\id COL  
\h Kolose 
\toc1 Paulus susura na fee lahenda kamahereꞌ rai kota Kolose 
\toc2 Kolose 
\toc3 Kol 
\mt2 Paulus susura na  
\mt2 fee lahenda kamahereꞌ rai kota  
\mt1 Kolose  
\c 1  
\s1 Paulus mulai duiꞌ susura na  
\p
\v 1 Soda-moleꞌ neme au mai, Paulus. Manetualain riꞌ here na au fo dadi uꞌ Yesus Kristus lahenda nadedenun. Ita toranoon Timotius nai ia, ana haitua haraoe soda-moleꞌ fee emi boe.   
\p
\v 2 Au duiꞌ susuraꞌ ia fee emi, Manetualain lahendan rai kota Kolose, fo riꞌ tao tuka Yesus Kristus eno masoda Na laꞌo naroo.  
\p Ami hule fo ita Aman Manetualain, natudu dale malole Na neuꞌ emi, fo ela emi bisa masoda no tetu-temaꞌ, mole-dame, ma tesatei-tamadaleꞌ.   
\s1 Paulus hule-haradoi fee lahenda kamahereꞌ rai Kolose  
\p
\v 3 Maneniko ami nai ia hule-haradoi fee emi, sona ami hule makasi neuꞌ Manetualain, ita Ramatuan Yesus Kristus Aman.  
\v 4 Ami mamanene hata dodouꞌ laꞌeneuꞌ emi mamahere Yesus Kristus, ma laꞌeneuꞌ emi dale susue-lalaim, ma dale malole mara soaneuꞌ basa lahenda kamahereꞌ ara.  
\v 5 Emi tao leo naꞌ, nana huu emi malelaꞌ soda-moleꞌ fo nanapedaꞌ soaneuꞌ emi nai nusatetu-ikutemaꞌ a. Parnaa emi mamanene soda-moleꞌ ia neme dedea-nafada matetuꞌ a, riꞌ Ramatuaꞌ a Tutui Malolen,  
\v 6 fo lahenda reu rafadan neuꞌ emi neme uluꞌ mai so. Tutui Malole ria nanatui-nanabekaꞌ nai basa mamanaꞌ nai dae-bafoꞌ ia, ma hapu buna-boa malole, nana huu tao na lahenda masoda na natafali dadi malole. Emi masoda ma boe natafali dadi malole leo naꞌ, mulai neme masososa na emi mamanene Tutui Malole ria, ma bubuluꞌ matetuꞌ Manetualain dale malole Na.   
\p
\v 7 Emi manori hata ia ra neme aꞌa Epafras, fo ami tia-lai mana noi susuem. Ana makate nalalaꞌo naroo Kristus nonoi-tataon nai emi talada.\x + \xo 1:7 \xt Kolose 4:12; Filemon 23\x*  
\v 8 Ana tui ami nai ia, laꞌeneuꞌ emi susue-lalaim fo Manetualain Dula-dale Na fee emi so a.   
\p
\v 9 Huu ria na, mulai neme masososa na, ami mamanene laꞌeneuꞌ emi, ami hule-haradoi fee emi laꞌo naroo. Ami hule neuꞌ Menetualain, ela emi bisa malelaꞌ matetuꞌ Ria hihii-nanaun, ma emi bisa bubuluꞌ hata dodouꞌ, tuka hata fo Ramatuaꞌ a Dula-dale Na nanori-nafadan neuꞌ emi.  
\v 10 No ria na, emi bisa masoda raadale-toꞌeteiꞌ, ma meni Manetualain nade malole Na. Ma emi boe bisa tao ma Ramatuaꞌ a dale Na namahoꞌo nai basa hata a. Maneniko emi matudu dale malole neuꞌ lahenda, neuꞌko emi maboa boa malole laꞌo naroo. No ria na, emi bisa boe-boe malelaꞌ Ramatuaꞌ a.   
\p
\v 11-13 Ami boe hule-haradoi neuꞌ Manetualain, fo fee Ria kuasa kahere Na, ela emi bisa lepa-masaa ma basa hata sira no dale naneneteꞌ. Ami hule fo emi dale ma bisa henuꞌ no namahoꞌo, ela emi hule makasi maroo neuꞌ Amaꞌ Manetualain. Ana soi enoꞌ, ela emi bisa sipo babatiꞌ neme posakaꞌ nai nusatetu-ikutemaꞌ a. Ana fee posaka ria neuꞌ basa lahenda fo ramahere Yesus Kristus. Ana poꞌi-tata na ita teme kuasa maiu-mahatuꞌ a mai so, boe ma fee ita dadi teuꞌ Yesus Kristus lahendan, fo leo nai makaledoꞌ a daleꞌ. Ana soꞌu na Yesus Kristus, dadi neuꞌ ita Mane na. Yesus nana Manetualain Ana susuen.  
\v 14 Manetualain fee heni Ana Na, ela soi-tefa na ita, ma sae-safe heni ita sala-siko nara.\x + \xo 1:14 \xt Efesus 1:7\x*   
\s1 Kristus, dema lena basa-basan  
\q1
\v 15 Kristus, rupa-loleꞌ esa no Manetualain,  
\q2 lahenda dae-bafoꞌ a ta bisa ritan.  
\q1 Ria riꞌ uluꞌ, neme basa-basan,  
\q2 ma Ana dadi Ramatua neuꞌ basa-basan fo Manetualain adu naa so a.   
\q1
\v 16 Manetualain pake Ni  
\q2 fo adu lalai ma dae-bafoꞌ a no basa oe-isin.  
\q1 Ana adu-tao basa-basan fo lahenda dae-bafoꞌ a bisa ritan,  
\q2 ma lahenda dae-bafoꞌ a ta bisa ritan.  
\q3 Natutuduꞌ leo-leoꞌ, mana pareta ra, sira siꞌ homu kuasa,  
\q3 maneꞌ ara, ma malaka ra.  
\q1 Basa-basan fo Manetualain adu-tao a,  
\q2 Ana adu-tao soaneuꞌ Yesus Kristus,  
\q3 ma Yesus boe noi-tao basa sira.   
\q1
\v 17 Tepoꞌ fo basa fekeꞌ ara bei taꞌa,  
\q2 tehuu hapu Ni memaꞌ so.  
\q1 Basa-basan nanahekeꞌ roo Ni,  
\q2 ma Ria riꞌ ator asa.   
\q1
\v 18 Ria riꞌ dadi Malaka fee basa lahenda kamahereꞌ ara,  
\q2 ma lahenda kamahereꞌ ara dadi sama leoꞌ Ria ao-ina Na.  
\q1 Ria riꞌ nalalaꞌo basa-basan.  
\q1 Neme basa mana mateꞌ fo riꞌ ara rasoda seluꞌ a,  
\q2 Ria riꞌ penting lena,  
\q3 fo ela Ria riꞌ madema nan seli lena neme basa-basan.\x + \xo 1:18 \xt Efesus 1:22-23\x*   
\q1
\v 19 Basa-basan fo rai Manetualain Ao-inan daleꞌ a,  
\q2 rai Kristus Ao-inan daleꞌ boe,  
\q3 ria riꞌ tao na Ramatuaꞌ a namahoꞌo.   
\q1
\v 20 Manetualain pake Yesus Kristus,  
\q2 ela basa-basan fo riꞌ Ana adu-tao a mole-dame roo Ni.  
\q1 Ria fee Ana Na,  
\q2 de daa Na faa dadi neuꞌ tutunu-hohotuꞌ,  
\q2 ma mate nai ai kake a,  
\q3 fo ela basa-basan rai lalai,  
\q3 ma basa-basan rai dae-bafoꞌ a,  
\q3 bisa ramole-radameao seluꞌ roo Manetualain.\x + \xo 1:20 \xt Efesus 2:16\x*   
\p
\v 21 Fai a ulu na, emi masoda nai deaꞌ, dooꞌ a meme Manetualain mai. Emi musu moo Ni, boe ma bika-bati memeꞌ Ana mai, nana huu emi dale tadalu mara, ma nonoi tadalu ma riꞌ nalena laka neuꞌ Ana laꞌo naroo.  
\v 22 Leo mae leoꞌ na, tehuu besaꞌ ia Ria riꞌ soi enoꞌ, de ita bisa mole-dame seluꞌ too Ni. Ria riꞌ nadenu Ana Na fo dadi lahenda dae-bafoꞌ. Ria riꞌ nadenu Ana Na mai dadi lahenda dae-bafoꞌ, ela mate Ni nai ai kake a dadi neuꞌ tutunu-hohotuꞌ, fo ita bisa mole-dame seluꞌ too Ni. Yesus Kristus tao leo naꞌ, ela Ana noo ita teu tapadeiꞌ nai Manetualain mata Na boe oo, ita lalao-lalafuꞌ, dale roos, ma sala-siko taꞌa.  
\v 23 Sadi emi muste manenete maroo nai emi namahere ma. Mamahere tebe-tebe, bosoꞌ keke-boiꞌ! Bosoꞌ heoꞌ memeꞌ Tutui Malole, fo riꞌ emi sipon tepoꞌ fo mamanenen masososa a. Emi bisa mamahena-mabani meuꞌ Tutui Malole a. Lahenda reu tui-beka Tutui Malole a nai basa mamanaꞌ ara nai dae-bafoꞌ ia so. Ma Ramatuaꞌ a nadenu au, Paulus, fo u tui-beka Tutui Malole a boe.   
\s1 Paulus noi-tao nalalau Ramatuaꞌ a lahenda nara  
\p
\v 24 Tepoꞌ fo Kristus nasoda nai dae-bafoꞌ ia, Ana hapu doidoso dodouꞌ. Ma besaꞌ ia au lepa-asaa doidoso rupaꞌ ara. Leo mae leoꞌ na, tehuu au dale ka namahoꞌo naroo. Maneniko lehenda hapu doidoso, sona ela au riꞌ lepa-asaa kati si, sama leoꞌ Kristus lepa-nasaa na doidoso sira kati lahenda nara. Ria lahenda nara, dadi sama leoꞌ Ria ao-ina Na.  
\v 25 Manetualain fee au nonoi lakaꞌ, fo alalau Ria lahenda nara. Huu ria na, de au anori-afada alulutuꞌ Ria Dedea-nafadan soaneuꞌ emi.  
\v 26-27 Neme masososa na mai, lahenda ramanene Manetualain Dedea-nafada nara. Tehuu ara bei ta bubuluꞌ Dedea-nafadaꞌ matetuꞌ ria dale hihii na, nana huu ria bei nafuniꞌ. Tehuu besaꞌ ia, Ramatuaꞌ a naetu, fo buka dale hihiiꞌ ria fee Ria lahenda nara. Ma Ria dale hihii na, nana tutuiꞌ kahereꞌ soaneuꞌ basa leo ra rai dae-bafoꞌ ia. Tutuiꞌ kahereꞌ a nana riꞌ:  
\q1 Kristus nasoda nai emi dale mara!  
\q2 Ria riꞌ tao na emi mamahere maroo mae,  
\q3 neuꞌ ko Ana fee posakaꞌ malole ina soaneuꞌ emi nai nusatetu-ikutemaꞌ a.  
\q2 Ia riꞌ ita lahenda dae-bafoꞌ a tahanin neme fai a ulu na mai.   
\p
\v 28 De, ami mafada basa lahenda laꞌeneuꞌ Kristus. Ami manori-mafada basa lahenda ra, ma mafarereneꞌ fee si, pake basa duduꞌa-aafiꞌ fo Manetualain feen neuꞌ ami a. Ami tao leo naꞌ, ela matetea basa lahenda fo tuka Kristus, de neuꞌ ko sira bisa rapadei nai Ria mata Na, ma ta maeꞌ fa, nana huu masoda nara roos a naroo.  
\v 29 Huu ria na, de au oi-tao sota an seli fee emi. Au bisa anenete oi-tao sota leoꞌ na, nana huu Kristus kuasa Na riꞌ tao natetea au. Ma Ria kuasa Na, kahereꞌ nan seli!   
\c 2  
\p
\v 1 Emi fo leo nai kota Kolose,  
\p ma sira fo leo rai kota Laodikia, ma sira fo bei ta parnaa raneta roo au. Nenene matalolole! Au nau emi basa bubuluꞌ au oi-tao sota an seli fee emi, ma fee sira.  
\v 2 Au dale ka ae, nau atetea sira basa dale nara, ela sira boe bisa nanahekeꞌ dadi esaꞌ, nana huu ara rasue-ralaiao. Boe ma ramahere tebe-tebe, nana huu ara bubuluꞌ matetuꞌ Ramatuaꞌ a dale hihiin fo maulu na bei nafuniꞌ. Hata nino ria riꞌ Kristus!  
\v 3 Maneniko emi nanahekeꞌ daleꞌ esa moo Kristus, besaꞌ ko Ana fee katemaꞌ duduꞌa-aafiꞌ fo emi parluu, ma nanori-nafada emi pake duduꞌa-aafiꞌ ria, fo tao hata malole ra. Duduꞌa-aafiꞌ ia ra, sama leoꞌ hata posaka mabeli.   
\p
\v 4 Au afada emi basa hata ia ra, fo ela bosoꞌ lahenda mai rapuputaꞌ, ma lalame maa nara roo emi.  
\v 5 Tebe au dooꞌ a emeꞌ emi mai. Leo mae leoꞌ na, tehuu au ta afarene heni emi, nana huu au dale ka nanahekeꞌ noo emi. Ma amahoꞌo, nana huu au bubuluꞌ emi masoda roo-tetuꞌ, ma emi bei mamahere tebe-tebe neuꞌ Kristus.   
\s1 Ita fo nanahekeꞌ too Kristus, hapu soda roo-tetuꞌ  
\p
\v 6 Huu no maulu na emi sipo Yesus Kristus dadi neuꞌ emi Ramatua ma, de besaꞌ ia, emi muste mamanene maroo Ni. Ria dadi neuꞌ emi Ramatua ma.  
\v 7 Maneniko emi masoda nanahekeꞌ moo Ni, sona emi sama leoꞌ ai-huuꞌ fo riꞌ boe-boe natea, nana huu oka na narolo losa dae daleꞌ. Ma emi sama leoꞌ uma tea-mepeꞌ, nana huu rafoa ni nai fanderen matea. Emi mamahere tebe-tebe, sama leoꞌ parnaa emi manori so a. Ela leoꞌ bea na emi dale mara henuꞌ no makasi, nana huu basa hata fo Manetualain taon soaneuꞌ emi a.   
\p
\v 8 Besa-besa ela emi bosoꞌ tuka lahenda fekeꞌ fo pake lahenda dae-bafoꞌ a duduꞌa-aafin ma atoran nara, de naheoꞌ heni emi meme eno roos a mai. Huu fo nanori-nafada ria ta nanuu neteꞌ fa ma ta nanaseleꞌ nai Kristus daleꞌ.   
\p
\v 9 Basa-basan fo nai Manetualain Ao-inan daleꞌ, sira rai Kristus Ao-inan daleꞌ boe. Ma Kristus dadi lahenda dae-bafoꞌ sama leoꞌ ita boe.  
\v 10 Huu no emi nanahekeꞌ moo Kristus, ma dadi meuꞌ Ria lahendan, de Ana tao na emi mamanoꞌu-mamadai. Ria riꞌ dema lena basa kuasa, ma basa mana pareta, leo mae malole do tadaluꞌ.   
\p
\v 11 Fai fo lahenda Yahudi sunat a, ara ee heni ‘mamae nara’ rou peda na fo dadi tanda nae, sira nana Manetualain lahendan. Tepoꞌ fo emi dadi meuꞌ Kristus lahendan, emi boe ‘sunat’. Ria sosoa na leo iaꞌ: sunat nana, ta laꞌeneuꞌ lahenda ee heni rouꞌ fo nai ao-ina na fa, tehuu laꞌeneuꞌ Kristus ee heni basa hata tadaluꞌ a neme ita dale na mai. Riꞌ basa hata tadaluꞌ fo ita nau taon, nana huu ita lahenda dae-bafoꞌ.   
\p
\v 12 Fai fo ara sarani emi pake oe, ria sama leoꞌ emi nana natoiꞌ sama-sama moo Kristus. Boe ma emi hapu soda bebeuꞌ, sama leoꞌ Ria hapu soda bebeuꞌ a boe. Emi hapu leoꞌ na, nana huu emi mamahere mae, Manetualain pake kuasa kahere Na, fo fee Yesus nasoda seluꞌ neme mamate Na mai. Ana pake kuasa ria boe, fo noi-tao nai emi dale mara.\x + \xo 2:12 \xt Roma 6:4\x*   
\p
\v 13 Maulu na, emi sama leoꞌ mate, nana huu emi manuu sala-siko rupaꞌ ara, ma bei ta dadi meuꞌ Manetualain lahenda nara. Leo mae leoꞌ na, tehuu Ana sae-safe heni emi sala mara katemaꞌ, ma fee emi soda bebeuꞌ, sama leoꞌ Ana fee Kristus nasoda seluꞌ a.\x + \xo 2:13 \xt Efesus 2:1-8\x*  
\v 14 Matetu na, ita muste hapu huhukuꞌ, nana huu ita talena laka neuꞌ Manetualain atoran nara. Tehuu Ana soi-tefa heni ita huhuku nara, tepo fo ara paku Kristus nai ai kake a.\f + \fr 2:14 \ft Susura Makamoiꞌ dedea Yunani manaduiꞌ nae, “Tehuu Ana soi-tefa na ita teme huhuku a mai, nana huu Ana paku huhuku a nai Kristus ai kake na so.”\f* \x + \xo 2:14 \xt Efesus 2:15\x*  
\v 15 Nai naa, Ana naseki kuasa maiu-mahatuꞌ ara, ma basa-basan fo pareta no tadaluꞌ. Boe ma Ana namamaeꞌ asa rai lahenda dodouꞌ matan. Ria sama leoꞌ soldadu naseki nai natatiaoꞌ a, de laꞌo rule-feo ranononda ratudu sira musu-noon fo riꞌ ara raseki si a.   
\p
\v 16 Maneniko lahenda nau ratuda emi laꞌeneuꞌ atoran nanaa-nininuꞌ, sona bosoꞌ tao daleꞌ neuꞌ asa. Ma kalu lahenda nau radedea roo emi laꞌeneuꞌ fai malole ra, do feta bula bebeuꞌ, do atoran fai hahae aoꞌ, sona bosoꞌ mamanene si.\x + \xo 2:16 \xt Roma 14:1-6\x*  
\v 17 Hata rupa leo naꞌ ara, ta penting fa! Huu fo hata sira sama leoꞌ salaoꞌ, de neuꞌ ko sapu-lalo. Tehuu Kristus nana teaꞌ. Ria riꞌ nasoda naroo.   
\p
\v 18 Maneniko lahenda nau ratuda emi, nana huu emi ta tuka atoran fo sira siꞌ tao a, sona bosoꞌ mamanene. Maneniko emi mamanene neuꞌ asa, sona emi ta bisa sipo posaka fo Manetualain nau fee emi a. Tehuu besa-besa e! Tebe lahenda rahiiꞌ saka enoꞌ ela ratuda emi. Ara nau emi muste maloe-madaeao mara, ma soko neuꞌ Ramatuaꞌ a eilaꞌo-limalopen rai nusatetu-ikutemaꞌ a, nana huu ara raendobuko mei-afeꞌ a natudu si leoꞌ na. Ara tao ao nara lena reme lahenda fekeꞌ ara mai. Sekona te, ta leo naꞌ fa! Sira dudua-aafin sama leoꞌ lahenda dae-bafoꞌ a boe.  
\v 19 Sira ta nanahekeꞌ roo Kristus. Sekona te, Ria nana Lakaꞌ. Ma Ria lahenda nara, sama leoꞌ ao-inan fo Ria ator a. Ana tao na lahenda nara boe-boe tea-mepeꞌ, pake Manetualain kuasa Na. No ria na, ara dadi sama leoꞌ uaꞌ ma duiꞌ, fo nanaheke nahereꞌ de ratulu-rafaliao esa no esa, losaꞌ ao-ina katemaꞌ esa bisa noi-tao no malole.\x + \xo 2:19 \xt Efesus 4:16\x*   
\s1 Maneniko ita nanahekeꞌ too Kristus, ita hapu soda bebeuꞌ  
\p
\v 20 Emi mate sama-sama moo Kristus so. Boe ma emi ta nanahekeꞌ moo kuasa maiu-mahatuꞌ nai dae-bafoꞌ ia soꞌ. Ubeaꞌ taon, de emi bei tuka maroo dae-bafoꞌ a atoran rupa-rupa nara? Ara rae leo iaꞌ:  
\v 21 “Bosoꞌ homu ia; bosoꞌ mia ria; bosoꞌ tototo ia.”  
\v 22 Tehuu lahenda dae-bafoꞌ a riꞌ tao atoran sira, fo ranori-rafadan soaneuꞌ lahenda ra. Sekona te atoran sira ator adaꞌ noi hata fo neuꞌ ko sapu-lalo!  
\v 23 Uniꞌ ko leo lahenda bisa tao tuka atoran sira, dale nara rae, neuꞌ ko lahenda hadaꞌ asa, ma tao si reuꞌ lahenda malelaꞌ, lahenda duduꞌa-aafi naruꞌ, lahenda maloe-madaeaoꞌ, ese-rumu seluꞌ ao-ina nara, makate soko-taku. Sekona te taꞌa! Atoran sira ta bisa ator ratalolole lahenda dae-bafoꞌ a duduꞌa-aafin, ma lahenda dae-bafoꞌ a dalen fo rahiiꞌ tao tadaluꞌ a!   
\c 3  
\p
\v 1 Manetualain fee emi masoda bebeuꞌ, sama leoꞌ Ana tao na emi masoda seluꞌ sama-sama moo Kristus. Besaꞌ ia, Kristus natuuꞌ nai mamana hada-horomata nai Manetualain boboa ona Na. Huu ria na, de emi muste duꞌa-afi hata fo riꞌ tao na Manetualain dale Na namahoꞌo.\x + \xo 3:1 \xt Sosoda Iꞌio-oꞌoaꞌ ara 110:1\x*  
\v 2 Duꞌa-afi maroo laꞌeneuꞌ hata fo Ramatuaꞌ a nahiiꞌ. Bosoꞌ tao daleꞌ neuꞌ hata fo tao namahoꞌo adaꞌ noi lahenda dae-bafoꞌ a dale na.  
\v 3 Nana huu tepoꞌ fo Kristus mate a, emi mate sama-sama moo Ni boe. Boe ma emi masoda bebeu ma nanahekeꞌ noo Kristus, fo riꞌ sama-sama noo Manetualain nai nusatetu-ikutemaꞌ a.  
\v 4 Kristus nasoda nai emi daleꞌ, ma Ana tao na emi masoda roo-tetuꞌ. Fai bea ma Ana natafali mai, emi toda sama-sama moo Ni boe. Basa sira nana, kahereꞌ nan seli!   
\s1 Masodaꞌ rupa-lole paraaꞌ, ma masodaꞌ rupa-lole bebeuꞌ  
\p
\v 5 Huu ria na, de emi muste tuꞌu-tapa heni dale hihii tatao tadaluꞌ mara. Natutuduꞌ leo-leoꞌ: mahiiꞌ hohoke; mahiiꞌ tao hata makakeo-makakanuꞌ ara; mahiiꞌ tao tuka hihii-nanau ao-paaꞌ; mahiiꞌ tao tadalu rupaꞌ ara; ma tendetuu fo nau basa-basan dadi reuꞌ o nuu-enam (sekona te, tendetuuꞌ a sama leoꞌ sosokoꞌ ria, huu fo soꞌu madedema hata fekeꞌ de seti heni Ramatuaꞌ a).  
\v 6 Hata sira tao ra Manetualain namanasa nan seliꞌ, losaꞌ Ana nau huku basa lahenda fo ta nau ramanene Ni.  
\v 7 Maulu na, emi masoda leo naꞌ boe, huu fo emi dale mara nanahekeꞌ noo hata tadaluꞌ ara.   
\p
\v 8 Tehuu besaꞌ ia, emi muste tuꞌu-tapa heni katemaꞌ dale hihii tatao tadalu mara. Natutuduꞌ leo-leoꞌ: mahiiꞌ mamanasa; dale hanas; napeda daleꞌ; dedea malutu lahenda nade malolen; ma dedea tadaluꞌ.  
\v 9-10 Ma emi bosoꞌ mapuputaꞌ esa no esa. Nana huu emi tuꞌu-tapa heni dale hihii tatao tadalu mara, ma foa ela emi eno masoda paraa mara so.\x + \xo 3:9-10 \xt Efesus 4:22\x*  
\p Ma besaꞌ ia, emi kati ni neniꞌ dale bebeuꞌ. Ria sama leoꞌ lahenda tuꞌu-tapa heni kakao-papake paraa makekeo nara, de pake papake bebeu makamoiꞌ. Fai a ulu na Manetualain riꞌ adu na emi. Ma besaꞌ ia tao Na emi boe-boe bubuluꞌ Ana, ma tao na emi neuꞌ ko dadi rupa-loleꞌ esa sama leoꞌ Ria.\x + \xo 3:9-10 \xt Tutui Masososaꞌ 1:26; Efesus 4:24\x*  
\v 11 Nai soda bebeuꞌ a daleꞌ, ita ta mete lahenda neme rou dea na mai tae, sira nana lahenda Yahudi do, lahenda ta Yahudi fa do; lahenda fo sunat do, ta sunat do; rarelaꞌ hadas do, ta rarelaꞌ hadas do;\f + \fr 3:11 \ft Susura Makamoiꞌ dedea Yunani manaduiꞌ nae, “lahenda Barbar ma lahenda Skutia”. Ara tao lahenda Barbar neuꞌ lahenda manamai, de mana pareta Roma ta pareta si fa. Ma ara tao lahenda Skutia ra neuꞌ ta rarelaꞌ hadas.\f* ata do, ta ata fa. Basa sira ta penting fa! Tehuu penting a, nana riꞌ kalu sira nanahekeꞌ roo Kristus, ma kalu Ana nasoda nai sira dalen.   
\p
\v 12 Manetualain here emi, nana huu Ana sue-lai emi. Ria dale hihii na, ela emi dadi meuꞌ Ria lahenda lalao-lalafun, fo fekeꞌ neme lahenda dae-bafoꞌ a mai. Huu ria na, de emi muste dadi lahenda fo nanuu dale kasian, dale malole, dale naloe-nadaeaoꞌ, dale balaroe-balanauꞌ, ma dale naneneteꞌ.  
\v 13 Emi muste manenete ma esa bubuluꞌ neuꞌ esa. Maneniko neme emi mai ruma saka dedeaꞌ no ria tia-lain, sona bosoꞌ mapeda daleꞌ. Tehuu emi muste mafarene heni salaꞌ ria, ma fee ampon neuꞌ ana, sama leoꞌ Ramatuaꞌ a nafarene heni emi sala mara.\x + \xo 3:13 \xt Efesus 4:2, 32\x*  
\v 14 Mafarereneꞌ, te susue-lalaiꞌ a penting neme basa-basan mai. Boe ma emi muste pake susue-lalaiꞌ nai dale mara, sama leoꞌ lahenda pake bua-loas nai ao-ina na. Susue-lalaiꞌ a, sama leoꞌ abas fo heke-tenun dadi neuꞌ temaꞌ malole. Ria riꞌ heke ita dadi teuꞌ esa.   
\p
\v 15 Ita bisa mole-dame too Manetualain, nana huu Kristus. De, emi muste mataaꞌ Kristus mole-dame na, ator emi dale mara. Ramatuaꞌ a nau emi basa masoda mole-dame esa no esa, nana huu emi basa nanahekeꞌ dadi ao-paaꞌ esa. Ma emi muste manuu dale makasi laꞌo naroo, huu fo Ria riꞌ teka-here emi.   
\p
\v 16 Kristus Dedea-nafadan nara, muste ator emi dale mara ma emi masoda ma. Dedea-nafadaꞌ sira sama leoꞌ hata-heto mabeli, fo Ana fee emi a. Emi bisa bubuluꞌ hata dodouꞌ, tuka Ramatuaꞌ a duduꞌa-afin, nana huu Dedea-nafadaꞌ sira ratudu enoꞌ. Boe ma emi bisa pake si, fo manori ma fee nafarereneꞌ neuꞌ esa no esa. Maneniko emi manori-mafada lahenda mara, sona bosoꞌ baraꞌaai si, tehuu pake dale balaroe-balanauꞌ fo henuꞌ no makasi. Pake sosoda iꞌio-oꞌoaꞌ, sosoda rohani, ma basa sosodaꞌ fo emi duiꞌ ma fo io-oa Manetualain.  
\v 17 Bosoꞌ mafarene henin, te hata fo emi dedea ma tao a, ria nonooꞌ leo nae emi Ramatuam Yesus Kristus riꞌ tao basa sira. Ma hule makasi maroo neuꞌ Ria Aman, Manetualain.\x + \xo 3:17 \xt Efesus 5:19-20\x*   
\s1 Lahenda Saraniꞌ ara, muste rasoda leo beaꞌ esa no esa?  
\p
\v 18 Sao-inaꞌ ara! Emi muste mamania-mamanene neuꞌ sao-tou mara, nana huu ria naraa soaneuꞌ lahenda fo tuka Ramatua Yesus Kristus.\x + \xo 3:18 \xt Efesus 5:22; 1 Petrus 3:1\x*   
\p
\v 19 Sao-touꞌ ara! Emi muste sue-lai sao-ina ma, ma bosoꞌ ese-rumun, fo tao dale hedi ni.\x + \xo 3:19 \xt Efesus 5:25; 1 Petrus 3:7\x*   
\p
\v 20 Anaꞌ ara! Emi muste mamania-mamanene neuꞌ ina-ama mara nai basa hata lalaꞌen, huu fo ria riꞌ tao na Ramatuaꞌ a dale Na namahoꞌo.\x + \xo 3:20 \xt Efesus 6:1\x*   
\p
\v 21 Ina-ama ra! Bosoꞌ mahehediꞌ anaꞌ ara, fo ela dale nara bosoꞌ dodaꞌ ma rapeda daleꞌ roo emi.\x + \xo 3:21 \xt Efesus 6:4\x*   
\p
\v 22 Lahenda mana noi ra! Nai dae-bafoꞌ ia, emi muste tao tuka malaka mara nai basa hata a. Bosoꞌ makateꞌ adaꞌ noi fai fo ara roi rereluꞌ emi a. Tehuu saka eno na, fo tao mamahoꞌo dale nara kokosen. Moi-tao basa hata a no matetuꞌ, huu fo emi bubuluꞌ mae, Manetualain riꞌ noi rereluꞌ emi.  
\v 23-24 Emi tao sudi hata ubeaꞌ, sona moi-tao no matetuꞌ ma ao maseeꞌ. Emi muste moi-tao sama leoꞌ moi-tao fee emi Ramatuam Yesus Kristus, ta fee lahenda dae-bafoꞌ a fa. Emi malalau Ni, neuꞌ ko Ria riꞌ bati-pala fee emi posakaꞌ.  
\v 25 Tehuu maneniko emi ta moi-tao no matetuꞌ fa, neuꞌ ko Ana huku emi. Huu fo Ria nana, roo-tetuꞌ, ma ta mete mataꞌ fa.\x + \xo 3:25 \xt Efesus 6:5-8; Tui Seluꞌ Laꞌe Neuꞌ Eno Sodaꞌ a 10:17; Efesus 6:9\x*   
\c 4  
\p
\v 1 Basa malaka ra! Emi muste ator ata mara no matetuꞌ, ma beibeberaꞌ. Mafarereneꞌ te, emi boe manuu Ramatuaꞌ nai nusatetu-ikutemaꞌ a fo ator emi.\x + \xo 4:1 \xt Efesus 6:9\x*   
\s1 Lelea-nonoreꞌ  
\p
\v 2 Emi muste makate hule-haradoi. Kalu emi hule-haradoi, sona muste tebe-tebe ma meniꞌ daleꞌ fo henuꞌ no makasi, bosoꞌ duꞌa-afi hata fekeꞌ.  
\v 3 Bosoꞌ mafarene henin hule-haradoi fee ami, hule fo Manetualain soi enoꞌ, ela ami bisa tui lahenda hata fo maulu na nananafuniꞌ laꞌeneuꞌ Kristus. Mafarereneꞌ te, au masoꞌ bui a, nana huu au afada lahenda laꞌeneuꞌ Kristus.  
\v 4 Hule-haradoi fo au bisa tui-beka Tutui Malole a no matetuꞌ, ela lahenda bisa bubuluꞌ ratalololen.   
\p
\v 5 Masoda no roo-tetuꞌ nai lahenda fo bei ta ramahere Kristus a, talada. Pake matalolole fai lelaꞌ fo Manetualain feen neuꞌ emi.\x + \xo 4:5 \xt Efesus 5:16\x*  
\v 6 Maneniko emi dedea, sona dedea no balaroe-balanauꞌ. Dedea sona laꞌe lahenda dalen, ela sira bosoꞌ doaꞌ neuꞌ emi dedeam. Pake dedea roo-tetuꞌ, fo maneniko lahenda ratane emi, sona bisa mataa matafaliꞌ asa no malole.   
\s1 Paulus duiꞌ nateꞌe susura na  
\p
\v 7 Tikikus sakaꞌ mai tui fee emi laꞌeneuꞌ au leleo-lalaꞌo ki. Ria nana, ami toranoo susuem fo riꞌ dite-tama nahere nalalau Ramatuaꞌ a lahenda nara. Maulu na, ria boe sama-sama noo au nalalaꞌo Ramatuaꞌ a nonoi-tataon.\x + \xo 4:7 \xt Lahenda Nadedenuꞌ ara Tutuin 20:4; 2 Timotius 4:12\x*  
\v 8 Au adenu ni, fo ana bisa neu natetea emi dale mara, ma bisa tui emi laꞌeneuꞌ ami nai ia.\x + \xo 4:8 \xt Efesus 6:21-22\x*  
\v 9 Au adenu Onesimus fali, fo tuka noo ni boe. Onesimus nana, toranoo susueꞌ fo dite-tama nahere. Ria nana, emi lahendam. Sira dua, neuꞌ ko tui emi laꞌeneuꞌ basa hata fo dadiꞌ nai ia so a.\x + \xo 4:9 \xt Filemon 10-12\x*   
\p
\v 10 Aristakus haitua fee emi haraoe soda-moleꞌ. Ara ena ni nai bui a, sama-sama no au. Barnabas toranoo na anan fo, nade Markus haitua haraoe soda-moleꞌ boe. Maulu na, au helu memaꞌ emi ae, maneniko Markus mai dama emi, sona sipoꞌ ana no malole.\x + \xo 4:10 \xt Lahenda Nadedenuꞌ ara Tutuin 19:29; 27:2; Filemon 24; Lahenda Nadedenuꞌ ara Tutuin 12:12, 25; 13:13; 15:37-39\x*  
\v 11 Yesus, (fo taloo ni tae, “Yustus”) ana haitua fee emi haraoe soda-moleꞌ boe. Neme basa tia-lai fo sama-sama ralalaꞌo Manetualain nonoi-tataon, noi sira telu siꞌ dadi lahenda Saraniꞌ neme lahenda nusa Yahudi a mai. Ma sira siꞌ tao ratetea au dale ka.   
\p
\v 12 Emi tiam Epafras nai ia, ma ana haitua fee emi haraoe soda-moleꞌ boe. Ana dadi neuꞌ Yesus Kristus atan. Ana hule-haradoi naroo fee emi, ma hule fo Manetualain tao natetea emi namaherem, ma tao na emi bubuluꞌ matetuꞌ Ria hihii-nanaun.\x + \xo 4:12 \xt Kolose 1:7; Filemon 23\x*  
\v 13 Au afada memaꞌ emi ae, Epafras noi-tao sota nan seli fee emi, ma fee lahenda Saraniꞌ ara rai kota Laodikia ma kota Herapolis.   
\p
\v 14 Haraoe soda-moleꞌ neme Demas, no doter Lukas, fo riꞌ ita sue-lai!\x + \xo 4:14 \xt 2 Timotius 4:10, 11; Filemon 24\x*   
\p
\v 15 Au haitua haraoe soda-moleꞌ fee toranoo kamahereꞌ fo rai kota Laodikia. Bosoꞌ mafarene henin malosaꞌ au haraoe soda-mole ka fee Mama Nimfa no basa lahenda kamahereꞌ, fo biasa rabua rai uma na.   
\p
\v 16 Maneniko emi basa nai Kolose, lees basa susuraꞌ ia, sona haituan fee lahenda kamahereꞌ rai kota Laodikia, ela sira bisa lees boe. Ma emi muste lees susuraꞌ fo au parnaa haitua fee si so a.   
\p
\v 17 Mafarereneꞌ fee Arkipus mae, “O bosoꞌ mafarene henin malalaꞌo mabasa nonoi lakaꞌ, fo o sipo neme Ramatuaꞌ a mai so a.”\x + \xo 4:17 \xt Filemon 2\x*   
\p
\v 18 Bosoꞌ mafarene henin mae, ara bei ena au nai bui daleꞌ ia.  
\p Au hule fo Manetualain natudu dale malole Na neuꞌ emi.  
\p \it Au riꞌ lima-ree mata ki susuraꞌ ia\it*.  
\q2 \it Soda-moleꞌ neme au\it*,  
\q2 \it Paulus\it*.