\id 2TH 2Th \h 2 Tésalonika \toc1 2 Tésalonika (2 Thessaloniciens) \toc2 2 Tésalonika \toc3 2 Tésalonika \mt2 Béârailu kâra tii \mt3 tà tàpé \mt1 Tésalonika \imt1 Bétapoo popai \is1 Wàilàapà na wii tii bèeni? \ip Wà Paulo, pwi *apostolo, na rà tâa na ville Korénito ma wà Timotéo ma wà Silas. \is1 É wii wiidà? \ip Nabibiu kâra *naja 49 ma 52, pàra parui gée na càùru pâbéaa kâra tii kêe tà tàpé Tésalonika. \is1 É wii tâî? \ip Târa ê wâra pwapwicîri wâ Tésalonika. Côo \bk 1 Tésalonika\bk* Bétapoo popai. \fig |src="Map Thes.tif" size="col" loc="1.0" ref="2 Tésalonika 1:0" \fig* \is1 Cina é wii? \ip Gée na càùru na é wii pâbéaa kâra tii tà tàpé Tésalonika, â é têre wà Paulo pâ, tàgére pimaina pâ ê cèikî bau ê pimeaari kàra (1.3).  é ipwàdée, â é wii, ba na é pagòorà. \ip  é wii mwara ba na é pacâmurirà mwara goo ê pai wâjué côwâ kà Pwi Ukai Iésu, ma ê wâro na wâdé na pàara na jè tapacîê. Ba wâru tàpé gée goorà, na càra caa tâmogòori bwàti ê pupûra na pâbéaa kâra tii kêe, â rà niimiri pâ, jèe tèepaa pâ bénabwé tòotù, gée goo na pimaina pâ pai tubaèpà tàra. Ba wà pàra tàpé, âna rà ina pâ, pwiri é jèe wâjué côwâ wà Iésu (2.1–2).  wà pàra tàpé, âna rà naaco wakè (3.6–13).  é pò ma wii tii bèeni wà Paulo, ba na é patêrerà ma pacoorà. \is1 Dà êre ê tii bèeni? \ip É napéaati bwàti wà Paulo ê pwina o tèepaa béaa kâra pai wâjué côwâ kà Pwi Ukai, ba câé caa pâji tèepaa. Wâru tèpa âboro na rà o cicara Pwiduée.  ée mwa cipàpaa wà pwi âboro na dau èpà, na ina gooé pâ \it A cicara\it* (2.3). Ée mwa too na tâa na ê wâra pwapwicîri kà Pwiduée, ma inapàpari pâ, wàé Pwiduée (2.4).  ée mwa pwa pâ *câmu kâra pàtàmee, na rà pò goo tèpa âboro, â o wâru tàpé na ée mwa ipa-imwürurà (2.9–10).  ée mwa tubaèpà tèpa âji âboro kà Pwiduée. \ip Êco na é pagòojè wà Paulo, ba na jè cimwü naa na cèikî kâjè naa tubaèpà tâjè. Jè cibwaa pò ma cèikî naa goo tàpé na rà pame jèkutâ na ité goro ê pai wâjué côwâ kà Pwi Ukai (2.1–3). Wâdé na jè tâa goro ê popai kà Pwiduée na jè tòpi (2.15). Jè cibwaa pwa ciritàu. Wâdé na jè wârori ê wâro na pitòimiri ma wâdé tà Pwiduée tiagoro pwâadèreè (1.12). \is1 Pai pitàgoo tii 2 Tésalonika \io1 Ipwabwàcu ma pwâra pwapwicîri \ior (1.1–12)\ior* \io1 Béaa kâra pai wâjué me côwâ kà Pwi Ukai \ior (2.1–17)\ior* \io1 Bénabwé popai ma ipicijii \ior (2.13–3.18)\ior* \ie \c 1 \s2 Ipwabwàcu \p \v 1 Wâgo\f + \fr 1:1 \fq Wâgo—\ft Grec: \fqa Wàibà. \ft Wà Paulo na é pwa tii, êco na é paari pâ, caapwi pwâranümarà ma wà Timotéo ma Silas na ru tâa jaaé.\f* Paulo, na pwa tii. Tàgére wàibà ma wà Silas ma wà Timotéo. [ ru naa bwàcu kàwà mwara.] Go wii tàwà, wâguwà ê wâra pwapwicîri wâ Tésalonika, na guwà tâa goo wà Pwiduée Caa kâjè, ma Pwi Ukai Iésu *Kériso. \p \v 2 \x - \xo 1:2 \xt Roma 1.7\x*Wâdé na tà tàwà ê *pimeaari imudi ma pinaanapô, na me gée goo Pwiduée kâjè ma Pwi Ukai Iésu Kériso. Cidòri nyuâawà! \s2 Ipwaolé kà Paulo \p \v 3 Tèpa béebà naa goo Kériso, bà ciburà pwaolé tà Pwiduée ba kàwà. Ba pimaina pâ ê cèikî kàwà, bau ê pimeaari kàwà jècaa ba kà pàra tàpé. \v 4 \x - \xo 1:4 \xt 2 Korénito 7.4; 1 Tésalonika 2.19\x*Êkaa pwiri na bà ina târa pàra wâra pwapwicîri kà Pwiduée, pâ, bà nye dau ipwàdée kaa goowà. Ba guwà piwéaari ba mwü ê cèikî kàwà wâna pidàpwicâari naa na pâ aré ma tòina na wâru. \s1 Ée mwa pitèi gòropuu wà Pwi Ukai \p \v 5-6 \x - \xo 1:5-6 \xt Roma 12.19\x*Wiàna guwà tâa na aré, âna gée goo na [guwà tèpa naîri *Mwaciri kà Pwiduée. Â] é pwabwàtiwà wà Pwiduée, ba na o pâri ma guwà o tò naa na Mwaciri kêe.  é paari pâ, é *tàrù ma âjupâra, ba ée mwa pipaa dà wà tàpé na rà pipaa dàwà—[ée mwa pitèirà ma naa wârimuru tàra] gée goro pai tubaèpà tàwà kàra. \v 7 \x - \xo 1:7 \xt 1 Tésalonika 3.13\x* ée mwa naa tâjè nao, wâguwà ma wàibà, na tòotù na ée mwa wâjué me côwâ wà Pwi Ukai Iésu Kériso. \p Ba rà mwa boome gée *napwéretòotù bau tèpa *angela kêe na dau pwa pàtàmarà. \v 8 \x - \xo 1:8 \xt Ésaïe 66.15\x* é pa ê ânye na dau maina, ba na é pwa wârimuru tà tàpé na rà naa càùrà naa goo Pwiduée, ma càra caa pitêre dàra ê *Picémara Wâdé goo Pwi Ukai kâjè Iésu. \v 9 \x - \xo 1:9 \xt Ésaïe 2.10\x*Wàéni wârimuru kàra: Ê pai tubatiàurà dàra gòiri awé. Ba ée mwa nama tiàurà jiié, ma tiàurà jii pai maina ma muugère kà Pwi Ukai ma pàtàmee, dàra gòiri awé. \p \v 10 \x - \xo 1:10 \xt Kolosé 3.4\x*Ê pwi bèepwiri, âna o tèepaa na tòotù na ée mwa wâjué me côwâ na.  wà diri tèpa âboro na rà cèikî naa gooé, âna rà câdirié ma ipwamainaê.  wâguwà ma wàilà, ba guwà jèe cèikî naa gooé, na ia bà paâjupâraê tàwà. \s2 É pwapwicîri ba kàra Paulo \p \v 11 \x - \xo 1:11 \xt Kolosé 1.9; 1 Tésalonika 1.2–3\x*Êkaa pwiri na bà ciburà pwapwicîri tà Pwiduée kâjè pâ, na é pitu tàwà, ba na guwà wârori ê wâro na wâdé têe. Ba é todàwà [ma guwà wâro ba kêe co].  bà ilari jiié pâ, na é pitu tàwà goro ê pàtàmee, ba na guwà tubanabwé diri pâ muru na wâdé na nümawà na guwà pwa, gée goro ê cèikî kàwà. \v 12 Ûna wàrapwiri, â o pwamaina nee Iésu, Pwi Ukai kâjè, gée goowà.  wâguwà mwara, âna o ipwamainawà ma wàé, gée goro ê pimeaari imudi kà Pwiduée kâjè, ma Pwi Ukai Iésu Kériso. \c 2 \s1 Béaa kâra pai wâjué me côwâ kà Pwi Ukai \p \v 1 Tèpa cèikî béebà, [nümabà na bà pacâmuriwà] goro ê pai o wâjué côwâ kà Pwi Ukai kâjè Iésu Kériso, bau ê pai o naanaimarijè kêe, ba na jè tâa ma wàé. \v 2 Guwà cibwaa nama gùmagù ê pwâranümawà, wiàna rà ina pàra tàpé pâ, é jèe wâjué côwâ\f + \fr 2:2 \fq É jèe wâjué côwâ—\ft Grec: \fqa É jèe tèepaa i Tòotù kà Pwi Ukai.\f*, [ba jèkutâ na pwâ].  pwiri rà o ina pâ, nye ê *Nyuâaê Pwicîri na é nye paari tàra pwiri, wâna âcôwâ\f + \fr 2:2 \fq Ê Nyuâaê Pwicîri, na é nye paari tàra pwiri, wâna âcôwâ—\ft Grec: \fqa Gée goro ê nyuâaê. \ft Pai ina wèe pâ, \fqa vision, \ft é, \fqa prophétie \ft (popai naa na nee Pwiduée).\f*, é, rà o ina pâ, wàibà na wii tàra pwiri. \v 3 \x - \xo 2:3 \xt 1 Timotéo 4.1; 1 Ioane 2.18, 4.3\x*Bwa! Guwà cibwaa nama rà ipa-imwüruwà! \s2 Ée mwa tèepaa me ‘A cicara’ \p O càcaa pâji tèepaa i tòotù-bà, béaa kâra pai tèepaa kâra [pàra muru. Ba o mwa mara coo] ê pàara, na rà o cicara Pwiduée tèpa âboro na rà dau wâru.  ée mwa cipàpaa wà pwina ina gooé pâ \it A cicara\it*\f + \fr 2:3 \fq Acicara—\ft Pwi ukai kà tàpé na rà cicara Pwiduée, ma êgòjai pâ naèà kêe.\f*.  wà pwiibà, âna o mwa tubatiàué. \p \v 4 \x - \xo 2:4 \xt Ézékiel 28.2; Daniel 11.36\x*Ée mwa piècaari diri ê pâ namuru na pwicîri, ma diri ê pwina rà ipwamaina ma papwicîri wà tèpa âboro.  ée mwa ipwamainaê côwâ, ma ina mwara pâ, é tâdòiti jii diri pâ muru. É mwa pâra na too, na tâa na ê wâra pwapwicîri kà Pwiduée, ma inapàpari pâ, wàé Pwiduée! \v 5 Go jèe nye ina tàwà diri pâ pwiibà, na pàara na ia go bwaa tâa jaawà. É, gona guwà ipwanauri pwiri? \p \v 6 Wà A cicara, âna o càcaa pâri ma é ipaarié, béaa kâra ê tòotù kêe. Ba pwa pwina é pacooé tiagoro pwi tòotù bèepwiri.  guwà nye tâmogòori bwàti wà pwiibà\f + \fr 2:6 \ft Dernière phrase—\ft Càcaa pwéelaa tâjè nabà ê pwina é pacoo Acicara. Pwiri ê naèà kâra mwaciri kà tèpa Roma, é, ê Nyuâaê Pwicîri, é, wakè kâra wâra pwapwicîri, é wà Mikaéla, wà pwi ukai kà tèpa angela. Côo mwara \fqa Angela \ft naa na Neeremuru \fqa (Vocabulaire)\ft , ma Daniel 10.13,20–21.\f*. \v 7 Âjupâra pâ, é jèe tàgére wakè ni gòropuu, ê pàtàmee na é cicara Pwiduée. Êco na, tiagoro nabà, âna wàijè co tèpa naî Pwiduée na jè côoinaê.  wiàna é càùé côwâ wà pwina é pacooé, \v 8 \x - \xo 2:8 \xt Ésaïe 11.4; Auinapàpari 19.15\x*â wà A cicara, âna ée mwa cipàpaa. [Wàéni ê pwina o tèepaa têe na pwâadèreè]: \b \q1 Ée mwa tèepaa \q1 Pwi Ukai Iésu, \q1 na pwényuâa kêe. \q1 Ée mwa nama é bà, \q1 wiàna é upié goro pwêe. \q1 Ée mwa nama tiàué awé, \q1 goro pai tèepaa me, \q1 naa muugère kêe! \b \m \v 9 \x - \xo 2:9 \xt Auinapàpari 13.11–13\x*[Êco na, béaa kâra pwiibà, âna] wà A cicara, âna ée mwa pwa pâ câmu na wâru, goro ê pàtàma *Caatana—ê pâ muru na rà o pò goo wà tèpa âboro, â o ipa-imwürurà goo. \v 10  o wâru mwara pâ muru na èpà, na ée mwa pwa, ba na é pwâgàri tèpa âboro. Wà tàpéebà, âna o tiàurà awé, ba tàutàra goo ê âjupâra. Ba wiàna rà gére tòpi, â pwiri rà o udò, [â o tâa tàra ê *âji wâro]. \p \v 11 Nye wà Pwiduée, na [é panuâ ma o wàrapwiri, ba] é panuâ ê pwi pàtàmee-bà na èpà, ma é ipa-imwürurà.  rà o cèikî naa goo ê pwina pwâ. \v 12  ée mwa tèirà ma naa wârimuru tàra, gée goo na wâdé tàra na rà pwa na èpà, jii na rà cèikî naa goro ê âjupâra. \s1 Bénabwé popai \p \v 13 \x - \xo 2:13 \xt Éféso 1.4; 2 Tésalonika 1.3\x*Tèpa cèikî béebà, dau wânüma Pwi Ukai tàwà, â wâdé na bà ciburà pwaolé têe goowà! Ba é jèe tàmara pitòrigariwà napwiri\f + \fr 2:13 \fq Napwiri—\fl é, \fqa Béaa kâra diri tèpa âboro.\f*, ba na é pa-udòwà [ma o tâa tàwà ê âji wâro].  é wàrapwiri goro ê Nyuâaê Pwicîri kêe, na é nama guwà tèpa âboro pwicîri kà Pwiduée, â gée goro pai cèikî kàwà naa goro ê âjupâra. \v 14  é todàwà, na ia bà picémara tàwà ê *Picémara Wâdé, ba na guwà tâa na pai maina ma muugère kà Pwi Ukai kâjè Iésu Kériso. \v 15 Êkaa na wàrapwiri, co tèpa béebà, na wâdé na guwà tà mwü [naa na cèikî kàwà].  guwà cimwü naa goo ê popai na ia bà naa tàwà, naa na pwâratùra, é, na bà wii tàwà naa na pâ tii. \p \v 16 Wà Pwiduée Caa kâjè, âna dau wânümee tâjè.  gée goro ê *pimeaari imudi kêe, â é nye ciburà pagòojè dàra gòiri.  é jèe naa tâjè ê cèikî na maina, na pàara na jè bwaa tapacîri diri pâ wâdé na ée mwa naa tâjè.  bà ilari jiiru ma wà Pwi Ukai Iésu Kériso pâ, \v 17 na ru pagòowà, ba na [o câguwà caa piwâ na] guwà ciburà pwa ma ina ê pwina wâdé! \c 3 \s2 Guwà pwapwicîri ba kâbà \p \v 1 Bà tubanabwé [ê pâ auniimiri kâbà bèepwiri] co tèpa béebà naa goo Kériso, na bà ilari jiiwà pâ, guwà pwapwicîri ba kâbà. Guwà ilari jii Pwi Ukai pâ, na é ipâra pâ wài i popai kêe, â na rà papwicîri ê popai wà tèpa âboro, na diri pâ ére, pwacèwii na guwà pwa. \v 2  guwà ilari mwara, ba na é wéaaribà jii tàpé na èpà pwâranümarà. Ba wâru tàpé na rà cicara ê popai kâjè. \p \v 3 Êco na wà Pwi Ukai, âna é tâa na pai tâa kêe, â ée mwa nama guwà gòo, â ée mwa piwéaariwà jii wà *Caatana, Pwi âboro èpà. \v 4 \x - \xo 3:4 \xt 2 Korénito 7.16; Galatia 5.10\x* é nye pagòobà mwara wà Pwi Ukai, ba na bà tâmogòori pâ, guwà tàgére pâra wiâra ê pâ pitûâ kâbà, â guwà o wàrapwiri dàra gòiri. \p \v 5 Go pwapwicîri tà Pwi Ukai pâ, na é popa pwâranümawà naa na pimeaari kà Pwiduée [na é wâgòro]. Â, na é nama pimaina too naa goowà ê pai pidàpwicâari, na me gée goo Kériso. \s2 Wakè ba gòo pwacèwiibà! \p \v 6-7 \x - \xo 3:6-7 \xt Roma 16.17\x*\x - \xo 3:6-7 \xt Filipi 3.17\x*Tèpa cèikî béebà, bà pitûâri tàwà, naa na nee Pwi Ukai Iésu Kériso, pâ, guwà cibwaa tâa jaa wà tèpa cèikî na rà pwaora—wà tàpé na càra caa pâra wiâra ê aupamogòori kâbà, pâ, napârajè na jè wakè bwàti.  guwà pwacèwiibà. Ba câbà caa tèpa pwaora naa jaawà, \v 8 \x - \xo 3:8 \xt 1 Tésalonika 2.9\x*â câbà caa po tâa, ba na guwà mwa po géaa goobà\f + \fr 3:8 \ft 1\+ord re\+ord* phrase—\ft Grec: \fqa Câbà mu caa ija ê poloa kà pwi jèpwi.\f*. Bà nye wakè ba gòo, naa ne ma pwaa, ba na câbà caa nakake kàwà. \p \v 9 \x - \xo 3:9 \xt 1 Korénito 9.4; 1 Tésalonika 1.6\x*Âjupâra pâ, pwa tàrù kâbà, ma bà ilari jiiwà pâ, na guwà pitu tâbà. Êco na nümabà na guwà picòo gée goobà. \v 10 Ba, na ia bà tâa jaawà, âna bà naa tàwà ê popai bèeni, pâ: Wà pwina câé caa wakè, âna wâdé na câé caa ija! \p \v 11 \x - \xo 3:11 \xt 1 Timotéo 5.13\x*Bà wii tàwà pwiri, ba bà têre pâ, pwa pàarawà na rà pwa ciritàu, â tàutàra dàra wakè!  rà nye tà géaa ma tùra goo ê wâro kà pàra tàpé. \v 12 \x - \xo 3:12 \xt 1 Tésalonika 4.11\x* bà tacoo goorà, naa na nee Pwi Ukai Iésu Kériso pâ, na rà wârori ê wâro na pitòimiri ma moo, â na rà wakè dàra cè uti kàra. \s2 Pwa taaci pwina wâdé \p \v 13 \x - \xo 3:13 \xt Galatia 6.9\x*Tèpa béebà naa goo Kériso, â guwà cibwaa nama oratàwà goro pwa ê pwina wâdé. \v 14 Guwà côo bwàti tàpé na tàutàra na rà pitêre dàra ê pwina bà ina tàwà naa na tii bèeni.  guwà cibwaa pagòorà naa goro ê pwina rà pwa\f + \fr 3:14 \ft 2\+ord e\+ord* phrase—\ft Grec: \fqa Guwà cibwaa pabéerà.\f*. Ba wâdé na rà kamu goo. \v 15 \x - \xo 3:15 \xt 1 Tésalonika 5.14\x*Êco na guwà cibwaa côorà pwacèwii na guwà pièpàriwà.  guwà nye ciburà pwa pupûra tàra. Ba wâdé na wàrapwiri naa jaajè tèpa cèikî. \s2 Ipicijii \p \v 16 Wà Pwi Ukai, âna é pwi a naa pinaanapô, â go ilari jiié pâ, na é ciburà naa tàwà ê pinaanapô, na diri pâ pai pwa wèe. Wâdé na é tâa jaawà diri! \p \v 17 Wâgo Paulo, na go popa i bépwa tii, ba na go tubanabwé i tii. Ba go nye wàrapwiri târa diri pâ tii kôo, ba [na paari pâ, nye âjupâra pâ] wâgo na go wii. \p \v 18 Wâdé na tâa jaawà diri ê *pimeaari imudi kà Pwi Ukai kâjè Iésu Kériso! \cls Cidòri nyuâawà!