\id 1PE  
\h 1 Pétéru 
\toc1 1 Pétéru (1 Pierre) 
\toc2 1 Pétéru 
\toc3 1 Pétéru 
\mt2 Pâbéaa kâra tii 
\mt3 kà 
\mt1 Pétéru 
\imt1 Bétapoo popai 
\is1 Wàilàapà na wii tii bèeni? 
\ip Wà Simona Pétéru, pwi *apostolo, ma pwi âboro imaina naa na wâra pwapwicîri. É pitu têe wà Silas (côo 5.12), ba pwiri é pwi a tâmogòori bwàti pwa tii naa na grec. 
\is1 É wii wiidà? 
\ip Nabibiu kâra *naja 62 ma 64, na pàara na wà pwi ukai kà tèpa *Roma, wà Néron, âna é tapoo tubaèpà tà tèpa cèikî naa goo wà Iésu. Munaa é wii gée Roma wà Pétéru (na ina goo wê pâ ‘*Babulona’ na 1 Pétéru 5.13). 
\is1 É wii tâî? 
\ip Tà tèpa cèikî naa goo wà Iésu Kériso, na càra caa tèpa *Juif, â na rà wâro na province Asia kà tèpa Roma, wâna ére na ina goo pâ Turquie nabà. Â tii tà diri tèpa cèikî na tubaèpà tàra. 
\is1 Cina é wii? 
\ip Wà tèpa cèikî, âna rà tâa na ê tàbwàti na pâ naja na wâru. Êco na pwa tèpa âboro na rà tapoo cicararà ma tubaèpà tàra. Â rà cètùu wà pwi ukai kà tèpa Roma, wà Néron, ba na é tubaèpà tàra mwara. É wii wà Pétéru, ba na é pagòo tèpa cèikî naa na pâ aré kàra. 
\is1 Dà êre ê tii bèeni? 
\ip Wàijè na jè cèikî naa goo wà Iésu, âna jè pâ nau tèpa âboro na ê Ba kà Pwiduée, gée goo pai pwa *ârapwaailò goo Iésu Kériso. Jèe *upwaajè naa na nee Kériso, â wâdé na jè wârori ê wâro na pwicîri na diri pâ tòotù. Wiàna tubaèpà tâjè, â wâdé na jè niimiri pâ wà Kériso, âna dau tubaèpà têe, â wâdé na jè pidàpwicâarijè naa na ipwàdée, pwacèwiié. Ba o tâa tâjè pâ *aupwényunyuâari na wânidò *napwéretòotù na o tâa dàra gòiri awé (1.3–4, 5.12). 
\is1 Pai pitàgoo tii 1 Pétéru 
\io1 Ipwabwàcu \ior (1.1–2)\ior* 
\io1 É pa-udòjè Pwiduée â é pwényunyuâarijè \ior (1.3–12)\ior* 
\io1 Wârori wâro na pwicîri \ior (1.13–2.10)\ior* 
\io1 Wâro kâjè naa jaa tàpé na càra caa tâmogòorié \ior (2.11–25)\ior* 
\io1 Popai tà du duadà \ior (3.1–7)\ior* 
\io1 Jè pidàpwicâarijè naa tubaèpà tâjè \ior (3.8–4.19)\ior* 
\io1 Popai tà tèpa pitûâ kâra wâra pwapwicîri \ior (5.1–4)\ior* 
\io1 Bénabwé popai ma ipicijii \ior (5.5–14)\ior* 
\ie  
\c 1  
\s2 Ipwabwàcu 
\p  
\v 1 Wâgo Pétéru na pwa tii. Go pwi *apostolo kà Iésu *Kériso, [ba é cùruo pâ, ba na go picémara ê popai kêe]. Go cau wii tàwà, tèpa âboro kà Pwiduée na pa-ipiinariwà pitiri pâ na province—wâ Pont, ma Galatia, ma Cappadoce, ma Asia ma Bithynie\f + \fr 1:1 \fq Pont…Bithynie—\ft Diri pâ province bèepwiri, âna tâa napô Turquie nabà.\f*.  
\v 2 \x - \xo 1:2 \xt Roma 8.29; 2 Tésalonika 2.13\x*Wà Pwiduée Caa, âna é jèe pitòrigariwà, ba wàépwiri ê auniimiri kêe gée na biu. Â ê *Nyuâaê Pwicîri kêe, âna é nama guwà pwi Ba kêe na é pwicîri. Â wà [Pwina naîê] Iésu Kériso, âna é jèe cèitiri ê pâ èpà kàwà\f + \fr 1:2 \ft 3\+ord e\+ord* phrase—\ft Grec: \fqa Ê pai upwaawà goro ê domii kà Iésu. \ft Wà tèpa Juif, âna rà tétàmwara ê paaci, â rà upwaa tèpa âboro goro ê domii kêe, ba na rà cèitiri èpà kàra. Nabàni, âna ê pai bà kà Kériso, âna é pwi ârapwaailò na cèitiri èpà kâjè. Ucina mwara goro ê auipwataâboro kâjè ma wà Pwiduée, ma câmu kêe pâ, jè o mwa pitêre dèe. (Côo Exode 24.5–6, ma Hébéru 9.18–21.)\f* goro pai joro wàra ê domii kêe. Â guwà jèe tèpa âboro na guwà pitêre dèe. 
\p Wâdé naa tà tàwà ê *pimeaari imudi ma pinaanapô, na piêdò ma wéna! Cidòri nyuâawà! 
\s1 É pa-udòjè Pwiduée â ée mwa dau pwényunyuâarijè 
\p  
\v 3 Pwamaina Pwiduée, pwi Caa kà Pwi Ukai kâjè, Iésu Kériso! Ba dau maina awé ê pimeaari imudi kêe ba kâjè. Â é naa tâjè ê wâro na bwaa âmuê, gée goro ê pai wâro côwâ gée na aubà, kà Iésu Kériso. Â gée goo kaa pwiri, â tâa tâjè mwara ê cèikî na tâbawêe,  
\v 4 \x - \xo 1:4 \xt Kolosé 1.12\x*naa goo diri pâ *aupwényunyuâari na jè tapacîri. Â wàéni: O cau tâa tâjè tèpa naî Pwiduée ê *aamwari na wânidò *napwéretòotù—pwi aamwari na dau wâdé awé, â na càcaa wai ma botére, ba é tâa dàra gòiri awé! 
\p  
\v 5 \x - \xo 1:5 \xt Ioane 10.28, 17.11\x*Ba é pa-udòjè wà Pwiduée gée goro ê cèikî kâjè [naa goo wà Kériso]. Â é gére wéaarijè goro ê nii ma pàtàmee, ba na jè o mwa bàra tòpi bamwara diri ê aupwényunyuâari kêe, na o âpàpaa na Tòotù pwicò\f + \fr 1:5 \fq Tòotù pwicò—\fqa Bénabwé tòotù. \ft Ê tòotù na ée mwa wâjué côwâ wà Iésu Kériso, ba na é pwi apitûâ naa goro diri pâ muru naani gòropuu ma na wânidò napwéretòotù. Na pwi tòotù-bà, âna wà Pwiduée, âna ée mwa nama bwaa âmuê diri pâ muru.\f*. 
\p  
\v 6 \x - \xo 1:6 \xt Jacques 1.2; 1 Pétéru 5.10\x*Gée goo diri pâ pwi bèepwiri, â wâdé na guwà ipwàdée na guwà tâa na pâ na jèpapara aré ma tòina. Ba nye wâdé na wàrapwiri na ji pàara bèeni dau ûgé,  
\v 7 \x - \xo 1:7 \xt Proverbes 17.3; Zakarie 13.9; Malachie 3.3; Jacques 1.3\x*ba na tacai ê cèikî kàwà. Ba pwacèwii ê mwani mii, na jè cîri naa gòro ânye, ba na cèitiri ê pwina tòri gée goo\f + \fr 1:7 \ft Pwacèwii mwara pai wâèùru ê iri da naa gòro ânye.\f*. Â ê cèikî, âna dau âjimuru awé jii ê mwani mii, na o tiàué na jè tòotù. Â wiàna é tà cimwü ê cèikî kàwà [gée na càùru pâ tacai] â guwà o mwa tòpi ê pinabawâdé ma ipwamaina ma pitòbuari, na ê tòotù na ée mwa pipaarié târa diri tèpa âboro wà Iésu Kériso. 
\p  
\v 8-9 \x - \xo 1:8-9 \xt Ioane 20.29; 2 Korénito 5.7\x*Câguwà caa mu côo wà Iésu, êco na wânümawà gooé. Â bwaa câguwà pâ côoê, êco na guwà tàgére cèikî naa gooé. Â gée goo kaa pwiri, âna é pa-udòwà wà Pwiduée, [ma naa tàwà ê *âji wâro]. Â o nye dau maina awé kaa ê ipwàdée kàwà, na pwacoé ma jè ina. 
\s2 Inapàpari gée na biu pai pa-udòjè 
\p  
\v 10-11 \x - \xo 1:10-11 \xt Mataio 13.16–17\x*\x - \xo 1:10-11 \xt Psaume 22 Ésaïe 53 Luka 24.26–27\x*Wà tèpa *péroféta biu, âna rà mara pame ê popai kà Pwiduée, na rà tùra goo ê âraimeai na jè o mwa tòpi—ê pai udò kâjè [naa na âji wâro]. Ba é tâa goorà ê Nyuâaê Pwicîri kà Kériso, â é nama rà inapàpari béaa ê pai tâa na aré ma bà kà Kériso, bau ê pai maina ma muugère kêe gée na càùé. [Êco na càra caa tâmogòori ê pai ina wàra ê popai na rà pame!] Â rà dau pinünüma naa goo, ma pimudàra ma rà tâmogòori pâ, o [wàilàapà, ma] wiidà, ma o wànau. 
\p  
\v 12 Ba é ina tàra wà Pwiduée pâ, êdiri pâ muru na rà inapàpari naa na nee, âna o mwa coo [gée na càùrà co] ba kâjè nabà. Â [wàé kaa pwiri ê pwina tèepaa. Ba] tèpa âboro [na ia é cùrurà pâ wà Pwiduée] âna rà jèe picémara tàwà ê Picémara Wâdé, naa na ê pàtàmara ê Nyuâaê Pwicîri, na é cùrué boome gée napwéretòotù. Â guwà côo, [nye muru na po dau pwényuâa] na rà niâ boo wà tèpa *angela, ba na rà côo [ê pwina tèepaa]. 
\s1 Wârori wâro na pwicîri 
\p  
\v 13 Guwà pitaniimiri diri pâ aupwényunyuâari bèepwiri, na o tà tàwà na tòotù na ée mwa pipaarié wà Iésu Kériso. Guwà nünümari bwàti, â guwà piaabòriwà, â guwà tà tàcî, ba na guwà pwa ê wakè [kà Pwiduée].  
\v 14 \x - \xo 1:14 \xt Roma 12.2; Éféso 2.3, 4.17–18\x*Guwà pitêre dèe, ba guwà tèpa naîê. Â guwà cibwaa wâro wiâra pâ câbawâdé kàwà na èpà, pwacèwii pai pwa kàwà béaa, na bwaa câguwà caa pâji tâmogòori wà Kériso.  
\v 15 Guwà ipapwicîriwà, naa na pâ tûâ kàwà. Ba wà Pwiduée na é todàwà, âna é pwicîri.  
\v 16 \x - \xo 1:16 \xt Lévitique 11.44–45; Mataio 5.48\x*Ba jèe nye wii naa na *Tii Pwicîri pâ: \qt Guwà ipapwicîriwà, ba go pwicîri.\qt*\rq Lévitique 19.2\rq* 
\s2 Papwicîri Pwiduée 
\p  
\v 17 \x - \xo 1:17 \xt Roma 2.11; Auinapàpari 2.23\x*[Wâdé na guwà pitaniimiri pâ] wà Pwiduée na guwà pwapwicîri têe, ma ina gooé pâ Caa, âna câé caa pwaké goro âboro. Â ée jèpa pitèijè jècaa goro ê pwina jè pwa. Êkaa na guwà dau papwicîriê, na guwà bwaa wâro ni gòropuu. 
\p  
\v 18 Ba guwà tâmogòori bwàti pâ, [guwà tèpa âboro kêe nabàni. Ba] é jèe wâriwà goro ê wâri wèe na dau maina awé. É upawà jii ê wâro kàwà béaa, na càcaa pâri ma é naa tàwà cè âji cidòri\f + \fr 1:18 \fq Na càcaa pâri ma é naa tàwà cè âji cidòri—\ft Grec: \fqa Na ticèmuru naa goo.\f*. Ba ia guwà tèpa *ênawéna kîri kâra diri pâ tûâ na èpà, na ia guwà popa jii tèpa jojoorowà. 
\p Câé caa wâriwà wà Pwiduée goro mwani mii, é, mwani pwaa, é, goro cè pàra muru na o wai ma botére.  
\v 19 \x - \xo 1:19 \xt Apostolo 20.28; Hébéru 9.12–14\x*Bwa! É upawà goro ê domii kà Kériso [na joro na ia é bà ba kàwà]—domii na po dau maina awé wâri wèe. Wà Kériso, âna ticè èpà gooé, pwacèwii ê nari mutô na pwa ârapwaailò gooé, na ticè tòri ma maagé gooé. 
\p  
\v 20 \x - \xo 1:20 \xt Éféso 1.4\x*Ba é jèe mara pitòrigarié wà Pwiduée, béaa kâra pai tòpò kêe ê gòropuu, [ba na ée mwa bà, ma tipijè jii ê pâ èpà kâjè]. Â wà Kériso, âna é jèe nye tèepaa na pàara kâjè nabà—naa na pâ bénabwé tòotù. Â guwà côo, é jèe pwa pwiri ba kàwà!  
\v 21 \x - \xo 1:21 \xt Ioane 14.6; Roma 5.1–2\x*Nye gée gooé kaa, na guwà cèikî naa goo wà Pwiduée, na é jèe pawâroé côwâ gée na aubà, ma naa têe ê pai maina ma muugère. Wàépwiri na guwà tâmogòori pâ, wà Pwiduée, âna ée mwa naa tàwà ê pwina é jèe ina\f + \fr 1:21 \ft 2\+ord e\+ord* phrase—\fqa Espérance en Dieu.\f*. Â guwà tapacîri goro cèikî. 
\s2 Pimeaariwà 
\p  
\v 22 \x - \xo 1:22 \xt Ioane 13.34; Roma 12.10\x*Guwà jèe tòpi ê [popai na] âjupâra, [ê *Picémara Wâdé goo wà Iésu Kériso] â guwà pitêre dèe. Â jèe cèitiri ê pâ èpà kàwà gée na ê pwâranümawà. Â gée goo kaa pwiri, â jèe pâri ma guwà meaari tèpa cèikî béewà, gée na âji pwâranümawà. Êkaa na wâdé na guwà tà ciburà wàrapwiri,  
\v 23 ba jèe pitèpawà côwâ, â ê wâro na guwà jèe tòpi, âna é dau piwéna jii ê pwina guwà tòpi jii du nyaa ma caa kàwà. Ba êpwiri, âna muru na o wai ma botére\f + \fr 1:23 \ft 1\+ord re\+ord* & 2\+ord e\+ord* phrases—\ft Grec: \fqa Pitèpawà côwâ, â càcaa gée goo ê arapwüru na o wai ma botére; â nye gée goo ê arapwüru na tâa awé.\f*. Êco na ê wâro na bwaa âmuê na go ina, âna o tâa dàra gòiri awé, ba é me gée goo ê Popai kà Pwiduée—pwi Popai na é *wâro dàra gòiri awé. 
\b  
\q1  
\v 24 \x - \xo 1:24 \xt Ésaïe 40.6–8\x*\qt Ba rà pwacèwii\qt* 
\q1 \qt ê murumwatò\qt* 
\q1 \qt diri pâ âboro.\qt* 
\q1 \qt Rà o mwari diri.\qt* 
\q1 \qt O tiàu pwényuâa kàra\qt* 
\q1 \qt pwacèwii murubuké\qt* 
\q1 \qt na é jèe moo ma tûuboo\qt* 
\q1 \qt [ma wai ma botére].\qt* 
\q1  
\v 25 \qt Napwa naa goo\qt* 
\q1 \qt ê popai kà Pwi Ukai,\qt* 
\q1 \qt âna o tâa awé!\qt* 
\q1 \qt É cimwü dàra gòiri!\qt*\qs Ésaïe 40.6–8\qs* 
\b  
\m Guwà côo, ê popai bèepwiri, âna ê Picémara Wâdé, na jèe picémara tàwà! 
\c 2  
\p  
\v 1 \x - \xo 2:1 \xt Éféso 4.22; Jacques 1.21\x*Wiàna wàrapwiri, â guwà cibwaa gòmapwa! Guwà tétâjii diri pâ tûâ na èpà, pwacèwii ê ipwa tûâ, ê piboo, ma ê picocoo.  
\v 2 Guwà jèe niimiri cai ê ji nari èpo na bwaa tapoo pitèpaé. Nye caapwi co ê muru na wâdé têe—ê nüru di. Â wâdé na guwà wàrapwiri naa goo ê popai [kà Pwiduée]. Guwà naa nümawà naa goo, â guwà dau iari. Ba wàépwiri ê utimuru [târa ê pwâranümawà] na càcaa pinaanaimari ma cè jè muru. Â naa tàwà, ba na guwà o imaina too, â na o tâbawêe ê wâro na bwaa âmuê naa goowà.  
\v 3 \x - \xo 2:3 \xt Psaume 34.9\x*Ba guwà jèe nari\f + \fr 2:3 \fq Nari (é, namiri)—\fqa Goûter.\f* gée goo ê pai wâdé awé kà Pwi Ukai. 
\s2 Iésu âna é âji atü pàara wâ 
\p  
\v 4 Guwà medari wà Pwi Ukai Iésu, [â guwà tâa jaaé]. Ba wàé pwi pàara ê wâro kâjè, ma pwi atü na é wâro! Rà tétâjiié wà tèpa âboro èpà, êco na é pitòrigarié wà Pwiduée, ba dau pwamuru naa gooé.  
\v 5 \x - \xo 2:5 \xt Éféso 2.21–22; Auinapàpari 1.6\x*Â wâguwà mwara, âna guwà pwacèwii pâ atü na wâro. Wâdé na guwà pipanuâwà [tà Pwiduée] ba na é tòpòwà, naa na wâ pwicîri kêe na é gére bari. Jèpwi mwara, âna guwà pwacèwii tèpa pwa ârapwaailò, [ârapitòrigari kà Pwiduée, ba na guwà cau piênawéna kêe] naima. Â pârawà na guwà tòpò pâ âraimeai na o wâdé têe—âraimeai na me gée goo ê wakè kâra Nyuâaê Pwicîri naa goowà. Â ée mwa tòpi wà Pwiduée, gée goo i pwi ia é pwa wà Iésu Kériso\f + \fr 2:5 \ft Dernière phrase—\fl é, \fqa Âraimeai na guwà tòpò, na é naigé mee wà Iésu Kériso.\f*.  
\v 6 \x - \xo 2:6 \xt Ésaïe 28.16; Éféso 2.20\x*Ba jèe wii naa na *Tii Pwicîri [goo wà Iésu] pâ: 
\b  
\q1 \qt Gà têre ni, co Ba!\qt* 
\q1 \qt Go pitòrigari pwi atü,\qt* 
\q1 \qt atü na pwâra;\qt* 
\q1 \qt na maina wâri wèe\qt* 
\q1 \qt pwi neaapiâ kôo.\qt* 
\q1 \qt Go tòpòé naa *Siona,\qt* 
\q1 \qt [gòrojaa kôo,\qt* 
\q1 \qt napô pwicîri kôo.\qt* 
\q1 \qt É atü târa wâro!]\qt* 
\q1 \qt Rà mwa piétò\qt*\f + \fr 2:6 \fq Rà mwa piétò—\fl é, \fqa O câgo caa panuârà. \ft Grec: \fqa O càra caa kamu.\f* 
\q1 \qt wà tèpa âboro\qt* 
\q1 \qt na rà cèikî naa gooé.\qt*\qs Ésaïe 28.16\qs* 
\b  
\m  
\v 7 \x - \xo 2:7 \xt Psaume 118.22\x*Â guwà côo, dau âjimuru tâjè i pwi atü bèepwiri—[wà Iésu Kériso] ba jè jèe cèikî naa gooé. Êco na [wàéni ê popai goo] wà tàpé na tàutàra na rà cèikî naa gooé: 
\b  
\q1 \qt I pwi atü na rà tétâjii\qt* 
\q1 \qt wà tèpa ba wâ,\qt* 
\q1 \qt âna nye wàé kaa pwiri,\qt* 
\q1 \qt i âji êkêe!\qt* 
\q1 \qt [Tàutàra goo\qt* 
\q1 \qt pwi ò kâra wâao!]\qt*\qs Psaume 118.22 \qs* 
\b  
\m  
\v 8 \x - \xo 2:8 \xt Ésaïe 8.14–15\x*Â jèpwi mwara: 
\q1 \qt O cigòtù â\qt* 
\q1 \qt tèpa cicarao;\qt* 
\q1 \qt Rà tûuboo awé\qt* 
\q1 \qt gée goo Atü kôo-bà!\qt*\qs Ésaïe 8.14\qs* 
\b  
\m Wàépwiri wà tàpé na càra caa cèikî naa gooé, [âna rà jèe tûu awé]. Ba wàépwiri ê câbawâdé [kà Pwiduée] goo wà tàpé na càra caa pitêre dàra ê popai kêe. 
\s2 Guwà pwi Ba kà Pwiduée 
\p  
\v 9 \x - \xo 2:9 \xt Exode 19.6\x*Wâguwà, âna guwà pwi Ba na pwicîri kà Pwiduée, Pwi Ukai. É jèe pitòrigariwà, ba na guwà pwi Mwaciri kêe; pacimawà, ba na guwà tèpa pwa ârapwaailò kêe; pa-udòwà, ba na guwà tèpa âboro kêe; todàwà gée na bàutê, naa na pwéelaa ma muugère kêe, ba na guwà inapàpari ê pâ muru na pwényuâa na é jèe pwa! 
\p  
\v 10 \x - \xo 2:10 \xt Osée 2.25\x*Napwiri, âna câguwà caa tèpa âboro na jè mwaciri, â nabà, âna guwà jèe pwi Ba kà Pwiduée. Béaa, âna câguwà caa tòpi ê pimeaari kêe, â nabà, âna guwà jèe tòpi! 
\s1 Wâro na pwamaina Pwiduée naa jaa tàpé na càra caa tâmogòorié 
\p  
\v 11 \x - \xo 2:11 \xt Galatia 5.17,24\x*Tèpa âji béeò wée, guwà tèpa pârame naani gòropuu, ba càcaa âji napô kàwà! Â go ina tàwà [gée na diri pwâranümoo] pâ, guwà cibwaa pâra wiâra ê pâ câbawâdé kàwà na èpà. Ba pâ muru bèepwiri, âna rà pipaa dàra ê pwâranümawà. 
\p  
\v 12 \x - \xo 2:12 \xt Mataio 5.16\x*Guwà ipwacôoco goro ê pai wâro kàwà, naa nabibiu kà tàpé na càra caa cèikî. Wà tàpéebà, âna rà o picocooriwà, â rà ina pâ, guwà tèpa âboro èpà, êco na rà o mwa côo diri pâ muru na wâdé na guwà pwa. Â rà o pwamaina Pwiduée, na Tòotù na ée mwa tèepaa me\f + \fr 2:12 \fq Na Tòotù na ée mwa tèepaa me—\ft Pwiri pwi tòotù na ée mwa pitèi ê gòropuu wà Pwiduée, é, pwiri pwi tòotù na é cèikî naa gooé wà pwi jè âboro, â é tòpi ê âji wâro. É, pwiri mwara ê tòotù na é tâa na aré na, wà pwi jè âboro.\f*. 
\s2 Pitêre dà tèpa pitûâ kâra napô 
\p  
\v 13 \x - \xo 2:13 \xt Tito 3.1\x*Guwà tèpa âboro kà Pwi Ukai [Iésu Kériso]\f + \fr 2:13 \fq Guwà tèpa âboro kà Pwi Ukai Iésu Kériso—\ft Grec: \fqa Gée goo wà Pwi Ukai.\f*. Êkaa na wâdé na guwà ipakîriwà na ara ê pâ pitûâ kâra ê napô, wiàna pwi ukai naa napô maina,  
\v 14 é, wiàna tèpa pitûâ na é pacimarà. Ba pwa tàrù kàra, ma rà pwa wârimuru tà tàpé na rà pwa na èpà, ma câdiri tàpé na rà pwa na wâdé.  
\v 15 \x - \xo 2:15 \xt 1 Pétéru 3.16\x*Ba wàépwiri câbawâdé kà Pwiduée. Â wâdé têe na guwà wârori ê wâro na wâdé, ba na guwà târi ê pwâ tàpé na rà picocooriwà imudi\f + \fr 2:15 \fq Na rà picocooriwà imudi—\ft Grec: \fqa Na ticè nümarà.\f*. 
\p  
\v 16 Âjupâra pâ, [é jèe tipiwà wà Pwi Ukai, â] pwa tàrù kàwà târa pwa diri pâ muru. Êco na guwà cibwaa popa ê tàrù kàwà bèepwiri, ba na guwà pwa na èpà! Bwa! Pwi tàrù, ba na guwà piênawéna kà Pwiduée [naa na diri pâ muru].  
\v 17 \x - \xo 2:17 \xt Roma 12.10\x*Êkaa na guwà tòimiri pâ âboro diri; â guwà ipakîriwà na ara pwi ukai naa napô; â guwà meaari tèpa cèikî béewà; â guwà dau papwicîri wà Pwiduée. 
\s2 Ipakîrijè pwacèwii Kériso 
\p  
\v 18 \x - \xo 2:18 \xt Éféso 6.5\x*Wiàna gà pwi *ênawéna kîri kà pwi jè âboro, â wâdé na gà ipakîrigà, â gà dau tòimiriê. Â ipaiwà ê càragà, wiàna é pwi âboro na é tàrù ma moo, é, wiàna é pwi âboro èpà ma pwi a putàmu.  
\v 19 Ba pwiri nye ticè majoro ê pai tubaèpà tâgà kêe. Â wiàna wàrapwiri, â o cidòri nyuâagà\f + \fr 2:19 \fq Cidòri nyuâagà—\fl é, \fqa Muru na wâdé, \fl é, \fqa Ée mwa pwényunyuâariwà wà Pwiduée.\f*, wiàna gà pidàpwicâarigà, naa na pâ aré na wàrapwiri, gée goro pai pitêre dàra'gà wà Pwiduée.  
\v 20 \x - \xo 2:20 \xt 1 Pétéru 3.14,17\x*Êco na, wiàna gà tâa na aré, gée goro pai pwa'gà ê pwina èpà, â nye ticè cidòri'gà! 
\p Dau wâdé tà Pwiduée, wiàna gà pidàpwicâarigà naa na pâ aré, gée goro pai pwa'gà ê pwina tàrù.  
\v 21 \x - \xo 2:21 \xt Mataio 16.24; Ioane 13.15\x*Ba êkaa pwiri na é todàjè naa goo. Ba gà côo, é jèe maagé côo wà Kériso ba kâjè, â é jèe naa tâjè ê câmu, â wâdé na jè pâra wii naigé kêe, ma ipwacèwiié.  
\v 22 \x - \xo 2:22 \xt Ésaïe 53.9\x*Ba wà Kériso, âna: 
\b  
\q1 \qt Nye ticè èpà na é pwa,\qt* 
\q1 \qt ma ticè na pwâ na é ina.\qt*\qs Ésaïe 53.9\qs* 
\b  
\q1  
\v 23 \x - \xo 2:23 \xt Ésaïe 53.7; 1 Pétéru 3.9\x*Rà nye tànyiriê, 
\q1 â câé caa tòpi. 
\q1 Rà tubaèpà têe, 
\q1 â câé kànarirà. 
\q1 É ipanuâê tà Pwiduée, 
\q1 na tàrù pai pitèi kêe. 
\q1  
\v 24 \x - \xo 2:24 \xt Ésaïe 53.5–6; Roma 6.11\x*É popa èpà kâjè, 
\q1 naa na naiié. 
\q1 É kakeri diri 
\q1 naa goro satauro. 
\q1 É tapàgà pitûâ kàra\f + \fr 2:24 \fq É tapàgà pitûâ kàra… \ft Grec: \fqa Jè bà naa goo pâ èpà kâjè.\f*. 
\q1 É tipijè jii ê tojii. 
\q1 [É naa tâjè tàrù] 
\q1 ba na jè wâro, 
\q1 ma jè pâra ba tàrù! 
\q1 É nama jè wâdé côwâ; 
\q1 goro aurumuru kêe. 
\q1 Â tiàu maagé kâjè! 
\q1  
\v 25 \x - \xo 2:25 \xt Ézékiel 34.5–6; Mataio 9.36; Ioane 10.14; Hébéru 13.20–21\x*Jè tèpa mutô kêe. 
\q1 Jè jèe imwüru; 
\q1 â é popajè côwâ. 
\q1 É wéaarijè diri 
\q1 dàra gòiri awé! 
\c 3  
\s1 Popai tà du duadà 
\s2 Pa ilàri 
\p  
\v 1-2 \x - \xo 3:1-2 \xt Éféso 5.22\x*Napwa naa goowà co ipâê, âna guwà ipakîriwà naa goo tèpa éawà. Â ipaiwà wiàna pwi éagà, âna câé caa pwi a cèikî. Ba wiàna gà wàrapwiri, â jèe câgà caa ina têe cè popai, ba é jèe po cèikî gée goo ê tûâ'gà.  
\v 3 \x - \xo 3:3 \xt 1 Timotéo 2.9\x*Gà cibwaa coona ârabwée na po dau maina wâri wèe, â gà cibwaa po dau tòpò pâ mwani mii ma perle, ba na gà pipaarigà. Ba ê pai pwa ârabwée'gà, ma pai pwa wèe pûrugà, ma pai tòpò mwani mii, âna muru naa naiiri âboro co, â càcaa âjimuru\f + \fr 3:3 \fq Muru naa naiiri âboro co, â càcaa âjimuru—\ft Grec: \fqa Muru na wâgòroigé.\f*. 
\p  
\v 4 Ba ê âji pwényuâa'gà, âna ê moo ma pitòimiri ma pinaanapô na tâa na pwâranümagà. Wàépwiri ârabwée na o càcaa wai; pwi aamwari na dau wâdé tà Pwiduée.  
\v 5 Ba rà wàrapwiri pa ilàri, na rà cèikî naa goo wà Pwiduée naa pàara biu, â rà piaabòrirà. Ba rà ipakîrirà naa goo tèpa éarà,  
\v 6 \x - \xo 3:6 \xt Genèse 18.12\x*pwacèwii wà Sara, na é pitêre dà wà *Abéraama, â é ina gooé pâ ‘pwi ukai’. Â gà o tô èpo kêe, wiàna gà pwa ê pwina wâdé, â gà cibwaa nama wâgotâgà [na gà ipakîrigà na ara pwi éagà]. 
\s2 Tèpa paao 
\p  
\v 7 \x - \xo 3:7 \xt Éféso 5.25\x*Ipaiwà naa goowà, wâguwà tèpa paao. Wiàna gà piéa, â wâdé na gà wéaari tô wâdàgà, â gà moo naa gooé, ba pwa nii'gà jiié. Â gà dau papwicîriê mwara, ba wà Pwiduée, âna é jèe naa têe ê *âji wâro, pwacèwii na é jèe naa tâgà. Ba wiàna gà wàrapwiri, â ée têre ê pwâra pwapwicîri'gà wà Pwiduée. 
\s1 Jè pidàpwicâarijè na tubaèpà tâjè 
\p  
\v 8 Wâdé na caapwi pwâranümawà, [wâguwà diri tèpa cèikî naa goo Iésu]. Guwà dau pimeaariwà jècaa gée na pwâranüma na moo, â guwà dau pitu tàwà, ba guwà tèpa aéjii naa na nee Kériso. Â guwà jèpa ipakîriwà.  
\v 9 Wiàna rà pwa tàwà ê pwina èpà wà pàra tàpé, â guwà cibwaa pawâjuépiri tàra côwâ. Â wiàna rà tànyiriwà, â guwà *pwényunyuâarirà, ba é jèe todàwà wà Pwiduée, ba na guwà wàrapwiri. Ba wiàna guwà pwa, â ée mwa dau pwényunyuâariwà.  
\v 10 \x - \xo 3:10 \xt Psaume 34.13–17\x*Ba jèe wii naa na *Tii Pwicîri pâ: 
\b  
\q1 \qt Cidòri nyuâagà\qt* 
\q1 \qt wiàna gà naaco èpà\qt*\f + \fr 3:10 \fq Cidòri nyuâagà wiàna gà naaco èpà—\ft Grec: \fqa Wiàna nümagà na o wâdé ê wâro'gà, â wâdé na…\f*. 
\q1 \qt Gà mwa ipwàdée\qt* 
\q1 \qt wiàna [gà pwa na *tàrù].\qt* 
\q1 \qt Gà naaco picocoo:\qt* 
\q1 \qt Gà tétâjii pwina pwâ!\qt* 
\q1  
\v 11 \qt Gà coo jii tûâ na èpà!\qt* 
\q1 \qt Gà pâra na âjupâra:\qt* 
\q1 \qt Gà mudàra pinaanapô;\qt* 
\q1 \qt gà pa pâdari pàra tàpé.\qt* 
\b  
\q1  
\v 12 \qt É wéaari tàpé na rà tàrù,\qt* 
\q1 \qt wà Pwi Ukai Pwiduée.\qt* 
\q1 \qt É têrerà na rà to.\qt* 
\q1 \qt É pipaa dà tàpé na rà èpà!\qt*\qs Psaume 34.13–17\qs* 
\s2 Cidòri nyuâajè na jè tâa na aré 
\p  
\v 13 Wiàna gà pwa na wâdé, â pwâco tàpé na rà o tubaèpà tâgà.  
\v 14 \x - \xo 3:14 \xt Ésaïe 8.12–13; Mataio 5.10; 1 Pétéru 2.20, 4.14\x*Êco na, wiàna gà tâa na aré, gée goo pâ tûâ'gà na tàrù, â o cidòri nyuâagà! Êkaa na: 
\b  
\q1 \qt Gà cibwaa nama wâgotâgà,\qt* 
\q1 \qt goro pai pwa tâgà na èpà\qt* 
\q1 \qt na me gée goro âboro.\qt* 
\q1 \qt Gà cibwaa pidumapiê!\qt*\qs Ésaïe 8.12\qs* 
\b  
\m  
\v 15 Bwa, gà papwicîri Kériso naa na pwâranümagà. Â gà tà ciburà wéaa, ba na o pwa cè pai tòpi'gà tà tèpa âboro, na rà tawèerigà goo ê cèikî'gà.  
\v 16 \x - \xo 3:16 \xt 1 Pétéru 2.12\x*Â wâdé na gà tòpi tàra goro ipapwicîri ma moo. [Gà ipwacôoco ê càragà, ba] na o câé caa pitòtigà ê *pwâratùra-nigée-googà. Â o wâdé ê wâro'gà gée goo na gà pwi âboro kà Kériso. Â wà tàpé na rà pinabaèpàgà, âna rà o dau kamu, gée goo na ê pâ tûâ'gà, âna po cau wâdé diri [naa na diri pâ ére].  
\v 17 Wiàna gà tâa na aré, â dau wâdé wiàna nye gée goo ê càragà na wâdé, wiâra ê câbawâdé kà Pwiduée. Â càcaa wâdé wiàna gée goo pâ tûâ'gà na èpà! 
\s2 É tâa na aré Kériso â é jèe piétò! 
\q1  
\v 18 É wacaapwi bà 
\q1 wà Iésu Kériso, 
\q1 bépwanauri èpà. 
\q1 É maagé côo, 
\q1 wà Pwina é tàrù; 
\q1 [É maagé bà] 
\q1 ba kâjè tèpa âboro, 
\q1 na câjè caa tàrù. 
\q1 É popajè pâ, 
\q1 dari wà Pwiduée. 
\q1 Jèe tétàmwereê 
\q1 na naiiri âboro, 
\q1 [naani gòropuu]. 
\q1 Pawâroé côwâ, 
\q1 naa na naiiri âboro 
\q1 na bwaa âmuê 
\q1 na o câé mwa caa bà\f + \fr 3:18 \ft Dernière phrase—\fl é, \fqa Pawâroé côwâ gée goro ê Nyuâaê Pwicîri. \ft Grec: \fqa Pawâroé côwâ naa na nyuâa.\f*! 
\b  
\m  
\v 19 [Gée na càùru pai bà kêe] â é pâra wà Kériso, ba na é pwa pupûra tà tàpé\f + \fr 3:19 \fq Tàpé—\ft Munaa tèpa âboro èpà gée na pàara biu na ia rà bà, â wà Kériso, âna é inapàpari ê Picémara Wâdé tàra. É, pwiri tèpa duée—tèpa angela na ia rà cicara wà Pwiduée. (Côo Genèse 6.1–4.) Â wà Kériso, âna é pâra nau tèirà, ba na rà pwa wârimuru dàra gòiri.\f* na rà bà na rà pwa karapuu [naa na autâa kà tèpa bà].  
\v 20 \x - \xo 3:20 \xt Genèse 6–7\x*Wà tàpéebà, âna jèe càra caa pitêre dà wà Pwiduée napwiri, na pàara kà Noa, na é iti i wànga kêe. É dau pidàpwicâariê wà Pwiduée naa goorà [êco na càra caa biirà dèe]. Â nye 8 âboro co na uparà jii i jèpé gòro wànga. 
\p  
\v 21 Ê jawé bèepwiri, âna ucina goro ê *piupwaa kâjè nabàni, na é pinaigé mara ê pai upajè. Na *upwaajè, â càcaa ba na jè nuwa tâjii ê tòri kâra ê naiiri âboro! Nye câmu kâra pai nuwa tâjii ê pâ èpà gée na pwâranümajè. Câmu mwara kâra *auipwataâboro na jè pwa tà Pwiduée [pâ, na jè o tèpa âboro kêe]\f + \fr 3:21 \fq Nye câmu kâra pai nuwa… \fl é, \fqa Nye câmu kâra pai to kâjè dà wà Pwiduée, ba na é nuwa tâjii ê pâ èpà gée na pwâranümajè.\f*. É upajè wà Pwiduée, gée goo pai [bà ma] wâro côwâ kà Kériso gée na aubà.  
\v 22 Â é jèe too naa *napwéretòotù, â é tâa gòro étò kà Pwiduée [ba na o pwamainaê]. Â pwa tàrù kêe ma pàtàmee, naa goo diri pâ *angela, ma pâ duée, ma pâ pitûâ ma pâ pàtàma. 
\c 4  
\s2 Wârori wâro na wâdé tà Pwiduée 
\p  
\v 1 \x - \xo 4:1 \xt Roma 6.2,7\x*Wà Kériso, âna é maagé côo naa na naiiri âboro, â wâdé na guwà ipwabwàtiwà, ba na guwà ipwacèwiié. Ba [pwacèwii na jè mu ina pâ]: «Wà pwi a cèikî na é dau maagé côo naa na naîri âboro, âna wàé kaa pwi âboro na é naaco ê èpà\f + \fr 4:1 \fq Wà pwi acèikî na é dau maagé côo… \ft Munaa pai ina wèe pâ: \fqa Wà pwi acèikî na é piupwaa, ba na é paari pâ ée mwa naaco ê èpà.\f*.» Â guwà popa ê auniimiri kà Kériso, ba na neemuru paa kàwà, [târa ma pagòowà na guwà maagé côo]. 
\p  
\v 2 Tapoo nabàni, âna wâdé na guwà cibwaa pâra wiâra côwâ ê câbawâdé kàwà na èpà. Guwà pâra wiâra co ê câbawâdé kà Pwiduée, na guwà bwaa tâa ni gòropuu.  
\v 3 \x - \xo 4:3 \xt Éféso 2.2–3\x*Ba po dau gòri ê pàara na guwà wâro imudi pwacèwii tèpa béewà na càra caa tâmogòori Pwiduée. Na pwi pàara bèepwiri, âna guwà pâra wiâra pâ auniimiri kàwà na èpà; â guwà ciburà pi-ija ma piwâdo imudi, ma ipuu imudi. Â jèpwi mwara, âna guwà tèpa pwamaina pâ duée—muru na po dau miiri tà Pwiduée. 
\p [Êco na jèe nabwé diri pwiri!]  
\v 4 Â wà tèpa béewà béaa, âna rà pò goowà nabà. Â rà pinabaèpàwà, ba jèe câguwà caa tâa jaarà, na rà pwa na èpà ma wâro imudi.  
\v 5 \x - \xo 4:5 \xt Apostolo 10.42\x*Êco na rà o mwa coo ara wà Pwiduée, wà Pwina é pitèi tàpé na rà wâro ma tàpé na rà bà. [Â rà o tòpi têe na é pitèirà goro ê jèpa tûâ kàra.] 
\p  
\v 6 Êkaa pwiri ê majoroé ma jèe picémara ê *Picémara Wâdé tà tèpa âboro diri, tiagoro mwara tàpé na ia rà jèe bà\f + \fr 4:6 \fq Tàpé na ia rà jèe bà—\ft Pwiri tèpa âboro na rà bà béaa kâra pai tèepaa kà Iésu Kériso. Â wà Iésu na é picémara tàra na âracié tòotù kêe nanaara napuu. (Côo du nee tii 19 ma 20.) Êco na wâru mwara pâ auniimiri goro pai ina wàra pâ popai-bà.\f*. Wà tàpéebà, âna rà jèe bà\f + \fr 4:6 \fq Âna rà jèe bà—\ft Grec: \fqa Âna jèe pitèirà.\f* naa na naiiri âboro, ba wàépwiri ê wârimuru na jè cau tòpi, wàijè diri tèpa âboro. Êco na wâdé [tà Pwiduée] wiàna tâa tàra ê *âji wâro, goro ê Nyuâaê Pwicîri. 
\s2 Guwà pitòimiriwà 
\p  
\v 7 \x - \xo 4:7 \xt Roma 13.11–12\x*Jèe wâmwünyabwe ê pwâadàra diri pâ muru. Êkaa na guwà tà piaabòriwà, ma tà tàcî, ba na guwà pwapwicîri.  
\v 8 \x - \xo 4:8 \xt Proverbes 10.12; 1 Pétéru 1.22\x*Â wàéni ê pwina dau âjimuru: Guwà pimeaariwà taaci, gée na âji pwâranümawà. Ba «Wà tàpé na rà pimeaari, âna wâru pâ èpà na rà pwanauri\f + \fr 4:8 \fq Wà tàpé na rà pimeaari… \fl é, \fqa Wà Pwiduée, âna é pwanauri pâ èpà kà tàpé na rà meaari pàra tàpé.\f*.» 
\p  
\v 9 \x - \xo 4:9 \xt Hébéru 13.2\x*Â guwà tòpi tèpa [cèikî béewà] naa na pwârawâ kàwà, gée na âji pwâranüma, â guwà cibwaa nye tà kûu.  
\v 10 \x - \xo 4:10 \xt Roma 12.6–8\x*[Wà Pwiduée, âna é] jèe jèpa naa tàwà jècaa ê jèpa âraimeai, ba na guwà piênawéna kà wà tèpa béewà. Êkaa na guwà wakèri bwàti ê uràpâra kàwà, ba na guwà pame tàra ê aupwényunyuâari kà Pwiduée. 
\p  
\v 11 Wiàna é naa tâgà, ba na gà pwi a pwa pupûra, â wâdé na gà pwa, ba na gà pame ê popai kêe. Wiàna é todàgà, ba na gà pwi a pitu tà pàra tàpé, â gà pwa goro ê nii ma pàtàma Pwiduée. 
\p Na diri pâ muru na gà pwa, âna gà wàrapwiri, ba na o ipwamaina Pwiduée, naa na nee Iésu Kériso. Wâdé na tâa jaa Pwiduée\f + \fr 4:11 \fq Pwiduée—\fl é, \fqa Iésu Kériso.\f* ê pai maina ma muugère dàra gòiri awé! Amen! 
\s2 Aré me gée goo pai pâra wiâ Iésu 
\p  
\v 12 Tèpa âji béeò wée, jèe tèepaa mariwà ê tacai, pwacèwii ê ânye na dau tòjè. Â guwà cibwaa pò goo, pwacèwii na muru na ité.  
\v 13 \x - \xo 4:13 \xt Apostolo 5.41; Jacques 1.2; 1 Pétéru 1.6–7\x*Bwa, wâdé na guwà ipwàdée goo, ba guwà tèpa bée Kériso, [pwi *Mesia, pwi ênawéna kà Pwiduée] naa na pâ maagé côo kêe. Â o dau maina awé ê ipwàdée kàwà, na tòotù na o paari ê pai maina ma muugère kêe.  
\v 14 \x - \xo 4:14 \xt 1 Pétéru 2.20\x*Ba wiàna pinabaèpàwà, gée goro na guwà tèpa âboro kêe, â cidòri nyuâawà! Ba é tâa goowà ê Nyuâaê Pwicîri kà Pwiduée, Pwi Nyuâaê na é maina ma muugère! 
\p  
\v 15 [Câgo caa ina ê aré na é me gée goro pai pwa'gà ê pwina èpà!] Wiàna gà gée naa na wâro kà pàra tàpé, é, wiàna gà mura, é wiàna gà pwi a-ipòtàmwara, â gà mwa maagé côo goo! Guwà cibwaa wàrapwiri! 
\p  
\v 16 Êco na, wiàna gà maagé côo, gée goro na gà pwi a cèikî naa goo wà Kériso, â gà cibwaa kamu goo. Bwa, gà ipwamaina Pwiduée, ma pwaolé têe, ba gà pwi âboro kà Kériso. 
\p  
\v 17 Wà Pwiduée, âna ée mwa pitèi tèpa âboro. Â ée mwa tapoo, naa na wâao kêe. Â wiàna o pitèijè, wàijè tèpa naîê, o dà cè wârimuru kà tàpé na rà tétâjii ê Picémara Wâdé kà Pwiduée?  
\v 18 \x - \xo 4:18 \xt Proverbes 11.31\x*Ba jè pûra naa na *Tii Pwicîri pâ: 
\b  
\q1 \qt Pwacoé pai upa\qt* 
\q1 \qt wà pwina é *tàrù.\qt* 
\q1 \qt Ée mwa wànau\qt* 
\q1 \qt wà pwi âboro èpà,\qt* 
\q1 \qt na é naa càùé,\qt* 
\q1 \qt naa goo wà Pwiduée?\qt*\qs Proverbes 11.31\qs* 
\b  
\m  
\v 19 Wàépwiri, [co tèpa béeò, â go tubanabwé goro ê auina bèeni]: Wiàna gà maagé côo wiâra ê câbawâdé kà Pwiduée, â wâdé na gà tà cimwü goro pwa ê pwina wâdé. Â gà ipanuâgà têe, ba wàé pwi a tòpògà. Ba é tâa na pai tâa kêe, â o câé mwa caa panuâgà. 
\c 5  
\s1 Popai tà tèpa pitûâ kâra wâra pwapwicîri 
\p  
\v 1 Go pwa pupûra tàwà ni, wâguwà tèpa pitûâ kâra wâra pwapwicîri. Ba wâgo mwara pwi jè ijiao pwacèwiiwà, na go inapàpari ê pai maagé côo [ma pai bà] kà Kériso. Â o tâa tâjè ma wâguwà ê câmajè. Ba jè o mwa tâa na pai maina ma muugère kêe, na tòotù na ée mwa paarié [wà Pwiduée]. 
\p  go ilari jiiwà, pâ,  
\v 2 \x - \xo 5:2 \xt Ioane 21.15–17; Apostolo 20.28\x*guwà tòimiri tèpa âboro na é naa tàwà wà Pwiduée. Ba rà tèpa mutô kêe, â [é nama guwà tèpa wéaarirà. Â pârawà ma] guwà naa èrà ma tòimirirà. Êkaa na guwà wàrapwiri gée na âji pwâranüma, â càcaa pwacèwii tàpé na mwa po tacoo goorà, ba na rà pwa. Guwà pwa, gée goo ê pimeaari kàwà, â guwà cibwaa bu mwani goo.  
\v 3 \x - \xo 5:3 \xt 2 Korénito 1.24; Filipi 3.17; Tito 2.7\x*Guwà cibwaa naa naèà tà tèpa âboro kàwà. Â guwà paari tàra co ê pâ càrawà na wâdé. Â rà o pâra wiâwà ma ipwacèwiiwà.  
\v 4 Ba wiàna guwà wàrapwiri, â o tâa tàwà ê bwe korona—[ê câmawà na dau pwényuâa]—na tòotù na ée mwa wâjué côwâ wà [Iésu] Pwi Ukai kà tèpa wéaari mutô. Ê câmawà bèepwiri, âna ê [pai tâa kàwà jaaé, naa na] pai maina ma muugère kêe, na o tâa dàra gòiri awé. 
\s1 Bénabwé popai 
\p  
\v 5 \x - \xo 5:5 \xt Éféso 5.21; Jacques 4.6\x*Wàéni popai kôo tàwà diri\f + \fr 5:5 \fq Tàwà diri—\fl é, \fqa Diri tàpé na càra caa tèpa pitûâ. \ft Grec: \fqa Tàwà na guwà bwaa dopwa.\f*: Guwà ipakîriwà na ara tèpa pitûâ [naa na cèikî]. Â guwà cau piênawéna kàwà jècaa naa na ipakîri. Ba jèe wii naa na *Tii Pwicîri pâ: 
\b  
\q1 \qt Pwiduée, âna é cicara\qt* 
\q1 \qt tèpa ipwamainarà.\qt* 
\q1 \qt É naa pimeaari\qt* 
\q1 \qt tà tèpa ipakîrirà.\qt*\qs Proverbes 3.34\qs* 
\b  
\m  
\v 6 \x - \xo 5:6 \xt Mataio 23.12; Luka 14.11; Jacques 4.10\x*Êkaa na guwà ipakîriwà, na aranara ê pàtàma Pwiduée na dau maina awé. Â ée mwa ipwamainawà na tòotù na é pitòrigari.  
\v 7 \x - \xo 5:7 \xt Mataio 6.25–30\x*Â guwà panuâ têe diri ê pâ tòina kàwà, ba é tòimiriwà. 
\p  
\v 8 \x - \xo 5:8 \xt 1 Tésalonika 5.6\x*Guwà tà tàcî, â guwà tà pitòimiriwà. Ba wà pwi a pièpàriwà, wà *Caatana, âna é nye tàgére biié goowà, pwacèwii ê liô\f + \fr 5:8 \fq Liô—\ft Grec: \fqa Liô (lion) na é kûu.\f* na é imudàra cè âboro cèna é utié.  
\v 9 \x - \xo 5:9 \xt Éféso 6.11–13; Jacques 4.7\x*Guwà cicaraé, â guwà tà cimwü naa na cèikî kàwà! Â [guwà cibwaa niimiri pâ] guwà maagé côo [acari]. Ba rà wàrapwiri wà diri tèpa cèikî béewà, pitiri naa gòropuu.  
\v 10 [Â guwà maagé côo naa na ji pàara na càcaa gòiri.] 
\p Êco na wà Pwiduée, âna é jèe todàwà, goo wà Iésu Kériso, ba na guwà mwa tâa ma wàilu, naa na pai maina ma muugère kàru, dàra gòiri awé. É wàrapwiri gée goo ê *pimeaari imudi kêe ba kàwà. Â gée na càùru ji pàara na ûgé na guwà maagé côo na, â ée mwa nama guwà wâdé côwâ. Â ée mwa pagòowà, ma nama guwà cimwü, ma pacimawà dàra gòiri. 
\p  
\v 11 Ba tâa jaaé ê pàtàmee na ticè pwâadèreè, dàra gòiri awé! Wâdé na wàra! Amen! 
\s2 Ipicijii 
\p  
\v 12 \x - \xo 5:12 \xt Apostolo 12.2,25, 13.13, 15.22,37–40\x*Go jèe wii tàwà ê ji nari tii bèeni, ba na go pagòowà, ma taniimiri tàwà pâ, tâa jaawà ê pimeaari imudi kà Pwiduée. Wâdé na guwà tà cimwü na! É tâa jaao wà Silas, â é pitu tôo na go wii ê tii bèeni. É pwi âji béeò na é *tàrù, â go dau cèikî naa gooé. 
\p  
\v 13 \x - \xo 5:13 \xt 2 Timotéo 4.11\x*Rà naa bwàcu kàwà tèpa cèikî béewà géeni na ville ‘*Babulona’\f + \fr 5:13 \fq ‘Babulona’—\ft É wii tii gée na ville Roma wà Pétéru, êco na pwiri nümee na é naapwàniri jii wà tàpé na rà pièpàri tèpa cèikî. Babulona, âna câmu kà tàpé na rà pipaa dàra pwi Ba kà Pwiduée. (Côo Auinapàpari 14.8 ma 18.10,21.)\f*. Ba wà Pwiduée, âna é todàra, ba na tèpa âboro kêe, pwacèwiiwà. 
\p  é naa bwàcu kàwà mwara wà Maréko, pwina naîô naa na nee Kériso. 
\p  
\v 14 Wâdé na guwà pipwabwàcu tàwà naa na pimeaari, naa na nee Kériso. 
\p Wâdé na cau tâa jaawà ê pinaanapô, wâguwà tèpa âboro kà Kériso! 
\cls Cidòri nyuâawà!