\id TIT - Old Pohnpeian 
\h Titus 
\toc1 EN PAULUS A KISIN LIKAU ONG TITUS. 
\toc2 Titus 
\toc3 Tit 
\mt2 EN PAULUS A KISIN LIKAU ONG  
\mt1 TITUS.  
\c 1  
\p
\v 1 PAULUS ladun Kot o wanporon en Iesus Kristus amen, duen poson en me pilipildar en Kot akan o duen erpit en melel ong pai ren Kot;  
\v 2 O kaporoporeki maur soutuk, me Kot so likam inaukidar mon tapin kaua.  
\v 3 A ni a ansau a kotin kasansaledar a masan ki padak, me ko ong ia, duen kusoned en Kot atail Saunkamaur.  
\v 4 Ong Titus nai seri melel ni ata poson ta ieu: Mak o popol sang ren Kot Sam o Kristus Iesus atail Saunkamaur en mi re om!  
\v 5 Iet karepen ai kamodang uk edi Kreta, pwe koe en kapwaiada, me kaikenta wiauier o kasapwilada saunkoa kan ni kanim karos, due i kakaliki ong uk.  
\v 6 Saunkoa amen en indand mau, o warok en li ta men, o me na seri kan posonla, o so kaindandeki, me re kamom de sopeik.  
\v 7 Pwe pisop en pungla, duen saunkoa en Kot amen, der katiwo, der purianikom, der kamom wain, der pamara, der norok moni.  
\v 8 A ren apwali men kairu o pok ong me mau, o kanongama, o pung, o saraui, o makelekel.  
\v 9 Kolekoleta masan, me udan pung o koiok ong padak, pwen kak ong panauiki padak en kamaur o kapung ong me katiwo kan.  
\v 10 Pwe ir me toto me malaun o kapei lokaia o me kaweid sapung, iet eten, kisan men sirkomsais.  
\v 11 Me mau ong au ar en pinapinla, pwe re kin kawukila toun im toto, o me kin padapadaki, me sota mau, pweki moni.  
\v 12 Amen irail, pein arail saukop amen inda: Men Kreta me kalap likam, man sued o laualo, nain manga.  
\v 13 Kadede pot et me melel. Ari, i me koe en kapung kelail ong irail, pwe ren kelailada ni poson.  
\v 14 O ren der insenoki en Sus oko ar kasoi mal akan o kusoned en aramas akan, me muei sang melel.  
\v 15 Karos me kon ong makelekel akan, a sota me kon ong me samin o so poson akan, pwe arail lamelame o pil insen arail me samin.  
\v 16 Re kin inda, me re asa Kot, a ni ar wiawia kan re kin ponsasa i. Irail meid sued, o sopeik, o so koiok ong song en wiawia mau karos.   
\c 2  
\p
\v 1 A KOE en padapadakeki duen me kon ong lamalam en kamaur.  
\v 2 Padaki ong ol ma kan, ren der wukiwuk sili, a ren indand mau o ngenin, o kelail ni poson, o ni limpok, o ni kanongama.  
\v 3 Pil dueta li ma kan, ren wiawia duen me kon ong saraui kan, ren der likinekine der lidun wain, a ren saunpadak en me mau,  
\v 4 Pwe ren panaui li pulepul akan, en apapwali ar paud o pok ong nair seri kan.  
\v 5 Ren lelapok, min, apwali nan im ar akan, kadek, peiki ong ar warok kan, pwe masan en Kot ender lalauela.  
\v 6 Pil dueta manakap akan, panaui ir, ren lelapok.  
\v 7 Ni wiawia mau kan karos koe kasaleda pein uk kaalemongi mau amen, ni om padak melel o lelapok.  
\v 8 Kida padak en kamaur o namenokala, pwe me palian kitail en namenokala, o sota diar me sued kot men karaune kitail.  
\v 9 Padaki ong ladu kan, me ren peiki ong ar saumas ni meakaros ren kaperen ir ada, o ren der katiwo.  
\v 10 Ren der pirap, a irail en mau o melel ong irail, pwe ren kalinganada lamalam en Kot atail Saunkamaur ni meakaros.  
\v 11 Pwe mak en Kot pwarado kamaureda aramas akan karos.  
\v 12 O padapadaki ong kitail, me kitail en muei sang meakan me doo sang Kot o inong sued en sappa, ap lelapok, o pung, o dadaureta me kon ong ni sappa et.  
\v 13 O auiauiki kapor mau, o sansal lingan en atail Kot lapalap o atail Saunkamaur Kristus Iesus.  
\v 14 Me sokonpaudeki pein i ki kitail, pwen dore sang kitail sapung karos, o kamakelekel ong pein i aramas, me a pan sapwilim aneki, me kin nantiong wiawia mau karos.  
\v 15 Mepukat padake kida, o panauiki, o kapung kelail ong; sota amen me pan mamale kin uk.   
\c 3  
\p
\v 1 KATAMAN kin irail ren peiki ong monsap o me manaman akan, o ren apwali wiawia mau karos.  
\v 2 Der lalaue amen, der akamai, a en kamantik, o opampap ong aramas akan karos.  
\v 3 Pwe kitail pil pweipwei mas o, o sopeik, o salongala, o papa song en inong o madong sued akan, kokoa me sued, o peirin, pakailok, o kailongki amen amen.  
\v 4 A kalangan o limpok en Kot atail Saundor lao pwarado,  
\v 5 A kotin dore kitail la kaidin pweki pein atail wiawia pung, a pein a kupur ki paptais en kaipwi kap o kawilia kap ren Ngen saraui.  
\v 6 Me a kotin kupura dong kitail kaualap ren Iesus Kristus atail Saundor.  
\v 7 Pwe kitail en pung kila a mak, pwen sosoki maur soutuk duen at kaporopor.  
\v 8 Melel padak pot et o i men, koe en nantiong kaweweda, pwe irail, me posonla Kot, en kadoke kin ir wiawia mau, mepukat me mau o kon ong aramas akan.  
\v 9 A liki sang peidok mal akan, o padok en tiak kan, o akamai, o akamai ki kapung, pwe mepukat sota kadepa o me mal.  
\v 10 Aramas likin panau amen, panaui pan mepak de riapak ap muei sang i.  
\v 11 Pwe koe asa, me i me sapung o kin wia dip, a kadeikada pein i.  
\v 12 I lao kadar wong uk Artemas de Tikikus, koe madang dong ia, Nikopolis, pwe i kileledier me i pan kauson wasa o ni ansaun kapau.  
\v 13 Saunkawewe Senas o Apolos kadara dong ia madang. Sauasa ira, pwe ira de anane meakot.  
\v 14 O naitail akan en porisok o koiokki ong wiawia mau, pwe ren der so wa ’rail.  
\v 15 Karos, me mi re i, kin ranamau wong uk. Ranamau wong karos, me kin pok ong kit ni poson. Mak o en mi re omail karos!