\id 1JN - Romani Arli Bible (RAB)
\ide UTF-8
\h 1. Jovan
\toc1 O prvo lil e Jovanesoro
\toc2 1. Jovan
\toc3 1. Jn
\mt O prvo lil e Jovanesoro
\c 1
\s O Lafi e dživdipnasoro
\p
\v 1 Okova so inele taro anglunipe, so šunđam, so amare jaćhencar dikhljam, so dikhaja ine hem so amare vastencar dolinđam, adava mothovaja oto Lafi e dživdipnasoro. 
\v 2 Adava dživdipe mothovđa pe, hem amen dikhljam le hem svedočinaja olestar, hem vaćeraja tumenđe e večnone dživdipnastar, savo inele koro Devel o Dad hem savo mothovđa pe amenđe. 
\v 3 A mothovaja tumenđe adava so dikhljam hem so šunđam, te šaj hem tumen ovel zajedništvo amencar. A amaroi zajedništvo e Dadeja hem lesere Čhaveja, e Isuse Hristeja. 
\v 4 Akava pisinaja tumenđe te šaj amari radost ovel pherdi.
\s O Develi svetlost
\p
\v 5 A akavai o lafi savo šunđam olestar hem savo tumenđe vaćeraja: O Develi svetlost hem ano leste nane ni hari tomina. 
\v 6 Te phenaja da isi amen zajedništvo oleja, a phiraja ani tomina, hovavaja hem na živinaja palo čačipe. 
\v 7 Ali, te phiraja ano svetlost, sar soi ov ano svetlost, isi amen zajedništvo jekh avereja, hem o rat lesere Čhavesoro e Isusesoro čistini amen taro đijekh greh.
\p
\v 8 Te phenaja da nane amen greh, korkore amen hovavaja hem nane ana amende čačipe. 
\v 9 Te priznajinaja amare grehija, ovi verno hem pravedno: ka oprostini amenđe o grehija hem ka očistini amen tari đijekh nepravda. 
\v 10 Te phenaja da na grešinđam, e Devle ćeraja hovavne hem lesoro Lafi nane ana amende.
\c 2
\p
\v 1 Mle čhavoralen, akava pisinava tumenđe te na grešinen. Ali, hem te neko ćerela greh, isi amen Zastupniko koro Dad, e Isuse Hriste, e pravedniko. 
\v 2 Ovi žrtva dindi zako oprostiba amare grehengoro, hem na samo amare nego hem sa e manušengere grehengoro.
\s O vernici valjani te ićeren pe ko naredbe e Devlesere
\p
\v 3 A palo akava džanaja da pendžaraja le: te ićeraja amen ko lesere naredbe. 
\v 4 Okova kova vaćeri da pendžari le, a na ićeri pe ko lesere naredbe, ovi hovavno hem ano leste nane čačipe. 
\v 5 A ko ićeri pe ko lesere lafija, ano leste o mangipe e Devlesoro čače alo đi ko savršenstvo. Palo adava džanaja da injam ano leste. 
\v 6 Ko vaćeri da ačhola ano leste, ov mora te živini ađahar sar so o Hrist živinđa.
\s Nevi naredba
\p
\v 7 Mle manglalen, na pisinava tumenđe nesavi nevi naredba, nego i purani naredba savi ine tumen taro anglunipe. Adaja purani naredbai o lafi savo šunđen. 
\v 8 A palem, pisinava tumenđe nevi naredba, savakoro čačipe dičhola ano leste hem ana tumende. Adalese so, i tomina nakhela, a o čačikano svetlost već sijajini.
\p
\v 9 Ko vaćeri dai ano svetlost, a mrzini ple phrale, panai ani tomina. 
\v 10 Ko mangela ple phrale, živini ano svetlost hem nane so te peraj le ano greh. 
\v 11 A ko mrzini ple phrale, ovi ani tomina – phirela ani tomina hem na džanel kaj džala, adalese so i tomina korjarđa lesere jaćha.
\p
\v 12 Pisinava tumenđe, čhavoralen,
\q1 adalese soi tumare grehija oprostime zbog olesoro anav.
\p
\v 13 Pisinava tumenđe, dadalen,
\q1 adalese so pendžarđen okole kovai taro anglunipe.
\p Pisinava tumenđe, terne muršalen,
\q1 adalese so pobedinđen e Bišukare.
\p
\v 14 Pisinđum tumenđe, čhavoralen,
\q1 adalese so pendžarđen e Dade.
\p Pisinđum tumenđe, dadalen,
\q1 adalese so pendžarđen okole kovai taro anglunipe.
\p Pisinđum tumenđe, terne muršalen,
\q1 adalese so injen zorale
\q1 hem so e Devlesoro lafi živini ana tumende
\q1 hem so pobedinđen e Bišukare.
\p
\v 15 Ma mangen akava sveto ni okova soi ano sveto. Te neko mangela o sveto, ano leste nane e Dadesoro mangipe. 
\v 16 Adalese so, sa soi ano sveto – i požuda e telosiri, i požuda e jaćhengiri hem o barikanipe zbog o barvalipe – na avela e Dadestar, nego e svetostar. 
\v 17 O sveto hem lesere požude nakhena, a ko ćerela e Devlesiri volja živini zauvek.
\p
\v 18 Mle čhavoralen, poslednjoi vreme, hem sar so šunđen, avela o antihrist. Već akana iklile but antihristija, hem palo adava džanaja dai poslednjo vreme. 
\v 19 Cidinde pe amendar, ali na inele čače amare. Adalese so, te čače inele amare, ka ačhoven ine amencar. Ali adaleja mothovđa pe da on nane amare. 
\v 20 Ali tumen isi pomazanje e Svetonestar, i sare džanen soi čačipe. 
\v 21 Na pisinava tumenđe adalese so na džanen o čačipe, nego adalese so džanen le hem adalese so nijekh hovajba na avela e čačipnastar. 
\v 22 Koi hovavno te nane okova kova na priznajini dai o Isus o Hrist. Ko na priznajini e Dade hem e Čhave – ovi o antihrist. 
\v 23 Ko na priznajini e Čhave, nane le ni e Dade. Ko priznajini e Čhave, isi le hem e Dade.
\p
\v 24 Okova so šunđen taro anglunipe, nek ačhol ana tumende. Te adava so šunđen taro anglunipe ačhola ana tumende, onda hem tumen ka ačhoven ano Čhavo hem ano Dad. 
\v 25 A akavai o obećanje savo dinđa amen: o večno dživdipe.
\p
\v 26 Akava pisinava tumenđe okolendar kola legarena tumen ko hovajba. 
\v 27 Ali tumen priminđen o pomazanje olestar, savo ačhola ana tumende, i na valjani neko te sikaj tumen. A lesoro pomazanje sikaj tumen oto sa, hem adavai čačipe, a na hovajba. Adalese, sar so sikavđa tumen, ađahar ačhoven ano Hrist.
\p
\v 28 I akana, mle čhavoralen, ačhoven ano leste, te šaj ovel amen pouzdanje anglo leste kad ov ka mothoj pe, te na lađa kad ka avel. 
\v 29 Sar so džanena dai o Hrist pravedno, džanena hem dai olestar bijando đijekh kova ćerela okova soi pravedno.
\c 3
\s E Devlesere čhave
\p
\v 1 Dikhen kobor mangipe dinđa amen o Dad: te vičina amen e Devlesere čhave. A čače amen adava injam. O manuša e svetosere na pendžarena amen adalese so na pendžarde ole. 
\v 2 Mle manglalen, akana injam e Devlesere čhave, a pana nane amenđe mothovdo so ka ova. Ali džanaja so, kad o Hrist ka mothoj pe, ka ova sar oleste, adalese so ka dikha le esavke sar soi ov čače. 
\v 3 I đijekhe kas isi adaja nada ano leste, čistini pe sar soi hem o Hrist čisto.
\p
\v 4 Đijekh kova ćerela greh, phagela o Zakoni, adalese soi o greh bezakonje. 
\v 5 Tumen džanen da o Hrist mothovđa pe te cidel o grehija hem da ano leste nane greh. 
\v 6 Ko ačhola ano leste, na živini ano greh. A ko živini ano greh, ni dikhlja le ni pendžarđa le.
\p
\v 7 Mle čhavoralen, ma muken nikas te hovaj tumen. Ko ćerela okova soi pravedno, ovi pravedno sar soi o Hrist pravedno. 
\v 8 Ko živini ano greh, ovi e bengestar, adalese so o beng grešini taro anglunipe. Adalese mothovđa pe o Čhavo e Devlesoro, te uništini e bengesere delja. 
\v 9 Koi bijando e Devlestar, na živini ano greh, adalese so e Devlesoro seme živini ano leste. Ov našti te živini ano greh, adalese soi bijando e Devlestar. 
\v 10 Palo akava pendžarđona e Devlesere čhave hem e bengesere čhave: ko na ćerela okova soi pravedno hem ko na mangela ple phrale, nane e Devlestar.
\s Te manga jekh avere
\p
\v 11 Adalese soi akava o lafi savo šunđen oto anglunipe: te manga jekh avere. 
\v 12 Ma oven sar o Kain, kova inele e Bišukaresoro hem mudarđa ple phrale. A sose mudarđa le? Adalese so lesere delja inele bišukar, a o delja lesere phralesere inele pravedna, i mrzinđa le. 
\v 13 Ma čudinen tumen, phraljalen, te o manuša e svetosere mrzinena tumen. 
\v 14 Amen džanaja da nakhljam taro meriba ano dživdipe, adalese so mangaja e phraljen. Ko na mangela ple phrale, ačhola ano meriba. 
\v 15 Đijekh kova mrzini ple phrale, ovi ubica, a džanen da nijekh ubica nane le ana peste večno dživdipe.
\p
\v 16 Palo akava džanaja soi o mangipe: o Hrist dinđa plo dživdipe amenđe. Adalese hem amen injam dužna te da amaro dživdipe amare phraljenđe. 
\v 17 Kas isi barvalipe akala phuvjakoro hem dikhela ple phrale so nane le, i na ćerela ništa te pomožini lese, sar šaj e Devlesoro mangipe te ačhol ano leste?
\p
\v 18 Mle čhavoralen, na mangaja samo lafencar hem čhibjaja, nego ćeribnaja hem čačipnaja. 
\v 19 Palo adava ka džana da injam e čačipnastar hem ka ovel amen ani savest mir anglo Devel 
\v 20 te i savest osudini amen. Adalese so, o Develi po baro oti amari savest hem ov sa džanel.
\p
\v 21 Mle manglalen, te amari savest na osudini amen, isi amen pouzdanje anglo Devel 
\v 22 hem dobinaja olestar sa so rodaja, adalese so ićeraja lesere naredbe hem ćeraja okova soi olese šukar. 
\v 23 A akavai olesiri naredba: te verujina ano anav lesere Čhavesoro e Isuse Hristesoro hem te manga jekh avere sar so naredinđa amenđe. 
\v 24 Ko ićeri lesere naredbe ačhola ano Devel, hem o Devel ačhola ano leste. A palo akava džanaja da ov ačhola ana amende: palo Duho kole dinđa amen.
\c 4
\s E Duhen valjani te proverini pe
\p
\v 1 Mle manglalen, ma verujinen đijekhe duhose, nego proverinen e duhen – te dikhen avena li taro Devel – adalese so iklile but hovavne proroci ano sveto. 
\v 2 Palo akava ka pendžaren e Devlesere Duho: đijekh duho kova priznajini da o Isus Hrist alo ano telo, ovi taro Devel. 
\v 3 I đijekh duho kova na priznajini e Isuse, nane taro Devel, nego ovi taro antihrist. A šunđen zako antihrist da avela, hem već akanai ano sveto.
\p
\v 4 Mle čhavoralen, tumen injen e Devlestar hem pobedinđen len, adalese so okova kovai ana tumende po baroi okolestar kovai ano sveto. 
\v 5 O hovavnei proroci akale svetostar – adalese vaćerena sar o sveto so vaćeri hem o sveto šunela len. 
\v 6 Amen injam e Devlestar. Ko pendžari e Devle, šunela amen, a ko nane e Devlestar, na šunela amen. Ađahar pendžaraja kovai o Duho e čačipnasoro, a kovai o duho e hovajbnasoro.
\s O Develi mangipe
\p
\v 7 Mle manglalen, hajde te manga jekh avere, adalese soi o mangipe e Devlestar. Đijekh kova mangela, ovi e Devlestar bijando hem pendžari e Devle. 
\v 8 Ko na mangela, ov na pendžari e Devle, adalese soi o Devel mangipe. 
\v 9 Ađahar o Devel mothovđa plo mangipe amenđe: bičhalđa ple jekhore Čhave ano sveto te šaj živina prekalo leste. 
\v 10 Ano akavai o mangipe: na ano adava da amen mangljam e Devle, nego da ov manglja amen hem bičhalđa ple Čhave sar žrtva zako oprostiba amare grehengoro. 
\v 11 Mle manglalen, te amen o Devel edobor manglja, onda hem amen injam dužna te manga jekh avere. 
\v 12 E Devle niko nikad na dikhlja; ali te mangaja jekh avere, o Devel živini ana amende hem lesoroi mangipe ana amende savršeno.
\p
\v 13 Palo adava džanaja da živinaja ano leste hem ov ana amende: dinđa amen ple Duhostar. 
\v 14 A amen dikhljam hem svedočinaja da o Dad bičhalđa e Čhave te ovel Spasitelji e svetosoro. 
\v 15 Ko priznajini dai o Isus o Čhavo e Devlesoro, o Devel živini ano leste hem ov ano Devel. 
\v 16 A amen pendžarđam hem verujinđam ano mangipe savo o Devel isi le premalo amende. O Develi o mangipe. Ko živini ano mangipe, ano Devel živini hem o Devel živini ano leste. 
\v 17 Palo adava o mangipe ana amende ovela savršeno, te šaj ovel amen pouzdanje ko Dive oto sudo; adalese so, savoi o Hrist, esavke injam hem amen ano akava sveto.
\p
\v 18 Ano mangipe nane dar, nego o savršeno mangipe ispudini i dar. Okova kova darala, isi le dar oti kazna, so značini da nane savršeno ano mangipe.
\p
\v 19 Amen mangaja adalese so o Devel najangle manglja amen. 
\v 20 Te neko vaćeri: “Mangava e Devle”, a mrzini ple phrale, ovi hovavno. Adalese so, ko na mangela ple phrale, kole dikhela, ov našti te mangel e Devle, kole na dikhela. 
\v 21 A akaja naredba isi amen olestar: ko mangela e Devle, te mangel hem ple phrale.
\c 5
\s Pobedini pe e veraja ano Čhavo e Devlesoro
\p
\v 1 Đijekh kova verujini dai o Isus o Hrist, bijandoi e Devlestar. I đijekh kova mangela e Dade, mangela hem okole kovai bijando lestar. 
\v 2 Palo akava džanaja da mangaja e Devlesere čhaven: kad mangaja e Devle hem kad ćeraja lesere naredbe. 
\v 3 Adalese so, akavai o mangipe premalo Devel: te ićera amen lese ko naredbe. A olesere naredbe nane phare. 
\v 4 Adalese so, sa soi e Devlestar bijando, pobedini e sveto. A akavai pobeda savi pobedinđa e sveto: amari vera. 
\v 5 Koi pobedniko upreder o sveto te nane okova kova verujini dai o Isus o Čhavo e Devlesoro?
\p
\v 6 Ov, o Isus Hrist, alo prekalo pani hem o rat – na samo prekalo pani nego prekalo pani hem o rat. A o Duhoi adava kova svedočini adalestar, adalese soi o Duho o čačipe. 
\v 7 Ađahar, isi trin so svedočinena: 
\v 8 o Duho, o pani hem o rat – hem adala trin dena jekh svedočanstvo. 
\v 9 Te prihvatinaja o svedočanstvo e manušengoro, sar onda te na prihvatina o svedočanstvo e Devlesoro savoi po baro, adalese soi adava o svedočanstvo saveja o Devel svedočinđa zako plo Čhavo. 
\v 10 Ko verujini ano Čhavo e Devlesoro, isi le adava svedočanstvo ana peste. A ko na verujini e Devlese, ćerđa le dai hovavno, adalese so na verujinđa ano svedočanstvo saveja o Devel svedočinđa zako plo Čhavo. 
\v 11 A akavai adava svedočanstvo: o Devel dinđa amen večno dživdipe, hem adavai dživdipe ano lesoro Čhavo. 
\v 12 Kas isi e Čhave, isi le dživdipe. Kas nane e Čhave e Devlesere, nane le dživdipe.
\s E Devlesere čhave na ačhovena ano greh
\p
\v 13 Akava pisinđum tumenđe kola verujinena ano anav e Devlesere Čhavesoro te džanen da isi tumen večno dživdipe. 
\v 14 A akavai o pouzdanje savo isi amen ano leste: te rodaja nešto soi pali olesiri volja, ov šunela amen. 
\v 15 A te džanaja da šunela amen kad so god rodaja, džanaja da isi amen adava so rodinđam lestar.
\p
\v 16 Te neko dikhela ple phrale da ćerela greh savo na legari ano meriba, nek molini olese hem o Devel ka del le dživdipe. Vaćerava okolendar kasoro greh na legari ano meriba. Ali, isi hem greh savo legari ano meriba. Zako adava greh na phenava te molini. 
\v 17 Đijekh nepravdai greh, ali isi greh savo na legari ano meriba.
\p
\v 18 Džanaja da đijekh kovai bijando e Devlestar na živini ano greh, nego arakhi le o Čhavo e Devlesoro, hem o Bišukar našti te ćerel lese ništa. 
\v 19 Amen džanaja da injam e Devlestar, a dai sa o sveto ani vlast e Bišukaresiri. 
\v 20 A džanaja da o Čhavo e Devlesoro alo hem dinđa amen godi te pendžara e čačikane Devle. A amen injam ano čačikano Devel, ano lesoro Čhavo o Isus Hrist. Ovi o čačikano Devel hem o večno dživdipe.
\p
\v 21 Mle čhavoralen, arakhen tumen e idolendar!