\id 1TH  
\h 1 Tesalonika 
\toc1 Paulus susura masososa na fee lahenda kamahereꞌ fo rai kota Tesalonika 
\toc2 1 Tesalonika 
\toc3 1Tes 
\mt1 1 Tesalonika  
\mt2 Paulus susura masososa na  
\mt2 fee lahenda kamahereꞌ fo rai kota Tesalonika  
\c 1  
\s1 Soda-moleꞌ  
\p
\v 1 Au, Paulus ma nonoo kara Silas no Timotius, ami malosaꞌ haraꞌ soda-moleꞌ neuꞌ emi.  
\p Ami telu haitua susuraꞌ ia, fee emi lahenda kamahereꞌ nai kota Tesalonika. Emi riꞌ here ao mara tuka Manetualain ita Aman, ma Yesus Kristus ita Ramatua na.  
\p Ami hule neuꞌ Manetualain, fo natudu dale malole Na neuꞌ emi ela emi bisa masoda no tetu-temaꞌ, mole-dame, ma tesatei-tamadaleꞌ.\x + \xo 1:1 \xt Lahenda Nadedenuꞌ ara Tutuin 17:1\x*   
\s1 Paulus hule makasi, huu fo lahenda Tesalonika ra ramahere raroo  
\p
\v 2 Ami hule makasi kose-kose neuꞌ Manetualain, nana huu emi namahere mara. Tuka-tuka faiꞌ, ami hule-haradoi fee emi basa.  
\v 3 Ami mafarene maroo neuꞌ nonoiꞌ fo emi tao a, huu fo emi mamahere Ramatuaꞌ a, ma sue-lai neuꞌ Ana. Emi manenete mahere neuꞌ nonoiꞌ sira, nana huu emi mamahena neuꞌ Ramatua Yesus Kristus. Ami meni basa sira kose-kose leo ita Aman Manetualain mata Na neu.   
\p
\v 4 Toranoo kara emin! Ami bubuluꞌ Manetualain sue-lai emi ma here na emi dadi meuꞌ Ria kileoboboki Nara.  
\v 5 Fai maneuꞌ ara, ami leo Tesalonika meu, ami mafada emi Manetualain Tutui Malole Na. Faiꞌ ria, emi nenene matalolole ami dedea-nafada mara. Emi ta noi mamaneneꞌ a fa, tehuu emi boe mita mataꞌ Manetualain kuasa Na, nemeꞌ Dula-dale Malalao-malalafuꞌ Na mai. Ria riꞌ tao na emi mamahere tebe-tebe neuꞌ Manetualain Tutui Malole Na. Tepoꞌ ria, emi mita mataꞌ ami natuu-napadeim mae, ami tao leoꞌ bea, fo ela emi bubuluꞌ tebe-tebe Manetualain eno-dalan.  
\v 6 Huu no emi maꞌetuꞌ nau tuka Manetualain hihii-nanaun, de emi masoda tuka ami leleo-lalaꞌom, ma masoda tuka Ramatua Yesus leleo-lalaꞌon. Tehuu faiꞌ fo, emi sipoꞌ Tutui Malole a, hapu lahenda ruma rasususaꞌ emi. Leo mae leoꞌ na boe, emi ta matakeko, huu fo Dula-dale Malalao-malalafuꞌ a, riꞌ tao na emi dale mara ramahoꞌo.\x + \xo 1:6 \xt Lahenda Nadedenuꞌ ara Tutuin 17:5-9\x*   
\p
\v 7 No ria na, emi matudu enoꞌ neuꞌ basa lahenda kamahereꞌ fo rai propinsi Makedonia, ma propinsi Akaya.  
\v 8 Tehuu, ta noi nai naa fa, huu fo Manetualain Hara-dasin boe tui-bekan neme emi fo nai Tesalonika, losaꞌ sudi bea-beaꞌ neu. De, ami bei dedea ubeaꞌ bali, huu fo basa lahenda ramanene emi namaherem neuꞌ Manetualain so.  
\v 9 Nai bea-bea oo, lahenda ratuiꞌ rae, fai maneuꞌ ara emi sipoꞌ ami no malole. Boe ma, emi tuꞌu-tapa heni basa sosoko mara, de matafali tuka Manetualain Masoda Matetuꞌ a.  
\v 10 Sira boe ratuiꞌ rae, emi mahani Manetualain Anan Yesus neme nusatetu-ikutemaꞌ a mai. Fai maneuꞌ ara lahenda raisa Ni, tehuu Manetualain feen nasoda seluꞌ. Kalu Manetualain nau fee huhukuꞌ neuꞌ lahenda ra, neuꞌ ko Ramatua Yesus riꞌ soi na ita, teme Manetualain nasa-bolii Na maiꞌ.   
\c 2  
\s1 Paulus nafarene nonoi-tataon nai Tesalonika  
\p
\v 1 Toranoo kara emin! Emi basa bubuluꞌ, fai fo ami meu malalaꞌo Manetualain nonoi-tataon nai Tesalonika, ami ta sota hihiiꞌ fa.  
\v 2 Emi boe mafarene, tepoꞌ fo ami bei ta leo Tesalonika meu, te lahenda fo rai kota Filipi rasusaꞌ ma tao doidoso ami so. Tehuu Manetualain natetea ami dale mara, de maparani tui-beka Manetualain Tutui Malole Na neuꞌ emi, leo mae lehenda dodouꞌ rahohoeꞌ ro ami.\x + \xo 2:2 \xt Lahenda Nadedenuꞌ ara Tutuin 16:19-24; 17:1-9\x*  
\v 3 Tepoꞌ ria, ami meni Tutui Malole ria fee emi nai Tesalonika, ami ta meni nanori napuputaꞌ. Ami ta meu fo tao mamakoa, do mapuputaꞌ emi fa. Taꞌa!   
\p
\v 4 Fai ria, ami meu no dale roos. Manetualain riꞌ nadenu ami fo meni Tutui Malole ria fee neuꞌ emi. Ami ta mae tao mamahoꞌo lahenda dalen, tehuu tao mamahoꞌo Manetualain, huu fo Ria riꞌ teteni ami dale mara nae, roos do pepekoꞌ.   
\p
\v 5 Emi boe bubuluꞌ mae, ami ta lalame maa mara fa, lena-lenaꞌ bali mae saka oꞌontoꞌ sen esa-dua neme emi mai. Manetualain bubuluꞌ ami dale mara.  
\v 6 Ami malalaꞌo nonoi-tataoꞌ ia, ta saka iꞌioꞌ nemeꞌ lahenda dae-bafoꞌ a mai, neme emi mai, do neme lahenda fekeꞌ ara mai.  
\v 7 Ami ia nana Kristus lahenda nadedenu nara. De, ami manuu hak fo tao ao mara sama leoꞌ lahenda bauinaꞌ, tehuu ami ta nau matutua-madedema ao mara leo naꞌ fa. Fai ria, ami dadi sama leoꞌ ana aanaꞌ nai emi mata mara.\f + \fr 2:7 \ft Susura Makamoiꞌ dedea Yunani manaduiꞌ nae, νήπιοι (neipioi). Sosoa na nae, “ana aanaꞌ, ana boki beuꞌ”. Hapu susuraꞌ ruma boe manaduiꞌ nae, ἤπιοι (eipioi). Sosoa na nae, “dale malole”.\f* Ami boe matudu susue mara neuꞌ emi, sama leoꞌ mama bokiꞌ a oꞌo-ifa ana na.  
\v 8 Ami ta meni noi Tutui Malole a fee emi, tehuu ami boe fee heni katemaꞌ ao-ina mara, nana huu ami sue ma emi seli.   
\p
\v 9 Toranoo kara emin! Emi boe tantu bei mafarene ami moi-tao hatu-leledon, losaꞌ mela-maku man seliꞌ ela leoꞌ bea na, ami lepa ao mara masoda ma. Huu no fai fo ami meni Tutui Malole ria fee emi, ami ta nau masosota emi fa.  
\v 10 Neuꞌ fai fo ami sama-sama mo basa emi kamahereꞌ fo nai naa, ami masoda no dale malole, masoda tuka roo na, ma ta tao masalaꞌ hata esa boeꞌ. Emi basa mita mataꞌ, ma Manetualain nita leoꞌ na boe.  
\v 11 Emi bubuluꞌ mae, ami malalau emi basa, sama leoꞌ ama bokiꞌ a nalalau ana nara.  
\v 12 Ami matetea emi basa dale mara, fee nafarereneꞌ neuꞌ emi ma leleꞌo emi, fo leo-laꞌo no malole, ela tao mamahoꞌo Manetualain dale Na. Huu fo Ria riꞌ dadi Maneꞌ. Ana naloo na emi fo dadi meuꞌ anaraun nara. Ria boe naloo na emi fo hapu hada-horomataꞌ sama-sama moo Ni.   
\s1 Manetualain fufuꞌa-aali emi dale mara  
\p
\v 13 Ami ta hahae hule makasi neuꞌ Manetualain, nana huu tepoꞌ fo emi mamanene Tutui Malole Na neme ami mai, emi mamanene Manetualain Hara-dasin, tehuu ta lahenda dae-bafoꞌ a hara-dasin fa, huu fo Manetualain riꞌ fufuꞌa-aali emi lahenda kamahereꞌ ara dale mara.   
\p
\v 14 Toranoo kara emin! Emi besaꞌ ko mulai tuka Manetualain eno Na, tehuu emi nusa isi mara, tao ra sususaꞌ emi so. No ria na, emi mo lahenda kamahereꞌ fo rai propinsi Yudea sama-sama mameda mita susa, huu fo sira hapu susa neme lahenda Yahudi nara mai boe.\x + \xo 2:14 \xt Lahenda Nadedenuꞌ ara Tutuin 17:5\x*   
\p
\v 15 Lahenda Yahudi ruma ta rafaduli neuꞌ Manetualain hihii-nanaun. Huu ria de ara raisa mana nesimata fo Manetualain fee si leo sira reu a. Leoꞌ na boe, raisa Ramatua Yesus. Besaꞌ ia ara rasaka enoꞌ, fo tipa heni ami boe. Ara musu ro basa lahenda ra, de Manetualain ta nahiiꞌ asa.\x + \xo 2:15 \xt Lahenda Nadedenuꞌ ara Tutuin 9:23, 29; 13:45, 50; 14:2, 5, 19; 17:5, 13; 18:12\x*  
\v 16 Lena-lenaꞌ ara tao puteai rupaꞌ ara, ela ami bosoꞌ meni Manetualain Tutui Malole Na fee lahenda fo ta Yahudi fa. Huu fo ara ta nau Manetualain fee soda-moleꞌ neuꞌ lahenda sira. No ria na, sira boe-boe tao rauunu sala-siko nara. Manetualain namanasa, de neuꞌ ko huku si.   
\s1 Paulus nahiiꞌ naneta seluꞌ no lahenda kamahereꞌ fo rai Tesalonika  
\p
\v 17 Toranoo kara emin! Besaꞌ ia, nau do ta nau fa oo, ita esa dooꞌ a no esa, tehuu leo mae ao-paaꞌ a nai dooꞌ a boe, daleꞌ a ta dooꞌ a. Ami saka enoꞌ fo kalu bisa, sona ami mai dama seluꞌ emi, nana huu ami dale mara mahiiꞌ maneta mo emi.  
\v 18 Laꞌi-laꞌi au sakaꞌ ae uu dama emi, tehuu nitu ra malaka na, soa tao puteaiꞌ naroo neuꞌ ami.  
\v 19 Emi bubuluꞌ, tao leo beaꞌ de ami nau meu dama emi? Huu fo ami mamahena emi. Emi riꞌ tao mamahoꞌo ma maloloa ami dale mara. Bea riꞌ hopu nahehere Ramatua Yesus nade Na bali, huu fo noi emi so! Tepoꞌ fo Ramatuaꞌ a natafali main, ami laka mara botiꞌ nana huu emi.  
\v 20 Memaꞌ tebe! Emi riꞌ matetea ma maloloa ami dale mara.   
\c 3  
\s1 Paulus naetuꞌ nan fee Timotius leo Tesalonika neu  
\p
\v 1-2 Sadi emi bubuluꞌ, faiꞌ fo ami laꞌo ela emi, nana ta ami hihii-nanaum fa. Ami mahiiꞌ man seliꞌ meu dama emi tehuu ta bisa fa. Ami ta manenete soꞌ, huu ria na de ami maetuꞌ fo fee Timotius neti. Tehuu au oo Silas mahaniꞌ kota Atena. Timotius, nana ami toranoom ma ami nonoom, no ami eiꞌ esa sama-sama malalaꞌo Yesus Kristus Tutui Malole Na. Ami madenu ni neti nana ela nanori emi ma natetea dale mara, fo ela emi namahere mara boe-boe natea neuꞌ Manetualain.  
\v 3 No ria na, maneniko emi hapu susa boe emi ta matakeko fa. Homu mahere emi namahere mara. Huu fo emi bubuluꞌ mae, lahenda fo ramahere neuꞌ Kristus, neuꞌ ko ara hapu susa leo naꞌ boe.  
\v 4 Faiꞌ fo ami bei sama-sama mo emi a, ami fee nafarereneꞌ neuꞌ emi mae, lahenda fo ramahere neuꞌ Ramatua Yesus, neuꞌ ko hapu susa-lela rupaꞌ ara. Besaꞌ ia basan dadi leoꞌ na so, hete!\x + \xo 3:4 \xt Lahenda Nadedenuꞌ ara Tutuin 17:15\x*   
\p
\v 5 Huu fo, au susa an seli no emi natuu-napadei mara, de au fee Timotius leo Tesalonika neti, ela ami bisa bubuluꞌ mae, emi bei mamahere maroo neuꞌ Ramatuaꞌ a, do taꞌa. Huu fo au dale ka dodaꞌ, boso losa nitu ra malaka na neti fo fufudiꞌ nalaꞌ emi, boe ma masadea Ramatuaꞌ a. Maneniko dadi tao leoꞌ na, sona ami nonoi-tatao maꞌulu ma mana dadi taaꞌ!   
\s1 Timotius fali so, de neni tutuiꞌ neme lahenda kamahereꞌ fo nai kota Tesalonika a mai  
\p
\v 6 Besaꞌ ia Timotius fali nemeꞌ Tesalonika mai so, ana neni tutuiꞌ, de tao na ami mamahoꞌo. Ana tui nae, emi mamahere maroo neuꞌ Kristus, ma emi masue-malai ao maroo esa no esa. Boe ma ana nafada nae, emi dale mara mafarene maroo, de mahiiꞌ maneta mo ami sama leoꞌ ami boe mahiiꞌ maneta mo emi.\x + \xo 3:6 \xt Lahenda Nadedenuꞌ ara Tutuin 18:5\x*   
\p
\v 7-8 Toranoo kara emin! Leo mae ami nai ia, mameda man bera na seliꞌ nana huu hapu susa-lela ta baianaꞌ, tehuu Timotius tutuin na tao na ami mamahoꞌo. Huu fo besaꞌ ia ami bubuluꞌ, emi namahere ma natea naroo neuꞌ Ramatuaꞌ a.   
\s1 Paulus hule-haradoi fee lahenda kamahereꞌ fo rai Tesalonika  
\p
\v 9 De, ami hule makasi dodouꞌ neuꞌ Manetualain no dale namahoꞌo, nana huu emi tuka mahere Ni.  
\v 10 Hatu-leledon ami hule-haradoi laꞌo naroo, fo ela kalu bisa sona ami maneta moo emi bali. Ami nau manori-mafada emi ela matetea-mamemepe emi namahere ma neuꞌ Ramatuaꞌ a.   
\p
\v 11 Ami boe hule neuꞌ Manetualain, ita Aman ma Yesus Kristus, ita Ramatua na, fo soi enoꞌ losaꞌ ami bisa meu maneta seluꞌ mo emi bali.  
\v 12 Ami hule neuꞌ Ramatuaꞌ a fo Ana tao na emi boe-boe esa sue-lai esa. Ma emi boe sue-lai neuꞌ basa lehenda ra, sama leoꞌ ami sue-lai emi.  
\v 13 No ria na, Ana natetea emi dale mara, fo masoda no roos ma malalao-malalafuꞌ, losaꞌ neuꞌ ko Ramatua Yesus natafali mai, no lahenda nara, sona emi mapadeiꞌ nai ita Aman Manetualain mata Na, ta no sala-sikoꞌ soꞌ.   
\c 4  
\s1 Eno masodaꞌ fo neni namahoꞌo neuꞌ Manetualain dale Na  
\p
\v 1 De leo iaꞌ, toranoo kara emin! Ami leleꞌo emi, fo ela leoꞌ bea na, emi masoda mara, tao na Manetualain dale na namahoꞌo, sama leoꞌ hata fo ami manori emi so. Tebe emi masoda tuka basa sira so. Huu fo ita dadi teuꞌ Ramatua Yesus kileobobokin nara so, de ami hule fo emi boe-boe moi-tao mahere seluꞌ bali.  
\v 2 Emi basa bubuluꞌ hata fo ami manorin neuꞌ emi so a, nana pake Ramatua Yesus kuasa Na.  
\v 3 Manetualain hihii-nanaun leo iaꞌ: masoda no malalao-malalafuꞌ! Bosoꞌ makekeo-makakanuꞌ. Bosoꞌ hohoke.  
\v 4 Emi muste manea matalolole ao-ina mara, fo masoda no malalao-malalafuꞌ ela lahenda ra hada-horomata neuꞌ emi.\f + \fr 4:4 \ft Susura Makamoiꞌ dedea Yunani a nae, “Emi muste ator matalolole emi σκεῦος (skeuos) ‘mamana’, mesan”. Dedea σκεῦος (skeuos) ria nana, biasa sosoa na nae, ‘mamanaꞌ’, do, ‘ao-paaꞌ’, do, ‘aoinaꞌ’. Tehuu lahenda ruma rae nai lalaneꞌ ia, ‘mamanaꞌ’ sosoa na nae, ‘saoinaꞌ’. No ria na, lalaneꞌ ia sosoa na nae, “masoda no malalao-malalafuꞌ mo saoina ma”.\f*  
\v 5 Bosoꞌ tuka hihii-nanau ao-paaꞌ a, sama leoꞌ lahenda fo ta nalelaꞌ Manetualain.  
\v 6 Bosoꞌ saka oontoꞌ do hohoke lahenda fo sama-sama ramahere Ramatuaꞌ a. Neuꞌ ko, Ana balas nonoi-tatao tadaluꞌ leo naꞌ ara. Basa sira ami mafada emi laꞌi-laꞌi ma fee nafarereneꞌ neme uluꞌ mai so.  
\v 7 Manetualain naloo na ita, fo dadi teuꞌ lahenda Nara. Ria hihii Na, ita muste tasoda no malalao-malalafuꞌ, bosoꞌ no makekeo-makakanuꞌ sama leoꞌ mana hohoke ra.  
\v 8 Bea ta tuka nanoriꞌ ia, sona ana ta tipa noi ami fa, te ria boe tipa heni Manetualain, huu fo Ria riꞌ fee Dula-dale Malalao-malalafuꞌ Na neuꞌ emi.   
\p
\v 9 Au ameda an ta parluu duiꞌ seluꞌ fee emi laꞌeneuꞌ susueꞌ nai emi daleꞌ, nana huu Manetualain riꞌ nanori emi nae, muste esa sue-lai esa.  
\v 10 Ami mamanene rae emi sue basa toranooꞌ fo rai propinsi Makedonia. Tehuu, toranoo kara emin, e! Besaꞌ ia ami hule fo emi sue-lai lahenda fekeꞌ a lena bali.  
\v 11 Saka enoꞌ fo emi bisa masoda no tetu-temaꞌ. Bosoꞌ sososoꞌ leo lahenda fekeꞌ a nonoi-tataon, esaꞌ ko noiꞌ ria nonoi-tataon. Emi muste moi-tao, fo saka nanaa-nininuꞌ meniꞌ emi sosota heheli mara. Bosoꞌ mamahena lehenda fekeꞌ. Ami fee memaꞌ nafarereneꞌ ia neuꞌ emi neme uluꞌ mai.  
\v 12 Kalu emi masoda mara leo naꞌ, sona emi ta maheta lahenda fekeꞌ. Maneniko lehenda fekeꞌ fo ta ramahere neuꞌ Kristus ara rita emi masoda leoꞌ na mara, sona neuꞌ ko ara rae, “Ae! Tebe lahenda fo riꞌ tuka Ramatua Yesus nana, rasoda tuka roo-tetu na, oo!”   
\s1 Laꞌe neuꞌ Ramatua Yesus natafali mai Na  
\p
\v 13 Toranoo kara emin, besaꞌ ia au nau afada emi hata esa, fo ela leoꞌ bea na, emi bubuluꞌ tebe-tebe laꞌeneuꞌ lahenda mana mateꞌ ara. Ita bubuluꞌ tae, neuꞌ ko lahenda mana mateꞌ ara rasoda faliꞌ. Maneniko Ramatuaꞌ a lahendan ruma mate, sona emi bosoꞌ susa, sama leoꞌ lahenda fo ta bubuluꞌ hata ia.  
\v 14 Ita bubuluꞌ tae, Yesus mate, boe ma, Manetualain fee Ni nasoda seluꞌ. Kalu leoꞌ na, sona neuꞌ ko Manetualain boe fee lahenda kamahere mana mateꞌ ara rasoda seluꞌ. Ma Ana nabubua naa si sama-sama roo Ramatua Yesus.   
\p
\v 15-17 Huu fo kalu Ramatua Yesus natafali mai, ana onda nemeꞌ nusatetu-ikutemaꞌ a leo dae-bafoꞌ a mai, neuꞌ ko hapu haraoe bauinaꞌ fee pareta. Basa boe ma, Manetualain eilaꞌo-limalope nara malakan fo nai nusatetu-ikutemaꞌ a, fee pareta fo fuu fufuuꞌ a. Boe ma Ramatuaꞌ a lahenda mana mate nara rasoda seluꞌ. Sira roo ita fo bei tasoda ia, nanasoꞌu leo oaꞌ a teu, ela sama-sama sipoꞌ Ramatua Yesus mamai Na. Boe ma ita hapu soda-moleꞌ manabasa taꞌa.\x + \xo 4:15-17 \xt 1 Korintus 15:51-52\x*  
\p Emi nenene matalolole, te hata fo ami mafada neuꞌ emi nana, Ramatuaꞌ a riꞌ nafada.  
\v 18 De, emi muste pake nanori-nafadaꞌ ia, fo esa natetea esa dalen.   
\c 5  
\s2 Mahehere ao mara fo sipoꞌ Ramatuaꞌ a mamai Na  
\p
\v 1 Toranoo kara emin! Ami ta parluu duiꞌ mae, Ramatuaꞌ a mamai na, laꞌe liꞌu hida, do bulaꞌ a faiꞌ hida.  
\v 2 Huu fo emi basa bubuluꞌ, Ria mamai Na, nakekeꞌ a, sama leoꞌ naꞌo a mai nai fai hatuꞌ.\x + \xo 5:2 \xt Mateos 24:43; Lukas 12:39; 2 Petrus 3:10\x*  
\v 3 Ria mamai Na sama leoꞌ lahenda ratuuꞌ nee-nee, kekeneu te ara hapu soe boe. Ma sama leoꞌ ina kairus a, kekeneu te nameda bobokiꞌ. Maneniko basa ia ra dadi, sona ita ta bisa tipa heni si soꞌ! Ramatuaꞌ a natafali mai na leo naꞌ boe.   
\p
\v 4-6 Toranoo kara emin! Bosoꞌ losa, Ria mamai Na, noi saaꞌ na emi, sama leoꞌ naꞌo a mai fatilada na, naraa no emi suku mamanee. Bosoꞌ losa leo naꞌ! Ita ta tasoda nai maꞌiu-mahatuꞌ a daleꞌ, sama leo lehenda fekeꞌ fo suku ramanee. Nana huu ita fo tamahere neuꞌ Yesus, tasoda nai makaledoꞌ a so, sadia fo sipoꞌ Ana, ma tanea tatalolole ita masoda na. Basa hihii-nanauꞌ ia ra emi bubuluꞌ asa so!  
\v 7 Lahenda suku nai hatuꞌ, ma lahenda mafuꞌ boe nai hatuꞌ.  
\v 8 Emi bosoꞌ tao leo naꞌ, huu fo ita tasoda nai makaledoꞌ a daleꞌ so. Emi muste manea masoda mara. Maneniko emi mamahere maroo neuꞌ Ramatuaꞌ a, ma esa sue-lai esa, sona sama leoꞌ soldadu fo pake hata babaa araꞌ. Ma kalu emi mamahena maroo neuꞌ Ramatua Yesus fo riꞌ soi-tefa na emi meme Manetualain nasa-boliin mai, sona sama leoꞌ soldadu a babaa laka na pake silaka besi.\x + \xo 5:8 \xt Yesaya 59:17; Efesus 6:13-17\x*   
\p
\v 9 Manetualain ta here na ita, fo ela hapu Ria huhuku nara. Tehuu Ana here na ita, fo hapu soda-moleꞌ, nana huu tamahere neuꞌ Yesus Kristus ita Ramatua Na.  
\v 10 Ana mate kati ita so. De, neuꞌ ko Ana natafali mai, sona leo mae ita mana mate do, bei tasoda do, basan hapu soda-moleꞌ manabasa taꞌa.\x + \xo 5:10 \xt 1 Tesalonika 4:13-18\x*  
\v 11 Huu ria na, pake au dedea-nafadak sira fo esa matetea esa dalen, ma matulu-mafali ao sama leoꞌ maꞌulu na emi tao a.   
\s1 Paulus fee nanoriꞌ neuꞌ lahenda kamahereꞌ fo rai Tesalonika  
\p
\v 12 Toranoo kara emin! Fee hada-horomata neuꞌ ina-ama mauli-malaka uma mamasoꞌ ara. Sira roi-tao mela-maku raan seli fee emi. Ma sira fee nafarereneꞌ ela emi bosoꞌ tuda.  
\v 13 Doruꞌ asa meniꞌ emi susue-lalai mara, huu fo ara roi-tao rahere soa neuꞌ emi. Masoda mole-dame esa no esa.   
\p
\v 14 Toranoo kara emin! Ami sakaꞌ mafarereneꞌ fee emi leo iaꞌ: masaꞌai aomataꞌ ara fo roi-tao tebe-tebe. Matetea dale manadodaꞌ ara, tulu-fali lahenda aanaꞌ ara, ma manenete dale mara mo basa lahenda ra.   
\p
\v 15 Bosoꞌ balas tadaluꞌ no tadaluꞌ. Tao noi nonoi-tatao malole fee basa lahenda ra. Tao malole neuꞌ lahenda fekeꞌ ara, bosoꞌ noi neuꞌ ita lahenda nara.   
\p
\v 16 Mamahoꞌo-matadale maroo.  
\v 17 Hule-haradoi laꞌo naroo.  
\v 18 Leo mae susa do, mamahoꞌo do, hule makasi neuꞌ Manetualain. Huu fo, Ana nahiiꞌ basa lahenda fo tuka Yesus Kristus a tao leo naꞌ.   
\p
\v 19 Bosoꞌ tao ena-babaa neuꞌ Dula-dale Malalao-malalafuꞌ a nonoi-tataon.  
\v 20 Maneniko toranooꞌ esa nae, Dula-daleꞌ a nafada ria haraꞌ neme Manetualain mai, sona bosoꞌ afi mae, toranooꞌ ria dedea-nafadan mudaꞌ a!  
\v 21 Muste parisaꞌ matalolole dedea-nafadaꞌ ria, fo bubuluꞌ mae, huu na tebe-tebe nemeꞌ Manetualain mai, do taꞌa. Kalu tebe, sona tuka leo.  
\v 22 Maheoꞌ memeꞌ basa tadaluꞌ ara mai.   
\s1 Paulus duiꞌ nateꞌe susura na  
\p
\v 23-24 Au hule-haradoi neuꞌ Manetualain ela tao malalao-malalafuꞌ emi. Ria riꞌ, tao na ita tamole-tadame ao esa no esa. No ria na, fai fo ita Ramatuan Yesus Kristus natafali mai, emi bisa mapadeiꞌ nai Ria mata Na ta no sala-sikoꞌ soꞌ. Tebe! Ramatua Yesus naloo na emi dadi meuꞌ Ria lahenda Nara. Ria dale na roos. Ana dedea ubeaꞌ, sona tao natetun. De ita bubuluꞌ tae, neuꞌ ko Ana napipipi-nalalaꞌo emi no malalao-malalafuꞌ, leo Manetualain mata Na meu.   
\p
\v 25 Toranoo kara emin! Bosoꞌ mafarene henin fo hule-haradoi fee ami nai ia.   
\p
\v 26 Au hule ela emi fee haraoe soda-moleꞌ neuꞌ basa Manetualain lahenda kamaheren fo rai na.   
\p
\v 27 No Ramatua Yesus kuasa Na emi muste lees au susurak ia, fee basa lahenda kamahereꞌ ara.   
\p
\v 28 Au hule neuꞌ ita Ramatuan Yesus Kristus, fo natudu dale malole Na neuꞌ emi basa.  
\p Teꞌe adaꞌ ia leo,  
\q3 Soda-moleꞌ  
\q3 Paulus