\id 2PE - Patep NT [ptp] -Papua New Guinea 1986 (DBL 2014) 
\h 2 PITA 
\toc1 Pita kɨpihac wê vông yuu ge 
\toc2 2 Pita 
\toc3 2 Pit 
\mt1 2 PITA  
\mt2 Pita kɨpihac wê vông yuu ge  
\c 1  
\p
\v 1 A, Saimon Pita, a ga Yesu Kɨlisi nu yuac dɨ a tu sinale ti. A kɨvuu kɨpihac tiga loc vô xam wê xam vông i vin Anutu tɨyi xocbê xe vông i vin ge. Môp vông vinên tige nivɨha. Il vông i vin lec môp nivɨha wê Kɨlisi vông ge. Yesu Kɨlisi ge il Anutu i wê vô il vêl ên il nêd nipaên.  
\v 2 Xam xovô Anutu yuu il lig Apumtau Yesu, om xam vông xovôên tige i vô levac, ên xêyaa vin lecên yuu kɨyang malehe i vô levac vô xam.   
\s1 Il ob vông môp wê Anutu tyuc il dɨ vɨnoo il ge i vô nôn lec  
\p
\v 3 Anutu vông susu hɨxôn nôn nivɨha vɨhati vô il ya xêkɨzêc wê i vông ge ên nêb nôn tigee i ngɨdu il xôn gê kɨbun ga dɨ dɨdii il mɨ la vac môp nivɨha wê Anutu vông ge vɨhati mɨ il tɨmu vô. Om il kô nôn tigee vɨhati ya xovôên nivɨha wê Anutu vông vô il lec ici va ge. Anutu tyuc il ya xêseac yuu lê levac wê i vông ge ên nêb il tu i nue.  
\v 4 Ilage Anutu hɨlu kɨyang tɨbeac vô il ên nêb ob vông nôn nivɨha vɨhati vô il ya xêseac yuu lê levac wê i vông ge. Nôn tigee nivɨha yang. Lêc môp nipaên wê il nɨlôd kɨdu il ên nêb il vông ge yêp vô il gê kɨbun ga om vông il vô nipaên. Om Anutu vông kɨyang wê hɨlu pyap ge vɨhati vô nôn lec vô il dɨ vông nôn nivɨha vɨhati vô il ên nêbê he i ngɨdu il xôn dɨ il pec ên môp wê ob vông il vô nipaên ge, dɨ il tu xomxo nivɨha nôn i tɨyi xocbê Anutu vaci ge.   
\p
\v 5 Anutu nêb il ob tu xomxo nivɨha i tɨyi xocbê i ge, mêgem a ob nêl vô xam bê xam lêc vông yuac xêkɨzêc dɨ vông môp nivɨha vɨhati i yêp hɨxôn vông vinên wê xam vông ge, dɨ xam kô xovôên nivɨha hɨxôn,  
\v 6 dɨ xam viac xam ên môp wê nimnɨvi xovô ge, dɨ xam le xêkɨzêc vac vɨyin, dɨ xam tɨmu vô môp wê Anutu vông ge vɨhati,  
\v 7 dɨ xêmyaa i vin lec lime, dɨ xêmyaa i vin lec xomxo vɨhati hɨxôn.  
\v 8 Ên xam obêc tɨmu vô môp bêgee dɨ vông i vô levac ge od xovôên wê xam xovô lec il lig Apumtau Yesu Kɨlisi ge obêc yêp vɨdaaên lêm. Nge, ob vô nôn nivɨha vô xam, dɨ xam ob vông yuac nivɨha ya.  
\v 9 Lêc xomxo vông vinên ti obêc vông môp tibêgee lêm ge od tɨyi xocbê manôn toc dɨ o yê vɨgwe lêm, ên ilage xovô wê Anutu kɨtya i nên nipaên vêl ge lê, lêc gwêbaga lungên môp tige nang.   
\p
\v 10 Xam lige, Anutu tyuc xam dɨ vɨnoo xam pyap ên nêb xam tu i nue. Mêgem xam vông yuac xêkɨzêc, ên môp wê Anutu tyuc xam dɨ vɨnoo xam ge i vô nôn lec. Ên xam obêc vông bêge ge od xam ob le xêkɨzêc dɨ susu ti ob pwoo xam pec lêm,  
\v 11 dɨ Anutu obêc tax vuayen ên xam dɨ xam la vac Yesu Kɨlisi ben dɨ Anutu obêc hi vɨxa pec ên xam dɨ viac xam dô luta lêc luta. Yesu Kɨlisi ge il Apumtau wê vô il vêl ên il nêd nipaên.   
\p
\v 12 Kɨyang wê a nêl vô xam ge, xam ngô dɨ vông i vin pyap, dɨ xam mi le xêkɨzêc vac kɨyang nôn tige. Lêc a nêb a ob nêl kɨyang tige i tii vac nang vô xam,  
\v 13 om tɨyi buc vɨhati wê a dô magvɨha gê kɨbun ga ge od a ob nêl kɨyang tige i tii vac vac vô xam ên xam ngô dɨ hôm xôn pɨlihi. A obêc vông bêge ge od nivɨha,  
\v 14 ên il lig Apumtau Yesu Kɨlisi nêl kɨtong vô a om a xovô bêga ên a nêbê buc wê a ob xib ge vô kwabo lec.  
\v 15 Om a nêb a ob vông yuac xêkɨzêc dɨ nêl kɨyang tige i tii vac vô xam, êdêc wê a xib ge od kɨyang wê a nêl vô xam ge i yêp vac xam pɨyôp dɨ xam xovô i tɨyi buc vɨhati.   
\s1 Pita yê xêseac wê Kɨlisi vông ge  
\p
\v 16 Xe nêl xêkɨzêc wê il lig Apumtau Yesu Kɨlisi vông ge kɨtong vô xam, dɨ xe nêl vô xam ên xe nêbê Yesu obêc vena i tii vac nang. Lêc xe o ngô pɨvulac vɨdaaên ti lec Yesu mɨ nêl kɨtong vô xam lêm. Nge, xe xê Yesu lec mamnôn, dɨ xe xê xêseac wê i vông ge. Om xe nêl kɨtong vô xam.  
\v 17 Mag Anutu vông Yesu lê vô levac dɨ vông xêseac wê i vông ge vô i. Anutu wê xêseac kehe ge vông kɨyang lam vô Yesu bêga ên nêbê, “Xomxo tige a nug wê a xêgyaa vin lec i dɨ a xê i nivɨha ge.”  
\v 18 Xe dô hɨxôn Yesu lec kɨtôn ngɨbua om xe ngô vya tige wê lam gê lag kɨsiinê ge.   
\p
\v 19 Om xe xovô bêga ên xe nêbê kɨyang wê plopete vɨhati nêl ilage, he nêl vɨxôhɨlôg nôn. Om xam obêc hôm he kɨyang tige xôn pɨlihi ge, od xam ob dô nivɨha. Ên kɨyang wê he nêl ge tɨyi xocbê lam wê linac vac mapɨtoc ge. Om xam tɨmu vô he kɨyang dɨ i loc tyip vô buc wê Kɨlisi obêc vena hɨxôn xêseac ge. Xêseac wê i vông ge ngɨnoo xêseac wê lam vông ge vêl. Vô buc tige il ob xovô plopete kɨyang wê he nêl ilage i yêp seac.  
\v 20 Lêc taxlee ge xam xovô bêga bê xomxo ti o tɨyi wê ob nêl plopete kɨyang kehe kɨtong ya xovôên wê ici va vông ge lêm.  
\v 21 Ên ilage he plopete ti o nêl kɨyang ya xovôên wê heche va xovô ge lêm. Nge, Myakɨlôhô Ngɨbua vông Anutu kɨyang vô he lêc he nêl.   
\c 2  
\s1 Môp nipaên wê plopete kɨtyooên vông ge  
\p
\v 1 Ilage plopete kɨtyooên ya kɨdi lec vac he Islel mahɨgun. Dɨ gwêbaga plopete kɨtyooên ya obêc kɨdi lec vac xam mahɨgun dɨ kɨtyoo xam ya xolac kɨtyooên, dɨ he ob vɨyum kɨyang nipaên vac kɨyang nivɨha nɨlô, dɨ nêl kɨyang kɨtyooên vɨyang vɨyang wê obêc vông xomxo vô nipaên ge, dɨ he ob yax Apumtau wê vô he vêl ên nipaên ge vun. Om môp nipaên wê he vông ge wê Anutu obêc kɨtya he vêl lutibed.  
\v 2 Dɨ he obêc dɨdii xomxo tɨbeac la vac môp yôdac hɨxôn môp wê vaxvax ge. Om môp nipaên wê he vông ge ob vông xomxo nêl kɨyang nipaên lec Anutu môp yuu kɨyang nôn.  
\v 3 Plopete kɨtyooên tigee mi vông nɨlô la vô mone, om he ob nêl kɨyang kɨtyooên vô xam ên nêb ob kô mone vô xam. Lêc ilage Anutu nêl mɨ i yêp pyap ên nêb obêc yaxên he nên kɨyang dɨ vông myavɨwen vô he. Anutu wê obêc kɨtya he vêl ge o lungên he lêm. Nge, dô bin buc wê obêc vông myavɨwen vô he ge.   
\p
\v 4 Ilage angela ya vông môp nipaên, lêc Anutu o xo vɨgwe pɨsiv ên he lêm. Nge, tii he la vac vɨgwe nipaên, dɨ vông he la dô kalabuhu vac lôva wê mapɨtoc ta ge. Om he ob la dô dɨ i la tyip lec buc wê Anutu ob yaxên he nên kɨyang ge.  
\v 5 Ilage lec buc wê Nôa dô mavɨha ge od xomxo vô nɨmi vô Anutu, lêc Anutu o xo vɨgwe pɨsiv ên he lêm. Nge, vông mia tyip vac kɨbun dɨ hi he ma vêl. Mêd Nôa tibed wê mi nêl môp nivɨha kɨtong mɨ i yêp seac, om Anutu viac Nôa dɨ xomxo vɨgê vɨlu dɨ sec yuu ge he dô mavɨha vô buc wê mia hi tɨbii ge.  
\v 6 Ilage Anutu yaxên môp nipaên wê tɨbii Sodom yuu Gomola vông ge. Om vông myavɨwen vô vɨgwe yuu ge, dɨ nyuu yuuya ngwax levac dɨ ngwax ya yuu ma vêl, om vɨgwe tu vɨwev pɨleva. Anutu vông bêge ên nêb xomxo wê vô nɨmi vô i ge he i yê dɨ xovô bê Anutu obêc vông myavɨwen vô he.  
\v 7 Lot mi dô vac vɨgwe Sodom, lêc Anutu hôm Lot vêl ên ngwax wê ob ya vɨgwe Sodom yuu Gomola ge, ên Lot ge xomxo nivɨha ti. Om môp yôdac hɨxôn môp nipaên vɨhati wê tɨbii Sodom yuu Gomola vông ge vông Lot nɨlô vô vɨyin.  
\v 8 Ên Lot ge xomxo nivɨha wê nɨlô tɨmu vô môp nivɨha ge, lêc dô vac he mahɨgun om yê môp nipaên wê he vông ge dɨ ngô kɨyang nipaên wê he nêl ge. Om vông i nɨlô vô vɨyin mabu yocên tɨyi buc vɨhati.  
\v 9 Kɨyang tige wê nêl lec angela nipaên hɨxôn Nôa yuu Lot ge ob vông xovôên vô il bêga bê Apumtau xovô vɨyin wê tulec xomxo nivɨha ge om ici va tɨyi wê ob vô he vêl ên vɨyin tige. Dɨ xovô môp nipaên wê xomxo nipaên vông ge om ici va tɨyi wê ob vông myavɨwen vô he dɨ i la tyip vô buc wê obêc yaxên xomxo vɨhati nên kɨyang ge.  
\v 10 Plopete kɨtyooên obêc kô myavɨwen nipaên i luu vêl, ên he mi vông môp yôdac hɨxôn môp ningeac vɨhati, dɨ yê Anutu kɨyang hɨxôn xomxo levac kɨyang tɨyi xocbê kɨyang pɨleva ge, dɨ he mi yong he dɨ tɨmu vô môp wê he nɨlô xovô ge, dɨ he nêl kɨyang nipaên lec angela lag kɨsiinê dɨ o xona lêm.  
\v 11 Angela tigee lê hɨxôn xêkɨzêc wê he vông ge luu xomxo vɨhati vôngo vêl. Lêc angela tigee o luu kɨyang nipaên ti lax vô plopete kɨtyooên tigee lêm, dɨ he o vông kɨyang vô Apumtau lec nipaên wê xomxo tigee nêl lec he ge lêm.   
\p
\v 12 Plopete kɨtyooên tigee mi tɨmu vô môp nipaên wê ninɨvi vông ge, om he tɨyi xocbê bwoc vɨmen wê pɨyôp maên wê xomxo ob tii he dɨ hi he yib ge. Ên he nêl kɨyang nipaên vaxvax lec kɨyang wê he xovôên kehe ma ge. Om môp nipaên wê he vông ge obêc vông he vô nipaên dɨ kɨtya he vêl,  
\v 13 dɨ he obêc kô myavɨwen nipaên lec nipaên wê he vông ge. Ên he xêyaa vin lec wê he ob num dɨ vông môp nipaên vô vɨdiiên wê hɨyôv ge. Dɨ he ya yaên hɨxôn xam, lêc he nɨlô vô nivɨha ên môp nipaên wê he mi vông ge, om he tɨyi xocbê do nipaên vac xam mahɨgun ge.  
\v 14 Dɨ he manôn yê vêx dɨ xo môp yôdac, dɨ he o dô seac vêl ên môp nipaên lêm. Dɨ he dɨdii xomxo wê o vông i vin xêkɨzêc lêm ge mɨ la vac môp nipaên, dɨ he vông pɨyôp yuu nɨlô la vɨhati vô susu kɨbun ga. Anutu nêl pyap ên nêbê obêc kɨtya he vêl.  
\v 15 Plopete kɨtyooên tigee sea môp nivɨha dɨ la vaxvax vac môp nipaên, dɨ tɨmu vô môp nipaên wê Bio nu vux Belam vông ilage. Belam xêyaa vin lec wê ob vông môp nipaên dɨ kô mone lec.  
\v 16 Lêc bwoc donki wê Belam vông ge nêl i nên nipaên kɨtong vô i. Bwoc donki o tɨyi wê ob nêl kɨyang ge lêm. Lêc donki tige keac vô Belam tɨyi xocbê xomxo keac ge dɨ nêl Belam nên nipaên kɨtong vô i. Om donki tige le vac plopete Belam nɨlô judajuda xôn.   
\p
\v 17 Om plopete kɨtyooên tigee vɨhati tɨyi xocbê lôva wê xomxo mi kɨlê mia vac lêc mia tuacên ge, dɨ he tɨyi xocbê lun mapɨtoc lêc lun valên ma ge. Om Anutu viac vɨgwe mapɨtoc ta wê he obêc la dô vac ge.  
\v 18 Xomxo tigee kô he lec dɨ keac vya levac lec kɨyang pɨleva wê nôn maên ge. Dɨ he kɨtyoo xomxo wê gên sea môp nipaên wê tɨbii madɨluhu vông ge, dɨ dɨdii he lax mɨ la vac môp yôdac hɨxôn môp nipaên wê he ninɨvi xovô ge.  
\v 19 Xomxo kɨtyooên tigee nêl bêga ên nêbê, “Xam obêc nêb xam ob vông môp ti i tɨyi wê xam xêmyaa vin lec ge od xam vông. Lêc môp tige ti o tɨyi wê ob viac xam ge lêm.” He nêl bêge lê, lêc he nêl kɨyang kɨtyooên. Ên he tu xomxo yuac wê môp nipaên viac he ge. Ên môp nipaên ti obêc viac xomxo ge od xomxo tige ob tu môp nipaên tige nu yuac.  
\v 20 Xomxo ob xovô il lig Apumtau Yesu Kɨlisi wê vô il vêl ên il nêd nipaên ge, dɨ vông i vin i, dɨ pec ên môp nipaên kɨbun ga wê vông he vô nipaên ge, lêc he obêc pɨlepac he mɨ lax vô môp nipaên tii vac nang dɨ môp nipaên obêc hôm he xôn ge, od he obêc dô vac nipaên luu wê he dô vac tax ge vêl.  
\v 21 Ên ilage he o xovô môp nivɨha lêm om he dô vac nipaên. Lêc gwêbaga he xovô dɨ vông i vin Anutu kɨyang, lêc he vô nɨmi vô, om he ob dô vac nipaên luu wê he dô vac ilage vêl.  
\v 22 Om nipaên wê tulec he ge tɨyi xocbê kɨyang ti wê yêp bêga ên nêbê, “Noo mi ya susu wê he mutac ge tii vac nang.” Dɨ kɨyang ngwe nêl bêga ên nêbê, “Bwoc ti wê loc hɨxôn ninɨvi nivɨha ge ob lax lipac i vac lôm tii vac nang.”   
\c 3  
\s1 Apumtau Yesu obêc vena vɨxôhɨlôg  
\p
\v 1 Xam lige, ilage a kɨvuu kɨpihac ti vô xam, nang dêc gwêbaga a kɨvuu kɨpihac ngwe ga wê vông yuu ge vô xam. Lêc a kɨvuu kɨpihac yuu ge vô xam ên a nêb i tɨpi vô xam pɨyôp i yêp seac dɨ xam xovô kɨyang tiga i tii vac.  
\v 2 A nêb xam xovô kɨyang wê plopete ngɨbua nêl ilage i tii vac, ên he nêl kɨtong lec buc wê obêc val tɨmuên ge. Dɨ xam xovô xolac wê il Apumtau vông ge. Apumtau vô il vêl ên il nêd nipaên, dɨ vông i xolac vô lime sinale dɨ he nêl kɨtong vô xam mɨ xam ngô. Om xam ngô dɨ xovô i tii vac.   
\p
\v 3 Om xam lêc xovô taxlee bêga bê vô buc tɨmuên ge od tɨbii ya obêc val vô xam dɨ ob tɨmu vô môp wê he nɨlô kɨdu he ên nêb he ob vông ge, dɨ he ob so vya vô xam ên wê xam vông i vin Anutu ge, om he ob yax mang dɨ nêl vô xam bêga ên nêbê,  
\v 4 “Yesu nêl vô xam ên nêbê obêc vena vô xam, me? Om tyo dô gê tina? Wê lê, Yesu o vena lêm. Nge, vô buc wê Anutu tung lag yuu kɨbun ge, dɨ i la vô buc wê il mage buge yib ilage, dɨ i val tyip gwêbaga hɨxôn, susu hɨxôn kɨyang vɨhati dô tɨyi xocbê dô ilage dɨ ti o pɨlepac lêm.”  
\v 5 He ob nêl kɨyang tibêge vô xam, lêc he nêbê he ob xovô yuac wê Anutu vông ilage lêm. Yuac wê Anutu vông ilage bêga nêbê Anutu nêl dɨ lag yêp dɨ kɨbun val tyip vac mia nɨlô dɨ yêp vac mia mahɨgun.  
\v 6 Lêc kɨbun o yêp bêge xuhu dia lêm. Nge, tɨmuên ge od Anutu nêl dɨ mia hɨvun kɨbun xôn ên wê xomxo vông nipaên ge.  
\v 7 Lêc lag yuu kɨbun wê yêp gwêbaga, Anutu nêl ên nêbê yuu ob yêp dɨ i loc tyip lec buc wê ngwax obêc ya yuu xôn vêl ge. Vô buc tige Anutu obêc yaxên xomxo vɨhati nên kɨyang dɨ obêc kɨtya he wê vô nɨmi vô i ge vêl.   
\p
\v 8 Xam lige, le i lêc lungên kɨyang tiga lêm. Kɨyang tiga nêl bêga ên nêbê buc wê il xê ên il nêb buc myabo tya ge Anutu yê nêb buc dia tɨyi xocbê klismas 1,000, dɨ buc wê il xê ên il nêb buc dia ge Anutu yê tɨyi xocbê buc tibed.  
\v 9 Om xomxo ya so ên he nêb mêd Apumtau vông yuac hɨyi hɨyi om kɨyang wê nêb ob vena ge gên o vô nôn lec lêm. Ge he so. Ên Apumtau o vông yuac hɨyi hɨyi lêm. Nge, bin xomxo wê vô nɨmi vô i ge ên nêb he i pɨlepac he vêl ên nipaên wê he vông ge, ên Apumtau xo ên nêbê xomxo ti i o lêc yib mɨ la vac nipaên lêm.   
\s1 Lag yuu kɨbun xôa obêc ma  
\p
\v 10 Buc tɨmuên wê Apumtau obêc vena lec ge, buc tige obêc val tɨyi xocbê xomxo yôdac ti. Ên buc tige il o xovô lêm. Vô buc tige lag obêc vô nidɨdun levac dɨ xôa obêc ma, dɨ ngwax obêc ya lag yuu kɨbun hɨxôn susu vɨhati ma vêl.  
\v 11 Vɨxôhɨlôg nôn, Anutu obêc kɨtya susu lag yuu kɨbun vɨhati vêl. Om gwêbaga xam ob dô bêna? Xam vông môp ngɨbua i vô nôn lec vô xam dɨ tɨmu vô môp wê Anutu vông ge,  
\v 12 dɨ xam dô bin Anutu buc wê obêc val tɨmuên ge dɨ vông yuac xêkɨzêc ên buc tige i val sebseb. Vô buc tige ngwax obêc ya lag ma vêl, dɨ susu vɨhati obêc dɨdee ên ngwax levac dɨ xôa obêc ma.  
\v 13 Ilage Anutu hɨlu kɨyang pyap ên nêbê lag yuu kɨbun paha obêc yêp tɨmuên, dɨ kɨyang nivɨha obêc hɨvun xôn, dɨ nipaên ti obêc yêp hɨxôn lêm. Om il bin lag yuu kɨbun paha wê obêc val ge.   
\p
\v 14 Xam lige, xam mi dô bin lag yuu kɨbun wê paha ge, om xam viac xam nivɨha dɨ vông yuac xêkɨzêc ên Anutu i yê xam tɨyi xocbê nipaên ti o yêp vô xam lêm ge dɨ i yê xam tɨyi xocbê xam dô vac kɨyang malehe ge.  
\v 15 Xam xovô bêga bê Apumtau venaên gên ma, ên dô bin xomxo vɨhati ên nêb he i pɨlepac he ên i kɨtya he nên nipaên vêl. Kɨyang tige tɨyi xocbê kɨyang wê Pol kɨvuu ge. Pol ge il lig wê il xêdyaa vin lec i ge. Anutu vông xovôên vô i,  
\v 16 om i kɨvuu kɨyang tiga vac kɨpihac vɨhati wê i kɨvuu ge. Kɨyang wê Pol kɨvuu ge, kɨyang ya vɨyin dɨ kehe o yêp seac lêm, om vông yuac levac vô il ên wê il ob xovô kɨyang wê i kɨvuu ge kehe. Om xomxo pɨyôp maên wê o le xêkɨzêc lêm ge, he ya pɨlepac xolac wê Pol kɨvuu ge vac dɨ kɨyang vɨhati wê yêp vac xolac ge hɨxôn. Om Anutu obêc kɨtya xomxo tigee vêl vô buc tɨmuên.   
\p
\v 17 Xam lige, xam xovô pyap ên xam nêbê xomxo tigee mi nêl kɨyang kɨtyooên dɨ pwoo Anutu kɨyang vac. Om xam viac xam ên he, gec lêc he dɨdii xam la vac kɨyang kɨtyooên wê he nêl ge dɨ vông xam sea vông vinên wê xam vông ge.  
\v 18 Apumtau Yesu Kɨlisi vô il vêl ên il nêd nipaên. Om a nêl vô xam bêga bê xam vông xovôên yuu xêyaa vin lecên wê Yesu vông ge i vô levac vac xam nɨlôm. Yesu lê i vô levac gwêbaga dɨ i yêp luta lêc luta. Nôn.