\id 2TH  
\h 2 Tesalonika 
\toc1 Paulus susura kadua na fee lahenda kamahereꞌ fo rai kota Tesalonika 
\toc2 2 Tesalonika 
\toc3 2Tes 
\mt1 2 Tesalonika  
\mt2 Paulus susura kadua na  
\mt2 fee lahenda kamahereꞌ fo rai kota Tesalonika  
\c 1  
\s1 Soda-moleꞌ  
\p
\v 1 Au, Paulus ma nonoo kara Silas no Timotius, ami malosaꞌ haraꞌ soda-moleꞌ neuꞌ emi.  
\p Ami telu haitua susuraꞌ ia fee emi lahenda kamahereꞌ nai kota Tesalonika. Emi riꞌ here ao mara tuka Manetualain ita Aman, ma Yesus Kristus ita Ramatua na.\x + \xo 1:1 \xt Lahenda Nadedenuꞌ ara Tutuin 17:1\x*  
\v 2 Ami telu hule fo Ara ratudu dale malole nara reuꞌ emi, ela leoꞌ bea na emi bisa masoda no tetu-temaꞌ, mole-dame, ma tesatei-tamadaleꞌ.   
\s1 Paulus hule makasi neuꞌ Manetualain  
\p
\v 3 Toranoo kara emin! Muste ami hule makasi laꞌo naroo neuꞌ Manetualain, huu no emi boe-boe mamahere Ni, ma emi tamba masue-malai ao esa no esa.  
\v 4 Huu ria de, ami tui emi leleo-lalaꞌo mara neuꞌ Manetualain lahenda kamahereꞌ nara rai basa mamanaꞌ ara. Ami tui mae, emi manenete maroo, nai namahere mara daleꞌ, leo mae lahenda fekeꞌ ara ese-rumu rasususaꞌ emi.   
\p
\v 5 Basa ia ra natudu nae, neuꞌ ko Manetualain naetuꞌ emi dedea mara no matetuꞌ. Susa-lela fo besaꞌ ia emi lepa-masaa, tao na emi maraa dadi meuꞌ Ria anaraun ara. Ria riꞌ emi Maneꞌ ma.  
\v 6 Bosoꞌ bii, huu fo Manetualain tuka roo na. Mete leo! Neuꞌ ko, Ana balas lahenda fo tao doidoso emi a.  
\v 7 Ma, Ria boe fee emi hahae memeꞌ doidosoꞌ fo emi lepa-masaa a. Ria tao leo naꞌ fee ami boe.  
\p Neuꞌ ko basa ia ra dadi, tepoꞌ fo Ramatua Yesus onda mai, sama-sama no eilaꞌo-limalope manakuasa nara reme nusatetu-ikutemaꞌ a mai.  
\v 8 Ara onda mai, roo ai-pilaꞌ bauinaꞌ. Boe ma Ana fee huhukuꞌ neuꞌ bea fo ta nau nalelaꞌ Manetualain, ma ta nau tuka Ramatua Yesus Tutui Malole Na.  
\v 9 Ana fee huhuku mabera neuꞌ basa si, losaꞌ ralulutuꞌ losa doo-doo na neu. Ana usi heni si remeꞌ mata Na mai, de ara ta rameda rita Ria kuasa marela-masaꞌa Na soꞌ.\x + \xo 1:9 \xt Yesaya 2:10\x*  
\v 10 Tepoꞌ fo Ana mai, basa lahenda kamahereꞌ ara, soꞌu radedema nade Na ma fee hada-horomata neuꞌ Ana. Neuꞌ ko emi boe nai lahenda kamahereꞌ ara talada, nana huu emi sipoꞌ ma Tutui Malolen fo fai maneuꞌ ara ami tui-bekan neuꞌ emi so a.   
\p
\v 11 Huu ria na, ami hule-haradoi fee emi laꞌo naroo, ela Manetualain tao emi meuꞌ lahenda fo raadaleꞌ-toꞌeteiꞌ. Ami boe hule fo Ana fee kuasa Na neuꞌ emi, ela bisa tao basa hihii-nanauꞌ malole, tuka hata fo emi maetuꞌ nau tao ni, ma hata fo emi mamahere.  
\v 12 Maneniko emi masoda tuka enoꞌ ria, neuꞌ ko lahenda ra soꞌu radedema Ramatua Yesus Nade Na. Ma emi boe hapu iꞌioꞌ, nana huu emi tuka Ni. Basa ia ra reme ita Aman Manetualain ma Ramatua Yesus Kristus dale malole Na mai.   
\c 2  
\s1 Lahenda tadaluꞌ kahereꞌ esa muste mai naꞌuluꞌ besaꞌ ko Ramatua Yesus natafali mai  
\p
\v 1 Toranoo kara emin! Besaꞌ ia ami nau mafada emi laꞌeneuꞌ fai bea ita Ramatuan Yesus Kristus neuꞌ ko mai, ma laꞌeneuꞌ ita tabua too Ni.\x + \xo 2:1 \xt 1 Tesalonika 4:15-17\x*  
\v 2 Bosoꞌ mudaꞌ laesaꞌ hapu eedi-fufuleꞌ, fo moi patararaaꞌ a, maneniko lahenda rae Ramatuaꞌ a natafali mai so. Leo mae rae sira bubuluꞌ neme Dula-daleꞌ a, do ramanene neme lahenda do, ara hapu susuraꞌ neme ami mai, bosoꞌ mamahere si. Huu fo basa sira, nana dedea fufudiꞌ.  
\v 3 Bosoꞌ mataaꞌ lahenda tao ramakoa emi. Huu fo lahenda tadaluꞌ esa muste mai naꞌuluꞌ, besaꞌ ko Ramatua Yesus natafali mai. Lahenda ria soaꞌ tebe-tebe neuꞌ Ramatuaꞌ a, losaꞌ tao na lahenda dodouꞌ soaꞌ Ana boe. Lahenda ria, memaꞌ talalu naan seli! Huu ria na de, naraa ana masoꞌ leo tasi ai pilaꞌ a neu.  
\v 4 Ana tao aon dema lena basa hata fo lahenda soko-taku ma soaꞌ basa hata fo lahenda doꞌo-tabe neuꞌ asa, losaꞌ ana masoꞌ leo Uma Mamaso Inaꞌ daleꞌ neu, boe ma ana fapa ara na nae, “Au ia, Manetualain!”\x + \xo 2:4 \xt Daniel 11:36; Yeskial 28:2\x*   
\p
\v 5 Emi mafarene, do taꞌa? Fai maneuꞌ ara au afada memaꞌ emi so, laꞌeneuꞌ lahenda tadaluꞌ ria, tepoꞌ fo au bei sama-sama oo emi a, hete?   
\p
\v 6 Besaꞌ ia lahenda tadaluꞌ ria ta ledo-fai natudu aon fa, nana huu hapu esa riꞌ namakee ni. Emi boe bubuluꞌ ubeaꞌ riꞌ namakee ni.  
\v 7 Besaꞌ ia lahenda tadaluꞌ ria noi-tao nafufuniꞌ, nana huu bei hapu esa namakee ni. Tehuu neuꞌ ko manamamakeeꞌ ria napoꞌi lima na.  
\v 8 Boe ma lahenda tadaluꞌ ria toda mai de ana mulai noi-tao ledo-ledo. Tehuu tepoꞌ fo Ramatua Yesus natafali mai no rela-saꞌan, Ana nalulutuꞌ lahenda tadaluꞌ ria, neniꞌ noi dedeaꞌ esaꞌ a.\x + \xo 2:8 \xt Yesaya 11:4\x*   
\p
\v 9 Tehuu, tepoꞌ fo Ramatua Yesus beita mai, nitu ra malaka na, fee kuasa bauinaꞌ neuꞌ lahenda tadaluꞌ ria, fo ana bisa tao tanda heran rupaꞌ ara, losaꞌ lahenda ra afi rae, ana pake Manetualain kuasa Na.\x + \xo 2:9 \xt Mateos 24:24\x*  
\v 10 No ria na, lahenda dodouꞌ hapu eedi-fufuleꞌ neme lahenda tadaluꞌ ria napuputa na mai. Sira, nana neuꞌ ko bika-bati reme Manetualain mai. Ana soi enoꞌ fo nau fee si rasoda, tehuu ara tipa heni Ria duduaꞌ-aafi malole Na, ma ta nau ramahere neuꞌ nanori matetuꞌ a fa.  
\v 11 De Manetualain ena etu dale nara reme aafi roo-tetuꞌ a mai, ela ara ramahere neuꞌ basa mapuputaꞌ ara.  
\v 12 No enoꞌ ria, Manetualain fee si hapu huhuku mabera, nana huu ara ta nau ramahere neuꞌ nanori roo-tetuꞌ. Huu fo ara rahiiꞌ tao noi tadaluꞌ a.   
\s1 Lahenda kamahereꞌ ara muste ranenete rahere  
\p
\v 13 Toranoo kara emin! Ami muste hule makasi maroo neuꞌ Manetualain, nana huu Ana sue-lai emi. Ana bei ta adu na dae-bafoꞌ ia, tehuu Ana naetuꞌ memaꞌ so, fo fee emi soda-moleꞌ manabasa taꞌa. Boe ma Ana fee Dula-dale Na tao nalalao emi, nana huu mamahere nanori roo-tetuꞌ.  
\v 14 Tepoꞌ fo ami tui-beka Tutui Malole a neuꞌ emi, Manetualain pake Tutui Malole ria, fo naloo emi mameda mita Ramatua Yesus Kristus rela-saꞌan.   
\p
\v 15 Toranoo kara emin! Manenete maroo ma homu matalolole basa nanoriꞌ fo ami mafada emi a. Boe ma mafarereneꞌ neuꞌ basa-basan fo ami duiꞌ a.   
\p
\v 16-17 Ami hule-haradoi maroo neuꞌ Manetualain, ita Aman, ma Yesus Kristus, ita Ramatua na. Ami hule fo Ara ratetea emi dale mara, ela emi tao basa hihii-nanauꞌ malole ra. Ami hule leo naꞌ, nana huu ami bubuluꞌ mae, Ramatuaꞌ a sue na ita basa seli. Huu no Ria dale malole Na, de Ana ta hahae natetea ita dale nara. No enoꞌ ria, ita bisa tamahena taroo neuꞌ Ana.   
\c 3  
\s1 Paulus hule neuꞌ lahemda kamahereꞌ fo rai kota Tesalonika ela hule-haradoi fee si  
\p
\v 1 Toranoo kara emin! Bosoꞌ mafarene henin, hule-haradoi fee ami. Hule-haradoi, ela leoꞌ bea na lahenda fo sudi rai bea lai-lai ramanene Ramatuaꞌ a Tutui Malole Na ma fee hada-hormata neuꞌ Tutui Malole ria, sama leoꞌ tepoꞌ fo emi sipo a.  
\v 2 Ma hule-haradoi boe, fo ela leoꞌ bea na ami poꞌi memeꞌ mana tao nahuu-nalenaꞌ ara, ma lahenda tadalu fekeꞌ ara, huu fo ta basa lahenda ra ramahere Tutui Malole ria.   
\p
\v 3 Tehuu, Ramatuaꞌ a hopu nahere Hara-dasin. De, Ana bisa natetea emi dale mara, ma nanea emi neme tadaluꞌ ara mai.  
\v 4 Ami boe mamahere mae, Ramatua Yesus neuꞌ ko nafofoa emi dale mara boe, losa emi tuka hata fo ami mafadan so. Ma neuꞌ ko emi tao leo naꞌ losa doo-doo na neu.   
\p
\v 5 Ami hule Ramatua Yesus napipipi-nalalaꞌo emi, ela boe-boe malelaꞌ mae, Manetualain sue-lai emi, losa bisa manenete nai doidoso daleꞌ, sama leoꞌ fai maꞌuluꞌ a Kristus nanenete nai doidoso Na daleꞌ.   
\s1 Basa lahenda ra muste roi-tao, bosoꞌ aomataꞌ  
\p
\v 6 Toranoo kara emin! Au fee nafarereneꞌ memaꞌ neuꞌ emi pake Ramatua Yesus Kristus kuasa Na. Bosoꞌ mabua mo lahenda kamahere aomataꞌ ara, huu fo ara ta tuka natutuduꞌ neme ami nonoi-tataom mai.  
\v 7 Emi basa bubuluꞌ mae, emi muste hai natutuduꞌ tuka ami leleo-lalaꞌo mara, tepoꞌ fo ami bei leo mo emi a. Ami ta tutuꞌu hihiiꞌ ledo-fai esa boeꞌ. Emi mita mataꞌ so.  
\v 8 Ami moi-tao sota maan seli hatu-leledon, fo ela leoꞌ bea na ami bosoꞌ tao maheta emi. Ami boe ta parna sipo hihiiꞌ lahenda nanaa-ninimun fa.  
\v 9 Ami ia nana, Ramatuaꞌ a lahenda mana noi nara. De, ami manuu hak, fo hule sudi hata ubeaꞌ nemeꞌ emi mai. Tehuu ami ta nau pake hak ria fa. Ami mae tao nonoi-tatao malole ela emi tao tuka.  
\v 10 Fai maneuꞌ ara ami foa ela hohoro-lalaneꞌ neu emi so nae, “Bea ta noi-tao, sona ta bole naa-ninu fa.”   
\p
\v 11 Ami hapu haraꞌ rae, ruma reme emi mai soa noi rorolo dae a, ta nau roi-nonoiꞌ fa. Sosoa nara noi sososoꞌ leo lahenda uman daleꞌ reu.  
\v 12 Lahenda rupa leo naꞌ ara, ami fee si nafarereneꞌ, pake Ramatua Yesus Kristus kuasa Na, ela ara hahae rorolo daeꞌ a. Malole lenaꞌ, ara mulai roi-nonoiꞌ, fo saka nanaaꞌ reniꞌ sira pusetiti nara.   
\p
\v 13 Toranoo kara emin! Bosoꞌ aomata tao malole, ee!   
\p
\v 14 Tanda matalolole lahenda fo ta nau tuka hata fo ami duiꞌ ana nai susuraꞌ ia daleꞌ. Bosoꞌ tao daleꞌ neuꞌ asa, ela ara maeꞌ.  
\v 15 Tehuu bosoꞌ tao si sama leoꞌ emi musunoo mara. Masaꞌai si no malole sama leoꞌ emi toranoo boki mara.   
\s1 Paulus duiꞌ nateꞌe susura na  
\p
\v 16 Ramatuaꞌ a nana, Mane Mole-dame. Au hule fo Ana bati fee emi Ria mole-dame Na, nai basa hihii-nanauꞌ ara. Ma au hule Ramatuaꞌ a sama-sama no emi laꞌo naroo.   
\p
\v 17 \it Dedea mateꞌe aoꞌ ia, au duiꞌ mata ki, ela emi bubuluꞌ mae, susuraꞌ ia tebe-tebe nemeꞌ au mai. Basa susuraꞌ fekeꞌ ara au tao si leo naꞌ boe\it*.\f + \fr 3:17 \ft Lahenda malela Susura Makamoiꞌ a nae, Paulus biasa pake manaduiꞌ fo duiꞌ ria susura nara. Tehuu, ana duiꞌ matan ruma boe. Ela lahenda bubuluꞌ, susuraꞌ ria nana huu, ta lahenda fekeꞌ dui pake ria nade na.\f*   
\p
\v 18 Au hule fo ita Ramatuan Yesus Kristus natudu dale malole Na, neuꞌ emi basa.  
\q2 Susuraꞌ ia teꞌe adaꞌ ia,  
\q2 Paulus