolestar so ačhilo oto mare hem oto maćhe. 
\v 44 A okola so hale inele pandž hiljade murša.
\s O Isus phirela upro pani
\p
\v 45 I odmah palo adava o Isus terinđa e učenikonen te đerdinen ko čamco hem angleder oleste te džan ki aver strana, nakori diz Vitsaida, đikote ov bičhali čhere e manušen. 
\v 46 Kad bičhalđa čhere e manušen, dželo ko brego te molini pe.
\p
\v 47 Kasno ani rat, o čamco inele ko ekvaš o jezero, a o Isus inele ki phuv korkoro. 
\v 48 Ov dikhlja e učenikonen sar phareste veslinena, adalese so nakoro lende phudinđa i barval, i paše đi maškaro trin hem šov o sati prekali rat alo nakoro lende phirindoj upro jezero. Ov valjanđa te nakhel uzalo lende, 
\v 49 ali kad dikhle le sar phirela upro jezero, lelje te vičinen, adalese so mislinde dai duho. 
\v 50 Sare dikhle le hem tresinde oti dar,
\p ali o Isus odmah phenđa lenđe: “Ma daran! Me injum!” 
\v 51 Tegani đerdinđa koro lende ko čamco hem i barval ačhili. A on inele but začudime, 
\v 52 adalese so na halile okova čudo so ulo e marencar, adalese so lengere vile inele steđime.
\s O Isus sasljari e nambormen ano Genisaret
\p
\v 53 I o Isus hem lesere učenici nakhle ki aver strana oto jezero, ki phuv e Genisaretakiri hem phandle o čamco. 
\v 54 So iklile taro čamco, o manuša odmah pendžarde e Isuse, 
\v 55 i prastandile maškaro sa adava krajo te vaćeren averenđe so o Isus alo, i o manuša lelje ko nosiljke te anen e nambormen adari kaj šunde dai o Isus. 
\v 56 I kaj god te đerdini ine – ko dizja, ko gava ili ko po tikore thana – čhivena ine e nambormen ko trgija hem molinena le ine te mukel lenđe samo te dolen pe upro lesere fostanesoro krajo. I đijekh kova dolinđa pe, saslilo.
\c 7
\s E puranengere adetija hem e Devlesere naredbe
\p
\v 1 Uzalo Isus čedinde pe o fariseja hem nesave učitelja e Zakonestar kola ale taro Jerusalim. 
\v 2 I dikhle nesaven lesere učenikonendar sar bithovde vastencar hana maro – so značini dai lengere vasta melale palo adeti e farisejengoro. 
\v 3 Adalese so, o Jevreja, a posebno o fariseja, na hana ine maro đikote na thovena pumare vasta đi o kunja, sar te ićeren o adeti pumare puranengoro. 
\v 4 Hem kad avena ine čhere taro pijac, na hana ine đikote šukar na thovena pe. A isi pana but adetija save ićerena, sar soi o thojba e čašengoro, e bokalengoro hem e čarengoro. 
\v 5 Adalese o fariseja hem o učitelja e Zakonestar pučle e Isuse: “Sose te učenici na ićerena o adetija amare puranengere, nego melale vastencar hana maro?”
\p
\v 6 A o Isus phenđa lenđe: “Dujemujengere manušalen! Šukar tumendar prorokujinđa o Isaija. Sar soi pisime ano Sveto lil:
\b
\q1 ‘Akala manuša poštujinena man samo mujeja,
\q2 a lengoroi vilo dur mandar.
\q1
\v 7 Džabe poštujinena man,
\q2 adalese so sikavena o manušikane naredbe sar dai mlo sikaviba.’
\b
\p
\v 8 Tumen ačhavđen e Devlesere naredbe, a ićerena o manušikane adetija.”
\p
\v 9 Hem phenđa lenđe: “Ko šukar način arakhljen te čhinaven e Devlesiri naredba sar te ićeren tumare adetija!
\p
\v 10 Adalese so o Mojsije phenđa: ‘Poštujin te dade hem te daja’ hem: ‘Ko dela armanja pe dade ili pe daja, nek ovel kaznime meribnaja.’ 
\v 11 A tumen vaćerena: ‘O manuš šaj te phenel pe dadese ili pe dajaće: Sa soja šaj ine te pomožinav tut, već haljum sovli dai adava korbani, so značini daro e Devlese’, 
\v 12 i ađahar na mukena lese ništa više te pomožini pe dadese ili pe dajaće. 
\v 13 Ađahar čhinavena e Devlesoro lafi tumare adetencar saven sikavena averen. Hem pana but so ađahar ćerena.”
\s O bišukaripe e manušesoro meljari le anglo Devel
\p
\v 14 I o Isus palem vičinđa kora peste e narodo hem phenđa lenđe: “Šunen man sare hem haljoven: 
\v 15 Ništa so od avrijal đerdini ano manuš našti te meljari le, nego okova so ikljola e manušestar – adava meljari e manuše. 
\v 16 [Te nekas isi kana, nek šunel!]”
\p
\v 17 A kad cidinđa pe e narodostar hem kad đerdinđa ano čher, o učenici pučle le te objasnini lenđe adaja priča. 
\v 18 I ov pučlja len: “Ni tumen li na haljovena? Na haljovena li so e manuše našti te meljari ništa so od avrijal đerdini ano leste, 
\v 19 adalese so na đerdini lese ano vilo, nego ano vođi hem ikljola taro lesoro telo?”
\p (Ađahar sa soi hajbnase, o Isus proglasinđa dai čisto.)
\p
\v 20 Hem phenđa: “E manuše meljari okova so ikljola olestar. 
\v 21 Adalese so, andral, e manušesere vilestar, ikljona o bišukar mislija, o blud, o čoriba, o mudariba, 
\v 22 o preljube, i pohlepa, o bišukaripe, o prevariba, i bilađ, i zavist, o bišukar vaćeriba averendar, o barikanipe hem o dilinipe. 
\v 23 Sa adala bišukaripa ikljona andral hem meljarena e manuše.”
\s I vera ano Isus e đuvljakiri koja nane Jevrejka
\p
\v 24 Palo adava o Isus tari regija Galileja dželo ko krajo e tiresoro hem e sidonesoro, i ačhilo adari ano nesavo čher. Na manglja niko te džanel dai adari, ali našti ine te garaj pe 
\v 25 adalese so odmah šunđa olese jekh đuvli kasiri čhajori inele opsednutime bišukare duhoja. Oj ali hem peli mujeja đi phuv anglo lesere pre. 
\v 26 Adaja đuvli inele Grkinja, bijandi ani e sirijakiri Fenicija. Molinđa e Isuse te ispudini e demone lakere čhajatar.
\p
\v 27 O Isus phenđa laće: “Muk najangle o čhavore te han đikote na čaljona. Adalese so nane šukar te lel pe o maro e čhavorendar hem te frdel pe e đuklorenđe.”
\p
\v 28 A oj phenđa: “Oja, Gospode, ali hem o đuklore talo astali hana o troške save perena e čhavorendar.”
\p
\v 29 Tegani o Isus phenđa laće: “Adalese so ađahar phenđan, šaj te dža čhere. O demoni iklilo te čhajatar.” 
\v 30 Kad i đuvli resli čhere, arakhlja e čhajorja sar ano mir pašljola ko than e pašljojbnasoro, a o demoni već iklilo ine olatar.
\s O Isus sasljari e manuše kova našti ine te šunel hem te vaćeri
\p
\v 31 Tegani o Isus dželo taro krajo e tiresoro, i prekalo Sidon reslo ko e Galilejakoro jezero, ko krajo e dekapolisesoro. 
\v 32 Adari ande koro Isus jekhe kašuke manuše kova hem phareste vaćeri ine hem molinde le te čhivel plo vas upro leste hem te sasljari le. 
\v 33 I o Isus cidinđa le ki strana e narodostar, čhivđa ple naja ano lesere kana, a palo adava čhungarđa ko ple naja hem pipinđa lesiri čhib. 
\v 34 I dikhlja nakoro nebo, zorale uzdahninđa hem phenđa lese: “Efata!”– so značini “Phravđov!” 
\v 35 I odmah phravdile e manušesere kana hem lesiri čhib, i lelja šukar te vaćeri.
\p
\v 36 O Isus naredinđa lenđe te na vaćeren adalestar nikase. Ali sa so više naredini lenđe ine te na vaćeren, on sa više vaćerena ine adalestar. 
\v 37 I o manuša but divinena pe ine hem vaćerena: “Sa ćerela šukar – đi o kašuke te šunen hem o lalore te vaćeren.”
\c 8
\s O Isus parvari štar hiljade manušen
\p
\v 1 Ko adava vreme palem čedinđa pe baro narodo. I adalese so na ine len so te han, o Isus vičinđa kora peste ple učenikonen hem phenđa lenđe: 
\v 2 “Pharo maje akale manušenđe. Trito divei mancar, a nane len so te han. 
\v 3 Te bičhalđum len čhere bokhalen, ka peren odrumal, a nesave olendar ale odural.”
\p
\v 4 A o učenici pučle le: “Kaj ko akava čučo than te arakha dovoljno maro zako sa akala manuša te čaljoven?”
\p
\v 5 I o Isus pučlja len: “Kobor mare isi tumen?”
\p A on phende: “Efta.”
\p
\v 6 Tegani naredinđa o narodo te bešel ki phuv, lelja okola efta mare, zahvalinđa e Devlese, phaglja len hem dinđa len ko ple učenici, hem on dinde len e manušenđe. 
\v 7 A olen inele hem nekobor tikore maćhe. O Isus zahvalinđa hem olenđe, i phenđa e učenikonenđe hem olen te podelinen e manušenđe. 
\v 8 Sare hale hem čalile, hem efta pherde bare korpe čedinde pe okolestar so ačhilo oto hajba. 
\v 9 A adari inele đi ko štar hiljade manuša. I o Isus bičhalđa len čhere 
\v 10 hem odmah đerdinđa ko čamco e učenikonencar, i dželo ko krajo e dalmanutakoro.
\s O fariseja rodena e Isusestar te dokažini pe
\p
\v 11 Tegani ale nesave fariseja hem lelje te raspravinen pe e Isuseja. Iskušinde le ađahar so rodinde lestar znako taro nebo.
\p
\v 12 A ov zorale uzdahninđa, i phenđa: “Sose akaja generacija rodela mandar znako? Čače phenava tumenđe: nisavo znako naka del pe laće.”
\p
\v 13 Tegani ačhavđa len, palem đerdinđa ko čamco hem nakhino ki aver strana oto jezero.
\s O uticaj e farisejengoro hem e carosoro e Irodesoro nane šukar
\p
\v 14 A o učenici bisterde te legaren pumencar maro, i ano čamco inolen samo jekh maro.
\p
\v 15 I sar nakhena ine ki aver strana oto jezero, o Isus upozorinđa len vaćerindoj: “Arakhen tumen taro kvasco e farisejengoro hem taro kvasco e Irodesoro!”
\p
\v 16 A on maškara pumende vaćerena ine: “Adava phenđa adalese so nane amen maro!”
\p
\v 17 O Isus džanđa sostar vaćerena, i pučlja len: “Sose vaćerena adalestar so nane tumen maro? Pana li na haljovena hem na anena ki godi? Edobor li steđime tumare vile? 
\v 18 Jaćha isi tumen, a na dikhena? Kana isi tumen, a na šunena? Hem sar na setinena tumen? 
\v 19 Kad phagljum o pandž mare zako pandž hiljade murša, kobor pherde korpe čedinđen okolestar so ačhilo oto hajba?”
\p On phende: “Dešuduj.”
\p
\v 20 “A kad phagljum o efta mare zako štar hiljade murša, kobor bare korpe čedinđen okolestar so ačhilo oto hajba?”
\p On phende: “Efta.”
\p
\v 21 A ov pučlja len: “I pana li na haljovena?”
\s O Isus sasljari e korore ani Vitsaida
\p
\v 22 I kad resle ki Vitsaida, nesave manuša ande koro Isus jekhe korore manuše, i molinde le te čhivel ple vasta upro leste. 
\v 23 O Isus dolinđa e korore oto vas hem ikalđa le taro gav, čhungarđa lese ko jaćha hem čhivđa ple vasta upro leste.
\p I pučlja le: “Dikheja li nešto?”
\p
\v 24 A o manuš lelja te dikhel, i phenđa: “Dikhava manušen, ali oni sar kašta save phirena!”
\p
\v 25 I o Isus palem čhivđa ple vasta upro lesere jaćha, hem e manušese irinđa pe o dikhiba hem sa šukar dikhlja.
\p
\v 26 O Isus bičhalđa le čhere, vaćerindoj: “Ma đerdin ko gav.”
\s O Petar phenela dai o Isus o Hrist
\p
\v 27 I o Isus hem lesere učenici džele ko gava uzali e Filipesiri Cezareja. Odrumal o Isus pučlja len: “So phenena o manuša, ko injum me?”
\p
\v 28 On phende lese: “Nesave manuša phenena da tu injan o Jovan o Krstitelj, a avera phenena da tu injan o proroko o Ilija, a nesave avera da tu injan jekh oto avera proroci.”
\p
\v 29 Tegani o Isus pučlja len: “A so tumen phenena, ko injum me?”
\p O Petar phenđa: “Tu injan o Hrist!”
\p
\v 30 I o Isus zorale upozorinđa len nikase te na vaćeren adava olestar.
\s O Isus vaćeri ple meribnastar
\p
\v 31 I lelja te sikaj len vaćerindoj: “Me, o Čhavo e manušesoro, valjani but te patinav. O starešine, o šerutne sveštenici hem o učitelja e Zakonestar naka prihvatinen man. Ka ovav mudardo, ali o trito dive ka uštav taro mule.” 
\v 32 Phravdeste vaćerđa lenđe adalestar, i o Petar cidinđa le ki strana hem lelja te ukorini le.
\p
\v 33 A o Isus, irinđa pe, dikhlja ano učenici, i ukorinđa e Petre hem phenđa: “Dža mandar, Sotone! Adalese so na razmislineja devlikane, nego manušikane.”
\s Sar te ovel pe e Isusesoro učeniko
\p
\v 34 Tegani o Isus vičinđa kora peste e narodo zajedno ple učenikonencar, i phenđa lenđe: “Ko mangela te ovel mlo učeniko, mora te ačhaj pe ple dživdipnastar hem te lel plo krsto hem te phirel pala mande. 
\v 35 Adalese so, ko mangela te spasini plo dživdipe, ka našali le, a ko našali plo dživdipe zbog mande hem zbog o Šukar lafi, ka spasini le. 
\v 36 I so vredini e manušese hem sa i phuv te ovel olesiri, a našali plo dživdipe? 
\v 37 I so o manuš šaj te del sar zamena zako plo dživdipe?
\p
\v 38 Adalese so, ko angli akaja neverno hem grešno generacija lađala mandar hem mle lafendar, hem me, o Čhavo e manušesoro, ka lađav olestar kad ka avav ani slava mle Dadesiri e svetone anđelencar.”
\c 9
\p
\v 1 I o Isus phenđa lenđe: “Čače vaćerava tumenđe, isi nesave akalendar so terđona akate kola čače naka meren đikote na dikhena o carstvo e Devlesoro sar avela ano zoralipe.”
\s E Isusesiri slava mothovela pe ki gora anglo trin učenici
\p
\v 2 Palo šov dive, o Isus lelja peja e Petre, e Jakove hem e Jovane hem dželo olencar ki jekh uči gora, kote inele korkore. Adari o Isus ulo averčhane anglo lende: 
\v 3 lesere šeja ule sjajna hem parne – edobor parne da nijekh manuš ki phuv naka šaj ine edobor te parnjari len. 
\v 4 I tegani iklile anglo lende o Ilija hem o Mojsije hem lelje te vaćeren e Isuseja.
\p
\v 5 I o Petar phenđa e Isusese: “Učitelju, šukari amenđe so injam akate. Te ćera trin šatorja: jekh tuće, jekh e Mojsijase hem jekh e Ilijase.” 
\v 6 (Na džanđa so te vaćeri, adalese so but darandile.)
\p
\v 7 Tegani iklilo jekh oblako savo učharđa len hem taro oblako šundilo glaso savo vaćerđa: “Akavai mlo Čhavo o manglo! Ole šunen!”
\p
\v 8 I otojekhvar, kad dikhle uzala pumende, na dikhle više nikas sem e Isuse.
\p
\v 9 Sar huljena ine tari gora, o Isus naredinđa lenđe nikase te na vaćeren so dikhle sa đikote ov, o Čhavo e manušesoro, na uštela taro mule. 
\v 10 I on nikase na vaćerde adalestar, ali maškara pumende pučena pe ine upra soste mislinđa kad phenđa da ka “uštel taro mule.”
\p
\v 11 I o učenici pučle le: “Sose onda o učitelja e Zakonestar vaćerena da o Ilija valjani te avel angleder e Mesijastar?”
\p
\v 12 O Isus phenđa lenđe: “Čače prvo o Ilija avela hem palem ka čhivel sa than thaneja. A sosei onda pisime ano Sveto lil zako Čhavo e manušesoro da but ka patini hem da ka ovel odbacime? 
\v 13 Ali phenava tumenđe: o Ilija već alo, ali ćerde oleja sar olenđe manglja pe, sar soi pisime olestar.”
\s O Isus ikali e bišukare duho e čhavorestar
\p
\v 14 Kad o Isus hem o trin učenici irinde pe koro avera učenici, dikhle bute manušen uzalo lende hem nesave učiteljen e Zakonestar sar raspravinena pe olencar. 
\v 15 I so dikhle e Isuse sa adala manuša, but iznenadinde pe, i prastandile nakoro leste te pozdravinen le.
\p
\v 16 I o Isus pučlja len: “Sostar raspravinena olencar?”
\p
\v 17 A jekh manuš taro narodo phenđa lese: “Učitelju, anđum mle čhave te sasljare le. Ov našti te vaćeri adalese soi opsednutime bišukare duhoja kova na mukela le te vaćeri. 
\v 18 Kad prelela le, frdela le ki phuv, taro muj ikljola lestar pena, steđini pe danda hem kočini pe. Rodinđum te učenikonendar te ispudinen le mle čhavestar, ali našti ine te ćeren adava.”
\p
\v 19 A o Isus phenđa lenđe: “O, biverakiri generacijo! Pana kobor valjani te ovav tumencar? Pana kobor valjani te trpinav tumen? Anen adale čhavore kora mande!” 
\v 20 I on ande e čhavore koro Isus. Kad o bišukar duho dikhlja e Isuse, odmah frdinđa e čhavore ano grčevija. Ov pelo ki phuv hem lelja te irini pe ko sa o strane, a taro muj lelja te ikljol lestar pena.
\p
\v 21 O Isus pučlja lesere dade: “Kobori već ov esavko?”
\p A o dad phenđa: “Pana taro tikoripe. 
\v 22 Hem but puti frdela le ani jag ili ano pani te mudari le. Ali, te šaj nešto te ćere, smilujin tut amenđe hem pomožin amenđe.”
\p
\v 23 A o Isus phenđa lese: “Te šaj? Sa šaj okolese kova verujini.”
\p
\v 24 A e čhavoresoro dad odmah vičinđa: “Verujinava! Pomožin maje više te verujinav!”
\p
\v 25 Kad o Isus dikhlja so but manuša prastana nakoro lende, naredinđa e bišukare duhose: “Duhona so ćereja e manušen te našti vaćeren hem te našti šunen, naredinava će te ikljove olestar hem te na irine tut više ano leste!”
\p
\v 26 I o bišukar duho vičinđa, zorale tresinđa e čhavore hem iklilo olestar. A o čhavoro ačhilo ki phuv sar mulo, i but džene phende da mulo. 
\v 27 Ali o Isus dolinđa le oto vas hem vazdinđa le, hem o čhavoro terdino ko pre.
\p
\v 28 Kad o Isus đerdinđa ko čher, lesere učenici inele korkore oleja hem pučle le: “Sose amen našti ine te ispudina e bišukare duho?”
\p
\v 29 O Isus phenđa lenđe: “Akaja vrsta ispudini pe samo molitvaja.”
\s O Isus dujto puti vaćeri ple meribnastar
\p
\v 30 I o Isus hem lesere učenici džele taro adava krajo hem nakhine maškari regija Galileja. O Isus na manglja o manuša te džanen dai adari 
\v 31 adalese so manglja te sikaj samo ple učenikonen. Phenđa lenđe: “Me, o Čhavo e manušesoro, valjani te ovav predime ano vasta e bišukare manušengere. Ka mudaren man, ali palo trin dive ka uštav taro mule.”
\p
\v 32 Ali o učenici na halile so o Isus manglja te vaćeri adaleja, a darandile te pučen le adalestar.
\s O poniznai najbare ano carstvo e Devlesoro
\p
\v 33 Kad o Isus hem lesere učenici ale ani diz Kafarnaum hem kad inele ano čher, o Isus pučlja len: “Sostar raspravinđen odrumal?”
\p
\v 34 A on trainde, adalese so odrumal raspravinde maškara pumende adalestar kovai olendar najbaro.
\p
\v 35 Tegani o Isus beštino, vičinđa kora peste e dešu duje apostolen hem phenđa lenđe: “Kova mangela te ovel prvo, valjani te ovel zadnjo maškaro sarijende hem te ovel sluga sarijenđe.”
\p
\v 36 Tegani lelja jekhe čhavore, čhivđa le maškar olende, zagrlinđa le hem phenđa lenđe: 
\v 37 “Đijekh kova primini jekhe esavke čhavore zbog maje, man primini. A đijekh kova man primini, na primini samo man, nego primini hem e Devle kova bičhalđa man.”
\s O Isus vaćeri koi olese hem koi protiv oleste
\p
\v 38 O učeniko o Jovan phenđa e Isusese: “Učitelju, dikhljam nesave manuše sar ano to anav ispudini e demonen hem amen na mukljam lese te ćerel adava, adalese so na džala amencar pala tute.”
\p
\v 39 A o Isus phenđa: “Muken le te ćerel adava! Adalese so nijekh kova ano mlo anav ćerela čudo našti odmah te vaćeri bišukar mandar. 
\v 40 Adalese so okova kova nane protiv amende, ovi amencar! 
\v 41 Adalese so, đijekh kova dela tumen đi hem jekh čaša panjeja te pijen adalese so injen mle, e Hristesere, čače vaćerava tumenđe da ka primini pli nagrada.”
\s O Isus upozorini te na legari pe ko iskušenje
\p
\v 42 “Te neko ćerela jekh akale tikorendar kola verujinena ana mande te perel ano greh, po šukar ka ovel lese ine ki men te ovel lese phandlo baro bar hem te ovel frdime ano more. 
\v 43 Hem te to vas legari tut ano greh, čhin le. Po šukari će te đerdine ko večno dživdipe sakatime nego te oven tut soduj vasta, a te dža ko pakao, ki jag savi nikad na mudarđola, 
\v 44 [kote o čirme save hana len na merena hem i jag na mudarđola.] 
\v 45 Te to pro legari tut ko greh, čhin le. Po šukari će te đerdine ko večno dživdipe sakatime nego te oven tut soduj pre, a te ove frdime ano pakao, 
\v 46 [kote o čirme save hana len na merena hem i jag na mudarđola.] 
\v 47 Te ti jakh legari tut ko greh, ikal la. Po šukari će te đerdine ko carstvo e Devlesoro jekha jakhaja nego te oven tut soduj jaćha, a te ove frdime ano pakao 
\v 48 kote o čirme save hana len na merena hem i jag na mudarđola.
\p
\v 49 Adalese so, đijekh ka ovel pročistime jagaja sar soi i žrtva pročistime loneja. 
\v 50 Šukari o lon. Ali te našalđa plo londipe, soja ov ka lonđari pe? Nek ovel tumen lon ana tumende, hem oven ano mir jekh avereja!”
\c 10
\s O Isus sikaj o rom hem i romni te na ačhaven pe
\p
\v 1 I o Isus iklilo tari diz Kafarnaum, i dželo ko krajo e Judejakoro hem ki aver strana oti len Jordan. I palem alo koro leste but narodo, a ov lelja te sikaj len, sar so uvek ćerela ine.
\p
\v 2 I ale nakoro leste nesave fariseja mangindoj te iskušinen le, i pučle le: “Tromal li o rom te ačhaj pe romnja?”
\p
\v 3 A ov pučlja len: “So naredinđa tumenđe o Mojsije?”
\p
\v 4 On phende: “O Mojsije muklja e manušese pe romnjaće te del lil oto rastaviba hem te ačhaj la.”
\p
\v 5 A o Isus phenđa lenđe: “O Mojsije pisinđa tumenđe adaja naredba adalese so injen šerale. 
\v 6 Ali, ko anglunipe o Stvoritelj ‘ćerđa murše hem đuvlja’. 
\v 7 ‘Adalese o manuš ka ačhaj pe dade hem pe daja hem ka ovel jekh pe romnjaja, 
\v 8 hem on duj ka oven jekh telo.’ Ađahar on nane više duj, nego jekh telo. 
\v 9 Adalese, o manuš te na rastavini okolen so o Devel ćerđa te oven jekh!”
\p
\v 10 Kad palem inele ano čher, o učenici pučle le adalestar, 
\v 11 a o Isus phenđa lenđe: “Đijekh kova ačhaj pe romnja hem lela avera, ćerela preljuba premalo late. 
\v 12 Hem te i romni ačhaj pe rome hem lela avere, ćerela preljuba.”
\s O carstvo e Devlesoroi okolenđe kolai ponizna sar o čhavore
\p
\v 13 O manuša anena ine anglo Isus pumare čhavoren te čhivel ple vasta upro lende, a o učenici braninde lenđe.
\p
\v 14 Kad o Isus dikhlja adava, holjanđa hem phenđa lenđe: “Muken e čhavoren te aven kora mande hem ma braninen lenđe, adalese so esavkenđe pripadini o carstvo e Devlesoro! 
\v 15 Čače vaćerava tumenđe, ko na primini o carstvo e Devlesoro sar o čhavoro, nikad naka đerdini ano leste.”
\p
\v 16 Tegani zagrlinđa e čhavoren, čhivđa ple vasta upro lende hem blagoslovinđa len.
\s Pharoi e barvalenđe te đerdinen ko carstvo e Devlesoro
\p
\v 17 Sar o Isus lela ine te džal ko drom, prastandilo nakoro leste jekh manuš, pelo ko kočija anglo leste hem pučlja le:
\p “Učitelju šukareja, so valjani te ćerav te dobinav o večno dživdipe?”
\p
\v 18 A o Isus phenđa lese: “Sose vičineja man šukareja? Samoi jekh šukar – o Devel. 
\v 19 O naredbe džane: ‘Ma mudar!’, ‘Ma ćer preljuba!’, ‘Ma čor!’, ‘Ma svedočin hovavne!’, ‘Ma prevarin’, ‘Poštujin te dade hem te daja!’”
\p
\v 20 A ov phenđa: “Sa adava ićerava pana taro tikoripe.”
\p
\v 21 O Isus dikhlja ano leste hem osetinđa mangipe olese, i phenđa lese: “Pana jekh ačhola tut te ćere: dža hem biknin sa so isi tut, a o pare de e čororenđe i ka ovel tut barvalipe ano nebo. Tegani ava hem phir pala mande.”
\p
\v 22 A kad o terno manuš šunđa adava, rastužisalo hem dželo, adalese so na manglja te biknel plo baro barvalipe.
\p
\v 23 O Isus dikhlja ano učenici hem phenđa lenđe: “Kobori pharo e barvalenđe te đerdinen ko carstvo e Devlesoro!”
\p
\v 24 A o učenici čudinde pe ko adava so phenđa.
\p A o Isus palem phenđa lenđe: “Mle čhavoralen, kobori pharo te đerdini pe ko carstvo e Devlesoro! 
\v 25 Po lokhei e kamilaće te nakhel maškaro kan e suvjakoro nego e barvalese te đerdini ko carstvo e Devlesoro.”
\p
\v 26 A o učenici po više čudinde pe, i lelje maškara pumende te pučen pe: “Ko onda šaj te ovel spasime?”
\p
\v 27 O Isus dikhlja len šukar, i phenđa: “E manušenđe adava nane moguće, ali na hem e Devlese. Adalese soi e Devlese sa moguće.”
\p
\v 28 O Petar lelja te vaćeri lese: “Ače, amen sa ačhavđam te dža pala tute.”
\p
\v 29 O Isus phenđa: “Čače vaćerava tumenđe, đijekh kova ačhavđa plo čher, ili e phraljen, ili e phenjen, ili e daja, ili e dade, ili e čhaven, ili o njive zbog maje hem zbog o Šukar lafi, 
\v 30 akana, ano akava vreme, ka primini šel puti više: čhera, phraljen, phenjen, dajen, čhaven hem njive – uzalo adava ka ovel hem progonime – a ko sveto savo avela, ka primini o večno dživdipe. 
\v 31 Ali, but okola kolai akana prva tegani ka oven zadnja, a okola kolen akate dikhena sar zadnjonen adari ka oven prva.”
\s O Isus trito puti vaćeri ple meribnastar
\p
\v 32 Kad lelje te džan dromeja nakoro Jerusalim, o Isus džala ine anglo lende. O učenici inele začudime so džala ko Jerusalim, a okolen so džana ine palo lende uklinđa i dar.
\p Tegani o Isus palem cidinđa ki strana e dešu duje apostolen, i lelja te vaćeri lenđe adalestar so ka ovel oleja: 
\v 33 “Ače, đerdinaja ko Jerusalim. Adari man, e Čhave e manušesere, o manuša ka den ko šerutne sveštenici hem ko učitelja e Zakonestar, hem on ka osudinen man ko meriba. Tegani ka den man ko manuša kola nane Jevreja 
\v 34 hem on ka maren muj mancar, ka čhungaren man, ka šibinen man hem ka mudaren man, a me palo trin dive ka uštav taro mule.”
\s Najbaroi okova kova kandela
\p
\v 35 Tegani uzalo Isus ale o Jakov hem o Jovan, e Zevedejesere čhave, hem phende lese: “Učitelju, mangaja te ćere amenđe so god ka roda tutar.”
\p
\v 36 A ov pučlja len: “So mangena te ćerav tumenđe?”
\p
\v 37 I on phende: “Muk amenđe, kad ka ove ani ti slava, te beša ko počasna thana uzala tute – jekh oti desno strana, a o dujto oti levo.”
\p
\v 38 A o Isus phenđa lenđe: “Na džanen so rodena. Šaj li te pijen tari čaša savatar me pijava ili te krstinen tumen krstibnaja saveja me krstinava man?”
\p
\v 39 A on phende lese: “Šaj.”
\p Tegani o Isus phenđa: “Oja, ka patinen ađahar so ka pijen tari mli čaša hem so ka krstinen tumen krstibnaja saveja me krstinava man, 
\v 40 ali nane mlo te vaćerav ko ka bešel maje oti desno ili oti levo strana. Adalai thana okolenđe kolenđei spremime.”
\p
\v 41 Kad šunde adava avera deš apostolja, holjande upro Jakov hem upro Jovan.
\p
\v 42 Tegani o Isus vičinđa len kora peste hem phenđa: “Džanen da okola kola pes dikhena sar vladaren avere nacijengere, gospodarinena olencar, hem lengere bare manuša vladinena upro lende. 
\v 43 Ali, ma te ovel ađahar maškar tumende. Nego, ko mangela te ovel baro maškar tumende, nek ovel tumenđe sluga. 
\v 44 Ko mangela te ovel prvo maškar tumende, nek ovel sarijenđe robo. 
\v 45 Adalese so ni o Čhavo e manušesoro na alo te kanden le, nego te kandel hem te del plo dživdipe sar otkup butenđe.”
\s O Isus sasljari e korore prosjako ano Jerihon
\p
\v 46 I ađahar resle ani diz Jerihon. I sar o Isus ple učenikonencar hem bute narodoja ikljola ine taro Jerihon, uzalo drom bešela ine o kororo, o Vartimej (so značini “čhavo e Timejesoro”) hem prosini. 
\v 47 Kad šunđa so nakhela o Isus o Nazarećanin, vičinđa: “Isuse, čhaveja Davidesereja, smilujin tut maje!”
\p
\v 48 But džene vičinde upro lese te traini, ali ov po zorale vičinđa: “Čhaveja Davidesereja, smilujin tut maje!”
\p
\v 49 O Isus terdino hem phenđa: “Vičinen le.” I on vičinde e korore vaćerindoj: “Ma dara! Ušti, o Isus vičini tut!”
\p
\v 50 A ov frdinđa pestar plo ogrtači, ripinđa ko pre hem alo koro Isus.
\p
\v 51 I o Isus pučlja le: “So mangeja te ćerav će?”
\p A o kororo phenđa: “Učitelju, mangava te dikhav.”
\p
\v 52 A o Isus phenđa lese: “Dža. Ti vera sasljarđa tut.”
\p I o manuš otojekhvar dikhlja hem lelja te džal dromeja palo Isus.
\c 11
\s O manuša ano Jerusalim dena čast e Isusese sar carose
\p
\v 1 Kad o Isus hem lesere učenici ale paše uzali diz Jerusalim hem resle uzalo gava Vitfaga hem Vitanija ki e Maslinakiri gora, bičhalđa anglal duje učenikonen, 
\v 2 vaćerindoj lenđe: “Džan ko adava gav savoi angla tumende. I so ka đerdinen, ka arakhen phandle terne here upro saveste pana nijekh manuš na beštino. Phraven le hem anen le akari. 
\v 3 Te neko pučlja tumen: ‘Sose ćerena adava?’, phenen lese: ‘E Gospodese valjani, ali sigate ka irini le palal.’ ”
\p
\v 4 I on džele hem arakhle e terne here phandle ko udar, avri ko drom, i phravde le.
\p
\v 5 A nesave manuša kola terdine adari pučle len: “Sose phravena e terne here?”
\p
\v 6 On phende lenđe ađahar sar so o Isus sikavđa len, i o manuša mukle len. 
\v 7 I ande e terne here anglo Isus. Čhivde pumare fostanja upro her, i o Isus beštino upro leste.
\p
\v 8 But manuša buljarena ine pumare fostanja upro drom anglo leste, a nesave manuša buljarena ine o granke save čhinde ko polje. 
\v 9 O manuša kola džele anglo leste hem palo leste vičinena ine:
\q1 “‘Hosana!
\q2 Blagoslovimei okova kova avela ano anav e Gospodesoro!’
\b
\q1
\v 10 Blagoslovimei o carstvo amare pradadesoro e Davidesoro, savo avela!
\q2 ‘Hosana e Devlese ko učipe!’”
\b
\p
\v 11 I o Isus đerdinđa ano Jerusalim, i dželo ko Hram hem sa dikhlja uzala peste. Ali, adalese so već lelja te perel i rat, lelja te džal ple dešu duje apostolencar ki Vitanija.
\s O Isus prokletini e smokvakere kašte
\p
\v 12 Tejsato dive, kad iklile tari Vitanija, o Isus bokhalilo. 
\v 13 I odural dikhlja e smokvakere kašte savoi pherdo listija, i dželo nakoro leste sar te arakhi nešto upro leste. Ali, kad alo đi o kaš, na arakhlja upro leste ništa sem listija, adalese so na inele vreme zako bijandipe e smokvakoro.
\p
\v 14 Tegani phenđa e kaštese: “Nikad više o manuša te na han to plod!” A adava šunde hem lesere učenici.
\s O Isus na mukela te biknel pe ano Hram
\p
\v 15 Kad resle ko Jerusalim, o Isus đerdinđa ano boro e Hramesoro hem lelja te ispudini adathar okolen so biknena hem so činena hem peravđa o astalja okolengere so menjinena o pare hem o klupe okolengere so biknena goluben. 
\v 16 Nikase na muklja maškaro boro e Hramesoro te akhari bilo so zako bikniba.
\p
\v 17 I lelja te sikaj len, vaćerindoj: “Nane li pisime ano Sveto lil: ‘O čher mlo ka vičini pe čher zaki molitva zako sa o nacije’? A tumen ćerđen olestar ‘than kote čedena pe o čora!’”
\p
\v 18 Kad šunde adava o šerutne sveštenici hem o učitelja e Zakonestar, lelje te roden sar te ćeren o Isus te ovel mudardo, adalese so darandile olestar so sa o narodo divinđa pe lesere sikavibnaja.
\p
\v 19 Kad peli i rat, o Isus hem lesere učenici iklile tari diz.
\s Prekali šuki smokva, o Isus sikaj e učenikonen te ovel len vera
\p
\v 20 A sabajle, sar nakhena ine o Isus hem lesere učenici, dikhle so okova kaš e smokvakoro taro koreno šućilo.
\p
\v 21 O Petar setinđa pe hem phenđa e Isusese: “Učitelju, dikh! Šućilo o kaš e smokvakoro save prokletinđan!”
\p
\v 22 O Isus phenđa lenđe: “Nek ovel tumen vera ano Devel! 
\v 23 Čače vaćerava tumenđe, te neko vaćeri akala goraće: ‘Ikal tut hem frde tut ano more!’, a na sumnjini ano plo vilo, nego verujini da ka ovel ađahar sar so vaćeri, ka ovel lese adava. 
\v 24 Adalese vaćerava tumenđe: zako sa so molinena hem so rodena, verujinen da ka priminen, i ka ovel tumenđe adava. 
\v 25 Hem kad terđovena te molinen tumen, oprostinen te isi tumen nešto protiv nekaste, te šaj hem tumaro Dad, kovai ano nebo, te oprostini tumare grehija.”
\p
\v 26 [Ali, tumen te na oprostinđen, ni tumenđe tumaro Dad, kovai ano nebo, naka oprostini tumare grehija.]
\s E Jevrejengere vođe na verujinena da o Devel dinđa autoritet e Isuse
\p
\v 27 I palem o Isus hem lesere učenici ale ano Jerusalim. Sar o Isus nakhela ine maškaro boro e Hramesoro, ale koro leste o šerutne sveštenici, o učitelja e Zakonestar hem o starešine 
\v 28 hem pučle le: “Kotar tuće autoritet te ćere akava? Ko dinđa tut pravo?”
\p
\v 29 O Isus phenđa lenđe: “Hem me tumen ka pučav nešto, i te phenđen maje, hem me tumenđe ka phenav kotar maje pravo te ćerav akava. 
\v 30 Ko dinđa pravo e Jovane te krstini e manušen, o Devel kovai ano nebo ili o manuša? Phenen maje.”
\p
\v 31 I on raspravinde pe maškara pumende vaćerindoj: “Te phenđam ‘o Devel kovai ano nebo’, ov ka pučel amen sose onda na verujinđam lese. 
\v 32 A te phena ‘o manuša…’?” Ali darandile e narodostar, adalese so sare dikhle e Jovane sar čačikane proroko.
\p
\v 33 Adalese phende e Isusese: “Na džanaja.”
\p I ov phenđa lenđe: “Ni me onda naka phenav tumenđe kotar maje pravo akava te ćerav.”
\c 12
\s I priča oto bišukar vinogradarija
\p
\v 1 Tegani o Isus lelja te vaćeri lenđe ano priče, sar soi akaja: “Nesavo manuš sadinđa vinograd, ogradinđa le, handlja ano leste than zako pritiskiba i drakh hem vazdinđa e stražakiri kula. Tegani iznajminđa le nesave vinogradarenđe hem dželo ki aver phuv. 
\v 2 I kad alo o vreme te čeden pe o drakha, bičhalđa e sluga koro vinogradarija te šaj lel plo deo oto bijandipe e drakhakoro. 
\v 3 Ali o vinogradarija dolinde le, marde le hem bičhalde le palal čuče vastencar. 
\v 4 Ov palem bičhalđa lenđe avere sluga, a on pharavde lesoro šero hem lađarde le. 
\v 5 Bičhalđa lenđe hem e tritone sluga, ali ole mudarde. Hem pana buten bičhalđa lenđe, a o vinogradarija jekhen marde, a averen mudarde.
\p
\v 6 Ačhilo lese samo pana jekh: lesoro manglo čhavo. Ko kraj bičhalđa hem ole, vaćerindoj: ‘Mle čhave ka poštujinen.’
\p
\v 7 Ali o vinogradarija vaćerde maškar pumende: ‘Akavai o nasledniko. Hajde te mudara le hem amenđe te ačhol o nasledstvo.’ 
\v 8 I dolinde le, mudarde le hem frdinde le avri taro vinograd.
\p
\v 9 So mislinena, so ka ćerel o gospodari e vinogradesoro? Ka avel hem ka mudari adale vinogradaren, a o vinograd ka iznajmini averenđe.
\p
\v 10 Na čitinđen li akava ano Sveto lil:
\b
\q1 ‘O bar savo odbacinde o zidarija
\q2 ulo najbitno bar e čheresoro.
\q1
\v 11 Adava o Gospod ćerđa
\q2 hem adava ćerela amen te ova zadivime’?”
\b
\p
\v 12 A e jevrejengere vođe dikhena ine sar te dolen e Isuse, adalese so džande da vaćerđa adaja priča protiv olende, ali darandile e narodostar. Adalese ačhavde le hem džele.
\s O fariseja hem o irodovci našti te dolen e Isuse ko bišukar lafi
\p
\v 13 I e jevrejengere vođe bičhalde koro Isus nesave farisejen hem e manušen kola podržinena e Irode te dolen e Isuse ko bišukar lafi. 
\v 14 On ale koro leste hem phende: “Učitelju, džanaja da vaćereja o čačipe hem na ićereja nikasiri strana, adalese so na dikheja koi kova, nego čačimase sikaveja o drom e Devlesoro. Vaćer amenđe so mislineja? Valjani li amen o Jevreja te da o porez e rimesere carose ili na? Te platina ili na?”
\p
\v 15 A o Isus džanđa soi on dujemujengere manuša, i phenđa lenđe: “Sose iskušinena man? Anen maje te dikhav i kovanica savaja platinena o porez.”
\p
\v 16 On dinde le denari, a ov pučlja len: “Kasiri slika hem kasoroi anav ki kovanica?”
\p A on phende: “E carosoro.”
\p
\v 17 Tegani o Isus phenđa lenđe: “Onda den soi e carosoro e carose, a soi e Devlesoro e Devlese.”
\p I on inele but zadivime lesere vaćeribnaja.
\s O sadukeja pučena e Isuse zako uštiba taro mule
\p
\v 18 Tegani ale koro Isus hem nesave sadukeja, kola vaćerena da nane uštiba taro mule, i pučle e Isuse: 
\v 19 “Učitelju, o Mojsije pisinđa amenđe so te ćerel o manuš te mulo lesoro phral kova pala peste ačhavđa romnja bizo čhave. Adava manuš valjani te lel ple phralesere romnja te šaj oj te bijani čhave kova ka ovel nasledniko e mulesoro.
\p
\v 20 Inele efta phralja. O prvo lelja romnja i mulo, a na ačhavđa pala peste čhaven. 
\v 21 O dujto phral lelja ple phralesere romnja, ali hem ov mulo, a na ačhavđa pala peste čhaven. Ađahar ulo hem e tritoneja. 
\v 22 I nijekh oto efta phralja na ačhavđa pala peste čhaven. Ko kraj muli hem i romni. 
\v 23 Kasiri onda romni oj ka ovel kad ka uštel pe taro mule, a inele dindi ko sa o efta phralja?”
\p
\v 24 O Isus phenđa lenđe: “Injen hovavde, adalese so na haljovena ni o Sveto lil ni e Devlesoro zoralipe. 
\v 25 Adalese so, kad ka ušten taro mule, o manuša ni ka len pe ni ka den pe, nego ka oven sar o anđelja ano nebo. 
\v 26 A zako uštiba taro mule, na čitinđen li ano Lil e Mojsijasoro kote pisini oto grmo savo ine thabljola, kad o Devel phenđa e Mojsijase: ‘Me injum o Devel e Avraamesoro, e Isaakesoro hem e Jakovesoro’ kola mule odavno? 
\v 27 A o Devel nane Devel e mulengoro, nego Devel e dživdengoro. But hovavdiljen.”
\s O najbare naredbei te mangel pe e Devle hem e pašutne
\p
\v 28 Tegani alo jekh učitelj e Zakonestar, kova šunđa lengiri rasprava. Dikhlja so o Isus šukar phenđa lenđe, i pučlja le: “Oto sa o naredbe, savi najbari?”
\p
\v 29 O Isus phenđa: “Akajai najbari:
\q1 ‘Šun, Izraele! O Gospod, amaro Devel, samoi ov Gospod! 
\v 30 Mang e Gospode te Devle, sa te vileja, sa te dušaja, sa te gođaja hem sa te zoralipnaja.’
\p
\v 31 A i dujtoi:
\q1 ‘Mang te pašutne sar korkore tut.’
\p Nane po bare naredbe akalendar.”
\p
\v 32 O učitelj e Zakonestar phenđa: “Šukar phenđan, učitelju. U pravu injan kad pheneja dai samo ov Gospod hem da nane avera sem leste. 
\v 33 Te mangel pe ole taro sa o vilo, tari sa i godi hem taro sa o zoralipe, hem te mangel pe e pašutne sar korkore pes po bitnoi taro sa o žrtve save tharena pe hem taro avera žrtve.”
\p
\v 34 I dikhindoj so šukar vaćeri, o Isus phenđa lese: “Na injan dur taro carstvo e Devlesoro.”
\p I nijekh više na tromandilo te pučel le nešto.
\s O Hrist po baroi e carostar e Davidestar
\p
\v 35 Sar sikaj ine e manušen ano Hram, o Isus pučlja: “Sar šaj o učitelja e Zakonestar te vaćeren dai o Hrist samo e Davidesoro čhavo? 
\v 36 Korkoro o David, ano Sveto Duho, phenđa:
\b
\q1 ‘O Gospod phenđa mle Gospodese:
\q1 Beš ko počasno than, oti mli desno strana,
\q2 đikote na pašljarava te neprijateljen talo te pre!’
\b
\p
\v 37 Korkoro o David vičini le ‘Gospode’. Sar šaj onda o Hrist te ovel samo lesoro čhavo?” A but džene oduševime šunena le ine.
\s O Isus upozorini ple učenikonen upro učitelja e Zakonestar
\p
\v 38 I sar sikaj len ine, o Isus phenđa: “Arakhen tumen e učiteljendar e Zakonestar! On volinena te phiren urjavde ano skupa fostanja, hem te pozdravinen len o manuša ko trgija. 
\v 39 Volinena te bešen ko anglune thana ano sinagoge hem ko najšukar thana ko gozbe. 
\v 40 Hana o imanje e udovicengoro hem ćerena pe dai pobožna ađahar so molinena bare molitve. On ka oven po zorale kaznime nego avera manuša.”
\s I čorori udovica dela sa so isi la
\p
\v 41 I o Isus beštino uzali e hramesiri kutija zako čediba hem lelja te dikhel sar o manuša čhivena ano late pare. I but barvale manuša čhivde but pare. 
\v 42 Ali hem jekh čorori udovica hem čhivđa samo duj najtikore kovanice, save but hari vredinde.
\p
\v 43 Tegani o Isus vičinđa kora peste ple učenikonen hem phenđa lenđe: “Čače vaćerava tumenđe, akaja čorori udovica čhivđa više sarijendar kola čhivde pare ani kutija zako čediba. 
\v 44 Adalese so sare on dinde oto buderi so isi len, a oj, kojai čorori, dinđa sa so inola zako živiba.”
\c 13
\s O Hram ka ovel peravdo hem o znakija oto bare nevolje
\p
\v 1 Sar o Isus ikljola ine taro Hram, jekh lesere učenikonendar phenđa lese: “Učitelju, dikh! Soi bare bara hem soi šuže građevine!”
\p
\v 2 A o Isus phenđa lese: “Dikheja li akala bare građevine? Olendar naka ačhol ni bar upro bar. Đijekh ka ovel peravdo.”
\p
\v 3 I sar o Isus bešela ine ki e Maslinakiri gora, kotar šaj te dikhel pe o Hram, o Petar, o Jakov, o Jovan hem o Andreja inele korkore oleja hem pučle le: 
\v 4 “Vaćer amenđe, kad adava ka ovel hem savo ka ovel o znako da sa adava ka pherđol?”
\p
\v 5 I o Isus lelja te vaćeri lenđe: “Dikhen te na oven hovavde nekastar. 
\v 6 But džene ka aven ano mlo anav vaćerindoj: ‘Me injum o Hrist’ hem buten ka hovaven. 
\v 7 A kad šunena da ovena mariba hem da vaćeri pe e maribnastar, ma te daran. Adalese so prvo adava valjani te ovel, ali adava pana nane kraj. 
\v 8 Adalese so ka uštel jekh nacija upri aver nacija hem jekh carstvo upro aver carstvo. Ko but thana ka oven zemljotresija, hem ka ovel bokhalipe. Adavai samo o anglunipe e bijandipnasere mukengoro.
\p
\v 9 A tumen arakhen tumen! Ka legaren tumen ko sudo hem ka maren tumen ano sinagoge. Ka terđoven anglo vladarija hem anglo carija adalese so injen mle učenici. Adava ka ovel te šaj svedočinen lenđe mandar. 
\v 10 O Šukar lafi najangle valjani te vaćeri pe sa e nacijenđe. 
\v 11 A kad ka dolen tumen te legaren tumen ko sudo, ma angleder brininen tumen so valjani te vaćeren, nego tegani ka del pe tumenđe so te vaćeren. Adalese so naka vaćeren tumen, nego o Sveto Duho.
\p
\v 12 O phral e phrale ka del te mudaren le, a o dad e čhave. O čhave ka ušten upro pumare dada hem daja hem ka ćeren lenđe te oven mudarde. 
\v 13 Sare ka mrzinen tumen adalese so injen mle učenici. Ali kova ačhola verno đi o kraj, ka ovel spasime.
\p
\v 14 A kad ka dikhen da o ‘gadost savo anela uništenje’ terđola adari kaj nane lesoro than (ko akava čitini, nek haljol), tegani okola kola živinena ani e judejakiri regija nek našen ko gore. 
\v 15 Ko ka ovel upro čher, ma te huljel te đerdini te lel nešto taro čher! 
\v 16 Ko ka ovel ki njiva, ma te irini pe čhere te lel plo fostani! 
\v 17 Pharo ka ovel e khamnjenđe hem okolenđe kola dena čuči ko adala dive! 
\v 18 Molinen tumen o našiba te na ovel ko jevend, 
\v 19 adalese so adala dive ka ovel bari nevolja savi na inele taro anglunipe, kad o Devel ćerđa i phuv, đi akana, ni nikad palo adava naka ovel. 
\v 20 I te na skratini ine o Gospod o broj adale divengoro, sare ka meren ine. Ali zbog o birime kolen o Devel birinđa, odlučinđa te skratini adala dive.
\p
\v 21 Te phenđa tumenđe neko tegani: ‘Ače akatei o Hrist’, ili ‘Eče adari’, ma verujinen. 
\v 22 Adalese so ka ikljoven hovavne hristija hem hovavne proroci hem ka ćeren znakija hem čudesija sar, te šaj ine, te hovaven hem e Devlesere birimen. 
\v 23 A tumen arakhen tumen! Sa vaćerđum tumenđe angleder o vreme.”
\s O znakija save ka mothoven e Isusesoro aviba
\p
\v 24 “A ko adala dive, palo adala nevolje,
\q1 ‘o kham ka kaljol
\q1 hem o masek naka sijajini,
\q1
\v 25 o čerenja ka peren taro nebo
\q1 hem o zoralipa e nebosere ka oven potresime’.
\p
\v 26 Tegani o manuša ka dikhen man, e Čhave e manušesere, sar avava upro oblaci ano baro zoralipe hem ani slava. 
\v 27 Hem tegani ka bičhalav mle anđelen te čeden mle birimen taro sa o štar strane e phuvjakere, taro krajo e phuvjakoro đi o krajo e nebosoro.
\p
\v 28 A oti smokva sikljoven akava: Kad lakere granke zrelonena hem ikljona listija upro lende, džanena dai paše o linaj. 
\v 29 Ađahar hem tumen kad dikhena da ovela sa adava, te džanen dai adava vreme paše, dai anglo udar. 
\v 30 Čače vaćerava tumenđe, akaja generacija naka nakhel đikote sa adava na ovela. 
\v 31 O nebo hem i phuv ka nakhen, ali mle lafija nikad naka nakhen.”
\s Oven uvek spremna zako e Isusesoro aviba
\p
\v 32 “A niko na džanel adava dive ili adava sati kad adava ka ovel. Na džanen ni o anđelja ko nebo ni o Čhavo. Džanel samo o Dad. 
\v 33 Džangale pazinen, adalese so na džanen kad adava vreme ka avel. 
\v 34 Adavai sar kad jekh manuš lela te džal ko drom: ačhaj o čher, dela autoritet e slugenđe hem đijekhese dela te ćeren lesiri buti, a e stražarese naredini džangale te pazini. 
\v 35 Adalese džangale pazinen, adalese so na džanen kad o gospodari e čheresoro ka avel – angli rat, ki ekvaš i rat, anglo disljojba kad o bašne đilabena ili sabajle – 
\v 36 te na avel otojekhvar hem te arakhel tumen sar sovena.
\p
\v 37 A adava so phenava tumenđe, phenava sarijenđe: džangale pazinen!”
\c 14
\s E jevrejengere vođe dogovorinena pe te mudaren e Isuse
\p
\v 1 Inele pana duj dive đi i Pasha hem o Prazniko e bikvascone marengoro. O šerutne sveštenici hem o učitelja e Zakonestar rodena ine ko hovavne te dolen e Isuse sar te ćeren te ovel mudardo. 
\v 2 Ali phende: “Naka ćera adava zako vreme e praznikosoro, te na pobunini pe o narodo.”
\s O Isus pomazime ani Vitanija
\p
\v 3 A o Isus inele ano gav Vitanija, ano čher e Simonesoro e Gubavcosoro. I sar inele uzalo astali, ali koro leste jekh đuvli e čareja, savo inele ćerdo oto šužo bar, ano savo inele skupo mirisno ulje oto čisto nard, i phaglja o bokali hem čhorđa o ulje upro lesoro šero.
\p
\v 4 I nesave manuša kola inele adari lelje te holjanen, vaćerindoj jekh averese: “Sose ađahar bespotrebno čhorela pe o skupo miris? 
\v 5 Adava ulje šaj ine te biknel pe zaki jekhe beršesiri plata, i o pare te den pe e čororenđe.”
\p I holjame vičinde upro late.
\p
\v 6 Ali o Isus phenđa: “Muken la! Sose uznemirinena la? Oj ćerđa maje šukaripe. 
\v 7 Adalese so, o čorore manuša uvek ka oven uzala tumende hem šaj te pomožinen lenđe kad god mangena, a me naka ovav uvek tumencar. 
\v 8 Oj ćerđa so šaj ine. Angleder makhlja mlo telo, te pripremini man zako paruniba. 
\v 9 Čače vaćerava tumenđe, kaj god, ki sa i phuv, ka vaćeri pe o Šukar lafi, ka vaćeri pe hem akalestar so oj ćerđa, sar setiba olatar.”
\s O Juda dogovorini pe te izdajini e Isuse
\p
\v 10 Tegani o Juda Iskariot, jekh oto dešu duj apostolja, dželo koro šerutne sveštenici te dogovorini pe olencar te izdajini lenđe e Isuse. 
\v 11 A on, kad šunde adava, ule radosna hem dinde lese pumaro lafi da ka den le pare, i ov lelja te rodel šukar prilika te izdajini e Isuse.
\s O Isus bičhali duje učenikonen ko Jerusalim te pripreminen i Pasha
\p
\v 12 Ko prvo dive oto Prazniko e bikvascone marengoro, kad čhinela pe bakrore zaki Pasha, o učenici pučle e Isuse: “Kaj mangeja te dža te ćera će te ha e pashakoro hajba?”
\p
\v 13 I o Isus bičhalđa dujen ple učenikonendar vaćerindoj lenđe: “Džan ki diz hem adari ka resel tumen jekh manuš kova akhari pani ano khoro. Džan palo leste. 
\v 14 Ko čher ko savo ka đerdini roden e čherutne hem vaćeren lese: ‘O učitelj pučela ki savi soba šaj te hal e pashakoro hajba ple učenikonencar?’ 
\v 15 I ov ka mothoj tumenđe i bari upruni soba savi već pripremime. Adari ćeren amenđe zako hajba.”
\p
\v 16 I o učenici džele ki diz hem arakhle sa ađahar sar so phenđa lenđe o Isus, i adari ćerde zako hajba e pashakoro.
\s O Isus džanel so o Juda ka izdajini le
\p
\v 17 Kad peli i rat, o Isus dželo adari ple dešu duje apostolencar.
\p
\v 18 I sar hana ine uzalo astali, o Isus phenđa lenđe: “Čače vaćerava tumenđe, jekh tumendar, kova akana hala mancar, ka izdajini man!”
\p
\v 19 On but rastužisale, i lelje jekh palo avereste te pučen le: “Te na injum me adava?”
\p
\v 20 A ov phenđa lenđe: “Adavai jekh tumendar, e dešu duje apostolendar, kova mancar macini o maro ano čaro. 
\v 21 Adalese so, me, o Čhavo e manušesoro, valjani te merav sar so pisini ano Sveto lil, ali jao okole manušese kova ka izdajini man! Po šukar ka ovel lese ine te na ovel ine bijando!”
\s O Isus hala i poslednjo večera e učenikonencar
\p
\v 22 Sar hana ine, o Isus lelja o maro, zahvalinđa e Devlese hem phaglja le, i dinđa le e apostolenđe, vaćerindoj: “Len! Akavai mlo telo.”
\p
\v 23 Tegani lelja i čaša e moljaja, zahvalinđa e Devlese hem dinđa la olenđe, i sare pile olatar.
\p
\v 24 I phenđa lenđe: “Akavai mlo rat, o rat oto savez, savo čhorela pe butenđe. 
\v 25 Čače vaćerava tumenđe: naka pijav više mol sa đi o dive kad ka pijav i nevi mol ano carstvo e Devlesoro.”
\p
\v 26 Tegani đilabde psalmija, i džele ki e Maslinakiri gora.
\s O Isus džanel so o Petar hem o avera učenici ka ačhaven le
\p
\v 27 I o Isus phenđa lenđe: “Sare ka ačhaven man, adalese soi pisime ano Sveto lil:
\q1 ‘Ka mudarav e pastire,
\q1 hem o bakre ka našen.’
\p
\v 28 Ali kad ka uštav taro mule, ka džav angla tumende ki Galileja.”
\p
\v 29 A o Petar phenđa lese: “I sare te ačhavde tut, me naka ačhavav tut!”
\p
\v 30 O Isus phenđa lese: “Čače vaćerava će, pana ki akaja rat, angleder so o bašno duj puti ka đilabi, trin puti ka hovave da na pendžareja man.”
\p
\v 31 Ali o Petar po zorale vaćeri ine: “Naka ćerav adava, čak hem te valjani te merav tuja!”
\p I ađahar vaćerde sa o učenici.
\s O Isus molini pe ani Getsimanija
\p
\v 32 Tegani džele ko than vičime Getsimanija. I o Isus phenđa ple učenikonenđe: “Bešen akate đikote me molinav man!” 
\v 33 Peja lelja e Petre, e Jakove hem e Jovane. Uklinđa le baro nemir hem pharipe, 
\v 34 i phenđa lenđe: “Edobor injum žalosno da mlo vilo ka pharjol! Ačhoven akate hem džangale pazinen.”
\p
\v 35 I dželo hari po dur, pelo mujeja đi phuv hem molinđa pe e Devlese, te šaj, te cidel lestar o pharo vreme savo adžićeri le.
\p
\v 36 Phenđa: “Abba! Dade! Tu sa šaj. Cide akaja čaša e patnjaja mandar. Ali, nek ovel pali ti volja, a na pali mli.”
\p
\v 37 Tegani irinđa pe koro učenici hem arakhlja len sar sovena, i phenđa e Petrese: “Simone, tu li soveja? Našti li ine ni jekh sati džangale te pazine? 
\v 38 Džangale pazinen hem molinen tumen te na peren ko iskušenje. O duho mangela te ćerel okova soi šukar, ali o teloi bizoralo.”
\p
\v 39 I palem dželo hem molinđa pe, vaćerindoj ista lafija. 
\v 40 I palem, kad irinđa pe, arakhlja len sar sovena adalese so phandljona ine lengere jaćha, i na džande so te phenen lese.
\p
\v 41 Kad o trito puti irinđa pe, phenđa lenđe: “Pana li sovena hem odmorinena? Šukari više! Alo o sati! Ače, me, o Čhavo e manušesoro, ka ovav dindo ko vasta e grešnikonengere. 
\v 42 Ušten! Hajde! Ače mlo izdajniko avela.”
\s O Isus izdajime hem dolime
\p
\v 43 I sar pana o Isus vaćeri ine adava, reslo o Juda, jekh e dešu duje apostolendar, hem oleja, e mačencar hem e kaštencar, but manuša kolen bičhalde o šerutne sveštenici, o učitelja e Zakonestar hem o starešine. 
\v 44 A o Juda, lesoro izdajniko, pana angleder dinđa len znako vaćerindoj: “Kas ka čumudinav – ovi adava. Ole dolen hem legaren le tali straža.”
\p
\v 45 I so alo đi o Isus, phenđa: “Učitelju”, hem čumudinđa le ki čham.
\p
\v 46 Tegani o manuša dolinde le hem phandle le. 
\v 47 A jekh okolendar, kola inele adari uzalo Isus, ikalđa o mači, hem khuvđa oleja e prvosveštenikosere sluga hem čhinđa lesoro kan.
\p
\v 48 O Isus phenđa lenđe: “Mačencar hem kaštencar aljen pala mande te dolen man, sar palo pobunjeniko. 
\v 49 Divencar injumle tumencar ano Hram hem sikavđum e narodo, ali na dolinđen man. Ali ađahar ulo sar te pherđol okova soi mandar pisime ano Sveto lil.”
\p
\v 50 Tegani sa o učenici ačhavde le hem našle.
\p
\v 51 A palo leste džala ine jekh terno čhavo, učhardo skupone čaršaveja upro nango telo. Hem ole dolinde, 
\v 52 ali ov tegani muklja o čaršavi hem nango našlo olendar.
\s E verakere hem e narodosere vođe rodena krivica upro Isus
\p
\v 53 I legarde e Isuse koro prvosvešteniko, i čedinde pe sa o šerutne sveštenici, o starešine hem o učitelja e Zakonestar. 
\v 54 A o Petar odural džala ine palo Isus sa đi ko boro e prvosveštenikosoro, i adari bešlo e slugencar hem tačola ine uzali jag.
\p
\v 55 A o šerutne sveštenici hem sa o sabor rodena ine nesavo svedočiba protiv o Isus sar te šaj ćeren te ovel mudardo, ali našti ine te arakhen le. 
\v 56 A but džene svedočinena ine hovavne protiv oleste, ali lengoro vaćeriba na inele sar jekh.
\p
\v 57 Tegani nesave svedoci uštine, i hovavne svedočinde protiv oleste vaćerindoj: 
\v 58 “Šunđam le sar vaćeri: ‘Ka peravav akava Hram savoi ćerdo e manušengere vastencar, hem zako trin dive ka vazdav aver, savo naka ovel ćerdo e manušengere vastencar.’ ”
\p
\v 59 Ali ni adava lengoro vaćeriba na inele sar jekh.
\p
\v 60 Tegani o prvosvešteniko uštino, terdino ko maškar, hem pučlja e Isuse: “Tut li nane so te phene ko akava so vaćerde protiv tute?”
\p
\v 61 A o Isus trainđa hem ništa na vaćerđa. Tegani o prvosvešteniko pučlja le: “Tu li injan o Hrist, o Čhavo e Blagoslovime Devlesoro?”
\p
\v 62 O Isus phenđa: “Oja, me injum. Hem ka dikhen man, e Čhave e manušesere, sar bešava ko počasno than, oti desno strana e Najzorale Devlesiri hem sar avava upro oblaci e nebosere.”
\p
\v 63 Ko adava o prvosvešteniko pharavđa ple šeja oti holi hem phenđa: “Na valjani amenđe više svedoci! 
\v 64 Šunđen sar hulinđa upro Devel! So mislinena?”
\p I sarijengiri osuda inele da zaslužini te merel.
\p
\v 65 Tegani nesave lelje te čhungaren le, te učharen lesere jaćha hem te khuven le dumukhencar, vaćerindoj lese: “Prorokujin ko khuvđa tut!”
\p Palo adava o sluge lelje e Isuse hem khuvena le ine šamarke.
\s O Petar odreknini pe e Isusestar
\p
\v 66 I sar o Petar inele tele ano boro, adari ali jekh sluškinja e prvosveštenikosiri. 
\v 67 Oj dikhlja e Petre sar tačola uzali jag, i po šukar dikhlja ano leste hem phenđa: “Hem tu injanle adale Nazarećanineja, e Isuseja!”
\p
\v 68 A o Petar hovavđa vaćerindoj: “Ni džanava, ni haljovava sostar vaćereja!” I dželo nakori kapija e borosiri. A o bašno đilabđa.
\p
\v 69 Okoja sluškinja palem dikhlja le, i lelja te vaćeri okolenđe kola terđona ine adari: “Akavai manuš jekh olendar!” 
\v 70 A o Petar palem hovavđa da nane.
\p Na nakhlo but palo adava, okola kola terđona ine adari phende e Petrese: “Tu čače injan jekh olendar, adalese so hem tu injan Galilejco!”
\p
\v 71 A ov lelja te vičini prokletstvija upra peste hem te hal pe sovli: “Na pendžarava adale manuše kastar vaćerena!”
\p
\v 72 I odmah, palo dujto puti, o bašno đilabđa. Tegani o Petar setinđa pe e lafendar save o Isus phenđa lese: “Angleder so o bašno duj puti ka đilabi, trin puti ka hovave da na pendžareja man.” I lelja zorale te rovel.
\c 15
\s E jevrejengere vođe tužinena e Isuse ko Pilat
\p
\v 1 Odmah sabajle, o šerutne sveštenici, o starešine hem o učitelja e Zakonestar hem sa o sabor ande odluka, i phandle e Isuse, legarde le hem dinde le ko Pilat.
\p
\v 2 I o Pilat pučlja le: “Tu li injan o caro e Jevrejengoro?”
\p A o Isus phenđa: “Ađahari sar so pheneja.” 
\v 3 A o šerutne sveštenici lelje te tužinen le zako but so.
\p
\v 4 Tegani o Pilat palem pučlja le: “Tut li nane so te phene ko adava? Dikheja li zako so tut sa tužinena?”
\p
\v 5 Ali o Isus ništa na phenđa, i o Pilat but začudinđa pe.
\s O Pilat ćerela e narodosiri volja ađahar so osudini e Isuse ko meriba
\p
\v 6 A o Pilat ko prazniko Pasha mukela ine e narodose jekhe phandle Jevrejco kole on mangle. 
\v 7 Tegani ano phandlipe, e pobunjenikonencar kola mudarde ani pobuna, inele hem o manuš vičime Varava. 
\v 8 O narodo alo, i lelja te rodel e Pilatestar, palo lesoro adeti, te mukel lenđe jekhe phandle.
\p
\v 9 A o Pilat pučlja len: “Mangena li te mukav tumenđe e jevrejengere caro?” 
\v 10 Adalese so džanđa so o šerutne sveštenici e Isuse predinde tari zavist. 
\v 11 Ali o šerutne sveštenici pherde e narodo te roden te mukel lenđe e Varava, umesto e Isuse.
\p
\v 12 A o Pilat palem pučlja len: “A so mangena te ćerav akaleja kole vičinena caro e jevrejengoro?”
\p
\v 13 A on vičinde: “Čhiv le ko krsto!”
\p
\v 14 A o Pilat pučlja len: “A savo bišukaripe ćerđa?”
\p Ali on pana po zorale vičinde: “Čhiv le ko krsto!”
\p
\v 15 I o Pilat, mangindoj te ćerel e narodosiri volja, muklja lenđe e Varava, a e Isuse dinđa ko vojnici te šibinen le hem palo adava te čhiven le ko krsto.
\s O vojnici marena muj e Isuseja
\p
\v 16 I o vojnici legarde e Isuse ki e Pilatesiri palata, ko Pretorijum, i čedinde sa i četa e vojnikonendar. 
\v 17 Urjavde le ano lolo ogrtači, ćerde kruna oto kare hem čhivde lese ko šero, 
\v 18 i lelje te maren muj oleja vaćerindoj: “Te ove sasto e jevrejengere carona!” 
\v 19 I khuvena le ine e trskaja ko šero, čhungarena le ine hem perena anglo leste ko kočija sar te ćeren pe da slavinena le. 
\v 20 I palo adava so marde muj oleja, huljavde lestar o lolo ogrtači, hem urjavde le lesere šeja, i legarde le avri te čhiven le ko krsto.
\s E Isuse čhivena ko krsto
\p
\v 21 A jekhe manuše, e Simone tari Kirinija, e Aleksandresere hem e Rufesere dade, kova nakhela ine adathar irindoj taro polje, terinde le te akhari e Isusesoro krsto. 
\v 22 I ande e Isuse ko than vičime Golgota – so značini “Kokalo e šeresoro.” 
\v 23 I kaninde le mol mešime e smirnaja zbog o dukha, ali ov na manglja te pijel. 
\v 24 I kad čhivde le ko krsto, delinde maškara pumende lesere šeja ađahar so frdinde barbuti olenđe, te dikhen ko so ka lel.
\p
\v 25 Kad čhivde le ko krsto, inele enja o sati sabajle. 
\v 26 Upreder lesoro šero terdino znako kote inele pisime lesiri krivica: \sc O Caro e Jevrejengoro \sc*. 
\v 27 Oleja čhivde ko avera krstija hem duje pobunjenikonen, jekhe oti lesiri desno, a e dujtone oti lesiri levo strana. 
\v 28 [Ađahar pherdilo okova so terđola ano Sveto lil: “Dikhle le sar jekhe zločinco.”]
\p
\v 29 A okola kola nakhena ine adale dromeja vređinena le ine. Mrdinena ine šerencar, vaćerindoj: “Ej, tu kova peraveja o Hram hem vazdeja le zako trin dive, 
\v 30 spasin tut! Hulji taro krsto!”
\p
\v 31 Ađahar da marde muj oleja o šerutne sveštenici, zajedno e učiteljencar e Zakonestar, vaćerindoj jekh averese: “Averen spasinđa, a pes našti te spasini! 
\v 32 Ovi o Hrist, o caro e Izraelesoro! Nek huljel akana taro krsto te dikha, i ka verujina ano leste.”
\p A vređinena le ine hem okola kola inele čhivde ko krsto oleja.
\s E Isusesoro meriba
\p
\v 33 A ko ekvaš o dive, i tomina učharđa sa i phuv hem ađahar inele trin saća. 
\v 34 Ko trin o sati, o Isus vičinđa oto sa o glaso: “Eloi, Eloi, lema sabahtani?” (so značini: “Devla mleja, Devla mleja, sose ačhavđan man?”)
\p
\v 35 Kad adava šunde nesave okolendar kola terđona ine adari, phende: “Dikh, vičini e Ilija.”
\p
\v 36 A jekh olendar prastandilo hem čhivđa o sunđeri ani ušli mol, čhivđa le upri trska, hem dinđa e Isusese te pijel, vaćerindoj: “Adžićeren, te dikha ka avel li o Ilija te huljaj le!”
\p
\v 37 A o Isus vičinđa oto sa o glaso, i muklja pli duša.
\p
\v 38 Tegani e hramesiri zavesa pharavdili ko ekvaš, odupral natele.
\p
\v 39 A kad o kapetani, kova terdino anglo Isus, dikhlja le sar mulo, phenđa: “Čače akava manuš inele e Devlesoro Čhavo!”
\p
\v 40 A adari inele hem nesave đuvlja kola sa adava dikhena ine odural. Maškar olende inele i Marija Magdalena, i Marija, e terne Jakovesiri hem e Josijasiri daj, hem i Saloma – 
\v 41 kola džana ine palo Isus kad inele ani Galileja hem kandena le ine, hem pana but avera đuvlja kola oleja ale ano Jerusalim.
\s E Isusesoro paruniba
\p
\v 42 Kad lelja te raćol, adalese so inele Dive zako pripremiba – dive anglo savato, 
\v 43 o Josif tari diz Arimateja, kova inele ugledno člano oto e jevrejengoro sabor, kova hem korkoro adžićeri ine o carstvo e Devlesoro, bizi dar đerdinđa koro Pilat hem rodinđa te den le o telo e Isusesoro. 
\v 44 A o Pilat čudinđa pe so o Isus već mulo, i terinđa te vičinen koro leste e kapetane te pučel le čače li o Isus već mulo. 
\v 45 Kad o kapetani phenđa so čače o Isus mulo, o Pilat naredinđa te den o telo e Isusesoro ko Josif. 
\v 46 I o Josif činđa skupo čaršavi, huljavđa o telo e Isusesoro taro krsto, paćarđa le čaršaveja hem čhivđa le ano grobo savo inele ćerdo ani stena. Hem o udar e grobosoro phandlja e bare bareja. 
\v 47 A i Marija Magdalena hem i Marija e Josijasiri daj dikhena ine kaj čhivena lesoro telo.
\c 16
\s E Isusesoro uštiba taro mule
\p
\v 1 Kad nakhlo o savato, i Marija Magdalena, i Marija e Jakovesiri daj, hem i Saloma činde mirisija sar te šaj džan hem te makhen e Isusesoro telo. 
\v 2 I rano sabajle ko prvo dive oto kurko, kad o kham iklilo, lelje te džan ko grobo. 
\v 3 Odrumal pučena pe ine: “Ko ka cidel amenđe o bar taro udar e grobosoro?”
\p
\v 4 Ali kad resle, dikhle so o bar već inele cidime. A adava inele čače baro bar. 
\v 5 Kad đerdinde ko grobo, dikhle jekhe terne manuše ano parne šeja sar bešela oti desno strana, i darandile.
\p
\v 6 A ov phenđa lenđe: “Ma daran! Tumen rodena e Isuse e Nazarećanine, kova inele čhivdo ko krsto. Ov uštino taro mule hem nane akate. Ače o than kaj pašljarde lesoro telo. 
\v 7 Nego, džan hem vaćeren lesere učenikonenđe hem e Petrese: ‘Ov džala angla tumende ki Galileja. Adari ka dikhen le, sar so angleder phenđa tumenđe.’ ”
\p
\v 8 I o đuvlja iklile, i našle taro grobo, adalese so uklinđa len i dar hem lelje te tresinen. I nikase ništa na vaćerde, adalese so darandile.\f + \fr 16,8 \fr*\ft Nesave purane rukopisija oto e Markosoro evanđelje završinena pe e oftone stihoja. Nekobor rukopisija isi len kratko završetak, a but rukopisija isi len po baro završetak hem nekobor rukopisija isi len soduj završeci (savei mothovde akate). \ft*\f*
\s (Po kratko završetak oto Evanđelje e Markosoro)
\p [Ali na nakhlo but i on sa adava vaćerde e Petrese hem avere učenikonenđe. Palo adava korkoro o Isus bičhalđa len taro istok đi ko zapad te vaćeren o sveto hem o nepropadljivo lafi te šaj o manuša zauvek te oven spasime. Amen.]
\s (Po baro završetak oto Evanđelje e Markosoro)
\s O Isus mothoj pe e učenikonenđe
\p
\v 9 [Rano sabajle ko prvo dive oto kurko, kad o Isus uštino taro mule, najangle mothovđa pe e Marijaće e Magdalenaće, kolatar angleder ispudinđa ine efta demonen. 
\v 10 Oj dželi hem vaćerđa adava okolenđe kola inele oleja, a kola tugujinena ine hem rovena. 
\v 11 Kad on šunde dai o Isus dživdo hem so oj dikhlja le, na verujinde laće.
\p
\v 12 Palo adava o Isus, ko aver obličje, mothovđa pe anglo duj džene olendar sar džana ine ko jekh gav. 
\v 13 On pendžarde e Isuse hem irinde pe te vaćeren adava averenđe, ali ni olenđe na verujinde.
\p
\v 14 Palo adava, o Isus mothovđa pe anglo dešujekh učenici sar hana ine maro zajedno. I ukorinđa len so na inolen vera hem soi lengere vile steđime, adalese so na verujinde okolenđe kola dikhle le palo lesoro uštiba taro mule.
\s O Isus vaćeri e učenikonenđe so valjani te ćeren hem legarđola ko nebo
\p
\v 15 I phenđa lenđe: “Džan ko sa o sveto hem propovedinen o Šukar lafi sarijenđe. 
\v 16 Ko poverujini hem krstini pe, ka ovel spasime, a ko na poverujini, ka ovel osudime. 
\v 17 A akala znakija ka pratinen okolen kola verujinena: ano mlo anav ka ispudinen e demonen; ka vaćeren neve čhibjencar; 
\v 18 te dolinde sapen vastencar, hem te pile nešto otrovno, ništa naka ovel lenđe; ka čhiven pumare vasta upro namborme hem on ka sasljoven.”
\p
\v 19 Kad phenđa lenđe adava, o Gospod Isus legardilo ko nebo, hem beštino ko počasno than, oti desno strana e Devlesiri.
\p
\v 20 I o učenici džele ko sa o thana te propovedinen, a o Gospod pomožinđa lenđe hem potvrdini ine o Lafi znakonencar save pratinde le.]