\id PHP - Rohingya Delhi Version
\ide UTF-8
\h Filíppaiól
\toc1 Injil Córif or Síyara Filíppaiól
\toc2 Filíppaiól
\toc3 Filp
\mt2 Injil Córif or Síyara
\mt1 FILÍPPAIÓL
\is Síyara Filíppaiól or Foriso
\im E síyara Filíppaiól óilde ekkán ceñṛí. Yián or lekóya óilde sáhabi Pául. Ceñṛí yián ore Isá Mosih zormo ói tokoriban háiṭ-ek bosór baade leká gíyeh. Héñtte yóggwa ziyól ot accíl \ior (1:13)\ior*, óitofare Rom cóor or ziyól ot. Ceñṛí yián Filíppi cóor ot accíl de zomát twar hañse leikkíl deh. Filíppi cóor or baabute síyara Hamól ottu kessú zani fari. Filíppi óilde Makedóniya elakar rasdáni. E zomát twa óilde Makedóniya elakat foóila zomát. E zomát twa re Páule edde Sílase bóng bañdí cúru goijjíl. Ítara héṛe táite ítara re ek rait olla ziyól ot úddwa diya gyíl (Hamól 16).
\ip Óitofare Páule e ceñṛí gán boóut ḍóilla niyote leikkíl. Yóggwa ziyól ot de fúni e zomát twa ye yóggwa lla ze modot tun foóñsaiye híin olla yóggwa ye ítara re cúkuriya goijjé \ior (4:10-19)\ior*. Yóggwa ye ítara re nizor ziyól or hálot or baabute yó noya hóbor ókkol foóñsaiye, aar Timóti edde Epaforoditus olla tuaijjo diyé \ior (2:19-30)\ior* zeéne ítara tará re estekbal goré aar tarár netaham ore izzot deh.
\iot Súrki ókkol
\io1 1. Filíppi cóor or zomát ore Pául or sólam \ior (1:1-2)\ior*
\io1 2. Pául nizor hálot or kessú noya hóbor edde íbar kessú sintabáfana \ior (1:3—2:30)\ior*
\io1 3. Isáyi zindigir kessú amóli nosíyot \ior (3:1—4:9)\ior*
\io1 4. Filíppi cóor or zomát twa re cúkuriya edde sólam \ior (4:10-23)\ior*
\c 1
\s Sólam
\p
\v 1 Añí Pául, añr fúañti Timóti yó asé. Añára óilam de Mosih Isár gulam.
\p Filíppi cóor ot Mosihr bútore Allar ze pak bonda ókkol asé ítara beggún or hañse lekír; héṛe zomát or neta ókkol edde háadem ókkol óu gólaiya asé.
\p
\v 2 Tuáñrar uore añárar Baf Allar edde Malik Isá Mosihr torfóttu rahámot edde cánti nazil óuk.
\s Filíppaiól olla Pául or dua
\p
\v 3 Añí tuáñra re zetóbar yaad gorí, hétobar añr Allar cúkur gorí, 
\v 4 aar tuáñra beggún olla gorí de hárr dua hámica kúcir sáañte gorí, 
\v 5 kiyólla-hoilé tuáñra toh foóila din ottu lóti kúchóbor fólar ham ot aij foijjonto córik asó. 
\v 6 Añr ttu yián ekin asé de ki, zibá ye tuáñrar bútore ze ekkán gom ham cúru goijjé Íba ye híyan ore Mosih Isá aibó de din foijjonto solai loizai furussat goríbo.
\p
\v 7 Tuáñra beggún or baabute héndilla kíyal rakón añr lla ṭík, kiyólla-hoilé tuáñra toh añr dil ot asó, aar añí bon táki yáh kúchóbor or sófai dí híyan or sóiyi re sábut gorí, tuáñra beggún toh añr fúañti Allar rahámot or bági. 
\v 8 Alla añár gobá asé, Mosih Isár adore añr ttu tuáñra beggún olla hoddúr furer.
\p
\v 9 Añí dua gorí de, tuáñrar muhábbot sóiyi giyan edde hárr ḍóilla buddír sáañte zetó éto bicí barát táke fán; 
\v 10 zeéne tuáñra ziín uttom híin forók gorí zano, aar Mosih aibó de din foijjonto pak edde behosúr táko, 
\v 11 Isá Mosihr duara forhésgarir gulagala ókkol aiyé de híin lói bóraiya ói yore; zeéne Allar mohíma edde taarif ó.
\s Añr lla Mosih óilde zindigi
\p
\v 12 Ó báiboináin ókkol, añr ttu tuáñra re yián zanaidito monehoór de ki, añr uore ziín-ziín guzoijjé, híine kúchóbor zetó éto fólat modot goijjé, 
\v 13 zeén níki añí Mosihr wasté bon así de híyan razmohól or tamám faáradar ókkole edde baki manúc beggúne zani faijjé. 
\v 14 Aar añr bon or zoriya bicí zon imandár báiboináin dor ttu Malik or uore bóraca eddúr barígiyoi zeén níki ítara no ḍoorai kalam tobolik gorí bolla aró bicí hímmot faiyé.
\p
\v 15 Becók, hodúne ricé edde zibbat or niyote Mosihr tobolik goré, montor hodúne bála niyote goré de yó asé. 
\v 16 Fisór gúne híyan muhábbote beh goré, kiyólla-hoilé kúchóbor or sófai dí bolla añré basílowa gíyeh de híyan ítara zane. 
\v 17 Montor agor gúne Mosihr tobolik goré de ehélasir sáañte no bólke nizor fáidar niyote; kiyólla-hoilé ítara ṭáare de, añí bon así de héṛe ítara añr lla mosibot foida gorí faribó. 
\v 18 Tói kii óiye? Asól hotá óilde, bét dóri óuk yáh sóiyi niyote óuk, fottí mikká ttu de Mosihr tobolik éna ór; hétolla añí kúci.
\p Ói, aar kúci ówat tákiyum óu, 
\v 19 kiyólla-hoilé añí zani de, añr uore ziín-ziín guzorer híin or notiza ísafe añí hálas óiyum. Híyan tuáñrar duaye edde Isá Mosihr Ruhr modote beh óibo. 
\v 20 Añr ttu furafuri ekin edde acá asé de ki, añr ttu honó kessút córminda ówa no foribó, bólke eén furafuri hímmot tákibo zeén níki hámicar ḍóilla yala yó añr gaar duara Mosihr mohíma zahér óibo, añí zinda táki yáh mori. 
\v 21 Kiyólla-hoilé añr lla Mosih óilde zindigi, aar moot óilde laf. 
\v 22 Zodi añí haiyaye zinda táki, añí kimoti ham or meénnot ókkol gorí faijjum. Hétolla hon nán basítam añí hoi no fari. 
\v 23 Añí duihaṛat foijjí: monehoór de, duniyai ttu zaigói Mosihr fúañti tákito, kiyólla-hoilé híyan boóut beétor óibo; 
\v 24 montor tuáñrar wasté añí haiyaye basi táka toh aró zorur. 
\v 25 Híyan or ekine añí zani de, añí basi táikkum aar tuáñra beggún or fúañti tákiyum, zeéne tuáñra iman ot baró aar híyan ot kúci táko. 
\v 26 Añí tuáñrar héṛe abar ailé, tuáñra ttu Mosih Isár bútore asé de borái añr zoriya bicí hoilé bicí barízayboi.
\p
\v 27 Siríf endilla goró, ki hoilé, tuáñrar solasol ore Mosihr kúchóbor or laayek bano, zeéne añí aái yore tuáñra re saái yáh gairházir táki, añí zen tuáñrar baabute fúni de, tuáñra ek ruht máze mozbut gori tíyaiya asó aar kúchóbor ottu foida ó de iman olla ek mone milizúli bicí meénnot gorór. 
\v 28 Tuáñrar muhálef ókkol ore honó hálote no ḍooraiyó, ziyán óilde ítara lla hálak óibar ekkán nicán, lekin tuáñra lla nejat faibar, ze nejat óilde Allar torfóttu. 
\v 29 Kiyólla-hoilé tuáñra re toh Mosihr wasté toóufik diiya giyéh de siríf Íbar uore iman aníbar no, bólke Íbar wasté duk fai bolla yó. 
\v 30 Hétolla toh tuáñra yó duk uúin foór ziín añí faáilam de deikkíla aar yala yó fair de fúnor.
\c 2
\s Mosihr niróci edde ḍoóñrgiri
\p
\v 1 Hétolla, Mosihr ummot ísafe tuáñra ttu honó josba tákile, muhábbot or honó tosólli tákile, Pak-Ruhr honó taalukat tákile, aar honó ador edde rahám tákile, 
\v 2 endilla gorí añr kúci fura goró: ek mon ói yore, ekí ḍóilla muhábbot rakí yore, zane ek ói yore, edde ekí kíyal rakí yore. 
\v 3 Nizor fáidar niyote yáh barík kúwalai bolla kessú no goijjó, bólke niróc ói oinno zon ore nizor túaro uttom báfiyo. 
\v 4 Siríf nizor fáida no saiyó, oinno zon or fáida yó saiyó.
\p
\v 5 Tuáñrar bútore e kíyal rakó ziyán Mosih Isá ttu yó accíl:
\q1
\v 6 Íba toh Allar súrote accíl de óile yo,
\q2 Allar fúainnagiri re sibi dóri rakídito nó saá,
\q1
\v 7 bólke Íba ye Nizoré háli gorífelail,
\q2 gulam boni,
\q2 insán ísafe zonom loi yore.
\q1
\v 8 Íba ye insáni cokóle táki,
\q2 moot foijjonto, hoitó sailé, kúruc or uore more foijjonto fórmadar ói yore
\q2 Nizoré niróc goijjíl.
\b
\q1
\v 9 Hétolla bóuli toh Alla ye yó Íba re bicí uñsol tokkat tuillé,
\q2 aar Íba re nam waán diiyé ziyán hárr nam or túaro ḍoóñr,
\q1
\v 10 zeéne Isá nam ot hárr kiyé añṛú féla,
\q2 híin asman ot tóuk yáh zobin ot, yáh zobin or nise;
\q1
\v 11 aar hárr zobane zen Baf Allar mohíma ói bolla cíkar goré de,
\q2 Isá Mosih óilde Malik.
\s Tuáñra duniyait serak or ḍóilla zoloór
\p
\v 12 Hétolla, ó añr adorja ókkol, zendilla tuáñra siríf añr cáikkat no, bólke añr gairházirit hámica aró fórmadar accíla, héndilla tuáñra yala ḍoore edde hafanir sáañte nizor nejat or ham gorízo, 
\v 13 kiyólla-hoilé tuáñrar bútore toh Alla ye éna ham gorér, tuáñra re Íba ye kúci ó de erada fura goríbar mon edde amól dí bolla.
\p
\v 14 Hárr kessú cékayot sára edde torkatorki sára goijjó, 
\v 15 zeéne tuáñra behosúr edde maasum boni, e zobanar ṭeṛá edde báañra maincór dormiyan ot Allar dak sára fuain ṭóoro, zetarár mazé tuáñra duniyait serak or ḍóilla zoloór, 
\v 16 kiyólla-hoilé tuáñra toh zindigir kalam ore mozbut or sáañte dóri asó; hétolla Mosihr waafesir din añí borái gorí faijjum de, añí no behar duñijjí aar no behar meénnot goijjí. 
\v 17 Fúno, zodi añr ttu tuáñrar iman or hédmot or edde kurbanir uore nizoré úddwa roc kurbanir ḍóilla ḍálidiya fore, toóu añí kúci aar tuáñra beggún or fúañti kúci goijjúm. 
\v 18 Tuáñra yó héndilla kúci ó, aar añr fúañti kúci goró.
\s Timóti edde Epaforoditus or baabute
\p
\v 19 Añí acá gorír, Malik Isá ye sailé añí Timóti re tuáñrar héṛe hára difeṛáiyum, zeéne tuáñrar hóbor fúni añí yó tosólli fai. 
\v 20 Kiyólla-hoilé añr ttu yóggwar ḍóilla ar kiyó nái, zee niki tuáñra lla ehélasir sáañte sintabáfana goré. 
\v 21 Beggúne nizor gún ot beh lagi asé, Mosih Isár gún ot no. 
\v 22 Lekin Timótir kimot sábut óiye de híyan toh tuáñra zano, ki hoilé, fua ye zendilla baf or fúañti meénnot goré, héndilla yóggwa ye añr fúañti kúchóbor fóla lla meénnot goijjé. 
\v 23 Hétolla añí acá gorír, añr hálot kii óibo híyan zani faille mottor añí yóggwa re tuáñrar héṛe difeṛáiyum. 
\v 24 Aar añr ttu Malik or uore bóraca asé de ki, añí nize yó tuáñrar héṛe bicí hára aiccúm.
\p
\v 25 Lekin añr imandár bái Epaforoditus ore tuáñrar héṛe waafes difeṛáidon zoruri bouli báfir, zibá añr sáañti ham-goróya edde sáañti fóous, aar tuáñrar hóborgwa yó, zibá re añr zorurot ókkol fura gorí bolla difeṛáila. 
\v 26 Kiyólla-hoilé yóggwa ttu tuáñra beggún ore saitó kúb monehoór, aar yóggwa ocúk ot foijjé de híyan tuáñra fúinno de hétolla yóggwa ferecanit asé. 
\v 27 Bécok, yóggwa ocúke moron-moron óoil, montor Alla ye yóggwar uore rahám goijjé; siríf yóggwar uore no, bólke añr uore yó, zeéne añr ttu ferecanir uore ferecani no táke. 
\v 28 Hétolla yóggwa re difeṛái bolla añr ttu aró bicí kíyal óiye, zeéne tuáñra yóggwa re abar dekí kúci ó, aar añr sinta yó home. 
\v 29 Hétolla yóggwa re Malik or ummot ísafe furafuri kúcir sáañte kobul goijjó, aar héndilla maincóre izzot goijjó; 
\v 30 kiyólla-hoilé yóggwa ye Mosihr ham or wasté moot or foñt ot óoil, aar tuáñrar torfóttu añr lla ze hédmot homi accíl híin adai gorí bolla nizor zan foijjonto hótarat félail.
\c 3
\s Asól forhésgari
\p
\v 1 Ahérit hoóir, ó añr báiboináin ókkol, Malik or ummot de hétolla kúci goró. Añr ttu ekí hotá lekíte duk no lage, kiyólla-hoilé héndilla goillé tuáñra héfazot tákiba. 
\v 2 Kuñir ókkol ottu úñciyar táikko, yáni hóraf ham-goróya uitará ttu zetará jisím haṛi-síri ázomi goré. 
\v 3 Kiyólla-hoilé añára éna asól ázomi goijjá manúc, zetará Allar Ruhr hédaiyote ebaadot gorí, Mosih Isá re lói borái gorí, aar jisím or uore honó bóraca no gorí, 
\v 4 zodi añí nizor ttu yó jisím or uore bóraca goríbar wajá asé de óile yo. Honókiye ítar ttu jisím or uore bóraca goríbar wajá asé bóuli ṭáare de óile, añr ttu toh aró bicí asé: 
\v 5 añré añcṭo din ot din ázomi gorá gíyl; añí Boni Isráili, Binyamin or háandan ottu, añí Hibraniól or ézzon Hibrani. Córiyot amól gorár baabute hoilé, añí ézzon Féroci accílam; 
\v 6 jus tákar baabute hoilé, añí Mosihr zomát ore zulúm goittám; aar Córiyote forhésgar ówar baabute hoilé, añré nidak faa zayto.
\p
\v 7 Lekin ziín añr lla nofá accíl, yala híin ore Mosihr zoriya lussán bouli goni. 
\v 8 Aró hoitó sailé, añí hárr kessú re lussán bouli goni de kiyólla-hoilé Mosih Isá añr Malik ore zanat ódorbaára kimot asé, zibár zoriya niki añí hárr kessúr lussán cóoiyi aar híin ore fúrari bouli goni, zeéne añí Mosih re fai, 
\v 9 aar añré Íbar bútore faa zah, Córiyot amól goillé faa zah de héndilla nizor kucíc or forhésgarir zoriya no, bólke Mosihr uore iman aníle faa zah de forhésgarir zoriya, ze forhésgari Allar torfóttu iman or zoriya beh aiyé. 
\v 10 Añr ttu hé Mosih re, yáni Íbar zinda ówar kudurut ore edde Íbar dukkót híssa ówa re zainto monehoór, Íbar moot or nomunaye mori-mori; 
\v 11 zeéne honó bote añí mora ttu zinda ówar héddur foijjonto yó foóñsi.
\s Monzil-moksót or uzu duñra
\p
\v 12 Endilla no de ki, añí híyan furafuri faifélaiyi yáh añí furafuri sóiyi óigiyigoi, montor añí waán dórifelai bolla beh duñrat así ziyán or niyote Mosih Isá ye añré dórifelaiye. 
\v 13 Báiboináin ókkol, añí nizoré nize híyan aijjó dórifelaiyi bouli no ṭáari, lekin añí ekkán gorí de híyan óilde: fisé ziín asé híin ore foóraifelai muúntu ziín asé híin or héṛe foóñsibar kucíc. 
\v 14 Añí monzil-moksót or uzu duñrat así de, Mosih Isár duara asman or uzu Allar ze ḍak asé, boccíc ísafe yíba hásil gorí bolla.
\p
\v 15 Hétolla, añára zetará balok así, añára beggún ottu hé kíyal rakár zorur. Aar zodi honó kessút tuáñra ttu oinno ḍoilla kíyal táke, Alla ye tuáñra re híyan óu zahér goríbo. 
\v 16 Zeén óibo óuk, añára zeddúr ot foóñiccigoi héddur or mutafek zindigi haṛai.
\p
\v 17 Báiboináin ókkol, tuáñra beggúne añr ḍóilla góri solat táko, aar uitarár híkka díyan diyo zetará añára ttu tuáñra deikkó de hé nomuna mozin sole. 
\v 18 Kiyólla-hoilé añí toh tuáñra re yián boóut bar hoóilam, aar yala hañdi-hañdi yó hoóir, endilla boóut zon asé zetará Mosihr kúruc or duccon or ḍóilla góri sole; 
\v 19 ítarar tokdír ot borbadi asé, ítarar Kúda óilde nizor feṭ, ítara nizor ttu córom laga foitto de híin lói fohórai goré, ítara duniyaibi gún or híkka beh mon deh. 
\v 20 Montor añárar nagorita óilde asman ot, zentú añára éggwa Nejatdoya yáni Malik Isá Mosih aibár bicí azzur sáañte entezar ot así, 
\v 21 zibá ye níki añárar niróc haiya re Íbar mohíma ola gaar ḍóilla ói bolla bodolifélaibo; híyan oh taakot estemal gorí goríbo ziyán lói Íba ye hárr kessú re úddwa Nizor kobzat gorífelai fare.
\c 4
\p
\v 1 Hétolla hoóir, ó añr adorja báiboináin ókkol, tuáñra zetará re añr ttu saitó kúb monehoór, zetará añr kúci edde matár tas, tuáñra héndilla soli Malik or bútore mozbut táko, ó adorja ókkol.
\s Nosíyot ókkol
\p
\v 2 Añí Yuwádiya re yó aros gorír aar Suntoki re yó aros gorír, Malik or bútore tuáñrar mon ek ḍoilla goró. 
\v 3 Aar, ó añr asól sáañti, añí tuáñre yó aros gorír, hé mayafuain nún ore híyan ot modot goró, kiyólla-hoilé ítara toh kúchóbor fóli bolla Kelemen edde añr oinno sáañti ham-goróya ókkol lói cóo añr fúañti bicí meénnot ókkol goijjé, zetará beggún or nam zindigir-kitab ot asé.
\p
\v 4 Malik or bútore hámica kúci táko; añí abar hoóir, kúci táko. 
\v 5 Tuáñrar cídayi tamám manúc ókkol or hañse zahér goró. Malik hára aiyér. 
\v 6 Honó kessúr sinta no goijjó, bólke hárr hálot ot dua edde fóriyat or duara cúkuriyar sáañte tuáñrar aros ókkol Alla re zanaiyó. 
\v 7 Baade Allar cánti, ziyán buzí farar furafuri baáre, híyane tuáñrar dil edde kíyal ore Mosih Isár usílaye héfazot rakíbo.
\p
\v 8 Ahérit hoóir, ó báiboináin ókkol, ziín háñsa, ziín izzotdár, ziín sóiyi, ziín pak, ziín cúndor, ziín namdár, yáni ziín uttom aar taarif or laayek asé, tuáñrar kíyal híin or híkka beh rakó. 
\v 9 Tuáñra añr ttu ziín cíkko, hásil goijjó, fúinno, edde deikkó, híin ore amól goró, tói cánti dooya Alla tuáñrar fúañti-fúañti tákibo.
\s Modot olla cúkuriya
\p
\v 10 Añí Malik or bútore bicí kúci, kiyólla-hoilé yala boóut din baade tuáñra ttu añr lla sintabáfani abar zari óiye; becók tuáñra ttu age yó accíl, montor daháibar mouka nu accíl deh. 
\v 11 Añí híyan muútac ot fori hoóir de no, kiyólla-hoilé añí toh ze honó hálot ot kúci táka cíkki. 
\v 12 Añí hom táka keén de yó zani, aar beec táka keén de yó zani. Añí hárr mikká edde hárr hálot ot kúci tákar gufoni cíkki, bóra feṛot óuk yáh háli feṛot, beec tákat óuk yáh muútac ot. 
\v 13 Añí hárr kessú Ubár duara gorí fari zibá ye níki añré bol dee.
\p
\v 14 Toóu gom óiye, tuáñra añr mosibot ot córik óiyo. 
\v 15 Ó Filíppaiól, tuáñra nize de zano, foóilabar tuáñrar hañse kúchóbor tobolik gorí zeñtté añí Makedóniya ttu giílamboi, héñtte siríf tuáñra bade ar honó zomáte añr llói lenden gorát cámil nó. 
\v 16 Tuáñra de Tisólonikat úddwa añr zorurot ókkol fura gorí bolla hoek bar modot foóñsaila. 
\v 17 Añí hádiya saáir de héen no, bólke nofá saáir deh, ziín tuáñrar hísaf ot barízargoi. 
\v 18 Becók añí hárr kessú furafuri faifélaiyi, yala añr ttu ódorbaára asé. Epaforoditus or áta tuáñra ziín difeṛáila híin fai yore añr ttu bicí hoilé bicí óigiyoi; híin toh kúcbodar edde kobuldár kurbani, ziín lói Alla kúci ó. 
\v 19 Añr Alla ye Íbar mohímar dón ottu Mosih Isár usílaye tuáñrar hárr zorurot fura goríbo.
\p
\v 20 Añárar Alla Baf or taarif abadulabad foijjonto hámica ówat tákouk. Aamin.
\s Ahéri sólam
\p
\v 21 Mosih Isár bútore Allar ze pak bonda ókkol asé, ítara fottíkiyo re añr sólam díyo. Añr fúañti asé de báiboináin ítara yó tuáñra re sólam zanar. 
\v 22 Allar pak bonda ókkol beggúne tuáñra re sólam zanar, háasgori baáñcca Káisar\f + \fr 4:22 \fr*\ft Girík zuban ot Káisar hoó de híyan nam no, híyan ekkán Rom raijjor baáñcca ókkol or lokób.\ft*\f* or gór or maincé.
\p
\v 23 Malik Isá Mosihr rahámot tuáñrar ruhr uore zari tákouk.