\id 2TI - Rikbaktsa NT -Brazil 2011 (DBL -2013) 
\h 2 Timoteo 
\toc1 Pauro Timoteo bo ziwatahakazo 
\toc2 2 Timoteo 
\toc3 2 Ti 
\mt1 Pauro Timoteo bo ziwatahakazo 
\ip Pauro siakyriukrẽnikitsa hurukwy eze niapykyrykze Timoteo bo ziwatahakazo. Timoteo tatse wata ziknazukniki. — Atsoko pikbezenaha — nikara. Deus Pauro ziapewywyky iwaze katsa kino niwatihi tanymyryky. 
\c 1  
\p  
\v 1 Uta Pauro. Timoteo ikia bo papeu humo piwatahaka. Tubabatu Sesus Kiristu kytsa bo zikpeha, kape niy: 
\p — Ikia sizubatsa bo tsimy. Deus wasania ty tsimytsaso. Kytsa kaharere bo hyỹ mykaranaha zeka kahumo sispirikporẽtsa moziknaha asaktsa tahawahi Deus tuk mynapykyryknaha tsimy — niy. 
\p  
\v 2 Timoteo ikiakta katse wata tsikyzik. Utakta ikia humo kamypokzitsiarẽta. Deus myzo, Sesus Kiristu mypehakatsa sibo atsyhyryze mopamykysokoze ispe my: 
\p — O kazo Timoteo humo amypokzitsiukta. Ihumo tsimypokzitsiarẽta. O kazo ahumo tsakurẽta mozik — my. Iwa Deus bo atsyhyryze mopamykysoko. 
\s1 Hawa Deus humo kakurẽta my. Abaka kasoho ahabo piwataha. 
\p  
\v 3 Kyze uta Deus bo motsasoko: 
\p — O kazo ikia zuba tsamysapyrẽta — mykara. Deus tsyhyryze pitsumuẽhĩkĩ mykara. Pykyhytu iharere bo hyỹ mykara. Iharere humo batu kaspiriktsokdahu. Myzotsa niwatihi iharere bo hyỹ ziknakaranaha. Deus bo mopamykysokoze ikia soho ty okoroze unata ibo mopamykysoikik. Ikia soho humo mytsaty mynakara.  
\v 4 Ikparakze tsasukatsihikrẽta. Tsikpuziuku ana bo hi mytsaty mykara. Ikia bo mynakozore tsihikik. Ikia bo mynakozore zeka kakurẽta. Kakurẽta hỹ.  
\v 5 Ikia Sesus humo tsimyspirikpoko ana bo hi mytsaty mykara. Ihumo aspirikporẽta hỹ. Tubabatu aikiwa Roide atatsahi Sesus humo tispirikporẽtatsa. Iwaze aje Eunise kino niwatihi ihumo tispirikporẽtatsa. Abaka ikia kino niwatihi ihumo tsimyspirikpoko ana humo hi kahyrinymyrẽta. 
\p  
\v 6 Iwatahi abo motsasoko. Tubabatu Sesus tuktsa tuk ispirikpokota tsikyzik. Uta katsyhyrypetsa ty aharek humo paik paik iky. Ispirikpokota tsikyzikze katsyhyrypetsa ty aharek humo paik paik iky, Sudeutsa sopykwy ty iky. Ana bo hi mytsatyzotykta! Deus zikwy abo izumu. Ihyrikoso atuk mynapykyryk. Pykyhytuty ihyrikoso tuk tsimyzuruku. Izikwy humo tsimyzuruku. Ana bo hi mytsatyziutykta! Iwaze izikwy humo tarabajaziu tsimykara. 
\p  
\v 7 Deus hyrikoso mybo izumu. Ihyrikoso humo batu mypyby. Deus mybarawy nizuknikita tazikwy mybo inazukmywy. Izikwy humo katsa sizubarẽtsa humo mymypokzitsirẽtsa. Katsa mypetu mysopyk iwatsahi mysapybyitsa ba tsinakaranaha. Deus hyrikoso humo mypetu mysopyk. 
\p  
\v 8 Kytsa asahi Sesus harere bo batu hỹ nikaranaha sakyriukrẽnikitsa hurukwy bo zikoktyhyryknaha. Sesus harere iktsasokoze katsipa humo zikoktyhyryknaha. Abaka sakyriukrẽnikitsa hurukwy eze tu mopykyryk. Iwatatu kahumo batu asikpyby. Sesus harere humo kino niwatihi batu asikpyby. Sesus harere humo sinini mykara. Ikia kino niwatihi Sesus harere tsimytsasokoze sinini tsimykara. Iwatuze sinini tsimykara Sesus harere tsimytsasoikikze Deus patsumuẽhĩ. Sinini tsimy zeka atahi papunihikwyky.  
\v 9 Deus kino botu ityryk nimywatawyhik. Tapara mybarawy eze ky nizukni iwaze bijoikpe nizukni iwaze botu nimywatawyhik. Katsa mysapyrẽtsa humo batu myty watawy. Myhumo tsimypokzitsiarẽta ana humo hi nimywatawyhik. Deus tihi: 
\p — O amy ty isapyrẽnikia ty sibo nyny my — niy. Katsa mysapyrẽtsa humo batu nyny aha. 
\p — Asahi Sesus Kiristu harere bo hyỹ mykaranaha iwatsahi myspirikporẽtsa tsimoziknaha iwaze amy ty isapyrẽnikia ty sibo nyny my — niy.  
\v 10 Taparaka ana soho humo batu myhyrinymyry abaka myhyrinymyrẽtsa. Sesus Kiristu humo tsinymyrykynaha. Sesus mymyoktyhyrykta humo tsinymyrykynaha. Sesus botu mybarawy bo inasik iwatahi tsinymyrykynaha. Sesus kino isapyrẽnikia ty mybo nyny mykara. Sesus nihyrikosokda. Iwaze harakykbyri zuruze nahyrizikpo ispitu niyzikzo. Iwatsahi katsaktsa mohyrikosokdanaha humo batu mypyby. Sesus wasaniha nitsasoko. 
\p — Tsimyhyrikosokdanahaze namyhyrizikpowyzo. Mywahi Deus tuk tsimypykyryknaha — niy. Iwaze katsaktsa Sesus humo tsimyspirikponahaze iwatsahi tsimyhyrikosokdanaha humo batu mypyby. 
\p  
\v 11 Deus botu zikwatawyhik. Sesus kape niy: 
\p — Wasania ty motsasoko katuktsa tysihyrinymyryky — niy. Tysihyrinymyrykyta my. Sesus zikwatawyhik iwatahi mykzohotsa.  
\v 12 Ana humo hi sinini mykara. Sesus wasaniha humo sinini mykara. Kytsa Sesus harere humo batu sispirikpo asahi ziksukyrykynaha. Utakta Sesus humo kaspirikporẽta. Ihumo batu kasikpyby. Abaka Sesus zikny iwatahi pikspirikpoko hỹ. Ata kino tsihyrinymyrẽta. Atahi imysapyrẽnikita. Nawa ha ty ibo nyny iky tahi ana hi myziperyky. Hawa ha taeze Sesus myziksizo naha humo kaspihikrẽta iwaze kabo nynyzo my. 
\p  
\v 13 Deus wasania ty ikia abo iktsasoko. Deus harere anahi abo iktsasoko hyỹ tsimykara. Hawa zikzuruku naha humo kawata tsimyzuruku. Tyzikwatuku Sesus humo aspirikpotohikta! Kytsa humo tsamypokzitsiarẽta. Iwa tsimyzuruku. Sesus Kiristu tuk zeka iwa tsimyzurukunaha.  
\v 14 Deus harere ty pykyhytu tynakara. Iharere iktsasoko. Ana bo hi mytsaty tsimykara. Ba aspiriktsokda huk. Deus hyrikoso mytuk mynapykyryk. Atahi mymytsumuẽhĩkĩ iwatsahi Deus harere humo ba zikspiriktsokdanaha. 
\s1 Iwa Pauro Timoteo bo ziwatahaka. 
\p  
\v 15 Kytsa Asia ezektsa zikarekbaiknaha. Ana hi botu tsiwaby. Situk Pisero zikarekek. Eremosenes kino niwatihi zikarekek.  
\v 16 Onesiporo zuba ziktsumuẽhĩkĩ. Kabo inakozore sakyrikrẽnikitsa hurukwy eze kabo nikozore. Kahumo batu isikpyby. Atahi zikykuwyky. Ihumo kakurẽta ikykara. Iwaze Deus pe iky: 
\p — O kazo Onesiporo itukytsa humo kino niwatihi tysipokzitsikikta tsimy — iky.  
\v 17 Atahi Homa bo niukuru. Izumuze paikpa zikberiki iwatatu kabo zumu.  
\v 18 Tapara Onesiporo Epeso eze tuze ziktsumuẽhĩkĩ. Ana soho humo hi tsahyrinymyrẽta. Iwatahi Deus pe my: 
\p — O kazo ikia Onesiporo tsimypokzitsikikta. Sesus myziksizoze ihumo tsimypokzitsiarẽta — my. 
\p Iwa Deus bo itsyhyryze my. 
\c 2  
\s1 Sesus Kiristu tukta babata tsipunihikrẽta mozik. 
\p  
\v 1 — O Timoteo ikiakta katse wata tsikyzik. Deus Sesus Kiristu mymypokzitsiki. Katsa Sesus tuktsa tsimaha. Mymypokzitsiki, iwatahi batu apyby. Amo wasani tsimykara! — my. 
\p Tubabatu uta ahyrinymyryky.  
\v 2 Amy ty ahyrinymyryky naha ty tsiwabyba hỹ. Aba ustsa tsimysihyrinymyryziuku. Kytsa tysiny asaktsa aharere pykyhytu pinymyrykynaha. Ahyrinymyryky naha ty atsatu mysihyrinymyryziuku. Bykyze asahi atsatu mykaranaha ustsa kytsa mysihyrinymyrykynaha. Kytsa aharere humo motsasoziukunaha pykyhytuty mykaranaha. 
\p  
\v 3 Sesus tuktsa sizubarẽtsa sinini mykaranaha. Ikia sinini tsimykara zeka batu apyby. Ikia sodadu wata tsimozik. Ikia Sesus Kiristu sodadu wata tsimozik. Iharere bo zuba hyỹ tsimykara.  
\v 4 Sodadu tapehatsa harere bo zuba hyỹ mykaraze tawata. Ikia niwatihi Sesus harere bo zuba hyỹ tsimynakara iwatahi sodadu wata tsimozik. Iwa tsimykara. Sodadu amy iakparawy ha humo batu yhỹ ziky. Tapehatsa harere bo zuba hyỹ mynakara. Ihyriziktsokzawy humo zuba mynakara. Ikia iwahaty tsimyzuruku. Sesus apehatsa my. Iwaze amy akparawy ba yhỹ ziky, iharere bo zuba hyỹ tsimykara, sodadu wata tsimozik. 
\p  
\v 5 Iwaze ustsa kytsa motururuknahaze tapara pomoze mozihikik. Iwaze sisopyk humo yhỹ nikara iwaze motururuknaha, niwazuba nikara. Ikia atawata tsimozik amy Deus myzehikik nahaty zuba tsimykara. Amy ty Sesus mynazihikik naha ty zuba tsimykara, iwatahi tapara zumuta wata tsimozik. 
\p  
\v 6 Iwaze usta maku tatsuhuk mozikezoze. Atahi tadisahawy sukpesapy myzekezokoze tapara tadisaha. Ikia niwatihi Sesus Kiristu tsyhyryze hyriziktsokzawy humo tsimy. Hyriziktsokzawy humo tykta! Kytsa mysihyrinymyryky iwa ahyriziktsokzawy. Iwaze Sesus asoho humo: 
\p — O ikia tsamysapyrẽta — my. Iwaze ikia Deus harere bo hyỹ tsimykara sodadu wata. Ikia tyzibyituhukutu hawa Sesus mozihikik yhỹ tsimy maku kytsa nitururuknahaze tapara izumuta wata. Ikia Sesus tsyhyryze hyriziktsokzawy humo tsimykara maku itsuhuk eze wata.  
\v 7 Kaharere bo mytsatyziu tykara. Amy kaharere piwatawyky atsatu mypehatsa mykara. Atahi pahyrinymyryky. 
\p  
\v 8 Deus wasaniha abo nitsasoko. Sesus Kiristu soho bo mytsaty tsimykara. Sesus Kiristu nihyrikosokda. Deus hi zihyrizikpowy iwaze ispitu niyzikzo. Dawi tsekoka Sesus niy. Ata hi zihyrizikpozo. Deus wasaniha nitsasokoze ana hi iktsasoko.  
\v 9 Deus harere iktsasoko ana humo hi sinini mykara. Kytsa sakyriukrẽnikitsa hurukwy bo zikorokiknaha. Karikutsitsiwytsa ty zikektsawarakanaha. Iwatahi batu pão my. Iwatatu Deus harere sihumo ba zikpyk. Deus sohowy ba pyk ziky.  
\v 10 Iwatahi sinini mykara. Kytsa asahi Deus nisiwatawyhik sitsyhyryze sinini mykara, iwatsahi Deus wasania ty piwabykynaha. Sinini mykaraze iwatsahi Sesus humo sispirikporẽtsa. Sesus Deus bo mysioktyhyryk katsa mywatsa Deus bo mysioktyhyryk. Simysapyrẽtsa moziknaha. Deus tuk asatu mynapykyryknaha tahawahi Deus tuk mynapykyryknaha.  
\v 11 Hawa botu katsaktsa tsiwabynaha ana harere wasani my. Utakta niwatihi ahabo iktsasoko aba motsasokozo. 
\q1 — Kytsa Sesus pokzi mymybanaha zeka iwatsa tu ituk namyhyrizikpobawyzo. 
\q2 Tsinahyrizikponaha zeka ituk mywahi tsinapykyryknaha. 
\q1  
\v 12 Sinini tsimykaranaha zeka Sesus Kiristu pokzi mypehakatsa watsa tsimoziknaha. 
\q2 Katsaktsa kytsa pe tsimaha zeka: “O utakta batu Sesus tukta my. 
\q1 Sesus batu kanyhy” tsimykaranaha. Iwaze Sesus niwatihi mype my: “O uta kino batu kanyhy my. 
\q2 Asahi batu katuktsa my” niy. 
\q1  
\v 13 Iharere bo hyỹ ahabyizeka iharere humo mynapykyryk. 
\q2 Iharere wasani my. 
\q1 Tapara nitsasoko atsatyty mykara 
\q2 iharere tisapyrẽna hỹ. 
\q1 Tawahi nitsasoko iwaze atsatu — mykara. 
\s1 Deus tsumuẽhĩtsa tsimysapyrẽta. 
\p  
\v 14 Ikia awabytsitsa bo tsimy. Iwa tsimysihyrinymyryky. Mytsatyziu tsimy Deus pawabyky. Deus okzeka tsimysihyrinymyryky. Ispe tsimy: 
\p — Pykyhytutaha kytsa! Ahaharere humo ahape ty peha peha byitaha iwa zeka ustsa kytsa mysisapybyrinaha. Iwazeka kytsa ba ziksitsumuẽhĩnaha. Kytsa pahawabykynahaze Sesus humo batu sispirikpo. Iwazeka ahaharere humo ba zikspirikponaha — tsimy. Iwa awabytsitsa bo tsimy. 
\p  
\v 15 Wasani tyzurukukta! Pykyhytuty wasani tyzurukukta! Iwaze Deus asoho tihi: 
\p — Atakta tsimysapyrẽta. Kaokzeka wasani mykara — my. Wasani tsimyzuruku zeka batu asikpyby. Deus ahyriziktsokzawy bo iktsa myzeka batu asikpyby. Deus harere ty kytsa tysihyrinymyryikik. Tysihyrinymyry baba iwa abo my. 
\p  
\v 16 Kytsa asahi siharerewabymybaranikitsa ana ka Deus batu iakparawy. Ikia kino batu situk tsimypamykysoko asaktsa kytsa ba ziksitsumuẽhĩ. Sesus humo sispirikporẽtsa ba ziksitsumuẽhĩ. Iwa siwabytsitsa batu imysapy nikaranaha. Iwaze sibo ba ziktsaso. Siharere ba ziktsaso. Asaktsa ustsa kytsa mysisapybyrikinaha. 
\p  
\v 17 Sispirikpowy mykõrõrõtsa watsa. Inury piokbakanaha. Hawa inury mykõrõrõtsa humo piokbakanaha, kytsa Sesus humo ba sispirikpo tahaspirikpowy zimyikiknaha iwatsahi sispirikpowy mykõrõrõtsa watsa. Asahi myhyrinymyrykynaha zeka kytsa Sesus humo batu sispirikpo. Situk estuba maku Imeneu inarokota, usta Pireto inarokota, iwatsa sispirikpowy kino mykõrõrõtsa watsa. Sispirikpowy humo kytsa Sesus harere bo batu yhỹ niaha.  
\v 18 Wastuhu Sesus tuktsa siharere ziwabykynaha. Asahi siharere bo asiba yhỹ niaha. Iwaze Sesus harere humo asiba ziakbatanahaze batu yhỹ niaha. Asa tihi: 
\p — Kytsa niakbakanahatsa botu bijoikpe bo nidoknaha — mybarapetu nikaranaha. 
\p — Deus mybarawy ezektsa nisierekek — mybarapetu nikaranaha. Kytsa anahi ziwabynahaze paikpa mytsaty nikaranaha. Kytsa jakara bo nizaranahatsa watsa niyziknaha. Sispirikpowy humo paikpa mytsaty nikaranaha. Iwatsahi wastuhu Sesus tuktsa Sesus harere bo asiba batu yhỹ nikaranaha.  
\v 19 Katsa hiba Deus harere humo tsinymyrykynaha. Ustsa kytsa simyspihikbatanikitsa sihumo batu mospirikpo. Deus harere zuba tsiwabynaha. Mypehakatsa tahyrytsa humo tsihyrinymyrẽta hỹ. Aty motsasoikik: 
\p — O katsaktsa Deus hyrytsa — tsimaha. Deus ispe my: 
\p — Ahasapybyri tsimoewynaha! — niy. Iwa Deus tahyrytsa bo motsasoko. 
\p  
\v 20 Myporosuktsa mywahoro eze sizubarẽtsa tsimykaranaha. Wastuhu zuba pibyituhukunaha tu tsimykaranaha. Ustsa batu. Katsa mymyikaha boktsa zubatsa myporosuktsa sisapyrẽtsa tsimykaranaha. Mymyikaha humo morosuk tisapyrẽna tsimykaranaha. Katsaktsa myporosuktsa watsa.  
\v 21 Hawa katsa morosuk tisapyrẽna tyakse tsihikik mymyikaha boktsa zubatsa, Deus hyriziktsokzawy humo mymykse tsihikik. Deus okzeka wasani tsimoziknaha. Iwaze Deus mype my: 
\p — O ikiahatsa katsumuẽhĩtsa tsimoziknaha. Ikiahatsa humo kakurẽta. Amy humo wasani tsimykaranaha! — mykara. Iwatsahi morosuktsa watsa tsimoziknaha atakta mymyikahaze tsimykaranaha. Deus mysoho: 
\p — O ikiahatsa tsamysapyrẽtsa tsimaha. Iwatahi ikiahatsa katsyhyryze tarabaja tsimykaranaha — my. Tarabaja tsizubarẽna humo mykyzodiharẽtsa tsimykaranaha kahumo kytsa Sesus harere mysihyrinymyryky my. Mysapybyitsa tsikykaranaha botu tahamoewyhik ana humo hi Deus tsakurẽta hỹ. 
\p  
\v 22 — O Timoteo ikia ba mykyryburuktsa wata tsimykuru! Asahi imysapybyitsa zuba mykaranaha. Ustsa okeza mysihuahuakanaha. Ikiakta hawa wasani zuba tsimyzuruku. Imysapybara humo ka ikiakta batu yhỹ ziky. Sesus Kiristu humo aspirikpohukta! Kytsa tysipokzitsiki. Kytsa humo batu akyri. Maku tsimysapyrẽta Deus bo mopamykysoko. “O Deus myzo tisapyrẽna humo tsiktsumuẽhĩ my”. Ikia niwatihikta ituk tawata tsimysapyrẽta tsimozik — my. 
\p  
\v 23 Kytsa asahi sipehatsitsa zuba batu siharere ty batu tyso. Ikia sibo tsimypamykysoko zeka tsipahabetsakwynaha. 
\p  
\v 24 Mypehakatsa tsumuẽhĩtsaktsa ba zikmybetsaknaha. Kytsa mymypokzitsiki. Deus harere mysihyrinymyryziuku. Kytsa harere piwabyziuku, iwatahi mysihyrinymyryziuku.  
\v 25 Aty myharere ty wabyziu zeky byizeka batu ziksibetsak. Wasanikia ty tsimy. Sibo tsimytsasoko. Aibani tozeka ja aharere humo simysapybyitsa mykaranaha mysimoewyhiknaha Deus mysitsumuẽhĩ iwatsahi simysapybyitsa mykaranaha mysimoewyhiknaha. Aharere humo sispirikporẽtsa moziknaha.  
\v 26 Tubabatu hyrikoso sapybara pehakatsa nisispihikbataka iwaze tahawerekywy nahatsa watsa niaha. Siraratsa tahawerekywy bo nipupunaha. Astsatu kytsa hyrikoso sapybara pehatsa harere bo yhỹ mykaranaha. Siraratsa tahawerekywy naha tsawatsa. Iwa kytsa sispirikpobyitsa zeka hyrikoso sapybara pehatsa harere bo yhỹ nikaranaha. Iwa mozurukunaha. Bykyzehu tozeka ja aharere humo hyrikoso sapybara pehatsa bo ba yhỹ zikaha. Amy ty wasania ty zuba yhỹ mykaranaha. 
\c 3  
\s1 Aibani zuba ziharawybabaka tsihokdaharẽna iwatsahi pykyhytutaha. 
\p  
\v 1 Kaharere bo mytsatyziutaha. Sesus harazetu kytsa sinini mynakaranaha. Sesus tuktsa Deus harere bo hyỹ mynakaranahaze tsihokdaharẽna mozik. Kytsa simysapybyitsa mykaranaha sihumo tsihokdaharẽna mozik. 
\p  
\v 2 Kytsa asa zuba mynakaranaha. Sisorekanikitsa. Sisakimyijarẽtsa mykaranaha okyrysaro tsihitsa mozihikiknaha. Motsasokonaha — Katsa zuba myhyrinymyrẽtsa — mybarapetu mynakaranaha. Myhyrinymyrẽtsa mytsaty ahabyitsa mynakaranaha. Siharerewabymybarẽtsa. Kytsa tahanamy ty harape bo nyny maha zeka: 
\p — O ikia tsimysapyrẽta ana humo hi mykurẽtsa — iwahaty batu harere. Tahazotsa harere bo batu ma zikaha. Deus harere humo batu wabyziu zikaha.  
\v 3 Tatukytsa humo niwatihi tahasopyksapybyri mynakaranaha. Batu aty tohi humo simypokzitsiu. Kytsa sizubarẽtsa humo sisopyksapybyitsa mynakaranaha. Zikaharapeziunahabyitsa. Batu tahapetu sisopyk iwatsahi tahamysapybyrity mykaranaha batu tymoewy. Sizokdirẽtsa. Ziksihokyknahabyitsa.  
\v 4 Situkytsa sisukyrytsitsa bo mysioktyhyryknaha. Mysibanaha bo. Simytsatyhybyitsa tu iwatsahi batu simysapy mynakaranaha. Motsasokonaha: 
\p — O uta zuba wasani. Uta myhyrizikwani — mykaranaha. Deus humo batu siakparawy iwatahi Deus batu iaku. Asa zuba sakurẽtsa. Mynazihikiknaha ty zuba mykaranaha.  
\v 5 Asahi: 
\p — O katsaktsa Deus hyrytsa — mybarapetu mykaranaha. Deus zikwy humo batu sihyrinymyry. Amy mozihikiknaha humo zuba mykaranaha. Deus harere bo batu hỹ mynakaranaha. Deus hyrikoso humo batu sihyrinymyry. Ikia situk tsimykara zeka tyserekekta my. 
\p  
\v 6-7 Wastuhu wytykyryk mysispihikbatakanaha. Wytykyryk asizahi batu mytsaty zikaha. Mysimyiwykynaha. Siwakyrizerẽza. 
\p — O katsaktsaza Deus harere tsipinymyrynaha — mykaranaha. Batu sihyrinymyry. Tsikaeni zuba zinymyrynaha. Iwazahi batu sispirikpo Deus harere bo batu hỹ zikaha. Iwaze kytsa asahi mybarapetu ziknakaranaha wytykyryk pe maha. Siwahoro bo kytsa papatu ziknapupukunaha. Inapupunahaze imysapybara ty ziknasihyrinymyrykynaha. Iwazahi wytykyryk Deus harere humo batu sispirikpo. 
\p  
\v 8 Tubabatu Moises Deus harere baba ziknatsasoko. Sãbores Sãnes ahatsa Moises harere humo batu siakparawy. Deus harere baba humo batu siakparawy. Kytsa simyspihikbatanikitsa watsa. Astsatu mykaranaha. Kytsa bo mybarapetu mykaranaha, iwatsa tu Deus harere humo batu siakparawy. Sesus harere humo batu sispirikpo.  
\v 9 Kytsa sihyrinymyrytsa pe: 
\p — Batu amy tohi ty isty hyrinymyry — nikaranaha. Taparaktsa tubabatu astatu Sãnes Sãbores ahatsa bo niwatihi ziknakaranaha. Astatu kytsa bo ziknakaranaha. Iwatsahi sizubarẽtsa tihi: 
\p — Batu amy tohi ty ziksihyrinymyrynaha iwatsahi batu mywabyhy — nikaranaha. 
\s1 Abaka kasohowy asiba nepyk wabyty tsimy. 
\p  
\v 10 O Timoteo hawa mozuruku naha humo tsahyrinymyrẽta. Kytsa nasihyrinymyryky anaha humo kino tsahyrinymyrẽta. Hawa Sesus humo kaspirikporẽta ana humo kino niwatihi tsahyrinymyrẽta. Hawa kytsa humo batu kasakpare uta hi nasipokzitsiki ana humo kino tsahyrinymyrẽta. Kakubyrisorokrẽta. Hawa sinini ikykara ana humo kino tsahyrinymyrẽta. 
\p  
\v 11 Kytsa asahi Sesus humo batu sispirikpo asahi zikziksininiwykynaha. Ãtiokia eze sinini ziknakara. Ikonio eze niwatihi sinini ziknakara. Risitera eze niwatihi sinini ziknakara. Sesus hi mypehakatsa zikbetesaka. Ziktsumuẽhĩkĩ. Ana humo hi tsahyrinymyrẽta.  
\v 12 Katsaktsa Deus harere bo hyỹ tsimykaranaha zeka kytsa mymysininiwykynaha. Asahi Sesus Kiristu humo batu sispirikpo iwatsahi mymysininiwykynaha. 
\p  
\v 13 Kytsa asahi batu simysapybyitsa mykaranaha mysihyrinymyrykynaha. Simysapybyitsa babatsa mynakaranaha. Kytsa mysispihikbatakanaha. Ustsa kytsa kino niwatihi sibo mybarapetu mykaranaha. Paikpa myharape spihikbataikiknaha. 
\p  
\v 14 Hawa zahyrinymyryky nawa tsimyzuruku. Hawa taparaktsa sihyrinymyrẽtsa zahyrinymyrykynaha nawa tsimyzuruku. Siharere wasani my ana humo hi tsahyrinymyrẽta. Iwatahi siharere bo hyỹ tynakara. 
\p  
\v 15 Ikia jabastuze Deus harere papeu humo iwatahaha tsinykyry. Iharere humo tispirikporẽta tsimozik. Ana papeu tsipinykyze hawa Deus tuk tsimynapykyryknaha ana hi tsinymyryky. Sesus Kiristu humo tsimyspirikpo zeka Deus bo mymyoktyhyryk. 
\p  
\v 16 Tubabatu mydiritsa Deus harere ziwatahakanaha. Iharere ziwatahakanahaze Deus zikwy humo sihyrinymyrẽtsa. Iharere wasani my. Ana papeu tisapyrẽna niy. Iwatsahi Deus harere wasani humo tanymyryky. Amysapybyita tsimykara zeka amysapybyri ka tsimoewybaik. Aty pimyiki zeka papeu humo amyiwyhy piwatawy. Hawa wasani haty papeu humo mysopyk mymywatawyky. Hawa Sesus tuktsa mozurukunahaze anahi mymywatawyky.  
\v 17 Deus tsumuẽhĩtsa iharere papeu humo iwatahaha pinymyryky. Deus iakparawy ty zuba pinymyryky. Ana bo zuba Deus tsumuẽhĩtsa papeu humo yhỹ mykara. Imysapyhaty zuba mynakara mekywa humo tisapyrẽna mykara, Deus harere papeu humo. Ustsa niwatihi mysitsumuẽhĩ. Nanabyi humo niwatihi wasani mynakara myziwatawyky Deus harere papeu humo. Iwaha hỹ. 
\c 4  
\p  
\v 1 Abaka Deus okzeka abo motsasoko tsiwabytoktokta! Sesus Kiristu okzeka niwatihi abo motsasoko. Atakta myziksizoze hawa kytsa mozurukunaha soho motsasoko. Atahi kytsa simysapyrẽtsa pe my: 
\p — O ikiahatsa wasani ziknakaranaha — my. Ustsa kytsa simysapybyitsa pe my: 
\p — O ikiahatsa batu ahamysapybyitsa ziknakaranaha — my. Iwa kytsa myzubarẽtsa pe my. Kytsa sispitutsa pe my iwaze niakbakanahatsa pe kino niwatihi my. Myzubaha pe my. Sesus Kiristu myziksizoze iwa my. Simysapybyitsa ziknakaranahatsa pe my: 
\p — Ikiahatsaktsa sinini ykarawy bo taha! — my. Anabo mysipehahik. Iwaze simysapyrẽtsa pe my: 
\p — O ikiahatsaktsa pahasapywyky — my. 
\p Iwa myziksizoze tatuktsa tuk my.  
\v 2 Iwatahi iharere tynatsasokokta! Tsihokdaharẽnaze kino iharere tytsasoikik. Ihokdaha byize kino niwatihi tytsasoikik. Kytsa imyitsitsa tynasibetsakak: 
\p — O amo imysapybyitsa zeka tysimoewyhikta! Sesus humo tyspirikponahaktsa! Ahapunihikrẽtsaktsa — tsimy iwatsahi simysapyrẽtsa moziknaha. Asakparebyijaty. Akubyrisorokok ja tsimy. Iwa tysihyrinymyryky. 
\p  
\v 3 Bykyzehu kytsa ispirikpowy babata ba ziwabynaha. Iharere atakta batu ziky. Amo siakparawy zuba ana bo hi yhỹ mykaranaha. Kytsa amy zimyikinaha ana ty hi mysihyrinymyrykynaha. Ana hi siakparawy. Iwatsahi sihyrinymyrytsitsa bo piwaby tsihikiknaha iwaze amy ty siakparawy piwabykynaha.  
\v 4 Deus harere batu siwabyhy. Amy imysapybara zuba piwabykynaha.  
\v 5 Ikia Timoteo pykyhytuty. Hawa tsimyzuruku naha humo pykyhytuty iwazeka wasani tsimynakara. Sinini tsimykaraze tsapunihikrẽta tsimozik. Deus wasaniha tsinatsasoko. Deus zawatawy itsumuẽhĩtsa tsimozik, iwatahi tsipitsumuẽhĩkĩ. 
\p  
\v 6 Hawaeze ja kytsa pikbezenaha batu sispirikpo. Utakta sirara wata. Tubabatu kytsa siraratsa ty Deus bo nyny ziknakaranahaze tapara nisibakanahaze ky wa. Uta niwatihi hawa eze ja kytsa pikbezenahaze utatu Deus bo katy nyny my Deus pokzi pikbezenahaze Sesus pokzi ba ziktakyri. 
\p  
\v 7 Uta kaokzetuze Deus harere motsasoziuku zuba mynatsasoikik. Sesus humo kaspirikporẽta ziknakara. Ustsa kytsa kahumo Deus harere bo yhỹ mykaranaha. Sesus Kiristu zikzitsumuẽhĩekik pyk ahabyita ziknakara, zikzibyituhukutu Sesus Kiristu tsyhyryze zikzitsumuẽhĩekik. Hawaeze ja mohyrikosokda amy ty Deus kape ziknakaranaha ty tsizubarẽna humo ma ikykara.  
\v 8 Kakubyrisorokrẽta Deus tsyhyryze zikzitsumuẽhĩkik. Hawa kytsa sizubarẽtsa motururuknahaze tapara estuba siharaze pomo tahi iwaze kytsa ipe maha: 
\p — O ikiakta tsipisapybaka — mykaranaha. Iwa mypehakatsa Sesus kytsa sizubarẽtsa okzeka kape my: 
\p — O ikia tsisapybaka ikia wasani tsikykara. Deus zabetesaka iwatahi amysapyrẽta tsikyzik — my. 
\p Kakubyrisorokrẽta Sesus kasoho humo harereziu mykara. Myziksizoze kasoho kytsa bo iwa motsaso. Mypehakatsa wasani mykara. Hawa tsimyzurukunaha bo iktsa ziknakara. Myziksizoze ustsa bo niwatihi: 
\p — Ikiahatsa wasani tsikykaranaha. Deus okzeka wasani tsikykaranaha — my. Iwa motsaso taperytsitsa bo motsaso. Iwatsahi taperyky myziksizo naha humo tsimyzihikiknaha. 
\s1 Timoteo ikia bo zuba mopamykyso. 
\p  
\v 9 Abaka kabo aidytynykta asukmotsihik zeka.  
\v 10 Kytsa katuktsa zikarekbaiknaha. Demas tanamy bo zuba mytsaty mynakara. Zikarekek zuba. Tesaronika bo niparak. Keresẽte Karatas bo niparak. Titu Daramasia bo niukuru iwa nikaranaha.  
\v 11 Rukas zuba katuk nitare. Ikiakta Marakos tyziberikta! Ibo tsipomo zeka atuk tyziokty. Marakos Deus hyriziktsokzawy humo piktsumuẽhĩ.  
\v 12 Tikiko pe my: 
\p — O ikia Epeso bokta! — iky. Hyỹ niy.  
\v 13 Kabo tsinaparak zeka kakpyzazawy tuk tuja. Toroade eze Karapo wahoro eze tihi ikzerekek. Papeu tuktu. Riweros tisapyrẽna asahi siraratsa hwyk hi tyzibykyk. Riweros kino tynasibykykta tsimy. \fig |src="HK00153B.TIF" size="col" copy="by Horace Knowles revised by Louise Bass © The British & Foreign Bible Society, 1994." ref="2 Timoteo 4.13" \fig* 
\p  
\v 14 Aresãdere zikmyijaka. Atahi pero tuk tarabaja ziknakara. Hawa zikmyijaka naha humo mypehakatsa tsihyrinymyrẽta atahi ana sohotyhi ibo mykara.  
\v 15 Ity pykyhytuty ihumo tsimy. Ihumo amytsatyhyhokta tsimykara. Myharere iakparawy byita tsakyriukrẽta. Atahi: 
\p — Ikiahatsa ahamysapybyitsa tsimykaranaha — niy. Tsipihobyk zeka amytsatyhyhokta tsimy. 
\p  
\v 16 Tapara Sesa abazubata tuktsa okzeka iktsasoko utakta kasoho iktsasoko. Batu aty tohi zikbetesa: 
\p — O atahi tsimysapyrẽta my. Amy imyiki batu mykara — niy. Batu aty tohi iwa kasoho ty batu tyso. Sizubarẽtsa zikarekbaiknaha. — O mytuktsa tsimaha — mybarapetu nikaranaha. Iwaze Deus tihi sisoho batu hỹ my. Deus ispe: 
\p — O ikiahatsa Pauro tsikzerekbaiknaha. Kaokzeka ahamysapybyitsa tsimykaranaha. Pauro tsikzerekiknaha humo ahamysapybyitsa tsimykaranaha — my. 
\p Iwa Deus sisoho motsaso zeka kasoho humo batu hỹ my. Iwaze utakta Deus bo mopamykysoko: 
\p — O kazo kasoho humo kytsa humo aty kyri kyri byity. Uta sihumo batu kakyri. Asahi zikarikiknaha sihumo batu aty kyri kyri byity — my.  
\v 17 Asahi zikarikiknaha. Mypehakatsa zuba katuk nitare. Atahi ziktsumuẽhĩkĩ. Iwatahi Sudeutsabyitsa bo Deus wasania ty motsasoko. Kytsa sizubarẽtsa Sudeutsabyitsa Deus wasania ty motsasobaka mypehakatsa zikwy ziktsumuẽhĩ. Atahi zikoktyhyryk. Kytsa parinitsa watsa, sakyriukrẽtsa zikbezekyzykynaha mypehakatsa zikoktyhyryk.  
\v 18 Mypehakatsa, kytsa zikbezekyzykynahaze zikbetesaka. Mohyrikosokdaze pikoktyhyryk ituk kawahi mynapykyryk, mynahyrizikpoze Sesus tuk kawahi mynapykyryk. Atahi abazuba sipehatsa mozik. Iwaze sizubarẽtsa tihi: 
\p — O ikia zuba tsamysapyrẽta awahi amysapyrẽnikita — tsimaha hỹ. Iwa ibo tsimytsasokonaha hỹ. 
\s1 Myzubaha humo kahyrizikbarẽta. 
\p  
\v 19 Uta Pirisira Akiro ahatsa humo kahyrizikbarẽta. Onesiporo itukytsa niwatihi iwatsa humo kahyrizikbarẽta. Iwa sibo tsimytsasoko, sihumo kahyrizikbarẽta hỹ.  
\v 20 Erasto Korĩto eze nitare. Teropemo tsimyitsapyrẽta iwatahi Miretus eze ikzerekek.  
\v 21 Ikia kabo tyzumu. Hyritsik wõbyitu tyzumu hỹ. Katukytsa Euburus, Pudẽs, Rinus, Kaudio ustsa niwatihi iwatsa ahumo tsihapyrykyknaha maha. 
\s1 Deus pahasapywyky. 
\p  
\v 22 O Timoteo atsyhyryze Deus bo mopamykysoko ipe mykara: 
\p — O Deus myzo ikia humo Timoteo tsipunihikrẽta mozik. O myzo Sesus tuktsa kino niwatihi tysipokzitsiki — my. Iwa atsyhyryze Deus bo mopamykysoko. Iwa hỹ. De. 
\cls Pauro