\id 2TI  
\h 2 Timotéo 
\toc1 2 Timotéo (2 Timothée) 
\toc2 2 Timotéo 
\toc3 2 Timotéo 
\mt2 Béârailu kâra tii kà Paulo 
\mt3 tà 
\mt1 Timotéo 
\imt1 Bétapoo popai 
\is1 Wàilàapà na wii tii bèeni? 
\ip Wà Paulo, pwi *apostolo. 
\is1 É wii wiidà? 
\ip Nabibiu kâra *naja 66 ma 67, na béârailu kâra pai tâa kà Paulo na karapuu wâ *Roma. Côo \bk 1 Timotéo\bk* Bétapoo popai. Bénabwé kâra tii na é wii, ba càcaa gòiri gée na càùé, âna é nama tétàmwereê wà Néron, pwi ukai kà tèpa Roma. Ba é pwi a èpàri tèpa cèikî naa goo Iésu. 
\is1 É wii tâî? 
\ip Tà Timotéo. Côo \bk 1 Timotéo\bk* Bétapoo popai. 
\is1 Cina é wii? 
\ip É tâmogòori wà Paulo pâ, o jèe càcaa gòiri wâro kêe, â é wii tà Timotéo, ba dau wânümee têe, ba é pwacèwii pwina naîê (1.3). É wii, ba na é paari pimeaari kêe têe, ma pagòoé naa na cèikî kêe. Â é ina têe cè càraé naa goo tèpa pwa pupûra na rà tèpa pwâ. 
\is1 Dà êre ê tii bèeni? 
\ip Wà Paulo, âna é pwi âboro na dau imaina naa na cèikî. Naa na tii bèeni, âna é wii bénabwé auniimiri kêe, â jè côo pwâranümee ma pwina âjimuru têe. Wàéni ê pupûra, na é naa tà Timotéo, naa na tii bèeni: 
\ili1 • Gà tà côo Iésu, ma pâra wiâê taaci, tiagoro pwâadèreè, pwacèwiio (2.8–13; 4.6–8). 
\ili1 • Gà papwicîri ê wâro'gà (2.21–22). 
\ili1 • Gà cibwaa piwâ na gà pwa ê wakè na é naa tâgà wà Pwi Ukai, ba é naa tâgà pàtàmee (1.6–8). 
\ili1 • Gà pidàpwicâarigà, naa na aré ma tòina na tèepaa medarigà gée goo na gà pwi âboro kà Iésu (2.3–7; 4.5). 
\ili1 • Gà ciburà pitêre dàra ê pâ popai na âjupâra, na tâa na Tii Pwicîri (1.13; 4.14–17), â gà ciburà picémara ma pacâmuri tèpa âboro goo (2.15; 4.5). 
\ili1 • Gà tétâjii ê pâ ârapupûra na pwâ (2.21), â gà ipwacôoco tàpé na rà me nau ipawâmi tèpa âboro kà Pwiduée (3.1–9). 
\ili1 • Gà pitòrigari tèpa âboro na rà *tàrù, ba na rà tèpa pacâmuri pàra tàpé (2.1–2). 
\is1 Pai pitàgoo tii 2 Timotéo 
\io1 Ipwabwàcu \ior (1.1–2)\ior* 
\io1 Jè tà cimwü na cèikî kâjè \ior (1.3–2.13)\ior* 
\io2 É pagòo Timotéo wà Paulo \ior (1.3–18)\ior* 
\io2 Pwi coda na é pitêre dà pwi ukai \ior (2.1–7)\ior* 
\io2 Iésu Kériso, âna é pwi câmu kâjè \ior (2.8–13)\ior* 
\io1 Ipwacôoco tàpé na rà pâiti jii âjupâra \ior (2.14–3.9)\ior* 
\io1 Câmu tà Timotéo \ior (3.10–4.8)\ior* 
\io1 Bénabwé popai ma ipicijii \ior (4.9–22)\ior* 
\ie  
\c 1  
\s2 Ipwabwàcu 
\p  
\v 1 Wâgo Paulo [na pwa tii] tâgà, co Timotéo, wâgo pwi *apostolo kà *Kériso Iésu, wiâra ê câbawâdé kà Pwiduée. Ba é cùruo pâ, ba na go inapàpari ê *âji wâro. Ba é jèe mara ina béaa pâ, na ée mwa naa tâjè ê wâro bèepwiri, na é naigé mee Kériso Iésu. 
\p  
\v 2 \x - \xo 1:2 \xt Apostolo 16.11; 1 Timotéo 1.2\x*Gà pwi âji naîô naa na cèikî, co Timotéo, â dau wânümoo tâgà. Wâdé na tà tâgà ê *pimeaari imudi ma pinaanapô, na me gée goo Pwiduée kâjè ma Pwi Ukai Kériso Iésu. Â [wâdé na gà tâmogòori] pai moo kàru naa googà. Cidòri nyuâagà! 
\s1 É pagòo Timotéo wà Paulo 
\p  
\v 3 \x - \xo 1:3 \xt Apostolo 23.1\x*Naa ne ma pwaa, ûna go pwapwicîri, â go ciburà ina ê neegà. Â go pwaolé tà Pwiduée, na ia rà piênawéna kêe wà tèpa nyimuô ma upòo, â na go piênawéna kêe mwara gée na âji pwâranümoo.  
\v 4 Go tà niimiri ê pai dau i'gà [na ia go pâra jiigà]. Â po dau nümoo na go côogà côwâ. Â go o dau ipwàdée, wiàna ju ipâmariju côwâ. 
\s2 Tòcidàra côwâ ânye na wâgoogà 
\p  
\v 5 \x - \xo 1:5 \xt Apostolo 16.1\x*Go tâmogòori pâ, gà pwi a cèikî naa goo Pwi Ukai, gée na âji pwâranümagà. Ba gà pwacèwii wà gèe'gà Loïs, na ia é mara cèikî, â wà mwara nyaa'gà, Eunice.  
\v 6 \x - \xo 1:6 \xt 1 Timotéo 4.14\x*Êkaa na go pagòogà, ba na gà wéaari bwàti ê âraimeai kà Pwiduée, na é wâgoogà—na ia gà tòpi, gée goro pai tòpò ê du îô naa gògà. Ba é jèe pwacèwii ê ânye na jèe pwa na é bà, â wâdé na gà tòcidàra côwâ\f + \fr 1:6 \fq Ânye na jèe pwa na é bà…tòcidàra côwâ—\fl é, \fqa Ânye, na wâdé na gà nama dau udàrù.\f*. \fig Wà Paulo, âna é tâa na karapuu goo wà Kériso|src="131 hk00204c.tif" size="col" ref="1.8" \fig* 
\p  
\v 7 \x - \xo 1:7 \xt Roma 8.15\x*Ba ê Nyuâaê Pwicîri, na é naa tâjè wà Pwiduée, âna câé caa nama jè piwâ ma wâgotâjè. Ba é pame tâjè ê pàtàmee, ma ê pimeaari ma ê pai pitòimirijè!  
\v 8 Êkaa na gà cibwaa piwâ na gà inapàpari Pwi Ukai kâjè. Â gà cibwaa nama wâgotâgà\f + \fr 1:8 \fq Gà cibwaa nama wâgotâgà—\ft Ê popai \fqa kamu \ft naa na grec, âna pai ina wèe pâ: \fqa Wâgotâjè \ft naani, ma na nee tii 12 ma 16.\f*, goro pai wâni na karapuu kôo ba kêe. Wâdé na ju kakeri ma picâri naima, ba kâra ê *Picémara Wâdé. [Â gà cimwü naa goo Pwiduée] ba é naa tâgà ê pàtàmee [na go jèe ina tâgà]. 
\s2 Nyabi tà Pwiduée na é pa-udòjè 
\q1  
\v 9 \x - \xo 1:9 \xt Éféso 2.8–9; Tito 3.5\x*É jèe pa-udòjè 
\q1 wà Pwiduée Caa. 
\q1 É todàjè diri, 
\q1 ba na jè Ba kêe. 
\q1 Càcaa wàijè, 
\q1 na pwa pwiri; 
\q1 Ba nye câbawâdé kêe, 
\q1 na é pacoo gée na biu, 
\q1 na bwaa tiàu gòropuu. 
\q1 É paari tâjè, 
\q1 pimeaari kêe, 
\q1 na é naigé mee Kériso. 
\q1  
\v 10 \x - \xo 1:10 \xt Hébéru 2.14\x*É tèepaa me Kériso, 
\q1 *pwi a pa-udòjè. 
\q1 É nama tiàu 
\q1 pàtàmara ê pwâra bà. 
\q1 É naa tâjè wâro 
\q1 dàra gòiri awé! 
\q1 Wàépwiri kaa 
\q1 Picémara Wâdé kêe\f + \fr 1:10 \fq Wàépwiri kaa Picémara Wâdé kêe—\fl é, \fqa Gée goro ê Picémara Wâdé.\f*! 
\s2 Câjè caa piwâ na jè picémaraê 
\m  
\v 11 \x - \xo 1:11 \xt 1 Timotéo 2.7\x*Wà Pwiduée, âna é pwa ma go pwi apostolo kêe, ma pwi a-inapàpari ê *Picémara Wâdé kêe bèepwiri, ma pwi a pacâmuri tèpa âboro.  
\v 12 Wàé kaa pwiri, na go gére picâri goo, nabà. Êco na càcaa wâgotôo goo. Ba go nye tâmogòori wà Pwina go cèikî naa gooé. Â go nye niimiri ba mwü pâ, é tâmogòori wéaari ê wâro kôo na ia go naa têe\f + \fr 1:12 \fq Ê wâro kôo na ia go naa têe—\fl é, \fqa I pwi ia é naa tôo, \ft pai ina wèe pâ, ê Picémara Wâdé.\f*, tiagoro ê Tòotù pwicò\f + \fr 1:12 \fq Tòotù pwicò—\ft Tòotù na ée mwa wâjué côwâ wà Iésu na, \fqa é\ft , \fqa tiagoro ê pwâadèreè.\f*. 
\p  
\v 13 Gà pâra wiâra ê pâ popai na âjupâra, na gà jèe tòpi jiio, â gà pitêre dàra. Â gà wârori pwiibà, naa na ê cèikî ma ê pimeaari, na é naa tâjè wà Kériso Iésu.  
\v 14 \x - \xo 1:14 \xt 1 Timotéo 6.20\x*Â gà wéaari bwàti ê Picémara Wâdé na naa tâgà. Â ée mwa pitu tâgà ê *Nyuâaê Pwicîri, na é wâro goojè. 
\s2 É cimwü pwi béejè Onésifor 
\p  
\v 15 Napwa tèpa cèikî gée na province Asia, âna gà nye tâmogòori pâ, rà naa càùrà tôo—wàrapwiri mwara naa goo wà tupédu aéjii wà Figèle, ma Hermogène.  
\v 16 Caapwi co, wà pwini Onésifor. Wâdé na wà Pwi Ukai, âna é naa ê pimeaari kêe târa ê wâao kêe. Ba é nye ciburà pitu tôo, â càcaa wâgotêe na é pwa karapuu, pwacèwiio\f + \fr 1:16 \fq Càcaa wâgotêe na é pwa karapuu, pwacèwiio—\ft Grec: \fqa Câé caa kamu goo pâ itùpaò kôo.\f*.  
\v 17 Ba ûna é tèepaa me naani na ville *Roma, â câé caa nao goro mudòo pitiri ê pâ ére, â é nye pâmariô. 
\p  
\v 18 Â gà nye tâmogòori bwàti diri pâ na wakè na wâdé, na ia é pwa tôo, naa na ville kêe, Éféso. Â go ilari jii Pwi Ukai pâ, na é paari têe ê pimeaari kêe\f + \fr 1:18 \fq Ê pimeaari kêe—\fl é, \fqa Ê pimeaari kà Pwiduée.\f*, na Tòotù na ée mwa pitèi ê gòropuu wà Pwiduée! 
\c 2  
\s1 Pwi coda na é pitêre dà pwi ukai 
\p  
\v 1 Gée goo kaa [diri pâ muru bèepwiri] co pwina naîô, â wâdé na gà cimwü, naa goro ê pàtàmee ma *pimeaari imudi kà Kériso Iésu.  
\v 2 Gà jèe têre ê ârapupûra na âjupâra, na go inapàpari, na ara pâ âboro na dau wâru. Wâdé na gà naa diri ê pâ pwiibà, tà tèpa âboro na rà *tàrù—tà tàpé na pârirà ma rà pacâmuri pàra tàpé. 
\p  
\v 3 \x - \xo 2:3 \xt 2 Timotéo 1.8\x*Gà kakeri ma picâri, pwacèwii pwi jè coda kà Kériso Iésu.  
\v 4 Ba wà pwi coda, âna nümee na é wâdéarié wà pwi caa kêe. Â câé caa tà niimiri ê pâ wakè na wâgòroigé jii wâra coda.  
\v 5 \x - \xo 2:5 \xt 2 Timotéo 4.8\x*Â wà pwi a pwa kòcò mwara, âna o câé caa piétò, wiàna câé caa pâra wiâra ê pâ naèà goro kòcò. 
\p  
\v 6 \x - \xo 2:6 \xt 1 Korénito 9.7\x*[Pwacèwii na jè mu ina pâ]: Wà pwi a dau wakè na aupwanapô, âna o nye wàé, na ée mwa mara tòpi béaa pwâra wakè kêe.  
\v 7 Gà nünüma bwàti naa goo ê pwina go ina tâgà ni, â wà Pwi Ukai, âna ée mwa pwa ma gà po tâmogòori diri. 
\s1 Iésu Kériso âna é pwi câmu kâjè 
\p  
\v 8 \x - \xo 2:8 \xt Roma 1.3; 1 Korénito 15.4\x*Gà mwa tà niimiri pâ, wà Iésu Kériso, pwi gòobàra pwi ukai *Davita, âna é jèe wâro côwâ gée na aubà. Wàé kaa pwiri ê *Picémara Wâdé, na go picémara. 
\p  
\v 9 \x - \xo 2:9 \xt Éféso 3.1,13; Filipi 1.12–14\x*Â majoroé kaa ê Picémara Wâdé bèepwiri, na go gére tòina, â tòo-o goro ê pâ itùpaò, naani na karapuu, pwacèwii pwi jè a pòtàmwara âboro. Êco na ticè âboro cèna pâri ma é tòo ê Popai kà Pwiduée!  
\v 10 Go pidàpwicâariô naa goo diri ê pwiibà, ba kà tàpé na é pitòrigarirà wà Pwiduée. Ba nümoo na rà udò, ma tâa tàra, dàra gòiri, ê wâro ma ê muugère jaa Kériso Iésu.  
\v 11 \x - \xo 2:11 \xt 2 Korénito 4.11\x*Ba âjupâra ê popai na [jè mu ina] pâ: 
\b  
\q1 Wiàna jè jèe bà 
\q1 naima ma Kériso, 
\q1 â jè o wâro côwâ 
\q1 naima ma wàé. 
\q1  
\v 12 \x - \xo 2:12 \xt Mataio 10.33\x*Wiàna jè cimwü, 
\q1 â jè o pitûâ 
\q1 naima ma wàé. 
\q1 Wiàna jè tétâjiié, 
\q1 â ée mwa tétâjiijè. 
\q1  
\v 13 \x - \xo 2:13 \xt Roma 3.3–4; Tito 1.2\x*Wiàna câjè caa tàrù, 
\q1 êco na wàé, âna 
\q1 é nye tà tâa taaci 
\q1 na ê tàrù. 
\q1 Ba é tâa na pai tâa kêe. 
\s1 Ipwacôoco tàpé na rà pâiti jii âjupâra 
\p  
\v 14 \x - \xo 2:14 \xt 1 Timotéo 6.4; Tito 3.9\x*Gà taniimiri ê pâ popai bèepwiri tà diri [tèpa cèikî]. Â gà ina ba gòo tàra, na ara Pwiduée, pâ, na rà cibwaa pitòocia goro popai. Ba piticèmuru naa goo ê pâ pwâratùra bèepwiri, â nye po târa na tòdidiri tàpé na rà têre. 
\p  
\v 15 \x - \xo 2:15 \xt 1 Timotéo 4.6\x*Wâgà, âna gà gòo naa na wakè'gà, â gà ina ba tàrù ê popai na âjupâra. Â wà Pwiduée, âna ée mwa ipwàdée goo ê wakè'gà, â o câgà caa kamu goo. 
\p  
\v 16-17 \x - \xo 2:16-17 \xt 1 Timotéo 4.7\x*\x - \xo 2:16-17 \xt 1 Timotéo 1.20\x*Gà cibwaa tâa jaa tèpa âboro, na rà pwacèwii Himéné ma wà Filétos, ba ru pwa pâ jèkutâ na piticèmuru naa goo. Ba wà tàpé na rà wàrapwiri, âna càra caa papwicîri wà Pwiduée. Ê pâ popai bèepwiri, âna pwacèwii ê aurumuru naiiwà, na é imaina pâ. Â wà tàpé na rà pacâmuri tèpa âboro goro pwiri, âna rà o tâiti jii Pwiduée. 
\p  
\v 18 Napwa naa goo wà tupéebà, âna ru jèe pâiti jii ê âjupâra, ba ru ina pâ, wà tèpa bà, âna rà jèe wâro côwâ gée na aubà, [â o ticè cè jè wâro côwâ na jè tapacîri.] Â, na wàrapwiri, â ru ténoori ê cèikî kâra pàra âboro.  
\v 19 \x - \xo 2:19 \xt Ésaïe 52.11; Ioane 10.14; 1 Korénito 8.3\x*Êco na ê pàaé na é tòpò wà Pwiduée, âna nye gòo ma cimwü. Â wii naa gò, pâ: \qt Wà Pwi Ukai, âna é nye tâmogòori tàpé na rà tèpa âboro kêe,\qt*\rq Nahoum 1.7\rq* ma «Wà pwina é ina pâ é pwi âboro kà Pwi Ukai, âna wâdé na é pâiti jii ê èpà.» 
\p  
\v 20 [Gà niimiri cai] ê wâ na dau wâdé, âna càcaa tâa na co ê pâ ngapò, na pwa goro mwani mii ma mwani pwaa. Â pwa mwara, ê pâ ngapò, na pwa goro upwâra ma goro puu, ba nye târa diri ê pâ tòotù. Â ê ngapò na dau wâdé, âna târa pâ tòotù na jè pi-ija naima na.  
\v 21 Â wiàna gà cèitiri ê èpà'gà gée na pwâranümagà, [ma tétâjii ê pâ ârapupûra bèepwiri na pwâ] âna gà o pwacèwii ê ngapò na dau wâdé, ba kà Pwi Ukai. Â ée mwa popagà, ba na gà pwi neemuru wakè kêe. Â o wâru pâ na jèpapara wakè na wâdé na ée mwa pwa googà. 
\s2 Gà uru jii pwina èpà ma pwina pwâ 
\p  
\v 22 \x - \xo 2:22 \xt 1 Timotéo 6.11\x*Gà uru jii ê pâ câbawâdé kà tèpa âboro dopwa, co Timotéo. Â gà mudàra ma gà wârori ê wâro na tàrù. Â gà mudàra ma gà wâro na cèikî, ma pimeaari ma pinaanapô. Ba wàépwiri pai pwa kà diri tàpé na rà papwicîri wà Pwi Ukai, gée na pwâranümarà na wâdé na araé. 
\p  
\v 23 \x - \xo 2:23 \xt 1 Timotéo 4.7\x*Gà cibwaa ipacè naa goo ê pâ jèkutâ na ticè êreê, ma ticèmuru naa goo. Ba tèepaa me gée goo pwiri ê pâ pitòocia.  
\v 24 Â wà pwi ênawéna kà Pwi Ukai, âna càcaa wâdé na é pwi a tòocia. Wâdé na é pwi a moo ma ipakîriê naa goo diri tèpa âboro, ma pwi a tâmogòori pacâmuri, ma pwi a pidàpwicâariê. 
\p  
\v 25 Ba wâdé na é tâmogòori tùra ba moo tà tàpé na rà cicaraé. Â géewê, â wà Pwiduée, âna ée mwa pitu tàra, ma rà pinünüma, ba na rà tâmogòori ê âjupâra.  
\v 26 Â wiàna pitâmogòo nümarà, â rà o udò jii ê pwârajé kà *Caatana, wà Pwi âboro èpà, na é tâjùrurà, ba na rà pwa ê câbawâdé kêe. 
\c 3  
\s2 O dau wâru tèpa ipa-imwüru 
\p  
\v 1 \x - \xo 3:1 \xt 1 Timotéo 4.1\x*Wâdé na gà tâmogòori pâ, na pâ bénabwé tòotù, âna o jèe tèepaa me pâ pàara na gòo ma pwacoé.  
\v 2 Ba wà tèpa âboro, âna [rà o dau èpà]: 
\b  
\li1 Rà o piniimirirà co; 
\li1 Rà o wâdéari mwani; 
\li1 Rà o pi-ina ba èpà wà Pwiduée; 
\li1 O càra caa papwicîri ê pwina pwicîri; 
\li1 O maina nümarà, â rà o pi-ina kàra; 
\li1 O càra caa pitêre dà du nyaa ma caa kàra, â rà o jèe tèpa cuâcâda; 
\li1  
\v 3 O gòo pwâranümarà, ma ticè pimeaari goorà; 
\li1 Rà o pi-ina ba èpà pàra tàpé; 
\li1 Rà o wârori ê wâro imudi; 
\li1 Rà o tèpa putàmu; 
\li1 Rà o tèpa cicara ê pwina wâdé; 
\li1  
\v 4 Rà o tèpa icuri tèpa béerà; 
\li1 Rà o tèpa pwaduwà kà tèpa pigù, â rà o ipwa-imudirimuru; 
\li1 Rà o tèpa ipwamainarà; 
\li1 O wâdé tàra ê ipwàdée imudi, jii wà Pwiduée. 
\b  
\m  
\v 5 \x - \xo 3:5 \xt Mataio 7.15,21; Tito 1.16\x*Rà o gòmapwa ma rà tèpa âboro kà Pwiduée, ma pâra wiâra ê nyamanya kâra wâra pwapwicîri. Êco na o nye ticè pàtàmara cèikî [naa na wâro kàra]. Â gà upi tèpa âboro na rà wàrapwiri. 
\p  
\v 6 [Â gére wàrapwiri ni.] Ba wà pàra tàpé gée goorà, âna rà cai pâ pwârawâ. Â rà ipiwâmi pa ilàri, na càcaa mwü ê cèikî kàra. Ba wà pa ilàri-bà, âna rà nye tà niimiri pâ, dau maina èpà kàra, ba nye tà càù pwâranümarà diri kaa ê pâ na jèpapara èpà.  
\v 7 Â dau wâdé tàra na rà tàmaari diri kaa tèpa picémara popai, êco na po dau pwacoé ma rà côoinari ê âjupâra,  
\v 8 \x - \xo 3:8 \xt Exode 7.11\x*gée goo na wà tèpa ipa-imwürurà, âna rà cicara ê âjupâra. 
\p Wà tèpa pwa pupûra-bà, âna rà pwacèwii wà Jannès ma wà Jambrès\f + \fr 3:8 \fq Jannès ma wà Jambrès—\ft Pwiri tupédu âboro gée goo tèpa pwa tutê na rà cicara Moosé.\f*, tupédu a cicara wà *Moosé [na *Aigupito biu]. Càcaa wâdé aunünüma kàra, ba ticè pàara ê cèikî kàra.  
\v 9 Êco na o càra caa pâra tia-iti. Ba wà diri tèpa âboro, âna rà mwa bàra côoina ê pai imwüru kàra, pwacèwii na ia rà côo ê càra Jannès ma Jambrès. 
\s1 Câmu na é naa Paulo tà Timotéo 
\p  
\v 10 Êco na wâgà, co Timotéo, âna gà tâmogòorio bwàti, â gà pâra wiâô naa na diri pâ muru—ê ârapupûra kôo, ma ê càrao, ma ê aunünüma kôo; â ê cèikî kôo, ma ê pidàpwicâariô; â ê pimeaari kôo, ma ê pai cimwü kôo,  
\v 11 \x - \xo 3:11 \xt Apostolo 13.14–52, 14.5,8–20\x*ma ê pai tubaèpà tôo ma pâ aré kôo. Ba gà tâmogòori pâ, rà po dau tubaèpà tôo, naa na pâ ville Antioche gée Pisidie, ma Iconium ma Lystre. Â go dau pwamaagé côo goo. Êco na wà Pwi Ukai, âna é nye upao jii diri ê pâ pwi bèepwiri.  
\v 12 \x - \xo 3:12 \xt Mataio 16.24; Ioane 15.20; Apostolo 14.22\x*Â jèe wâdé, ba wiàna nümajè na jè pâra wiâ Kériso Iésu, â o tubaèpà tâjè. 
\p  
\v 13 Napwa naa goo wà tèpa piwâmi, âna rà o mwa nye ciburà dau pwa na èpà jii béaa. Â rà o ipa-imwüru pàra tàpé. Êco na rà nye ipa-imwürurà côwâ. 
\p  
\v 14 Â wâgà, âna wâdé na gà tà pâra wiâra bwàti ê âjupâra na gà jèe picòo, â na gà jèe cèikî naa goo. Ba gà nye tâmogòori pâ, wàilàapà tàpé na rà pacâmurigà.  
\v 15 Ba é pacâmurigà ê *Tii Pwicîri, gée na aukîri'gà, â tâa tâgà ê autâmogòorimuru, târa ma gà udò, [ba na tâa tâgà ê *âji wâro] gée goo ê cèikî'gà naa goo Kériso Iésu. 
\p  
\v 16 \x - \xo 3:16 \xt Roma 15.4\x*Ba diri ê Tii Pwicîri, âna é me gée jaa Pwiduée, târa ma picòo tâjè, ma èùrujè, ma patàrùjè, ma pinadàrù ê pwina wâdé jii ê pwina èpà\f + \fr 3:16 \fq Pinadàrù ê pwina wâdé jii ê pwina èpà—\fl é, \fqa Pacâmurijè goro pai wârori ê wâro na wâdé ma tàrù.\f*.  
\v 17 Nye gée goro ê Tii Pwicîri, na [é wakè goojè wà Pwiduée, ba na] jè tèpa ênawéna kêe na tâbawêe. Â é pwabwàtijè, ba na jè pwa diri pâ muru na wâdé. 
\c 4  
\s2 Gà inapàpari popai kà Pwiduée 
\p  
\v 1 Wà Kériso Iésu, âna ée mwa me nau pitûâ kâra diri tèpa âboro, â ée mwa pitèirà diri—tèpa wâro ma tèpa bà. Êkaa na go tûâri tâgà, na araé, ma na ara Pwiduée, pâ:  
\v 2 Gà picémara ê popai kà Pwiduée, na diri na pàara, wiàna wâdé, ma wiàna èpà. Gà pacâbweri\f + \fr 4:2 \fq Pacâbweri—\fqa Convaincre, réitérer.\f* tèpa âboro; â gà patàrù tàpé na rà pwa na èpà; â gà pacâmurirà bwàti. Â gà pagòorà. Gà pwa diri pwiri, naa na pidàpwicâari. 
\p  
\v 3 \x - \xo 4:3 \xt 1 Timotéo 4.1\x*Ba o jèe tèepaa me ê jè pàara, na o wà tèpa âboro, âna o jèe tàutàra na rà têre ê Popai kà Pwiduée. Â rà o nye tà pâra wiâra ê pâ câbawâdé kàra na èpà. Â rà o nye ciburà mudàra tèpa picòo na wâru wàilà, na rà ina co ê pwina wâdé tàra na rà têre.  
\v 4 Ba rà o kee naa goo ê âjupâra, ba na rà o têre ê pâ jèmaa na pwâ. 
\p  
\v 5 Êco na wâgà, âna wâdé na gà pwi a pitòimirigà na diri pâ pàara, â gà pidàpwicâarigà, naa na aré ma tòina. Â gà inapàpari ê *Picémara Wâdé. Â gà tubanabwé diri pâ wakè na é panuâ tâgà wà Pwiduée, ba gà pwi ênawéna kêe. 
\s2 Go jèe pwa pipaa na wâdé 
\p  
\v 6 \x - \xo 4:6 \xt Filipi 2.17\x*Napwa naa gooò, âna go jèe panuâ ê wâro kôo, ba na go pwa *ârapwaailò goo tà Pwiduée. Ba o jèe tèepaa ê pàara na go bà na.  
\v 7 \x - \xo 4:7 \xt 1 Timotéo 6.12\x*Go pwa pwi ipaa na wâdé.  go jèe tubanabwé ê itàa kôo.  go nye cipa ba mwü ê cèikî\f + \fr 4:7 \fq  go nye cipa ba mwü ê cèikî—\fl é, \fqa  go jè pitêre dàra, tiagoro ê pwâadèreè.\f*.  
\v 8 \x - \xo 4:8 \xt 1 Korénito 9.24–25\x*Go jèe piétò, ba go jèe wârori ê wâro na *tàrù ma wâdé tà Pwi Ukai\f + \fr 4:8 \fq Go jèe piétò, ba go jèe wârori ê wâro na tàrù ma wâdé tà Pwi Ukai—\fl é, \fqa Go mwa tòpi ê pumara wakè kôo—wâro dàra gòiri—jii wà Pwi Ukai. \fl É, \fqa  o wâdé ma tàrù na go tòpi ê pumara wakè jii wà Pwi Ukai. \ft Grec: \fqa La couronne de justice.\f*, pwi a pitèi na é tàrù.  tapoo nabàni, âna go tapacîri ê bwe korona—ê pumara wakè kôo—na ée mwa naa tôo, naa na pwi Tòotù, na ée mwa pitèi tèpa âboro na.  ée mwa nye naa tà mwara, diri tàpé na wânümarà gooé, ma tapacîri ê pai o tèepaa kêe. 
\s1 Bénabwé popai 
\p  
\v 9 Wâdé na gà piwàcî me mariô.  
\v 10 \x - \xo 4:10 \xt Apostolo 15.37–39; 2 Korénito 8.23; Kolosé 4.14\x*Ba wà Démas, âna é jèe panuâô, ba é po dau wâdéari ê pâ neemuru ê pé gòropuu bèeni. Â é pâra naa na ville Tésalonika. Â wà Crescens, âna é pâra naa Galatia; â wà Tito, âna é pâra naa Dalmatie.  
\v 11 Tà wàco Luka, na é tà wâjaao. Â wâdé na gà mudà Maréko, â gà popaé wiâgà. Ba ia é po dau pitu tôo naa goo ê wakè na go pwa. 
\p  
\v 12 Napwa naa goo Tychique, âna go o jèe panuâê pâ naa na ville Éféso.  
\v 13 \x - \xo 4:13 \xt Apostolo 20.6\x*Na gà mwa me, â gà tàpo coo jaa Carpus naa na ville Troas, ba na gà popa ê palito, na ia go tà ujii naa jaaé. Â gà pame mwara ê pâ tii kôo—â gà cibwaa imwüru jii i pâ tii, naa wii naa gòro parawére mutô\f + \fr 4:13 \fq Tii na wii naa gòro parawére mutô—\fqa Parchemins. \ft Ê pâ tii na wii naa gòro parawére mutô, âna maina wâri wèe jii pâ pwàpié \fqa (papyrus)\ft , ba dau gòo.\f*. \fig Wà Timotéo, âna é pame pâ tii kà Paulo|src="132 cn02087B.tif" size="col" ref="4.13" \fig* 
\p  
\v 14 \x - \xo 4:14 \xt Psaume 62.13; Roma 2.6; 1 Timotéo 1.20\x*Wà Alexandre, wà pwi a caagai paò, âna é po dau pwa tôo ê pâ muru na èpà. Êco na wà Pwi Ukai, âna ée mwa nye naa têe cè pumara ê pâ wakè kêe [na èpà].  
\v 15 Gà ipwacôogà gooé mwara, ba é nye dau gòo goro cicara ê popai kôo. 
\s2 Rà capai panuâô 
\p  
\v 16 Na tòotù na tapoo pitèio naa na wâra pitèimuru, â nye ticè âboro cèna pitu tôo. Ba wàilà diri, âna rà capai panuâô. Wâdé na é pwanaurirà wà Pwiduée.  
\v 17 Êco na wà Pwi Ukai, âna é pitu tôo, ma pagòo-o. Â é naa tôo ê nii kêe, ba na go inapàpari diri ê popai kêe, tà tàpé na càra caa tèpa *Juif, na rà tâa ni. Â é upao [jii ê pwâra bà na dau èpà, pwacèwii na upao] gée na pwâra liô\f + \fr 4:17 \fq Liô—\fqa Lion.\f*.  
\v 18 [Â go tâmogòori pâ] ée mwa pa-udò-o jii diri ê pâ pàra èpà, ma popao, naa na ê Mwaciri kêe, na wânidò *napwéretòotù. Picagòtùé ma pwényunyuâariê dàra gòiri awé! Wâdé na wàra. Amen! 
\s2 Ipicijii 
\p  
\v 19 \x - \xo 4:19 \xt Apostolo 18.2; 2 Timotéo 1.16–17\x*Bwàcu kà du duadà Priscille ma Aquilas, ma diri ê pwârawâ kà Onésifor. 
\p  
\v 20 \x - \xo 4:20 \xt Apostolo 19.22, 20.4; Roma 16.23\x*Wà Éraste, âna é tà tâa na ville Korénito. Â go ujii Trophime naa na ville Milet, ba é maagé. 
\p  
\v 21 Timotéo, gà piwàcî me, béaa kâra ê pàara aumoo. 
\p Wà Eubule, ma Pudens, ma Linus, ma Claudia, âna rà naa paé bwàcu'gà, wàilà ma wà diri tèpa cèikî béejè naa goo Kériso, na rà wâni. 
\p  
\v 22 Wâdé na é tà jaagà wà Pwi Ukai. Wâdé na é pwényunyuâariwà diri goro ê *pimeaari imudi kêe! 
\cls Cidòri nyuâawà!