\id 1PE  
\h 1 Petrus 
\toc1 Petrus susura masososa na 
\toc2 1 Petrus 
\toc3 1Pet 
\mt1 1 Petrus  
\mt2 Petrus susura masososa na  
\c 1  
\s1 Soda-moleꞌ  
\p
\v 1-2 Susuraꞌ ia neme au mai, Petrus, Yesus Kristus lahenda nadedenun.  
\p Au duiꞌ susuraꞌ ia fee emi fo riꞌ Manetualain lahenda teteka-heheren. Emi dadi lahenda manamai fo riꞌ kofela mabasa mamanaꞌ dodouꞌ, nai propinsi Pontus, propinsi Galatia, propinsi Kapadokia, propinsi Asia, ma propinsi Bitinia.  
\p Toranoo susue kara! Neme masososa na mai, Amaꞌ Manetualain teka-here memaꞌ emi, fo dadi meuꞌ Ria lahendan. Ria Dula-dale Na boe, tao na emi dadi lalao-lalafuꞌ soaneuꞌ Ana, ela emi bisa tao tuka basa pareta fo Yesus Kristus feen neuꞌ emi a. Ma kalu emi tao tuka Ria pareta Na katemaꞌ, ria sama leoꞌ Ramatuaꞌ a pisi Yesus daa Na neuꞌ emi, fo dadi tanda nae, emi dadi lalao-lalafuꞌ soaneuꞌ Ana.  
\p Au hule-haradoi fo Manetualain natudu dale malole Na neuꞌ emi, ela emi bisa masoda tamba faiꞌ, tamba tetu-temaꞌ, mole-dame, ma tesatei-tamadaleꞌ.   
\s1 Maneniko ita tamahere Ramatuaꞌ a, sona ita tiadea-radaara neuꞌ Ana  
\p
\v 3 Basa iꞌio-oꞌoa a soaneuꞌ Manetualain! Ria nana, ita Ramatuan Yesus Kristus Papa Na. Huu no Ramatuaꞌ a dale lilo na, de Ana talalu kasian neuꞌ ita. Yesus Kristus mate, boe ma Ana nasoda seluꞌ. De, maneniko Kristus tao na ita tasoda, Ana fee soda bebeuꞌ, sama leoꞌ boki natafaliꞌ ita. Ita tamahere taroo Kristus, huu fo ita tamahena ma tamahere tae, neuꞌ ko Ana naboi-nasamao natalolole ita.  
\v 4 Nai dae-bafoꞌ ia, maneniko amaꞌ esa mate, sona foa ela ria hata-heton neuꞌ ana nara. Leoꞌ na boe, Yesus peda-fua ela ita posakaꞌ nai lalai. Tehuu posakaꞌ ria ta bisa puru-poꞌo, ta bisa nalulutuꞌ, ma ta bisa sapu-lalo.  
\v 5 Emi mamahere mae, Manetualain nanuu kuasa ela tulu-fali emi. Ana naboi-nasamao emi, ma nanea emi, ela bosoꞌ hapu esa tao nalulutuꞌ emi. Ma kalu dae-bafoꞌ a noe, neuꞌ ko Ana nau natudu, Ana soi-tefa tao emi leoꞌ bea.   
\p
\v 6 Huu ria na, de emi dale mara ramahoꞌo, leo mae besaꞌ ia mameda man beraꞌ a, nana huu emi muste hapu susa rupaꞌ ara.  
\v 7 Manetualain nataaꞌ ita hapu sosobaꞌ ara, fo nau fefei-fofora ita namahere na neuꞌ Ana. Maneniko ita lui teme sosobaꞌ a mai, sona natudu nae, ita tamahere tebe-tebe, ma roo-tetuꞌ. Ita bisa tararaaꞌ ana noo lilo-pilas. Ita muste tatanoe lilo-pilas neuꞌ ai-pilaꞌ, fo ela ono heni kekeo na dei, besaꞌ ko ita hapu lilo-pilas teaꞌ a. Sekona te, tuka Manetualain duduꞌa-aafin, sona ita namahere na beli na lena lilo-pilas. De, maneniko ita namahere na lui neme sosoba leo naꞌ a, sona fai fo Yesus Kristus natafali mai, neuꞌ ko Manetualain io ita, boe ma Ria natudu ita rela-saꞌan, ma Ana hada-horomata neuꞌ ita.   
\p
\v 8 Leo mae emi bei ta mita mataꞌ Yesus, tehuu emi sue-lai Ni. Leo mae besaꞌ ia emi ta mita Ni, tehuu emi mamahere Ni. Emi boe mamahoꞌo-matadale seli uukuꞌ, leo mae ta hapu dedea lakaꞌ matetu-maraaꞌ ela nafada lahenda laꞌeneuꞌ emi dale namahoꞌo ma.  
\v 9 Huu no emi mamahere Ni, de emi seseba-babaem riꞌ Manetualain soi-tefa na emi meme sala-siko mara mai.   
\p
\v 10 Manetualain mana nesimata fai ulu nara parisaꞌ ralulutuꞌ nau bubuluꞌ ratalolole, Ramatuaꞌ a soi-tefa leo beaꞌ lahenda ra reme sira sala-siko nara mai. Mana nesimata sira bubuluꞌ memaꞌ laꞌeneuꞌ Ramatuaꞌ a natudu dale malole na neuꞌ emi, nana huu Ana sadia memaꞌ nau soi-tefa emi.  
\v 11 Kristus Dula-dale Na noi-tao nai sira dale nara, fo nafada memaꞌ nae, neuꞌ ko Kristus muste hapu susa, Ana muste doidoso tao leoꞌ bea. Basa sira dei, besaꞌ ko Ramatuaꞌ a soꞌu nadedema Ni. Huu ria na, de mana nesimata ra nau ratatane fai hidaꞌ hihii-nanauꞌ ia ra dadi.  
\v 12 Boe ma Kristus Dula-dale Na, nafada mana nesimata sira nae, sira ta rita fa, tehuu emi riꞌ mita hihii-nanauꞌ sira. Besaꞌ ia emi mamanene hihii-nanauꞌ ia ra boe, huu fo Ramatuaꞌ a Dula-dale Malalao-malalafu Na, nai nusatetu-ikutemaꞌ a fee lahenda fekeꞌ mai, fo neu tui-beka Ramatuaꞌ a Tutui Malole Na soaneuꞌ emi. Sekona te, Ramatuaꞌ a eilaꞌo-limalopen rai nusatetu-ikutemaꞌ a boe, rahiiꞌ rita hihii-nanauꞌ ia ra.   
\s1 Ramatuaꞌ a nadenu fo ita tasoda lalao-lalafuꞌ  
\p
\v 13 Huu ria na, de ita muste sadia ela talelaꞌ tatalolole basa hihii-nanauꞌ ia ra. Manea matalolole fo emi duꞌa-afi roo-tetuꞌ. Mahehere ao mara fo mamahere maroo Yesus Kristus losaꞌ Ana natafali mai. Nana huu ledo-fai ria, te Ramatuaꞌ a natudu Ria dale malole Na neuꞌ emi.  
\v 14 Emi muste mamania-mamanene neuꞌ Manetualain, sama leoꞌ anaꞌ ara ramania-ramanene neuꞌ ina-ama nara. Maulu na, emi bei ta bubuluꞌ Ramatuaꞌ a eno masoda roo-tetu Na. Tehuu besaꞌ ia emi bubuluꞌ so. De, emi bosoꞌ boe masoda tuka hihii-nanau tatao tadalu mara bali. Huu fo emi eno masoda paraam ria.  
\v 15 De, besaꞌ ia emi muste lalao-lalafuꞌ. Huu fo Ramatuaꞌ a malalao-malalafuꞌ. Ria riꞌ naloo emi fo dadi meuꞌ ana nara. Huu ria na, emi masoda ma katemaꞌ muste lalao-lalafuꞌ.  
\v 16 Huu fo manaduiꞌ nai Susura Makamoiꞌ a nae, “Emi muste lalao-lalafuꞌ, nana huu Au lalao-lalafuꞌ.”\x + \xo 1:16 \xt Malaka Agama ra Atoran 11:44-45; 19:2; 20:7\x*   
\p
\v 17 Emi mahiiꞌ dedea mo Manetualain sama leoꞌ Ria nana emi Amam. Ria boe dadi Mana Ee Dedeaꞌ, fo neuꞌ ko parisaꞌ lahenda ra esa-esaꞌ ko nonoi-tataon. Tehuu Ria ta sama leo mana ee dedea fekeꞌ ara fa. Ana naetuꞌ lahenda dedean no matetuꞌ, ma ta nabenuꞌ fa. Huu ria na, de emi muste masoda besa-besa. Emi sama leoꞌ lahenda manamai fo leo lalai nai dae-bafoꞌ ia.   
\p
\v 18 Emi bubuluꞌ mae, Kristus tifa-bae etu, ela soi-tefa emi meme masodam fo ta nanuu huu-pedaꞌ. Emi sipo masoda rupa leo naꞌ a, neme bei-baꞌi mara mai, sama leoꞌ hata posakaꞌ. Tehuu mafarereneꞌ, te Yesus tifa-bae emi ta pake lilo-pilas do doi perak fo neuꞌ ko sapu-lalo.  
\v 19 Tehuu Ana tifa-bae pake Ria daa mabeli bera Na! Ana mate sama leoꞌ ara hala bibi-lopo anaꞌ sala taaꞌ, fo tao tutunu-hohotuꞌ.   
\p
\v 20 Tepoꞌ fo Manetualain bei ta adu dae-bafoꞌ ia, te Ana bubuluꞌ memaꞌ basa-basan fo neuꞌ ko Kristus tao a. Tehuu maulu na, Manetualain bei ta natudu Kristus neuꞌ lahenda nai dae-bafoꞌ ia. Besaꞌ ia, besaꞌ ko Ana natudu Kristus fo dadi ua-naleꞌ soaneuꞌ emi.  
\v 21 Huu no Kristus nonoi-tataon, de emi bisa mamahere Manetualain. Huu fo Ana fee Kristus nasoda seluꞌ, ma soꞌu nadedema Ni. Manetualain tao leo naꞌ fo ela emi mamahere Ni, ma mamahehenaꞌ Ana tao tuka hata fo Ana helu memaꞌ so a.   
\p
\v 22 Emi tao tuka matetu na. De besaꞌ ia emi bisa moi-tao mela-maku soaneuꞌ Ramatuaꞌ a. Ria riꞌ tao na emi sue-lai matetuꞌ toranooꞌ lahenda kamahereꞌ ara. Emi muste tebe-tebe masue-malaiao, huu fo emi dale mara lalao-lalafuꞌ.  
\v 23 Besaꞌ ia, emi hapu masoda bebeuꞌ so. Tehuu masoda bebeuꞌ ia, emi ta hapu neme emi ina-amam fo riꞌ neuꞌ ko mate si rai dae-bafoꞌ ia, tehuu emi hapu neme ita Aman masoda manaetu-manabasa taaꞌ a nai nusatetu-ikutemaꞌ. Emi masoda bebeu ma hapun nesiꞌ Ramatuaꞌ a Hara-dasin. Ria Hara-dasin, neni masoda roo-tetuꞌ manaetu-manabasa taaꞌ.  
\v 24 Huu fo Ramatuaꞌ a Susura Makamoi Na manaduiꞌ nae,  
\q1 “Lahenda dae-bafoꞌ a, sama leoꞌ nau mooꞌ, do buna leteꞌ esa.  
\q2 Sira lole-napun, ta ranenete fa.  
\q1 Nau a, mamale.  
\q2 Bunaꞌ a boe, ono henin.  
\q1 Noi hate mataꞌ fo mate si, ma sapu-lalo.   
\q1
\v 25 Tehuu ita Ramatua na Hara-dasin,  
\q2 nanenete losa doo na neu.”  
\p Ramatuaꞌ a Hara-dasin, nana riꞌ Tutui Malole fo ami tui-bekan soaneuꞌ emi.\x + \xo 1:25 \xt Yesaya 40:6-8\x*   
\c 2  
\s1 Ita dadi teuꞌ Ramatuaꞌ a lahenda lalao-lalafun  
\p
\v 1 De, emi bosoꞌ tao tadaluꞌ hata esa boe. Bosoꞌ tipu-dai lahenda. Bosoꞌ dea-mataꞌ. Bosoꞌ ete aoꞌ. Bosoꞌ mamumulu-mamamaeꞌ lahenda. Tuꞌu heni basa sira leo!  
\v 2 Ana boki beuꞌ ara rahiiꞌ susu reme mama nara susu oen mai. Leoꞌ na boe, emi dale mara muste rahiiꞌ bubulu-malelaꞌ Ramatuaꞌ a Hara-dasin. Huu fo ria riꞌ tao na emi namahere ma tamba faiꞌ tamba tea-mepeꞌ. De emi bisa mamatua nai Yesus daleꞌ, fo masoda tuka Ramatuaꞌ a hihii-nanaun.  
\v 3 Huu fo emi mameda mita ita Ramatua na dale malole na so.\x + \xo 2:3 \xt Sosoda Iꞌio-oꞌoaꞌ ara 34:10\x*   
\p
\v 4 Mabua-maesa mo Kristus. Huu fo Ria sama leoꞌ batu esa, tehuu batu masodaꞌ ria. Tukan ara tuꞌu heni batu ria, nana huu ara afi rae, batu ria ta nanuu sosoa-raraaꞌ. Tehuu Manetualain tao Ni neuꞌ hata mabeli beraꞌ, boe ma here naa Ni, fo dadi batu natendeꞌ penting.  
\v 5 Emi boe muste mabua-maesa mo Kristus, fo ela Manetualain pake emi. No ria na, emi sama leoꞌ batu fo Ramatuaꞌ a here nan ela tao uma fee Ria Dula-dale Na. Emi batu masodaꞌ, sama leoꞌ Kristus boe. Emi sama leoꞌ malaka agama fo rasoda lalao-lalafuꞌ soaneuꞌ Ramatuaꞌ a. Ria sama leoꞌ emi meni fee Ni tutunu-hohotuꞌ. Emi tutunu-hohotu mara tao ramahoꞌo Ramatuaꞌ a dale Na, nana huu Yesus Kristus mate soaneuꞌ emi basa.  
\v 6 Huu fo manaduiꞌ nai Ramatuaꞌ a Susura Makamoi Na daleꞌ nae,  
\q1 “Mete dei! Huu fo Au atuu-atende batu masososaꞌ a,  
\q2 nai kota Yerusalem,  
\q3 fo riꞌ ara hule rae, ‘kota Sion’.  
\q1 Au riꞌ here batu ria.  
\q2 Ria beliꞌ mesan soaneuꞌ Au.  
\q1 De, lahenda bea namahere Ni,  
\q2 neuꞌ ko ta maeꞌ hata esa boeꞌ.”\x + \xo 2:6 \xt Yesaya 28:16\x*   
\p
\v 7 Yesus, sama leoꞌ batu ria. Boe ma Ria beliꞌ mesan soaneuꞌ lahenda fo ramahere Ni. Tehuu soaneuꞌ lahenda fo ta ramahere Ni, Ramatuaꞌ a Susura Makamoi na manaduiꞌ nae,  
\q1 “Batu fo tukan ara tuꞌu henin a,  
\q2 besaꞌ ia dadi neuꞌ  
\q3 batu masososa penting.”\x + \xo 2:7 \xt Sosoda Iꞌio-oꞌoaꞌ ara 118:22\x*   
\p
\v 8 Manaduiꞌ boe nae,  
\q1 “Hapu batu tao na lehenda natundu.  
\q2 Hapu batu tao na lahenda ra tuꞌu reu.”\x + \xo 2:8 \xt Yesaya 8:14-15\x*  
\p Ara tuꞌu reu, nana huu ara ta nau tao tuka Ramatuaꞌ a Hara-dasin. Huu fo Ramatuaꞌ a ator memaꞌ leo naꞌ, ela ara tuꞌu reu.   
\p
\v 9 Tehuu emi ta leo naꞌ fa. Huu fo emi dadi meuꞌ Ramatuaꞌ a lahenda teteka-heheren so. Emi dadi meuꞌ Ria nuu-enan. Emi sama leoꞌ malaka agama a nalalau maneꞌ. Emi boe sama leoꞌ Ramatuaꞌ a lahenda parentan fo rasoda lalao-lalafuꞌ. Emi dadi leo naꞌ, fo ela emi bisa tui-beka fee lahenda laꞌeneuꞌ Manetualain dale malolen, fo riꞌ Ana taon soaneuꞌ emi a. Ana nadenu emi fo saledale-tuꞌetei mara ma moi-tao malole. Ria sama leoꞌ emi kalua meme maiuꞌ a mai, de masoda nai Ramatuaꞌ a makaledon.\x + \xo 2:9 \xt Kalua reme Masir 19:5-6; Yesaya 43:20, 21; Tui Seluꞌ Laꞌe Neuꞌ Eno Sodaꞌ a 4:20; 7:6; 14:2; Titus 2:14; Yesaya 9:2\x*  
\v 10 Maulu na emi dadi sama leoꞌ kileobobokiꞌ sosoa-raraa taaꞌ esa. Tehuu besaꞌ ia emi dadi meuꞌ Manetualain kileobobokin so. Maulu na emi ta nau sipoꞌ Ramatuaꞌ a dale kasian na neuꞌ emi a. Tehuu besaꞌ ia, emi sipoꞌ so.\x + \xo 2:10 \xt Hosea 2:23\x*   
\s1 Tanea tatalolole ela ita tasoda roo-tetuꞌ  
\p
\v 11 Toranoo susue kara! Emi sama leoꞌ fui nai dae-bafoꞌ ia, nana huu emi lahenda manamai. Huu ria na, de au hule emi bosoꞌ sama leoꞌ lahenda fekeꞌ nai dae-bafoꞌ ia, fo tao tadaluꞌ tuka sira hihii-nanaun. Huu fo hapu natatiaoꞌ esa nai emi dale mara. Nana riꞌ dale fo nahiiꞌ tao tadaluꞌ natati soaꞌ daleꞌ fo nahiiꞌ tao malole. De, bosoꞌ mataaꞌ daleꞌ fo nahiiꞌ tao tadaluꞌ a, naseki emi. Maneniko leo naꞌ, sona emi malulutuꞌ!  
\v 12 Lahenda fo riꞌ ta ralelaꞌ Ramatuaꞌ a, emi manea matalolole ela masoda roo-tetuꞌ nai sira matan. No ria na, uniꞌ ko leo rafararaꞌu rapaneneoꞌ emi, sona ara rita noi emi malole ma. Boe ma maneniko Kristus natafali mai, sona neuꞌ ko sira siꞌ soꞌu radedema Manetualain, nana huu emi nonoi-tatao malole ma.   
\s1 Ita muste tamania-tamanene neuꞌ lahenda fo homu kuasa  
\p
\v 13 Ita Ramatua na nau emi mamania-mamanene neuꞌ lahenda fo homu kuasa. Conto leo-leoꞌ: mamania-mamanene neuꞌ maneꞌ, huu fo ria dadi mauli-malaka madema.  
\v 14 Mamania-mamanene neuꞌ gubernor, huu fo maneꞌ a nadenu ni ela huku lahenda mana tao tadaluꞌ ara, ma ana io lahenda fo tao hihii-nanau roo-tetuꞌ ara.  
\v 15 Huu ria na, de Manetualain nahiiꞌ emi tao roo-tetuꞌ ara, ela lahenda koa-pakanaaꞌ fo ta bubuluꞌ hata esa boeꞌ, ta hapu neteꞌ fo rapaneneoꞌ emi.  
\v 16 Leo mae emi dadi lahenda poꞌilotaꞌ, de manuu hak tao tuka emi hihii ma, tehuu bosoꞌ pake mafararaꞌu hak ria, fo tao hihii-nanau tadaluꞌ. Pake hak ria fo moi-tao soaneuꞌ Ramatuaꞌ a, huu fo emi dadi meuꞌ Ria nuu-enan.  
\v 17 Emi muste fee hada-horomata neuꞌ basa lahenda ra. Emi muste sue-lai basa lahenda fo ramahere Kristus. Emi muste masoda natetu-naraa nai Ramatuaꞌ a matan, huu fo neuꞌ ko Ria riꞌ naetuꞌ huhuku soaneuꞌ emi. Ma emi muste fee hada-horomata neuꞌ mana pareta ra.   
\s1 Ita muste tanenete nai susa daleꞌ, tuka Kristus conto na  
\p
\v 18 Ata ra! Mamania-mamanene neuꞌ emi malaka mara, ma fee hada-horomata neuꞌ asa. Bosoꞌ mamania-mamanene noi malaka dale malole, ma balaroe-balanauꞌ. Uniꞌ ko leo emi malaka ma tadalu naan seli, tehuu emi muste mamania-mamanene neuꞌ ana boe.  
\v 19 Kalu emi malaka ma huku nafararaꞌu emi bea, leo mae emi ta tao salaꞌ fa, ma kalu emi manenete nai susa ria daleꞌ, nana huu mafarene Ramatuaꞌ a hihii-nanaun soaneuꞌ emi, sona neuꞌ ko Manetualain natudu Ria dale malole Na neuꞌ emi.  
\v 20 Uniꞌ ko leo emi tao salaꞌ, boe ma hapu fefepa-liliꞌu, ma kalu emi mahaniꞌ susa ria daleꞌ, sona onto ubeaꞌ? Taꞌa hete? Tehuu maneniko emi hapu susa, nana huu emi tao malole, boe ma emi manenete, sona Ramatuaꞌ a tao daleꞌ neuꞌ emi.  
\v 21 Kristus nahiiꞌ emi tao malole, leo mae emi hapu susa. Huu fo soaneuꞌ ita, de Ana lepa-nasaa susa. No ria na, Ana dadi conto, ela ita tuka Ni, sama leoꞌ ita molo-tabu tuka Ria ei ree Na.  
\v 22 Ramatuaꞌ a Susura Makamoi Na manaduiꞌ nae,  
\q1 “Ana ta parnaa tao salaꞌ.  
\q2 Ta hapu dedea napuputaꞌ a kalua neme Ria bafa Na mai fa.”\x + \xo 2:22 \xt Yesaya 53:9\x*   
\p
\v 23 Faiꞌ fo ara dedea radadae Ni, Ana ta balas fa. Fai fo Ana hapu susa, Ana ta nabibiiꞌ nau balas fa. Tehuu Ana fee heni ao-ina Na leo Manetualain lima Na neu. Huu fo Ana namahere nae, Ramatuaꞌ a nana, Mana Ee Dedea Matetuꞌ.\x + \xo 2:23 \xt Yesaya 53:7\x*  
\v 24 Fai fo Kristus maten nai ai-kake a, Ana lepa-nasaa na ita sala-sikon. Ana tao leo naꞌ, de ita taa tao salaꞌ soꞌ, tehuu ita tao noi roo-tetuꞌ. Huu fo Ana kati ita, de sipo na ita huhuku na. Huhukuꞌ ria tao naa Ni hinaꞌ-hinaꞌ mesan, losa Ana mate. Hinaꞌ fo riꞌ tao namate Ni a, puli na emi so.\x + \xo 2:24 \xt Yesaya 53:6\x*  
\v 25 Huu fo maulu na emi sama leoꞌ bibi-lopo manasala-manamopoꞌ. Tehuu besaꞌ ia emi fali leo Ramatuaꞌ a eno roo-tetu na meu so. Ria riꞌ nanea ma naboi-nasamao natalolole emi, sama leoꞌ manafoo esa nanea ma naboi ria bibi-lopo nara.   
\c 3  
\s1 Lelea-nonoreꞌ soaneuꞌ saoina-saotouꞌ ara  
\p
\v 1 Sao-inaꞌ ara! Bisinaꞌ a au ae ita muste tamania-tamanene neuꞌ lahenda fo homu kuasa. De, emi muste mamania-mamanene neuꞌ sao-tou mara. Mafarereneꞌ, te sao-touꞌ ruma ta nau tao tuka Ramatuaꞌ a Hara-dasin. Leo mae ara ta nau ramanene emi dedeam, tehuu neuꞌ ko ara ramahere Ramatuaꞌ a, nana huu emi masoda ma.\x + \xo 3:1 \xt Efesus 5:22; Kolose 3:18\x*  
\v 2 Huu fo ara rita emi tao basa-basan no dale roos ma lalao-lalafuꞌ nai Manetualain matan.   
\p
\v 3 Inaꞌ ara lole-napun, nana ta neme hata fo nananitaꞌ nai deaꞌ fa. Conto leo-leoꞌ: ralane rupaꞌ lakadoo nara, do barias seli uukuꞌ, pake lilo-henu, do pake kakao-papake mabeli manori taaꞌ.\x + \xo 3:3 \xt 1 Timotius 2:9-10\x*  
\v 4 Tehuu bisa tao na inaꞌ ara napuꞌ mesan nana riꞌ: sira dalen fo ta nananitaꞌ neme deaꞌ mai. Conto leo-leoꞌ: dale balaroe-balanauꞌ, ma hara taaꞌ. Huu fo lole-napu rupa leo naꞌ a, ta sapu-lalo leo mae inaꞌ a namalasi so. Tuka Ramatuaꞌ a uuku-susudin, lole-napu rupa leo naꞌ a, beliꞌ mesan.  
\v 5 Fai a ulu na, inaꞌ dale lalao-lalafuꞌ fo riꞌ ara ramahere Manetualain, sira lole-napun leo naꞌ. Ara ramania-ramanene neuꞌ sira sao-tou nara boe.  
\v 6 Hai conto neme besa Sara mai. Ana namania-namanene neuꞌ sao ni Abraham. Ria boe nataaꞌ sao-tou na fo ator ana. Emi inaꞌ ara boe muste tao tuka Sara leleo-lalaꞌon, fo tao malole ma taa manuu dale bibiiꞌ fa.\x + \xo 3:6 \xt Tutui Masososaꞌ 18:12\x*   
\p
\v 7 Sao-touꞌ ara! Masoda daleꞌ esa moo sao-ina mara. Dodoo-tatai ma hata malole ubeaꞌ soaneuꞌ sao-ina ma, sona tao tukan. Fee hada-horomata neuꞌ ana nai basa hihii-nanauꞌ ara, nana huu inaꞌ a baraꞌai na ta sama noo touꞌ a baraꞌai na fa. Emi basa sipo belaꞌ posakaꞌ fo Manetualain feen neuꞌ emi a. Riꞌ sipo belaꞌ masoda bebeuꞌ fo Ramatuaꞌ a feen neuꞌ emi neme Ria dale malole Na mai. Tehuu emi sao-touꞌ ara muste masoda daleꞌ esa moo sao-ina mara, ela maneniko emi dua soꞌu dale mara hule-haradoi, fo hule hihii-nanauꞌ esa neme Ramatuaꞌ a mai, sona Ana namanene emi.\x + \xo 3:7 \xt Efesus 5:25; Kolose 3:19\x*   
\s1 Leo mae emi tao malole boe, neuꞌ ko emi hapu susa  
\p
\v 8 Toranoo susue kara! Mateꞌe na, au nau afada hihii-nanauꞌ esa. Emi basa muste masoda daleꞌ esa boe. Maneniko lahenda esa susa-lela do namahoꞌo, sona emi fekeꞌ ara muste leo naꞌ boe. Sue-lai lahenda fo ramahere Kristus. Matudu dale balaroe-balanauꞌ esa no esa. Bosoꞌ matutua-madedema ao mara, emi muste manuu dale balaroe-balanauꞌ.  
\v 9 Bosoꞌ balas tadaluꞌ no tadaluꞌ. Kalu lahenda doꞌi-ali emi, sona bosoꞌ balas meniꞌ dodoꞌi-aaliꞌ. Tehuu hule fo Ramatuaꞌ a tao malole soaneuꞌ ana. Ramatuaꞌ a naloo emi dadi meuꞌ Ria lahendan, fo ela emi bisa sipo malole neme Ria mai.  
\v 10 Huu fo mana duiꞌ nai Ramatuaꞌ a Susura Makamoi Na nae,  
\q1 “Lahenda bea saka sodaꞌ malole,  
\q2 ma saka teu-fai loa-naruꞌ,  
\q1 lahenda ria muste nanea bafa na fo bosoꞌ dedea tadaluꞌ,  
\q2 ma bosoꞌ dedea napuputaꞌ.   
\q1
\v 11 Ria muste saledale-tuꞌetei na, ma bosoꞌ tao salaꞌ bali,  
\q2 tehuu natafali fo tao malole.  
\q1 Ana muste nanori fo mole-dame no basa lahenda,  
\q2 boe ma saka enoꞌ ela malole no si.   
\q1
\v 12 Huu fo ita Ramatua na relu-natanae  
\q2 lahenda fo nasoda roo-tetuꞌ.  
\q2 Ma Ana nau namanene sira huhule-haradoi na.  
\q1 Tehuu ita Ramatua na soaꞌ naroo  
\q2 lahenda fo tao tadaluꞌ.”\x + \xo 3:12 \xt Sosoda Iꞌio-oꞌoaꞌ ara 34:12-17\x*   
\p
\v 13 Maneniko emi makate tao roo-tetuꞌ, sona bea nau tao tadadalu emi bali? Taꞌa hete?  
\v 14 Leo mae esa tao nasususaꞌ emi, nana huu emi tao malole tehuu emi maua-manale. Maneniko lahenda fo ta nalelaꞌ Kristus, ana biiꞌ nana huu hihii-nanauꞌ esa, sona emi bosoꞌ bii-mamataꞌu leoꞌ na. Emi duduꞌa-aafim bosoꞌ liuaari ma bosoꞌ susa sama leoꞌ sira.\x + \xo 3:14 \xt Mateos 5:10\x*  
\v 15 Matatama emi dale mara, nana huu emi sipoꞌ Kristus nai dale mara, de dadi neuꞌ emi Ramatua Malalao-malalafu ma.  
\p Uniꞌ ko leo lahenda hule emi fo mafada namahere ma, ma ubeaꞌ taon de emi mamahena mae, neuꞌ ko Kristus tao na basa-basan dadi malole, sona emi muste sadia mataa si.\x + \xo 3:15 \xt Yesaya 8:12-13\x*  
\v 16 Tehuu emi muste mataa meniꞌ dale balaroe-balanauꞌ, ma fee hada-horomata neuꞌ asa, fo ela ara bubuluꞌ emi tao malole neme dale lalao-lalafu mara mai. Leo mae emi tao malole leoꞌ na, tehuu tantu ruma dedea ratuda emi, nana huu emi mabua-maesa mo Kristus. De, maneniko emi tao malole maroo, sona sira fo riꞌ ramumulu-ramamaeꞌ emi a, neuꞌ ko ara maeꞌ.  
\v 17 Maneniko tuka Ramatuaꞌ a hihii-nanaun, sona bosoꞌ mafarene henin, te malole lenaꞌ emi hapu susa nana huu tao malole; bosoꞌ huu no emi tao salaꞌ.   
\q1
\v 18 Huu fo Kristus mate laiꞌ esa,  
\q2 nana huu ita lahenda dae-bafoꞌ a tao salaꞌ.  
\q1 Ria fo riꞌ roo-tetuꞌ,  
\q2 mate soaneuꞌ ita lahenda makekeo-makakanuꞌ.  
\q1 Ana mate fo ela emi bisa malole seluꞌ mo Manetualain.  
\q1 Kristus, lahenda dae-bafoꞌ sama leoꞌ ita boe.  
\q2 Lahenda raisa Ni,  
\q2 tehuu, Ramatuaꞌ a Dula-dale Na feen nasoda seluꞌ.   
\p
\v 19 Dula-daleꞌ ria boe no Ni neu nanori-nafada dula-daleꞌ fo nanaenaꞌ rai mamanaꞌ esa, sama leoꞌ bui a.  
\v 20 Sira nana, siꞌ fai a ulu na lahenda fo ta nau ramanene neuꞌ Ramatuaꞌ a. Tepoꞌ ria baꞌi Noh tao ofa bauinaꞌ. Ramatuaꞌ a nahani fo nau nita lahenda ra tao tuka Ria hihii-nanaun, tehuu ara ta nau tao tuka fa. Huu ria na, de nai faa inaꞌ ria noi lahenda faluꞌ a siꞌ rasoda.\x + \xo 3:20 \xt Tutui Masososaꞌ 6:1—7:24\x*  
\v 21 Faa ria dadi conto esa, sama leoꞌ fai fo sarani emi a. Oe saraniꞌ ria natudu nae, Ramatuaꞌ a poꞌi-tata na emi meme sala-siko mara mai, nana huu Yesus Kristus nasoda seluꞌ. Fai fo ara sarani emi a, ara ta radiu emi oe ela tao makamomoi emi ao-ina mara. Huu fo matetu na riꞌ, emi helu neuꞌ Ramatuaꞌ a, fo nau tao lalao-lalafu emi dale mara. No ria na, emi bisa masoda ma tao roo-tetuꞌ.  
\v 22 Besaꞌ ia Yesus ae faliꞌ leo nusatetu-ikutemaꞌ a neu so. Nai naa Ana natuuꞌ neuꞌ mamana hada-horomata, nai Manetualain boboa ona Na. Eilaꞌo-limalope rai nusatetu-ikutemaꞌ a, katemaꞌ kuasa ra, ma mana homu kuasa ra, muste ramania-ramanene neuꞌ Kristus.   
\c 4  
\s1 Kristus lahenda nara muste rasoda raadaleꞌ-toꞌeteiꞌ  
\p
\v 1 Kristus lahenda dae-bafoꞌ sama leoꞌ ita. Huu no Ana doidoso dodouꞌ, de emi boe muste sadia doidoso sama leoꞌ Ria. Tehuu mafarereneꞌ, te lahenda bea sadia hapu susa, nana huu nabua-naesa noo Kristus, ana naetuꞌ naan ta nau tao salaꞌ soꞌ.  
\v 2 Leo mae ana bei nasoda nai dae-bafoꞌ ia, tehuu ana ta tao seluꞌ salaꞌ sama leoꞌ lahenda dae-bafo fekeꞌ ara. Huu fo ana tao tuka Ramatuaꞌ a hihii-nanaun.   
\p
\v 3 Maulu na emi tutuꞌu ledo-fai fo tao tadalu rupa ara, sama leoꞌ lahenda fo ta nalelaꞌ Ramatuaꞌ a. Conto leo-leoꞌ: ara tao rafararaꞌu. Ara hohoke. Ara tuka sira dale nahiiꞌ tatao tadalu nara. Ara rinu mafuꞌ. Ma ara tao nabua-naesaꞌ fo raa-rinu nanaa-nininu hohoro-lalaneꞌ. Ara tao nabua-naesa tadaluꞌ. Ara soko-taku fo bisa tao ra ita ao na maninis.  
\v 4 Ara dedea ramumulu-ramamaeꞌ emi, nana huu ara ta bubuluꞌ rae ubeaꞌ taon de emi ta epo-seoꞌ moo sira tadalun fo riꞌ seli uukuꞌ a.   
\p
\v 5 Tehuu mafarereneꞌ, te neuꞌ ko ara muste reu rataa Manetualain, Mana Ee Dedeaꞌ. Ara muste rafada Ni rae ubeaꞌ taon, de ara tao tadalu leo naꞌ. Bosoꞌ mafarene henin, te basa lahenda muste rasare Ni. Leo mae lahenda fo bei nasoda, do lahenda mana mate ara.  
\v 6 Tebe! Manetualain sakaꞌ parisaꞌ lahenda mana mateꞌ ara, sama leoꞌ Ana parisaꞌ lahenda dae-bafo fekeꞌ. Huu fo Ana nau nita sira leleo-lalaꞌon maulu na. Huu ria na, de Yesus neu tui-beka fee si Ramatuaꞌ a Tutui Malole Na, fo ela sira boe bisa rasoda roo-tetuꞌ fo tao tuka Ramatuaꞌ a hihii-nanaun.   
\s1 Ita muste taboi tatalolole basa-basan fo riꞌ Ramatuaꞌ a feen neuꞌ ita a  
\p
\v 7 Dae-bafoꞌ a nonoe na naneneaꞌ so. Huu ria na, de emi muste duꞌa-afi loa-naruꞌ, ma manuu duduꞌa-aafi makaneuꞌ, ela emi bisa hule-haradoi no malole.  
\v 8 Penting na riꞌ, emi muste masue-malaiao esa no esa. Leo mae lahenda fekeꞌ a tao salaꞌ dodouꞌ, tehuu emi bei bisa matiaꞌ kalu emi sue-lai ni.\x + \xo 4:8 \xt Dedea Lasiꞌ a 10:12; Yohanis 13:34-35\x*  
\v 9 Lahenda neme mamana fekeꞌ mai tuli nai emi uma-lom, sona sipoꞌ ana no namahoꞌo. Tehuu mafarereneꞌ, bosoꞌ sipoꞌ no muu-daus.   
\p
\v 10 Lahenda ra esa-esaꞌ ko sipoꞌ babati-papalan neme Ramatuaꞌ a mai, de ana muste pake babati-papalaꞌ ria ela nalalau toranoon lahenda kamahereꞌ ara. Maboi ma pake matalolole babati-papalaꞌ ria, te ria nanuu sosoa-raraaꞌ soaneuꞌ Ramatuaꞌ a.  
\v 11 Conto leo-leoꞌ: maneniko hapu babati-papalaꞌ manori-mafada lahenda, sona mafarereneꞌ, emi muste mafada lahenda pake Ramatuaꞌ a Hara-dasin. Maneniko hapu babati-papalaꞌ malalau lahenda, sona malalau pake mapii-baraꞌaiꞌ fo riꞌ Ramatuaꞌ a fee a. No ria na, basa lahenda rita rae emi nana, Yesus Kristus lahendan. Huu ria na, de ara io-oa Manetualain. Huu fo Ria nana, marela-masaꞌa! Ma Ria nanuu kuasa fo homu pareta losa doo na neu! Tebe!   
\s1 Ita hapu doidoso nana huu dadi lahenda Saraniꞌ  
\p
\v 12 Toranoo susue kara! Bosoꞌ heran kalu hapu sosobaꞌ mabera. Huu fo ria fefei-fofora ita namahere na. Bosoꞌ afi mae, noi o mesaꞌ ko riꞌ hapu sosoba leo naꞌ.  
\v 13 Tehuu emi bisa mamahoꞌo-matadale, huu fo emi hapu doidoso sama leoꞌ Kristus boe hapu doidoso. Ma fai fo basa lahenda ra rita Kristus marela-masaꞌan nai emi doidoso mara, ria riꞌ tao naa emi mamahoꞌo-matadale matetuꞌ.  
\v 14 Huu no emi mabua-maesa moo Kristus, de fai fo lahenda dedea radadae emi a, emi maua-manale, nana huu Manetualain Dula-dale marela-masaꞌa Na nai emi daleꞌ.  
\v 15 Tehuu maneniko emi muste hapu doidoso, sona bosoꞌ huu no emi mana maisa lahenda do, naꞌodaa do, lahenda tadaluꞌ do, sososoꞌ leo lahenda fekeꞌ a urusan.  
\v 16 Tehuu maneniko lahenda hapu susa, nana huu ria dadi neuꞌ Kristus lahendan, ana ta maeꞌ hata esa boeꞌ. Malole lenaꞌ, ara io-oa Manetualain, nana huu sira dadi lahenda Saraniꞌ.   
\p
\v 17 Losa ledo-fain so, fo basa lahenda ra reu rasare Manetualain. Ana mulai parisaꞌ Ria lahenda nara masodan. De, moi dodooꞌ a leo! Maneniko Ana mulai parisaꞌ ita lahenda Saraniꞌ a, sona lahenda fo ta nau sipoꞌ Ria Tutui Malole Na, leo beaꞌ bali? Tantu sira huhuku na bera lena, hete!  
\v 18 Huu fo manaduiꞌ nai Ramatuaꞌ a Susura Makamoi Na daleꞌ nae,  
\q1 “Maneniko lahenda fo nasoda roo-tetuꞌ boe kura baiꞌ ta hapu sodaꞌ,  
\q2 sona lahenda fo ta tao daleꞌ neuꞌ Ramatuaꞌ a, leoꞌ bea bali?  
\q2 Boe ma lahenda fo tao salaꞌ a, leoꞌ bea?”\x + \xo 4:18 \xt Dedea Lasiꞌ a 11:31\x*   
\p
\v 19 De, maneniko Manetualain nataaꞌ Ria lahenda nara hapu susa tuka Ramatuaꞌ a hihii-nanaun, sona ara bisa ramahere rae, neuꞌ ko Ana nanea-nasalaꞌe si. Huu fo Ria riꞌ adu naa si. Ria boe tao tuka hata fo Ana dedean a. Huu no Ana nanea si leoꞌ na, de ara bei bisa tao malole raroo.   
\c 5  
\s1 Lelea-nonoreꞌ soaneuꞌ mauli-malaka saraniꞌ ara  
\p
\v 1 Mauli-malaka esa aun boe. Maulu na, tepoꞌ fo Kristus lepa-nasaa Ria doidoso Na, au ita mataꞌ. Maneniko basa lahenda ra rita Manetualain marela-masaꞌa Na, neuꞌ ko au ita mataꞌ hihii-nanauꞌ sira boe. De, au nau fee lelea-nonoreꞌ neuꞌ mauli-malaka fekeꞌ ara leo iaꞌ:  
\v 2 Emi sama leoꞌ manafoo fo raboi bibi-lopo nara. De, emi muste maboi-masamao matalolole lahenda fo Ramatuaꞌ a fee si reuꞌ emi a. Urus asa noo malole. Bosoꞌ urus nana huu emi nonoi lakam, tehuu no emi mahiiꞌ tao leo naꞌ. Urus asa tuka Ramatuaꞌ a hihii-nanaun. Bosoꞌ saka oontoꞌ a, tehuu makate moi-tao ela tulu-fali Ramatuaꞌ a lahenda nara.\x + \xo 5:2 \xt Yohanis 21:15-17\x*  
\v 3 Bosoꞌ pareta mafararaꞌu, fo tao bera-bauꞌ soaneuꞌ lahenda fo Ramatuaꞌ a fee emi urus asa a. Tehuu, emi muste dadi conto malole, ela matudu si eno-dalaꞌ.  
\v 4 Yesus sama leoꞌ Malaka Manafoo. Maneniko Ana natafali mai, sona Manetualain nau fee emi seseba-babaeꞌ, nana huu emi urus emi lahenda mara no malole. Seseba-babaeꞌ ria ta puru-poꞌo fa, tehuu ria natea-namepe naroo.   
\s1 Lelea-nonoreꞌ soaneuꞌ lahenda muri anaꞌ ara  
\p
\v 5 Lahenda muri anaꞌ ara! Emi boe muste mamania-mamanene neuꞌ mauli-malaka saraniꞌ ara. Emi basa bosoꞌ matutua-madedema ao mara. Huu fo manaduiꞌ nai Ramatuaꞌ a Susura Makamoi Na nae,  
\q1 “Ramatuaꞌ a soaꞌ lehenda matutua-madedema aoꞌ ara,  
\q2 tehuu Ana natudu dale malole Na neuꞌ lahenda dale balaroe-balanauꞌ ara.”\x + \xo 5:5 \xt Dedea Lasiꞌ a 3:34\x*   
\p
\v 6 Huu ria na, de emi basa muste mafarene Ramatuaꞌ a kuasa Na, fo ela emi bosoꞌ koao. Boe ma naraa laꞌe ledo-fain Ramatuaꞌ a nau io emi.\x + \xo 5:6 \xt Mateos 23:12; Lukas 14:11; 18:14\x*  
\v 7 Basa hihii-nanauꞌ fo tao teisusa-dalehedi emi a, soꞌu dale mara fo ela Ramatuaꞌ a riꞌ urus. Huu fo Ana tao daleꞌ neuꞌ emi.   
\p
\v 8 Besa-besa oo! Duꞌa-afi loa-naruꞌ! Manea matalolole, huu fo ita musu na riꞌ nitu ra malaka na, ana nau tao nalulutuꞌ emi. Ana nau odo na emi, sama leo singa esa namanasa nan seliꞌ, de ana saka banda ela sii fo naa.  
\v 9 Tehuu bosoꞌ biiꞌ. Emi muste soaꞌ nitu ra malaka na. Emi muste tebe-tebe mamahere maroo Ramatuaꞌ a. Huu fo emi bubuluꞌ mae, emi toranoom lehenda kamahereꞌ rai basa mamanaꞌ nai dae-bafoꞌ ia, hapu susa leoꞌ emi boe.  
\v 10 Tehuu mafarereneꞌ, te Manetualain nahiiꞌ natudu dale malole Na neuꞌ ita. Ria riꞌ naloo emi fo dadi meuꞌ lahenda nara, nana huu emi sipoꞌ Kristus. Huu ria na, de Ana nau soꞌu nadedema emi, ela emi bisa masoda maroo mo Ni. Tehuu maneniko emi hapu susa nai dae-bafoꞌ ia, sona noi hatemataꞌ fo Ramatuaꞌ a tao nalolole seluꞌ emi. Ana nau natetea emi, ma tao na emi manenete. Ria boe nau nafoa emi nai fanderen tea-mepeꞌ.  
\v 11 Ita hule ela basa kuasa ra rai Ramatuaꞌ a lima Na losa doo na neu. Tebe!   
\s1 Petrus duiꞌ nateꞌe ria susura na  
\p
\v 12 Silas\f + \fr 5:12 \ft Duduiꞌ dedea Yunani nai ia nae, \ft \+it Silvanus\+it*. Silvanus nana, Silas nade feke na. Lees nai ria tutui masososa na mulai nai \+it Lahenda nadedenuꞌ ara Tutuin\+it* babati kasanahulu liman lalane kadua hulu duan, ma kahaa hulun.\f* duiꞌ fali au susura eetu anaꞌ ia. Ria nana ita toranoon lahenda kamahereꞌ, ma au lima boa ona ka. Au fee emi lelea-nonoreꞌ, ela emi tea-mepeꞌ mahere, huu fo Ramatuaꞌ a nahiiꞌ natudu naroo Ria dale malole Na neuꞌ ita. De, emi muste mapadei mahere ao mara bosoꞌ heoꞌ.   
\p
\v 13 Lahenda kamahereꞌ fo rabua rai kota Babel, ara haitua haraoe soda-moleꞌ soaneu emi boe. Manetualain teka-here naa si, sama leoꞌ Ana teka-here emi a.  
\p Au ana ki Markus boe haitua fee emi haraoe soda-moleꞌ.\x + \xo 5:13 \xt Lahenda Nadedenuꞌ ara Tutuin 12:12, 25; 13:13; 15:37-39; Kolose 4:10; Filemon 24\x*   
\p
\v 14 Maneniko emi maneta, sona mateꞌa pake dedeꞌi lalao-lalafuꞌ ela natudu emi susue-lalaim.  
\p Au nau emi basa fo riꞌ mamahere Kristus a, bisa masoda no tetu-temaꞌ, mole-dame, ma tesatei-tamadaleꞌ.  
\q2 Soda-moleꞌ,  
\q2 Petrus