\id 2PE \h 2 Pétéru \toc1 2 Pétéru (2 Pierre) \toc2 2 Pétéru \toc3 2 Pétéru \mt2 Béârailu kâra tii \mt3 kà \mt1 Pétéru \imt1 Bétapoo popai \is1 Wàilàapà na wii tii bèeni? \ip Wà Simona Pétéru, pwi jè a *câmu kà Iésu Kériso, pwi âboro imaina naa na wâra pwapwicîri. \is1 É wii wiidà? \ip Nabibiu kâra *naja 65 ma 67. É wii wà Pétéru gée *Roma, càcaa gòiri béaa kâra ê pai bà kêe naa goro *satauro, pwacèwii wà Iésu. \is1 É wii tâî? \ip Tà diri tèpa cèikî naa goo wà Iésu Kériso. \is1 Cina é wii? \ip Na pàara na é wii, âna wâru tèpa pwa pupûra na tèpa pwâ na rà pa-imwüru tèpa cèikî jii ê popai na âjupâra goo wà Iésu.  é wii wà Pétéru, ba na é pa-icôo wà tèpa cèikî, ba na rà cibwaa pâra wiârà.  é wii mwara, ba na é picijiirà, ba é tâmogòori pâ ée jèe tàpo bà. \is1 Dà êre ê tii bèeni? \ip Wà Pétéru, âna é pagòojè, ba na jè ciburà pâra wiâ Iésu, ba na o ciburà pimaina pâ ê *pimeaari imudi naa goojè, ma pai tâmogòorié kâjè. Ée nye wâjué côwâ wà Pwi Ukai Iésu Kériso, â na jè cibwaa ipacè naa goo wà tàpé na rà ina pâ, o càcaa wàrapwiri. O maina ê wârimuru kà tèpa pwa pupûra na rà tèpa pwâ. Wâru pâ popai, na ipaiwà bau ê pâ popai na ê \bk Tii kà Jude\bk*. \is1 Pai pitàgoo tii 2 Pétéru \io1 Ipwabwàcu \ior (1.1–2)\ior* \io1 Wârori wâro na wâdé tà Pwiduée \ior (1.3–21)\ior* \io1 Tèpa pwa pupûra na rà tèpa pwâ \ior (2.1–22)\ior* \io1 Ée mwa nye tèepaa côwâ Pwi Ukai \ior (3.1–13)\ior* \io1 Bénabwé popai ma ipicijii \ior (3.14–18)\ior* \ie \c 1 \s2 Ipwabwàcu \p \v 1 Wâgo Simona Pétéru [na pwa tii]. Go pwi ênawéna kà Iésu *Kériso, ma pwi apostolo kêe [ba é cùruo pâ, ba na go picémara ê popai kêe]. Go cau wii tàwà, wâguwà na caapwi cèikî kâjè ma wâguwà. Ê cèikî kâjè bèepwiri, âna muru na dau pwényuâa, ba jè jèe tòpi gée goo wà Iésu Kériso, na é Pwiduée kâjè ma *pwi a pa-udòjè. Dau *tàrù diri pai pwa kêe, â câé caa pwaké goojè, ûna é cau naa tâjè diri ê cèikî bèepwiri\f + \fr 1:1 \ft Dernière phrase—\fl é, \fqa Wàé na é nama jè tàrù na ara Pwiduée. \ft Grec: \fqa Gée goro pai tàrù kêe.\f*. \p \v 2 Wâdé na ru *pwényunyuâariwà wà Pwiduée kâjè ma wà Pwi Ukai kâjè Iésu Kériso\f + \fr 1:2 \ft 1\+ord re\+ord* phrase—\fl é, \fqa Wà Iésu Kériso na é Pwiduée ma Pwi Ukai kâjè.\f*. Wâdé na o ciburà pimaina pâ ê pai tâmogòoriru kàwà, ba na o pimaina pâ naa goowà ê pimeaari imudi, ma pinaanapô kàru! \s1 Wârori wâro na wâdé tà Pwiduée \p \v 3 É todàjè wà Pwiduée, ba na jè tâa na ê pai maina ma muugère kêe!  gée goo pai tâmogòorié kâjè, â pâri ma jè wârori ê wâro na pwicîri ma wâdé têe.  wà Pwi Ukai\f + \fr 1:3 \fq Pwi Ukai—\ft Munaa Iésu, é, pwiri Pwiduée.\f*, âna é naa tâjè diri ê pwina âjimuru, ba na wàrapwiri ê pai wâro kâjè, goro ê pàtàma Pwiduée. \v 4 Gée goo diri pwiri, â é naa tâjè wà Pwiduée i pwi ia é mara ina béaa—diri pâ *aupwényunyuâari na dau pwényuâa ma dau maina awé! Guwà cipa bwàti, ba na o tipiwà jii ê pâ câbawâdé na èpà, na tubaèpà tà tèpa âboro gòropuu!  o caapwi ê pwâranümawà ma wà Pwiduée, â guwà o pwacèwiié. \p \v 5  guwà ipwadàrapwa, ba na ê cèikî kàwà, âna ée tòpò naa goowà ê pâ pwêe bèeni: \b \li1 Guwà wârori ê wâro na wâdé ma tàrù; \li1 Guwà tâmogòori Pwiduée, â o pimaina too ê pai tâmogòorié kàwà; \li1 \v 6 \x - \xo 1:6 \xt Galatia 5.22–23\x*Guwà piaabòriwà; \li1 Guwà pidàpwicâariwà; \li1 Guwà papwicîri wà Pwiduée, ma pitêre dèe; \li1 \v 7 Guwà dau meaari tèpa cèikî béewà; \li1 Guwà meaari diri tèpa âboro. \s2 Nama pimaina too pwina wâdé \p \v 8 Wiàna guwà nama rà pimaina too, pâ muru wâdé bèepwiri, naa goowà, â o pwa ê pwâra wakè na wâdé na me gée na wâro kàwà. Â, na wàrapwiri, â guwà paari pâ guwà tâmogòori\f + \fr 1:8 \fq  guwà paari pâ guwà tâmogòori—\fl é, \fqa  o pimaina too ê pai tâmogòori kàwà.\f* wà Pwi Ukai kâjè Iésu Kériso. \v 9 Êco na wà tàpé na tiàu goorà pâ pwêe bèepwiri, âna rà pwacèwii tèpa bwi. Ba càra caa côoina i pwi ia rà tòpi [na ia *upwaarà]—ê pai cèitiri diri pâ èpà kàra. \p \v 10 Wà Pwiduée, âna é pitòrigariwà, co tèpa béeò, â é todàwà, ba na guwà tèpa âboro kêe.  wâdé na guwà dau gòo goro wârori ê wâro ma *paâjupâra pâ, guwà tèpa âboro kêe. Ba wiàna wàrapwiri, â o càcaa cigòtù âwà, â o câguwà caa tûu. \v 11  ée mwa bàra tòpiwà naa na ipwàdée, naa na Mwaciri kà [Pwina naîê] Iésu Kériso, Pwi Ukai kâjè ma *pwi a pa-udòjè—naa na Mwaciri na ticè pwâadèreè. \s2 O càcaa gòiri â ée bà Pétéru \p \v 12 Guwà jèe nye tâmogòori bwàti diri pâ muru bèepwiri na go ina ni, â guwà jèe nye tà cimwü naa pai wâro kàwà wiâra ê âjupâra. Êco na câgo caa piwâ na go taniimiri tàwà mwara. \v 13  go niimiri pâ, go o nye tà ciburà wàrapwiri, na go bwaa tâa ni gòropuu. \v 14 \x - \xo 1:14 \xt Ioane 21.18–19; 2 Korénito 5.1\x*Ba é jèe paari tôo wà Pwi Ukai Iésu Kériso, pâ, o càcaa gòiri, â go jèe pâra jiiwà géeni. \v 15 Â, na go wakè ba gòo ni, ba na guwà o ciburà tà niimiri diri ê pwina go ina tàwà ni, gée na càùru pai pâra kôo. \s2 Bà piwiâ tàwà pwina bà côo \p \v 16 \x - \xo 1:16 \xt Mataio 17.1–5\x*[Wàibà ma wà tèpa apostolo béeò, âna] bà jèe inapàpari tàwà ê pàtàma wà Pwi Ukai Iésu Kériso, ma cè pai o mwa wâjué me côwâ kêe.  càcaa cè jè jèmaa kà tèpa âboro, â càcaa jèkutâ, na me gée goo ê tàmanga kâbà. Ba bà piwiâ tàwà co ê pwina bà côo goro du âraporomeebà. \fig Bà côo ê pai maina ma muugère kà Pwi Ukai Iésu|src="148 CN01728B.TIF" size="col" ref="1.16-18" \fig* \p Ba bà côo ê pai maina ma muugère kà Pwi Ukai Iésu, \v 17-18 \x - \xo 1:17-18 \xt Mataio 17.5\x*na ia bà tâa gò i gòrojaa na pwicîri.  bà têre ê pwâratùra kà Pwiduée—pwi Caa kâjè na é maina ma pwényuâa—na é dau pwamaina ma tòbuari Iésu [béaa kâbà]. Ba é inapàpari pâ: «Wà pwini, âna wàé co kaa pwiri wà Pwina naîô, na caapwi co, na go dau meaarié. Wàé kaa, na go jèe nye pitòrigarié, ba dau wânümoo gooé.» \s2 Tii Pwicîri âna popai kà Pwiduée \p \v 19 Gée goo kaa pwiri\f + \fr 1:19 \fq Gée goo kaa pwiri—\ft Pai ina wèe pâ, gée goo na coo ê popai na ia rà mara pame wà tèpa péroféta biu, goro ê pai maina ma muugère kà Kériso.\f*, â pâri ma jè cèikî naa goo diri pâ popai kà tèpa péroféta, ma naa nümajè naa goo. Ba rà pwacèwii ê wâra ânye na pwéelaa na bàutê, tapacîri ê pai too kâra îricò kaatàdaa\f + \fr 1:19 \fq Îricò kaatàdaa—\fqa Étoile du matin.\f* na é pame i tòotù, [âna wà Kériso] na é jèe tèepaa me naa na pwâranümajè! \p \v 20 Ê popai [kà Pwiduée, na tâa] na *Tii Pwicîri, âna rà naigé mee tèpa péroféta kêe.  gà cibwaa niimiri pâ, pâri ma gà tâmogòori acari\f + \fr 1:20 \ft 2\+ord e\+ord* phrase—\ft Tèi bwàti ê Popai kà Pwiduée, âna wakè kâra diri ê wâra pwapwicîri. \fl É, \fqa Wâdé na guwà tâmogòori pâ, ticè popai na Tii Pwicîri na é me gée goo ê auniimiri kà tèpa péroféta.\f* diri ê pai ina wèe. \v 21 \x - \xo 1:21 \xt 2 Timotéo 3.16; 1 Pétéru 1.11–12\x*Ba ê popai na rà pame wà tèpa péroféta, âna càcaa muru gée goorà tèpa âboro.  nye ê Nyuâaê Pwicîri na wakè goorà, ba na rà pame ê popai na me gée goo wà Pwiduée. \c 2 \s1 Tèpa pwa pupûra na rà tèpa pwâ \p \v 1 \x - \xo 2:1 \xt Mataio 24.11; Jude 1.4\x*Napwiri, âna rà tèepaa mari ê Ba *Isaraéla pâ péroféta na rà pwâ\f + \fr 2:1 \fq Pâ péroféta na rà pwâ—\ft Rà ina pâ, rà pame pâ popai naa na nee Pwiduée, êco na rà tèpa pwâ.\f*.  o ipaiwà nabàni. Ba rà o tèepaa mariwà pwàniri tèpa pwa pupûra na rà tèpa pwâ.  rà mwa ina pâ, rà tèpa âboro kà Pwi Ukai kâjè. Êco na rà o tèpa tétâjiié—wàé na ia é pipanuâê, ba na é wârirà [goro ê wâri wèe na dau maina awé].  rà o ipa-imwüru tèpa âboro ma pwa ma tûu ê cèikî kàra\f + \fr 2:1 \ft 5\+ord e\+ord* phrase—\ft Grec: \fqa Rà pame popai na nama tiàu (doctrines de perdition).\f*. Êco na nye wàilà côwâ, na o dau wàcî ma dau èpà, ê pai tubatiàurà! \p \v 2 O wâru tàpé na rà o pâra wiâra ê ârapupûra kàra, ma ê pâ tûâ kàra na miiri goro naiirà.  gée goo pwiri, â o ina ba èpà ê âji naigé [wiâ Kériso]. \v 3  wà tèpa pwa pupûra bèepwiri na rà tèpa pwâ, âna rà o tèpa iau ma piâranümarà mwani.  rà o pwa cuka tàwà, ba na rà popa mwani kàwà. Êco na o càcaa wâiti ê pai tubatiàurà. Ba é jèe niimiri [wà Pwiduée] gée na biu pâ, na ée mwa naa wârimuru tàra. \s2 Rà o pwa wârimuru \p \v 4 \x - \xo 2:4 \xt Jude 1.6\x*Ba câé caa piwâ wà Pwiduée, na é naa wârimuru tà tèpa *angela na ia rà cicaraé. Ba é jèe nye pwairi türà naa na ére na dau bàutê, tapacîri ê tòotù na ée mwa pitèi ê gòropuu. \p \v 5 \x - \xo 2:5 \xt Genèse 6–8; Hébéru 11.7; 2 Pétéru 3.6\x*Jèpwi mwara, âna, na pàara biu, âna câé caa piwâ, na é nama tiàu tèpa âboro èpà gòropuu na càra caa papwicîriê. Wà pwi âboro na é caapwi, wà Noa, âna é pwa pupûra tàra pâ, na rà wârori ê wâro na *tàrù na ara Pwiduée, [êco na tàutàra dàra pitêre dèe].  rà cau bà naa na pé jèpé na dau maina awé, na é pâ jai ê gòropuu diri.  nye 8 co tàpé na rà udò—wà Noa ma ê tâa kêe. \p \v 6 \x - \xo 2:6 \xt Genèse 19.24; Jude 1.7\x*Jèpwi mwara, âna wà Pwiduée, âna é nama tiàu ê du ville *Sodoma ma Gomora.  nye ticè na coo, êco ê dàuru ânye. É wàrapwiri, ba na câmu kêe târa diri cè pâ âboro na o tàutàra na rà papwicîriê, na pâ tòotù na bwaa wâ naigé. \v 7-8 \x - \xo 2:7-8 \xt Genèse 19.1–16\x*Êco na pwa pwi jè âboro na caapwi, gée goorà, na *tàrù ê tûâ kêe na ara Pwiduée—âna wà Lota\f + \fr 2:7-8 \fq Lota—\ft Pwi niaa goo wà Abéraama. (Côo \fl note \ft goo Luka 17.28.)\f*.  diri pâ tòotù, âna é côo ma têre pâ muru na miiri na rà pwa wà pàra tèpa âboro wê.  dau tòina ê pwâranümee goo, ba é côo pâ muru na càcaa *tàrù na ara Pwiduée.  gée goo kaa pwiri, â wà Pwiduée, âna é upaé jii ê ânye. \p \v 9 Guwà côo, é nye tâmogòori wà Pwi Ukai cè pai upa tàpé na rà papwicîriê, jii ê pâ aré kàra.  napwa naa goo tèpa âboro èpà, âna é tòpòrà naa na karapuu\f + \fr 2:9 \fq É tòpòrà naa na karapuu—\fl é, \fqa É naa wârimuru tàra naa na karapuu.\f*, tapacîri pwi tòotù na ée mwa bàra pitèi ê gòropuu diri. \v 10 \x - \xo 2:10 \xt Jude 1.7-8, Jude 1.16\x* o dau maina ê wârimuru, na ée mwa naa tà tàpé na rà wâro wiâra ê pâ câbawâdé kàra na èpà, ma pwa pâ tûâ na miiri goro naiirà.  ipaiwà naa goo wà tàpé na rà câbapiticèmuru naa goo ê pitûâ kêe. \s2 Rà tèpa maina nüma \p [Rà wàrapwiri wà tèpa pwa pupûra na rà tèpa pwâ.] Ba rà tèpa maina nüma, â rà nye pwa diri kaa ê pâ na pwâra èpà.  càra caa piwâ na rà ina ba èpà tàpé na pwa pàtàmarà\f + \fr 2:10 \fq Tàpé na pwa pàtàmarà—\ft Grec: \fqa Tàpé na rà pwényuâa. \ft Pwiri tèpa angela, é, tèpa ênawéna kà tèpa angela, é, tèpa duée, é, tèpa âboro na rà pitûâ naani gòropuu. (Côo Jude 8.)\f*. \v 11 \x - \xo 2:11 \xt Jude 1.9\x* guwà côo, wà tèpa angela, na dau pwa nii ma pàtàmarà jiirà\f + \fr 2:11 \fq Jiirà; Tàpéebà—\ft Pwiri tèpa pwa pupûra na rà tèpa pwâ, \fl é, \ft pwiri \fqa tèpa pitûâ na pwényuâa.\f*, âna càra caa niimiri pâ, na rà pinabaèpà tàpéebà na ara wà Pwiduée! \v 12 \x - \xo 2:12 \xt Jude 1.10\x*Êco na wà tèpa pacâmu-bà, âna càcaa wâgotàra na rà piècaari ê pâ muru [na dau piwéna jiirà] na ticè na rà tâmogòori naa goo. \p Napwa naa goo ê wâro kàra, âna rà pwacèwii ê pâ macii a piugà, na ticè nümarà, na rà tâa ni gòropuu, ba na o capwârirà ma pòtàmwararà.  ê pâ tûâ kàra na miiri, âna poparà dàra ê wârimuru dàra gòiri\f + \fr 2:12 \fq Wârimuru dàra gòiri—\ft Grec: \fqa Pwâra bà.\f*. \v 13  o tubaèpà tàra, pwacèwii pai tubaèpà kàra tà pàra tàpé. \p Wà tèpa âboro-bà, âna rà pwâgàriwà, wâguwà [tèpa âji a cèikî] ba rà tâmogòori pwàniri èpà kàra, na rà tâa na pi-ija kàwà, â rà tubatòri ê picaatâa kàwà, ma tubakamuwà. Ba: \b \li1 Rà pwa pàpari ê pâ muru na miiri; \li1 \v 14 Rà ciburà ucâri pa ilàri, â èpà pwâranümarà goo; \li1 Rà nye tà nümarà dàra pwa taaci pâ câbawâdé na èpà; \li1 Rà mudàra taaci pâ muru na rà iari; \li1 Rà picàù dà tàpé na càcaa cimwü ê cèikî kàra, ba na rà pwa na èpà. \b \m Gée goo kaa diri pwiri, â é jèe tojiirà wà Pwiduée, â ée mwa naa tàra ê wârimuru na dau maina. \fig É patùra Balaam ê buriko kêe|src="149 CO00867B.TIF" size="col" ref="2.14" \fig* \v 15-16 \x - \xo 2:15-16 \xt Nombres 22.7; Jude 1.11; Auinapàpari 2.14\x*\x - \xo 2:15-16 \xt Nombres 22.28–35\x*Ba rà jèe pàgà jii ê naigé na tàrù, â rà pwaduwà kà Balaam biu, wà pwina naî wà Béor\f + \fr 2:15-16 \fq Béor—\fl é, \fqa Bosor.\f*. Ba wàé pwi *péroféta a pwâ, â dau wâdé têe pai tòpi mwani târa pwa na èpà. Êco na wà Pwiduée, âna é pwaé, goro ê pâ tûâ kêe na èpà.  é pacooé jii ê pwina é niimiri na ée mwa pwa goro pai ticè nümee. Ba é nama é patùraé ê buriko kêe, goro ê pwâratùra kà pwi jè âboro! \s2 Rà tèpa ênawéna kîri kâra èpà \p \v 17 \x - \xo 2:17 \xt Jude 1.12–13\x*Wà tèpa pwa pupûra na rà tèpa pwâ, âna [ticè muru na wâdé na rà pame]. Rà pwacèwii pâ pwârajawé na ticè jawé na, ma pâ nee na pòtòrà ê pwéretòotù—po duu [êco na ticè popaa na]. Wà tàpéebà, âna é wéaari ê autâa kàra wà Pwiduée, naa na bàutê, na nye cikautê kaa. \p \v 18 Maina nümarà ma maina pwârà, â rà pi-ina kàra goro pâ nyakâra pwâratùra na ticè êreê.  rà cètùu tàpé na rà me jii ê pai wâro na èpà, ba na rà pwa côwâ diri ê pâ càrarà na miiri. Ba rà ina tàra pâ, wâdé na jè pâra wiâra diri pâ câbawâdé kâra naiiri âboro. \p \v 19 Ba rà ina pâ rà tipiwà jii ê pwina piiwà, [ba na o câguwà caa tèpa ênawéna kîri kâra cè pâ naèà]. Caapwi co na wàilà, âna [piirà goro pâ tûâ kàra na miiri] ma tèpa ênawéna kîri kâra pâ càrarà, na rà gére poparà dàra ê pai tubatiàurà! Ba wà pwi jè âboro, âna é pwi ênawéna kîri kâra ê pwina pa pitûâ naa gòé. \p \v 20 \x - \xo 2:20 \xt Mataio 12.45\x*Béaa, âna rà tâmogòori Pwi Ukai kâjè ma *pwi a pa-udòjè, wà Iésu Kériso.  é jèe tipirà jii ê pâ tûâ na miiri kà tèpa âboro gòropuu. Êco na rà wâjué côwâ, ba na rà tèpa ênawéna kîri côwâ kâra ê èpà. Dau pwaée kàra! Ba rà jèe dau èpà jii béaa! \p \v 21 \x - \xo 2:21 \xt Luka 12.47–48\x*Béaa, âna rà tòpi ê aupitûâri na pwicîri [jii Pwi Ukai] â rà tâmogòori ê naigé na tàrù. Êco na rà tétâjii diri, â bwaa nye wâdé naa goorà wiàna càra caa tâmogòori ê âjupâra! \v 22 \x - \xo 2:22 \xt Proverbes 26.11\x*Jè côo naa goorà pâ, nye âjupâra ê du ârailu auina bèeni: \qt É ija côwâ i wéregaa kêe i akàna.\qt*\rq Proverbes 26.11\rq*  «Jè nuwa i puàkà, â é wâjué côwâ naa na dùuru.» \c 3 \s1 Ée mwa nye tèepaa côwâ Pwi Ukai \p \v 1 Tèpa âji béeò wée, wàéni ê béârailu kâra tii na go wii tàwà, ba na go taniimiri tàwà diri pâ muru bèepwiri, ma pagòowà, ba na o *tàrù ma pwicîri ê aunünüma kàwà. \v 2 \x - \xo 3:2 \xt Jude 1.17\x*Wâdé na guwà pitaniimiri ê pâ popai na rà mara ina béaa wà tèpa *péroféta pwicîri kà Pwiduée.  guwà wéaari ê aupitûâri kà Pwi Ukai, *pwi a pa-udòjè, na ia rà jèe inapàpari tàwà wà tèpa *apostolo kàwà. \p \v 3 \x - \xo 3:3 \xt 1 Timotéo 4.1; Jude 1.18\x*Wàéni ê popai na dau âjimuru, na wâdé na guwà tâmogòori bwàti. [Ba jèe mara ina tàwà pâ] rà o mwa tèepaa medariwà, na pâ bénabwé tòotù, wà tèpa âboro na rà pâra co wiâra ê pâ câbawâdé kàra na èpà. \p  rà o piècaariwà, \v 4 \x - \xo 3:4 \xt Mataio 24.48\x*ma rà ina tàwà pâ: «Gona é wâpà wà pwi [Iésu kàwà] na ia é ina pâ ée mwa wâjué côwâ? O câé mwa caa me! Rà jèe maagé bà wà tèpa mara cèikî naa gooé\f + \fr 3:4 \fq Wà tèpa mara cèikî naa gooé—\ft Grec: \fqa Wà tèpa caa kâjè.\f*, [â càra caa côoê]! Ba nye ticè cè jè muru naani gòropuu cèna pitòotéri gée na autapoo goo!» \p \v 5 \x - \xo 3:5 \xt Genèse 1.6–9\x*Wà tèpa pitaurèe na rà ina pwiri, âna tàutàra na rà côoinari pâ, wà Pwiduée, âna é tòpò ê gòropuu bau napwéretòotù, goro ê popai kêe. Ba é dàgòtù ê pâ napô gée najawé, ba na é cibèepi ê pâ napô ê najawé. \v 6 \x - \xo 3:6 \xt Genèse 7.11; 2 Pétéru 2.5\x* gée na càùé, â é nama tiàu ê pâ napô goro jawé. Ba é panuâ pâ i jèpé na dau maina. \p \v 7 [Wàépwiri ê pwina go ina]: Wiàna ru tâa ê napwéretòotù ma ê gòropuu nabàni, âna nye gée goro kaa ê popai kà Pwiduée.  é wéaari diri pâ muru goro ê popai kêe, tapacîri ê Tòotù na ée mwa cau pitèirà diri. Â, na pwi Tòotù-bà, âna ée mwa cîri napwéretòotù ma gòropuu, bau diri tèpa âboro na tàutàra na rà papwicîriê. \s2 É ipwâ ba é dau meaarijè \p \v 8 \x - \xo 3:8 \xt Psaume 90.4\x*Êco na wâguwà, co tèpa béeò, âna guwà cibwaa ipwanauri pâ: «Ê caapwi tòotù, âna pwacèwii 1 000 naja, naa na pai côo kà Pwi Ukai.  ê 1 000 naja, âna pwacèwii caapwi tòotù.» \p \v 9 \x - \xo 3:9 \xt Habakuk 2.3; 1 Timotéo 2.4\x* wàépwiri na guwà côo pâ, càcaa âjupâra ê auina kà pàra tàpé pâ, wà Pwi Ukai, âna é ipwâ ma é pacoo ê auina kêe! Bwa! [É cau tapacîjè] ba é dau moo ma pidàpwicâariê naa goojè tèpa âboro. Ba o càcaa wâdé têe wiàna o tiàu awé cè pwi jè âboro caapwi. [ é naa tà tèpa âboro diri ê pàara] ba na rà biirà dèe, jii ê pâ èpà kàra, [ma rà o cau udò]. \p \v 10 \x - \xo 3:10 \xt Mataio 24.29,35; Luka 12.39; 1 Tésalonika 5.2\x*Êco na ée mwa nye wâjué me côwâ wà Pwi Ukai. [ ée mwa papò tèpa âboro] pwacèwii pwi a mura. Rà o mwa têre ê aié na dau maina awé, â rà pwùkùru goo, ba o tùdàrù ê napwéretòotù.  o tòotiàu diri pâ îricò naa na pé diopwaa kâra ânye.  o tubatiàu\f + \fr 3:10 \fq Tubatiàu—\fl é, \fqa Pitèi.\f* ê gòropuu, ma diri pâ muru na tâa na! \s2 Wârori wâro na pwicîri \p \v 11 Wiàna o tiàu diri, â o dà cè càrawà ni? Wàéni: Guwà wârori ê wâro na pwicîri ma wâdé tà Pwiduée, â guwà piênawéna kêe co. \v 12  guwà dau wàrapwiri, ba na ée mwa tèepaa me wài ê pwi Tòotù bèepwiri\f + \fr 3:12 \fq  guwà dau wàrapwiri… \fl é, \fqa  guwà ipwàdée goro pai o tèepaa me kâra pwi Tòotù bèepwiri.\f*, [na ée mwa pitèi diri pâ muru wà Pwiduée]; pwi tòotù na o tòo diri ê napwéretòotù bau ê gòropuu. \v 13 \x - \xo 3:13 \xt Ésaïe 65.17, 66.22; Auinapàpari 21.1,27\x*Ba é jèe mara ina béaa pâ, na ée mwa tòpò ê napwéretòotù ma gòropuu na bwaa âmuê.  diri pâ muru na o mwa tâa wê, âna rà o wâro wiâra ê câbawâdé kà Pwiduée\f + \fr 3:13 \ft 2\+ord e\+ord* phrase—\ft Grec: \fqa Ée mwa tâa wê ê tàrù.\f*.  wàépwiri ê gòropuu na jè tapacîri naa na ipwàdée! \s1 Bénabwé popai \p \v 14 Gée goo kaa pwiri, co tèpa âji béeò, guwà ipwadàra, ma guwà wârori ê wâro na pwicîri, târa tapacîri ê pwi Tòotù bèepwiri. Ba wiàna guwà wàrapwiri, â o ticè èpà goowà, na ée mwa pitèiwà goo wà Pwiduée.  o pwa pinaanapô nabibiu kàwà ma wàé. \p \v 15-16 \x - \xo 3:15-16 \xt Roma 2.4\x*[Gorodà na é ipwâ na é wâjué me côwâ wà Pwi Ukai?] Gée goo co ê pai moo ma pidàpwicâariê kêe!  guwà cibwaa ipwanauri pâ, wâguwà, âna upawà jii ê wârimuru gée goo kaa pwiri!  wàépwiri i pwi ia é mu wii tàwà wà Paulo, pwi âji béejè na dau wânümajè gooé. É inapàpari ê pâ pwi bèepwiri na diri pâ tii kêe, goo ê autâmogòori na é naa têe wà Pwiduée. \p Âjupâra pâ, pàra popai kêe, âna tàpo pwacoé pai tâmogòori wèe.  wà pàra tèpa âboro, âna rà ébii ê pwina é ina. Wà tàpéebà, âna càra caa wàawà naa na âjupâra, â càra caa tèpa âji a câmu [goro ê *Tii Pwicîri].  rà wàrapwiri mwara târa pàra ére auwii naa na Tii Pwicîri.  gée goo kaa pwiri, â rà pame naa gòrà ê wârimuru kàra na ticè pwâadèreè. \s2 Ipicijii \p \v 17 \x - \xo 3:17 \xt Maréko 13.33; 1 Korénito 10.12\x*[Go wii ê tii bèeni, ba na] go mara pa-icôowà, goo wà tèpa [pwa pupûra na rà tèpa pwâ, na] càra caa papwicîri ê pwina tàrù! Êkaa na guwà tà tàcî!  guwà ipwacôoco, ba rà péa ipa-imwüruwà, â guwà péa tûu, gée na pai cimwü kàwà. \p \v 18 Wâdé na o pimaina pâ naa goowà ê *pimeaari imudi kà Pwi Ukai kâjè ma pwi a pa-udòjè wà Iésu Kériso. Wâdé na pimaina pâ ê pai tâmogòorié kàwà! Wâdé na tâa jaaé ê pai maina ma muugère, nabà ma dàra gòiri awé! \cls Wâdé na wàra! Amen!