\id COL - Gapapaiwa NT [pwg] -Papua New Guinea 2009 (DBL 2014) 
\h Kolosei 
\toc1 Pol Ina Giruma Kolosei Damsi Kurisi 
\toc2 Kolosei 
\toc3 Kol 
\mt2 Pol Ina Giruma  
\mt1 Kolosei  
\mt2 Damsi Kurisi  
\mt3 (Colossians)  
\imt1 Vonaviakova  
\ip Kolosei kwanatuna na Eisiya Maina kamonai ma kwanatu sago ke ita rabaraba, tuna na Epesas. Pol ke ita nae ku Kolosei ma Epesas kamonai ina bigabiga ivonatawesi inae da Kolosei kamonai idima. Tuna kubiine inotanotai da vitumaghana damsi Kolosei kamonai na ina rewapana gaburinai ma weni girumina igiruma kurisi. Pol sisiya ivi yanei da vibeyebeyena vibero wawayisi Kolosei kamonai ivomiiri da vitumaghana damsi ivonavonesi da iyavo kava God akovina ma yawasa makamakii nonowina ina vii yavui na kanukanuma i babada ma i kiikiivavo kurisi ita vokavakavara. Ma ivonavonesi da ku tepana kiki berasi viya nakanani ma tuvivirataweyana na ita nunuri ma bade sisiya bagibagisi ivereveresi da aviyavisina ke ita kani ma ikikava ita makai.  
\ip Pol weni berasi varana ivi yanei na igiruma da iyavo kava vibeyebeyena vibero wawayisi ikivikivinisi na iyeghisi ma Keresiyana ketana vaghata ivi sisiyei da ita terevimaninisi. Nota ghamana ina giruma kamonai na Yesu Keriso kovokovoghina da ini yawasita ma ke sago aviyavisina ku tepana taberai da yawasa tapanani. Ma vibeyebeyena vibero wawayisi vitumaghana ma bera bogii ma bogiiyai isisiyei na wawaya inuwatinisi da i vitumaghana Yesu Keriso kurina na nuwatuwai ina momowa. Pol igiruma da Keriso tepanai God dobu iyamoni, ma bade Keriso tepanai aviyavisina peyarina dobuwai God ikawakiikiiyei na ina tinariyariyesi da ini rapena meyesi. Keta sago kava da wawaya dobuwai yawasa ina panani, tuna na Keriso yavata ini nuwasago. Muriyai iyavo kava Keriso yavata inuwasago na Pol ibeyebeyesi da vitumaghana yawasina vaghata kamonai na ikikava ita makai.  
\ip Weni girumina kamonai takitai da Pol tomowa kana vava Taikikas ivi yonei da ina giruma pepana ikavaraneyei Kolosei damsi kurisi. Ma tomowa sago ivi kaeturanei na Onesimas. Ma tuna wawayina kubiine Pol igiruma ina bada Pirimon kurina. Nani girumina kana vava \bk Pirimon\bk*.  
\ip Pol ina nota weni nakanani irereghi.  
\io1 Sapta 1:1-8 Giruma ivotawei.  
\io1 Sapta 1:9 da ku 2:19 Keriso ina yawasa ma ina biga.  
\io1 Sapta 2:20 da ku 4:6 Yawasa vuna Keriso tepanai.  
\io1 Sapta 4:7-18 Vikiikiiwa ma giruma igudui.  
\c 1  
\p
\v 1 Taku Pol, varesita Timoti yavata kagirugiruma. God ina kayowanai ivineku da taku Yesu Keriso\f + \fr 1:1 \fk Keriso: \ft Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’\f* ina aposol.   
\p
\v 2 Tami iyavo kava Kolosei kamonai Keriso yavata koinuwasago ma koipatutu da wawaya vovokaravimi na ita Mamai God kurina ainowi da agabiibai ma nuwanuba ina veremi.   
\s1 Vikiikiiwa ma nipowana.  
\p
\v 3 Maranai kaniponipowana, kamonai na mara nonowa God kaikiikiiwei kubiimi, tuna ita Bada Yesu Keriso ina Mamai.  
\v 4 Kaikiikiiwei, iyamna kavi yanei da ami vitumaghana irakata Yesu Keriso kurina ma bade ami nuwaviina irakata God ina wawaya kurisi.  
\v 5 Koitumaghana ma koinuwaviina, iyamna nota rewapana gwabimiyai da aviyavisina biibiina kunumai God ivovunagha kubiimi na mara sago kona viiya. Varana biibiina ina vonavaghata namada kovi yanei na tuna nani nota rewapanina iveremi.  
\v 6 Tuna God ina agabiibai akovina ivi debei kurimi ma patana da varana kamomiyai erakarakata ma amena etereterei. Ma ikikava itupuwa kurimi na nakanani dobu ku kudubina kamonai etuputupuwa.  
\v 7 Epapiras kavonatawei da kubiikai Keriso varana biibiina ivi debei kurimi. Tuna na Keriso ina bigabiga maninina ma patupatutuna, yavata kabiga patapata ma kavi nuwaviinavivirana.\x * \xo 1:7 \xt Kol 4:12; Prm 23\x*  
\v 8 Ma tuna ivonekai da ikikava Kanuma Vovokaravina iberimi da God ina wawaya yavata koinuwaviinavivirana.   
\p
\v 9 Tuna kubiine sisiyimi kavi yanei na nipowana kavi karei da mara nonowa kubiimi kaniponipowana. Ma God kurina kainowi da kanuma ina ku nevaneva nuwagiura ma akova kudubina ina veremi da ina kayowana konakova bubuni ma kona votekatekei.  
\v 10 Nakanani kaniponipowana da Bada ina kayowanai kona makai ma aviyavisina kudubina kona beraberai na ini nuwabiibiiyei. Bera biibiisi mara nonowa kona beraberai na tami nakanani ma kii biibiina, iuwa da amena peyarina. Ma bade kainowi da God akovina gwabimiyai ina rakata.  
\v 11 Ma ina rewapana kadakadarina ini damani kurimi da ami nota ini rewapana ma ami nuwapoya kamonai na ere nuwanubami kona miirikikina.  
\v 12 Ma nuwabiibiiyai ita Mamai mara nonowa koni kiikiiwei. Ivi vaghinei da tami na ina wawaya vovokaravisi kamosiyai ma aviyavisina ina veresi na tami bade kami reregha ina veremi, maranai ina ku vikiivavona yaseganina tarui.  
\v 13 Nubakutuva ina rewapana kamonai ivi yawasita ma irutinita da nubakutuva takiibutawei. Ma Natuna, tuna nuwanuwana, ina vikiivavona ku kamona itereta.  
\v 14 God iberai da Natuna tepanai igimarataweta, ma ita berabero kudubina inotatawei.\x * \xo 1:14 \xt Epe 1:7\x*   
\s1 Keriso ma ina biga.  
\p
\v 15 Keriso na God maghimaghighina. Ke kovokovoghina da God takitai ma kegha da wawaya Keriso ikitai ma tuna ivi debei kurita da God na ikikava. Keriso na iyarokona ma bera kudubina ibadei, iyamna tuna namada imakamakai ma muriyai da God bera kudubina iyamoni.  
\v 16 Ma aviyavisina kudubina kunumai ma dobuwai iyamoyamoni na Keriso tepanai iyamoni. Aviyavisina takitakitai ma ke kata kitakitai ma nani kamonai na kanuma ma rewapana biibiisi ma beroberosi kunumai ma dobuwai i kiikiivavo ma i babada peyarisi na kudubina iyamonisi da Keriso rapenai.  
\v 17 Tuna namada imakamakai ma muriyai da bera kudubina itupuwa. Ma ina rewapanai da aviyavisina kudubina patana da yawayawana emakamakai ma ke ita wapawapa.  
\v 18 Ma Keriso na gayamina ma ekalesiya na tupuwina. Ma tuna na iyarokona, ivi nao da rabobowai ivomiiri na keta ivotawei da tota bade rabobowai tavomiiri. Tuna kubiine Keriso ighe kirakai da bera kudubina ighekuyowei.\x * \xo 1:18 \xt Epe 1:22-23\x*  
\v 19 God tuna mani ina kayowanai ina rewapana ma ina bera kudubina ivi damani Natuna kurina da ivi ruwa na sago.  
\v 20 Ma God Natuna tepanai na bera kudubina dobuwai ma kunumai iviini ivovira kurina, iyamna God yavata tavivi makiiberowana ma Natuna korosiyai irabobo da taranai keta ivotawei da ere nuwanubata God yavata tamakai bubuna.\x * \xo 1:20 \xt Epe 2:16\x*   
\p
\v 21 Rorova na ami bera ma ami nota beroberosi kubiine God yavata kovi ghavighaviyana na kovi bogebogemi.  
\v 22 Ma wekarakava na God iviinimi da kovi sagomi da tami na turaturana, iyamna Natuna ivi wawayota ma irabobo na iberimi da God ku matana tami vovokaravimi, maninimi ma berabero gwabimiyai kegha.  
\v 23 Ma kokitaruvimi da ami vitumaghana kovokikini da bagibagina. Keriso varana biibiina kovi yanei na tuna tepanai komiirikikina ma ke kona voterei da sisiya vibero koni tumaghanei. Weni varana biibiina na wawaya idima da dobu kudubina ivi yanei. Ma God ivineku da tuna varana kubiine abigabiga.   
\s1 Pol ina biga Keresiyana kamosiyai.  
\p
\v 24 Ma wekarakava na ainuwabiibai da tami kubiimi gabura kamonai avovokwarakwara. God ivineku da ikikava Keriso ivi kamaghiyei nakanani aku biga kamonai ati kamaghiyei da biga ati kovini vitumaghana damsi kubiisi, ti na Keriso tupuwina.  
\v 25 Ivineku da Keresiyana kubiimi abigabiga, aku biga ivereku da vonana kudubina ana dimei tami kupuna dami kurimi.  
\v 26 Rorova na God vonana kamonai nota gavugavusi imakamakai da namadani kava, kimta ma kimta ke itakovi. Ma karako nani notasi na ina wawaya vovokaravita kurita ivi debei.  
\v 27 Ivi akovita da ke tokai Jiu damkai kava ma kupuna dami yavata ini biibiinita da kanuma ina ku nevaneva na mura ghamana ma kadakadarina ina vereta. Ma nota gavugavuna na weni, Keriso na kamomiyai irunuma, tuna kubiine koakova bubuni da kana kadara ku kamona kona rui.  
\v 28 Tuna kubiine na Keriso kadimadimei wawaya kudubisi kurisi. Nuwagiura na God gwabinai kaviiviiya na tuna tepanai wawaya katereterevimaninisi ma kaibeyebeyesi, iyamna kakayokayowei da Keriso tepanai nota magura ina viiya, ma kana rutinisi da God kurina.  
\v 29 Tuna kubiine Keriso tepanai aipaparana da weni bigana ani kovini. Ma ina rewapana ghamana everevereku da aku yawasa kamonai ebigabiga.   
\c 2  
\p
\v 1 Aku kayowana da tami ma wawaya Laodisiya kwanatuna kamonai ma iyavo kava iakoviku ma ke meyani maghighiku ita kitai na peyarimi ati akovimi da ikikava kubiimi ainuwapoya ma aipaparana kirakai.  
\v 2 Nakanani aberaberai da peyarimi ana kiiepepimi da ami nuwaviina koni sagoi. Ma ami akova ina rakata kamowa, tuna nakanani ma kanumimi ina mura. God ina nota gavugavuna na Keriso, ma konakova bubuni na notaragharagha gwabimiyai kegha.  
\v 3 Keriso gwabinai na akova kudubina ma nuwagiura emakamakai, tuna nakanani ma mura gavugavuna.   
\p
\v 4 Nakanani avonavonemi iyamna ke ata kayokayowei da wawaya sisiya vigayagaya ina berai da ini beroberowemi.  
\v 5 Namanaki da taku ke nani ma aku nota na gwabimiyai, ma ainuwabiibai da tami kobigabiga patapata ma komiimiirikikina. Ma bade ainuwabiibai da Keriso kurina ami vitumaghana irakata kirakai.   
\s1 Yawasa Keriso gwabinai tapanani.  
\p
\v 6 Namada kovi vaghinei da Yesu Keriso na ami Bada, tuna kubiine mara nonowa tuna yavata kovi nuwasago ma yavata komakii patapata.  
\v 7 Ma Keriso tepanai kona miirikikina ma kona gogo. Ma vonavaghata kavi beyebeyemi na tuna tepanai ami vitumaghana ina rakata. Ma mara nonowa God kurina kona vivikiikiiwa.   
\p
\v 8 Tuna kubiine kokitaruvimi da ke wawaya i sisiya viberowai nuwanuwami ina tinavirai da i vibeyebeyena kwebuna kona kivini. Ti na i vibeyebeyena na wawayota gwabisiyai ma dobu ina nuwagiura ma ina taravatu kamonai eviiviiya ma ke Keriso gwabinai.  
\v 9 Keriso ma God na sago. God ikikava na Keriso bade nakanani. Ma kegha da Keriso dobuwai imakamakai na tupuwina tota nakanani.  
\v 10 Tuna na kiikiivavo i kiivavo ma kanukanuma babadisi i bada ghamana. Ma tuna yavata koinuwasago kubiine, yawasa kuduba yavuna namada gwabinai koviiya.   
\p
\v 11 Yavata koinuwasago kubiine na dobu yawasina ina kayowana beroberosi ituviviratawei da gwabimiyai ivi kovini. Weni tuvivirina na ke wawaya imasiyai tupuwa ita boriya ma Keriso tuna mani iberai.  
\v 12 Babataito kamonai na korabobo da Keriso yavata idogomi. Ma bade babataito kamonai Keriso yavata rabobowai kovomiiri, iyamna God ina rewapana kovi tumaghanei, tuna rewapaninai Keriso ivi yawasi.\x * \xo 2:12 \xt Rom 6:4\x*  
\v 13 Rorova na kanumimi raborabobosi iyamna ami berabero irakata ma Keriso ami berabero ke ita tuviviratawei. Ma karako na kanumimi yawayawasisi iyamna Keriso tepanai na God ivi yawasimi. Tuna ita berabero peyarina inotatawei.\x * \xo 2:13 \xt Epe 2:1-5\x*  
\v 14 Tuna nakanani ma ita berabero kudubina igiruma yavui da wavuna kata kavari ma kegha da nani girumina na Keriso yavata ituparatui da wavuna ivi kovi tuwanonowi.\x * \xo 2:14 \xt Epe 2:15\x*  
\v 15 Ma bade aviyavisina korosiyai iberai na kanuma beroberosi i kiikiivavo ma i babada i rewapana iviitawei, tuna nakanani ma i kapiya ita nebotawesi. Ma debiiyai iberai da ivinimaya ma ivi nuwapoya kirakai da wawaya matasiyai itereoruwesi.   
\p
\v 16 Tuna kubiine wawaya ina vonemi da siya sago ke kona kani bo okowa sago ke konumai na i sisiya ke koni yanei. Ma kanina kubiine ini wavumi na iyamna kegha. Ma bade i kayowana da mara ghamaghamasi kona vovokaravei na ke koni nuwapoyei. Kamporagha madegha ma nawaravi nununai ma bade viyakam marasi ghamaghamasi etereterei ma ke kota nununuri na ke koni nuwapoya da berabero kota beraberai.\x * \xo 2:16 \xt Rom 14:1-6\x*  
\v 17 Weni berasi na ke bera vaghata ma keyakeyuna, ivi debei da aviyavisina karakava ina tupuwa. Ma bera vaghata na Keriso.  
\v 18 Kokitaruvimi da wawaya ke ini beroberowemi, wawaya viya na ikikava imatu ma bera gubana ekitakitai na tuna isisiya kirakiiyei. Ma evonavona da aneya kota vovokavarisi. Ti na dobu akovina gwabisiyai ma debiiyai eberaberai da nakanani ma vovoyaghotisi ma kegha da nuwanuwasi kamonai na ekayokayotata. Ke koni vaghinei da ini wavumi bo ini bademi.  
\v 19 Wawayisi na Keriso ivoterei, ma tuna na Keresiyana gayamina. Keriso tupuwina na tota vitumaghana damta, ina vibadana gaburinai na tuna kwarokwarona tupuwa ikabakabai da evovokikini. Ma God ina berai da Keriso tupuwina ini rewapana ma nota magura ina terei.\x * \xo 2:19 \xt Epe 4:16\x*   
\s1 Keriso yavata tarabobo ma tayawasa patapata.  
\p
\v 20 Keriso yavata korabobo na ivotawemi da sisiya bagibagisi dobu yawasina kamonai ke ini bademi. Ma avi kubiine komakamakai da nakanani ma weni dobuna wawayimi? Avi kubiine sisiya bagibagisi konununuramakiiyei?  
\v 21 Vibeyebeyena vibero wawayisi evonavona bo, “Weni tuna ke kuna votani,” “Nokoni tuna ke kuna kuta tovoni,” “Nani tuna ke kuna votovotovoni.”  
\v 22 Weni sisiyisi na iyamsi kegha, wawaya mara tupona ina kivini ma muriyai na ina wapa. Wawaya ti mani i notiyai sisiya bagibagisi ibeyebeyena, tuna dobu akovina.  
\v 23 Enotanotai da nuwagiura biibiisi ma kegha, iyamna i vokavakavara ketasi na dobu yawasina kamonai. Evonavona da wawaya ita tereoruwe meyesi da ti nakanani ma vovoyaghotisi ma ibero, iyamna nuwanuwasi kamonai na ekayokayotata. Ma ti mani tupuwisi itupaketowanei ma ikawapatei da iberoi. Ma weni berasi ke ini vitesi da tupuwa ina kayowana beroberosi ina voterei.   
\c 3  
\p
\v 1 Ikikava Keriso rabobowai ivomiiri na tami bade nakanani da Keriso yavata koyawasa patapata. Tuna kubiine aviyavisina kunumai na tuna kona notai da nuwakamomiyai ina makamakai, nani gawarinai na Keriso emakamakai, God katagheyanai.\x * \xo 3:1 \xt Psa 110:1\x*  
\v 2 Ma aviyavisina kunumai na tuna kava konota bogai ma ke ami yawasa dobuwai kona nota kirakiiyei.  
\v 3 Tami nakanani ma raborabobomi da ami yawasa vaghata na Keriso evovotani, iyamna God yavata kovi nuwasago.  
\v 4 Ami yawasa vaghata na Keriso gwabinai tuna kubiine maranai tuna ina vovira ku dobu da ini debe meyei na nani maranai tami bade kona rudeba ma kana kadara ku kamona kona rui.   
\s1 Yawasa wadubona ma yawasa vuna.  
\p
\v 5 Tuna kubiine, dobu yawasina ma tupuwa ina kayowana beroberosi peyarina kovoterei. Nani kamonai na vipekana wapawapa, bera inimayamayisi, kitakiroro, nota dowadowasi ma vomatamatigha. Sawara ke nuwanuwami ina vii kirakiiyei iyamna vomatamatigha ini bademi na God vaghata nuwanuwami ina wapa.  
\v 6 Iyavo kava weni berasi eberaberai na God ina nuwapughu damina ina viiya.  
\v 7 Rorova weni berasi ami yawasa ivivi badei da tupuwa ina kayowana koberaberai.   
\p
\v 8 Ma karako na weni berasi kudubina kovoterei. Ma bade ke nuwanuwami ina pughu, ke kona kayaya, wawaya ke koni tupaketowanesi, ke koni varabero ma ke meyani kawamiyai sisiya dowadowasi kona karatawei.  
\v 9 Ma ke koni bero, iyamna ami yawasa katamanina na namada kovoterei.\x * \xo 3:9 \xt Epe 4:22\x*  
\v 10 God iyamonimi ma bade gwabinai yawasa vuna koviiviiya, mara nonowa ivunimi da tami na tuna maghimaghighina. Nakanani eberaberai da tuna akovina kona vii bubuni da konakova kiimatani.\x * \xo 3:10 \xt Gen 1:26; Epe 4:24\x*  
\v 11 Weni kamonai na kupuna damsi ma Jiu damsi na sago, iyavo kava ituvivira bo ke ita tuvivira na sago, dam makiiwapasi ma kayakayayisi, sleiv wawayisi bo vovotawesi ma peyarisi na sago. Bera ghamana na Keriso ma tuna na peyarita sago sago duma gwabitiyai emakamakai.   
\p
\v 12 Tami na God ina wawaya, ivovinemi da vovokaravimi ma ina nuwaviina kurimi irakata kirakai. Tuna kubiine vikamyuyuwa, agabiibai, vopepeta, nuwapika ma nuwanuba gwabimiyai ina makai na tuna nakanani ma gara biibiina kota kotei.\x * \xo 3:12 \xt Epe 4:2\x*  
\v 13 Kamomiyai ami vimakiiberowana na tami mani nuwanubiiyai kovi maninini. Ma ikikava Bada ami berabero inotatawei, nakanani turaturami kurisi koberai, berabero ina berai kurimi na konotatawei.\x * \xo 3:13 \xt Epe 4:32\x*  
\v 14 Ma weni berasi biibiisi ku tepana na kovi nuwaviinavivirana da tuna ina bawimi na ami vinuwasago ina rakata kamowa.  
\v 15 Ma kovi vaghinei da Keriso ina nuwanuba nuwanuwami ini badei, iyamna ikwatumi da tami na Keriso ina tupuwa sago kava ma nuwanuba yawasina kamonai kona makai. Ma God mara nonowa koni kiikiiwa kirakiiyei.  
\v 16 Keriso Vonana tuna nakanani ma mura ghamana ma kovi vaghinei da nuwanuwami kamonai ina makai. Ma vonana kamonai nuwagiura kona viiya da koni beyebeyena turaturami kurisi ma kona terevimaninisi. Ma bade tavora ma agi vovokaravisi kona tavora God kurina da nuwanuwami kamonai koni kiikiiwei.\x * \xo 3:16 \xt Epe 5:19-20\x*  
\v 17 Ma aviyavisina kudubina kona beraberai bo kona vivisisiyei na Bada Yesu avanai koberai ma tuna tepanai Mamai God koni kiikiiwei.   
\s1 Ikikava kata makai bubuna.  
\p
\v 18 Tami wivine, kakawami kovotekatekesi da i vibadana gaburinai kona makai, iyamna iyavo kava Keriso rapenai na i biga da nakanani ina berai.\x * \xo 3:18 \xt Epe 5:22; 1Pit 3:1\x*   
\p
\v 19 Tami tomotomowa, kakawami nuwanuwami ina viiya ma ke nuwanuwami ina pughu kurisi da kona ratakutakuresi.\x * \xo 3:19 \xt Epe 5:25; 1Pit 3:7\x*   
\p
\v 20 Tami ededa, ami biga da mara nonowa maduwa da mamai kona votekatekesi, iyamna nani yawasina Bada inuwabiibiiyei.\x * \xo 3:20 \xt Epe 6:1\x*   
\p
\v 21 Tami mami mau, ke kona berai da natunatumi kona yegha kirakiiyesi da koni nuwapughupughu nonowesi da i nota ina peku.\x * \xo 3:21 \xt Epe 6:4\x*   
\p
\v 22 Tami sleiv dami, aviyavisina kudubina kona beraberai na ami babada dobuwai kovotekateka bubunisi. Mara nonowa kona votekateka, ke matasiyai kava da ini gheghenimi. Nuwanuwami kudubinai kona votekateka da ami vokarava Bada kurina koni debei.\x * \xo 3:22 \xt Epe 6:5-8\x*  
\v 23 Ami biga na nuwabiibiiyai ma nuwanuwami kudubinai koberai da nakanani ma Bada kubiine kota bigabiga ma ke wawaya kubiisi.  
\v 24 Namada koakovi da mara sago Bada Yesu gwabinai kami miiya kona viiya. God ina vonakiiyapa bagibagina iterei da aviyavisina ita veremi na ina veremi, iyamna ami Bada vaghata na Keriso ma tuna wawayina kubiine kobigabiga.  
\v 25 Ma iyi tam berabero kuna berai na kovogha kuna viiya, iyamna God kudubita ini tupavireta ma nani kamonai ke ina kitai da tam wawaya avatetem bo tam wawayota, peyarita na sago.\x * \xo 3:25 \xt Deut 10:17; Epe 6:9\x*   
\c 4  
\p
\v 1 Tami babada, ami sleiv na nota manininai koni badesi ma kona koyagha bubunisi. Konota bogai da tami bade ami Bada kunumai emakamakai.\x * \xo 4:1 \xt Epe 6:9\x*   
\s1 Vibeyebeyena turina.  
\p
\v 2 Mara nonowa kona niponipowana na nuwanuwami kudubinai ma vikiikiiwa yavata koberai.  
\v 3 Ma bade kubiikai konipowana da God taraboga ina verekai da kana dima. Rorova God ina nota Keriso kubiine na gavugavuna ma karako na ku deba iterei da kana dimei. Tuna kubiine adimadima na ipatumiku da karako gabura kamonai amakamakai.  
\v 4 Ma konipowana da weni notana ana dimadimei na iyamna ani debe bubuni.   
\p
\v 5 Konuwagiura da ikikava koni matakira bubuna iyavo kava ke ita vivitumaghana kurisi. Ma taraboga imapatana kona viiviiya na ke koni rekwei.\x * \xo 4:5 \xt Epe 5:16\x*  
\v 6 Ami sisiya kurisi na mara nonowa biibiisi ma nuwaviiviinisi, ma namada kona vovunagha da ikikava wawaya sago sago duma kona vonapote bubunisi.   
\s1 Vikiikiiwa.  
\p
\v 7 Varesita Taikikas, tuna ini varaveremi da taku ikikava. Tuna nuwanuwaku, ma nuwanuwana kudubinai mara nonowa iviteku ma Bada ina biga kamonai yavata kabigabiga patapata.\x * \xo 4:7 \xt Apos 20:4; 2Tim 4:12\x* \x * \xo 4:7 \xt Epe 6:21-22\x*  
\v 8 Avonavonatawei kurimi da ina vonemi da tokai ikikava kamakamakai ma nuwanuwami ina kiiepepai.  
\v 9 Ma Taikikas ina nenae kurimi na Onesimas yavata, tuna bade nuwanuwaku ma varesita patupatutuna, ma tuna na ami wawaya. Ma aviyavisina peyarina weni dobunai etuputupuwa na ivi ruwa ina vonaveremi.\x * \xo 4:9 \xt Prm 10-12\x*  
\v 10 Aristakas ikiikiiwemi, tuna na taku yavata gabura kamonai kamakamakai. Ma bade Mak ikiikiiwemi, tuna Banabas tina kikei. Ma tami namada aku sisiya koviiya da maranai Mak ina nekiibau kurimi na kokoyagha bubuni.\x * \xo 4:10 \xt Apos 19:29, 27:2; Prm 24; Apos 12:12, 25, 13:13, 15:37-39\x*  
\v 11 Ma Josuwa, kana vava sago na Jastas, tuna bade ikiikiiwemi. Iyavo kava yavata kabigabiga patapata God ina vikiivavona kubiine ma kamosiyai na weni damsi ivi aroba kava na Jiu damsi. Ma ti na ivite kirakiiyeku.   
\p
\v 12 Ma Epapiras ikiikiiwemi, tuna ami wawaya sago, ma bade Yesu Keriso ina bigabiga. Ma tuna mara nonowa nipowana kamonai ipaparana kubiimi ma God kurina inowi da kona miirikikina ma nuwanuwami kudubinai Keriso koni tumaghanei ma God ina kayowana kudubina kona votekatekei.\x * \xo 4:12 \xt Kol 1:7; Prm 23\x*  
\v 13 Taku mani matakuwai akitai da tuna ikikava eniponipowana kirakai tami kubiimi ma bade vitumaghana damsi Laodisiya ma Herapolis kwanatusi kamonai.  
\v 14 Ma kokoseni badana Luk, tuna varesita ma nuwanuwata. Tuna ma Demas ivi ruwa ikiikiiwemi.\x * \xo 4:14 \xt 2Tim 4:10, 11; Prm 24\x*   
\p
\v 15 Varevaresita Laodisiya kamonai kovonesi da aikiikiiwesi. Ma bade Nimpa ma Keresiyana kudubisi ina numiiyai ikiidaburana vokavakavara kubiine na ti yavata aikiikiiwesi.  
\v 16 Weni girumina koni yavi ina kovi na murinai vitumaghana damsi Laodisiya kamonai kurisi kovonatawei da ti yavata ini yavi. Maghimaghighina, aviyavisina agiruma varevaresita Laodisiya kamonai kurisi na ina vonatawei kurimi na tuna girumina kovi yavi.  
\v 17 Akipas kovonei da biga Bada gwabinai iviiya na ini koviya.\x * \xo 4:17 \xt Prm 2\x*   
\p
\v 18 Kiiwa kiiwa.  
\p Taku Pol taku mani imakuwai weni vikiikiiwina agirumi.\f + \fr 4:18 \ft Weni girumina kudubina na Pol ivivi sisiya ma wawaya sago igirugiruma. Ma vikiikiiwa 4:18 kamonai na Pol imanai igirumi da Kolosei damsi iti tumaghana da tuna mani weni girumina ivonavonatawei kurisi.\f* Ke nuwanuwami ina wapa da taku na gabura kamonai.  
\p Ma ainowi God kurina da ina agabiibai gwabimiyai ina makai nonowa.