\id 2TH - Patep NT [ptp] -Papua New Guinea 1986 (DBL 2014) 
\h 2 TESALONAIKA 
\toc1 Pol kɨvuu kɨpihac wê vông yuu ge la vô tɨbii Tesalonaika 
\toc2 2 Tesalonaika 
\toc3 2 Tes 
\mt1 2 TESALONAIKA  
\mt2 Pol kɨvuu kɨpihac wê vông yuu ge  
\mt2 la vô tɨbii Tesalonaika  
\c 1  
\p
\v 1 A, Pol, xen Sailas yuu Timoti, xen kɨvuu kɨyang ga vô xam Tesalonaika wê xam vông i vin Yesu ge. Xam tu il Mag Anutu yuu Apumtau Yesu Kɨlisi xe pyap.   
\p
\v 2 Mag Anutu yuu Apumtau Yesu Kɨlisi yuu i vông xam dô vac vɨzid nivɨha dɨ vông kɨyang malehe i hɨvun xam xôn.   
\s1 Pol pɨmil Anutu  
\p
\v 3 Xam lige, xe nɨlôm kɨdu xe om xe pɨmil Anutu ên xam tɨyi buc vɨhati. Môp tige môp bôbac, ên vông vinên wê xam vông ge dɨyêp xêkɨzêc dɨ vô levac tɨyi buc vɨhati, dɨ xam toto xêmyaa mi vin lecma nôn, dɨ môp xêmyaa vin lecên tige dɨvô levac vac xam mahɨgun tɨyi buc vɨhati.  
\v 4 Mêgem xe yong xam lêm vô levac vac konglegesen vɨyang vɨyang ge bêga ên xe nêbê xomxo vông vɨyin yuu myavɨnê levac vô xam lec wê xam vông i vin ge, lêcom xam le xêkɨzêc ta dɨ kɨlê vɨyin dɨ hôm vông vinên wê xam vông ge xôn pɨlihi.   
\s1 Anutu yaxên il ya môp bôbac  
\p
\v 5 Xam mi le xêkɨzêc ta vac vông vinên, om xam môp bêge nêl xam kɨtong ên nêbê Anutu yaxên xam ya môp bôbac, om gwêbaga xam kô vɨyin levac ên wê xam tu Anutu nue ge, lêcom vɨyin tige ob vông xam vô nivɨha tɨyi wê xam ob la dô vac Anutu ben lag puunê ge.  
\v 6 Dɨ Anutu ob vông môp bôbac ngwe hɨxôn bêga bê ob vông myavɨwen nipaên vô he wê vông vɨyin vô xam ge,  
\v 7 dɨ ob vô vɨyin vêl ên xam, dɨ ob vông il xôn dô seac vêl vô buc tɨmuên wê Apumtau Yesu hɨxôn angela xêkɨzêc wê i vông ge obêc sea ben lag puunê dɨ lop mɨ lam le seac ge. He ob lam hɨxôn ngwax mahelac levac,  
\v 8 dɨ ob vông myavɨwen nipaên vô xomxo wê lungên Anutu gee hɨxôn he wê vô nɨnya kɨtu vô il Apumtau Yesu xolac gee.  
\v 9 Om he ob kô myavɨwen nipaên bêga bê Apumtau obêc ngɨloo he la vêl tevabanê ên i manôn hɨxôn xêkɨzêc levac yuu xêseac wê i vông ge, om he ob la dô vac nipaên luta lêc luta  
\v 10 vô buc tɨmuên wê Kɨlisi obêc lop mɨ lôm ge. Vô buc tige xomxo wê vông i vin dɨ tu i nue gee vɨhati ob nêl Yesu lê vô levac dɨ pɨmil i hɨxôn xêyaa nivɨha yang. Mêgem xam êno ob vông bêge ên xam vông i vin Anutu kɨyang wê xe nêl vô xam ilage.   
\s1 Pol kɨtaa vô Anutu lec tɨbii Tesalonaika  
\p
\v 11 Xe xovô ên xe nêbê xe nêl xolac vô xam ilage dɨ xam vông i vin. Mêgem xe kɨtaa vô il Mag Anutu tɨyi buc vɨhati bêga bê i ngɨdu xam xôn ên xam tu xomxo nivɨha tɨyi wê xam ob vông môp yuu yuac nivɨha vɨhati wê Anutu tyuc xam ên nêb xam ob vông ge. Dɨ xe kɨtaa vô Anutu bêga bê i ngɨdu xam xôn ya xêkɨzêc wê i vông ge êdêc xam vông môp nivɨha vɨhati i tɨyi wê xam nêb xam ob vông ge, dɨ xam vông yuac vɨhati wê xam vông ên wê xam vông i vin Yesu ge i dɨyêp nivɨha.  
\v 12 Xe kɨtaa bêge ên xe nêb môp wê xam vông ge i vông il lig Apumtau Yesu lê i vô levac, dɨ Yesu i vông xam lêm i vô levac êno. Il Mag Anutu hɨxôn Apumtau Yesu Kɨlisi obêc vông bêge ya vɨzid nivɨha wê yuu vông ge.   
\c 2  
\s1 Kɨyang lec xomxo nipaên kehe nôn wê ob tu levac ge  
\p
\v 1 Xam lige, a ob nêl kɨtong vô xam lec buc wê Apumtau Yesu obêc vena dɨ kɨtuc il xôn mɨ il la vô i ge. Om xe nêl kɨtong vô xam bêga ên xe nêbê  
\v 2 xomxo ya ob val nêl kɨyang kɨtyooên vô xam ên nêbê buc wê Apumtau ob vena lec ge val pyap. He ya nêl i tɨyi xocbê plopete kɨtyooên mi nêl ge, dɨ he ya nêl ya xovôên wê heche va vông ge, dɨ he ya so ên he nêbê xe kɨvuu kɨyang tibêge vac kɨpihac. Om xam obêc ngô kɨyang kɨtyooên tige ge od xam nɨlôm i o lêc vô vɨyin dɨ xam vông i vin kɨyang tibêge lutibed lêm.  
\v 3 Le i lêc vông i vin kɨyang yuu môp kɨtyooên wê xomxo ob nêl vô xam ge lêm, ên buc tige obêc seb lam tax lêm. Nge, xomxo tɨbeac hɨwocên ob pwoo Anutu kɨyang vac dɨ vô nɨmi vô Anutu, dɨ xomxo nipaên kehe nôn ob val le seac tax, nang dêc Apumtau ob vena tɨmuên. Xomxo nipaên kehe nôn tige wê Anutu ob vông i la dô vac Seten ben.  
\v 4 Lêc xomxo nipaên tyo ob val le seac lê, lêc vông vevac vô Anutu nôn dɨ anutu baba wê xomxo vaci vɨnoo ge hɨxôn susu ngɨbua vɨhati yang, dɨ ob yong ici va lê ên nêbê i tu levac dɨ luu susu ngɨbua vêl. Om ob la vac Anutu xumac ngɨbua dɨ la dô dɨ kɨtyoo xomxo ên nêbê, “A ga a Anutu tyo mêga.”   
\p
\v 5 Ilage wê a loc dô hɨxôn xam ge od a nêl kɨyang tiga kɨtong vô xam. Mêd xam lungên kɨyang tige tii vac nang, me?  
\v 6 Lêcom xam xovô ên xam nêbê gwêbaga xomxo ngwe le vac xomxo nipaên tyo nên môp xôn ên nêb i lamên i ma, lêc ob lam le seac vô buc tɨmuên wê Anutu vɨnoo vô i ge.  
\v 7 Xomxo nipaên kehe nôn tyo valên gên ma, lêcom gwêbaga i vông yuac nipaên wê pwoo Anutu kɨyang vac ge mɨ dô xôpacên. Mêdêc obêc buc tɨmuên ge od xomxo ngwe wê le vac i xôn ge obêc tɨtêc la vêl,  
\v 8 mêd ge wê xomxo nipaên kehe nôn tyo ob lam le seac. Nang dêc Apumtau Yesu ob hi i yib ya myakɨlôhô wê lam vac mya ge. Apumtau ob lam le seac hɨxôn xêseac wê i vông ge, dɨ ob hi xomxo nipaên tige vô nipaên ya xêkɨzêc wê i vông ge.  
\v 9 Lêcom buc wê xomxo nipaên kehe nôn tyo obêc val ge od obêc val hɨxôn xêkɨzêc wê Seten vông ge, om ob vông yuac levac hɨxôn do levac wê kɨtyooên ge vɨyang vɨyang,  
\v 10 dɨ ob vông môp nipaên wê kɨtyooên ge vɨhati ên nêb i kɨtyoo xomxo wê ob la dô vac nipaên luta ge. Xomxo tigee xêyaa obêc vin lec Anutu kɨyang nôn ge od Anutu ob vô he vêl ên he nên nipaên, lêc he vô nɨmi vô om Anutu ob kɨtya he vêl.  
\v 11 Mêgem Anutu ob vông xêkɨzêc wê kɨtyooên ge vô he ên nêb he i vông i vin kɨyang kɨtyooên.  
\v 12 Mêgem he vɨhati wê o vông i vin kɨyang nôn lêm dɨ xêyaa vin lec môp nipaên ge, Anutu ob nêl he nên nipaên kɨtong dɨ vông he la dô vac nipaên luta lêc luta.   
\s1 Anutu vɨnoo xam pyap ên nêb ob vô xam vêl ên nêm nipaên  
\p
\v 13 Xam lige, Apumtau xêyaa vin lec xam, dɨ xe nɨlôm kɨdu xe om xe pɨmil Anutu ên xam tɨyi buc vɨhati, ên mugên ilage Anutu vɨnoo xam ên nêb ob vô xam vêl ên xam nêm nipaên. Om vô xam vêl ya yuac wê Myakɨlôhô Ngɨbua vông ge hɨxôn môp vông vinên wê xam vông ge, ên xam vông i vin i kɨyang nôn.  
\v 14 Mêgem Anutu nêb ob tung xam la dô vac xêseac wê il Apumtau Yesu Kɨlisi vông ge, om dɨdii xam pyap ya xolac nivɨha wê xe nêl vô xam ge.  
\v 15 Mêgem xam lige, xe nêl vô xam bêga bê xam le xêkɨzêc dɨ hôm kɨyang nôn wê xe nêl vô xam vac myam dɨ kɨvuu vac kɨpihac ge xôn pɨlihi dɨ tɨmu vô.   
\p
\v 16 Il Apumtau Yesu Kɨlisi yuu Mag Anutu, yuu xêyaa vin lec il om vông vɨzid nivɨha vô il ên nêb ob ngɨdu il xôn dɨ vông il nɨlôd i vô vɨyin maên luta lêc luta. Dɨ yuu ngɨdu il xôn om il dô bin nôn nivɨha wê yuu ob vông vô il tɨmuên ge.  
\v 17 Mêgem xe kɨtaa vô Anutu ên xe nêbê i ngɨdu xam xôn dɨ vông xêkɨzêc vô xam êdêc xam vông yuac wê nivɨha ge ya dɨ nêl kɨyang wê nivɨha ge vɨhati.   
\c 3  
\s1 Xam kɨtaa vô Anutu bê i ngɨdu xe xôn  
\p
\v 1 Xam lige, a ob nêl kɨyang ngwe hɨxôn bêga bê xam kɨtaa vô Anutu bê i ngɨdu xe xôn ên Apumtau kɨyang i loc vac vɨgwe vɨyang vɨyang ge lutibed dɨ i vô levac i tɨyi xocbê vô levac vac xam mahɨgun ge.  
\v 2 Dɨ xam kɨtaa vô Anutu bê i vô xe vêl ên tɨbii nipaên wê mi vông môp nipaên ge vɨgê, ên xam xovô ên xam nêbê xomxo tɨbeac o vông i vin Anutu lêm.   
\p
\v 3 Lêc Apumtau ob pwoo vya vac dɨ sea il lêm. Nge, ob vông xam le xêkɨzêc dɨ viac xam, ên Seten i o vông xam vô nipaên lêm.  
\v 4 Apumtau vông xovôên vô xe lec xam, om xe xovô en xe nêbê gwêbaga xam dɨtɨmu vô môp vɨhati wê xe vông vô xam ge, dɨ xe xovô ên xe nêbê tɨmuên ge xam ob vông môp bêgee i tii vac nang.  
\v 5 Om xe kɨtaa vô Apumtau bêga bê i vông xovôên nivɨha vô xam ên xam vyac xovô bê Anutu xêyaa vin lec xam, dɨ xam xovô bê Kɨlisi le xêkɨzêc dɨ kɨlê vɨyin.   
\s1 Xomxo vɨhati i vông yuac  
\p
\v 6 Xam lige, xe tu Apumtau Yesu Kɨlisi manôn dɨ nêl vô xam bêga bê xam kol xam mɨ dô teva ên lime vông vinên wê mi vô ni maên ên he yuac kɨbun ga, ên he o vông i tɨyi wê xe nêl vô xam ilage lêm.  
\v 7 Ên xacxam va xovô pyap bêga bê xam ob tup vô môp wê xe vông ge, ên buc wê xe loc dô hɨxôn xam ilage od xe o dô vɨdaaên dɨ yuac ma lêm,  
\v 8 dɨ xe o kô yaên ti vô xam pɨleva lêm. Nge, xe vông yuac bisnis tɨyi vɨdiiên yuu bucên vɨhati ên xe nêb xe ob kô mone lec dɨ kɨsuu xe xom yaên vô xam lêc xa, om xe vông yuac levac ên xe nêb xe ob vông vɨyin vô xam ên susu yaên lêm.  
\v 9 Xe vông yuac bêge, lêcom xam xovô ên xam nêbê xe tu xam nêm levac om xe tɨyi wê xe ob nêl bê xam vông xe xom yaên pɨleva. Mêlêc xe o nêl bêge vô xam lêm, ên xe nêb xe ob hɨlung môp nivɨha wê xam ob tɨmu vô ge vô xam.  
\v 10 Om tɨyi buc vɨhati wê xe dô hɨxôn xam ge od xe nêl vô xam bêga ên nêbê, “Xomxo ti obêc nêb ob xeedô pɨleva dɨ yuac i ma ge od xam o lêc vông yaên vô i lêm. Toto vɨgê i vông yuac lec, lêc ya.”   
\p
\v 11 Xe nêl kɨyang tibêge vô xam ên xe ngô wê xam ya dô vɨdaaên dɨ o vông yuac ti lêm. Nge, xam ngena tɨbeac lec xomxo mangwe yuac wê he vông ge, dɨ xacxam va ge xam o vông yuac wê xam ob tulec yaên ge lêm.  
\v 12 Mêgem xe viac kɨyang vô he wê mi dô vɨdaaên ge dɨ nêl xêkɨzêc lec Apumtau Yesu Kɨlisi lê bêga bê he i dô nivɨha dɨ vông yuac ên tulec yaên.   
\p
\v 13 Xam lige, xam nim i o lêc ma lec môp wê xam ob vông nivɨha vô xomxo ge lêm,  
\v 14 dɨ xomxo ti obêc vô nɨnya kɨtu vô kɨyang wê xe kɨvuu vac kɨpihac tiga ge od xam xovô xomxo tyo dɨ kol xam mɨ dô teva ên i, ên i xovô nên soên dɨ ni i yoc ên i.  
\v 15 Lêcom xam o lêc wê i xocbê tɨbii wê vông vevac vô xam ge ti lêm. Nge, xam wê i xocbê xam lime môci ti, dɨ viac kɨyang vô i ên i xovô.   
\s1 Kɨyang vɨwen tɨmuên  
\p
\v 16 Apumtau vaci wê kɨyang malehe kehe ge i vông xam nɨlôm i vô malehe lec i tɨyi buc vɨhati, buc vɨyin hɨxôn buc nivɨha. Apumtau i dô hɨxôn xam vɨhati.   
\p
\v 17 A, Pol, a kɨvuu kɨyang tiga ya vɨgêg dɨ a nêl vɨdiiên vô xam. A mi kɨvuu kɨyang dɨ  
\p mi nêl vɨdiiên vô xam vac kɨpihac vɨhati wê a kɨvuu ge. Môp wê a vông ge yêp bêge.   
\p
\v 18 Vɨzid nivɨha wê il nêd Apumtau Yesu Kɨlisi vông ge i loc dô hɨxôn xam vɨhati.