\id 1PE - Rikbaktsa NT -Brazil 2011 (DBL -2013) 
\h 1 Peduru 
\toc1 Peduru tapara papeu humo Sesus tuktsa bo ziwatahaka nanabyitaba napykyryknaha 
\toc2 1 Peduru 
\toc3 1 Pe 
\mt1 Peduru tapara papeu humo Sesus tuktsa bo ziwatahaka nanabyitaba napykyryknaha 
\ip Peduru Sesus tuk zinymyrykyta. Sesus tuktsa bo ziwatahaka nisiakusukniki. Sispirikpobyitsa nisisapybyrikinaha iwatahi sibo ziwatahaka. Deus Peduru ziapewywyky iwatahi Deus harere ziwatahaka. Aba katsa kino niwatihi Sesus soho humo tanymyryky. 
\c 1  
\p  
\v 1 Utakta Peduru. Kiristu Sesus iakzohota. Sesus Kiristu kape niy: 
\p — Ikia myzubaha bo tsimy. Nanabyitaba wasania ty tytsaso — niy. 
\p Yhỹ iky. 
\p Aba ikiahatsa Deus tyryktsa bo piwatahaka. Zahawatawy. Nanabyitaba tsinapykyryknaha. Põto eze tsinapykyryknaha. Karatas eze, Kapazosia eze, Asia eze, Bitinija eze iwa tsinapykyryknaha. Sihudikhudikwy ezektsa ahasoho — O bipyritsa — mykaranaha. Deus batu — Asahi katyryktsa — my.  
\v 2 Deus myzo koikny bakta tu niy: 
\p — O asaktsa mysiwatawy. Amy skaraba niwa nikara, asaktsa mekywa tu moziknaha simysapyrẽtsa moziknaha iwatahi mysiwatawy. Sesus Kiristu harere bo yhỹ mynakaranaha iwaze simysapyrẽtsa moziknaha. Sesus katse babata sisapy zeky nihyrikosokda iwatahi kahyrikoso situk mynapykyryk — niy. Aba Deus bo ahasoho motsasoko: 
\p — O myzo atyryktsa humo tysipokzitsikikta. Asaktsa nanabyitaba mynapykyryknaha tysisakihikykta. Ahumo sakurẽtsa babatsa moziknaha — my. Iwa Deus bo mopamykysoko. 
\s1 Deus sapyrẽnikiha ty ana humo hi tsinamyspihikiknaha. 
\p  
\v 3 Katsaktsa Deus tsimytsasokonahaktsa: 
\p — O Deus myzo ikia zuba tsamysapyrẽta. Ikia Sesus Kiristuzo tsimy wasani tsimykara — tsimaha. Atahi Sesus Kiristu nihyrikosokdaze izihyrizikpowy. Iwatsahi katsa ihumo tsimyspirikponaha zeka Deus tyryktsa tsimoziknaha. Deus myhumo tsimypokzitsiarẽta iwaze ihyrytsa tsimoziknaha. 
\p  
\v 4 Iwatsahi tsipiperykynaha. Deus tuk mywahi tsimynapykyryknaha iwatsahi taperyky. Deus bijoikpe eze tu isapyrẽnikiaha ty kino mybo nyny my. Deus mybo nyny mahaka ba zikyryry batu hawa tohi ziky ba zikokda. Deus isapyrẽnikiaha ty tawahi mynakara anatyhi Deus mybo nyny my.  
\v 5 Deus isapyrẽnikia ty tabaze botu zikymy. Sesus Kiristu humo tsimyspirikponaha zeka Deus tawahi ahahumo tsimypokzitsiukrẽta. Aibani hawa ibo mymyoktyhyryk ana hi myzubaha bo piwatawy. Ituk mywahi tsimynapykyryknaha ana hi taperyky. 
\p  
\v 6 Ana soho bo hi mytsaty tynakaranahaktsa kytsa! Ana humo hi ahakurẽtsa. Mybarawy eze tuze tsimyzurukunaha batu ahaku. Sinini tsimykaranaha humo ahasukatsihikrẽtsa. Ahamyitsapyri humo batu ahaku. Pahamyijaikiknaha humo batu ahaku. 
\p  
\v 7 Ouro wa tsipokzitsarẽna katsaktsa ouro wa. Katsa kino Sesus humo myspirikporẽtsa zeka ihumo mymypokzitsirẽtsa hỹ. Katsaktsa ouro izo bo piakzazanaha wa takpyky amybara tu ja iwaze amy ty ouro baba zuba motare, iwa Deus niwatihi mybo my. Sinini tsimykaranaha zeka Sesus humo myspirikporẽtsa ana humo hi tsihyrinymyrẽta. Sinini tsimykaranaha zeka Deus harere bo yhỹ tsimykaranaha. Myspirikporẽtsa hỹ wasani tsimykaranaha. Ba zikpyk ana humo hi Deus tsihyrinymyrẽta. Ouro izo eze ky waha. Sesus Kiristu myziksizoze Deus ahape: 
\p — Kaokzeka ikiahatsa ahamysapyrẽtsa. Ahaharere wasani Sesus watsa ahapunihikrẽtsa tsimoziknaha — my. 
\p  
\v 8 Katsa Sesus Kiristu bo batu iktsa zikaha iwatsa tu ihumo mymypokzitsirẽtsa. Aba ihumo ba zinynaha iwazehi ihumo ahaspirikporẽtsa hỹ. Ahaspirikporẽtsa zeka ahakurẽtsa tsimoziknaha. Sesus Kiristu humo ahakurẽtsa hỹ.  
\v 9 Ikiahatsa Sesus humo tsikspirikpokonaha. Iwatahi Deus bo pahaoktyhyryk. Aba ahakurẽtsa Deus baze tu tsinapykyryknaha iwatsahi ahakurẽtsa hỹ. Abaka ikiahatsa ituk tsimynapykyryknaha. Tawahi ahahumo abaka ba zikmyrek tsahahyrinymyrẽtsa hỹ. 
\p  
\v 10 Tubabatu Deus sohokotsa mytsaty nikaranaha. Hawa Deus mybarawy ezektsa mysipokzitsiki ana soho bo mytsaty nikaranaha. Anahi zinymyry tsihikiknaha. Asaktsa: 
\p — Hawa Deus hyrytsa humo mysioktyhyryk. Hawa ihyrytsa humo tsimypokzitsiukrẽta — nikaranaha. Iwa ziknapamykysokonaha. Tapara Deus mybarawy ezektsa mysioktyhyryk iwa Deus sohokotsa ziknapamykysokonaha.  
\v 11 Kiristu hyrikoso Deus sohokotsa tuk niapykyryk. Ata soho sibo nitsasokoro. Ata soho: 
\p — Deus zipehata sinini mykara. Sininiwy nepykze Deus isoho “O katse humo kakurẽta” — my kytsa isoho humo niwatihi — O atakta imysapyrẽnikita. Wasani mykara — maha. Anasoho ziwabynahaze Deus sohokotsa hi: 
\p — Aty skaraba Kiristu hyrikoso mybo hi motsasokoro — nikaranaha.  
\v 12 Deus sohokotsa ispe niy: 
\p — Batu ikiahatsa bo zuba katse sinini mykara. Aiba ezektsa kino niwatihi sinini mykara — niy. 
\p Taparaktsa Deus sohokotsa ana harere ziknatsasokonaha. Abaka kytsa Deus wasania ty ahabo motsasokonaha atsatu ahabo motsasokonaha. Deus hyrikoso harere humo motsasoikiknaha. Ata kino Deus bijoikpe ikny inasikta ata soho motsasokonaha. Bijoikpe iknyktsa Deus tsumuẽhĩtsitsa kino niwatihi inasikta harere pinymyry tsihikiknaha. 
\s1 Deus imysapyrẽnikita. Iwatsahi ahamysapyrẽtsa niwatihiktsa. 
\p  
\v 13 Kyze iwatsahi meky watu tsimoziknahaktsa! Sesus Kiristu myziksizoze Deus tisapyrẽna ty ahabo nyny my ihumo myspihikrẽtsa. Ahanamy bo ka mytsaty mytsaty byitaha. Sesus Kiristu myziksizo naha bo zuba mytsaty tynakaranaha!  
\v 14 Tapara ahaspirikpobyize ahasopyksapybyitsa ziknakaranaha. Abaka mahani. Deus harere bo hyỹ tsimykaranaha ana humo hi tsinymyrykynaha. Amy ty wasani tsimynakaranahaktsa!  
\v 15 Deus imysapyrẽnikita. Ata kino ba zimyi. Atahi zahawatawyhik. Iwatsahi ikiahatsa iwata tyzurunahaktsa! Ahaharere wabymybara byihuja ahaharere humo kino wasani tynakaranahaktsa!  
\v 16 Deus papeu humo botu ziwatahaka: 
\p — Utakta ba zimyi. Kamysapyrẽta. Iwatsahi ikiahatsa kawatu tykaranahaktsa. Kawatsa tihi ba zimyinahaktsa — niy. 
\p  
\v 17 Iwaze Deus bo tsimypamykysokonahaze ipe tsimaha: 
\p — O Deus myzo — tsimaha. 
\p Atakta myzubatsa astsatutsa watsa isopyk. Hawa mykaranaha ty motsaso. Asahi wasani mykaranaha zeka isapyrẽnikia ty sibo nyny my. Asahi sisopyksapybyitsa mykaranaha zeka sinini ykarawy bo mysipehahik. Hawa mykaranaha zuba humo motsasoko. Iwatsahi hawa tsimyzurukunaha zeka pykyhytutaha tsimaha. 
\p  
\v 18 Tapara zikzurukunahaze isapybara ty tsikykaranaha. Ahazotsa watsa zikzurukunaha, sisopyk yhỹ tsikykaranaha iwatsahi ahasopyksapybyitsa tsikykaranaha. Deus zikwy humo meky watu tsimoziknaha. Ihumo ahamysapyrẽtsa tsimoziknaha. Hawa sa niy Sesus Kiristu ahasapyzeky zibezenaha. Ahasapyzeky nihyrikosokda iwaze Deus bo myoktyktsa niyzik. Atahi Deus ouro ty batu nyny niy. Parata ty kino niwatihi batu nyny niy. Ouro aiba eze mohokda. Iwaze parata niwatihi mohokda. Batu pykyhy ipokzitsi. 
\p  
\v 19 Deus Sesus hyrikosokdawy huak tsipokzitsarẽna hiba. Kiristu nihyrikosokdaze ahasapy ziakse. Taspu ahapokzi ziweke. Taparaktsa hozipyrykzatsa wa kytsa sapyzeky ziknasibakanaha. Iwatahi sisopyksapybyitsa nikaranaha Deus nisiokzohik hozipyrykzatsa ziknasiwezokonaha anahumo hi nisiokzohik. Hozipyrykzatsa sisapyrẽtsa zuba nisibakanaha. Hozipyrykzatsa simyitsapyrẽtsa zeka ba ziksibanaha. Atawata hi Kiristu ahasapyzeky nihyrikosokda. Imysapyrẽnikita tu ahapokzi nihyrikosokda hozipyrykza wata niy. 
\p  
\v 20 Tapara Deus mybarawy isuknihibyize Sesus mymyoktyhyrykta ziwatawyhik. Iwatatu abazubata Deus tatse zipehahik. Mybarawy ezektsa bo inasik iwaze Deus bo pahaoktyhyryk. Aibaze myzubaha ihumo mospirikponaha.  
\v 21 Kyze Sesus nihyrikosokdaze Deus zihyrizikpowy. Myzubaha ibo iktsa maha. Atahi imysapyrẽnikita wasani mykara. Iwatsahi taperyky. Ikiahatsa Deus humo ahaspirikporẽtsa iwahi Deus mozihikik. 
\p  
\v 22 Abaka Deus harere bo yhỹ tsimykaranahaze, Deus hi: 
\p — O asaktsa wasani mykaranaha. Mekywatu niyziknaha — niy. Ahatukytsa humo ahamypokzitsiukrẽtsa hỹ. Ba zikahape spihikbatanaha ahatuktsa humo ahamypokzitsiukuk.  
\v 23 Ahazotsa ikny tsipupurukuknaha. Ahazotsa mybarawy ezektsa niakbabanaha. Ikiahatsa kino niwatihi tsimyhyrikosokdanaha. Abaka ikiahatsa tsimypurukzonaha hyrity watsa, Deus hyrytsa tsimoziknaha. Deus ba zikyrikosokda. Katsaktsa Deus harere bo yhỹ tsimykaranaha zeka Deus hyrytsa tsimoziknaha. Deus harere ba zikpyk, tawahi mypkyk. Ikiahatsa hi tsimypurukzonahatsa hyrity watsa ihyrytsa tsimoziknaha.  
\v 24 Deus papeu humo 
\q1 — Mybarawy ezektsa wihara sazik waha. 
\q2 Abaka wihara sazik anatu byi 
\q1 hana bo nasaziktõbaik. 
\q2 Wihara sazik hana bo ja 
\q1 atsoko nihokda 
\q1  
\v 25 Deus harere ba zikpyk. 
\q2 Tawahi iharere mynapykyryk — niy. 
\m Ana kino botu tsiwabynaha. Deus wasania ty tsiwabynahaze iharere bo yhỹ tsimykaranaha. 
\c 2  
\s1 Sesus harahare tsipokzitsiarẽta hyrity wata. Sesus tuktsa Deus tyryktsa maha. 
\p  
\v 1 Kyze amy ty sisopyksapybyitsa batu hỹ zikaha ahamyspihikbata byrihuja. Wasape tsimykaranaha! Mektsa humo ahazokdi byrihuja! Ahasopyksapy byihuja! Ahaharerewabymybara byihuja! Iwa tsimykaranaha. Tapara ahaspirikpobyitsa tu tsikykaranaha. Abaka batu. Mekywatu tsimoziknaha. 
\p  
\v 2 Mypehatsa ahahumo tsimypokzitsiukrẽta. Iharere papeu humo ziwatahaka ana kino tsipinymyrykynaha! Ibykyhy ipurukuhu zytyk tawa taje tsotsik iakparawy. Ikiahatsa kyry watsa Deus harere ahakparawy. Iharere anawaha. Ibykyhy wotsik humo taypykyk anawa hi Deus harere humo meky watu tsimoziknaha. Ahamysapyrẽtsa tsimoziknaha.  
\v 3 Iwaze Sesus humo ahaspirikporẽtsa atahi Deus pahaoktyhyryk, atahi ihumo pahapokzitsiki. 
\p  
\v 4 Mypehakatsa Sesus humo ahaspirikporẽtsa. Atahi harahare ispitu zek tawata. Sesus zuba ispitu mynapykyryk. Wastuhu kytsa ihumo batu siakparawy. Sispirikpobyitsa hi ihumo batu siakparawy. Isoho: 
\p — Atakta batu imysapy — sisopyk. Deus hi isoho: 
\p — Atakta imysapyrẽnikita. Zikpehata ba zikmyi. Mybarawy ezektsa kabo mynasioktyhyryk — niy. 
\p  
\v 5 Ikiahatsa Sesus humo tsimyspirikponaha zeka atahi ahahumo tsimypokzitsiukrẽta. Ikiahatsa haraharezatatsa hyrity watsa tsimoziknaha. Deus wahoro zubata haraharezatatsa ty hi nizukniki. Asahi ihumo sispirikporẽtsa iwahoro zubata hyrity watsa maha. Deus hyrikoso situk mynapykyryk iwatsahi iwahoro hyrity watsa maha. Abaka ikiahatsa hi Deus wahoro zubata eze ziknapamykysokonahatsa watsa tsimaha. Mekywatu tsimoziknaha. Deus hyrikoso ahatuk mynapykyryk humo ahamysapyrẽtsa tsimoziknaha. Tubabatu Deus wahoro zubata eze ziknapamykysokonahatsa Deus zitsumuẽhĩkĩnaha. Siwatsa ikiahatsa ziknapamykysokonahatsa watsa ikiahatsa Deus tsitsumuẽhĩkĩnaha. Nawa haty Deus bo nyny niaha ana humo hi tsakurẽta nikara. Atsatu nawa ha Deus bo nyny tsimaha ana humo hi tsakurẽta mykara. Sesus humo ahaspirikporẽtsaze Deus ahahumo tsakurẽta mykara.  
\v 6 Deus papeu humo ziwatahaka: 
\q1 — Kytsa wahoro mozoknikinahaze haraharetsa mysiwatawykynaha. 
\q2 Utakta harahare hyrity wata. 
\q1 Harahare tisapyrẽta. 
\q2 Harahare ustsa haraharezatatsa iwa babatsa tu buruhuwa nisizozokonaha. 
\q1 Atahi harahare hyrity wata myzipeha. 
\q2 Siaõ sapy waha bo myzipeha. 
\q1 Atahi myzubaha ibo iktsa zuba maha. 
\q2 Wasani mykara. 
\q1 Aty ihumo tispirikporẽta atahi batu isikpyby. 
\q2 Atahi tsakurẽta hỹ 
\m Iwa Deus papeu humo niy. 
\p  
\v 7 Ikiahatsa Sesus humo ahaspirikporẽtsa ahabo harahare hyrity wata my. Harahare tisapyrẽta. Ihumo sispirikpobyitsa Sesus batu siakparawy, atahi sibo harahare isapybyita hyritywa my. Deus harere papeu humo ziwatahaka: 
\q1 — Wahoro suknikitsa ata harahare humo batu hỹ zikaha. 
\q2 Ata harahare hi tisapyrẽta niyzik. 
\q1 Ata humo hi ustsa haraharezatatsa iwa babatsa buruhuwa nisizozokonaha — niy. 
\p  
\v 8 Usa Deus papeu humo ziwatahakazo: 
\q1 — Ata harahare humo hi kytsa mynarahanaha. 
\q2 Kytsa Deus harere humo batu hỹ zikaha 
\q2 sisopyksapybyitsa nikaranaha. 
\q1 Iwatsahi harahare hyrity wata nisimyiwy — niy. 
\p Ata hyrity wata Kiristu kytsa abazubatsa pehakatsa mozik. Asahi iharere bo batu hỹ zikaha natukyrikihyk nahatsa watsa. Hawa Deus nizihikik batu hỹ niaha. 
\p  
\v 9 Ikiahatsa hi meky watu tsimoziknaha. Deus zahawatawy. Tubabatu ityryktsa Sudeutsa nisitsihikik. Iwatahi zahawatahawy. Ikiahatsa Deus wahoro zubata eze ziknapamykysokonahatsa hyrity watsa Deus tsitsumuẽhĩkĩnaha. Mekywatu tsimoziknaha. Deus hyrytsa tsimoziknaha. Deus zahawatawy iwatsahi ipe tsimaha: 
\p — O Deus myzo ikia zuba wasani tsimykara. Ikia zuba tsamysapyrẽta. Ikia myhyrizikwanikita — tsimaha. Iwa ahamysopyksapybyitsa tsikykaranaha iwaze tsimoewyhiknaha ana ty hi tsipiwatawykynaha. 
\p Tapara ikiahatsa kytsa miwa ezektsa watsa tsimaha. Abaka kytsa iwororoha buruktsa watsa tsimaha ahamysopyksapybyitsa tsikykaranaha tsimoewyhiknaha.  
\v 10 Tapara ikiahatsa Deus hyrytsa byitsa tu. Abaka ihyrytsa babatsa tsikyziknaha. Tapara ahanamybyitsa watsa abaka batu. Abaka Deus ahahumo tsimypokzitsiukrẽta. 
\s1 Katsa Deus tuk tsimyzihikiknaha. 
\p  
\v 11 Kyze — O katukytsa ikiahatsa mybarawy eze sisukmotsa watsa tsimaha. Bipyritsa watsa. Mybarawy eze tsinapykyrykspyknaha. Ikiahatsa ahabo zuba mytsaty tsimykaranaha zeka ahamysopyksapybyitsa tsimykaranaha. Ikiahatsa tsimyikinaha. Ahamysapybyitsa tsimykaranaha ana hi tsimoewynaha — my.  
\v 12 Kytsa Sesus humo sispirikpobyritsa zimyijaikiknaha. Sesus tuktsa soho motsaso tsihikiknaha: 
\p — Myokzeka batu wasani mykaranaha. Kytsa nisibaikiknahatsa watsa — mybarapetu mykaranaha. Ikiahatsa siokzeka batu zimyinaha. Ahahyrizikporẽtsa wasani tsimahaktsa! Ahamysapyrẽtsa tsimaha iwaze ahasoho motsasokonaha: 
\p — O asahi wasani mykaranaha — maha. Siharereziubyitsa ahasopyk wasaniha humo harereziu mykaranaha. Nawa puruze Sesus myziksizoze ahasoho tihi: 
\p — O asaktsa simysapyrẽtsa — mykaranaha. 
\p  
\v 13 Kyze ikiahatsa Sesus tuktsa tsimaha. Mypehakatsa Sesus hyrytsa tsimaha. Mypehakatsa harere bo yhỹ tahaktsa! Iwa tsimyzurukunaha zeka Sesus soho ty ka batu tyso: 
\p — O atakta batu imysapy — maha. Iwa ba ziktsasonaha. Mypehakatsa abazubatsa Sesa harere bo yhỹ tsimykaranaha. Mypehakatsitsa ustsa hudikhudikwy ezektsa iharere bo yhỹ mykaranaha.  
\v 14 Ahapehakatsa harere bo yhỹ tsimykaranaha. Deus harere humo Sesa zahapeha. Kytsa simysopyksapybyitsa nikaranaha ipokso sipybyrẽtsa. Kytsa hi simysapyrẽtsa sisoho: 
\p — Myokzeka wasani tsawatsa tsimaha — mykaranaha.  
\v 15 Asaktsa Sesus humo sispirikpobyitsa ahasoho pahaziubyri tsihikiknaha. Ikiahatsa hi tsipisapybanaha zeka batu zikaha.  
\v 16 Zihitsa tsumuẽhĩtsa pe: 
\p — Tsimyzukehik — niy. Kyze ikia tsipiksi iwa hana wa tihi mykaranaha. Hana bo ja tahasapy tsihikiknaha nabo mokurunaha. Katsa Sesus humo tsimyspirikponaha zeka siwatsa mymyzihikrẽtsa. Myharere zuba zeka tyso so byitaha iwa zeka batu imysapy tsimykaranaha. Iwa tihi: 
\p — Aba mymyzihikrẽtsa iwaze tsipipokzitsikinaha. Deus harere bo zuba yhỹ tsimykaranaha — tsimaha.  
\v 17 Myzubaha bo wasani tsimykaranaha! Ustsa Sesus tuktsa ahatukytsa humo ahamypokzitsiukrẽtsaktsa! Deus harere bo pykyhytuty yhỹ tsimykaranaha. Mypehakatsa abazubata harere bo yhỹ tsimykaranaha. Takino ustsa pehakatsa sihudikhudikwy ezektsa siharere bo yhỹ mykaranaha. Iwaze sizubarẽtsa bo wasani tsimykaranaha. 
\s1 Kiristu sininiwyky atawata tsimyzurukunahaktsa. 
\p  
\v 18 Kyze O Sesus tuktsa ahatsihitsa harere bo yhỹ tsimykaranaha. Ahatsihitsa ahabo wasani mykaranaha zeka siharere bo yhỹ tsimykaranaha. Ahatsihitsa ahabo wasani ahabyizeka niwatihi siharere bo hyỹ tsimykaranaha. Ahatsihitsa simysapyrẽtsa harere bo yhỹ tsimykaranaha. Sisakimyijanikita zeka kino niwatihi siharere bo yhỹ tsimykaranaha. 
\p  
\v 19 Ustsa kytsa pahasapybyikinaha zeka Deus harere bo yhỹ tsimykaranaha humo sinini tsimykaranahaze. Iwa Deus myzehikik ahahyrinymyrẽtsa. Ikiahatsa sinini tsimykaranaha zeka ahakubyrisoroku ja iwaze Deus tisapyrẽna ty ahabo nyny my. 
\p  
\v 20 Ahatsihitsa pahabetsakaknaha ahamysapybyitsa tsimykaranaha humo Deus tisapyrẽna ty ahabo batu nyny ziky. Ahazikaranikitsa zeka pahasininiwyky iwaze Deus isapyrẽnikia ty batu ahabo nyny ziky. Ikiahatsa kino tsipisapybakanaha zeka ahatsihitsa pahasininiwykynaha tu iwaze Deus tisapyrẽna ty ahabo nyny my. Ahapunihikrẽtsa tsimoziknaha.  
\v 21 Ana humo kino Deus zahawatawyhik sinini tsimaha Kiristu wata zahawatawy. 
\p Kiristu ahasapyzeky sinini nikara iwatsahi ikiahatsa sinini ykarawy bo ahawahi ba zikahasapynaha. Atahi imysapyrẽnikita tuze sinini nikara. Iwata tsimyzurukunahaktsa ana bo kino Deus zahawatawyhik.  
\v 22 Kiristu ba zimyi. Ba zikmyspihikbata.  
\v 23 Ustsa ihumo siharerewabymybarẽtsa atakta sibo batu harere. Kytsa zimyijakanahaze batu taty tsapusare niy. Tasukyritsitsa ty batu tyso: 
\p — Ikiahatsa tsipiksapybyrikinaha iwatahi sinini tsimaha iwa mozihikik — my. Iwa batu tyso. Atahi: 
\p — O Deus ikia kahumo tsipikpokzitsiki kahyrinymyrẽta. Ikia hi wasani tsimykara. Kasukyritsitsa bo wasani tsimykara — niy. Iwa Deus bo nitsaso. 
\p  
\v 24 Mysopyksapybara humo Kiristu nihyrikosokda. Iharapatawyhyta humo nihyrikosokdaze mysopyksapybyitsa tsimykaranaha mysapyzeky nihyrikosokda, iwaze mysopyksapybyitsa tsikykaranaha Deus nimyokzohik. Nihyrikosokda iwatsahi mypunihikrẽtsa tsikyziknaha. Batu mypyby. Mekywatu tsimoziknaha. Deus okzeka mysapyrẽtsa. Kiristu tetekwy humo tsikzororonaha.  
\v 25 Tsikykmynaha. Katsaktsa hozipyrykzatsa hyrity watsa asahi ske byita buruk nizaranaha. Abaka Deus mymyoktyhyryk. Ituk tsinapykyryknaha. Atahi myhumo tsimypokzitsiukrẽta. Iwaze myzarabyitsa wa tsimoziknaha. 
\c 3  
\s1 Hawa sisukzakatsa sisopyk. 
\p  
\v 1 Kyze nawa sipytsakaza! Ahapytsa harere bo yhỹ tykaranaha. Wastuhu ahapytsa Deus harere bo yhỹ ahabyizeka ikiahaka zuba iharere bo hyỹ tsimykaranaha. Ikiahaka wasani tsimykaranaha zeka ahapytsa Deus harere bo hyỹ mykaranaha. Ikiahaka ityso byizeka Deus harere bo hyỹ mykaranaha.  
\v 2 Ikiahaka wasani tsimyzurukunahaze ahapytsa tahapehe mykaranaha: 
\p — Kaoke tatsa tsimysapyrẽtatsa. Atatsa iktsa zuba isopyk — mykara. Iwatahi Sesus Kiristu humo tispirikporẽta mozik. 
\p  
\v 3 Kykyryk pykyhytutaha! Ahasuk ty wasania tyzuba korokbyktaha! Ahasuk wasanita ty korobyk tsimaha zeka kytsa ahabo batu iktsaziu zikaha. Ahaharadi humo kino niwatihi hazizo hazizo byritaha iwatsahi kytsa ahabo batu iktsaziu zikaha. Ahanahatsa humo ouro bara tu ahatsyhyrytariktsa ipokzitsi baratu.  
\v 4 Mysuk mysykbaik batu zikokzo. Mynahatsa hana bo ja, mytsyhyrytariktsa mohokdanaha. Ahamoksapyrẽtsa Deus okzeka batu ipokzitsi. Ahahyrizikararawy hiba Deus humo tsipokzitsarẽta. Ahazikarabyrihu ja kytsa tysitsumuẽhĩ ana humo hi Deus tsakurẽta. Ba zikmyi ana humo kino Deus tsakurẽta. 
\p  
\v 5 Tubabatu taparakykyhy zikzurukunaha. Asizahi Deus humo sispirikporẽza, asizahi Deus tisapyrẽna ty ziperykynaha. Asiza kino tahapytsa harere bo yhỹ ziknakaranaha. Tahapytsa humo simypokzitsiarẽza hỹ. Iwazahi Deus okzeka simysapyrẽza niyziknaha. 
\p  
\v 6 Asiza Sara waza. Atatsa tabarikta Abarão harere bo yhỹ ziknakara. Ikia kapehakatsa hyrity watsa nikara. Iwa atatsa tabarikta pe isopyk. Iwaze ikiahaka Sara waza tsimoziknaha. Ahapunihikrẽza ahapyby byihuja Sara waza tsimaha. Iwaze Sara hyrytsa waza tsimoziknaha. 
\p  
\v 7 Kyze kytsa bo motsasoko. Ahaokeza batu sipaik maha ana humo hi mytsatyziutaha. Iwatsahi tysipokzitsinahaktsa! Deus tabo pahaoktyhyryk iwa ahaokeza kino niwatihi tabo mysioktyhyryk. Asizahi iharere bo yhỹ maha zeka ikiahatsa watsa iwatsahi harapetok tu tabo pahaoktyhyryk. Atatsa ka tsipokzitsikinahaktsa! Iwatsa tsimyzurunaha zeka Deus bo tsimypamykysokonahaze pahawaby. 
\s1 Ahamysapyrẽtsa tsimykaranahatsa. 
\p  
\v 8 Kyze sizubarẽtsa bo kapehawy motsasoko. Astsa botu mytsaty tsimykaranaha! Tyharape pokzitsinahaktsa! Ustsa tahatsumuẽhĩnaha. Asa zuba batu tyso — uta zuba wasani — kasopyk iwa batu tyso. Tyharape pokzitsikinahaktsa! 
\p  
\v 9 Deus zahawatawyhikze ahape niy. — Amy ty tisapyrẽna ty ahabo nyny my — niy. Kytsa pahamyijakanaha zeka ikiahatsa sibo ba ziksimyija. Kytsa ahabo tahasakaninaha zeka awatu taha. Ikiahatsa hi tysipokzitsinaha.  
\v 10 Mytsatyziutaha! Deus harere humo papeu ziwatahaka: 
\q1 — Atahi tawahi tsakurẽta mozihikik 
\q2 atahi batu mybarapetu mykara. Ba zikbetsak. 
\q1  
\v 11 Mysopyksapybyritsa tsimoewynaha 
\q2 katsaktsa tsipisapybakanaha! 
\q1 Mypehatsitsa batu imysapy mynakaranaha 
\q2 katsaktsa tsipiharereziukunaha. 
\q1  
\v 12 Mypehakatsa kytsa sisopyksapyrẽtsa bo nasisuparaka iwaze sihumo mysipokzitsiki. 
\q2 Ibo mopamykysokonahaze mysiwabyziuku. 
\q1 Kytsa sisopyksapybyitsa mykaranaha 
\q2 sihumo takyriki — niy. 
\m Iwa Deus harere papeu humo ziwatahaka. 
\s1 Kiristu tuktsa ihumo sinini mykaranaha. 
\p  
\v 13 Iwaze tsipisapybakanaha zeka aty sa pahakniki  
\v 14 Iwatuze wasani tsimykaranahaze siharereziubyitsa pahasapybyikinaha. Iwaze ahakurẽtsa tsimoziknaha! Sipybyrẽtsa tu nikaranaha ikiahatsa ahapunihikrẽtsa tsimoziknaha! Iwaze Deus tisapyrẽna ty ahabo nyny my. 
\p  
\v 15 Kiristu ahapehakatsa bo ka iktsazuba tahaktsa! Iharere bo zuba ma tsimynakaranaha. Aty my zeka tahi: 
\p — Hawa Sesus humo aspirikpo — my. Sesus humo ahaspirikporẽtsa babatsa tsimaha zeka iwaze ahasikpybybyitsa Sesus soho sibo tsimytsasoziukunaha.  
\v 16 Sibo tsimytsasoziukunahaze sihumo ahamypokzitsirẽtsa, ahaharereziuwytsa ty iwatsahi piwabytoktokonaha. Ahamysapyrẽtsa zeka siharerewabymybaranikitsa ty ka ba ziksisonaha. Ahasopyksapyrẽtsa humo ahaharere soho ziubyibatabyihuktsa mykaranaha! 
\p — Kiristu hyrytsa batu simysapy maha — ana kino motsaso tsihikiknaha. Wasani tsimykaranaha iwatsahi batu siharerewabymybara pimyikiknaha. 
\p  
\v 17 Kytsa pahasapybyinaha zeka ahamysapyrẽtsa humo wasani. Kytsa pahasapybyikinaha Deus hi pahapokzi tsihikik. Ikiahatsa kytsa pahamyijakanaha zeka ahamysapybyitsa tsimykaranaha humo batu wasani. Ana humo hi Deus takyriki. 
\p  
\v 18 Kiristu soho bo mytsatyziutaha! Hawa nihyrikosokda mytsatyziu tsimaha. Mypokzitsikitsa mysapyzeky nihyrikosokda. Estuba zuba nihyrikosokda iwaze Deus mysopyksapybyitsa tsikykaranaha Kiristu humo mymyokzohik. Kiristu imysapyrẽnikita tuze siharereziubyitsa sapyzeky nihyrikosokda. Iwaze Deus bo mymyoktyhyryk. Mybarawy boze isukyrytsitsa inury zibezenaha. Deus zihyrizikpowy. 
\p  
\v 19 Kiristu sinini ykarawy bo inakozore. Anaeze Deus harere nitsasoko. Sinini ziknakaranahatsa hurukwy eze hi Deus harere nitsasoko.  
\v 20 Asahi Deus harere bo batu hỹ zikaha. Tubabatu Noe tsaraha puẽtsikbyita nizuknikize Deus harere bo batu hỹ zikaha. Deus mybarawy ezektsa humo iakyri tsihikbyita nikara. Tsakubyrisorokrẽta nikara iharere bo yhỹ maha ziperyky. Sizubabyitsa tu iharere bo hyỹ nikaranaha. Oito zuba iharere bo ma nikaranaha. Oito zuba tsaraha puẽtsikbyita bo nipupunaha. Deus oito zuba nasizuk. Asahi zuba tsaraha puẽtsikbyita eze tu niapykyryknaha. Ustsaktsa pihik bo tahababaiknaha. 
\p  
\v 21 Pihik kino myharasusuwy soho piwatawyky. Myharasusunahaze ba zikmypiknaha. Katsaktsa tsimyharasusunahaze myzubaratsa pe: 
\p — Abaka Deus okzeka wasani tsimaha. Iharere bo zuba hyỹ tsimykaranaha. Sesus nihyrikosokda na humo mysapyrẽtsa tsimoziknaha — tsimaha. Anahi pihik eze myharasusuhiknahaze myzubaha bo tsipiwatawynaha. Sesus Kiristu nihyrizikpozo anahumo hi iwatsa tsimykaranaha. 
\p  
\v 22 Ata hi bijoikpe bo nido. Deus tuk napykyryk. Ipanuryk taba mynapykyryk. Sizubarẽtsa iharere bo hyỹ mynakaranaha. Bijoikpe iknyktsa Deus tsumuẽhĩtsitsa, simyharerewabyrẽtsa zikwytsitsa bijoikpe pehatsitsa iwatsa Sesus Kiristu harere bo ma mynakaranaha. 
\c 4  
\s1 Hawa Kiristu zikzuruku ikiahatsa iwatsa tsimyzurukunaha. 
\p  
\v 1 Kiristu mybarawy eze tuze sinini nikara. Ana bo kino mytsatyziutaha! Mypokzitsiwy tuk sinini nikara iwatsahi ikiahatsa hi astsatu mytsaty tahaktsa. Ikiahatsa kino niwatihi aba sinini tsimaha tu tsikahazozikymybanaha. Sinini tsimaha zeka imysapybara humo batu hỹ zikaha iwatsahi batu ahamyi wasani tsimykaranaha. 
\p  
\v 2 Tapara ahaharere bo zuba yhỹ ziknakaranaha abaka batu, Deus harere bo zuba ma tsinakaranaha.  
\v 3 Tubabatu kytsa sispirikpobyitsa watsa zikzurukunaha. Imysapybara ty zuba ziknakaranaha. Ana hi niwazuba tsikaha! Tapara wytykyryk ziknasisapybyrikinaha. Ustsa kytsa nasiwowokoronaha, jabyiza ziknasipyrirykyknaha ustsa kytsa ziknasipyrirykyknaha, tsõsĩ zikzikukunaha humo batu kyik ziky, tsahamypyiryjakrẽtsa, deusbyitsa bo zuba ziknapamykysonaha. Abaka asa kino botu nepykbanaha niwazuba. 
\p  
\v 4 Abaka sispirikpobyitsa okzeka ikiahatsa Sesus humo meky watu tsimoziknaha. Ahamysapyrẽtsa iwatsahi pahasapybyrikinaha. Ikiahatsa imysapybara ba hỹ zikaha. Amy ty batu imysapy batu situk zikaha ana humo kino batu sihyrinymyry iwatsahi ahasoho humo siharerewabymybarẽtsa. Ahasoho humo mybarapetu mykaranaha.  
\v 5 Siharerewabymybarẽtsa tu ka Deus bo tytsasonaha. Hawa mybarawy eze zikzurukunaha Deus bo motsasonaha. Aty wasani ziknakara Deus tisapyrẽna ty ibo nyny my. Atakta imysapybyita tu ziknakara Deus sinini ykarawy bo myzipeha. Kiristu myziksizoze kytsa ihuak ty sibo nyny my. Iwaze kytsa simysopyksapybyitsa kino niwatihi sihuak ty sibo nyny my. 
\p  
\v 6 Tubabatu myzotsa nihyrikosokdanaha, hawa mybarawy eze zikzurukunaha, Deus nisiny. Atahi sihuak ty sibo nyny niy. Katsa mywatsa sihuak ty Deus sibo nyny niy. Kiristu Deus harere sibo nitsasoko. Iwaze asaktsa sispitutsa kino niwatihi Deus tuk tahawahi mynapykyryknaha. 
\s1 Isapyrẽnikia sohotsitsa ustsa bo tysitsumuẽhĩnaha. 
\p  
\v 7 Aibani tsizubarẽna nepyk. Ikiahatsa hi Deus bo tsimypamykysokonaha. Batu ahakubyrizikzumu. Ahape tu ahasopyk tsimykymynahaktsa iwaze Deus bo tsimynapamykysokonaha.  
\v 8 Tyharape pokzitsikinahaktsa! Ahamysapyrẽtsa tsimaha iwatsahi ahatukytsa sisopyksapybyitsa nikaranaha ana soho bo hi batu mytsaty zikaha. Iwa tsimyzurunaha zeka Deus okzeka wasani tsimaha. 
\p  
\v 9 Ahatukytsa ahawahoro bo mozumukunahaze ikiahatsa ispe tsimaha: 
\p — Kawahoro bo paku paku tynaha tohi buruk tihi ahawanu tyhãitaha tsimaha. Iwa tsimytsasonaha sisukmotsa bo tsimaha. Ahaharerehakyhyk byihuja. 
\p  
\v 10 Deus tisapyrẽna ty mybo nyny my. Iwaze mywatu tsiaksekenaha. Iwatsahi ustsa tahatsumuẽhĩnaha.  
\v 11 Ustsa kytsa bo tsimypamykysokonahaze Deus harere sibo tsimytsasokonaha. Ustsa bo tsimysitsumuẽhĩnahaze Deus zikwy humo tsipiwatawykynaha. Iwaze kytsa: 
\p “Deus zuba imysapyrẽnikita my. Ihyrytsa bo tisapyrẽna ty nyny my. Ana bo kino iktsa tsimaha” — mykaranaha. Katsaktsa Sesus Kiristu bo tsimytsasokonaha: 
\p — O ikia zuba wasani tsimykara. Ikia hi tsamysapyrẽta aharere bo zuba tsiwabytoktokonaha — tsimaha. Iwa tsimytsasoikiknaha tawahi ituk tsimynapykyryknaha. Iwa hỹ my. 
\s1 Hawa Kiristu tuktsa wa sinini tsimykaranaha. 
\p  
\v 12 Katukytsa ahahumo kamypokzitsiarẽta. Sinini tsimykaranaha zeka Kiristu humo ahaspirikporẽtsa iwatsahi ahapyby byihuja. Ikiahatsa Sesus pahadutu. Batu tyso: 
\p — Amo skaraba sinini tsimykaranaha. Ustsa kytsa sininiwy bo batu istykzo — tsimaha. Iwa batu tyso. Sinini tsimykaranaha zeka batu ahasukatsihik.  
\v 13 Kiristu ahaziky wata niyzik. Atahi sinini nikara atawatahi ikiahatsa kino tsimaha. Abaka sinini tsimykaranaha bykyze Kiristu imysapyrẽnikita tu piwatawykyze ahakurẽtsa hỹ. Ikiahatsa ahamysapyrẽtsa iwata tsimoziknaha. Iwaze ahakurẽtsa hỹ. 
\p  
\v 14 Ikiahatsa Kiristu hyrytsa tsimaha. Asaktsa Sesus humo sispirikpobyitsa ahasoho humo siharerewabymybarẽtsa. Zahasohoziubyibatakanahaze ahakurẽtsaktsa! Pahasohometukunaha zeka Deus hyrikoso ahatuk mynapykyryk. Ana bo kino mytsatyziu tsimahaktsa! Hawa Deus hyrikoso wasani mynakara iwatahi ahatuk mynapykyryk, ustsa siharerewabymybaranikitsa anahi piwatawyky. 
\p  
\v 15 Kytsa harape ty beze beze byitaha. Ustsa namy ty ka ykse ykse byitaha. Ahatsyhyryboa byihuja! Ustsa kytsa humo batu isty myija. Batu ahaharerewabymybara. Iwa tsimykaranaha zeka kytsa pahasapybyikinaha ana humo hi wasani my.  
\v 16 Sinini tsimykaranaha zeka Kiristu hyrytsa humo meky watu my. Ana humo kino batu ahasikpyby. Ikiahatsa hi: 
\p — O Deus myzo sinini tsimykaranaha Kiristu hyrytsa humo iwaze mykurẽtsa — tsimaha. Kiristu humo kytsa pahamyijakanahaze iwa Deus bo tytsasonaha. 
\p  
\v 17 Abaka Deus mybarawy ezektsa bo iktsa mynakara. Asaktsa ihyrytsa mysimyijakanaha sibo iktsa mynakara. Amo simysapybyitsa mykaranaha ana humo hi sihuak ty sibo nyny my. Aibani sihuak ty sibo nyny my. Sinini ykarawy bo mysipeha. Iwaze asa hi wasaniha humo batu sispirikpo iwatsahi sinini ykarawy bo mysipeha.  
\v 18 Deus harere papeu humo ziwatahaka: 
\q1 — Tsihokdaharẽnaha zeka simysapyrẽtsa Deus bo mysioktyhyryk. 
\q2 Iwaze hawa ja asaktsa sisopyksapybyitsa nikaranaha 
\q1 ana humo hi tsihokdaharẽna hỹ. 
\q2 Asaktsa Deus harere bo yhỹ habyitsa mykaranaha Deus bo batu mysioktyhyryk, 
\q1 asahi sinini ykarawy bo mysipehahik — niy. 
\p  
\v 19 Iwaze katsaktsa Deus harere bo ma tsimahaze kytsa mymymyijakanaha ana hi Deus myzehikik iwatsahi ihumo myspirikporẽtsa hỹ. Mybarawysuknitsa humo myspirikporẽtsa. Iwaze tyzipokzitsikinahaktsa! Deus hi myhumo tsimypokzitsiukrẽta babata mybarawysuknitsa myhumo tsimypokzitsiarẽta hỹ. 
\c 5  
\s1 Deus tuktsa hozipyrykzatsa watsa maha. 
\p  
\v 1 Abaka myspirikpokonahatsa bo pahapehaka ikiahatsa humo Sesus tuktsa sipokzitsikitsa pahapehaka. Uta kino niwatihi ikiahatsa watsa Sesus tuktsa sipokzitsikitsa. Hawa Kiristu sinini nikara motsasoko. Utakta ibo iktsa iky. Kaokzetu nitsakikinaha. Deus sizubarẽtsa bo Kiristu imysapyrẽnikita mysiwatawy. Iwaze utakta niwatihi iwata kamysapyrẽta mozik.  
\v 2 Deus zahawatawy ihyrytsa myspirikpokotsa tsimoziknaha ana humo hi zahawatawyhik. Iwatsahi hawa hozipyrykzatsa perytsitsa mynasipokzikinahatsitsa iwatsa ikiahatsa Deus hyrytsa tynasipokzitsikinahaktsa kytsa! Mykyzoziurẽtsa iwatsahi tatsumuẽhĩnaha hỹ. Ahahyriziktsokzawy humo ahakurẽtsaktsa anahi Deus mozihikik. Batu ahape tu zikaha: 
\p — Tyzeka ja kytsa okyrysaro ty kabo nyny maha — my. Iwa zeka batu mytsaty tsimaha. Ahape tu ahasopyk: 
\p — Hawaze kytsa tahatsumuẽhĩnaha — tsimaha. Iwa ahape tu ahasopyk. 
\p  
\v 3 Isty ykzo ykzo byitaha. Isty betsak betsak byitaha sihumo tysipokzitsikinaha. Wasani tsimykaranaha. Iwa tsimyzurukunaha zeka ahawatsa wasani mykaranaha niwatihi. Pahasopykziukunaha. Asa hi: 
\p — Myspirikponahatsa simysapyrẽtsa astsatu tsimyzurunahaktsa kytsa — maha.  
\v 4 Kiristu mysopykanikita my. Atahi mykzotsa hozipyrykzatsa perytsitsa wata my. Kiristu myziksizoze ihuak ty ahabo nyny my. Hawa mybarawy ezektsa siharereziuwytsitsa sitsohorik ty nyny niaha. Sitsorik ty ouro ty nyny nikaranaha. Bykyze ouro mohokda. Ikiahatsa hi Deus isapyrẽnikia ty ahabo nyny my zeka. Anahi tawahi tisapyrẽna. 
\p  
\v 5 O ahaypykyhyzytyktsa! Pykyhytutaha hawa haty sitsaikbatsa mopamykysokonahaze siharere bo ma tynakaranaha. Ahazubarẽtsa tahapetsumuẽhĩnaha! 
\p — Uta zuba wasani mykara — iwa batu tyso. Tahaharerewabynahakta! Deus harere ziwataha: 
\p — Asa sizokzianikitsa utakta sihumo ikykyriki awatutsa zuba mysitsihikik. Asa sisorokbyitsa mysitsumuẽhĩekik hỹ — niy.  
\v 6 Iwatsahi ikiahatsa myhyrizikwanikita ihumo tsahamozikrẽtsa tsimoziknaha. Deus izikwyrẽnikita ba hawa tohi zikzukninaha. Ikiahatsa ihumo tsahamozikrẽtsa tsimoziknahaze Deus ahahumo tsakurẽta mozik.  
\v 7 Paikpa mytsaty tsimykaranaha zeka Deus bo tsimypamykysonaha: 
\p — O Deus myzo paikpa mytsaty ikykara. Ikia humo kaspirikporẽta iwatahi ikia tsipiktsumuẽhĩ — tsimaha. Iwa ibo tytsasonaha iwatahi ahahumo tsimypokzitsiukrẽta mynakara. 
\p  
\v 8 Tsikymynahaktsa tsihasuparakanahaktsa! Ahasopyksapybyitsa tsimykaranaha tsimoewynaha. Parini irapaze kakaik myze. Tawata Satanas mypauktaba pyryrykba mykara. Sesus humo myspirikporẽtsa ana kino mopyk tsihikik. Ihumo pykyhytutaha! Sesus humo ahaspirikporẽtsa iwatsahi Satanas harere bo ba hỹ zikaha. \fig |src="LB00047B.TIF" size="col" copy="Louise Bass ©The British & Foreign Bible Society, 1994." ref="1 Peduru 5.8" \fig* 
\v 9 Tsikahapunihiknahaktsa. Satanas hyrikoso sapybara pehakatsa harere bo waby waby byitaha. Ikiahatsa ipe tsimaha: 
\p — Aharere batu mykparawy. Aharere bo batu hỹ — tsimykaranaha. Iwa ibo tsimytsasoikiknaha. Ahawatsa ustsa Sesus tuktsa sinini nikaranaha. Nanabyitaba ahatukytsa Sesus humo mymymyijakanaha ana kino ahahyrinymyrẽtsa.  
\v 10 Sininispyk tsimykaranaha. Deus ahahumo tsimypokzitsiukrẽta. Kiristu imysapyrẽnikita. Deus zahawatawyhik Kiristu wata tsimoziknaha. Kiristu tuk tsimyzurukunaha. Deus humo wasani tsimykaranaha Sesus humo tyspirikpotohinahaktsa! Ana humo hi pahatsumuẽhĩekik. Deus zikwy humo tsahamyharerewabyrẽtsa tsimoziknaha. Sesus tsipunihikrẽta my iwaze ikiahatsa iwata tsimoziknaha. Atahi tawahi imysapyrẽnikita. Iwaze ikiahatsa iwata tsimoziknaha hỹ, Sesus zikwy humo ahamysapyrẽtsa tsimoziknaha.  
\v 11 Izikwy tawahi napykyryk. Myzubahatsa pehakatsa mozik. Abazubata mozik myzubaha iharere bo zuba hyỹ mynakaranaha. Batu aty tohi iharere bo batu ma zikaha. Iwa hỹ. 
\s1 Abaka pepykyryk, katukytsa humo myhyrizikbarẽtsa. 
\p  
\v 12 Abaka kawataha mopykyk. Kapapeutsa ikiahatsa bo izubabaratu. Siras Sesus harere bo hyỹ mynakara atahi kapapeu ty ahabo nyny my. Ata kino myzipeha kapapeu ty ahabo nyny my. Uta pahakusukniwyky iwatahi papeu humo piwatahaka. Deus myhumo tsimypokzitsiukrẽta iharere bo zuba hyỹ mynakara. Iwatsahi ihumo tyspirikpotohikinahaktsa! 
\p  
\v 13 Kytsa kapauk bazektsa ahahumo sihyrizikbarẽtsa. Asahi Sesus tuktsa niwatihi Babironija ezektsa maha. Asahi ikiahatsa watsa Deus nisiwatawyhik. Marakos niwatihi ahahumo tsihyrizikbarẽta. Atahi katse wata.  
\v 14 Tyharape pokzitsikinahaktsa! Iwaze tyharapehapyryknahaktsa! 
\s1 Deus pahasapywyky. 
\p Utakta Deus bo mopamykysoikik ipe my: 
\p — O myzo ahahyrytsa batu paikpa mytsaty zikaha. Ikia hi tysiakusukniwykykta — my. Niwazuba. 
\cls Peduru