\id 1TI - Romani Arli Bible (RAB)
\ide UTF-8
\h 1. Timotej
\toc1 O prvo lil e Timotejese
\toc2 1. Timotej
\toc3 1. Tim
\mt O prvo lil e Timotejese
\c 1
\s E Pavlesoro pozdrav
\p
\v 1 Me, o Pavle, o apostoli e Hriste Isusesoro pali naredba e Devlesiri, amare Spasiteljesiri, hem e Hriste Isusesiri kovai amari nada,
\p
\v 2 pisinava e Timotejese, mle čačikane čhavese ani vera:
\p Milost, milosrđe hem mir e Devlestar e Dadestar hem e Hriste Isusestar, amare Gospodestar.
\s Upozoriba upro hovavne sikaviba
\p
\v 3 Angleder so te džav ki Makedonija, rodinđum tutar te ačhove ano Efes, te naredine nesave manušenđe te na sikaven nesave avera sikaviba, 
\v 4 hem te ačhaven pe oto verujiba ano paramiza hem ano bare rodoslovija. Sa adava više anela rasprave, nego so mothovela e Devlesoro plan savo ćerela pe veraja. 
\v 5 O cilj oti akaja naredbai mangipe taro čisto vilo, tari šukar savest hem tari čačikani vera. 
\v 6 Nesave cidinde pe adalestar, hem irinde pe ko beskorisna vaćeriba. 
\v 7 On mangena te oven učitelja e Zakonestar, a na haljovena ni so vaćerena ni so zorale tvrdinena.
\p
\v 8 Džanaja dai o Zakoni šukar te neko ićeri le sar so valjani. 
\v 9 Džanaja hem adava da o Zakoni nane dindo zako pravednici, nego zako okola kola na ićerena le hem kolai protiv o Devel, zako nepobožna hem zako grešnici, zako nesveta hem zako biedevlesere, zako okola kola mudarena e dade ili e daja, zako okola kola mudarena e manušen, 
\v 10 zako bludnici, zako murša kola sovena e muršencar, zako okola kola činena hem biknena e manušen, zako okola kola hovavena, zako okola kola hovavne hana pe sovli hem zako sa kola ćerena okova so protivini pe e saste sikavibnase. 
\v 11 Akava sikavibai palo slavno evanđelje amare blagoslovime Devlestar savoi maje poverime te vaćerav.
\s O Pavle zahvalini zako e Devlesoro milosrđe
\p
\v 12 Zahvalinava e Hriste Isusese, amare Gospodese, kova dinđa man zoralipe, so inole poverenje ana mande hem čhivđa man ani pli služba, 
\v 13 iako angleder injumle hulitelji, progonitelji hem nasilniko. Ali ov smilujinđa pe maje, adalese so adava ćerđum ano bidžandipe, sar neverniko. 
\v 14 Amaro Gospod mothovđa maje but bari milost! Pherđa man veraja hem mangipnaja savei ano Hrist Isus.
\p
\v 15 Akavai lafi čačipe hem zaslužini pherdeste te ovel prihvatime: O Hrist Isus alo ki phuv te spasini e grešnikonen, kolendar me injum najbaro. 
\v 16 Ali, adalese mothovđa pe milost maje, e najbare grešnikose, te šaj upra mande o Hrist Isus mothoj pli bari strpljivost, sar primer okolenđe kola ka verujinen ano leste te priminen o večno dživdipe. 
\v 17 A e večnone Carose, e jekhe Devlese, kova našti merel, kova na dičhola, čast hem slava zauvek! Amen.
\s E Timotejesiri odgovornost
\p
\v 18 Timotej, mlo čhavo, poverinava će akava uputstvo palo proroštvija save pana angleder inele tutar vaćerde. Te ićerđan tut upro lende, ka mare šukar mariba, 
\v 19 ađahar so ka ovel tut vera hem šukar savest. Nesave odbacinde akava hem uništinde pumari vera. 
\v 20 Maškar olendei o Imenej hem o Aleksandar, kolen predinđum e Sotonese te sikljoven te na hulinen.
\c 2
\s Uputstvija zaki molitva
\p
\v 1 Angleder sa, mangava te ovel rodiba, molitve, molbe hem zahvaliba zako sa o manuša, 
\v 2 zako carija hem zako sa kolai ki vlast, te šaj živina mirno hem tiho dživdipe ani sa i pobožnost hem ano poštenje. 
\v 3 Adavai šukar hem ugodno e Devlese, amare Spasiteljese, 
\v 4 kova mangela sa o manuša te oven spasime hem te pendžaren o čačipe. 
\v 5 Adalese so jekhi o Devel hem jekhi kova terđola maškaro Devel hem o manuša – o manuš o Hrist Isus. 
\v 6 Ov dinđa plo dživdipe sar otkup zako sa o manuša. Adavai svedočanstvo savo o Devel dinđa ko pravo vreme. 
\v 7 I adalese o Devel čhivđa man te ovav propovedniko hem apostoli, te ovav učitelji avere nacijengoro ani vera hem ano čačipe. Na hovavava, vaćerava tumenđe o čačipe.
\p
\v 8 Adalese, mangava o murša te molinen pe ko đijekh than, vazdindoj pumare sveta vasta bizi holi hem bizi rasprava.
\p
\v 9 Ađahar da, o đuvlja te urjen pe pristojno, skromno hem sar so džala ano redo, te na kitinen pe frizurencar, ni zlatoja ili biserencar ili skupone šejencar. 
\v 10 Umesto adava, nek ćeren šukaripe, sar so dolikujini e đuvljenđe kola mothovena pe sar pobožna.
\p
\v 11 O đuvlja nek sikljoven ani tišina hem ani sa i pokornost. 
\v 12 E đuvljaće na mukava te sikaj ili te ovel upreder o murš, nego nek traini. 
\v 13 Adalese so, najangle inele ćerdo o Adam, i tegani i Eva. 
\v 14 Hem na ine o Adam adava kova inele prevarime, nego i đuvli inele prevarime hem peli ano greh. 
\v 15 Ali i đuvli ka ovel spasime adaleja so ka bijani čhaven, te ačhile ani vera, ano mangipe hem ani svetost anglo Devel, sar so džala ano redo.
\c 3
\s Save valjani te oven e khanđirjakere vođe
\p
\v 1 Akavai lafi čačipe: te neko mangela te ovel nadgledniko, šukar služba mangela. 
\v 2 O nadgledniko valjani te ovel bizi mana, te ovel rom jekha romnjakoro, te ovel trezveno, razumno, poštujime, gostoljubivo, hem sposobno te sikaj, 
\v 3 te na ovel pijanica, ni nasilniko, nego te ovel nežno, ni kavgađija, ni halano parenđe. 
\v 4 Valjani te upravini šukar ple čhereja, hem te oven le čhave kola šunena le hem but poštujinena le. 
\v 5 Ali, te na džanđa te upravini ple čhereja, sar ka upravini e Devlesere khanđirjaja? 
\v 6 O nadgledniko na tromal te ovel manuš kova samo so obratinđa pe, sar te na ovel barikano hem te na perel ani isto osuda sar o beng. 
\v 7 I valjani te ovel poštujime hem avere manušendar kola nane ani khanđiri, te na lađari pe hem te na perel ani zamka e bengesiri.
\s Save valjani te oven o đakonja
\p
\v 8 Ađahar hem o đakonja valjani te oven cenime, te na oven dujemujengere, te na pijen but mol hem te na džan palo nepošteno barvalipe. 
\v 9 Valjani te ićeren pe ko hor čačipe e verakoro, ani čisto savest. 
\v 10 E đakonen najangle valjani te proverini pe, i tei bizi mana, šaj te oven ani služba. 
\v 11 Ađahar hem lengere romnja valjani te oven cenime, te na ogovorinen, te oven trezvena hem ko sa te oven verna.
\p
\v 12 O đakoni valjani te ovel rom jekha romnjakoro, hem šukar te upravini ple čhavencar hem ple čhereja. 
\v 13 Adalese so, okola kola šukar ćerena i služba, ovena poštujime maškaro narodo hem troman bizi dar te vaćeren oti pumari vera ano Hrist Isus.
\s O čačipe amara verakoro
\p
\v 14 Iako isi man nada da pana hari i ka avav tute, pisinava će akava 
\v 15 sar te šaj, te zadržinđum man, džane sar valjani te ponašini pe o manuš e Devlese ano čher, savoi i khanđiri e dživde Devlesiri, stubo hem temelji e čačipnasoro.
\p
\v 16 Bizi sumnja, baroi o garavdipe ano adava so verujinaja:
\b
\q1 Ov inele mothovdo ano telo,
\q2 inele opravdime e Duhostar,
\q1 inele dikhlo e anđelendar,
\q2 inele propovedime maškaro avera nacije,
\q1 ano leste o manuša verujinde
\q2 hem legardilo upre ani slava.
\c 4
\s Upozoriba protiv o hovavne učitelja
\p
\v 1 O Duho jasno vaćeri so ko poslednja vremenja nesave ka otperen oti vera, hem ka džan palo hovavne duhija hem palo sikaviba e demonengere. 
\v 2 Esavke sikaviba avena taro dujemujengere hovavne manuša kolengiri savest otupinđa. 
\v 3 On na mukena e manušenđe te ženinen pe hem vaćerena lenđe te na han nesavo hajba save o Devel ćerđa te ovel primime ani zahvalnost okolendar kola verujinena hem kola pendžarena o čačipe. 
\v 4 Adalese so, šukari sa o Devel so ćerđa hem na valjani te odbacini pe ništa so primini pe ani zahvalnost, 
\v 5 adalese soi adava posvetime e Devlesere lafeja hem molitvaja.
\s Šukar sluga e Isuse Hristesoro
\p
\v 6 Te akalestar sikaveja e phraljen, ka ove šukar sluga e Hriste Isusesoro, parvardo verakere lafencar hem šukare sikavibnaja palo savo džaja. 
\v 7 Cide tut taro biedevlesere hem e puranengere paramiza, a vežbin tut ani pobožnost. 
\v 8 Adalese so, i vežba zako telo anela tikori korist, a i pobožnost šukari zako sa, adalese so ana peste isi la obećanje hem zako akava dživdipe hem zako dživdipe savo avela.
\p
\v 9 Akavai lafi čačipe hem zaslužini pherdeste te ovel prihvatime. 
\v 10 Zako adava trudinaja amen hem maraja amen, adalese so amari nada čhivđam ano dživdo Devel, kovai Spasitelji sa e manušengoro, najangle okolengoro kola verujinena.
\p
\v 11 Adava naredin hem sikav. 
\v 12 Niko te na dikhel tut po tele adalese so injan terno, nego ov primer e vernonenđe ano vaćeriba, ano ponašiba, ano mangipe, ani vera hem ani čistota. 
\v 13 Đikote na avava, dikh te na ačhave o čitiba o Lafi anglo manuša, o propovediba hem o sikaviba. 
\v 14 Ma zanemarin o daro savoi ana tute, savoi će dindo prekalo proroštvija kad o starešine čhivde pumare vasta upra tute.
\p
\v 15 Dikh sa adava te ćere, sa vileja de tut adalese, te šaj sare te dikhen so džaja anglal. 
\v 16 Arakh korkore tut hem o sikaviba. Ačhov ko adava, adalese so, ćerindoj adava ka spasine hem tut hem okolen kola šunena tut.
\c 5
\s E udovicendar
\p
\v 1 E purane manuše ma ukorin strogo, nego vaćer lese sar dadese, e ternenđe sar phraljenđe, 
\v 2 e purane romnjenđe sar dajenđe, a e ternjenđe sar phenjenđe, ani sa i čistota.
\p
\v 3 Poštujin e udovicen kolen nane ko te dikhel. 
\v 4 Ali, te e udovica isi čhave ili unukija, najangle on nek sikljoven te mothoven pobožnost dikhindoj pumare čherutnen hem ađahar te irinen pumare dadenđe hem dajenđe, adalese soi adava šukar anglo Devel. 
\v 5 A i đuvli kojai čače udovica hem nane ko te dikhel la, čhivđa pli nada ano Devel, hem dive hem rat terđola ano moliba hem ano rodiba. 
\v 6 A okoja koja živini raspusno, već muli iakoi dživdi. 
\v 7 Vaćer lenđe sa adava, te oven bizi mana. 
\v 8 A te neko na dikhela pla familija, najangle ple čherutnen, adava odrekninđa pe oti vera hem po bišukari e nevernikostar.
\p
\v 9 Ano popis oto udovice šaj te čhivel pe okoja koja nane po terni taro šovardeš berš, kola inele jekh rom. 
\v 10 Oj valjani te ovel pendžardi palo šukar delja, te barjarđa čhaven, te inele gostoljubivo, te thovđa o pre e Devlesere manušengere, te pomožinđa okolenđe kola ine ani nevolja, te posvetinđa pe zako đijekh šukar delo.
\p
\v 11 E terne udovicen ma čhiv ko popis, adalese so kad i požuda cidela len e Hristestar, mangena te den pe. 
\v 12 Ađahar upra peste anena osuda, adalese so phagle pumaro angluno dindo lafi e Devlese. 
\v 13 Sem adalestar soi lenjiva, siklile te džan oto čher ko čher, hem na samo soi lenjiva, nego hem ogovorinena hem mešinena pe kaj nane lengiri buti, vaćerindoj so na valjani. 
\v 14 Adalese mangava o terne udovice te den pe, te bijanen čhaven, te dikhen pumaro čher, te na den than e neprijateljese zako prigovor. 
\v 15 Adalese so, nesave već cidinde pe e veratar hem džele palo Sotoni.
\p
\v 16 Te nesava vernica isi udovice kolen dikhela, nek ćerel ađahar, te na perel o pharipe upri khanđiri, te šaj i khanđiri te pomožini e udovicen kolen čače nane ko te dikhel.
\s E starešinendar
\p
\v 17 O starešine kola šukar vodinena i khanđiri zaslužinena duplo čast, najangle okola kola propovedinena hem sikavena. 
\v 18 Adalese so o Sveto lil vaćeri: “Ma phand o muj e guruvesoro sar te na hal kad ćerela buti e điveja” hem “O bućarno zaslužini pli plata.” 
\v 19 Ma prihvatin i tužba protiv o starešina, sem kad isi duj ili trin svedoci. 
\v 20 Okolen kola grešinena ukorin anglo sarijende, te šaj averen te ovel dar te grešinen.
\p
\v 21 Rodava tutar anglo Devel, anglo Hrist Isus hem anglo izabirime anđelja te ićere tut ko sa akava bizo predrasude hem te na ićere nekasiri strana.
\p
\v 22 Ma siđar te rukopoložine nekas. Ma te ovel tut ništa averengere grehencar; dikh te ačhove čisto.
\p
\v 23 Ma više pi samo pani, le pohari hem mol zako to želuco hem zako adava so but puti injan namborme.
\p
\v 24 Nesave manušengere grehija dičhovena, hem angleder olendar džana ko sudo e Devlesoro. A isi hem okola kasere grehija ka dičhoven ko sudo. 
\v 25 Ađahar, hem e manušengere šukar delja dičhovena, a hem kad na dičhovena, našti te ačhoven garavde.
\c 6
\p
\v 1 Sare kola akharena pharipe sar robija nek dikhen pumare gospodaren sar dostojnonen zako sa o poštujiba, te na vaćeri pe bišukar e Devlesere anavestar hem amare sikavibnastar. 
\v 2 A okola robija kaserei gospodarija vernici, te na ceninen len po hari adalese soi on lengere phralja. Nego, nek služinen lenđe po šukar, adalese so korist adalestar isi e mangle phraljen kolai vernici.
\p Adava sikav hem rode e manušendar te ćeren!
\s O hovavno sikaviba hem mangipe zako pare
\p
\v 3 Te neko averčhane sikaj e manušen hem na složini pe e saste sikavibnaja amare Gospodesere e Isuse Hristesere hem e sikavibnaja savoi pobožno, 
\v 4 ovi barikano hem na džanel ništa. Esavko patini oti namborme želja te raspravini pe hem te irini lafija, savestar ikljovena ljubomora, kavge, bišukar vaćeriba hem bišukar misliba averendar 
\v 5 hem stalna rasprave maškaro manuša kolen isi rumime godi, kolai cidime e čačipnastar, kola mislinena da prekali pobožnost ka barvaljon.
\p
\v 6 A čačei i pobožnost baro barvalipe tei o manuš zadovoljno okoleja so isi le. 
\v 7 Adalese so, ništa na anđam ko akava sveto, i ništa olestar našti ni te legara. 
\v 8 Adalese, te isi amen so te ha hem so te urja, valjani adaleja te ova zadovoljna. 
\v 9 A okola kola mangena te barvaljon, perena ano iskušenje hem ani zamka, hem ano but nerazumna hem bišukar želje save legarena e manušen ani propast hem uništenje. 
\v 10 Adalese soi o mangipe zako pare koreno đijekhe bišukaripnasoro. Nesave edobor mukle pe ano adava, i cidinde pe e veratar hem korkore pumenđe ande but dukha.
\s E Pavlesere poslednja uputstvija
\p
\v 11 Ali tu, e Devlesere manušeja, naš adalestar, a dža pali pravednost, pobožnost, vera, mangipe, strpljivost hem krotkost. 
\v 12 Mar šukar e verakoro mariba, ićer tut ko večno dživdipe ko savo o Devel vičinđa tut hem ko savo anglo but svedoci šukar ispovedinđan ti vera. 
\v 13 Anglo Devel, kova dela dživdipe zako sa, hem anglo Hrist Isus, kova svedočindoj anglo Pontije Pilat dinđa šukar ispovediba, naredinava će 
\v 14 te ićere akaja naredba bizi mana hem čisto đi ko dive kad ka avel amaro Gospod Isus Hrist. 
\v 15 Adava ka ćerel te ovel ano pravo vreme o blagoslovime hem o jekh Vladari, o Caro upreder o carija hem o Gospodari upreder o gospodarija. 
\v 16 Ovi o jekh kova nikad naka merel hem kova bešela ano svetlost kaj niko našti te avel. Ole nijekh manuš na dikhlja, ni šaj te dikhel le. Olese čast hem večno zoralipe. Amen.
\p
\v 17 E barvalenđe kolai ko akava sveto naredin te na ćeren pe barikane hem te na čhiven plo pouzdanje ano nesigurno barvalipe, nego ano Devel kova barvale dela amen sa zako uživiba, 
\v 18 te ćeren šukaripe, te oven barvale šukare ćeribnaja, te oven darežljiva hem spremna te delinen pumaro averencar. 
\v 19 Ađahar ka čedenfse barvalipe kova ka ovel zoralo temelji zako vreme savo avela, te šaj ićeren pe ko čačikano dživdipe.
\p
\v 20 Timotej, arakh šukar okova soi tuće poverime. Cide tut taro biedevlesere čuče vaćeriba hem taro adava soi hovavne vičime džandipe savo protivini pe e čačipnase, 
\v 21 save nesave manuša ićerde hem adaleja cidinde pe e veratar.
\p I milost te ovel tumencar!