\id EPH - Rikbaktsa NT -Brazil 2011 (DBL -2013) 
\h Epesios 
\toc1 Pauro Epeso ezektsa bo ziwatahaka 
\toc2 Epesios 
\toc3 Ep 
\mt1 Pauro Epeso ezektsa bo ziwatahaka 
\ip Pauro Epeso ezektsa tuk niapykyrykspyk petok ziytyk tsehe. Sesus soho ty nisispirikpoko iwaze mekybotu niparakzo. Aibatohi Pauro sakyriukanikitsa hurukwy eze niapykyryk. Sesus soho kytsa nisispirikpoko iwatsahi kytsa sakyriukanikitsa hurukwy zioktyhyryk anaeze hi Epeso ezektsa bo ziwatahaka, Deus soho ty nisispirikpoko. Deus hyrikoso ituk niapykyryk iwatahi Deus harere ziwatahaka, abaka katsa kino niwatihi iwatahaha humo tanymyryky. 
\c 1  
\p  
\v 1 Uta Pauro. Deus zikwatawy iykzoho my ikiahatsa Epeso ezektsa bo piwatahaka. Ikiahatsa Sesus Kiristu harere bo hyỹ tsimykaranaha iwatsahi ahaspirikporẽtsa. Tubabatu Deus kape niy: 
\p — Ikia myzubahatsa bo tsimy. Wasaniha ty sibo tytsasoko — niy. 
\p Yhỹ iky. 
\p  
\v 2 Uta tihi: 
\p — O Deus myzo. Sesus Kiristu mypehakatsa my hỹ. Ikiahatsa Epeso ezektsa bo tysisapywyky. Ahahumo sakurẽtsa moziknaha hỹ — my. Iwa Deus bo ahatsyhyryze ikpamykysoko hỹ. 
\s1 Kiristu humo Deus mymysapywyikik. 
\p  
\v 3 Kyze katsaktsa Deus Sesus Kiristuzo bo tsimypamykysoziukunahaktsa kytsa! Atahi isapyrẽnikia ty mybo nyny niy. Atahi ihyrikoso mybo zipeha atakta mytuk mynapykyryk hỹ. Iwatsahi katsa: 
\p — O Deus ikia zuba tsamysapyrẽta. Ikia amysakihikynikita ahumo ka mykurẽtsa — tsimykaranaha.  
\v 4 Deus mybarawy nizukni. Isuknihibyize katsa ityryktsa nimywatawy. Nawa Sesus Kiristu tuk nimywatawy. Tubabatu katsa mysapyrẽtsa nimysukni tsihikik iwatahi nimywatawy. Deus tatyryktsa bete nimysukni iwa nizihikik asaktsa pisapywyikiknaha iwatahi Kiristu nimywatawy. 
\p Tapara myhyritykyhybyri eze myhumo tsimypokzitsiarẽta.  
\v 5 Atahi nimysukniwy iwatsahi ihyrytsa babatsa tsimoziknaha. Sesus Kiristu mymytsumuẽhĩ naha humo hi tsihyrinymyrẽta iwaze ihyrytsa babatsa tsimoziknaha iwa niyzihikik. Katsaktsa ihyrytsa babatsa tsimoziknaha iwa tatu tuka nikara.  
\v 6 Iwaze Deus bo tsimysakibazikiknahaktsa! 
\p — O Deus myzo ikia myhumo ka tsamypokzitsiarẽta. Iwatahi Sesus mybo zipeha mymytsumuẽhĩ, iwaze mybarawy ezektsa bo inasik mywata niyzik. Ikia zuba tsamysapyrẽta. Batu aty tohi ikia wata. Katsa tynamysapywyikik batu ihuakbaratu tsimyzihikik iwatsahi ahumo mykurẽtsa. Ikia wasani hỹ — tsimykaranaha. 
\p  
\v 7 Deus tse babata myhumo tsimypokzitsiarẽta ituk hi tsimynapykyknaha. Iwatsahi mykurẽtsa. Atahi mysapyzeky nihyrikosokda. Kytsa iharapatawyhyta humo zihyriziknaha iwaze zibezenaha. Iwaze Deus bo mymyoktyhyryk. Nihyrikosokdaze imysapybara ty tsikykaranaha ana humo hi Deus nimyokzohik ihumo nispiriktsokda. Hawa batu imysapy tsimykaranaha abaka batu mykparawy. Deus tse humo mymysapywyikik.  
\v 8 Iharere baba ana kino mybo nitsasoko ana humo hi hyỹ tsimykaranaha iwatsahi myspirikporẽtsa. 
\p  
\v 9-10 Iharere Sesus soho tisapyrẽna hỹ. Tubabatu Deus tihi: 
\p — O Kiristu zipehata sizubarẽtsa pehatsa mozik. Nanabyitaba abazubata mozik. Bijoikpe ezektsa mybarawy ezektsa kino niwatihi iharere bo zuba hyỹ mynakaranaha — niy. Abaka iharere tsinymyrynaha. Iharere mybo motsasoko. Nawa puruze piwatawy iharere Kiristu soho wasani my iwa botu nikara. Aba atsatu mybo motsasoko. 
\p  
\v 11-12 Tapara katsaktsa Sudeutsa tsimaha Kiristu taperyikik. Atahi Deus bo mymyoktyhyryk ata hi taperyky. Tubabatu Deus nimywatawy, Kiristu harere bo hyỹ tsimaha iwatsahi myspirikporẽtsa tsimoziknaha anahi nizihikik. Mysapyrẽtsa tsimoziknaha niyzihikik. Iwaze kytsa sizubarẽtsa tihi: 
\p — O Deus ikia zuba tsamysapyrẽta myzubatsa atyryktsa moziknaha. Simysapyrẽtsa moziknaha iwatahi tsamysapyrẽta — mykaranaha. Katsaktsa Kiristu humo wasani tsimykaranaha ana humo hi sihyrinymyrẽtsa iwaze Deus bo motsasoziukunaha. Hawa Deus motsaso atsatu mykara. Iwatsahi Sesus Kiristu harere bo hyỹ tsimykaranaha hỹ. 
\p  
\v 13 Ikiahatsa Sudeutsabyitsa mytuk mykaranaha. Ikiahatsa niwatihi Kiristu tuk tsimynapykyknaha hỹ. Deus wasaniha humo mymyoktyhyryk ana soho botu tsiwabynaha iwatsahi iharere bo hyỹ tsimykaranaha. Sesus Kiristu humo tsikspirikponahaze Deus hyrikoso ahabo zipeha. Ihyrikoso ahatuk mynapykyryk. 
\p Kytsa tahanamy humo tahanaro ziwatahakanaha iwaze ustsa kytsa sinamy pinynahaze ana humo hi sihyrinymyrẽtsa. Ana wa hi Kiristu harere humo Deus hyrikoso ahabo zipeha iwaze ityryktsa tsimoziknaha ana humo hi ahahyrinymyrẽtsa hỹ.  
\v 14 Deus hyrikoso mytuk mynapykyryk bykyze Deus isapyrẽnikia ty mybo nyny my. Sesus tuktsa myzubarẽtsa bo Deus isapyrẽnikia ty botu ziperykynaha ana kino mybo nyny my. Iwa botu nitsaso. Iharere wasani my. Ana kino tsinymyrynaha. Deus hyrikoso mybo zipeha iwa iharere soho tsinymyrykynaha. Imysapybyikia ty batu mykparawy iwaze isapyrẽnikia ty zuba mybo nyny my nawa botu nitsaso atsatu my. Iwatsahi katsaktsa: 
\p — O Deus myzo ikia zuba tsamysapyrẽta. Ikia zuba tsapunihikrẽta — tsimykaranaha hỹ. 
\s1 Pauro Epeso ezektsa tsyhyryze Deus bo nipamykysoko. 
\p  
\v 15 Kyze kytsa ahasoho kabo nitsasokonaha. Siharere tisapyrẽna. Asahi: 
\p — O Epeso ezektsa Sesus harere bo hyỹ mykaranaha iwatsahi sispirikporẽtsa maha. Tyhapepokzitsikinaha — nikaranaha. 
\p  
\v 16 Ana humo ziwabyze ahatsyhyryze Deus bo mopamykysoko. Deus pahasapywy tsihikik ibo hi mopamykyso. Kakurẽta ibo mopamykysoikik utahi: 
\p  
\v 17 — O Deus myzo. Sesus Kiristu mypehakatsa my. Ikia Sesus Kiristu pehatsa tsimy. Myzo ikia zuba tsamysapyrẽnikita. Epeso ezektsa tysitsumuẽhĩkta! Hawa ja mozurukunaha tysihyrinymyryky. Sihyrinymyrẽtsa zeka ahumo sispirikporẽtsa, ana humo kino myzapykyky.  
\v 18 Ikia isapyrẽnikia ty sibo nyny tsimy. Sesus tuktsa sizubarẽtsa isapyrẽnikia ty sibo nyny tsimy. Iwa botu tsiktsaso. Myzo isapyrẽnikia ty tsipiperykynaha. Tsipiperykynahaze tymytsumuẽhĩkta myzo, tsimaha. 
\p  
\v 19-20 Ikia zuba tsapunihikrẽta ba hawa tohi zasukninaha. Kiristu nihyrikosokdaze ikia hi tsikzihyrizikpowyhikzo. Ikia humo bijoikpe bo nido abaze apanuryk taba modyhyky. Ikia tuk kytsa mysipehaka. Azikwy ty Epeso ezektsa Sesus tuktsa sisopyk azikwy tuk mozurukunaha. 
\p  
\v 21 Atakta abazubata my. Myzubatsa iharere bo hyỹ mykaranaha. Bijoikpe iknyktsa iharere bo hyỹ mykaranaha. Hyrikoso sapybara wakatsa kino iharere bo yhỹ mykaranaha. Mybarawy ezektsa pehatsa sizubarẽtsa iharere bo hyỹ mykaranaha. Atahi abazubata tsizikwyrẽta hỹ.  
\v 22-23 Sesus Kiristu hi mybarawy ezektsa iharere bo hyỹ mykaranaha. Atakta koikny bakta tu batu amy tohi mykara iwatahi tsihyrinymyrẽta hỹ. Ihyrikoso nanabyitaba my. Ihyrikoso mytuk mynapykyryk. Iwatahi Sesus Kiristu mype niy: 
\p “Ikiahatsa kanury wata” niy. Hawa kytsa tahanury nisipehakanaha nawa Sesus Kiristu ituktsa mysipehaka. Ikia Sesus Kiristu tuktsa humo tsamypokzitsiukrẽta. Iwaze ikia Sesus Kiristu humo tsimymysapywyikik myzo — my. Iwa ahatsyhyryze Deus bo mopamykysoko. 
\c 2  
\s1 Kiristu humo myspirikporẽtsa tsimoziknaha. 
\p  
\v 1 Tapara ikiahatsa ahamysapybyitsa tsikykaranaha iwaze Deus okzeka batu ahaspirikpo iwatsahi siakbatsa watsa tsikykaranaha. Deus harere bo batu hỹ tsikaha. Hawa siakbatsa sityryk niakba naha tsa wa. Iwa batu ahaspirikpo. Deus zahasapywyky ihumo mekywa tu tsimoziknaha ihumo mekywa tu tsimyzurukunaha.  
\v 2 Taparaka sispirikpobyitsa harere bo yhỹ tsikykaranaha. Asaktsa Satanas hyrikoso sapybara pehatsa harere piwabyziukunaha siharere bo kino yhỹ tsikykaranaha. Satanas bijoikpe ikny mybarawy bo izumu anaeze mozuruku.  
\v 3 Katsa Sudeutsa niwatihi ahawatsa zikzurukunaha. Mysapybyitsa tsikykaranaha, hawa mytsaty tsikykaranaha ana kino mysopyk. Taha bo zuba ziknakaranaha. Katsaktsa wasani tsimaha mytsaty ahabyitsa tsikykaranaha iwa mypetu mysopyk. Deus mype niy: 
\p — Ikiahatsa Sudeutsa ustsa kytsa watsa tsimaha, kaokzeka batu ahamysapy tsimaha. Sinini ykarawy bo pahapehahik — niy. 
\p  
\v 4 Deus hiba myhumo tsimypokzitsiarẽta. Katsaktsa iharere bo ma mysopyk byitsa tu iwatatu myhumo imysapyrẽta mymysapywy tsihikik hỹ.  
\v 5 Katsaktsa tsikyhyrikosokdanahaze iwaze myspitu tsikyzikzonaha tsawatsa. Katsaktsa mysapybyitsa tsikykaranaha iwaze siakbatsa watsa Deus inamyhyrizikpowyhikzo. Sesus wata inamyhyrizikpowyhikzo iwatsahi iharere bo zuba hyỹ tsimykaranaha. Iharere zuba mykparawy iwa hawa Deus mozihikik katsa kino niwatihi tsimyzihikiknaha. Ana humo niyze mynamy batu ziakse. Batu amy tohi ty zihuaknaha. Atahi myhumo tsimypokzitsiarẽta babata iwa niy. 
\p  
\v 6 Deus Kiristu zihyrizikpowyze jobo bijoikpe bo nido. Anaeze ituk tawahi mynapykyryk. Katsa kino niwatihi iharere bo hyỹ tsimykaranahaze isoho bo mytsaty tsimykaranaha. Botu Sesus Kiristu tuk tsimynapykyryknaha, mybarawy ezektsa Deus hyrikoso botu namykse iwatsahi ituk tsinapykyryknaha hỹ.  
\v 7 Deus myhumo tsimypokzitsiarẽta iwatahi Kiristu Sesus nimytsumuẽhĩkĩ. Nimytsumuẽhĩze hawa Deus mozihikik ziwatawyky. Isapyrẽnikia mybo pinyny tsihikik ana hi tsinymyrykynaha. Ustsa kytsa mysoho tihi: 
\p — Hawa Deus mysisapywyky — mykaranaha. 
\p  
\v 8 Deus myhumo tsimypokzitsiarẽta iwatahi mymysapywyky. Sesus izumuze tazo bo mymyoktyhyryk niy. Katsa zuba zeka Deus bo ba zikumunaha. Iwatahi Deus myzo Sesus zipehahik atahi Deus bo mymyoktyhyryk ihumo zuba Deus tyryktsa tsimoziknaha hỹ. Katsa ibo batu amy tohi ihuak ty nyny zikaha. Deus zuba isapyrẽnikia ty zuba mybo nyny niy. 
\p  
\v 9 Katsaktsa Deus tyryktsa tsimoziknaha. Deus hi tatyryktsa nimysukniwy iwatsahi katsa batu tyso. 
\p — O mysapyrẽtsa iwatsahi Deus tyryktsa tsimoziknaha — tsimaha. Iwa batu aty tohi tyso. Deus zuba katsa ityryktsa nimysukniwy Sesus humo Deus bo mymyoktyryk my.  
\v 10 Abaka Deus tyryktsa tsimaha mekywa tu tsimoziknaha. Sesus Kiristu harere bo hyỹ tsimykaranaha iwatsahi ihumo myspirikporẽtsa mekywa tu tsimyzurukunaha. Sesus tuktsa sizubarẽtsa ihumo simysapyrẽtsa moziknaha. Tubabatu Deus tihi: 
\p — O katyryktsa Sesus Kiristu watsa mozurukunahaze ana kino mozihikik. Ustsa kytsa mysitsumuẽhĩnaha iwa mozurukunaha hỹ — niy. 
\p Iwaze mymytsumuẽhĩnaha nawa kytsa bo mozihikik atsa tu mymytsumuẽhĩkĩnaha hỹ. 
\s1 Parakbaha Deus tyryktsa tsimoziknaha. 
\p  
\v 11-12 Tapara ahaspirikpobyitsa zikzurukunaha. Ana bo mytsatytaha Kiristu harere bo batu hỹ tsikaha isoho humo batu ahaspirikpo. Ikiahatsa Sudeutsabyitsa tsimaha. Ahanury humo iwatawyhybyitsa Deus wasania ty batu ahawabyhy. Sudeutsabyitsa tu batu Isareu tsekokatsa ka. Bipyritsa tsikaha. Deus wasania ty Sudeutsa ziperykynaha ana kino batu ahawabyhy iwatsahi hawa tisapyrẽna batu mytsaty tsikykaranaha. Deus kytsa mysitsumuẽhĩ tsihikik ana humo hi batu ahahyrinymyry. 
\p  
\v 13 Abaka meky watu tsimaha. Wasani tsimykaranaha. Sesus Kiristu iharapatawyhyta humo zihyrizikiknaha iwaze zibezenaha. Mysapyzeky nihyrikosokdaze Deus bo mymyoktyhyryk niy. Katsa ihumo myspirikporẽtsa tsikyziknaha iwaze Deus bo mymoktyhyryk. Iwatsahi ahape mysopyk mytukytsa tsimykaranaha. Batu bipyritsaka tsimaha. Myzubarẽtsa iharere bo zuba hyỹ tsimykaranaha. 
\p  
\v 14 Taparaka katsa sisukyrytsitsa abaka myzubarẽtsa Kiristu harere bo hyỹ tsimykaranaha iwatsahi taharapepokzitsikinaha. Sudeutsa, Sudeutsabyitsa kino niwatihi ihumo myspirikporẽtsa iwaze myharereziuwytsa tsimoziknaha. Taparaka metutu ziknakaranaha ipokpedawy waha abaka ihumo nihokda. Katsaktsa ikiahatsa kino niwatihi Deus tyryktsa tsimaha. 
\p  
\v 15 Tubabatu Deus harere Moises bo nitsaso. Anaharere Moises ziwatahaka. Sudeutsa anaharere tsizubarẽna bo yhỹ ziknakaranaha. Tsihokdaharẽna. Anaharere bo yhỹ nikaranahaze simysapybyitsa nikaranahaze iwaze Deus nisiokzohik. Anaharere humo hi yhỹ nikaranahaze batu zikaha. Abaka Deus harere ezytyk wasani iwaze iokzeka mysapyrẽtsa tsimoziknaha. Kiristu myzubaha sapyzeky nihyrikosokda iwatsahi ihumo mekywa tu tsimoziknaha. Sudeutsa, Sudeutsabyitsa kino niwatihi abaka atsaezubaha tsimyzurukunaha. Iharere bo zuba yhỹ tsimykaranaha iwatsahi taharapepokzitsikinaha hỹ. Iwa Deus okzeka mysapyrẽtsa tsimoziknaha. Katsa ikiahatsa kino niwatihi Deus tyryktsa tsimaha. 
\p  
\v 16 Kiristu iharapatawyhyta humo zihyriziknahaze nihyrikosokda kytsa sizubarẽtsa sapyzeky nihyrikosokda iwaze Deus simysapybyitsa nikaranahaze nisiokzohik. Abaka Deus Sesus tuktsa bo mysisapywyky. Asaktsa Sudeutsa, Sudeutsabyitsa kino niwatihi Sesus tuktsa sizubarẽtsa mysisapywyky. Ihumo myspirikporẽtsa Sesus harere bo zuba hyỹ tsimykaranaha iwatsahi batu mysukyrytsitsa tsimaha. Ihumo taharapepokzitsikinaha, Sudeutsa Sudeutsabyitsa kino niwatihi, abaka atsaezubaha ityryktsa tsimaha. 
\p  
\v 17 Sesus Kiristu mybarawy bo inasik iwaze Deus wasania ty tsiwabynaha. Tapara ikiahatsa Sudeutsabyitsa Deus harere batu ahahyrinymyry abaka Deus wasania ty tsiwabynaha iwatsahi ahakurẽtsa. Katsaktsa niwatihi tapara Deus harere Moises ziwatahaka ana humo hi myhyrinymyrẽtsa. Abaka Deus wasania ty tsiwabynaha iwatsahi mykurẽtsa. Deus Sesus humo batu iakyri, myhumo batu iakyri iwa ityryktsa tsimoziknaha. Deus Sesus tuktsa sizubarẽtsa mysisapywyky batu iakyri.  
\v 18 Kiristu mysapyzeky nihyrikosokda iwatsahi mykurẽtsa Deus myzo okzeka mysapyzeky niyzik. Ihyrikoso mybo natasapy. Sesus humo myspirikporẽtsa iwatsahi Deus bo tsimypamykysonahaze myharere piwabyky. 
\p  
\v 19 Iwaze ahakurẽtsa tsimoziknaha. Abaka Deus tyryktsa tsimaha. Ikiahatsa taparaka bipyritsa abaka batu, Deus tyryktsa tsimoziknaha. Deus hyrytsa tsimaha. 
\p  
\v 20 Ikiahatsa Sesus Kiristu mypehakatsa tuktsa tsimaha. Katsaktsa Deus ykzohotsa wasania ty ahabo tsinatsasokonaha iwatsahi Sesus humo ahaspirikporẽtsa tsimaha. Deus sohokotsa niwatihi siharere bo hyỹ tsimykaranaha. Ikiahatsa Sesus humo ahaspirikporẽtsa iwatsahi katsaktsa mysopyk mytuk kytsa tsimaha. Hawa kytsa wahoro mozoknikinaha haraharetsa mysizozokonahaze kywa anawahi myharere Deus sohotsa sihyrinymyrykytsa kino niwatihi Sesus tuktsa siharere bo hyỹ mykaranahaze Deus tyryktsa moziknaha. Hawa kytsa wahoro mozoknikinahaze tapara harahare tsiziurẽta zik mahaze ustsa haraharetsa ty ibaze zozo mykaranaha wa. Ata harahare tsiziurẽta humo ustsa haraharetsa buruhuwa babatu zozozo mykaranaha. Sesus Kiristu hi harahare tsiziurẽta wata atakta tapara piziknahaze tawata iwaze ituktsa haraharetsa watsa ihumo buruhuwa zozozo mykaranaha iwaze Deus tyryktsa tsimoziknaha. Sesus Kiristu humo atahi myhyrizikwanita. 
\p  
\v 21 Hawa kytsa haraharetsa iharahorokwytsa ty, hwitsa iwa wahoro humo zozozo mykaranaha ana waha Deus Sudeutsa, Sudeutsabyitsa kino niwatihi kytsa sizubarẽtsa ityryktsa moziknaha. 
\p  
\v 22 Tapara Deus wahoro zubata anaeze ziknapykyryk. Abaka Sudeutsa, Sudeutsabyitsa sizubarẽtsa situk mynapykyryk. Deus hyrikoso situk mynapykyryk iwatsahi sizubarẽtsa Sesus harere bo hyỹ mykaranaha ihumo sispirikporẽtsa moziknaha, situk mynapykyryk. Iwahoro zubata wata my. Ikiahatsa Sesus harere bo hyỹ tsimykaranaha ihumo ahaspirikporẽtsa tsimoziknaha iwaze ahasopyk mytukytsa. Deus hyrikoso mytuk atsaezubaha mynapykyryk katsa Deus wahoro zubata watsa tsimaha. 
\c 3  
\s1 Pauro Sudeutsabyitsa bo tarabaja nikara. 
\p  
\v 1 Iwaze uta Pauro ahatsyhyryze Deus bo mopamykysoikik. Ikiahatsa Sudeutsabyitsa ahahumo kamypokzitsiarẽta. Deus wasania ty ahabo iktsasoko iwatahi kytsa katsipa humo zikoktyhyryknaha, siakyriukrẽnikitsa hurukwy bo zikoktyhyryknaha.  
\v 2 Deus imysapyrẽnikita my wasania ty ahabo zikpehahik ana soho botu ziwatahaka. Ana kino kok tsiwabynaha.  
\v 3 Tubabatu Deus tihi: 
\p — O tapara Sudeutsa zuba katyryktsa abaka kytsa Sudeutsabyitsa kino niwatihi katyryktsa moziknaha mysitsihikik — niy. Ana harere humo hi batu kahyrinymyry. Batu aty tohi hawa nizihikikze batu ihyrinymyry. Kyze Deus kape niy: 
\p — Pauro Sudeutsabyitsa bokta! Wasaniha ty sibo tytsasokta! Asahi katyryktsa moziknaha mozihikik, iwatahi sibo papeha my — niy. 
\p  
\v 4 Hyỹ iky. Deus soho kabo nitsasoko ana soho humo hi ahabo tsikaeni zuba botu ziwatahaka. 
\p  
\v 5 Deus Sudeutsabyitsa soho mozihikik kytsa batu sihyrinymyry. Aba zuba Deus ykzohotsa bo, isohotsitsa iwatsa taharere soho ihyrikoso humo nisihyrinymyryky hỹ.  
\v 6 Sudeutsabyitsa tu Deus wasania ty Sesus harere bo yhỹ mykaranaha zeka Sudeutsa atsatu maha. Sudeutsa sisopyk mytukytsa maha. Deus isapyrẽnikia ty Sudeutsa bo botu nitsasoko, ana kino Sudeutsabyitsa bo niwatihi mysisapywyky. Iwaze Sudeutsa, Sudeutsabyitsa niwatihi asahi sizubarẽtsa Sesus harere bo hyỹ mykaranaha ihumo sispirikporẽtsa astsa watsatu maha sibo hi Deus mysisapywyky hỹ. 
\p  
\v 7 Deus wasania ty Sesus soho motsasoikik nawa kahyriziktsokzawy my. Utakta Deus tsyhyryze tarabaja mykara. Kahyriziktsokzawy humo ziktsumuẽhĩkĩ. Izikwy humo zuba tarabajaziu mykara, Deus kahumo tsimypokzitsiarẽta iwatahi zikpeha kytsa sizubarẽtsa bo wasania ty motsasoko. 
\p  
\v 8 Taparaka uta kamysapybyita tu ziknakara abaka mahani. Sesus tuktsa simysapyrẽtsa maha. Taparaka Sesus tuktsa humo kakyrirẽta ziknakara. Deus hi kahumo tsimypokzitsiarẽta iwatahi zikwatawy. Sudeutsabyitsa bo zikpeha iwaze wasania ty sibo motsasokoro. Kiristu koikny baktatu hawa tisapyrẽna ituk zuba mynakara, ana soho humo batu myhyrinymyry. Abaka Deus harere wasania ty motsasoko. Kiristu isapyrẽnikia ty myhyrinymyrẽtsa anahumo hi Deus zikpeha. 
\p  
\v 9 Tapara Deus mybaratsa harere ty batu tyso. Aiba zuba tsasohowy kytsa sizubarẽtsa bo mysihyrinymyry tsihikik iwatahi zikpeha. Iharere motsaso ana humo hi zikpeha.  
\v 10 Iwa niy. Deus hyrinymyrywy baba ty myzubaha bo motsaso tsihikik. Sizubarẽtsa bo ihyrinymyrywy baba motsaso tsihikik. Bijoikpe iknytsitsa sitsumuẽhĩtsitsa sibo motsaso tsihikik. Hyrikoso sapybara watsa niwatihi sibo motsaso tsihikik. Abazubatsa Sesus tuktsa bo iktsa mynakaranahaze Deus soho humo sihyrinymyrẽtsa. Sesus tuktsa sisapyrẽtsa moziknaha iwaze sizubarẽtsa Deus hyrinymyrywy baba humo sihyrinymyrẽtsa hỹ. Sesus harere bo hyỹ tsimykaranaha sibo Deus hyrinymyrywy baba motsasokonaha. 
\p  
\v 11 Hawa Deus mytsaty nikara, atsatu wasani mykara. Abaka Sesus Kiristu harere bo hyỹ tsimykaranaha zeka Deus hyrytsa tsimoziknaha, Deus sohowy atsatu wasani my. Iwaze ihyrinymyrywy baba atsaezubaha bo ziwatawy. 
\p  
\v 12 Iwaze mypehakatsa harere bo hyỹ tsimykaranaha iwa tsimyzurukunaha. Abaka batu mypyby. Iwatsahi Deus bo tsimypamykysoikiknaha. Atahi mymywabyky. Atahi mymykusukniki. Ibo hyỹ tsimykaranaha iwatsahi myspirikporẽtsa abaka batu mypyby. 
\p  
\v 13 Iwatsahi ahakurẽtsaktsa! Kaharere tsiwabyziukunahaktsa! Deus wasania ty ahabo iktsasoko iwatsahi kytsa piksukyrykynaha. Kahumo ahasukatsihik byihuja! Deus pahasapywyky iwatahi kakurẽta. Ahatsyhyryze sinini mykara ikiahatsa humo tisapyrẽna iwatahi kakurẽta my. 
\s1 Hawa Kiristu myhumo tsimypokzitsiarẽta. 
\p  
\v 14 Iwatahi ahatsyhyryze myzo bo mopamykysoikik.  
\v 15 Deus myzo koikny baktatu mynakara katsaktsa Sesus tuktsa ihyrytsa tsimaha. Asahi myzubaha bijoikpe eze tu mybarawy ezektsa kino niwatihi ihumo sispitu maha. Myzubarẽtsa ihyrytsa tsimaha hỹ.  
\v 16 Ahatsyhyryze ipe my: 
\p — O myzo ikia zuba tsapunihikrẽta. Azikwy tisapyrẽna. Ahyrikoso Epeso ezektsa tuk mynapykyryk asa kino ihumo sipunihikrẽtsa moziknaha. 
\p  
\v 17-18 O myzo tysitsumuẽhĩkta. Iwa tsimykaraze aharere bo hyỹ mykaranaha, iwa Sesus situk mynapykyryk ana kino myzapykyky. Hawa hwi puẽtsikbyita iharatatsa zihiboani iwatahi ba ziknatsihipetok. O myzo Epeso ezektsa Sesus tuktsa ikia humo sipunihikrẽtsa moziknaha. Iwa hwi iharatatsa zihiboani watsa asaktsa Sesus harere bo hyỹ mykaranaha ikia humo sipunihikrẽtsa moziknaha. Iwaze asaktsa batu tyso Sesus myhumo tsimypokzitsiarẽta ja. Batu mynyhy. Iwa batu tyso. Sesus myhumo tsimypokzitsiarẽta ana kino myhyrinymyrẽtsa maha hỹ. Sispirikporẽtsa tybyi zubataha. 
\p O myzo Sesus tuktsa myzubarẽtsa ahumo tysihyrinymyrytohikta! Kiristu myhumo tsimypokzitsiarẽta hỹ ana humo kino tysihyrinymyrytohikta. Sesus mymypokzitsiki ba zipyk tawahi myhumo tsimypokzitsiarẽta. Ana kino sihyrinymyrẽtsa hỹ ana humo hi mozihikik. Iwa batu aty tohi hawa Sesus myhumo tsimypokzitsiarẽta tsihyrinymyrẽta babata. 
\p  
\v 19 O kazo isapyrẽnikia ty sibo tsinyny tsihikik ana kino botu tsiktsaso. Aharere isapyrẽnikia soho atsatu wasani sitsyhyryze myzapykyky — my. 
\p Iwa Deus myzo bo ahatsyhyryze mopamykysoko. 
\p  
\v 20 O Epeso ezektsa Sesus tuktsa Deus bo tsimysakibazikiknahaktsa! Ipe tsimaha: 
\p — O myzo ahyrikoso mytuk mynapykyryk hỹ. Iwaze ahyrikoso humo azikwy mytuk mynapykyryk iwatsahi mykurẽtsa hỹ. Ikia zuba tsamysapyrẽta. Ikia zuba apunihikrẽnikita. Ikia zuba amysakihikynikita. Hawa abo tsimyzapykykynahaze Sesus humo yhỹ tsimykara. Hawa mytsaty tsimykaranahaze ana humo hi tsihyrinymyrẽta. Katsa tsimyzapykytohinahaze mymytsumuẽhĩkĩ azikwy tisapyrẽna hỹ. 
\p  
\v 21 O myzo katsaktsa Sesus tuktsa ikia bo mywahi tsimysakibazikiknaha. Sesus Kiristu mymysapywyky iwatsahi atuk mywahi tsinapykyryknaha hỹ. Yhỹ tsimaha — iwa myzo bo tsiksakibazikiknaha hỹ. 
\c 4  
\s1 Sesus tuktsa atsatu ty mytsaty mykaranaha. 
\p  
\v 1 Utakta Sesus soho iktsasoikik naha humo siakyriukrẽnikitsa hurukwy bo zikoktyhyryknaha. 
\p O kytsa kaharere bo wabyziutaha! Deus hi zahawatawy iwatsahi ihyrytsa tsimoziknaha iwaze wasani tahaktsa!  
\v 2 Katsa zuba myhyrinymyrẽtsa batu ahasopyk. Ahahokani byrihuja. Ahakubyrisorokuja! Batu ahabo zuba tsimykaranaha tyharape pokzitsikinahaktsa! 
\p  
\v 3 Myzo hyrikoso mymysapywyky iwatsahi mykurẽtsa tsimykaranaha. Katsaktsa atsa botu mytsaty tsimykaranaha iwatsahi aharape hahokbyitsa abaka tyharape pokzitsinaha. Ahape tu ahasopyk: 
\p — Utakta Sesus tuktsa mysisapybaka. Yhỹ wasani mysisapy tsihikik — my. Iwa Deus myhumo mozihikik. 
\p  
\v 4 Myzo nimywatawy iwatsahi ituk mywahi tsimynapykyryknaha. Nimywatawyze Sesus humo myspirikporẽtsa tsimoziknaha, iwaze Deus hyrytsa tsimoziknaha. Kiristu harere bo zuba hyỹ tsimykaranaha iwa tsimyzurukunaha. Deus hyrikoso estuba zubata atahi mytuk mynapykyryk. Deus hyrikoso estuba zubata atahi mytuk mynapykyk zeka Kiristu nury estuba zubata tsimaha. Iwatahi kytsa Kiristu tuktsa soho: 
\p — Asaktsa Sesus nury maha — my.  
\v 5 Sesus Kiristu mypehakatsa atazubata my. Astatu mymyoktyrykta my. Kytsa nimyharasusuhiknahaze Sesus Kiristu mektsa botu nisiwatawy. 
\p  
\v 6 Deus zuba koikny baktatu atazubata my. Atahi mypehakatsa. Izikwy mytuk mynapykyryk iwa mymytsumuẽhĩkĩ. Atahi tawahi mytuk mynapykyryk hỹ. 
\p  
\v 7 Kiristu myhyriziktsokzawy humo nimywatawy ana humo hi mymytsumuẽhĩkĩ.  
\v 8 Tubabatu Kiristu mybarawy bo izumuze Deus sohokotsa botu ziwatahaka: 
\q1 — Bijoikpe bo ziksizoze tasukyrytsitsa nisioktyhyryk. 
\q2 Ipunihikrẽnikita tu tasukyrytsitsa sizubarẽtsa tatuk nisioktyhyryk. 
\q1 Abaka iharere bo zuba yhỹ nikaranaha. 
\q2 Iwaze bijoikpe bo ziksizoze isapyrẽnikia ty tatuktsa bo nyny my — niy. 
\m Iwa botu ziwatahaka, aba zuba wasani my. 
\p  
\v 9 Hawa Kiristu nidoze Deus sohokotsa ziwatahaka. Tapara Kiristu mybarawy bo inasik iwaze nido.  
\v 10 Atakta Sesus bijoikpe ikny mybarawy bo inasik astatu bijoikpe bo nido. Nanabyitaba mypehakatsa myhyrizikwani mozik. Mypehatsa abazubata iwaze ihumo mybarawy tisapyrẽna mozik.  
\v 11 Atakta Kiristu wastuhu kytsa nisiwatawy. Ispe niy: 
\p — Ikiahatsa kakzohotsa tsimaha iwatsahi Deus wasania ty tytsasonaha kytsa tysihyrinymyry — niy. 
\p Kytsa Sesus humo sispirikpobyitsa bo Deus wasania ty motsasonaha. Iwa Deus tuk mynapykyknaha iharere humo sispirikporẽtsa moziknaha. Nanabyitaba Deus wasania ty tsimytsasonaha. 
\p Ustsa kytsa nisiwatawy. Ispe niy: 
\p — Ikiahatsa Deus sohokotsitsa kaharere Sesus tuktsa bo tytsasokonaha — niy. 
\p Ustsa kytsa niwatihi nisiwatawy. Ispe niy: 
\p — Ikiahatsa wasania ty ziknapamykysokonahatsa tsimaha. Nanabyitaba sizubarẽtsa bo wasania ty tsimytsasonaha — niy. Ustsa kytsa niwatihi nisiwatawy ispe niy: 
\p — Ikiahatsa tsinymyrykynahatsa Sesus tuktsa tysihyrinymyry. Tysisapywykynaha sihumo tynasipokzitsikinaha — niy. Iwa my.  
\v 12 Iwaze tyharape pokzitsikinaha. Siharere humo ustsa Sesus tuktsa tynasitsumuẽhĩ tsihikiknaha.  
\v 13 Katsaktsa Kiristu watsa tsimoziknaha, ana hi Kiristu mozihikik. Hawa tisapyrẽna my Kiristu mykara. Kyze mopyk tsawa ihumo myhyrinymyrẽtsa. Katsaktsa astsatu tsawatsa mytsaty tsimykaranaha. Deus tse Kiristu isapyrẽnikia soho humo myhyrinymyrẽtsa hỹ. Iwaze katsaktsa ustsa Sesus tuktsa niwatihi atsaezubaha iwata tsimoziknaha hỹ. 
\p  
\v 14 Kyze Kiristu humo myspirikporẽtsa tsimykaranaha iwatsahi iharere humo myhyrinymyrẽtsa. Ihyrinymyrywy baba humo myhyrinymyrẽtsa. Ustsa mymyspihikbatakanaha zeka batu waby tsimaha. Ustsa mybarapetu mykaranaha zeka siharere humo hi batu hỹ tsimaha. Katsaktsa jabyitsa sopykbyitsa asahi paikpa mytsaty mynakaranaha. Katsaktsa Deus harere bo zuba hyỹ tsimykaranaha.  
\v 15 Ihyrinymyrywy baba humo zuba yhỹ tsimykaranaha. Iwa tyharape pokzitsikinaha. Sesus myharek wata tsimaha. Iwaze katsa wasanitsa tsimoziknaha. 
\p  
\v 16 Sesus Kiristu myhumo tsimypokzitsiarẽta iwatahi mybo tawahi myzisapywyky. Parakbaha mysitsumuẽhĩekik. Iwatsahi katsaktsa niwatihi ustsa bo tahatsumuẽhĩnahaktsa! Katsaktsa inury tsimaha. Myni mypoiktsa humo pyryk pyryk mahaze kyik rikto maha. Myni byizeka batu kyik rikto zikaha. Anawata Sesus tuktsa estuba estuba zubata tahahyriziktsokzawy tsimykaranaha iwaze katsaktsa Sesus harere bo hyỹ tsimykaranaha ihumo myspirikporẽtsa tsimoziknaha. Kytsa simysapyrẽtsa moziknaha myharere humo iwa tahatsumuẽhĩnaha hỹ. Iwatsahi taharapepokzitsinahaktsa! 
\s1 Hawa Kiristu harere bo hyỹ tsimykaranaha ihumo myspirikporẽtsa, meky watu tsimoziknaha. 
\p  
\v 17 O katukytsa kaharere bo wabyziutaha! Mypehatsa Sesus harere ahape my. Kytsa Deus soho humo sispirikpobyitsa watsa batu ahasopyk. Asahi paikpa mytsaty nikaranaha kytsa harere humo zuba yhỹ mykaranaha. Ikiahatsa batu. Niwazubaktsa. Siwatsa batu hỹ zikaha. 
\p  
\v 18 Asaktsa Deus harere bo batu hỹ niaha, iwatsahi batu sihyrinymyry. Batu ma zikaha Deus hyrinymyrywy baba humo batu sihyrinymyry iwatsahi kytsa miwa eze nizaranahatsa watsa niyziknaha. Siharerehakyrẽtsa asaktsa hawa mykaranaha batu sihyrinymyry. Deus harere humo batu sihyrinymyry, iwatsahi paikpa mytsaty mykaranaha.  
\v 19 Nisikpybybyinahatsa hi ustsa bo mysisapybyrikinaha. Tsõsĩ zikuikik naha tsahi ihyriziktsopyryryk izumu. Nahapewohiknaha. Sisapybyikitsa tihi nikaranaha. 
\p  
\v 20 Ana hi Sesus Kiristu soho humo batu ahahyrinymyry. Ahamysapybara tsimoewynahaktsa!  
\v 21 Kytsa Sesus Kiristu harere bo zuba hyỹ mykaranahaze simysapyrẽtsa moziknaha. Ana hi botu tsiwabynaha. Ana humo hi tsikahahyrinymyrykynaha iwaze ikiahatsa ahamysapybyitsa tsikykaranaha tsimoewynaha. Myharere tyziwabyziukunahaktsa hỹ. 
\p  
\v 22 — O katukytsa! Taparaka amy ty batu imysapybara zuba tsikzihikiknaha.  
\v 23-24 Anabo hi wasani mytsaty ahabyitsa tsikykaranaha. “Iwa tsimaha zeka ahakurẽtsa tsimaha ahape tu ahasopyk” mybarapetu tsikykaranaha. Ana kino batu imysapy iwatsahi batu ahaku. Iwa tsikzurukunaha. Ahasopyk meky watu tsimyzurukunaha. Ahasuk ibykta mysykbaik zeka typapykik kyze ahasuk ezytyk ty korobyk tsimaha. Atawahi ahasopyk batu imysapy tsimoewynaha. Mekywa tu tsimoziknaha. Ahasopykwy ezytyk Sesus humo mytsaty tahaktsa! Sesus tuk tsimyzurukunaha! Ahasuk ezytyk ty korobyk tsimaha asa watsa tihi Sesus sopykwy humo zuba tsimyzurukunahaktsa! Iwaze wasani my tsimykaranaha. Hawa tsimyzurukunaha Kiristu wata tsimoziknaha iwa tsikahahyrinymyrykynaha hỹ — my. 
\s1 Hawa Kiristu ziknakara ikia niwatihiktsa! 
\p  
\v 25 — O katukytsa! Taparaka ahamyspihikbatarẽtsa ziknakaranaha. Abaka ahamyspihikbata byihuktsa wasape tynakaranaha. Hawa wasani haty zuba tsimykaranaha hỹ. Katsaktsa atsaezubaha Sesus tuktsa tsimaha ana humo hi ahamyspihikbata byrihuja. 
\p  
\v 26-27 Kytsa humo ahakyri zeka niwazubakta! Haramwe junubabyizetu tynakokozonaha ahakoko byizeka Satanas harere bo yhỹ tsimykaranaha. Aty wahoro hokbowy zoksapare my zeka usta mytsuk, katsa mykoko byizeka Satanas mytuk mymykniki. Iwatsahi ahakyri byihuja. 
\p  
\v 28 Aty ahatuktsa tsitsyhyryboarẽta ziknakara zeka ustsa namy ty ka tyakse akse byity. Abaka tarabaja tykta. Iwaze tsipanamy ustsa kytsa bo nyny tsimy. Tsipanamyze hi wastuhu anamy ty sinamybyikitsa bo nyny tsimy. 
\p  
\v 29 Asaktsa ahatuktsa siharerewabymybarẽtsa tu zeka niwazubakta. Ahaharere tisapyrẽna humo zuba ustsa bo tynapamykysonaha iwaze tyharape hapokzitsikinaha. Ustsa bo tysitsumuẽhĩnaha hỹ. Iwaze kytsa ahaharere piwabynaha zeka: “O anaharere hi tisapyrẽna my” maha. 
\p  
\v 30 Iwa tsimyzurukunaha zeka Deus hyrikoso ahahumo tsakurẽta mynapykyryk. Imysapybara tyty tsimykaranaha zeka Deus hyrikoso ahahumo batu iaku. Deus hyrikoso zahawatawy iwatsahi Deus tyryktsa tsimoziknaha ahahyrinymyrẽtsa. Hawa Deus hyrikoso imysapyrẽnikita my ikiahatsa niwatihi ihumo ahamysapyrẽtsa tsimoziknaha. Ikiahatsa Deus hyrikoso tuk tsimynapykyknaha atahi bijoikpe bo mymyoktyhyryk. Deus ipe my: 
\p “Hana puruze Sesus tuktsa kabo tysioktyhyk” my. Iwaze pahaoktyhyryk. Deus bo bijoikpe bo pahaoktyhyryk hỹ. 
\p  
\v 31 Iwatsahi pykyhytutaha! Harape humo ahaty kyri kyri byitaha! Ahape ty myija myija byitaha. Ahaty betsak betsak byitaha! Aty iotutsa pauktsitsa humo takyriki tsiharerewabymybarẽta mozik. Iwaze ana kino tsimoewynaha! 
\p  
\v 32 Ikiahatsa hi kytsa bo tysisapywykynahaktsa! Ahahyrizikporẽtsa tyharape pokzitsikinahaktsa! Ahamysapybyitsa tsikykaranaha Deus pahaokzohik. Sesus Kiristu humo Deus mymyokzohik ispiriktsokdatawata my. Iwatsahi ikiahatsa niwatihiktsa. Aty batu imysapy abo my zeka ikia imysapybara ty nikara tsipiokzohik, mahani byitatu tsimyzuruku. Ikspiriktsokdatawata. Deus ahamysapybyitsa tsikykaranaha Sesus humo pahaokzohik iwatsahi ustsa imysapybara tsipiokzohik hỹ Deus wata my — my. 
\c 5  
\s1 O myzubaha Sesus watsa tsimyzurukunaha. 
\p  
\v 1 Ikiahatsa Deus hyrytsa tsimaha. Atahi ahahumo tsimypokzitsiarẽta hỹ. Iwatsahi ahamysapyrẽtsa tsimoziknaha. Hawa kytsa hyrytsa tahazotsa mysisopykzukunaha ikiahatsa Deus watsa tsimykaranaha. Ahazo watsa tsimoziknaha.  
\v 2 Ustsa tysisapywykynahaktsa! Kiristu watsa tsipisapywykynahaktsa! Atahi myhumo tsimypokzitsiarẽta iwatahi mysapyzeky nihyrikosokda. Tapara kytsa siraratsa ziknasibakanaha iwaze Deus bo ziknasiwezokonaha ana humo hi simysapybyitsa nikaranaha Deus nisiokzohik atawatsa Sesus nihyrikosokdaze mymysapybyitsa tsikykaranaha Deus ihumo nimyokzohik. Deus tihi: 
\p — O Sesus Kiristu mybarawy ezektsa sapyzeky nihyrikosokda ta humo kakurẽta. Hawa jokmorẽnikia waok myze kakurẽta anawahi Sesus nihyrikosokda iwatahi ibo iktsa myze kakurẽta my. Mybarawy ezektsa humo tsimypokzitsiarẽta babata ziwatawy — niy. 
\p  
\v 3 Ikiahatsa hi Deus tyryktsa tsimaha. Iwaze hawa wasani zuba tahaktsa! Kytsa ahatukze ustsa okeza bo iktsa zuba taha. Taokeza zuba mysipyrirynaha. Wytykyryk kino niwatihi tahabariktsa humo zuba ziktahasipihiknaha. Amy ty batu sisopyksapy wytykyryk nisiakzobyrikinaha batu mytsaty tsimykaranaha. Ahazokdi byihuja! Ahazokdibyitsa zeka mektsa namy ba zikzihikiknaha.  
\v 4 Ikiahatsa zuba wytykyryk nury soho tsimypamykysokonahaze ahamysupehe byihuja. Ahaharerewabymybarabyihu ja. Anawaze ahaharere humo ustsa kytsa bo batu mysimyiwyky. Ahamykni byihuja tynapykyknaha. Wasaniha ty tsimaha zeka ikiahatsa Deus pe tihi: 
\p — O ikia zuba tsamysapyrẽta. Nawa nizukni tsizubarẽna tisapyrẽna iwatsahi mykurẽtsa — tsimaha. Iwa tsimytsasokonaha.  
\v 5 Atakta ustatsa bo tahyrizikwy zeka Deus tuk batu tawahi zikakpykyk. Wytyk usta maku bo tahyrizikwy zeka atatsa katsa Deus tuk batu tawahi zikykpykyk imysapybara bo mytsaty mynakaranaha asahi Deus tuk batu tahawahi zikakpykyknaha. Ustsa namy tsihitsa watsa mynazihikiknaha batu Kiristu tyryktsa asahi sizokdirẽtsa Deus tuk batu tahawahi zikakpykyknaha. 
\s1 Kiristu harere bo zuba hyỹ tahaktsa kytsa! 
\p  
\v 6 Kytsa asahi Deus harere bo batu hỹ zikaha Deus tuk batu tahawahi zikykpykyknaha. Kytsa ahape naha zeka: 
\p — O hawa tsimyzurukunaha wasani tsimaha. Iwatsatu ahamysapybyitsa tsimykaranaha zeka ikiahatsa Deus tuk ahawahi tsimynapykyryknaha — mybarapetu nikaranaha. Anaharere batu wabyziu zikaha. Asaktsa mopamykysonaha zuba.  
\v 7 Siharere bo waby waby byitaha! Deus tihi: 
\p — Kytsa kaharere bo batu hỹ zikahaze katuk batu tawahi zikapykyryknaha — my. Iwatsahi siharere bo ka waby waby byitahaktsa. 
\p  
\v 8 Taparaka wasaniha humo batu ahahyrinymyry. Kiristu harere humo batu ahahyrinymyry. Iwatsahi ahamysapybyitsa tsikykaranaha. Kytsa miwa ezektsa watsa tsikzurukunaha iwatsahi Kiristu harere bo batu hỹ tsikykaranaha. Deus harere humo batu ahahyrinymyry hỹ. Abaka meky watu tsimykaranaha. Sesus Kiristu harere bo hyỹ tsimykaranaha ihumo meky watu ahaspirikporẽtsa tsimoziknaha. Hawa kytsa iwororo haburuk tu mokurunaha ezektsa watsa tsinymyrykynaha iwatsahi imysapybara bo batu hỹ tsimykaranaha meky watu tsimoziknaha.  
\v 9 Ikiahatsa hi Kiristu harere bo hyỹ tsimaha zeka kytsa humo tahasapywykynaha. Wasani tsimykaranaha. Kytsa bo ahaspihikbata byihuja ahaharere wasani zuba tsimykaranaha. 
\p Iwa Kiristu harere bo hyỹ tahaktsa!  
\v 10 Ahape tu ahasopyk: 
\p — Hawa Deus mozihikik naha zuba tsimyzihikiknaha iwatsahi isopyk ty tanymyry tsihikik. Deus ykparawy humo tanymyryky — tsimaha.  
\v 11 Kytsa Sesus harere bo yhỹ ahabyi zeka sisopyksapybyitsa mykaranaha.  
\v 12 Ikiahatsa batu situk tsimaha. Asaktsa kytsa watsa asahi miwa eze pyrikpyrik mykaranaha kytsa papatu simysapybyitsa mykaranaha. Simysapybyitsa nikaranaha ana soho tihi batu tyso. Mysikpybyrẽtsa simysapybyitsa nikaranaha humo. Ikiahatsa ispe tsimaha: 
\p — O kytsa ahamysapybyitsa tsimykaranaha ana ty kino “niwazubakta” tsimaha — my. 
\p  
\v 13-14 Miwaka rika ty pok mahaze kywa mypubyize mynamy bo iktsa tsimaha. Anawahi Kiristu harere kytsa bo tsimypamykysokonahaze simysapybyitsa mykaranaha anasoho humo hi sihyrinymyrẽtsa. Ahaharere rika wata mozik. Iwororo ha eze kywa mypubyi mozik. Anawahahi Kiristu harere tsimytsasokonahaze kytsa simysapybyitsa nikaranaha nisihyrinymyrykynaha iwaze iharere humo simysapybyitsa nikaranaha sitsyhyryze piwatawyky. Tapara aty zeka: 
\q1 — Ikiakta tsipuruziukze popotykta kyiktykta ikia amysapybyita tsikykara naha humo ibezehe tawata tsimy. 
\q2 Tsikahazoziknahaktsa! Kiristu harere bo zuba yhỹ tahaktsa! 
\q1 Hawa kytsa iwororo ha eze kywa mokurunaha ikiahatsa siwatsa tsimaha hawa wasani tsinymyrykynaha. 
\q2 Kiristu harere humo wasanitsa tsimoziknaha — nikaranaha. 
\m Iwa botu ziwataha. 
\p  
\v 15 Kaharere bo wabyziutaha! Ahape tu ahasopyk: 
\p — O hawa haeze tsimyzurukunaha wasani ja tsimaha. Sispirikponikitsa — tsimaha. Iwa ahasopyk. Hawa tsimyzurukunaha pykyhytu tahaktsa!  
\v 16 Mybarawy ezektsa simysapybyitsa mykaranaha. Ikiahatsa batu. Mekywatu tsimoziknaha. Kytsa tysisapywyikiknahaktsa! Tysitsumuẽhĩnahaktsa.  
\v 17 Iwatsahi mypehakatsa Sesus harere bo wabyziutahaktsa! Ahasopyksapy byihuja! Ikiahatsa hi mypehakatsa harere bo mytsatyziu tsimynakaranaha iwatsahi iharere bo zuba hyỹ tsimykaranaha. 
\p  
\v 18 Tsõsĩ ty ka tsõ tsõ byitaha. Kytsa tsõsĩ ty pikukunaha zeka batu saku. Tahakyri humo sisopyksapybyitsa mykaranaha. Tsõsĩ humo batu imysapy mykaranaha. Ikiahatsa batu. Deus hyrikoso ahatuk mynapykyryk ana kino tuzihikiknahaktsa! 
\p  
\v 19 Tsikzumubanahaze Deus bo tysakibazikiknahaktsa! Ikia zubaze kino niwatihi Deus bo tysakibazikikta! Hawa taparaktsa Deus bo nisakibazikiknaha ikiahatsa kino niwatihi tsimaha. Hawa Deus sohotsitsa nisakibazikiknaha ikiahatsa atsatu tsimaha. Deus hyrikoso humo iharere tuk tsimysakibazikiknahaktsa!  
\v 20 Iwaze nanabyitaba ikiahatsa Deus bo tsimysakibazikiknaha. Ikiahatsa tihi: 
\p — O Deus myzo ikia zuba amysapyrẽnikita. Ikia zuba apunihikrẽnikita, ikia amysakikynikita iwatsahi ikia humo ka mykurẽtsa tsimaha — my. 
\p Iwa Deus bo tsimypamykysokonaha hỹ. 
\s1 Kytsa, wytykyryk kino niwatihi tuharape pokzitsinaha. \fig |src="LB00189B.TIF" size="span" copy="Bass ©The British & Foreign Bible Society, 1994." ref="Epesios 5.20" \fig* 
\p  
\v 21 Kyze Deus harere bo yhỹ tynakaranaha. Sesus Kiristu harere bo zuba hyỹ tynakaranaha iwatsahi ahaspirikporẽtsa tsimoziknaha. Ustsa Sesus tuktsa harere bo kino niwatihi yhỹ tsimykaranaha. 
\p  
\v 22 Wytykyryk ikiahaka kino Kiristu harere bo hyỹ taha. Atsawatu ahapytsa harere bo yhỹ tynakaranaha.  
\v 23 Kiristu mypehakatsa harere bo zuba hyỹ tsimykaranaha.  
\v 24 Katsaktsa ituktsa tsimaha. Atahi myharek wata my. Katsaktsa inury watsa tsimaha. Sesus Kiristu tazo bo mymyoktyhyryk mykara. Iwatsahi iharere bo hyỹ tsimykaranaha. Atsawatu wytykyryk kino ahapytsa harere bo zuba tynakaranaha iwazahi ahapytsa ahapehatsa harere bo yhỹ tynakaranaha. 
\p  
\v 25 Kytsa kaharere bo wabyziutaha! Ahaokeza humo ahamypokzitsiukoktsa! Tysitsumuẽhĩnahaktsa! Hawa Kiristu myhumo tsimypokzitsiukoktsa ikiahatsa kino niwatihi ahaokeza tysipokzitsinaha! Kiristu myhumo tsimypokzitsiarẽta mysapyzeky nihyrikosokda. Aparakbaha bo nihyrikosokda.  
\v 26 Kiristu harere humo mysapyrẽtsa tsimoziknaha. Kytsa momurunaha zeka siziurẽtsa moziknaha. Astsatu Kiristu harere bo yhỹ tsimykaranaha zeka siziurẽtsa watsa tsimoziknaha. Iharere humo ahamysapyrẽtsa tsimoziknaha.  
\v 27 Kiristu hi: 
\p — O katuktsa katuk ahawahi tynapykyryknaha. Wasani tsimoziknaha. Ahamysapyrẽtsa tsimoziknaha anawahi mozihikik — niy. 
\p  
\v 28 Atsawatu kytsa ahaokeza tysipokzitsinaha. Hawa Kiristu aparakbaha humo tsimypokzitsiukrẽta iwatsa kytsa ahaokeza tysipokzitsinaha. Amy ty tisapyrẽna tsimyzihikiknaha batu ahabo zuba zikaha. Isapyrẽnikia humo ahaokeza bo kino niwatihi tsimyzihikiknaha. 
\p  
\v 29 Isapyrẽnikia ty ahaokeza tsyhyryze tsiberinaha niwatihi. Ikiatu tsizapokzitsiki. Araparẽta zeka tsipadisaha. Arapukrẽta zeka tsipuku. Iwatahi isapyrẽnikia ty hyryk tsimy zeka atsatu ahaokeza bo nyny tsimy.  
\v 30 Kiristu wata tsimoziknaha. Atahi namypokzitsihikik. Atahi: 
\p — O katuktsa ikiahatsa kanurywatsa, iwatahi pahapokzitsihikik — my. Iwa mysopyk mykara. — Kiristu tatuktsa humo tsimypokzitsiarẽta iwatahaktsa kytsa ahaokeza humo ahamypokzitsihu.  
\v 31 Deus harere mype maku tasukzaze tazo perek taje perek my. Taparaka atazuba zikzuruku. Tasukza zeka mahani, taoke tuk mynapykyryk.  
\v 32 Kiristu tuktsa humo tsimypokzitsiukrẽta ana watsa hi kytsa tahaokeza humo simypokzitsiukrẽtsa. Anasoho hi piwatawyky. Tapara ana soho humo batu myhyrinymyry aba zuba tsinymyrykynaha.  
\v 33 Kiristu tatuktsa humo tsimypokzitsiukrẽta babata, atawahi ahaokeza tysipokzitsinahaktsa! Tapara isapyrẽnikia ty ahabo zuba hyryk zikaha, abaka batu, isapyrẽnikia ty ahaokeza bo kino niwatihi taha. Wytykyryk ikiahaka ahapytsa harere bo yhỹ tsimykaranaha hỹ. Iwa tuzurukunahaktsa — niy. 
\c 6  
\s1 Hawa sizotsa tahahyrytsa humo mysisakihikynaha. 
\p  
\v 1 — O jabyitsa ahazotsa harere bo hyỹ tahaktsa! Siharere tsipiwabyziunaha zeka ma tsimaha. Ahajeza harere bo niwatihi hyỹ tahaktsa! Siharere bo ma tsimaha zeka Deus ispe my: “O asaktsa wasani mykaranaha” — my.  
\v 2-3 Tubabatu Deus tyryktsa pe niy. — Ahazotsa harere bo hyỹ taha. Ahamyharerewabyrẽtsa zeka aibani zuba tsimyhyrikosokdanaha — niy. Deus harere tisapyrẽna iwatsahi ahazotsa ahajeza kino niwatihi siharere bo ma taha.  
\v 4 — O myzotsa ahahyrytsa humo ahahokani byrihuja ahaharere humo siakubyitsa mykaranaha. Siaku byizeka sioktsiukrẽtsa moziknaha. Ikiahatsa hi ahahyrytsa Kiristu harere humo tysihyrinymyrynaha. Iwaze Sesus sopyk wa mozurukunaha iwa ikiahatsa soho humo ahasopykwatu mykaranaha — my. 
\s1 Hawa sipehatsa tahatsumuẽhĩtsitsa humo sisopyk. 
\p  
\v 5 Abaka kytsa ahahyriziktsokzaharẽtsa kaharere bo wabyziutaha! Ahapehakatsa pahapehanaha zeka yhỹ tsimykaranaha. Sihyriziktsokzawy soho pahapehanahaze yhỹ tsimykaranaha. Ahape tu ahasopyk batu tyso. — O ana hyriziktsokzawy humo batu hỹ — tsimaha. Ahahyriziktsokzawy humo ahapykyhytutaha! Ahapehatsa harere bo yhỹ tsimykaranaha watihi Kiristu harere bo hyỹ tynakaranaha.  
\v 6 Tarabajaziu tykaranahaktsa! Ahapehatsa pahasukparanaha zeka tarabajaziutaha. Ahapehatsa ahaty sukpara habyize kino niwatihi tarabajaziutaha. Kiristu tuktsa humo ahasopykziurẽtsa hỹ. Iwa Deus mozihikik ana humo hi ahasopykziurẽtsa tsimoziknaha.  
\v 7 Ahape tu ahasopyk: 
\p — O kahyriziktsokzawy kapehatsa bo mykara. Sesus Kiristu bo kino niwatihi. Iwatahi pisapybaka — tsimaha.  
\v 8 Sesus Kiristu mypehakatsa babata. Atakta abazubata. Mybarawy ezektsa pehakatsa babata my, atahi ihuak ty sihyriziktsokzawy humo kytsa aparakbaha bo nyny my. Anabo hi mytsatyziu tahaktsa kytsa!  
\v 9 O sipehatsa abaka ikiahatsa pe my: 
\p — Asaktsa ahatsyhyryze ahahyriziktsokzawy humo mykaranaha tysisapywykynaha. Ahamypybyty byihuja. Ahasakimyskyry byihujataha. Asaktsa ahatsyhyryze tarabaja mykaranaha. Deus hyrytsa maha ikiahatsa kino niwatihi Deus hyrytsa tsimaha. Iokzeka astsabani. Iwatsahi ahakzoziuhuktsa! Myzo bijoikpe eze mybarawy ezektsa aparakbaha bo mysisapywyky. Ana humo hi ahaspiriktsokda byihuja kytsa! — my. 
\s1 Deus sodadu suk imiokbyita wata ahabo nyny my, iwaze ahapunihikrẽtsa tsimoziknaha. 
\p  
\v 10 Aba pepykyk, kaharere ahabo motsaso pahatsumuẽhĩ tsihikik. Ahapunihikrẽtsa tsimoziknaha ana humo hi pahatsumuẽhĩ. Ikiahatsa Sesus Kiristu humo ahaspihikrẽtsa iwatsahi ahaspirikporẽtsa tsimoziknaha. Atahi ipunihikrẽnikita my ba hawa tohi zikzukninaha. Iharere bo ma tsimykaranaha zeka izikwy ahatuk mynapykyryk. 
\p  
\v 11 Sodadutsa pehakatsa sisuk ty mekywahaty ty sodadutsa bo nyny my. Sisuk ty imiokbyita iwatsahi sisukyrytsitsa ba ziksibanaha. Deus zikwy mytuk mynapykyryk. Iwatsahi mypunihikrẽtsa tsimoziknaha izikwy sodadutsa suk imiokbyita wata my. Katsahi: 
\p — O myzo azikwy ty mybo nynytyny — tsimaha. Yhỹ mykara. Iwaze Satanas harere bo batu hỹ tsimaha Deus zikwy humo, Satanas pahaspihikbatakaze iharere bo batu hỹ tsimaha. 
\p  
\v 12 Mybarawy ezektsaktsa mysukyrybyitsitsa maha. Hyrikoso sapybara watsa mysukyrytsitsa maha. Sinurybyitsa tu mysukyrytsitsa babatsa maha. Hyrikoso sapybara myhumo batu siakparawy mymysukyryikiknahatsa maha. Iwatsahi siharere bo batu hỹ tsimaha. Asaktsa mysukyrytsitsa babatsa hỹ. Asahi namysapybyrikinaha. Kytsa Sesus humo sispirikpobyitsa hi siharere bo yhỹ mykaranaha. Sizubarẽtsa mysipehakanaha iwatsahi sisopyk watsa mozurukunaha. Asaktsa Sesus harere bo batu hỹ zikaha sispirikpobyitsa tu hyrikoso sapybara pehakatsa sipehakatsa niyzik. Asaktsa unata zuba siakparawy kytsa papa tu simysapybyitsa tu nikaranaha iwaze miwa siakparawy. 
\p  
\v 13 Iwatsahi Deus zikwyty tsimyzapykykynaha. Sodadutsa sisuk imiokbyita watsa ikiahatsa hi Deus zikwy tsimyzapykykynaha. Deus zikwy ahatuk mynapykyrykze ahapunihikrẽtsa tsimoziknaha. Ahaspirikporẽtsa tsimoziknaha Deus zikwy humo hyrikoso sapybara harere bo batu hỹ tsimaha. 
\p  
\v 14 Mybarawy ezektsa niwatsorokonahaze sisuk ty mekywaha tu korobyk niaha. Sisuk imiokbara ty korobyk niaha iwatsahi sisukyrytsitsa ba ziksibanaha. Ikiahatsa sodadutsa watsa tsimaha. Tapara sodadu tasukpesuk ty izezeharẽnikia ty korobyk niy. Tazikoikaĩwy ty haĩ niy. Ikiahatsa batu ahamyspihikbata. Wasani zuba tsimytsasonaha ikiahatsa sodadu zikoikaĩwy watsa. Iwaze wasani tsimyzurukunahaze ikiahatsa sodadu suk imiokbyita ty korobyk niy tawata tsimaha. Hawa isuk imiokbyita humo ba zibezenaha, ikiahatsa wasani tsimykaranaha humo hyrikoso sapybara humo ahakyzohokbyitsa maha. 
\p  
\v 15 Deus mybarawy ezektsa humo tsimypokzitsiarẽta iwaze wasania ty Sesus Kiristu soho tsimytsasokonahaze sodadutsa watsa. Sodadutsa pyrysuktsa ty simiokbyitsa ty korobyk maha siwatsa tsimaha. 
\p  
\v 16 Sesus Kiristu humo ahaspirikporẽtsa! tsimynakaranaha. Ihumo tsimyspirikponahaze sodadutsa watsa tsimaha. Sodadutsa orokpedawy imiokbyita. Iwaze sisukyrytsitsa orobiktsa ty iharazõrõ ba zizaknaha. Atawahi hyrikoso sapybara pehakatsa mybo nimykzoikik iwatahi imysapybara myhumo nazihikik. Niwazubakta! Katsaktsa Sesus Kiristu humo myspirikporẽtsa imysapybara humo ba hỹ tsimaha. 
\p  
\v 17 Sesus Kiristu mymyoktyhyrykta tazo bo mymyoktyhyryk. Sesus watsa tsimoziknaha ana hi mozihikik. Taperykyze sodadutsa watsa. Sodadutsa tsorik imiokbyita taharek humo pu maha. Ikiahatsa hawa mytsaty tsimykaranaha pykyhytutaha. Iwaze Deus harere humo mytsaty tynakaranahaktsa! Deus hyrikoso iharere ty pahahyrinymyryky iwatsahi ikiahatsa sodadutsa watsa tsimoziknaha. Sodadutsa sokorotsapuzeze tyryeze kihiwa. Hawa sodadu isukyrytsa nisiba sokorotsapuzeze tyryezekihiwa ty ikiahatsa Deus harere humo Satanas harere nepykba. \fig |src="LB00196B.TIF" size="col" copy="Bass ©The British & Foreign Bible Society, 1994." ref="Epesios 6.17" \fig* 
\p  
\v 18 Deus bo tynapamykysonahaktsa! Hawa Deus hyrikoso mozihikik ana hi tyzapykynahaktsa! Ahazikara byihuja tsiperykynahaktsa. Deus bo typamykysonaha. Tsibyituhukutunaha. Ikiahatsa tihi: 
\p — O myzo Sesus tuktsa tsyhyryze tsimyzapykynaha. Nanabyitaba atyryktsa tsyhyryze tsimyzapykynaha.  
\v 19 Asaktsa mysitsumuẽhĩ. Pauro kino niwatihi tsipitsumuẽhĩ. Hawa wasania ty Sesus soho motsasoko tsipitsumuẽhĩkĩ iwaze ustsa kytsa bo ihumo sihyrinymyrẽtsa moziknaha. Tsiakusukniki. Atahi ahumo ipybybyita tu wasania ty motsasoziu! myzo tsimaha — my. Taparaka Deus Sesus Kiristu soho humo batu mymyhyrinymyry abaka kytsa sizubarẽtsa mymyhyrinymyrykynaha. 
\p  
\v 20 Deus zikpeha iwatahi iharere motsasoikik. Abaka iharere humo kytsa siakyriukrẽnikitsa hurukwy bo zikoktyhyryknaha. Iwatsahi Deus bo katsyhyryze tsimyzapykyikiknaha. Wasani mykara ana hi ibo tsimyzapykyikiknaha. Ikiahatsa tihi: 
\p — Myzo azikwy ty Pauro bo nyny tsimy iwaze aharere motsasoziuku. Ipybybyita azikwy humo tsipunihikrẽta mozik — tsimaha. 
\s1 Aba mopykykze kytsa bo mytsaty mykara. 
\p  
\v 21 Tikiko kasoho ahabo motsaso. Ata humo kamypokzitsiarẽta mytsy babatawa my. Mypehatsa Sesus tsyhyryze tarabajaziu mynakara. Tsiakzoziurẽta tarabaja my. Tsiakubyrisorokrẽta.  
\v 22 Iwatahi ahabo pipeha, hawa mynakara ana soho ahabo motsaso. Iwaze ikiahatsa batu tyso: 
\p — Pauro ja. Yhỹ ja — tsimaha. Atahi ikiahatsa tuk mopamykyso. 
\s1 Deus pahasapywyky. 
\p  
\v 23 Deus bo ahatsyhyryze mopamykysoikik. Ipe my: 
\p — O Deus myzo, mypehakatsa Sesus Kiristu niwatihi ahyrytsa bo tysisapywykynaha. Ba paikpa mytsaty zikaha, ikia hi tysiakuwyky. O myzo tysitsumuẽhĩ ustsa kytsa wasani sisopyk. Sesus Kiristu harere bo hyỹ mykaranaha iwaze ihumo mospirikpotohinaha iwa tysitsumuẽhĩkta! 
\p  
\v 24 O myzo tysisapywyky. Amy humo siaku byizeka sibo tyzapykykta iwaze atuk tahawahi mynapykyryknaha. Sesus humo sipunihikrẽtsa moziknaha — my. 
\p Iwa Deus bo ahatsyhyryze mopamykysoikik. Nepyk niwazuba. 
\cls Pauro