\id PHP  
\h Filipi 
\toc1 Paulus susura na fee lahenda kamahereꞌ rai kota Filipi 
\toc2 Filipi 
\toc3 Flp 
\mt2 Paulus susura na  
\mt2 fee lahenda kamahereꞌ rai kota  
\mt1 Filipi  
\c 1  
\s1 Paulus mulai duiꞌ susura na  
\r (Lahenda Nadedenuꞌ ara Tutuin 16:12)  
\p
\v 1 Susuraꞌ ia nemeꞌ au mai, Paulus. Au tia ki Timotius boe, haitua fee emi haraoe soda-moleꞌ. Ami dua ia nana, Yesus Kristus lahenda nadedenun.  
\p Ami haitua susuraꞌ ia fee basa lahenda, fo ramahere Yesus Kristus nai kota Filipi. Ma ami nau basa mauli-malaka saraniꞌ ara, ma manatulu-manafali mauli-malaka saraniꞌ ara, boe bubuluꞌ ratalolole susuraꞌ ia isi na.   
\p
\v 2 Manetualain nana ita Aman. Ma Yesus Kristus nana, ita Ramatuan. Ami hule fo Ara ratudu dale malole Nara neuꞌ emi, fo ela emi bisa masoda no tetu-temaꞌ, mole-dame, ma tesatei-tamadaleꞌ.   
\s1 Paulus hule-haradoi fee Ramatuaꞌ a lahenda nara rai kota Filipi  
\p
\v 3 Leo mae au ta ita emi fa dooꞌ a so, tehuu au ta afarene heni emi! Tuka-tuka faiꞌ au afarene emi, au hule makasi neuꞌ Ramatuaꞌ a, nana huu emi mamahere maroo Ni.  
\v 4 Fai bea ma au hule-haradoi fee emi, au dale ka namahoꞌo,  
\v 5 nana huu neme fai masososaꞌ a, emi sipoꞌ Ramatuaꞌ a Tutui Malole Na, emi malalaꞌo maroo Ria nonoi-tataon, sama-sama moo au.  
\v 6 Ria natudu nae, Manetualain mulai noi-tao nai emi dale mara so. Ma au bubuluꞌ matetuꞌ ae, neuꞌ ko Ana nalalaꞌo nabasa katemaꞌ Ria nonoi-tatao malole na, losaꞌ tepoꞌ fo Yesus Kristus natafali mai.   
\p
\v 7 Tebe naraa au sue-lai emi, nana huu neme uluꞌ mai au dale ka nanahekeꞌ noo emi so. Faiꞌ naa ra, emi moi-tao sama-sama moo au, tepoꞌ fo au afada lahenda ra laꞌeneuꞌ Ramatuaꞌ a Tutui Malole Na, ma tepoꞌ fo au ataa atafaliꞌ lahenda fo ta sipoꞌ Tutui Malole ria. Leo mae au masoꞌ bui a, tehuu emi ta malai ela au fa.  
\v 8 Manetualain riꞌ bubuluꞌ nae, au dale ka nahiiꞌ na emi seli. Nana huu au susue-lalai ka neuꞌ emi a, sama leoꞌ Yesus Kristus susue-lalain.   
\p
\v 9-10 De, au hule-haradoi fee emi, leo iaꞌ: Au hule fo emi nasue-nalaiaom esa no esa, boe-boe tamba naroo losaꞌ henu-sofeꞌ. Au hule fo Manetualain fee emi bubuluꞌ matetuꞌ hata malole a, fo ela emi masoda mara dadi lalao-lalafuꞌ. No ria na, tepoꞌ fo Kristus naetuꞌ basa lahenda ra dedean, sona Ana nafada nae, emi ta manuu salaꞌ esa boeꞌ,  
\v 11 nana huu Ria riꞌ tao na emi dale mara makamoiꞌ a, ela emi bisa masoda roos a. Ma emi masoda roos a leoꞌ na, sona lahenda fekeꞌ ara soꞌu radedema Manetualain, ma io-oa Ni.   
\s1 Leo mae ita hapu susa, tehuu tamahere taroo Ramatua Yesus  
\p
\v 12 Toranoo susue kara emin! Au nau fo emi bubuluꞌ mae, lahenda tao rasususaꞌ au, losaꞌ ara tee au leo bui daleꞌ u. Tehuu Ramatuaꞌ a Tutui Malole Na nanatui-nanabekaꞌ laꞌo naroo,  
\v 13 losaꞌ soldadu fo ranea nai uma mana pareta a, ma basa lahenda fekeꞌ ara boe bubuluꞌ rae, au masoꞌ bui a nana huu au tuka Yesus Kristus.\x + \xo 1:13 \xt Lahenda Nadedenuꞌ ara Tutuin 28:30\x*  
\v 14 Manetualain lahendan nara boe rita hata fo dadi a, leo mae au nai bui daleꞌ. Huu ria na, de ara boe-boe raparani, losaꞌ ara ta bii soꞌ. Ma ara dedea lelekaꞌ, Ramatuaꞌ a Dedea-nafadan nai basa mamanaꞌ ara.   
\p
\v 15-17 Nai ia, hapu lahenda rupaꞌ dua riꞌ makate ranori-rafada laꞌeneuꞌ Kristus. Riꞌ ruma roi-tao no dale roos, ma ruma bali roi-tao no dale peko-pakiꞌ. Roi-tao no dale roos a, nana dale nara malole a roo au. Ara bubuluꞌ matetuꞌ rae, au lepa-asaa susa ia, nana huu alalaꞌo au nonoi-tatao ka, ma ta heoꞌ baiꞌ boeꞌ.  
\p Tehuu, roi-tao no dale peko-pakiꞌ a, ara rapeda daleꞌ, ma saka nadeꞌ. Ara tao nabika-nabatiꞌ neuꞌ lahenda kamahereꞌ ara, sadi ruma tuka si. Ara saka enoꞌ, ela bisa io ao nara rae, sira kahereꞌ lena neme au mai. Sira afi rae, maneniko hapu lahenda tuka si, sona neuꞌ ko tao na au susa ka nambera nai bui daleꞌ.   
\p
\v 18 Tehuu pesi si remeꞌ na! Au ta tao daleꞌ neuꞌ lahenda fo nanori-nafada no dale roos do, taꞌa. Penting na riꞌ ara ranori-rafada laꞌeneuꞌ Kristus! Ria riꞌ tao na au dale ka namahoꞌo.  
\p Ma au amahoꞌo tebe-tebe,  
\v 19 nana huu au bubuluꞌ ae, emi hule-haradoi fee au, ma Yesus Kristus Dula-dale Na tulu-fali au. Huu ria na, de au bubuluꞌ neuꞌ mateꞌe na, malole a.  
\v 20 Leo mae au asoda do, mate do, ta hata-hata fa. Sadi Manetualain pake au fo soꞌu adedema Yesus Kristus nade Na, ma anori-afada lelekaꞌ laꞌeneuꞌ Ana, losaꞌ ta hapu hata esa tao namamaeꞌ au boeꞌ. Au amahehenaꞌ au tao aroo basa ia ra, losaꞌ doo-doo na neu.   
\p
\v 21-23 Au afi ae leo iaꞌ: maneniko au asoda, sona ela au asoda abua-aesa oo Kristus, ma au alalaꞌo aroo Ria nonoi-tataon. Ria nana malole a. Tehuu maneniko au mate, au onto lena bali. Nana huu au bisa foa ela dae-bafoꞌ ia, ma asoda seluꞌ fo leo sama-sama oo Kristus nai nusatetu-ikutemaꞌ a. Huu ria na, de au dale ka kadudua, ma au ta bubuluꞌ ae bea riꞌ malole lena fa!  
\v 24 De, leo iaꞌ! Huu no emi bei parluu au nai ia, de malole lenaꞌ au leo sama-sama oo emi nai dae-bafoꞌ ia.  
\v 25 Au amahere ae au teu-fai ki bei naruꞌ a, de au bisa leo sama-sama oo emi. Ramatuaꞌ a nau au tao atetea emi dale mara, boe ma emi boe-boe mamahere Ni no dale namahoꞌo.  
\v 26 De, neuꞌ ko emi bisa soꞌu madedema Yesus Kristus nade Na, nana huu Ana soi enoꞌ de au bisa fali seluꞌ mai dama emi.   
\s1 Masoda roos a maroo  
\p
\v 27-28 Tehuu leo mae leoꞌ bea boe, emi masoda ma muste matetuꞌ, huu fo emi nana, Ramatuaꞌ a lahendan. De, emi masoda ma muste naraa, ma tao tuka hata fo Kristus Tutui Malole Na, nanori-nafadan neuꞌ emi so a. Maneniko au dadi atafali mai dama emi, do oi amaneneꞌ a neme lahenda mai rae, emi masoda no malole, sona au amahoꞌo. Au bisa bubuluꞌ ae, huu no Dula-daleꞌ malalao-malalafu a tataon, de emi masoda daleꞌ esa. Ma au bisa bubuluꞌ ae, emi sadia fo sama-sama malalaꞌo Ramatua Yesus Tutui Malole Na, fo ela lahenda fekeꞌ ara boe ramahere. Ma emi ta bii fa, leo mae lahenda soaꞌ emi. Ria dadi tanda fee musunooꞌ ara nae, Manetualain nau tuꞌu-tapa heni si leo ai-pila naraka daleꞌ reu. Tehuu, Ana fee emi soda-moleꞌ manabasa taaꞌ a.  
\v 29 Huu no Manetualain malolole na seli, de Ana soi enoꞌ, fo emi bisa mamahere Kristus, ma dadi meuꞌ Ria lahenda nara. Ta adaꞌ noi namahereꞌ a fa, tehuu Ana fee lelaꞌ fo emi hapu susa, nana huu emi tuka Ni.  
\v 30 Au ae leoꞌ na, huu fo lahenda ruma rai na soaꞌ emi, nana huu emi malalaꞌo Kristus Tutui Malole Na. Mafareneꞌ, te faiꞌ naa ra, ara soaꞌ au leo naꞌ. Ma besaꞌ ia, bei hapu lahenda fekeꞌ nai ia, soaꞌ au boe.\x + \xo 1:30 \xt Lahenda Nadedenuꞌ ara Tutuin 16:19-40\x*   
\c 2  
\s1 Ita muste taloe-tadae aoꞌ ara, sama leoꞌ Yesus Kristus  
\p
\v 1 Toranoo susue-lalaiꞌ fo riꞌ dadi meuꞌ Yesus Kristus lahendan! Ana fee emi hata malole dodouꞌ so. De, emi bisa tao matetea esa no esa dale na. Emi bisa fee lelea-nonoreꞌ fo naoka-nasamu neme emi nasusue-nalalaiao mara mai. Emi bisa masoda balaroe-balanauꞌ esa no esa, nana huu Ramatuaꞌ a Dula-dale Na noi-tao nai emi basa talada. Ma bisa matudu emi dale kasian mara, ma dale balaroe-balanau esa no esa.  
\v 2 Maneniko emi tao leo naꞌ, sona au amahoꞌo-atadale. Lena-lenaꞌ bali, maneniko emi masue-malai ao ma teiꞌesa-daleꞌesa, masoda no enoꞌ esaꞌ a, ma mala haraꞌ fo moi-tao neuꞌ esa.  
\v 3 Bosoꞌ tao hata fo saka noi oontoꞌ a, soaneuꞌ emi ao-ina heheli mara. Ma bosoꞌ tao ao mara emi kahereꞌ lena neme lahenda fekeꞌ. Sekona te o koao ma ta nanuu neteꞌ fa. Tehuu ita muste taloe-tadae aoꞌ ara, fo tao lahenda fekeꞌ a lena neme ita mai.  
\v 4 Ma emi bosoꞌ urus adaꞌ noi nonoi mesa mara. Tehuu ita muste mete-relu lahenda fekeꞌ a parluu na boe.   
\p
\v 5 Ita dale na, muste sama noo Yesus Kristus dale Na.   
\q1
\v 6 Leo mae Ria rupa-lolen sama leoꞌ Manetualain,  
\q2 ma Ria boe Ramatuaꞌ sama leoꞌ Manetualain,  
\q1 tehuu Ana poꞌi hak Na,  
\q2 ma Ana ta pake Ria pangkat Na.   
\q1
\v 7 Boe ma Ana onda leo dae-bafoꞌ ia mai,  
\q2 pake rupa-loleꞌ sama leoꞌ lahenda dae-bafoꞌ a.  
\q2 Ana foa ela katemaꞌ hak Na,  
\q3 de tao ao Na dadiꞌ ata.   
\q1
\v 8 Ta dadi adaꞌ noi lahenda aanaꞌ a,  
\q2 tehuu Ana tao aon leoꞌ lahenda mana dadi taaꞌ,  
\q3 ela tao tuka Manetualain hihii-nanaun.  
\q2 Leo mae lahenda raisa Ni nai ai kakeꞌ a boe, Ana noi sipo-sipoꞌ a,  
\q3 ma maten, sama leoꞌ Ria nana lahenda tadaluꞌ.   
\q1
\v 9 Huu no Ria naloe-nadae aon leoꞌ na,  
\q2 de Manetualain soꞌu nadedema Ni.  
\q1 Ma fee Ni nade kahereꞌ nan seli.  
\q2 Ta hapu nadeꞌ esa, kahereꞌ lena heni Ria mai boeꞌ.   
\q1
\v 10 Manetualain soꞌu nadedema Ria nade Na,  
\q2 ela basa lahenda ra fee hada-horomata neuꞌ Ana.  
\q3 Riꞌ: lahenda rai lalai,  
\q3 ma lahenda rai dae-bafoꞌ a.  
\q3 Lahenda masodaꞌ, ma lahenda mana mateꞌ.  
\q2 Neuꞌ ko basa lahenda ra sundaꞌ undulaka nara, fo doꞌo-tabe Ni.   
\q1
\v 11 Ma neuꞌ ko basa lahenda ra rae, “Yesus Kristus nana tetebe Ramatuaꞌ!”  
\q2 No ria na, ara io-oa Amaꞌ Manetualain.\x + \xo 2:11 \xt Yesaya 45:23\x*   
\s1 Ita dadi sama leoꞌ ruuꞌ fo nahaa-nakaledo soaneuꞌ dae-bafoꞌ a  
\p
\v 12 Toranoo susue kara emin! Nenene matalolole! Faiꞌ naa raa au bei nai kota Filipi a, emi mamanene neuꞌ au, boe ma emi tuka Manetualain eno roo-tetu Na. Besaꞌ ia ita esaꞌ ko matan nai mamana fekeꞌ so, tehuu au hule fo emi sadia maroo ela masoda roo-tetuꞌ. Mafarene te, maneniko emi ta mamanene neuꞌ Ana fa, sona neuꞌ ko emi mita mataꞌ! Nana huu Ria riꞌ soi-tefa na emi neme sala-siko mara mai. Boe ma emi muste masoda noo matetu-maraaꞌ, huu fo emi dadi meuꞌ Ria lahendan so.  
\v 13 Manetualain riꞌ noi-tao nai emi dale mara. Ria riꞌ soi enoꞌ ela emi nau mamanene Ni. Ma Ria riꞌ fee kuasa de emi nau moi-tao fo tao ma dale Na namahoꞌo.   
\p
\v 14 Maneniko emi tao sudi ubeaꞌ, sona bosoꞌ mamumuu, ma bosoꞌ mareresiꞌ.  
\v 15 Tao leo naꞌ, ela emi bisa dadi meuꞌ lahenda dale makamoiꞌ, ma lahenda fo ta nanuu salaꞌ fa. Emi masoda nai lahenda tadaluꞌ ara ro mapuputaꞌ ara talada. Tehuu emi bosoꞌ tuka si! Emi masoda ma muste makamoiꞌ, huu fo emi nana Ramatuaꞌ a ana nara. No ria na emi masoda ma muste nahaa ela natudu fee si enoꞌ, sama leoꞌ ruuꞌ ara rahaa-rakaledo soaneuꞌ dae-bafoꞌ ia.\x + \xo 2:15 \xt Tui Seluꞌ Laꞌe Neuꞌ Eno Sodaꞌ a 32:5\x*  
\v 16 Emi masoda noo roos, ma malalaꞌo Manetualain Dedea-nafadan. No ria na, neuꞌ ko emi tao ma au dale ka namahoꞌo-natadale, tepoꞌ fo Yesus Kristus natafali mai. Ma au sosota ka, hapu buna-boa malole, nana huu ta tuꞌu henin hihiiꞌ fa.   
\p
\v 17-18 Tehuu uniꞌ ko leo au poꞌa heni laesaꞌ au soda ka, fo dadi tutunu-hohotuꞌ ela emi bisa mamahere tebe-tebe, ma malalaꞌo Ramatuaꞌ a nonoi-tataon, sona au sipoꞌ no dale namahoꞌo. [Ria, sama leoꞌ malaka agama a poꞌa oe anggor neuꞌ mei tutunu-hohotuꞌ a fo doꞌo-tabe Ramatuaꞌ a.] No ria na, ita bisa tamahoꞌo belaꞌ a, nana huu tutunu-hohotuꞌ ria, ta mana dadi taꞌ fa.\x + \xo 2:17-18 \xt Susura Dudui Nadeꞌ a 28:7\x*   
\s1 Timotius nonoi laka na  
\p
\v 19 Au amahehenaꞌ, ta dooꞌ a soꞌ, te Ramatua Yesus soi enoꞌ fo au fee Timotius neti, ela tao natetea emi dale mara. Basa nana, ana natafali leo iaꞌ mai bali, fo nafada au laꞌeneuꞌ emi leleo-lalaom, ma natetea au dale ka.  
\v 20 Au ta adenu lahenda fekeꞌ fa. Au adenu noi Timotius, nana huu ria daleꞌ esa no au. Ma ana sue-lai matetuꞌ emi.  
\v 21 Ria ta sama leoꞌ toranoo fekeꞌ ara fa. Ara, afi adaꞌ noi sira parluu mesa nara, tehuu ta urus hata fo penting soaneuꞌ Yesus Kristus.  
\v 22 Tehuu emi bubuluꞌ mae, Timotius noi-tao sota nan seli, ela nalalaꞌo Manetualain nonoi-tataon. Ana noi-tao no au, sama leo anaꞌ esa noi-tao fee papa na. Ami dua meu tui-beka Ramatua Yesus Tutui Malole Na nai basa mamanaꞌ ara so.  
\v 23 Maneniko ara raetuꞌ basa au dedea ka nai ia, besaꞌ ko au fee Timotius leo emi naaꞌ neti.  
\v 24 Tehuu besaꞌ ia, Manetualain natetea au dale ka nae, ta dooꞌ a soꞌ, te au bisa mai dama emi boe.   
\s1 Epafroditus nonoi laka na  
\p
\v 25 Maulu na, au hapu susa. Boe ma emi fee ita toranoon Epafroditus mai dama au. Ana nalalaꞌo Ramatuaꞌ a nonoi-tataon sama-sama no au, sama leoꞌ soldadu fo makate tuka malaka na paretan. Tehuu besaꞌ ia, au ameda an, feen fali seluꞌ leo emi neu.  
\v 26 Ria dale na nahiiꞌ nau nita emi so. Ma ria dale na dodaꞌ neuꞌ emi, nana huu bubuluꞌ nae, emi mamanene rae ana odaꞌ namahediꞌ a.  
\v 27 Memaꞌ tebe. Faiꞌ naa ra ana namahedi beraꞌ losaꞌ hisadeina maten. Tehuu Manetualain sue ni de puli nan. Ma Ramatuaꞌ a sue-lai au boe, de puli na Epafroditus, ela au bosoꞌ boe-boe susa.  
\v 28 Huu ria na de au ahiiꞌ an seli feen fali leo emi neti, ela emi basa mabua no dale namahoꞌo. Kalu leoꞌ na, sona au dale ka tama.  
\v 29-30 De, emi muste sipoꞌ ana no malole, huu fo ria nana Ramatuaꞌ a lahendan. Ma emi muste fee hada-horomata neuꞌ basa lahenda, fo rupa-lolen sama leoꞌ ria. Huu fo ana nalalaꞌo Kristus nonoi-tataon, losaꞌ hisadeina maten. Ma ana ta heoꞌ baiꞌ boeꞌ, nana huu ana nau tulu-fali au, huu fo emi ta bisa mai tulu-fali au. De, emi muste sipoꞌ seluꞌ ana no dale balaroe-balanauꞌ.   
\c 3  
\s1 Manetualain sipoꞌ lahenda, nana huu ara ramahere Yesus Kristus  
\p
\v 1 Toranoo kara emin! Nenene matalolole! Emi dale ma muste namahoꞌo, nana huu emi manahekeꞌ moo Kristus. Leo mae au duiꞌ asarerei leoꞌ ia, tehuu au ta doaꞌ afarereneꞌ fee emi, ela emi bosoꞌ nanatipu-nanadaiꞌ!   
\p
\v 2 Besa-besa moo mana mapuputaꞌ fo riꞌ raseti lahenda rae, “Emi muste sunat fo dadi tanda nae, emi nana Manetualain lahendan.” Sekona te, Ramatuaꞌ a ta pareta nae leoꞌ na fa! Sira sala ria so! Leo mae leoꞌ na, tehuu ara bei usi rahere lahenda, sama leo busa maꞌaaꞌ.  
\v 3 Ara rae Ramatuaꞌ a sipoꞌ lahenda nana huu ara sunat. Tehuu sala ria! Ita bubuluꞌ tae, Ramatuaꞌ a sipoꞌ lahenda nana huu ramahere Yesus. Ramatuaꞌ a lahenda tetea nara nana siꞌ, ita fo tamahere Yesus! Ita riꞌ doꞌo-tabe neuꞌ Ana tuka Ria Dula-dale Malalao-malalafu Na. Ita riꞌ soꞌu tadedema Yesus Kristus, huu fo Ana buka enoꞌ, de ita bisa dadi teuꞌ Ramatuaꞌ a lahendan. Ita ta bisa hapu soda-moleꞌ, nana huu tuka lahenda dae-bafoꞌ a atoran.   
\p
\v 4 Maulu na au afi sala, sama leoꞌ sira boe. Ae, lahenda bisa dadi reuꞌ Manetualain lahendan, sadi ara sunat. Sekona te, ria nana lahenda dae-bafoꞌ a atoran! Kalu tui lahenda dae-bafoꞌ a nonoi-tataon, sona au bisa dedea koaoꞌ lena neme basa-basan mai, nana huu maulu na, au nonoi-tatao ki tuka matetuꞌ lahenda Yahudi ra atoran agama nara.  
\v 5-6 Tuka atoran agama a, tepoꞌ fo au ina-ama kara boki basa au faiꞌ falu, boe ma ara sunat au. Au boe lahenda Yahudi teaꞌ, huu fo au eme leo Benyamin, tititi-nonosiꞌ nemeꞌ baꞌi Israel mai. Au makate, tuka matetuꞌ basa atoran nemeꞌ partei agama Farisi, losaꞌ ta hapu lahenda esa sale au baiꞌ boeꞌ. Lena-lenaꞌ bali, au makate, tao doidoso lahenda fo tuka Kristus, nana huu au afi ae, lahenda ia ra tuꞌu heni ita atoran agama na so.\x + \xo 3:5-6 \xt Roma 11:1; Lahenda Nadedenuꞌ ara Tutuin 8:3; 22:4; 23:6; 26:5, 9-11\x*   
\p
\v 7-8 Tehuu besaꞌ ia au saledale-tuꞌetei ka mai tuka Yesus Kristus. De au ta koao neuꞌ masoda maulu ka soꞌ. Maulu na, au afi ae, basa sira reni sosoa-raraaꞌ neuꞌ au, tehuu besaꞌ ia sira sosoa-raraaꞌ taꞌa soꞌ. Hata fo kahereꞌ nan seli a, nana riꞌ: au bisa alelaꞌ Yesus Kristus, au Ramatua ka. Basa hata fekeꞌ a au tao si reuꞌ kadafuꞌ.  
\v 9 Au nau asoda nanahekeꞌ oo Yesus Kristus. Leo mae au tuka atoran agama a katemaꞌ boe oo, Manetualain taꞌ sipoꞌ au fa. Leo mae ae au lahenda roo-tetuꞌ, Ana taꞌ sipoꞌ au boeꞌ. Tehuu au muste amahere Kristus dei, besaꞌ ko Manetualain sipoꞌ au nae, “Huu no Kristus sae-safe heni o sala-siko mara so, de o makamoiꞌ a so.”   
\p
\v 10 Boe ma, au hihii-nanau ki leo iaꞌ: au nau alelaꞌ Kristus. Au boe nau bubuluꞌ Manetualain kuasan fo Ana paken de fee Yesus Kristus nasoda seluꞌ nemeꞌ mamate Na mai. Uniꞌ ko leo lahenda nau tao rasususaꞌ au, nana huu au tuka Kristus, sona pesin nemeꞌ na. Huu fo lahenda tao rasususaꞌ Kristus boe. Maneniko lahenda nau raisa au, nana huu au alalau lahenda ra, sona au sipoꞌ. Huu fo Kristus boe mate leo naꞌ soaneuꞌ au.  
\v 11 Ma kalu au mate, sona neuꞌ ko Ana fee au asoda seluꞌ.   
\s1 Tahere aoꞌ ara fo tuka matetuꞌ Ramatuaꞌ a eno Na  
\p
\v 12-13 Toranoo kara emin! Au ahiiꞌ tuka Kristus eno masoda na ma Ria hihii-nanaun katemaꞌ. Tehuu tui neuꞌ tea na te, au bei ta tuka matetuꞌ leoꞌ na fa. Huu ria na, de au ahehere ao ki, nana huu Yesus Kristus here au, fo tuka Ni. Au sama leoꞌ lahenda fo nalaiinaꞌ a, de ana bisa losa too a. De, au alai arooꞌ mata u, ma ta lipe deaꞌ fo afi hata mauluꞌ ara. Au afarene heni si.  
\v 14 Tehuu au alaiinaꞌ losa too a, de hapu beker. Au hadia ka nana riꞌ: neuꞌ ko Manetualain sipoꞌ au nai nusatetu-ikutemaꞌ a, nana huu au amahere Yesus Kristus.   
\p
\v 15 Au hule emi basa fo riꞌ mori ma maoka-masamu nai Kristus daleꞌ a, bisa daleꞌ esa moo hata ia ra. Tehuu maneniko bea riꞌ nanuu duduꞌa-aafi fekeꞌ, sona ela Manetualain riꞌ natudu fee eno roo-tetuꞌ.  
\v 16 Leo mae leoꞌ na, tehuu ita muste hopu tahere, ma tao tuka basa hata roo-tetuꞌ, fo riꞌ Ramatuaꞌ a nanori-nafadan neuꞌ ita so a.   
\p
\v 17 Basa toranoo kara emin! Emi muste hai natutuduꞌ neme au eno masoda ka mai. Emi ruma rai naa, eno masoda mara sama leoꞌ au boe. Tehuu bea riꞌ beiꞌ, sona bisa nanori natalolole nemeꞌ sira mai, fo tao tuka leoꞌ na boe.\x + \xo 3:17 \xt 1 Korintus 4:16; 11:1\x*  
\v 18 Besa-besa moo lahenda fo riꞌ ralena laka neuꞌ Kristus, ma ara ta sipoꞌ no malole Ria mamate Na nai ai kakeꞌ a. Sira eno masodan ria, riꞌ natudu sira nalena laka nara neuꞌ Kristus. Au parnaa afada emi laꞌeneuꞌ lahenda rupa-mata leo naꞌ ara, tehuu besaꞌ ia au afada seluꞌ emi bali noo luumata-pinuidu.  
\v 19 Neuꞌ ko Manetualain tipa heni si, boe ma tuꞌu-tapa si leo ai-pila naraka a reu, nana huu dale nara ta nanahekeꞌ roo Ni fa. Ara hopu adaꞌ noi hata tadaluꞌ a, ma ara saka enoꞌ fo tao ramahoꞌo ao-ina heheli nara, losaꞌ ara koao roo sira tadalu nara. Ara ta maeꞌ fa. Sira duꞌa-afi sama leoꞌ lahenda fo ta ralelaꞌ Ramatuaꞌ a.   
\p
\v 20 Emi bosoꞌ tao tuka si, tehuu tao tuka ami. Huu fo ita dadi teuꞌ Manetualain lahendan, ma ita homu hak nai nusatetu-ikutemaꞌ a so. Besaꞌ ia tahani ita Ramatuan Yesus Kristus. Neuꞌ ko Ana onda faliꞌ neme nusatetu-ikutemaꞌ a mai, fo fee ita sodaꞌ a neme Manetualain nasa-bolii Na mai.  
\v 21 Neuꞌ ko Kristus narali ita ao-ina mana dadi taaꞌ, manamopo-mana mateꞌ ia, ela dadi ao-ina bebeuꞌ fo ta mopo-mate, sama leoꞌ Ria ao-ina kahere Na. Ana tao narali ita ao-ina na, pake kuasa bau-ina Na. Ma Ana pake kuasa ria boe, de tao na basa-basan fo nai mamanaꞌ bea a, raloe-radae ao nara tuka Ria pareta na.   
\c 4  
\p
\v 1 Toranoo susue kara emin! Huu no basa sira, au hule fo emi masoda roos a naroo, ma bosoꞌ pepeko-papakiꞌ. Au ahiiꞌ u dama emi. Huu fo emi riꞌ dadi meuꞌ au buna-boa ki, nemeꞌ au nonoi-tatao ka mai. Emi tao ma au dale ka namahoꞌo. Ma au bisa soꞌu botiꞌ laka ka, nana huu emi.   
\s1 Ramatuaꞌ a nau fee ita tesatei-tamadaleꞌ, sadi ita tasoda roo-tetuꞌ laꞌo naroo  
\p
\v 2 Au hule inaꞌ sira dua, siꞌ Yodia no Sinteke, fo bosoꞌ rareresiꞌ bali. Ara muste radame ao, ela rasoda malole esa no esa. Huu fo sira dua Ramatuaꞌ esaꞌ, de sira nanahekeꞌ esa no esa.   
\p
\v 3 Tia-lai mananoi-manatao ki! Au hule fo, o urus toranoo inaꞌ sira dua, losaꞌ ara malole ra ao nara. Maulu na parnaa ara roi-tao sota ran seli, fo tulu-fali au tui-beka fee lahenda laꞌeneuꞌ Ramatuaꞌ a Tutui Malole Na. Sira boe parnaa roi-tao leo naꞌ sama-sama roo Klemens, ma tia-lai fekeꞌ ara. Sira basa nade nara, manaduiꞌ nai Ramatuaꞌ a susura dudui nadeꞌ, lahenda fo neuꞌ ko rasoda sama-sama roo Ni nai nusatetu-ikutemaꞌ a.   
\p
\v 4 Huu no emi dadi meuꞌ Ramatuaꞌ a lahendan so, de emi dale mara muste ramahoꞌo hatu-leledon. Au afada seluꞌ bali: tao emi dale mara ramahoꞌo raroo!   
\p
\v 5 Emi dale mara boe muste balaroe-balanau neuꞌ basa lahenda. Ma bosoꞌ mafarene henin mae, Ramatua Yesus mamai na naneneaꞌ so.  
\v 6 Maneniko emi hapu susa, sona dale mara bosoꞌ dodaꞌ hata esa boe. Tehuu hule-haradoi neuꞌ Manetualain ela Ana tulu-fali emi nai basa hata a. Ma basa-basan fo emi hule a, bosoꞌ mafarene henin soꞌu dale mara hule makasi neuꞌ Ana.  
\v 7 Maneniko emi tao leo naꞌ, neuꞌ ko Ramatuaꞌ a tao na emi dale mara tama. Memaꞌ lahenda dae-bafoꞌ a ta bisa bubuluꞌ rae ubeaꞌ taon, de emi dale ara ta dodaꞌ fa. Tehuu no emi mamahere Yesus Kristus, de Ramatuaꞌ a tao na dale mara tama. Huu fo Ana nanea emi, de emi dale mara, ma duduꞌa-aafim, Tuhan Yesus.   
\p
\v 8 Toranoo kara emin! Koe na leo iaꞌ: bosoꞌ duꞌa-afi mafararaꞌu. Tehuu manea emi duduꞌa-aafim, dodoo hata fo naraa no Manetualain dale Na, ma hata malole fo tao namahoꞌo lahenda dalen. Emi muste afi roo-tetuꞌ ma makamoiꞌ. Afi hata matetuꞌ ara ma malole ra. Saka enoꞌ fo lahenda fekeꞌ a bisa hapu hada-horomata. Saka enoꞌ fo soꞌu-fua hata malole ra. Ma bosoꞌ hahae duꞌa-afi basa hata malole ia ra.  
\v 9 Au anori-afada emi tuka Ramatuaꞌ a eno masoda Na so. Emi boe muste tuka au eno masoda ka, ma tao tuka basa-basan fo parnaa au dedea ma tao a. Maneniko emi tuka leo naꞌ, sona Manetualain natetea emi dale mara, ela tesa-tama ma bisa masoda no mole-dame.   
\s1 Paulus hule makasi, nana huu ara tulu-falin  
\p
\v 10 Au hule makasi, ma io-oa Manetualain, nana huu emi ta mafarene heni au. Memaꞌ au bubuluꞌ ae, maulu na emi mafarene au, tehuu bei ta hapu lelaꞌ fo tulu-fali au.  
\v 11 Au ta anuu daleꞌ hule emi hata-hata esa boeꞌ. Au ta parnaa kura-kaiꞌ hata esa boeꞌ, nana huu au ateme an de, hapu ubeaꞌ sona dai so.  
\v 12 Parnaa au masoda ka ta hapu hata-hata esa boeꞌ. Au boe parnaa asoda nai mananoꞌu-manadaiꞌ a. Au parnaa amalaa, ma abete. Nai basa hata lalaꞌen, au anori a koe na so, de au bisa anenete nai masoda ka daleꞌ.  
\v 13 Au bisa lepa-asaa basa hata a, nana huu Kristus riꞌ tao natetea au!   
\p
\v 14 Leo mae leoꞌ bea boe, au hule makasi, nana huu emi matudu dale malole mara, fo tulu-fali au nai susa ka daleꞌ.  
\v 15 Maulu na, tepoꞌ fo au laꞌo ela propensi Makedonia, fo u tui-beka Manetualain Tutui Malole Na nai mamana fekeꞌ ara, adaꞌ noi emi meme kota Filipi a riꞌ tulu-fali au doi laꞌo enoꞌ. Sarani fekeꞌ ara, taꞌa. Tehuu emi bubuluꞌ tutuiꞌ ria so.  
\v 16 Natutuduꞌ leo-leoꞌ, tepoꞌ fo au nai kota Tesalonika, emi haitua doiꞌ laiꞌesa-laiꞌdua, fo tulu-fali au boe.\x + \xo 4:16 \xt 2 Korintus 11:9; Lahenda Nadedenuꞌ ara Tutuin 17:1\x*  
\v 17 Besaꞌ ia, au ta anuu daleꞌ nau hule hata neme emi mai. Au nau Ramatuaꞌ a balas fee emi ua-naleꞌ, nana huu emi dale mara malole a moo au.  
\v 18 Au sipo basa tutulu-fafaliꞌ fo emi haitua a, neme Epafroditus mai so. Ria dadi ua-naleꞌ soaneuꞌ au, losaꞌ besaꞌ ia au ta kura-kai hata esa boeꞌ. Ria boe dadi sama leoꞌ tutunu-hohotu mabomeniꞌ, fo lahenda tunu-hotu ela doꞌo-tabe neuꞌ Manetualain. Ma Ramatuaꞌ a sipoꞌ tutunu-hohotuꞌ ria no malole, nana huu ria riꞌ tao na dale Na namahoꞌo.\x + \xo 4:18 \xt Kalua reme Masir 29:18\x*   
\p
\v 19 Manetualain fo au doꞌo-tabe Ni a, namasuꞌi nan seli. Ma Ana bubuluꞌ matetuꞌ emi parluu mara. Boe ma neuꞌ ko Ana natudu dale malole Na, ma fee emi ua-nale kahere Na, huu fo emi nanahekeꞌ moo Yesus Kristus.  
\v 20 De, ela ita soꞌu tadedema Amaꞌ Manetualain nade Na laꞌo naroo, losa doo na neu. Tebe ria!   
\s1 Paulus duiꞌ nateꞌe susura na  
\p
\v 21 Au haitua haraoe soda-moleꞌ soaneuꞌ basa lahenda fo riꞌ tuka Yesus Kristus nai kota Filipi.  
\p Au tia-lai ki fo rai ia, haitua fee emi haraoe soda-moleꞌ boe.   
\p
\v 22 Basa lahenda kamahereꞌ fo rai kota Roma, haitua haraoe soda-moleꞌ boe.  
\p Leoꞌ na boe basa toranooꞌ fo roi-tao nai mane bauinaꞌ a uma mana pareta na. Ara haitua fee emi haraoe soda-moleꞌ.   
\p
\v 23 Au hule fo ita Ramatuan Yesus Kristus, natudu dale malole Na neuꞌ emi basa.  
\q2 Au susura ka teꞌe adaꞌ ia,  
\q2 Paulus.