\id ROM - Patep NT [ptp] -Papua New Guinea 1986 (DBL 2014) 
\h LOM 
\toc1 Kɨpihac wê Pol kɨvuu vô tɨbii Lom ge 
\toc2 Lom 
\toc3 Lom 
\mt1 LOM  
\mt2 Kɨpihac wê Pol kɨvuu vô  
\mt2 tɨbii Lom ge  
\c 1  
\s1 Pol nêl i yuac sinale kehe kɨtong  
\p
\v 1 A, Pol, a kɨvuu kɨpihac ga vô xam Lom. A ga Yesu Kɨlisi nu yuac ti wê Anutu vɨnoo a nêb a tu sinale ti dɨ nêl i xolac ge.   
\p
\v 2 Xolac tiga, Anutu nêl vô plopete ilage mɨ he kɨvuu i yêp vac kɨpihac ngɨbua.  
\v 3 Xolac tiga nêl lec Anutu nu Yesu wê lam tu xomxo gê kɨbun ga, vac hɨpu wê Devit vông ge,  
\v 4 lêc Yesu ge xomxo xêseac pɨleva ti, om Anutu tɨpi vô i kɨdi lec mavɨha vac yibên ên nêb xomxo i xovô bê Yesu ge Anutu nu wê xomxo xêkɨzêc. Yesu Kɨlisi ge il nêd Apumtau.  
\v 5 Mêd Anutu vông vɨzid vô xe lec Yesu tibed om vông yuac sinale vô xe ên nêb xe vông Kɨlisi lê i vô levac. Anutu vông bêge ên nêbê xomxo vac vɨgwe vɨyang vɨyang ge i ngô xolac dɨ vông i vin dɨ vông i vô nôn lec.  
\v 6 Dɨ xam êno, Anutu tyuc xam ên nêb xam tu Yesu Kɨlisi xe.   
\p
\v 7 Mêgem a kɨvuu kɨpihac ga vô xam tɨbii Lom wê Anutu xêyaa vin lec xam dɨ i tyuc xam nêbê xam tu i nue ge. Il Mag Anutu yuu Apumtau Yesu Kɨlisi, yuu i vông vɨzid hɨxôn kɨyang malehe i loc ngɨdu xam xôn.   
\s1 Pol nêb ob la yê tɨbii Lom  
\p
\v 8 A ob nêl kɨyang vô xam tax bêga bê tɨbii nêl vông vinên wê xam vông ge vô levac vac vɨgwe vɨhati, om a hi vɨxag pec ên xam vô Anutu lec Yesu Kɨlisi lê.  
\v 9 A ga wê a vông nɨlôg la yadɨluhu vô Anutu yuac dɨ a nêl nu tuc xolac kɨtong, om Anutu vaci xovô wê a mi xo xam vac kɨtaaên tɨyi lec buc vɨhati ge.  
\v 10 Lêc a gên o loc vô xam ila ti lêm, mêgem a mi kɨtaa vô Anutu ên a nêbê Anutu obêc tyuc lec ge od i lêc hɨlung môp wê a ob loc vô xam ge.  
\v 11 Ên a nɨlôg kɨdu a ên nêb a loc xê xam, ên vông vɨzid wê Myakɨlôhô Ngɨbua vông ge ya vô xam ên i ngɨdu vông vinên wê xam vông ge xôn.  
\v 12 Kehe bêga, a nêb vông vinên wê a vông ge i ngɨdu xam xôn, dɨ xam êno, vông vinên wê xam vông ge i lêc ngɨdu a xôn, ên vông vinên wê il vông ge i ngɨdu il vɨhati xôn.   
\p
\v 13 Xam lige, a nêb xam xovô bê buc tɨbeac a nêb a ob loc vô xam lê, lêc kɨyang yuu yuac tɨbeac hôm a xôn om a o tɨyi wê a ob loc ge lêm. Om a nêb a ob loc vông xolac vô xam ên i vô nôn vac xam mahɨgun i tɨyi xocbê a la vông vac tɨbii baba ben ge.  
\v 14 A yuac yêp wê a ob nêl xolac vô tɨbii vɨyang vɨyang, om a ob nêl vô he Glik wê he xovô kɨyang tɨbeac gee dɨ he madɨluhu êno, dɨ a ob nêl vô tɨbii wê pɨyôp nivɨha gee dɨ nêl vô he wê pɨyôp maên gee hɨxôn.  
\v 15 Mêgem a nɨlôg kɨdu a nêb a nêl xolac kɨtong vô xam Lom hɨxôn.   
\s1 Anutu xolac ge xêkɨzêc  
\p
\v 16 A nig ob yoc ên Anutu xolac lêm, ên xolac tiga xêkɨzêc wê Anutu vông ge, tɨyi wê xomxo ti obêc vông i vin xolac ge od Anutu obêc kɨtya i nên nipaên vêl dɨ tung i lôm lam dô vac xêseac nɨlô. Kɨyang tige val vô xe Yuda tax dêc la vô tɨbii madɨluhu tɨmuên.  
\v 17 Ên xolac tiga nêl Anutu môp yêp seac bêga ên nêbê Anutu ob yê xomxo nêb he xomxo nivɨha, kehe lec wê he vông i vin Kɨlisi ge, tɨyi xocbê kɨyang wê yêp vac xolac bêga ên nêbê, “Xomxo ti obêc vông i vin ge, od Anutu obêc yê i nêbê i xomxo nivɨha wê ob dô mavɨha ge.”   
\s1 Kɨyang yêp vô xomxo vɨhati ên wê he vông nipaên ge  
\p
\v 18 Il xovô ên il nêbê Anutu xêyaa vô myavɨnê vô xomxo nipaên om ici va obêc vông myavɨwen vô he lec nipaên wê he vông ge, ên he vô nɨmi vô Anutu dɨ vông môp nipaên luu vêl, om nipaên wê he vông ge kɨtya kɨyang nôn vêl ên he nɨlô.  
\v 19 Anutu ob vông myavɨwen vô he, ên môp wê Anutu vông ge ti o yêp xôpacên mɨ he lungên lêm. Nge, vɨhati yêp seac tɨyi wê xomxo ob yê dɨ xovô ge, ên Anutu vaci hɨlung vô he.  
\v 20 Vô buc mugên ilage wê Anutu tung lag yuu kɨbun ge dɨ i lam tyip gwêbaga hɨxôn, xomxo obêc yê susu wê Anutu tung ge od ob xovô bê Anutu ge Anutu nôn dɨ i xêkɨzêc wê ob yêp luta lêc luta ge. Vɨxôhɨlôg, xomxo o tɨyi wê ob yê Anutu lec manôn ge lêm, lêc susu wê Anutu tung ge wê ob vông xovôên vô xomxo, om xomxo ti o tɨyi wê ob nêbê i lungên Anutu ge lêm.   
\p
\v 21 Ên he xovô Anutu lê, lêc he o pɨmil Anutu lê dɨ nêl bê i Anutu lêm, dɨ he o hi vɨxa pec ên vɨzid wê i vông ge lêm. Nge, he pɨyôp vô judajuda dɨ he vyac xovôên ma, om vông he nɨlô vô mapɨtoc.  
\v 22 He yong he nêbê he tɨbii xovôên, lêc he tɨyi xocbê tɨbii pɨyôp maên.  
\v 23 He vô nɨmi vô Anutu mavɨha wê yibên ob ma ge, dɨ la yev vɨxa kɨtu vô anutu mayibên wê xomxo sev i tɨyi xocbê xomxo yuu menac dɨ lɨlii yuu myel hɨxôn susu mayibên mangwe.  
\v 24 He vông môp nipaên bêge, mêgem Anutu sea he dɨ he nɨlô dɨdii he mɨ la vac môp ningeac om he vông he ninɨvi vô nipaên lec môp tibêgee.  
\v 25 Xomxo tigee sea Anutu kɨyang nôn dɨ vông i vin kɨyang kɨtyooên. Mêd he sea Anutu wê tu susu vɨyang vɨyang ge kehe ge dɨ la yev vɨxa kɨtu vô dɨ kɨtaa vô susu wê Anutu tung ge. Lêc Anutu ge mavɨha kehe mêgem il ob pɨmil i lê i vô levac dɨ i yêp luta lêc luta. Nôn.   
\p
\v 26 Xomxo vông môp nipaên tibêge, mêgem Anutu sea he dɨ he la vac môp nipaên wê he nɨlô kɨdu he nêb he ob vông ge, om vêx sea môp wê ob kô vux ge dɨ vông môp nipaên vôma.  
\v 27 Dɨ he vux êno sea môp nivɨha wê ob kô vêx ge, dɨ he nɨlô kɨdi lec nêb he ob la vô vux vaci, om he vux vông môp nipaên vôma, mêgem heche va kô myavɨwen nipaên tɨyi môp wê he vông ge.   
\p
\v 28 He nêb he ob xovô Anutu vac pɨyôp wê he vông ge lêm, mêgem Anutu sea he dɨ he tɨmu vô môp nipaên wê heche va pɨyôp xovô ge.  
\v 29 Mêgem xomxo tigee vông môp nipaên vɨyang vɨyang ge pup vac he nɨlô, om he doma vô xomxo susu, dɨ he doma vô môp nipaên nêb he ob vông xomxo i vô nipaên, dɨ he yê xomxo wê he susu tɨbeac ge nipaên, dɨ he hi xomxo yib, dɨ he xêyaa vô myavɨnê vôma, dɨ he nêl kɨyang kɨtyooên, dɨ he nêb he ob vông xomxo vɨhati i vô nipaên, dɨ he yê xomxo nên soên dɨ keac lec i la nɨnya nɨnya,  
\v 30 dɨ he nêl kɨyang kɨtyooên lec xomxo, dɨ he vô nɨmi vô Anutu, dɨ he yong he dɨ kô he lec, dɨ he pɨyôp la tulec môp paha wê ob vô nipaên ge mangwe hɨxôn, dɨ he pwoo tae mae vya vac,  
\v 31 dɨ he pɨyôp vô judajuda, dɨ he nêl kɨyang lê, lêc he o vông kɨyang vô nôn lec lêm, dɨ he xêyaa o vin lec lie lêm, dɨ he o xo vɨgwe pɨsiv ên xomxo ti lêm.  
\v 32 Xomxo tigee xovô kɨyang wê Anutu nêl ên nêbê xomxo obêc vông môp nipaên tibêgee ge od tɨyi wê he ob yib lec nipaên wê he vông ge. He xovô kɨyang tige lê, lêc he o sea môp nipaên wê he mi vông ge lêm, dɨ he nên nipaên ti yêp hɨxôn bêga nêbê he pɨmil xomxo wê vông nipaên gee hɨxôn.   
\c 2  
\s1 Anutu obêc yaxên xomxo vɨhati ge nên kɨyang tɨmuên  
\p
\v 1 Xam wê xam vô nɨlôm vô xomxo ya ên xam nêb he tɨbii nipaên ge, xam o tɨyi wê xam ob yax nipaên wê xam vông ge vun lêm. Ên môp nipaên wê xam vô nɨlôm vô he ge yêp vô xam êno hɨxôn, om xam obêc vô nɨlôm vô he ge od xocbê xam vô nɨlôm vô xacxam va ge êno.  
\v 2 Il xovô ên il nêbê Anutu obêc vông myavɨwen nipaên vô xomxo wê vông môp nipaên tibêgee, dɨ Anutu môp wê ob yaxên he dɨ tɨtô he ge od obêc la tɨyi.  
\v 3 Xame, xam vô nɨlôm vô tɨbii lec môp nipaên wê he mi vông ge, lêc xam êno môp nipaên yêp vô xam, lêcom xam so ên xam nêbê mêd myavɨwen wê Anutu vông ge obêc tulec xam hɨxôn lêm.  
\v 4 Anutu vông môp nivɨha vô xam luu vêl, om dô bin xam buc xuhu dia dɨ o vông myavɨwen ti vô xam lutibed lêm. Lêc mêd xam wê Anutu môp nivɨha tige xocbê kɨyang pɨleva ti? Anutu vông nivɨha vô xam ên nêb xam xovô dɨ pɨlepac xam, lêc mêd xam o xovô lêm?  
\v 5 Xam nɨlôm yen xêkɨzêc ta dɨ xam o pɨlepac xam lêm, om ge tɨyi xocbê xam kɨtuc nipaên wê xam vông ge vô levac vô xam. Mêgem obêc vô buc tɨmuên wê Anutu obêc tɨtô xomxo nên kɨyang ge od obêc vông myavɨwen vô xam lec nipaên wê xam vông ge.  
\v 6 Ên Anutu obêc vông myavɨwen vô xomxo vɨhati i tɨyi môp wê he toto mi vông gee.  
\v 7 Om xomxo wê le xêkɨzêc vac môp nivɨha dɨ myag môp wê he ob dô hɨxôn Anutu vac xêseac dɨ kô lê levac ge, od Anutu obêc vông xomxo tigee dô mavɨha luta lêc luta.  
\v 8 Dom he wê xovô heche va dɨ vô nɨmi vô kɨyang nôn dɨ la vac môp wê nipaên ge od Anutu xêyaa obêc vô myavɨnê vô he dɨ kɨtya he vêl.  
\v 9 Mêgem xomxo tigee, vɨyin levac obêc hɨvun he xôn dɨ he ob kô myavɨnê levac luu vêl lec nipaên wê he vông ge, om myavɨwen ob tulec xomxo nipaên vɨhati, he Yuda hɨxôn tɨbii baba ya.  
\v 10 Dɨ xomxo wê mi vông môp nivɨha ge, Anutu obêc tung he la dô vac xêseac gê lag puunê dɨ vông lê levac vô he dɨ he ob dô vac kɨyang malehe nɨlô, om obêc vông vô xomxo wê nivɨha ge vɨhati, he Yuda hɨxôn tɨbii baba ya.  
\v 11 Ên Anutu obêc yaxên xomxo vɨhati tɨyima, om xomxo vɨhati obêc la le vô Anutu manôn, dɨ i yaxên môp wê he toto vông ge.   
\p
\v 12 Tɨbii madɨluhu wê lungên Moses xolac ge, he obêc vông nipaên ge od Anutu ob tɨtô he nên kɨyang ya Moses xolac lêm. Nge, heche va obêc yib vɨdaaên lec nipaên wê he vông ge. Dɨ Yuda wê he xovô Moses xolac ge, he obêc vông nipaên ge od Anutu ob tɨtô he ya Moses xolac wê he mi ngô ge.  
\v 13 Lêc xomxo obêc ngô Moses xolac pɨleva ge od o tɨyi wê Anutu ob yê nivɨha ge lêm. Nge, xomxo wê vông xolac tyo vô nôn lec ge wê Anutu ob yê he nivɨha.  
\v 14 Tɨbii madɨluhu o xovô Moses xolac lêm, lêc heche va pɨyôp vɨnoo kɨyang ya tɨyi xocbê kɨyang wê yêp vac Moses xolac ge, om kɨyang tige tɨyi xocbê heche va xolac wê yêp vô he ge.  
\v 15 Om môp wê he vông ge nêl kɨtong ên nêbê xolac wê Anutu vông vô Moses ge yêp vac he nɨlô êno, dɨ heche va nɨlô le yaxên môp vɨlu vɨlu, om môp ya he nêbê nivɨha dɨ ya he nêbê nipaên. Om môp tige nêl kɨtong hɨxôn ên nêbê xolac yêp vac he nɨlô.  
\v 16 Mêgem Anutu obêc yaxên xomxo nên kɨyang vô buc tɨmuên dɨ ob vông yuac vac Yesu Kɨlisi vɨgê dɨ Yesu ob yaxên kɨyang vɨhati wê yêp xôpacên vac xomxo nɨlô ge dɨ tɨtô. Kɨyang tige yêp vac xolac nɨlô mɨ a nêl vô xomxo.   
\s1 Yuda yong he lec Moses xolac ên nêb ob vô nivɨha vô he  
\p
\v 17 Xame, xam wê xam nêbê xam lêm Yuda ge, xam hôm Moses xolac xôn ên xam nêbê ob vô nivɨha vô xam, dɨ xam yong xam ên xam nêbê xam ge Anutu nue xam.  
\v 18 Xam xovô môp wê Anutu xêyaa vin lec ge pyap, ên xomxo tɨxuu xam ya Moses xolac om xam xovô môp nivɨha.  
\v 19-20 Xam xo ên xam nêbê xovôên hɨxôn kɨyang nôn yêp vac xolac wê Moses vông ge nɨlô. Om xam mi nêl ên xam nêbê, “A tɨyi wê a ob hɨlung môp nivɨha vô xomxo wê matocên ge, dɨ a ob hɨlung xêseac vô he wê dô vac mapɨtoc ge. Dɨ a tɨyi wê a ob tɨxuu he wê gên o xovô lêm ge, dɨ he wê tɨyi xocbê xomxo nipwo ge.”  
\v 21 Vɨxôhɨlôg, xam mi tɨxuu xomxo dɨ vông xovôên vô he, lêc bêna lêc xam o vông xovôên vô xacxam va lêmê? Xam mi nêl xolac vô xomxo ên xam nêbê he i o lêc vông yôdac vô xomxo susu lêm, lêc mêd xam êno, xam mi vông yôdac vô xomxo susu hɨxôn.  
\v 22 Dɨ xam mi nêl vô xomxo ên xam nêbê, “Le i lêc vông yôdac vêx yuu vux lêm,” lêc mêd xacxam va mi vông hɨxôn. Dɨ xam nêbê xam xêmyaa o vin lec anutu mayibên lêm, lêc bêna lêc xam la vun susu vac xumac ngɨbua wê tɨbii madɨluhu vông ge?  
\v 23 Xam yong xam ên xam nêbê xam xovô Anutu xolac pyap, lêcom xam o tɨmu vô xolac mɨ vông i vô nôn lec lêm, om ge tɨyi xocbê xam vông Anutu lê vô nipaên,  
\v 24 tɨyi xocbê kɨyang wê yêp vac kɨpihac xolac bêga ên nêbê, “Tɨbii wê o Yuda lêm ge yê môp nipaên wê xam Yuda mi vông ge om so vya vô Anutu.”   
\s1 Yuda môp wê mi gôl ninɨvi ge o vô nivɨha vô he lêm  
\p
\v 25 Xam obêc tɨmu vô xolac wê Anutu nêl vô Moses ge od môp wê gôlên ninɨvi ge ob vô nivɨha vô xam, lêc xam obêc pwoo xolac vac ge od môp wê xam mi gôl nimnɨvi ge, tɨyi xocbê xam vông lec kɨsii dɨ xam o xovô Anutu lêm.  
\v 26 Dɨ tɨbii madɨluhu wê gôlên ninɨvi ma ge obêc tɨmu vô Anutu xolac ge od Anutu ob yê he nivɨha tɨyi xocbê xomxo wê gôl ninɨvi ge.  
\v 27 Xam Yuda, Anutu xolac yêp vac kɨpihac wê xam vông ge om xam gôl nimnɨvi tɨyi, lêc xam o vông xolac tyo vô nôn lec lêm. Mêgem tɨbii wê ninɨvi gôlên ma ge obêc tɨmu vô Anutu xolac ge od môp wê he vông ge obêc nêl xam kɨtong seac bêga bê xam tɨbii nipaên.  
\v 28 Môp wê ninɨvi ge ti o yêp wê ob nêl Yuda kɨtong nêbê he Yuda nôn ge lêm. Dɨ môp ninɨvi gôlên ge, kehe o yêp vac ninɨvi gôlên pɨleva lêm.  
\v 29 Xomxo wê Yuda nôn ge, kehe yêp vac wê he vông nɨlô la yadɨluhu vô Anutu ge, dɨ môp wê ob nêl he kɨtong nêbê he Anutu nue nôn ge, kehe o yêp vac môp ninɨvi gôlên ge lêm. Nge, ge yuac wê Myakɨlôhô Ngɨbua vông vac he toto nɨlô. Xomxo tibêgee ob kô lê levac ge od ob kô lê levac vô xomxo kɨbun ga lêm. Nge, obêc kô lê levac vô Anutu môci.   
\c 3  
\s1 Anutu nêl Yuda nên nipaên yêp seac vô he manôn  
\p
\v 1 Om xomxo Yuda ngɨnoo tɨbii madɨluhu vêl lec vatya? Dɨ môp ninɨvi gôlên ge ob vô nivɨha vô he lec vatya?  
\v 2 Xam wê. Yuda tulec vɨzid levac luu xomxo baba ge vêl. Vɨzid taxlee bêga nêbê Anutu vɨnoo he dɨ nêl i xolac vô he nêb he i viac.  
\v 3 Lêc he ya o vông i vin xolac tige lêm. Om obêc bêna? Mêd môp wê he vông ge obêc vông Anutu sea i kɨyang wê nêl vô he ge, me?  
\v 4 Ma vêl. Anutu ob sea i kɨyang ti lêm. Ên il vɨhati yang obêc nêl kɨyang kɨtyooên, dom Anutu tibed ge wê obêc nêl kɨyang hɨxôn nôn, tɨyi xocbê kɨyang wê nêl lec Anutu mɨ i yêp vac xolac bêga ên nêbê,  
\q1 “Kɨyang wê ông nêl vô xomxo ge, he obêc ngô dɨ xovô nêbê nivɨha, dɨ he ti obêc nêb vông kɨyang ti vô ông ge od ông kɨyang nôn obêc ngɨnoo he vêl.”   
\p
\v 5 Môp nipaên wê il vông ge obêc nêl môp nivɨha wê Anutu vông ge kehe kɨtong vô xomxo ge, od il ob nêbê va? Il ob nêl bê môp wê Anutu ob vông myavɨwen vô xomxo lec nên nipaên ge, mêd Anutu vông i so, me? Kɨyang tiga a nêl i tɨyi xomxo pɨyôp wê mi nêl ge.  
\v 6 Lêc kɨyang tibêge kɨyang kɨtyooên. Ên môp wê Anutu vông ge tɨyiên obêc ma ge od o tɨyi wê ob yaxên xomxo nên kɨyang ge lêm.  
\v 7 Xomxo ya nêl ên he nêbê kɨyang kɨtyooên wê he mi tɨmu vô ge obêc vông Anutu kɨyang nôn yêp seac dɨ vông i lê i vô levac, om Anutu o tɨyi wê ob nêl bê he xomxo nipaên dɨ vông myavɨwen vô he ge lêm.  
\v 8 He ya nêl ên he nêbê, “Om il ob vông môp nipaên i luu vêl, ên nivɨha obêc val lec tige.” Kɨyang tibêge o tɨyi lêm. Lêc xomxo ya so vya lec a ên nêbê a mi nêl kɨyang tibêge. Om xomxo tibêgee obêc tulec myavɨwen nipaên tɨyi môp nipaên wê he mi vông ge.   
\s1 Xomxo kɨbun ga vɨhati dô vac nipaên  
\p
\v 9 Om il ob nêbê va? Xe Yuda ngɨnoo xomxo baba vêl, me? Ma vêl. Ên a nêl pyap vô xam ên a nêbê xe Yuda hɨxôn xam tɨbii ba, il xôn vɨhati dô vac nipaên nɨlô.  
\v 10 Tɨyi xocbê xolac nêl bêga ên nêbê,  
\q1 “Xomxo wê Anutu ob yê nêb he xomxo nivɨha ge, ti dôên ma.  
\v 11 Dɨ xomxo pɨyôp nivɨha ti o dô lêm, dɨ xomxo wê nêb ob myag Anutu mɨ la tulec nôn ge, ti o dô lêm.  
\v 12 Ên xomxo vɨhati vô nɨmi vô Anutu dɨ la vac môp nipaên nɨlô, om he ti o vông môp nivɨha ti lêm. Ma vêl.  
\v 13 He mya mi nêl kɨyang nipaên tɨyi xocbê lôva wê xomxo yibên la yêp vac ge lêc mya tax dɨ nuhu lam ge, om he mya mi nêl kɨyang kɨtyooên, dɨ kɨyang nipaên wê he nêl ge la vông xomxo vô nipaên tɨyi xocbê myel mya kɨlin wê nga xomxo ge.  
\v 14 He mi nêl vya lôt xomxo ên nêb i yib vêl.  
\v 15 He tup lutibed ên nêb he ob la hi xomxo i yib.  
\v 16 Dɨ môp wê he vông ge vông xomxo vô nipaên dɨ vông he dô vac vɨyin.  
\v 17 He lungên môp wê ob dô vac kɨyang malehe ge,  
\v 18 dɨ he o xona ên Anutu lêm.” Xolac nêl bêge.   
\p
\v 19 Il xovô ên il nêbê kɨyang wê yêp vac xolac ge Anutu nêl vô xomxo wê dô vac xolac nɨlô ge ên nêb he i tɨmu vô, lêc il o tɨmu vô vɨhati lêm, om xomxo ti o tɨyi wê ob nêl vô Anutu bê i xomxo nivɨha wê tɨmu vô xolac vɨhati ge lêm. Nge, xomxo kɨbun ga vɨhati tɨyi wê ob tulec myavɨwen vô Anutu manôn ge.  
\v 20 Ên xomxo obêc nêb tɨmu vô xolac wê Anutu nêl vô Moses ge od môp ge o tɨyi wê ob vông Anutu yê he nivɨha ge lêm, ên xolac wê Moses vông ge nêl kɨtong vô il ên nêbê il tɨbii nidpaên.   
\s1 Xomxo wê vông i vin Yesu ge, Anutu ob yê nêb he xomxo nivɨha  
\p
\v 21 Gwêbaga môp wê Anutu ob yê xomxo nêb he xomxo nivɨha ge lam yêp seac. Môp tige, kehe o yêp vac Moses xolac lêm, lêc Moses xolac hɨxôn plopete kɨyang nêl lec môp tige hɨxôn.  
\v 22 Môp yêp bêga ên nêbê xomxo ti obêc vông i vin Yesu Kɨlisi ge od Anutu ob yê nêb i xomxo nivɨha wê nipaên ti o yêp vô i ge lêm. Dɨ Anutu ob vông vô xomxo wê vông i vin ge vɨhati tɨyima, ên xomxo ngwe o bangwe dɨ ngwe bangwe lêm.  
\v 23 Nge, il vɨhati yang, il vông môp nipaên, om il o tɨyi wê il ob tulec xêseac wê Anutu vông ge lêm.  
\v 24 Lêc Anutu xo vɨgwe pɨsiv ên il om vông vɨzid levac vô il bêga ên nêbê vông Yesu Kɨlisi lam vô il vêl ên nipaên, om Anutu yê il nêbê il xomxo nivɨha. Lêc il o kɨsuu ya susu ti lêm. Nge, Anutu vông pɨleva vô il lec yuac nivɨha wê Yesu Kɨlisi vông ge.  
\v 25 Anutu vông Yesu lam yib mɨ kɨpyax i hi sea ên nêbê xomxo i vông i vin Yesu, ge od Anutu obêc kɨtya he nên nipaên vêl. Anutu vông Yesu lam ên nêb môp wê ob yê xomxo nêb nivɨha ge i yêp seac vô xomxo, ên ilage Anutu yê nipaên wê xomxo vông ge, lêc o vông myavɨwen vô he lêm. Nge, hôm xôn mɨ i yêp.  
\v 26 Lêc gwêbaga Anutu kɨtya il nêd nipaên vêl lec Yesu Kɨlisi, om il ob xovô bê Anutu ge xêseac pɨleva dɨ nivɨha kehe, dɨ xomxo wê vông i vin Yesu ge Anutu ob yê he tɨyi xocbê xomxo nivɨha.   
\p
\v 27 Om môp ti yêp wê il ob kô il lec ge, me? Môp ti o yêp bêge lêm. Mêd il ob kô il lec ên wê il tɨmu vô xolac wê Moses vông ge, me? Ma vêl. Ên Anutu yê il nivɨha lec vông vinên wê il vông ge, om o tɨyi wê il ob yong il ge lêm.  
\v 28 Ên il xovô ên il nêbê môp wê Anutu ob yê xomxo nivɨha ge, kehe o yêp vac xolac wê Moses vông ge lêm. Nge, kehe yêp vac wê xomxo obêc vông i vin Yesu Kɨlisi ge.   
\p
\v 29 Il ob nêl bê Anutu tu Yuda vaci Anutu dɨ o tu tɨbii baba Anutu lêm, me? Ma vêl. Tɨbii wê o Yuda lêm ge, Anutu tu he Anutu hɨxôn.  
\v 30 Vɨxôhɨlôg nôn, Anutu tibed, om tɨbii Yuda wê ninɨvi gôlên ge obêc vông i vin ge od Anutu ob yê he nivɨha, dɨ tɨbii baba wê gôlên ninɨvi ma gee obêc vông i vin ge od Anutu ob yê he nivɨha êno.  
\v 31 Lêc môp wê il vông i vin Yesu ge ob kɨtya Moses xolac vêl lêm. Nge, il ob hôm Moses xolac xôn mɨ i yêp hɨxôn.   
\c 4  
\s1 Anutu yê Eblaham nivɨha ên wê vông i vin ge  
\p
\v 1 Om il ob nêl kɨyang bêna lec il bug Eblahamê?  
\v 2 Anutu obêc yê Eblaham nivɨha lec wê vông yuac nivɨha ge od Eblaham obêc tɨyi wê ob yong i ge, lêc o tɨyi wê ob yong i vô Anutu manôn ge lêm.  
\v 3 Ên kɨyang yêp vac kɨpihac xolac bêga ên nêbê, “Eblaham vông i vin Anutu om Anutu yê vông vinên wê i vông ge, nêb i xomxo nivɨha.”  
\v 4 Il xovô ên il nêbê yuac wê yêp vô il gê kɨbun ga, xomxo ti obêc vông yuac dɨ kô mone lec ge, od mone wê i kô ge, tɨbii o vông pɨleva vô i lêm. Nge, vông lec yuac wê i vông ge.  
\v 5 Xomxo môp bêge yêp, lêc môp wê Anutu vông ge o ngwe bêge lêm. Ên Anutu o yê yuac wê xomxo vông ge nêbê i xomxo nivɨha lêm. Nge, ob yê wê xomxo vông i vin ge dɨ nêl ên nêb i xomxo nivɨha lec môp vông vinên tibed. Ên Anutu ge wê kɨtya il nêd nipaên vêl dɨ yê il tɨyi xocbê xomxo wê nipaên ti o yêp vô il lêm ge.  
\v 6 Devit êno nêl kɨyang lec xomxo wê Anutu yê nêb he xomxo nivɨha ge, ên nêbê he hi vɨxa pec ên wê Anutu yê he nivɨha ge, lêc kehe o yêp vac yuac nivɨha wê he vông ge lêm.  
\v 7 Om Devit kɨyang yêp bêga ên nêbê,  
\q1 “Xomxo wê Anutu kɨtya he nên nipaên vêl dɨ hi i yib ge, he ob dô hɨxôn xêyaa nivɨha.  
\v 8 Dɨ xomxo wê Anutu o hôm he nên nipaên xôn lêm ge, od he ob dô hɨxôn xêyaa nivɨha.”   
\p
\v 9 Om kɨyang tige yêp vô xomxo tina? Mêd yêp vô he Yuda wê gôl ninɨvi ge vaci, me yêp vô xomxo wê gôlên ninɨvi ma ge hɨxôn? Ge nêl lec xomxo vɨhati. Ên kɨyang yêp bêga ên nêbê, “Vông vinên wê Eblaham vông ge, Anutu yê ên nêbê i xomxo nivɨha.”  
\v 10 Om xam xovô lê. Vô buc tina Anutu yê Eblaham nêbê i xomxo nivɨha? Ge nêl vô buc wê Eblaham gôl ninɨvi pyap ge, me nêl vô buc wê ninɨvi gôlên gên ma ge? Ge nêl vô buc wê Eblaham gôlên ninɨvi gên ma ge.  
\v 11 Ên buc wê ninɨvi gôlên gên ma ge od Eblaham vông i vin Anutu tax dɨ Anutu yê nêb i xomxo nivɨha. Pyap dêc gôl ninɨvi tɨmuên ên nêbê môp ninɨvi gôlên i nêl kɨtong bê Anutu yê Eblaham nêb i xomxo nivɨha ên wê vông i vin ge. Mêgem tɨbii wê ninɨvi gôlên ma gee, lêc he vông i vin Anutu dɨ Anutu yê he nivɨha, om Eblaham tɨyi xocbê he bu.  
\v 12 Dɨ xomxo wê gôlên ninɨvi gee, he êno tɨyi xocbê Eblaham bue. Lêc o nêl kɨyang lec ninɨvi gôlên pɨleva mô lêm. Nge, nêl lec he wê gôl ninɨvi dɨ vông i vin tɨyi xocbê Eblaham vông i vin vô buc wê gên o gôl ninɨvi lêm ge.   
\s1 Kɨyang wê Anutu hɨlu vô Eblaham ge ob vô nôn lec vô xomxo wê vông i vin ge  
\p
\v 13 Ilage Anutu hɨlu kɨyang vô Eblaham he bue ên nêbê ob vông kɨbun vɨhati vô he. Lêc kɨyang tige Anutu o hɨlu vô Eblaham ên wê mi tɨmu vô xolac ge lêm. Nge, hɨlu vô Eblaham ên wê vông i vin Anutu om Anutu yê nêbê i xomxo nivɨha ge.  
\v 14 Ên kɨyang wê Anutu hɨlu pyap ge obêc vô nôn lec vô xomxo ên wê he mi tɨmu vô Moses xolac ge, od vông vinên wê he vông ge obêc pɨleva, dɨ kɨyang wê Anutu hɨlu vô he ge, he ob yê tɨyi xocbê kɨyang pɨleva.  
\v 15 Il xovô ên il nêbê xomxo ti obêc pwoo Moses xolac vac ge od ob tulec myavɨwen. Xolac yêpên obêc ma ge od o tɨyi wê il ob nêl bê xomxo pwoo kɨyang vac ge lêm. Lêc xolac yêp, om vông xovôên vô il.   
\p
\v 16 Om kɨyang wê Anutu hɨlu vô Eblaham ge ob vô nôn lec vô xomxo wê vông i vin ge, ên vɨzid wê Anutu hɨlu ge, Anutu nêb ob vông pɨleva vô Eblaham bue vɨhati. Lêc ob vông vô xomxo wê mi tɨmu vô Moses xolac ge vaci lêm. Nge, ob vông vô xomxo vɨhati wê vông i vin xocbê Eblaham ge. Eblaham ge xocbê il vɨhati bug mugên,  
\v 17 tɨyi xocbê kɨyang wê Anutu nêl vô Eblaham mɨ i yêp vac xolac bêga ên nêbê, “A vɨnoo ông tu xomxo vɨhati bu.” Mêgem kɨyang tige vô nôn lec mɨ yêp vô Anutu. Anutu ti wê Eblaham vông i vin i ge, ge wê ob tɨpi vô xomxo yibên kɨdi lec mavɨha, dɨ i wê ob nêl susu wê gên ma ge vɨhati ob lam le seac.   
\p
\v 18 Anutu nêl vô Eblaham ên nêbê, “Bume obêc vô tɨbeac hɨwocên.” Eblaham ngô kɨyang tige dɨ vông i vin ên nêbê obêc vô nôn lec. Môp ti o yêp wê kɨyang ob vô nôn lec ge lêm, lêc Eblaham vông i vin xêkɨzêc dɨ yaxên kɨyang. Mêgem Eblaham tɨyi xocbê xomxo tɨbeac, kɨnu i.  
\v 19 Eblaham vô kɨpwoc dɨ klismas wê i vông ge vô kwabo lec 100 dɨ vɨnê Sela êno vô vêxta om yuu o tɨyi wê yuu ob kô nue ti ge lêm. Eblaham xo bêge lê, lêc vông vinên wê i vông ge yêp xêkɨzêc ta,  
\v 20 dɨ o sea vông vinên wê i vông ge lêm. Dɨ nɨlô o la yuu lec kɨyang wê Anutu hɨlu vô i ge lêm. Nge, vông i vin xêkɨzêc ta dɨ pɨmil Anutu,  
\v 21 ên Eblaham xovô vɨnux yang ên nêbê, “Anutu tɨyi wê ob vông kɨyang wê hɨlu vô a ge ob vô nôn lec.”  
\v 22 Mêgem Anutu yê vông vinên wê Eblaham vông ge nêb Eblaham xomxo nivɨha.   
\p
\v 23 Kɨyang yêp vac xolac bêga ên nêbê, “Anutu yê nêb i xomxo nivɨha.” Kɨyang tige o nêl lec Eblaham tibed lêm.  
\v 24 Nge, nêl lec il xôn vɨhati, ên nêb il obêc vông i vin Anutu wê tɨpi vô il lig Apumtau Yesu kɨdi lec vac yibên ge, od Anutu ob yê il nêb il xomxo nivɨha.  
\v 25 Ên Anutu vông Yesu lam yib ên il nêd nipaên, dɨ Anutu tɨpi vô Yesu kɨdi lec vac yibên ên nêb ob yê il tɨyi xocbê il xomxo nivɨha.   
\c 5  
\s1 Anutu yê ên nêb il xomxo nivɨha  
\p
\v 1 Il vông i vin Yesu om Anutu yê nêb il xomxo nivɨha, mêgem il lig Apumtau Yesu Kɨlisi vông Anutu xêyaa myavɨnê tip la dɨ tung il la dô vac xêyaa vin lecên wê Anutu vông ge.  
\v 2 Yesu vaci dɨdii il mɨ la tung vac vɨzid yuu malehe mɨ il dô vac gwêbaga, dɨ il vông i vin ên il nêbê obêc buc tɨmuên ge od il ob la dô vac xêseac hɨxôn Anutu, om gwêbaga il ob dô dɨ yaxên buc tige hɨxôn xêdyaa nivɨha.  
\v 3 Lêc il ob hi vɨxad i pec ên kɨyang tige mô lêm. Nge, il ob hi vɨxad i pec ên vɨyin wê ob val vô il ge hɨxôn. Ên il xovô ên il nêbê vɨyin tige ob vông il le xêkɨzêc,  
\v 4 dɨ il obêc le xêkɨzêc vac vɨyin ge od il ob tɨyi xocbê xomxo wê Anutu yaxên he, lêc he le xêkɨzêc om Anutu yê nêbê nivɨha ge, dɨ Anutu obêc yê il nivɨha ge od il ob vông i vin dɨ yaxên vɨzid wê Anutu obêc vông vô il tɨmuên ge.  
\v 5 Dɨ il obêc vông i vin mɨ yaxên vɨzid tige ge od vông vinên wê il vông ge obêc vɨdaaên lêm, ên Anutu obêc vông i vô nôn lec tɨmuên. Il xovô bêge, ên Myakɨlôhô Ngɨbua wê Anutu vông i lam vô il ge vông xêyaa vin lecên wê Anutu vông ge lam hɨvun il xôn.   
\p
\v 6 Ilage il xêkɨzêc o tɨyi wê ob vô il vêl ge lêm, lêc vô buc gwêbaga Kɨlisi lam yib, ên nêb ob kɨtya il wê il vô nɨmid vô Anutu ge nêd nipaên vêl.  
\v 7 Môp wê il xomxo vông ge bêga nêbê xomxo ti ob yib mɨ kɨsuu xomxo nivɨha ti lec lêm. Lêcom mêd xomxo ti ti tɨyi wê ob vông he vac yibên ên kɨsuu xomxo nivɨha lec.  
\v 8 Dom môp wê Anutu vông ge yêp bêga ên nêbê yê wê il gên dô vac nipaên nɨlô ge, om vông Yesu lam yib ên nêb ob ngɨdu il xôn, om môp tige nêl kɨtong seac bêga nêbê Anutu xêyaa vin lec il luu vêl.  
\v 9 Yesu hi vông Anutu yê il nivɨha dɨ kɨtya il nêd nipaên vêl om il xovô vɨnux ên il nêbê Yesu ob vô il vêl ên xêyaa myavɨnê wê Anutu ob vông vô il tɨmuên ge.  
\v 10 Ên ilage Anutu yê il tɨyi xocbê tɨbii wê vông vevac vô i ge, lêc nu tuc Yesu lam yib om vông kɨsoac ên il dɨ vông il lax dô hɨxôn ma Anutu. Il dô hɨxôn Anutu, om il xovô vɨnux ên il nêbê mavɨha wê Yesu vông ge obêc vông il la dô madvɨha dɨ ob vô nivɨha vô il luu vêl.  
\v 11 Dêc kɨyang o tibed ge lêm. Il ob hi vɨxad i pec ên Anutu ên wê il lig Apumtau Yesu Kɨlisi dɨdii il lax dô hɨxôn ma Anutu hɨxôn kɨyang malehe ge.   
\s1 Adam vông xomxo dô vac môp yibên, dɨ Kɨlisi vông xomxo dô vac môp mavɨha  
\p
\v 12 Il xovô bêga ên il nêbê xomxo tibed wê nêbê Adam ge pwoo kɨyang vac, om môp nipaên tige vô levac gê kɨbun, dɨ nipaên tige dɨdii il vac yibên, om yibên sox vac sox vac mɨ la hɨvun xomxo vɨhati xôn, ên xomxo vɨhati vông môp nipaên.  
\v 13 Anutu gên o vông xolac vô Moses lêm dɨ nipaên yêp lec kɨbun tax, lêc xolac gên ma, om o tɨyi wê ob nêl nipaên toto ge lêm.  
\v 14 Lêc môp wê yibên ge yêp vô xomxo vɨhati vô buc wê Adam vông ge dɨ i lam tyip vô buc wê Moses vông ge hɨxôn. Vɨxôhɨlôg, xomxo tigee he ya o pwoo Anutu kɨyang vac tɨyi xocbê Adam ge lêm, lêcom he vɨhati yib hɨxôn.  
\p Adam ge tɨxuu lec xomxo ngwe wê val tɨmuên ge,  
\v 15 lêc nipaên wê Adam vông ge o tɨyi xocbê vɨzid wê Anutu vông vô il ge lêm. Ên xomxo tibed vông nipaên om xomxo vɨhati ob yib, lêc Anutu xo vɨgwe pɨsiv ên il om vông vɨzid nivɨha lam hɨvun il tɨbeac xôn lec Yesu Kɨlisi nôn tibed. Om il kô vɨzid tɨbeac luu vêl, lêc il o kɨsuu ya susu lêm. Nge, Anutu vông pɨleva vô il.  
\v 16 Om vɨzid wê Anutu vông pɨleva vô il ge, nôn o tɨyi xocbê nôn wê yêp vac nipaên wê Adam vông ge lêm. Ên Adam vông môp nipaên om Anutu yaxên lêc nêbê xomxo ob yib mɨ la vac nipaên. Dom xomxo wê tɨmuên gee he pwoo Anutu kɨyang vac, lêc Anutu xo vɨgwe pɨsiv ên he dɨ vông vɨzid yuu malehe vô he bêga nêbê kɨtya he nên nipaên vêl dɨ yê nêb he xomxo nivɨha.  
\v 17 Ilage Adam vông môp nipaên, om môp yibên hɨvun xomxo kɨbun ga vɨhati xôn ên wê xomxo tige tibed vông nipaên ge. Lêc môp nivɨha wê xomxo tibed Yesu Kɨlisi vông ge luu môp nipaên wê Adam vông ge vêl. Ên Anutu vông vɨzid levac vô xomxo om kɨtya he nên nipaên vêl dɨ yê nêb he xomxo nivɨha lec yuac wê Yesu vông ge, om xomxo obêc vông i vin Yesu ge od he ob kô lê levac dɨ dô mavɨha luta lêc luta.   
\p
\v 18 Xomxo tibed wê nêbê Adam ge wê vông môp nipaên ilage, om myavɨwen nipaên wê i vông ge tulec xomxo vɨhati hɨxôn, lêc xomxo tibed Yesu Kɨlisi vông môp nivɨha, om Anutu kɨtya xomxo vɨhati nên nipaên vêl dɨ vông he dô mavɨha.  
\v 19 Xomxo tibed ge pwoo kɨyang vac, om vông xomxo tɨbeac dô vac nipaên. Lêc xomxo ngwe bed Yesu Kɨlisi wê vô nɨnya lehe vô Anutu kɨyang mɨ vông i vô nôn lec, om môp tige vông Anutu yê xomxo tɨbeac nêb he xomxo nivɨha.   
\p
\v 20 Anutu vông xolac vô Moses, ên nêb i nêl xomxo nên nipaên i yêp seac, mêgem môp wê xomxo pwoo xolac vac ge vô levac vô he, lêc xêyaa vin lecên yuu malehe wê Anutu vông ge, levac mabu luu vêl.  
\v 21 Vɨxôhɨlôg, môp nipaên hɨvun xomxo vɨhati yang xôn dɨ he dô vac môp mayibên, lêc gwêbaga vɨzid levac wê Anutu vông ge lam hɨvun il xôn, om Anutu kɨtya il nêd nipaên vêl dɨ yê il ên nêb il xomxo nivɨha wê il ob dô madvɨha luta lêc luta. Vɨzid wê Anutu vông ge kehe lec il lig Apumtau Yesu Kɨlisi nôn tibed.   
\c 6  
\s1 Il xib hɨxôn Kɨlisi  
\p
\v 1 A nêl gwêba ên a nêbê vɨzid wê Anutu vông ge luu nipaên wê il vông ge vêl, om il ob nêl kɨyang bêna? Il ob vông môp nipaên i luu vêl êdêc Anutu xêyaa i vin lec il luu vêl dɨ i kɨtya il nêd nipaên vêl, me?  
\v 2 Ma vêl. Ên il sea môp nipaên la vêl pyap om il ob tɨmu vô môp tigee i tii vac lêm.  
\v 3 Buc wê il lipac mia lec Yesu Kɨlisi lê ge od tɨyi xocbê il xib hɨxôn Yesu. Lêc mêd xam lungên kɨyang tige?  
\v 4 Buc wê il lipac mia ge od tɨyi xocbê il xib hɨxôn Kɨlisi mɨ la vac lôva, lêc xêkɨzêc yuu xêseac wê Mag Anutu vông ge tɨpi vô Kɨlisi kɨdi lec mavɨha, om vông il kɨdi lec madvɨha hɨxôn dɨ dô vac môp paha.   
\s1 Il dô madvɨha hɨxôn Kɨlisi  
\p
\v 5 Il xib hɨxôn Kɨlisi, om il ob xovô bêga hɨxôn bê il ob kɨdi lec madvɨha tɨyi xocbê Kɨlisi kɨdi lec mavɨha ge.  
\v 6 Il xovô ên il nêbê il nɨlôd nipaên yib hɨxôn Kɨlisi lec xax pola, mêgem xêkɨzêc wê il nɨlôd nipaên vông ge tip la vêl, om nipaên ti ob hôm il xôn nang lêm.  
\v 7 Ên xomxo wê yib ge, môp nipaên ti o tɨyi wê ob ku he xôn ge lêm.   
\p
\v 8 Il xib hɨxôn Kɨlisi pyap, mêgem il vông i vin ên il nêbê il ob dô madvɨha hɨxôn Kɨlisi.  
\v 9 Ên il xovô ên il nêbê Kɨlisi kɨdi lec mavɨha vac yibên dɨ obêc yib i tii vac nang lêm, ên xêkɨzêc wê yibên vông ge ob hôm i xôn lêm.  
\v 10 Yesu yib lu tibed, om kɨtya il nêd nipaên vêl, dɨ gwêbaga dô mavɨha hɨxôn Anutu.  
\v 11 Mêgem xam xovô bêga bê xam êno o dô vac xêkɨzêc wê nipaên vông ge tii vac nang lêm, mêd gwêbaga xam dô mamvɨha hɨxôn Anutu lec yuac wê Yesu Kɨlisi vông ge.   
\s1 Il ob tɨmu vô môp nivɨha  
\p
\v 12 Mêgem xam o lêc vông xam vac môp nipaên lêm, dɨ xam o lêc tɨmu vô môp nipaên wê xam nɨlôm kɨdu xam ên ge lêm.  
\v 13 Xam o lêc vông nimnɨvi i loc vac môp vɨlu wê nipaên ge lêm. Xam vông nɨlôm i loc dɨluhu vô Anutu, ên xam tɨyi xocbê xomxo wê kɨdi lec vac yibên mɨ dô mavɨha ge, om xam vông xam i loc yadɨluhu vô Anutu, dɨ dô vac môp nivɨha.  
\v 14 Môp nipaên o tɨyi wê ob hôm xam xôn ge lêm. Ên xam o dô vac xolac wê Moses vông ge kwa ngɨbi lêm. Nge, xam dô vac vɨzid wê Anutu vông ge kwa ngɨbi.   
\p
\v 15 Il o dô vac Moses xolac kwa ngɨbi lêm. Nge, il dô vac vɨzid wê Anutu vông ge. Om il obêc nêb va lec môp tige? Tɨyi wê il ob vông môp wê nipaên ge, me? Ma vêl.  
\v 16 Om xam wê lê. Xam obêc la vac xomxo ti kwa ngɨbi dɨ vô nɨnyam lehe vô kɨyang wê i nêl ge od xam tu xomxo tige nue yuac. Om xam obêc la vac môp nipaên kwa ngɨbi dɨ tu môp nipaên nue yuac ge od xam obêc wib. Lêc xam obêc la vac Anutu kwa ngɨbi dɨ vông i kɨyang vô nôn lec ge od xam obêc kô nôn nivɨha wê Anutu ob yê xam nêb xam xomxo nivɨha ge.  
\v 17 Om il ob hi vɨxad i pec ên Anutu, ên ilage xam dô vac môp nipaên kwa ngɨbi, lêc gwêbaga xam dô vac Anutu xolac kwa ngɨbi dɨ xam vô nɨnyam lehe vô xolac dɨ hôm xôn mɨ i yêp vac nɨlôm.  
\v 18 Anutu vô xam vêl ên môp nipaên wê hôm xam xôn ilage, dɨ xam tu Anutu nue yuac wê xam ob vông môp nivɨha ge.  
\v 19 Il ga xomxo kɨbun wê il o vyac xovô Anutu kɨyang lêm, om kɨyang wê a nêl lec nue yuac ge, a nêl i tɨyi xocbê il mi nêl ge, ên a nêb i vông xovôên vô xam. Om kɨyang yêp bêga nêbê ilage xam vông nɨlôm yuu nimnɨvi la vac môp wê ningeac yuu nipaên ge dɨ xam pwoo Anutu kɨyang vac luu vêl, om xam dô tɨyi xocbê môp nipaên nue yuac xam. Lêc gwêbaga, xam dô tɨyi xocbê Anutu nue yuac, om xam vông nɨlôm yuu nimnɨvi i loc vô môp nivɨha dɨ xam tu xomxo ngɨbua lec.   
\p
\v 20 Vô buc ilage wê xam tu môp nipaên nue yuac ge, xam o dô vac môp nivɨha kwa ngɨbi lêm.  
\v 21 Môp wê xam mi vông ilage, xam kô nôn nivɨha lec môp tige, me? Ma vêl, xam o kô nôn nivɨha lec môp tige lêm. Ên môp tibêge ob vô nôn nipaên bêga bê xomxo ob yib lec, om gwêbaga xam nim yoc ên môp nipaên wê xam mi vông ilage.  
\v 22 Lêc Anutu vô xam vêl ên nipaên wê ku xam xôn ilage dɨ xam tu Anutu nue yuac, om xam kô nôn nivɨha bêga nêbê xam tu xomxo ngɨbua dɨ xam ob dô mamvɨha luta lêc luta.  
\v 23 Ên môp nipaên ob vông myavɨwen nipaên vô xomxo bêga bê he ob yib. Lêc vɨzid wê Anutu vông pɨleva vô il ge bêga ên nêbê il lig Apumtau Yesu Kɨlisi lam yib ên il nêd nipaên om il ob dô madvɨha luta lêc luta.   
\c 7  
\s1 Il o dô vac Moses xolac kwa ngɨbi lêm  
\p
\v 1 Xam lige, a ob nêl kɨyang ti vô xam lec Moses xolac wê xam mi ngô ge. Kɨyang yêp bêga nêbê xomxo wê dô vac Moses xolac kwa ngɨbi ge, od ob dô vac i tɨyi buc wê dô mavɨha ge dɨ i la tyip vô buc wê ob yib ge, lêc obêc yib ge od ob dô vac Moses xolac kwa ngɨbi i tii vac lêm. Môp tige xam xovô pyap.  
\v 2 Môp wê yêp kɨbun ga bêga nêbê vêx ti obêc kô vux ge od xolac nêl kɨtong ên nêbê vêx i dô hɨxôn lɨya i tɨyi buc wê ob dô mavɨha ge. Lêc lɨya obêc yib ge od xolac wê nêl nêbê i dô vac lɨya kwa ngɨbi ge ob tip vac.  
\v 3 Xolac nêl bêge, om lɨya obêc gên dô mavɨha dɨ vêx la kô vux paha ge, od xomxo ob nêl vêx tige nêbê vêx yôdac. Lêc lɨya obêc yib ge od xolac wê vêx la vac lɨya kwa ngɨbi ge tip vac, om vêx tige obêc kô vux ti ge od o tɨyi xocbê vông môp yôdac ge lêm. Nge, ge tɨyi môp nivɨha.   
\p
\v 4 Om xam lige, kɨyang tige nêl kɨyang tɨxuuên lec il, ên Kɨlisi yib om tɨyi xocbê il xib hɨxôn i dɨ il o dô vac Moses xolac kwa ngɨbi lêm. Dɨ gwêbaga il dô vac xomxo ngwe kwa ngɨbi. Ge a nêl lec Kɨlisi ti wê Anutu tɨpi vô i vac yibên mɨ i kɨdi lec mavɨha, ên nêbê il vông i vin dɨ il dô vac môp nivɨha wê Anutu vông ge.  
\v 5 Ilage il tɨmu vô môp tɨyi wê icil va xovô ge, lêc kɨyang wê yêp vac Moses xolac ge vông nipaên wê yêp vac il nɨlôd ge kɨdu il om il vông môp nipaên. Dɨ nipaên vông yuac vac il nidnɨvi om vông il tulec nôn wê yibên ge.  
\v 6 Lêc il xib hɨxôn Kɨlisi om Anutu pɨwelac il vêl ên Moses xolac wê ku il xôn ge, om gwêbaga il ob vông yuac wê Anutu vông ge. Lêc il ob vông i tɨyi môp tɨkwê wê yêp vac Moses xolac ge lêm. Nge, il ob vông i tɨyi môp paha wê Myakɨlôhô Ngɨbua vông ge.   
\s1 Nipaên vông il la vac yibên  
\p
\v 7 Om il ob nêbê va lec Moses xolacê? Il ob nêl bê xolac ge nipaên, me? Ma vêl, ên Moses xolac ge wê nêl môp nipaên kɨtong mɨ i yêp seac vô il. Om xolac nêl bêga ên nêbê, “Le i lêc doma vô xomxo ngwe susu lêm.” Xolac nêlên bêge obêc ma ge od xomxo ob so ên nêb môp madoên ge nivɨha.  
\v 8 Xolac nêl môp madoên kɨtong yêp seac, om nipaên wê yêp vac il nɨlôd ge vông môp madoên vɨyang vɨyang ge vô levac vac il nɨlôd. Xolac obêc ma ge od xêkɨzêc wê nipaên vông ge obêc yêp lêm. Lêc xolac yêp om nipaên vông yuac vac il nɨlôd.  
\v 9 Ilage a lungên xolac om a so ên a nêb mêd a dô nivɨha. Nang dêc a xovô xolac wê nêl môp nipaên kɨtong ge, om môp nipaên vông yuac vac a nɨlôg dɨ a xovô ên a nêbê a xomxo mayibên.  
\v 10 Ilage Anutu vông xolac vô xomxo ên nêb obêc tɨmu vô ge od ob dô mavɨha. Lêc xolac tige o vông a dô magvɨha lêm. Nge, xolac tɨyi xocbê hi a xib.  
\v 11 Ên nipaên pɨlepac kɨyang nivɨha wê yêp vac xolac ge vac dɨ kɨtyoo a, om vông a la vac môp yibên.  
\v 12 Om il ob xovô bêga bê Anutu xolac ge ngɨbua, dɨ kɨyang toto wê yêp vac xolac ge, nivɨha dɨ bôbac hɨxôn xêseac pɨleva.   
\p
\v 13 Om il ob nêl bêna lec xolacê? Il ob nêl bê kɨyang nivɨha tige hi il xib, me? Ma vêl. Nipaên môci wê hi il xib. Ên nipaên pɨlepac xolac nivɨha vac dɨ vông il la vac môp yibên, om môp nêl nipaên kɨtong i yêp seac, dɨ xolac vông xovôên vô il bêga nêbê nipaên ge nipaên vɨxôhɨlôg nôn mêge.   
\s1 Nipaên ku xenac kɨsuu il lec  
\p
\v 14 Il xovô ên il nêbê xolac ge, Myakɨlôhô Ngɨbua wê Anutu vông ge tu kehe, lêc a ga xomxo kɨbun wê a dô vac nipaên nɨlô.  
\v 15 Om môp wê a mi vông ge, a o xovô kehe lêm. Ên môp nivɨha wê a nêb a ob vông ge, a vôngên ma. Dɨ môp nipaên wê a xona ên ge od a vông.  
\v 16 Lêc a xona ên môp nipaên wê a vông ge, om vông xovôên vô a ên nêbê Moses xolac wê vɨbu môp nipaên tige nêl kɨyang nôn.  
\v 17 Lêc ge aca va o vông môp nipaên ge lêm. Nge, nipaên wê yêp vac a nɨlôg ge môci vông.  
\v 18 A xovô ên a nêbê a ga tɨbii kɨbun om môp nivɨha ti o yêp vac a nɨlôg lêm. Om a nêb a ob vông môp nivɨha lê, lêc a o vông i la tɨyi lêm.  
\v 19 Om môp nivɨha wê a nêb a ob vông ge, a vôngên ma, dɨ môp nipaên wê a nêb a vôngên obêc ma ge, od a vông.  
\v 20 Om môp nipaên wê a vông ge, ge o aca va vông lêm. Nge, nipaên wê yêp vac a nɨlôg ge môci vông.   
\p
\v 21 Mêgem môp yêp bêga nêbê a nêb a ob vông môp nivɨha lê, lêc nipaên le vac môp xôn.  
\v 22 Vɨxôhɨlôg, a xêgyaa vin lec Anutu xolac tɨyi buc vɨhati,  
\v 23 lêc nipaên yêp vac a nɨlôg hɨxôn om vông vevac vô kɨyang nivɨha wê yêp vac a nɨlôg ge, mêgem môp nipaên tige ku a xôn tɨyi xocbê a dô vac kalabuhu ge.  
\v 24 A obêc bêna tɨmuênê? A ga, a dô hɨxôn vɨyin levac, om letya obêc vô a vêl ên môp yibên tige?  
\v 25 A ob hi vɨxag i pec ên Anutu, ên wê vông il lig Apumtau Yesu Kɨlisi lam vô il vêl ên nipaên.  
\p Mêgem môp yêp bêga nêbê a nɨlôg hɨxôn a pɨyôp kɨdu a nêb a tɨmu vô Anutu xolac, lêc nipaên wê yêp vac a nɨlôg ge vông a la vac môp wê nipaên ge.   
\c 8  
\s1 Kɨlisi kɨtya il nêd nipaên vêl dɨ vông Myakɨlôhô Ngɨbua lam dô hɨxôn il  
\p
\v 1 Mêgem il wê il vông i vin Yesu Kɨlisi ge, myavɨwen wê xomxo ob kô lec nên nipaên ge, ti ob tulec il lêm.  
\v 2 Ên ilage il dô vac môp nipaên yuu yibên, lêc Myakɨlôhô Ngɨbua vô il vêl dɨ vông il dô madvɨha hɨxôn Yesu Kɨlisi.  
\v 3 Il kɨbun ga, il tɨbii nidpaên om xolac wê Moses vông ge o tɨyi wê ob vô il vêl ên nipaên ge lêm. Xolac wê Moses vông ge o tɨyi lêm, lêc Anutu vaci vô il vêl. Ên Anutu nêb ob kɨtya nipaên vêl om vông ici va nu tuc lam kɨbun dɨ i lam kô ninɨvi kɨbun xocbê il xomxo kɨbun ga, dɨ Anutu vông myavɨwen wê il vông ge la vô i mɨ i kɨlê.  
\v 4 Anutu vông bêge, ên nêb il tɨmu vô môp nivɨha wê xolac nêl ge dɨ vông i vô nôn lec. Om il ob la vô môp nipaên wê yêp vô icil va ge lêm. Nge, il ob la vô môp wê Myakɨlôhô Ngɨbua vông ge.   
\p
\v 5 Ên xomxo wê dô vac môp nipaên kɨbun ga ge, od he vông nɨlô la vô môp kɨbun ga, lêc xomxo wê dô vac môp wê Myakɨlôhô Ngɨbua vông ge, he vông pɨyôp hɨxôn nɨlô yen vɨhati yang la vô môp wê Myakɨlôhô Ngɨbua vông ge.  
\v 6 Ên xomxo obêc vông nɨlô la vô môp kɨbun ga ge od obêc yib, lêc xomxo obêc vông nɨlô yen la vô môp wê Myakɨlôhô Ngɨbua vông ge od ob dô mavɨha hɨxôn kɨyang malehe.  
\v 7 Ên xomxo wê vông nɨlô la vô môp kɨbun ga ge od tɨyi xocbê vông vevac vô Anutu, ên kehe bêga nêbê xomxo tibêge o dô vac xolac wê Anutu vông ge kwa ngɨbi lêm, dɨ ici va o tɨyi wê ob la vac xolac kwa ngɨbi ge lêm.  
\v 8 Mêgem xomxo wê tɨmu vô môp nipaên kɨbun ga ge o tɨyi wê he ob vông môp wê Anutu ob yê nivɨha ge lêm.   
\p
\v 9 Lêc xam o dô vac môp nipaên kɨbun ga lêm. Nge, xam dô vac môp wê Myakɨlôhô Ngɨbua vông ge, ên Myakɨlôhô Ngɨbua dô vac xam nɨlôm. Lêc xomxo ti, Myakɨlôhô Ngɨbua wê Kɨlisi vông ge obêc dô vac i nɨlô lêm ge od ob tu Kɨlisi nu lêm.  
\v 10 Xam nimnɨvi obêc yib lec nipaên, lêc Kɨlisi obêc dô vac xam nɨlôm ge od xam kɨnum obêc dô mavɨha, ên wê Anutu yê xam nêbê xam xomxo nivɨha ge.  
\v 11 Anutu tɨpi vô Yesu Kɨlisi kɨdi lec vac yibên, om Myakɨlôhô Ngɨbua wê Anutu vông ge obêc dô vac xam nɨlôm ge od Anutu obêc vông Myakɨlôhô Ngɨbua tɨpi vô xam nimnɨvi wê ob yib ge kɨdi lec mavɨha nang.   
\s1 Myakɨlôhô Ngɨbua vông il tu Anutu nue  
\p
\v 12 Xam lige, il nɨlôd obêc kɨdu il ên nipaên ge od le i lêc vông i vô nôn lec lêm.  
\v 13 Ên il obêc dô vac môp wê il nɨlôd nipaên xovô ge od il ob xib. Lêc il obêc ngɨloo môp nipaên la vêl ya xêkɨzêc wê Myakɨlôhô Ngɨbua vông ge od il ob dô madvɨha.   
\p
\v 14 Xomxo wê tɨmu vô môp wê Myakɨlôhô Ngɨbua vông ge, he tu Anutu nue.  
\v 15 Ên Anutu o vông Myakɨlôhô Ngɨbua vô il ên nêb il dô i tɨyi xocbê xomxo wê nipaên hôm he xôn dɨ he xona ge lêm. Nge, Myakɨlôhô Ngɨbua wê Anutu vông vô il ge vông il tu Anutu nue nôn, dɨ xêkɨzêc wê Myakɨlôhô Ngɨbua vông ge vông il keac vô Anutu ên il nêbê, “Mag.”  
\v 16 Myakɨlôhô Ngɨbua nêl kɨtong vac il nɨlôd ên nêbê il Anutu nue.  
\v 17 Il ge Anutu nue, om vɨzid wê nu tuc Yesu kô vô ma Anutu ge, il obêc kô hɨxôn. Ên il obêc kô myavɨnê tɨyi xocbê Kɨlisi ge od il ob la dô vac xêseac hɨxôn Kɨlisi tɨmuên.   
\s1 Il ob dô vac xêseac tɨmuên  
\p
\v 18 A xovô ên a nêbê vɨyin wê il tulec gê kɨbun ga, ge o susu levac ti lêm. Ge susu pɨleva. Dom xêseac wê Anutu ob vông vô il tɨmuên ge, levac luu vêl.  
\v 19 Om kɨbun hɨxôn susu vɨhati yang wê Anutu tung ge, he dô bin buc tɨmuên wê Anutu ob vông xêseac vô nue il ge.  
\v 20 Ên susu vɨhati ge vô nipaên dɨ o vô nôn nivɨha lêm. Lêc susu vaci o nêb ob dô bêge lêm. Nge, Anutu ku he xôn nêb he i dô bin buc wê ob val tɨmuên ge.  
\v 21 Ên gwêbaga susu kɨbun ga dô vac nipaên hɨxôn pɨtalên, om tɨyi xocbê Anutu ku he xôn, lêc obêc buc tɨmuên ge od Anutu obêc pɨwelac he vêl dɨ vông he la dô vac nivɨha hɨxôn i nue, dɨ nipaên ti ob hôm he xôn i tii vac lêm.   
\p
\v 22 Il xovô ên il nêbê susu wê Anutu tung ge vɨhati dô vac vɨyin yuu myavɨnê om iac, tɨyi xocbê vêx wê nu ob yubac om yaxên myavɨnê ge, om môp ge yêp ila dɨ val tyip lec gwêbaga hɨxôn.  
\v 23 Lêc o susu kɨbun vaci wê yaxên myavɨnê ge lêm. Nge, il êno, il yaxên myavɨnê. Vɨxôhɨlôg, Anutu vông vɨzid taxlee vô il bêga, wê vông Myakɨlôhô Ngɨbua lam dô hɨxôn il, lêc il gên dô vac vɨyin kɨbun ga, om il dô bin buc wê Anutu obêc vông il nidnɨvi kɨdi lec dɨ vông il dô tɨyi xocbê i nue ge.  
\v 24 Anutu vô il vêl ên nipaên om il dô bin kɨyang wê Anutu nêb ob vô nôn lec vô il ge. Ên kɨyang tige obêc vô nôn lec pyap ge od il ob dô bin kɨyang tige lêm. Ên susu wê il xê madnôn lec nôn pyap ge od o tɨyi wê il ob dô bin ge lêm.  
\v 25 Lêc kɨyang wê gên o vô nôn lec lêm ge, il ob dô bin dɨ il nid ob ma lec lêm, ên il vông i vin ên il nêbê obêc vô nôn lec tɨmuên.   
\p
\v 26 Xêkɨzêc wê il vông ge o tɨyi lêm, lêc Myakɨlôhô Ngɨbua môci ngɨdu il xôn. Ên il o vyac xovô kɨyang wê il ob kɨtaa vô Anutu ge lêm, om Myakɨlôhô Ngɨbua kô il myad mɨ la nêl ên nêb Anutu i ngɨdu il xôn. Lêc vya ti wê Myakɨlôhô Ngɨbua kô mɨ la ge ngɨnoo kɨyang wê xomxo nêl ge vêl.  
\v 27 Anutu ge wê xovô kɨyang vɨhati wê yêp vac xomxo nɨlô ge om ob xovô kɨtaaên wê Myakɨlôhô Ngɨbua vông ge kehe, ên Myakɨlôhô Ngɨbua kɨtaa tɨyi xocbê xovôên wê Anutu vông ge ên nêb Anutu i ngɨdu nue il xôn.   
\p
\v 28 Il xovô ên il nêbê il wê il xêdyaa vin lec Anutu ge, nivɨha yuu xôn vɨyin obêc tulec il, lêc Anutu obêc vông vɨhati i vô nôn nivɨha vô il, ên il ga wê Anutu xovô pyap nêb ob kô il ge, om tyuc il lam.  
\v 29 Ên xomxo wê Anutu xovô he pyap ilage ge, Anutu vɨnoo he nêb he i tu xomxo tɨyi xocbê nu tuc Yesu ge, êdêc Yesu i tu xocbê he li tuc dɨ he i tu xocbê Yesu lie.  
\v 30 Dɨ xomxo wê Anutu vɨnoo he ge od tyuc he nêb he i tu i nue, dɨ xomxo wê Anutu tyuc he ge od kɨtya he nên nipaên vêl dɨ yê he nêb he xomxo nivɨha, dɨ xomxo wê Anutu yê he nêb he xomxo nivɨha ge od vông he la dô vac xêseac wê i vông ge.   
\s1 Xêyaa vin lecên wê Anutu vông ge ob sea il lêm  
\p
\v 31 Anutu môp wê vông vô il ge bêge, om il ob nêb va? Anutu ge wê ob ngɨdu il xôn, om xomxo ti o tɨyi wê ob vông il vô nipaên ge lêm.  
\v 32 Anutu o xona ên wê ob vông nu tuc lam kɨbun ge lêm. Nge, vông i lam ên nêb i hôm il lec. Anutu vông ici va nu tuc lam, om il ob xovô hɨxôn bêga bê Anutu obêc vông vɨzid tɨbeac mangwe lam pɨleva hɨxôn vô il.   
\p
\v 33 Xomxo wê Anutu vɨnoo he mɨ he tu i nue ge, letya ob so kɨyang ti lec he? Xomxo ti tɨyiên ma, ên Anutu vaci yê he nêbê he xomxo nivɨha wê nipaên ti o yêp vô he ge lêm.  
\v 34 Om letya ob nêl nêbê xomxo vông vinên ob kô myavɨwen nipaênê? Xomxo ti o tɨyi wê ob nêl ge lêm, ên Yesu Kɨlisi yib mɨ kɨdi lec mavɨha nang, dɨ lax dô vô Anutu vɨgê hɨyôv dɨ kɨtaa vô Anutu ên nêb i ngɨdu il xôn.   
\p
\v 35 Môp tinae wê ob vô il vêl ên xêyaa vin lecên wê Kɨlisi vông ge? Môp ti o yêp lêm. Ên il obêc tulec vɨyin yuu myavɨnê, dɨ tɨbii ob vông vɨyin vô il, me vip ob den il, dɨ il nêd ngakwi ob ma, me susu ya ob vông il vô nipaên, dɨ xomxo ob vông vevac vô il ge od susu tigee o tɨyi wê ob vô il vêl ên xêyaa vin lecên wê Yesu Kɨlisi vông ge lêm.  
\v 36 Vɨxôhɨlôg, il ob tulec vɨyin, i tɨyi xocbê kɨyang wê yêp vac xolac bêga nêbê,  
\q1 “Anutu, xe tu ông nume, om tɨyi lec buc vɨhati xomxo nêb ob hi xe xib lec vông vinên wê xe vông ge. He yê xe tɨyi xocbê bwoc sipsip wê he ob hi i yib ge.”   
\p
\v 37 Kɨyang nêl bêge, lêc vɨyin ge susu vɨdaaên. Ên Yesu xêyaa vin lec il dɨ vông xêkɨzêc vô il, om il ob yax mang vô vɨyin wê ob tulec il ge dɨ le xêkɨzêc ya vông vinên.  
\v 38 Ên a xovô vɨnux ên a nêbê susu ti o tɨyi wê ob vô il vêl ên xêyaa vin lecên wê Anutu vông ge lêm. Om il obêc xib me il obêc dô madvɨha ge od xêyaa vin lecên wê Anutu vông ge ob sea il lêm. Dɨ angela wê dô kɨsii ganê hɨxôn xomxo levac kɨbun ga, dɨ susu wê dô gwêbaga hɨxôn susu wê ob val tɨmuên, dɨ xêkɨzêc wê susu vɨyang vɨyang ge vông,  
\v 39 dɨ susu wê dô vac lag hɨxôn susu wê dô lec kɨbun, dɨ susu yaya hɨxôn, susu tigee vɨhati o tɨyi wê ob vô il vêl ên xêyaa vin lecên wê Anutu vông ge lêm. Ên il dô vac xêyaa vin lecên wê Anutu vông ge lec yuac wê il lig Apumtau Yesu Kɨlisi vông ge.   
\c 9  
\s1 Pol nɨlô vô vɨyin ên wê lie Islel vô nɨmi vô Yesu ge  
\p
\v 1 A ga Kɨlisi nu a, om kɨyang wê a ob nêl vô xam ge o kɨyang kɨtyooên lêm. Nge, a nêl kɨyang nôn, dɨ Myakɨlôhô Ngɨbua ngɨdu kɨyang wê yêp vac a nɨlôg ge xôn,  
\v 2 om a nêl kɨyang bêga ên a nêbê a nɨlôg vô vɨyin levac dɨ a dô hɨxôn vɨyin tɨyi buc vɨhati ên a lige Islel.  
\v 3 Ên a nêb Anutu i vô a lige wê xe kehe tibed ge vêl, om a nêb obêc tɨyi ge od a ob kɨlê myavɨnê lec nipaên wê he vông ge dɨ Kɨlisi i kɨtya a vêl ên i ngɨdu a lige xôn.  
\v 4 Ên xomxo Islel ge, Anutu vɨnoo he nêb i nue, dɨ xêkɨzêc hɨxôn xêseac wê Anutu vông ge lam le seac vô he mɨ he yê, dɨ Anutu hɨlu kɨyang vô he dɨ vông xolac vô he, dɨ nêl môp wê he ob si daa dɨ kɨtaa vô Anutu ge, dɨ hɨlu kɨyang ya hɨxôn vô he,  
\v 5 dɨ he ge wê he pum lec Eblaham yuu Aisak dɨ Jekop wê he bue taxlee ge, dɨ Yesu lam tu xomxo gê kɨbun ga ge od kehe yêp vac Islel. Kɨlisi ge Anutu, dɨ ici va tu susu vɨhati kehe, om il ob pɨmil i lê i vô levac dɨ i yêp luta lêc luta. Nôn.   
\s1 Anutu ob vɨnoo xomxo ya, ya xovôên wê ici va vông ge  
\p
\v 6 Vɨxôhɨlôg, xomxo Islel vô nɨmi vô Anutu kɨyang, lêc kɨyang wê Anutu hɨlu vô he ge o tɨyi wê ob sea he ge lêm. Ên kɨyang tige obêc vô nôn lec vô he Islel nôn. Lêc xomxo wê kô lê Islel ge, he ya o tu Anutu nue Islel nôn lêm.  
\v 7 Dɨ xomxo wê pum lec Eblaham ge, he ya o tu Eblaham nue nôn lêm, xocbê kɨyang wê Anutu nêl vô Eblaham bêga ên nêbê, “He kɨdu ti wê nêbê num Aisak bue ge, heche va ob tu ông nume.”  
\v 8 Kɨyang tige kehe bêga nêbê nipwo wê Eblaham vaci kô ya xovôên wê i vông ge, he o tu Anutu nue lêm. Lêc nu Aisak wê Eblaham kô tɨyi kɨyang wê Anutu hɨlu vô i ge od Anutu yê nêbê Eblaham nu nôn.  
\v 9 Kɨyang wê Anutu hɨlu vô Eblaham ge bêga nêbê, “Buc wê a vɨnoo pyap ge, a obêc lôm lam i tii vac, dɨ vɨnêm Sela obêc kô num ti.”   
\p
\v 10 Nang dêc Anutu nêl kɨyang ngwe vô Lebeka lec nu Jekop yuu Iso. Nu yuu ge, yuu ma Aisak wê il bug.  
\v 11 Nu yuu gên o yubac lêm, om yuu gên o vông môp nivɨha me nipaên ti lêm. Lêc Anutu xovô nêb ob vɨnoo nu yuu ngwe i tɨyi xocbê xovôên wê ici va vông ge, om o dô mɨ yê môp wê yuu vông ge lêc vɨnoo ngwe lêm. Nge, vɨnoo ngwe tax, dɨ nu yuu gên o yubac lêm  
\v 12 od Anutu nêl kɨyang tax vô Lebeka ên nêbê, “Num tuc ob vông yuac vac num môn kwa ngɨbi.”  
\v 13 Om kɨyang yêp vac xolac bêga ên nêbê, “A xêgyaa vin lec Jekop, lêc Iso ge a xêgyaa o vyac vin lec i lêm.”   
\p
\v 14 Om il ob nêb va? Il ob xê Anutu môp wê vɨnoo xomxo ge ên il nêb tɨyiên ma, me? Ma vêl.  
\v 15 Ên kɨyang wê Anutu nêl vô Moses ge yêp bêga nêbê, “A obêc nêb vông nivɨha vô xomxo ti ge od a ob vông vô i, dɨ a obêc nêb xo vɨgwe pɨsiv ên xomxo ti ge od a obêc xo vɨgwe pɨsiv ên i.”  
\v 16 Om il ob xovô bêga bê Anutu obêc vɨnoo xomxo ti ge od o kehe lec xovôên hɨxôn yuac nivɨha wê xomxo tige vông ge lêm. Nge, Anutu vaci xo vɨgwe pɨsiv ên xomxo tige om vɨnoo.  
\v 17 Tɨyi xocbê kɨyang wê Anutu nêl vô Pelo mɨ i yêp vac xolac bêga ên nêbê, “A vông lê levac vô ông dɨ vông tɨxuu tɨxuu tɨbeac vô ông, ên a nêbê xêkɨzêc wê a vông ge i yêp seac dɨ xomxo tɨbeac i yê dɨ nêl a lêg i vô levac vac vɨgwe vɨhati.”  
\v 18 Om il ob xovô bêga bê Anutu obêc nêb xo vɨgwe pɨsiv ên xomxo ti ge od obêc xo vɨgwe pɨsiv ên i, dɨ obêc nêb vông xomxo i hɨngoo kɨyang wê i nêl ge od xomxo tige obêc hɨngoo kɨyang wê i vông ge.   
\s1 Anutu xêyaa myavɨnê hɨxôn xêyaa vin lecên  
\p
\v 19 Mêd xam ti obêc nêl vô a bê, “Anutu vông xomxo ya hɨngoo i kɨyang om bêna lêc Anutu ob nêl bê nipaên yêp vô heê? Xomxo ti tɨyiên ma wê ob le vac Anutu kɨyang xôn ge.”  
\v 20 Lêc a ob nêl vô xam bê xomxo letya wê ob luu kɨyang vô Anutu ge? Dêg kɨbun o tɨyi wê ob kunac xomxo ti wê pɨtii i ge dɨ nêl bê “Bêna lêc ông  
\p pɨtii a tibêga?” ge lêm.  
\v 21 Ên xomxo ti wê pɨtii dêg ge ob pɨtii i tɨyi xovôên wê ici va vông ge, om hôm kɨbun nipwo ti dɨ pɨtii dêg yuu, ngwe tɨyi xocbê dêg nivɨha dɨ ngwe tɨyi dêg nipaên. Lêc môp tige tɨyi.   
\p
\v 22 Dɨ môp wê Anutu vông ge yêp bêga wê nêl lec dêg. Ên Anutu nêb ob hɨlung xêyaa myavɨnê hɨxôn xêkɨzêc wê i vông ge i yêp seac. Om dêg nipaên wê Anutu xêyaa vô myavɨnê vô he nêb ob kɨtya he vêl ge, Anutu o vông myavɨwen vô he lutibed lêm. Nge, hôm he nên nipaên xôn mɨ i yêp dia.  
\v 23 Anutu vông bêge, ên nêb ob vông xêseac wê i vông ge lam hɨvun dêg nivɨha xôn. Dêg tigee wê Anutu pɨtii ên nêb ob xo vɨgwe pɨsiv ên he dɨ vông he i dô vac xêseac wê i vông ge.  
\v 24 Dêg nivɨha ge tɨyi xocbê il wê Anutu tyuc il. Il ya xomxo Yuda, lêc Anutu o tyuc xomxo Yuda vaci lêm. Nge, tɨbii wê o Yuda lêm gee tɨbeac hɨxôn.   
\p
\v 25 Tɨyi xocbê Anutu vya wê yêp vac kɨpihac wê plopet Hosea kɨvuu ge bêga nêbê,  
\q1 “Xomxo wê he o tu a nuge ilage lêm ge, od a ob nêl bê a nuge he hɨxôn, dɨ xomxo wê a xêgyaa o vin lec he ilage lêm ge od a xêgyaa ob vin lec he hɨxôn.  
\v 26 Dɨ vɨgwe ti wê he dô vac dɨ a nêl vô he ên a nêbê he o a nuge lêm ge, od vac vɨgwe tige a ob nêl bê, ‘A, Anutu magvɨha, nuge he.’”   
\p
\v 27 Nang dêc plopet Aisaia kɨvuu kɨyang lec xomxo Islel mɨ i yêp bêga ên nêbê,  
\q1 “Xomxo Islel obêc vô tɨbeac hɨwocên tɨyi xocbê luda wê dô vô gwec nɨnya ge, lêc Anutu obêc kô he yuu bed mɨ la vô i.  
\v 28 Ên Apumtau obêc yaxên xomxo vɨhati nên kɨyang lec buc tɨmuên dɨ vông myavɨwen lutibed vô he.”   
\p
\v 29 Mêd Aisaia nêl kɨyang ngwe tii vac nang ên nêbê,  
\q1 “Apumtau wê xêkɨzêc kehe ge obêc kɨtya il buge vɨhati vêl ilage ge od gwêbaga il obêc ma, tɨyi xocbê tɨbii Sodom yuu Gomola ge.”   
\s1 Xomxo Islele o vông i vin Kɨlisi lêm  
\p
\v 30 Om il ob nêl bêna? Il ob xovô bêga bê xomxo wê o Islel lêm gee, he nɨlô yen o myag môp nivɨha wê Anutu ob yê nêb he xomxo nivɨha ge lêm, lêc he vông i vin Kɨlisi om Anutu yê he nêb he xomxo nivɨha.  
\v 31 Dɨ xomxo Islel tɨmu vô xolac wê Moses vông ge dɨ vông yuac levac lec, ên nêb Anutu i yê he nivɨha, lêc môp wê he vông ge o tɨyi lêm.  
\v 32 Môp wê he vông ge o tɨyi lêm, ên he o nêl ên he nêbê Anutu i yê he nivɨha lec vông vinên lêm. Nge, he so ên he nêbê yuac wê he vông ge obêc vông Anutu yê he nêb he tɨbii nivɨha, dɨ he o vông i vin Yesu lêm. Om Yesu ge tɨyi xocbê ngɨdax wê he vɨnux vɨxa lec,  
\v 33 tɨyi xocbê kɨyang wê yêp vac xolac bêga nêbê,  
\q1 “Xam wê lê. Vac vɨgwe Saion a ob lax ngɨdax ti wê xomxo obêc vɨnux vɨxa lec dɨ tɨlii ge. Lêc xomxo ti obêc vông i vin ngɨdax tige ge od vông vinên wê i vông ge obêc pɨleva lêm. Nge, ob vô nivɨha vô i.”   
\c 10  
\s1 Môp wê xomxo Islel dô vac ge o vô nivɨha vô he lêm  
\p
\v 1 Xam lige, a nêb Anutu i vô a lige Islel vêl ên he nên nipaên, om a kɨtaa vô Anutu ên he tɨyi lec buc vɨhati.  
\v 2 A xovô môp wê he vông ge om a nêl he kɨtong ên a nêbê he xêyaa vin lec nêb he ob tɨmu vô Anutu kɨyang lê, lêc he o vyac xovô môp wê Anutu vông ge lêm.  
\v 3 Ên môp wê Anutu ob yê xomxo nêb he xomxo nivɨha lec vông vinên ge, he Islel lungên môp tige, om he o la vac môp tige kwa ngɨbi lêm. Nge, he dô vac môp wê tɨmu vô Moses xolac ge ên nêb Anutu i yê he nivɨha lec môp tige.  
\v 4 Lêc Kɨlisi hi xolac wê Moses vông ge tip la vêl, om gwêbaga xomxo obêc vông i vin Kɨlisi ge od Anutu ob yê he nêb he xomxo nivɨha.   
\s1 Anutu nêb xomxo vac vɨgwe vɨhati i vông i vin Kɨlisi  
\p
\v 5 Ilage Moses kɨvuu kɨyang lec môp wê Anutu ob yê xomxo nivɨha ên wê he tɨmu vô Moses xolac ge, om kɨyang yêp bêga nêbê, “Xomxo ti obêc tɨmu vô kɨyang tigae vɨhati ge od ob vông he dô mavɨha.”  
\v 6-7 Lêc môp wê Anutu ob yê xomxo nêb he xomxo nivɨha lec vông vinên ge o bêge lêm. Ên kɨyang yêp bêga nêbê, “Le i lêc xo vac nɨlô bêga bê, ‘Letya ob lec mɨ la lag puunê?’, dɨ le i lêc nêl bê, ‘Letya ob la vac vɨgwe yibênê?’” Le i lêc nêl bêge lêm, ên Kɨlisi lop mɨ lam kɨbun pyap dɨ kɨdi lec vac yibên pyap.  
\v 8 Om kɨyang wê nêl lec môp vông vinên ge yêp vac xolac bêga nêbê, “Anutu xolac yêp vô xam pyap, tɨyi wê xam ob xovô vac pɨyôp dɨ nêl vac myam ge.” Kɨyang tige nêl lec xolac wê xe mi nêl vô xam ên xe nêbê xam vông i vin ge.  
\v 9 Om xomxo ti obêc nêl Yesu kɨtong seac vac mya bêga ên nêbê, “Yesu ge Apumtau” dɨ obêc vông i vin nêbê Anutu tɨpi vô Yesu kɨdi lec vac yibên ge od Anutu obêc kɨtya i nên nipaên vêl.  
\v 10 Ên il obêc vông i vin ge od Anutu ob yê il nêb il xomxo nivɨha, dɨ il obêc nêl vông vinên kɨtong i yêp seac vac myad ge od Anutu ob kɨtya il nêd nipaên vêl dɨ vông il dô vac nivɨha.   
\p
\v 11 Dɨ kɨyang ti yêp vac xolac bêga nêbê, “Xomxo ti obêc vông i vin Yesu ge od vông vinên wê i vông ge obêc pɨleva lêm. Nge, ob vô nivɨha vô i.”  
\v 12 Kɨyang tige nêl lec xomxo vɨhati yang, ên Anutu ob yê xomxo Yuda hɨxôn tɨbii ba vɨhati tɨyima, ên Apumtau ge xomxo vɨhati yang, he Apumtau, om obêc vông vɨzid nivɨha vô xomxo vɨhati wê he kɨyag vya lec i ge.  
\v 13 Tɨyi xocbê kɨyang wê yêp vac xolac bêga ên nêbê, “Xomxo ti obêc kɨyag vya lec Apumtau ge od Apumtau obêc vô i vêl ên nipaên dɨ vông i dô vac nivɨha.”   
\p
\v 14 Lêc xomxo obêc vông i vin Yesu lêm ge od he obêc kɨyag vya lec i bêna? Dɨ he obêc ngô Yesu kɨyang lêm ge, od he ob vông i vin bêna? Dɨ xomxo obêc la nêl kɨyang tige vô he lêm ge, od he ob ngô kɨyang tige bêna?  
\v 15 Dɨ Anutu obêc vông xomxo la nêl xolac lêm ge, od xomxo ob nêl xolac tibêna? Ên kɨyang yêp vac xolac bêga nêbê, “Xomxo obêc kô xolac mɨ lam nêl vô il ge od nivɨha yang.”   
\s1 Islel ngô xolac lê, lêc he o vông i vin lêm  
\p
\v 16 Xomxo Islel ngô xolac lê, lêc he tɨbeac o vông i vin lêm, tɨyi xocbê kɨyang wê plopet Aisaia kɨvuu mɨ i yêp vac xolac bêga nêbê, “Apumtau, xomxo vɨhati ge, he o vông i vin kɨyang wê xe nêl ge lêm.”  
\v 17 Om il ob xovô bêga bê xomxo obêc vông i vin ge od kehe bêga nêbê he ngô xolac, dɨ xolac wê he ngô ge, xomxo nêl Kɨlisi kɨtong vô he.   
\p
\v 18 Om a ob kɨnêg vô xam bêga bê xomxo Islel ge, he ngô xolac, me he ngôên ma? He ngô pyap ila, ên kɨyang yêp vac xolac bêga nêbê,  
\q1 “Xomxo kô xolac mɨ la nêl vac vɨgwe vɨyang vɨyang, dɨ kɨyang wê he nêl ge la tɨyi kɨbun myahɨpu vɨhati yang.”   
\p
\v 19 Om a ob kɨnêg kɨyang ngwe hɨxôn vô xam bêga bê xomxo Islel ge, he lungên xolac tige, me? He o lungên lêm. Nge, he xovô pyap, lêc he o vông i vin lêm. Om Anutu nêl kɨyang vô he Islel mɨ i yêp vac kɨpihac wê Moses kɨvuu ilage bêga nêbê,  
\q1 “Tɨbii madɨluhu gee, xam wê he tɨyi xocbê xomxo pɨleva wê pɨyôp maên ge, lêc a ob vông he tu a nuge dɨ vông vɨzid vô he, om xam obêc wê he nipaên dɨ kunac he.”   
\p
\v 20 Nang dêc Aisaia nêl Anutu vya yêp seac bêga ên nêbê,  
\q1 “Xomxo wê o myag a ilage lêm ge, od gwêbaga he xovô a, dɨ xomxo wê o kɨnêg a lêm ge, od a hɨlung a vô he.”   
\p
\v 21 Lêc Anutu nêl kɨyang lec xomxo Islel bêga ên nêbê,  
\q1 “A tyuc he tɨyi buc vɨhati ên a nêb he i lam vô a, lêc he vô nɨnya kɨtu vô a dɨ pwoo a vyag vac.”   
\c 11  
\s1 Anutu xo vɨgwe pɨsiv ên Islel vɨlu bed  
\p
\v 1 Om a ob kɨnêg vô xam bêga bê Anutu ngɨloo i nue Islel vɨhati vêl, me? Ma vêl. Xam wê lê. A ga, a êno xomxo Islel ti wê a pum lec Eblaham dɨ a kehe yêp vac Bensamin.  
\v 2 Anutu o ngɨloo nue Islel wê vɨnoo he ilage lêm. Kɨyang wê Ilaija nêl vô Anutu mɨ i yêp vac kɨpihac xolac ge, xam mêd lungên, me? Ên Ilaija kɨtaa vô Anutu dɨ nêl lie Islel nên nipaên kɨtong bêga ên nêbê,  
\v 3 “Apumtau, he hi ông nume plopete yib dɨ dii ông alta wê ob si daa lec ge vêl. Lêc a tibed gên dô om he myag a ên nêb ob hi a xib.”  
\v 4 Dɨ Anutu nêl kɨyang tina vô Ilaija? Anutu nêl vô i ên nêbê, “O ôcông tibed lêm. Ên a nuge 7,000 gên dô wê a vɨnoo he pyap ge wê he o yev vɨxa kɨtu vô anutu mayibên Bal ge lêm.”   
\p
\v 5 Om môp tibêge yêp gwêbaga hɨxôn, ên gwêbaga he Islel vɨwen dô wê Anutu nue ge, ên Anutu xo vɨgwe pɨsiv ên he dɨ vɨnoo he.  
\v 6 Lêc Anutu o vɨnoo he ên yuac nivɨha wê he vông ge lêm. Nge, ici va vɨnoo he tɨyi xocbê vông vɨzid pɨleva vô he ge. Ên Anutu obêc vông vɨzid vô he lec yuac nivɨha wê he vông ge od obêc tɨyi xocbê he kɨsuu ya yuac nivɨha wê he vông ge. Lêc o ngwe bêge lêm. Nge, Anutu vaci vông pɨleva vô he.   
\p
\v 7 Om il ob xovô bêga bê xomxo Islel myag môp wê Anutu ob yê he nivɨha lec ge, lêc he o tulec lêm. He vɨlu bed wê Anutu vɨnoo he ge, he tulec. Dom he tɨbeac vô nɨnya kɨtu vô Anutu kɨyang,  
\v 8 tɨyi xocbê kɨyang wê yêp vac xolac bêga nêbê,  
\q1 “Anutu vông he nɨlô tɨyi xocbê he yêp ge om he manôn o yê susu ti lêm, dɨ he nɨnya o ngô kɨyang ti lêm, om he dô lung lung dɨ i val tyip lec gwêbaga hɨxôn.”   
\p
\v 9 Nang dêc Devit êno nêl kɨyang lec he Islel bêga nêbê,  
\q1 “Vɨzid wê he myêl mɨ ya ge, i tɨyi xocbê pulac wê he ob vac ge, me xocbê lôva wê he ob tô dɨ vac kɨpêd ge, me leac wê ob ku he xôn ge, ên i vông myavɨwen vô he.  
\v 10 Dɨ he manôn i toc, ên he i o lêc yê vɨgwe lêm, dɨ vɨyin levac i tulec he dɨ he i kɨlê tɨyi buc vɨhati.”   
\s1 Anutu ob kô he wê o Islel lêm ge vêl  
\p
\v 11 Xomxo Islel o vông i vin Yesu lêm, om tɨyi xocbê he tô mɨ la, om a ob kɨnêg vô xam bê he ob tô mɨ la dô xel, me? Ma vêl. Ên he pwoo kɨyang vac, om Anutu vông vɨzid la vô tɨbii ba dɨ vô he vêl ên he nên nipaên. Mêgem xomxo Islel obêc yê vɨzid nivɨha wê Anutu vông vô tɨbii ba ge od obêc vông he nɨlô yen yetac dɨ he ob lôm vô Anutu.  
\v 12 Xomxo Islel pwoo kɨyang vac, mêgem Anutu vông vɨzid levac la vô tɨbii vɨyang vɨyang, om he Islel vɨhati obêc pɨlepac he dɨ lôm vô Anutu ge od Anutu ob vông vɨzid levac lax mɨ la vô he vɨhati luu vêl.   
\p
\v 13 A ob nêl kɨyang ti vô xam wê xam o Islel lêm ge. Anutu vɨnoo a nêb a nêl xolac vô xam wê o Islel lêm ge, om a xêgyaa nivɨha ên yuac tige,  
\v 14 ên a nêb mêd a lige Islel ob yetac ên vɨzid wê xam kô vô Anutu ge dɨ he ya ob pɨlepac he dɨ lôm vô Anutu ên i ngɨdu he xôn.  
\v 15 Anutu ngɨloo Islel vêl dɨ la vô tɨbii ba ên nêb he i tu i nue, om Anutu obêc vông he Islel lax tu i nue nang ge od obêc tɨyi xocbê Anutu tɨpi vô he kɨdi lec mavɨha vac yibên.   
\p
\v 16 Xomxo ti obêc kô blet nipwo ti mɨ la kɨtaa lec ge od blet vɨhati ge tu Anutu xe. Dɨ xomxo ti obêc kô xax ngɨlôhô ti mɨ la kɨtaa lec ge od xax ngen vɨhati ge tu Anutu xe. Kɨyang tige nêl lec xomxo Islel, ên Anutu nêl vô Eblaham ilage nêbê i tu ixe, om Eblaham bue tɨvae ob tu Anutu xe hɨxôn.   
\p
\v 17 Dɨ a ob nêl kɨyang pɨlepacên ti lec xax oliv. Ên xomxo Islel ge tɨyi xocbê xax oliv wê Anutu vaci tung he ge, dɨ xam wê xam o Islel lêm ge, xam tɨyi xocbê xax oliv wê vɨmen ge. Mêd Anutu xoo ngen ya vêl ên xax wê ici va tung ge, dɨ la kô xax ngen wê vɨmen ge dɨ lam yev lec dɨ ku xôn. Om xam dô dɨ kô vɨzid wê xomxo Islel vông ge tɨyi xocbê xax ngen kô hɨzi vô xax yatôv ge.  
\v 18 Om xam o lêc wê ngen wê Anutu xoo vêl ge nipaên lêm, dɨ xam o yong xam lêm. Ên xam ge ngen pɨleva dom xam o viac xax ngɨlôhô lêm. Nge, xax ngɨlôhô viac xam.   
\p
\v 19 Lêc mêd xam ya obêc nêl bêga bê, “Xe ga, Anutu xoo ngen ya vêl ên nêb ob yev xe la le vac he nipɨlêhê.”  
\v 20 Xam nêl vɨxôhɨlôg, ên Anutu xoo he Islel vêl ên wê he o vông i vin lêm ge dɨ yev xam la le vac he nipɨlêhê ên wê xam vông i vin ge. Lêc xam o lêc yong xam lêm. Nge, xam viac xam dɨ xona nêm.  
\v 21 Ên Islel ge tɨyi xocbê ngen wê nôn ge, lêc Anutu o vông he le lêm. Nge, xoo he vêl. Om xam obêc sea vông vinên ge od Anutu obêc vông xam le lêm. Nge, obêc xoo xam vêl hɨxôn êno.  
\v 22 Om xam wê lê. Anutu ge wê ob vông vɨzid vô xomxo dɨ obêc vông myavɨwen nipaên vô xomxo êno. Om xomxo wê vông môp nipaên ge, Anutu ob vông myavɨwen nipaên vô he, lêc xam mô ge, Anutu vông vɨzid vô xam. Om xam dô vac vɨzid tige nɨlô, ên xam obêc sea ge od Anutu obêc xoo xam vêl.  
\v 23 Dɨ xomxo Islel obêc pɨlepac he dɨ vông i vin ge od he ob lax le vac xax tige i tii vac, ên Anutu tɨyi wê ob yev he lax le vac nipɨlêhê ge.  
\v 24 Xam tɨbii ba, ilage xam dô tɨyi xocbê xax oliv wê vɨmen ge ngen, lêc Anutu xoo xam vêl dɨ yev xam le vac xax xumac wê xam o le vac ilage lêm. Om Anutu tɨyi wê obêc kô Islel wê xoo vêl ge mɨ lax yev vac xax oliv wê he le vac ilage.   
\s1 He Islel obêc pɨlepac he dɨ vông i vin tii vac  
\p
\v 25 Xam lige, kɨyang wê yêp xôpacên ilage, a nêb a ob nêl kɨtong vô xam, êdêc xam o lêc yong xam dɨ nêl bê xam xovô kɨyang vɨhati lêm. Om kɨyang wê yêp xôpacên ilage bêga nêbê, xomxo Islel vô nɨnya kɨtu vô Anutu kɨyang, dɨ obêc mɨla vô buc wê tɨbii ba tɨbeac obêc pɨlepac he mɨ la vô Anutu ge od Islel vông môp wê vô nɨnya kɨtu vô Anutu kɨyang ge obêc tip la vô buc tige,  
\v 26 dɨ Anutu obêc vô he Islel vɨhati vêl. Tɨyi xocbê Anutu vya wê yêp vac xolac bêga nêbê,  
\q1 “Xomxo ti wê ob hôm xomxo lec ge obêc val vac vɨgwe Saion, dɨ obêc vô xomxo wê Jekop bue tɨvae ge vêl ên he nên nipaên.  
\v 27 Dɨ a ob kɨtya he nên nipaên vêl, tɨyi xocbê kɨyang wê a hɨlu vô he ge.”   
\p
\v 28 Xomxo Islel o vông i vin Yesu xolac lêm, om tɨyi xocbê he vông vevac vô Anutu dɨ Anutu yê he nipaên, om Anutu vông vɨzid loc vô xam wê tɨbii ba ge. Lêc Anutu xêyaa vin lec Islel ên wê vɨnoo he ilage, om xovô kɨyang wê hɨlu vô he bue ilage, dɨ o sea he lêm.  
\v 29 Ên Anutu obêc vɨnoo xomxo dɨ vông vɨzid vô he ge od obêc hôm i kɨyang xôn dɨ ob sea lêm.   
\p
\v 30 Xam wê xam o Islel lêm ge, ilage xam pwoo Anutu kɨyang vac, lêc gwêbaga Anutu xo vɨgwe pɨsiv ên xam, ên he Islel pwoo kɨyang vac, om Anutu vông xêyaa vin lecên wê i vông ge loc vô xam.  
\v 31 Gwêbaga he Islel pwoo Anutu kɨyang vac, lêc obêc tɨmuên ge od xêyaa vin lecên wê Anutu vông ge ob la vô he tɨyi xocbê val vô xam gwêbaga.  
\v 32 Ên Anutu yê wê xomxo vɨhati pwoo i kɨyang vac ge om vông he vɨhati dô tɨyi xocbê he dô vac kalabuhu ge. Anutu vông bêge, ên nêb obêc xo vɨgwe pɨsiv ên he vɨhati tɨmuên.   
\s1 Il ob pɨmil Anutu lê  
\p
\v 33 Pɨyôp yuu xovôên wê Anutu vông ge, levac mabu luu vêl. Xomxo ti o tɨyi wê ob xovô pɨyôp wê Anutu vông ge kehe lêm, dɨ ti o tɨyi wê ob xovô môp wê i vông ge kehe êno lêm.  
\v 34 Tɨyi xocbê kɨyang wê yêp vac xolac bêga nêbê,  
\q1 “Letya xovô kɨyang wê yêp vac Apumtau pɨyôp ge? Dɨ letya vông xovôên vô i?  
\v 35 Dɨ letya vông susu ti vô Anutu tax ên nêb i lêc vông vacê? Ma vêl.”   
\p
\v 36 Anutu vaci tu susu vɨhati yang ge kehe, om susu vɨhati yang ge tɨyi xocbê ici va xe, wê ob vông i lê i vô levac. Om il ob pɨmil i lê i vô levac dɨ i yêp luta lêc luta. Nôn.   
\c 12  
\s1 Il ob vông icil va vô Anutu i tɨyi xocbê daa  
\p
\v 1 Xam lige, Anutu xo vɨgwe pɨsiv ên il dɨ vông vɨzid levac vô il, om a nêl vô xam bê xam vông xam i loc yadɨluhu vô Anutu i tɨyi xocbê daa ngɨbua wê mavɨha ge, ên Anutu i yê nivɨha. Ên xam obêc vông môp tibêge ge od môp tige tɨyi xocbê xam hi vɨxam pec ên Anutu dɨ pɨmil i lê.  
\v 2 Dɨ xam o lêc tɨmu vô môp xocbê xomxo kɨbun ga mi vông ge lêm. Xam vông pɨyôp yuu nɨlôm i loc vô Anutu, ên i pɨlepac xam nɨlôm yuu pɨyôp i vô paha lec, êdêc xam xovô môp wê Anutu xêyaa vin lec nêb il tɨmu vô ge, ên môp tige nivɨha yuu xêseac tɨyi wê ob vông Anutu xêyaa vô nivɨha vô il ge.   
\s1 Il ob vông yuac ya xovôên wê Anutu vông vô il ge  
\p
\v 3 Anutu vông yuac sinale vô a tɨyi xocbê vɨzid nivɨha ge, om a nêb a ob nêl vô xam vɨhati bêga bê xam o lêc xo bê xam ge tɨbii levac me tɨbii nivɨha i luu vêl lêm. Xam vyac xovô xam lê, dɨ xam toto ge yaxên vông vinên wê Anutu vông vô xam ge dɨ xovô yuac wê xam ob vông ge.  
\v 4 Ên il xovô ên il nêbê xomxo tibed, lêc ninɨvi toto. Lêc vɨhati o vông yuac tibed lêm. Nge, toto ge he vông yuac wê yêp vô he ge.  
\v 5 Dɨ il ga, il tɨyi xocbê ngang ngang tɨbeac, lêc Kɨlisi vông il lax tu ninɨvi nôn tibed. Om il ngang toto ge, il ob vông yuac dɨ ngɨduma xôn dɨ i tu ninɨvi nôn tibed.   
\p
\v 6 Anutu vông xovôên hɨxôn yuac toto vô il tɨyi xocbê vɨzid wê vông pɨleva vô il ge, om il toto ge il ob vông yuac ya. Dɨ Anutu obêc vông xovôên vô xomxo ti nêb i nêl xolac ge, od xomxo tige i nêl xolac i tɨyi xocbê vông vinên wê yêp vô i ge.  
\v 7 Dɨ Anutu obêc vông xovôên vô xomxo ti ên nêb i ngɨdu lie xôn ge, od i xovô yuac wê ob ngɨdu lie xôn ge. Dɨ Anutu obêc vông xovôên vô xomxo ti ên nêb i tɨxuu lie ya xolac ge od i vông yuac wê ob tɨxuu lie ge.  
\v 8 Dɨ Anutu obêc vông xovôên vô xomxo ti nêb i ngɨdu vông vinên wê lie vông ge xôn ge od i ngɨdu lie xôn nivɨha. Dɨ xomxo ti obêc vông susu vô lie ge od i vông tɨbeac vô he. Dɨ xomxo ti obêc kô yuac wê ob viac lie ge od i xêyaa i vin lec yuac tige. Dɨ xomxo ti obêc xo vɨgwe pɨsiv ên xomxo dɨ ngɨdu he xôn ge od i ngɨdu he xôn, hɨxôn xêyaa nivɨha.   
\s1 Il ob dô vac môp xêyaa vin lec maên  
\p
\v 9 Xam xêmyaa i vin lec lime hɨxôn nôn, dɨ xam o lêc kɨtyoo lêm. Xam xona nêm dɨ vô nɨmim vô môp nipaên dɨ hôm môp nivɨha xôn mɨ i yêp pɨlihi.  
\v 10 Xam xêmyaa i vin lec lime vông vinên i tɨyi xocbê xam xêmyaa vin lec lime wê xam hi tibed ge, dɨ xam toto ge pɨmil lime dɨ ngɨdu he xôn.   
\p
\v 11 Xam nim i o lêc ma ên yuac wê yêp vô xam ge lêm. Nge, xam vông yuac vô Apumtau ya xêkɨzêc wê Myakɨlôhô Ngɨbua vông ge.   
\p
\v 12 Kɨyang wê xam vông i vin mɨ dô bin ge, xam bin hɨxôn xêmyaa nivɨha. Dɨ xam le xêkɨzêc vac vɨyin wê xam ob tulec ge. Dɨ xam o lêc sea môp kɨtaaên lêm. Nge, xam kɨtaa i tɨyi buc vɨhati.   
\p
\v 13 Dɨ lime vông vinên nên susu obêc ma ên he ge od xam ngɨdu he xôn. Dɨ xomxo vɨyang bangwe obêc val vac xam bom ge, od xam viac he i nivɨha.   
\p
\v 14 Dɨ xomxo obêc vông xam vô nipaên ge od xam o lêc kɨtaa vô Anutu bê i vông myavɨwen vô he lêm. Nge, xam kɨtaa vô Anutu ên i vông nivɨha vô he.   
\p
\v 15 Lime obêc dô hɨxôn xêyaa nivɨha ge od xam xêmyaa i vô nivɨha hɨxôn he, dɨ he obêc byag ge od xam byag hɨxôn he.   
\p
\v 16 Xam viac lime i nivɨha, i tɨyi xocbê xam viac xacxam va nivɨha ge. Dɨ xam o lêc yong xam dɨ nêl bê xam tɨbii levac lêm. Nge, xam dô hɨxôn xomxo wê o kô lê levac lêm ge. Dɨ xam o lêc yong xam dɨ nêl bê xam pɨyôp levac lêm.   
\p
\v 17 Xomxo ti obêc vông nipaên vô xam ge od le i lêc vông nipaên i luu nipaên lêm. Xam tɨmu vô môp wê xomxo vɨhati ob yê dɨ xovô nêbê nivɨha ge.  
\v 18 Môp obêc yêp ge od xam viac kɨyang vôma dɨ dô malehe hɨxôn xomxo vɨhati.  
\v 19 Xam lige, xam o lêc vông nipaên i luu nipaên lêm. Xam vông myavɨwen nipaên i loc vac Anutu vaci vɨgê. Ên Apumtau nêl kɨyang mɨ i yêp vac kɨpihac bêga nêbê, “Aca va tibed wê a obêc vông myavɨwen vô xomxo i luu nipaên wê he vông ge.”  
\v 20 Om xam vông i tɨyi kɨyang wê yêp vac xolac bêga nêbê, “Xomxo wê yê xam tɨyiên ma ge, vip obêc den he ge od xam vông yaên vô he, dɨ he obêc nêb num mia ge od xam vông mia vô he mɨ he num. Ên xam obêc vông bêge vô he ge od he ob xo i lax lec nipaên wê he vông ge dɨ ni ob yoc ên he.”  
\v 21 Môp nipaên i o lêc vông xam vô nipaên lêm. Nge, xam dô vac môp nivɨha wê ob ngɨnoo môp nipaên vêl ge.   
\c 13  
\s1 Il ob la vac gavman kɨyang kwa ngɨbi  
\p
\v 1 Xam vɨhati, xam dô vac gavman kwa ngɨbi. Ên gavman wê viac xam ge, heche va o vɨnoo he lêm. Nge, Anutu vaci tung he dɨ vông xêkɨzêc vô he.  
\v 2 Om xomxo ti obêc pwoo kɨyang wê gavman vông ge vac ge od tɨyi xocbê he pwoo Anutu kɨyang vac hɨxôn, om xomxo tibêge ob kô myavɨwen nipaên, ên Anutu vaci tung gavman.  
\v 3 Xomxo wê dô vac môp nivɨha ge ob xona ên gavman lêm. Dom xomxo wê vông môp nipaên ge, od ob xona ên gavman nêbê gavman obêc vông myavɨwen vô he. Om xam obêc nêb xam xonaên ma ge od xam dô vac môp nivɨha ên gavman i pɨmil xam.  
\v 4 Ên gavman vɨyang vɨyang tu Anutu nue yuac wê ob ngɨdu xam xôn dɨ vông xam dô nimvɨha ge. Lêc xam obêc vông môp nipaên ge od xam xona ên he, ên xêkɨzêc wê yêp vô he ge, he o kô vɨdaaên lêm. Nge, Anutu vông vô he ên nêb he i tu i nue yuac wê ob vông myavɨwen luu nipaên wê xomxo vông ge.  
\v 5 Mêgem xam vô nɨnyam lehe vô gavman kɨyang. Lêc xam o lêc vông ên wê xam xona ên myavɨwen nipaên ge vaci lêm. Nge, xam vông lec kehe bêga bê xam nɨlôm kɨdu xam nêb môp tibêge nivɨha.   
\p
\v 6 Mone wê il mi vông vô gavman ge, kehe yêp vac kɨyang tige hɨxôn, ên gavman vɨyang vɨyang ge he tu Anutu nue yuac wê ob viac yuac wê Anutu vông vô he ge.  
\v 7 Mêgem xam vông mone yuac toto ge i loc vô gavman tɨyi xocbê he nêb xam vông vô he ge. Dɨ he wê kô lê gavman dɨ viac xam ge, xam pɨmil he dɨ loc vac he kwa ngɨbi.   
\s1 Môp xêyaa vin lecên ob vông xolac vô nôn lec  
\p
\v 8 Le i lêc kô lime ti susu dɨ myavɨwen i yêp dia lêm. Ên môp tibed wê yêp bêga nêbê il xêdyaa i vin lecma i yêp i loc buc dia. Ên xomxo ti xêyaa obêc vin lec xomxo ge od tɨyi xocbê vông xolac wê Anutu nêl vô Moses ge vô nôn lec.  
\v 9 Ên xolac wê Moses vông ge nêl bêga nêbê, “Le i lêc vông yôdac vêx yuu vux lêm”, dɨ “le i lêc hi xomxo i yib lêm,” dɨ “le i lêc vông yôdac vô xomxo susu lêm,” dɨ “le i lêc doma vô xomxo susu ya lêm.” Lêc xolac tige hɨxôn xolac baba, he xôn vɨhati yang ge, kehe tibed bêga nêbê ông xêmyaa i vin lec lime baba i tɨyi xocbê ông xêmyaa vin lec ôcông va ge.  
\v 10 Ên xomxo ti xêyaa obêc vin lec xomxo ngwe ge od obêc vông i vô nipaên lêm. Om xomxo ti obêc dô vac môp xêyaa vin lecên ge, od tɨyi xocbê vông xolac wê Moses vông ge vɨhati vô nôn lec.   
\p
\v 11 Mêgem xam lêc dô vac môp tibêgee, ên xam xovô buc wê il dô vac gwêbaga pyap, om xam sea yêpên dɨ kɨdi lec. Ên ilage wê il vông i vin taxlee ge, buc wê Anutu ob kô il mɨ la tung vac ben ge gên yêp teva, lêc gwêbaga, buc tige vô kwabo lec.  
\v 12 Om vô kwabo lec wê mapɨtoc ob tip vac dɨ vɨgwe ob vɨdii. Om il ob sea môp mapɨtoc dɨ la le vac xêseac, êdêc vông vevac vô nipaên.  
\v 13 Om il ob dô vac môp bôbac tɨyi xocbê xomxo wê la vac xêseac wê hɨyôv vông ge. Om il ob num dɨ vô mavmav dɨ vông môp vaxvax wê nipaên ge hɨxôn lêm, dɨ il ob vông môp yôdac vêx yuu vux lêm, dɨ il ob kunacma dɨ xêma nipaên dɨ do mad vô lige susu lêm.  
\v 14 Il ob tɨmu vô môp yuu yuac wê Apumtau Yesu Kɨlisi vông ge, dɨ il ob tɨmu vô môp nipaên wê yêp vac il nɨlôd ge lêm.   
\c 14  
\s1 Il ob yaxên môp wê lige vông vinên vông ge lêm  
\p
\v 1 Xomxo wê vông i vin Yesu pyap lêc vông vinên wê he vông ge gên o vô xêkɨzêc lec lêm ge, od xam vông he lam dô vac xam mahɨgun, dɨ xam o lêc ngaênma lec kɨyang yaya wê xomxo tigee vông ge lêm.  
\v 2 Ên xomxo ya vông i vin xêkɨzêc om he xovô ên he nêbê susu yaên vɨhati ge nivɨha tɨyi wê he ob ya ge. Lêc xomxo wê vyac xovôên xolac ma ge, he vɨbu nêbê he ob ya bwoc lɨyôhô lêm.  
\v 3 Om xomxo wê mi ya susu yaên vɨhati ge, he i o lêc yê xomxo wê mi ngɨbua bwoc lɨyôhô ge nipaên lêm, dɨ xomxo wê mi ngɨbua bwoc ge, he i o lêc yê xomxo wê mi ya susu vɨhati ge dɨ nêl bê he vông i so lêm, ên Anutu kô he ge êno la tu ixe.  
\v 4 Bêna lêc xam nêb xam ob vông kɨyang vô xomxo ngwe nue yuacê? Xomxo tigee, Apumtau tu he nên levac om obêc yaxên môp wê he vông ge dɨ nêl bê tɨyi me tɨyiên ma. Lêc môp wê he vông ge obêc tɨyi, ên Apumtau vaci ob ngɨdu he xôn dɨ vông he le xêkɨzêc.   
\p
\v 5 Xomxo ya nêl ên he nêbê buc ya levac i luu buc baba vêl, dɨ xomxo ya nêl ên he nêbê buc vɨhati ge tɨyima. Om xam toto yaxên lê, dɨ xam vyac xovô môp wê xam ob tɨmu vô ge dɨ hôm xôn pɨlihi mɨ i yêp vac xam pɨyôp.  
\v 6 Ên xomxo wê vɨnoo buc ya nêbê buc ge levac ge, he vông ên he nêbê he ob pɨmil Apumtau lec buc tige. Dɨ xomxo wê mi ya susu yaên vɨhati ge, he vông ên nêbê he ob pɨmil Apumtau lê om he pɨmil Anutu ên yaên vɨhati dɨ ya. Dɨ xomxo wê mi ngɨbua yaên ya ge, he vông ên he nêb he ob pɨmil Apumtau, om he êno pɨmil Anutu ên yaên wê he mi ya ge.   
\p
\v 7 Il ob xovô bêga bê il obêc dô madvɨha ge od il o xovô icil va lêm, me il obêc xib ge od il o xovô icil va lêm.  
\v 8 Ên buc wê il dô madvɨha ge od il ob vông Apumtau lê i vô levac, dɨ il obêc xib ge od il ob vông Apumtau lê i vô levac hɨxôn. Om il obêc dô madvɨha me il obêc xib ge od il ob tu Apumtau xe.  
\v 9 Ên Kɨlisi yib dɨ kɨdi lec mavɨha om kehe bêga nêbê tu xomxo wê dô mavɨha hɨxôn he wê yib ge nên Apumtau.   
\p
\v 10 Bêna lêc xam yaxên môp wê lime vông ge dɨ nêl ên xam nêbê tɨyiên ma, dɨ bêna lêc xam wê lime ya nipaênê? Ên il vɨhati obêc la le vô Anutu manôn dɨ ici va ob yaxên môp wê il toto vông ge.  
\v 11 Tɨyi xocbê kɨyang wê Apumtau nêl dɨ i yêp vac xolac bêga nêbê,  
\q1 “A nêl hɨxôn nôn ên a nêbê xomxo vɨhati yang ob yev vɨxa kɨtu vô a, dɨ nêl a kɨtong seac bêga bê a ga Anutu nôn.”   
\p
\v 12 Om il ob xovô bêga bê il toto obêc nêl môp wê il vông gê kɨbun ga kehe kɨtong vô Anutu vô buc tɨmuên.   
\s1 Il ob vông lige vô nipaên lec môp wê il vông ge lêm  
\p
\v 13 Om il ob sea môp wê il ob xê lige ngwe tɨyiên ma ge, dɨ il ob xovô môp bêga bê môp wê ob vông lige sea vông vinên wê he vông ge dɨ vông he la vac môp wê he yê nêbê nipaên ge, il ob vông môp tibêge lêm.  
\v 14 Apumtau Yesu vông xovôên vô a om a xovô ên a nêbê yaên ti o nipaên tɨyi wê ob vông il vô nipaên ge lêm. Lêc xomxo ti obêc yê susu yaên tɨyi xocbê nipaên ge od ob ya lêm, ên obêc ya ge od obêc vông i vô nipaên.  
\v 15 Om ông obêc wa yaên ti wê lim tige ngɨbua ge od obêc vông lim tige nɨlô vô vɨyin, om môp wê ông vông ge o tɨyi xocbê ông xêmyaa vin lec lim tige lêm. Kɨlisi yib ên xomxo tige hɨxôn, om xam viac xam ên yaên wê xam mi wa ge, êdêc yaên i o lêc vông lim tige i vô nipaên lêm.  
\v 16 Om môp wê xam wê ên xam nêbê nivɨha ge, xam viac xam êdêc xomxo i o lêc yê môp tige nipaên lêm.  
\v 17 Ên môp wê il tu Anutu nue dɨ la vac i kwa ngɨbi ge, kehe o yêp vac yaên yuu numên lêm. Nge, kehe bêga nêbê il dô vac môp nivɨha yuu kɨyang malehe dɨ xêyaa nivɨha wê Myakɨlôhô Ngɨbua vông ge.  
\v 18 Om xomxo obêc tu Kɨlisi nue yuac dɨ dô vac môp tigee ge od Anutu ob yê he nivɨha dɨ xomxo êno ob pɨmil he.   
\p
\v 19 Mêgem il ob tɨmu vô môp wê xêyaa vin lec maên ge dɨ dô vac kɨyang malehe nɨlô, dɨ il ob ngɨduma xôn vac vông vinên.  
\v 20 Om yaên wê xam mi wa ge i o lêc vông yuac wê Anutu vông ge i vô nipaên lêm. Vɨxôhɨlôg, yaên vɨhati ge nivɨha tɨyi wê il ob xa ge, lêc yaên wê xam mi wa ge obêc vông lime la vac môp wê he yê nêbê tɨyiên ma ge od môp wê xam vông ge, xam vông i so.  
\v 21 Om il ob tɨmu vô môp bêga bê il ob xa bwoc me il ob num wain me il ob vông môp vae vae, lêc môp tigee obêc vông lige nɨlô vô vɨyin ge od il ob sea môp tibêge i loc yêp xel dɨ vôngên i ma.  
\v 22 Om môp yaên yuu numên yuu bêge, xam toto xovô môp wê xam ob tɨmu vô ge, lêc môp ge ông sea i loc vô Anutu vaci. Ên xomxo ti obêc tɨmu vô môp wê yê nêbê nivɨha ge, dɨ nɨlô yuu pɨyôp obêc vông kɨyang vô i lec môp tige lêm ge od xomxo tige ob dô hɨxôn xêyaa nivɨha.  
\v 23 Lêc xomxo ti obêc ya yaên ti hɨxôn nɨlô yuu ge od ge vông i so, ên xomxo tige o ya hɨxôn nɨlô tibed lêm. Nge, ya hɨxôn xonaên. Ên môp wê xomxo nêb ob vông ge, he obêc vông hɨxôn nɨlô yuu ge od ge nipaên.   
\c 15  
\s1 Il ob tɨmu vô môp wê Kɨlisi vông ge  
\p
\v 1 Il wê il vông i vin xêkɨzêc ge, il ob ngɨdu lige wê gên o vông i vin xêkɨzêc lêm ge xôn dɨ kɨlê vɨyin wê he vông ge. Dɨ il ob vông môp wê ob vô nivɨha vô icil va ge lêm.  
\v 2 Nge, il toto ob vông môp wê ob vô nivɨha vô lige vông vinên, ên i ngɨdu vông vinên wê he vông ge xôn, ên he i le xêkɨzêc.  
\v 3 Ên môp wê Kɨlisi vông ge, o vông ên nêb i vô nivɨha vô ici va lêm. Nge, môp wê i vông ge, tɨyi xocbê kɨyang wê yêp vac xolac bêga nêbê, “Kɨyang nipaên wê xomxo nêl lec Anutu ge, he nêl lec a hɨxôn.”  
\v 4 Kɨyang vɨhati wê xomxo kɨvuu mɨ i yêp vac kɨpihac xolac ge, Anutu nêl ên nêbê i vông xovôên vô il dɨ vông il le xêkɨzêc vac vông vinên dɨ bin buc wê il ob tulec vɨzid vô Anutu ge.  
\v 5 Anutu ti wê ngɨdu xomxo xôn dɨ vông he le xêkɨzêc vac vông vinên ge, i ngɨdu xam xôn dɨ vông xam nɨlôm i yêp tibed i tɨyi xocbê môp wê Yesu Kɨlisi vông ge,  
\v 6 êdêc xam vɨhati hi vɨxam i pec ên Anutu, wê il lig Apumtau Yesu Kɨlisi ma ge.   
\s1 Kɨlisi xolac lam vô he Yuda hɨxôn tɨbii ba  
\p
\v 7 Xam hôm lime lec nivɨha i tɨyi xocbê Kɨlisi hôm il lec nivɨha ge, êdêc xam vông Anutu lê i vô levac.  
\v 8 A nêl bêga vô xam ên a nêbê Kɨlisi lam tu Yuda nên xomxo yuac dɨ hôm he lec, ên nêb ob vông kɨyang wê Anutu hɨlu vô bue ilage i vô nôn lec, ên he Yuda i xovô bê Anutu kɨyang ge kɨyang nôn.  
\v 9 Dɨ Kɨlisi nêb ob vông xomxo wê o Yuda lêm ge he êno i pɨmil Anutu ên wê i vông vɨzid vô he ge, tɨyi xocbê kɨyang wê yêp vac xolac bêga nêbê,  
\q1 “A ob pɨmil ông lêm vac tɨbii madɨluhu mahɨgun, dɨ a ob vông lɨlo dɨ hi vɨxag i pec ên ông.”   
\p
\v 10 Dɨ kɨyang ngwe yêp vac xolac bêga hɨxôn nêbê,  
\q1 “Xam wê xam o Yuda lêm ge, xam xêmyaa i vô nivɨha hɨxôn Anutu nue Yuda.”   
\p
\v 11 Dɨ kɨyang ti yêp vac xolac hɨxôn bêga nêbê,  
\q1 “Xam tɨbii ba, xam pɨmil Apumtau lê, dɨ xomxo vɨhati yang i hi vɨxa i pec ên Apumtau.”   
\p
\v 12 Dɨ plopet Aisaia kɨvuu kɨyang ti lec Kɨlisi mɨ i yêp bêga nêbê,  
\q1 “Xomxo ti obêc val vac he kɨdu ti wê nêb Jesi bue ge, dɨ xomxo tige ob tu tɨbii baba nên king hɨxôn dɨ viac he, om he baba ob vông i vin dɨ dô bin buc wê xomxo tige ob vông he vô nivɨha lec ge.”   
\p
\v 13 Nôn wê xam dɨbin ge, Anutu tu kehe, om obêc ngɨdu xam xôn dɨ vông xêyaa nivɨha hɨxôn kɨyang malehe i lam pup vac xam nɨlôm ên wê xam vông i vin ge. Dɨ xêkɨzêc wê Myakɨlôhô Ngɨbua vông ge i ngɨdu xam xôn, ên xam le pɨlihi vac vông vinên dɨ bin nôn wê xam ob tulec tɨmuên ge.   
\s1 Pol xêyaa vô nivɨha ên yuac sinale wê vông ge  
\p
\v 14 Xam lige, aca va xovô pyap ên a nêbê xam dô vac môp nivɨha, dɨ xovôên nivɨha pup vac xam nɨlôm tɨyi wê xam ob vông xovôên vô lime vông vinên ge.  
\v 15 Lêc kɨyang ya wê a kɨvuu vô xam ge, a kɨvuu xêkɨzêc dɨ a o xona lêm, ên a nêb xam pɨyôp i yêp seac. A vông bêge, ên Anutu vông vɨzid vô a  
\v 16 nêb a tu i nu yuac ti dɨ la nêl Yesu Kɨlisi kɨtong vô xomxo madɨluhu. Om yuac wê a vông ge tɨyi xocbê xomxo si daa vô Anutu ge, ên a la nêl Anutu xolac vô tɨbii wê o Yuda lêm gee, ên a nêb Myakɨlôhô Ngɨbua i vông he i tu xomxo ngɨbua tɨyi xocbê daa wê Anutu ob yê nivɨha ge.   
\p
\v 17 Yesu Kɨlisi ngɨdu a xôn om a xêgyaa vô nivɨha ên yuac wê a mi vông vô Anutu ge.  
\v 18 Om a ob nêl lec yuac baba lêm. Nge, a ob nêl lec wê Kɨlisi ngɨdu a xôn dɨ vông xêkɨzêc vô a om a dɨdii tɨbii wê o Yuda lêm gee mɨ la vô Anutu ên a nêb he i vô nɨnya lehe vô Anutu xolac. Om yuac tige, a vông ya kɨyang wê a mi nêl vô he ge, hɨxôn môp wê a mi vông vac he mahɨgun ge,  
\v 19 dɨ Anutu vông xêkɨzêc vô a om a vông do levac ya hɨxôn, dɨ xêkɨzêc wê Myakɨlôhô Ngɨbua vông ge ngɨdu a xôn. Mêgem a nêl Kɨlisi xolac vac vɨgwe Jelusalem dɨ vɨgwe yaya hɨxôn mɨ i la tɨyi vɨgwe Ililikam.  
\v 20 A vông yuac bêge, ên a nêb a ob la nêl xolac vô tɨbii madɨluhu wê gên o ngô Yesu xolac lêm ge, ên a nêb a ob la vông yuac vac vɨgwe wê xomxo la nêl xolac pyap vac ge lêm, ên ge obêc tɨyi xocbê a la lox xumac lec xomxo ngwe teac kɨsii ge.  
\v 21 Om a nêb a ob vông i tɨyi xocbê kɨyang wê yêp vac xolac bêga nêbê,  
\q1 “Xomxo wê gên o ngô Kɨlisi lê lêm ge, he ob yê i, dɨ he wê gên o ngô i xolac lêm ge, he ob ngô dɨ xovô.”   
\s1 Pol nêb ob la vɨgwe Lom yuu Spên  
\p
\v 22 Buc tɨbeac ge, yuac hôm a xôn om a o tɨyi wê a ob loc vô xam ge lêm.  
\v 23 Tɨyi klismas tɨbeac ge, a nêb a ob loc xê xam, lêc a o loc lêm. Dɨ gwêbaga a vông yuac vac vɨgwe tigae vɨhati pyap,  
\v 24 om a nêb a ob loc vô xam. Om buc wê a ob la vɨgwe Spên ge, od a ob mɨloc vô xam taxlee, dɨ il dô buc ya ên i vông a xêgyaa i vô nivɨha. Pyap dêc xam ngɨdu a xôn vac môp ên a la Spên.   
\p
\v 25 Lêc gwêbaga a ob la Jelusalem ên la ngɨdu lige wê Anutu nue gee xôn.  
\v 26 Ên xomxo vông vinên vac vɨgwe Masedonia yuu Glik ga nêl kɨyang pyap dɨ kɨtuc mone ên nêb ob vông i loc Jelusalem ên i loc ngɨdu he Yuda vông vinên wê nên susu maên ge xôn.  
\v 27 Heche va nêb he ob vông mone tige vô he Yuda, lêc mone tige wê he obêc hi myavɨwen wê he Yuda kô xolac mɨ la nêl vô he ilage. Vɨzid wê Anutu vông vô he Yuda ge la vô tɨbii baba hɨxôn dɨ vông he kɨnu hɨxôn nɨlô vô nivɨha lec, om gwêbaga he tɨbii baba ob vông vɨzid wê ninɨvi xe ge i la vô he Yuda ên i ngɨdu he xôn.   
\p
\v 28 Om a ob kô mone wê he Masedonia yuu Glik kɨtuc pyap ge dɨ kô mɨ la vông vô xomxo Jelusalem, dɨ yuac tige obêc pyap ge od a ob mɨloc vô xam dɨ la Spên.  
\v 29 Dɨ a xovô ên a nêbê a obêc loc vô xam ge od a obêc mɨloc hɨxôn vɨzid wê Kɨlisi vông ge ên i hɨvun xam xôn.   
\p
\v 30 Xam lige, xam tu il lig Apumtau Yesu Kɨlisi xe dɨ dô vac xêyaa vin lecên wê Myakɨlôhô Ngɨbua vông ge, om a nêl vô xam bê xam ngɨdu a xôn ya kɨtaaên. Xam kɨtaa xêkɨzêc vô Anutu ên i ngɨdu a xôn  
\v 31 dɨ i vô a vêl ên xomxo Judia wê hɨngoo Yesu xolac ge. Dɨ mone wê a ob kô mɨ la vông vô xomxo vông vinên Jelusalem ên a nêb i ngɨdu he xôn ge, xam kɨtaa vô Anutu ên he xêyaa i vin lec mone tige dɨ he i yê nivɨha.  
\v 32 Anutu obêc lee yuu ge od a obêc mɨloc vô xam hɨxôn xêgyaa nivɨha dɨ loc dô seac vêl hɨxôn xam.  
\v 33 Mêgem Anutu ti wê kɨyang malehe kehe ge, i dô hɨxôn xam vɨhati. Kɨyang nôn.   
\c 16  
\s1 Pol nêl vɨdiiên wê i vông ge la vô xomxo Lom  
\p
\v 1 A ob nêl vêx Pibi kɨtong vô xam, ên Pibi ge il lig vêx vông vinên wê mi vông yuac vac konglegesen wê dô vɨgwe Senklia ge.  
\v 2 Om Pibi obêc val vô xam ge od xam hôm i lec nivɨha ên wê i vông i vin Apumtau ge, ên môp tibêge môp nivɨha wê il xomxo vông vinên ob vông vôma ge. Dɨ vɨyin obêc tulec i ge od xam ngɨdu i xôn, ên i ge wê mi ngɨdu xe xomxo tɨbeac xôn.   
\p
\v 3 Xam nêl vɨdiiên i loc vô Plisila yuu lɨya Akwila, wê xen xôn vông yuac wê Yesu Kɨlisi vông ge.  
\v 4 Ên yuu ge wê yuu ngɨdu a xôn om tɨbii hôm yuu xôn nêb ob hi yuu yib, lêc he o hi yuu yib lêm. Om a hi vɨxag i pec ên yuu, lêc o aca va tibed lêm. Nge, tɨbii vông vinên wê o Yuda lêm ge, he êno, he vɨhati hi vɨxa pec ên yuu hɨxôn.  
\v 5 Om xam nêl vɨdiiên i loc vô he vông vinên wê mi kɨtucma vac yuu ben ge.  
\p Dɨ xam nêl vɨdiiên i loc vô Epinitas wê a xêgyaa vin lec i ge, ên i ge wê vông i vin taxlee vac vɨgwe Esia ge.   
\p
\v 6 Dɨ xam nêl vɨdiiên i loc vô Malia wê vông yuac levac ên nêb ob ngɨdu xam xôn ge.   
\p
\v 7 Dɨ xam nêl vɨdiiên i loc vô Andlonikas yuu Junias. Yuu ge a lige Yuda wê xen xôn dô vac kalabuhu lec xolac wê xen mi nêl ge. Yuu vông i vin tax, dɨ a vông i vin tɨmuên, dɨ sinale vɨyang vɨyang xovô yuu nêb yuu xomxo nivɨha.   
\p
\v 8 Dɨ xam nêl vɨdiiên i loc vô a lig vông vinên Amplietas wê a xêgyaa vin lec i ge.   
\p
\v 9 Dɨ xam nêl vɨdiiên i loc vô Eban wê mi vông Kɨlisi yuac hɨxôn il ge. Dɨ xam nêl vɨdiiên i loc vô Stekis hɨxôn, ên i ge wê a xêgyaa vin lec i.   
\p
\v 10 Dɨ xam nêl vɨdiiên i loc vô Apelis wê vông i vin Kɨlisi nôn.  
\p Dɨ xam nêl vɨdiiên i loc vô Alistobyulas hɨxôn he wê dô vac i ben ge.   
\p
\v 11 Dɨ xam nêl vɨdiiên i loc vô Helodion wê a lig Yuda ti.  
\p Dɨ xam nêl vɨdiiên i loc vô Nasisas hɨxôn xomxo vac i ben wê he vông i vin Apumtau ge.   
\p
\v 12 Dɨ xam nêl vɨdiiên i loc vô vêx yuu Tlaipina yuu Tlaiposa wê yuu vông yuac levac vô Apumtau ge.  
\p Dɨ xam nêl vɨdiiên i loc vô Pesis wê a xêgyaa vin lec i nôn ge, ên i ge wê vông yuac tɨbeac vô Apumtau.   
\p
\v 13 Dɨ xam nêl vɨdiiên i loc vô Lupas wê vông i vin xêkɨzêc dɨ vông yuac vô Apumtau ge, dɨ ta êno hɨxôn, ên i ge tɨyi xocbê a tag.   
\p
\v 14 Dɨ xam nêl vɨdiiên i loc vô Asinklitas, Pligon, Hemis, Patlobas, dɨ Hemas, hɨxôn lie vông vinên wê dô hɨxôn he ge.   
\p
\v 15 Dɨ xam nêl vɨdiiên i loc vô Pilologas yuu Julia, dɨ Nelias hɨxôn li vêx, dɨ Olimpas, hɨxôn lie vông vinên vɨhati wê dô hɨxôn he ge.   
\p
\v 16 Xam pulma vɨgêm ên i nêl xam kɨtong bê xam xêmyaa vin lecma.  
\p Konglegesen vac vɨgwe gae vɨhati nêl vɨdiiên i loc vô xam.   
\s1 Pol nêl kɨyang lec xomxo wê xolac kɨtyooên ge  
\p
\v 17 Xam lige, a nêl vô xam bê xam viac xam ên xomxo wê nêl xolac so xolac wê xam ngô ilage, ên kɨyang tibêge ob vông xam le kɨtyê kɨtyê dɨ ngaênma lec xolac dɨ obêc vông xam sea vông vinên wê xam vông ge, om xam le teva ên he.  
\v 18 Ên xomxo tigee o vông nɨlô la vô il lig Apumtau Kɨlisi lêm. Nge, he vông nɨlô la vô môp nipaên wê heche va xovô ge, dɨ he mi nêl kɨyang hɨzi nivɨha yang vô xomxo om kɨtyoo he wê vyac xovôên ma gee.  
\v 19 Môp wê xam vông ge vông a nɨlôg vô nivɨha, ên xomxo vɨyang vɨyang ge xovô ên he nêbê xam tɨmu vô Yesu xolac. Lêc gwêbaga a nêb a ob nêl vô xam bê xam lêc vyac xovô môp wê nivɨha ge dɨ xam o lêc xo môp wê nipaên ge lêm.  
\v 20 Dɨ buc vô kwabo lec wê Anutu ti wê kɨyang malehe kehe ge ob kê Seten la vac xam kwa ngɨbi dɨ hi i hɨbu sea lutibed.  
\p Vɨzid yuu xêyaa vin lecên wê il lig Apumtau Yesu vông ge i loc vô xam vɨhati.   
\s1 Xomxo wê dô hɨxôn Pol ge nêl vɨdiiên la vô xomxo Lom  
\p
\v 21 Timoti wê mi vông yuac hɨxôn a ge dɨ Lusias yuu Jeson hɨxôn Sosipata, wê a lige Yuda ge, he nêl vɨdiiên vô xam.   
\p
\v 22 Dɨ a Tetias, wê a kɨvuu Pol mya wê nêl ga, a nêl vɨdiiên vô xam ên wê il xôn vông i vin Apumtau lê ge.   
\p
\v 23 Dɨ Gaias nêl vɨdiiên vô xam. Gaias ge wê viac a nivɨha vac ben, dɨ mi viac xomxo vông vinên tɨbeac hɨxôn.  
\p Elastas wê mi viac mone wê gavman mi kô vac vɨgwe ga ge yuu Kwotas wê il lig ge, yuu nêl vɨdiiên vô xam.   
\p
\v 24 [Vɨzid yuu xêyaa vin lecên wê il lig Apumtau Yesu Kɨlisi vông ge i loc viac xam. Nôn.]   
\s1 Il ob pɨmil Anutu ên vông i lê i vô levac  
\p
\v 25 Anutu tɨyi wê ob vông xam le xêkɨzêc vac xolac wê a mi nêl ge. Xolac tiga nêl lec Yesu Kɨlisi. Xolac tige yêp xôpacên ilatɨkwê, lêc gwêbaga Anutu vông i lam yêp seac.  
\v 26 Dɨ Anutu wê dô luta ge nêl om xe la nêl kɨyang wê plopete kɨvuu ilage vô tɨbii vɨyang vɨyang ge vɨhati, ên xe nêb plopete kɨyang i nêl xolac kɨtong i yêp seac vô he ên he i ngô dɨ vông i vin.  
\v 27 Anutu tibed ge i xovôên kehe, om il ob xovô yuac wê Yesu Kɨlisi vông ge dɨ il ob pɨmil Anutu lê i vô levac dɨ i yêp luta lêc luta. Kɨyang nôn.