\id JAS - Romani Arli Bible (RAB)
\ide UTF-8
\h Jakov
\toc1 O lil e Jakovesoro
\toc2 Jakov
\toc3 Jak
\mt O lil e Jakovesoro
\c 1
\s Uvod
\p
\v 1 Me, o Jakov, o sluga e Devlesoro hem e Gospodesoro e Isuse Hristesoro, pozdravinava o dešu duj plemija e Izraelesere kolai rasejime ko sa o sveto.
\s O iskušenja
\p
\v 2 Mle phraljalen, kad upra tumende avena o razna iskušenja, dikhen adava sar bari radost, 
\v 3 adalese so džanen da o proveriba tumara verakoro barjari tumari istrajnost. 
\v 4 A i istrajnost nek delujini ana tumende te šaj oven savršena hem potpuna, bizo nešto te falini tumenđe.
\p
\v 5 Te nekase falini mudrost, nek rodel la e Devlestar kova sarijenđe dela phravde vileja hem nikas na ukorini, hem ka del pe lese. 
\v 6 Ali nek rodel ani vera, bizi nisavi sumnja, adalese so okova kovai nestabilno sličnoi zako e moresoro talas save i barval vazdela hem legari tari jekh strana ki aver. 
\v 7 Esavko manuš ma te mislini da bilo so ka primini e Gospodestar, 
\v 8 adalese soi ko duj gođa hem nane stabilno ko sa so ćerela.
\p
\v 9 O čororo phral nek hvalini pe adaleja so o Devel povazdinđa le, 
\v 10 a o barvalo adaleja so ponizinđa le, adalese so ka nakhel sar i luludi ko polje. 
\v 11 Adalese so, kad o kham ikljola, ovela baro tatipe hem šućari i biljka, a i luludi olakiri otperela, i properela lakoro šužipe. Ađahar hem o barvalo ka nakhel sar džala palo ple buća.
\p
\v 12 Blago e manušese kova istrajini ani kušnja. Adalese so, kad ka nakhaj i kušnja, ka primini i kruna e dživdipnasiri sava o Devel obećinđa okolenđe kola mangena le.
\p
\v 13 Kad neko avela ano iskušenje, ma te phenel: “O Devel iskušini man”, adalese so o Devel našti te ovel iskušime bišukaripnaja, a ni ov korkoro nikas na iskušini. 
\v 14 Nego, đijekhe iskušini korkori olesiri požuda savi privucini le hem mamini le. 
\v 15 Tegani i požuda ovela khamni hem bijani greh, a o ćerdo greh bijani meriba.
\p
\v 16 Ma oven hovavde, mle mangle phraljalen! 
\v 17 Đijekh šukar daro hem đijekh savršeno poklon avela taro nebo, e Dadestar kova ćerđa sa so svetlini ko nebo, kova na menjini pe sar i senka. 
\v 18 Ov odlučinđa te bijani amen e čačipnasere lafeja, te ova prva maškaro sa so ćerđa.
\s Te šunel pe hem te ćerel pe
\p
\v 19 Akava te džanen, mle mangle phraljalen: đijekh manuš te siđari te šunel, te na siđari te vaćeri hem te na siđari te holjani, 
\v 20 adalese so e manušesiri holi na anela pravednost anglo Devel. 
\v 21 Adalese, frden tumendar sa o melalipe hem đijekh bišukaripe hem krotko priminen o lafi savoi usadime ana tumende, savo šaj te spasini tumare duše.
\p
\v 22 Ma oven okola kola samo šunena o lafi e Devlesoro hem ađahar pumen hovavena, nego oven okola kola ćerena palo adava lafi. 
\v 23 Adalese so, te neko šunela o lafi, a na ćerela le, sličnoi e manušese kova šukar dikhela plo muj ko ogledalo: 
\v 24 šukar dikhela pe, i džala hem odmah bistrela sar dičhola. 
\v 25 Ali, ko šukar dikhela pe ano savršeno zakoni savo anela sloboda, hem nastavini te dikhel ano leste, hem na bistrela okova so šunđa, nego ćerela palo leste, adava ka ovel blagoslovime ano okova so ćerela.
\p
\v 26 Te neko pes dikhela sar pobožnone, a na ićeri tali kontrola pli čhib, adava korkoro pes hovaj; lesiri pobožnost ništa na vredini. 
\v 27 Akajai pobožnost savi čisto hem bimeljardi anglo Devel o Dad: te brinini pe zako čhavore bizo dad hem bizi daj hem zako udovice ano lengere patnje hem te na meljari pe e svetoja.
\c 2
\s Te na ćerel pe razlika maškaro manuša
\p
\v 1 Mle phraljalen, tumen kola verujinena ano amaro slavno Gospod Isus Hrist, ma ćeren razlika maškaro manuša.
\p
\v 2 Na primer, avela ko tumaro čediba manuš zlatnona angrustikaja hem ano barvale šeja, a avela hem o čororo ano pharavde šeja, 
\v 3 i tumen po šukar dikhena okole kovai ano barvale šeja hem phenena lese: “Beš akate, ko šukar than”, a okole čororese phenena: “Tu terđov adari”, ili “Beš akate uzalo mle pre”. 
\v 4 Na li ađahar ćerđen razlika maškara tumende hem uljen sar o nepravedna sudije?
\p
\v 5 Šunen, mle mangle phraljalen: Na li o Devel birinđa okolen kolai čorore ano sveto te oven barvale ani vera hem te nasledinen o Carstvo savo o Devel obećinđa okolenđe kola mangena le? 
\v 6 A tumen potceninđen e čorore! Nane li baš o barvale adala kola iskoristinena tumen hem vucinena tumen ko suđa? 
\v 7 Nane li on adala kola vaćerena bišukar e Gospodesere šukare anavestar kase tumen pripadinena.
\p
\v 8 Te čače ićerena o carikano zakoni sar soi pisime ano Sveto lil: “Mang te pašutne sar korkore tut”, tegani šukar ćerena. 
\v 9 Ali, te ćerena razlika maškaro manuša, ćerena greh hem o Zakoni osudini tumen sar okolen kola phagena le. 
\v 10 Adalese so, te neko ićeri sa o Zakoni, a grešini samo ko jekh, krivoi zako phagiba sa o Zakoni. 
\v 11 Adalese so okova kova phenđa: “Ma ćer preljuba”, isto hem phenđa: “Ma mudar.” Adalese, te na ćereja preljuba, a mudareja, krivo injan zako phagiba o Zakoni.
\p
\v 12 Vaćeren hem ćeren sar okola kolenđe ka sudini pe palo Zakoni savo oslobodini. 
\v 13 Adalese so, o sudo naka ovel milosrdno okolese kova hem korkoro na inele milosrdno. A o milosrđe nadvladini e sudo.
\s I verai bizo delja muli
\p
\v 14 Mle phraljalen, te neko vaćeri da isi le vera, a nane le šukar delja, lesiri vera na vredini ništa. Šaj li te spasini le esavki vera? Na! 
\v 15 Te nesavo phral ili phen nane len so te urjaven ili nane len dovoljno hajbnase, 
\v 16 a neko tumendar phenela lenđe: “Mangava tumenđe sa najšukar, tačoven hem čaljoven!”, a na dena lenđe okova so valjani lengere telose, savi korist adalestar?
\p
\v 17 Ađahar hem tei i vera korkori, te nane la delja, ondai muli.
\p
\v 18 Ali neko ka vaćeri: “Tut isi vera, a man isi delja.” Mothov maje ti vera bizo delja, a me ka mothovav će mli vera mle deljencar.
\p
\v 19 Tu verujineja da isi samo jekh Devel? Šukar ćereja. Ali hem o bišukar duhija adava verujinena hem tresinena!
\p
\v 20 Mangeja li dokaz, bigođakere manušeja, dai i vera bizo delja beskorisno? 
\v 21 Sar amaro pradad o Avraam inele opravdime anglo Devel? Prekalo ple delja, kad predinđa ple čhave e Isaake ko žrtveniko. 
\v 22 Dikheja li da i vera sarađujinđa lesere deljencar, hem da i vera palo delja uli pherdi. 
\v 23 A ađahar pherdilo hem okova soi pisime ano Sveto lil: “O Avraam poverujinđa e Devlese hem adava uračuninđa pe lese sar pravednost” hem inele vičime e Devlesoro amal. 
\v 24 Dikhena da o manuš na ovela pravedno anglo Devel samo prekali vera, nego hem e ćeribnaja.
\p
\v 25 Hem isto ađahar, i Rahava koja inele bludnica, opravdinđa pe ple ćeribnaja ađahar so ugostinđa e izraelesere špijunen hem bičhalđa len avere dromeja. 
\v 26 Adalese sar soi o telo bizo duho mulo, ađahari hem i vera bizo delja muli.
\c 3
\s Kontrola upri čhib
\p
\v 1 Mle phraljalen, ma but tumendar te mangen te oven učitelja, adalese so džanaja da amenđe e učiteljenđe po zorale ka sudini pe. 
\v 2 Adalese so, sare amen ko but so grešinaja. Ali te neko na grešini ko lafija, ovi savršeno manuš, sposobno te ovel le kontrola upro sa plo telo.
\p
\v 3 Kad e grastenđe čhivaja o žvale ano muj sar te šunen amen, upravinaja sa lengere teloja. 
\v 4 Dikhen hem o brodija: edobori bare hem o zorale barvalja legarena len, a olencar upravini o but tikoro kormilo adari kaj o kormilari mangela te džal. 
\v 5 Ađahari hem i čhib tikoro ud, ali šaj te hvalini pe bare bućencar. Dikh, sar i tikori jag šaj tharel i bari šuma! 
\v 6 Ađahari hem i čhib jag, o sveto oti nepravda maškaro amare udovija. Meljari sa amaro telo hem tharela sa e manušesoro dživdipe jagaja savi avela taro pakao. 
\v 7 Đijekh vrsta oto divlja životinje, oto čiriklja, oto okola so lazinena phuvjaja hem oto životinje kolai ano pani šaj te oven pokorime hem o manuš pokorinđa len. 
\v 8 Ali i čhib – adava bišukaripe savo na mirujini, pherdi e meribnasere otroveja – niko našti te pokorini. 
\v 9 Olaja blagoslovinaja e Gospode hem e Dade hem olaja daja armanja e manušen kolai ćerde e Devlese pali slika. 
\v 10 Taro isto muj ikljola hem blagoslovija hem armanja. A adava na valjani ađahar te ovel, mle phraljalen. 
\v 11 Šaj li taro isto izvor te ikljol hem gudlo hem ćerko pani? 
\v 12 Šaj li i smokva, mle phraljalen, te bijani masline, ili i drakh te bijani smokve? Ađahar ni o londo izvor našti te del gudlo pani.
\s I čačikani mudrost
\p
\v 13 Koi maškar tumende mudro hem razumno? Nek adava mothoj ple šukare dživdipnaja, ćerindoj šukar delja ani poniznost savi avela tari mudrost. 
\v 14 Ali, tei tumenđe ano vilo i ćerki ljubomora hem i sebičnost, ma grešinen protiv o čačipe ađahar so ka hvalinen tumen da injen mudra. 
\v 15 Esavki mudrost na avela taro nebo, negoi tari phuv, telesno hem demonsko. 
\v 16 Adalese so, kaj isi ljubomora hem sebičnost, adari isi nered hem đijekh bišukaripe.
\p
\v 17 A i mudrost savi avela taro nebo, najanglei čisto, onda miroljubivo, nežno hem pokorno, pherdi milosrđe hem šukar plodija, na ćerela razlika maškaro manuša hem nane dujemujengiri. 
\v 18 A o mirotvorci, kola sejinena ano mir, čedena o plod oti pravednost.
\c 4
\s Preden tumen e Devlese
\p
\v 1 Kotar avena o mariba hem o kavge maškar tumende? Na avena li andral, tumare požudendar save marena pe ana tumende? 
\v 2 Tumen mangena, ali nane tumen, i adalese mudarena. Injen ljubomorna upro okova so isi averen, a našti te dobinen adava, i adalese marena tumen hem ćerena kavge. Nane tumen, adalese so na rodena e Devlestar. 
\v 3 A kad rodena, na dobinena adalese so rodena taro bišukar motivija, te šaj adava te koristinen zako tumare zadovoljstvija.
\p
\v 4 Preljubnikonalen! Na džanena li dai o amalipe akale svetoja neprijateljstvo premalo Devel? Adalese, ko mangela te ovel amal e svetose, ovela neprijatelji e Devlese. 
\v 5 Ili mislinena da o Sveto lil džabe vaćeri da o Devel ljubomorno mangela e duho kole ćerđa te živini ana amende? 
\v 6 Ali ov amenđe mothoj po bari milost. Adalese o Sveto lil vaćeri:
\b
\q1 “O Devel protivini pe e barikanenđe,
\q2 a e poniznonenđe mothoj milost.”
\b
\p
\v 7 Adalese pokorinen tumen e Devlese, a protivinen tumen e bengese, i ka našel tumendar. 
\v 8 Aven paše uzalo Devel, hem ov ka avel paše uzala tumende. Thoven tumare vasta, grešnikonalen! Thoven tumare vile, tumen kola injen ko duj gođa! 
\v 9 Tugujinen, žalinen hem zorale roven zbog tumare grehija! Nek tumaro asajba irini pe ano rojba, a tumari radost ani žalost! 
\v 10 Ponizinen tumen anglo Gospod, hem ov ka povazdel tumen.
\s Ma osudinen jekh avere
\p
\v 11 Phraljalen, ma vaćeren jekh protiv avereste. Ko vaćeri protiv plo phral, ili osudini ple phrale, vaćeri protiv o Zakoni hem osudini o Zakoni. A te osudineja o Zakoni, onda na ićereja le, nego injan lesoro sudija. 
\v 12 Samoi o Devel adava kova dinđa o Zakoni hem kovai Sudija, kova šaj te spasini hem te uništini. A ko tu injan te osudine te pašutne?
\s Našti planirini pe bizo Devel
\p
\v 13 Šunen akana, tumen kola vaćerena: “Avdive ili tejsa ka dža ki adaja hem adaja diz. Adari ka ačhova berš dive, ka ćera buti hem ka zaradina.” 
\v 14 Tumen na džanen ni so ka ovel tejsa. Soi tumaro dživdipe? Ovi kratko sar i magla savi sigate ikljola, a onda našalđola. 
\v 15 Ađahar valjani te vaćeren: “Tei e Gospodesiri volja, ka živina hem ka ćera akava ili okova.” 
\v 16 Ali tumen pana hvalinena tumen ano tumare barikane planja. Đijekh esavko hvalibai bišukar.
\p
\v 17 Adalese, ko džanel te ćerel šukaripe, a na ćerela le, ćerela greh.
\c 5
\s Upozoriba zako barvale
\p
\v 1 Šunen akana, tumen barvalalen! Zorale roven hem kukinen zbog i bari nevolja savi ka arakhi tumen. 
\v 2 O barvalipe tumaro čirnjola, a o šeja tumare hana o moljci. 
\v 3 O zlato hem o srebro tumaro rđavini, i rđa olengiri protiv tumende ka svedočini, hem ka hal tumare telija sar i jag. Čedinđen tumenđe blago, a poslednjai dive. 
\v 4 Ače! O bućarne ćerde buti tumenđe ko njive, ali tumen na platinđen lenđe. O Gospod e nebosere vojskengoro šunđa o rojba okolengoro kola čedena ine tumenđe ko njive. 
\v 5 Živinđen ki phuv raskošno hem uživinđen; pherđen tumare vile sar i stoka so pherela pe anglo čhiniba. 
\v 6 Osudinđen hem mudarđen e pravedniko, a ov na protivinđa pe tumenđe.
\s Strpljivost ano patnje
\p
\v 7 Adalese, phraljalen, oven strpljiva đikote o Gospod na avela. Ače hem o manuš so ćerela buti phuvjaja adžićeri o dragoceno bijandipe e phuvjakoro hem strpljivo adžićeri upro jesensko hem o prolećno bršin. 
\v 8 Hem tumen strpljivo adžićeren hem zorjaren tumare vile, adalese soi paše e Gospodesoro aviba. 
\v 9 Phraljalen, ma gunđinen jekh protiv avereste te na oven osudime. Ače o sudija terđola anglo udar!
\p
\v 10 Phraljalen, nek o proroci, kola vaćerena ine ano anav e Gospodesoro, oven tumenđe sar primer. On but patinde, ali inele strpljiva. 
\v 11 Ače, okolenđe kola izdržinde vaćeraja dai blagoslovime. Šunđen zaki e Jovesiri istrajnost hem dikhljen so ko kraj o Gospod ćerđa. O Gospodi but milostivno hem milosrdno.
\p
\v 12 A angleder sa, mle phraljalen, ma han tumen sovli ni e neboja, ni e phuvjaja, ni nisava avera sovljaja. Kad phenena: “Oja”, nek adava čače značini “oja”, kad phenena: “Na”, nek adava čače značini “na”, te na oven osudime.
\s I molitva ani vera
\p
\v 13 Nekoi tumendar ani nevolja? Nek molini pe. Nekoi tumendar radosno? Nek slavini e Devle điljencar. 
\v 14 Nekoi tumendar namborme? Nek vičini kora peste e starešinen e khanđirjakere, a on nek molinen pe upro leste hem te makhen le uljeja ano anav e Gospodesoro. 
\v 15 I molitva vaćerdi ani vera ka sasljari e namborme – o Gospod ka vazdel le. Hem te ćerđa grehija, ka ovel lese oprostime. 
\v 16 Adalese, vaćeren tumare grehija jekh averese hem molinen jekh averese te oven sasljarde. I molitvai e pravednikosiri zorali hem but šaj te ćerel.
\p
\v 17 O proroko o Ilija inele samo manuš sar hem amen. Sa vileja molinđa pe te na perel bršin, hem o bršin trin berš hem šov masek na pelo ki adaja phuv. 
\v 18 Onda palem molinđa pe, hem o nebo dinđa bršin, hem i phuv anđa plo bijandipe.
\s Te irini pe e našalden ko pravo drom
\p
\v 19 Mle phraljalen, te neko tumendar našalđola taro čačipe, a neko irini le, 
\v 20 te džanen da adava kova irinđa e grešniko taro našaldo drom ka spasini lesoro dživdipe taro meriba hem ka učhari but grehija.