\id 2TI - Patep NT [ptp] -Papua New Guinea 1986 (DBL 2014) 
\h 2 TIMOTI 
\toc1 Pol kɨvuu kɨpihac wê vông yuu ge la vô Timoti 
\toc2 2 Timoti 
\toc3 2 Tim 
\mt1 2 TIMOTI  
\mt2 Pol kɨvuu kɨpihac wê vông yuu ge  
\mt2 la vô Timoti  
\c 1  
\p
\v 1 A, Pol, Anutu vɨnoo a ên nêb a tu Yesu Kɨlisi nu sinale. Ilage Anutu hɨlu kɨyang pyap bêga ên nêbê xomxo wê vông i vin Yesu ge obêc dô mavɨha luta lêc luta. Om Anutu xovô kɨyang wê hɨlu pyap ge dɨ vông yuac sinale vô a ên nêb a la nêl Yesu Kɨlisi kɨyang kɨtong.   
\p
\v 2 Timoti, a kɨvuu kɨpihac tiga vô ông. Ông ge a nug vông vinên wê a xêgyaa vin lec ông ge. Mag Anutu hɨxôn il lig Apumtau Yesu Kɨlisi, yuu i xo vɨgwe pɨsiv ên ông dɨ vông vɨzid nivɨha hɨxôn kɨyang malehe i loc vô ông.   
\s1 Il nid ob yoc ên xolac lêm  
\p
\v 3 A mi tɨmu vô Anutu môp dɨ vông i yuac tɨyi xocbê a mage buge vông ilage, dɨ nipaên ti o yêp vac a nɨlôg lêm. Timoti, a xo ông dɨ a pɨmil Anutu ên ông vac kɨtaaên wê a kɨtaa vɨdiiên yuu bucên vɨhati ge.  
\v 4 Dɨ a xo wê ông byag vô buc wê a sea ông ge, om a nêb a ob lôc vô ông i tii vac ên i vông a nɨlôg i vô nivɨha.  
\v 5 A xovô ên a nêbê vông vinên wê ông vông ge nôn dɨ o kɨtyooên lêm. Ilage ông bum vêx Lois yuu tam Yunis vông i vin tibêge, om a xovô ên a nêbê gwêbaga vông vinên wê ông vông ge tɨyi xocbê yuu vông ge.  
\v 6 Om a ob nêl vô ông bê ông xovô xêkɨzêc wê Anutu vông vô ông ilage i tii vac. Ông kô xêkɨzêc tige vô buc wê a vyax vɨgêg lec ông ge. Om gwêbaga ông kô xêkɨzêc tige dɨ vông yuac ya.  
\v 7 Ên Anutu o vông môp xonaên vô il lêm. Nge, vông xêkɨzêc wê i vông ge vô il dɨ vông môp xêyaa vin lecên vô il, dɨ vông il nɨlôd xovô môp yuu kɨyang nivɨha ên nêb il tɨmu vô.   
\p
\v 8 Anutu vông xêkɨzêc wê i vông ge vô il, om ông nim i o lêc yoc ên Apumtau Anutu kɨyang wê ông ob nêl ge lêm. Dɨ ông nim i o lêc yoc ên a ên wê tɨbii tung a lam dô vac kalabuhu lec Apumtau lê ge lêm. Nge, ông kɨlê vɨyin lec xolac hɨxôn a, dɨ le xêkɨzêc vac vɨyin tige ya xêkɨzêc wê Anutu vông vô ông ge.  
\v 9 Anutu vô il vêl ên il nêd nipaên dɨ tyuc il ên nêb il tɨmu vô môp ngɨbua wê i vông ge. Lêc o vô il vêl ên il nêd nipaên ên yuac ti wê il vông ge lêm. Nge, ilage wê Anutu gên o tung lag yuu kɨbun lêm ge, od ici va xo vɨgwe pɨsiv ên il dɨ xovô pyap ên nêb Yesu Kɨlisi ob yib ên il nêd nipaên.  
\v 10 Dɨ gwêbaga môp wê Anutu xo vɨgwe pɨsiv ên il ge yêp seac vô il, ên wê Yesu Kɨlisi lam yib dɨ vô il vêl ên il nêd nipaên ge. Yesu kɨtya xêkɨzêc wê yibên vông ge vêl dɨ vông xolac nivɨha vô il ên nêb kɨyang wê nêbê il ob dô madvɨha luta ge i yêp seac vô il.   
\p
\v 11 Anutu vɨnoo a ên nêb a tu sinale dɨ la nêl xolac vô xomxo dɨ tɨxuu he ya xolac tige.  
\v 12 A vông yuac tibêge om tɨbii vông vɨyin wê a tulec gwêbaga ge vô a. Lêc a nig o yoc ên vɨyin tige lêm, ên a xovô xomxo ti wê a vông i vin i ge, dɨ a xovô ên a nêbê xomxo tyo tɨyi wê ob viac yuac wê vông vac a vɨgêg ge i tɨyi buc vɨhati dɨ i mɨloc vô buc wê Yesu obêc vena lec ge.   
\p
\v 13 Ông tɨmu vô kɨyang nôn wê a nêl vô ông mɨ ông ngô ge, dɨ vông i vin Yesu Kɨlisi xêkɨzêc ta, dɨ ông xêmyaa i vin lec i, ên ông tu Kɨlisi xe pyap.  
\v 14 Myakɨlôhô Ngɨbua dô vac il nɨlôd, om ông viac kɨyang nôn wê Anutu vông vac ông vɨgêm ge i nivɨha ya xêkɨzêc wê Myakɨlôhô Ngɨbua vông ge.   
\p
\v 15 Timoti, ông xovô pyap ên ông nêbê Piselas yuu Hemosenis hɨxôn xomxo vông vinên vɨhati wê dô vac vɨgwe levac Esia ge, he sea a.  
\v 16 Lêc Onesipolas ge, a kɨtaa vô Apumtau lec i bêga bê i xo vɨgwe pɨsiv ên Onesipolas yuu vɨnê dɨ nue, ên mi ngɨdu a xôn dɨ vông a nɨlôg vô nivɨha lu tɨbeac dɨ ni o yoc ên wê a lam dô vac kalabuhu ga lêm.  
\v 17 Nge, buc wê Onesipolas val vɨgwe Lom ga ge od vông yuac levac lec myagên a mɨ val yêvô a.  
\v 18 Om a kɨtaa vô Apumtaubêga bê i xo vɨgwe pɨsiv ên Onesipolas vô buc tɨmuên wê Yesu obêc vena ge. Ông xovô pyap ên ông nêbê buc ilage wê a la dô Epesas ge Onesipolas mi ngɨdu a xôn ya môp nivɨha tɨbeac.   
\c 2  
\s1 Il tɨyi xocbê Yesu Kɨlisi nue vevac  
\p
\v 1 A nug Timoti, Yesu Kɨlisi vông vɨzid nivɨha vô ông pyap om ông hôm vɨzid wê i vông ge xôn pɨlihi dɨ le xêkɨzêc ya.  
\v 2 Kɨyang vɨhati wê a nêl vô xomxo tɨbeac dɨ ông ngô hɨxôn ge, ông vông kɨyang tigee vô xomxo wê ob ngô dɨ viac nivɨha ge ên he i loc nêl kɨyang tigee vô xomxo ya ên he i ngô hɨxôn.   
\p
\v 3 Ông le xêkɨzêc i tɨyi xocbê Yesu Kɨlisi nu vevac ti wê vông i yuac nivɨha ge, dɨ ông kɨlê vɨyin hɨxôn xe lec yuac tige.  
\v 4 Xomxo ti wê kô yuac vevac ge ob vông yuac bangwe hɨxôn lêm. Nge, ob vông nɨlô vô yuac vevac tibed ên nêb tɨbii levac wê viac i ge i yê yuac wê i vông ge nivɨha.  
\v 5 Dɨ xomxo ti obêc nêb tup mɨ ngɨnoo ge od ob tup i tɨyi môp wê ob kô nôn ge. Ên obêc ma ge od ob mɨla kô nôn wê tup ên ge lêm.  
\v 6 Dɨ xomxo ti obêc xin vê vac yuac dɨ viac yuac nivɨha ge od ob kô nôn mɨ ya tax.  
\v 7 Om ông xovô kɨyang tiga wê a nêl ga, ên Apumtau ob vông xovôên vô ông ên ông xovô kɨyang vɨhati kehe.   
\p
\v 8 Ông xovô kɨyang lec Yesu Kɨlisi i tii vac. Yesu pum lec Devit dɨ yib dɨ kɨdi lec mavɨha vac yibên. Kɨyang tiga xolac nivɨha wê a mi nêl ge.  
\v 9 Lêc tɨbii yê a nipaên ên xolac tige, om vông vɨyin vô a dɨ ku a xôn ya sen dɨ vông a lam dô vac kalabuhu ga tɨyi xocbê tɨbii nipaên ti. Lêc he tɨyiên ma wê he ob ku Anutu kɨyang xôn ge.  
\v 10 Mêgem a le xêkɨzêc ta vac vɨyin, ên a nêb xomxo wê Anutu vɨnoo he ên nêb he i tu i nue ge he i ngô xolac dɨ vông i vin Yesu Kɨlisi dɨ dô mavɨha hɨxôn i vac Anutu ben lag puunê luta lêc luta.   
\p
\v 11 Kɨyang tiga nôn bêga ên nêbê  
\q1 “Il obêc xib hɨxôn i ge od il obêc dô madvɨha hɨxôn i.  
\v 12 Il obêc le xêkɨzêc vac vɨyin ge od il ob tu levac mɨ dô hɨxôn i. Lêc il obêc yax i vun ge od i êno ob yax il vun.  
\v 13 Il obêc sea vông vinên wê il vông ge od i ob sea il lêm, ên o tɨyi wê ob pɨlepac kɨyang wê i vông ge lêm.”   
\s1 Xomxo wê vông Anutu yuac vô nivɨha ge  
\p
\v 14 Ông nêl kɨyang tige vô xomxo ên he i xovô i tii vac nang, dɨ ông le Apumtau manôn dɨ nêl vô he bê he i o lêc vông vevac vôma lec kɨyang vaxvax lêm, ên môp tibêge ob vô nôn nivɨha vô he lêm. Nge, ob vông he wê ngô kɨyang tige vô nipaên.   
\p
\v 15 Ông vông yuac nivɨha ên Anutu i yê ông nivɨha i tɨyi xocbê i nu yuac ti wê ông nêl xolac wê nôn ge bôbac dɨ ông nim o yoc ên yuac tige lêm ge.  
\v 16 Ông kol ông ên kɨyang vaxvax wê nôn maên ge. Ên kɨyang tige ob dɨdii xomxo la vac nipaên dɨ he ob vô nɨmi vô Anutu kɨyang, dɨ ob vông môp tige vô levac.  
\v 17 Kɨyang nipaên wê he nêl ge ob vô levac tɨyi xocbê kɨtyax wê ob vô levac mɨ ya xomxo ninɨvi ma vêl ge. Haimenias yuu Pailitas, yuu mi vông bêge.  
\v 18 Yuu sea kɨyang nôn dɨ nêl kɨyang kɨtyooên bêga ên nêbê, “Il kɨdi lec vac yibên pyap.” Yuu mi nêl bêge mɨ xomxo vông vinên ya ngô, om vông vinên wê he vông ge vô nipaên.  
\v 19 Lêc Anutu xolac le xêkɨzêc xocbê teac le xêkɨzêc ge. Xolac bo ti nêl bêga ên nêbê, “Apumtau xovô xomxo wê tu i nue ge pyap.” Dɨ ngwe nêl bêga ên nêbê, “Xomxo ti obêc nêl ên nêbê i tu Apumtau nu ti ge od i vô nɨmi vô môp nipaên vɨhati.”   
\p
\v 20 Vac xumac levac ti pɨle yuu dêg wê silva yuu gol ge vaci o dô vac lêm. Nge, dêg kɨbun yuu pɨle xax le vac hɨxôn. Dêg yuu pɨle ya vông yuac nivɨha, dɨ ya dô vaxvax.  
\v 21 Mêgem xomxo vông vinên ti  
\p obêc vô nɨmi vô kɨyang yuu môp nipaên dɨ dô nivɨha ge od tɨyi xocbê pɨle yuu dêg wê vông yuac nivɨha ge, ên xomxo tige vông nɨlô la vô Apumtau dɨ viac i pyap tɨyi wê ob vông yuac nivɨha wê Apumtau vông vô i ge vɨhati.   
\p
\v 22 Om ông le teva ên môp nipaên vɨhati wê yêp vac xam ngɨvihi nɨlôm ên xam nêb xam ob vông ge. Dɨ ông vông nɨlôm i loc vô môp nivɨha, dɨ môp vông vinên, dɨ môp xêyaa vin lecên, dɨ môp malehe hɨxôn. Om ông hɨxôn xomxo vɨhati wê xam xôn nɨlôm vô paha lec dɨ xam kɨtaa vô Apumtau ge, xam vɨhati tɨmu vô môp tibêgee.  
\v 23 Ông kol ông ên kɨyang vaxvax wê xovôên nivɨha ti o yêp vac lêm ge, ên kɨyang tibêge wê ob vông xomxo kunacma dɨ vông vevac vôma.  
\v 24 Xomxo ti obêc tu Apumtau nu yuac ge od i o vông vevac vô xomxo ya kɨyang lêm. Nge, i lum nêl kɨyang vô xomxo dɨ tɨxuu he i nivɨha ya xolac, dɨ xêyaa i o vô myavɨnê vô xomxo wê vông vɨyin vô i ge lêm,  
\v 25 dɨ i lum nêl kɨyang vô he wê vông vevac vô xolac ge dɨ tɨtô he, ên mêd Anutu ob vông he pɨlepac he dɨ he ob xovô kɨyang nôn.  
\v 26 Ilage Seten ku he xôn vac leac wê i vông ge dɨ vông he tɨmu vô ici va kɨyang. Lêc he obêc xovô Anutu kɨyang nôn ge od he pɨyôp obêc yêp nivɨha dɨ he ob sea leac wê Seten ku he xôn ya ge.   
\c 3  
\s1 Môp nipaên wê ob val vô buc tɨmuên ge  
\p
\v 1 Ông xovô bêga bê vô buc myahɨpu ge od vɨyin tɨbeac obêc val.  
\v 2 Ên xomxo ob tɨmu vô môp nipaên bêga nêbê he ob xovô heche va, dɨ he ob doma vô mone, dɨ he ob yong heche va lê, dɨ he ob kô he lec vô xomxo, dɨ he ob nêl xomxo lê nipaên, dɨ he ob vô nɨnya kɨtu vô tae mae, dɨ he ob pɨmil xomxo wê ngɨdu he xôn ge lêm, dɨ he ob la vac Anutu kɨyang kwa ngɨbi lêm,  
\v 3 dɨ he ob vông nivɨha vô lie lêm, dɨ he xêyaa ob vô myavɨnê lec kɨyang dɨ hôm xôn, dɨ he ob nêl kɨyang nɨmi vaxvax, dɨ he ob kol he ên môp nipaên wê he ninɨvi xovô ge lêm, dɨ he ob vông xomxo vô nipaên, dɨ he ob vông vevac vô môp nivɨha vɨhati,  
\v 4 dɨ he ob kɨtyoo lie dɨ vông he la vac xomxo nipaên vɨgê, dɨ he ob tɨmu vô pɨyôp nipaên wê he vông ge lutibed, dɨ he ob xovô heche va ên nêbê he xomxo levac, dɨ he xêyaa ob vin lec Anutu lêm. Nge, he xêyaa ob vin lec môp toto wê ninɨvi xovô ge,  
\v 5 dɨ he ob yê da dɨ kɨtaa lê, lêc he nêl vac mya pɨleva, ên he vô nɨmi vô Anutu hɨxôn xêkɨzêc wê i vông ge. Timoti, ông le teva ên he wê mi vông môp nipaên tibêgee.  
\v 6 Ên he ya nêl xolac kɨtyooên vô vêx wê o vông i vin xêkɨzêc lêm ge. Vêx tigee mi vông môp nipaên wê vông he nɨlô vô vɨyin ge, dɨ he vông pɨyôp la vô kɨyang nipaên tɨbeac.  
\v 7 Vêx tigee mi ngô kɨyang vɨyang vɨyang ge ên nêb he ob kô xovôên lec, lêc he o tɨyi wê he ob xovô kɨyang nôn ge lêm.  
\v 8 Ilage vux yuu lê nêbê Janis yuu Jamblis, yuu vông vevac vô Moses vac vɨgwe Isip. Dɨ gwêbaga xomxo tigee wê nêl kɨyang kɨtyooên vô vêx ge he tɨyi xocbê Janis yuu Jamblis, ên he vông vevac vô kɨyang nôn, dɨ pɨyôp wê he vông ge vô nipaên dɨ he sea vông vinên wê nôn ge.  
\v 9 Lêc môp kɨtyooên wê he vông ge ob vô levac lêm. Ên xomxo ob yê môp wê he vông ge ên nêbê môp yacyac, tɨyi xocbê xomxo yê môp wê Janis yuu Jamblis vông ilage ên nêbê môp yacyac.   
\s1 Pol nêl vô Timoti ên nêb i hôm Anutu kɨyang xôn pɨlihi  
\p
\v 10 Ông dô hɨxôn a ila, om ông xovô kɨyang pyap wê a tɨxuu xomxo ya ge, dɨ ông xovô môp vɨhati wê a mi tɨmu vô ge, dɨ pɨyôp wê a vông ge, dɨ môp vông vinên wê a vông ge, dɨ ông xovô wê a mi lum nêl kɨyang malehe vô xomxo, dɨ a xo vɨgwe pɨsiv ên he, dɨ a le xêkɨzêc dɨ kɨlê vɨyin vɨhati,  
\v 11 dɨ ông xovô môp nipaên vɨhati wê tɨbii vông vô a ge hɨxôn vɨyin levac wê tulec a vac vɨgwe Antiok yuu Aikoniam yon Listla ge. A tulec vɨyin yuu myavɨnê mabu yocên, lêc Apumtau vô a vêl ên vɨyin tigee vɨhati.  
\v 12 Vɨxôhɨlôg nôn, tɨbii ob vông vɨyin yuu myavɨnê vô xomxo vɨhati wê nêb ob tɨmu vô môp wê Yesu Kɨlisi vông ge.  
\v 13 Dɨ xomxo nipaên hɨxôn xomxo kɨtyooên ob vông môp nipaên vô levac, dɨ nipaên wê he vông ge ob vɨyum he xôn, dɨ he ob kɨtyoo xomxo tɨbeac, lêc Seten ob kɨtyoo he.   
\p
\v 14 Lêc ông mô, kɨyang nôn wê ông kô dɨ vông i vin xêkɨzêc ge, ông hôm kɨyang tige xôn pɨlihi, ên ông xovô xe vêx yuu vux wê xe tɨxuu ông ya kɨyang tige,  
\v 15 dɨ ông xovô ên ông nêbê ilage ông gên dô nipwo, lêc ông kô xovôên lec Anutu kɨyang dɨ i val tyip lec gwêbaga hɨxôn. Anutu kɨyang tɨyi wê ob vông xovôên vô xomxo ên he i vông i vin Yesu Kɨlisi dɨ i kɨtya he nên nipaên vêl.  
\v 16 Anutu kɨyang vɨhati wê yêp vac kɨpihac xolac ge, Anutu vaci vông vô xomxo mɨ he kɨvuu. Anutu kɨyang tige nivɨha tɨyi wê ob vông xovôên vô il, dɨ ob hɨlung il nêd nipaên vô il, dɨ ob tɨtô môp wê il vông ge, dɨ ob tɨxuu il ya môp wê Anutu yê nêb nivɨha ge.  
\v 17 Om Anutu vông xolac vô il ên nêb i vông xovôên yuu xêkɨzêc vô il wê Anutu nue ge tɨyi wê il ob vông yuac nivɨha vɨhati ya ge.   
\c 4  
\s1 Pol nêl vô Timoti ên nêb i nêl Anutu xolac nôn kɨtong  
\p
\v 1 Yesu Kɨlisi obêc yaxên xomxo vɨhati nên kɨyang, he wê dô mavɨha hɨxôn he wê yib ge, dɨ Yesu Kɨlisi ob vena le seac dɨ tu xomxo vɨhati nên levac wê ob viac he luta ge. Om a le vô Anutu yuu Yesu Kɨlisi manôn dɨ a nêl vô ông bêga bê  
\v 2 ông nêl Anutu kɨyang i tɨyi buc vɨhati, dɨ xomxo ob nêb ngô me ngôên obêc ma ge od ông nêl xolac vô he. Ông nêl xolac vô he i tɨyi wê he ob ngô mɨ xovô dɨ vông i vin, dɨ ông nêl he nên nipaên kɨtong vô he ên i kɨtiv he nɨlô dɨ he i pɨlepac he vêl ên môp nipaên wê he vông ge, dɨ ông nêl kɨyang wê ob ngɨdu he xôn ge, dɨ môp wê ông ob lum nêl kɨyang vô xomxo dɨ tɨxuu he ya xolac ge, le i lêc sea môp tige lêm.  
\v 3 Ên obêc buc tɨmuên ge od xomxo ob nêb ngô kɨyang nôn lêm. Nge, he ob tɨmu vô môp wê heche va xovô ge, dɨ vɨnoo xomxo wê ob tɨxuu he ya kɨyang vaxvax wê he ngô nêb nivɨha ge.  
\v 4 Dɨ he ob vô nɨmi vô kɨyang nôn dɨ vô nɨnya vô kɨyang wê pɨvulac pɨleva ge.  
\v 5 Lêc ôcông va, ông pɨyôp i yêp nivɨha i tɨyi buc vɨhati, dɨ ông kɨlê vɨyin, dɨ ông loc nêl Kɨlisi kɨyang vô tɨbii madɨluhu ên he i ngô dɨ vông i vin. Yuac wê Anutu vông vac ông vɨgêm ge, ông vông yuac tigee vɨhati i vô nôn lec.   
\p
\v 6 Ên a ga, tɨbii madɨluhu nêb ob hi a xib, om a hi ob kɨpyax sea dɨ a ob tu xocbê daa vô Anutu. Om buc wê a ob xib dɨ sea kɨbun ga ge vô kwabo lec.  
\v 7 Vevac nivɨha wê a vông ya xolac ge, a vông pyap. A tup vac môp vông vinên dɨ la tɨyôô lec myahɨpu. Dɨ a o sea vông vinên wê a vông ge lêm. Nge, a hôm xôn pɨlihi.  
\v 8 Om Apumtau viac nôn nivɨha pyap ên nêb a ob kô. Nôn tige bêga nêbê i ob yê a nêb a xomxo nivɨha. Om Apumtau wê yaxên xomxo ya môp bôbac ge obêc vông nôn tige vô a vô buc wê obêc vena lec ge. Lêc ob vông vô aca va tibed lêm. Nge, ob vông vô xomxo vɨhati wê he xêyaa vin lec ên nêb he ob yê i vô buc wê obêc vena lec ge.   
\s1 Kɨyang vɨwen tɨmuên  
\p
\v 9 Timoti, ông seb lam vô a lutibed,  
\v 10 ên Klesens la vɨgwe Galesia, dɨ Taitas la vɨgwe Dalmesia. Dimas vông nɨlô la vô susu kɨbun ga om sea a dô dɨ la vɨgwe Tesalonaika.  
\v 11 Luk tibed wê dô hɨxôn a. Om ông loc kô Mak dɨ muu lam vô a, ên Mak tɨyi wê ob ngɨdu a xôn vac yuac ge.  
\v 12 Tikikas ge, a vông i la Epesas.   
\p
\v 13 Ilage wê a la vɨgwe Tloas ge od a sea a saket levac dô vac Kapas ben. Om buc wê ông obêc lam vô a ge od ông loc kô a saket tige mɨ lam, dɨ kô a kɨpihac hɨxôn, dɨ le i lêc lungên a kɨpihac wê he vông ya bwoc ninɨvi ge lêm. Nge, ông kô kɨpihac vɨhati mɨ lam hɨxôn.   
\p
\v 14 Aleksanda wê vông yuac lec ain siên ge vông nipaên levac vô a, om Anutu obêc vông myavɨwen nipaên vô i lec nipaên wê i vông vô a ge.  
\v 15 Om ông êno, ông viac ông ên xomxo tige, ên xêyaa vô myavɨnê ên nêb ob le vac kɨyang nivɨha wê il mi nêl ge xôn.   
\p
\v 16 Vô buc wê a la le vac kot taxlee ge, xomxo ti o le hɨxôn a dɨ nêl kɨyang wê ob ngɨdu a xôn ge lêm. Nge, he vɨhati sea a dô. Mêlêc a kɨtaa vô Anutu ên a nêbê i kɨtya he nên nipaên wê he vông vô a ge vêl.  
\v 17 He vɨhati sea a mɨ la, lêc Apumtau dô hɨxôn a dɨ vông xêkɨzêc wê i vông ge vô a, om a nêl Kɨlisi xolac vɨhati yêp seac dɨ tɨbii madɨluhu wê lam le vac kot ge vɨhati ngô. Om tɨyi xocbê Anutu vô a vêl ên noo laion mya.  
\v 18 Apumtau obêc vô a vêl ên nipaên vɨhati wê xomxo nêb ob vông vô a ge, dɨ obêc kô a mɨ la vac ben lag puunê dɨ obêc viac a luta. Om il ob pɨmil i lê i yêp luta lêc luta. Nôn.   
\p
\v 19 Ông nêl vô Akwila yuu vɨnê Plisila hɨxôn Onesipolas he vɨnê nue bêga bê a nêl vɨdiiên vô he.  
\v 20 Elastas gên dô vac vɨgwe Kolin, dɨ Tlopimas vông yidac ti om a sea i vac vɨgwe Mailitas mɨ i dô.  
\v 21 Ông seb lam vô a lutibed, dɨ le i lêc bin buc wê lun yuu ningɨgooên ob val lec ge lêm. Yubyulas yuu Pyudens dɨ Lainas yuu Klodia hɨxôn lime vông vinên vɨhati vac vɨgwe tiga, he nêl vɨdiiên vô ông.   
\p
\v 22 Apumtau i ngɨdu ông xôn, dɨ vɨzid nivɨha wê i vông ge i viac xam vɨhati.