\id 1JN - Gapapaiwa NT [pwg] -Papua New Guinea 2009 (DBL 2014) 
\h 1 Jon 
\toc1 1 Jon Jon Ina Giruma Karena 
\toc2 1 Jon 
\toc3 1Jon 
\mt1 1 Jon  
\mt2 Jon Ina Giruma Karena  
\mt3 (1 John)  
\imt1 Vonaviakova  
\ip Aposol Jon ina giruma karena kamonai na nota ghamaghamasi ruwa emakamakai. Sago na Keresiyana wawayisi ikiiepepisi da mara nonowa God ma Natuna Yesu Keriso yavata iti nuwasago. Ma kana viruwa na ivi akovisi da wawaya viya i vibeyebeyena viberowai nani vinuwasagona ita resoi. Ti damsi ivivi beyebeyena da aviyavisina kudubina dobuwai na berona kavakava. Ma ivonavona da tupuwita ma bera peyarina dobuwai tavovotovoni na epuyapuyakita. Tuna kubiine ivonavona da God Natuna Yesu na kanuma kava, ke wawaya vaghata. Ma bade ivonavona da Yesu ini yawasita na dobu ina nuwapoya ma ina bera kudubina takiibutawei. Ma bade ivonavona da Keresiyana na ke yawasa maninina bo nuwaviinavivirana ini nuwapoyei, nani berasi na iyamsi kegha.  
\ip Ma Jon na weni notasi viviberosi ke iti vaghinei. Igiruma da Yesu Keriso dobuwai imakamakai na tuna wawaya ere tupuwina ma iyavo kava Yesu itumaghanei ma God yavata inuwaviina na bade turaturasi yavata ini nuwaviinavivirana. Tuna kubiine weni notana ivi sisiya kirakiiyei.  
\ip Jon ina nota weni nakanani irereghi.  
\io1 Sapta 1:1-4 Vikiikiiwa.  
\io1 Sapta 1:5 da ku 2:29 Yasegana ma nubakutuva.  
\io1 Sapta 3:1-24 God natunatuna ma Seitan natunatuna.  
\io1 Sapta 4:1-6 Vonavaghata ma vibero.  
\io1 Sapta 4:7-21 Ita biga da tinuwaviinavivirana.  
\io1 Sapta 5:1-21 Vitumaghana tepanai dobu ina yawasa berona taghegavovori.  
\c 1  
\s1 Yesu na God Vonana ma yawasa everevereta.  
\p
\v 1 God dobu iyamoyamoni na namada wawaya sago imakamakai, tuna na God Vonana ma yawasa karena. Ma tokai gamona kavi yanei, matakiiyai kakitai ma kavotovotovoni,\x * \xo 1:1 \xt Jon 1:1\x*  
\v 2 na tuna kaimamatarei tami kurimi. Yawasa Vaghata Wawayina irudeba na kakitai. Ma kawamatarai kavonavonemi da yawasa makamakii nonowina na Mamai God gwabinai ipisi ma inekiibau kurita.\x * \xo 1:2 \xt Jon 1:14\x*  
\v 3 Aviyavisina kavi yanei ma kakitai na peyarina kaisisiyei kurimi, iyamna akii kayowana da tami ma tokai na yavata tinuwasago. Ma bade Mamai God ma Natuna Yesu Keriso\f + \fr 1:3 \fk Keriso: \ft Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’\f* yavata tinuwasago.  
\v 4 Kagirugiruma kurimi da akii nuwabiibai ina rakata kamokamowa.   
\s1 God na yasegana.  
\p
\v 5 Keriso gwabinai sisiya kavi yanei na kurimi kaidebei na weni. God tuna na yasegana. Ma didibara berasi gwabinai kegha.  
\v 6 Mikeda tavonavona da God yavata tinuwasago ma didibara berasi patana da taberaberai na tibero ma vonavaghata yawasina ke kata vovotani.  
\v 7 God tuna yasegana kamonai emakamakai ma tota bade nakanani taberai. Yasegana yawasina kamonai tababa na turaturata yavata tinuwasago ma ita bera beroberosi kudubina Natuna Yesu taranai ina kowakowatawei.   
\p
\v 8 Ma kata vona da bera beroberosi ke kata beraberai na tibero. Nakanani kati sisiya na vonavaghata gwabitiyai kegha, tota mani tiberoberowe meyeta.  
\v 9 Ma kawamatarai ita bera beroberosi timamatarei na God kudubina ina kowatawei ma ina terevimaninita, iyamna tuna na ke viviberona ma ina bera maninisi kavakava. Tuna kubiine ina vonakiiyapa bagibagina iterei kurita na ina berai.  
\v 10 Ma kata vona da bera beroberosi ke meyani kata beraberai na tavonavona da God tuna viviberona ma vonana ita yawasa kamona ke ita makamakai.   
\c 2  
\s1 Keriso na kata vivita.  
\p
\v 1 Natunatuku, tami nuwanuwaku. Weni sisiyisi agirugiruma kurimi da berabero ke kona berai. Ma iyavo kava berabero ina berai na wawaya sago muritiyai emiimiiri da kubiita inowi ita Mamai kurina da ita berabero ina notatawei. Tuna wawayina na Yesu Keriso, ina yawasa na biibiina ma maninina kavakava.  
\v 2 Tuna mani ivere meyei da ivi suwara da ita berabero ivi miiyei na God ina nuwapughu ivi nubai. Ma ke tota kava kubiita ma wawaya dobu ku kudubina kamonai yavata i berabero ivi miiyei.   
\p
\v 3 Ikikava takova kiimatani da namada God yavata tavi nuwasago? Weni nakanani takovi. Ina sisiya bagibagisi tavotekatekei.  
\v 4 Ma tam iyai kuna vona bo, “Keriso akovi,” ma ina sisiya bagibagisi ke kuta vovotekatekei, tam na viviberom ma vonavaghata gwabimuwai kegha.  
\v 5 Ma tam iyai vonana kevovotekatekei na kuvi debe meyem da God nuwanuwana namada kuviiya. Vonana kevovotekatekei na takovi da tam God yavata koinuwasago.  
\v 6 Iyi tam kevonavona da God yavata koinuwasago na Yesu dobuwai ikikava imakai na tuna yawasina kava kevi bonebonei.   
\s1 Sisiya bagibagina ivi vuni.  
\p
\v 7 Turaturaku, tami nuwanuwaku. Agirugiruma kurimi na sisiya bagibagina avonavonavinotimi, tuna sisiyina na katamanina, ke vuna, iyamna rorova vitumaghana kovi karei na akovina koviiya. Ma sisiyina bagibagina na weni. “Kovi nuwaviinavivirana.” Tuna namada kovi yanei.\x * \xo 2:7 \xt Jon 13:34\x*  
\v 8 Tuna katamanina ma kegha da Keriso ipisi na sisiyina ivi vuni ma bade taku kurimi agirugirumi. Takovi da nani sisiyina bagibagina na vonavaghata, iyamna namada Keriso ina yawasa ivi debei ma bade ami yawasa idebei. Takitakitai da gwabimiyai didibara berasi na ekovikovi ma yasegana vaghata namada erakarakata.   
\p
\v 9 Meni wawayina evonavona da yasegana kamonai emakamakai ma Keresiyana varesina ibarakamtawei, tuna patana da didibara yawasina kamonai emakamakai.  
\v 10 Ma meni wawayina Keresiyana varesina nuwanuwana eviiviiya na yasegana kamonai emakamakai. Ma ke meyani ina bera beroi da varesina ina peku.  
\v 11 Meni wawayina varesina ibarakamtawei na tuna na didibara yawasina kamonai emakamakai ma ke itakovi da mike enenae, iyamna matana ididibarapotai.   
\p
\v 12 Natunatuku, tami nuwanuwaku. Agirugiruma kurimi, iyamna Keriso avanai na God ami berabero inotatawei.  
\v 13 Mami mau, agirugiruma kurimi, iyamna Keriso koakova bubuni. Dobu karenai na tuna namada imakamakai. Yarayaraga, agirugiruma kurimi, iyamna Seitan koghetani.   
\p
\v 14 Natunatuku, tami nuwanuwaku. Agirugiruma kurimi, iyamna Mamai God na koakovi. Mami mau, agirugiruma kurimi, iyamna Keriso koakovi. Dobu karenai na tuna namada imakamakai.  
\p Yarayaraga, agirugiruma kurimi, iyamna tami na rewapanimi ma God vonana na nuwakamomiyai emakamakai ma bade Seitan koghetani.   
\p
\v 15 Ma tami peyarimi, dobu yawasina ke kona kayowei. Iyavo kava dobu yawasina nuwanuwasi eviiviiya na ke kovokovoghina da Mamai God nuwanuwana ina viiya.   
\p
\v 16 Dobu yawasina na weni. Wawaya tupuwa ina kayowana ekirokirorowei, aviyavisina peyarina ekitakitai na enuwanuwakapiyei, ma bade aviyavisina rapesiyai ma ti mani i bera na ekayokayotatei. Tuna na dobu kana bera ma ti notasi na ke Mamai God ita vereveresi.  
\v 17 Weni dobuna ma kana bera kudubina na ina wapa, ma meni wawayina God ina kayowana eberaberai na ina makii nonowa.   
\s1 Keriso kana ghavighaviya.  
\p
\v 18 Natunatuku, tami nuwanuwaku. Mara damona inetupo. Ma namada kovi yanei da keriso vibero na epipisi. Ma avonavonemi da keriso viviberosi ipeyari kirakai namada inekiibau. Bera nakanani takitai na takovi da weni tuna na mara damona.  
\v 19 Ti damsi na ita ekalesiya ikiibutawei, iyamna ke meyani tota yavata kati nuwasago. Kati nuwasago na ita makai. Ma maranai ikiibutaweta na ivi debe meyesi da ti na ke Keresiyana turaturata.   
\p
\v 20 Ma tami na ke nakanani, iyamna Kanuma Vovokaravina itowatepanimi da kudubimi na vonavaghata koakovi.  
\v 21 Ke ata notai da tami na vonavaghata ke kotakovi. Ke tuna kubiine ata girugiruma kurimi, iyamna sisiya damina koviiviiya da meni sisiyina na vonavaghata ma meni sisiyina na vibero. Ma koakovi da God na ke viviberona.  
\v 22 Meni wawayina evonavona da Yesu na ke God ina Vivinevine Wawayina, tuna na viviberona. Nakanani ini sisiya na takovi da tuna keriso vibero ina keta ikivikivina, ma Mamai God ma Natuna yavata ibaresi.  
\v 23 Wawaya God Natuna ina barei na ke kovokovoghina da ina Mamai yavata ini nuwasago. Ma wawaya kawamatarai ina vona da Yesu na God Natuna na bade ina Mamai yavata ini nuwasago.   
\p
\v 24 Kokitaruvimi da karenai aviyavisina kovi yanei na kovokikini. Nakanani kona beraberai na mara nonowa Yesu yavata koni nuwasago ma bade Mamai God yavata.  
\v 25 Ma tuna ina vonakiiyapa bagibagina kurita iterei da yawasa makamakii nonowina ina vereta.   
\p
\v 26 Kokitaruvimi da iyavo kava eberabera tovoni da iti nowe beromi na i sisiya kobarei, tuna kubiine agirugiruma kurimi.  
\v 27 Ma tami na namada Keriso ina Kanuma Vovokaravina iveremi da nuwanuwami kamosiyai emakamakai, tuna kubiine ke wawaya konekwai da ini beyebeyemi. Kanuma Vovokaravina bera peyarina ibeyebeyemi. Ma kudubina na vonavaghata, ke sago vibero. Ma ikikava ibeyebeyemi na kovokikini da mara nonowa Keriso yavata koni nuwasago.   
\p
\v 28 Natunatuku, tami nuwanuwaku. Keriso yavata ami vinuwasago kovokikini da ina ne nonowa. Weni nakanani kona beraberai da maranai ina vovira na ke tinimaya, ere tepatorata maghinonai tamiiri.  
\v 29 Koakovi da Keriso na maninikiikiina, tuna kubiine kotakovi da wawaya iyavo kava bera maninisi eberaberai, ti damsi na God natunatuna.   
\c 3  
\s1 God natunatuna.  
\p
\v 1 Kovi yana, ita Mamai God ina nuwaviina irakata kirakai da ivoneta da tota natunatuna. Vonavaghata da tota na God natunatuna. Tuna kubiine iyavo kava dobu yawasina kamonai emakamakai na ke itakovi da tota nakanani, iyamna ti damsi na God ke itakovi.\x * \xo 3:1 \xt Jon 1:12\x*   
\p
\v 2 Turaturaku, tami nuwanuwaku. Vonavaghata da namada tota na God natunatuna, ma ke katakova da ikikava kitata ina virei, tuna ke iti debei kurita. Ma takovi da maranai Keriso ina vovira na ina rudeba da takitai da tuna kitana ikikava. Ma bade tota kitata ina virei da tuna maghimaghighina.  
\v 3 Iyavo kava Keriso itumaghanei ma ekoyakoyaghi na mara nonowa nuwanuwasi dadabuna ekiikiipupuni da ina ruyaghari, iyamna Keriso na yagharakiikiina.   
\p
\v 4 Iyavo kava bera beroberosi eberaberai na God ina vonaviyoyovana ikiigiiyei, iyamna berabero kudubina na nani vonaviyoyovanina emiimiirikupukuputei.  
\v 5 Ma koakovi da Keriso ipisi da ita bera beroberosi ita viitawei, ma tuna gwabinai na berabero kegha.\x * \xo 3:5 \xt Jon 1:29\x*  
\v 6 Tuna kubiine iyavo kava Keriso yavata inuwasago na berabero ke ina berai, ina voterei. Ma iyavo kava bera beroberosi patana da eberaberai na Keriso ke itakovi.   
\p
\v 7 Natunatuku, tami nuwanuwaku. Kokitaruvimi da ke sago iyai ini nowe beromi da ami keta koni wapai. Iyavo kava bera maninisi kava eberaberai na God ku matana ti na wawaya maninisi, Keriso nakanani.  
\v 8 Ma iyavo kava bera beroberosi eberaberai, ti na Seitan ina wawaya, iyamna Seitan berabero ivi karei ma patana da eberaberai. Ma God Natuna ipisi da Seitan ina bera iti kovi tuwanonowi.   
\p
\v 9 Iyavo kava itupuwame da ti na God natunatuna na berabero ke ita beraberai, iyamna God yavata inuwasago ma berabero ivoterei, iyamna i Mamai na God.  
\v 10 Yawasa weni nakanani takitai na takovi da iyavo kava na God natunatuna ma iyavo kava na Seitan natunatuna. Meni wawayina bera maninisi ke ita beraberai bo varesina yavata ke ita vivinuwaviina, tuna na ke God natuna.   
\s1 Tinuwaviinavivirana.  
\p
\v 11 Tami ami vitumaghana karenai na sisiya sago kovi yanei, sisiyina na weni. Tinuwaviinavivirana.\x * \xo 3:11 \xt Jon 13:34\x*  
\v 12 Ma ke kona berai da Kein nakanani, tuna Seitan ina wawaya kubiine da tina kikei ikiivunui. Ma avi kubiine ikiivunui? Iyamna ina yawasa kamonai na bera beroberosi iberaberai ma tina kikei na bera maninisi iberaberai.\x * \xo 3:12 \xt Gen 4:8\x*   
\p
\v 13 Varevaresiku, maranai wawaya dobuwai ina barakamtawemi na ke ami nota ina peku.  
\v 14 Keresiyana varevaresita yavata tinuwaviinavivirana, tuna kubiine takovi da tota na rabobo takiibutawei da yawayawata. Ma iyai ke ita vivinuwaviina na ivi debe meyei da tuna nakanani ma wawaya raborabobona.\x * \xo 3:14 \xt Jon 5:24\x*  
\v 15 Ma meni wawayina varesina ibarakamtawei, tuna na nakanani ma kiivunuwa wawayina. Ma koakovi da kiivunuwa wawayina na yawasa makamakii nonowina ke ina panani.  
\v 16 Takovi da nuwaviina vaghata na weni. Yesu Keriso ivere meyei kubiita. Ma tota bade ita yawasa taverena varevaresita kubiisi.  
\v 17 Meni wawayina sawara gwabinai emakamakai ma ikitai da varesina nuwapoya kamonai ma ke iti kamyuyuwei na tuna mani idebe meyei da God ina nuwaviina gwabinai kegha.  
\v 18 Natunatuku, tami nuwanuwaku. Ita nuwaviina na ke sisiyina kava tisisiyei ma ku tepana na berasi yavata taberai, tuna na nuwaviina vaghata.   
\s1 Ere tepatorata God kurina tanae.  
\p
\v 19 Nuwaviina berasi taberai na takovi da vonavaghata gwabitiyai. Ma tuna nuwanuwata inubai da ere nuwanubata God kurina tanae,  
\v 20 namanaki da nuwanuwata kamonai damita taviiviiya da berabero wawayita. Tota ere tepatorata God maghinonai tamiiri, iyamna God ighe kirakai da aviyavisina nuwanuwata kamonai ighekuyowei. Ma tuna ita yawasa kudubina iakova yavui.  
\v 21 Turaturaku, tami nuwanuwaku. Nuwanuwata yagharina na ita nota ini rewapana maranai God kurina tanipowana,  
\v 22 ma aviyavisina tinowi kurina na peyarina ina vereta, iyamna ina sisiya bagibagisi tavovotekatekei ma ina kayowana kava taberaberai.  
\v 23 Ma ina sisiya bagibagina kurita na weni. Natuna Yesu Keriso titumaghanei ma varevaresita yavata tinuwaviinavivirana. Ikikava Keriso ivoneta na nakanani taberai.\x * \xo 3:23 \xt Jon 13:34, 15:12, 17\x*  
\v 24 Ma iyavo kava God ina sisiya bagibagisi evovotekatekei, ti na God yavata inuwasago. Ma ina Kanuma Vovokaravina ivereta na tuna idebei kurita da God na nuwanuwata kamonai ma tota na God nuwanuwana kamonai.   
\c 4  
\s1 Kanukanuma tarubusi.  
\p
\v 1 Turaturaku, tami nuwanuwaku. Iyavo kava evonavonemi da Kanuma Vovokaravina gwabisiyai na ke yaghiyaghinai koni tumaghanesi. Peyarisi kona vorubusi ma konakovi da ti na God Kanumina gwabisiyai bo kegha, iyamna namada peroperoveta viviberosi ipeyari dobu enene yavui.  
\v 2 God ina Kanuma Vovokaravina na weni nakanani kona vogiiya. Iyavo kava God Kanumina gwabisiyai na ina vona da Yesu Keriso kunumai ioru ku dobu da ivi wawayota.  
\v 3 Ma iyavo kava ke ita vivivaghinei da Yesu Keriso na God gwabinai ipisi na kanuma vibero gwabisiyai, tuna na keriso vibero kanumina. Vonaverena kovi yanei da tuna kanumina ita pisi na namada inekiibau da dobuwai emakamakai.   
\p
\v 4 Natunatuku, tami nuwanuwaku. Tami na God rapenai ma nani peroperoveta viviberosi na namada koghetanisi, iyamna Kanuma Vovokaravina gwabimiyai ivi rewapana kirakai da kanuma berona dobuwai ighetani, tuna kanumina na Seitan.  
\v 5 Ma ti damsi na weni dobuna wawayisi, tuna kubiine na dobu yawasina isisiyei. Ma iyavo kava dobu yawasina kamonai emakamakai na i sisiya iyana bogai.  
\v 6 Tokai aposol na God rapenai ma meni wawayina God iakovi na akii vibeyebeyena ini yanei. Ma meni wawayina God ke itakovi na ke ini yanekai. Weni nakanani takitai na tavogiini da meni wawayina na Vonavaghata Kanumina gwabinai, tuna na Kanuma Vovokaravina. Ma bade tavogiini da meni wawayina na kanuma viviberona gwabinai.   
\s1 God ina nuwaviina.  
\p
\v 7 Turaturaku, tami nuwanuwaku. Tinuwaviinavivirana iyamna God na nuwaviina karena. Meni wawayina inuwaviina na God iakovi ma ivi debei da tuna na God natuna.  
\v 8 Ma meni wawayina ke ita vivinuwaviina na God ke itakovi, iyamna God na nuwaviina.  
\v 9 God ina nuwaviina na weni nakanani ivi debei kurita. Natuna sago kava ma ivonatawei ku dobu da tuna gwabinai yawasa tapanani.  
\v 10 Nuwaviina vaghata na ke tota ita nuwaviina God kurina nakanani. God ina nuwaviina kurita na nuwaviina vaghata. Natuna ivonatawei da ivere meyei da ivi suwara da ita berabero kovoghina iviiya.   
\p
\v 11 Turaturaku, tami nuwanuwaku. God ina nuwaviina irakata kirakai kurita, tuna kubiine na tota bade tinuwaviinavivirana.  
\v 12 Ke sago iyai God ita kita tovoni. Ma tinuwaviinavivirana na God nuwanuwata kamonai emakamakai. Ma tuna ina berita da ita yawasa kamonai na ita nuwaviina ina rakata kamokamowa.\x * \xo 4:12 \xt Jon 1:18\x*   
\p
\v 13 God Kanumina ivereta, tuna kubiine takovi da God ina yawasa nuwanuwata kamonai ma tota ita yawasa na tuna gwabinai.  
\v 14 Mamai God, Natuna ivonatawei da dobu kana Viviyawa. Ma tokai aposol matakiiyai kakitai na debiiyai kaimamatara da tuna sisiyina na vonavaghata.  
\v 15 Meni wawayina evonavona da Yesu na God Natuna, na wawayina nuwanuwana kamonai God emakamakai ma wawayina ina yawasa na God gwabinai.  
\v 16 Takovi da God ina nuwaviina kurita irakata kirakai da tepanai tamiimiiri.  
\p God na nuwaviina. Meni wawayina ina yawasa kamonai ina nuwaviina irakata na nuwanuwana kamonai God emakamakai, ma God yavata inuwasago.  
\v 17 Weni vinuwasagona kubiine tota ita nuwaviina ina rakata kamowa da God ina nuwaviina yavata ini yavayavatei. Ma vitupavira maranai na titepatora, iyamna ita yawasa dobuwai na Keriso nakanani.  
\v 18 Wawaya God nuwanuwana eviiviiya na ke ina yabumana, iyamna nuwaviina vaghata na yabumana ekwavikwavini. Wawaya vitupavira ma kovogha eyabuyabumanei na tuna mani ivi debe meyei da ina yawasa kamonai na nuwaviina vaghata kegha.   
\p
\v 19 God ina nuwaviina kurita ivi nao, tuna kubiine tota bade tinuwaviina.  
\v 20 Meni wawayina ina vona bo, “God nuwanuwana aviiviiya,” ma Keresiyana varesina ibarakamtawei, tuna na viviberona. Varesina ekitakitai ma kegha da nuwanuwana ke ita viiviiya na ikikava God nuwanuwana ina viiya, iyamna ke meyani God ita kitai.  
\v 21 Ma vaghina, ina sisiya bagibagina na weni nakanani ivoneta. Meni wawayina God nuwanuwana eviiviiya na bade varesina nuwanuwana ina viiya.   
\c 5  
\s1 Dobu yawasina taghegavovori.  
\p
\v 1 Wawaya iyavo kava itumaghana da Yesu na God ina Vivinevine Wawayina, ti damsi kudubisi na God natunatuna. Ma iyavo kava tomowa magurina nuwanuwana eviiviiya na bade natunatuna yavata nuwanuwasi ina viiya.  
\v 2 Ma ikikava God natunatuna kurisi tinuwaviina na weni. God nuwanuwana taviiya ma ina sisiya bagibagisi tavotekatekei.  
\v 3 Ina sisiya bagibagisi tavotekatekei na tidebe meyeta da ita nuwaviina God kurina emakamakai. Ma nani sisiyisi na ke vitana,\x * \xo 5:3 \xt Jon 14:15\x*  
\v 4 iyamna iyavo kava God natunatuna na yawasa berona ighegavovori. Keriso titumaghana kirakiiyei na yawasa berona dobuwai titugudai.  
\v 5 Meni wawayina itumaghana kirakai da Yesu na God Natuna, tuna wawayina kava dobu yawasina ina ghegavovori.   
\s1 God ivi mamatara da Yesu Keriso na iyai.  
\p
\v 6 Yesu Keriso ipisi na okowai ibabataito ma korosiyai tarana isororo. Ma ke okowa kava, ma tara yavata ivi matakira kurita. Ma bade Kanuma Vovokaravina nuwanuwata kamonai imamatareta da vonavaghata takovi.  
\v 7 Bera ivi aroba imamatareta,  
\v 8 sago na Kanuma Vovokaravina, sago na okowa, ma sago na tara. Ivi aroba i sisiya na sago, evonavoneta da Yesu na God Natuna.  
\v 9 Wawaya dobuwai imamatara na tanotanotai da vonavaghata isisiyei. Ma God ivi mamatara kurita na ina vimamatara ivi rewapana kirakai, ke wawayota nakanani. Ma takovi da aviyavisina ivi sisiyei Natuna kubiine na vonavaghata.  
\v 10 Ma meni wawayina God Natuna itumaghanei na weni sisiyina nuwanuwana kamonai emakamakai. Ma meni wawayina God ina sisiya ke ita vivitumaghanei na evonavona da God na viviberona. Ma God ina vimamatara kamonai na tuna mani Natuna ivi sisiyei.  
\v 11 Ma sisiyina ivi mamatarei kurita na weni. God yawasa makamakii nonowina ivereta ma nani yawasina na Natuna gwabinai taviiya.\x * \xo 5:11 \xt Jon 3:36\x*  
\v 12 Ma iyavo kava God Natuna gwabisiyai na yawasa makamakii nonowina namada iviiya. Ma iyavo kava God Natuna ke gwabisiyai na yawasa makamakii nonowina ke ita viiya.   
\s1 Yawasa makamakii nonowina.  
\p
\v 13 Weni sisiyisi agirugiruma kurimi da tami iyavo kava God Natuna koitumaghanei na kotakovi da yawasa makamakii nonowina namada koviiya.  
\v 14 Ma titepatora da God kurina tamiiririya ma ina kayowanai kava tinowi kurina na takovi da ini yaneta.  
\v 15 Ma ini yaneta kubiine aviyavisina kurina tinowi na takovi da ina vereta.   
\p
\v 16 Ma iyi tam kuakovi da varesim berabero eberaberai na God kurina kuna nipowana da ini yawasi. Ma berabero sago kava emakamakai na tuna ibero kirakai da damona na wawaya kanumina ina rabobo. Wawaya nani bera berona ina berai na ke ata vonavonemi da kuna nipowana wawayina kubiine, ke ruvaruvana.  
\v 17 Bera dowadowasi peyarina yavu na berabero God ku matana. Ma berabero viya ke ina berita da God yavata tibogebogeta da kanumita ina rabobo.   
\p
\v 18 Takovi da meni wawayina ina tupuwame da tuna God natuna na bera beroberosi ina voterei, ma Keriso nani wawayina etaratarapapari da Seitan ke ina kiiviberoi.   
\p
\v 19 Ma takovi da tota na God natunatuna. Ma dobuwai iyavo kava ke God ina rakaraka kamonai na peyarisi Seitan ibadesi.   
\p
\v 20 Bade takovi da God Natuna ipisi na akova ivereta da God vaghata akovina taviiya. Ma Natuna Yesu Keriso yavata tinuwasago, tuna kubiine God yavata tinuwasago. Tuna kava na God vaghata ma yawasa makamakii nonowina everevereta.   
\p
\v 21 Natunatuku, tami nuwanuwaku. Sawara yamoyamonisi ke kona vokavakavarisi.