\id TIT - Patep NT [ptp] -Papua New Guinea 1986 (DBL 2014) 
\h TAITAS 
\toc1 Kɨpihac wê Pol kɨvuu vô Taitas ge 
\toc2 Taitas 
\toc3 Titi 
\mt1 TAITAS  
\mt2 Kɨpihac wê Pol kɨvuu vô  
\mt2 Taitas ge  
\c 1  
\p
\v 1 A, Pol, a ga Anutu nu yuac ti, dɨ Yesu Kɨlisi nu sinale a. Anutu vông a la vô xomxo wê i vɨnoo he ên nêb he i tu i nue ge ên nêb a la ngɨdu he xôn ên he i vông i vin xêkɨzêc, dɨ he i xovô Anutu kɨyang nôn wê ob dɨdii he mɨ la vac môp wê Anutu vông ge,  
\v 2 dɨ he i xovô bê he obêc dô mavɨha luta lêc luta. Ilage wê Anutu gên o tung lag yuu kɨbun lêm ge od hɨlu kɨyang pyap ên nêbê il obêc dô madvɨha luta lêc luta. Dɨ Anutu o tɨyi wê ob kɨtyoo il ge lêm.  
\v 3 Om buc wê Anutu nêl ge wê vông xomxo la nêl kɨyang tige yêp seac. Anutu wê vô il vêl ên il nêd nipaên ge nêl ên nêb a êno kô yuac xolac nêlên tige.   
\p
\v 4 Taitas, a kɨvuu kɨpihac tiga vô ông. Ông ge a nug wê u xôn vông i vin ge. Mag Anutu yuu nu tuc Yesu Kɨlisi wê vô il vêl ên il nêd nipaên ge, yuu i vông vɨzid nivɨha hɨxôn kɨyang malehe i ngɨdu ông xôn.   
\p
\v 5 A sea ông vac vɨgwe Klit ên a nêbê ông dô vac Klit dɨ vông yuac wê a vông ge myahɨpu i yêp nivɨha, dɨ ông vɨnoo he wê ob kô yuac gyovɨxa vac vɨgwe toto i tɨyi wê a nêl vô ông ilage.  
\v 6 Om ông yaxên he dɨ vɨnoo he wê nipaên ti o yêp vô he lêm, dɨ wê vɨnê tibed, dɨ wê nue vông i vin Yesu om xomxo ti o tɨyi wê ob nêl bê xomxo tige nue mi vông môp nipɨpaa me vô nɨnya kɨtu vô tae mae ge lêm.  
\v 7 Ên he gyovɨxa wê ob viac Anutu yuac, om he i tɨmu vô môp nivɨha ên xomxo i o lêc tulec he nên nipaên ti lêm, dɨ he i o lêc kô he lec vô xomxo lêm, dɨ he xêyaa i o lêc vô myavɨnê lutibed lêm, dɨ he i o lêc num mɨ vô mavmav lêm, dɨ he i o lêc hi xomxo vaxvax lêm, dɨ he i o lêc doma vô mone i luu vêl lêm.  
\v 8 Nge, he i kô tɨbii mɨ loc viac he vac xumac dɨ vev ngwax vô he, dɨ he xêyaa i vin lec môp nivɨha vɨhati, dɨ he i viac he pɨyôp i yêp nivɨha, dɨ he i dô i tɨyi xocbê xomxo wê viac i nivɨha ge, dɨ he i tɨmu vô môp wê Anutu vông ge vɨhati, dɨ he i viac he nivɨha ên môp vɨhati wê he xovô ên nêb ob vông ge,  
\v 9 dɨ he i hôm Anutu kɨyang nôn wê xomxo tɨxuu he ya ge xôn pɨlihi, ên he obêc hôm xôn pɨlihi ge od he tɨyi wê he ob nêl xolac nôn vô tɨbii dɨ hi he wê yax xolac vun ge nên kɨyang i tô.   
\p
\v 10 Ên xomxo tɨbeac vac vɨgwe Klit vô nɨnya kɨtu vô Anutu kɨyang, dɨ nêl kɨyang vaxvax wê vông xomxo pɨyôp vô hɨmena hɨmena ge. He wê mi tɨmu vô Yuda vông môp ninɨvi gôlên gee, he tɨbeac mi nêl kɨyang tibêgee.  
\v 11 He nêb he ob kô mone yuu susu vô xomxo, om he tɨxuu he ya môp nipaên wê o tɨyi wê il ob vông ge lêm. Om kɨyang wê he nêl ge vông xomxo hɨxôn he tae mae lie vô nipaên. Mêgem ông le vac he xôn ên he i o nêl kɨyang nipaên tibêge lêm.  
\v 12 Ilage Klit levac ti nêl lec lie Klit bêga ên nêbê, “He Klit ge xomxo vɨgwe kɨtyooên, dɨ he tɨyi xocbê bwoc vɨmen ge, dɨ he mi ya levac, dɨ mi dô ni maên.”  
\v 13 Kɨyang tige vɨxôhɨlôg nôn. Om ông nêl he Klit nên nipaên vô he ya kɨyang xêkɨzêc ên vông vinên wê he vông ge i yêp bôbac,  
\v 14 dɨ he i o ngô pɨvulac pɨleva wê xomxo Yuda mi nêl ge lêm, dɨ he i o ngô kɨyang baba wê xomxo wê vô nɨmi vô Anutu kɨyang nôn ob nêl ge lêm.   
\p
\v 15 Xomxo wê nɨlô paha ge ob yê susu vɨhati nêb nivɨha. Lêc xomxo wê nɨlô ningeac wê o vông i vin Kɨlisi lêm ge, he ob yê susu ti nivɨha lêm, ên pɨyôp yuu nɨlô vô ningeac tɨyima.  
\v 16 He mya mi nêl bêga en nêbê, “A xovô Anutu.” Lêc môp wê he vông ge nêl he kɨtong nêbê he mi yax Anutu vun. He mi vô nɨnya kɨtu vô Anutu kɨyang, dɨ he o tɨyi wê he ob vông yuac nivɨha ti ge lêm. Om Anutu yê he nipaên.   
\c 2  
\s1 Kɨyang lec kɨpwoc  
\p
\v 1 Taitas, ông lêc tɨxuu xomxo ya môp nivɨha i tɨyi xocbê Anutu kɨyang nôn nêl ge.  
\v 2 Om ông nêl vô he kɨpwoc bêga bê he i o lêc num mɨ vô mavmav lêm. Nge, he i tɨmu vô môp nivɨha tɨyi wê ob vông xomxo yê he nivɨha ge, dɨ he i viac he pɨyôp i yêp nivɨha, dɨ he i vông i vin xêkɨzêc ta, dɨ he xêyaa i vin lec xomxo, dɨ he i le xêkɨzêc vac vɨyin vɨhati wê ob val vô he ge.   
\s1 Kɨyang lec vêxta yuu vêxwo  
\p
\v 3 Ông nêl vô he vêxta bêga bê he i tɨmu vô môp i tɨyi xocbê xomxo vông vinên vông ge, dɨ he i o lêc nêl kɨyang nipaên lec xomxo lêm, dɨ he i o num mia xêkɨzêc dɨ mia i viac he lêm. Nge, he i tɨxuu he vêxwo ya môp nivɨha,  
\v 4 ên he vêxwo gee i xovô mɨ tɨmu vô môp nivɨha bêga bê he xêyaa i vin lec lɨyae nue,  
\v 5 dɨ he i viac he pɨyôp i yêp nivɨha, dɨ he i o loc vô vux bangwe dɨ vông môp nipaên lêm, dɨ he i viac he xumac i nivɨha, dɨ he i ngɨdu xomxo xôn, dɨ he i loc vac lɨyae kɨyang kwa ngɨbi. He i tɨmu vô môp tibêgee vɨhati ên xomxo ti i o nêl nipaên lec Anutu xolac lêm.   
\s1 Kɨyang lec ngɨvihi  
\p
\v 6 Ông nêl vô he ngɨvihi bêga bê he i viac he pɨyôp i yêp nivɨha.  
\v 7 Taitas, ôcông va ge ông tɨmu vô môp nivɨha ên he ngɨvihi he i yê dɨ tɨmu vô ông vɨxam. Dɨ wê ông obêc tɨxuu he ya kɨyang ge, od le i lêc nêl kɨyang kɨtyooên hɨxôn lêm. Nge, ông vông pɨyôp i loc vô môp nivɨha dɨ vông ông yuac tige.  
\v 8 Ông nêl kɨyang nôn wê xovôên nivɨha ge ên xomxo ti i o lêc tulec nipaên ti i yêp vac lêm. Om xomxo obêc nêb vông vevac vô ông ya kɨyang ge od he ni ob yoc ên he, ên he o tɨyi wê ob nêl kɨyang nipaên lec il ge lêm.   
\s1 Kɨyang lec xomxo wê tu xomxo levac nue yuac  
\p
\v 9 Ông nêl vô he wê tu xomxo levac nue yuac ge bêga bê he i loc vac xomxo levac wê viac he ge kwa ngɨbi, dɨ vông he yuac vɨhati i nivɨha i tɨyi wê xomxo levac ob yê nivɨha ge. Dɨ he i o luu kɨyang vô xomxo levac ya kɨyang nipaên lêm.  
\v 10 He i o lêc vun xomxo levac susu lêm. Nge, he i vông he yuac vɨhati i yêp nivɨha ên xomxo levac i yê bê he o vông yuac ti vô nipaên lêm. Ên nue yuac obêc vông bêge ge od xomxo ob yê xolac wê il mi nêl vô he ge nêb nivɨha. Xolac tiga, Anutu wê vô il vêl ên il nêd nipaên ge kɨyang nôn.   
\p
\v 11 Ên môp wê Anutu xo vɨgwe pɨsiv ên il ge lam yêp seac pyap. Môp tige tɨyi wê ob vô xomxo vɨhati vêl ên he nên nipaên,  
\v 12 dɨ ob tɨxuu il ya môp nivɨha bêga nêbê il ob sea môp wê il vô nɨmid vô Anutu ge, dɨ sea môp nipaên kɨbun ga, dɨ kol il ên môp nipaên, dɨ vông môp wê bôbac ge, dɨ tɨmu vô môp wê Anutu vông ge vɨhati i tɨyi buc vɨhati wê il dô kɨbun ga ge.  
\v 13 Il ob bin nôn nivɨha ti wê ob vông il xêdyaa vô nivɨha ge. Nôn tige bêga nêbê il Mag Anutu wê levac ge hɨxôn Yesu Kɨlisi wê vô il vêl ên il nêd nipaên ge obêc vena hɨxôn xêseac wê i vông ge dɨ lam le seac vô il.  
\v 14 Kɨlisi lam yib ên il ên nêb ob vô il vêl ên nipaên vɨhati yang dɨ vông il vô paha lec, ên nêb il tu i nue wê xo vɨnux ên nêb il vông yuac nivɨha ge.   
\p
\v 15 Om ông nêl kɨyang tige vô xomxo vɨhati, dɨ tɨpi vô he pɨyôp ên he i tɨmu vô kɨyang tige, dɨ nêl he nên nipaên kɨtong vô he. Le i lêc vông xomxo ti i yê ông i tɨyi xocbê xomxo vɨdaaên ge lêm.   
\c 3  
\s1 Môp nivɨha wê il ob tɨmu vô ge  
\p
\v 1 Taitas, ông nêl vô tɨbii Klit bêga bê he i loc vac gavman hɨxôn xomxo levac vɨhati kwa ngɨbi, dɨ ngô he vya, dɨ he i viac he i tɨyi wê he ob vông yuac nivɨha vɨhati ge,  
\v 2 dɨ he i o nêl kɨyang nipaên lec xomxo ti lêm, dɨ he i o ngaênma lêm. Nge, he i lum nêl kɨyang vô xomxo, dɨ he i vông nivɨha vô he vɨhati.   
\p
\v 3 Ên ilage il pɨyôp maên êno, dɨ il vô nɨnyad kɨtu vô kɨyang, dɨ Seten dɨdii il mɨ la vac môp nipaên, dɨ il nɨlôd kɨdu il ên môp vɨyang vɨyang wê il xovô ên il nêb il ob vông ge, hɨxôn môp wê il nidnɨvi yê nivɨha ge, om môp nipaên tibêgee viac il ilage, dɨ il nɨlôd xo nipaên lec xomxo, dɨ il do mad vô susu wê xomxo vông ge. Xomxo yê il nipaên, dɨ il xê he nipaên.  
\v 4 Il mi vông môp tibêgee ilage. Mêlêc Anutu wê vô il vêl ên il nêd nipaên ge xêyaa vin lec il dɨ vông nivɨha vô il. Om buc wê xêyaa vin lecên yuu nivɨha wê i vông ge lam yêp seac vô il madnôn,  
\v 5 ge wê i vô il vêl ên il nêd nipaên. Lêc Anutu o vô il vêl ên il nêd nipaên ên yuac nivɨha ti wê il vông ge lêm. Nge, Anutu vaci xo vɨgwe pɨsiv ên il, om lipac il vô paha lec dɨ il tu i nue paha, dɨ Myakɨlôhô Ngɨbua vông il dô madvɨha.  
\v 6 Yesu vô il vêl ên il nêd nipaên, om Anutu kɨpyax Myakɨlôhô Ngɨbua lam vô il luu vêl lec yuac wê Yesu Kɨlisi vông ge  
\v 7 ên nêb môp wê i xo vɨgwe pɨsiv ên il ge i vông il tu xomxo wê Anutu ob yê nivɨha ge dɨ vông il tu i nue dɨ il dô bin buc wê il ob dô madvɨha luta lêc luta ge.   
\p
\v 8 Kɨyang tige vɨxôhɨlôg nôn. Om a nêl vô ông bêga bê ông nêl kɨyang tige xêkɨzêc vô xomxo, ên he wê vông i vin Anutu ge he i vông nɨlô i loc vô yuac nivɨha vɨhati dɨ le xêkɨzêc vac yuac tigee. Yuac tigee nivɨha dɨ ob ngɨdu xomxo xôn.   
\p
\v 9 Ông lêc le teva ên kɨyang vaxvax wê xomxo kunacma lec ge, dɨ kɨyang wê he nêl lec bue tɨvae lê ge, dɨ kɨyang hɨgacên, dɨ kɨyang wê he ngaênma lec Moses xolac ge. Ông le teva ên kɨyang tibêgee, ên ob ngɨdu il xôn lêm dɨ ob vô nôn nivɨha vô il lêm.   
\p
\v 10 Xomxo ti obêc lam nêl kɨyang ti wê ob vông xomxo vông vinên hɨbu sea mɨ la le kɨdu kɨdu ge od ông nêl i nên nipaên vô i manôn lu ti me lu yuu. Lêc ngôên obêc ma ge od ông vô nɨmim vô i,  
\v 11 ên ông xovô ên ông nêbê xomxo tibêge sea môp nivɨha dɨ la vô môp nipaên, om nipaên wê ici va vông ge vông i vô nipaên dɨ kɨtya i vêl.   
\s1 Kɨyang vɨwen tɨmuên  
\p
\v 12 A nêb a obêc vông Atemas me Tikikas i loc vô ông vô buc tɨmuên. Om buc wê yuu ngwe obêc val vô ông ge od ông sea vɨgwe Klit dɨ seb lam vô a lutibed vac vɨgwe Nikopolis, ên a nêl pyap ên a nêb a ob dô vac Nikopolis tɨyi dentuc wê lun yuu ningɨgooên ge.  
\v 13 Xomxo ti lê nêbê Sinas ge wê i xovô môp wê gavman vông ge vɨhati. Ông vông Sinas yuu Apolos i loc lutibed, dɨ ông ngɨdu yuu xôn êdêc susu ti i o lêc ma ên yuu vac môp lêm.   
\p
\v 14 A nêl vô il lige vông vinên vɨhati bêga bê he i le xêkɨzêc vac yuac vɨhati wê nivɨha ge ên i ngɨdu he xôn i tɨyi buc vɨhati dɨ i ngɨdu xomxo wê susu maên ge xôn êno. Om he i vông yuac nivɨha wê ob vô nôn nivɨha ge, dɨ he i o dô vɨdaaên lêm.   
\p
\v 15 Xomxo vɨhati wê dô hɨxôn a ge nêl vɨdiiên vô ông. Ông nêl vɨdiiên vô il lige vông vinên wê xêyaa vin lec il ge.  
\p Vɨzid nivɨha wê Anutu vông ge i viac xam vɨhati.