\id 2TH - Gapapaiwa NT [pwg] -Papua New Guinea 2009 (DBL 2014) 
\h 2 Tesalonika 
\toc1 Pol Ina Giruma Viruwina Tesalonika Damsi Kurisi 
\toc2 2 Tesalonika 
\toc3 2Tes 
\mt2 Pol Ina Giruma Viruwina  
\mt1 Tesalonika  
\mt2 Damsi Kurisi  
\mt3 (2 Thessalonians)  
\imt1 Vonaviakova  
\ip Vitumaghana damsi Tesalonika kwanatuna kamonai Keriso ina vovira marana ivivi ruwei. Pol namada igiruma kurisi ma kegha, patana da i nota ivovoragharagha. Tuna kubiine Pol igirumame kurisi, ivonesi da ke ini tumaghana da Keriso namada ivovira ku dobu. Ivi beyebeyesi da bera viya ini nao ma muriyai Keriso ina nekiibau. Ivonesi da Wawaya Kawakiikiina dobu ini badei da tuna gaburinai wawaya peyarisi bera beroberosi ma dowadowasi ina votupe kirakiiyei. Ma Wawaya Kawakiikiina, Keriso ma vitumaghana damsi ini ghaviyesi. Murinai na Keriso ina vovira.  
\ip Weni girumina kamonai, Pol vitumaghana damsi ikiiepepisi da nuwapoya ma vokwarakwara kamonai i vitumaghana ini rewapana ma ina miirikikina. Ma ivonesi da ke ina kayobara, ti mani kubiisi ina biga, ikikava Pol turaturana yavata ikoyakoyagha meyesi na Tesalonika damsi bade nakanani ita berai. Ma ku tepana ivonesi da bera biibiisi ke ina voterei.  
\ip Pol ina nota weni nakanani irereghi.  
\ip Sapta 1:1-2 Giruma ivotawei.  
\ip Sapta 1:3-12 Vigheghena.  
\ip Sapta 2:1-17 Keriso ina vovira kana sisiya.  
\ip Sapta 3:1-15 Kiiepepa da Keresiyana yawasinai ita makai.  
\ip Sapta 3:16-18 Giruma igudui.  
\c 1  
\p
\v 1 Taku Pol, ma Sailas da Timoti\x * \xo 1:1 \xt Apos 17:1\x* yavata kagirugiruma tami Keresiyana dami Tesalonika kamonai kurimi. Tami na ita Mamai God ma Bada Yesu Keriso\f + \fr 1:1 \fk Keriso: \ft Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’\f* rapesiyai.   
\p
\v 2 Mamai God ma Bada Yesu Keriso kurisi kainowi da agabiibai ma nuwanuba ina veremi.   
\s1 Keriso ina vovira ma ini tupavireta.  
\p
\v 3 Varevaresikai, ibiibai da mara nonowa God kani kiikiiwei kubiimi, iyamna ami vitumaghana erakarakata kirakai, ma bade tami sago sago duma ami nuwaviina erakarakata da kamomiyai koinuwaviinavivirana.  
\v 4 Tuna kubiine, dobu viya kamosiyai Keresiyana turaturata kurisi kaigheghenimi. Kavonesi da wawaya iagaberowemi ma vokwarakwara damina koviiviiya na mara nonowa ami vitumaghana ivi rewapana ma komiimiirikikina.   
\p
\v 5 Weni berasi peyarina ivi debei kurita da God ina vikiivavona kubiine kovovokwarakwara. Mara damonai God vonavaghata tepanai ini tupavireta da iyi biibiina ma iyi berona. Ma ina vonakiiyaragha da tami na ina wawaya maninimi ma ini vaghinei da ina vikiivavona kamonai kona makai.  
\v 6 Ma bade bera maninina ina berai da iyavo kava karako itupaketowanimi na mara damonai biwa ina veresi.  
\v 7 Karako dobuwai koikamyuyuwa na mara damonai nuwanuba ina veremi, ma takii yavata nakanani ina verekai. Nani maranai Bada Yesu keyama yebayebarina kamonai, ina aneya rewapanisi yavata kunumai inoru.  
\v 8 Ma iyavo kava God ibarei ma ita Bada Yesu varana biibiina ke ita votekatekei na kovogha ina veresi.   
\p
\v 9 Kii kovogha na makamakii nonowina ma ina gwaramutusi. Ina miiripotesi da ke Bada kurina ina nae ma ke meyani kana kadara ma ina rewapana damina ina viiya.\x * \xo 1:9 \xt Isa 2:10\x*  
\v 10 Bada ina mara ghamana ina nekiibau na ina wawaya vovokaravisi ini ghegheni da kana kadara ina rakata. Ma vitumaghana damsi kudubisi ina kitai ma ini deye kirakiiyei. Ma tami yavata nani korotona kamonai, iyamna aviyavisina kavi mamatarei kurimi na kovi tumaghanei.   
\p
\v 11 Tuna kubiine mara nonowa kaniponipowana kubiimi da God ina berai da ami yawasa na maninina ku matana, iyamna ikwatumi da yawasa maninina kamonai kota makai. Ma kainowi God kurina da ina rewapana ini vitemi da avi berasi biibiisi kona notai na kona bera yavui, ma avi bigana ere vitumaghanimi kovi karei na koni koviya.  
\v 12 Nakanani kaniponipowana da ita Bada Yesu kana kadara koni debei da wawaya kana vava ini ghegheni, ma bade ita Bada Yesu tami ini gheghenimi. Weni berasi na ita God ma Bada Yesu Keriso i agabiibai tepanai ina tupuwa.   
\c 2  
\s1 Wawaya Kawakiikiina ini ghaviya.  
\p
\v 1 Varevaresikai, ita Bada Yesu Keriso ina nekiibau ma ina tinariyeta na nani marana tisisiyei.\x * \xo 2:1 \xt 1Tes 4:15-17\x*  
\v 2 Ke ami nota ina ragharagha ma ke koni nuwapoya maranai wawaya ini beroberowemi da sisiya Bada gwabinai iviiya, bo akii vibeyebeyena kamonai ivi yanei bo giruma gwabikiiyai iviiya da Bada namada ipisi da ina mara ghamana ikovi.  
\v 3 Ke koni vaghinei da wawaya ini beroberowemi ma ke koni tumaghanesi. Bera viya ina tupuwa ma muriyai Bada ina mara ghamana ina nekiibau. Weni berasi ini nao. Wawaya peyarisi God ini ghaviyei ma Wawaya Kawakiikiina ina rudeba. Karakava God nani wawayina ku keyama karakaratina ina tawei.  
\v 4 Ma Wawaya Kawakiikiina na god viviberosi ma kokoitau wawaya evovokavakavarisi na kudubisi ini ghaviyesi, ina tereoruwesi ma tuna mani ina terepa meyei. Ma ina rui God ina ku Taparoro Numana, ina makiivipika ma ina vonakiiyaragha da ‘Taku God.’\x * \xo 2:4 \xt Dan 11:36; Ezek 28:2\x*   
\p
\v 5 Rorova yavata tamakamakai na weni berasi peyarina namada avonemi ikovi. Konotanotai bo kegha?  
\v 6 Ma wekarakava akova koviiya da weni berasi kana mara vaghata na ke ita nekiibau, karakava ina tupuwa. Tuna kubiine Wawaya Kawakiikiina na guduguduna.  
\v 7 Ma berabero ina rewapana gavugavuna namada idagudagu da wawaya peyarisi God ina kayowana ikiigiiyei. Ma God ina wawaya sago emakamakai ma tuna nani rewapanina berona emiimiiripotei, ina nenae da God ina vona na wawayina ina miiritawei.  
\v 8 Ma nani maranai Wawaya Kawakiikiina ina rudeba. Karakava Bada Yesu yana ina tawei da Wawaya Kawakiikiina ina kiivunui, ina nekiibau ma kana kadara ina rakata da Wawaya Kawakiikiina ina gwaramutui.\x * \xo 2:8 \xt Isa 11:4\x*  
\v 9 Ma kunona nani Wawayina Kawakiikiina ina rudeba na Seitan ina biga ina beraberai. Vibero berasi ghamaghamasi ma matakira viviberosi ina berai da wawaya ini deye kirakiiyei.\x * \xo 2:9 \xt Mat 24:24\x*  
\v 10 Ma iyavo kava God karakava ina gwaramutusi na ti damsi Wawaya Kawakiikiina ina vibero bogii ma bogiiyai ini tumaghanei. Vonavaghata iti tumaghanei da yawasa makamakii nonowina ita panani ma ibara, tuna kubiine God ina gwaramutusi.  
\v 11 Ibara kubiine, God ina berisi da vibero ini tumaghana kamokamowi.  
\v 12 Nuwabiibiiyai bera beroberosi ina beraberai ma vonavaghata ina barei, tuna kubiine maranai God ini tupaviraviresi na ina vonakiiyaragha da kovogha berona ina veresi.   
\s1 Tamiirikikina.  
\p
\v 13 Varevaresikai, Bada inuwaviina kirakiiyemi, ma ibiibai da mara nonowa God kati kiikiiwei kubiimi. Ivinemi da koti nao, yawasa makamakii nonowina damina kota viiya. God ivi yawasimi iyamna vonavaghata kovi tumaghanei ma Kanuma Vovokaravina ami yawasa kamonai idagudagu ma ivinetawemi da wawaya maninimi ma vovokaravimi.  
\v 14 Ma varana biibiina kadimei kurimi na God ikwatumi da Bada Yesu Keriso kana kadara ku kamona kota rui.  
\v 15 Tuna kubiine, varevaresikai, komiirikikina ma peyarina kawakiiyai kavi beybeyemi ma kagiruma kurimi na kovotani.   
\p
\v 16 Ita Bada Yesu Keriso ma ita Mamai God ekayokayowana kirakiiyeta ma i agabiibai kurita irakata. Tuna kubiine ina kiiepepita da mara nonowa titepatora ma titumaghana kamowa. Ma kainowi kurisi da  
\v 17 ini vitemi da nuwanuwami kamonai i kiiepepa damina kona viiya ma rewapana ina veremi da mara nonowa biibiina kona beraberai ma kona vivisisiyei.   
\c 3  
\s1 Konipowana kubiikai.  
\p
\v 1 Ma vaghina, varevaresikai, konipowana kubiikai da Bada sisiyina kana dimei ma yaghiyaghinai ina rakata da dobu ina ne yavui. Ma konipowana da ikikava sisiyina kovovopepetei na nakanani wawaya ina vopepetei.  
\v 2 Ma bade konipowana da maranai wawaya beroberosi ini kawapatekai na God ini yawasikai, iyamna ke wawaya kudubisi Bada iti tumaghanei.   
\p
\v 3 Bada vonakiiyapa bagibagisi iterei ma berasi ina berai kubiita. Rewapana ina veremi, ma ini tarapaparanemi da wawaya berona Seitan ke ina nekiibau kurimi.  
\v 4 Bada nota evereverekai da kaitumaghanemi ma kakovi da akii sisiya bagibagisi peyarina namada kokivikivini ma bade mara nonowa kona kivina bubuni.   
\p
\v 5 Ma kainowi Bada Yesu Keriso kurina da ini nowemi da God ina nuwaviina damina kona viiya. Ma kainowi kurina da ikikava Keriso vokwarakwara kamonai imiirikikina da ku damona na tami bade nakanani kona miirikikina.   
\s1 Ke kona kayobara.  
\p
\v 6 Varevaresikai, ita Bada Yesu Keriso avanai sisiya bagibagina kavereveremi da Keresiyana turaturata kayobarisi kokitatawesi, iyamna ti na akii vibeyebeyena ke ita kivikivini.  
\v 7 Tami namada koakovi da ikikava gwabimiyai kabiga na nakanani kota biga. Ke kata kayobara maranai yavata tamakamakai.  
\v 8 Akii kayowana peyarina ke kata viiviiyotei, kavivi miiyei. Ke kata kayokayowei da vita kata veremi, tuna kubiine mara nonowa mariyai ma didibarai kabigabiga kirakai.  
\v 9 Akii rewapana emakamakai da tepamiyai kata makai ma ke kata berai. Kavi matakira da kota kitikai ma koti bonebonekai.  
\v 10 Rorova gwabimiyai tamakamakai na kavonavonemi bo, “Wawaya ke ina biga na ke ina kam.”   
\p
\v 11 Weni sisiyina kavereveremi iyamna kavi yanei da kamomiyai wawaya viya kayobarisi, biga kiimatana ke ita beraberai, ma esarosaropa wapawapa.  
\v 12 Ma vaghina, wawaya kayobarisi kurisi kii sisiya bagibagina na weni. Bada Yesu Keriso avanai kovi wawaya bubuna ma kovi poyapoya da kona kam.   
\p
\v 13 Ma varevaresikai, peyarimi bera biibiisi kona beraberai, ke ininimi ina bara.  
\v 14 Wawaya iyai akii vibeyebeyena weni girumina kamonai ke ina kivikivini na vitumaghana damsi kudubisi kovi akovisi da wawayina na nakanani. Ma peyarimi wawayina kokitatawei da ininimaya.  
\v 15 Ma ke koni ghaviyei, ma kovonavinotai da ina kitaruvai, iyamna tuna na Keresiyana turami.   
\s1 Giruma damona.  
\p
\v 16 Vaghina, Bada gwabinai nuwanuba taviiviiya. Ma ainowi kurina da tuna mani mara nonowa nuwanuba ina vereveremi da ami bera peyarina ku kamona na damina kona viiya.  
\p Ita Bada peyarimi gwabimiyai emakai.   
\p
\v 17 Taku Pol aku vikiikiiwa imakuwai agirumi. Mara nonowa aku giruma damonai weni nakanani aimatakira da konakovi da taku mani agiruma.\f + \fr 3:17 \ft Weni girumina kudubina na Pol ivivi sisiya ma wawaya sago igirugiruma. Ma vikiikiiwa 3:17 kamonai na Pol imanai igirumi da Tesalonika damsi iti tumaghana da tuna mani weni girumina ivonavonatawei kurisi.\f*   
\p
\v 18 Ainowi ita Bada Yesu Keriso kurina da ina agabiibai peyarimi gwabimiyai ina makai.   
\p