\id EPH - Romani Arli Bible (RAB)
\ide UTF-8
\h Efežanenđe
\toc1 O lil e Efežanenđe
\toc2 Efežanenđe
\toc3 Ef
\mt O lil e Efežanenđe
\c 1
\s E Pavlesoro pozdrav
\p
\v 1 Me, o Pavle, o apostoli e Hriste Isusesoro pali volja e Devlesiri, pisinava e Devlesere manušenđe kolai ano Efes, okolenđe kola verujinena ano Hrist Isus:
\p
\v 2 Milost tumenđe hem mir e Devlestar, amare Dadestar, hem e Gospodestar e Isuse Hristestar.
\s Duhovna blagoslovija ano Hrist
\p
\v 3 Blagoslovime te ovel o Devel hem o Dad amare Gospodesoro e Isuse Hristesoro, kova ano Hrist blagoslovinđa amen đijekhe duhovnone blagosloveja ko nebesija.
\p
\v 4 Ano leste izabirinđa amen angleder so ulo o sveto, te šaj anglo leste ova sveta hem bizi mana. Ano mangipe 
\v 5 predodredinđa amen, pali pli šukar volja, te ova lesere čhave prekalo Isus Hrist, 
\v 6 hem te hvalina lesiri slavno milost savi dinđa amen sar daro ano plo manglo Čhavo. 
\v 7 Ano Hrist isi amen otkupljenje prekalo lesoro rat, o oprostiba e grehengoro palo barvalipe oti e Devlesiri milost. 
\v 8 Ola o Devel izobilno čhorđa upra amende, zajedno sa e džandipnaja hem e haljojbnaja. 
\v 9 Ćerđa amen te džana i tajna oti lesiri volja, savi palo plo plan angleder odredinđa ano Hrist. 
\v 10 Akava plan, savo ka ovel ano pravo vreme, sa soi ko nebo hem ki phuv ka čhivel talo jekh šero – talo Hrist.
\p
\v 11 Ano leste injam izabirime sar naslednici, predodredime palo plan Okolesoro kova sa ćerela pali odluka oti pli volja, 
\v 12 te hvalina lesiri slava – amen kola prva čhivđam amari nada ano Hrist. 
\v 13 Ano leste injen hem tumen kad šunđen o Lafi e čačipnasoro – o evanđelje oto tumaro spasenje. Ano leste hem, kad poverujinđen, injen obeležime pečateja – e obećime Svetone Duhoja. 
\v 14 Ovi sar garancija zako amaro nasledstvo đi ko otkupljenje okolengoro kolai e Devlesere, ki hvala oti olesiri slava.
\s E Pavlesiri molitva
\p
\v 15 Adalese hem me, od kad šunđum zaki tumari vera ano Gospod Isus hem zako tumaro mangipe sa e Devlesere manušenđe, 
\v 16 stalno zahvalinava e Devlese zako tumenđe hem ićerava tumen ano mle molitve. 
\v 17 Molinav man o Devel amare Gospodesoro e Isuse Hristesoro, o slavno Dad, te del tumen e Duho oti mudrost hem oto otkrivenje, te pendžaren le. 
\v 18 Molinav man te phravel o duhovna jaćha tumare vilesere, te dikhen savi i nada ki savi vičinđa tumen, kobori o barvalipe oto lesoro slavno nasledstvo savo pripreminđa ple manušenđe 
\v 19 hem kobori lesoro but baro zoralipe premalo amende kola verujinaja. Adavai zoralipe isto sar okova baro zoralipe 
\v 20 savo mothovđa upro Hrist, kad vazdinđa le taro mule hem čhivđa le ko počasno than, pese oti desno strana ko nebesija. 
\v 21 Čhivđa le upreder sa o poglavarstvija hem o vlastija, o zoralipa, o gospodstvija, hem upreder đijekh anav savo šaj te del pe, na samo ko akava sveto, nego hem ko okova savo avela. 
\v 22 O Devel sa čhivđa talo lesere pre hem čhivđa le upreder sa te ovel Šero e Khanđirjaće. 
\v 23 A e Hristesoroi telo i Khanđiri – pherdi e Hristeja kova pherela sa ano sa.
\c 2
\s Taro meriba ano dživdipe
\p
\v 1 A tumen injenle mule zbog tumare prestupija hem grehija, 
\v 2 ano save nekad živinđen sar so živini akava sveto. Injenle poslušna e bengese, e demonengere vladarese ano vazduho, kova akana ćerela buti maškar okola kola nane poslušna e Devlese. 
\v 3 Hem amen sare nekad živinđam maškar olende, palo požude amare telosere hem ćerđam adava so mangela amaro telo hem i godi. Hem amen pali priroda zaslužinđam e Devlesiri holi, sar avera. 
\v 4 Ali o Devel, kovai barvalo ano milosrđe, oto plo baro mangipe premalo amende, 
\v 5 dživđarđa e Hristeja amen kola injamle mule zbog amare prestupija. Spasime injen pali milost e Devlesiri. 
\v 6 O Devel vazdinđa amen taro mule e Hristeja hem čhivđa amen ko nebesija ano Hrist Isus. 
\v 7 Adava ćerđa te šaj ano vremenja save avena mothoj o but baro barvalipe oti pli milost ano šukaripe premalo amende ano Hrist Isus. 
\v 8 Adalese so, pali milost injen spasime prekali vera. Adava na avela oto tumaro trud, adavai e Devlesoro daro. 
\v 9 Na injen spasime zbog tumare delja, sar te našti nijekh hvalini pe. 
\v 10 Adalese so, amen injam lesoro delo, stvorime ano Hrist Isus, te ćera o šukar delja save o Devel angleder pripreminđa zako amenđe.
\s Jekh ano Hrist
\p
\v 11 Adalese, setinen tumen da injenle bijande sar manuša taro avera nacije. O Jevreja, kola pumen vičinena “obrezime” (palo adeti savoi ćerdo upro telo), tumen vičinde “biobrezime”. 
\v 12 Tegani živinđen bizo Hrist, i na injenle ani zajednica e izraelesiri hem injenle abanđije zako savezija oto obećanje; živinđen ano sveto bizi nada hem bizo Devel. 
\v 13 A akana ano Hrist Isus tumen, kola nekad injenle dur e Devlestar, aljen paše prekalo rat e Hristesoro.
\p
\v 14 Adalese soi o Hrist amaro mir. Ov ćerđa o Jevreja hem o avera narodija te oven jekh. Ple teloja peravđa o duvari oto neprijateljstvo savo razdvojinđa len. 
\v 15 E jevrejengere Zakone ine but naredbe hem pravilja, ali o Hrist poništinđa le sar te šaj oto duj grupe manuša te ćerel ana peste jekh nevo narodo hem te anel mir. 
\v 16 Ple meribnaja ko krsto, o Hrist čhinavđa o neprijateljstvo taro soduj strane hem ćerđa len te oven jekh telo. Ađahar soduj strane pomirinđa e Devleja. 
\v 17 Ov alo hem propovedinđa o mir tumenđe kola injenle dur e Devlestar hem amenđe e Jevrejenđe kola injamle paše. 
\v 18 Prekalo leste hem jekh hem dujta šaj te ava koro Dad ano jekh Duho.
\p
\v 19 Adalese na injen više ni abanđije ni okola kola ale tari aver phuv, nego dizutne zajedno e svetone manušencar hem čherutne e Devlesere porodicakere. 
\v 20 Tumen injen i građevina savi ćerdi upro temelji e apostolongoro hem e prorokonengoro, a korkoroi o Hrist Isus lakoro najbitno bar. 
\v 21 Ano lestei sa i građevina sastavime hem barjola ano sveto hram ano Gospod. 
\v 22 Prekalo leste hem tumen injen ugradime ano hram ano savo o Devel živini ple Duhoja.
\c 3
\s E Pavlesiri buti te propovedini avere nacijenđe
\p
\v 1 Me o Pavle, injum phandlo so služinava e Hriste Isuse zako šukaripe tumaro kola injen taro avera nacije. 
\v 2 Tumen, sigurno, šunđen zaki služba savi maje pali e Devlesiri milost poverime zako tumenđe. 
\v 3 O Devel mothovđa maje pli tajna, sar so ukratko pisinđum tumenđe. 
\v 4 Čitindoj adava, šaj te dikhen sar me haljovava i tajna e Hristestar, 
\v 5 savi angleder na inele mothovdi zako anglune generacije, ali akanai prekalo Duho mothovdi lesere svetone apostolenđe hem e prorokonenđe. 
\v 6 Adajai tajna dai prekalo evanđelje o manuša taro avera nacije, zajedno e Jevrejencar, naslednici okolestar so o Devel pripreminđa. Oni udovija oto jekh telo hem zajedno delinena o obećanje savo o Devel dinđa ano Hrist Isus.
\p
\v 7 Me uljum sluga zako akava evanđelje palo daro oti e Devlesiri milost savi maje dindi palo delujiba oto lesoro zoralipe. 
\v 8 A maje, e najtikorese maškaro sa e Devlesere manuša, dindi akaja milost te propovedinav avere nacijenđe o beskrajno barvalipe e Hristesoro, 
\v 9 hem sarijenđe te mothovav i namera oti akaja tajna savi ano anglune vremenja inele garavdi ano Devel, kova sa stvorinđa. 
\v 10 O Devel adaleja manglja, prekali Khanđiri, akana te mothoj pli raznoliko mudrost zako poglavarstvija hem zako vlastija ko nebesija. 
\v 11 Adava inele lesoro večno plan, savo ostvarinđa prekalo Hrist Isus, amaro Gospod. 
\v 12 Zbog o Hrist hem zbog amari vera ano leste, amen akana šaj slobodno hem bizi dar te ava anglo Devel. 
\v 13 Adalese molinava tumen te na oven obeshrabrime zbog akala mle nevolje save nakhavava zbog tumende – olencar šaj te ponosinen tumen.
\s E Pavlesiri molitva zako Efežanja
\p
\v 14 Adalese hem perava ko kočija anglo Dad, 
\v 15 kolestar đijekh porodica ko nebo hem ki phuv dobini anav. 
\v 16 Molinav man, palo barvalipe oti lesiri slava, ple Duhoja te zorjari tumen andral, 
\v 17 te šaj o Hrist prekali vera, te živini ano tumare vile, hem te oven ukorenime hem utemeljime ano mangipe, 
\v 18 te šaj zajedno sa e Devlesere manušencar haljoven kobori i širina, i dužina, i visina hem i dubina e Hristesere mangipnastar, 
\v 19 hem te pendžaren adava mangipe e Hristesoro savoi upreder đijekh džandipe. Ađahar ka oven pherde ano sa o pherdipe e Devlesoro.
\p
\v 20 A Okolese kova ple zoralipnaja, savo delujini ana amende, šaj te ćerel but više nego so amen šaj te molina le ili te zamislina, 
\v 21 olese nek ovel slava ani Khanđiri hem ano Hrist Isus prekalo sa o generacije zauvek. Amen.
\c 4
\s Jedinstvo ano telo e Hristesoro
\p
\v 1 Adalese, me, o phandlo zbog o Gospod, molinava tumen te živinen dostojno zako poziv ko savo injen vičime. 
\v 2 Ani sa i poniznost hem krotkost, strpljivo podnosinen jekh avere ano mangipe. 
\v 3 Den sa tumendar te ićeren o jedinstvo ano Duho, palo mir savo povezini tumen. 
\v 4 Jekhi telo hem jekhi Duho, sar soi jekh i nada ki savi o Devel vičinđa tumen. 
\v 5 Samoi jekh Gospod, jekh vera, jekh krstiba. 
\v 6 Samoi jekh Devel hem Dad sarijengoro. Ovi upreder sa, prekalo sa hem ano sarijende.
\p
\v 7 A đijekhese amendar dindi i milost edobor kobor o Hrist odredinđa. 
\v 8 Adalesei pisime ano Sveto lil:
\b
\q1 “Kad uklinđa ko učipe,
\q2 peja legarđa bute phandlen,
\q2 hem dinđa darija e manušenđe.”
\b
\p
\v 9 A adava “uklinđa”, so šaj aver te značini nego da angleder huljinđa ano naj telune, e phuvjakere krajevija. 
\v 10 Okova kova huljinđa, istoi Okova kova uklinđa više oto sa o nebesija, te pherel sa. 
\v 11 Ov korkoro dinđa jekhen zako apostolja, a averen zako proroci, jekhen zako evangelizatorja, a averen zako pastirija hem učitelja, 
\v 12 te pripremini e Devlesere manušen zaki služba, te izgradini pe o telo e Hristesoro. 
\v 13 Ađahar sare ka ava đi ko jedinstvo ani vera hem ano pendžaripe e Devlesere Čhave, đi ko zrelo manuš, sa dok na ovaja savršena sar o Hrist. 
\v 14 Ađahar naka ova više nezrela sar čhavore kolencar čhelenafse o talasija hem kolen upre tele frdela đijekh barval oto sikaviba e lukavone manušengoro, kola kandena pe prevaraja sar te legaren len ko bišukar drom. 
\v 15 Nego, vaćerindoj o čačipe, ano mangipe, ano sa ka barjova ano Hrist, kovai o Šero. 
\v 16 Ov ćerela sa o telo te barjol hem te gradini pe ano mangipe, ađahar so o zglobija ićerena o telo zajedno, a đijekh ud ćerela pli buti.
\s Nevo dživdipe ano Hrist
\p
\v 17 Adalese vaćerava tumenđe hem upozorinava tumen ano e Gospodesoro anav: ma živinen više sar okola kola na džanen e Devlese, kasere mislija zako ništa nane šukar. 
\v 18 Lengiri godi ani tomina, hem oni dur oto dživdipe e Devleja zbog pumaro bidžandipe hem zbog pumare steđime vile. 
\v 19 Adalese so našalde o osećaj zaki lađ, mukle pe ano grešna požude, i požudno ćerena đijekh vrsta oto bišukar buća.
\p
\v 20 Ali tumen adava na sikliljen e Hristestar. 
\v 21 Te čače šunđen e Isusestar hem te sikliljen dai ano leste o čačipe, 
\v 22 huljaven tumendar o purano dživdipe, e purane manuše ana tumende kova properela zbog o hovavne požude. 
\v 23 Muken e Duhose te obnovini tumaro razmisliba. 
\v 24 Urjaven upra tumende e neve manuše, kovai ćerdo te ovel slično e Devlese ani čačikani pravednost hem ani svetost.
\p
\v 25 Adalese ačhaven tumen taro hovajba! “Vaćeren o čačipe jekh averese”, adalese so sare zajedno injam udovija oto isto telo. 
\v 26 “Kad holjanena, ma grešinen.” Ma muken te perel i rat, a tumen te ačhoven holjame, 
\v 27 ni ma den prilika e bengese. 
\v 28 Ko čorđa, ma više te čorel, nego nek ćerel buti, ćerindoj šukaripe ple vastencar, te šaj ovel le so te podelini okolencar kas nane.
\p
\v 29 Ma vaćeren bišukar lafija, nego šukar, save, pali potreba, šaj te služinen ki izgradnja hem ko blagoslov okolenđe kola šunena. 
\v 30 Ma žalostinen e Devlesere Svetone Duho, saveja injen zapečatime zako Dive oto tumaro otkupljenje. 
\v 31 Ciden tumendar đijekh gorčina, holi hem gnev, vičiba hem akošiba, hem đijekh aver bišukaripe. 
\v 32 Oven šukar hem milosrdna jekh premalo avereste hem oprostinen jekh averese sar so o Devel ano Hrist oprostinđa tumenđe.
\c 5
\p
\v 1 I adalese, dikhen te oven sar o Devel, adalese so injen lesere mangle čhave. 
\v 2 Živinen ano mangipe, sar so o Hrist manglja amen, i korkoro pes dinđa zako amenđe sar mirisno prinos hem žrtva e Devlese.
\p
\v 3 O blud hem đijekh nečistota, ili pohlepa te na pominen pe maškara tumende – sar so dolikujini e Devlesere manušenđe. 
\v 4 Ni lađutne lafija, ni dilino vaćeriba, ni prosta šale, adalese so adava na dolikujini tumenđe. Umesto adava zahvalinen e Devlese. 
\v 5 Adalese so, akava šukar te džanen: nijekhe bludniko, nečistone ili pohlepniko – soi isto sar hem o idolopokloniko – nane nasledstvo ano Carstvo e Hristesoro hem e Devlesoro. 
\v 6 Ma muken niko te hovaj tumen čuče lafencar. Adalese so, zbog adava e Devlesiri holi avela upro neposlušna manuša. 
\v 7 Adalese ma te ovel tumen ništa olencar!
\p
\v 8 Adalese so, angleder injenle tomina, a akana injen svetlost ano Gospod. Živinen sar čhave e svetlosere. 
\v 9 Adalese soi o plod oto svetlost sa soi šukar, pravedno hem čačikano. 
\v 10 Istražujinen soi šukar anglo Gospod. 
\v 11 Ma oven saučesnici okolengere kola ćerena o beskorisna delja e tominakere. Umesto adava ikalen ko svetlost adala delja. 
\v 12 Adalese so, lađavoi čak hem te vaćeri pe adalestar so on garavde ćerena. 
\v 13 A sa so ikali pe ko svetlost, dičhola, 
\v 14 adalese so sa so ikali pe ko svetlost, ovela svetlost. Adalese phenela pe:
\b
\q1 “Ušti, tu kova soveja,
\q2 ušti taro mule,
\q2 hem o Hrist ka osvetlini tut.”
\b
\p
\v 15 Adalese, pazinen sar živinena: na sar o nerazumna, nego sar o mudra. 
\v 16 Šukar koristinen o vreme, adalese soi akala dive bišukar. 
\v 17 Adalese ma oven nerazumna, nego haljoven soi i volja e Gospodesiri. 
\v 18 Ma mačon oti mol, savi legari ano nemoralno živiba, nego pherđoven e Svetone Duhoja. 
\v 19 Jekh averese vaćeren psalmija, zahvalna đilja hem duhovna đilja. Đilaben hem slavinen e Gospode sa tumare vileja. 
\v 20 Uvek zahvalinen zako sa e Devlese hem e Dadese ano anav amare Gospodesoro e Isuse Hristesoro.
\p
\v 21 Pokorinen tumen jekh averese ani dar anglo Hrist.
\s O romnja hem o roma
\p
\v 22 O romnja te pokorinen pe pumare romenđe sar e Gospodese. 
\v 23 Adalese soi o rom šero e romnjaće sar soi o Hrist šero e Khanđirjaće, ple telose, kasoroi Spasitelji. 
\v 24 I sar so i Khanđiri pokorini pe e Hristese, ađahar hem o romnja ano sa te pokorinen pe pumare romenđe.
\p
\v 25 Romalen, mangen tumare romnjen sar so hem o Hrist manglja i Khanđiri, hem dinđa plo dživdipe zako olaće, 
\v 26 te posvetini la, čistindoj ola ađahar so thovđa la ano pani lafeja, 
\v 27 te ikali angla peste i Khanđiri ani pherdi slava, bizi mana hem bizi mrlja, ili bizo avera nedostaci, te ovel sveto hem bizi greška. 
\v 28 Ađahar hem o roma dužnai te mangen pumare romnjen sar pumaro telo. Ko mangela pla romnja, korkoro pes mangela. 
\v 29 Adalese so, niko nikad na mrzinđa plo telo, nego parvari le hem brinini pe olestar, sar so hem o Hrist e Khanđirjatar. 
\v 30 Adalese so, amen injam o udovija lesere telostar. 
\v 31 Sar so pisini ano Sveto lil: “Adalese o manuš ka ačhaj pe dade hem pe daja hem ka ovel jekh pe romnjaja, hem on duj ka oven jekh telo.” 
\v 32 Akavai bari tajna, ali me adava vaćerava tumenđe e Hristestar hem e Khanđirjatar. 
\v 33 Ađahar đijekh tumendar te mangel pla romnja sar korkore pes, a i romni te poštujini ple rome.
\c 6
\s O čhavore hem lengere dada hem o daja
\p
\v 1 Čhavoralen, poštujinen tumare dade hem e daja zbog o Gospod, adalese soi adava ispravno. 
\v 2 “Poštujin te dade hem te daja”, adajai i prvo naredba ani savi isi obećanje: 
\v 3 “te ovel će šukar hem but berša te živine ki phuv.”
\p
\v 4 A tumen, dadalen, ma ogorčinen tumare čhaven, nego vaspitujinen len hem sikaven len palo e Gospodesere uputstvija.
\s O robija hem o gospodarija
\p
\v 5 Robonalen, oven poslušna tumare phuvjakere gospodarenđe ano baro poštujiba hem ani dar. Ćeren adava čačikane, sar so bi ovena poslušna e Hristese. 
\v 6 Ma adava ćeren samo anglo lengere jaćha, sar okola kola ulizinena pe e manušenđe, nego sar e Hristesere robija kola sa vileja ćerena e Devlesiri volja. 
\v 7 Služinen lenđe radosno, sar e Gospodese, a na sar e manušenđe, 
\v 8 adalese so džanen da o Gospod ka nagradini đijekhe kova ćerela šukaripe, bilo te ovel robo ili slobodno manuš. 
\v 9 Hem tumen kola injen gospodarija, isto ađahar oven šukar tumare robonencar. Ma više pretinen lenđe, adalese so džanen da hem tumen hem olen isi jekh isto Gospodari ko nebo, kova na dikhela koi kova.
\s E Devlesiri oprema zako mariba
\p
\v 10 A ko kraj, oven zorale ano Gospod hem ano lesoro baro zoralipe. 
\v 11 Urjaven tumen sa i oprema e Devlesiri zako mariba, te šaj suprotstavinen tumen zako lukavstvo e bengesoro. 
\v 12 Adalese so, amaro mariba nane protiv o manuša, nego protiv o poglavarstvija, protiv o vlastija, protiv akale svetosere zoralipa e tominakere, protiv o bišukar duhovna zoralipa ko nebesija. 
\v 13 Adalese, urjaven tumen sa i oprema e Devlesiri zako mariba, te šaj suprotstavinen tumen kad avela o bišukar dive hem – kad ka završinen sa – te šaj zorale terđoven. 
\v 14 Adalese, terđoven zorale! Phanden tumaro maškar čačipnaja, urjaven o oklop oti pravednost, 
\v 15 hem čhiven ko pre i spremnost te vaćeren o evanđelje oto mir. 
\v 16 Uzalo sa adava, len o štit oti vera saveja ka šaj te mudaren sa o jagale strele e Bišukaresere. 
\v 17 Čhiven ko šero i kaciga oto spasenje hem len o mači e Duhosoro, savoi o lafi e Devlesoro. 
\v 18 Uvek hem ani đijekh prilika roden hem molinen tumen ano Duho. Hem adalese oven džangavde hem istrajna ano moliba zako sa e Devlesere manuša. 
\v 19 Molinen tumen hem maje, o Devel te del man pravo lafi kad phravava mlo muj, te šaj hrabro mothovav i tajna oto evanđelje. 
\v 20 Zako evanđelje hem služinava sar poslaniko ano lancija. Molinen tumen te vaćerav o evanđelje hrabro, sar so hem valjani te vaćerav le.
\s Završna pozdravija
\p
\v 21 A o Tihik, o manglo phral hem o verno sluga ani služba e Gospodesiri, sa ka vaćeri tumenđe mandar, te džanen sar injum hem so ćerava. 
\v 22 Ole baš adalese hem bičhalava tumende, te džanen sar injam hem te ohrabrini tumen.
\p
\v 23 Mir e phraljenđe hem mangipe e veraja oto Devel o Dad hem oto Gospod Isus Hrist.
\p
\v 24 Milost sarijencar kola mangena amare Gospode e Isuse Hriste mangipnaja savo nikad na nakhela.