\id 1JN  
\h 1 Ioane 
\toc1 1 Ioane (1 Jean) 
\toc2 1 Ioane 
\toc3 1 Ioane 
\mt2 Pâbéaa kâra tii 
\mt3 kà 
\mt1 Ioane 
\imt1 Bétapoo popai 
\is1 Wàilàapà na wii tii bèeni? 
\ip Munaa Ioane, pwi *apostolo, na ia é bwaa pwi nari âboro èpo na pàara kà Iésu. 
\is1 É wii wiidà? 
\ip Nabibiu kâra *naja 85 ma 100, na é jèe pwi ijiao, â é pwi a pitûâ kâra wâra pwapwicîri wâ Éféso naa province Asia (napô Turquie nabà). Na pwi pàara bèepwiri, na é wii diri tèpa 5 tii kêe na tâa na *Tii Pwicîri—ê *Picémara Wâdé \bk (Tii kà Ioane)\bk*; \bk 1, 2, 3 Ioane\bk*, ma tii \bk Auinapàpari\bk*. 
\is1 É wii tâî? 
\ip Târa ê pâ picaatâa kà tèpa cèikî naa goo Iésu, na rà tâa na province Asia. 
\is1 Cina é wii? 
\ip É pacâmuri tèpa cèikî na Asia goro ê âjupâra. Ba wà pàra tàpé gée goorà, âna rà pacâmurirà goro pâ popai na pwâ. Ba rà ina pâ, wà Iésu, âna câé caa pwi âji âboro pwacèwiijè, â câé caa tâmogòori pâ tacai ma aré kà tèpa âji âboro. Â rà ina mwara pâ, piticèmuru naa goo ê naiijè ma diri pâ muru na jè côo. Êkaa na piticèmuru naa goo pai wârori ê wâro kâjè, wiàna wâdé, é wiàna èpà, ba ipaiwà. Â rà jèe ipa-imwüru pàra tàpé goro ê popai bèepwiri. 
\is1 Dà êre ê tii bèeni? 
\ip É taniimiri tâjè wà Ioane pâ, nye âjupâra pâ, wà Iésu, âna é nye pwi âji âboro pwacèwiijè. Êco na wàé *Pwina naî Pwiduée wà Kériso. Napwa wà Pwiduée, âna é pwéelaa, ma pimeaari. Â jè tâmogòori pwiri gée goo Iésu, na é jèe pwanauri ê èpà kâjè. Â jè tâmogòori mwara gée goo ê Nyuâaê Pwicîri na é jèe naa tâjè wà Iésu. 
\ip Napwa wà pwi âji a cèikî naa goo Iésu, âna wâdé na é ciburà tâa goo ê cèikî, na jèe picòo têe gée na autapoo goo. Â wâdé mwara, na é naa ê wâro kêe ba kà pàra tàpé, pwacèwii Iésu. 
\ip Na wàrapwiri â é paari ê pai pimeaari kêe ba kà Pwiduée, ma pai tâmogòorié kêe. 
\ib  
\is1 Pai pitàgoo tii 1 Ioane 
\io1 Popai kà Pwiduée na é naa wâro \ior (1.1–4)\ior* 
\io1 Jè wâro na pwéelaa wàijè tèpa naî Pwiduée \ior (1.5–2.17)\ior* 
\io1 Tèpa cicara Kériso \ior (2.18–28)\ior* 
\io1 Jè tèpa naî Pwiduée \ior (3.1–24)\ior* 
\io1 Tèpa péroféta a pwâ \ior (4.1–6)\ior* 
\io1 Majoroé pai pimeaarijè \ior (4.7–21)\ior* 
\io1 Cèikî naa goo Pwina naî Pwiduée \ior (5.1–12)\ior* 
\io1 É wii Ioane, ba na cimwü cèikî kâjè \ior (5.13–21)\ior* 
\ie  
\c 1  
\s1 Popai kà Pwiduée na é naa wâro 
\p  
\v 1 \x - \xo 1:1 \xt Ioane 1.1\x*Wà Pwi Popai, na é naa ê wâro\f + \fr 1:1 \fq Pwi Popai na é naa ê wâro—\ft Pai ina wèe pâ, Iésu Kériso. (Côo Ioane 1.1.)\f*, âna é tâa béaa kâra ê autapoo goo ê gòropuu. Â bà inapàparié tàwà nabà, ba bà jèe po têreê; â bà jèe po côoê; â bà jèe po tu naa gooé; â bà jèe po nünüma naa gooé.  
\v 2 \x - \xo 1:2 \xt Ioane 1.14\x*Ba é piâpàparié [tà tèpa âboro] â wàibà na bà côo pai tèepaa kêe, âna bà tèpa *paâjupâraê. Â bà picémara tàwà pâ, wâjaaé ê *wâro dàra gòiri. É tâa jaa wà Caa, na é jèe paarié tâbà.  
\v 3 Êkaa na bà inaê tàwà, wâguwà mwara, ba na [jè capai tâmogòori ê wâro bèepwiri, â] o caapwi pwâranümajè. Â o caapwi pwâranümajè mwara, ma wà Caa, ma wà Pwina naîê, Iésu *Kériso.  
\v 4 \x - \xo 1:4 \xt Ioane 16.24\x*Â bà\f + \fr 1:4 \fq Bà—\ft Wà Ioane, âna é wii ê tii goro ê auniimiri kàra ma wà tèpa apostolo bée.\f* wii paé tàwà, ê tii bèeni, ba na o tâbawêe ê ipwàdée kâbà. 
\s1 Wâdé na jè wâro na pwéelaa 
\p  
\v 5 \x - \xo 1:5 \xt 1 Timotéo 6.16; Jacques 1.17\x*Wàéni ê popai, na bà têre jii Iésu Kériso, na bà inapàpari tàwà ni: Wà Pwiduée, âna wàé ê pwéelaa, â nye ticè bàutê gooé.  
\v 6 \x - \xo 1:6 \xt 1 Ioane 2.4\x*Wiàna jè ina pâ, jè tâa goo wà Pwiduée, â wiàna jè bwaa gére wâro na ê bàutê, â jè tèpa pwâ, â câjè caa pâra wiâra ê \nd *âjupâra\nd* [na ara Pwiduée].  
\v 7 Ba wà Pwiduée, âna é tâa na ê pwéelaa. Â wiàna jè wâro na ê pwéelaa, â o caapwi pwâranümajè goojè. Â é patâjii diri pâ èpà kâjè, wà Pwina naîê, Iésu Kériso, goro ê domii kêe [na joro na ia é bà ba kâjè] ba na jè o caapwi mwara ma wàé. 
\p  
\v 8 \x - \xo 1:8 \xt Psaume 32.5; Proverbes 28.13\x*Wiàna jè ina pâ, nye ticè èpà na pwâranümajè, â jè nye pipwâgàrijè côwâ, â câé caa tâa goojè ê \nd *âjupâra\nd*.  
\v 9-10 Â câé caa wâro goojè, ê popai kêe, â jè pâ nau tèpa tobapwâ wà Pwiduée. Êco na, wiàna jè inapàpari tà Pwiduée ê pâ èpà kâjè, â ée mwa pwanaurijè, ma patâjii diri ê èpà na tâa goojè. Ba é *tàrù, â é pwa ê pwina é ina. 
\c 2  
\s1 Pai wâro kâjè tèpa naî Pwiduée 
\s2 É pitu tâjè wà Iésu Kériso 
\p  
\v 1 \x - \xo 2:1 \xt Hébéru 9.24\x*Tèpa naîô, go wii tàwà ê pâ muru bèepwiri, ba na câguwà caa pwa ê pwina èpà. Êco na, wiàna jè [pitanami ma] pwa cèna èpà, â pwa pwi a-ipwamurujè na ara wà Caa—âna wà Iésu Kériso, na é *tàrù [ba nye pwi a ticè èpà kêe].  
\v 2 \x - \xo 2:2 \xt Ioane 1.29; Kolosé 1.20; 1 Ioane 4.10\x*Â wàé, âna é pipanuâê côwâ, ba na pwi *ârapwaailò târa ma patâjii pâ èpà kâjè; â càcaa pâ èpà kâjè co, â êmwara ê pâ èpà kâra diri pâ âboro gòropuu. 
\s2 Jè pitêre dèe wiàna jè meaarié 
\p  
\v 3 Wàéni ê câmu kà pwi âboro na é tâmogòori Pwiduée: É pitêre dàra ê pwina é ina.  
\v 4 Wà pwi âboro na é ina pâ é tâmogòori Pwiduée, â na câé caa pâra wiâra bwàti ê pwina é ina, âna é pwi a pwâ, ba càcaa tâa gooé ê \nd *âjupâra\nd*.  
\v 5 \x - \xo 2:5 \xt Ioane 14.21,23\x*Â wà pwi âboro na é pâra wiâra ê popai kà Pwiduée, âna tâbawêe naa gooé ê pimeaari kêe\f + \fr 2:5 \fq Pimeaari kêe—\fl é, \fqa Ê pai meaari Pwiduée kâjè; \fl é, \fqa ê pai meaari tèpa cèikî bée, goro ê pimeaari na me gée goo wà Pwiduée.\f*. Wàéni ê câmu kêe, na jè tâa goo Pwiduée: [Na jè pitêre dèe.]  
\v 6 Â wà pwi âboro na é ina pâ é tâa goo wà Pwiduée, âna wâdé na ê wâro pwacèwii wà Iésu Kériso. 
\s2 Jè meaari tèpa cèikî béejè 
\p  
\v 7 \x - \xo 2:7 \xt Ioane 13.34; 2 Ioane 1.5–6\x*Tèpa âji béeò, guwà cibwaa niimiri pâ, go naa tàwà cè jè âmu aupitûâri. Ba jèe nye aupitûâri gée na autapoo goo\f + \fr 2:7 \fq Gée na autapoo goo—\ft Pai ina wèe pâ, \fqa gée na autapoo wàra ê gòropuu, \fl é, \fqa gée na pàara na ia picémara ê Picémara Wâdé, \fl é, \fqa na guwà tapoo cèikî. \ft Ipaiwà naa 2.24 ma naa 3.11.\f* [pâ guwà pimeaariwà]. Ba i popai na ia bà picémara tàwà.  
\v 8 \x - \xo 2:8 \xt Ioane 1.9; Roma 13.12\x*Êco na [pwacèwii na] pwi aupitûâri na bwaa âmuê, ba wà Kériso, âna é paari tâjè ê âji pai wârori. Â wâguwà, âna wâdé mwara na guwà wârori nabàni\f + \fr 2:8 \fq Ba wà Kériso… \ft Grec: \fqa Ê autûâri bèepwiri, âna âjupâra naa goo Kériso, ma naa goowà mwara.\f*. Ba jèe tapoo pitiàu pâ ê bàutê, â jèe tèepaa bwàti ê pwi âji pwéelaa. 
\p  
\v 9 \x - \xo 2:9 \xt 1 Ioane 4.20\x*Napwa naa goo wà pwi âboro na é ina pâ é tâa na ê pwéelaa, â é câbaèpà pwi a cèikî bée, âna é nye tà ciburà tâa na ê bàutê, tèepaa naa goo nabàni.  
\v 10-11 \x - \xo 2:10-11 \xt Roma 14.13\x*\x - \xo 2:10-11 \xt Ioane 12.35\x* câé caa tâmogòori cèna é pâra naawê, ba târi ê du âraporomee ê bàutê. Êco na wà pwi âboro na é meaari tèpa cèikî bée, âna é tâa na ê pwéelaa.  o ticè èpà cèna é pwa\f + \fr 2:10-11 \fq  o ticè èpà cèna é pwa—\ft Grec: \fqa  o câé caa tûu.\f*. 
\s2 Jè cibwaa wâdéari tûâ na èpà 
\li1  
\v 12-14 Go wii paé tàwà co tèpa naî [Pwiduée]. Ba jèe pwanauri ê pâ èpà kàwà, ba wàrapwiri goo ê pwina é pwa wà Kériso. Â guwà jèe tâmogòori wà Caa. 
\li1 Go wii paé tàwà co tèpa ‘caa’—[wâguwà na guwà jèe cimwü naa na cèikî]. Ba guwà jèe nye tâmogòori wà Pwina é tâa, béaa kâra autapoo goo—üu, é tâa béaa kâra pai tòpò diri pâ muru! 
\li1 Go wii paé tàwà co tèpa âboro dopwa, ba guwà gòo, ba é tà mwü naa na pwâranümawà, ê Popai kà Pwiduée. Â guwà jèe piétò jii *Caatana, wà Pwi âboro èpà. Üu, guwà jèe nye piétò jiié\f + \fr 2:12-14 \ft Bà jèe naanaimari naa na paicî ê pâ popai, na é pi-ina cùuru wà Ioane, naa na grec.\f*! 
\b  
\m  
\v 15 \x - \xo 2:15 \xt Roma 8.7\x*Guwà cibwaa pii ê pwâra-nümawà naa goro ê pâ muru gòropuu, bau ê pâ muru [na èpà] na tâa na. Ba wiàna gà wâdéari ê gòropuu, â o câgà caa meaari wà Caa\f + \fr 2:15 \fq O câgà caa meaari wà Caa—\ft Grec: \fqa O càcaa tâa googà ê pimeaari kà Caa.\f*.  
\v 16 \x - \xo 2:16 \xt Roma 13.14\x*Wàéni ê pwina é me gée na ê gòropuu bèeni: 
\b  
\li1 Jè câbawâdé pâ muru na èpà, naa na pwâranümajè; 
\li1 Jè naa nümajè naa goo ê pwina jè côo, goro du âraporomeejè; 
\li1 Jè ipwamainajè goro ê pâ neemurujè. 
\b  
\m Diri ê pâ pwiibà, âna càra caa me gée goo Caa, ba rà me gée goo [ê wâro kâjè na èpà naani] gòropuu.  
\v 17 \x - \xo 2:17 \xt Mataio 7.21\x*Jèe tàgére pitiàu pâ, ê pwi gòropuu bèeni, bau diri pâ muru na wâna, na rà câbawâdé wà tèpa âboro. Êco na wà pwina é pwa ê câbawâdé kà Pwiduée, âna ée mwa *wâro dàra gòiri jaaé. 
\s1 Tèpa cicara Kériso 
\p  
\v 18 \x - \xo 2:18 \xt Mataio 24.5,24; 2 Ioane 1.7\x*Tèpa gòrobéeò, jè wâro naa pâ bénabwé tòotù. Ba guwà jèe têre pâ, ée mwa tèepaa na pwi pàara bèepwiri, wà pwi âboro na ina gooé pâ Pwi a cicara Kériso. Â guwà côo, rà jèe dau wâru nabà tèpa cicara Kériso. Â wàépwiri pai tâmogòori pâ, jè wâro na pâ bénabwé tòotù.  
\v 19 \x - \xo 2:19 \xt Apostolo 20.30\x*Napwa tàpéebà, âna rà pâra jii ê wâra pwapwicîri, ba càra caa tèpa âji a cèikî béejè. Ba wiàna rà tèpa âji béejè, â pwiri rà tà mwü jaajè. Üu, pai pâra kàra jiijè, âna cipàpaa âji pai pwa goorà\f + \fr 2:19 \fq Cipàpaa âji pai pwa goorà—\ft Grec: \fqa Cipàpaa pâ, càra caa tèpa béejè.\f*. 
\p  
\v 20 \x - \xo 2:20 \xt 1 Korénito 2.15\x*Êco na wâguwà, âna é jèe pitòrigariwà wà Kériso, wà Pwina é Pwicîri, â é jèe naa tàwà ê *aupwényunyuâari kêe, ê Nyuâaê Pwicîri\f + \fr 2:20 \fq É jèe pitòrigariwà… \ft Grec: \fqa  wâguwà, âna tâa tàwà ê aupwényunyuâari na é wicèpwiri {‘onction’} naa gòwà, gée goo wà Pwina Pwicîri. \ft Ê \+it onction\+it* ni, âna câmu kâra pai pitòrigarijè. Munaa ê Nyuâaê Pwicîri, é, pwiri ê popai kà Pwiduée. Ipaiwà naa na nee tii 27. (Côo mwara \fl note \ft goo Luka 4.18.)\f*.  nabàni, âna guwà jèe tâmogòori ê \nd *âjupâra\nd*.  
\v 21 Wàé kaa pwiri, na go wii tàwà. Ba câguwà caa pwacèwii tàpé na càra caa tâmogòori ê \nd âjupâra\nd*.  go wii, ba na guwà tâmogòori pâ, nye ticè popai na pwâ, na é me gée goo wà Pwina é \nd âjupâra\nd*\f + \fr 2:21 \fl É, \fqa Câgo caa wii tàwà pâ, câguwà caa tâmogòori ê \nd âjupâra\nd*. \fqa Go wii tàwà pâ guwà tâmogòori ê \nd âjupâra\nd*. \fqa  nye ticè popai na pwâ, na é me gée goo ê \nd âjupâra\nd*.\f*. 
\p  
\v 22 \x - \xo 2:22 \xt 1 Ioane 4.3; 2 Ioane 1.7\x*É wàilàapà pwi a pwâ? Wàéni: Wà pwi âboro na é ina pâ, wà Iésu, âna càcaa wàé wà Kériso, [wà pwi *Mesia, na é me gée goo Pwiduée]. 
\p Wà tàpé na rà ina pwiri, âna rà pitütü\f + \fr 2:22 \fq Pitütü—\fqa Rejeter.\f* goo wà Pwina naîê, ma wà Caa kêe mwara. Wàilà kaa pwiri tèpa a cicara Kériso!  
\v 23 \x - \xo 2:23 \xt Ioane 5.23; 1 Ioane 4.15, 5.1\x*Ba wà pwi âboro na é pitütü goo wà Pwina naîê, âna câé caa tâa gooé wà Caa. Â wà pwi âboro na é tòpi\f + \fr 2:23 \fq Tòpi—\fl é, \fqa Côoina.\f* wà Pwina naîê, âna é tâa gooé wà Caa. 
\s2 Nama é tâa goowà ê âjupâra 
\p  
\v 24 Wâguwà, âna wâdé na é nye tà cawi goowà ê popai na guwà têre na guwà tapoo cèikî\f + \fr 2:24 \fq Na guwà tapoo cèikî—\ft Grec: \fqa Gée na autapoo goo.\f*. Ba wiàna é tâa goowà ê popai, â guwà o nye tà tâa goo Pwina naîê ma wà Caa.  
\v 25 Â tâa tâjè ê wâro dàra gòiri jaaru, ba wàépwiri ê âraimeai na é jèe ina béaa wà Kériso. 
\p  
\v 26 Go jèe wii diri tàwà ê pâ muru bèepwiri, [ba na guwà côoina] tàpé na pwa na rà ipa-imwüruwà.  
\v 27 \x - \xo 2:27 \xt Ioane 16.13\x*Guwà cibwaa mudàra tèpa pacâmuriwà [na rà wàrapwiri]. Ba é tà tâa goowà ê Nyuâaê Pwicîri, pwi aupwényunyuâari\f + \fr 2:27 \fq Pwi aupwényunyuâari—\ft Grec: \fqa Onction, \ft pwacèwii na nee tii 20. Munaa ê Nyuâaê Pwicîri, \fl é, \ft pwiri ê popai kà Pwiduée.\f* na jèe naa tàwà. Â wàé na é nye paari tàwà diri ê pwina wâdé na guwà tâmogòori. Â ê pwina é pacâmuriwà goo, âna nye âjupâra, â càcaa pwâ. Â wàéni ê autûâri kêe tàwà: Guwà tà tâa goo wà Kériso. Êkaa na wâdé na guwà wàrapwiri. 
\p  
\v 28 Üu, co tèpa âji béeò, wâdé na guwà tâa goo Kériso, ba na o câguwà caa piwâ, ma kamu na araé, na tòotù na ée mwa wâjué me côwâ na.  
\v 29 \x - \xo 2:29 \xt 1 Ioane 3.10\x*Ba guwà tâmogòori pâ, wà Kériso, âna é tàrù ma âjupâra. Êkaa na, wà diri tàpé na pwa ê pwina tàrù ma âjupâra, âna rà tèpa âji naî Pwiduée. 
\c 3  
\s1 Jè tèpa naî Pwiduée 
\p  
\v 1 \x - \xo 3:1 \xt Ioane 1.12–13, 16.3\x*Guwà côo, dau maina awé ê pimeaari kà Pwiduée Caa ba kâjè, ba é pitunee tâjè pâ, na jè tèpa naîê! Â jèe wàijè gooni! Napwa naa goo wà tèpa âboro naa gòropuu bèeni, âna càra caa tâmogòori pwiri\f + \fr 3:1 \fq Tâmogòori pwiri—\fl é, \fqa Côoinajè, \fl é, \fqa tâmogòorijè.\f*, ba càra caa tâmogòori wà Pwiduée, Caa kâjè. 
\p  
\v 2 \x - \xo 3:2 \xt 2 Korénito 3.18\x*Tèpa âji béeò, jè jèe tèpa naî Pwiduée nabà. Â o mwa wànau, na pwi tòotù na ée mwa wâjué me côwâ na, wà Kériso\f + \fr 3:2 \ft 2\+ord e\+ord* phrase—\fl é, \fqa Widàuru ma wiilu.\f*? Jè nye tâmogòori pâ, o tòotérijè, ba na jè pwacèwiié, wiàna jè côoê gée, [naa na pwényuâa kêe].  
\v 3 Êkaa na jè pitòimirijè, ba na o ticè èpà goojè, na jè tà tapacîri goro cèikî ê pwi tòotù-bà. Ba wà Kériso, âna é pitòimiriê, â ticè èpà gooé. 
\s2 Jè cibwaa ciburà pwa na èpà! 
\p  
\v 4 Wà tàpé na rà pwa na èpà, âna rà [jèe pâ nau pwacèwii wà Pwina é] cicara wà Pwiduée ma ê pâ aupitûâri kêe. Ba wiàna jè pwa na èpà, â jè cicara Pwiduée.  
\v 5 \x - \xo 3:5 \xt Ioane 1.29; 1 Pétéru 2.22–24; 1 Ioane 2.2\x*Â guwà jèe nye tâmogòori pâ, é jèe tèepaa wà Iésu Kériso, ba na é patâjii ê pâ èpà kà tèpa âboro\f + \fr 3:5 \fq Ba na é patâjii ê pâ èpà… \fl é, \fqa Ba na é pitu tà tèpa âboro, ba na o càra mu caa pwa na èpà.\f*, â nye ticè èpà gooé.  
\v 6 Wiàna jè tâa gooé, â câjè mwa caa pwa na èpà. Â wà pwi âboro na é ciburà pwa na èpà, âna câé mu caa côoina wà Kériso, â câé mu caa tâmogòorié. 
\p  
\v 7 Tèpa âji béeò, guwà cibwaa nama ipa-imwüruwà. É nye *tàrù pwi âboro, wiàna é pwa ê pwina tàrù ma wâdé, pwacèwii Kériso, wà pwina é dau tàrù ma wâdé awé.  
\v 8 \x - \xo 3:8 \xt Ioane 8.44\x*Â wà pwi âboro na é ciburà pwa na èpà, âna é pwi âboro kà *Caatana, wà pwi ia é dau ciburà pwa na èpà gée na autapoo goo. Wàéni ê majoroé ma é tèepaa me [naani gòropuu] wà *Pwina naî Pwiduée: É me, ba na é pwa ma tiàu diri pâ wakè na èpà kà Caatana. 
\p  
\v 9 \x - \xo 3:9 \xt 1 Ioane 5.18\x*Wiàna gà pwina âji naî Pwiduée, â pwacoé ma gà ciburà pwa na èpà. Ba é tâa googà ê *âji wâro me gée goo Pwiduée\f + \fr 3:9 \fq Ê âji wâro, me gée goo Pwiduée—\fl é, \fqa Ê pàtàma Pwiduée, \fl é, \fqa ê Nyuâaê Pwicîri kà Pwiduée, \fl é, \fqa ê popai kà Pwiduée. \ft Grec: \fqa Ê arapwüru kà Pwiduée.\f*. Â wiàna é tâa googà wà Pwiduée, â gà o mwa wârori ê wâro kêe.  
\v 10 Wàépwiri pai côoina tèpa naî Pwiduée ma wà tèpa naî Caatana. Ba wà pwi âboro na câé caa pitêre dà Pwiduée\f + \fr 3:10 \fq Pitêre dà Pwiduée—\ft Grec: \fqa Pwa ê pwina tàrù.\f*, âna câé caa pwi âboro kà Pwiduée. Â wà pwina câé caa meaari tèpa cèikî bée, âna câé caa pwi âboro kêe. 
\s2 Wâdé na jè pimeaarijè 
\p  
\v 11 \x - \xo 3:11 \xt Ioane 13.34\x*Wàéni ê *Picémara Wâdé na guwà têre na guwà tapoo cèikî\f + \fr 3:11 \ft 1\+ord re\+ord* phrase—\ft Grec: \fqa Wàéni ê popai na guwà têre gée na autapoo goo.\f*: Wâdé na jè pimeaarijè. 
\p  
\v 12 \x - \xo 3:12 \xt Genèse 4.8\x*Guwà cibwaa pwacèwii Kaina, na é pwi âboro kà Caatana, wà Pwi âboro èpà. Ba wà Kaina, âna é tétàmwara Abéla, pwi jiié. Â gorodà na é tétàmwereê? Ba é pwi a pwa pâ tûâ na èpà, â wà Abéla, âna é pwi a pwa pâ tûâ na wâdé.  
\v 13 \x - \xo 3:13 \xt Ioane 5.18–19\x*Êkaa na, guwà cibwaa pò, tèpa gòrobéeò, wiàna rà èpàriwà ê pâ âboro naa gòropuu bèeni [na càra caa papwicîri wà Pwiduée]. 
\p  
\v 14 \x - \xo 3:14 \xt Ioane 5.24\x*Wàijè, âna jè jèe pâra gée na aubà, naa na âji wâro. Wàéni ê câmu kêe—wiàna jè pimeaari tèpa cèikî béejè. Ba wà pwi âboro na câé caa pimeaari, âna é nye tà ciburà tâa na aubà, [wâiti jii Pwiduée].  
\v 15 \x - \xo 3:15 \xt Auinapàpari 21.8\x*[Wà Pwiduée, âna é niimiri pâ] wà pwi âboro na é èpàri pwi a cèikî bée, âna é pwacèwii pwi a tétàmwara âboro. Â wà tèpa tétàmwara âboro, âna càcaa wâgoorà ê *wâro dàra gòiri, [na é me gée jaa Pwiduée]. 
\p  
\v 16 \x - \xo 3:16 \xt Ioane 13.1; Galatia 1.4\x*Wàéni ê âji pimeaari: Wà Kériso, âna é panuâ ê wâro kêe ba kâjè. Â wâdé na jè panuâ ê wâro kâjè ba kà tèpa béejè. 
\p  
\v 17 \x - \xo 3:17 \xt Deutéronome 15.7\x*Guwà côo, wiàna wâru neemurujè, â wiàna jè iauri jii pwi jè a cèikî béejè na ticè kêe, â o wànau cè pai tâa goojè ê pimeaari kà Pwiduée?  
\v 18 \x - \xo 3:18 \xt Jacques 2.15–16\x*Tèpa gòrobéeò, jè cibwaa pimeaari co goro popai, â wâdé wiàna jè âji pimeaari goro ê tûâ ma càrajè. 
\s2 Câjè caa piwâ na ara Pwiduée 
\p  
\v 19 Wiàna jè âji pimeaarijè goro ê pâ tûâ kâjè, â jè o tâmogòori pâ jè wâro na \nd *âjupâra\nd*. Â o càcaa wâgotâjè, na jè coo ara Pwiduée, [wà Pwina é \nd âjupâra\nd*].  
\v 20 (Êco na, wiàna é pitòtijè ê pwâranümajè, â [é bwaa nye tà meaarijè wà Pwiduée. Ba] jè tâmogòori pâ, é nye piwéna jii ê pwâranümajè wà Pwiduée, wàé na é tâmogòori diri pâ muru.)  
\v 21 \x - \xo 3:21 \xt Hébéru 4.16\x*Â wiàna câé caa pitòtijè ê pwâranümajè, co tèpa âji béeò, â o câjè caa piwâ ma wâgotâjè na jè coo ara Pwiduée. 
\p  
\v 22 Â ée mwa naa tâjè diri pâ namuru na jè ilari jiié, gée goo na jè pitêre dèe, ma pwa ê pwina wâdé têe.  
\v 23 \x - \xo 3:23 \xt Ioane 6.29, 13.34\x*Â wàéni ê pwina é ina tâjè: Wâdé na jè cèikî naa goo Pwina naîê, Iésu Kériso; â jè pimeaarijè, pwacèwii autûâri kêe tâjè. 
\p  
\v 24 \x - \xo 3:24 \xt 1 Ioane 4.13\x*Wiàna jè pitêre dà Pwiduée, ma tâa gooé, â wàé, âna é tâa goojè. Â jè tâmogòori pâ, é tâa goojè, ba é wâro goojè ê Nyuâaê Pwicîri, na é jèe naa tâjè. 
\c 4  
\s1 Ipwacôoco tèpa péroféta a pwâ 
\p  
\v 1 \x - \xo 4:1 \xt Mataio 7.15; 1 Tésalonika 5.21; 1 Ioane 2.18; 2 Ioane 1.7\x*Guwà ipwacôoco, co tèpa âji béeò. Ba wâru tèpa *péroféta a pwâ, na rà mwa tèepaa me. [Â rà ina pâ rà pame ê popai kà Pwiduée.] Â guwà cibwaa nama cèikî naa goorà! Wâdé na guwà côo bwàti ê pwina rà ina pâ, pwiri âji popai na me gée goo ê Nyuâaê Pwicîri kà Pwiduée.  
\v 2 \x - \xo 4:2 \xt 1 Korénito 12.3\x*Â guwà o côoina pâ, é tâa goorà ê Nyuâaê Pwicîri, wiàna [ê pwina] rà ina, [âna pâra naa goo ê pwina é ina wà Pwiduée] pâ: «É jèe boome wà Iésu Kériso, âna é pa naiiri âboro.» 
\p  
\v 3 \x - \xo 4:3 \xt 1 Ioane 2.18\x*Wà pwi âboro\f + \fr 4:3 \fq Âboro—\fl é, \fqa Duée.\f* na câé caa wàrapwiri, târa pai inapàpari kêe wà Iésu, âna câé caa me gée goo Pwiduée. Âna wàépwiri câmu kà pwi a cicara Kériso, na ia guwà jèe têre pâ, ée mwa tèepaa. Â âjupâra, é jèe nye tà wâni gòropuu. 
\p  
\v 4 \x - \xo 4:4 \xt Mataio 12.29; 1 Ioane 5.4–5\x*Tèpa âji béeò, guwà jèe tèpa âboro kà Pwiduée, â guwà jèe piétò jii tèpa pwâ bèepwiri\f + \fr 4:4 \fq Tèpa pwâ bèepwiri—\fl é, \fqa Tèpa duée bèepwiri.\f*. Ba ê Nyuâaê Pwicîri\f + \fr 4:4 \fq Ê Nyuâaê Pwicîri—\fl é, \fqa Pwiduée, \fl é, \fqa Iésu Kériso. \ft Grec: \fqa Pwina.\f* na é tâa goowà, âna é maina jii *Caatana na é tâa ni gòropuu.  
\v 5 \x - \xo 4:5 \xt Ioane 8.47, 15.19\x*Ba wà tèpa âboro bèepwiri, âna rà nye tèpa âboro na ê gòropuu bèeni [na èpà]. Â pwâratùra kàra, âna popai me gée gòropuu. Êkaa na wà tèpa âboro gòropuu, âna rà pitêre dàra. 
\p  
\v 6 Êco na wàijè\f + \fr 4:6 \fq Wàijè—\fl é, \fqa Wàibà \ft (wà Ioane ma wà diri tèpa apostolo na rà pacâmuri tèpa âboro goro ê âjupâra).\f*, âna jè tèpa âboro kà Pwiduée. Â rà nye pitêre dàjè tàpé na rà tâmogòori Pwiduée. Â wà tàpé na càra caa tèpa âboro kêe, âna càra caa pitêre dàjè. Â gée goo pwiri, na jè côoina ê pwina tâa goo pwi âboro—wiàna ê Nyuâaê Pwicîri na é \nd *âjupâra\nd*, é, wiàna ê duée na é tuba-imwürujè. 
\s1 Jè pimeaarijè gée goo na Pwiduée âna é pwi a pimeaari 
\p  
\v 7 Tèpa âji béeò, wâdé na jè tà pimeaarijè, ba é me gée goo Pwiduée ê pimeaari. Wiàna jè pimeaarijè, â jè paari pâ, jè tèpa âji naî Pwiduée, â jè paari pâ jè tâmogòorié.  
\v 8 Wà pwi âboro na câé caa pimeaari, âna câé caa tâmogòori Pwiduée, ba wà Pwiduée, âna é pimeaari.  
\v 9 \x - \xo 4:9 \xt Ioane 3.16\x*Â é paari ê pimeaari kêe ba kâjè. Ba é cùru me Pwina naîê na é caapwi co, naani gòropuu, ba na, gée gooé, âna o tà tâjè ê *âji wâro.  
\v 10 \x - \xo 4:10 \xt Roma 5.8–10; 1 Ioane 2.2\x*Wàéni ê âji pimeaari: Ê pimeaari kà Pwiduée ba kâjè, na é po dau maina awé jii ê pimeaari kâjè ba kêe. Ba é cùru me pwina Naîê, ba na é pwi *ârapwaailò na patâjii ê pâ èpà kâjè. 
\p  
\v 11 Tèpa âji béeò, wiàna é wàrapwiri cè pai meaarijè kà Pwiduée, â wâdé na jè pimeaarijè mwara.  
\v 12 \x - \xo 4:12 \xt Ioane 1.18; 1 Ioane 2.5\x*Nye ticè pwi jè âboro cèna é jèe côo Pwiduée [Caa]. Êco na, wiàna jè pimeaarijè, â é tâa goojè wà Pwiduée, â o tâbawêe naa goojè ê pimeaari kêe. 
\s2 Jè tâa goo Pwiduée â é tâa goojè 
\p  
\v 13 \x - \xo 4:13 \xt 2 Korénito 1.22; 1 Ioane 3.24\x*Jè tâmogòori pâ, jè tâa goo Pwiduée, â é tâa goojè. Ba é naa tâjè ê Nyuâaê Pwicîri kêe, na é wâro goojè.  
\v 14 Â jè jèe côo goro du âraporomeejè\f + \fr 4:14 \fq Jè jèe côo goro du âraporomeejè—\fl é, \fqa Bà jèe côo goro du âraporomeebà \ft (wà Ioane ma wà tèpa apostolo na rà côo wà Iésu na é wâro naa gòropuu).\f* pâ, é cùru Pwina naîê wà Caa, ba na *pwi a pa-udò pâ âboro gòropuu. Â bà *paâjupâraê ma inapàparié tà pàra tàpé. 
\p  
\v 15 Â wà pwi âboro na é inapàpari pâ, wà Iésu, âna é *Pwina naî Pwiduée, âna é tâa gooé wà Pwiduée, â wàé, âna é tâa goo wà Pwiduée.  
\v 16 Â gée goo kaa pwiri, âna jè tâmogòori pâ, é meaarijè wà Pwiduée, ba jè jèe cèikî naa goo ê pimeaari kêe bèepwiri. 
\p Wiàna é meaarijè wà Pwiduée, âna ba wàé kaa ê Pimeaari. Â wà pwi âboro na é wâro na pimeaari, âna é tâa goo Pwiduée, â é wâro gooé wà Pwiduée.  
\v 17 Wiàna tâbawêe naa goojè ê pimeaari kêe, â jè o pwacèwii Kériso, naa na ê pai wâro kâjè, naani gòropuu. Â o càcaa wâgotâjè naa na pwi Tòotù, na ée mwa pitèi ê gòropuu na.  
\v 18 Ê pimeaari na tâbawêe, âna é patâjii ê pai wâgotâjè. Â càcaa wâgotâjè wiàna é tâa goojè ê pimeaari. Ba wiàna wâgotâjè, âna pwacèwii na jè gére tapacîri ê wârimuru kâjè\f + \fr 4:18 \ft 3\+ord e\+ord* phrase—\fl é, \fqa Ê pai wâgotâjè, âna pwacèwii na jè pwa wârimuru.\f*; â càcaa tâbawêe ê pimeaari naa goojè. 
\s2 Jè wârori pimeaari 
\p  
\v 19 Wàijè, âna jè wârori ê pimeaari, ba é nye mara meaarijè béaa wà Pwiduée.  
\v 20 Â wiàna é ina cè pwi jè âboro pâ, é meaari Pwiduée, â é èpàri pwi a cèikî bée, âna é pwi a pwâ. Ba wà pwina câé caa meaari pwi bée na é côoê, â ée mwa wànau târa cè pai meaari kêe Pwiduée, na câé caa côoê?  
\v 21 \x - \xo 4:21 \xt Maréko 12.29–31\x*Ba wàéni ê pwina é tûâri tâjè wà Pwiduée, wàijè na jè meaarié: Wâdé na jè meaari tèpa cèikî béejè. 
\c 5  
\s1 Cèikî naa goo Pwina naî Pwiduée 
\p  
\v 1 \x - \xo 5:1 \xt 1 Ioane 4.15\x*Wà diri tàpé na rà cèikî pâ, wà Iésu, âna wàé pwi Kériso, [wà Pwina é me gée goo Pwiduée] âna rà tèpa naî Pwiduée. Â wà diri tàpé na rà meaari Pwiduée Caa, âna rà o meaari mwara wà tèpa naîê.  
\v 2 Â jè tâmogòori pâ, ûna jè meaari wà Pwiduée, ma pitêre dàra ê pwina é ina, â jè meaari mwara tèpa naîê.  
\v 3 \x - \xo 5:3 \xt Ioane 14.15,23–24\x*Ba [wiàna nümajè] na jè meaari wà Pwiduée, â jè o pitêre dàra ê pwina é ina. Â càcaa pwacoé ma jè pitêre dàra. 
\p  
\v 4 Ba wiàna jè tèpa naî wà Pwiduée, â jè piétò jii ê [èpà naa] gòropuu, gée goro ê cèikî kâjè [naa goo wà Iésu Kériso]!  
\v 5 Ba o wàilàapà na piétò jii ê [èpà naa] gòropuu? Nye êco wà pwina é cèikî pâ, wà Iésu âna é *Pwina naî Pwiduée. 
\s2 Tèpa 3 paâjupâra Pwina naîê 
\p  
\v 6 \x - \xo 5:6 \xt Ioane 1.29–34\x*Wà Iésu Kériso, âna paari pâ é Pwina naî Pwiduée\f + \fr 5:6 \fq Paari pâ, é Pwina naî Pwiduée—\ft Grec: \fqa É tèepaa.\f*, goro ê jawé bau ê domii. Càcaa goro co ê jawé, â nye goro ê jawé bau ê domii. Â ê Nyuâaê Pwicîri, âna é nye tà *paâjupâra ê pwiibà. Ba ê Nyuâaê Pwicîri, âna wàé ê \nd *âjupâra\nd*.  
\v 7 Êkaa na rà po âracié tèpa paâjupâra\f + \fr 5:7 \ft Pàra Tii Pwicîri naa na grec, âna rà ina pâ: \fv \ft 7\+fv*\fqa Ba rà âracié tèpa paâjupâra naa napwéretòotù—wà Caa, wà Popai, ma ê Nyuâaê Pwicîri.  rà tèpa âboro caapwi. \fv \ft 8\+fv*\fqa  rà âracié tèpa paâjupâra naa gòropuu—ê Nyuâaê Pwicîri, ê jawé ma ê domii.  rà pitêrerà wà tèpa âracié bèepwiri.\f*—  
\v 8 \x - \xo 5:8 \xt Ioane 15.26\x*ê Nyuâaê Pwicîri [na é patùrajè]; ma ê jawé [kâra *piupwaa kà Iésu]; ma ê domii kêe\f + \fr 5:8 \fq Jawé…ma ê domii kêe—\ft Ucina mwara goro ê piupwaa kâjè, ma ê dipâa na jè wâdo naa na Caanilo, ba naa pitaniimiri ê pai bà kêe.\f*, [na joro na é bà ba kâjè]. Â wà tèpa âracié bèepwiri, âna rà nye pitêrerà. 
\p  
\v 9 \x - \xo 5:9 \xt Ioane 5.32–37\x*Wiàna jè tòpi ê pai paâjupâra, na me gée goro âboro, â [wâdé na jè tòpi] ê pai paâjupâra na me gée goo Pwiduée, ba é nye piwéna. Â é nye paâjupâra kaa wà Pwina naîê.  
\v 10 \x - \xo 5:10 \xt Galatia 4.6\x* wiàna jè cèikî naa gooé, â jè mwa côoina pâ, ê popai gooé, âna é âjupâra\f + \fr 5:10 \fq  jè mwa côoina pâ, ê popai gooé, âna é âjupâra—\ft Grec: \fqa  tâa goojè ê bépaâjupâra.\f*. 
\p Êco na, wiàna câjè caa cèikî naa goo [Pwina naî] Pwiduée, âna jè câbapwâ Pwiduée, ba câjè caa tòpi ê pwina é ina goo wà Pwina naîê. 
\p  
\v 11 Jè tâmogòori pâ, ê pwina é ina naa gooé, âna \nd *âjupâra\nd*, ba é jèe naa tâjè ê *wâro dàra gòiri jaaé. Â ê wâro bèepwiri, âna wâgoo wà Pwina naîê.  
\v 12 \x - \xo 5:12 \xt Ioane 3.36\x*Üu, wà pwi âboro na é tâa gooé wà Pwina naîê, âna tâa gooé ê wâro bèepwiri. Â wà pwi âboro na câé caa tâa gooé wà Pwina naî Pwiduée, âna ticè *âji wâro gooé. 
\s1 Go pwa tii ba na cimwü cèikî kàwà 
\p  
\v 13 \x - \xo 5:13 \xt Ioane 20.31\x*Guwà tèpa cèikî naa goo Pwina naî Pwiduée. Â go pwa tii tàwà ni, ba na guwà tâmogòori bwàti pâ, jèe tà tàwà ê wâro dàra gòiri jaa Pwiduée.  
\v 14 \x - \xo 5:14 \xt Ioane 14.13; 1 Ioane 3.21–22\x*Wàéni gorodà na tà mwü ê cèikî kâjè naa goo Pwiduée. Ba jè tâmogòori pâ, é têre ê pwâra pwapwicîri kâjè, wiàna jè ilari jè muru naa na câbawâdé kêe.  
\v 15 Â wiàna jè tâmogòori pâ é têrejè, â jè tâmogòori mwara pâ, é jèe naa tâjè ê pwina jè ilari jiié! 
\s2 Câjè caa pwa taaci pwina èpà 
\p  
\v 16 \x - \xo 5:16 \xt Mataio 12.31\x*Wiàna gà côo pwi a cèikî béegà, na é pwa na èpà\f + \fr 5:16 \fq Na é pwa na èpà—\ft Napéaati naa na grec pâ: \fqa Na câé caa popaé naa na aubà {dàra gòiri}.\f*, â wâdé na gà pwapwicîri kêe, ba na tà têe ê âji wâro. Êco na pwa pwi jè èpà, na é nama é bà [dàra gòiri]\f + \fr 5:16 \fq Pwi jè èpà, na é nama é bà dàra gòiri—\ft Munaa ê pai ciburà naa càùjè naa goo Kériso (côo nee tii 12), ma pai ciburà tàutâjè na jè meaari tèpa béejè (côo 1 Ioane 3.14). Pwi pwâra bà bèepwiri, âna munaa pwâra bà dàra gòiri, wâiti jii Pwiduée, \fl é, \ft pwiri ê pai tubaèpà târa ê pai tâa kâjè ma wà Pwiduée, \fl é, \ft pwiri ê pwâra bà kâra naiiri âboro.\f* wà pwi jè âboro. Â câgo caa tacoo googà pâ, na gà pwapwicîri ba kêe, wiàna é tàgére pwa ê pwi èpà bèepwiri.  
\v 17 Ba êdiri pâ tûâ kâjè na càcaa *tàrù, âna wàépwiri ê èpà. Êco na càcaa diri pâ èpà na jè pwa, na rà nama jè bà. 
\p  
\v 18 \x - \xo 5:18 \xt 1 Ioane 3.9\x*Jè nye tâmogòori pâ, wàijè tèpa naî Pwiduée, âna câjè caa pwa taaci ê pwina èpà. Â wà *Caatana, wà Pwi âboro èpà, âna càcaa pâri ma é tubaèpà ê nyuâajè. Ba é wéaarijè wà Pwina naîê. 
\p  
\v 19 Â jè nye tâmogòori pâ, jè tèpa âboro kà Pwiduée. Â napwa naa goo diri [pàra tèpa âboro] gòropuu, âna [càra caa tèpa âboro kêe. Ba] é pitûâ kàra wà Pwi âboro èpà. 
\s2 Jè tâmogòori Pwiduée 
\p  
\v 20 Jè nye tâmogòori mwara pâ, é jèe tèepaa me wà Pwina naî Pwiduée. Â é jèe naa tâjè ê pai tâmogòorimuru, ba na jè tâmogòori wà Pwiduée, na é caapwi co. Â jè tâa goo wà Pwiduée, gée goo na jè tâa goo Iésu Kériso, Pwina naîê. Ba wàé Pwiduée na é caapwi co, â wàé mwara na é naa tâjè ê wâro dàra gòiri jaaé. 
\p  
\v 21 Â êkaa, co tèpa âji béeò, na guwà tétâjii diri pâ muru na pwa na rà popa autâa kà Kériso, naa na pwâranümawà\f + \fr 5:21 \fl É, \fqa Guwà tétâjii ê èpà gée na ê pwâranümawà, \fl é, \fqa Guwà tétâjii cè pâ ârapupûra na càcaa papwicîri wà Kériso. \ft Grec: \fqa Guwà piwéaariwà jii pâ ânuurumuru. \ft Côo mwara \fqa Ânuurumuru (Idole) \ft naa na Neeremuru \fqa (Vocabulaire) \ft naa pwâadàra tii.\f*.