\id 2CO  
\h 2 Korintus 
\toc1 Paulus susura kadua na soaneuꞌ lahenda kamahereꞌ rai kota Korintus 
\toc2 2 Korintus 
\toc3 2Kor 
\mt2 Paulus susura kadua na  
\mt2 soaneuꞌ lahenda kamahereꞌ rai kota Korintus  
\mt1 2 Korintus  
\c 1  
\s1 Soda-moleꞌ  
\p
\v 1 Susuraꞌ ia neme au, Paulus. Manetualain nadenu au leo basa mamanaꞌ ara uu, ela afada lahenda ra laꞌeneuꞌ Yesus Kristus, fo riꞌ Manetualain tudu memaꞌ ana neme uluꞌ mai. Ita fadin Timotius nai ia boe. Ana haitua haraoe soda-moleꞌ.  
\p Au duiꞌ susuraꞌ ia fee basa lahenda kamahereꞌ fo biasa rabua rai kota Korintus, ma rai propinsi Akaya.\x + \xo 1:1 \xt Lahenda Nadedenuꞌ ara Tutuin 18:1\x*  
\v 2 Au hule-haradoi neuꞌ Manetualain, ita Aman, ma Yesus Kristus, ita Ramatua na. Au hule fo Ara ratudu Sira dale malolen neuꞌ emi, ela emi bisa masoda no tetu-temaꞌ, mole-dame, ma tesatei-tamadaleꞌ.   
\s1 Paulus hule makasi neuꞌ Manetualain  
\p
\v 3 Ami mahiiꞌ basa lahenda ra io-oa Manetualain nade Na. Huu fo Ria nana, ita Ramatuan Yesus Kristus Papa Na. Basa dale kasian a raoka-rasamu remeꞌ Ria mai, ma Ria riꞌ nahiiꞌ natetea ita dale na.  
\v 4 Maneniko ita hapu susa-lela, sona Ria riꞌ ooe-nanasi ita. Huu ria na, de ita bisa ooe-nanasi lahenda fekeꞌ fo riꞌ hapu susa-lela. Ita bisa tatetea sira dale nara, sama leoꞌ Manetualain natetea ita dale nara boe.  
\v 5 Kristus hapu susa-lela dodouꞌ nana huu ita. Huu no Kristus doidoso na, de maneniko ita hapu susa-lela, sona Ria Papa Na boe-boe natetea ita dale na.  
\v 6 Maneniko ami nai ia hapu susa-lela, sona Manetualain natetea ami dale mara. Ma kalu ami hapu susa-lela, boe ma manenete no dale loaꞌ, sona emi boe muste bubuluꞌ mae, Manetualain pake enoꞌ ria ela natetea emi dale mara, ma poꞌi-tata na emi meme tadaluꞌ a mai. Maneniko emi hapu susa-lela sama leoꞌ ami, sona Manetualain natetea emi dale mara, ela emi boe bisa manenete noo dale loaꞌ.  
\v 7 Huu ria na, de ami mamahere mae, emi bisa manenete ma ta keke-boiꞌ fa. Huu fo ami bubuluꞌ mae, maneniko emi hapu susa-lela sama leoꞌ ami, sona Manetualain natetea emi dale mara, sama leoꞌ Ana natetea ami dale mara boe.   
\p
\v 8 Toranoo kara! Ami nau, emi bubuluꞌ matetuꞌ laꞌeneuꞌ susa-lela fo parnaa ami hapun nai propinsi Asia. Ami mameda man beraꞌ a, lena neme ami bisa lepan. Losaꞌ ami makate ma mopon, nana huu ami dodoo man noonoꞌ nae ami mate.\x + \xo 1:8 \xt 1 Korintus 15:32\x*  
\v 9 Ami mameda maan beraꞌ a, sama leoꞌ lahenda esa besaꞌ ko namanene mana ee dedeaꞌ a naetuꞌ huhuku mamates soaneuꞌ ana. Tehuu basa sira dadi, fo ela ami mamahere Manetualain, ma ta mamahere neuꞌ ami ao-ina mara. Huu fo Manetualain riꞌ nanuu kuasa, de fee lahenda mana mateꞌ ara rasoda seluꞌ.  
\v 10 Fai fo ami kura baiꞌ mate a, Ria riꞌ poꞌi-tata na ami meme tadaluꞌ a mai \it so\it*. Neuꞌ ko Ana \it nau\it* poꞌi-tata na ami meme tadaluꞌ a mai boe. Ami mamahena mahere mae, neuꞌ ko Ana poꞌi-tata na ami \it laꞌo naroo\it* meme hihii-nanauꞌ tadaluꞌ ara mai.  
\v 11 Maneniko emi hule-haradoi maroo fee ami, ria boe tutulu-fafaliꞌ neuꞌ ami, huu fo Manetualain sipoꞌ emi huhule-haradoim ma natudu dale malole Na neuꞌ ami. Ana nau tao leo naꞌ, nana huu lahenda dodouꞌ hule-haradoi fee ami. Boe ma fai fo lahenda dodouꞌ rafarene hata fo Manetualain taon soaneuꞌ ami, neuꞌ ko sira boe hule makasi dodouꞌ neuꞌ Ana.   
\s1 Paulus helu nau dama lahenda Korintus ara, tehuu ubeaꞌ taon de ta dadi fa  
\p
\v 12 Ami bisa dedea bau-inaꞌ, nana huu ami bubuluꞌ nai ami dale ana boboko mara mae, ami tao hata ubeaꞌ nai dae-bafoꞌ ia, tuka Manetualain hihii-nanaun soaneuꞌ ami. Ami ta heoꞌ meme nonoi lakaꞌ ria mai, fo ela basa lahenda bisa rita ami moi-tao noo dale lalao-lalafuꞌ. Ami malalaꞌo nonoi-tatao mara, meniꞌ duduꞌa-aafi tandeꞌ\f + \fr 1:12 \ft Nai ia Paulus maksud na nae, ‘malelaꞌ a riꞌ tao na lahenda duꞌa-afi naruꞌ, de bubuluꞌ hihii-nanauꞌ, tuka Manetualain memete-rerelun’. No ria na ‘malelaꞌ’ ia ta nemeꞌ noi lahenda dodole na mai, tehuu neme Manetualain mai.\f* neme Manetualain mai, ta pake duduꞌa-aafi tandeꞌ fo ri naoka-nasamu nai dae-bafoꞌ a. Huu fo Manetualain natudu dale malole Na neuꞌ ami. De tepoꞌ fo ami sama-sama moo emi a, tebe-tebe ami saka enoꞌ fo moi-tao noo dale lalao-lalafuꞌ.  
\v 13 Au duiꞌ fee emi laꞌeneuꞌ noi basa hihii-nanauꞌ fo emi bisa lees ma bubuluꞌ. Besaꞌ ia emi bubuluꞌ au maksud ki ruma so. Tehuu au amahehenaꞌ, neuꞌ ko emi bubuluꞌ dodou inaꞌ bali.  
\v 14 Besaꞌ ia, emi bubuluꞌ noi baianaꞌ laꞌeneuꞌ ami. Tehuu maneniko ita Ramatuan Yesus Kristus natafali mai, neuꞌ ko au amahere ae emi bubuluꞌ dodouꞌ. No ria na, emi bisa dedea bau-inaꞌ laꞌeneuꞌ ami, sama leoꞌ ami boe dedea bau-inaꞌ laꞌeneuꞌ emi.   
\p
\v 15 Huu no au amahere ae emi bubuluꞌ hihii-nanau ia ra, de maulu na au parnaa aetuꞌ aan nau uu tiro-dama seluꞌ emi, fo ela emi bisa hapu ua-naleꞌ laiꞌ dua.  
\v 16 De maulu na au afi ae, maneniko au dadi leo propinsi Makedonia uu, sona au bisa tuli emi. Fai beaꞌ ma au fali emeꞌ Makedonia mai, au bisa tuli seluꞌ emi bali. No ria na, emi bisa tulu-fali au, fo bisa laꞌo aroo leo propinsi Yudea uu.\x + \xo 1:16 \xt Lahenda Nadedenuꞌ ara Tutuin 19:21\x*   
\p
\v 17 Au aetuꞌ ae uu dama emi a, ta dadi fa, de leo beaꞌ ia so? Fai bea ma afada ae, au ahiiꞌ uu dama emi, bate emi mae au bei aeesoꞌ, do? Do, emi bate mae au aetuꞌ hihii-nanauꞌ tuka noi au hihii-nanau mesa ka, sama leoꞌ lahenda fekeꞌ nai dae-bafoꞌ ia, do? Do, emi mae au lahenda masarole-masaraliꞌ, fo ahiiꞌ ae, “Yaa.” Sekona te, au duꞌa-afi nai dale ka ae, “Ta bisa fa!” Bate emi afi mae au rupa ka leo naꞌ, do?  
\v 18 Ita tamahere Manetualain, huu fo maneniko Ana dedea hihii-nanauꞌ esa, sona tantu Ana tao tukan. Huu ria na, de ami boe leo naꞌ. Maneniko ami dedea mae, “Yaa,” sona ami ta afi mae, “Taꞌa.”   
\p
\v 19 Au, Silas, ma Timotius tui-beka fee emi laꞌeneuꞌ Yesus Kristus Manetualain Ana Na, fo riꞌ ta lahenda masarole-masaraliꞌ fa, fo Ana dedea nae, “yaa”, tehuu maksud na nae “taꞌa”. Ria ta keke-boiꞌ, huu fo maneniko Ana dedea nae “yaa”, sona tebe-tebe maksud na nae “yaa”.\x + \xo 1:19 \xt Lahenda Nadedenuꞌ ara Tutuin 18:5\x*  
\v 20 Manetualain tantu tao natetuꞌ hata fo Ana helu a. Huu ria na, de maneniko Yesus helu hihii-nanauꞌ esa nae, “yaa”, ita bisa sipoꞌ tae, “Amin!” Nana huu ami bubuluꞌ memaꞌ Yesus tao natetuꞌ basa hihii-nanauꞌ sira. Ami mafada hihii-nanauꞌ ia ra, ela natudu Manetualain marela-masaꞌan.  
\v 21 Manetualain riꞌ teka-here emi moo ami. Ana soꞌu na ita dadi teuꞌ Ria lahendan, Ria riꞌ tao na ita tanenete taroo.  
\v 22 Ana fee Dula-dale Na ela ator ita, ma natudu basa hihii-nanauꞌ fo neuꞌ ko Ana fee ita. Ana fee Dula-dale Na leoꞌ na, sama leoꞌ lahenda tao ria eꞌe-dededen neuꞌ hata esa ela nafada nae, ria nuun.   
\p
\v 23 Au hule fo Manetualain riꞌ sakasii au dedea ka. Huu fo Ana bubuluꞌ au dale ka. Ana bubuluꞌ ubeaꞌ taon, de au bei ta dadi leo kota Korintus uu fa. Huu no au ta nau tao amamaeꞌ emi, de au bei ta leo naaꞌ uu fa.  
\v 24 Ami ta soꞌu-fua ao mara dadi malaka fo madenu emi mae, emi muste mamahere bea. Tehuu ami moi-tao sama-sama moo emi, fo ela emi mamahoꞌo-matadale. Emi bisa mapadei mahere, nana huu emi mamahere Manetualain.   
\c 2  
\p
\v 1 De au aetuꞌ basa ae, au bei ta nau uu dama emi, fo ela emi bosoꞌ dale hedi, nana huu au amanasa oo emi.  
\v 2 Maneniko au tao a emi dale hedi, sona bea riꞌ tao na au dale ka namahoꞌo bali? Noi emi riꞌ tao ma au dale ka namahoꞌo. Maneniko besaꞌ ia au eti, sona au tao a emi dale hedi.  
\v 3 De au ta uu dama emi fa, tehuu au haitua susuraꞌ fee emi, ela au afarereneꞌ fee emi laꞌeneuꞌ basa hihii-nanauꞌ sira. Maneniko au uu dama seluꞌ emi, sona emi bosoꞌ tao ma au dale hedi, nana huu emi nonoi-tatao tadalu mara. Matetu na, emi riꞌ tao ma au dale ka namahoꞌo. Ma au amahere ae, maneniko au dale ka namahoꞌo, sona emi dale mara boe ramahoꞌo.  
\v 4 Tehuu fai fo au duiꞌ susuraꞌ ia fee emi a, au dale ka hedis naan seli ma dola asa eꞌedu. Au haitua susuraꞌ ia nana, au ta saka enoꞌ fo tao a emi dale hedi, tehuu au tao leo naꞌ, ela emi bisa bubuluꞌ mae au sue a emi seli.   
\s1 Fee ampon neuꞌ lahenda sala-sikon  
\r (1 Korintus 5:1-13)  
\p
\v 5 Nai emi saraniꞌ ria, lahenda esa riꞌ tao na lahenda dodouꞌ dale nara susa. Au boe susa nana huu lahenda ria nonoi-tataon. Tehuu tao na au susa noi bai-anaꞌ, emi ruma riꞌ susa maan dodouꞌ.  
\v 6 Bosoꞌ boe au dedea dodouꞌ bali. Huu fo neme emi mai dodou rasaꞌai ni, de ana hahae so.  
\v 7 De besaꞌ ia, emi muste fee ampon neuꞌ ria sala-sikon, boe ma dedea matalolole moo ni. Bosoꞌ losa mopo ao masee na.  
\v 8 Huu ria na, au hule fo emi mabua moo ni, ela ana namehere nae, emi sue-lai neuꞌ ana.   
\p
\v 9 Bei lalaiꞌ ia au duiꞌ susura ka, fo sakaꞌ uji emi. Huu fo au nau bubuluꞌ emi tao malole, ma tao tuka basa-basan fo au pareta emi a.  
\v 10 Maneniko emi ta mapeda daleꞌ soꞌ, ma fee ampon neuꞌ lahenda sala-sikon, sona au boe tuka hata fo emi maetuꞌ a. Kalu ria nanuu salaꞌ fo parluu au feen ampon, sona au boe fee ampon neuꞌ lahenda ria sala-sikon. Au tao leo naꞌ nai Kristus matan, fo dadi conto malole soaneuꞌ emi.  
\v 11 Huu fo au ta ahiiꞌ nitu ra malaka na natuda ita, do naseki ita. Ita muste bubuluꞌ ria duduꞌa-aafi tadalu nara. De bosoꞌ emi momooꞌ pakanaaꞌ!   
\s1 Nai Troas Paulus dale na ta tama fa  
\p
\v 12 Maulu na, tepoꞌ fo au leo kota Troas uu a, Manetualain soi fee au enoꞌ nai naa, de tui-beka fee lahenda laꞌeneuꞌ Kristus Hara-dasin.  
\v 13 Tehuu au dale ka ta tama fa, nana huu au ta aneta oo toranoo ki Titus nai naa fa. De au ateꞌa lahenda kamahereꞌ ara rai Troas, boe ma au leo propinsi Makedonia uu.\x + \xo 2:13 \xt Lahenda Nadedenuꞌ ara Tutuin 20:1\x*   
\s1 Kristus riꞌ tao na ita taseki  
\p
\v 14 Tehuu leo mae au nai bea boe, au hule makasi dodouꞌ neuꞌ Manetualain. Huu fo Kristus natati soaꞌ hihii-nanau tadaluꞌ ara, boe ma Ana naseki, ma ita boe tabua-taesa too Ni. Huu ria na, de Manetualain natudu naroo nae, ita nana Ria lahendan. De, tepoꞌ fo ita tafada lahenda laꞌeneuꞌ Kristus, ria sama leoꞌ lahenda hae raa maboo-meniꞌ esa.  
\v 15-16 Maulu na, tepoꞌ fo lahenda Yahudi ra tao tutunu-hohotuꞌ, ria masu na ae leo Manetualain neu, de boo na tao namahoꞌo dale Na. Ita boe tuka Kristus, de ita sama leoꞌ boo-meniꞌ esa nai Manetualain matan. Tehuu soaneuꞌ lahenda ruma, sona ita sama leoꞌ boo-puruꞌ esa. Maneniko lahenda fo riꞌ rasoda dooꞌ a reme Manetualain mai, rita ita masoda na, ria tao naa si aafi rae, neuꞌ ko ara mate, ma bika-bati reme Manetualain mai. Tehuu soaneuꞌ lahenda ruma bali, ita sama leoꞌ boo-meniꞌ esa. Maneniko lahenda fo riꞌ hapu soda manaetu-manabasa taaꞌ a rita ita masoda na, sona ria tao naa si rafarene Kristus soi-tefa naa si, ma fee si sodaꞌ manaetu-manabasa taaꞌ a. Ta hapu lahenda dae-bafoꞌ esa bisa naboo-meni leo naꞌ nai Manetualain matan.   
\p
\v 17 Mafarereneꞌ, te ami ta leoꞌ lahenda fekeꞌ fo saka oꞌontoꞌ reniꞌ ara tui-beka Manetualain Hara-dasin, sama leoꞌ ara dagan Manetualain Hara-dasin. Taꞌa! Maneniko ami dedea, sona basa lahenda bisa rita ledo-ledo rae, ami manori-mafada noo dale lalao-lalafuꞌ. Ami dedea ma, naoka-nasamu neme Manetualain mai. Ma ami masoda mabua-maesa moo Kristus.   
\c 3  
\s1 Manetualain lahendan fo riꞌ ralalaꞌo Hehelu Bebeuꞌ  
\p
\v 1 Bosoꞌ mae, bate ami mulai dedea io ao ao-ina mara. Taꞌa! Bate mae ami sama leoꞌ lahenda fekeꞌ fo parluu meni susura isin fee emi, besaꞌ ko bisa malalaꞌo ami nonoi-tataom, do? Do, parluu ami hule susura isin neme emi mai, fo meni leo lahenda fekeꞌ neu? Taꞌa, hete?  
\v 2 Huu fo ami manuu susura isin so. Susuraꞌ ria nana riꞌ emi. Ami malelaꞌ hihii-nanauꞌ dodouꞌ laꞌeneuꞌ emi masoda ma. Hihii-nanauꞌ sira nanapedaꞌ nai ami dale mara. Basa lahenda bisa lees ra emi soda ma; neme naaꞌ mai, ara ralelaꞌ ami nonoi-tataom buna-boan.  
\v 3 Huu fo matetu na, emi sama leoꞌ susuraꞌ esa Kristus riꞌ duiꞌ, boe ma Ana fee ami homun. Kristus duiꞌ susuraꞌ ia ta neniꞌ tinta fa, tehuu Ana pake Manetualain Masodaꞌ a Dula-dale Malalao-malalafu Na. Kristus boe ta sura-duiꞌ Ria Hara-dasin nai batu lei, sama leoꞌ Manetualain duiꞌ fee Musa. Tehuu Ana duiꞌ nai ita dale masoda na.\x + \xo 3:3 \xt Kalua reme Masir 24:12; Yeremia 31:33; Yeskial 11:19; 36:26\x*   
\p
\v 4 Ami mamahere tebe-tebe neuꞌ Manetualain mae, memaꞌ basa hihii-nanauꞌ ia ra laꞌe, nana huu Kristus riꞌ natudu leo naꞌ.  
\v 5 Kalu neme noi ami ao-ina heheli mara mai, sona ami ta manuu kuasa fo bisa tao hata-hata esa boeꞌ. Kuasa ma hak fo nai ami, naoka-nasamu nai Manetualain.  
\v 6 Manetualain soꞌu na ami dadi meuꞌ Ria lahenda malalau-maoonon, ela mafada lahenda laꞌeneuꞌ Ria Hehelu Bebeuꞌ Na. Tehuu Ria Hehelu Bebeu Na, ta laꞌeneuꞌ lahenda tao tuka atoran rupaꞌ ara fa, tehuu laꞌeneuꞌ lahenda fo rabua-raesa roo Manetualain Dula-dale Malalao-malalafu Na. Maneniko lahenda ratukalele atoran a, sona ria sama leoꞌ mate dale nara, ma ta hapu soda matetu manaetu-manabasa taaꞌ a. Tehuu maneniko lahenda nabua-naesa noo Manetualain Dula-dale Na, ana hapu sodaꞌ matetuꞌ a.\x + \xo 3:6 \xt Yeremia 31:31\x*   
\p
\v 7 Fai a ulu na, tepoꞌ fo Manetualain sura-duiꞌ Ria Atoran na nai batu lei ra, tebe marela-masaꞌa. Leo mae lehenda tao tuka Atoran sira katemaꞌ, tehuu fai fo ara mate, neuꞌ ko bika-bati reme Manetualain mai. Tepoꞌ fo Musa sipo na Atoran sira a, ria mata-idun nahaa ledo-ledo. Huu ria na, de lahenda Israel ara mata nara rahiaꞌ. Tehuu doo-doo boe ma makaledoꞌ ria mopon.\x + \xo 3:7 \xt Kalua reme Masir 34:29\x*  
\v 8 De, maneniko manaduiꞌ nai batu a, bisa marela-masaꞌa leoꞌ na, sona hata fo Manetualain Dula-dale Na peda-fuan nai ita dale na a, leo beaꞌ bali? Tantu lena bali, hete?  
\v 9 Atoran ria isi-liin nae, neuꞌ ko ita hapu huhuku mamates, de bika-bati teme Manetualain mai, nana huu ita ta tao tuka atoran sira katemaꞌ. Leo mae leoꞌ na, tehuu Atoran ria bei rela-saꞌa nahere. Tehuu Manetualain Dula-dale Na narela-nasaꞌa lena bali, huu fo Ana natudu enoꞌ ela ita bisa malole seluꞌ too Manetualain.  
\v 10 De, Atoran fo riꞌ fai a ulu na lahenda rae kahereꞌ a, besaꞌ ia ta talalu kahereꞌ soꞌ, huu fo besaꞌ ia esa marela-masaꞌa lena so.  
\v 11 Atoran sira narela-nasaꞌa, sama leoꞌ fai a ulu na baꞌi Musa mata-idun nahaa, basa besaꞌ ko haaꞌ ria mopon. Musa, ma Atoran ria marela-masaꞌa, tehuu lena ria bali a, nana riꞌ marela-masaꞌa manaetu-manabasa taaꞌ a.   
\p
\v 12 Ami basa mamahere mae, Manetualain Hehelu Bebeu Na ta moi-mosa fa. Huu ria na, de ami dedea ledo-ledo, ta pake bibila-babaaꞌ fa.  
\v 13 Ami ta parluu tao sama leoꞌ baꞌi Musa. Huu fo ria muste poti etu mata-idun pake temaꞌ, fo ela kalu haaꞌ ria mopon boe, lahenda Israel ara ta bisa rita fa.\x + \xo 3:13 \xt Kalua reme Masir 34:33-35\x*  
\v 14 Tehuu Manetualain tao na lahenda Israel ara duduꞌa-aafi tukuꞌ. Huu fo losaꞌ besaꞌ ia, maneniko ara lees nai Manetualain Susura Makamoi Na, laꞌeneuꞌ Ria Hehelu Paraa Na, sona nonooꞌ leoꞌ temaꞌ esa poti etu laka nara, de ara ta nau ramanene, ma ta nau bubuluꞌ fa. Noi Kristus riꞌ buka-soi sira dale nara, ela ara bisa bubulu-ralelaꞌ. Ta hapu lahenda fekeꞌ soꞌ.  
\v 15 Losaꞌ besaꞌ ia boe, maneniko lahenda Yahudi ra lees baꞌi Musa susura na, sona ramanene, tehuu ara ta bubuluꞌ matetuꞌ fa. Ria sama leoꞌ hata esa napoti etu dale nara, de ta nau ramanene fa.   
\p
\v 16 Tehuu maneniko lahenda fo mulai namahere ita Ramatuan Yesus Kristus, sona Kristus buka-soi lahenda ria dale na, ela ana bisa bubuluꞌ matetuꞌ. Ria sama leoꞌ manaduiꞌ nai Manetualain Susura Makamoi Na nae, “Ana buka heni temaꞌ fo riꞌ nanapotiꞌ nai ria mata-idun.”\x + \xo 3:16 \xt Kalua reme Masir 34:34\x*  
\v 17 Nai Manetualain Susura Makamoi Na, fai fo baꞌi Musa dedea nae, “Ramatuaꞌ”, ria maksud na nae, Manetualain Dula-dale Na. Maneniko ita hapu Dula-daleꞌ ria, sona Ana poꞌi-tata na ita.  
\v 18 No ria na, Ana tao na ita boe-boe dadi sama leoꞌ Ramatua marela-masaꞌa. Huu fo ita mata-idun ta nanapotiꞌ soꞌ, tehuu ita duꞌa-afi taroo laꞌeneuꞌ ita Ramatuan marela-masaꞌan. Ramatuaꞌ a Dula-dale Na riꞌ tulu-fali ita leo naꞌ.   
\c 4  
\s1 Hata-heto mabeli fo nanapedaꞌ nai ure dae daleꞌ  
\p
\v 1 Manetualain natudu dale kasian na neuꞌ ami so, de Ana nadenu ami, fo mafada lahenda laꞌeneuꞌ Ria Hehelu Bebeu Na. Huu ria na, de ami makate maroo.  
\v 2 De neme uluꞌ mai ami maetuꞌ maan kalu ami ta nau tao hihii-nanauꞌ tadaluꞌ, sama leoꞌ lahenda fekeꞌ ara. Ara rahiiꞌ tao rafufuniꞌ, fo ela bosoꞌ lahenda rita, ma sira ta maeꞌ boeꞌ. Tehuu ami ta nau mapuputaꞌ lahenda. Ami ta dedea fufudiꞌ laꞌeneuꞌ Manetualain Hara-dasin, tehuu ami manori-mafada neuꞌ loan hata roo-tetuꞌ a. No ria na, basa lahenda bisa parisaꞌ ami nanori-nafadam nai Manetualain matan, boe ma uku-sudi ao nara ami lahenda rupa ubeaꞌ.  
\v 3 Maneniko Manetualain Tutui Malolen fo riꞌ ami tui-bekan a, lahenda ta nau bubuluꞌ ana, sona neuꞌ ko ara ralulutuꞌ, huu fo sira bika-bati reme Manetualain mai.   
\p
\v 4 Nitu ra malaka na, sama leoꞌ ramatuaꞌ esa rian, de besaꞌ ia lahenda ra doꞌo-taben. Ana tao na lahenda ruma duduꞌa-aafi nara tukuꞌ, sama leoꞌ poke dale nara so. Sira nana siꞌ lahenda fo ta ramahere ita Manetualain roo-tetuꞌ a. Huu no poke si, de ria sama leoꞌ ara ta bisa rita Manetualain makaledo na. Huu ria na, de ara ta bisa bubuluꞌ Tutui Malole laꞌeneuꞌ Kristus. Sira boe ta bubuluꞌ Kristus marela-masaꞌa Na. Kristus nana, rupa-loleꞌ esa noo Manetualain.  
\v 5 Ami ta dedea dodouꞌ laꞌeneuꞌ ami ao-ina heheli mara. Tehuu ami dedea dodouꞌ laꞌeneuꞌ Yesus Kristus, ita Ramatua na. Ami dedea dodouꞌ laꞌeneu ami ao-ina heheli mara nana noi riꞌ: ami tao ao mara sama leoꞌ ata fo malalau emi, nana huu ami dadi meuꞌ Yesus lahendan.  
\v 6 Fai a ulu na, parnaa Manetualain dedea nae, “Makaledoꞌ a muste nahaa nai mamana maiuꞌ a.” Boe ma Ana tao na Ria makaledo Na, nahaa nai ita dalen. Huu fo Ana nahiiꞌ fee ita Ria makaledo Na. Ria sosoa na nae, fai fo ita duꞌa-afi laꞌeneuꞌ Kristus, ita boe tafarene Manetualain marela-masaꞌan.\x + \xo 4:6 \xt Tutui Masososaꞌ 1:3\x*   
\p
\v 7 Leo mae ami nana noi lahenda biasa, tehuu Manetualain peda-fua hata-heto mabeli ia nai ami dale mara. Ria sama leoꞌ lahenda esa peda hata-heto mabeli na, nai ure dae daleꞌ. Hata-heto mabeli ia, riꞌ Manetualain makaledo na. Matetu na riꞌ, kuasa kahereꞌ fo nai ami a, ta naoka-nasamu neme ami, tehuu naoka-nasamu neme Manetualain mai.  
\v 8 De, leo mae lahenda tao rasususaꞌ ami nai basa mamanaꞌ ain, tehuu ami manenete maroo. Leo mae ami ta bubuluꞌ basa-basan, tehuu ta mopo ami makate ma fa.  
\v 9 Leo mae lahenda tao rasususaꞌ, tehuu Manetualain ta foa ela ami mesaꞌ kami fa. Leo mae lahenda ese-rumu ami, tehuu ara ta bisa ralulutuꞌ ami fa.  
\v 10 Huu no ami hapu eese-rurumu rupaꞌ ara, de ami leo beaꞌ meu, sona ami bisa mafarereneꞌ fee lahenda mae, fai fo Yesus mate a, Ana hapu eese-rurumuꞌ dodouꞌ boe. Leo mae lahenda ese-rumu ami rupaꞌ ara, tehuu ami masoda maroo. Ria boe fee nafarereneꞌ nae, Yesus leo nahere nai ami ao-ina mara daleꞌ.  
\v 11 Tebe! Laiꞌ dodouꞌ ami fo riꞌ bei masoda ia a, kura baiꞌ mate, nana huu ami dadi meuꞌ Yesus lahendan. No ria na, basa lahenda bisa bubuluꞌ rae, Yesus fee ami masoda matetuꞌ, leo mae neuꞌ ko ami mate.  
\v 12 De, leo mae neuꞌ mateꞌe na ami mate, tehuu ami ta biiꞌ dedea laꞌeneuꞌ Kristus. Ami sadia mate leoꞌ na, fo ela emi bisa hapu soda matetuꞌ.   
\p
\v 13 Manaduiꞌ nai Manetualain Susura Makamoi Na daleꞌ nae, “Huu no au amahere Manetualain, de au dedea.” Ami duduꞌa-aafim boe, sama. Huu no ami mamahere Manetualain, de ami muste mafada lahenda laꞌeneuꞌ Ana.\x + \xo 4:13 \xt Sosoda Iꞌio-oꞌoaꞌ ara 116:10\x*  
\v 14 Ami bubuluꞌ mae, Manetualain riꞌ fee ita Ramatuan Yesus Kristus nasoda seluꞌ neme mamate na mai. Ria boe neuꞌ ko fee ita tasoda seluꞌ, nana huu ita tabua-taesa too Yesus. Neuꞌ ko Manetualain fee ita basa tapadei nai Ria mata Na, fo Ana sipoꞌ ita.  
\v 15 Manetualain tao basa hihii-nanauꞌ ia ra, ela tulu-fali emi. Ria boe nau natudu dale malole Na neuꞌ lahenda fo riꞌ tuka-tuka faiꞌ tamba dodouꞌ laꞌo naroo. Neuꞌ ko ara hule makasi dodouꞌ neuꞌ Ana. No ria na, ara manaku Ria marela-masaꞌan.   
\s1 Ita tamahere taroo Manetualain  
\p
\v 16 Huu ria na, de ita tanenete taroo, ma ta mopo makateꞌ a. Leo mae ita ao-paa na ta nabebeꞌi soꞌ, tehuu Manetualain natetea ita dale na tuka-tuka faiꞌ.  
\v 17 Tuka ita dale dodoo-tatain, besaꞌ ia ita hapu susa-lela rupaꞌ ara. Tehuu ita muste tafarene tae, neuꞌ ko Manetualain nadedema ita. Huu ria na, ita tao ita susa-lelan sira sosoa-raraa taaꞌ, kalu tararaaꞌ ana noo hata fo neuꞌ ko mori-dadi!  
\v 18 De ita muste mete-relu basa hihii-nanauꞌ fo ta nananitaꞌ. Bosoꞌ mete-relu noi hihii-nanauꞌ fo nananitaꞌ. Huu fo hihii-nanauꞌ nananitaꞌ a, adaꞌ noi hate mataꞌ. Tehuu basa hihii-nanauꞌ fo ta nananitaꞌ, nana manaetu-manabasa taaꞌ.   
\c 5  
\p
\v 1 Ita bubuluꞌ, ita ao-paan fo besaꞌ ia nai dae-bafoꞌ a, sama leoꞌ mamana leleo-naparasaꞌ esa. Leo mae ita ao-paa na neuꞌ ko nalulutuꞌ, tehuu ita dale na bosoꞌ dodaꞌ, nana huu Manetualain sadia fee ita mamana malole esa nai nusatetu-ikutemaꞌ a. Lahenda dae-bafoꞌ a ta tao mamanaꞌ ria fa, tehuu Manetualain riꞌ taon. Mamanaꞌ ria manaetu-manabasa taaꞌ.  
\v 2 Ita sotaꞌ noo ita ao-paa besaꞌ ia na, nai dae-bafoꞌ a. Ma ita tahiiꞌ pake ao-paa bebeuꞌ nai nusatetu-ikutemaꞌ a.  
\v 3 Maneniko ita losa nai naa, ria sama leoꞌ ita ta poꞌiraoꞌ huu fo ita ta dadi adaꞌ noi dula-daleꞌ, tehuu ita hapu ao-paa bebeuꞌ nai naa.\f + \fr 5:3 \ft Duduiꞌ Yunani ruma manaduiꞌ nae, “pake bua-loas”. Tehuu ruma bali manaduiꞌ nae, “olu heni bua-loas”.\f*  
\v 4 Ita ao-paan fo riꞌ neuꞌ ko nalulutuꞌ a, tao na ita hela hahaeꞌ ara, nana huu tameda tan beraꞌ a. Leo mae leoꞌ na, tehuu ita ta nau mate, boe ma ta tanuu ao-paaꞌ soꞌ. Taꞌa! Ita nau hapu ao-paa bebeuꞌ, fo ela kati ao-paa paraaꞌ, neniꞌ sodaꞌ roo-tetu bebeuꞌ.  
\v 5 Manetualain riꞌ tao na ita sadia sipo sodaꞌ bebeuꞌ ria. Ana fee ita Ria Dula-dale Na boe, fo dadi napepedaꞌ esa neme Ria Hehelu Na mai.   
\p
\v 6 Huu ria na, de ita tamahere taroo tae, ita sodaꞌ ao-paa besaꞌ ia na bei ta nabua-naesa no Manetualain.  
\v 7 De ita tasoda nana huu tamahere neuꞌ Manetualain. Ita ta tasoda nana huu hata fo ita bisa titan nai dae-bafoꞌ ia.  
\v 8 Tehuu ita tamahere tae, uniꞌ ko leo ita mate foa ela ita ao-paa besaꞌ ia na, fo teu tasoda sama-sama too Manetualain nai nusatetu-ikutemaꞌ a, sona tantu ita tamahoꞌo tan seli.  
\v 9 De leo mae ita tasoda taroo nai dae-bafoꞌ ia do, ita mate nai ia ela tasoda nai ele, penting a, nana riꞌ ita saka enoꞌ fo tao tamahoꞌo taroo Manetualain dale Na. Ita hihii-nanaun ria.  
\v 10 Bosoꞌ mafarene henin. Losa bea oo, basa lahenda ra muste reu rasare Kristus. Ria nana Mana Ee Dedeaꞌ, de uku-sudi basa lahenda masodan nai dae-bafoꞌ ia. Neuꞌ ko Kristus balas lahenda natetu-naraa noo ria nonoi-tataon. Huu fo Kristus bubuluꞌ, lahenda ria tao malole do, tao tadaluꞌ.\x + \xo 5:10 \xt Roma 14:10\x*   
\s1 Ita bisa malole too Manetualain, nana huu Kristus  
\p
\v 11 Huu no ami mafarene mae, neuꞌ ko Kristus parisaꞌ ami masoda ma, de ami biiꞌ ma fee hada-horomata neuꞌ Ana. Ma ami moi-tao sota man seli, fo leleꞌo lahenda ela ara bisa ramahere Kristus. Manetualain bubuluꞌ ami dale mara lalao-lalafuꞌ. Au nau emi boe bubuluꞌ ami dale mara lalao-lalafuꞌ.  
\v 12 Ami ta io ao mara nai emi matam fa. Tehuu ami mafada ami nonoi-tatao roo-tetum ela emi pake ni dadi neteꞌ, fo emi bisa dedea bau-inaꞌ laꞌeneuꞌ ami, ma bosoꞌ bii-maeꞌ. No ria na, emi bisa mataa lahenda bafa maloa sira. Huu fo ara raloloa bafa nara laꞌeneuꞌ nonoi-tataoꞌ fo riꞌ lahenda bisa rita, sekona te sira dale nara ta lalao-lalafuꞌ.  
\v 13 Leo mae emi mae ami kamuluꞌ, tehuu ami tao leo naꞌ, ela ami malalaꞌo Manetualain nonoi-tataon. Leo mae emi ta bubuluꞌ, tehuu Manetualain bubuluꞌ. Maneniko ami dedea pake duduꞌa-aafi makaneuꞌ, sona ami dedea leo naꞌ ela tulu-fali emi.   
\p
\v 14 Kristus susue-lalain fo neuꞌ ita a, riꞌ neni fee ami makateꞌ de malalaꞌo ami nonoi laka ma. Huu fo ami mamahere mae, noi Lahenda esaꞌ a, riꞌ Kristus, mate kati basa lahenda. Ria sosoa-raraan nae, sama leoꞌ ita basa mate fo foa ela masoda paraaꞌ a, ma ta tanuu hak fo tuka dae-bafoꞌ a hihii-nanaun soꞌ.  
\v 15 Kristus mate soaneuꞌ basa lahenda, ela basa lahenda fo rasoda rai dae-bafoꞌ ia, ta rasoda tuka sira hihii-nanau mesa nara soꞌ. Tehuu besaꞌ ia ara muste rasoda tuka Kristus hihii-nanaun, huu fo Ana mate kati si so, ma Ana nasoda seluꞌ.   
\p
\v 16 De mulai neme besaꞌ ia mai, ita bosoꞌ uku-sudi lahenda pake lahenda dae-bafoꞌ a uuku-susudin. Leo mae maulu na ita uku-sudi Kristus, pake lahenda dae-bafoꞌ a duduꞌa-aafin, tehuu besaꞌ ia ami ta uku-sudi Ni leo naꞌ soꞌ.  
\v 17 Huu ria na, de lahenda dae-bafoꞌ bea nabua-naesa noo Kristus, ana nanuu sodaꞌ bebeuꞌ. Ana ta sama leoꞌ maulu na fa, huu fo masoda paraa na sapu-lalo, de neꞌes ana so! Huu fo masoda bebeuꞌ a mai so.  
\v 18 Manetualain riꞌ adu-tao basa ia ra. Ria riꞌ adu mole-dame de ita malole seluꞌ too Ni, nana huu Kristus sae-safe heni ita sala-sikon so. Ria boe fee ita nonoi-lakaꞌ, fo ita bisa tatudu enoꞌ ela lahenda fekeꞌ bisa mole-dame seluꞌ roo Manetualain.   
\p
\v 19 Mafarereneꞌ te, tepoꞌ fo Kristus bei nai dae-bafoꞌ a, Manetualain pake Ni ela noo lahenda reu mole-dame seluꞌ roo Manetualain. De, Ana ta reke sira sala-sikon, ma ara ta lepa sala-sikoꞌ a huhuku na soꞌ. Boe ma Ana fee ita nonoi-lakaꞌ fo teu tafada lahenda tae, ara bisa malole seluꞌ roo Ni.   
\p
\v 20 Ita dadi teuꞌ Kristus lima boa ona Na. De, Manetualain pake ita ela foo-lolo lehenda mai mole-dame seluꞌ roo Ni. Huu no ami dadi meuꞌ Kristus lima boa ona Na, de ami hule kokoe emi, nana huu Manetualain nahiiꞌ ita malole seluꞌ moo Ni.  
\v 21 Kristus ta parnaa tao sala-sikoꞌ fa. Tehuu Manetualain tao Nan lepa ita sala-sikon. Manetualain tao leo naꞌ soaneuꞌ ita, nana huu Kristus mamate na soi enoꞌ, ela ita bisa tasoda noo dale roos, sama leoꞌ Manetualain boe dale roos.   
\c 6  
\s1 Manetualain tao malole soaneuꞌ ita  
\p
\v 1 Huu no ami moi-tao sama-sama moo Manetualain, de ami hule kokoe emi leo iaꞌ: Emi sipo ma Manetualain dale malole ina Na so, de emi bosoꞌ tao ni neuꞌ mana dadi taaꞌ.  
\v 2 Huu fo Ria Susura Makamoi Na manaduiꞌ nae,  
\q1 “Naraa laꞌe ledo-fain, Au amanene neuꞌ o.  
\q2 Au tulu-fali o, tepoꞌ fo Au fee lahenda sodaꞌ.”  
\p Nenene matalolole! Besaꞌ ia ledo-fain malole a. Huu fo besaꞌ ia Ramatuaꞌ a fai Na, fo fee lahenda sodaꞌ.\x + \xo 6:2 \xt Yesaya 49:8\x*   
\p
\v 3 De ami nau manea matalolole ao-ina mara, ela masoda roo-tetuꞌ. Huu fo ami ta nau dadi eena-natabaaꞌ soaneuꞌ lahenda fo nau leo Manetualain eno masoda na neu. Ma ami boe nau dedea tuka matetu na, fo ela lahenda bosoꞌ ramumulu-ramamaeꞌ ami nade malole nara.  
\v 4 Basa-basan fo ami tao a, ami saka enoꞌ fo matudu mae, ami ia nana Manetualain lahenda malalau-maoono malolen. De, leo mae ami hapu susa, hapu doidoso, do masoda nai kakiliu-soroadoꞌ a talada boe, ami manenete mahere.  
\v 5 Fai fo ami hapu fefepa-liliꞌu, ena ami nai bui daleꞌ, lahenda ra adu nahuu-nalenaꞌ, ami moi-tao sota maan seli, ami ta suku fa, ma fai fo mamalaa, ami manenete mahere.\x + \xo 6:5 \xt Lahenda Nadedenuꞌ ara Tutuin 16:23\x*  
\v 6 Ami manenete noo dale malalao-malalafuꞌ. Ami bubuluꞌ dodou laꞌeneuꞌ Manetualain. Ami manenete ma sabar. Ami tao malole soaneuꞌ lahenda. Ami mataaꞌ Manetualain Dula-dale Na ator ami. Ami sue-lai matetuꞌ lahenda, ma ta masarole-masaraliꞌ fa.  
\v 7 Tepoꞌ fo ami dedea, ami dedea matetuꞌ, ta dedea fufudiꞌ fa. Ami sipo kuasa neme Manetualain mai, fo tao malole. Ami sama leoꞌ soldadu fo homu Ramatuaꞌ a tee-tafan katemaꞌ, de matati maseki musu.  
\v 8 Leo mae lahenda hada-horomata neuꞌ ami, do ara ramumulu-ramamaeꞌ ami nade malole ma; leo mae ara dedea ratuda ami, do ara ranea ami nade malole ma; leo mae lahenda dedea fufudiꞌ rae, ami tipu-dai lahenda, do ara dedea rae, ami dedea matetuꞌ, tehuu ami manenete.  
\v 9 Ruma ta ralelaꞌ ami fa. Tehuu dodouꞌ ralelaꞌ ami nade ma. Lai dodouꞌ kura baiꞌ ami mate, tehuu ami bei masoda maroo boe. Ami hapu fefepa-liliꞌu laiꞌ dodouꞌ, tehuu ami ta mate boeꞌ.  
\v 10 Leo mae ami mameda man beraꞌ a, tehuu ami mamahoꞌo-matadale maroo. Leo mae ami doiꞌ taꞌa, tehuu ami tao ma lehenda dodouꞌ ramasuꞌi nai dale nara. Ami ta manuu hata esa boeꞌ, tehuu sama leoꞌ ami manuu basa-basan.   
\p
\v 11 Ami dedea ledo-ledo soaneuꞌ emi nai kota Korintus. Ami sue-lai matetuꞌ emi.  
\v 12 Ami matudu susue-lalaim neuꞌ emi, ma ta eena-babaa fa. Tehuu emi eena-babaa susue-lalaim neuꞌ ami.  
\v 13 De, au nau lea-nore emi, sama leoꞌ emi nana au ana kara. Malole lenaꞌ emi sue-lai maroo ami.   
\s1 Bosoꞌ mabua-maesa moo lahenda fo ta ramahere Manetualain  
\p
\v 14 Bosoꞌ mabua-maesa moo lahenda fo ta ramahere Kristus. Huu fo emi ta sama fa. Lahenda kamahereꞌ fo leo-laꞌo roo-tetuꞌ, ma lahenda fo soaꞌ Manetualain, ta naraa ara roi-tao reu esa fa. Lahenda dale malole a noo lahenda tadaluꞌ a ta naraa dadi tia-lai. Ria sama leoꞌ makaledoꞌ a ta nabua noo maiuꞌ.  
\v 15 Kristus ta bisa dedea-raoꞌ noo nitu ra malaka na, hete?\f + \fr 6:15 \ft Dedea Yunani nai ia manaduiꞌ \ft \+it Beliar\+it*. Beliar nana ara hai neme dedea Ibrani nae \+it Belial\+it*. Ria maksud na nae, “tadaluꞌ, ta malole, ta nanuu sosoa-raraaꞌ, nitu ra malaka na”.\f* Leoꞌ na boe, lahenda fo ta namahere Manetualain, ta hapu babatiꞌ sama-sama noo lahenda kamahereꞌ a.   
\p
\v 16 Emi dale dodoo ma leo beaꞌ? Bate mae emi bisa leo Manetualain uma mamaso Na daleꞌ meu, fo doꞌo-tabe Ni dei, besaꞌ ko leo uma sosokoꞌ daleꞌ meu, fo hule-haradoi neuꞌ hata sosokoꞌ ara do? Ta naraa fa hete! Huu fo Manetualain nana Manetualain masodaꞌ. Ria boe ita Ramatua na. Ma ita dadi sama leoꞌ Ria uma mamason, nana huu Ana leo-naparasa nai ita dale nara. Huu fo manaduiꞌ nai Ramatuaꞌ Susura Makamoi Na daleꞌ nae,  
\q1 “Au uma Ka nai Au lahenda kara talada.  
\q2 Au masoꞌ-kalua nai sira talada.  
\q1 Au dadi uuꞌ sira Manetualain.  
\q2 Sira boe dadi reuꞌ Au lahenda kara.”\x + \xo 6:16 \xt Malaka Agama ra Atoran 26:11-12; Yeskial 37:26-27; 1 Korintus 3:16; 6:19; Efesus 2:21\x*   
\p
\v 17 Huu ria na, de Ramatuaꞌ a duiꞌ nae leoꞌ ia,  
\q1 “Emi muste kalua meme sira talada mai, ma heoꞌ meme sira mai,  
\q2 ela emi bosoꞌ dadi sama leoꞌ sira.  
\q1 Emi dale mara muste lalao-lalafuꞌ.  
\q2 Emi muste dooꞌ a meme basa-basan fo riꞌ nakekeo-nakakanu emi dale mara,  
\q2 No ria na, Au sipoꞌ emi noo malole.\x + \xo 6:17 \xt Yesaya 52:11\x*   
\q1
\v 18 Au dadi uuꞌ emi Amam;  
\q2 ma emi dadi meuꞌ Au ana kara.  
\q1 Ramatuaꞌ Mana Kuasa a,  
\q2 riꞌ nahara-nadasi nae leoꞌ na.”\x + \xo 6:18 \xt 2 Samuel 7:14; 1 Israel no Yahuda Tutui na 17:13; Yesaya 43:6; Yeremia 31:9\x*   
\c 7  
\p
\v 1 Toranoo susue kara! Huu no Manetualain helu fee ita basa hihii-nanauꞌ ia ra, de ita muste tao lalao-lalafu daleꞌ ara, ma ita masoda na. Kekeo-kakanuꞌ baianaꞌ boe, bosoꞌ feen leo nai ita ao-ina na. Huu fo ita nau dadi lalao-lalafuꞌ matetuꞌ soaneuꞌ Manetualain, ela tatudu tae, ita biiꞌ ma hada-horomata Ni.   
\s1 Hihii-nanauꞌ fo tao na Paulus dale na namahoꞌo  
\p
\v 2 Toranoo kara! Fee ami mamanaꞌ. Sipoꞌ ami no malole nai emi dale mara. Maulu na tepoꞌ fo ami nai emi talada, ami ta parnaa tao salaꞌ soaneuꞌ lahenda esa boeꞌ. Ami ta parnaa leleꞌo lahenda fo tao salaꞌ. Ami boe ta parnaa tipu-dai lahenda fo saka oontoꞌ neme sira mai.  
\v 3 Au ta anuu maksud sale emi fa. Huu fo au afada ae, ami sue-lai emi. Leo mae ita mate do tasoda boe, ami moo emi teiesa-daleꞌesa.  
\v 4 Besaꞌ ia au ta teisusa-dalehedi soꞌ, huu fo au amahere emi. Au boe dedea bauinaꞌ laꞌeneuꞌ emi. Emi boe matetea au dale ka. De, leo mae ami hapu susa rupaꞌ ara, tehuu au amahoꞌo-atadale aroo nana huu emi.   
\p
\v 5 Tepoꞌ fo ami leo propinsi Makedonia mai a, ami sota maan seli. Huu fo ami hapu susa ii-onaꞌ. Ami mareresiꞌ moo lahenda dea. Ami boe bii-mamataꞌu nai ami dale mara.\x + \xo 7:5 \xt 2 Korintus 2:13\x*  
\v 6 Tehuu Manetualain riꞌ natetea lahenda fo mopo makate na, ma nameda nan beraꞌ a. Ana natetea ami dale mara, fai fo Ana fee Titus leo ami mai.  
\v 7 Titus mamai na, natetea ami dale mara. Huu fo tui nae, ana bei nai naa, emi matetea ria dale na. Ami mamanene leoꞌ na, ria boe dadi natetea daleꞌ soaneuꞌ ami. Ana tui nae, emi mahiiꞌ mita au, ma emi masaledale matetuꞌ neuꞌ dedeaꞌ fo maulu na dadi nai emi talada. Ria boe tui laꞌeneuꞌ emi saka enoꞌ fo nau tao daleꞌ neuꞌ au. Huu ria na, de au amahoꞌo-atadale.\x + \xo 7:7 \xt 2 Korintus 2:5\x*   
\p
\v 8 Au bubuluꞌ ae, au toꞌo-asaꞌai emi uniꞌ susura fo maulu na au haitua fee emi a, memaꞌ tao na emi susa. Tehuu au ta asaledale duiꞌ susuraꞌ ria. (Sekona te tepoꞌ ria, au asaledale baiꞌ, fai fo au bubuluꞌ ae, au susura ka tao na emi susa, leo mae noi hate mataꞌ.)  
\v 9 Tehuu besaꞌ ia, au amahoꞌo-atadale. Au ta amahoꞌo nana huu tepoꞌ ria emi susa. Taꞌa! Au amahoꞌo nana huu tepoꞌ ria au susura ka isi-liin lea-nore emi fo saledale-tuꞌetei mara. Boe ma emi manaku sala-siko mara, ma foa ela emi hihii-nanauꞌ tadalu mara, fo matafali mai tuka Manetualain eno roo-tetu Na. Manetualain riꞌ tao na emi masaledale leo naꞌ. No ria na, ta ami riꞌ tao mahehediꞌ emi dale mara fa.  
\v 10 Kalu ita tasaledale sala-sikoꞌ ara tuka Manetualain hihii-nanaun, sona ita saledale-tuꞌetei ara ta tao hihii-nanauꞌ soꞌ, ma tatafali mai tuka eno roo-tetuꞌ. Ria riꞌ poꞌi-tata na ita teme Manetualain huhuku na mai, ma ita ta tasaledale laꞌo naroo. Tehuu maneniko ita tasaledale noi nai bafa-dooꞌ ara, sona sama leoꞌ lahenda nai dae-bafoꞌ a biasa nara, de neuꞌ ko ita bika-bati temeꞌ Manetualain mai.   
\p
\v 11 Soba emi dodoo! Tepoꞌ fo emi lees au susura ka, au bubuluꞌ emi masaledale sala-siko mara tuka Manetualain hihii-nanaun. Huu fo ria tao na emi moi-tao sota maan seli, ela sae-safe heni hihii-nanauꞌ tadaluꞌ a, neme emi masoda ma mai. Emi mamaꞌaiꞌ noo tadalu mara. Emi biiꞌ, boso losa emi tao seluꞌ tadaluꞌ bali. Emi mahiiꞌ mita au, ma sadia nau tao malole maroo. Emi boe sadia nau huku lahenda mana tao salaꞌ. Huu no emi tao roo-tetuꞌ leoꞌ na, de emi lalao-lalafuꞌ. No ria na, ta hapu esa sale emi boeꞌ.  
\v 12 De susura maulu ki fo riꞌ au duiꞌ a, ta fee lahenda mana tao tadaluꞌ. Au boe ta duiꞌ fee lahenda fo riꞌ doidosoꞌ nana huu lahenda fekeꞌ a nonoi-tatao tadalun. Tehuu au duiꞌ susuraꞌ fee emi, fo ela au atudu ae, emi helu basa nai Manetualain mata Na, nana teteaꞌ. Ma emi sue-lai matetuꞌ ami.  
\v 13 Basa ia ra, ratetea au dale ka.  
\p Emi boe matetea Titus dale na, fo ela ria dale na bisa tama. Hihii-nanauꞌ ria tao na ami boe-boe mamahoꞌo.  
\v 14 Au parnaa io emi nai Titus matan laꞌeneuꞌ emi nonoi-tatao malolem. Au afada ni ae, ta parnaa emi tao mamamaeꞌ au. Basa hihii-nanauꞌ fo parnaa ami tuin neuꞌ emi a, nana tebe. Ma basa hihii-nanauꞌ fo ami tuin neuꞌ Titus laꞌeneuꞌ emi a, tebe.  
\v 15 De fai bea ma ana nafarene emi nonoi-tataom, ma emi dedea-nafadam, sona sue na emi seli. Ma nafarene tepoꞌ fo leo emi naaꞌ neu a, emi sipoꞌ ana noo hada-horomata, tehuu emi boe dale mara dodaꞌ neuꞌ au susura ka.  
\v 16 Au amahoꞌo-atadale, nana huu au bisa amahere emi nai basa hihii-nanauꞌ ara. De au dale ka ta dodaꞌ neuꞌ emi soꞌ!   
\c 8  
\s1 Ara fee tutulu-fafaliꞌ noo dale malole  
\p
\v 1 Toranoo susue kara! Ami nau emi bubuluꞌ Manetualain dale susuen fo Ana natudun neuꞌ lahenda saraniꞌ rai propinsi Makedonia.  
\v 2 Leo mae ara hapu susa-lela dodouꞌ, tehuu ramahoꞌo-ratadale raroo. Huu ria na, de leo mae ara toꞌa-taa, tehuu ara bei fee sira doi-talin dodouꞌ noo dale balaroe-balanauꞌ, ela tulu-fali lahenda kamahere fekeꞌ manasusaꞌ ara.  
\v 3 Au bisa tui ae, ara fee katemaꞌ hata fo rabeꞌi fee neme sira hahapu-dadain mai. Ma ara fee lena neme naꞌ mai bali. Ta hapu esa naseti si boeꞌ.  
\v 4 Tebe-tebe sira siꞌ hule fo ela ami fee si lelaꞌ. No ria na, sira boe bisa tulu-fali lahenda kamahereꞌ manasusaꞌ ara rai Yerusalem.\x + \xo 8:4 \xt Roma 15:26\x*  
\v 5 Ami mamahena ara tao leo iaꞌ, tehuu ara tao lena neme ami namahena-nabanim! Masososa na, ara fee heni ao-ina nara reuꞌ ita Ramatua na. Ara rafada bali rae, “Ami nau fee heni ami ao-ina mara ela malalau emi, tuka Manetualain hihii-nanaun.”   
\p
\v 6 Huu no saraniꞌ fo rai Makedonia, ara ratudu conto leo naꞌ, de ami hule Titus fali seluꞌ leo emi neu nai Korintus, ela emi bisa tulu-fali Manetualain lahenda manasusaꞌ nara rai Yerusalem. Maulu na, ana mulai nabubua fee si doiꞌ. Besaꞌ ia ami hule ni ela bisa tao namanoꞌu-namadai emi nonoi-lakam fo riꞌ tulu-fali lahenda.\x + \xo 8:6 \xt Titus 2:14\x*  
\v 7 Tebe emi nonoi-tataom soaneuꞌ Manetualain, nana malole na seli. Conto leo-leoꞌ: emi mamahere tebe-tebe; emi nanori-nafadam malole; emi bubuluꞌ dodouꞌ laꞌeneuꞌ Manetualain; emi makate mara seli; ma emi sue ma ami seli. Huu ria na, de au nau emi fee doiꞌ dodouꞌ, ela tulu-fali Manetualain lahenda manasusa nara.   
\p
\v 8 Au ta pareta emi nai Korintus fo fee doiꞌ dodouꞌ, tehuu au nau uji emi. Lahenda saraniꞌ rai Makedonia, ara rahiiꞌ raan seli nau tulu-fali lahenda manasusaꞌ ara. De neuꞌ ko emi matudu mae tebe-tebe emi sue-lai lahenda sira boe.  
\v 9 Huu fo emi bubuluꞌ mae, ita Ramatuan Yesus Kristus, natudu dale malole Na neuꞌ emi so. Maulu na Ana sama leoꞌ lahenda kamasuꞌi. Tehuu Ana dadi lahenda manatoꞌa-manataaꞌ ela tulu-fali emi, fo bisa mamasuꞌi nai basa hihii-nanauꞌ daleꞌ.   
\p
\v 10 Manafaliꞌ a, emi mulai mabubua fee si doiꞌ. Emi ta fee noi doiꞌ, tehuu emi tulu-fali neme emi dale mara mai boe. De, tuka au sona emi muste tao leo iaꞌ:  
\v 11 Maulu na, emi nau tulu-fali Manetualain lahenda manasusa nara rai Yerusalem. De besaꞌ ia fee matetu hata fo emi maetuꞌ maan nau tulu-fali meniꞌ a. Ma emi mabeꞌi fee hida, sona fee leo. Tehuu penting na riꞌ, fee noo dale katematua.  
\v 12 Maneniko ita fee noo dale namahoꞌo tuka ita hahapu-dadain, sona ria malole a. Lahenda bosoꞌ fee hata fo neuꞌ ko tao nasususaꞌ ana nana huu fee noo nasetiꞌ.   
\p
\v 13 Au maksud ka ae, ela ita basa lepa belaꞌ sira susa nara. Au ta anuu maksud tao fee emi mambera, fo ela lahenda fekeꞌ namakafa.  
\v 14 Huu fo besaꞌ ia emi hapu-dai lena, ma sira kura-kopo. Fai bea ma emi kura-kopo, sona neuꞌ ko ara bisa fee emi. No ria na, ita sama-sama bisa lepa-tasaa baibeberaꞌ.  
\v 15 Sama leoꞌ manaduiꞌ nai Manetualain Susura Makamoi Na nae,  
\q1 “Lahenda fo hapu dodouꞌ,  
\q2 ara ta ranuu desi lena neme naꞌ mai.  
\q1 Ma lehenda fo hapu baianaꞌ,  
\q2 ara ta kura-kopo boeꞌ.”\x + \xo 8:15 \xt Kalua reme Masir 16:18\x*   
\s1 Laꞌeneuꞌ Titus, ma lahenda fekeꞌ fo sakaꞌ reni tutulu-fafaliꞌ  
\p
\v 16 Au hule makasi neuꞌ Manetualain, nana huu Ria riꞌ leleꞌo Titus fo nau tulu-fali emi, sama leo au nau tulu-fali emi.  
\v 17 Tebe ami hule ni neu dama emi. Sekona te, ria dale hii-hii na boe. Huu ria na, de leo mae au ta hule ni fa boe, ana nau neu tulu-fali emi.  
\v 18 Tehuu ta mesaꞌ ana neu fa. Huu fo ami madenu ami toranoom esa, ela neu sama-sama noo ni. Basa saraniꞌ fo rai ia ralelaꞌ lahenda ia, nana huu ria boe noi-tao sota naan seli, tui-beka fee lahenda Manetualain Tutui Malole Na.  
\v 19 Saraniꞌ ara mauli-malaka nara here raa ni, fo laꞌo sama-sama noo ami, ela tulu-fali nai ami nonoi-tatao malolem ia daleꞌ. Ami malalaꞌo nonoi-tatao ia, ela matudu ita Ramatua na marela-masaꞌan, ma tao malole soaneuꞌ lahenda manasusaꞌ ara rai Yerusalem.   
\p
\v 20 Ami saka enoꞌ tao roo-tetuꞌ, ela fai fo ami meni doiꞌ ia ra, leo lahenda fo ara parluu a, ta hapu lahenda bisa rapaneneoꞌ rae, ami ta moi-tao noo matetuꞌ.  
\v 21 Ami duꞌa-afi malole ela tao roo-tetuꞌ neme dale makamoiꞌ nai Manetualain matan, ma nai lahenda matan boe.\x + \xo 8:21 \xt Dedea Lasiꞌ a 3:4\x*   
\p
\v 22 Ami madenu toranoo esa bali, fo noo Titus asa sama-sama reni doiꞌ sira reu a, ami uji ni lai dodouꞌ so. De ami bubuluꞌ ria nau noi-tao sota naan seli soaneuꞌ emi. Ana nakate, nana huu bubuluꞌ nae, emi tao roo-tetuꞌ.   
\p
\v 23 Maneniko lahenda ratane laꞌeneuꞌ Titus sona mafada si mae, Titus nana, au toranoo ki fo riꞌ noi-tao noo au laꞌo naroo soaneuꞌ emi. Maneniko lahenda ratane laꞌeneuꞌ lahenda fekeꞌ fo riꞌ nau tuka roo Titus, sona mafada si mae lahenda kamahereꞌ rai mamana fekeꞌ boe here sira fo tuka Yerusalem reu reni doiꞌ ia ra. Ara rahani rai Korintus so, fo sakaꞌ reu. Titus sama-sama noo si. Neuꞌ ko sira basa ratudu Kristus marela-masaꞌan.  
\v 24 De emi muste matudu susue-lalaim neuꞌ lahenda mananeni doiꞌ sira. Ma matudu si, mae ubeaꞌ taon de ami dedea koaoꞌ laꞌeneuꞌ emi. No ria na, lahenda kamahereꞌ reme saraniꞌ nai basa mamanaꞌ ara, bubuluꞌ matetuꞌ rae, emi sue-lai si.   
\c 9  
\s1 Doi tutulu-fafaliꞌ fee lahenda Karisten rai Yerusalem  
\p
\v 1 Matetu na, ta parluu au duiꞌ bali, fo hule emi tulu-fali Manetualain lahenda kamahere nara.  
\v 2 Huu fo au bubuluꞌ emi makate tulu-fali lahenda leo naꞌ. Au boe amahoꞌo afada lahenda kamahereꞌ rai Makedonia laꞌeneuꞌ emi dale malole mara. Au tui ae, emi nai propinsi Akaya, sadia neme manafaliꞌ a mai so, fo nau haitua fee doi tutulu-fafaliꞌ. Au boe tui laꞌeneuꞌ emi makatem fo riꞌ tao na lahenda fekeꞌ boe nau tulu-fali lahenda manasusaꞌ ara.  
\v 3 De besaꞌ ia au adenu ita toranoo nara, ela ratudu rae, hata fo ami tuin laꞌeneuꞌ emi a, ta dedea fufudiꞌ fa. Au afada ae leoꞌ na, fo ela emi sadia memaꞌ.  
\v 4 Huu fo maneniko lahenda Makedonia ra mai sama-sama roo au, boe ma emi bei ta sadia fa, sona ita basa maeꞌ. Boso losa au namahere ka neuꞌ emi a neteꞌ taꞌa.  
\v 5 Huu ria na, de au afi ae, malole lenaꞌ ita toranoo nara rauluꞌ leo emi naaꞌ reu, ela emi basa bisa ator doi tutulu-fafaliꞌ sira tuka maulu na emi hehelu ma. Emi muste fee neme dale malole mara mai. Bosoꞌ fee no naseti-nalaꞌa.   
\p
\v 6 Eno na leo iaꞌ: “Lahenda fo sele-kari baianaꞌ, neuꞌ ko hapu buna-boaꞌ baianaꞌ boe. Lahenda fo nakate sele-kari dodouꞌ, neuꞌ ko hapu buna-boaꞌ ma ua-naleꞌ dodouꞌ boe.”  
\v 7 Lahenda ra muste esaꞌ ko naetuꞌ aon, nae ana nau fee hida. Bosoꞌ fee noo dale poseseriꞌ. Bosoꞌ fee nana huu lahenda raseti. Huu fo Manetualain sue-lai lahenda fo fee no dale namahoꞌo.  
\v 8 Manetualain nabeꞌi fee emi, basa ua-nale rupaꞌ. Ana nabeꞌi fee lenaꞌ, fo ela emi boe ta kura-kopo. Maneniko emi parluu, sona neuꞌ ko emi hapu-dai lena bali. No ria na, emi bisa bati-pala lena-ono mara fo tulu-fali basa nonoi-tatao malole ra.  
\v 9 Manaduiꞌ nai Manetualain Susura Makamoi Na nae,  
\q1 Manetualain bati-pala fee lahenda manatoꞌa-manataaꞌ ara,  
\q2 neme Ria dale malole Na mai.  
\q1 Ana tao roo-tetuꞌ naroo,  
\q2 huu fo Ria dale Na roo-tetuꞌ nahere losa doo na neu.”\x + \xo 9:9 \xt Sosoda Iꞌio-oꞌoaꞌ ara 112:9\x*   
\p
\v 10 Manetualain sadia bini-kee, fee lahenda maue-maosa ra ela sele-kari. Manetualain fee ita tua-nanaaꞌ, fo bisa taa-tinu. Manetualain ria boe, neuꞌ ko fee emi ua-naleꞌ, ela emi bisa tao roo-tetuꞌ. Ria sama leoꞌ emi dadi lahenda maue-maosa, de Manetualain fee emi bini-kee fo sele-kari. No ria na, Ana tao na emi nonoi-tatao malolem sira tamba fai, tamba dodouꞌ.\x + \xo 9:10 \xt Yesaya 55:10\x*  
\v 11 Manetualain nau fee emi lena neme emi parluu ma, fo ela emi bisa tulu-fali lahenda fekeꞌ ara neme emi dale balaroe-balanau mara. De, maneniko emi tulu-fali tao lahenda fekeꞌ a leoꞌ na, sona neuꞌ ko ara hule makasi neuꞌ Manetualain.  
\v 12 Huu fo emi fee tutulu-fafaliꞌ nana, tantu tulu-fali Manetualain lehendan fo rai naa. Ma ria boe emi tao tanda makasi dodouꞌ neuꞌ Manetualain.  
\v 13 Huu fo emi tulu-fali lahenda fekeꞌ ara, de ria natudu buti nae, emi mamahere tebe-tebe. Ria boe tao na lehenda fekeꞌ ara io-oa Manetualain. Huu fo ara bisa rita emi mamahere Kristus Tutui Malole Na, nana ta dedea fufudiꞌ fa. Ria nana huu emi tao tuka emi namahere ma. Fai fo emi fee tutulu-fafaliꞌ no dale balaroe-balanauꞌ soaneuꞌ sira, ma lahenda fekeꞌ boe, sona ria riꞌ tao naa si io-oa Manetualain.   
\p
\v 14 Lahenda fo sipo hata tutulu-fafaliꞌ neme emi mai a, neuꞌ ko ara hule-haradoi fee emi. Sira boe rahiiꞌ rita emi, nana huu Manetualain natudu Ria dale malole ina na neuꞌ emi.  
\v 15 Tehuu, Manetualain parsen fee ita Hadia esa malole na seli. Riꞌ Yesus! Ria beli na lena heni basa-basan mai! Huu ria na, de ita basa sama-sama hule “Makasi dodouꞌ!” neuꞌ Manetualain.   
\c 10  
\s1 Paulus bela ria nonoi-tataon soaneuꞌ Kristus  
\p
\v 1 Au, Paulus, riꞌ duiꞌ nai ia. Tantu emi ruma afi mae leo iaꞌ: maneniko au sama-sama oo emi, sona au maeꞌ dedea neuꞌ matetu na. Tehuu maneniko au dooꞌ a oo emi, sona au aparani dedea ta pake bibila-babaaꞌ fa. Leo naꞌ, hete? Sekona te, matetu na nana riꞌ au hule fo emi mamanene au, nana huu Kristus dale balaroe-balanau Na neuꞌ emi, ma Ana nahiiꞌ tao daleꞌ neuꞌ emi.  
\v 2 Tehuu emi ruma ta nau ramanene au fa. Ara rafada rae, ami nonoi-tataom, sama leoꞌ lahenda fekeꞌ nai dae-bafoꞌ ia nonoi-tataon boe. De maneniko au leo naaꞌ eti, sona au muste dedea soaneuꞌ asa ta pake bibila-babaaꞌ. Huu ria na, de au afada memaꞌ emi basa, fo ela fai bea ma au leo naaꞌ eti, sona bosoꞌ au dedea hara bera soaneuꞌ asa.  
\v 3 Leo mae ita lahenda dae-bafoꞌ, tehuu maneniko ita tareresiꞌ too lahenda fekeꞌ, sona bosoꞌ ita tahuu-talena sama leoꞌ lahenda fo riꞌ ta ralelaꞌ Manetualain.  
\v 4 Maneniko ita tahuu-talena too lahenda, sona bosoꞌ mafarene henin, te ita tee-tafan ta sama noo lahenda dae-bafoꞌ a nuu nara. Maneniko ita tahuu-talena ma tareresiꞌ too lahenda laka batuꞌ, sona ita tanuu Manetualain kuasa Na, de bisa tao talulutuꞌ lahenda kota musun.  
\v 5 Manetualain kuasa na bisa ofe heni basa hihii-nanauꞌ fo riꞌ soaꞌ Manetualain, ma tao na lahenda ta nau ralelaꞌ Ana. Ria kuasa Na boe bisa natudu enoꞌ, ela kati ita eno dodoo-tatai paraa na, neniꞌ eno dodoo-tatai bebeuꞌ. No ria na, ita bisa dodoo-tatai tuka Kristus nanori-nafadan.\x + \xo 10:5 \xt Roma 12:2\x*  
\v 6 Neme emi mai, kadodou na mulai ramania-ramanene neuꞌ Kristus, ma tao tuka Ria hihii-nanaun katemaꞌ. Tehuu emi ruma bei ta nau ramania-ramanene Ni. De ami sadia huku sira fo riꞌ ta nau ramanene neuꞌ Ana.   
\p
\v 7 Emi mahiiꞌ mete-relu noi hihii-nanauꞌ fo nananitaꞌ nai deaꞌ. Tehuu emi muste mete-relu lahenda dale na. De maneniko lahenda bea tao aon dadi neuꞌ Kristus lahenda nadedenun, sona nafarene natalolole. Huu fo ami boe Kristus lahenda nadedenun, sama leoꞌ ria.  
\v 8 Bate emi afi mae, au dedea bau-inaꞌ aan seli, laꞌeneuꞌ kuasa fo ita Ramatua na feen neuꞌ ami a. Leo naaꞌ, hete? Taꞌa! Huu fo hapu kuasa ria, ela natetea emi, te ta nalulutuꞌ emi dale mara fa. De au ta ataaꞌ lahenda ofe ralulutuꞌ au nonoi-tatao ki, fo tao ramamaeꞌ au.  
\v 9 Au ta anuu maksud abibiiꞌ emi uniꞌ au susura kara fa.  
\v 10 Tehuu lahenda sira dedea rae, “Bosoꞌ tao daleꞌ neuꞌ Paulus. Leo mae ria susura na nasaꞌ a ma kahereꞌ, tehuu maneniko ana mai matan, sona male-maleꞌ a, ma ria dedea-nafadan ta nanuu kuasa fa.”  
\v 11 Nemeꞌ na ela lahenda manadedea fufudi leo naꞌ a, dodoo-tatai hihii-nanauꞌ ia: ami duiꞌ ubeaꞌ nai susuraꞌ daleꞌ, sona ami mai fo dedea moo emi boe sama leoꞌ na.   
\p
\v 12 Lahenda sira io ao nara rae, sira nana Kristus lahenda nadedenu kaheren. Emi bubuluꞌ mae, ami ta maparani mararaaꞌ ao-ina mara moo sira. Huu fo ami ta bisa kahereꞌ sama leoꞌ sira! Lahenda rupa leo naꞌ, saka noi lahenda fo riꞌ sama leoꞌ sira, besaꞌ ko rae lahenda kahere ara si naꞌ dei. Sira rararaaꞌ ao-ina nara esa noo esa leo naꞌ, pakanaa raan seli!  
\v 13 Sekona te, kalu ami ta manuu neteꞌ fa, sona ami ta dedea koaoꞌ. Ami dedea noi leo naꞌ, laꞌeneuꞌ nonoi lakaꞌ fo Manetualain feen neuꞌ ami a. Ami tao ubeaꞌ soaneuꞌ emi, tuka noi hata fo riꞌ Manetualain nadenu ami tao a. Ami ta tao fekeꞌ lena neme naꞌ mai.  
\v 14 Matetu na, tepoꞌ fo ami dedea koaoꞌ laꞌeneuꞌ emi a, ami ta dedea mala lenaꞌ fa. Huu fo ami mai ela tui-beka fee emi Kristus Tutui Malole Na. Emi boe sipoꞌ ami dedea-nafadam. Kalu Manetualain ta parnaa nadenu ami, tehuu ami dedea koaoꞌ laꞌeneuꞌ emi, sona ria ta laꞌe fa.  
\v 15 Maneniko lahenda fekeꞌ a riꞌ noi-tao, sona ami ta dedea bau-inaꞌ mae, ami nonoi-tataom ria. Huu fo penting soaneuꞌ ami a, nana riꞌ emi namaherem boe-boe natea. No ria na, neme uluꞌ mai ami nonoi-tataom nai emi a, buna-boan tamba naroo.  
\v 16 Ami bisa meu tui-beka Kristus Tutui Malole Na, nai basa mamanaꞌ maneneaꞌ fo riꞌ lahenda bei ta roi-tao rai naa. No ria na, lahenda ta bisa rae ami dedea bau-inaꞌ laꞌeneuꞌ lehenda fekeꞌ fo riꞌ ralalaꞌo rauluꞌ sira nonoi-tataon.   
\p
\v 17 Manaduiꞌ nai Manetualain Susura Makamoi Na nae, “Maneniko lahenda nau dedea bau-inaꞌ, sona ela ana dedea bau-inaꞌ laꞌeneuꞌ noi ita Ramatuan Manetualain.”\x + \xo 10:17 \xt Yeremia 9:24\x*  
\v 18 Maneniko lahenda esa dedea bau-inaꞌ laꞌeneuꞌ ao-ina na, sona ria sosoa-raraaꞌ taꞌa. Tehuu maneniko ita Ramatua na riꞌ io lahenda ria, sona besaꞌ ko kahere na rinaaꞌ dei!   
\c 11  
\s1 Kristus lahenda nadedenu matetu nara, ma lahenda nadedenu ta matetuꞌ ara  
\p
\v 1 De soba nenene matalolole au dei! Au sakaꞌ dedea bau-inaꞌ baiꞌ, leo mae au dedea sama leoꞌ lahenda koa-pakanaaꞌ.  
\v 2 Au sama leoꞌ emi amam. Ma emi sama leoꞌ au ana-feto ana ka nanuu tunangan so. Kristus sama leoꞌ emi tunangan ma. De au anea atalolole emi, fo ela emi sao tunangan ria boe, emi bei lalao-lalafuꞌ. Au anea atalolole emi ela bosoꞌ hapu esa mai fufudi-leleꞌo emi, fo tao nalutu emi namahere ma.  
\v 3 Besaꞌ ia emi tuka Kristus eno roo-tetu na noo malole. Tehuu au biiꞌ, boso losa lahenda tipu-dai ralaꞌ emi, fo heo meme enoꞌ ria mai, sama leoꞌ fai a ulu na meke a tipu-dai nalaꞌ Hawa. Meke ria bisa tipu-dai leo naꞌ, nana huu ria napuputa heta!\x + \xo 11:3 \xt Tutui Masososaꞌ 3:1-5, 13\x*  
\v 4 Fai bea ma lahenda rupa leo naꞌ a leo emi mai, boe ma tui-beka fee emi laꞌeneuꞌ Yesus rupa fekeꞌ, ta sama leoꞌ Yesus fo ami tui-bekan neuꞌ emi a, sona ubeaꞌ taon de emi mamahere lahenda ria? Maulu na, emi sadia dale mara fo sipo Manetualain Dula-dale Malalao-malalafu Na, ela Ana ator emi. Boe ma, ubeaꞌ taon de besaꞌ ia emi nau sipo dula-dale rupa fekeꞌ esa bali? Maulu na, emi mamahere Kristus Tutui Malolen fo riꞌ ami tui-bekan neuꞌ emi a. Boe ma, ubeaꞌ taon de besaꞌ ia emi nau mamahere nanori-nafada rupa fekeꞌ bali?   
\p
\v 5 Ara io ao nara rae, sira nana Manetualain lahenda nadedenu kaheren. Dodoo man nana sira hak na lena neme au mai, do? Taꞌa! Au ta tuka duduꞌa-aafi leo naꞌ fa.  
\v 6 Leo mae au dedea ta alelaꞌ pake dedea hehelo fa, tehuu au bubuluꞌ matetuꞌ laꞌeneuꞌ hata fo au dedean a. Emi bubuluꞌ hihii-nanauꞌ ia ra, nana huu au atudu asarerei neuꞌ emi.   
\p
\v 7 Tepoꞌ fo au tui-beka Manetualain Tutui Malole Na neuꞌ emi a, au ta hule emi seba-bae au. Au aloe-adae ao ka, fo ela au bisa soꞌu-fua emi. Dodoo maan emi sale au, nana huu ria, do?  
\v 8 Lahenda kamahereꞌ rai saraniꞌ mamanaꞌ fekeꞌ siꞌ ara seba-bae au, de au bisa alalau emi. Ria sama leoꞌ au hai neme sira mai, ela bisa tulu-fali emi.  
\v 9 Tepoꞌ fo au sama-sama oo emi a, au parluu ubeaꞌ, au ta hule hata esa neme emi mai boeꞌ. Ita toranoon fo reme propinsi Makedonia mai, riꞌ tulu-fali au. Tehuu au ta parnaa tao asususaꞌ emi hata-hata esa boeꞌ, ma au ta nau tao leo naꞌ nai balahaa-binesaꞌ.\x + \xo 11:9 \xt Filipi 4:15-18\x*  
\v 10 Au abua-aesa oo Kristus, ma Kristus Dedea-nafadan roo-tetuꞌ, de au amahere ae, au dedea-nafada ki roo-tetuꞌ. Ta hapu lahenda nai propinsi Akaya, bisa rau au bafa ka, ma horo au fo bosoꞌ dedea bau-inaꞌae, au ta tao ambera emi leo naꞌ fa.  
\v 11 Ubeaꞌ taon, de au ta nau tao ambera emiꞌ? Bate mae au ta sue-lai emi fa, do? Leo mae emi duꞌa-afi leo naꞌ, tehuu Manetualain riꞌ bubuluꞌ au sue-lai emi.   
\p
\v 12 Ma au boe ta nau tao ambera emi nai fai mana maiꞌ a. No ria na, lahenda fo rahiiꞌ dedeꞌa bau-inaꞌ fo io ao nara rae, sira nonoi-tataon sama leoꞌ ami, sona sira ta hapu neteꞌ ela dedea leo naꞌ nana huu ara saka noi doiꞌ.  
\v 13 Ara rae, Manetualain riꞌ nadenu si. Sira lahenda mana noi manatipu-manadaiꞌ! Sira soba-soba nau tao ao nara sama leoꞌ Kristus lahenda nadedenu matetun. Sekona te, dedea fufudiꞌ mesan basa sira!  
\v 14 Emi bosoꞌ heran! Huu fo nitu ra malaka na boe soba-soba tao aon sama leoꞌ Manetualain eilaꞌo-limalopen rai nusatetu-ikutemaꞌ a pake makaledoꞌ noo dale malole.  
\v 15 Huu ria na, de bosoꞌ heran kalu nitu a lahenda malalau-maoono nara boe, soba-soba tao ao nara sama leoꞌ lahenda malalau-maoono dale roos. Tehuu besa-besa, te neuꞌ ko Manetualain balas sira tadalu nara.   
\s1 Tepoꞌ fo Kristus lahenda nadedenu matetu nara, tui-beka fee lahenda laꞌeneuꞌ Ramatua Yesus, ara hapu doidoso rupaꞌ  
\p
\v 16 Kalu emi nau, sona ela au dedea koa-pakanaaꞌ baianaꞌ seluꞌ. Huu fo au nau soba-soba dedea koaoꞌ.  
\v 17 Besaꞌ ia au duiꞌ fo io ao ka leo iaꞌ, au dedea koa-pakanaaꞌ ia. Ita Ramatua na ta nadenu au dedea leo iaꞌ. Ia sama leoꞌ lahenda pakanaaꞌa biasa io aon.  
\v 18 Lahenda dodouꞌ rahiiꞌ io ao nara tuka lahenda dae-bafoꞌ a biasa na. De, au nau dedea koaoꞌ leoꞌ sira boe.  
\v 19 Huu fo emi riꞌ tao ao mara leoꞌ lahenda duduꞌa-aafi tandeꞌ, maneniko maneta moi lahenda duduꞌa-aafi taaꞌ esa, sona emi sabar neuꞌ ana, hete?  
\v 20 Lahenda io ao nara rae, sira nana Manetualain ata kaheren tao emi leoꞌ bea boe, moi mataaꞌ asa. Conto leo-leoꞌ: kalu ara tao emi neuꞌ sira atan boe, moi mataaꞌ asa. Kalu ara tipu-dai emi boe, moi mataaꞌ asa. Kalu ara hai ra emi hata-hetom, moi mataaꞌ asa. Kalu ara radedema ao nara sama leoꞌ lahenda bau-inaꞌ, ma ara tao emi neuꞌ lahenda aanaꞌ boe, moi mataaꞌ asa. Leoꞌ na boe, kalu ara fapa emi boe, moi mataaꞌ asa.  
\v 21 Tehuu bosoꞌ mamanasa! Au maeꞌ, nana huu ami male-maleꞌ a. Huu fo ami ta mabeꞌi tao leo naꞌ, sama leoꞌ lahenda sira taon soaneuꞌ emi a. Tehuu maneniko ara dedea bau-inaꞌ laꞌeneuꞌ ubeaꞌ, sona au boe aparani dedea bau-inaꞌ leo naꞌ. (Tehuu bosoꞌ mafarene henin, te au dedea koa-pakanaaꞌ ia!)   
\p
\v 22 Sira lahenda Ibrani teaꞌ, do? Au boe lahenda Ibrani. Sira lahenda Israel, do? Au boe lahenda Israel! Sira nana baꞌi Abaraham tititi-nonosin, do? Au boe baꞌi Abraham tititi-nonosin!  
\v 23 Sira nana, Kristus lahenda malalaun, do? Au boe leo naꞌ. (Bosoꞌ mafarene henin, te au tao dedea nasasekoꞌ ria!) Memaꞌ au afada ae, au sama leoꞌ sira. Sekona te, au lena eme sira mai. Huu fo au oi-tao sota lena. Lahenda ra ena au nai bui daleꞌ lai dodouꞌ. Ara fepa-liꞌu au lai dodouꞌ. Lai dodouꞌ kura baiꞌ au mate.\x + \xo 11:23 \xt Lahenda Nadedenuꞌ ara Tutuin 16:23\x*  
\v 24 Au lahenda Yahudi kara fepa-liꞌu au laiꞌ lima so. Fai bea ma ara fepa-liꞌu au, sona losaꞌ liiꞌ telu hulu sio.\x + \xo 11:24 \xt Tui Seluꞌ Laꞌe Neuꞌ Eno Sodaꞌ a 25:3\x*  
\v 25 Lahenda ra fepa au reniꞌ ai laiꞌ telu. Ruma bali nau pia raisa au reniꞌ batu, laiꞌ esa. Au saꞌe ofaꞌ a, bolo laiꞌ telu. Au bonu-bonu nai tasi taladaꞌ leledoꞌ esa ma hatuꞌ esa.\x + \xo 11:25 \xt Lahenda Nadedenuꞌ ara Tutuin 16:22; 14:19\x*  
\v 26 Au leo mamana dooꞌ uu kose-kose. Soe-salaꞌ dodouꞌ tao ra au kura baiꞌ mate. Leo-leoꞌ: Soe neme faa a nai lee bau-inaꞌ, parompok ara rafaraꞌu ra au, au lahenda Yahudi kara ma lahenda fo ta Yahudi ra fa ese-rumu au, ma lahenda fo tao ao nara sama leoꞌ lahenda kamahereꞌ, sekona te manatipu-manadaiꞌ ara ese-rumu au boe. Kura baiꞌ mate au nai tasi taladaꞌ boe, nai bendar a, ma nai mamana lino-nees.\x + \xo 11:26 \xt Lahenda Nadedenuꞌ ara Tutuin 9:23; 14:5\x*  
\v 27 Au oi-tao sota aan seli, ma au hapu susa rupaꞌ ara. Lai dodouꞌ au ta suku fa. Au amalaa ma maamada-metihedu. Lai dodouꞌ au ta ua-inu hata esa boeꞌ. Parnaa au bua-loas taꞌa, de marini aan seli.  
\v 28 Kalu ta nau reke basa hihii-nanauꞌ sira fa, sona reke leo iaꞌ: huu fo tuka-tuka faiꞌ laka dileꞌ a dai au, nana huu au duꞌa-afi laꞌeneuꞌ ita toranoon lahenda kamahereꞌ fo rabua rai basa mamanaꞌ ara.  
\v 29 Kalu hapu lahenda nameda naan ta nabeꞌi fa, sona nafarene au. Huu fo au boe leo naꞌ. Maneniko lahenda fufudi-leleꞌo lahenda kamahereꞌ fo tao salaꞌ, sona au maeꞌ, ma eteꞌ ao ka.   
\p
\v 30 Maneniko au muste dedea koaoꞌ, sona malole lenaꞌ au dedea koaoꞌ laꞌeneuꞌ hihii-nanauꞌ fo ratudu rae au maleꞌ-maleꞌ a. Tebe!  
\v 31 Manetualain fo ita Ramatuan Yesus Aman, bubuluꞌ au ta dedea fufudiꞌ fa. Naraa lahenda io-oa Ni losa doo na neu.   
\p
\v 32 Conto leo-leoꞌ, maulu na nai kota Damsik, mane Aretas gubernor na nadenu lahenda tepa au nai lelesu bafaꞌ ara, fo hopu au.  
\v 33 Tehuu au tia-lai kara tao au uuꞌ karanjang esa daleꞌ, boe ma ara raonda au pake tali tuka kota a tembok na deaꞌ. De, au soi a soda ka eme gubernor a lima na mai. Mafarereneꞌ, te maneniko au mesaꞌ ka, sona ta bisa fa, hete?\x + \xo 11:33 \xt Lahenda Nadedenuꞌ ara Tutuin 9:23-25\x*   
\c 12  
\s1 Paulus nalamei ma nita hihii-nanauꞌ ara rai nusatetu-ikutemaꞌ  
\p
\v 1 Maneniko emi nau mamanene noi lahenda fo dedea bau-inaꞌ, sona ela au dedea bau-inaꞌ seluꞌ. Sekona te, dedea bau-inaꞌ a sosoa-raraaꞌ taꞌa. Tehuu au nau afada emi basa hihii-nanauꞌ fo ita Ramatua na natudun neu au, nai meis daleꞌ.  
\v 2-4 Au alelaꞌ lahenda esa nabua-naesa noo Kristus. Teuꞌ sanahulu haa maneuꞌ ele, esa noo ni hene-ae leo lalai poi na neu. Tehuu au ta bubuluꞌ, ana hene-ae neni ao-ina katematua na, do noi dula-dale na hene-ae. Noi Manetualain riꞌ bubuluꞌ. Au bubuluꞌ, fai fo ana hene-ae leo Manetualain Mamana Malole Na neu a, ana namanene dedea-nafadaꞌ kahereꞌ, losaꞌ lahenda dae-bafoꞌ a ta bisa dedea fa.  
\v 5 De soaneuꞌ lahenda rupa leo naꞌ a, au nau dedea bau-inaꞌ. Tehuu au ta nau dedea bau-inaꞌ laꞌeneuꞌ au ao-ina heheli ka. Noi laꞌeneuꞌ hihii-nanauꞌ fo au ta abeꞌi tao ni, besaꞌ ko au dedea bau-inaꞌ leo naꞌ.  
\v 6 Tehuu uniꞌ ko leo au sakaꞌ dedea bau-inaꞌ, au ta parluu dedea fufudiꞌ, huu fo au anuu hihii-nanauꞌ kahere dodouꞌ fo tebe-tebe au oi-tao si so. Tehuu au anenete, ela lahenda bosoꞌ afi rae, au kahereꞌ lena neme hata fo ara ramanene, ma rita mataꞌ neme au mai a.  
\v 7 Manetualain natudu au hihii-nanauꞌ kahereꞌ dodouꞌ nai au meis ka daleꞌ.  
\p Tehuu au hapu susa, fo ela bosoꞌ koao. Huu fo nitu ra malaka na nadenu ria ana nadedenun esa mai, de naseseboꞌ au laꞌo naroo, sama leoꞌ kau-kouꞌ esa pau-pau noo au ao-ina ka. Tebe-tebe au doidoso!  
\v 8 Au hule neuꞌ Ramatuaꞌ a laiꞌ telu so, fo ela soꞌu heni hihii-nanauꞌ ia neme au mai.  
\v 9 Tehuu Ana nataa au nae, “Au atudu dale malole Ka neuꞌ o. Ria namanoꞌu-namadai soaneuꞌ o. Huu fo o mameda maan mae, tuka o baraꞌai mesam, sona ta namanoꞌu-namadai fa, sona Au kuasa Ka boe-boe natea nai naa.” Huu ria na, de fai fo au ta abeꞌi tao hihii-nanauꞌ esa, au boe-boe dedea bau-inaꞌ. Huu fo au bubuluꞌ ae, Kristus kuasa na nasuru-nahapa au.  
\v 10 Huu ria na, de maneniko au ameda aan au ta mesaꞌ ka abeꞌi oi-tao hihii-nanauꞌ esa, au dale ka tama. De, fai fo lahenda dedea ramumulu-ramamaeꞌ au, do tao rasususaꞌ au, do tao doidoso au, do ese-rumu au, nana huu au dadi uuꞌ Kristus lahendan, sona au dale ka tama. Huu fo kalu au ta abeꞌi fa, sona au hapu kuasa neme Kristus mai, de au bisa abeꞌi tao hihii-nanauꞌ ria.   
\s1 Paulus dale na dodaꞌ laꞌeneuꞌ lahenda kamahereꞌ rai Korintus  
\p
\v 11 Emi masoda nonooꞌ leo Manetualain ta parnaa nadenu au leo naaꞌ eti fa. Huu ria na, de nau do ta nau, bisinaꞌ a au dedea koa-pakanaaꞌ baiꞌ. Matetu na riꞌ, emi muste dedea bau-inaꞌ laꞌeneuꞌ au. Memaꞌ au sosoa-raraaꞌ taꞌa marorooꞌ. Tehuu maneniko nararaaꞌ au oo “lahenda kahereꞌ raan seli” fo riꞌ rae, Manetualain nadenu si, sona sira ta kahereꞌ lena au fa.   
\p
\v 12 Fai bea ma Manetualain nadenu lahenda esa fo nafada lahenda laꞌeneuꞌ Ana, sona lahenda ria tao tanda heran rupaꞌ ara pake kuasa, ela natudu buti nae, Manetualain nadenu ni. Bosoꞌ mafarene henin, te tepoꞌ fo au nai emi talada, au tao tanda heran leo naꞌ ara boe. Tehuu au oi-tao leo naꞌ noo sabar laꞌo aroo.  
\v 13 Bosoꞌ mamanasa! Noi hihii-nanauꞌ esa, fo riꞌ lahenda fekeꞌ taon nai saraniꞌ fekeꞌ a, au ta taon nai emi fa. Riꞌ au ta tao fee emi mambera.   
\p
\v 14 Leo iaꞌ! Au sadia leo emi mai kalaiꞌ telu na ia so. Au ta parluu emi tanggon maolu-mahao au. Au ta parluu emi hata-hetom boeꞌ. Tuka ita hada na, ta naraa ana aanaꞌ ara peda-fua ela sira ina-ama nara hata-heto. Matetu na ina-ama riꞌ peda-fua ela ana nara hata-heto. Huu fo emi sama leoꞌ au ana kara, de au ta parluu emi peda-fua ela au hata-heto! Au parluu a nana riꞌ emi dale katematua mara, ma emi susue-lalaim.  
\v 15 Au amahoꞌo fee emi hata fo au anuu a. Au boe ahiiꞌ oi-tao sota, fo ela emi bisa masoda tuka Manetualain hihii-nanaun. Maneniko au sue emi, sona emi muste sue-lai au leoꞌ na boe. Ubeaꞌ taon, de emi makuraꞌ susue-lalai mara? Ta naraa fa, hete?   
\p
\v 16 Neme emi mai ruma manaku rae, au ta tao fee emi bera bauꞌ. Tehuu ruma bali rae, au dadi lahenda manatipu-manadaiꞌ malelaꞌ, losaꞌ tipu alaꞌ emi fo tuka au hihii-nanau ki.  
\v 17 De, leo beaꞌ? Emi dodoo ma nana, lahenda fo au fee si leo emi naaꞌ reu a, ara tipu-dai emi, do?  
\v 18 Au leleꞌo Titus fo leo emi naaꞌ neti. Au adenu toranoo fekeꞌ esa, fo no ni reu. Dodoo man, nana Titus tipu-dai emi, do? Taꞌa, hete? Titus no au, rupa esaꞌ a. Ami moi-tao hihii-nanauꞌ sama, huu fo ami dua duduꞌa-aafim boe, sama.   
\p
\v 19 Toranoo susue kara! Bate emi afi memeꞌ bisinaꞌ a mai mae, ami masalaꞌe ao mara nai emi matam, do? Taꞌa! Basa-basan fo ami dedea ia nana, Manetualain bubuluꞌ. De ami ta bisa mafuni Ni hata esa boeꞌ. Ami boe mabua-maesa moo Kristus. Ami sue-lai emi, de basa-basan fo ami tao a, nana ela bisa nafofoa emi namahere ma.   
\p
\v 20 Maneniko au dadi leo emi mai, au dale ka dodaꞌ, bosoꞌ losa emi ta dadi lahenda sama leoꞌ au hihii-nanau ki. Bosoꞌ losa ruma rareresiꞌ, ramanasaꞌ, rapeda daleꞌ, ruma afi noi ao-ina heheli nara, ruma dedea ramumulu-ramamaeꞌ lahenda, ratui dedea, ruma koaoꞌ, ma tao liuaari basa-basan. Boso losa au boe dadi lahenda ta sama leoꞌ emi dale hihiim.  
\v 21 Maneniko au leo emi mai, au teisusa-dalehedi, nana huu emi nonoi-tataom. Bosoꞌ losa Manetualain tao na au maeꞌ nai emi matam. Bosoꞌ losa au tao a lahenda rameda raan beraꞌ a, nana huu neme emi mai kadodou na bei tao tadaluꞌ, tehuu ta nau saledale-tuꞌetei nara, fo ratafali mai tuka Manetualain eno roo-tetun. Sira makekeo-makakanuꞌ! Huu fo ruma hohoke lahenda fo ta sira saon fa. Ara tao rupaꞌ ara ma ta maeꞌ ralelaꞌ boeꞌ.   
\c 13  
\s1 Manea matalolole emi masodam  
\p
\v 1 De, ia nana au sakaꞌ uu dama emi kalaiꞌ telu na. Maneniko bea nau neo lahenda, sona bosoꞌ nafarene heni atoran a. Huu fo manaduiꞌ nai Manetualain Susura Makamoi Na nae, “Maneniko bea nau napaneneoꞌ lahenda esa, sona muste lahenda dua do telu sakasii, ma tutuiꞌ esaꞌ a dei, besaꞌ ko sipoꞌ. Kalu ta leo naꞌ fa, sona bosoꞌ sipoꞌ.”\x + \xo 13:1 \xt Tui Seluꞌ Laꞌe Neuꞌ Eno Sodaꞌ a 17:6; 19:15\x*  
\v 2 Maulu na tepoꞌ fo au leo emi naaꞌ eti kalaiꞌ dua na, au afarereneꞌ fee lahenda mana tao tadaluꞌ ara so. Besaꞌ ia au fee seluꞌ asa nafarereneꞌ, sama-sama roo basa lahenda mana tao tadaluꞌ ara. Sama leoꞌ maulu na, au fee nafarene ae, kalu au dadi mai sona ara sipo ra huhuku nara.   
\p
\v 3 Emi saka buti mae, Kristus dedea nesiꞌ au. Maneniko Kristus nau ator emi, sona Ana noi-tao neniꞌ kuasa bauinaꞌ nai emi talada. Huu fo Ana ta noi-tao male-maleꞌ a fa.  
\v 4 Tepoꞌ fo ara raisa Ni nai ai-kake a, memaꞌ Ana male-maleꞌ a, huu fo Ana hai heni kuasa Na. Tehuu Manetualain fee Kristus kuasa, de besaꞌ ia Ana nasoda. Leo mae ita fo riꞌ dadi teuꞌ Ria lahendan, tameda taan ta tabeꞌi fa, tehuu Manetualain fee ita sodaꞌ bebeuꞌ. Huu ria na, de ami bisa malalau emi pake Ria kuasa Na.   
\p
\v 5 Parisaꞌ ao mara emi dalem, fo ela bubuluꞌ mae, emi mamahere tebe-tebe Kristus do, taꞌa? Ria kuasa Na nananitaꞌ nai emi masoda ma do, taꞌa? Uji ao mara leo naꞌ. Huu fo kalu Ana ta nabua-naesa noo emi, sona emi ta dadi meuꞌ Ria lahendan fa.  
\v 6 Kalu emi parisaꞌ ami, sona emi bisa mita Ria kuasa Na nai ami masoda ma. No ria na, ami lui ma ao mara meme uꞌujiꞌ a mai.  
\v 7 Ami hule-haradoi neuꞌ Manetualain, fo ela emi bosoꞌ tao salaꞌ. Ami ta tao daleꞌ mae lahenda rahiiꞌ ami nonoi-tataom do, taꞌa. Leo mae lahenda fekeꞌ tipa ami, tehuu ami mahiiꞌ emi tao malole. Leo mae leoꞌ na boe ta hata-hata fa.  
\v 8 Huu fo ami ta tao sudi ubeaꞌ, ela soaꞌ hata roo-tetuꞌ. Ami tao noi malole.  
\v 9 Huu fo kalu emi bara-aiꞌ, ma ami male-maleꞌ a, sona ami mamahoꞌo. Ami hule-haradoi neuꞌ Manetualain ela tao namanoꞌu-namadai emi namahere mara.  
\v 10 Huu ria na, de leo mae au dooꞌ a oo emi boe, besaꞌ ia au duiꞌ hihii-nanauꞌ ia ra, fo ela fai bea au mai, sona au bosoꞌ dedea hara bera emi bali. Au dadi uuꞌ ita Ramatua na lahenda nadedenun. Tehuu Ana fee au hak ma kuasa ela afofoa emi, ta alulutuꞌ emi fa.   
\s1 Paulus duiꞌ nateꞌe susura na  
\p
\v 11 Toranoo susue kara! Ia nana au dedea-nafada mateꞌe ka, soda-mole, nai susue-lalaiꞌ daleꞌ. Tao matetu basa hihii-nanauꞌ ara. Mamanene matalolole au lelea-nonore ka. Masoda teiꞌ esa ma daleꞌ esa. Emi muste esa malole noo esa. Manetualain, sue-lai emi. Au hule fo Ana sama-sama noo emi laꞌo naroo, ma Ana tulu-fali emi, ela emi masoda mole-dame esa noo esa.   
\p
\v 12 Fai beaꞌ ma emi mateteꞌa aoꞌ, sona meniꞌ dedeꞌiꞌ lalao-lalafuꞌ, fo riꞌ naraa soaneuꞌ Manetualain lahenda lalao-lalafun. Manetualain lahendan fo rai ia, basa si haitua haraoe soda-moleꞌ susue-lalaiꞌ soaneuꞌ emi.   
\p
\v 13 Au hule fo ita Ramatuan Yesus Kristus natudu dale malole Na neuꞌ emi. Au hule fo Manetualain natudu susue-lalain neuꞌ emi. Au hule fo Manetualain Dula-dale Malalao-malalafu Na natudu dale balaroe-balanau Na neuꞌ emi, fo ela emi basa teiꞌ esa ma daleꞌ esa.  
\q2 Noi rinaaꞌ so,  
\q2 Paulus