\id 1TH 1Th 
\h 1 Tésalonika 
\toc1 1 Tésalonika (1 Thessaloniciens) 
\toc2 1 Tésalonika 
\toc3 1 Tésalonika 
\mt2 Pâbéaa kâra tii kà Paulo 
\mt3 tà tàpé 
\mt1 Tésalonika 
\imt1 Bétapoo popai 
\is1 Wàilàapà na wii tii bèeni? 
\ip Wà Paulo, pwi *apostolo. Ru tâa jaaé wà Timotéo, ma Silas. 
\is1 É wii wiidà? 
\ip Nabibiu kâra *naja 49 ma 52 naa na béârailu kâra pai pâra kà Paulo, na rà tâa na ville Korénito ma wà Timotéo ma wà Silas. (Côo \bk Apostolo\bk* 18.1 ma 18.5.) 
\is1 É wii tâî? 
\ip Târa ê wâra pwapwicîri wâ Tésalonika, ville naa napô Grèce, ére gée goo na province Macédoine na pàara na rà pitûâ naawê wà tèpa *Roma. \fig |src="Map Thes.tif" size="col" loc="1.0" ref="1 Tésalonika 1:0" \fig*É picémara naawê ê *Picémara Wâdé wà Paulo, naa na âracié nadàpàra pwapwicîri, béaa kâra pai uru kêe jii tàpé na rà cicaraé \bk (Apostolo 17.1–10)\bk*. Êco na wâru tàpé na rà cèikî gée goo popai kêe, â é wii tii bèeni, pwiri caapwi naja gée na càùé, ba na é pagòo ê cèikî kàra na bwaa âmuê. 
\is1 Cina é wii? 
\ip Ûna é tapoo ê wâra pwapwicîri naa Tésalonika wà Paulo, â càcaa wâdé tà pàra tèpa *Juif ê popai na é picémara, â rà pacòobée gée na ville. (Côo \bk Apostolo\bk* 17.1–9.) É wii tà tèpa cèikî wê, ba na é pagòorà ma pacâmurirà. 
\is1 Dà êre ê tii bèeni? 
\ip É ipwàdée wà Paulo goo diri pâ muru na wâdé, naa na wâro kâra ê wâra pwapwicîri. Â é pagòorà, ba na rà piétò jii pâ géaa ma tacai. Â é pacâmurirà goro ê pai wâro kàra, na rà tapacîri ê pai wâjué me côwâ kà Pwi Ukai Iésu. Ba wà pàra tàpé gée goorà, âna rà tapoo dumapiê goro ê pwina o tèepaa tà tèpa cèikî, na rà bà béaa kâra pai wâjué me côwâ kà Iésu. Â gée goo na ée mwa wâjué me côwâ wà Pwi Ukai, â wà pàra tàpé mwara, âna rà niimiri pâ wâdé na rà wâro imudi, ma rà pwa ciritàu. 
\is1 Pai pitàgoo tii 1 Tésalonika 
\io1 Ipwabwàcu \ior (1.1)\ior* 
\io1 Wâro na wâdé kà tàpé Tésalonika \ior (1.2–10)\ior* 
\io1 Wakè kà Paulo naa Tésalonika \ior (2.1–3.13)\ior* 
\io1 Wâro na wâdé tà Pwiduée \ior (4.1–12)\ior* 
\io1 Pai wâjué côwâ kà Pwi Ukai \ior (4.13–18)\ior* 
\io1 Bénabwé popai ma ipicijii \ior (5.12–28)\ior* 
\ie  
\c 1  
\s2 Ipwabwàcu 
\p  
\v 1 \x - \xo 1:1 \xt Apostolo 17.1–9\x*Wâgo\f + \fr 1:1 \fq Wâgo—\ft Grec: \fqa Wàibà. \ft Wà Paulo na é pwa tii, êco na é paari pâ, caapwi pwâranümarà ma wà Timotéo ma Silas na ru tâa jaaé.\f* Paulo na pwa tii. Tàgére wàibà ma wà Silas\f + \fr 1:1 \fq Silas—\ft Nee, âna \fqa Silvain \ft naa na latin ma \fqa Silas \ft naa na grec. (Côo Apostolo 17.1.)\f*, ma wà Timotéo. [Â ru naa bwàcu kàwà mwara.] \fig Tésalonika|src="125 hk00371c.tif" size="col" ref="1.1" \fig*Go wii tàwà, wâguwà ê wâra pwapwicîri wâ Tésalonika, na guwà tâa goo wà Pwiduée Caa kâjè, ma wà Pwi Ukai *Kériso. 
\p Wâdé na tà tàwà ê *pimeaari imudi ma pinaanapô. Cidòri nyuâawà! 
\s1 Wâro na wâdé kà tàpé Tésalonika 
\p  
\v 2-3 \x - \xo 1:2-3 \xt 1 Korénito 13.13; Kolosé 1.4–6\x*Bà ciburà ipwaolé tà Pwiduée Caa, na bà pwapwicîri ba kàwà. Bà pwaolé têe goro diri pâ wakè na guwà pwa, gée goro ê cèikî ma pimeaari kàwà. Â bà ipwaolé mwara têe, goro pai cimwü kàwà, ba guwà pitapacîri goro cèikî, [ê pai wâjué me côwâ kà] wà Pwi Ukai Iésu Kériso.  
\v 4 Tèpa béebà naa goo Kériso, bà tâmogòori pâ, é meaariwà wà Pwiduée, â é pitòrigariwà, ba na guwà tèpa âboro kêe. 
\s2 Guwà ipwacèwiibà 
\p  
\v 5 \x - \xo 1:5 \xt 1 Korénito 2.4–5\x*Na ia bà inapàpari tàwà ê *Picémara Wâdé, â câbà caa po ina tàwà, goro pwâratùra co; â bà picémara tàwà goro ê pàtàmara ê *Nyuâaê Pwicîri, bau ê cèikî pâ, ê popai kâbà, âna âjupâra. Â guwà tâmogòori bwàti ê pai wâro kâbà naa jaawà, ma pai pitu tàwà kâbà.  
\v 6 \x - \xo 1:6 \xt Apostolo 17.5–9\x*Â wâguwà, âna guwà pâra wiâra ê pai wâro kâbà, ma ê pai wâro kà Pwi Ukai. Ba guwà jèe tòpi ê popai, naa na pâ aré na maina. Êco na ê Nyuâaê Pwicîri, âna é naa tàwà ê ipwàdée na dau maina.  
\v 7 Â guwà pâ nau tèpa câmu, tà diri tèpa cèikî wâna du province Macédoine, ma Akaïe, ma na diri pâ ére mwara. 
\p  
\v 8 Ba ê popai kà Pwi Ukai, âna é pâra jiiwà, â ê aié, âna jèe têreê pitiri wâ Macédoine ma wâ Akaïe, [pwacèwii ê tikakara]. Â wà diri tèpa âboro wê, âna rà tâmogòori pâ guwà cèikî naa goo Pwiduée. 
\p Nye ticè popai na pâri ma bà ina tàwà.  
\v 9 Ba ûna rà pwa jèkutâ goobà, â rà piwiâ mwara ê pai tòpibà kàwà naa jaawà. Â rà ina pâ, guwà jèe biiwà dà Pwiduée. Â guwà naaco ê pâ ânuuru duée, ba na guwà pwamaina ma pitêre dà i Pwiduée na é wâro ma âjupâra. 
\p  
\v 10 Â rà piwiâ pâ, guwà tapacîri goro cèikî, wà Pwina naîê, Iésu Kériso, na ée mwa wâjué me côwâ gée *napwéretòotù. Ba é jèe wâro côwâ gée na aubà, â é upajè gée na ê wârimuru goro ê pâ èpà—wârimuru na ée mwa naa tà tèpa âboro wà Pwiduée, naa na pwâra putàmu kêe. 
\c 2  
\s1 Wakè kà Paulo naa Tésalonika 
\p  
\v 1 Tèpa cèikî béeò, guwà tâmogòori bwàti pâ, ê pai tâa jaawà kâbà, âna càcaa piticèmuru naa goo.  
\v 2 \x - \xo 2:2 \xt Apostolo 16.19–24, 17.1–9\x*Â guwà tâmogòori pâ, béaa kâra na bà caiwà, âna bà tâa na ville Filipi. Â rà pwa-imudiri tâbà, ma tànyiribà naawê. Â wâjaawà mwara, âna wâru tàpé na rà cicarabà. Êco na wà Pwiduée, âna é pagòobà, ba na câbà caa piwâ goro pai picémara tàwà ê *Picémara Wâdé. 
\p  
\v 3 Â na ia bà picémara ê popai, â nye ticè auniimiri kâbà na tàbinyiri. Â nye ticè âboro cèna bà pwâgàrié ma pa-imwüruê.  
\v 4 \x - \xo 2:4 \xt Galatia 1.10\x*Ba é nye cèikî naa goobà wà Pwiduée, na é naa tâbà ê Picémara Wâdé kêe. Â câbà caa tùra, ba na rà wâdéaribà wà tèpa âboro; wàco wà Pwiduée, na é côo ê pâ auniimiri na tàbinyiri wâna pwâranümabà. 
\p  
\v 5 [Â ipaiwà na ia bà wakè jaawà.] Ba guwà nye tâmogòori pâ, câbà caa ipwawâdé pwâratùra tàwà. Â wà Pwiduée na é *paâjupâra pâ, câbà caa bu mwani.  
\v 6 Â câbà caa mudàra na guwà ipwamainabà, é, na rà ipwamainabà mwara wà pàra tàpé. 
\p  
\v 7 Êco na, wiàna nümabà, â pwa tàrù kâbà ma bà pitûâ kàwà, gée goo na bà tèpa apostolo kà Kériso, [ba wàé na é cùrubà]. Â êco na, na ia bà tâa jaawà, â bà po dau moo, pwacèwii tô jè ilàri na é côo bwàti ê nari èpo kêe.  
\v 8-9 \x - \xo 2:8-9 \xt Apostolo 20.34\x*Tèpa béeò, guwà wànau târa pai ipwanauri ê wakè kâbà? Ba bà po dau meaariwà, â câbà caa naa tàwà co ê Picémara Wâdé kà Pwiduée, â bà naa tàwà mwara ê wâro kâbà. Â, na pàara na ia bà picémara tàwà ê Popai, â bà wakè mwara naa ne ma pwaa, ba na bà wâro. Ba càcaa nümabà na bà tòpò tàwà cè nakake. 
\s2 Tàrù càrabà naa jaawà 
\p  
\v 10 Guwà tâmogòori bwàti, â wà Pwiduée mwara, pâ, ê càrabà naa jaawà, tèpa cèikî, âna é *tàrù ma âjupâra. Â ticè na caa pitèibà goo cèna bà pwa na èpà.  
\v 11 \x - \xo 2:11 \xt Apostolo 20.31\x*Â guwà tâmogòori mwara pâ, ba kàwà jècaa, âna bà ipwacèwii pwi caa kâra èpo na é meaari tèpa naîê.  
\v 12 Â bà pagòowà, ma tacoo goowà, ma pitûâ kàwà pâ, guwà wârori ê wâro na wâdé tà Pwiduée. Ba é todàwà, ba na guwà tò naa na Mwaciri kêe, ba na guwà o tâa jaaé naa na pai maina ma muugère kêe. 
\s2 Guwà jèe tòpi bwàti Popai 
\p  
\v 13 \x - \xo 2:13 \xt 2 Tésalonika 2.13\x*Bà ciburà pwaolé tà Pwiduée mwara, ba, na ia bà pame tàwà ê popai, â guwà têre ma tòpi bwàti, pwacèwii popai na é me gée jaa Pwiduée, â càcaa me gée goobà co, tèpa âboro. Â nye âjupâra, ba nye êkaa ê Popai kà Pwiduée, popai na é nye tà wakè goowà. 
\p  
\v 14 \x - \xo 2:14 \xt Apostolo 17.5\x*Üu, [ia guwà tòpi bwàti. Êco na] gée na càùé, âna rà tubaèpà tàwà wà tèpa jènerewà. Â, na wàrapwiri, â guwà ipwacèwii tèpa cèikî béewà\f + \fr 2:14 \fq Tèpa cèikî béewà—\ft Grec: \fqa Pâ wâra pwapwicîri naa goo Kériso Iésu.\f* naa napô *Judée. Ba na ia rà tòpi ê Popai, â pàra tèpa jènererà juif, â rà tubaèpà tàra.  
\v 15 \x - \xo 2:15 \xt Apostolo 9.23,29, 13.45,50, 14.2,5,19\x*Ba nye wà pàra tèpa *Juif mwara, na ia rà pòtàmwara tèpa *péroféta biu, tiagoo Pwi Ukai Iésu. Â nabàni, âna rà tubaèpà tâbà mwara. 
\p Dau càcaa wâdé tà Pwiduée wàilà, â rà cicara mwara diri pâ âboro!  
\v 16 Wàibà, âna bà inapàpari pâ, é pa-udò diri tèpa âboro wà Pwiduée, [â é naa tàra ê *âji wâro jaaé]. Êco na pwa na rà pacoobà wà tàpéebà, na bà pame ê popai-bà tà tàpé na càra caa tèpa Juif. Â êpwiri, âna pwi bénabwé kâra ê pâ èpà kàra na wâru. Â wà Pwiduée, âna ée jèe pitèirà ma pwa wârimuru tàra\f + \fr 2:16 \ft Dernière phrase—\ft Grec: \fqa Êco na o jèe tâa gòrà ê pwâra putàmu.\f*. 
\s1 Nümee na é côorà mwara 
\p  
\v 17-18 Tèpa béeò naa goo Kériso, jè pitâiti na ji pàara bèeni\f + \fr 2:17-18 \ft Ru pâra gée Tésalonika wà Paulo ma Silas, ba na ru upiri tàpé na rà cicararu. (Côo Apostolo 17.10.)\f*. Êco na bà nye tà ciburà niimiriwà. Â bà dau ipwadàra, ba na bà caiwà côwâ, ba dau wânümabà tàwà. Â wâru pâ pàara na pwa na go pâra dariwà, wâgo Paulo, êco na é pacoobà wà *Caatana.  
\v 19-20 \x - \xo 2:19-20 \xt Filipi 2.15–16, 4.1; 2 Tésalonika 1.4\x*Dau wâdé tâbà wâguwà, â bà ipwàdée goowà. Â gée goowà, na bà tapacîri ê tòotù na ée mwa wâjué me côwâ na, wà Pwi Ukai kâjè Iésu Kériso. Ba, na pwi tòotù-bà, âna o wâguwà na guwà o pumara wakè kâbà, pwacèwii ê bwe korona, na naa tà tàpé na rà piétò. 
\c 3  
\s2 Bà cùru paé dariwà Timotéo 
\p  
\v 1-2 \x - \xo 3:1-2 \xt Apostolo 17.15\x*\x - \xo 3:1-2 \xt Apostolo 16.1–3\x*[Dau gòo tâbà ê pai pitâiti kâjè ma wâguwà.] Â jèe càcaa pâri ma bà tà ciburà tapacîri ba gòiri. Â wàépwiri na bà pitêrebà, ba na bà cùru paé dariwà wà Timotéo, na bà bwaa tà tâa wâna ville Athènes. Wàé, âna pwi béebà goro wakè kà Pwiduée, goro picémara ê *Picémara Wâdé goo Iésu Kériso. Â bà niimiri pâ, dau wâdé wiàna é pagòo ê cèikî kàwà,  
\v 3 \x - \xo 3:3 \xt 2 Timotéo 3.12\x*ba na guwà cibwaa dumapiê, na pàara na gére tubaèpà tàwà. 
\p Ba jè cau tâmogòori bwàti pâ, o mwa tèepaa tâjè tèpa cèikî, pâ pàara na jè tâa na aré na. Â nye wà Pwiduée na é panuâ pâ, naa wàrapwiri.  
\v 4 Ba wàépwiri i pwi ia bà jèe tàmara ina tàwà, na ia bà tâa jaawà, âna, jè o mwa dau tâa na aré; â jèe wàéni nabà. 
\s2 É inawà ba wâdé tâbà 
\p  
\v 5 Üu, wàépwiri ê majoroé, co tèpa béeò, ma go panuâ paé wà Timotéo. Ba càcaa pâri ma go tà bàra tapacîri, â nümoo na é côo pai pâra kàwà naa na ê cèikî. Ba wâgotôo pâ, pwiri é jèe tacaiwà wà *Caatana, ma ténoori ê wakè kâbà, naa goowà. 
\p  
\v 6 \x - \xo 3:6 \xt Apostolo 18.5\x*Â ni, âna é jèe wâjué me côwâ, gée jaawà, â é piwiâ tâbà ê jèkutâ na wâdé, goro cèikî ma pimeaari kàwà. Â é ina pâ, guwà po dau niimiribà naa na ipwàdée, â nümawà na guwà côobà, pwacèwiibà.  
\v 7 \x - \xo 3:7 \xt 2 Tésalonika 1.4\x*Wàépwiri, co tèpa béeò naa goo Kériso, guwà dau pagòobà goro ê pai mwü wàra ê cèikî kàwà, naa nabibiu kâra diri pâ aré ma tòina kâbà.  
\v 8 Ba bà piêgòtùru, na bà têre pâ, guwà gòo naa goo wà Pwi Ukai.  
\v 9 O wànau târa cè pai pwaolé tà Pwiduée goro ê ipwàdée kâbà gée goowà?  
\v 10 Â naa ne ma pwaa, âna bà ciburà pwapwicîri têe, gée na diri ê pwâranümabà, ba na jè picôojè. Ba nümabà na bà naa tàwà ê pwina tiàu jii ê cèikî kàwà, ba na o tâbawêe. 
\s2 Pwâra pwapwicîri ba kàra 
\p  
\v 11 \x - \xo 3:11 \xt 2 Tésalonika 2.16\x*Üu, [wàépwiri ê pwâra pwapwicîri kâbà, pâ] wà Pwiduée Caa kâjè, ma wà Pwi Ukai kâjè Iésu Kériso, âna ru tàpiri ê naigé, ba na bà tèepaa mariwà.  
\v 12 Â [bà pwapwicîri mwara pâ] naa wà Pwiduée, âna é nama pimaina pâ, ê pimeaari kàwà. Ma guwà pimeaariwà côwâ, â guwà meaari pàra tàpé, pwacèwii pai meaariwà kâbà.  
\v 13 [Bà ilari jiié pâ] na ée pagòowà, ba na guwà piaabòriwà na araé, â guwà cimwü. Â o ticè èpà kàwà na o pitòtiwà goo, na guwà coo ara Pwiduée Caa, na pwi tòotù na ée mwa tèepaa me côwâ wà Pwi Ukai Iésu Kériso, ma wà diri tèpa âboro kêe. 
\c 4  
\s1 Wâro na wâdé tà Pwiduée 
\p  
\v 1 Tèpa béeò naa goo Kériso, bà tubanabwé [goro ê auniimiri bèeni]: Bà jèe pacâmuriwà goo ê pai wâro na wâdé tà Pwiduée, â guwà jèe wârori. Â nabàni, âna bà tacoo goowà, naa na nee Pwi Ukai Iésu, pâ, na guwà pwa cèna piwéna.  
\v 2 Ba guwà nye tâmogòori ê pâ aupitûâri, na ia bà jèe naa tàwà, naa na nee.  
\v 3 \x - \xo 4:3 \xt 1 Tésalonika 5.23; 1 Pétéru 1.16\x*Wà Pwiduée, âna nümee na guwà wârori ê wâro na wâdé têe, naa na diri pâ ére. 
\b  
\li1 Gà cibwaa ipuu mara pâ âboro imudi; 
\li1  
\v 4 \x - \xo 4:4 \xt 1 Korénito 6.13\x*Gà piwéaari bwàti ê naiigà\f + \fr 4:4 \fq Gà piwéaari bwàti ê naiigà—\fl é, \fqa Gà wéaari ma papwicîri tô wâdàgà.\f*, ba na gà o pwicîri ma wâdé na ara Pwiduée; 
\li1  
\v 5 Gà cibwaa nama dàtigà ê pâ câbawâdé kâra naiiri âboro, na èpà, pwacèwii tàpé na càra caa tâmogòori Pwiduée; 
\li1  
\v 6 Gà cibwaa ipwa tûâ tà pwi a cèikî béegà, ma ipuu ma ê wâdèe. 
\b  
\m Wà Pwiduée, âna ée pwa wârimuru tà tàpé na rà wàrapwiri, wàra pai jèe ina kâbà tàwà.  
\v 7 \x - \xo 4:7 \xt 1 Pétéru 1.15–16\x*Ba câé caa todàjè, ba na jè wâro imudi; â é todàjè, ba na jè wâro ba kêe.  
\v 8 \x - \xo 4:8 \xt Luka 10.16; 2 Korénito 1.22\x*Â wà pwina é tétâjii ê popai bèepwiri, âna câé caa tétâjii aupitûâri kâra âboro, â é nye tétâjii wà Pwiduée, na é naa tàwà ê Nyuâaê Pwicîri kêe. 
\s2 Nama pimaina too pimeaari kàwà 
\p  
\v 9 \x - \xo 4:9 \xt Ioane 13.34\x*Napwa naa goo ê pai pimeaari kàwà, âna, ticè muru na go ina tàwà naa goo. Ba guwà jèe nye tâmogòori, gée goo Pwiduée, ê pai meaari tèpa béewà naa goo Kériso.  
\v 10 Â [bà tâmogòori pâ] guwà dau meaari ba maina tèpa cèikî wâ Macédoine. Â bà ina tàwà pâ, wâdé na guwà dau pwa cèna piwéna. 
\p  
\v 11 \x - \xo 4:11 \xt Éféso 4.28\x*Guwà imudàra ma guwà piwâro na tàbwàti ma wà pàra tàpé. Â guwà cibwaa pwa ma âranümawà ê wâro kà pwi jèpwi. Â guwà wakè bwàti, wàra pai jèe ilari kâbà jiiwà. \fig Guwà wakè bwàti, ba wâdé tà Pwiduée|src="126 cn02081b.tif" size="col" ref="4.11" \fig* 
\v 12 Â, na wàrapwiri, â wà tàpé na càra caa tèpa cèikî, âna rà o câbawâdé ê pai wâro kàwà. Ba o câguwà caa tèpa ija wii pwârawâ\f + \fr 4:12 \ft 2\+ord e\+ord* phrase—\fl é, \fqa Ba na ticè cè jè muru cèna tiàu jiiwà.\f*. 
\s1 Pai wâjué côwâ kà Pwi Ukai 
\s2 Rà mwa wâro côwâ tèpa bà 
\p  
\v 13 Tèpa béeò naa goo Kériso, nümabà na guwà tâmogòori ê pwina tapacîri wà tèpa [cèikî na ia rà jèe] bà. Ba na, o câguwà caa pikîri, pwacèwii tàpé na càra caa tèpa cèikî.  
\v 14 \x - \xo 4:14 \xt Roma 14.9; 1 Korénito 15.3–4,12\x*Ba jè cèikî pâ, é bà wà Iésu, â é wâro côwâ gée na aubà. Êkaa na bà tâmogòori pâ, wiàna é bà wà pwi a cèikî naa gooé, â wà Pwiduée, âna é nama é wâro côwâ\f + \fr 4:14 \fq É nama é wâro côwâ—\ft Grec: \fqa É popaé me.\f* pwacèwii Iésu. 
\p  
\v 15 \x - \xo 4:15 \xt 1 Korénito 15.51–52\x*Üu, wàéni ê popai kà Pwi Ukai na bà ina tàwà: Na tòotù na ée mwa wâjué me côwâ wà Pwi Ukai, âna wà tèpa âboro kêe na rà jèe bà, âna [rà o mwa wâro côwâ gée na aubà, â rà o pâmariê. Â] o càra caa tapacîri wà tàpé na rà bwaa wâro. [Ba jè mwa capai pitànaima ma wàé.]  
\v 16 Na pwi tòotù-bà, âna jè o mwa têre cè pwâra uu cèna maina—pwâratùra kà pwi ukai kà tèpa *angela, ma ê airi tutu kà Pwiduée. Â wà Pwi Ukai, âna ée mwa tàbàtù boome gée napwéretòotù. Â wà tèpa cèikî naa gooé, na rà jèe bà, âna rà mara cimadò gée na aubà. 
\p  
\v 17 Â gée na càùé, â wàijè tàpé na jè bwaa wâro, âna o cau dàgòtùjè too, naima ma wàilà, too naa na pâ nee, dari wà Pwi Ukai, â o ipitijè ma wàé. Â jè o mwa pitànaima ma wà Pwi Ukai dàra gòiri awé.  
\v 18 Guwà ipagòowà, goro ê popai bèepwiri! 
\c 5  
\s2 O papòri tèpa âboro 
\p  
\v 1 Câbà caa wii tàwà goro cè pàara ma cè tòotù, cèna ée mwa tèepaa wà Pwi Ukai.  
\v 2 \x - \xo 5:2 \xt Mataio 24.42–43; 2 Pétéru 3.10; Auinapàpari 3.3\x*Ba guwà jèe nye tâmogòori bwàti pâ, ée wâjué me côwâ, pwacèwii pwi a mura, na é me naa ne. [Ba o càra caa tapacîê wà tèpa âboro.]  
\v 3 \x - \xo 5:3 \xt Mataio 24.39; Luka 21.34–35\x*Ba rà o gére tà niimiri pâ, rà jèe wâro na ê pinaanapô, ma o wâdé diri naa goorà. Êco na o papòrà pwi tòotù bèepwiri, pwacèwii ê pai maagé kà tô ilàri na é pitàmari èpo; â o tubatiàurà. Â o jèe càcaa pâri ma rà uru. 
\p  
\v 4 Napwa naa goowà, tèpa cèikî béeò naa goo Kériso, âna câguwà caa tèpa wâro na bàutê. Â o câguwà caa pò goo ê tòotù bèepwiri, na é tèepaa, pwacèwii pwi a mura.  
\v 5 \x - \xo 5:5 \xt Roma 13.12\x*Ba guwà tèpa âboro naa pwéelaa, â guwà tèpa wakè na pwaa. Â câjè caa tèpa tâa na bàutê. 
\s2 Jè tà tàcî! 
\p  
\v 6 Êkaa na wâdé na jè tà tàcî, ma jè pitòimirijè! Jè cibwaa puu wàra pàra tàpé!  
\v 7 Ba ê ne, âna kà tàpé na rà puu, ma wà tàpé na rà ipwirié.  
\v 8 \x - \xo 5:8 \xt Ésaïe 59.17; Éféso 6.14,17\x*[Go ina mwara pâ]: Wàijè, âna jè tèpa âboro na pwéelaa. Êpwiri na wâdé na jè piaabòrijè, ma coona [ê ârabwée târa paa. Jè popa] i cèikî ma i pimeaari, târa ma wéaari nawâajè. Â jè pa ê cèikî kâjè goro ê pai o pa-udòjè, ba na bwe, târa wéaari ê pûrujè. 
\p  
\v 9 Ba câé caa todàjè, ba na é pwa wârimuru tâjè, goro pwâra putàmu kêe. Â é jèe nye pitòrigarijè, ba na é upajè [ma naa tâjè ê *âji wâro jaaé] na é naigé mee wà Pwi Ukai Iésu Kériso.  
\v 10 \x - \xo 5:10 \xt Roma 14.8–9; 1 Tésalonika 4.14\x*Ba wà Kériso, âna é jèe bà ba kâjè, ba na jè o wâro naima ma wàé, [wiàna jè jèe bà, é, wiàna jè bwaa wâro; â] wiàna jè tàgére puu, é, wiàna jè tà tàcî; na pwi tòotù na ée mwa wâjué me côwâ na.  
\v 11 Êkaa na, wâdé na guwà ciburà ipitu tàwà ma ipagòowà, pwacèwii na guwà nye tàgére pwa. 
\s1 Bénabwé popai 
\p  
\v 12 Tèpa béebà naa goo Kériso, bà ilari jiiwà pâ, guwà tòimiri tèpa pitûâ kàwà naa goo Pwi Ukai, ba rà nye dau wakè ba gòo goowà, na rà pwa pupûra tàwà, ma pacâmuriwà.  
\v 13 Guwà papwicîrirà ma meaarirà, gée goro diri pâ muru na rà pwa ba kàwà. Â [guwà pitu tàra, â] guwà tâa na pinaanapô ma wà tèpa béewà. 
\p  
\v 14 \x - \xo 5:14 \xt 2 Tésalonika 3.6,11\x*Guwà patùra wà tèpa pwa ciritàu\f + \fr 5:14 \fq Tèpa pwa ciritàu—\fl é, \fqa Tàpé na càra caa pitòimirirà.\f*, â guwà pagòo tàpé na rà piwâ [na rà wakè kà Pwiduée] â guwà pitu tà tàpé na ticè nii kàra. Â guwà pidàpwicâariwà naa goorà diri. 
\p  
\v 15 \x - \xo 5:15 \xt Roma 12.17; 1 Pétéru 3.9\x*Guwà cibwaa pitôowâri tà tàpé na rà tubaèpà tàwà. Â guwà imudàra ma guwà ciburà ipwa tàwà ê pwina wâdé. Â guwà wàrapwiri tà diri tèpa âboro. 
\p  
\v 16 \x - \xo 5:16 \xt Filipi 4.4\x*Guwà ciburà ipwàdée,  
\v 17 â guwà ciburà pwapwicîri.  
\v 18 \x - \xo 5:18 \xt Éféso 5.20\x*Â guwà ciburà pwaolé tà Pwiduée, wiàna wâdé, é wiàna èpà naa goowà. Wàé kaa pwiri ê pwina nümee na guwà pwa, wâguwà na guwà caapwi ma Kériso Iésu. 
\p  
\v 19 \x - \xo 5:19 \xt Éféso 4.30\x*Guwà cibwaa pacoo ê Nyuâaê Pwicîri na é wakè,  
\v 20 â guwà cibwaa câbapiticèmuru naa goo wà tàpé na rà ipa popai naa na nee Pwiduée.  
\v 21 \x - \xo 5:21 \xt 1 Ioane 4.1\x*Guwà pitèi ma naaitiri bwàti ê pwina wâdé ma èpà. Â guwà cipa ba gòo ê pwina wâdé,  
\v 22 â guwà pâiti jii ê èpà. 
\s2 Ipicijii 
\p  
\v 23 \x - \xo 5:23 \xt 2 Tésalonika 3.3\x*Bà ilari jii Pwiduée, wà Pwina é naa ê pinaanapô, pâ, na é nama guwà pwicîri, ma guwà wâro ba kêe co. Ma é wéaari bamwara diri ê wâro kàwà—ê nyuâawà, ma pwâranümawà, ma auniimiri kàwà, ma naiiwà. Â, na tòotù na ée mwa wâjué me côwâ na, wà Pwi Ukai kâjè Iésu Kériso, âna o nye ticè èpà goowà, na o mwa pitèiwà goo.  
\v 24 Ba wà Pwiduée na ée jèe todàwà, âna é coo goo ê auina kêe, â ée mwa nye pacoo diri ê pâ pwiibà. 
\p  
\v 25 \x - \xo 5:25 \xt Kolosé 4.3; 2 Tésalonika 3.1\x*Â guwà pwapwicîri ba kâbà mwara, co tèpa béebà naa goo Kériso. 
\p  
\v 26 Guwà pwabwàcu târa diri tèpa cèikî béejè, wàra pai pwa kâjè, tèpa cèikî naa goo Kériso. 
\p  
\v 27 Â go ilari jiiwà, naa na nee Pwi Ukai, pâ, guwà mwa pûra ê tii bèeni tà diri tèpa cèikî. 
\p  
\v 28 Wâdé na tâa jaawà ê *pimeaari imudi kà Pwi Ukai kâjè Iésu Kériso! 
\cls Cidòri nyuâawà!